ရှန်းရွှီဘိုးဘေးကို စော်ကားရဲတယ်လား ဒါဆို ဗုဒ္ဓလမ်းစဉ် အကွက်နည်းနည်းကျွေးပေးမယ်

"ပွင့်ပွင့်လင်းလင်းပြောပြရင် ပိုကောင်းမယ်" အရပ်ငါးမျက်နှာဗောဓိသတ္တ၏မျက်နှာက တဖြည်းဖြည်း အေးစက်သွား၏။

"သတ်မလို့" ရှန်းယီက တိတ်ဆိတ်စွာရှေ့သို့ ခြေတစ်လှမ်း လှမ်းလိုက်သည်။

"ဘယ်သူ့ကို သတ်မှာလဲ" အရပ်ငါးမျက်နှာ ဗောဓိသတ္တ၏နားထင်များက လျင်မြန်စွာတုန်ခါလာ၏။

ရှန်းယီက တိုးညှင်းစွာသက်ပြင်းချလိုက်ပြီး သူ၏ လက်ဝါးကိုဖြည်းညှင်းစွာမြှောက်ကာ ကောင်းကင်ယံမှ ဗောဓိသတ္တ နှင့် တောင်အောက်ရှိ ခြေတစ်ထောင် အနက်ရောင်နဂါးနှစ်ကောင်ကို လွှမ်းခြုံလိုက်သည်။

"ခင်ဗျားနဲ့ သူတို့ကိုပဲ" စကားသံဆုံးသည်နှင့် တပြိုင်နက်အစီအစဉ်အားလုံးကို ထိန်းချုပ်နိုင်သည်ဟု ယုံကြည်ထားသော အရပ်ငါးမျက်နှာ ဗောဓိသတ္တ၏မျက်နှာပေါ်တွင် ရက်စက်သော အမူအရာတစ်ခု ပေါ်လာသည်။

သူက ဤနေရာတွင် အချိန်ကြာမြင့်စွာကြံစည်ခဲ့သော်လည်း ရူးသွပ်နေသည့် လူတစ်ယောက်ကြောင့် ပြဿနာပေါ်ပေါက်လာလိမ့်မည်ဟု ဘယ်သောအခါမျှ မမျှော်လင့်ခဲ့ပေ။

ဗောဓိဂိုဏ်းက ဆုံးဖြတ်ချက်ချမှတ်ပြီး ဖြစ်သည်။ ဗောဓိသတ္တတစ်ပါးဖြစ်သည့် ပြိုင်ဘက်က သူနှင့် တစ်လှေတည်းစီးမည့်သူ ဖြစ်သင့်ပေသည်။

သို့သော် ယခုအခါတွင်မူ သူတို့က အကြောင်းပြချက်မရှိဘဲ ဆန့်ကျင်ဘက်တွင် ရပ်တည်နေကြ၏။

မှောက်ကျသွားသော ငှက်သိုက်အောက်တွင် အကောင်းပကတိရှိသော ဥများ ရှိနေမည်ဟု တကယ် ထင်နေပုံရသည်။

"အသက်ရှင်ချင်ရင် တတ်နိုင်သလောက် ကြိုးစားကြ"

"သုံးယောက်နဲ့ နှစ်ယောက်ဆိုတော့ ငါ့ဘက်မှာ အသာစီးရနေပြီ"

ဒေါသတကြီး ဟိန်းဟောက်လိုက်ပြီးနောက် ဘုန်းကြီးအိုက သူ၏လက်ကို ရုတ်တရက် ဝှေ့ယမ်းလိုက်၏။

အရှေ့ အနောက် တောင် မြောက်နှင့် အလယ် ဟူသော အရပ်ငါးမျက်နှာတွင် အလံငါးခု မြေ၌ စိုက်ဝင်သွားသည်။ ၎င်းတို့က ဗုဒ္ဓရတနာများ မဟုတ်ဘဲ သူ၏အသီးအပွင့်စွမ်းအင်များပင် ဖြစ်သည်။

"ကောင်းတယ် ကောင်းတယ်၊ မင်းက အဲဒီ ချင်းလွမ်ထက် အများကြီးပိုဖြောင့်မတ်တယ်၊ ငါ့ကို စိတ်မပျက်စေခဲ့ဘူး" ဤမျှော်လင့်မထားသော အခြေအနေကြောင့် ချီဖုန်းက ဝမ်းသာအားရ ဖြစ်သွားကာ ချက်ချင်းပင်ခွန်အားများ ပြည့်ဝလာသကဲ့သို့ ခံစားလိုက်ရ၏။

သူတို့ဘက်တွင် လူနည်းနေသော်လည်း ပြိုင်ဘက် ဝူဟွိုင်မှာ ဒဏ်ရာရနေသဖြင့် သူ၏ဘက်တွင် အနိုင်ရနိုင်ခြေများစွာ ရှိနေသည်။

"ငါက နှစ်ကောင်ကို တာဝန်ယူမယ်၊ မင်းက ဒဏ်ရာရနေတဲ့ နဂါးနတ်ဆိုးကို သွားသတ်လိုက်" ထိုသို့ ပြောဆိုပြီးနောက် သူက လေထဲသို့ ချက်ချင်းပျံတက်သွားပြီး အဆုံးအစမရှိ ကျယ်ပြောလှသော အစွန်းရှစ်ပါးချိုင့်ဝှမ်းတစ်ခုလုံးကို တုန်ခါသွားစေသောပြင်းထန်သည့် လေပြင်းတစ်ခုအလား လှုပ်ရှားသွား၏။

သို့သော် ချီဖုန်းမမျှော်လင့်ထားသောအရာမှာ ရှန်းယီက သူ့စကားကိုမကြားလိုက်သည့်အလား ဖြစ်နေပြီး ထိုလူငယ်လေး၏အရှိန်က သူ့ထက်ပင် ပိုမို မြန်ဆန်နေခြင်းပင်။

အနက်ရောင် ဝတ်ရုံက နေရာလွတ်ထဲသို့ ပေါင်းစပ်သွား၏။

သူ ထပ်မံပေါ်လာချိန်တွင် ထူထဲသော ရွှေရောင် အရိပ်လက်တစ်ဖက်က ဝူဟွိုင်ကို ပြင်းထန်စွာ ဖမ်းဆုပ်လိုက်ပြီးဖြစ်သည်။

နဂါးအိုကြီးမှာ ဒဏ်ရာရထားပြီးအဆင်သင့် မရှိသောကြောင့် နတ်ဆိုးစွမ်းအားများ ကောင်းကင်သို့ တဟုန်ထိုးထွက်ပေါ်နေသော်လည်း ချုပ်နှောင်မှုမှ လွတ်မြောက်နိုင်ခြင်း မရှိပေ။

သူ့ကို ထိုလက်ကကောင်းကင်သို့ ပစ်ပေါက်လိုက်ပြီး ဓားသွားကဲ့သို့ ထက်မြက်သော ခြေတံထောင်ပေါင်းများစွာနှင့်အတူ ဧရာမ ခန္ဓာကိုယ်ကြီးကကြာပွတ်တစ်ခုအလား အရပ်ငါးမျက်နှာ ဗောဓိသတ္တဆီသို့ ပြင်းထန်စွာ ရိုက်ခတ်လိုက်၏။

"ငါ့ကို အထင်သေးတာလား" ချီဖုန်းက လက်သီးကို တင်းကျပ်စွာ ဆုပ်ကိုင်လိုက်ပြီး သူ၏အမူအရာက အနည်းငယ် ထူးဆန်းနေသည်။

ချင်းလွမ်နှင့် အပြန်အလှန်တိုက်ခိုက်ခဲ့သော လူငယ်လေးက ဤကဲ့သို့ပင် တူညီသောနယ်ပယ်ရှိ ပြိုင်ဘက်နှစ်ဦးကို ချက်ချင်းလုယူသွားလိမ့်မည်ဟု သူ မထင်ခဲ့ပေ။

သူက နောက်ဆုံးကျန်ရှိနေသော ဝူဟွမ်းကိုသာ အာရုံစိုက်နိုင်တော့၏။

ဤနတ်ဘုရားအရှင်က ရှေ့သို့ တိုးသွားချိန်တွင်ကောင်းကင်မှ နောက်ထပ်အက်ကွဲနေသော ရူးသွပ်သည့် ရယ်မောသံတစ်ခု ပဲ့တင်ထပ်လာသည်။

"မင်းတို့က ဒီဘိုးဘေးကို စော်ကားရဲတယ်ပေါ့၊ သေဖို့သာ ပြင်ထားတော့" စကားသံ ထွက်ပေါ်လာသည်နှင့်အတူ ထူထပ်သော မီးခိုးရောင်မြူခိုးများက ရူးသွပ်နေသော နဂါးတစ်ကောင်အလား ရုတ်တရက်ပေါ်ထွက်လာပြီး ကျန်ရှိနေသော ခြေတစ်ထောင် အနက်ရောင်နဂါးကို ချက်ချင်း ဝါးမြိုသွား၏။

ဘုန်း

ချီဖုန်းနတ်ဘုရားစစ်သူကြီးက တောင်ကို အပိုင်းပိုင်းအစစဖြစ်အောင်ရိုက်ခွဲပစ်လိုက်သော်လည်း သူ၏အောက်တွင် မည်သည့် သက်ရှိသတ္တဝါမျှ မရှိတော့ပေ။

သူက နှုတ်ခမ်းထောင့်ကို တွန့်လိုက်၏။

"..."

ယခုလေးတင် မြင်တွေ့ခဲ့ရသော မြင်ကွင်းက ရင်းနှီးနေသည့် ထိုက်ရွှီနည်းလမ်းများနှင့် အလွန် ဆင်တူနေ၏။

ခြေတစ်ထောင်အနက်ရောင်နဂါးကို ယှဉ်ပြိုင်နိုင်စွမ်းရှိသူမှာ မဟာတောင်ပိုင်းတိုက်ကြီးတစ်ခုလုံးတွင် ရှန်းရွှီဘိုးဘေးသာ ရှိသည်။

ဤအချက်က လူငယ်လေးက ထိုက်ရွှီဆေးဧကရာဇ်ဖြစ်သည်ဟူသော အချက်ကို အတည်ပြုပေးသကဲ့သို့ဖြစ်ပြီး အနည်းငယ် အဓိပ္ပာယ်ရှိသွားစေ၏။

သို့သော် ရှန်းရွှီဘိုးဘေးက အဘယ်ကြောင့် အခြားသူ၏အမိန့်ကို နာခံနေသနည်း။

ချီဖုန်းက ကောင်းကင်ရှိအနက်ရောင် ဝတ်ရုံကို နောက်တစ်ကြိမ် လှမ်းကြည့်လိုက်ပြီး သူ၏မျက်နှာအမူအရာက အလွန်ထူးဆန်းနေပါသည်။

ရှန်းရွှီတောင်၏ဘိုးဘေးက အမှန်တကယ်တော့ ဗောဓိဂိုဏ်းမှ ဗောဓိသတ္တတစ်ပါးဖြစ်နေသည်လော ဟုသူတွေးတောနေမိ၏။