အခန်း (၁၀၉-၁၁၀)

အခန်း ၁၀၉ - အရှက်မရှိသော လူယုတ်မာ

ရှုစီဝင်သည် ရုံးတွင်းရေးရာများကို တာဝန်ယူထားရသည့် လက်ထောက်ညွှန်ကြားရေးမှူး ဖြစ်၏။ ဆေးပစ္စည်းများ ဝယ်ယူခြင်းက သူ၏ တာဝန်မဟုတ်ဘဲ အတင်းလုယူနေသလိုပင်။

တကယ်လို့ သူ့မှာ နန်းတော်ကို အလုပ်အကျွေးပြုချင်တဲ့စိတ်နဲ့ ပြည်သူ့ဝန်ဆောင်မှုမှာ ကြိုးစားချင်တဲ့စိတ် တကယ်ရှိတယ်ဆိုရင် ပြီးခဲ့တဲ့အကြိမ်က ပိုက်ဆံမရှိလို့ ခက်ခဲနေတုန်းက ဘာလို့ နန်းတော်အတွက် ဆေးပစ္စည်းတွေ ဝယ်မပေးခဲ့တာလဲ။

ယခုအခါ ပိုက်ဆံလည်းရှိပြီး အလုပ်ကလည်း လွယ်ကူနေမှသာ လုယူရန် ရောက်လာခဲ့သည်။

ဒါက အခက်အခဲကို ရှောင်လွှဲပြီး အကျိုးအမြတ်ကိုပဲ လုယူတဲ့ ပုံမှန် အပြုအမူမျိုး ပင် ဖြစ်၏။

ရှုစီဝင်၏ အပြုအမူကြောင့် ဝူကျိရှန်းသည် အလွန် မကျေမနပ် ဖြစ်သွားပြီး ချက်ချင်းပင် ပြန်လည် တုံ့ပြန်လိုက်သည်၊၊

"လက်ထောက်အရာရှိ ရှု... ဆေးပစ္စည်းတွေ ဝယ်ယူဖို့က ငါ့ရဲ့ တာဝန်မဟုတ်ဘူးလား"

"ဒါက လက်ထောက်အရာရှိ ဝူရဲ့ တာဝန်ဖြစ်တာမို့ ကျွန်တော်လည်း စည်းကျော်ပြီး မလုပ်သင့်ပါဘူး။ ဒါပေမဲ့ ခုနတင်ပဲ လက်ထောက်အရာရှိ ဝူကိုယ်တိုင်က ဒီတာဝန်ကို မယူချင်ဘူးလို့ ပြောခဲ့လို့ ကျွန်တော်က ကိုယ့်သဘောနဲ့ကိုယ် ကူညီပေးတာပါ"

"မင်းရဲ့ ကူညီပေးမှုလား။သွားလိုက်စမ်းပါ။ မင်း အစောကြီးကလည်း ကူညီမပေးဘူး၊ နောက်ကျမှလည်း ကူညီမပေးဘူး။ ဒီအလုပ်က လွယ်ကူမှန်း သိတဲ့အချိန်ကျမှ ကူညီပေးတယ် ဟုတ်လား။ မင်းက ငါ့ရဲ့ အောင်မြင်မှုကို သိသိသာသာကြီး လုယူချင်နေတာပဲ"

"တော်ကြစို့၊ တော်ကြစို့"

သခင်ကြီး ချင်းကျန့်ယုံက ဘာမှမဖြစ်သကဲ့သို့ အမူအရာဖြင့် ပြောသည်၊၊

"မင်းတို့ နှစ်ယောက်လုံးက ငါ့ရဲ့ ဆေးဝါးစီမံခန့်ခွဲရေးဌာနက အရာရှိတွေပဲဟာ။ ဘယ်သူပဲ ကိုင်တွယ် ကိုင်တွယ် ကိစ္စမရှိပါဘူး"

"လက်ထောက်အရာရှိ ဝူက လွန်ခဲ့တဲ့အကြိမ်က ဆေးပစ္စည်းဝယ်တဲ့ တာဝန်ကို အလွန် စိတ်ချရအောင် ကိုင်တွယ်ခဲ့ပြီးပြီ။ လက်ထောက်အရာရှိ ရှုကတော့ ရုံးတွင်းရေးရာတွေကိုပဲ အထူးပြုလုပ်ရလို့ အပြင်အလုပ်တွေကို ကိုင်တွယ်ရတာ နည်းတယ်။ ဒါကြောင့် သူ့ကို အတွေ့အကြုံရအောင် အခွင့်အရေး ပေးသင့်တယ်လို့ ငါထင်တယ်"

ရှုစီဝမ်သည် ချင်းကျန့်ယုံကို အမြဲတမ်း ဖားတတ်ပြီး သူ၏ အထက်လူကြီးကို အားရပါးရ မြှောက်ပင့်ကာ အလိုလိုက်တတ်သဖြင့် ချင်းကျန့်ယုံက သူ့ဘက်က ရပ်တည်ပေး နေ၏။

ဝူကျိရှန်းသည် ပြီးခဲ့သည့်အကြိမ်က ဆေးပစ္စည်းဝယ်ယူသည့် တာဝန်ကို ကောင်းမွန်စွာ ကိုင်တွယ်ခဲ့သည်။

ဌာန၏ အကြီးအကဲဖြစ်သူ ချင်းကျန့်ယုံသည် တခြား အရည်အချင်း မရှိသော်လည်း လက်အောက်ငယ်သားများကို ထိန်းချုပ်သည့် အတတ်ပညာ ကိုမူ ကောင်းစွာ နားလည်ထား၏။ သူသည် မည်သည့် လက်အောက်ငယ်သားကိုမျှ ထင်ပေါ်ကျော်ကြားခွင့် မပေးဘဲ လက်ထောက်သုံးဦးကို အမြဲတမ်း အပြန်အလှန် ထိန်းကျောင်းခိုင်းထားတတ်သည်။

ထို့ပြင် ရှုစီဝင်သည် မြှောက်ပင့်ရာတွင် အတော်ဆုံး ဖြစ်ပြီး သူ ချင်းကျန့်ယုံကို ဖားလိုက်တိုင်း ချင်းကျန့်ယုံကို အလွန် စိတ်ချမ်းသာစေသည်။ အလုပ်ကောင်းများ ရှိလာလျှင် သူသည် ရှုစီဝင်ကို အထူး ဂရုစိုက်ပေးပေလိမ့်မည်။

အစည်းအဝေးပြီးနောက် ဝေရှင်းဝူက ပထမဆုံး စတင် ဆဲဆိုတော့သည်၊၊

"သူက တကယ့်ကို အရှက်မရှိတဲ့ လူယုတ်မာပဲ။ မင်းရဲ့ အောင်မြင်မှုကို သိသိသာသာကြီး လုယူဖို့ ကြိုးစားနေတာ။ ငါ ဒီလောက် အရှက်မရှိတဲ့ကောင်မျိုး တစ်ခါမှ မမြင်ဖူးဘူး"

"ညီအစ်ကို ဝူ။ ဒီကောင်က လူကြီးလူကောင်းလို ဟန်ဆောင်နေပေမဲ့ စိတ်ထဲမှာ မကောင်းတဲ့ အကြံတွေပဲ ပြည့်နေတာလို့ ငါ မင်းကို အစောကြီးကတည်းက ပြောသားပဲ။ အခု ယုံပြီလား"

ရှုစီဝင်သည် အောင်မြင်မှု ရယူကာ ရာထူးတက်ရန် လောနေမှန်း ဝူကျိရှန်း သိထားသော်လည်း ယခုတစ်ကြိမ်တွင်မူ မူလက မိမိ၏ တာဝန်ကို အတင်းအဓမ္မ လုယူသွားခြင်း ဖြစ်သည်။

ပို၍ ဆိုးသည်မှာ သူတို့နှစ်ဦးသည် ရုံးခန်းတစ်ခုတည်းကို အတူတကွ သုံးစွဲနေကြရသဖြင့် အမြဲတမ်း မျက်နှာချင်းဆိုင် တွေ့နေရခြင်း ပင် ဖြစ်သည်။ ဒါက သူတို့ကို ပို၍ စိတ်အနှောင့်အယှက် ဖြစ်စေလေသည်။

ဝူကျိရှန်း၏ တာဝန်ကို လုယူသွားခဲ့သော်လည်းရှုစီဝင်သည် နှိမ့်ချသော အမူအရာဖြင့် လာရောက် လမ်းညွှန်ချက် တောင်းခံသည်၊၊

"ဆေးပစ္စည်းတွေ ဝယ်ယူတာကအရာရှိ ဝူ ကျွမ်းကျင်တဲ့ အလုပ်ပါ။ အခုတစ်ကြိမ်မှာ ကျွန်တော်ကမိမိကိုယ်ကိုယ် အထင်ကြီးပြီး စမ်းလုပ်ကြည့်တာမို့ လိုအပ်ချက်တွေ ရှိလာမှာ သေချာပါတယ်။ တကယ်လို့ နားမလည်တာ ရှိရင် အရာရှိ ဝူအနေနဲ့ လမ်းညွှန်ပေးဖို့ မျှော်လင့်ပါတယ်"

ဆေးဝါးစီမံခန့်ခွဲရေးဌာနအတွင်းတွင် ဝူကျိရှန်းသည် စိတ်သဘောထားကောင်းသူအဖြစ် လူသိများသော်လည်း ယခုတစ်ကြိမ်တွင်မူ သူသည် ဒေါသကြောင့် တစ်ဝက်ခန့် သေလုနီးပါး ဖြစ်သွားခဲ့ရသဖြင့် ရှုစီဝင်ကို ပြန်လည် ပြောဆိုရန်ပင် စိတ်မပါတော့ချေ။ သူသည် စိတ်အပန်းဖြေရန်အတွက် ရုံးခန်းထဲမှ ထွက်လာခဲ့လေသည်။

ဆေးဝါးစီမံခန့်ခွဲရေးဌာနသည် လက်ဖဝါးခန့်မျှသာ ရှိသော နေရာအသေးလေး ဖြစ်၏။ သူသည် နောက်ဘက်ရှိ ဂိုဒေါင်သို့ လမ်းလျှောက်လာသောအခါ သူ့ကို အလွန် စိတ်အနှောင့်အယှက် ဖြစ်စေသည့် တခြားလူတစ်ယောက်နှင့် ဆုံတွေ့ခဲ့ပြန်သည်၊၊

သူကတော့ ဂိုဒေါင်မှူး ကျောက်ပင်တိန့်ပင် ဖြစ်၏။သူသည် အပေါ်ယံတွင် အဆင့်ကိုးရှိသော ဂိုဒေါင်မှူးမျှသာ ဖြစ်သော်လည်း အမှန်တကယ်တော့ ကိုယ်ရံတော်တပ်ဖွဲ့ဝင်တစ်ဦး ဖြစ်လေသည်။

နန်းတော်က ဤကဲ့သို့သော လူတစ်ယောက်ကို ဆေးဝါးစီမံခန့်ခွဲရေးဌာနအတွင်း ထည့်သွင်းထားခြင်းက ရုံးအတွင်းရှိ အရာရှိအားလုံးကို စောင့်ကြည့်ရန် ဖြစ်မှန်း ထင်ရှားလှ၏။

ဝူကျိရှန်းသည် ထိုအချက်ကို ကောင်းစွာ သိထားသော်လည်း ဖွင့်မပြောနိုင်ဘဲ ကျောက်ပင်တိန့်ကို မြင်ရတိုင်း အလွန် စိတ်အနှောင့်အယှက် ဖြစ်ရသည်။

မင်းက ကိုယ်ရံတော်တပ်ဖွဲ့ဝင် ဖြစ်မှန်း ငါသိတယ်၊ မင်းကလည်း မင်းကို ကိုယ်ရံတော်တပ်ဖွဲ့ဝင် ဖြစ်မှန်း ငါသိနေတာကို သိတယ်၊ ဒါပေမဲ့ ငါတို့နှစ်ယောက်လုံးက ငါ ဘာမှမသိဘူး လို့ ဟန်ဆောင်နေရတာ။ ဒါက တကယ်ကို စိတ်ဝင်စားဖို့ကောင်းလှ၏။

ထုံးစံအတိုင်း ဝူကျိရှန်းကို မြင်သောအခါ အဆင့်ကိုးရှိသော ဂိုဒေါင်မှူး ကျောက်ပင်တိန့်သည် သူ၏ အထက်လူကြီး ဖြစ်သူ ဝူကျိရှန်းကို ချက်ချင်းပင် ရိုသေစွာ ဦးညွှတ်လိုက်သည်၊၊

"ကျွန်တော်မျိုး လက်ထောက်အရာရှိ ဝူကို ဂါရဝပြုပါတယ်"

"ဒီမှာ ငါတို့နှစ်ယောက်တည်း ရှိတာကို ဟန်ဆောင်မနေပါနဲ့တော့"

ဝူကျိရှန်းက ခါးသက်သက် ပြုံးလျက် ပြောလိုကါသည်၊၊

"မင်းတို့ ကိုယ်ရံတော်တပ်ဖွဲ့ဝင်တွေက ဧကရာဇ်ရဲ့ ကိုယ်ရံတော်တွေ ဖြစ်ပြီး အရာရှိအားလုံးကို စောင့်ကြည့်ရတဲ့သူတွေပဲ။ မင်းတို့က အထက်လူကြီးတွေမို့ ငါကပဲ မင်းတို့ကို ဦးညွှတ်ရမှာပါ"

"လက်ထောက်အရာရှိ ဝူက နောက်နေပြန်ပြီ"

ကျောက်ပင်တိန့်သည် ဝူကျိရှန်းကို လူသူရှင်းသော ထောင့်တစ်နေရာသို့ တည်ငြိမ်စွာ ဆွဲခေါ်သွားပြီး တိုးတိုးလေး မေးသည်၊၊

"မနေ့က ယုရှီချန် ကုန်ခါနီးလောက်မှာ မင်း ဝမ်ကျန့်စွန်း လို့ ခေါ်တဲ့ ဆေးကုန်သည်နဲ့ ဆုံခဲ့တယ် မဟုတ်လား"

မနေ့က နေဝင်ရီတရောအချိန်လောက်တွင် ဝူကျိရှန်းသည် ဆေးကုန်သည် ဝမ်ကျန့်စွန်းနှင့် အမှန်ပင် ဆုံတွေ့ခဲ့ဖူးသည်။

"ငါပြောပါရစေဦး... ကိုယ်ရံတော်ကျောက်၊ မင်း ငါ့နောက်ကို ထပ်ပြီး စုံစမ်းနေပြန်ပြီလား။ ငါ့ရဲ့ အမှုတွေက ပြီးသွားပြီ မဟုတ်လား။ ဘာဖြစ်လို့ ငါ့တစ်ယောက်တည်းကိုပဲ စောင့်ကြည့်နေရတာလဲ"

"အများကြီး မမေးပါနဲ့။ ဆေးကုန်သည် ဝမ်ကျန့်စွန်းနဲ့ ဆုံတွေ့ခဲ့တဲ့ အကြောင်းရင်းနဲ့ လုပ်ငန်းစဉ်တစ်ခုလုံးကို ငါ့ကို အသေးစိတ် ပြောပြပါ"

ကိုယ်ရံတော်တပ်ဖွဲ့ဟူသည် ဝူကျိရှန်းအနေဖြင့် လုံးဝ မပြစ်မှားရဲသော တည်ရှိမှု ဖြစ်၏။ သူသည် ဆုံတွေ့ခဲ့သမျှကိုသာ ရိုးရိုးသားသား ပြန်လည် ပြောပြလိုက်ရသည်၊၊

"ငါက တကယ်ပဲ လူတစ်ယောက်အတွက် ဆေးကူဝယ်ပေးတာပါ၊ တခြား ဘာမှမရှိပါဘူး။ ငါ မင်းတို့ကို တောင်းပန်ပါတယ်၊ ငါ့နောက်ကို ခဏခဏ လိုက်မနေပါနဲ့တော့"

"မင်းနောက်ကို လိုက်တာ ဟုတ်လား"

ကျောက်ဘင်းတင့်က နှာခေါင်းရှုံ့ရင်း အထင်မြင်သေးစွာဖြင့် ပြောလာ၏၊၊

"ငါပြောမယ်... လက်ထောက်အရာရှိ ဝူ၊ မင်း ကိုယ့်ကိုယ်ကိုယ် အထင်ကြီးလွန်းနေပြီ။ ကောင်းကင်ကြီး ပြိုကျလာရင်တောင် မင်းက အဆင့်ခြောက် အရာရှိလေးတစ်ယောက်ပါ။ ငါတို့ ကိုယ်ရံတော်တပ်ဖွဲ့ဝင်တွေက မင်းနောက်ကို တစ်ချိန်လုံး လိုက်နေရလောက်အောင် အားမနေဘူး။ ငါတို့က အဲဒီ ဝမ်ကျန့်စွန်းနောက်ကို လိုက်ပြီး စောင့်ကြည့်နေတာ"

"ဝမ်ကျန့်စွန်းကို စောင့်ကြည့်နေတာ ဟုတ်လား။ သူက သာမန် ဆေးကုန်သည်တစ်ယောက်ပဲဟာ။ ဘာလို့ သူ့ကို စောင့်ကြည့်ရတာလဲ"

ဤသို့ ပြောပြီးနောက် ဝူကျိရှန်းသည် မိမိ စကားလွန်သွားမှန်း သတိရသဖြင့် အလျင်အမြန် ထပ်ဖြည့်ပြောသည်၊၊

"မင်းတို့ ဘယ်သူ့ကိုပဲ စောင့်ကြည့်စောင့်ကြည့် ငါနဲ့မဆိုင်ပါဘူး၊ ငါလည်း ဝင်မပတ်သက်ချင်ဘူး။ ခုနက စကားကို ငါမပြောခဲ့ဘူးလို့ပဲ သတ်မှတ်လိုက်ပါ"

"မဟုတ်ဘူး၊ ငါ မင်းကို အမှန်အတိုင်း ပြောပြရမယ်"

ကိုယ်ရံတော်တပ်ဖွဲ့ဝင်များ လုပ်ဆောင်သော ကိစ္စရပ်များသည် နိုင်ငံတော်၏ ကြီးမားသော လျှို့ဝှက်ချက်များ သို့မဟုတ် အရေးကြီးသော အမှုအခင်းများ ဖြစ်ကြသည်။ မည်သူမျှ ၎င်းတို့နှင့် မည်သည့်နည်းနှင့်မျှ မပတ်သက်ချင်ကြချေ။

ဝူကျိရှန်းသည် ၎င်းတို့က ဝမ်ကျန့်စွန်းကို ဘာဖြစ်လို့ လိုက်လံ စောင့်ကြည့်နေရသနည်းဟူသည်ကို မသိချင်တော့ပေ၊၊

"အဲဒီ ဝမ်ကျန့်စွန်းက ဘာအမှုပဲ ကျူးလွန်ကျူးလွန် ငါဂရုမစိုက်ဘူး။ ဘာပဲဖြစ်ဖြစ် ငါ သူနဲ့ ဆုံတာက ဆေးဝယ်ဖို့ သီးသန့်ပဲ၊ တခြား ဘာပတ်သက်မှုမှ မရှိဘူး။ နောင်ကျရင် ငါ သူနဲ့ ထပ်ပြီး မဆက်သွယ်တော့ဘူး"

"မဟုတ်ဘူး၊ မင်း သူနဲ့ ဆက်ပြီး ဆက်သွယ်ရမယ်။ မင်း သူ့ဆီက မိုးတိမ်နီအမွှေးတိုင်နဲ့ ဆားသန္တာပင်ကို ဝယ်ခဲ့တယ် မဟုတ်လား။ မင်း ထပ်ပြီး ဝယ်ရမယ်"

"နတ်သမားတော်စွန်းအတွက် ငါဝယ်ပေးခဲ့တဲ့ ဆေးပစ္စည်း နှစ်မျိုးကတင် သူ သုံးလေးနှစ်စာ သုံးလို့ လောက်နေပြီဟာ။ ထပ်ဝယ်ရမယ် ဟုတ်လား"

"ဘာဖြစ်လို့ ဆေးပစ္စည်းတွေ ဒီလောက်အများကြီး ဝယ်ရမှာလဲ"

"မင်း သူ့ဆီက ဆေးပစ္စည်းတွေကို ဆက်ပြီး ဝယ်မှသာ ငါတို့ဘက်က ဆက်လက် စုံစမ်းဖို့ အခွင့်အရေး ရမှာ"

"ကိုယ်ရံတော်ကျောက်... သခင်ကြီးကျောက်၊ မင်း ဝမ်ကျန့်စွန်းကို စုံစမ်းချင်ရင် သွားပြီး စုံစမ်းလေ။ ဘာဖြစ်လို့ ငါ့ကိုပါ ဆွဲထည့်ရတာလဲ"

"ဘာလို့ဆိုတော့ မင်းက အဲဒီ ဝမ်ကျန့်စွန်းနဲ့ တစ်ကြိမ် အရောင်းအဝယ် လုပ်ဖူးပြီးသား ဖြစ်လို့ သူက မင်းအပေါ် အနည်းငယ် ယုံကြည်မှု ရှိနေလို့ပဲ"

"ငါ ထူးဆန်းလို့ မေးပါရစေဦး။ အဲဒီ ဝမ်ကျန့်စွန်းက သာမန် ဆေးကုန်သည်တစ်ယောက်ပဲဟာ။ ဘာလို့ သူ့ကို စောင့်ကြည့်နေရတာလဲ"

"သူက မွန်ဂိုလူမျိုးတစ်ယောက် ဖြစ်ပြီး နောက်ခံ အလွန် လျှို့ဝှက်ထားတဲ့ မွန်ဂိုတစ်ယောက် ဖြစ်နေလို့ပဲ"

"ဝမ်ကျန့်စွန်းက မွန်ဂိုလူမျိုး ဟုတ်လား။ဒါက မဖြစ်နိုင်တာ"

"လုံးဝ မမှားစေရဘူး။ သူက မွန်ဂိုလူမျိုးတစ်ယောက်ပဲ။ သူ့ရဲ့တရားဝင် အဆင့်အတန်းက အုလုမျိုးနွယ်စုရဲ့ ဒါရုခီလာ (ဒါရုခီလာဆိုတာ တရားဝင် ရာထူးမဟုတ်ဘဲ မျိုးနွယ်စုရဲ့ လူကြီးလူကောင်းတစ်ယောက်လို အဆင့်အတန်းမျိုး ဖြစ်ပြီး မျိုးနွယ်စုအတွင်းမှာ အလွန် အရေးပါတဲ့ အခန်းကဏ္ဍက ရှိသူ ) တစ်ဦး ဖြစ်တယ်။ ဝမ်ကျန့်စွန်း ဆိုတာက သူ့ရဲ့နာမည်ရင်း မဟုတ်ဘူး။သူ့ရဲ့မျိုးရိုးအမည်ပဲ"

*********

အခန်း ၁၁၀ - မင်မင်းဆက်၏ အထောက်တော်များ

ကျောက်ပင်တိန့်ပြောသော စကားများကို ကြားပြီးနောက် ဝူကျိရှန်းသည် အခြေအနေ အရပ်ရပ်ကို အကြမ်းဖျင်း သဘောပေါက်သွားခဲ့၏။ ဆေးကုန်သည် ဝမ်ကျန့်စွန်းသည် အလွန် အရေးပါသော မွန်ဂိုလူမျိုးတစ်ဦး ဖြစ်နေသည်ကိုး။

အမှန်တော့ အနည်းငယ်မျှ တွေးကြည့်ရုံဖြင့် အဖြေကို ထုတ်နှုတ်နိုင်လေသည်။ မိုးတိမ်နီအမွှေးတိုင်နှင့် ဆားသန္တာပင်ဆေးပစ္စည်းနှစ်မျိုးသည် ဈေးကွက်တွင် ရှာဖွေရန် အလွန် ခက်ခဲလှပြီး မွန်ဂိုတို့သာလျှင် ၎င်းတို့ကို အလွယ်တကူ ရရှိနိုင်ကြသည်။

မွန်ဂိုတို့၏ အလယ်ပိုင်းလွင်ပြင် အုပ်ချုပ်ရေး ယိုင်နဲ့ပျက်စီးသွားခဲ့ပြီး ၎င်းတို့သည် မြက်ခင်းပြင်များဆီသို့ နောက်ဆုတ်ပြေးခဲ့ရသော်လည်း မွန်ဂိုခန်နိုင်ငံ အချို့မှာမူ အနောက်ဘက်ဒေသများနှင့် အရှေ့အလယ်ပိုင်း ဒေသအသီးသီးကို အုပ်ချုပ်နေဆဲ ဖြစ်ကာ အနောက်ကမ္ဘာနှင့် ကုန်သွယ်ရေး လမ်းကြောင်းများကို ထိန်းသိမ်းထားကြဆဲ ဖြစ်သည်။

ထို့ကြောင့် ၎င်းတို့သာလျှင် အာဖရိကမြောက်ပိုင်းနှင့် အာရေဗျကျွန်းဆွယ်မှ ထွက်ရှိသော ဆေးပစ္စည်းများကို အလွယ်တကူ ရရှိနိုင်ခြင်း ဖြစ်၏။

ဝမ်ကျန့်စွန်း ၏အုလုမျိုးနွယ်စုသည် အမှန်တကယ်တွင်ရိုးရာအယူအဆအရ မွန်ဂိုစစ်စစ်များ မဟုတ်ကြဘဲ လွန်ခဲ့သော နှစ်တစ်ရာကျော်က တောင်ပိုင်းစုန်းနှင့် မွန်ဂိုတို့၏ ပူးပေါင်းတိုက်ခိုက်မှုကြောင့် တိုင်းပြည် ပျက်စီးသွားခဲ့ရသော ကျင်းမင်းဆက်၏ အကြွင်းအကျန်များသာ ဖြစ်ကြသည်။

လွန်ခဲ့သော နှစ်တစ်ရာလုံးလုံး အုလုမျိုးနွယ်စုသည် ရွှေရောင်မိသားစု၏ သိုးထိန်းကျွန်များအဖြစ် တည်ရှိခဲ့ကြသဖြင့်သူတို့သည်မွန်ဂိုတို့၏ ကျွန်များ ဖြစ်ကြသည်။

မင်မင်းဆက် တည်ထောင်ပြီးနောက် မွန်ဂိုတို့၏ သြဇာအာဏာ နယ်ပယ်သည် တဖြည်းဖြည်း ကျုံ့ဝင်သွားခဲ့သဖြင့် ၎င်းတို့သည် အုလုမျိုးနွယ်စုကို ထိရောက်စွာ မထိန်းချုပ်နိုင်တော့ချေ။ ထို့ကြောင့် မွန်ဂိုတို့အပေါ် ထားရှိသော အုလုမျိုးနွယ်စု၏ သဘောထားမှာလည်း သိမ်မွေ့စွာ ပြောင်းလဲလာခဲ့လေသည်။

အုလုမျိုးနွယ်စုသည် မွန်ဂိုတို့၏ ထိန်းချုပ်မှုအောက်မှ လွတ်မြောက်ရန် အစွမ်းကုန် ကြိုးစားခဲ့ကြသည်။ရန်သူ၏ ရန်သူသည် မိမိ၏ မိတ်ဆွေ ဟူသော အယူအဆအရ အုလုမျိုးနွယ်စုသည် မင်မင်းဆက်၏ မိတ်ဆွေ ဖြစ်သင့်သည်။တူညီသော ရန်သူ ရှိနေသဖြင့် မဟာမိတ်ဖွဲ့နိုင်ငသော်လည်း လက်တွေ့မြေပြင်တွင်မူ လုံးဝ ဆန့်ကျင်ဘက် ဖြစ်နေလေသည်။

အုလုလူမျိုးများသည် မွန်ဂိုတို့၏ ထိန်းချုပ်မှုကို မခံချင်ကြသကဲ့သို့ မင်မင်းဆက်၏ လက်အောက်ခံ နိုင်ငံတစ်ခုလည်း မဖြစ်ချင်ကြချေ။ မိမိကိုယ်ကိုယ် မွန်ဂိုလူမျိုးများအဖြစ် သတ်မှတ်ထားကြသော အုလုလူမျိုးများသည် မင်မင်းဆက်၏ ရန်သူများသာ ဖြစ်ကြသည်။

မွန်ဂိုတို့၏ ရေရှည်ထိန်းချုပ်မှုကြောင့် အုလုလူမျိုးများ၏ လူနေမှုဘဝ ဓလေ့စရိုက်များနှင့် အလုပ်လုပ်ပုံ နည်းလမ်းများသည် မွန်ဂိုဆန်လှသည်။ ၎င်းတို့သည် မကြာခဏဆိုသလို အကြောင်းပြချက် မရှိဘဲ တခြားမျိုးနွယ်စုများနှင့် ပူးပေါင်းကာ နယ်စပ်ကို ဖြတ်ကျော်လျက် လုယက်ဖျက်ဆီးတတ်ကြပြီး တစ်ကြိမ်လျှင် လူအမြောက်အမြားနှင့် သားငါး တိရစ္ဆာန်များကို ဖမ်းဆီးခေါ်ဆောင်သွားတတ်ကြ၏။

မင်မင်းဆက်က ကြီးမားသော မြောက်ပိုင်းစစ်ဆင်ရေးကို စတင်သည့်အခါ အုလုလူမျိုးများသည် မိမိတို့၏ အားနည်းချက်ကို သိကြသဖြင့် မရေမရာသော သဘောထားကို ပြသကာ ဟန်ပြသက်သက် အညံ့ခံတတ်ကြသည်။

မင်မင်းဆက် စစ်တပ်ကြီး ပြန်လည် ဆုတ်ခွာသွားပြီးနောက်တွင်မူ ၎င်းတို့သည် နယ်စပ်ကို ပြန်လည် နှောင့်ယှက်ဖျက်ဆီးကြပြန်သည်။ ဤသံသရာသည် ရေတွက်မကုန်နိုင်အောင် အကြိမ်ကြိမ် ဖြစ်ပွားခဲ့ဖူးလေသည်။

ဤကဲ့သို့ စိတ်ချ၍မရသော မျိုးနွယ်စုအသေးလေးကို ရိုးရိုးရှင်းရှင်းပင် အမြစ်ဖြတ်ပစ်လိုက်ခြင်းက ပို၍ ကောင်းမွန်ပေလိမ့်မည်။ မည်သို့ပင်ဆိုစေ ၎င်းတို့သည် မင်မင်းဆက်၏ မြောက်ပိုင်းစစ်ဆင်ရေး စစ်တပ်ကြီးကို တားဆီးနိုင်မည် မဟုတ်ပေ။

"မင်းပြောသလောက် ဘယ်လိုလုပ် လွယ်ပါ့မလဲ"

ကျောက်ပင်တိန့်က မတတ်နိုင်ဟန်ဖြင့် ပြုံးလျက် ပြောလာ၏၊

၊ "အုလုမျိုးနွယ်စုအသေးလေးကို အမြစ်ဖြတ်ပစ်ဖို့က တကယ်တော့ ကြီးမားတဲ့ ပြဿနာ မဟုတ်ပါဘူး။ အဓိက ပြဿနာက တကယ်လို့ အုလုမျိုးနွယ်စုသာ တကယ် ပျက်စီးသွားရင် တောင်စီ၊ တောင်ပေ့နဲ့ အနောက်မွန်ဂို ဒေသအသီးသီးက မျိုးနွယ်စုအသေးလေးတွေဟာ ချက်ချင်းပဲ မြောက်ပိုင်းယွမ်နဲ့ ပူးပေါင်းသွားကြလိမ့်မယ်"

တကယ်လို့ အုလုမျိုးနွယ်စုကိုသာ အမြစ်ဖြတ်ပစ်လိုက်ပါက မြောက်ဘက်နှင့် မြောက်အနောက်ဘက်ရှိ တခြား ပျံ့နှံ့နေသော မြက်ခင်းပြင် မျိုးနွယ်စုအသေးလေးများသည် ချက်ချင်းပင် မြောက်ပိုင်းယွမ်ဘက်သို့ လုံးဝ ဘက်ပြောင်းသွားကြပေလိမ့်မည်။

ဤမျိုးနွယ်စုအသေးလေးများသည် အင်အားမတောင့်တင်းကြသော်လည်း အလွန် ကျယ်ပြန့်သော နယ်မြေကို အပိုင်စီးထားကြသည်။ တကယ်လို့ ၎င်းတို့အားလုံးက မင်မင်းဆက်၏ ရန်သူများ ဖြစ်လာကြပါက ဒါက တကယ်ကို စိတ်အနှောင့်အယှက် ဖြစ်စရာ ကောင်းလှ၏။

ထို့ကြောင့် နန်းတော်အတွင်းတွင် သဘောထား ကွဲလွဲမှု နှစ်မျိုး ထွက်ပေါ်လာခဲ့သည်။ တစ်ဖက်က ဖျောင်းဖျဖျားယောင်းကာ အလိုလိုက်ရန် အဆိုပြုပြီး တခြားတစ်ဖက်ကမူ ပြင်းထန်စွာ နှိမ်နင်းပြီး အမြစ်ဖြတ်ပစ်ရန် အဆိုပြုကြသည်။

နောက်ဆုံးတွင် ဧကရာဇ် ကျူးယွမ်ကျန်း ကိုယ်တိုင် ဆုံးဖြတ်ချက်ချခဲ့ပြီး 'နှိမ်နင်းခြင်းနှင့် ဖျောင်းဖျခြင်းကိုပေါင်းစပ်ခြင်းဟူသော မဟာဗျူဟာကို ချမှတ်ခဲ့လေသည်။

အပြင်ပန်းတွင် ဤမျိုးနွယ်စုအသေးလေးများကို ဖျောင်းဖျသည့် နည်းလမ်းများဖြင့် စည်းရုံးသိမ်းသွင်းထားပြီး လျှို့ဝှက်ချက်အနေဖြင့်မူ စစ်ပြင်ဆင်မှုများ ပြုလုပ်ထားကြသည်။

ဖျောင်းဖျခြင်း မအောင်မြင်သည့် တစ်နေ့တွင် ကြီးမားသော စစ်ရေးလှုပ်ရှားမှုများကို ချက်ချင်း စတင်ကာ လျင်မြန် ပြတ်သားသော အင်အားဖြင့် ၎င်းတို့ကို လုံးဝ အမြစ်ဖြတ်ပစ်မည် ဖြစ်၏။

ကိုယ်ရံတော်တပ်ဖွဲ့၏ တာဝန်မှာ အုလုမျိုးနွယ်စု၏ အခြေအနေမှန်ကို စုံစမ်းရန်၊ ၎င်းတို့ ရှိနေသည့် တိကျသော တည်နေရာကို စိစစ်ရန်နှင့် လိုအပ်သော သတင်းအချက်အလက် အားလုံးကို စုဆောင်းရန် ဖြစ်လေသည်။

နှစ်ပေါင်းထောင်ချီကတည်းက မြက်ခင်းပြင် လူမျိုးများသည် ရေနှင့် မြက်ရှိရာသို့ ရွှေ့ပြောင်းကာ အခြေချ နေထိုင်တတ်ကြသဖြင့် တိကျသော ပထဝီဝင် တည်နေရာဟူ၍ မရှိကြချေ။ စစ်ရေးအရ တိုက်ခိုက်ခြင်းနှင့် နှိုင်းယှဉ်လျှင် ၎င်းတို့ ရှိနေသည့် နေရာကို ရှာဖွေရန်က ပို၍ အရေးကြီးလှသည်။

လွန်ခဲ့သော နှစ်ပေါင်းထောင်ချီက ဟန်မင်းဆက်နှင့် ဟုန်းနူးတို့ကြား ဖြစ်ပွားခဲ့သော စစ်ပွဲများကို ပြန်တွေးကြည့်လျှင် ရန်သူ၏ တည်နေရာကို တိကျစွာ ရှာဖွေနိုင်ခဲ့သောကြောင့်သာ စစ်သူကြီး ဟော့ချွီပင်းသည် ဖုန်းလန်ကျူးရွှီး ဟူသော အမြင့်မြတ်ဆုံး ဂုဏ်သရေကို ရရှိခဲ့ခြင်း ဖြစ်သည်။

စစ်သူကြီး လီကွမ်မှာမူ ရန်သူ၏ တည်နေရာကို ရှာမတွေ့ဘဲ ကျယ်ပြန့်လှသော မြက်ခင်းပြင်ကြီးထဲတွင် လမ်းပျောက်ခဲ့သဖြင့် မော့ပေ့ဒေသတွင် နောင်တကြီးစွာဖြင့် သေဆုံးရခြင်း ဟူသော နှစ်ထောင်ချီ သက်ပြင်းချစရာ အဖြစ်ဆိုးနှင့် ကြုံတွေ့ခဲ့ရရှာသည်။

နန်းတော်၏ မြောက်ပိုင်းစစ်ဆင်ရေး အသီးသီးတွင် အရေးအကြီးဆုံး အစိတ်အပိုင်းမှာ စစ်ပွဲကိုယ်တိုင် မဟုတ်ဘဲ ရန်သူ၏ တိကျသော တည်နေရာကို မည်သို့ ရှာဖွေရမည်ဟူသော အချက်ပင် ဖြစ်၏။ မင်မင်းဆက်သည် ဤအချက်ကို နက်နက်ရှိုင်းရှိုင်း သဘောပေါက်ထားသောကြောင့် သတင်းအချက်အလက် စုဆောင်းခြင်း လုပ်ငန်းကို ဤမျှအထိ အလေးထားခြင်း ဖြစ်သည်။

ဟုတ်ပါသည်၊ ဤကဲ့သို့သော မဟာဗျူဟာမြောက် ကိစ္စရပ်များသည် ဝူကျိရှန်းကဲ့သို့သော ရာထူးအသေးအဖွဲလေးနှင့် ဘာမှမဆိုင်ပေ။ သူသည် ကိုယ်ရံတော်တပ်ဖွဲ့အတွက် အကာအကွယ် ပေးရုံသာ လိုအပ်သည်။

"အဲဒီ ဝမ်ကျန့်စွန်းက ကောက်ကျစ်ပြီး စိစစ်ရ ခက်လှတယ်။ ငါတို့ သူ့နောက်ကို အကြိမ်ကြိမ် လိုက်စုံစမ်းတာ အလဟဿ ဖြစ်ခဲ့ရုံတင်မကဘဲ သူ့ဘက်က ရိပ်မိသွားလုနီးပါး ဖြစ်ခဲ့တယ်"

ကျောက်ပင်တိန့်က မတတ်နိုင်ဟန်ဖြင့် ပြောလိုက်၏၊၊

"ကံကောင်းတာက မင်းက သူနဲ့ တစ်ကြိမ် အရောင်းအဝယ် လုပ်ဖူးပြီးသား ဖြစ်လို့ အစဦး ယုံကြည်မှုကို တည်ဆောက်နိုင်ခဲ့ပြီ။ ငါ အဲဒီသဲလွန်စကို သေချာ ကိုင်ဆွဲထားပြီး သူ့ရဲ့ ယုံကြည်မှုကို ရအောင် နည်းလမ်းပေါင်းစုံနဲ့ ကြိုးစားရမယ်။ တကယ်လို့ အုလုမျိုးနွယ်စုရဲ့ တည်နေရာကို ရှာတွေ့နိုင်ရင် ဒါက ကြီးမားတဲ့ အောင်မြင်မှု ဖြစ်မှာ သေချာတယ်"

ကြီးမားတဲ့ အောင်မြင်မှု ဟုတ်လား။ငါကတော့ ဒီလို အောင်မြင်မှုကြီးကို မရချင်ပါဘူး။

"ကိုယ်ရံတော်ကျောက်... မင်းလည်း ငါ့အကြောင်း သိတာပဲ။ ငါက သမားတော် အလုပ်ကိုပဲ လုပ်တာပါ။ စစ်ချီတာ၊ တိုက်ခိုက်တာ၊ လျှို့ဝှက် စိမ့်ဝင်တာ ဒါမှမဟုတ် သူလျှိုလုပ်တာမျိုးတွေကို ငါ တကယ် မကိုင်တွယ်နိုင်ပါဘူး။ တခြားလူကိုပဲ ရှာပါဦး"

"မဟုတ်ဘူး၊ မင်းပဲ ဖြစ်ရမယ်"

ကျောက်ပင်တိန့်က ပြတ်သားစွာ ပြောလိုက်သည်၊၊ "

အန်းကျန်းကျိုး မင်း ငါတို့နဲ့ ပူးပေါင်းရမယ်လို့ အထက်လူကြီးတွေကို အစီရင်ခံပြီးသားပါ"

"ကောင်းပါပြီလေ၊ မင်းပြောတဲ့အတိုင်းပဲ ငါလုပ်ပါ့မယ်"

ထို့ကြောင့် ကျောက်ပင်တိန့်၏ စီစဉ်မှုအောက်တွင် ဝူကျိရှန်းသည် လုံဖုန့်ဆေးပစ္စည်းဆိုင်သို့ နောက်တစ်ကြိမ် လာခဲ့ပြီး စမုန်နက်၊ နဂါးသဲမြက်နှင့် ဆလမွန်အမြစ် ကဲ့သို့သော ဆေးပစ္စည်း အမြောက်အမြားကို ဝယ်ယူရန် ကမ်းလှမ်းခဲ့လေသည်။

စမုန်နက်သည် အားအင်ကို ဖြည့်တင်းပေးပြီး နဂါးသဲမြက်သည် ချောင်းဆိုးခြင်းနှင့် ရင်ကြပ်ခြင်းကို သက်သာစေကာ ဆလမွန်အမြစ်မှာမူ အဆုတ်ကို အားကောင်းစေပြီး အဟာရ ဖြစ်စေသည်။ ၎င်းတို့အားလုံးသည် အလွန် အသုံးများသော ဆေးပစ္စည်းများ ဖြစ်ကြ၏။

သို့သော် ဆေးပစ္စည်းများတွင်လည်း အဆင့်အတန်း ကွာခြားမှု ရှိသည်။ ဝူကျိရှန်း ဝယ်ယူလိုသော ဆေးပစ္စည်း အားလုံးနီးပါးမှာ မွန်ဂိုမြက်ခင်းပြင်၏ အထူးထွက်ကုန်များ ဖြစ်ကြပြီး မွန်ဂိုဒေသမှ ထွက်ရှိသော ဆေးပစ္စည်းများကိုသာ အကောင်းဆုံး အမျိုးအစားများအဖြစ် သတ်မှတ်ကြသည်။

ယခင်အတိုင်းပင် ဆေးပစ္စည်းဆိုင်မှ ဆိုင်ရှင်သည် ဆေးကုန်သည် ဝမ်ကျန့်စွန်းကို နောက်တစ်ကြိမ် ထပ်မံ ဆက်သွယ်ပေးခဲ့လေသည်။

ဝမ်ကျန့်စွန်းနှင့် ဝူကျိရှန်းတို့ နှစ်ဦးလုံးသည် ဤနယ်ပယ်တွင် ကျွမ်းကျင်သူများ ဖြစ်ကြသည်။ ၎င်းတို့သည် ဆေးပစ္စည်းများ၏ အရည်အသွေးနှင့် ဈေးနှုန်းကို ကောင်းစွာ နားလည်ထားကြ၏။ မည်သို့ပင်ဆိုစေ ၎င်းတို့သည် တစ်ကြိမ် ပူးပေါင်းလုပ်ကိုင်ဖူးပြီးသား ဖြစ်ကာ အချင်းချင်း ဖောက်သည်ဟောင်းများအဖြစ် သတ်မှတ်ထားကြသဖြင့် ပူးပေါင်းဆောင်ရွက်မှုက သဘာဝအတိုင်း ချောမွေ့လှသည်။

ဒွါဒသမလကုန်ခါနီးသို့ ရောက်ရှိလာသောအခါ ဝူကျိရှန်းသည် ဝမ်ကျန့်စွန်းနှင့်အတူ တခြား ကြီးမားသော အရောင်းအဝယ်တစ်ခုကို ထပ်မံ အတည်ပြုခဲ့သည်၊၊ ၎င်းမှာ မွန်ဂိုအထူးထွက်ကုန်များ ဖြစ်ကြသော စမုန်နက်ခါး၊ နနွင်း၊ အဆိပ်မြစ်နှင့် ကုရှန်း ဆေးပစ္စည်းများကို အရေအတွက် အမြောက်အမြား ဝယ်ယူရန် ဖြစ်၏။

"ဒီဆေးပစ္စည်းတွေကိုတော့ နောက်နှစ် ပထမလကျမှ ပေးပို့နိုင်မယ်"

"ငါ မလောပါဘူး။ ဆေးပစ္စည်းတွေ ကောင်းဖို့ပဲ လိုတာပါ၊ စောစော ရောက်ရောက် နောက်ကျမှ ရောက်ရောက် ကိစ္စမရှိပါဘူး"

"မင်းက အမြင်ကျယ်ပြီး အလုပ်လုပ်တာ ပြတ်သားတာပဲ။ ငါ မင်းလိုလူမျိုးနဲ့ စီးပွားရေးလုပ်ရတာ သဘောကျတယ်"

ဤသို့ ပြောရင်း ဝမ်ကျန့်စွန်းသည် သူ၏ အိတ်ထဲမှ အရည်အသွေးမြင့် စိမ်းပြာကျောက် အချို့ကို ထုတ်လိုက်သည်၊

၊ "ဒီလို ဖောက်သည်ကောင်းနဲ့ ဆုံရတာ ရှားပါတယ်။ ဒီလက်ဆောင်အသေးလေးက ငါ့ရဲ့ လေးစားမှုကို ပြသတာမို့ လက်ခံပေးဖို့ မျှော်လင့်ပါတယ်"

တစ်ဖက်လူက လက်ဆောင်များပင် စတင် ပေးအပ်လာပြီ ဖြစ်သဖြင့် အစဦး ယုံကြည်မှု တည်ဆောက်နိုင်ခဲ့ပြီ ဖြစ်ကြောင်း ထင်ရှားလှ၏။ ဝူကျိရှန်းသည် အခွင့်အရေးကို ဆုပ်ကိုင်ကာ တောင်းဆိုချက်တစ်ခု တင်ပြလိုက်သည်၊၊

"ငါက ဆေးဝါးစီမံခန့်ခွဲရေးဌာနက အရာရှိတစ်ယောက် ဖြစ်လို့ ဆေးပစ္စည်းတွေ ရောင်းချရတာ အခွင့်ထူး ရှိတယ်။ ဒါကြောင့် ငါ့ရဲ့ လုပ်ငန်းကို ဒီထက်မက ပိုပြီး ချဲ့ထွင်ချင်တယ်"

"သဘာဝအတိုင်းပေါ့... သခင်လေး ဝူ။ မင်း ဆေးပစ္စည်း ဘယ်လောက်ပဲ လိုချင်လိုချင် ငါ အပြည့်အစုံ ထောက်ပံ့ပေးနိုင်ပါတယ်"

"အပြည့်အစုံ ထောက်ပံ့ပေးနိုင်တာက ကောင်းတာပေါ့၊ ဒါပေမဲ့ ငါကိုယ်တိုင် မင်းတို့ရဲ့ ဆေးစိုက်ခင်းတွေနဲ့ ကုန်ထုတ်လုပ်ငန်းခွင်တွေကို သွားပြီး ကြည့်ချင်သေးတယ်"

ဖောက်သည်ကြီးတစ်ဦးအနေဖြင့် မြေပြင်သို့ ကိုယ်တိုင် သွားရောက် စစ်ဆေးပြီး ဆေးစိုက်ပျိုးမှုနှင့် ပြုပြင်စီမံမှု လုပ်ငန်းစဉ်များကို ကိုယ်တိုင် မြင်တွေ့လိုခြင်း ဖြစ်သည်။ ဒါက လုံးဝ သင့်တင့်လျောက်ပတ်သော တောင်းဆိုချက် ဖြစ်သော်လည်း ဝမ်ကျန့်စွန်းကမူ ငြင်းဆန်ခဲ့သည်၊၊

"ငါတို့ရဲ့ ဆေးစိုက်ခင်းတွေနဲ့ ကုန်ထုတ်လုပ်ငန်းခွင်တွေကို ကြည့်မယ် ဟုတ်လား။ အခုလောလောဆယ်တော့ အဆင်မပြေသေးပါဘူး။ ပိုပြီး အဆင်ပြေမယ့် အချိန်ကျမှပဲ ကြည်တာပေါ့"

*********