အခန်း (၃၇၄-၃၇၅)

အခန်း (၃၇၄) ဟိန်းဟောက်သံ

တိုင်ဖန်းရွှမ်း၏ မျက်လုံးများထဲတွင် စိတ်လှုပ်ရှားမှုများ ပြည့်နှက်နေ၏။

သူ နောက်ထပ် ရက်အနည်းငယ်ခန့် စောင့်ဆိုင်းရမည်ဟု ထင်ခဲ့သည်။

မည်သို့ပင်ဆိုစေ ချန်ဖေးက မနေ့ကမှ အနက်ရောင် မြို့တော်သို့ ရောက်လာခဲ့ခြင်း ဖြစ်ပြီး အနက်ရောင် မြို့တော်သို့ လာရောက်သူ အများစုမှာ အနည်းဆုံး ရက်အနည်းငယ်ခန့် နေထိုင်လေ့ ရှိကြသည်။

သုံးနှစ်နီးပါး ကြာအောင် အံကြိတ် သည်းခံခဲ့ရပြီးပြီ ဖြစ်ရာ နောက်ထပ် ရက်အနည်းငယ် စောင့်ဆိုင်းရုံဖြင့် တိုင်ဖန်းရွှမ်းအတွက် ပြဿနာ မရှိပေ။

ထို့အပြင် နောက်ပိုင်းတွင် ချန်ဖေးကို ကိုယ်တိုင်ကိုယ်ကျ သတ်ဖြတ်ရမည် ဆိုလျှင် ပို၍ အံ့သြဖွယ် ကောင်းမည် မဟုတ်ပါလား။

အကောင်းဆုံးကတော့ ချန်ဖေးကို ပြင်းထန်စွာ ဒဏ်ရာရစေပြီး သေလုမျောပါး ဖြစ်သွားစေချင်သည်။ ထိုသို့ဆိုလျှင် တိုင်ဖန်းရွှမ်း အနေဖြင့် ချန်ဖေးကို နှိပ်စက်ရန် အချိန် လုံလုံလောက်လောက် ရရှိမည် ဖြစ်သည်။

ချန်ဖေးကို ဒီလောက် လွယ်လွယ်လေး သေခွင့်ပေးလိုက်ရင် သူရဲ့ သုံးနှစ်တာ နာကျင်မှုတွေကို ဘယ်လိုလုပ် ချေဖျက်နိုင်ပါ့မလဲ။

သို့သော် တိုင်ဖန်းရွှမ်းက မြောင်ချီရှန်းကို ဤတောင်းဆိုချက်မျိုး မလုပ်ခဲ့ချေ။

မည်သို့ပင်ဆိုစေ တောင်းဆိုမှု တစ်ခု ရှိနေခဲ့ပြီး မြောင်ချီရှန်းက ကူညီပေးခဲ့ခြင်းက ကြီးမားသော ကျေးဇူး တစ်ခု ဖြစ်နေပြီ ဖြစ်ရာ စကားများများ ပြောခြင်းက မကောင်းနိုင်ပေ။

သို့သော် တိုင်ဖန်းရွှမ်းက အစောက ချန်ဖေး၏ ခန္ဓာကိုယ် ကြံ့ခိုင်မှုနှင့် ထူးခြားသော အမွေအနှစ်အကြောင်းကို အထူး ပြောပြခဲ့ခြင်းမှာ မြောင်ချီရှန်းကို ဆွဲဆောင်ရန်အပြင် ချန်ဖေး၏ အသက်ကို တမင်တကာ ချန်ထားခဲ့ရန်လည်း ရည်ရွယ်ခဲ့ခြင်း ဖြစ်သည်။

မည်သို့ပင်ဆိုစေ ထိုကျင့်စဉ်ကို ကိုယ်ပေါ်တွင် ယူဆောင်လာလေ့ မရှိသဖြင့် နှိပ်စက်ညှဉ်းပန်းမှုများကို တိုးမြှင့်ကာ ထိုကျင့်စဉ် အကြောင်းကို မေးမြန်းဖော်ထုတ်ရမည် ဖြစ်သည်။

ကျင့်စဉ်ကို မေးမြန်းရရှိပြီးပါက ချန်ဖေး သေသည်ဖြစ်စေ၊ ရှင်သည်ဖြစ်စေ မြောင်ချီရှန်းက ဂရုစိုက်တော့မည် မဟုတ်ဟု ခန့်မှန်းရသည်။

ထိုအချိန်ကျလျှင် ချန်ဖေး၏ အသက်ရှင်ခြင်းနှင့် သေဆုံးခြင်းကို တိုင်ဖန်းရွှမ်းက အပြည့်အဝ ထိန်းချုပ်ခွင့် ရရှိမည် ဖြစ်သည်။

ဤအချက်ကို တွေးမိသောအခါ တိုင်ဖန်းရွှမ်း၏ မျက်လုံးများက စိတ်လှုပ်ရှားမှုနှင့် ရက်စက်ကြမ်းကြုတ်မှုတို့ ရောနှောနေပြီး အမျိုးမျိုးသော နှိပ်စက်နည်းများက တိုင်ဖန်းရွှမ်း၏ စိတ်ထဲတွင် ဖြတ်ပြေးသွားခဲ့ပြီ ဖြစ်သည်။

တိုင်ဖန်းရွှမ်း၏ စိတ်လှုပ်ရှားမှုနှင့် နှိုင်းယှဉ်ပါက မြောင်ချီရှန်းမှာ အတော်လေး တည်ငြိမ်နေပုံ ရသည်။

မြောင်ချီရှန်း အတွက်မူ မြို့ပြင်ထွက်၍ ဒွာရသန့်စင်ခြင်း အစောပိုင်းအဆင့် သိုင်းပညာရှင် တစ်ယောက်ကို သတ်ဖြတ်ရုံမျှသာ ဖြစ်သည်။

မိုးမျှော်စင်၏ အကြီးအကဲ တစ်ယောက် အနေဖြင့် မြောင်ချီရှန်းက ရံဖန်ရံခါ တာဝန်များ ထမ်းဆောင်လေ့ ရှိပြီး အများစုမှာ ဒွာရသန့်စင်ခြင်း အစောပိုင်းအဆင့် သိုင်းပညာရှင်များကို သတ်ဖြတ်ခြင်းသာ ဖြစ်သည်။

အများစုက ဂိုဏ်းမဲ့ ကျင့်ကြံသူများ ဖြစ်သော်လည်း ဂိုဏ်းများမှ လူအချို့လည်း ပါဝင်သည်။

လွန်ခဲ့သော နှစ်အနည်းငယ်က မြောင်ချီရှန်းက ဒွာရသန့်စင်ခြင်း အလယ်အလတ်အဆင့် သိုင်းပညာရှင် တစ်ယောက်ကိုပင် သတ်ဖြတ်ခဲ့ဖူးသည်။

အဆင့်တူ သိုင်းပညာရှင်များ တိုက်ခိုက်ရာတွင် ဒဏ်ရာ အချို့ ရရှိခြင်းမှာ မလွှဲမရှောင်သာ ဖြစ်သော်လည်း ထိုတိုက်ပွဲတွင် မြောင်ချီရှန်းက အနည်းငယ်မျှပင် ဒဏ်ရာ မရရှိခဲ့ဘဲ ထိုဒွာရသန့်စင်ခြင်း အလယ်အလတ်အဆင့် သိုင်းပညာရှင်ကို အလွယ်တကူ သတ်ဖြတ်နိုင်ခဲ့သည်ဟု ဆိုနိုင်သည်။

ထိုစွမ်းဆောင်ရည်က ထိုအချိန်က မိုးမျှော်စင် တစ်ခုလုံးကို အံ့အားသင့်သွားစေခဲ့ပြီး မြောင်ချီရှန်း၏ အဆင့်အတန်းကို တစ်ဟုန်ထိုး တည်ဆောက်ပေးခဲ့သည်။

ချန်ဖေးမှာ အခြားသော ဒွာရသန့်စင်ခြင်း အဆင့်များနှင့် နှိုင်းယှဉ်ပါက အလွန်ဆုံး ယွမ်ချန်ဓားဂိုဏ်း၏ နောက်ခံ တစ်ခု ပိုရှိနေခြင်းသာ ဖြစ်သည်။

ယခင်က သူ သတ်ဖြတ်ခဲ့သော ဂိုဏ်းများမှ ဒွာရသန့်စင်ခြင်း အဆင့်များနှင့် နှိုင်းယှဉ်ပါက ယွမ်ချန်ဓားဂိုဏ်းက သေချာပေါက် အတော်လေး အစွမ်းထက်ပေလိမ့်မည်။

မည်သို့ပင်ဆိုစေ ဒွာရသန့်စင်ခြင်း နောက်ဆုံးအဆင့် ပညာရှင် နှစ်ယောက် ရှိနေခြင်းက သာမန်ဂိုဏ်းများတွင် မည်သို့ ရှိနိုင်မည်နည်း။

သို့သော် ယွမ်ချန်ဓားဂိုဏ်း၏ ဤနောက်ခံကို ဘေးဖယ်ထားလိုက်ပါက ချန်ဖေးက ဒွာရသန့်စင်ခြင်း အစောပိုင်းအဆင့် တစ်ယောက်မျှသာ ဖြစ်ပြီး ဒွာရသန့်စင်ခြင်း အဆင့်သို့ ရောက်ရှိသည်မှာလည်း သုံးနှစ်သာ ရှိသေးသည်။

ပါရမီ မြင့်မားသော်လည်း အချိန်တိုတောင်းလွန်းသည် ဆိုသည့် အမှန်တရားကိုမူ ဖုံးကွယ်၍ မရနိုင်ချေ။

အနက်ရောင် မြို့တော် ပတ်ဝန်းကျင်မှာ စည်းကမ်းမဲ့ နယ်မြေတစ်ခု ဖြစ်ပြီး ဤနေရာတွင် သေဆုံးရသူ အလွန် များပြားလှရာ ချန်ဖေး တစ်ယောက် ထပ်တိုးလာခြင်းက မည်သည့် လှိုင်းဂယက်ကိုမျှ ဖြစ်ပေါ်စေမည် မဟုတ်ပေ။

"ကိုယ်ဖော့ပညာက မဆိုးဘူး... ငါတို့ကို သတိထားမိသွားလို့... သတိဝီရိယ ရှိသွားတာ ဖြစ်ရမယ်..."

မြောင်ချီရှန်းက ချန်ဖေး၏ ချီအရှိန်အဝါကို အာရုံခံလိုက်ပြီး ညင်သာစွာ ပြုံး၍ ပြောလိုက်သည်။

"ဒါဆို မြန်မြန် လိုက်ကြစို့... သူ့ကို အလွတ်မခံနဲ့..."

တိုင်ဖန်းရွှမ်းက အနည်းငယ် စိုးရိမ်တကြီး ပြောလိုက်၏။

ဤအဆင့်ထိ ရောက်နေပြီ ဖြစ်ရာ ချန်ဖေးသာ လွတ်မြောက်သွားပါက နောင်တွင် ဤသို့သော အခွင့်အရေးမျိုး မည်သည့်အချိန်တွင် ပြန်ရမည်ကို မသိနိုင်တော့သဖြင့် တိုင်ဖန်းရွှမ်း အနေဖြင့် မစိုးရိမ်ဘဲ မနေနိုင်ချေ။

"စိတ်မပူပါနဲ့... သူ ပြေးလို့ မလွတ်ပါဘူး..."

မြောင်ချီရှန်းက တိုင်ဖန်းရွှမ်း၏ ပခုံးကို ဖမ်းဆွဲလိုက်ပြီး သူ၏ ပုံရိပ် လက်ခနဲ ဖြစ်သွားကာ ပုံရိပ်ယောင်အဖြစ် ပြောင်းလဲသွားပြီး နေရာတွင် ပျောက်ကွယ်သွား၏။

မိုးမျှော်စင်က လူသတ်အဖွဲ့အစည်း တစ်ခု အနေဖြင့် သူတို့၏ ကိုယ်ပိုင် ထူးခြားသော အမွေအနှစ်များ ရှိပြီး ထိုအမွေအနှစ်များအနက် ကိုယ်ဖော့ပညာက သူတို့ အလွန် တန်ဖိုးထားသော အရာများထဲမှ တစ်ခု ဖြစ်သည်။

ထို့အပြင် မြောင်ချီရှန်းက မိုးမျှော်စင်၏ အကြီးအကဲ တစ်ယောက် ဖြစ်ရာ ကိုယ်ဖော့ပညာက သဘာဝကျကျ အလွန် ကောင်းမွန်ပေသည်။

မြောင်ချီရှန်း၏ ကိုယ်ဖော့ပညာက ဒွာရသန့်စင်ခြင်း အလယ်အလတ်အဆင့် အများစုထက်ပင် များစွာ သာလွန်သည်ဟု ဆိုနိုင်သည်။ ထို့ကြောင့် မြောင်ချီရှန်းက ချန်ဖေး လွတ်မြောက်သွားမည်ကို လုံးဝ စိုးရိမ်ပူပန်ခြင်း မရှိခဲ့ချေ။

သားကောင် အနေဖြင့် မည်သူကမျှ မြောင်ချီရှန်း၏ လက်ဖဝါးမှ လွတ်မြောက်နိုင်မည် မဟုတ်ပေ။

ဆယ့်ငါးမိနစ်ပင် မကြာလိုက်ဘဲ မိုင်ဆယ်ဂဏန်းကျော်ကို ဖြတ်ကျော်ပြီးနောက် တိုင်ဖန်းရွှမ်းက ရှေ့ရှိ ချန်ဖေး၏ ပုံရိပ်ကို နောက်ဆုံးတွင် မြင်တွေ့လိုက်ရသည်။

မြောင်ချီရှန်း၏ ကိုယ်ဖော့ပညာက ရုတ်တရက် အရှိန်မြင့်တက်သွားပြီး နောက်ဆုံး ခြေလှမ်း ရာဂဏန်း အကွာအဝေးကို တိုက်ရိုက် ကျော်ပစ်ကာ ချန်ဖေး၏ ရှေ့တွင် ရပ်တန့်လိုက်သည်။

တိုင်ဖန်းရွှမ်းက ချန်ဖေး၏ ထိတ်လန့်နေသော အသွင်ကို မြင်ရလိမ့်မည်ဟု ထင်ခဲ့သည်။

မည်သို့ပင်ဆိုစေ ဒွာရသန့်စင်ခြင်း အဆင့် သိုင်းပညာရှင် တစ်ယောက်က နောက်မှ လိုက်လံ ဖမ်းဆီးနေပြီး ဒွာရသန့်စင်ခြင်း အလယ်အလတ်အဆင့် ချီအရှိန်အဝါ အလွန် ထင်ရှားနေရာ မည်သည့် ဒွာရသန့်စင်ခြင်း အစောပိုင်းအဆင့် သိုင်းပညာရှင်မဆို ထိတ်လန့်တုန်လှုပ်သွားရမည် ဖြစ်သည်။

သို့သော် ဤအခိုက်အတန့်တွင် ချန်ဖေး၏ အမူအရာက အလွန် တည်ငြိမ်နေပြီး သူ၏ မျက်လုံးများထဲတွင် မည်သည့် ထိတ်လန့်မှုမျှ မရှိသည်ကို တိုင်ဖန်းရွှမ်း တွေ့ရှိလိုက်ရသည်။

မြောင်ချီရှန်းကလည်း ချန်ဖေးကို အနည်းငယ် အံ့အားသင့်စွာ ကြည့်လိုက်၏။ လူ၍များစွာကို သတ်ဖြတ်ခဲ့ဖူးသော်လည်း ချန်ဖေးက အတည်ငြိမ်ဆုံး ဖြစ်နေသည်။

ယွမ်ချန်ဓားဂိုဏ်း၏ နောက်ခံကြောင့်လား။

"ခင်ဗျားတို့ပဲ..."

ချန်ဖေးက တိုင်ဖန်းရွှမ်းကို ကြည့်လိုက်ရာ သူ၏ အမူအရာက အနည်းငယ် ရှင်းလင်းသွား၏။

အနက်ရောင် မြို့တော်မှ ထွက်လာသည်နှင့် ချန်ဖေးက သူ့ကို ပစ်မှတ်ထားနေသူ တစ်ယောက် ရှိနေကြောင်း ခံစားလိုက်ရပြီးနောက် ချီအရှိန်အဝါ နှစ်ခုက နောက်မှ လိုက်လာကြောင်း ခံစားလိုက်ရသည်။

တစ်ခုက လုံးဝ သူစိမ်း ဖြစ်နေပြီး အခြား ချီအရှိန်အဝါ တစ်ခုကိုမူ ချန်ဖေး အနည်းငယ် ရင်းနှီးနေသော်လည်း မည်သူဖြစ်ကြောင်း မမှတ်မိနိုင်ခဲ့ပေ။

ယခု တိုင်ဖန်းရွှမ်း၏ မျက်နှာကို မြင်လိုက်ရသောအခါမှသာ ချန်ဖေး မှတ်မိသွားခြင်း ဖြစ်သည်။

ရှုံးနိမ့်သွားသော ရန်သူများအတွက် ချန်ဖေးက ယေဘုယျအားဖြင့် တစ်ဖက်လူ၏ ချီအရှိန်အဝါကို မှတ်သားထားရန် အချိန်များစွာ ပေးလေ့ မရှိချေ။

"မင်းက နည်းနည်းလေးမှ ကြောက်နေပုံ မပေါ်ဘူး... ဒီနေရာမှာ မင်းကို စောင့်နေတဲ့ သူတွေ ရှိနေလို့လား..."

မြောင်ချီရှန်းက ပတ်ဝန်းကျင်ကို တစ်ချက် လှမ်းကြည့်လိုက်ရာ လူသူကင်းမဲ့နေပြီး ဤနေရာသို့ လာရောက်သူ လုံးဝ မရှိသလောက်ပင် ဖြစ်သည်။

မြောင်ချီရှန်းက အခြား ဒွာရသန့်စင်ခြင်း အဆင့် ချီအရှိန်အဝါကို မခံစားမိသော်လည်း ချန်ဖေး၏ အမူအရာကို ကြည့်ရလျှင် အားကိုးစရာ တစ်ခုခု ရှိနေပုံရသည်။

ဤအချက်က မြောင်ချီရှန်းကို သံသယ ဝင်စေခဲ့ပြီး သူ၏ စိတ်ထဲတွင် အနည်းငယ် သတိထားလာစေခဲ့သည်။

"ကြည့်နေစရာ မလိုပါဘူး... ဒီမှာ အခြား ဘယ်သူမှ မရှိပါဘူး..."

ချန်ဖေးက ပြုံး၍ ပြောလိုက်သည်။

"ဟန်ဆောင်နေတာ... အကြီးအကဲမြောင်... သူ့ကို မြန်မြန် ဖမ်းပေးပါ..."

တိုင်ဖန်းရွှမ်းက ချန်ဖေးကို ကြည့်ရင်း ဒေါသတစ်ဝက် ထွက်လာ၏။

သူတို့တွင် လုံးဝ အသာစီး ရနေသည်မှာ ထင်ရှားသော်လည်း ချန်ဖေး၏ ဤကဲ့သို့သော အသွင်က တိုင်ဖန်းရွှမ်းကို ရှေ့တိုး၍ ချန်ဖေးအား အရှင်လတ်လတ် ဆွဲဖြဲချင်စိတ် ပေါက်သွားစေသည်။

မြောင်ချီရှန်းက ဘာမှမပြောဘဲ ချန်ဖေး၏ မျက်လုံးများကို စိုက်ကြည့်နေစဉ် ရုတ်တရက် ဓားဆန္ဒ တစ်ခု လက်ခနဲ ဖြစ်သွားပြီး ချန်ဖေး၏ စိတ်ထဲသို့ တိုက်ရိုက် ခုတ်ပိုင်းလိုက်၏။

"ဝှစ်..."

ချန်ဖေး၏ ဆံပင်များက လေမတိုက်ဘဲ လှုပ်ရှားသွားပြီး နောက်သို့ လွင့်ထွက်သွားသည်။

ချန်ဖေးက မြောင်ချီရှန်းကို ကြည့်လိုက်ရာ သူ၏ အမူအရာ အနည်းငယ် အံ့အားသင့်သွား၏။

ဤဓားဆန္ဒက အလွန် ထက်မြက်လှသည်။

အကယ်၍ အခြားသော ဒွာရသန့်စင်ခြင်း အစောပိုင်းအဆင့် သိုင်းပညာရှင် တစ်ယောက်သာ ဆိုပါက ဤဓားဆန္ဒ တစ်ချက်တည်းဖြင့် စိတ်ထဲတွင် ပြင်းထန်စွာ ဒဏ်ရာရသွားပြီး ခွန်အားများ များစွာ ထိခိုက်သွားပေလိမ့်မည်။

ဒွာရသန့်စင်ခြင်း အလယ်အလတ်အဆင့် သိုင်းပညာရှင်ပင်လျှင် စိတ်ပိုင်းဆိုင်ရာ ထိခိုက်ဒဏ်ရာ ရသွားနိုင်ပေသည်။

ထို့အပြင် ဤဓားဆန္ဒကို ကြည့်ရလျှင် မြောင်ချီရှန်း၏ စိတ်စွမ်းအားက အတော်လေး အားကောင်းနေပြီ ဖြစ်ပြီး ဒွာရသန့်စင်ခြင်း အလယ်အလတ်အဆင့် အထွတ်အထိပ်နှင့် အလွန် နီးစပ်နေပြီ ဖြစ်သည်။

သို့သော် ချန်ဖေး အတွက်မူ ဤဓားဆန္ဒက သူ့ကို ထိခိုက်စေလိုပါက များစွာ လိုအပ်နေသေးသည်။

ချန်ဖေး၏ စိတ်စွမ်းအား ပမာဏက ဒွာရသန့်စင်ခြင်း အလယ်အလတ်အဆင့်များ အကြားတွင် အလွန် မများလှဘဲ ယခုအခါ ဒွာရ ၆၀ ကိုသာ ထိန်းချုပ်နိုင်သေးရာ မြောင်ချီရှန်းထက် များစွာ အားနည်းနေသေးသည်။

သို့သော် ချန်ဖေး၏ အသိစိတ်ပင်လယ် အတွင်း၌ ဝိညာဉ်ကြိုးမျှင် ကျင့်စဉ်နှင့် နဂါးဆင်နှိမ်နင်းခြင်း ကျင့်စဉ်တို့က အဆက်မပြတ် လည်ပတ်နေသဖြင့် ဤဓားဆန္ဒက ဝိညာဉ်ကြိုးမျှင်များကို ဆွဲဖြဲနိုင်လျှင်တောင်မှ နဂါးဆင်နှိမ်နင်းခြင်း၏ ကာကွယ်မှုကို လုံးဝ ဖောက်ထွင်းနိုင်မည် မဟုတ်ချေ။

"ဟင်..."

ချန်ဖေးက အနည်းငယ်မျှပင် မထိခိုက်သည်ကို မြင်သောအခါ မြောင်ချီရှန်း၏ မျက်လုံးများ မှေးကျဉ်းသွားပြီး သူ၏ စိတ်ထဲတွင် မကောင်းသော ခံစားချက် တစ်ခု ပေါ်လာ၏။

ဤဓားဆန္ဒ တိုက်ခိုက်မှုက မြောင်ချီရှန်း၏ အောင်ပွဲခံရန် အဓိက နည်းလမ်းများထဲမှ တစ်ခု ဖြစ်ပြီး အခြားသော ဒွာရသန့်စင်ခြင်း အလယ်အလတ်အဆင့်များနှင့် နှိုင်းယှဉ်ပါက မြောင်ချီရှန်း၏ အားသာချက်က အလွန် သိသာထင်ရှားလှသည်။

အခြား ဒွာရသန့်စင်ခြင်း အလယ်အလတ်အဆင့် တစ်ယောက်ကို အလွယ်တကူ သတ်ဖြတ်နိုင်ခဲ့ခြင်းမှာ ဤအချက်အပေါ် အားကိုးခဲ့ခြင်း ဖြစ်သည်။

မြောင်ချီရှန်းက ဒွာရသန့်စင်ခြင်း အစောပိုင်းအဆင့်များကို သတ်ဖြတ်ရန် လိုအပ်သောအခါ အမြဲတမ်း ဓားဆန္ဒဖြင့် အရင် ခုတ်ပိုင်းလေ့ ရှိပြီး ထို့နောက်မှ ဆက်လက် လှုပ်ရှားပါက အလွန် လွယ်ကူပေသည်။

နှစ်ပေါင်းများစွာ အတွင်း မြောင်ချီရှန်း တစ်ခါမျှ မလွဲချော်ခဲ့ဖူးချေ။

အချို့သော ဒွာရသန့်စင်ခြင်း အဆင့်များက စိတ်ပိုင်းဆိုင်ရာ ကျင့်ကြံမှု အလွန် အစွမ်းထက်ပြီး တစ်ခဏမျှ ခုခံနိုင်ခဲ့ကြသော်လည်း ချန်ဖေး ကဲ့သို့ လုံးဝ မလှုပ်မယှက် ဖြစ်နေခြင်းမျိုး တစ်ခါမျှ မပေါ်ပေါက်ခဲ့ဖူးချေ။

ထိုဓားဆန္ဒက ချန်ဖေး၏ အသိစိတ်ပင်လယ် ထဲသို့ ဝင်ရောက်သွားသောအခါ မြစ်ရေက ပင်လယ်ထဲသို့ စီးဝင်သွားသကဲ့သို့ မြောင်ချီရှန်း အနေဖြင့် အဆက်အသွယ် လုံးဝ ပြတ်တောက်သွားခဲ့သည်။

"ဓားဆန္ဒလား... ကျွန်တော်ဆီမှာလည်း ဓားတစ်ကွက် ရှိတယ်... မြည်းစမ်းကြည့်ပါဦး..."

ချန်ဖေးက ညင်သာစွာ ပြုံးလိုက်ရာ နတ်ဘုရား သတ်ဖြတ်ခြင်းဓားက ပြင်းထန်စွာ တုန်ခါသွားပြီး နောက်တစ်စက္ကန့်တွင် မြောင်ချီရှန်းနှင့် တိုင်ဖန်းရွှမ်းတို့ကို အတူတကွ ဖုံးလွှမ်းသွားသော သတ်ဖြတ်လိုစိတ်များ ထွက်ပေါ်လာ၏။

တိုင်ဖန်းရွှမ်းမှာ သူ၏ အသိစိတ်ပင်လယ်ထဲသို့ ထက်မြက်လှသော ဓားဆန္ဒ တစ်ခု ဖြတ်သန်းသွားသည်ကိုသာ ခံစားလိုက်ရပြီး နောက်တစ်စက္ကန့်တွင် ပြင်းထန်သော နာကျင်မှု တစ်ခုက သူ၏ ခေါင်းတစ်ခုလုံးကို လွှမ်းခြုံသွားကာ ခေါင်းကို တစ်ယောက်ယောက်က နှစ်ခြမ်း ခွဲပစ်လိုက်သကဲ့သို့ ဖြစ်သွားသည်။

တိုင်ဖန်းရွှမ်းက မသိစိတ်ဖြင့် ခေါင်းကို အလိုအလျောက် ကိုင်လိုက်မိပြီး တစ်ခဏမျှ ရပ်တန့်သွားပြီးနောက် ယခု သူ ဘယ်နေရာတွင် ရောက်နေသည်ကို သတိပြုမိကာ မျက်လုံးများကို အလျင်အမြန် ဖွင့်ကြည့်လိုက်ရာ သူ မည်သည့်အချိန်ကတည်းက မြေကြီးပေါ်သို့ လဲကျနေမှန်း မသိတော့ချေ။

ထို့အပြင် တိုင်ဖန်းရွှမ်း၏ စိတ်ထဲတွင် အလွန် အစွမ်းထက်လှသော မြောင်ချီရှန်းမှာ ဤအခိုက်အတန့်တွင် သူ၏ ဓားကို မြှောက်၍ ချန်ဖေး၏ တိုက်ခိုက်မှုကို ခုခံရန် ကြိုးစားနေသည်။

တိုင်ဖန်းရွှမ်းက ချန်ဖေးကို တွေဝေမိန်းမောစွာ ကြည့်လိုက်ရာ သူက ကောင်းကင်ယံသို့ ဟိန်းဟောက်နေသော တုန်လှုပ်ဖွယ်ရာ ဧရာမ သားရဲကြီး တစ်ကောင်ကို မြင်လိုက်ရသကဲ့သို့ ကြောက်မက်ဖွယ် ကောင်းလှသော ချီအရှိန်အဝါများက နေရာအနှံ့ ပျံ့နှံ့နေ၏။

တားဆီး၍ မရနိုင်ချေ၊ တားဆီးသူတိုင်း သေရမည်။

ဤအရာက တိုင်ဖန်းရွှမ်းကို လွန်ခဲ့သော သုံးနှစ်က ညကို ရုတ်တရက် ပြန်လည် အမှတ်ရသွားစေခဲ့သည်။

တူညီစွာပင် တားဆီး၍ မရနိုင်သော်လည်း ဤတစ်ကြိမ်တွင် ရင်ဆိုင်နေရသူမှာ သူ မဟုတ်ဘဲ မြောင်ချီရှန်း ဖြစ်နေသည်။

သို့သော် ရလဒ်အနေဖြင့် အနည်းငယ်မျှပင် ကွာခြားမှု မရှိပုံရသည်။ မြောင်ချီရှန်းက ဤဓားမျိုးကို မတားဆီးနိုင်ခဲ့ချေ။

သုံးနှစ်သာ ရှိသေးသည် မဟုတ်ပါလား။

ချန်ဖေး၏ ခွန်အားက မည်သို့ ဤမျှ အံ့မခန်း ပြောင်းလဲသွားနိုင်သနည်း။

လွန်ခဲ့သော သုံးနှစ်က အဆင့်တက်ခါစ ချန်ဖေးက အဘယ်ကြောင့် ဤမျှ ချဲ့ကားလွန်းသော တိုက်ခိုက်ရေး စွမ်းအား ရှိနေခဲ့ပြီး သူ့ကို လမ်းပျောက်နေသော ခွေးတစ်ကောင်ကဲ့သို့ အရိုက်ခံရအောင် လုပ်နိုင်ခဲ့သနည်း။

ရုတ်တရက် တိုင်ဖန်းရွှမ်း တစ်စုံတစ်ခု မှားယွင်းနေကြောင်း သတိထားမိလိုက်သည်။

ချန်ဖေး၏ ချီအရှိန်အဝါက အမှန်တကယ်တော့ ဒွာရသန့်စင်ခြင်း အစောပိုင်းအဆင့် မဟုတ်ဘဲ ဒွာရသန့်စင်ခြင်း အလယ်အလတ်အဆင့် ဖြစ်နေသည်။

ချန်ဖေး ရုပ်ဖျက်ထားခဲ့ခြင်း ဖြစ်သည်။ ချန်ဖေးက သူ၏ ချီအရှိန်အဝါကို ဒွာရသန့်စင်ခြင်း အစောပိုင်းအဆင့် အတိုင်းအတာအထိ ဖိနှိပ်ထားခဲ့ခြင်း ဖြစ်သည်။

သို့သော် တိုင်ဖန်းရွှမ်း ဖြစ်စေ၊ မြောင်ချီရှန်း ဖြစ်စေ ချန်ဖေး၏ ချီအရှိန်အဝါက အတုအယောင် ဖြစ်နေမည်ဟု တစ်ခါမျှ သံသယ မဝင်ခဲ့ကြချေ။

အဘယ်ကြောင့်ဆိုသော် သုံးနှစ်သာ ရှိသေးသောကြောင့် ဖြစ်သည်။ ချန်ဖေး၏ ပါရမီ မည်မျှပင် မြင့်မားနေစေကာမူ နောက်ထပ် ဒွာရ အနည်းငယ်မျှ ထပ်မံ ဖွင့်လှစ်နိုင်ခြင်းက အံ့အားသင့်စရာ ကောင်းနေပြီ ဖြစ်သည်။

ဒွာရသန့်စင်ခြင်း အလယ်အလတ်အဆင့် ဆိုသည်မှာ စိတ်ကူးယဉ်မျှသာ ဖြစ်ပြီး လုံးဝ မဖြစ်နိုင်သော အရာ တစ်ခု ဖြစ်သည်

သို့သော် ယခုအခါ ဤလုံးဝ မဖြစ်နိုင်သော အရာက တိုင်ဖန်းရွှမ်း၏ မျက်စိရှေ့တွင် အမှန်တကယ် ပေါ်လာခဲ့ပြီ ဖြစ်သည်။

ဘုန်း…

ပေါက်ကွဲသံကြီး တစ်ခုက တိုင်ဖန်းရွှမ်းကို လက်တွေ့ဘဝသို့ ပြန်လည် ဆွဲခေါ်သွားခဲ့သည်။

တိုင်ဖန်းရွှမ်းက မြောင်ချီရှန်းမှာ မိမိ၏ ဓားဖြင့် ပြန်လည် ရိုက်ခတ်ခံရပြီး သွေးများ အန်ထုတ်လိုက်ရသည်ကို မြင်တွေ့လိုက်ရပြီး တိုင်ဖန်းရွှမ်းက မြောင်ချီရှန်း၏ နံရိုးများ ကျိုးပဲ့သွားသည့် အသံကိုပင် ကြားလိုက်ရသည်။

နံရိုးများသာမက သူ့၏ အတွင်းကလီစာများပါ ဤအခိုက်အတန့်တွင် ဤဧရာမ ခွန်အားကြီး၏ ဖိကြိတ်ခြင်းကို ခံလိုက်ရပြီ ဖြစ်သည်။

မြောင်ချီရှန်းမှာ ထိုနေရာတွင်ပင် အသားစများ အဖြစ် ကြေမွမသွားခဲ့ခြင်းမှာ ဒွာရသန့်စင်ခြင်း အလယ်အလတ်အဆင့် အဖြစ် မရေမတွက်နိုင်အောင် ခန္ဓာကိုယ်ကို သန့်စင်ခဲ့ခြင်းကြောင့် မြောင်ချီရှန်း၏ အသက်ကို ကယ်တင်နိုင်ခဲ့ခြင်း ဖြစ်သည်။

သို့သော် သူက ဓားတစ်ချက်ဖြင့် ဤအဆင့်ထိ ဒဏ်ရာရသွားခဲ့ပြီ ဖြစ်ရာ ဤဒွာရသန့်စင်ခြင်း အလယ်အလတ်အဆင့် ခန္ဓာကိုယ်က တစ်ကြိမ် ကယ်တင်နိုင်သော်လည်း အကြိမ်များစွာ ကယ်တင်နိုင်ဦးမည်လော။

တိုင်ဖန်းရွှမ်း၏ နှလုံးသားထဲသို့ ကြောက်ရွံ့ထိတ်လန့်မှု လှိုင်းတံပိုးကြီး တစ်ခုက ချက်ချင်း ထိုးတက်လာ၏။

စိတ်ပိုင်းဆိုင်ရာ ထိခိုက်မှုကြောင့်လား မသိသော်လည်း တိုင်ဖန်းရွှမ်းကို အနည်းငယ် နောက်ကျမှ သဘောပေါက်သွားစေခဲ့သည်။

ယခုအချိန်အထိ တိုင်ဖန်းရွှမ်းက သူ သေရတော့မည်ဟု ထင်နေပုံ ရသည်။

ဤသေဆုံးရမည်ကို ကြောက်ရွံ့မှုက တိုင်ဖန်းရွှမ်း၏ နှလုံးသား တစ်ခုလုံးကို ချက်ချင်း ပြည့်နှက်သွားစေခဲ့ပြီး စိတ်ကို ဆွဲဖြဲခံရသည့် နာကျင်မှုကိုပင် တိုက်ရိုက် လွှမ်းမိုးသွားခဲ့သည်။

တိုင်ဖန်းရွှမ်း မသေချင်ချေ။ လွန်ခဲ့သော သုံးနှစ်က အချိန်ကဲ့သို့ပင် တိုင်ဖန်းရွှမ်းက အသက်ရှင် ကျန်ရစ်ခဲ့ပြီး အသည်းအသန် ထွက်ပြေးချင်ခဲ့သည်။

သေဆုံးသွားပါက ဘာမှ မရှိတော့ချေ။

အသက်ရှင်နေပါက မရေမတွက်နိုင်သော ဖြစ်နိုင်ချေများ ရှိနေသည်။

သို့သော် ယခုအခါ သူ မည်သို့ အသက်ရှင်အောင်နေရမည်နည်း။

အခန်း (၃၇၅) မပြောဘူးလား... ဒါဆို မပြောနဲ့တော့

မြောင်ချီရှန်းမှာ ချန်ဖေး၏ ဓားတစ်ချက်ဖြင့် သူ၏ ခန္ဓာကိုယ် တစ်ခုလုံး ပေါက်ကွဲလုနီးပါး ဖြစ်သွားခဲ့သည်။

ကြောက်မက်ဖွယ် စွမ်းအားများက မြောင်ချီရှန်း၏ အတွင်းကလီစာများကို အကြင်နာ ကင်းမဲ့စွာ ဖိကြိတ်နေပြီး မြောင်ချီရှန်း၏ မူလစွမ်းအားများက အနည်းငယ်မျှပင် အလုပ်မလုပ်နိုင်တော့ချေ။

မိမိ၏ ခန္ဓာကိုယ်ကို မထိန်းချုပ်နိုင်တော့ဘဲ မြောင်ချီရှန်းက ခြေလှမ်း ဆယ်ဂဏန်းခန့် လိမ့်ကျသွားပြီးနောက်မှ ဖြည်းညင်းစွာ ရပ်တန့်သွားကာ သွေးများက သူ၏ အဝတ်အစားများကို နီရဲသွားစေခဲ့ပြီ ဖြစ်သည်။

မြောင်ချီရှန်းက အားယူ၍ ထရပ်လိုက်ပြီး ချန်ဖေးကို မော့ကြည့်လိုက်ရာ မြောင်ချီရှန်း၏ မျက်လုံးများထဲတွင် ကြောက်ရွံ့မှုများနှင့် မယုံကြည်နိုင်မှုများ ပြည့်နှက်နေ၏။

ယုန်တစ်ကောင် အထက်အောက် ခုန်ပေါက်နေသကဲ့သို့ ယခုလေးတင်မှ ဘာတွေ ဖြစ်ပျက်သွားမှန်း မသိလိုက်မီ ချန်ဖေး၏ နတ်ဘုရား သတ်ဖြတ်ခြင်းဓားက ထိုးစိုက်လာပြီးနောက် မျက်စိတစ်မှိတ် အတွင်းမှာပင် ချန်ယွမ်ဓားက ခုတ်ပိုင်းလိုက်သည်။

မြောင်ချီရှန်းမှာ ယခုအချိန်အထိ ပြန်လည် မတုံ့ပြန်နိုင်သေးဘဲ သူ၏ စိတ်ထဲရှိ အပေါက်ကြီးနှင့် ယခုအခိုက်အတန့်ရှိ ရုပ်ပိုင်းဆိုင်ရာ ဒဏ်ရာများကသာ သူ ဘာတွေ ကြုံတွေ့ခဲ့ရသည်ကို အဆက်မပြတ် သတိပေးနေသည်။

ဤအခိုက်အတန့်တွင် မြောင်ချီရှန်း နားလည်သွားခဲ့ပြီ ဖြစ်သည်။

သူတို့က ချန်ဖေးကို တားဆီးလိုက်သောအခါ ချန်ဖေးက အဘယ်ကြောင့် ဤမျှ တည်ငြိမ်နေရသနည်း ဆိုသည်ကိုပေါ့။

ဤသို့သော ခွန်အားဖြင့် အခြားသော ဒွာရသန့်စင်ခြင်း အလယ်အလတ်အဆင့်များကို အနိုင်ယူရန်မှာ ရပ်ကွက်ထဲမှ ကြက်နှင့် ခွေးများ ကဲ့သို့ပင် လွယ်ကူလွန်းလှသည်ဟု ဆိုနိုင်သည်။

မြောင်ချီရှန်း၏ ဂုဏ်ယူဝင့်ကြွားရသော စွမ်းအားများမှာ ချန်ဖေး၏ ရှေ့တွင် အနည်းငယ် ရယ်စရာ ကောင်းနေပုံ ရသည်။

မြောင်ချီရှန်းက ချန်ဖေး တစ်လှမ်းချင်း လျှောက်လာသည်ကို ကြည့်ရင်း ထွက်ပြေးချင်သော်လည်း ဤအခိုက်အတန့်တွင် သူ၏ ခန္ဓာကိုယ်က အစောက ဓားတစ်ချက်ကြောင့် ပြင်းထန်စွာ ဒဏ်ရာရသွားခဲ့ပြီ ဖြစ်ပြီး ယခုအခိုက်အတန့်၌ သူ၏ ခန္ဓာကိုယ်ထဲတွင် မရေမတွက်နိုင်သော စွမ်းအားများ ရှုပ်ထွေးနေသည်။

မြောင်ချီရှန်း အနေဖြင့် အသက်စွမ်းအင်များကို လောင်ကျွမ်းစေ၍ ထွက်ပြေးချင်လျှင်တောင်မှ လုပ်နိုင်မည် မဟုတ်တော့ချေ။

ချန်ဖေး၏ ဓားက အသက်ရှင်ခြင်းနှင့် သေဆုံးခြင်းကို အပြည့်အဝ ဆုံးဖြတ်လိုက်ပြီ ဖြစ်သည်။

"မင်းရဲ့ စိတ်စွမ်းအားကို... ဘယ်လို ကျင့်ကြံခဲ့တာလဲ..."

ချန်ဖေးက မြောင်ချီရှန်းကို ကြည့်ကာ မေးလိုက်သည်။

မြောင်ချီရှန်း အနေဖြင့် ချန်ဖေးကို အထင်ကြီးစေနိုင်သည့် တစ်ခုတည်းသော အရာမှာ ဒွာရသန့်စင်ခြင်း အလယ်အလတ်အဆင့် အထွတ်အထိပ်နှင့် နီးစပ်နေသော သူ၏ စိတ်စွမ်းအားပင် ဖြစ်သည်။

ဤသည်က ချန်ဖေး၏ အမြင်တွင် အလွန် ခက်ခဲသော အရာ ဖြစ်သည်။

မြောင်ချီရှန်း၏ စိတ်စွမ်းအား အရဆိုလျှင် ကျင့်စဉ် နားလည်သဘောပေါက်မှုသာ လိုက်မီပါက ဒွာရသန့်စင်ခြင်း နောက်ဆုံးအဆင့်သို့ အဆင့်တက်ရန် အခြားသူများထက် များစွာ ပိုမို လွယ်ကူပေလိမ့်မည်။

"အောင်နိုင်သူက ဘုရင်၊ ရှုံးတဲ့သူက လူဆိုးပဲ... ငါ့ရဲ့ စွမ်းရည်က အခြားသူတွေကို မမီတာပါ..."

မြောင်ချီရှန်းက ချန်ဖေးကို ကြည့်ကာ မျက်နှာပေါ်တွင် မာနကြီးသော အရိပ်အယောင် အချို့ဖြင့် ပြောလိုက်သည်။

"ဒါပေမဲ့ မင်းက ငါ့ကို သတ်မှာပဲဆိုတော့... ဒီလို လျှို့ဝှက်ချက်မျိုးကို မင်းကို ဘာလို့ ပြောပြရမှာလဲ..."

"အဲဒါလည်း ဟုတ်တာပဲ... ဒါဆိုလည်း မပြောနဲ့တော့..."

ချန်ဖေးက ခေါင်းညိတ်လိုက်ပြီး သူ၏ လက်ထဲရှိ ချန်ယွမ်ဓားက လှုပ်ရှားသွားကာ မြောင်ချီရှန်း၏ လည်ပင်းကို တိုက်ရိုက် ဖြတ်တောက်လိုက်ရာ မြောင်ချီရှန်း၏ မျက်လုံးများ ပြူးကျယ်သွားပြီး တည့်မတ်စွာ လဲကျသွားတော့သည်။

သူ သေဆုံးသွားသည့် အချိန်အထိ မြောင်ချီရှန်း၏ မျက်လုံးများက မယုံကြည်နိုင်မှုများနှင့် မကျေနပ်မှုများ ပြည့်နှက်နေဆဲ ဖြစ်သည်။

မြောင်ချီရှန်း ထင်ထားခဲ့သည်မှာ ချန်ဖေးက သူနှင့် ဈေးဆစ်လိမ့်မည်ဟု ထင်ခဲ့သည်။

မည်သို့ပင်ဆိုစေ မြောင်ချီရှန်း၏ စိတ်စွမ်းအားက သာမန် ဒွာရသန့်စင်ခြင်း အဆင့်များထက် များစွာ ပိုမို အစွမ်းထက်နေသည်မှာ အမှန်ပင် ဖြစ်သည်။

စိတ်စွမ်းအား သန့်စင်ခြင်းက အမြဲတမ်း ဒွာရသန့်စင်ခြင်း အဆင့်များ၏ အခက်အခဲ တစ်ခု ဖြစ်ပြီး အချိန်ကို အားကိုး၍သာ မတွန်းတင်နိုင်ပါက ဒွာရများ ကျင့်ကြံခြင်းနှင့် အတူတကွ ရှေ့ဆက်နိုင်ခြင်းက အလွန် ရှားပါးလှပေသည်။

သူ့ကဲ့သို့ ဒွာရ အရေအတွက်ထက် စိတ်စွမ်းအားက အများကြီး ပိုမြင့်နေခြင်းမျိုးက ပြိုင်ဘက်ကင်းဟု မဆိုနိုင်သော်လည်း အလွန် နည်းပါးသော တည်ရှိမှုမျိုး သေချာပေါက် ဖြစ်ရမည်။

ဤအတွက် အခြား အကြောင်းရင်းများ ရှိရမည် ဖြစ်ပြီး သာမန်လူများ အနေဖြင့် သူတို့ကို အစွမ်းထက်လာစေမည့် ဤကဲ့သို့သော လျှို့ဝှက်ချက်မျိုးနှင့် တွေ့ကြုံရပါက သူတို့၏ နှလုံးသားထဲတွင် သဘာဝကျကျ မျှော်လင့်ချက် တစ်ခုခု ရှိနေမည် ဖြစ်သည်။

လိုချင်တပ်မက်မှု ရှိနေသရွေ့ ဈေးဆစ်ရန် အခွင့်အရေး ရှိသည်။

မြောင်ချီရှန်းက ဤအခွင့်အရေးကို အားကိုး၍ သူ့ကိုယ်သူ အသက်ရှင်သန်ခွင့် ရအောင် လုပ်ချင်ခဲ့သည်။

သို့သော် မြောင်ချီရှန်း လုံးဝ မမျှော်လင့်ထားခဲ့သည်မှာ ချန်ဖေးက တစ်ခွန်း မေးပြီးသည်နှင့် သူ့ကို တိုက်ရိုက် သတ်ပစ်လိုက်ပြီး အခြား ဘာမှ ပြောရန် အခွင့်အရေး မပေးခဲ့သဖြင့် မြောင်ချီရှန်း၏ အစီအစဉ်များ အားလုံး အချည်းနှီး ဖြစ်သွားခဲ့ရသည်။

ဝိညာဉ်အနှစ်သာရ အမျှင်တန်းများက မြောင်ချီရှန်း၏ ခန္ဓာကိုယ်မှ ထွက်ပေါ်လာပြီး ချန်ယွမ်ဓားထဲသို့ ဝင်ရောက် ပျောက်ကွယ်သွား၏။

"ငါ့ကို မသတ်ပါနဲ့... ငါ့ကို မသတ်ပါနဲ့..."

တိုင်ဖန်းရွှမ်းက ချန်ဖေး လှည့်ကြည့်လာသည်ကို မြင်သောအခါ ကျယ်လောင်စွာ အော်ဟစ်လိုက်မိသည်။

သို့သော် ဤတစ်ကြိမ်တွင် တိုင်ဖန်းရွှမ်းမှာ ချန်ဖေး၏ ခြောက်လှန့်မှုကြောင့် ထိတ်လန့်တုန်လှုပ်နေခဲ့ပြီ ဖြစ်သည်။

မြောင်ချီရှန်း ကဲ့သို့သော အစွမ်းထက် ပညာရှင် တစ်ယောက်ကိုပင် ချန်ဖေးက သတ်ချင်လျှင် သတ်ပစ်လိုက်သည် ဆိုတော့ သူ့ကဲ့သို့ ဒွာရသန့်စင်ခြင်း အစောပိုင်းအဆင့် တစ်ယောက် အတွက်မူ သတ်ပစ်ရန် ပို၍ပင် လွယ်ကူနေမည် မဟုတ်ပါလား။

သို့သော် တိုင်ဖန်းရွှမ်း မသေချင်ချေ၊ သူ အသက်ရှင်ချင်သည်။ မည်သည့် ပုံစံဖြင့် အသက်ရှင်ရသည် ဖြစ်စေ၊ သူ မသေသရွေ့ အားလုံး အဆင်ပြေသည်။

"အကြောင်းပြချက်..."

ချန်ဖေးက တိုင်ဖန်းရွှမ်းကို ကြည့်ကာ မေးလိုက်သည်။

"ဝိညာဉ်ကျောက်တုံး၊ ဝိညာဉ်ဆေးလုံးနဲ့ ဝိညာဉ်လက်နက်တွေ... ကျွန်တော် ခင်ဗျားကို ခေါ်သွားပေးမယ်... အနက်ရောင် မြို့တော်ထဲမှာ ရှိတယ်..."

တိုင်ဖန်းရွှမ်းက အလျင်အမြန် ပြောလိုက်ပြီး တစ်ချိန်တည်းမှာပင် မြောင်ချီရှန်းကို တစ်ချက် လှမ်းကြည့်ကာ ဆက်ပြောလိုက်သည်။

"ပြီးတော့ သူ့ရဲ့ အခန်း... ကျွန်တော် ခင်ဗျားကို အဲဒီကိုလည်း ခေါ်သွားပေးမယ်... တကယ်လို့ သူ့ဆီမှာ လျှို့ဝှက်ချက် တစ်ခုခု ရှိရင်... သူ့ရဲ့ အခန်းထဲမှာ ဖုံးကွယ်ထားနိုင်တယ်..."

ချန်ဖေး၏ နှလုံးသား အနည်းငယ် လှုပ်ရှားသွား၏။ သူ အနက်ရောင် မြို့တော်သို့ လာရခြင်း၏ ရည်ရွယ်ချက်က ဘာလဲ၊ ဝိညာဉ်လက်နက် အနည်းငယ်ကို ရောင်းချရန် မဟုတ်ဘဲ ကျင့်ကြံရေး အရင်းအမြစ်များနှင့် လဲလှယ်ရန် မဟုတ်ပါလား။

မနေ့က အကျိုးအမြတ် များစွာ ရရှိခဲ့သော်လည်း ပိုမို များပြားသော ဝိညာဉ်ကျောက်တုံးများ၏ သွေးဆောင်မှုကို မည်သူက ခုခံနိုင်မည်နည်း။

အနက်ရောင် မြို့တော်တွင် ဒွာရသန့်စင်ခြင်း နောက်ဆုံးအဆင့် တစ်ယောက် ရှိနေပြီး ပုံမှန် အခြေအနေများ အောက်တွင် ချန်ဖေး အနေဖြင့် ထိုနေရာကို လုယက်ရန် စိတ်ကူး ရှိမည် မဟုတ်ချေ။

မည်သို့ပင်ဆိုစေ ခွန်အား ကွာဟချက် ရှိနေသေးရာ ဤအန္တရာယ်ကို ယူရန် မလိုအပ်ပေ။

သို့သော် အကယ်၍ အတွင်းလူ တစ်ယောက်က ချန်ဖေးကို ခေါ်သွားပေးမည် ဆိုပါက အခြေအနေက များစွာ တိုးတက်လာပေလိမ့်မည်။

သို့သော် တိုင်ဖန်းရွှမ်းက အနက်ရောင် မြို့တော်သို့ ပြန်ရောက်သည်နှင့် တစ်ပြိုင်နက် သေချာပေါက် ရိုးသားစွာ နေမည် မဟုတ်ချေ။

မြို့ထဲတွင် ချန်ဖေးကို ခြိမ်းခြောက်နိုင်သော တစ်ဦးတည်းသော သူမှာ ထိုဒွာရသန့်စင်ခြင်း နောက်ဆုံးအဆင့် ပညာရှင်သာ ဖြစ်ပြီး တိုင်ဖန်းရွှမ်း အနေဖြင့် တစ်ဖက်လူကို သတင်းပို့ရန် နည်းလမ်း ရှာဖွေမည်မှာ မလွဲဧကန်ပင် ဖြစ်သည်။

မည်သို့ ကာကွယ်ရမည်နည်း။

"အနက်ရောင် မြို့တော်က... မင်းတို့ မိုးမျှော်စင် ပိုင်တာလား..."

ချန်ဖေးက မေးလိုက်၏။

"မဟုတ်ပါဘူး... အနက်ရောင် မြို့တော်က သူ့ပိုင်ရှင်နဲ့ သူ ရှိပါတယ်... မိုးမျှော်စင်က ပူးပေါင်း ဆောင်ရွက်ရုံ သက်သက်ဖြစ်ပြီး ဝင်ငွေ တစ်စိတ်တစ်ပိုင်းကို ရပါတယ်..."

တိုင်ဖန်းရွှမ်းက ခေါင်းခါလိုက်ပြီး သူ၏ အစောက အဆိုပြုချက်ကို ချန်ဖေး စိတ်ဝင်စားနေသည်ကို မြင်သောအခါ အလျင်အမြန် ပြောလိုက်သည်။

"ကျွန်တော် ခင်ဗျားကို ခေါ်သွားမယ့် နေရာက... မိုးမျှော်စင်ရဲ့ အနက်ရောင် မြို့တော် ဌာနခွဲပါ... အဲဒီက ပစ္စည်းတွေက အနက်ရောင် မြို့တော်ရဲ့ အစွမ်းထက် ပညာရှင်တွေနဲ့ ဘာမှ မဆိုင်သလို... အနက်ရောင် မြို့တော်က အစွမ်းထက် ပညာရှင်တွေကလည်း ဂရုစိုက်မှာ မဟုတ်ပါဘူး..."

"ကျွန်တော် ခင်ဗျားကို ခေါ်သွားပေးမယ်... ကျွန်တော့် အသက်ကို ချမ်းသာပေးသရွေ့... ကျွန်တော့်ရဲ့ ကျင့်ကြံမှုကို ဖျက်ဆီးပစ်လို့ ရပါတယ်..."

တိုင်ဖန်းရွှမ်းက ချန်ဖေးကို ကြည့်ရင်း သူ၏ မျက်လုံးများထဲတွင် တောင်းပန်မှုများ ပြည့်နှက်နေ၏။ သူ အသက်ရှင်ချင်ရုံ သက်သက်သာ ဖြစ်ပြီး အခြား ဘာမှ မလိုချင်တော့ချေ။

ချန်ဖေးက တစ်ခဏမျှ စဉ်းစားပြီးနောက် ခေါင်းညိတ်လိုက်သည်။ အဆိုးဆုံး အခြေအနေတွင်ပင် ချန်ဖေး အနေဖြင့် ထွက်ပြေးနိုင်စွမ်း ရှိနေသေးသည်။

အစပိုင်းက ယာရှန်းဂိုဏ်းတွင် ရှိနေစဉ်ကနှင့် နှိုင်းယှဉ်ပါက ယခုအခါ ချန်ဖေး၏ ကျင့်ကြံမှုက ပိုမို မြင့်မားနေရုံသာမက အဓိက အချက်မှာ ကောင်းကင် ရှောင်တိမ်းခြင်း ကိုယ်ဖော့ပညာက ပြီးပြည့်စုံခြင်း အဆင့်ထိ ရောက်ရှိနေပြီ ဖြစ်ပြီး တစ်ချိန်တည်းမှာပင် ဖေးဆော့ကျန့်ကလည်း ဟုန်ယွမ်ဖုန်း၏ ဓားမှ ဝိညာဉ်အနှစ်သာရများကို စုပ်ယူပြီးနောက် အလယ်အလတ်အဆင့် ဝိညာဉ်လက်နက် အတိုင်းအတာအထိ အနည်းငယ် တိုးတက်လာခဲ့ပြီ ဖြစ်သည်။

အလယ်အလတ်အဆင့် ဝိညာဉ်လက်နက် အနည်းငယ် အနက် ဟုန်ယွမ်ဖုန်း ဓား၏ ဝိညာဉ်စွမ်းအင်က သေချာပေါက် အားအကောင်းဆုံး ဖြစ်ပြီး တန်ဖိုးကလည်း အမြင့်ဆုံး ဖြစ်ကာ အလယ်အလတ်အဆင့် ဝိညာဉ်လက်နက်၏ အမြင့်ဆုံး ကန့်သတ်ချက်နှင့် နီးကပ်နေပြီ ဖြစ်သည်။

ထို့ကြောင့်ဝိညာဉ်အနှစ်သာရများကို ထုတ်ယူပြီးနောက် ဆုံးရှုံးမှု အချို့ ရှိခဲ့သော်လည်း ဖေးဆော့ကျန့်ကို အလယ်အလတ်အဆင့် ဝိညာဉ်လက်နက်၏ အောက်ခြေ ကန့်သတ်ချက် နေရာအထိ မြှင့်တင်ပေးနိုင်ခဲ့ဆဲ ဖြစ်သည်။

ချန်ဖေးက မြောင်ချီရှန်း လက်ထဲရှိ ဝိညာဉ်လက်နက်နှင့် ကိုယ်ပေါ်ရှိ အခြား အသုံးအဆောင် ပစ္စည်းအချို့ကို သိမ်းဆည်းလိုက်ပြီး မြောင်ချီရှန်း၏ ခန္ဓာကိုယ်ကို လေထဲတွင် ပြာအဖြစ် ပြောင်းလဲပစ်လိုက်ကာ တိုင်ဖန်းရွှမ်းကို မူလစွမ်းအားဖြင့် ဖမ်းဆွဲ၍ အနက်ရောင် မြို့တော် ရှိရာဘက်သို့ အပြင်းအထန် ပြေးထွက်သွား၏။

လမ်းတစ်ဝက်တွင် ချန်ဖေးက မူလစွမ်းအားကို အသုံးပြု၍ တိုင်ဖန်းရွှမ်း၏ ကျင့်ကြံမှုကို တိုက်ရိုက် ပိတ်ဆို့လိုက်ပြီး တစ်ချိန်တည်းမှာပင် တိုင်ဖန်းရွှမ်း၏ ဒဏ်ရာများကို အနည်းငယ် ပြုပြင်ပေးလိုက်သဖြင့် သိပ်ပြီး သနားစရာ ကောင်းမနေတော့ချေ။

တိုင်ဖန်းရွှမ်းက အနည်းငယ်မျှ ပြန်လည် မခုခံရဲဘဲ အသက်ရှင်ရန် အခွင့်အရေး တစ်ခု ရရန်သာ ကြိုးစားနေပုံ ရသည်။

ဆယ့်ငါးမိနစ်ပင် မကြာလိုက်ဘဲ ချန်ဖေးက တိုင်ဖန်းရွှမ်းကို အနက်ရောင် မြို့တော်သို့ ပြန်လည် ခေါ်ဆောင်လာခဲ့သည်။

တိုင်ဖန်းရွှမ်းက အနက်ရောင် မြို့တော်၏ မြို့တံခါးကို လှမ်းကြည့်လိုက်ရာ သူ၏ မျက်လုံးများက အနည်းငယ် တွေဝေမိန်းမောနေ၏။

မကြာသေးမီ အချိန်ကမှ တိုင်ဖန်းရွှမ်းက လက်စားချေရတော့မည့် ခံစားချက်ဖြင့် အနက်ရောင် မြို့တော်မှ ထွက်ခွာလာခဲ့ခြင်း ဖြစ်သည်။ ယခု ဤကဲ့သို့သော အနေအထားဖြင့် ပြန်လာရလိမ့်မည်ဟု သူ မမျှော်လင့်ထားခဲ့ချေ။

သူနှင့် အတူသွားခဲ့သော မြောင်ချီရှန်းမှာ သေဆုံးသွားခဲ့သည်မှာ ကြာပြီ ဖြစ်သည်။

အသွားတုန်းက မည်မျှ မောက်မာခဲ့သလဲ၊ ယခု အပြန်တွင် ပို၍ သနားစရာ ကောင်းနေလေ ဖြစ်သည်။

အနက်ရောင် မြို့တော်သို့ ဝင်ရောက်လာပြီးနောက် တိုင်ဖန်းရွှမ်းက ချန်ဖေးကို အနက်ရောင် မြို့တော်၏ အရှေ့တောင်ဘက်ရှိ အိမ်ကြီးရှေ့သို့ ခေါ်ဆောင်လာခဲ့သည်။

ဤအခိုက်အတန့်တွင် ချန်ဖေး၏ ချီအရှိန်အဝါက အတွင်းကလီစာသန့်စင်ခြင်း အဆင့်သို့ ကျဆင်းနေပြီ ဖြစ်သည်။

ယခုအခိုက်အတန့်တွင် တိုင်ဖန်းရွှမ်း၏ နောက်သို့ လိုက်ပါလာခြင်းက အလွန် သာမန်မျှသာ ဖြစ်ပုံရပြီး တိုင်ဖန်းရွှမ်း အိမ်ကြီးထဲသို့ ဝင်ရောက်သွားသောအခါ မည်သူကမျှ သဘာဝကျကျ မတားဆီးရဲကြသဖြင့် အဆင့်များစွာကို အလွန် လွယ်ကူစွာ ဖြတ်သန်းလာခဲ့သည်။

ချန်ဖေး၏ အာရုံခံနိုင်စွမ်း အရ ယခုအခိုက်အတန့် အိမ်ကြီးထဲတွင် အခြားသော ဒွာရသန့်စင်ခြင်း အစောပိုင်းအဆင့် ချီအရှိန်အဝါ တစ်ခု ရှိနေသေးသော်လည်း ထိုချီအရှိန်အဝါက တိုင်ဖန်းရွှမ်းကို သတိထားမိပြီးနောက် ရောက်မလာဘဲ မူလ နေရာတွင်သာ ဆက်နေခဲ့သည်။

"အဲဒီလူက ပုံမှန်ဆို ကျွန်တော်နဲ့ မတည့်ဘူး... ကျွန်တော်တို့ အချင်းချင်းလည်း သိပ်မတွေ့ဖြစ်ကြပါဘူး..."

တိုင်ဖန်းရွှမ်းက တိုးညှင်းစွာ ရှင်းပြလိုက်သည်။

စင်္ကြံလမ်း အနည်းငယ်ကို ဖြတ်ကျော်ပြီးနောက် တိုင်ဖန်းရွှမ်းက ချန်ဖေးကို မြောင်ချီရှန်း၏ ခြံဝင်းသို့ ခေါ်ဆောင်လာခဲ့သည်။

လမ်းတစ်လျှောက်ရှိ လူများက တိုင်ဖန်းရွှမ်းကို မြင်သောအခါ အားလုံးက ခေါင်းငုံ့၍ ဘေးဖယ်ရပ်ကာ တိုင်ဖန်းရွှမ်းကို အရင် ဖြတ်သွားခွင့် ပြုကြသည်။

မြောင်ချီရှန်း၏ ခြံဝင်းတွင် အစောင့်များ မရှိဘဲ အစေခံမိန်းကလေးမိန်းကလေး အချို့သာ ရှိသည်။

ဤအစေခံမိန်းကလေးများက တိုင်ဖန်းရွှမ်း လာသည်ကို မြင်သောအခါ သဘာဝကျကျ မတားဆီးရဲကြချေ။

တိုင်ဖန်းရွှမ်းနှင့် မြောင်ချီရှန်းတို့က အလွန် ရင်းနှီးကြောင်း လူတိုင်း သိကြပြီး တိုင်ဖန်းရွှမ်းက မြောင်ချီရှန်း၏ ခြံဝင်းသို့ မကြာခဏ လာရောက်လေ့ ရှိသည်။

သို့သော် မြောင်ချီရှန်း မရှိချိန်တွင်မူ တိုင်ဖန်းရွှမ်းက ဤ‌နေရာသို့ လာရောက်လေ့ မရှိချေ။

ဤအစေခံမိန်းကလေးများက တစ်စုံတစ်ခု မှားယွင်းနေကြောင်း ခံစားမိသော်လည်း မည်သူကမျှ စကားမပြောကြချေ။

တိုင်ဖန်းရွှမ်း အဘယ်ကြောင့် ဤနေရာသို့ လာရသနည်း ဟု မေးမြန်းရန် သူတို့တွင် အစွမ်းအစ သို့မဟုတ် အရည်အချင်း မရှိကြချေ။

ချန်ဖေးက တိုင်ဖန်းရွှမ်းနှင့်အတူ မြောင်ချီရှန်း၏ စာကြည့်ခန်းသို့ ရောက်ရှိလာသောအခါ ချန်ဖေးက စာကြည့်ခန်း တစ်ခုလုံးကို ပတ်လည် လှမ်းကြည့်လိုက်ပြီး စိတ်စွမ်းအားများဖြင့် ပတ်ဝန်းကျင်ကို ပြည့်နှက်သွားစေကာ နေရာတိုင်းကို တစ်လက်မချင်း အသေးစိတ် ရှာဖွေလိုက်သည်။

အခြားသော ဒွာရသန့်စင်ခြင်း အဆင့်များနှင့် နှိုင်းယှဉ်ပါက ဝိညာဉ်ကြိုးမျှင် ကျင့်စဉ်က ချန်ဖေး၏ စိတ်စွမ်းအားကို အလွန် သိမ်မွေ့သွားစေခဲ့ရာ မည်သည့် သဲလွန်စမဆို ချန်ဖေး၏ မျက်လုံးထဲတွင် အဆပေါင်းများစွာ ကြီးမားလာမည် ဖြစ်သည်။

အချိန်အနည်းငယ် ကြာပြီးနောက် ချန်ဖေးက စာအုပ်စင် တစ်ခုဆီသို့ လျှောက်သွားကာ လျှို့ဝှက် အကန့်တစ်ခုကို ဖွင့်လိုက်ပြီး အတွင်း၌ ဝှက်ထားသော ကျောက်စိမ်းစာလိပ် အချို့ကို တွေ့ရှိလိုက်သည်။

ထို့အပြင် ကျောက်စိမ်းစာလိပ် တစ်ခုစီတွင် အမှန်တကယ်ပင် စိတ်စွမ်းအားများ ရစ်ပတ်ထားသည်ကို တွေ့ရ၏။

အကယ်၍ ဖြေရှင်းသည့် နည်းလမ်း မှားယွင်းသွားပါက သို့မဟုတ် အကြမ်းဖက်၍ ဖယ်ရှားရန် ကြိုးစားပါက ကျောက်စိမ်းစာလိပ် တစ်ခုလုံး ကျိုးပဲ့သွားမည် ဖြစ်ပြီး အတွင်းရှိ အကြောင်းအရာများကိုလည်း သဘာဝကျကျ မြင်တွေ့ရတော့မည် မဟုတ်ချေ။

ကျောက်စိမ်းစာလိပ်ပေါ်တွင် ဤသို့သော ယန္တရားမျိုး တပ်ဆင်ထားခြင်းက အမှန်တကယ်တော့ အလွန် ဒုက္ခများသော ကိစ္စ တစ်ခု ဖြစ်ပြီး အဓိက အချက်မှာ အချိန်အတိုင်းအတာ တစ်ခုပြည့်တိုင်း ကျောက်စိမ်းစာလိပ်ပေါ်သို့ စိတ်စွမ်းအားများ ပြန်လည် ဖြည့်တင်းပေးရန် လိုအပ်ခြင်း ဖြစ်သည်။

သို့မဟုတ်ပါက တစ်နေ့တွင် ကျောက်စိမ်းစာလိပ်ပေါ်ရှိ စိတ်စွမ်းအားများ အလိုအလျောက် ကုန်ခမ်းသွားသောအခါ ဤကျောက်စိမ်းစာလိပ်လည်း တိုက်ရိုက် ပျက်စီးသွားမည် ဖြစ်သည်။

ချန်ဖေးက ကျောက်စိမ်းစာလိပ်များကို သိမ်းဆည်းလိုက်ပြီး လှည့်၍ ပတ်ဝန်းကျင်ကို ကြည့်လိုက်ရာ ဤစာကြည့်ခန်းထဲတွင် တန်ဖိုး အရှိဆုံး အရာမှာ ဤကျောက်စိမ်းစာလိပ်များသာ ဖြစ်သည်။

သို့သော် ယခု အနက်ရောင် မြို့တော်တွင် ရှိနေဆဲ ဖြစ်ရာ ချန်ဖေး အနေဖြင့် ဤကျောက်စိမ်းစာလိပ်များကို ဖောက်ထွင်းရန် မသင့်တော်သေးပေ။

နံရံ တစ်ခုသာ ခြားသော မြောင်ချီရှန်း၏ အိပ်ခန်းကိုလည်း ချန်ဖေးက စိတ်စွမ်းအားများ အသုံးပြု၍ ရှာဖွေခဲ့ပြီး ဖြစ်ကာ ခြံဝင်း တစ်ခုလုံးကိုပင် အစောကတည်းက ရှာဖွေ ပြီးစီးခဲ့ပြီး ဖြစ်၍ အပို ထပ်မံ တွေ့ရှိမှုများ မရှိတော့ချေ။

"လျှို့ဝှက်ခန်းဆီ သွားမယ်..."

ချန်ဖေးက တိုင်ဖန်းရွှမ်းကို လှမ်းကြည့်လိုက်သည်။

"ကောင်းပြီ..."

တိုင်ဖန်းရွှမ်းက ခေါင်းညိတ်လိုက်၏။

အစမှ အဆုံးတိုင်အောင် တိုင်ဖန်းရွှမ်းက ထိုနေရာတွင် တိတ်ဆိတ်စွာ ရပ်နေခဲ့ပြီး မည်သည့် အပြောင်းအလဲမျှ မရှိခဲ့ချေ။

စင်္ကြံလမ်း အနည်းငယ်ကို ထပ်မံ ဖြတ်ကျော်ပြီးနောက် နောက်ဆုံးတွင် လမ်းမကြီး တစ်ခုကို လိုက်၍ မြေအောက်သို့ နက်ရှိုင်းစွာ ဝင်ရောက်သွား၏။

တိုင်ဖန်းရွှမ်းက ချန်ဖေးကို ခေါ်ဆောင်၍ လမ်းထဲသို့ ဝင်ရောက်သွားချိန်တွင် အိမ်ကြီးထဲရှိ အခြား ဒွာရသန့်စင်ခြင်း အဆင့် ချီအရှိန်အဝါ တစ်ခုက အနည်းငယ် လှုပ်ခတ်သွားသော်လည်း နောက်ဆုံးတွင် ရောက်မလာခဲ့ချေ။

လမ်းတစ်လျှောက်တွင် လူများစွာ ရှိသော်လည်း အားလုံးကို တိုင်ဖန်းရွှမ်းက ဖြေရှင်းပေးခဲ့သည်။

မိုးမျှော်စင်၏ အကြီးအကဲ တစ်ယောက် အနေဖြင့် တိုင်ဖန်းရွှမ်းတွင် ဤနေရာသို့ လာရောက်ရန် အရည်အချင်း သဘာဝကျကျ ရှိပေသည်။

နောက်ဆုံးတွင် သူတို့ နှစ်ယောက်က သံမဏိဖြင့် ပြုလုပ်ထားသော တံခါးကြီး တစ်ခုရှေ့တွင် ရပ်တန့်လိုက်သည်။

တံခါးပေါ်တွင် အစီအရင်များ ရစ်ပတ်ထားပြီး အကယ်၍ အတင်းအကျပ် ဖောက်ထွင်းရန် ကြိုးစားပါက အထက်ရှိ အိမ်ကြီးတွင် သာမက အနက်ရောင် မြို့တော် တစ်ခုလုံးတွင်ပါ လှုပ်ရှားမှုများ ဖြစ်ပေါ်လာမည်ဟု ခန့်မှန်းရသည်။

"လျှို့ဝှက်ခန်းက နှစ်ထပ် ရှိတယ်... ပထမအထပ်ကို ငါ ဖွင့်ပေးနိုင်တယ်... အ

အတွင်းဆုံး အထပ်ကိုတော့ မင်း လက်ထဲက အစီအရင်ပြား လိုအပ်တယ်..."

တိုင်ဖန်းရွှမ်းက ချန်ဖေး၏ လက်ထဲရှိ ကျောက်စိမ်းကို ညွှန်ပြကာ ပြောလိုက်၏။

ဤကျောက်စိမ်းကို ချန်ဖေးက မြောင်ချီရှန်း ထံမှ ရရှိခဲ့ခြင်း ဖြစ်ပြီး မြောင်ချီရှန်း အမြဲတမ်း ကိုယ်ပေါ်တွင် သယ်ဆောင်ထားလေ့ ရှိသည်။

"ဒါဆို... အခု ဖွင့်လိုက်တော့..."

တိုင်ဖန်းရွှမ်းက ချန်ဖေးကို တစ်ချက် လှမ်းကြည့်လိုက်ပြီး သံမဏိ တံခါးကြီး ရှေ့သို့ ခြေလှမ်းသွားကာ သူ၏ လက်ဝါးက အစီအရင်ကို မထိရသေးမီမှာပင် သူ လှုပ်ရှား၍ မရတော့ကြောင်း တွေ့ရှိလိုက်ရသည်။

"ဒီပထမထပ် အစီအရင်ကို... ကျွန်တော် ဖွင့်ဖို့ လိုတယ်လေ..."

တိုင်ဖန်းရွှမ်းက အနည်းငယ် နားမလည်စွာဖြင့် ပြောလိုက်၏။

"ပြီးတော့... အနက်ရောင် မြို့တော်ရဲ့ ပိုင်ရှင်က... ဒီနေရာကို ရောက်လာမှာမလား..."

ချန်ဖေးက တည်ငြိမ်စွာ ပြောလိုက်သည်။

စကားအဆုံးတွင် သူ့ကို ကျောခိုင်းထားသော တိုင်ဖန်းရွှမ်း၏ မျက်လုံးများ အလိုအလျောက် အနည်းငယ် ပြူးကျယ်သွားတော့သည်။