အခန်း (၃၇၀-၃၇၁)

အခန်း (၃၇၀) သန့်စင်သော နယ်မြေ

သစ်ငုတ်တိုဆီမှ အသံကို ကြားလိုက်ရသောအခါ ချန်ဖေး၏ မျက်နှာပေါ်တွင် ဝမ်းသာပီတိ အပြုံးတစ်ခု ပေါ်လာ၏။

သူက ဤသစ်ပင်ကို ဝိညာဉ်နိုးထခြင်း ဆေးရည်ဖြင့် ရေလောင်းပေးနေခဲ့သည်မှာ လပေါင်းများစွာ ကြာမြင့်ခဲ့ပြီ ဖြစ်သည်။

ပွင့်ပွင့်လင်းလင်း ပြောရလျှင် ချန်ဖေး၏ ရင်ထဲရှိ မျှော်လင့်ချက်က အချိန်ကြာလာသည်နှင့်အမျှ လျော့နည်းလာခဲ့ပြီ ဖြစ်သည်။

နောက်ဆုံးတွင် သူက အမှန်တကယ် အရှုံးမပေးခဲ့ခြင်းမှာ ဘာကာ၏ ဉာဏ်ပညာကို ထိုအတိုင်း ပျောက်ကွယ်သွားစေရန် ဆန္ဒမရှိသောကြောင့်သာ ဖြစ်၏။

ယနေ့တွင် သစ်ငုတ်တိုအတွင်းရှိ ဘာကာ၏ ဝိညာဉ်က နောက်ဆုံးတွင် ပြန်လည် နိုးထလာခဲ့ပြီ ဖြစ်သည်။

နာရီဝက်ခန့် အကြာတွင် မူလ သစ်ငုတ်တိုလေးက သစ်ပင်လူသားငယ်လေး ပုံစံအဖြစ်သို့ ပြောင်းလဲသွား၏။

သို့သော် အတိတ်က ဘာကာထက် များစွာ သေးငယ်ပြီး အားနည်းနေသည်မှာ သေချာလှသည်။

ဘာကာကို ပထမဆုံး တွေ့ခဲ့စဉ်က ဘာကာမှာ အဆင့် ၁ အထွတ်အထိပ် မိစ္ဆာသားရဲ ဖြစ်နေပြီဖြစ်ပြီး ဒုတိယအဆင့် မိစ္ဆာသားရဲအဖြစ်သို့ ရောက်ရှိရန် ဆံချည်တစ်မျှင်သာ လိုတော့၏။

သို့သော် ယခု ဘာကာ၏ စွမ်းအားက အစောပိုင်းအဆင့်သို့ ကျဆင်းသွားပြီး အားအနည်းဆုံး မိစ္ဆာသားရဲ ဖြစ်လာသည်။

ခန္ဓာကိုယ်ကြံ့ခိုင်ခြင်း အဆင့်ရှိ မည်သည့် ကျင့်ကြံသူမဆို ဘာကာကို အလွယ်တကူ အနိုင်ယူနိုင်လိမ့်မည်ဟု ခန့်မှန်းရသည်။

ကံကောင်းထောက်မစွာဖြင့် ဘာကာ၏ မူလအစစွမ်းအင်များ ထိခိုက်သွားသော်လည်း အခြေခံအုတ်မြစ်မှာ ရှိနေသေးသဖြင့် အချိန်တစ်ခု ကြာလျှင် အဆင့် ၁ အထွတ်အထိပ်အဆင့်သို့ ပြန်လည်ရောက်ရှိနိုင်မည်ဟု ခန့်မှန်းရ၏။

အဆင့် ၂ အစောပိုင်းအဆင့်အတွက်မူ ပို၍ ခက်ခဲပေလိမ့်မည်။

လျှို့ဝှက်နယ်မြေက အဆင့် ၂ သို့ တက်လှမ်းသွားသောအခါ အတွင်းရှိ သတ္တဝါအားလုံး အကျိုးကျေးဇူးများစွာ ရရှိခဲ့ကြပြီး ဘာကာကလည်း ထိုအခွင့်အရေးကို အသုံးချ၍ အဆင့် ၂ မိစ္ဆာသားရဲအဖြစ်သို့ တက်လှမ်းနိုင်ခဲ့သည်။

သို့သော် လောဘကြောင့် သူက ပန်းဖျင်တောင်ပေါ်သို့ တက်သွားခဲ့ရာ အခြား မိစ္ဆာသားရဲများ၏ လိုက်လံတိုက်ခိုက်ခြင်းကို ခံခဲ့ရ၏။

သူ၏ ကြောက်လန့်တကြား အပြေးအလွှား သွားလာမှုကြောင့် နောက်ဆုံးတွင် မီဝမ်မြို့ သို့ ရောက်ရှိသွားခဲ့သည်။

တစ္ဆေမြို့တော်က ရင်ဆိုင်ဖြေရှင်းရန် နည်းလမ်းမရှိသော နေရာတစ်ခု ဖြစ်ပြီး တစ်ရက်အတွင်း သေဆုံးသွားနိုင်သည်။

တစ္ဆေမြို့တော်ထဲသို့ အစပိုင်းတွင် ဝင်ရောက်ခဲ့သော ဒွာရသန့်စင်ခြင်း အဆင့် နှစ်ဆယ်ကျော်အနက် အများစုမှာ ပထမနေ့ကိုပင် မကျော်လွန်နိုင်ခဲ့ကြချေ။

ဘာကာက သူ၏ မိစ္ဆာသားရဲ ဂုဏ်သတ္တိများကို အားကိုး၍ ရက်အနည်းငယ်ကြာ တိုက်ခိုက်မှုများကို ခံနိုင်ရည်ရှိခဲ့သော်လည်း ရိုးရိုးရှင်းရှင်း တောင့်ခံနေရုံဖြင့် အခြေခံပြဿနာကို မဖြေရှင်းနိုင်ခဲ့ပေ။

အဆုံးတွင် သူ၏ အသိဉာဏ်မှာ အူတိုင်ထဲတွင် ပုန်းအောင်းနေရုံမှတစ်ပါး အခြားရွေးချယ်စရာ မရှိတော့ဘဲ ချန်ဖေး တွေ့ခဲ့ရသည့် ပုံစံအဖြစ်သို့ ရောက်ရှိသွားခဲ့သည်။

အကယ်၍ ချန်ဖေးသာ အနည်းငယ် နောက်ကျမှ ပေါ်လာပါက ဤဉာဏ်ပညာ အနည်းငယ်လေးပင်လျှင် အတင်းအကျပ် ဖျက်ဆီးခံရမည်ဖြစ်ပြီး သူက တစ္ဆေမြို့တော်ရှိ သစ်ပင်တစ်ပင်အဖြစ် အမှန်တကယ် ပြောင်းလဲသွားမည် ဖြစ်ကာ ခြောက်သွေ့နေသော သစ်ပင်တစ်ပင်သာ ဖြစ်နေပေလိမ့်မည်။

"ငါ့သူငယ်ချင်းကောင်းကြီး.. မင်းကို ပြန်တွေ့ရလိမ့်မယ်လို့ ငါ မထင်ထားခဲ့ဘူး..."

ဘာကာမှာ ပြန်လည်မွေးဖွားလာသကဲ့သို့ ဖြစ်နေ၏။

ဘာကာက သစ်ပင်ထဲမှ ပြန်လည်နိုးထလာပြီးနောက် ချန်ဖေးကို ပထမဆုံး တွေ့လိုက်ရသောအခါ အတော်လေး ဝေခွဲမရ ဖြစ်သွားသည်။

ဘာကာက သူ ဘယ်ရောက်နေမှန်း မသိဘဲ တစ္ဆေမြို့တော်ထဲတွင် ရှိနေဆဲဟု အလိုလို ထင်မှတ်သွား၏။

အကယ်၍ ဘာကာသာ တစ္ဆေမြို့တော်ထဲတွင် သေဆုံးသွားရမည်ဆိုပါက ချန်ဖေးမှာလည်း ပိုကောင်းလာမည် မဟုတ်ဟု သူ ထင်ခဲ့သည်။

အမှန်တကယ်တွင် ချန်ဖေးက သူမကို တစ္ဆေမြို့တော်ထဲမှ ခေါ်ထုတ်လာခဲ့ပြီးပြီ ဖြစ်ကာ ယခု သူမက ချန်ဖေး၏ ဂိုဏ်းထဲတွင် ရောက်ရှိနေခြင်း ဖြစ်ကြောင်း သိလိုက်ရ၏။

တစ္ဆေမြို့တော်ထဲတွင် ဖြစ်ပျက်ခဲ့သမျှကို တွေးကြည့်ရုံဖြင့် ဘာကာ၏ ကျောရိုးကို စိမ့်တက်သွားစေသည်။ ပြန်လည်တိုက်ခိုက်ရန် အခွင့်အရေး လုံးဝ မရှိခဲ့ချေ။

အရာအားလုံးကို သေသေချာချာ စီစဉ်ထားသော်လည်း သူက တစ္ဆေမြို့တော်၏ ကြောက်မက်ဖွယ်ကောင်းသော သတ္တဝါများကို လုံးဝ မလွတ်မြောက်နိုင်ခဲ့ပေ။

"ဘာက မင်းကို ပြန်လည်သက်သာလာအောင် ကူညီပေးနိုင်မလဲ..."

ချန်ဖေးက ဘာကာကို ကြည့်၍ ပြုံးကာ မေးလိုက်သည်။

"ဒီနေရာက ကောင်းပါတယ်... ဒါပေမဲ့ မူလအစစွမ်းအင် မလုံလောက်ဘူး..."

ဘာကာက ပတ်ဝန်းကျင်ကို ဝေ့ကြည့်လိုက်ပြီး ပန်းအိုးတစ်အိုးဆီသို့ လျှောက်သွားကာ ချန်ဖေးကို လှည့်ကြည့်လိုက်၏။

ချန်ဖေးက ကန့်ကွက်ခြင်း မရှိသည်ကို မြင်သောအခါ ဘာကာက ပန်းအိုးထဲမှ အပင်ကို ဆွဲနုတ်၍ အိုးထဲသို့ ခုန်ဝင်ကာ သူ့ကိုယ်သူ စိုက်လိုက်သည်။

လျှို့ဝှက်နယ်မြေထဲတွင် ရှိစဉ်က ဘာကာမှာ တိုက်ဆိုင်မှုတစ်ခုကြောင့် ဆေးပင်တစ်ပင်မှ မိစ္ဆာသားရဲအဖြစ်သို့ မျိုးဗီဇပြောင်းလဲသွားခဲ့ခြင်း ဖြစ်သည်။

ယခု ပြင်းထန်စွာ ဒဏ်ရာရနေချိန်တွင်ပင် ဤနည်းလမ်းကို အသုံးပြု၍ ပြန်လည်သက်သာလာအောင် လုပ်နိုင်သေး၏။

မူလအစစွမ်းအင်လား...

ချန်ဖေးက တစ်ခဏမျှ တွေးတောလိုက်သည်။

ဤခြံဝန်းတွင် ဆူညံသံများကို ဖုံးကွယ်ရန်နှင့် မူလအစစွမ်းအင် အချို့ကို စုစည်းရန် အများအားဖြင့် အသုံးပြုနိုင်သော အစီအရင်တစ်ခု ရှိသော်လည်း အကျိုးသက်ရောက်မှုမှာ အလွန် မပြင်းထန်လှချေ။

အဆင့် ၂ လျှို့ဝှက်နယ်မြေအတွင်းရှိ မူလအစစွမ်းအင် သိပ်သည်းဆနှင့် နှိုင်းယှဉ်ပါက ချန်ဖေး၏ ခြံဝန်းရော၊ ဂိုဏ်းအတွင်းရှိ အဓိကတောင်ထွတ်ပါ ယှဉ်ပြိုင်နိုင်စွမ်း မရှိပေ။

အဆင့် ၂ လျှို့ဝှက်နယ်မြေကို ယခုအခါ ယွီမိသားစုက သိမ်းပိုက်ထားပြီး ပြင်ပလူများ လုံးဝ ဝင်ရောက်ခွင့် မရှိတော့ချေ။

ယွီမိသားစုကဲ့သို့သော အင်အားကြီး အဖွဲ့အစည်းတစ်ခုက အဆင့် ၂ လျှို့ဝှက်နယ်မြေကို သိမ်းပိုက်ထားသဖြင့် မည်သူကမျှ မကန့်ကွက်ရဲကြပေ။

ဤလျှို့ဝှက်နယ်မြေကို မူလက ယွမ်ချန်ဓားဂိုဏ်း အပါအဝင် အဖွဲ့အစည်း အချို့က ပူးတွဲပိုင်ဆိုင်ခဲ့သော်လည်း ယခု ယွီမိသားစုက ပိုင်ဆိုင်ကြောင်း ကြေညာလိုက်သောအခါ မည်သူကမျှ မဆန့်ကျင်ရဲကြချေ။

ထို့ကြောင့် ဘာကာရော ချန်ဖေးပါ ထိုအဆင့် ၂ လျှို့ဝှက်နယ်မြေထဲသို့ ရေတိုအတွင်း ဝင်ရောက်နိုင်မည် မဟုတ်ပေ။

"မင်းက ဝိညာဉ်ကျောက်တုံးတချို့ကို စုပ်ယူလိုက်ရင် ပိုမြန်မြန် သက်သာလာနိုင်မယ် ထင်တယ်..."

ချန်ဖေး၏ လက်ထဲတွင် ဝိညာဉ်ကျောက်တုံး တစ်တုံး ပေါ်လာ၏။ အနည်းငယ် အားစိုက်လိုက်သည်နှင့် ဝိညာဉ်ကျောက်တုံးမှာ အမှုန့်အဖြစ် ပြောင်းလဲသွားပြီး ဘာကာ၏ ပတ်ဝန်းကျင်ရှိ မြေကြီးထဲသို့ ပြန့်ကျဲသွားသည်။

ဝိညာဉ်ကျောက်တုံး အစအနများအတွင်းရှိ မူလအစစွမ်းအင်များက ဘာကာကို အာဟာရ ဖြည့်တင်းပေးလိုက်ရာ ဘာကာ၏ မျက်လုံးသေးသေးလေး နှစ်လုံးမှာ သက်တောင့်သက်သာဖြင့် မှိတ်သွား၏။

"ကျေးဇူးတင်ပါတယ် ချန်ဖေး... ငါ ပြန်သက်သာလာတာနဲ့ မင်းကို ဆေးပင်တွေ စိုက်ပျိုးဖို့ ကူညီပေးမယ်..."

ဘာကာက ချန်ဖေးကို လေးနက်သော မျက်နှာထားဖြင့် မော့ကြည့်လိုက်သည်။

"အဲဒီဆေးပင်တွေက ပိုက်ဆံအများကြီး ရနိုင်လောက်တယ်.. ငါ များများ စိုက်လေ မင်း များများ ရောင်းရလေပဲ..."

ဘာကာ၏ စကားကို ကြားသောအခါ ချန်ဖေးမှာ အနည်းငယ် အံ့သြသွား၏။

လျှို့ဝှက်နယ်မြေထဲတွင် ဘာကာ နေထိုင်ခဲ့သည့် ဂူကို သူ ချက်ချင်း သတိရသွားသည်။

ထိုနေရာတွင် ဆေးပင် စိုက်ပျိုးထားသည့် လက္ခဏာများ ရှင်းလင်းစွာ ရှိနေသော်လည်း ထိုအချိန်က ချန်ဖေးမှာ သေချာပေါက် မသိခဲ့ချေ။

အဓိက အကြောင်းရင်းမှာ ဆေးပင်များ အားလုံးက အသက်အရွယ် အလွန်ကြီးရင့်နေသောကြောင့်ပင်။

"အဲဒီတုန်းက မင်း ငါ့ကိုပေးခဲ့တဲ့ ဆေးပင်တွေ အားလုံးကို မင်း ကိုယ်တိုင် စိုက်ခဲ့တာလား..."

ချန်ဖေးက တိုးတိုးလေး မေးလိုက်၏။

ချန်ဖေးက ဘာကာနှင့် ပထမဆုံး တွေ့ဆုံစဉ်က ဘာကာက ဆယ်စုနှစ်များစွာ သက်တမ်းရှိသော ဆေးပင်များကို ပေါ့ပေါ့ပါးပါး ထုတ်ယူ၍ စားသုံးနေသည်ကို မြင်သောအခါ အနည်းငယ် အံ့အားသင့်ခဲ့ရသည်။

သို့သော် ထိုအချိန်က ဘာကာကိုယ်တိုင် ဤဆေးပင်များကို စုဆောင်းခဲ့ခြင်း ဖြစ်မည်ဟုသာ ချန်ဖေးက ပိုတွေးခဲ့၏။

အဘယ်ကြောင့်ဆိုသော် ထိုအချိန်က အဆင့် ၁ လျှို့ဝှက်နယ်မြေထဲတွင် ဝိညာဉ်ဆေးပင်များ သိပ်မရှိသော်လည်း သက်တမ်းရင့် ဆေးပင် အများအပြား ရှိနေသောကြောင့်ပင်။

"ဟုတ်တယ်.. ငါ အကုန်လုံး ကိုယ်တိုင် စိုက်ခဲ့တာ.. အဲဒါတွေက ပိုက်ဆံအများကြီး ရနိုင်တယ်မလား..."

ချန်ဖေးက စိတ်ဝင်စားနေသည်ကို မြင်သောအခါ ဘာကာက အလျင်အမြန် ခေါင်းညိတ်ပြလိုက်သည်။

"ပိုက်ဆံအများကြီး ရနိုင်ပါတယ်... ဒါပေမဲ့ အဲဒီလောက် သက်တမ်းရှိတဲ့ ဆေးပင်တွေ ထုတ်လုပ်ချင်ရင် မြေကြီးထဲက မူလအစစွမ်းအင်တွေအပေါ် လိုအပ်ချက်တွေလည်း ရှိတယ် မဟုတ်လား..."

ချန်ဖေးက သက်တမ်းရင့် ဆေးပင်များ ရနိုင်ခြေအပေါ် စိတ်လှုပ်ရှားမသွားခဲ့ချေ။

ဆေးပင်များ၏ သက်တမ်းကို မြှင့်တင်ခြင်းက အမှန်တကယ်ပင် အထင်ကြီးစရာ ကောင်းသော်လည်း သတ်မှတ်ထားသော အခြေအနေများ ပါဝင်ရမည်မှာ သေချာ၏။

ဆိုရိုးစကားရှိသည့်အတိုင်း လိမ္မာပါးနပ်တဲ့ ထမင်းချက်ကတောင် ဆန်မရှိဘဲ ထမင်းမချက်နိုင်ဘူး ဟူသည်မှာ အခြေခံအခြေအနေအချို့ မပြည့်စုံဘဲ အရာများစွာကို ပြီးမြောက်အောင် မလုပ်နိုင်ကြောင်း ဆိုလိုခြင်း ဖြစ်သည်။

ချန်ဖေး၏ ယခင်ဘဝကဲ့သို့ပင်။ မူလအစစွမ်းအင် မရှိသော လောကတစ်ခု ဖြစ်၏။

ခန္ဓာကိုယ် သို့မဟုတ် ကျွမ်းကျင်မှုများကို မည်မျှပင် ပြီးပြည့်စုံအောင် သွေးသင်ထားပါစေ နောက်ဆုံးတွင် အနည်းငယ် ပိုအစွမ်းထက်သော သာမန်လူတစ်ယောက်သာ ဖြစ်နေပါသေးသည်။

ကောင်းကင်ဘုံသို့ တက်လှမ်းခြင်း သို့မဟုတ် မြေကြီးထဲသို့ ပုန်းရှောင်ခြင်း၊ ထာဝရအသက် သို့မဟုတ် မသေနိုင်သော ခန္ဓာကိုယ်ကို ရရှိရန် နည်းလမ်း မရှိချေ။

အဘယ်ကြောင့်ဆိုသော် အခြေခံအခြေအနေများက ခွင့်မပြုသောကြောင့် ဖြစ်သည်။

ဤအခြေခံအပေါ်တွင် ဖွံ့ဖြိုးတိုးတက်လာသော အရာများက သဘာဝအားဖြင့် ပို၍ အစွမ်းထက်သော အရာတစ်ခုအဖြစ် ဖန်တီး၍ မရနိုင်ချေ။

"ဟုတ်တယ်..."

ဘာကာက ပတ်ဝန်းကျင်ရှိ မူလအစစွမ်းအင် သိပ်သည်းဆကို တွေးတောလိုက်သည်။

ဤအခြေအနေများအောက်တွင် ထုတ်လုပ်သော ဆေးပင်များက လျှို့ဝှက်နယ်မြေထဲတွင် ရှိနေစဉ်က အခြေအနေသို့ ရောက်ရှိနိုင်မည် မဟုတ်ချေ။

"ဒါက မင်းရဲ့ ပြဿနာ မဟုတ်ပါဘူး..."

ဘာကာ၏ အနည်းငယ် စိတ်ဓာတ်ကျနေသော အမူအရာကို မြင်သောအခါ ချန်ဖေးက ခပ်တိုးတိုး ရယ်မောလိုက်၏။

အကယ်၍ ဘာကာသာ ယခု နတ်တိမ်ဓားဂိုဏ်းတွင် ရှိနေမည်ဆိုပါက အဆင့် ၁ လျှို့ဝှက်နယ်မြေ သာမက အဆင့် ၂ လျှို့ဝှက်နယ်မြေပါ ရှိနေမည် ဖြစ်သည်။

အကယ်၍ ဘာကာသာ ထိုနေရာတွင် ရှိနေမည်ဆိုပါက ဝိညာဉ်ဖိတ်ခေါ်ဆေးပင်များ လုံလောက်မည် မဟုတ်သော်လည်း အရည်အသွေးမြင့် သာမန်ဆေးပင်များ အမြောက်အမြား သေချာပေါက် ရှိနေလိမ့်မည် ဖြစ်သည်။

နတ်တိမ်ဓားဂိုဏ်းအတွင်း သူ၏တန်ဖိုးက အဆမတန် မြင့်တက်သွားလိမ့်မည် ဖြစ်၏။

ခန္ဓာကိုယ်ကြံ့ခိုင်ခြင်း အဆင့် ကျင့်ကြံသူများအတွက် သက်တမ်းရင့် ဆေးပင်များဖြင့် ဖော်စပ်ထားသော ဆေးလုံးများကို အသုံးပြုနိုင်သည်။

ခိုင်မာသော အခြေခံအုတ်မြစ်တစ်ခု ရှိလာသည်နှင့်အမျှ ဒွာရသန့်စင်ခြင်း အဆင့်သို့ ရောက်ရှိနိုင်ခြေက သဘာဝအားဖြင့် ပိုမို မြင့်မားလာလိမ့်မည်။

ထို့ကြောင့် အင်အားကြီး ဂိုဏ်းများအတွက် ဘာကာ၏ တန်ဖိုးမှာ ချက်ချင်းပင် သိသာထင်ရှားလှ၏။

တစ်နည်းအားဖြင့် ယွမ်ချန်ဓားဂိုဏ်းတွင် အဆင့် ၁ လျှို့ဝှက်နယ်မြေ တစ်ခုမျှ မရှိချေ။ သို့မဟုတ်ပါက ဘာကာအတွက် အသုံးဝင်မည့် နေရာတစ်ခု ရှိနေပေလိမ့်မည်။

…

ရှန်ဝူမြို့။

ရှီးလျန်အစစ်အမှန် သခင်ကြောင့် ရှန်ဝူမြို့မှာ မကြာသေးမီက လူတိုင်းသိသော နာမည်တစ်ခု ဖြစ်လာခဲ့သည်။

လူတွေ ဘယ်လောက်ပဲ ဝေးဝေးရောက်နေပါစေ ဤနေရာကနေ လူသားလောင်းကောင် တစ်ကောင် ထွက်ပေါ်လာပြီး ကြောက်မက်ဖွယ်ကောင်းသော အန္တရာယ်များ ပေးနေသည်ဆိုတာကို အားလုံး သိထားကြ၏။

အဖွဲ့အစည်းများစွာက ရှန်ဝူမြို့ကို စောင့်ကြည့်ရန် ဤနေရာတွင် လူများ ချထားပြီး ထူးခြားသော လှုပ်ရှားမှုများကို ချက်ချင်း သတင်းပို့ရန် တောင်းဆိုထားကြသည်။

သို့သော် ရှန်ဝူမြို့မှာ မကြာသေးမီက ထူးထူးခြားခြား ငြိမ်သက်နေပြီး မည်သည့် လှုပ်ရှားမှု သို့မဟုတ် ပုံမှန်မဟုတ်သော အခြေအနေမျိုးမှ မရှိချေ။

ထို့အပြင် ပတ်ဝန်းကျင် ဧရိယာကို ပိတ်ဆို့ထားသောကြောင့် မတော်တဆ ဝင်ရောက်မိပြီး ရှန်ဝူမြို့၏ ဝါးမြိုခြင်းကို ခံရမည့်သူ သဘာဝအားဖြင့် ရှိလာမည် မဟုတ်ပေ။

အဖွဲ့အစည်း အသီးသီးမှ လူများအပြင် ဂိုဏ်းမဲ့ကျင့်ကြံသူ အတော်များများလည်း ဤနေရာသို့ လာရောက်ကြ၏။

သူတို့က ပြဿနာရှာရန် သို့မဟုတ် ဖျက်ဆီးရန် လာကြခြင်း မဟုတ်ပေ။ မည်သူကမျှ ထိုသို့ မလုပ်ကြချေ။အဘယ်ကြောင့်ဆိုသော် ထိုသို့ လုပ်လိုက်သည်နှင့် လူတိုင်း၏ တိုက်ခိုက်ခြင်းကို ခံရနိုင်သည်။

ဂိုဏ်းမဲ့ကျင့်ကြံသူများက အလုပ်လုပ်ရာတွင် သူတို့၏ ကိုယ်ပိုင် ရည်ရွယ်ချက်များ ရှိကြပြီး အများစုမှာ ကိုယ်ကျိုးစီးပွားကြောင့် လှုံ့ဆော်ခံရခြင်း ဖြစ်သည်။ လူအများစု၏ လှုံ့ဆော်မှုလည်း ဖြစ်၏။

ကျန်ကျီရှင်းက သူ့လက်ထဲရှိ ကျောက်စိမ်းပုလင်းကို အသက်သွင်းလိုက်ရာ အေးစက်သော စွမ်းအင် အငွေ့အသက်များက အထဲသို့ စိမ့်ဝင်သွားသည်။

တစ်နာရီအကြာတွင် ကျောက်စိမ်းပုလင်း ပြည့်သွားကြောင်း ကျန်ကျီရှင်းက အာရုံခံမိပြီး သူ၏ မျက်နှာပေါ်တွင် အပြုံးတစ်ခု ပေါ်လာ၏။

ကျန်ကျီရှင်း၏ အတွင်းကလီစာသန့်စင်ခြင်း အလယ်အလတ်အဆင့် ကျင့်ကြံမှုမှာ ကြီးမားသော ဂိုဏ်းတစ်ခုတွင်ဆိုလျှင် အတော်လေး သာမန်မျှသာ ဖြစ်သည်ဟု ယူဆရပေမည်။

သို့သော် ဂိုဏ်းမဲ့ကျင့်ကြံသူ အဆင့်တွင်မူ ဤကျင့်ကြံမှုအဆင့်က အတော်လေး ထူးခြားလှသည်။

အချို့သော မြို့ငယ်လေးများတွင် လူများက သူတို့၏ ကိုယ်ပိုင် မိသားစုများကိုပင် တည်ထောင်နိုင်ခဲ့ကြပြီး ဇိမ်ကျကျ နေထိုင်နိုင်ခဲ့ကြ၏။

သို့သော် ကျန်ကျီရှင်းက ထိုသို့ မလုပ်ခဲ့ချေ။

သိုင်းပညာနှင့် ပတ်သက်၍ သူ့တွင် ကိုယ်ပိုင် ရည်မှန်းချက်များ ရှိနေဆဲ ဖြစ်သည်။

ရှန်ဝူမြို့တွင် ဒွာရပေါင်းစည်းခြင်း အဆင့် လူသားလောင်းကောင် လွတ်မြောက်လာကြောင်း ကြားသိရသောအခါ ကျန်ကျီရှင်းက လာရောက်လေ့လာရန် ခရီးဝေးမှ လာခဲ့ခြင်း ဖြစ်သည်။

ကျန်ကျီရှင်း၏ ကျင့်စဉ်မှာ အနည်းငယ် ထူးခြားလှ၏။

အခြားသော ခန္ဓာကိုယ်ကြံ့ခိုင်ခြင်း အဆင့်များက မိမိ၏ အတွင်းကလီစာများကို သန့်စင်ခြင်းနှင့် သွေးများကို သန့်စင်ခြင်းအပေါ် အာရုံစိုက်နေချိန်တွင် ကျန်ကျီရှင်း၏ ကျင့်စဉ်က ကျင့်ကြံခြင်းတွင် အထောက်အကူပြုရန် လျှို့ဝှက်ဆန်းကြယ်သော ယင်ချီကို အသုံးပြုသည်။

ယင်ချီ၏ အရည်အသွေး မြင့်မားလေလေ ကျန်ကျီရှင်း၏ ကျင့်ကြံမှုက ပိုမို လျင်မြန်လေလေ ဖြစ်၏။

ယင်ချီကို စုဆောင်းရန်အတွက် သဘာဝလွန် အရာများကို သန့်စင်ခြင်း သို့မဟုတ် တစ္ဆေမြို့တော်များ သို့မဟုတ် တစ္ဆေနယ်မြေများဆီသို့ နက်ရှိုင်းစွာ ဝင်ရောက်ခြင်း ပြုလုပ်ရမည် ဖြစ်သည်။

ထိုနေရာများက ယင်ချီ အများအပြား စုစည်းနေသော နေရာများလည်း ဖြစ်၏။

သို့သော် ကျန်ကျီရှင်း၏ အတွင်းကလီစာသန့်စင်ခြင်း အဆင့် ကျင့်ကြံမှုဖြင့် သာမန် ထူးဆန်းသော သတ္တဝါများကို သတ်နိုင်သော်လည်း သူ၏ ယင်ချီ အရည်အသွေးမှာ မလုံလောက်ခဲ့ဘဲ ကျင့်ကြံခြင်း၏ အထောက်အကူပြု အကျိုးသက်ရောက်မှုမှာ မပြင်းထန်ခဲ့ချေ။

တစ္ဆေနယ်မြေ သို့မဟုတ် တစ္ဆေမြို့တော်ဆိုသည်မှာ ယေဘုယျအားဖြင့် ဒွာရသန့်စင်ခြင်း အဆင့်နှင့် ညီမျှသော ဒုတိယအဆင့် သဘာဝလွန် အရာများ ဖြစ်ကြ၏။

ကျန်ကျီရှင်း၏ ကျင့်ကြံမှုအဆင့်ရှိ သူတစ်ယောက်အတွက် ဝင်ရောက်သွားခြင်းက သူ့ကိုယ်သူ အစာကျွေးသကဲ့သို့ ဖြစ်နေပေလိမ့်မည်။

ထို့ကြောင့် ကျန်ကျီရှင်း၏ ကျင့်ကြံမှုက မမြင့်လွန်း၊ မနိမ့်လွန်းသော အခြေအနေများအောက်တွင် အမြဲတမ်း လုပ်ဆောင်နေရပြီး ကျင့်ကြံမှု အရှိန်မှာ တိုးတက်ရန် အမြဲတမ်း ခက်ခဲနေခဲ့သည်။

ဤတစ်ကြိမ် ရှန်ဝူမြို့အကြောင်း ကြားပြီး စမ်းသပ်ကြည့်ရန် တိုက်ရိုက် လာခဲ့သည့်အချိန်အထိဖြစ်သည်။

သူမျှော်လင့်ထားသည့်အတိုင်း ဒွာရပေါင်းစည်းခြင်း အဆင့်ရှိ လူသားလောင်းကောင်က အလွန်ပင် အစွမ်းထက်လွန်းလှသည်။

သူတို့က ဒါဇင်နှင့်ချီသော မိုင်ပေါင်းများစွာ ကွာဝေးနေသော်လည်း ပတ်ဝန်းကျင်ကို လွှမ်းခြုံထားသော ယင်ချီမှာ အလွန် အရည်အသွေး မြင့်မားလှ၏။

တစ္ဆေနယ်မြေထဲသို့ နက်နက်ရှိုင်းရှိုင်း ဝင်ရောက်ခြင်းဖြင့်သာ ရရှိနိုင်သော ယင်ချီနှင့် နှိုင်းယှဉ်ပါက ဤနေရာမှာ ကျန်ကျီရှင်း၏ ကျင့်ကြံခြင်းအတွက် သန့်စင်သော နယ်မြေတစ်ခုနီးပါး ဖြစ်နေသည်။

ယခု ရှန်ဝူမြို့တစ်ဝိုက်တွင် ကျန်ကျီရှင်းကဲ့သို့ လူအများအပြား ရှိနေ၏။ ဤပျံ့နှံ့နေသော ယင်ချီက သိုင်းပညာရှင် အများအပြားအတွက် တန်ဖိုးဖြတ်မရသော ကျင့်ကြံခြင်း အထောက်အကူ တစ်ခု ဖြစ်သည်။

ကျန်ကျီရှင်းက သူကဲ့သို့ အကျိုးအမြတ် အချို့ရရန် လာရောက်ကြသော ဂိုဏ်းမဲ့ကျင့်ကြံသူများ အများအပြား ရှိနေသည့် စခန်းတစ်ခုသို့ ပြန်လာခဲ့သည်။

"အစ်ကိုကျန်... ဒီနေ့ လောင်ဖန်းကို တွေ့သေးလား..."

လူတစ်ယောက်က ကျန်ကျီရှင်း၏ ရှေ့တွင် ရုတ်တရက် ပေါ်လာပြီး ပင်ပန်းနွမ်းနယ်နေကာ သွေးကြောများ ယှက်သန်းနေသော မျက်လုံးများဖြင့် မေးလိုက်၏။

"လွန်ခဲ့တဲ့ နှစ်ရက်လောက်က တွေ့လိုက်သေးတယ်..."

ကျန်ကျီရှင်းက ခေါင်းခါ၍ မျက်မှောင်ကြုတ်လိုက်သည်။

"မင်း ဒဏ်ရာရထားတာလား..."

"မဟုတ်ပါဘူး.. မကြာသေးမီက အိပ်ရေးမဝလို့ပါ..."

ထိုလူက နောက်ဆုံးတွင် ထွက်ခွာသွား၏။ ကျန်ကျီရှင်းက ထိုလူ၏ ကျောပြင်ကို ကြည့်ကာ ရပ်နေခဲ့သည်။

တွေဝေသွားသည့် အခိုက်အတန့်တွင် ကျန်ကျီရှင်းက ထိုလူ၏ နောက်ကွယ်၌ တစ်စုံတစ်ခုကို မြင်လိုက်ရသကဲ့သို့ ထင်မှတ်သွား၏။

အခန်း (၃၇၁) နှစ်ပေ ရှစ်လက်မ ရှည်လျားသော

ကျန်ကျီရှင်း သေချာမကြည့်လိုက်နိုင်မီမှာပင် ထိုလူက လမ်းထောင့်တွင် ပျောက်ကွယ်သွား၏။

ကျန်ကျီရှင်း မျက်မှောင်ကြုတ်လိုက်ပြီး သူ၏ စိတ်ထဲတွင် အတွေးမျိုးစုံ ထွက်ပေါ်လာသည်။

မကြာသေးမီက စခန်းချရာ နေရာတွင် လူများ ပိုမို များပြားလာသည်။

လူတို့သည် ဥစ္စာဓနအတွက် သေဆုံးရပြီး ငှက်တို့သည် အစာအတွက် သေပွဲဝင်ကြသည်။

ရှန်ဝူမြို့တွင် လောလောဆယ် မည်သည့် လှုပ်ရှားမှုမျှ မရှိသဖြင့် ဤနေရာသို့ လာရောက်သူ ပိုမို များပြားလာကာ ယခုအခါ ဈေးတန်းငယ်လေး တစ်ခုပင် ပေါ်ပေါက်လာခဲ့ပြီ ဖြစ်သည်။

လူရှိသော နေရာတွင် ရန်ငြိုးနှင့် အကျိုးအမြတ်များ ရှိတတ်ရာ အရောင်းအဝယ် ကိစ္စများလည်း သဘာဝကျကျ ရှိလာမည် ဖြစ်သည်။

ဈေးတန်း ပေါ်ပေါက်လာခြင်းက စခန်းတစ်ခုလုံး၏ ဖွံ့ဖြိုးတိုးတက်မှုကို ပိုမို တွန်းအားပေးခဲ့ပြီး ပိုမို စည်ကားလာစေသည်။

မိုင်ဆယ်ဂဏန်းခန့် မဝေးကွာပါက၊ သို့မဟုတ် ရှန်ဝူမြို့နှင့် အနည်းငယ် ဝေးကွာသော နေရာသို့ မရွှေ့ပြောင်းပါက အေးစက်သော ချီအရှိန်အဝါကို အာရုံခံမိနိုင်ဆဲ ဖြစ်သည်။

မိုင်ဆယ်ဂဏန်းခန့် အကွာတွင် ဒွာရပေါင်းစည်းခြင်း အဆင့်ရှိ လူသားလောင်းကောင် တစ်ကောင် ရှိနေသည်ကို လူအများစု မေ့လျော့နေကြပြီဟုပင် ထင်ရသည်။

ထိုအရာ ဖြတ်သန်းသွားရာ နေရာတိုင်းတွင် မြက်တစ်ပင်မျှ မပေါက်ရောက်နိုင်ဘဲ အလောင်းကောင်များ နေရာအနှံ့ ပြန့်ကျဲနေမည် ဖြစ်သည်။

လူများ ပိုမို များပြားလာသော်လည်း မိမိ ရင်းနှီးသော လူများ တဖြည်းဖြည်း နည်းပါးလာနေကြောင်း ကျန်ကျီရှင်း တွေ့ရှိလိုက်ရသည်။

ကျန်ကျီရှင်း သိသောသူ အများစုမှာ ဂိုဏ်းမဲ့ကျင့်ကြံသူများ ဖြစ်ကြသည်။

ဂိုဏ်းမဲ့ကျင့်ကြံသူများက အလွန် ရွှေ့ပြောင်းသွားလာလေ့ ရှိသော်လည်း အကျိုးအမြတ်များ ရှိနေသရွေ့ အခြေတကျ နေထိုင်လေ့ ရှိကြရာ သိကျွမ်းသူများ ရုတ်တရက် နည်းပါးသွားစရာ အကြောင်းမရှိချေ။

လွန်ခဲ့သော ရက်အနည်းငယ်က ကျန်ကျီရှင်း အော်ဟစ်သံ တစ်သံကို ကြားခဲ့ရသည်။

ထိုအသံကို ကျန်ကျီရှင်း မှတ်မိပြီး သူက အတွင်းကလီစာသန့်စင်ခြင်း အစောပိုင်းအဆင့် ကျင့်ကြံမှုရှိသော အမွှာညီအစ်ကို နှစ်ယောက်အနက်မှ တစ်ယောက် ဖြစ်သည်။

သို့သော် တူညီသော ကျင့်စဉ်ကို ကျင့်ကြံထားပြီး ငယ်စဉ်ကတည်းက စိတ်သဘောထား တူညီကြသဖြင့် သူတို့ ပူးပေါင်းတိုက်ခိုက်ပါက အတွင်းကလီစာသန့်စင်ခြင်း အထွတ်အထိပ်အဆင့် သိုင်းပညာရှင်များနှင့်ပင် ယှဉ်ပြိုင်တိုက်ခိုက်နိုင်စွမ်း ရှိကြသည်။

ထိုညီအစ်ကို နှစ်ယောက်မှာ ပုံမှန်အားဖြင့် ခွဲခြား၍မရအောင် အတူတကွ ရှိနေတတ်သော်လည်း မည်သည့် အကြောင်းကြောင့်မှန်း မသိဘဲ ထိုနေ့က သူတို့ထဲမှ တစ်ယောက် ပျောက်ကွယ်သွားခဲ့သည်။

အော်ဟစ်သံက အချိန်အတော်ကြာ ဆက်လက် ထွက်ပေါ်နေခဲ့ပြီးနောက် တဖြည်းဖြည်း ပျောက်ကွယ်သွားရာ လူကို ရှာတွေ့သွားသည်လား သို့မဟုတ် အဝေးသို့ ထွက်သွားသည်လား မသိရချေ။

ထိုအချိန်က ကျန်ကျီရှင်းမှာ ကျင့်ကြံခြင်းတွင် အလုပ်များနေသဖြင့် သိပ်ဂရုမစိုက်ခဲ့ပေ။

ယခု မကြာသေးမီက ပတ်ဝန်းကျင်ရှိ ထူးဆန်းသော ကိစ္စအချို့ကို ပြန်လည် တွေးတောကြည့်လိုက်သောအခါ သူ၏ စိတ်ထဲတွင် ရုတ်တရက် မကောင်းသော ခံစားချက် တစ်ခု ပေါ်လာ၏။

မိစ္ဆာလမ်းစဉ်မှ သိုင်းပညာရှင် တစ်ယောက်ယောက်က ဤနေရာရှိ ဂိုဏ်းမဲ့ကျင့်ကြံသူများကို အမဲလိုက်နေခြင်းများလား။

သို့မဟုတ် ရှန်ဝူမြို့တွင် ပြဿနာ တစ်ခုခု ရှိနေခြင်းလား။

ကျန်ကျီရှင်းက ရှန်ဝူမြို့ ရှိရာဘက်သို့ လှည့်ကြည့်လိုက်၏။ ရှန်ဝူမြို့တွင် မကြာသေးမီက မည်သည့် လှုပ်ရှားမှုမျှ မရှိခဲ့သလို ချီအရှိန်အဝါများကလည်း အလွန် တည်ငြိမ်နေကြောင်း ထိုဒွာရသန့်စင်ခြင်း အဆင့် ပညာရှင်များ ပြောသည်ကို သူ ကြားခဲ့ရသည်။

ဤသို့ဆိုလျှင် ရှန်ဝူမြို့တွင် မည်သည့် အန္တရာယ်မျှ မရှိသင့်ချေ။

ကျန်ကျီရှင်းက သူ၏ လက်ထဲရှိ ကျောက်စိမ်းပုလင်းကို ငုံ့ကြည့်လိုက်သည်။

အတွင်းရှိ ယင်ချီများ၏ အရည်အသွေးက အလွန် မြင့်မားပြီး ကျန်ကျီရှင်း အနေဖြင့် နှစ်ပေါင်းများစွာအတွင်း ဤကဲ့သို့သော အရာမျိုးကို ရရှိရန် အလွန် ရှားပါးလှသည်။

အချိန်အနည်းငယ် ကြာပြီးနောက် သူ၏ ကျင့်ကြံမှုများ လျင်မြန်စွာ တိုးတက်လာနေကြောင်း ကျန်ကျီရှင်း ရှင်းလင်းစွာ ခံစားလိုက်ရသည်။

ဤအခြေအနေက အချိန်အနည်းငယ်မျှ ဆက်လက် တည်ရှိနေနိုင်ပါက ကျန်ကျီရှင်း အနေဖြင့် အချိန်တိုအတွင်း အတွင်းကလီစာသန့်စင်ခြင်း နောက်ဆုံးအဆင့်သို့ တက်လှမ်းနိုင်မည် ဖြစ်သည်။

အတွင်းကလီစာသန့်စင်ခြင်း အထွတ်အထိပ်အဆင့်သို့ ရောက်ရှိရန်ပင် မဖြစ်နိုင်သည့် ကိစ္စ မဟုတ်တော့ချေ။

ဤနေရာမှ ထွက်ခွာသွားပါက နောင်တွင် ဤသို့သော ယင်ချီများကို ရယူရန် ပိုမို ကြီးမားသော အန္တရာယ်များကို ရင်ဆိုင်ရလိမ့်မည်။

သို့မဟုတ်ပါက ဤနေရာနှင့် အဝေးသို့ ထွက်သွားပြီး အခြားသူများထံမှ ဤယင်ချီများကို ဝယ်ယူရမည် ဖြစ်သည်။

သို့သော် ဤကဲ့သို့သော အရည်အသွေးရှိသည့် ယင်ချီများမှာ နေရာတိုင်းတွင် လူကြိုက်များသော ပစ္စည်းများ ဖြစ်ကြရာ ကျန်ကျီရှင်း၏ လက်ထဲရှိ ငွေကြေးဖြင့် အကြိမ်အနည်းငယ်မျှပင် ဝယ်ယူနိုင်မည် မဟုတ်ဘဲ ဝင်ငွေနှင့် ထွက်ငွေ မျှတနိုင်မည် မဟုတ်ချေ။

ပို၍ အရေးကြီးသည်မှာ ယခုအခါ အခမဲ့ ရရှိနိုင်နေပါလျက် ဤနေရာမှ ထွက်ခွာသွားရန် ခိုင်လုံသော အကြောင်းပြချက် မရှိဘဲ နောက်ပိုင်းမှ စျေးကြီးပေး၍ ဝယ်ယူရမည်ကို ကျန်ကျီရှင်း အနေဖြင့် လုံးဝ ဆန္ဒမရှိချေ။

ကျန်ကျီရှင်းက စခန်းရှိ လူများကို မော့ကြည့်လိုက်သည်။

လူဤမျှများစွာ ရှိနေပါလျက် ဘာကို ကြောက်စရာ လိုမည်နည်း။ ဤစခန်းကို မဆိုထားနှင့်၊ အင်အားစု အသီးသီးမှ ဒွာရသန့်စင်ခြင်း အဆင့် ပညာရှင်များလည်း ရှိနေသေးသည်။

အကယ်၍ တစ်စုံတစ်ခု အမှန်တကယ် ဖြစ်ပျက်ခဲ့ပါက သူတို့က အစောကတည်းက တွေ့ရှိသွားလောက်ပြီ ဖြစ်သည်။

ယခု မည်သူကမျှ သတိပေးခြင်း မရှိသည်ကို ကြည့်လျှင် သူ တွေးလွန်နေခြင်းသာ ဖြစ်ပေမည်။

ကျန်ကျီရှင်းက အတော်လေး လူသူကင်းမဲ့သော နေရာတစ်ခုကို ရှာဖွေတွေ့ရှိပြီးနောက် ကျောက်စိမ်းပုလင်းကို ဖွင့်ကာ ယင်ချီများကို ဆွဲထုတ်၍ ခန္ဓာကိုယ်ထဲသို့ ပေါင်းစပ်လိုက်ပြီး သူ၏ ခွန်အားများကို စတင် သန့်စင်လိုက်သည်။

"ဒီနေရာမှာ နောက်တစ်လလောက် ထပ်နေမယ်... တစ်လပြည့်ရင် ထွက်သွားတော့မည်..."

သူ၏ ကျင့်ကြံမှုများ တစ်စချင်း တိုးတက်လာနေသည်ကို အာရုံခံမိသောအခါ ကျန်ကျီရှင်း၏ မျက်နှာပေါ်တွင် အပြုံးတစ်ခု အလိုအလျောက် ပေါ်လာပြီး တစ်ချိန်တည်းမှာပင် ဆုံးဖြတ်ချက် တစ်ခု ချလိုက်သည်။

အေးစက်လှသော ယင်ချီများက ကျန်ကျီရှင်းကို ရစ်ပတ်ထား၏။

ကောင်းကင်ယံတွင် ပူပြင်းသော နေမင်းကြီး ရှိနေသော်လည်း ကျန်ကျီရှင်း၏ အနောက်ဘက်ရှိ အရိပ်က ရုတ်တရက် လှုပ်ရှားသွားပြီး ချက်ချင်းပင် ပုံမှန် အခြေအနေသို့ ပြန်လည် ရောက်ရှိသွားသည်။

ကျန်ကျီရှင်းက မည်သည့်အရာကိုမျှ မခံစားမိဘဲ ကျင့်ကြံခြင်းတွင် လုံးဝ နစ်မြုပ်နေခဲ့သည်။

......

ယွမ်ချန်ဓားဂိုဏ်းတွင် ချန်ဖေးက ဘာကာကို စိုက်ပျိုးထားသော အိုးကို လျှို့ဝှက်ခန်းထဲတွင် ထားလိုက်ပြီး ဝိညာဉ်ကျောက်တုံး နှစ်တုံးကို ထပ်မံ ချေမွ၍ မြေဆီလွှာထဲသို့ ထည့်လိုက်သည်။

နှစ်ရက်ကြာ ပြန်လည် နာလန်ထူလာပြီးနောက် ဘာကာ၏ ချီအရှိန်အဝါက များစွာ မြင့်တက်လာခဲ့ပြီး ဤအရှိန်အတိုင်းဆိုလျှင် အဆင့်တစ် အထွတ်အထိပ်သို့ ပြန်လည် ရောက်ရှိရန် အချိန်သိပ်ကြာမည် မဟုတ်ချေ။

ချန်ဖေးက ချွီချင်းရှန်းကို အသိပေး အကြောင်းကြားလိုက်ပြီး ဂိုဏ်းတံခါးမှ တိုက်ရိုက် ထွက်ခွာကာ အနက်ရောင် မြို့တော်သို့ သွားရောက်ခဲ့သည်။

အနက်ရောင် မြို့တော်က ယွမ်ချန်ဓားဂိုဏ်းမှ မိုင်တစ်ထောင်ကျော်ခန့် ကွာဝေးသည်။

နံနက်စောစော ထွက်ခွာလာပြီး နာရီအနည်းငယ် အချိန်ယူရပြီးနောက် နောက်ဆုံးတွင် ချန်ဖေးက သူ၏ ရှေ့မှ မြို့တစ်မြို့ကို မြင်တွေ့လိုက်ရသည်။

မြို့ရိုးလေးဘက်စလုံးမှာ မင်ရည်ကဲ့သို့ မည်းနက်နေပြီး အဝေးမှ ကြည့်လျှင် မြို့တစ်မြို့လုံးက အနက်ရောင် အဝတ်စကြီး တစ်ခုနှင့် တူနေ၏။

အနက်ရောင် မြို့တော် ဟူသော အမည်မှာ ဤအချက်ကြောင့် အဓိက ဖြစ်ပေါ်လာခြင်း ဖြစ်ပေမည်။

ဝိညာဉ်သတ်ဖြတ်ခြင်း ကျင့်စဉ် လည်ပတ်သွားရာ ထက်မြက်လှသော ဓားသွား တစ်ခုဖြင့် ဖြတ်တောက်လိုက်သကဲ့သို့ ချန်ဖေး၏ ချီအရှိန်အဝါက ဒွာရသန့်စင်ခြင်း အစောပိုင်းအဆင့် အတိုင်းအတာအထိ ချက်ချင်း ကျဆင်းသွားသည်။

ရုပ်အသွင်အပြင်ကို ပြောင်းလဲပြီး ချီအရှိန်အဝါ အားကောင်းမှုနှင့် အားနည်းမှုကိုလည်း ဖုံးကွယ်ထား၍ ရသော်လည်း ချီအရှိန်အဝါ၏ ဝိသေသလက္ခဏာများကိုမူ ပြောင်းလဲ၍ မရနိုင်ချေ။

အနက်ရောင် မြို့တော်တွင် နတ်တိမ်မြို့ ပတ်ဝန်းကျင်ရှိ ဂိုဏ်းများမှ လူများနှင့် ဆုံတွေ့နိုင်ခြေ ရှိရာ ချန်ဖေး အနေဖြင့် သဘာဝကျကျ အနည်းငယ် ဖုံးကွယ်ထားရမည် ဖြစ်သည်။

ချီအရှိန်အဝါကို သာမန် ခန္ဓာကိုယ်ကြံ့ခိုင်ခြင်း အဆင့်သို့ လျှော့ချရန်မှာမူ လုံးဝ မလိုအပ်ပေ။

အနက်ရောင် မြို့တော်တွင် စည်းကမ်းများ ရှိသော်လည်း အကျိုးအမြတ်ကိုသာ ကြည့်သော နေရာတစ်ခု ဖြစ်ပေသည်။

ခန္ဓာကိုယ်ကြံ့ခိုင်ခြင်း အဆင့် ကျင့်ကြံမှုက အလွန် အားနည်းလွန်းသဖြင့် ဤနေရာတွင် မလိုအပ်သော ပြဿနာအချို့ကို ဖြစ်ပေါ်စေနိုင်သည်။

ဒွာရသန့်စင်ခြင်း အစောပိုင်းအဆင့် ဆိုလျှင် အနေတော် ဖြစ်ပုံရပြီး ခိုးကြည့်နေသော အကြည့်အချို့ကို များစွာ ရုပ်သိမ်းသွားစေနိုင်သည်။

ချန်ဖေးက သူ၏ ခေါင်းပေါ်ရှိ ဝါးခမောက်ကို အောက်သို့ ဆွဲချလိုက်ပြီး သူ၏ ပုံရိပ် လက်ခနဲ ဖြစ်သွားကာ အနက်ရောင် မြို့တော်၏ မြို့တံခါးရှေ့သို့ ရောက်ရှိလာ၏။

အနက်ရောင် မြို့တော်၏ မြို့တံခါး အပြင်ဘက်တွင် အစောင့်များ မရှိသလို ဤနေရာတွင် ညမထွက်ရ အမိန့်လည်း မရှိချေ။

ချန်ဖေးက လူအုပ်နှင့်အတူ မြို့ထဲသို့ ဝင်ရောက်သွားရာ အထဲသို့ ခြေချလိုက်သည်နှင့် ဈေးရောင်းချနေသော ဆူညံသံများကို ကြားလိုက်ရသည်။

လမ်းဘေးဈေးသည်များနှင့် ဆိုင်ခန်းများက လမ်းတစ်လျှောက်လုံး နီးပါး ပျံ့နှံ့နေပြီး ပင်မလမ်းမကြီးတွင်သာမက ဘေးနားရှိ လမ်းကြားလေးများထဲတွင်လည်း ဖွင့်လှစ်ရောင်းချနေသော ဆိုင်ခန်းများ ရှိနေဆဲ ဖြစ်သည်။

ချန်ဖေး တစ်ချက် လှမ်းကြည့်လိုက်ရာ သက်တမ်းရင့် ဆေးဖက်ဝင် အပင်များကို နေရာအနှံ့ တွေ့မြင်နိုင်ပြီး ကျင့်ကြံမှု တိုးတက်စေမည့် အမျိုးမျိုးသော ဝိညာဉ်ဆေးလုံးများက ပို၍ပင် စုံလင်လှကာ ခန္ဓာကိုယ်ကြံ့ခိုင်ခြင်း အဆင့်များ အသုံးပြုနိုင်သော ဝိညာဉ်လက်နက်တစ်ပိုင်း များလည်း အများအပြား ရှိနေသည်။

ကျင့်စဉ်များနှင့် ပတ်သက်၍မူ ဤနေရာတွင် ပို၍ပင် များပြားလှသည်။ သို့သော် မည်မျှက မပြည့်စုံဘဲ မည်မျှက အပိုင်းအစများ ဖြစ်နေသနည်း ဆိုသည်မှာ လူတစ်ဦးချင်းစီ၏ အကဲဖြတ်နိုင်စွမ်း အပေါ်တွင်သာ မူတည်ပေသည်။

ရောင်းချပြီးသည်နှင့် ဤနေရာတွင် ရောင်းချပြီးနောက်ပိုင်း မည်သည့် ကိစ္စရပ်များကိုမျှ တာဝန်ယူမည် မဟုတ်ချေ။ အကယ်၍ ပြဿနာရှာရဲပါက ဓားနှင့် လှံများဖြင့် ရင်ဆိုင်ရမည် ဖြစ်သည်။

ဆေးဖက်ဝင် အပင်များနှင့် ဝိညာဉ်ဆေးလုံးများတွင်ပင် အတုအယောင် များစွာ ရှိနေသည်။

ဤနေရာတွင် အကဲဖြတ်နိုင်စွမ်းက အလွန် အရေးကြီးလှပြီး သေချာပေါက် သင့်၏ ကျင့်ကြံမှုသာ လုံလောက်စွာ မြင့်မားနေပါက သာမန်လူများက သင့်ကို အတုအယောင်များ ရောင်းချရဲမည် မဟုတ်ပေ။

ချန်ဖေးက လမ်းမပေါ်တွင် ဖြည်းဖြည်းချင်း လျှောက်သွားနေရာ ချန်ဖေး ဖြတ်သွားသောအခါ ဈေးရောင်းနေသော အသံများ အလိုအလျောက် တိုးသွားကြ၏။

ချန်ဖေး၏ ဒွာရသန့်စင်ခြင်း အဆင့် ကျင့်ကြံမှုက အတားအဆီးမရှိ ထွက်ပေါ်နေပြီး အနက်ရောင် မြို့တော်ကဲ့သို့ ရှုပ်ထွေးသော နေရာမျိုးတွင်ပင် ဒွာရသန့်စင်ခြင်း အဆင့်က အထက်တန်းလွှာ ပုဂ္ဂိုလ်များ အဖြစ် ပါဝင်နေဆဲ ဖြစ်သည်။

ခန္ဓာကိုယ်ကြံ့ခိုင်ခြင်း အဆင့် သိုင်းပညာရှင်များကို သင် စော်ကားနိုင်ပြီး အတွင်းကလီစာသန့်စင်ခြင်း အထွတ်အထိပ်အဆင့် သိုင်းပညာရှင် ဖြစ်နေလျှင်တောင်မှ ပြဿနာ ကြီးကြီးမားမား မရှိချေ။

သို့သော် ဒွာရသန့်စင်ခြင်း အဆင့်များကို မစော်ကားမိခြင်းက အကောင်းဆုံး ဖြစ်သည်။ ဒွာရသန့်စင်ခြင်း အဆင့်နှင့် ခန္ဓာကိုယ်ကြံ့ခိုင်ခြင်း အဆင့်တို့က မူလကတည်းက တူညီသော အဆင့်အတန်းတွင် မရှိကြပေ။

ဤသည်က မည်သည့်နေရာတွင်မဆို အသုံးပြုနိုင်သော နိယာမ တစ်ခု ဖြစ်သည်။

အနက်ရောင် မြို့တော် တစ်ခုလုံးက အလွန် မကြီးမားဘဲ ဧရိယာအားဖြင့် မူလ ဖျင်ရင်ခရိုင်နှင့် ခပ်ဆင်ဆင် တူညီပြီး ပို၍ပင် သေးငယ်နိုင်သေးသည်။

သို့သော် ဤနေရာတွင် ချန်ဖေး အာရုံခံမိသော ဒွာရသန့်စင်ခြင်း အဆင့် သိုင်းပညာရှင်များမှာ အယောက် ၃၀ ထက် မနည်းပေ။

ဒွာရသန့်စင်ခြင်း အစောပိုင်းအဆင့်က အများစု ဖြစ်သော်လည်း ဒွာရသန့်စင်ခြင်း နောက်ဆုံးအဆင့်များလည်း အနည်းငယ် ရှိနေသည်။

ဒွာရသန့်စင်ခြင်း နောက်ဆုံးအဆင့်ကသာ အနက်ရောင် မြို့တော်၏ ဈေးဆိုင်များကို ဖိနှိပ်ထားနိုင်ပြီး ဒွာရသန့်စင်ခြင်း နောက်ဆုံးအဆင့်သို့ ရောက်ရှိမှသာ အခြား အင်အားစုများက ဤအပေါ် သည်းခံနိုင်မှု အနည်းငယ် ရှိကြမည် ဖြစ်သည်။

သေချာပေါက် ဤသည်းခံနိုင်မှုကလည်း အတော်လေး အကန့်အသတ် ရှိပေသည်။

အနက်ရောင် မြို့တော်က ပစ္စည်းများ၏ ဇာစ်မြစ်ကို ဂရုမစိုက်ဘူးဟု ဆိုသော်လည်း အကယ်၍ အာဏာရှင် အင်အားစုများ၏ ပစ္စည်းသာ အမှန်တကယ် ဖြစ်နေပါက အနက်ရောင် မြို့တော် အနေဖြင့် လုံးဝ လက်ခံဝံ့မည် မဟုတ်ချေ။

ဤအကြောင်းကြောင့်ပင် ဟုန်ယွမ်ဖုန်း၏ ဓားကို ချန်ဖေးက ပထမဆုံး အကြိမ်ကတည်းက ဝိညာဉ်အနှစ်သာရများ အပြည့်အဝ ထုတ်ယူပစ်ခဲ့ခြင်း ဖြစ်သည်။

အဘယ်ကြောင့်ဆိုသော် မည်သည့်နေရာတွင် ဖြစ်စေ ထိုဓားမှာ ပူလောင်နေသော ကန်စွန်းဥ တစ်လုံး ဖြစ်နေသည်။

ဝိညာဉ်ကျောက်တုံး အနည်းငယ် ပိုရရန်အတွက် ဤကပ်ဘေးကို ထုတ်ယူရန် ချန်ဖေး အနေဖြင့် မလိုအပ်ချေ။

ချန်ဖေးက ပင်မလမ်းမကြီး၏ အလယ်ပိုင်းတွင် လမ်းကြားလေး တစ်ခုထဲသို့ ကွေ့ဝင်သွား၏။

ဤနေရာက ချီရှူချင်း အကြံပြုထားသော ဆိုင်ခန်းတစ်ခု ဖြစ်ပြီး ပင်မလမ်းမကြီး အပြင်ဘက်ရှိ ထိုဆိုင်ခန်းများနှင့် နှိုင်းယှဉ်ပါက ဤနေရာရှိ အရောင်းအဝယ်များက ပို၍ လျှို့ဝှက်ပေလိမ့်မည်။

အပြင်ဘက်နှင့် နှိုင်းယှဉ်ပါက မျက်စိရှေ့ရှိ ဤဆိုင်က အနည်းငယ် လူသူကင်းမဲ့နေပုံ ရသော်လည်း ရံဖန်ရံခါ ဝင်ထွက်သွားလာသူများ ရှိနေဆဲ ဖြစ်သည်။

ဆိုင်ထဲတွင် အခြား ပြင်ပလူများ မရှိတော့ကြောင်း အာရုံခံမိသောအခါ ချန်ဖေးက ဆိုင်ထဲသို့ ဝင်သွားသည်။

ဆိုင်ရှင်က ခေါင်းမော့၍ ချန်ဖေးကို တစ်ချက် ကြည့်လိုက်ပြီး ဆိုင်တံခါးကို သူကိုယ်တိုင် ပိတ်လိုက်၏။

အစောက အပြင်ဘက်ရှိ ချန်ဖေး၏ ချီအရှိန်အဝါကို ဆိုင်ရှင် ခံစားမိခဲ့ပြီး တစ်ချိန်တည်းမှာပင် ချန်ဖေး၏ ဆိုလိုရင်းကို နားလည်သွားခဲ့သည်။

"ဧည့်သည်တော် ဘာများ အလိုရှိပါသလဲ..."

ဆိုင်ရှင်က ပြုံးရွှင်စွာဖြင့် ဆီးကြို နှုတ်ဆက်လိုက်သည်။

"ဝိညာဉ်လက်နက် အနည်းငယ် ရောင်းမလို့ပါ..."

ချန်ဖေးက ပြောရင်း သူ၏ အနောက်ရှိ သစ်သားသေတ္တာ အနည်းငယ်ထဲမှ တစ်ခုကို ထုတ်ယူ၍ ဆိုင်ရှင်၏ ရှေ့တွင် ချထားလိုက်သည်။

အဆင်ပြေစေရန်အတွက် ချန်ဖေးက ဂိုဏ်းအတွင်းရှိ ရတနာပြခန်းမှ သစ်သားသေတ္တာ အနည်းငယ်ကို တမင်တကာ ဖန်တီးခိုင်းခဲ့ပြီး ဝိညာဉ်လက်နက်များ၏ လှုပ်ခတ်မှုများကို ထိန်းချုပ်ထားနိုင်သည်။

သို့မဟုတ်ပါက ဝိညာဉ်လက်နက် အနည်းငယ်ကို နေရာလွတ်အကွက်ထဲမှ တိုက်ရိုက် ထုတ်ယူခြင်းက အနည်းငယ် မျက်စိနောက်စရာ ဖြစ်ပေလိမ့်မည်။

ဆိုင်ရှင်က သစ်သားသေတ္တာကို ဖွင့်လိုက်ရာ အတွင်း၌ အဆင့်နိမ့် ဝိညာဉ်လက်နက် ဓားတစ်လက် ရှိနေပြီး ယာရှန်းဂိုဏ်းမှ ရွှီယန်ရှင်း ထံမှ ရရှိခဲ့ခြင်း ဖြစ်သည်။

ဆိုင်ရှင်က ဝိညာဉ်လက်နက် ဓားကို ကောက်ကိုင်၍ သေချာစွာ စစ်ဆေးကြည့်လိုက်ပြီး အချိန်အနည်းငယ် ကြာပြီးနောက် ဝိညာဉ်လက်နက် ဓားကို ပြန်ချထားကာ ချန်ဖေးကို မော့ကြည့်၍ ပြောလိုက်၏။

" ဒီဝိညာဉ်လက်နက် ဓားရဲ့ အရည်အသွေးက သာမန်မဟုတ်ပေမဲ့... အရင်က တိုက်ပွဲတစ်ခုခုမှာ ထိခိုက်ပျက်စီးမှု အချို့ ရှိခဲ့ပုံရတယ်... ဒါကြောင့် စျေးနှုန်းက အနည်းငယ် နိမ့်သွားနိုင်တယ်..."

"ဘယ်လောက် ဈေးပေးမလဲ..."

ချန်ဖေးက ခေါင်းညိတ်လိုက်ပြီး မည်သည့် ကန့်ကွက်မှုမျှ မရှိချေ။

ဤဝိညာဉ်လက်နက် ဓားမှာ အမှန်တကယ်ပင် ထိခိုက်ပျက်စီးမှု ရှိနေပြီး ထိုထိခိုက်ပျက်စီးမှုများက ချန်ဖေးထံမှ လာခြင်း ဖြစ်သည်။

တိုက်ကွက် တစ်ကွက်တည်းဖြင့် ရွှီယန်ရှင်းကို ပြင်းထန်စွာ ဒဏ်ရာရစေခဲ့ရာ ဤဝိညာဉ်လက်နက် ဓား၏ အရည်အသွေး ကောင်းမွန်နေ၍သာ ဖြစ်သည်။

သို့မဟုတ်ပါက ထိုနေရာတွင်ပင် အဆင့်ကျဆင်းသွားပြီး ဝိညာဉ်လက်နက်တစ်ပိုင်း အဖြစ် ပြောင်းလဲသွားလောက်ပြီ ဖြစ်သည်။

"ဝိညာဉ်ကျောက်တုံး ၃၈ တုံး..." ဆိုင်ရှင်က တွက်ချက်ကြည့်ပြီးနောက် ဈေးနှုန်း တစ်ခုကို ပေးလိုက်သည်။

အကယ်၍ ဤဝိညာဉ်လက်နက်တွင် ထိခိုက်ပျက်စီးမှု မရှိပါက ဝိညာဉ်ကျောက်တုံး ၅၀ ခန့်အထိ ဈေးခေါ်၍ ရနိုင်ပေသည်။

"ရတယ်..."

ချန်ဖေးက ပြုံး၍ ခေါင်းညိတ်လိုက်ရာ ဤဈေးနှုန်းက တရားမျှတသည်ဟု ဆိုနိုင်သေးသည်။

"ဧည့်သည်တော် ခဏစောင့်ပါဦး... ကျွန်တော် ဝိညာဉ်ကျောက်တုံးတွေ သွားယူလိုက်ပါ့မယ်..."

ဆိုင်ရှင်က ချန်ဖေး သဘောတူသည်ကို မြင်သောအခါ သူ၏ မျက်နှာပေါ်ရှိ အပြုံးများက ပို၍ ကြီးမားလာပြီးနောက် နောက်ဖေးသို့ သွားရန် လှည့်လိုက်သည်။

"ခဏနေဦး... ရောင်းစရာ ပစ္စည်းတွေ ရှိသေးတယ်..."

ချန်ဖေးက ဆိုင်ရှင်ကို တားလိုက်ပြီးနောက် သစ်သားသေတ္တာ တစ်လုံးကို ထပ်ထုတ်၍ ဆိုင်ရှင်၏ ရှေ့တွင် ချထားလိုက်သည်။

ချန်ဖေး၏ အစီအစဉ်အရ ဤကဲ့သို့သော လမ်းကြားလေးများထဲရှိ ဆိုင်များတွင် ဆိုင်တစ်ဆိုင်လျှင် ဝိညာဉ်လက်နက် နှစ်ခု၊ သုံးခုခန့် ရောင်းချပါက လက်ထဲရှိ ဝိညာဉ်လက်နက် အားလုံးကို အလွယ်တကူ ရောင်းနိုင်ပေသည်။

မျက်စိမနောက်သလို အလုပ်လည်း မြန်ဆန်ကာ ဤနေရာတွင် ဝိညာဉ်ဆေးလုံး အချို့ကိုပါ တစ်ပါတည်း ဝယ်ယူပြီးပါက ယွမ်ချန်ဓားဂိုဏ်းသို့ ပြန်သွားနိုင်ပြီ ဖြစ်သည်။

ဆိုင်ရှင်က လှည့်လာပြီး သစ်သားသေတ္တာကို ဂရုတစိုက် ဖွင့်လိုက်ရာ အစောကထက် များစွာ ပိုမို သွက်လက်နေသော ချီအရှိန်အဝါ တစ်ခု ပျံ့နှံ့ထွက်ပေါ်လာပြီး အလယ်အလတ်အဆင့် ဝိညာဉ်လက်နက် ဓားတစ်လက် ဖြစ်နေ၏။

ဤဓားက အလျား နှစ်ပေ ရှစ်လက်မ၊ အနံ သုံးလက်မခွဲ ရှိပြီး ယာရှန်းဂိုဏ်း၏ ဂိုဏ်းချုပ် ချီယွမ်လု ထံမှ ရရှိထားခြင်းပင် ဖြစ်သည်။