အခန်း (၁၀၁-၁၀၂)

`အခန်း(၁၀၁)ကိုယ်ဝန်မြဲဆေး

မနက်လင်းလာချိန်တွင်ဝူကျိရှန်းသည်တစ်ညလုံးမနိုးဘဲ အိပ်ခဲ့သော်လည်း တစ်ကိုယ်လုံး မအီမသာ ဖြစ်နေပြီး အရက်နာကျနေသကဲ့သို့ ခေါင်းထဲတွင် မူးဝေနေကာအားအင်ကုန်ခမ်းနေသလိုခံစား နေရ၏။

ဝူကျိရှန်းသည် မိမိကိုယ်မိမိ အအေးမိနေမှန်း သိလိုက်သည်။ ယခုခေတ်ကာလ အခေါ်အဝေါ်အရ ဆိုလျှင်မူ အအေးပတ်ခြင်းဟု ခေါ်ဆိုရမည် ဖြစ်၏။

သူနှင့် ချင်းချင်းသည် ရက်အတော်ကြာ ပိတ်လှောင်ခံထားခဲ့ရပြီး ချင်းချင်းမှာ အအေးမိနေနှင့်ပြီး ဖြစ်ရာ သူလည်း လွတ်ငြိမ်းခွင့်မရခဲ့ချေ။

သူသည် မနက်စာကို ကမန်းကတန်း စားသောက်ပြီးနောက် ချင်းနှင့်သကြားညိုရည် အိုးကြီးတစ်အိုးကို ပြုတ်ကာ အချို့ကို ချင်းချင်းထံ ပို့ပေးပြီး သူကိုယ်တိုင်လည်း အများကြီး သောက်လိုက်သည်။ထို့နောက် ချွေးထွက်သွားစေရန် အိပ်စက်ဖို့ ပြင်ဆင်နေစဉ် ဝေရှင်းဝူ ရောက်ရှိလာ၏။

"အရာရှိဝူ၊ရုံးကို အလုပ်မတက်တာ အတော်ကြာပြီ။ ဘာတွေ အလုပ်ရှုပ်နေတာလဲ"

လုပ်ဖော်ကိုင်ဖက်တစ်ဦး လာရောက်လည်ပတ်သဖြင့် ဝူကျိရှန်းသည်နေမကောင်းသော်လည်း အားနာနာနှင့်ပင် ဧည့်ခံလိုက်ရသည်။

"ဘာမှ အလုပ်မရှုပ်ပါဘူး။ အအေးပတ်သွားလို့ ရက်အနည်းငယ် နားချင်လို့ပါ။ အရာရှိဝေအတွက် အဆင်ပြေရင် ဌာနမှူးချင်းကို ကျွန်တော့်အတွက် ဆေးခွင့် တောင်းပေးပါဦး"

သူအလုပ်မတက်သည်မှာ ရက်အနည်းငယ် ရှိပြီဖြစ်ရာ ဆေးခွင့်တောင်းရန် လိုအပ်လေသည်။

သူ၏ အထက်လူကြီးအကြောင်း ပြောသော်လည်း ဝေရှင်းဝူကမူ လုံးဝ ဂရုမစိုက်ဟန်ဖြင့် ပြန်ပြော၏။

"ငါတို့ရဲ့ ဌာနမှူးချင်းက ဘယ်လိုလူလဲဆိုတာ အရာရှိဝူမသိတာလည်း မဟုတ်ဘူး။ ရုံးကို ရာသီဝက်လောက် အလုပ်မတက်ရင်တောင် အဘိုးကြီးချင်းက သိမှာ မဟုတ်ပါဘူး"

သူအနည်းငယ်အပို ပြောသည်မှလွဲ၍

ဆေးဘက်ဆိုင်ရာဌာန၏ အကြီးအကဲအဖြစ် အမည်ခံထားသော ဌာနမှူးချင်းကျန့်ယုံသည် လက်တွေ့တွင် အရုပ်တစ်ခုမျှသာ ဖြစ်သည်။

ဌာနမှူးချင်းသည် ရာထူးအမည်သာ ရှိသော်လည်း ဘာကိုမျှ စီမံခန့်ခွဲခြင်း မရှိဘဲ သက်တမ်းကုန်လျှင် တရားဝင် အနားယူရန် အချိန်ဆွဲနေခြင်းသာ ဖြစ်၏။

ထိုခေတ်ကာလ အရာရှိလောက၏ မပြဌာန်းထားသော စည်းမျဉ်းများအရ အရာရှိတစ်ဦးသည် ပုံမှန်အတိုင်း အနားယူလျှင် ၎င်းတို့၏ ရာထူးထက် တစ်ဆင့်မြင့်သော ဘွဲ့အမည်ကို ရရှိတတ်သည်။ ထိုအချိန်တွင် တစ်သက်လုံး ဆဋ္ဌမအဆင့် အရာရှိအဖြစ် နေခဲ့သော ဌာနမှူးချင်သည် ပဉ္စမအဆင့် အရာရှိတစ်ဦး၏ ခံစားခွင့်ကို ရရှိနိုင်မည် ဖြစ်၏။

"အရာရှိဝူ၊ ခင်ဗျားနေမကောင်းဘူးဆိုရင် ရက်အနည်းငယ် ကောင်းကောင်း အနားယူပါ။ ကျွန်တော်ဒီတစ်ခေါက် လာတာ အရေးကြီးကိစ္စ မဟုတ်ပါဘူး။ ခင်ဗျားကို အကူအညီအသေးအဖွဲတစ်ခု တောင်းချင်လို့ပါ"

ဝေရှင်းဝူသည် တဟားဟား ရယ်မောရင်း ဝူကျိရှန်း၏ နားအနီးသို့ ကပ်ကာ တိုးတိုးလေး ပြောလိုက်၏။

"ကျွန်တော့်ကို ကိုယ်ဝန်မြဲဆေး အချို့ ဖော်ပေးပါဦး"

"ကိုယ်ဝန်မြဲဆေးလား"

ဝူကျိရှန်းသည် ချက်ချင်းပင် ဆွံ့အသွားလေသည်။

"ကိုယ်ဝန်မြဲဆေးဆိုတာ ကိုယ်ဝန်ဆောင် အမျိုးသမီးတွေအတွက်လေ။အရာရှိဝေလို ယောက်ျားကြီးတစ်ယောက်က ကိုယ်ဝန်မြဲဆေးကို ဘာလုပ်ဖို့လဲ"

ယောက်ျားကြီးတစ်ယောက်က ကိုယ်ဝန်မြဲဆေး တောင်းနေခြင်းမှာ အလွန် ရယ်စရာကောင်းလှသည်။ ဝူကျိရှန်းသာမက ချင်းချင်းနှင့် သခင်မလေးရွန့်တို့ပင် မှင်တက်သွားကြပြီး ဝေရှင်းဝူကို သတ္တဝါဆန်းတစ်ခုကဲ့သို့ ကြည့်နေကြ၏။

"ငါတို့အားလုံးက ရင်းနှီးနေကြတာပဲ၊ ငါ သိက္ခာကျမှာကို မကြောက်ပါဘူး"

ဝေရှင်းဝူ၏ မျက်နှာတွင် ရှက်ပြုံးများ လွှမ်းနေသည်။

"အရာရှိဝူ၊ ခင်ဗျားကျွန်တော့်ရဲ့ မိသားစုနောက်ခံကို သိတာပဲ။ကျွန်‌တော်လွန်ခဲ့တဲ့ ခုနစ်နှစ်က လက်ထပ်ခဲ့ပြီးနောက်ပိုင်းမှမယားငယ်တစ်ယောက် ထပ်ယူခဲ့တယ်"

ဝေရှင်းဝူသည် ထင်ရှားသော မိသားစုမှ လာသူဖြစ်ရာ ငယ်ငယ်ရွယ်ရွယ်နှင့် ဇနီးကြီးတစ်ယောက်၊ မယားငယ်တစ်ယောက် ရှိနေခြင်းမှာ သာမန်ကိစ္စပင် ဖြစ်၏။

"ဒါပေမဲ့ ဒီလောက်နှစ်တွေ ကြာတဲ့အထိ ကျုပ်မှာ သားသမီး တစ်ယောက်မှ မရှိသေးဘူး။ ကျုပ်ရဲ့ ခန္ဓာကိုယ်မှာ ပြဿနာတစ်ခုခု ရှိနေတယ်လို့ ခံစားရတယ်"

တရားဝင်ဇနီးတစ်ဦးတည်းနှင့် သားသမီး မရခြင်း ဖြစ်ပါက ထိုဇနီးတွင် မြုံသောရောဂါ ရှိသည်ဟု ပြောနိုင်သော်လည်း မယားငယ် ထပ်ယူပြီးသည့်တိုင် သားသမီး မထွန်းကားပါက ယောက်ျားဖြစ်သူ၏ ပြဿနာ ဖြစ်နိုင် ပေသည်။

ဝေရှင်းဝူကိုယ်တိုင်လည်း ပြဿနာမှာ မိမိထံတွင်သာ ရှိရမည်ဖြစ်ပြီး လူတို့ အပြောများသော မြုံခြင်း ဖြစ်နိုင်သည်ဟု ထင်နေခဲ့၏။

ထို ရောဂါမျိုးသည် ထုတ်ပြောရန် ခက်ခဲဖြစ်ပြီး သိက္ခာကို အလွန်တန်ဖိုးထားသော ဝေရှင်းဝူကဲ့သို့ ထင်ရှားသော မိသားစုမှ သားတစ်ယောက်အဖို့ ပို၍ခက်ခဲပေသည်။

"ကျွန်တော်ထိုက်ယွမ်ခရိုင်ကို ရာထူးအသစ်နဲ့ လာတုန်းက ကိုယ်လုပ်တော် မိန်းကလေးတစ်ယောက်ကိုလည်း ခေါ်လာခဲ့တယ်"

ဝေရှင်းဝူသည် ခပ်ပြုံးပြုံးဖြင့် ပြော၏

"ယောက်ျားတစ်ယောက် အပြင်မှာ သွားလာနေတာ ဆိုတော့ အမျိုးသမီး မရှိလို့ မဖြစ်ဘူးလေ။ ကျွန်တော်အဲဒီမိန်းကလေးနဲ့ ညအနည်းငယ် အတူအိပ်ခဲ့တာ ဘာဖြစ်တယ်မှတ်လဲ"

"အဲဒီမိန်းကလေးမှာ ကိုယ်ဝန်ရှိသွားတာလား"

"အတိအကျပဲ"

ဝေရှင်းဝူသည် သူ၏ ပေါင်ကို ရိုက်ကာ ပြောသည်။

"အရာရှိဝူ ပြောတာ အမှန်ပဲ။ အဲဒီမိန်းကလေးမှာ ကိုယ်ဝန်ရှိလာလိမ့်မယ်လို့ ငါမထင်ထားခဲ့ဘူး"

"ကျုပ်တို့ ဝေမိသားစုမှာ သားသမီးကလွဲလို့ ဘာမှမလိုပါဘူး။ ဒီတစ်ခေါက် ကိုယ်ဝန်ရဖို့က အလွန်ခက်ခဲတာမို့ ဒါကို ထိန်းသိမ်းဖို့ ငါတို့ အစွမ်းကုန် လုပ်ရမှာပေါ့"

ဝေရှင်းဝူ၏ မျက်နှာတွင် အောင်နိုင်သူတစ်ဦး၏ အမူအရာ လွှမ်းနေ၏။

"ပြဿနာက ငါ့ဆီမှာ မဟုတ်ဘူး ထင်တယ်။ အခုကစပြီး ငါ့ရဲ့ ဇနီးနဲ့ မယားငယ် ရှေ့မှာ ယောက်ျားတစ်ယောက်လို ခေါင်းမော့ ရင်ကော့နိုင်ပြီ"

အစေခံမိန်းကလေးတစ်ဦးနှင့် အိပ်စက်ပြီး ကိုယ်ဝန်ရစေခြင်းမှာ ဝေရှင်းဝူအတွက် အလွန် ဝမ်းမြောက်စရာ ဖြစ်သော်လည်း တရားဝင် လက်ထပ်ထားခြင်း မရှိရာ ဝေမိသားစုသည် နိမ့်ကျသော အဆင့်အတန်းရှိသည့် အစေခံကို အသိအမှတ်ပြုချင်မှ ပြုမည် ဖြစ်သည်။ သူသည် ထိုမိန်းကလေး ကလေးမွေးဖွားပြီးမှသာ ကိုယ်ဝန်ကြောင့် လက်ထပ်ခြင်း ဖြစ်ကြောင်း အကြောင်းပြချက်ပြကာ ကိစ္စကို အပြီးသတ်ရမည် ဖြစ်၏။

"အော်... ဒါကြောင့်ကိုး၊ ငါ အခုပဲ နားလည်သွားပြီ"

ဝူကျိရှန်းသည် ပြုံးလိုက်သည်။

"ကိုယ်ဝန်မြဲဆေးက ပြောရလွယ်ပါတယ်။ ဒါပေမဲ့ ဒီလိုအရာမျိုးကို စည်းကမ်းမရှိ သောက်လို့မရဘူး။ သူမမှာ တကယ် ကိုယ်ဝန်ရှိနေတာကို အရင်ဆုံး အတည်ပြုရမယ်"

"သူမမှာ ကိုယ်ဝန်ရှိနေတာ အသေအချာပဲ"

ဝေရှင်းဝူက ကျိန်ဆိုကာ ပြော၏။

"သူမက မကြာခဏ ပျို့အန်တတ်ပြီး အစားအသောက် ပျက်နေတယ်။ အားမရှိသလို ဖြစ်နေပြီး ဗိုက်ကလည်း အနည်းငယ် ပူလာပြီ။ ဒါကတော့ လုံးဝ မမှားနိုင်ပါဘူး"

"အရာရှိ‌ဝေပြောပုံအရ ဆိုရင်တော့ သူမမှာ ကိုယ်ဝန်ရှိနေတာ ဖြစ်ရမယ်။ ဒါဆိုရင် ခင်ဗျားကို အန်ကုန်းပိုင်ကျူးထန်း ဆေးညွှန်း ရေးပေးမယ်"

ဝူကျိရှန်းသည် ချင်းချင်းဘက်သို့ လှည့်ကာ ပြောလိုက်၏။

"စက္ကူနဲ့ စုတ်တံ ယူခဲ့ပါ"

ချင်းချင်းသည် စက္ကူနှင့် စုတ်တံကို ယူဆောင်လာခဲ့ပြီး ဝူကျိရှန်းသည် ချက်ချင်းပင် ဆေးညွှန်းကို ရေးသားလိုက်လေသည်။ အဖြူရောင်အတြတ်တီးလုတ် လေးလျန်၊ သစ်ကြံပိုးခေါက်အစိမ်း နှစ်လျန်၊ ပြုပြင်ထားသော အကွန်နိုက်၊ မြည်းသားရေကော်၊ အသီးငါးပါးဆေးမြစ်၊ ကန်စွန်းဥဖြူ၊ အိန်ဂျယ်လီကာမြစ်၊ ပြုပြင်ထားသော မြေကမ္ဘာဥ၊ စပါးလင်မြစ်နှင့် နွယ်ချို သတ်မှတ်ထားသော ပမာဏအသီးသီးနှင့် ချင်းခြောက် တစ်လျန် ဖြစ်၏။

"ဒီဆေးညွှန်းအတိုင်း ဆေးတစ်ခွက်ချင်းစီကို နှစ်ကြိမ် ပြုတ်ပြီးမနက်နှင့်ညသောက်ပါ၊ ခုနစ်ရက် ဆက်တိုက် သောက်ရမယ်"

"ဒီလောက် ရိုးရှင်းတာလား။ ဂျင်ဆင်း တို့ကြောင်ပန်းမြစ်တို့လိုမျိုး အားဆေးတွေ ထပ်ထည့်ဖို့ မလိုဘူးလား"

"ဒါနဲ့ တင် လုံလောက်ပါပြီ။ အားဆေးတွေကို စည်းကမ်းမရှိ လုံးဝ မသောက်ပါနဲ့။ ကိုယ်ဝန်ဆောင် အမျိုးသမီးတွေက ဂျင်ဆင်းကို ရှောင်ရမယ်"

"နားလည်ပါပြီ၊ နားလည်ပါပြီ"

ဝေရှင်းဝူသည် ကျေးဇူးတင်စကားဆိုကာ လက်အုပ်ချီလိုက်ပြီး တစ်ချိန်တည်းမှာပင် နောက်ပြောင်သော အမူအရာဖြင့် သခင်မလေးရွန့်ကို ပြော၏။

"ဒီကိစ္စကို အပြင်လူတွေ မသိပါစေနဲ့။ မရီး၊ ငါ့အတွက် လျှို့ဝှက်ချက်ကို ထိန်းသိမ်းပေးပါဦး"

သခင်မလေးရွန့်က အနည်းငယ် ပြုံးလိုက်သည်။

"အရာရှိဝေ၊ စိတ်ချပါ၊ ကျွန်မ နှုတ်လုံပါ့မယ်"

ဝေရှင်းဝူသည် ဆေးညွှန်းကို သိမ်းဆည်းကာ ဝမ်းမြောက်ဝမ်းသာဖြင့် ထွက်ခွာရန် ပြင်ဆင်နေစဉ် ဝူကျိရှန်းက သူ့ကို ပြန်ခေါ်လိုက်၏။

"အရာရှိဝေ၊ ခင်ဗျားလိုလူမျိုးက ကိုယ်ဝန်ဆောင် အမျိုးသမီးကို ပြုစုစောင့်ရှောက်မယ်ဆိုတာစိတ်မချရဘူး။ ခင်ဗျားကို စကားအချို့ ထပ်မှာရဦးမယ်"

"အမျိုးသမီးတစ်ယောက် ကိုယ်ဝန်ရှိတဲ့အခါ အနားယူရုံတင် မဟုတ်ဘဲ ပေါ့ပါးတဲ့ လှုပ်ရှားမှုအချို့လည်း လုပ်ဖို့ လိုအပ်တယ်၊ ဒါပေမဲ့ အရမ်း ပြင်းထန်တာမျိုးတော့ မဖြစ်စေနဲ့"

"ပြီးတော့ အေးစက်တဲ့ အစားအစာတွေနဲ့ စပ်တဲ့ အစားအစာတွေကို လျှော့စားတာ အကောင်းဆုံးပဲ၊ တတ်နိုင်သမျှ အရက်ကိုလည်း ရှောင်ပါ။ နေ့စဉ် အစားအစာမှာ ငါး၊ အမဲသားနဲ့ ဆိတ်သားတို့ကို ပိုစားတာက အဆင်ပြေစေပြီး သစ်ကြားသီးနဲ့ ဗာဒံစေ့တွေကလည်း ကိုယ်ဝန်မြဲဖို့ အထောက်အကူ ပြုပါတယ်"

"ကျွန်တော်အားလုံးကို မှတ်သားထားပါ့မယ်။ ထွားထွားကြိုင်းကြိုင်း သားလေးတစ်ယောက် မွေးလာတဲ့အခါ သင့်ကို ကျေးဇူးတင်ဖို့ ကလေးကို သေချာပေါက် ခေါ်လာခဲ့ပါ့မယ်"

သူမ မွေးဖွားမည့်ကလေးက သား ဖြစ်လိမ့်မည်ဟု မည်သို့ သိနိုင်ပါသနည်း။ ယခုခေတ်ကာလတွင် အာထရာဆောင်း စက်လည်း မရှိချေ။

"ဒါကတော့ သေချာပေါက် သားလေးပဲ"

ဝေရှင်းဝူက ယုံကြည်မှုအပြည့်ဖြင့် ပြော၏။

"စကားပုံ ရှိတယ်မဟုတ်လား၊ ချဉ်တာကြိုက်ရင် သား၊ စပ်တာကြိုက်ရင် သမီးတဲ့။ သူမကဆီးသီးခြောက်ကိုတအား ကြိုက်နေတာမို့ ဒါက သေချာပေါက် သားလေးပဲ၊ မမှားနိုင်ဘူး"

"ဒါဆိုရင် အရာရှိဝေကို ထပ်ပြီး မှာရဦးမယ်။ ဆီးသီးခြောက်က အေးတဲ့သဘောရှိလို့သူ့ရဲ့ ဆေးဖက်ဝင် အာနိသင်က ကိုယ်ဝန်မြဲတာနဲ့ ဆန့်ကျင်ဘက် ဖြစ်တယ်။ တတ်နိုင်ရင် မစားတာ အကောင်းဆုံးပဲ"

"ကျုပ်ဒီနေ့ လူမှန်ကို ရှာဖွေတွေ့ရှိခဲ့တာပဲ"

ဝေရှင်းဝူသည် တဟားဟား ရယ်မောလေသည်။

"တကယ်လို့ ငါ တခြားသမားတော်ကို ရှာခဲ့ရင် သူတို့က ဒီလောက်အထိ အသေးစိတ် ဂရုစိုက်ပါ့မလား။ ဘာမှ ထပ်မပြောနဲ့တော့၊ နောက်မှ ခင်ဗျားကို အရက် အဝတိုက်မယ်"

*********

အခန်း(၁၀၂) အထင်လွဲပြီ

ချင်းချင်းသည် ပိတ်လှောင်ထားခံရစဉ်ကရခဲ့သောဆာလောင်မွတ်သိပ်ခြင်းနှင့် အအေးဒဏ်ကြောင့် အအေးမိသွားပြီးနလန်မထူနိုင်သေးဘဲဖြစ်နေ၏။

သူမသည် ပူပူနွေးနွေး ချင်းသကြားရည်အချို့ကို သောက်ခဲ့ပြီး ချွေးထွက်သွားစေရန် စောင်ပုံထဲတွင်အိပ်နေခဲ့သော်လည်း နေကောင်းမလာခဲ့ချေ။

အအေးမိရုံမျှသာ ဖြစ်ပြီး ပြင်းထန်သော ရောဂါ မဟုတ်သော်လည်း ချင်းချင်း၏ ရင်ထဲတွင်မူ စိုးရိမ်ပူပန်မှုများဖြင့် လေးလံနေခဲ့သည်။

အကြောင်းမှာသူမသည် မိမိကိုယ်မိမိ နေမကောင်းဖြစ်ခြင်း မဟုတ်ဘဲ ကိုယ်ဝန်ရှိနေသည်ဟု သံသယဝင်နေသောကြောင့် ဖြစ်၏။

ထိုရယ်စရာကောင်းသော အတွေးမျိုး ပေါ်လာရခြင်းမှာ ဝေရှင်းဝူကြောင့်ဖြစ်သည်။

ဝေရှင်းဝူသည်သူ၏အစေခံမိန်းကလေးတွင် ကိုယ်ဝန်ရှိနေသဖြင့် ဝူကျိရှန်းထံ ကိုယ်ဝန်မြဲဆေး လာတောင်းခြင်း ဖြစ်၏။ကိစ္စမှာ မူလက ချင်းချင်းနှင့် ဘာမှမဆိုင်သော်လည်း သူမကို မလိုအပ်သော အတွေးများ ဆက်စပ်တွေးတောမိစေခဲ့သည်။

မင်းဆက်မင်ခေတ်ကာလတွင် ဓလေ့ထုံးတမ်းများသည် ရှေးရိုးစွဲဆန်ပြီး အခြေခံ ခန္ဓာကိုယ်ဗေဒ ဗဟုသုတများ အလွန် ချို့တဲ့လှသည်။အိမ်ထောင်မပြုရသေးသော မိန်းကလေးငယ်အချို့သည် ကလေး မည်သို့ ရရှိလာသည်ကိုပင် လုံးဝ မသိကြချေ။

သခင်မလေးရွန့်ကိုယ်တိုင်ပင်ဘာမှမသိချေ။သခင်မလေးရွန့်၏ အသက်အရွယ်မှာ အပျိုကြီး'ဟု သတ်မှတ်၍ ရနေပြီ ဖြစ်သော်လည်း သူမသည် အိမ်ပြင်သို့ပင် မထွက်ဖူးဘဲ ဂရုတစိုက် စောင့်ရှောက်ခံခဲ့ရသော သမီးပျိုတစ်ဦးသာ ဖြစ်သည်။

သူမသည် သမိုင်းနှင့် စာပေကျမ်းဂန်များကို ကောင်းစွာ တတ်မြောက်သော်လည်း ယောက်ျားနှင့် မိန်းမကြားရှိ ကိစ္စရပ်များကိုမူ ဘာမှမသိချေ။ လက်ထပ်ခါနီး ညမှသာ မိခင်ဖြစ်သူ၏ အသေးစိတ် ဆုံးမသွန်သင်မှုကြောင့် ထိုကိစ္စရပ်များ၏ သဘောတရားကို နောက်ဆုံးတွင် နားလည်သွားခဲ့ခြင်း ဖြစ်သည်။

ထိုကိစ္စရပ်များသည် ထုတ်ဖော်မပြောအပ်သောလျှို့ဝှက်ချက်များဖြစ်ပြီး ပြောရန် အမြဲ ရှက်စရာကောင်းလှရာဗဟုသုတမျိုးမရှိ တစ်ခါမျှ မထိတွေ့ဖူးသော ချင်းချင်းမှာ လုံးဝ မသိနားမလည် ဖြစ်နေခဲ့၏။

ချင်းချင်းသည် လင်မယားကြားရှိ ကိစ္စရပ်များက ဘယ်လိုလဲဆိုသည်ကို မသိပါက ကိုယ်ဝန်ရရှိခြင်း၏ ပုံမှန်လုပ်ငန်းစဉ် ကို ပို၍ပင် မသိနိုင်ချေ။

သူမသည် အိမ်ထောင်ပြုလိုက်သည်နှင့် အပင်များ ပန်းပွင့်ပြီး အသီးသီးသကဲ့သို့ မည်သည့် လှုပ်ရှားမှု မျှ မလိုဘဲ သဘာဝအတိုင်း ကိုယ်ဝန်ရကာ ကလေးမွေးဖွားလာမည်ဟုသာ ရိုးသားစွာ ယုံကြည်နေခဲ့သည်။

ယနေ့တွင် ဝေရှင်းဝူက သူ၏ အစေခံမိန်းကလေး ကိုယ်ဝန်ရှိသည့်အကြောင်း ပြောမှသာ ချင်းချင်းသည် ယောက်ျားတစ်ယောက်နှင့် မိန်းမတစ်ယောက် အတူအိပ်လျှင် ကိုယ်ဝန်ရနိုင်ပြီး ကလေးမွေးနိုင်သည်ဟူသောအချက်ကိုအကြမ်းဖျင်းနားလည်သွားခဲ့ခြင်း ဖြစ်သည်။

ဝေရှင်းဝူနှင့် သူ၏ အစေခံမိန်းကလေးသည် ညအနည်းငယ် အတူအိပ်ခဲ့သဖြင့်ကိုယ်ဝန်ရှိသွားတယ်။ဒါဆိုငါနှင့် သခင်လေးတို့ အကျဉ်းချခံရစဉ်ကလည်း ညအနည်းငယ် အတူအိပ်ခဲ့ကြသည်။ ငါလည်း ကိုယ်ဝန်ရှိနေနိုင်တာလား။

ဝေရှင်းဝူ ပြောပုံအရ ဆိုလျှင် အမျိုးသမီးတစ်ဦး ကိုယ်ဝန်ရှိလာသောအခါ တစ်ကိုယ်လုံး အားအင်ကုန်ခမ်းကာ ဘာကိုမျှ မလုပ်ချင်မကိုင်ချင် ဖြစ်တတ်ပြီး အစားအသောက်ပျက်ခြင်း၊ ခဏခဏ ပျို့အန်ခြင်းနှင့် ချဉ်သောအရာများကို အထူး တပ်မက်ခြင်းတို့ ဖြစ်တတ်သည်ဟူ၏။

ချင်းချင်းသည် ပြင်းထန်သော အအေးပတ်ခြင်းကို ခံစားနေရသဖြင့် ခြေလက်များ နုံးချိကာ အားအင်ကုန်ခမ်းနေပြီး အမြဲ အိပ်ချင်နေခဲ့သည်။

သူမအစိုးရိမ်ဆုံး အချက်မှာပုံမှန်အားဖြင့် အသားဟင်းများကို အလွန်ကြိုက်တတ်သော ချင်းချင်းသည် ယင်းတို့ကိုမြင်လျှင် မအီမသာ ဖြစ်လာပြီး ရံဖန်ရံခါ အော့အန်ချင်သလို ဖြစ်လာသည်။

ထို့ပြင် ချင်းချင်းသည် ဆီးသီးခြောက်ကိုလည်း အလွန် စားချင်နေခဲ့၏။

လက္ခဏာအားလုံးသည် ဝေရှင်းဝူ ပြောခဲ့သော ကိုယ်ဝန်ဆောင် လက္ခဏာများနှင့် တစ်ထေရာတည်း တူညီနေလေသည်။

ထို့ကြောင့် ချင်းချင်းသည် မိမိကိုယ်မိမိ သေချာပေါက် ကိုယ်ဝန်ရှိနေပြီဟု တစ်ဦးတည်း ထင်မှတ်သွားခဲ့၏။

ရယ်စရာကောင်းသော ထင်မြင်ချက်ကြောင့် ချင်းချင်းမှာ ဝမ်းမြောက်မိသလို တစ်ဖက်ကလည်း ကြောက်ရွံ့မိသည်။

ချင်းချင်းသည် သခင်လေးအပေါ် နက်ရှိုင်းသော သံယောဇဉ် ရှိနေပြီးသား ဖြစ်ကာ နောင်တွင် ဝူကျိရှန်း၏ မယားငယ် ဖြစ်လာလိမ့်မည်ကိုလည်း သိထား၏။ ၎င်းမှာ သူမ၏ ကံကြမ္မာပင် ဖြစ်သည်။ သခင်လေး၏ ကလေးကို လွယ်ထားရခြင်းမှာ သေချာပေါက် ဝမ်းမြောက်စရာ ကိစ္စတစ်ခု ဖြစ်ရမည်။

သူမ ကြောက်ရွံ့သည်မှာ သခင်မလေးရွန့်ထက် အရင် ကိုယ်ဝန်ရှိသွားခြင်း ဖြစ်ပြီး ၎င်းမှာ ကောင်းသောအချက် မဟုတ်ချေ။

သခင်မလေးရွန့်သည် ဝူကျိရှန်း၏ တရားဝင် ဇနီးကြီး ဖြစ်ပြီး သူမမှာမူ ရာထူးအဆင့်အတန်း မရှိသော အစေခံမိန်းကလေးမျှသာ ဖြစ်ရာ ကိုယ်ဝန်ကိစ္စတွင် ပထမဆုကို ယူလိုက်သလို ဖြစ်နေသည်။ သခင်မလေးရွန့်က သူမအပေါ် မည်မျှပင် ကောင်းစေကာမူ ကိုယ်ဝန်အကြောင်းကို သိသွားလျှင် မသူမကို ဆက်လက် လက်ခံနိုင်မည်မဟုတ်ပေ။

ဇနီးကြီးများက မယားငယ်များကို နှိပ်စက်ခြင်း၊မယားငယ်၏ ကလေးကို ဖျက်ချရန်'နည်းလမ်းမျိုးစုံ သုံးခြင်းစသည့် အဖြစ်အပျက်များသည် အဆန်းမဟုတ်ချေ။ ချင်းချင်းသည် တွေးမိလေလေ ပို၍ ကြောက်လန့်မိလေလေ ဖြစ်၏။

ချင်းချင်းနှင့် သခင်မလေးရွန့်တို့၏ သခင်နှင့် အစေခံ ဆက်ဆံရေးမှာ မူလက အလွန် ကောင်းမွန်ခဲ့သော်လည်း မိမိကိုယ်မိမိ ကိုယ်ဝန်ရှိနေပြီ ဟု သံသယဝင်မိကတည်းက သူမသည် သခင်မလေးရွန့်နှင့် မသိမသာ ခပ်ခွာခွာ နေလာခဲ့သည်။

ညဉ့်နက်လာသောအခါ ချင်းချင်းသည် ကုတင်ပေါ်တွင် လဲလျောင်းရင်း မိမိ၏ ဗိုက်ကို မသိစိတ်ဖြင့် ပွတ်သပ်နေမိပြီး သူမ၏ ဝမ်းဗိုက်ထဲတွင်သက်ရှိတစ်‌ ယောက်တကယ်ပင် ကြီးထွားနေသကဲ့သို့ ခံစားနေရ၏။

ထိုစဉ် တံခါးဝမှ စည်းချက်ကျကျ 'ဒေါက် ဒေါက်' ဟု တံခါးခေါက်သံ ထွက်ပေါ်လာသည်။

တကယ်လို့ သခင်မလေးရွန့် တံခါးခေါက်ခြင်း ဖြစ်ပါက ချင်းချင်းသည် သေချာပေါက် ထကာ ကြိုဆိုမိမည် ဖြစ်သော်လည်း တံခါးခေါက်နေသူမှာ သခင်မလေးရွန့် မဟုတ်ဘဲ သခင်လေး ဝူကျိရှန်း ဖြစ်မှန်း သူမ သိလိုက်၏။

ချင်းချင်းသည် သခင်လေးကို အမြဲတမ်း အလွန် ရင်းနှီးသည်ဟု ခံစားရပြီး တကယ့် မိသားစုဝင်ကဲ့သို့ ဖြစ်ရာ မည်သည့် အခမ်းအနားမျှ မလိုသလို၊ ခစားရိုသေရန်လည်း မလိုအပ်ချေ။ သူမက သာမန်အတိုင်းပင် ပြောလိုက်သည်။

"တံခါး မပိတ်ထားပါဘူး၊ သခင်လေး၊ ဝင်ခဲ့ပါ"

"ရာသီဥတုက အေးလာပြီ၊ ငါ နင့်အတွက် စောင်တစ်ထည် ထပ်ယူလာပေးတာ"

မိမိ၏ ညီမငယ်လေးကို ဂရုစိုက်သကဲ့သို့ ဝူကျိရှန်းသည် အသစ်စက်စက် ဂွမ်းစောင်ကို ချင်းချင်း၏ ကုတင်ပေါ်တွင် တိုက်ရိုက် ခြုံပေးလိုက်ပြီးနောက် ဘာမှမပြောဘဲ လှည့်ထွက်သွား၏။

"သခင်လေး"

စောင်ပုံထဲတွင် ကွေးနေသော ချင်းချင်းက တိုးတိုးလေး ခေါ်လိုက်သည်။

"တစ်ခုခု လိုသေးလို့လား"

ဝူကျိရှန်းက ချင်းချင်းကို လှည့်ကြည့်၏။

ချင်းချင်းသည် သူမ၏ ကိုယ်ဝန် အကြောင်းကိုပြောပြချင်သဖြင့် စကားလုံးများမှာ နှုတ်ခမ်းဖျားသို့ ရောက်နေပြီ ဖြစ်သော်လည်း ပြန်လည် မြိုသိပ်လိုက်ကာ ဘာမှမဟုတ်ပါဘူး၊ သာမန်ပဲ မေးကြည့်တာပါဆိုသည့် အမူအရာမျိုး လုပ်လိုက်သည်။

"စောစောက အရာရှိဝေ ပြောတော့ သူ့ရဲ့ အစေခံမိန်းကလေးမှာ ကိုယ်ဝန်ရှိနေတယ်ဆို"

"ကိုယ်ဝန်ရှိတော့ ဘာဖြစ်လဲ၊ အဲဒါက နင်နဲ့ ဘာဆိုင်လို့လဲ"

"ဒါ... ဒါက ကျွန်မနဲ့မဆိုင်ပါဘူး။ သာမန်ပဲ မေးကြည့်တာပါ"

စောင်ထဲတွင် လဲလျောင်းနေသော ချင်းချင်းသည် ဝူကျိရှန်း၏ မျက်လုံးများကို မသိစိတ်ဖြင့် ရှောင်လွှဲကာ ပြတင်းပေါက် အပြင်ဘက်သို့ ကြည့်လိုက်၏။

ပြတင်းပေါက် အပြင်ဘက်ရှိ မှောင်မိုက်သော ညအမှောင်ကို ကြည့်ရင်း ချင်းချင်းက တိုးတိုးလေး ပြောသည်။

"အဲဒီအရာရှိဝေမှာ ဇနီး ရှိနေတာပဲ။ အခု အစေခံမိန်းကလေးမှာ ကိုယ်ဝန်ရှိလာတော့ တကယ်လို့ သူက အဲဒီ သနားစရာကောင်းတဲ့ မိန်းကလေးကို စွန့်ပစ်လိုက်ရင် ဘာဖြစ်သွားမလဲ"

"သူက မိန်းကလေးကို ကိုယ်ဝန်ရအောင် လုပ်ပြီးမှ စွန့်ပစ်ရင် လူ လို့ ခေါ်ဦးမလား"

ဝူကျိရှန်းက ရယ်မောကာ ပြော၏။

"ဝေရှင်းဝူက ဖြုန်းတီးတတ်တဲ့ လူရှုပ်လူပွေတစ်ယောက်လို ပြုမူတတ်ပေမဲ့ သူက သံယောဇဉ်ရှိတဲ့ ယောက်ျားတစ်ယောက်ပဲ။ သူ ဒီလို လူမဆန်တဲ့ ကိစ္စမျိုးတော့ လုပ်မှာ မဟုတ်ပါဘူး"

"ဒါ့အပြင် သူကိုယ်တိုင်လည်း သားသမီး မရှိဘူးလေ။ အခု အစေခံမိန်းကလေးမှာ ကိုယ်ဝန်ရှိလာတာက သူ အလိုချင်ဆုံး အရာ မဟုတ်ဘူးလား"

ဝူကျိရှန်းသည် သူ၏ မေးစေ့ကို ပွတ်သပ်ရင်း ခပ်ပြုံးပြုံးဖြင့် ပြောသည်။

"နင် ဝေရှင်းဝူရဲ့ အစေခံမိန်းကလေးအတွက် စိတ်ပူနေဖို့ မလိုပါဘူး"

"ဒါပေမဲ့... အရာရှိဝေက မြင့်မြတ်တဲ့ အဆင့်အတန်း ရှိပြီး အဲဒီမိန်းကလေးကတော့ အလွန် နိမ့်ကျတယ်။ သူ့ရဲ့ ဇနီးကြီးက အဲဒီ အစေခံမိန်းကလေးကို လက်ခံနိုင်ပါ့မလား"

"ဇနီးကြီးက သားသမီး မမွေးရသေးခင် အစေခံမိန်းကလေးက အရင် ကိုယ်ဝန်ရတာကတော့ တကယ်ပဲ ပြောရခက်တဲ့ ကိစ္စတစ်ခု ဖြစ်တယ်။ ဒါပေမဲ့ အရမ်း စိတ်ပူစရာတော့ မလိုပါဘူး"

ဝူကျိရှန်းက ပြုံးလိုက်၏။

"ဝေရှင်းဝူက အစီအစဉ် ဆွဲထားပြီးသားပဲ။ သူက အဲဒီမိန်းကလေးကို ကလေး အရင် မွေးခိုင်းပြီးမှ ကလေးကို ဇနီးဖြစ်သူထံ ခေါ်သွားဖို့ ရည်ရွယ်ထားတာ။ အဲဒီအချိန်ကျရင် အရာအားလုံးက ပြီးဆုံးသွားပြီ ဖြစ်လို့ သူ့ဇနီးက သဘောမတူရင်တောင် ဘာမှတတ်နိုင်မှာ မဟုတ်တော့ဘူး။ သူက အဲဒီမိန်းကလေးကို မယားငယ်အဖြစ် အိမ်ထဲ ခေါ်သွင်းပြီး တရားဝင် အဆင့်အတန်းတစ်ခု ပေးမှာပါ"

ဝူကျိရှန်း၏ စကားကို ကြားရသောအခါ ချင်းချင်း၏ ရင်ထဲတွင် ချက်ချင်းပင် အာမခံချက်တစ်ခု ရလိုက်သကဲ့သို့ ဝမ်းမြောက်သွားလေသည်။ သူမက ကျေနပ်စွာဖြင့် ပြော၏။

"ဒါဆိုရင်တော့ ကျွန်မ စိတ်အေးသွားပါပြီ"

"ဒါက အရာရှိဝေရဲ့ မိသားစုကိစ္စပဲ၊ နင်က ဘာလို့ ဒီလောက် စိတ်ပူနေတာလဲ"

ဝူကျိရှန်းသည် ချင်းချင်း၏ စောင်ကို နောက်တစ်ကြိမ် သေသေချာချာ ခြုံပေးလိုက်သည်။

"အဲဒီ ရှုပ်ထွေးတဲ့ အရာတွေကို လျှောက်မတွေးနဲ့တော့။ စောစော အိပ်"

ထိုညတွင် ချင်းချင်းသည် မိမိ၏ ဗိုက်ကို ပွတ်သပ်ရင်း အလွန် နှစ်ခြိုက်စွာ အိပ်ပျော်သွားခဲ့ပြီး အိပ်မက်ကောင်းတစ်ခုပင် မက်ခဲ့၏။ အိပ်မက်ထဲတွင် ချင်းချင်းသည် အသံထွက်၍ပင် တဟီးဟီး ရယ်မောနေမိလေတော့သည်။

*********