ဗောဓိဂိုဏ်း၏အကြံအစဉ်

"မင်း ရောက်လာပြီပဲ"

ဘုန်းကြီးအိုသည် သူ၏မျက်ခွံများကို ဖြည်းညှင်းစွာ ပင့်လိုက်၏။ သူ၏အသံက သတ္တုများပွတ်တိုက်ကာထွက်ပေါ်လာသည့်အလား ကြားရသူကို မသိစိတ်အရမျက်မှောင်ကြုတ်သွားစေသည်။

"သန့်စင်သောကမ္ဘာအရှင်ရဲ့အမိန့်အရ အစစ်မှန် နတ်ဘုရားရဲ့ စိုးရိမ်ပူပန်မှုများကို ဖယ်ရှားပေးဖို့ ကျုပ် လာခဲ့တာပါ"

အစွန်းရှစ်ပါးချိုင့်ဝှမ်းက အတော်လေးထူးခြားသည်။ ထို့ကြောင့် ရှန်းယီ ဆရာတော်ကျစ်ခုန်းကို အတွင်းသို့ ခေါ်ဆောင်မလာခဲ့သကဲ့သို့ သူ၏ရှေ့ရှိ ဗောဓိသတ္တမှာ မည်သူဖြစ်ကြောင်းကိုလည်း မသိရှိပေ။

စကားနည်းလျှင် အမှားနည်းမည်ဖြစ်၍ သူ၏ရည်ရွယ်ချက်ကိုသာ ရှင်းပြလိုက်၏။

ဖယ်ရှားပေးဖို့ဟူသော စကားကို ကြားသောအခါ ဘုန်းကြီးအိုက နှုတ်ခမ်းကိုမသိမသာကွေးလိုက်သည်။ အပိုစကားများမဆိုတော့ဘဲ လိုရင်းကိုသာ တိုက်ရိုက် ပြောလိုက်၏။ "တောင်ပိုင်းဧကရာဇ် ဦးဆောင်တဲ့ မဟာနတ်ဆိုးကြီးသုံးကောင်က စုန့်ဖုန်းစီရင်စုမှာ အကြီးအကျယ်ရှုံးနိမ့်သွားတယ်။ တိုက်ပွဲတစ်ပွဲတည်းနဲ့ စတုတ္ထအဆင့် နတ်ဆိုးမသေမျိုး ရှစ်ကောင်တိတိ ကျဆုံးသွားတယ်။ ဒါကို မင်း သိရဲ့လား"

"ကျုပ် ကြားထားပါတယ်" ရှန်းယီ၏အမူအရာက တည်ငြိမ်နေဆဲပင်။

ဤစကားများကိုကြားပြီးနောက် ဗောဓိဂိုဏ်း၏ရည်ရွယ်ချက်များကို သူအကြမ်းဖျင်း သိရှိသွားသည်။

"မင်း သိထားရင် ရပါပြီ"

ဘုန်းကြီးအိုက ကျစ်ခနဲစုပ်သပ်လိုက်ပြီး တည်ငြိမ်စွာဆိုသည်။ "ဒီကိစ္စ ဖြစ်ပြီးတဲ့နောက် အဲဒီ မဟာနတ်ဆိုးကြီး သုံးကောင်က ငါတို့ ဂိုဏ်းနဲ့ အဆက်အသွယ် ဖြတ်သွားတယ်။ ဘာအားထုတ်မှုမှ မလုပ်ဘဲအကျိုးအမြတ်ရဖို့ နောက်ကွယ်မှာ ပုန်းနေကြတယ်"

"သန့်စင်သောကမ္ဘာဗောဓိသတ္တက ကရုဏာကြီးမားလို့ သူတို့ကိုနောက်ထပ် အခွင့်အရေးတစ်ခု ပေးချင်နေတာ"

"သူတို့ရဲ့ဆုံးရှုံးမှုများကို အစားထိုးပေးရုံသာမက ပိုပြီးတော့တောင် ပေးလျော်ချင်နေတယ်။ ဒါက ငါတို့ ဒီကိုလာရတဲ့ ရည်ရွယ်ချက်ပဲ"

ဤစကားကိုကြားသော်လည်း ရှန်းယီက မည်သည့် ထူးခြားမှုကိုမျှ မပြသပေ။ "သူတို့ကို ဘယ်လိုများ ပေးလျော်ဖို့ စီစဉ်ထားသလဲ"

"အစွန်းရှစ်ပါးချိုင့်ဝှမ်းမှာ တတိယအဆင့်နတ်ဆိုးအရှင်နှစ်ပါး ရှိတယ်။ ဒီငရဲလိုနေရာကနေ ထွက်သွားနိုင်အောင် သူတို့ထဲက တစ်ပါးနဲ့ ငါ စကားပြောထားပြီးပြီ။ ဒါပေမယ့် မင်း ရောက်လာပြီဆိုတော့ သူတို့နှစ်ပါးလုံးနဲ့အတူ ထွက်သွားနိုင်လိမ့်မယ်"

ဘုန်းကြီးအို၏စကားများက မည်သည့် ဖုံးကွယ်မှုမျှမရှိခဲ့ပေ။

နတ်ဘုရားမင်းဆက်နှင့် ပြောင်းလဲလာသော ဆက်ဆံရေးများအပေါ်နားမလည်ဘဲ ဇဝေဇဝါ ဖြစ်နေသည့် တပည့်အချို့ ဗောဓိဂိုဏ်းတွင် ရှိနေနိုင်သေးသည်။ သို့သော် ပေလျိုမြစ်အပြင်ဘက်တွင် တိုက်ပွဲအကြီးအကဲထဲပါဝင်ခဲ့သော ကျားနဂါးဖိနှိပ်ခြင်းမဟာအလင်းဘုရင်၊ ယခု ကျားနဂါးဖိနှိပ်ခြင်း ဗောဓိသတ္တတော့ ၎င်းတို့ထဲတွင် လုံးဝ ပါဝင်မည် မဟုတ်ပေ။

အမှန်ပင် ရှန်းယီ၏မျက်လုံးများတွင် အံ့အားသင့်သည့် အရိပ်အယောင်မျှမရှိဘဲ ပိုမို လေးနက်သော အကြည့်သာ ရှိသည်။ "အစစ်မှန်နတ်ဘုရားကရော ဘယ်လိုလဲ"

"မူလကတော့ သန့်စင်သောကမ္ဘာဗောဓိသတ္တက ငါ့ကို ဗုဒ္ဓရတနာတစ်ခု ချီးမြှင့်ထားပြီး ဒီကိစ္စကို တိတ်တဆိတ်ပြီးမြောက်အောင် လုပ်ဖို့ ရည်ရွယ်ထားတာပါ"

ဘုန်းကြီးအိုသည် သူ၏လက်ဖဝါးကို အသာအယာပင်ဖြန့်ပြလိုက်သည်။ ဘယ်ဘက်လက်တွင် အရုပ်တစ်ရုပ်ရှိနေပြီး ညာဘက်လက်ချောင်းများကြားတွင် သံချေးတက်နေသော အပ်တစ်ချောင်းကို ကိုင်ထား၏။

အရုပ်၏ကျောဘက်တွင်မျက်နှာတစ်ခုလုံး နီးပါးကို ပန်းထိုးထားသည်။ "ဒါပေမယ့် အခု ကျားနဂါးဖိနှိပ်ခြင်းဗောဓိသတ္တ ကူညီနေပြီဆိုတော့ သိပ်ပြီး ဒုက္ခများမှာမဟုတ်တော့ဘဲ ရှေ့တည့်တည့်ကနေ တိုက်ရိုက်ကိုင်တွယ်လို့ ရနိုင်ပါပြီ"

သူ ကြိုတင် ခန့်မှန်းထားခဲ့သော်လည်း ဤစကားများကို အမှန်တကယ်ကြားလိုက်ရသောအခါ ရှန်းယီက တစ်ခဏတာ တိတ်ဆိတ်သွားသည်။

ဆက်တိုက်ရှုံးနိမ့်မှုများ ကြုံတွေ့ပြီးနောက်တွင်လည်း လမ်းစဉ်သုံးသွယ်က နတ်ဘုရားမင်းဆက်ကိုသာပစ်မှတ်ထားနေဆဲ ဖြစ်မည်ဖြစ်ပြီး သူတို့၏နည်းလမ်းများကလည်း ယခင်ကထက် သေချာပေါက် ပိုမိုရက်စက်ကြမ်းကြုတ်လာမည်ဟု သူ ထင်ထားခဲ့သည်။

သို့သော် ဤဘုန်းကြီးများက အစစ်အမှန်နတ်ဘုရားဂိုဏ်းကိုပစ်မှတ်ထားရဲမည်ဟု သူမမျှော်လင့်ထားခဲ့ပေ။

ကောင်းကင်တာအို၏ပြယုဂ်များ၊ မသေမျိုးခုံရုံး၏ တရားဝင် အရှင်သခင်များဖြစ်သည်။

ဤအစစ်မှန်နတ်ဘုရားအုပ်စုက မိုးကောင်းကင်နှင့် မြေပြင် စတင်ဖြစ်တည်ကတည်းက တည်ရှိနေခဲ့ခြင်းဖြစ်ပြီး ကျန်ရှိသော ဂိုဏ်းနှစ်ခုမှာ ကူညီပံ့ပိုးသူများမျှသာဖြစ်သည်။

ယခုကြည့်ရသည်မှာ ဗောဓိဂိုဏ်း၏ ရည်မှန်းချက်က သာမန်လူများ၏စိတ်ကူးထက် ကျော်လွန်နေပုံ ရသည်။

"ကောင်းကင်တာအိုရဲ့ပြယုဂ် ဖြစ်နေပြီး အသေးအဖွဲကိစ္စတွေမှာ မပါဝင်ချင်ဘူး ဆိုမှတော့ အဲဒီနေရာကို ဆက်မယူထားသင့်ဘူး။ ပွင့်ပွင့်လင်းလင်းပြောရရင် ကောင်းကင်နိယာမဆိုတာ ပစ္စည်းတစ်ခုပါပဲ။ ပစ္စည်းတစ်ခု ဖြစ်တဲ့အတွက် တစ်စုံတစ်ယောက်ကကိုင်ဆောင်ထားသင့်တာပါ"

ရှန်းယီ၏အံ့အားသင့်မှုကို ဘုန်းကြီးအို သတိပြုမိပြီး သူ၏ အပြုံးတွင်မောက်မာမှု အနည်းငယ် ပိုမို ပါဝင်လာသည်။ "စိုးရိမ်စရာ မလိုပါဘူး။ သွေးတစ်စက်ကနေပြန်လည်မွေးဖွားတယ် ဆိုတာလည်း အချိန်ယူရတာပဲ။ သူတို့ ပြန်လည် ရှင်သန်လာတဲ့ အချိန်ကျရင်အခြေအနေ အရပ်ရပ်က တည်ငြိမ်သွားပြီးကပ်ဘေးလည်း ပြီးဆုံးသွားလောက်ပြီ။ အဲဒီအချိန်ကျရင် ကောင်းကင်က ဘယ်လောက်ပဲ မြင့်မြင့်ငါတို့ ဂိုဏ်းက ကောင်းကင်ထက်ပိုမြင့်နေမှာပါ။ ဘာကို ကြောက်စရာ လိုသေးသလဲ"

ကူညီပံ့ပိုးသူများလော။

ချီသန့်စင်သူများနှင့် လောကခရီးသည်များသည် လမ်းကြောင်းကို စူးစမ်းရှာဖွေနေဆဲ အချိန်က သူတို့က သဘာဝအလျောက် ဤအစစ်မှန်နတ်ဘုရားများအတွက်အလုပ်အကျွေး ပြုရန်သာ တတ်နိုင်ခဲ့သည်။

သို့သော် အချိန်များကုန်လွန်လာသည်နှင့်အမျှ ယခုအခါ လမ်းစဉ်သုံးသွယ်မှ ခေါင်းဆောင်သုံးပါးပင်လျှင် ကောင်းကင်တာအိုကို ထိုးသွင်းရောက်နိုင်ခဲ့ပြီ ဖြစ်သည်။

ဗုဒ္ဓသုံးပါးကလည်း လောကီရေးရာများကို သိမြင်နားလည်ခဲ့ပြီဖြစ်သည်။ သူတို့ ခြောက်ပါးအနက် နှစ်ပါးမှာ ကန့်သတ်ချက်ကိုကျော်လွန်၍ ခြေလှမ်းတစ်လှမ်း လှမ်းနိုင်ခဲ့ပြီဖြစ်သည်။

၎င်းနှင့် ဆန့်ကျင်ဘက်အနေဖြင့် အစစ်မှန်နတ်ဘုရားများမှာ ယခင်အတိုင်းသာရှိနေပြီး မည်သည့် တိုးတက်မှုကိုမျှ မပြသနိုင်ခဲ့ပေ။

ဤရာထူးနေရာကို ပြောင်းလဲရမည့် အချိန် ရောက်လာပြီ ဖြစ်သည်။

"..."

ဘုန်းကြီးအို ကျေနပ်စွာပြုံးရယ်နေသည်ကို ရှန်းယီက တိတ်ဆိတ်စွာစောင့်ကြည့်နေ၏။ အချိန်အနည်းငယ်ကြာပြီးနောက် သူလည်းညင်သာစွာ ရယ်မောလိုက်သည်။

"လက်တစ်ထောင်ဗောဓိသတ္တ အကြောင်းကို ကျားနဂါးဖိနှိပ်ခြင်းဗောဓိသတ္တ သိလောက်ပါတယ်"

ဘုန်းကြီးအိုက နောက်ဆုံးတွင် သစ်ပင်ထိပ်မှ ဆင်းလာပြီး စကားတစ်လုံးချင်းစီ ပြောလိုက်သည်။ "အဲဒီ ဗောဓိသတ္တကျဆုံးသွားကတည်းက ဒီမဟာကပ်ဘေးက ကွဲပြားသွားခဲ့ပြီ။ ဘေးကနေ ထိုင်ကြည့်နေလို့ ရမယ်လို့ တစ်ချိန်က ထင်ခဲ့ဖူးတဲ့ မင်းနဲ့ငါတို့တောင်တစ်နေ့ကျရင် အသက်ဆုံးရှုံးသွားနိုင်တယ်။ အဲဒီလိုဆိုမှတော့ ဘာလို့ ရဲရဲတင်းတင်းမလှုပ်ရှားရမှာလဲ"

"အဲဒီ မသေမျိုးဧကရာဇ်နေရာက ကန့်သတ်ချက်တချို့ကိုယူဆောင်လာနိုင်ပါတယ်။ ဒါပေမယ့် ဘယ်လိုပဲဖြစ်ဖြစ် အဲဒါက ပထမအဆင့်ဖြစ်ပြီး ကောင်းကင်စည်းစိမ်ကိုထာဝရ ခံစားရမှာပါ"

ယခင် တတိယအဆင့် ကျွမ်းကျင်သူများအားလုံးက သူတို့၏တွက်ချက်မှုများကို ပြုလုပ်နေကြသည်။

သူတို့၏အလွန်အမင်းရှည်လျားသော သက်တမ်းများကြောင့် ကပ်ဘေးအတွင်း ပါဝင်ပတ်သက်ရခြင်းမှာ အမှန်တကယ်ပင်မထိုက်တန်လှပေ။

မည်သို့ပင်ဆိုစေ မည်သူနိုင်သည်ဖြစ်စေ ရှုံးသည်ဖြစ်စေ၊ ထိုလူသားဧကရာဇ်အစားထိုးခံရသည်နှင့် နတ်ဘုရားမင်းဆက်၏အချိန်ကြာမြင့်စွာ စုဆောင်းထားသောအရင်းအမြစ်များကို အဆင့်နှင့် အောင်မြင်မှုအလိုက်သေချာပေါက် ခွဲဝေပေးပါလိမ့်မည်။

သူတို့သည် ဒြပ်စင်ငါးပါးကို ကျော်လွန်၍ မသေမျိုးဒုတိယအဆင့်သို့ တက်လှမ်းရန် ဤပေါများလှသော ဧကရာဇ်ချီကို အခွင့်ကောင်းယူရန်သာ လိုအပ်သည်။ ထို့နောက် ပထမအဆင့်ဆီသို့ သွားရာလမ်းကိုဖြည်းညှင်းစွာ စူးစမ်းလေ့လာနိုင်၏။

နှေးကွေးကောင်း နှေးကွေးနိုင်သော်လည်း ၎င်းမှာ လုံခြုံပြီး လွတ်လပ်မှုရှိသည်။

သို့သော် လက်တစ်ထောင် ဗောဓိသတ္တ၏ကျဆုံးမှုက ဤအတွေးများကို ရိုက်ချိုးပစ်လိုက်၏။

တာ့လော်မသေမျိုးအရှင်များ နှင့် ဗောဓိသတ္တများ ဖြစ်လျှင်ပင်သေဆုံးနိုင်သည်။ ကပ်ဘေး ဆက်လက်ဖြစ်ပွားနေသရွေ့ စိုးရိမ်ပူပန်မှုကင်းသောလုံခြုံမှုဆိုတာ ရှိမည် မဟုတ်ပေ။

ဤကဲ့သို့ အန္တရာယ်များသော အခြေအနေများတွင် ပြဿနာများကြားသို့ အတင်းအကျပ်တွန်းပို့ခံရမည့်အစားတက်ကြွစွာ တိုက်ခိုက်ပြီး ဦးဆောင်သူနေရာဆုပ်ကိုင်ထားခြင်းက ပိုကောင်းသည်။

"ငါ့ရဲ့ဓမ္မအမည်က အရပ်ငါးမျက်နှာလို့ ခေါ်တယ်။ ဒီကို ရက်အနည်းငယ် စောပြီး ရောက်လာခဲ့တာပါ။ ကျားနဂါးဖိနှိပ်ခြင်းဗောဓိသတ္တကို ငါ့ရဲ့ ခြေလှမ်းတွေနောက်ကနေ အနီးကပ်လိုက်ခဲ့ဖို့နဲ့ လမ်းမလွဲသွားဖို့ တောင်းဆိုပါတယ်"

"ထွက်သွားပြီးတဲ့နောက်မှာ အောင်မြင်မှုကို ညီတူမျှတူ ခွဲဝေယူကြတာပေါ့" အရပ်ငါးမျက်နှာ ဗောဓိသတ္တက နက်ရှိုင်းသော အကြည့်ဖြင့် ကြည့်လိုက်ပြီးနောက် ရှေ့မှ ဦးဆောင်သွားသည်။

"..."

ရှန်းယီ၏အကြည့်က တစ်ဖက်လူ၏လက်ထဲရှိ ဗုဒ္ဓရတနာပေါ်သို့ ကျရောက်သွားသည်။ သာမန်ပုံပေါက်နေသော ထိုအရာဝတ္ထုထံမှ အန္တရာယ်ရှိသောအရှိန်အဝါအချို့ ထွက်ပေါ်နေ၏။

ဗောဓိဂိုဏ်းက သူ့ကို အပြည့်အဝမယုံကြည်ကြောင်း ထင်ရှားသည်။

အစစ်မှန်နတ်ဘုရားနှင့် ပတ်သက်သည့် ကိစ္စရပ်များတွင် အသစ်တက်လာသော ဗောဓိသတ္တ တစ်ပါးအနေဖြင့် လွတ်လပ်စွာ လုပ်ဆောင်ခွင့် ရှိရန်မှာ အလွန်ခက်ခဲသည်။

ထိုအတွေးဖြင့် ရှန်းယီက နောက်မှလိုက်ရန် တိတ်ဆိတ်စွာ ရှေ့သို့လှမ်းသွားသည်။

...

အစွန်းရှစ်ပါးချိုင့်ဝှမ်း

နတ်ဘုရားများ၏ရှေ့တွင် ဆယိယ်ကျန်း အမြင့်ရှိသော ရွှေရောင်ခန္ဓာကိုယ်ကြီး ရှိနေသည်။ မသေမျိုး စစ်သူကြီးတစ်ဦးအနေဖြင့် ချင်းဟွာက ဤနယ်မြေကို စုံစမ်းစစ်ဆေးရန် တာဝန်အောင်မြင်နိုင်ရေးအတွက် အောက်ခြေဘဝမှ စုဆောင်းလာခဲ့သောပါးနပ်မှုကို အားကိုးခဲ့ရ၏။