အခန်း (၃၇၆-၃၇၇)

အခန်း (၃၇၆) နှလုံးသား နင်းခြေ သိုင်း

"ဒီအစီအရင်က မိုးမျှော်စင်နဲ့ သက်ဆိုင်တယ်... အနက်ရောင် မြို့တော်ရဲ့ ပိုင်ရှင်နဲ့ ဘာမှ မသက်ဆိုင်ဘူး... အနက်ရောင် မြို့တော်ရဲ့ ပိုင်ရှင်လည်း ဒီနေရာကို ရောက်လာမှာ မဟုတ်ဘူး..."

တိုင်ဖန်းရွှမ်းက တိုးညှင်းစွာ ပြောလိုက်၏။

"မင်း အခုလေးတင်က အစီအရင်ရှေ့ကို မရောက်ခင်တုန်းက... မင်းရဲ့ စိတ်အခြေအနေက ပုံမှန်အတိုင်းဘဲ မပြောင်းလဲသွားဘူးဆိုရင်... ငါ ယုံကောင်း ယုံမိမှာပါ..."

ချန်ဖေးက သံမဏိ တံခါးကြီး ရှေ့သို့ လျှောက်သွားကာ မျက်စိရှေ့ရှိ အစီအရင်ကို သေချာစွာ လေ့လာကြည့်လိုက်သည်။

ကာကွယ်ရေး စွမ်းအားက အလွန် မအားကောင်းလှဘဲ ချန်ဖေး အနေဖြင့် အတင်းအကျပ် ဖောက်ထွင်းလိုပါက ဓားသုံးချက် အတွင်း ပြီးစီးနိုင်သည်။

သို့သော် ချန်ဖေး အမှန်တကယ်သာ ဤသို့ လုပ်ဆောင်လိုက်ပါက အထဲသို့ ဝင်ရောက်ရန် အချိန်မရလိုက်မီမှာပင် ဒွာရသန့်စင်ခြင်း အဆင့် များစွာက ဤနေရာသို့ ပြေးလာကြပြီး ချန်ဖေးကို အထပ်ထပ် ဝိုင်းရံသွားကြလိမ့်မည်ဟု ခန့်မှန်းရသည်။

ထိုအခါ ဤနေရာမှ ထွက်ပြေးရန်ပင် မလွယ်ကူတော့ဘဲ အလွယ်တကူ သေလမ်းထဲသို့ ကျရောက်သွားနိုင်သည်။

"ခင်ဗျား နားလည်မှု လွဲနေပါပြီ..."

တိုင်ဖန်းရွှမ်းက အသည်းအသန် ခုခံကာကွယ်ရန် ကြိုးစားနေပြီး မတရားခံရသကဲ့သို့ အလွန် နှိမ့်ချသော လေသံဖြင့် ပြောလိုက်သည်။

"အသက်ရှင်ချင်တယ် ဆိုတာက အတုအယောင်ဖြစ်ပြီး... ငါ့ကို ဒီကို ခေါ်လာတာကမှ အဓိက ရည်ရွယ်ချက်လား..."

ချန်ဖေးက လှည့်၍ တိုင်ဖန်းရွှမ်းကို ကြည့်လိုက်ပြီးနောက် အစီအရင်ကို တစ်ချက် ထပ်ကြည့်လိုက်ရာ သူ၏ အမူအရာ အနည်းငယ် ပြောင်းလဲသွားပြီး ပြောလိုက်၏။

"ဒီအစီအရင်က... အနက်ရောင် မြို့တော်ရဲ့ ပိုင်ရှင်ကို ဆွဲဆောင်နိုင်ရုံသာမကဘဲ... မင်းကိုပါ အထဲကို ခေါ်ဆောင်သွားနိုင်ပုံရတယ်... အဲဒီအချိန်ကျရင်... မင်း အသက်ရှင်နိုင်သေးတယ်ပေါ့..."

တိုင်ဖန်းရွှမ်းက ချန်ဖေးကို ကြည့်လိုက်ရာ သူ၏ အမူအရာက နားမလည်နိုင်မှုမှ တဖြည်းဖြည်း အေးစက်လာပြီး နာကြည်းမှုများ အဖြစ်သို့ ပြောင်းလဲသွား၏။

တိုင်ဖန်းရွှမ်းက ဆက်လက် မဟန်ဆောင်တော့ချေ။

အစောက ချန်ဖေး ပြောလိုက်သော စကားများအရ သူ အရင်က လုပ်ခဲ့သမျှ အရာအားလုံးကို ချန်ဖေးက တစ်ခုပြီးတစ်ခု ဖောက်ထွင်းသိမြင်သွားခဲ့ပြီ ဖြစ်ကြောင်း သက်သေပြနေသည်။

ဆက်လက် ဟန်ဆောင်နေလျှင်လည်း အချည်းနှီးသာ ဖြစ်ပေလိမ့်မည်။

တိုင်ဖန်းရွှမ်းက အစောက အနည်းငယ်မျှပင် မလိမ်ညာခဲ့ချေ။ သူ အမှန်တကယ် အသက်ရှင်ချင်ခဲ့သည်။

သို့သော် အသက်ရှင်ချင်သည့်အပြင် ချန်ဖေးကိုလည်း တိုက်ရိုက် ဆွဲချ၍ ချန်ဖေး သေဆုံးပြီးနောက် မြှုပ်နှံစရာ နေရာပင် မရှိစေရန် သူ အလိုရှိခဲ့သည်။

ဒွာရသန့်စင်ခြင်း အလယ်အလတ်အဆင့် တစ်ယောက် အနေဖြင့် ချန်ဖေးကို မယှဉ်နိုင်ပါက ဒွာရသန့်စင်ခြင်း နောက်ဆုံးအဆင့် အနက်ရောင် မြို့တော်၏ ပိုင်ရှင်ကို လာစေရမည်။

ဤအစီအရင်က မိုးမျှော်စင်နှင့် သက်ဆိုင်ပြီး အနက်ရောင် မြို့တော်၏ ပိုင်ရှင်နှင့် မည်သည့် ဆက်စပ်မှုမျှ မရှိသည်မှာ မှန်ပါသည်။

သို့သော် မိုးမျှော်စင်နှင့် အနက်ရောင် မြို့တော်၏ ပိုင်ရှင်ကြားတွင် မဟာမိတ် ဆက်ဆံရေး ရှိပြီး မိုးမျှော်စင် အန္တရာယ်နှင့် ကြုံတွေ့ရချိန်တွင် အနက်ရောင် မြို့တော်၏ ပိုင်ရှင်က တတ်နိုင်သမျှ ကူညီဖြေရှင်းပေးလေ့ ရှိသည်။

ဤအစီအရင်ကို ပုံမှန်အတိုင်း ဖွင့်လှစ်ပါက အတွင်းရှိ လျှို့ဝှက်ခန်းကို သဘာဝကျကျ ဖွင့်ပြနိုင်မည် ဖြစ်ပြီး မည်သည့် ထူးခြားမှုမျှ ရှိမည် မဟုတ်ပေ။

သို့သော် ဖွင့်လှစ်သည့် နည်းလမ်းကို ပြောင်းလဲလိုက်ပါက သတင်းပို့သည့် အရာအဖြစ် ပြောင်းလဲသွားပြီး သတင်းက အနက်ရောင် မြို့တော်၏ ပိုင်ရှင်ထံသို့ တိုက်ရိုက် ရောက်ရှိသွားမည် ဖြစ်သည်။

တစ်ချိန်တည်းမှာပင် ချန်ဖေး ခန့်မှန်းခဲ့သည့်အတိုင်း ဤအစီအရင်က တိုင်ဖန်းရွှမ်းကို လျှို့ဝှက်ခန်း အတွင်းသို့ ခေါ်ဆောင်သွားမည် ဖြစ်ပြီး လျှို့ဝှက်ခန်း၏ အစီအရင်ကို အသုံးပြု၍ အနက်ရောင် မြို့တော်၏ ပိုင်ရှင် ရောက်လာသည်အထိ တိုင်ဖန်းရွှမ်း၏ လုံခြုံရေးကို ယာယီ ကာကွယ်ပေးထားမည် ဖြစ်သည်။

ဤသည်က သေမင်းနှင့် ရင်ဆိုင်ရချိန်တွင် တိုင်ဖန်းရွှမ်း စဉ်းစားမိသော အသက်ရှင်သန်ရန် နည်းလမ်း ဖြစ်သည်။

တိုင်ဖန်းရွှမ်း သံမဏိ တံခါးကြီး ရှေ့တွင် ရပ်နေချိန်၌ သူ၏ လက်ဝါးက အစီအရင်နှင့် လက်မအနည်းငယ်သာ ကွာဝေးတော့ချိန်တွင် သေဘေးမှ လွတ်မြောက်ကာ ချန်ဖေးကိုပါ အတူတကွ ဆွဲချနိုင်တော့မည် ဟူသော စိတ်လှုပ်ရှားမှုက တိုင်ဖန်းရွှမ်း၏ ခေါင်းတစ်ခုလုံးကို ပြည့်နှက်သွားစေခဲ့သည်။

သို့သော် လက်မအနည်းငယ်မျှသာ ကွာဝေးတော့ချိန်တွင် တိုင်ဖန်းရွှမ်း အနေဖြင့် ဆက်လက် မထိတွေ့နိုင်တော့ဘဲ ချန်ဖေးက ဤအရာအားလုံးကို တိုက်ရိုက် ရပ်တန့်ပစ်လိုက်သည်။

ထိုအခိုက်အတန့်တွင် တိုင်ဖန်းရွှမ်း၏ စိတ်အခြေအနေက ဖော်ပြ၍ မရနိုင်အောင်ပင် ဖြစ်ခဲ့သည်။

ချန်ဖေးကို ယုံကြည်အောင် လုပ်ရန်အတွက် အနက်ရောင် မြို့တော်သို့ ဝင်ရောက်ကတည်းက တိုင်ဖန်းရွှမ်းက အမြဲတမ်း အလွန် ရိုးသားစွာ ပြုမူနေခဲ့သည်။

အမှန်တကယ်တွင် တိုင်ဖန်းရွှမ်း အနေဖြင့် လျှို့ဝှက်စွာ သတင်းပို့ရန် အခွင့်အရေး အကြိမ်အနည်းငယ် ရခဲ့သော်လည်း ချန်ဖေး ရှာဖွေတွေ့ရှိနိုင်ခြေ များလွန်းသဖြင့် အားလုံးကို လက်လျှော့ခဲ့ရသည်။

ထို့အပြင် ချန်ဖေး မသိအောင် သတင်းပို့နိုင်ခဲ့လျှင်တောင်မှ အနက်ရောင် မြို့တော်၏ ပိုင်ရှင် ရောက်ရှိလာသောအခါ ချီအရှိန်အဝါက ချန်ဖေးကို သေချာပေါက် သတိပေးသကဲ့သို့ ဖြစ်သွားမည် ဖြစ်သည်။

ထိုအချိန်ကျလျှင် ချန်ဖေး အနေဖြင့် တိုင်ဖန်းရွှမ်းကို အရင်သတ်ပြီးနောက် ထွက်ပြေးရန် အချိန် အပြည့်အဝ ရှိနေပေလိမ့်မည်။

တိုင်ဖန်းရွှမ်း အသက်ရှင်ချင်သည်။ ဤသို့ မိမိကိုယ်တိုင် သေဆုံးပြီး ချန်ဖေး သေဆုံးသွားလျှင်တောင်မှ တိုင်ဖန်းရွှမ်း အနေဖြင့် မကျေနပ်နိုင်ချေ။

တိုင်ဖန်းရွှမ်း အလိုလားဆုံး အရာမှာ အစီအရင်၏ ကာကွယ်မှု အောက်တွင် ချန်ဖေးက အနက်ရောင် မြို့တော် ပိုင်ရှင်၏ ဟန့်တားခြင်းကို ခံရပြီးနောက် ရိုက်နှက် သတ်ဖြတ်ခံရသည့် မြင်ကွင်းကို သူ၏ ကိုယ်ပိုင် မျက်စိဖြင့် မြင်တွေ့ရရန်ပင် ဖြစ်သည်။

ထို့ကြောင့် တိုင်ဖန်းရွှမ်းက အလွန် လိမ္မာစွာဖြင့် ချန်ဖေးကို မြောင်ချီရှန်း၏ ခြံဝင်းသို့ ခေါ်ဆောင်လာခဲ့ပြီး လျှို့ဝှက်ခန်းသို့ ခေါ်ဆောင်လာခဲ့သည်။

မည်သည့် အပြောင်းအလဲမျှ မရှိခဲ့ဘဲ အဆုံးစွန် ရည်မှန်းချက် အောင်မြင်ရန် အကွာအဝေး အနည်းငယ်မျှသာ လိုတော့သည်။

သို့သော် နောက်ဆုံးတွင် အနည်းငယ် လွဲချော်သွားခဲ့သည်။

"ကျွန်တော် မရှိဘဲနဲ့... ခင်ဗျား ဒီအစီအရင်ကို ဖွင့်လို့မရဘူး... ခင်ဗျား ဘာမှရမှာ မဟုတ်ဘူး..."

တိုင်ဖန်းရွှမ်းက ချန်ဖေးကို ကြည့်ကာ လှောင်ပြောင်လိုက်၏။

"လုံးဝ သေချာတဲ့ အရာဆိုတာ မရှိဘူး... ဒါကို မင်း သိလား..."

ချန်ဖေး၏ လက်မောင်းမှ အက်ကွဲကြောင်း တစ်ခု ပွင့်ထွက်လာပြီး သွေးများ ပန်းထွက်လာကာ သွေးမြူခိုးများ အဖြစ် ပြောင်းလဲသွားပြီး မျက်စိရှေ့ရှိ အစီအရင်ပေါ်သို့ ကျရောက်သွား၏။

အစီအရင်က အနည်းငယ် လှုပ်ခတ်သွားသော်လည်း သွေးမြူခိုး၏ စွမ်းအားကိုမူ မငြင်းဆန်ခဲ့ချေ။

တိုင်ဖန်းရွှမ်းက သွေးမြူခိုးနှင့် အစီအရင်၏ ပြောင်းလဲမှုများကို ကြည့်ရင်း သူ၏ မျက်လုံးများ တဖြည်းဖြည်း ပြူးကျယ်လာကာ ရှေးဟောင်းကျမ်းစာ တစ်ခုတွင် သူမြင်တွေ့ခဲ့ဖူးသော အမွေအနှစ် တစ်ခုက တိုင်ဖန်းရွှမ်း၏ စိတ်ထဲတွင် ပေါ်လာ၏။

မိုးမျှော်စင်က လူသတ်အဖွဲ့အစည်း တစ်ခု ဖြစ်သော်လည်း တစ်စုံတစ်ယောက်က တာဝန်ပေးအပ်လာသရွေ့ အခြားသော လုပ်ငန်းတာဝန် အသီးသီးကိုလည်း လုပ်ဆောင်သည်။

ထို့ကြောင့် အမျိုးမျိုးသော သတင်းအချက်အလက် စုဆောင်းမှုများက အလွန် စေ့စပ်သေချာလှသည်။

သွေးရင်းမြစ် ကျင့်စဉ်တွင် အစီအရင်များကို ယာယီ ထိန်းချုပ်နိုင်သည့် သတ်ကွက် တစ်ခု ပါဝင်နေသောကြောင့် သွေးရင်းမြစ် ကျင့်စဉ်နှင့် ပတ်သက်သည့် သတင်းအချက်အလက်များ ရှိနေခြင်း ဖြစ်သည်။

အလွန် ချဲ့ကားလွန်းပြီး ထိပ်တန်း အဆင့်ရှိသော အစီအရင်များ မဟုတ်သရွေ့ ယေဘုယျအားဖြင့် ဖြေရှင်းနိုင်ပြီး အချိန်ပိုကြာခြင်း သို့မဟုတ် မြန်ခြင်းသာ ကွာခြားပေလိမ့်မည်။

ဆင်တူသော အမွေအနှစ် ကျင့်စဉ် အနည်းငယ် ရှိသေးသော်လည်း အခြေခံအားဖြင့် ပျောက်ဆုံးနေပြီ ဖြစ်သည်။

သွေးရင်းမြစ် ကျင့်စဉ်မှာလည်း ပျောက်ဆုံးနေသော ကျင့်စဉ်များထဲမှ တစ်ခု ဖြစ်ရာ ယနေ့ ဤနေရာတွင် ဤကျင့်စဉ်ကို မြင်တွေ့ရလိမ့်မည်ဟု တိုင်ဖန်းရွှမ်း မမျှော်လင့်ထားခဲ့ချေ။

ထို့အပြင် သွေးရင်းမြစ် ကျင့်စဉ် ပါရှိနေသဖြင့် ချန်ဖေး အနေဖြင့် လျှို့ဝှက်ခန်း အတွင်းသို့ ဝင်ရောက်ရန် လွယ်ကူနေမည် မဟုတ်ပါလား။

တိုင်ဖန်းရွှမ်းက ချန်ဖေးကို မော့ကြည့်လိုက်ရာ သူမြင်တွေ့လိုက်ရသည်မှာ မျက်စိရှေ့တွင် ပွင့်လန်းလာသော ဓားအလင်းတန်း တစ်ခုသာ ဖြစ်ပြီး နောက်တစ်စက္ကန့်တွင် တိုင်ဖန်းရွှမ်း၏ အသိစိတ်များက အဆုံးမဲ့ အမှောင်ထုထဲသို့ ကျဆင်းသွားတော့သည်။

သူ သေဆုံးသွားသည့် အချိန်အထိ တိုင်ဖန်းရွှမ်းတွင် မေးချင်သော မေးခွန်း တစ်ခု ရှိနေခဲ့ပြီး တစ်ချိန်တည်းမှာပင် ချန်ဖေးကို ဆဲဆို အော်ဟစ်ကာ သူ၏ နှလုံးသားထဲရှိ မကျေနပ်မှုနှင့် ဒေါသများကို ဖြေဖျောက်ချင်ခဲ့သည်။

သို့သော် ချန်ဖေးက သွေးရင်းမြစ် ကျင့်စဉ်ကို သူ့အား ပြသပြီးနောက် တိုင်ဖန်းရွှမ်းကို အခြား အခွင့်အရေး တစ်ခုမျှ ထပ်မပေးတော့ချေ။

တိုင်ဖန်းရွှမ်းက မကျေနပ်မှုများနှင့် နာကြည်းမှုများဖြင့် မြေကြီးပေါ်သို့ ပျော့ခွေကျသွားပြီး အသက်ရှူသံ လုံးဝ မရှိတော့ချေ။

ဝိညာဉ်အနှစ်သာရ အမျှင်တန်းများက တိုင်ဖန်းရွှမ်း၏ ခန္ဓာကိုယ်မှ ထွက်ပေါ်လာပြီး ချန်ယွမ်ဓားထဲသို့ ဝင်ရောက် ပျောက်ကွယ်သွား၏။

ချန်ဖေးက ညာဘက်လက် တစ်ချက် ဝှေ့ယမ်းလိုက်ရာ တိုင်ဖန်းရွှမ်း၏ ခန္ဓာကိုယ်ပေါ်ရှိ ဝိညာဉ်လက်နက်နှင့် ဝိညာဉ်ကျောက်တုံးများ၊ ဝိညာဉ်ဆေးလုံး များကို သိမ်းဆည်းလိုက်ပြီး လျှို့ဝှက်ခန်း၏ အစီအရင်ကို ဆက်လက် ဖျက်ဆီးလိုက်သည်။

ဆယ့်ငါးမိနစ်ပင် မကြာလိုက်ဘဲ သံမဏိ တံခါးကြီး ရှေ့ရှိ အစီအရင်က အလိုအလျောက် အက်ကွဲကြောင်း တစ်ခု ပွင့်လာခဲ့သည်။

သို့သော် ဤအစီအရင်၏ အောက်တွင် သံမဏိ တံခါးရှေ့၌ ဒုတိယ အစီအရင် တစ်ခု ရှိနေသေးသည်။

ဤသည်က အစီအရင် နှစ်ထပ် ဖြစ်ပြီး အစောက အခြေအနေကို ပြောင်းပြန်လှန်ရန် တိုင်ဖန်းရွှမ်း အားကိုးခဲ့သော အရာပင် ဖြစ်သည်။

ကံမကောင်းစွာဖြင့် ချန်ဖေးက အစမှ အဆုံးတိုင်အောင် တိုင်ဖန်းရွှမ်းကို တစ်ခါမျှ မယုံကြည်ခဲ့ဘဲ လမ်းတစ်လျှောက်တွင် တိုင်ဖန်းရွှမ်း မည်မျှပင် ရိုးသားစွာ ပြုမူနေစေကာမူ ချန်ဖေးက သူ၏ သတိဝီရိယကို အနည်းငယ်မျှ မလျှော့ချခဲ့ချေ။

သွေးလက်တံများက ဒုတိယ အစီအရင်ကို စတင် ဖျက်ဆီးလိုက်၏။

ဒုတိယ အစီအရင်က အလွန် အစွမ်းမထက်လှဘဲ တစ်ခဏမျှ အချိန်ယူလိုက်ရုံဖြင့် သွေးအထိအတွေ့ က အာဏာ တစ်စိတ်တစ်ပိုင်းကို ထိန်းချုပ်နိုင်သွားခဲ့သည်။

ချန်ဖေးက သံမဏိ တံခါးပေါ်သို့ လက်တင်၍ အနည်းငယ် အားစိုက်ကာ တဖြည်းဖြည်း တွန်းဖွင့်လိုက်သည်။

လျှို့ဝှက်ခန်းက မကြီးမားဘဲ အတွင်း၌ စင် အနည်းငယ် ရှိကာ စင်များပေါ်တွင် ဝိညာဉ်ပစ္စည်းများ၊ ဝိညာဉ်ဆေးလုံး များနှင့် ဝိညာဉ်ကျောက်တုံး ရာဂဏန်းခန့် ရှိနေသည်။

ချန်ဖေး တစ်ချက် လှမ်းကြည့်လိုက်ရာ အရာအားလုံး၏ တန်ဖိုးက ချန်ဖေး မျှော်လင့်ထားသလောက် မကြီးမားဘဲ ယာရှန်းဂိုဏ်းမှ ချန်ရစ်ခဲ့သော အရင်းအမြစ်များကိုပင် မမီချေ။

သို့သော် အနည်းငယ် စဉ်းစားကြည့်ပါက ဤနေရာက မိုးမျှော်စင်၏ ဌာနခွဲ တစ်ခုမျှသာ ဖြစ်ရာ လုပ်ငန်းတာဝန် အသီးသီးအတွက် ဆုကြေးအဖြစ် အရင်းအမြစ် တစ်စိတ်တစ်ပိုင်းကိုသာ သဘာဝကျကျ ဤနေရာတွင် ချန်ထားမည် ဖြစ်သည်။

မိမိ၏ ပိုင်ဆိုင်မှု အားလုံးနီးပါးကို ကိုယ်ပေါ်တွင် ယူဆောင်သွားလေ့ရှိသော ယာရှန်းဂိုဏ်း ကဲ့သို့သော နေရာမျိုးနှင့် သဘာဝကျကျ နှိုင်းယှဉ်၍ မရနိုင်ချေ။

ဤကဲ့သို့သော အရာမျိုးကို လုံးဝ မမျှော်လင့်ထားသော အကျိုးအမြတ်အဖြစ် သတ်မှတ်နိုင်ရာ ချန်ဖေး အနေဖြင့် အနည်းငယ်မျှပင် နည်းပါးသည်ဟု မထင်ချေ။

ချန်ဖေးက သေချာစွာ မစစ်ဆေးတော့ဘဲ နေရာလွတ်အကွက်ထဲသို့ ထည့်၍ ရနိုင်သမျှ အရာအားလုံးကို ထည့်သွင်းလိုက်သည်။

တကယ် ထည့်၍ မရတော့သော အတော်လေး ကြီးမားသည့် ဝိညာဉ် ဆေးဖက်ဝင် အပင်အချို့ကိုမူ ချန်ဖေးက ထိုနေရာတွင်ပင် တိုက်ရိုက် မျိုချပစ်လိုက်သည်။

ဝိညာဉ်ဆေးလုံး အဖြစ် သန့်စင်မထားသောကြောင့် ဆေးဘက်ဝင် အာနိသင်များစွာ ဆုံးရှုံးသွားသော်လည်း ကျောတွင် လွယ်ထားရသည်ထက်မူ ပိုမို အဆင်ပြေပေသည်။

ဝိညာဉ်ကျောက်တုံးများက နေရာယူလွန်းသဖြင့် ချန်ဖေးက တစ်စိတ်တစ်ပိုင်းကို စနစ်ထဲသို့ပင် တိုက်ရိုက် သွင်းလိုက်သည်။

စနစ်ထဲသို့ သွင်းလိုက်သော ဝိညာဉ်ကျောက်တုံးများကို ပြန်လည် ထုတ်ယူ၍ မရနိုင်တော့ချေ။

သို့သော် ကျင့်စဉ်များကို ရိုးရှင်းအောင် ပြုလုပ်ရန်အတွက် ဝိညာဉ်ကျောက်တုံးများ အမြဲတမ်း လိုအပ်နေမည် ဖြစ်ရာ သွင်းထားပြီး လောလောဆယ် အသုံးမပြုနိုင်သေးလျှင်တောင်မှ သဘာဝကျကျ အလကား မဖြစ်သွားနိုင်ချေ။

အချိန်အနည်းငယ် ရှင်းလင်းပြီးနောက် နောက်ဆုံးတွင် အားလုံး ပြီးစီးသွားခဲ့သည်။

ချန်ဖေးက ပတ်ဝန်းကျင်ကို တစ်ချက် လှမ်းကြည့်လိုက်ပြီး မည်သည့်အရာမျှ ကျန်ရစ်ခြင်း မရှိကြောင်း သေချာစေလိုက်သည်။

ဤနေရာတွင် လျှို့ဝှက်ခန်း၏ ဒုတိယအထပ် ဆိုသည်မှာ လုံးဝ မရှိခဲ့ဘဲ အစောက တိုင်ဖန်းရွှမ်း ပြောခဲ့သည်များမှာ ချန်ဖေး၏ အာရုံကို လွှဲရန် သက်သက်သာ ဖြစ်သည်။

တိုင်ဖန်းရွှမ်း ကိုယ်တိုင်ပင် ဤလျှို့ဝှက်ခန်း အပေါ်တွင် အခွင့်အာဏာ အလွန် နည်းပါးလှပေသည်။

တိုင်ဖန်းရွှမ်း ဤလျှို့ဝှက်ခန်းသို့ လာရခြင်း၏ ရည်ရွယ်ချက်က ချန်ဖေးကို ဆွဲချ၍ မိမိကိုယ်ကို ကယ်တင်ရန် ဟူသော ရည်ရွယ်ချက် တစ်ခုတည်း သက်သက်သာ ဖြစ်သည်။

ကံမကောင်းစွာဖြင့် တိုင်ဖန်းရွှမ်းက ဤအရာ နှစ်ခုစလုံးကို မအောင်မြင်ခဲ့ချေ။

ချန်ဖေးက လျှို့ဝှက်ခန်းထဲမှ ထွက်လာပြီးနောက် တိုင်ဖန်းရွှမ်း၏ အလောင်းကို တစ်ချက် လှမ်းကြည့်လိုက်ကာ ညာဘက်လက်ကို ညင်သာစွာ တစ်ချက် ဝှေ့ယမ်းလိုက်ရာ တိုင်ဖန်းရွှမ်းက ပြာအဖြစ် ပြောင်းလဲသွား၏။

ချန်ဖေး၏ ပုံရိပ် လက်ခနဲ ဖြစ်သွားပြီး စင်္ကြံလမ်း ရှိရာဘက်သို့ ထွက်လာခဲ့သည်။

စင်္ကြံလမ်း ပတ်လည်ရှိ အစောင့်များက ချန်ဖေးကို တစ်ချက် လှမ်းကြည့်လိုက်ပြီး ချန်ဖေးက လက်ချည်းသက်သက် ဖြစ်နေသည်ကို မြင်သောအခါ မတားဆီးခဲ့ကြဘဲ တိုင်ဖန်းရွှမ်းတွင် ပြုလုပ်စရာ ကိစ္စရှိသဖြင့် ချန်ဖေးကို အရင် ထွက်လာခိုင်းသည်ဟုသာ ထင်မှတ်လိုက်ကြသည်။

ချန်ဖေးက စင်္ကြံလမ်း၏ အထက်ကို တစ်ချက် လှမ်းကြည့်လိုက်ရာ ထိုနေရာတွင် အစီအရင်ပြားငယ် တစ်ခု ရှိနေပြီး လုပ်ဆောင်ချက်က အလွန် ရိုးရှင်းလှကာ စင်္ကြံလမ်းမှ တစ်ဆင့် လျှို့ဝှက်ခန်းထဲမှ တစ်ခုခု ထွက်ပေါ်လာပါက သတိပေးရန်သာ ဖြစ်သည်။

လျှို့ဝှက်ခန်း၏ အစီအရင်တွင် စိတ်ဝင်စားစရာ ကောင်းသော အချက်တစ်ခု ရှိပြီး လျှို့ဝှက်ခန်းထဲတွင် အချိန်အတိုင်းအတာ တစ်ခုအထိ သိမ်းဆည်းထားသော ပစ္စည်းများက သဘာဝကျကျ ချီအရှိန်အဝါ အချို့ စွဲထင်သွားခြင်းပင် ဖြစ်သည်။

ထို့အပြင် ဤအခိုက်အတန့်တွင် စင်္ကြံလမ်းပေါ်ရှိ အစီအရင်ပြားက ဤကဲ့သို့သော ချီအရှိန်အဝါမျိုးကို စောင့်ကြည့်နိုင်စွမ်း ရှိသည်။

ဤကဲ့သို့သော ချီအရှိန်အဝါမျိုးက အပြင်ဘက်သို့ ရောက်ရှိသွားပါက မကြာမီ ပြယ်လွင့်သွားမည် ဖြစ်သော်လည်း ဤအချိန်တိုလေး အတွင်းမှာပင် အစီအရင်ပြား အနေဖြင့် ပြဿနာကို ရှာဖွေတွေ့ရှိရန် လုံလောက်ပေသည်။

ကာကွယ်ရေးပိုင်းတွင် မိုးမျှော်စင်က အမှန်တကယ်ပင် အလွန် စေ့စပ်သေချာလှသည်။ အစီအရင် မည်မျှ အစွမ်းထက်သနည်း ဆိုသည်ထက် စဉ်းစားတွေးခေါ်မှု ပိုင်းတွင် အလွန် ပြောင်းလွယ်ပြင်လွယ် ရှိခြင်းပင် ဖြစ်သည်။

ချန်ဖေးတွင် နေရာလွတ်အကွက်သာ မရှိခဲ့ပါက ယခုအခိုက်အတန့်တွင် လုပ်နိုင်သည့် အရာမှာ တိုက်ခိုက် ထွက်ပြေးရန်သာ ဖြစ်ပြီး ထိုအချိန်ကျလျှင် ကြီးမားသော လှုပ်ရှားမှုများ ဖြစ်ပေါ်လာမည်ဟု ခန့်မှန်းရသည်။

မိုးမျှော်စင်၏ ကြီးမားသော သေကြောင်းကြံ သည့် အကျင့်အရ ယန္တရား အချို့ကိုပင် ထိခိုက်မိသွားနိုင်သေးသည်။

တစ်ဆင့်ပြီးတစ်ဆင့် ချိတ်ဆက်ထားသော်လည်း အစစ်အမှန် အစွမ်းထက် ပညာရှင်များ၏ မျက်လုံးထဲတွင်မူ အကျိုးသက်ရောက်မှုက အလွန် ကောင်းမွန်မည်ဟု မဆိုနိုင်ချေ။

ချန်ဖေး ကဲ့သို့သော စိတ်စွမ်းအား အခြေအနေမျိုးဖြင့် ဖုံးကွယ်ထားသော ထောင်ချောက်များစွာကို အလွယ်တကူ ရှာဖွေတွေ့ရှိနိုင်သည်။

ဤလောကကြီးတွင် နောက်ဆုံး၌ အကြွင်းမဲ့ ခွန်အားဖြင့်သာ စကားပြောရဆဲ ဖြစ်သည်။

ချန်ဖေးက အကြည့်ကို ပြန်ရုပ်သိမ်းလိုက်ပြီး စင်္ကြံလမ်းမှ အေးဆေးတည်ငြိမ်စွာ လျှောက်ထွက်လာခဲ့သည်။

အိမ်ကြီးထဲရှိ မလှမ်းမကမ်းမှ ခြံဝင်းထဲတွင် ရှိသော ဒွာရသန့်စင်ခြင်း အဆင့် သိုင်းပညာရှင်မှာ ဤနေရာတွင် ထူးခြားမှု တစ်ခုခု ရှိနေကြောင်း ယခုထက်တိုင် ရှာမတွေ့သေးချေ။

ချန်ဖေးက တိုင်ဖန်းရွှမ်း၏ ကျောက်စိမ်းပြားကို လက်ထဲတွင် ကိုင်ဆောင်၍ အိမ်ကြီးထဲမှ အတားအဆီးမရှိ ထွက်လာခဲ့ရာ မည်သည့် ပြဿနာမျှ မရှိခဲ့ချေ။

ချန်ဖေးက အနက်ရောင် မြို့တော် ပိုင်ရှင်၏ တည်နေရာကို အဝေးမှ အာရုံခံလိုက်ရာ ချီအရှိန်အဝါက ဤအနက်ရောင် မြို့တော် ကဲ့သို့ပင် နက်ရှိုင်းပြီး မှောင်မိုက်နေ၏။

ဤနေရာတွင် အနက်ရောင် မြို့တော် ပိုင်ရှင်၏ ခွန်အားက များစွာ တိုးတက်လာပေလိမ့်မည်။

သို့သော် ဤအရာများ အားလုံးက ယခု ချန်ဖေးနှင့် မသက်ဆိုင်တော့ချေ။

ချန်ဖေး၏ ပုံရိပ် လက်ခနဲ ဖြစ်သွားပြီး အနက်ရောင် မြို့တော်၏ မြို့တံခါးမှ တိုက်ရိုက် ထွက်လာခဲ့ကာ ပုံရိပ်ယောင် အဖြစ် ပြောင်းလဲသွားပြီး ယွမ်ချန်ဓားဂိုဏ်း ရှိရာဘက်သို့ အပြင်းအထန် ပြေးထွက်သွား၏။

ဤတစ်ကြိမ် အနက်ရောင် မြို့တော်သို့ လာရောက်ခြင်းက ချန်ဖေး မူလ မျှော်လင့်ထားသည်ထက် ကျော်လွန်ကာ အကျိုးအမြတ် များစွာ ရရှိခဲ့သည်။

ထိုဝိညာဉ်လက်နက် ဓားများကို ရောင်းချပြီးနောက် ရရှိလာသော အရင်းအမြစ်များက ချန်ဖေးကို အချိန်အတိုင်းအတာ တစ်ခုအထိ ကျင့်ကြံရန် လုံလောက်ပေသည်။

တိုင်ဖန်းရွှမ်း ပေါ်လာခြင်းက ချန်ဖေး၏ ပိုင်ဆိုင်မှုများကို ရုတ်တရက် ပိုမို ကြွယ်ဝသွားစေခဲ့သည်။

ထို့အပြင် ဤအကျိုးအမြတ်များ အနက် ဝိညာဉ်ကျောက်တုံးများနှင့် ဝိညာဉ်ဆေးလုံး များက သဘာဝကျကျ အလွန် ကောင်းမွန်သော်လည်း ချန်ဖေးကို ပို၍ ဂရုစိုက်စေခဲ့သည်မှာ မြောင်ချီရှန်း၏ စာကြည့်ခန်းထဲမှ ကျောက်စိမ်းစာလိပ် အချို့ပင် ဖြစ်သည်။

မြောင်ချီရှန်းက ချန်ဖေး တွေ့ကြုံဖူးသော ဒွာရသန့်စင်ခြင်း အဆင့်များ အနက် စိတ်စွမ်းအားက မိမိ၏ ဒွာရ အရေအတွက်ထက် ကျော်လွန်နိုင်သည့် ရှားပါးသော ပညာရှင် တစ်ယောက် ဖြစ်သည်။

ချန်ဖေးကလည်း သူ၏ စိတ်စွမ်းအားက ဒွာရ အရေအတွက်ထက် ကျော်လွန်နေသော်လည်း ချန်ဖေး ကျင့်ကြံထားသော ကျင့်စဉ်များက အလွန် များပြားလှပြီး စိတ်စွမ်းအားနှင့် သက်ဆိုင်သော ကျင့်စဉ် အနည်းငယ် ရှိနေကာ နဂါးဆင်နှိမ်နင်းခြင်းနှင့် နတ်ဘုရားဖိနှိပ်ခြင်း သဏ္ဍာန် ကဲ့သို့သော ကျင့်စဉ်များမှာမူ ထိပ်တန်း အဆင့်တွင် ရှိနေသည်။

ထို့ကြောင့် စိတ်စွမ်းအားက ဒွာရ အရေအတွက်ထက် ကျော်လွန်ရန် ဆိုသည်မှာ မည်မျှ ခက်ခဲသော ကိစ္စ တစ်ခု ဖြစ်ကြောင်း ချန်ဖေး အလွန် ရှင်းလင်းစွာ သိရှိပေသည်။

ချန်ဖေးက စိတ်စွမ်းအားက ဒွာရ အရေအတွက်ထက် ကျော်လွန်နေသောသူ အချို့ကို တွေ့ကြုံဖူးသော်လည်း ထိုသူများမှာ အနည်းငယ်သာ ရှိပြီး များများစားစား မရှိလှချေ။

ထို့အပြင် မြောင်ချီရှန်း၏ စိတ်စွမ်းအားက ဒွာရသန့်စင်ခြင်း အလယ်အလတ်အဆင့်၏ အထွတ်အထိပ်သို့ ရောက်ရှိနေပြီ ဖြစ်သည်။

မြောင်ချီရှန်း၏ ဒွာရ အရေအတွက်က ချန်ဖေးနှင့် သိပ်မကွာခြားလှဘဲ ဒွာရ အရေအတွက်နှင့် စိတ်စွမ်းအား ကြားရှိ ကွာဟချက်က ၂၀ နီးပါးခန့် ရှိနေမည်ဟု ခန့်မှန်းရသည်။

ဤသည်က သဘာဝကျကျ ချန်ဖေးကို မြောင်ချီရှန်း မည်သို့ လုပ်ဆောင်ခဲ့သနည်း ဆိုသည်နှင့် ပတ်သက်၍ အလွန် စူးစမ်းလိုစိတ် ဖြစ်ပေါ်စေခဲ့သည်။

နာရီအနည်းငယ် အချိန်ယူရပြီးနောက် ချန်ဖေးက အနက်ရောင် မြို့တော်မှ ဂိုဏ်းသို့ ပြန်ရောက်လာခဲ့ပြီး လမ်းခရီး တစ်လျှောက်တွင် မည်သည့် ပြဿနာမျှ မကြုံတွေ့ခဲ့ရချေ။

အဝေးမှ ချန်ဖေး၏ ကိုယ်ဖော့ပညာ အရှိန်ကို မြင်နိုင်သူတိုင်း အကယ်၍ အမှန်တကယ် မကောင်းသော ရည်ရွယ်ချက် ရှိနေလျှင်တောင်မှ နောက်ဆုတ်သွားလောက်မည်ဟု ခန့်မှန်းရသည်။

ခြံဝင်း၏ လျှို့ဝှက်ခန်းထဲတွင် ဘာကာက အိုးထဲ၌ တိတ်ဆိတ်စွာ နေနေပြီး အခြေအနေက ကောင်းမွန်နေဆဲ ဖြစ်ကာ ခွန်အားများလည်း ဆက်လက် ပြန်လည် ကောင်းမွန်လာနေပြီး မြေဆီလွှာထဲရှိ ယွမ်ချီစွမ်းအင် များကလည်း အလွန် လုံလောက်နေသည်။

ချန်ဖေးက ဘာကာကို အနှောင့်အယှက် မပေးဘဲ နေရာလွတ်အကွက်ထဲမှ ကျောက်စိမ်းစာလိပ်များ အားလုံးကို ထုတ်ယူလိုက်သည်။

ကျောက်စိမ်းစာလိပ်များက အတော်လေး များပြားပြီး အချို့က မြောင်ချီရှန်း၏ စာကြည့်ခန်းမှ ဖြစ်ကာ အများစုက မိုးမျှော်စင်၏ လျှို့ဝှက်ခန်းမှ ဖြစ်သည်။

မြောင်ချီရှန်း၏ ကျောက်စိမ်းစာလိပ်များ ပေါ်တွင် စိတ်စွမ်းအား ရစ်ပတ်မှုများ ရှိနေသေးရာ ချန်ဖေးက အလျင်စလို မဖောက်ထွင်းသေးဘဲ မိုးမျှော်စင်၏ လျှို့ဝှက်ခန်းမှ ကျောက်စိမ်းစာလိပ်များကို အရင်ဆုံး တစ်ခုပြီးတစ်ခု လေ့လာကြည့်ရှုလိုက်သည်။

နှစ်နာရီနီးပါး အချိန်ယူပြီးနောက် နောက်ဆုံးတွင် ချန်ဖေးက လျှို့ဝှက်ခန်းမှ ကျောက်စိမ်းစာလိပ်များကို အားလုံး ဖတ်ရှုပြီးစီးသွားခဲ့သည်။

ကျောက်စိမ်းစာလိပ်များကို ဘေးသို့ ဖယ်ထားလိုက်ပြီးနောက် ချန်ဖေး၏ အမူအရာက တွေးတောနေပုံ ရသည်။

ဤကျောက်စိမ်းစာလိပ်များထဲတွင် ချန်ဖေးအတွက် အထောက်အကူ ဖြစ်စေမည့် အရာများ သိပ်မများလှချေ။ သို့မဟုတ် အလွန် နည်းပါးလှသည်ဟု ဆိုရမည်။

ဥပမာ - မိုးမျှော်စင်၏ ထူးခြားသော နှလုံးသား နင်းခြေ သိုင်းကဲ့သို့ပင်၊ ခြေသံများကို အသုံးပြု၍ အခြားသူများ၏ ချီနှင့် သွေးစီးဆင်းမှုကို အနှောင့်အယှက် ပေးနိုင်ပြီး နက်နဲသော အဆင့်ထိ ကျင့်ကြံထားပါက သာမန် အသံတစ်သံကပင် လူတစ်ယောက်၏ နှလုံးနှင့် အဆုတ်ကို ကွဲအက် သေဆုံးသွားစေနိုင်သည်။

နားထောင်ကြည့်ရုံဖြင့် အလွန် ကောင်းမွန်ပြီး အလွန် လက်တွေ့ကျသည်ဟု ထင်ရသည်။

သို့သော် ဤအရာက ခန္ဓာကိုယ်ကြံ့ခိုင်ခြင်း အဆင့် သိုင်းပညာရှင်များကို ပစ်မှတ်ထားရာတွင်သာ အသုံးပြုနိုင်ပြီး ဒွာရသန့်စင်ခြင်း အဆင့်များကို အနှောင့်အယှက် ပေးရန် အသုံးပြုမည် ဆိုပါက မဖြစ်နိုင်ဘူးဟု မဆိုနိုင်သော်လည်း အကျိုးသက်ရောက်မှုက အလွန် နည်းပါးလှပေသည်။

အဆုံးစွန် ပြောရမည် ဆိုလျှင် နှလုံးသား နင်းခြေ သိုင်းမှာ အသံလှုံ့ဆော်မှု တစ်ခုမျှသာ ဖြစ်သည်။

ဒွာရသန့်စင်ခြင်း အဆင့်များက မူလစွမ်းအားများကို တိုက်ရိုက် အသုံးပြု၍ အတားအဆီး တစ်ခု ဖန်တီးလိုက်ပါက ဤအသံကို အလွယ်တကူ ကာကွယ်နိုင်ပေသည်။

ထို့အပြင် ဒွာရသန့်စင်ခြင်း အဆင့်များ၏ မိမိကိုယ်ကို ထိန်းချုပ်နိုင်စွမ်းအရ အခြားသူများ၏ စိတ်ကြိုက် ခြယ်လှယ်ခြင်းကို လုံးဝ ခံရမည် မဟုတ်ပေ။

ထို့အပြင် နှလုံးသား အမှတ်အသား လည်း ရှိသေးပြီး အမှတ်အသား ပြုလုပ်ပြီးနောက် အခြားသူများကို လိုက်လံ ခြေရာခံရန် အသုံးပြုသည်။

ခန္ဓာကိုယ်ကြံ့ခိုင်ခြင်း အဆင့်များက စိတ်စွမ်းအားပိုင်းတွင် အာရုံခံနိုင်စွမ်း လုံလောက်စွာ မရှိသဖြင့် မိမိတို့ ပစ်မှတ်ထား ခံရသည်ကို သတိမပြုမိနိုင်သော်လည်း ဒွာရသန့်စင်ခြင်း အဆင့်များကမူ မိမိတို့နှင့် မသက်ဆိုင်သော စိတ်စွမ်းအား အမှတ်အသားများကို သေချာပေါက် တွေ့ရှိသွားပေလိမ့်မည်။

အခြား ကျင့်စဉ်များ အတော်များများ ရှိသေးသော်လည်း ခန္ဓာကိုယ်ကြံ့ခိုင်ခြင်း အဆင့်များကိုသာ အများဆုံး အကျိုးသက်ရောက်မှု ရှိကြသည်။

တစ်ခုတည်းသော ခြွင်းချက်မှာ အသက်စွမ်းအင်များကို လောင်ကျွမ်းစေသော သွေးလောင်ကျွမ်းခြင်း ကျင့်စဉ်ပင် ဖြစ်သည်။

အန္တရာယ်နှင့် ကြုံတွေ့ရချိန်တွင် အသုံးပြုရန် သို့မဟုတ် ထွက်ပြေးရန် အတွက် ဖြစ်သည်။

သို့သော် အလွန်အကျွံ အသုံးပြုပါက နောက်ပိုင်းတွင် လူတစ်ဝက်ခန့် အသုံးမကျ ဖြစ်သွားလိမ့်မည်ဟု ခန့်မှန်းရပြီး ဆုံးရှုံးမှုအတိုင်းအတာက ဒွာရများ ပြိုကျခြင်းထက်ပင် ပို၍ ဆိုးရွားနိုင်သည်။

သို့သော် အသက်အန္တရာယ်နှင့် ကြုံတွေ့ရပြီး အမှန်တကယ် အသက်လုရမည့် အခြေအနေမျိုးတွင် နောက်ဆက်တွဲ ဆိုးကျိုးများကို ဂရုစိုက်ရန် မည်သူက စိတ်ကူး ရှိတော့မည်နည်း။

လောလောဆယ် အသက်ကို ကယ်တင်နိုင်ရန်ကသာ အရေးအကြီးဆုံး ဖြစ်သည်။

ချန်ဖေးက ဤကျင့်စဉ်ကို စိတ်ဝင်စားမိသည်။

မိမိ၏ နောက်ခံ အင်အားကို တိုးမြှင့်ရန် အပြင် ပို၍ အရေးကြီးသည်မှာ နဂါးဆင်နှိမ်နင်းခြင်း ကျင့်စဉ်၏ ခန္ဓာကိုယ် ထောက်ပံ့မှုဖြင့် ဤသွေးလောင်ကျွမ်းခြင်း ကျင့်စဉ် အပေါ် မတူညီသော ပြောင်းလဲမှုများ ရှိလာနိုင်မလား ဆိုသည်ကို မသိနိုင်သောကြောင့် ဖြစ်သည်။

မကြာမီ အချိန်အတွင်း ဤသွေးလောင်ကျွမ်းခြင်း ကျင့်စဉ်ကို ကျင့်ကြံရန် ချန်ဖေး ဆုံးဖြတ်လိုက်သည်။ မျှော်လင့်မထားသော အံ့သြစရာ အချို့ ရှိလာနိုင်ပေသည်။

ချန်ဖေးက သူ၏ အကြည့်ကို မြောင်ချီရှန်း၏ ကျောက်စိမ်းစာလိပ်များပေါ်သို့ ရွှေ့လိုက်ရာ သူ၏ မျက်လုံးများထဲတွင် အလင်းတန်းလေး တစ်ခု တောက်ပသွား၏။

ဤကျောက်စိမ်းစာလိပ်များထဲတွင် မြောင်ချီရှန်း၏ စိတ်စွမ်းအား အားကောင်းရသည့် အကြောင်းရင်း ပါဝင်နေမည်ဟု မျှော်လင့်မိသည်။

အကယ်၍ ချန်ဖေး၏ စိတ်စွမ်းအား နှောင့်နှေးနေမှု ပြဿနာကို ဖြေရှင်းပေးနိုင်မည် ဆိုပါက အဆင်ပြေလိမ့်မည်။

ထို့အပြင် စိတ်စွမ်းအား အတားအဆီးများ ပွင့်သွားသည်နှင့် တစ်ပြိုင်နက် ယခုတစ်ကြိမ် ရရှိခဲ့သော အရင်းအမြစ်များက ချန်ဖေးကို ခြေလှမ်းကျဲကြီးများဖြင့် တိုးတက်သွားစေရန် လုံလောက်ပေသည်။

အခန်း (၃၇၇) တစ်စိတ်တည်းဖြင့် အသုံး တစ်ရာ

စိတ်စွမ်းအား ရစ်ပတ်မှု ဆိုသည်မှာ သော့ခလောက် တစ်ခုနှင့် တူပြီး နည်းလမ်း မှားယွင်းသွားပါက ဤသော့ခလောက်ကို သဘာဝကျကျ ဖွင့်၍ မရနိုင်သလို အတင်းအကျပ် ဖောက်ထွင်းရန် ကြိုးစားပါက ကျောက်စိမ်းစာလိပ်ကိုပါ အတူတကွ ပျက်စီးသွားစေရန် အလွန် လွယ်ကူပေသည်။

ကံကောင်းထောက်မစွာဖြင့် ချန်ဖေး ကျင့်ကြံထားသော ဝိညာဉ်ကြိုးမျှင် ကျင့်စဉ်က မူလကတည်းက စိတ်စွမ်းအားကို သိမ်မွေ့စွာ ထိန်းချုပ်ခြင်း ဖြစ်သည်။

ဆေးဖော်စပ်ရာတွင် ဆေးဖိုအတွင်းရှိ ဆေးဖက်ဝင် အပင်များ၏ ဆေးဘက်ဝင် အာနိသင်များက အချိန်တိုင်း အဆက်မပြတ် ပွတ်တိုက်နေသကဲ့သို့ပင် ဖြစ်သည်။

အကယ်၍ စိတ်စွမ်းအားဖြင့် ဤပွတ်တိုက်မှုများကို ကျွမ်းကျင်စွာ မဖြေရှင်းနိုင်ဘဲ ဆေးဘက်ဝင် အာနိသင်များကို ပိုမို ကြီးမားသော အတိုင်းအတာ တစ်ခုအထိ မထုတ်လွှတ်နိုင်ပါက ဆေးဖော်စပ်ခြင်း၏ ရလဒ်မှာ ဆေးဖို ပေါက်ကွဲခြင်းသာ ဖြစ်လာနိုင်သည်။

ထို့ကြောင့် အခြားသူများ အနေဖြင့် ဤကဲ့သို့သော စိတ်စွမ်းအား ရစ်ပတ်ထားသည့် ကျောက်စိမ်းစာလိပ်များနှင့် တွေ့ကြုံရပါက အနည်းငယ် ခက်ခဲသည်ဟု ခံစားရမည် ဖြစ်သော်လည်း ချန်ဖေး အတွက်မူ အချိန်အနည်းငယ် ယူရုံသာ ဖြစ်သည်။

နာရီဝက်ပင် မကြာလိုက်ဘဲ ကျောက်စိမ်းစာလိပ်က အနည်းငယ် တုန်ခါသွားပြီး အပေါ်တွင် တွယ်ကပ်နေသော စိတ်စွမ်းအားကို ချန်ဖေးက ဖြေရှင်းလိုက်ပြီ ဖြစ်သည်။

ချန်ဖေးက သူ၏ စိတ်စွမ်းအားကို ကျောက်စိမ်းစာလိပ်ထဲသို့ ထည့်သွင်းလိုက်ပြီး အချက်အလက်များကို စတင် ဖတ်ရှု မှတ်တမ်းတင်လိုက်သည်။

ဆယ့်ငါးမိနစ် ကြာပြီးနောက် ချန်ဖေးက စိတ်စွမ်းအားကို ပြန်လည် ရုပ်သိမ်းလိုက်ပြီး လက်ထဲရှိ ကျောက်စိမ်းစာလိပ်ကို ဘေးသို့ ဖယ်ထားလိုက်သည်။

ဤသည်က မြောင်ချီရှန်း ကျင့်ကြံထားသော ကျင့်စဉ် တစ်ခု ဖြစ်ပြီး မဆိုးလှချေ။

အထွတ်အထိပ်သို့ ကျင့်ကြံပါက ဒွာရ ၈၁ ခု ဖွင့်လှစ်နိုင်သည်။ နက်နဲမှု အဆင့်က ယွမ်ချန်ဓားဂိုဏ်း၏ ကျုံးယွမ် ဓားသိုင်းနှင့် သိပ်မကွာခြားလှချေ။

သို့သော် ဤသည်က ယခု ချန်ဖေး လိုအပ်နေသော အရာ မဟုတ်ပေ။

နောက်ပိုင်း အားလပ်ချိန် ရပါက ချန်ဖေး အနေဖြင့် ကောက်ယူ ကြည့်ရှုပြီး အကျိုးကျေးဇူး အချို့ ပေးစွမ်းနိုင်မလား ဆိုသည်ကို စမ်းသပ်ကြည့်ပေလိမ့်မည်။

ယခုအချိန်တွင် ချန်ဖေး၏ အဓိက အာရုံစိုက်မှုက သတ်ဖြတ်ခြင်းဓားသွား ဓားသိုင်း အပါအဝင် ကျင့်စဉ် လေးခုအပေါ်တွင်သာ ရှိနေဆဲ ဖြစ်သည်။

အစွမ်းထက်သော စိတ်ပိုင်းဆိုင်ရာ ကျင့်စဉ် တစ်ခု မဟုတ်ပါက ချန်ဖေး အနေဖြင့် အတူတကွ ကျင့်ကြံရန် စဉ်းစားမည် မဟုတ်ချေ။

ချန်ဖေးက ဒုတိယမြောက် ကျောက်စိမ်းစာလိပ်ကို လက်ထဲသို့ ယူလိုက်ပြီး အပေါ်ရှိ စိတ်စွမ်းအား ရစ်ပတ်မှုကို စတင် ဖြေရှင်းလိုက်သည်။

ဤတစ်ကြိမ်တွင် ပထမအကြိမ်ထက် ဖြေရှင်းရန် အချိန်များစွာ ပိုမို လျော့နည်းသွားခဲ့သော်လည်း စိတ်စွမ်းအားက ကျောက်စိမ်းစာလိပ်ထဲသို့ ဝင်ရောက်သွားပြီး တစ်ခဏ အကြာတွင် ချန်ဖေးက ပြန်လည် ရုပ်သိမ်းလိုက်သည်။

ဒိုင်ယာရီ၊ မြောင်ချီရှန်း၏ ဒိုင်ယာရီ ကျောက်စိမ်းစာလိပ်။

ဤသည်က ချန်ဖေး အနေဖြင့် အခြားသူ တစ်ယောက်၏ ဒိုင်ယာရီကို ပထမဆုံး အကြိမ် တွေ့ကြုံဖူးခြင်း ဖြစ်ပြီး အတွင်း၌ အရေးကြီးသော ကိစ္စရပ် အချို့ကို မှတ်တမ်းတင်ထားသင့်သော်လည်း ယခု ချန်ဖေး လိုအပ်နေသော အရာ မဟုတ်သဖြင့် ချန်ဖေးက သဘာဝကျကျ အရင် ကျော်သွားလိုက်သည်။

အကယ်၍ မျက်စိရှေ့ရှိ ဤကျောက်စိမ်းစာလိပ်များထဲတွင် ချန်ဖေး လိုအပ်သည့်အရာ တစ်ခုမှ မရှိပါက ချန်ဖေး အနေဖြင့် လိုအပ်သည်များကို ရှာဖွေရန် ဤဒိုင်ယာရီ ကျောက်စိမ်းစာလိပ်ကို ပြန်လည် ဖတ်ရှုရပေလိမ့်မည်။

ချန်ဖေးက တတိယမြောက် ကျောက်စိမ်းစာလိပ်ကို လက်ထဲသို့ ယူ၍ ဖြေရှင်းပြီးနောက် စိတ်စွမ်းအားဖြင့် စူးစမ်းရှာဖွေလိုက်ရာ ချန်ဖေး၏ အရှိန်က တဖြည်းဖြည်း ပိုမို မြန်ဆန်လာ၏။

ဤကျောက်စိမ်းစာလိပ်များပေါ်ရှိ စိတ်စွမ်းအား ရစ်ပတ်မှုများက ရှုပ်ထွေးသည်ဟု ဆိုနိုင်သော်လည်း သက်ဆိုင်ရာ ကျွမ်းကျင်မှု မရှိသော ဒွာရသန့်စင်ခြင်း အဆင့်များ အတွက်မူ စတင်ရန် အနည်းငယ် ခက်ခဲပေလိမ့်မည်။

သို့သော် ကျောက်စိမ်းစာလိပ် နှစ်ခုကို ဖြေရှင်းဖူးသော ချန်ဖေး အတွက်မူ လွယ်ကူစွာ ကိုင်တွယ်နိုင်ပြီ ဖြစ်ပြီး ကျန်ရှိနေသော ကျောက်စိမ်းစာလိပ်များကို ဖြေရှင်းရန်မှာ ချန်ဖေးအတွက် ခက်ခဲမှု မရှိတော့ချေ။

တတိယမြောက် ကျောက်စိမ်းစာလိပ်က ဓားသိုင်း အမွေအနှစ် တစ်ခု ဖြစ်ပြီး ဤအမွေအနှစ်က အတော်လေး အံ့မခန်း ဖြစ်ကာ ချန်ဖေးက အစိတ်အပိုင်း သေးသေးလေး တစ်ခုကို ဖတ်ရှုလိုက်ရုံဖြင့် အတွင်းရှိ ဓားသိုင်း သီအိုရီများကြောင့် ဆွဲဆောင်ခံလိုက်ရသည်။

သို့သော် နောက်ဆက်တွဲများကို ဆက်ဖတ်ကြည့်လိုက်သောအခါ ဤအမွေအနှစ်က မပြည့်စုံသော အခြေအနေတွင် ရှိနေပြီး ဒွာရ ၃၁ ခု အထိသာ ကျင့်ကြံနိုင်ကာ ဒွာရသန့်စင်ခြင်း အလယ်အလတ်အဆင့်သို့ပင် မရောက်နိုင်ကြောင်း ချန်ဖေး တွေ့ရှိလိုက်ရသည်။

အရသာ မရှိသော်လည်း လွှင့်ပစ်ရန် နှမြောစရာ ကောင်းနေ၏။

ဤကဲ့သို့သော မပြည့်စုံသည့် အမွေအနှစ်များက ဂိုဏ်းမဲ့ သိုင်းပညာရှင် များစွာ၏ ရင်နာစရာများ ဖြစ်ကြသည်။

သင်ယူထားသော ကျင့်စဉ်က အလွန် အစွမ်းထက်သည်မှာ ထင်ရှားသော်လည်း အစိတ်အပိုင်း အနည်းငယ်မျှသာ ရှိနေခြင်းက လူများကို မျက်ရည်ကျချင်လောက်အောင် ဖြစ်စေသည်။

စတုတ္ထမြောက် ကျောက်စိမ်းစာလိပ်တွင် မြေပုံတစ်ခုကို မှတ်တမ်းတင်ထားသည်။

ချန်ဖေးက မြေပုံကို ကြည့်လိုက်ရာ အမြဲတမ်း အနည်းငယ် ရင်းနှီးနေသကဲ့သို့ ခံစားနေရသော်လည်း သူ၏ မှတ်ဉာဏ်ထဲရှိ အရာများနှင့် မကိုက်ညီဘဲ အနည်းငယ် ဆင်တူသကဲ့သို့ ဖြစ်နေသည်။

ချန်ဖေး၏ ကိုက်ညီမှုက မှားယွင်းနေခြင်း ဖြစ်နိုင်သလို သို့မဟုတ် ဤမြေပုံကို မြောင်ချီရှန်းက ပြုပြင်မွမ်းမံမှု အချို့ ပြုလုပ်ထားခြင်းလည်း ဖြစ်နိုင်သည်။

ထို့အပြင် မြေပုံ တစ်ခုတည်းကသာ ဤမြေပုံ ဘာကို ကိုယ်စားပြုသည် ဆိုသည်ကို မပြောပြနိုင်ချေ။

ပဉ္စမမြောက် ကျောက်စိမ်းစာလိပ်က အစီအရင် တစ်ခု ဖြစ်ပြီး အတွင်း၌ အသေးစိတ် ပြင်ဆင်မှု နည်းလမ်းများနှင့် အသုံးပြုရန် လိုအပ်သော အစီအရင် ပစ္စည်းများ ပါဝင်သည်။

ထိုမျှသာမက ဤအစီအရင်အပေါ် မြောင်ချီရှန်း၏ အမျိုးမျိုးသော နားလည်သဘောပေါက်မှုများကိုလည်း ကျောက်စိမ်းစာလိပ် အတွင်း၌ အသေးစိတ် မှတ်တမ်းတင်ထားသည်။

နားလည်သဘောပေါက်မှု မှတ်တမ်းများအရ ဤအစီအရင် အပေါ် မြောင်ချီရှန်း၏ ကျင့်ကြံမှုက အလယ်အလတ်အဆင့် နေရာတွင် ရှိနေပြီး မြောင်ချီရှန်းက ဤအစီအရင်ကို အလွန် အလေးထားကြောင်း တွေ့မြင်နိုင်ပေသည်။

"နှလုံးသားကျောက်တုံး ကို အစီအရင် အဖြစ် အသုံးပြုဖို့ လိုအပ်တယ်..."

ချန်ဖေး၏ နှလုံးသား အနည်းငယ် လှုပ်ရှားသွား၏။ နှလုံးသားကျောက်တုံး ဆိုသည်ကို ချန်ဖေး ယခု သိရှိထားပြီး နှလုံးသားနယ်မြေတွင် ထွက်ရှိကာ အရေအတွက်က အလွန် ရှားပါးလှသည်။

ချန်ဖေး နှလုံးသားနယ်မြေသို့ အကြိမ်အနည်းငယ် သွားရောက်ခဲ့သော်လည်း နှလုံးသားကျောက်တုံးကို ရရှိပါက တိုက်ရိုက် အသုံးပြုလေ့ ရှိသည်။

အဘယ်ကြောင့်ဆိုသော် နှလုံးသားကျောက်တုံးက စိတ်စွမ်းအား တိုးတက်မှုအတွက် အတော်လေး သိသာထင်ရှားသော အကျိုးသက်ရောက်မှု ရှိသောကြောင့် ဖြစ်သည်။

ချန်ဖေး ယခု ဒွာရသန့်စင်ခြင်း အဆင့်သို့ ရောက်ရှိနေပြီ ဖြစ်သော်လည်း နှလုံးသားကျောက်တုံးက ကောင်းမွန်သော အကျိုးသက်ရောက်မှု ရှိနေဆဲ ဖြစ်သည်။

နှလုံးသား ကျောက်တုံး၊ မြေပုံ။

ချန်ဖေးက အစောက သူမြင်တွေ့ခဲ့ရသော မြေပုံကို စိတ်ထဲတွင် ပြန်လည် မြင်ယောင်လိုက်ရာ မျက်လုံးများ ရုတ်တရက် တောက်ပသွား၏။

မြေပုံပေါ်တွင် ရေးဆွဲထားသည်များက နှလုံးသားနယ်မြေ၏ အသွင်အပြင်များ မဟုတ်ပါလား။

နှလုံးသားနယ်မြေက အလွန် အံ့သြဖွယ်ကောင်းသော နေရာတစ်ခု ဖြစ်ပြီး လက်တွေ့ဘဝနှင့် ကိုက်ညီသော်လည်း လုံးဝ တူညီခြင်းတော့ မရှိချေ။

အစောက ချန်ဖေး မြေပုံကို ပထမဆုံးအကြိမ် ကြည့်စဉ်က ရင်းနှီးသလိုလို စိမ်းသက်သလိုလို ခံစားခဲ့ရခြင်းမှာ ထိုတောင်တန်းက လက်တွေ့ဘဝတွင် ရှိနေသော်လည်း ကျောက်စိမ်းစာလိပ်ထဲရှိ အသွင်အပြင်နှင့် မတူညီသောကြောင့် ဖြစ်သည်။

သို့သော် နှလုံးသားနယ်မြေ ဖြစ်မည် ဆိုပါက ထိုတောင်တန်း၏ အသွင်အပြင်က သေချာပေါက် ကိုက်ညီနိုင်ပေလိမ့်မည်။

"မြောင်ချီရှန်းရဲ့ စိတ်စွမ်းအား တိုးတက်လာရတဲ့ အကြောင်းရင်းက... နှလုံးသားနယ်မြေ ထဲမှာလား..."

နှလုံးသားနယ်မြေ အတွင်းရှိ နေရာအနှံ့ ပျံ့နှံ့နေသော ညစ်ညမ်းမှုများကို ခံနိုင်ရည် ရှိပါက အမှန်တကယ်ပင် စိတ်စွမ်းအားကို သန့်စင်ပြီး တိုးတက်စေနိုင်သည်။

အစပိုင်းက အတွင်းကလီစာသန့်စင်ခြင်း အဆင့်တွင် ရှိနေစဉ်က ချန်ဖေးက ဤနည်းဖြင့် သူ၏ စိတ်စွမ်းအားကို ကျင့်ကြံခဲ့ခြင်း ဖြစ်သည်။

သို့သော် ဒွာရသန့်စင်ခြင်း အဆင့်သို့ ရောက်ရှိပြီးနောက် ထိုနေရာအနှံ့ ပျံ့နှံ့နေသော ညစ်ညမ်းမှုများက ဒွာရသန့်စင်ခြင်း အဆင့်၏ စိတ်စွမ်းအား အပေါ် သက်ရောက်မှု ရှိရန် ခက်ခဲသွားခဲ့သည်။

ညစ်ညမ်းမှုများ ဆက်လက် ရှိနေဆဲ ဖြစ်သော်လည်း အနည်းငယ် ပြုပြင်လိုက်ရုံဖြင့် ညစ်ညမ်းမှုများကို ဖယ်ရှားပစ်နိုင်သည်။

ထိခိုက်ဒဏ်ရာ မရှိသောကြောင့် ပြုပြင်ပြီးနောက် တိုးတက်မှု အကျိုးသက်ရောက်မှုကလည်း အလွန် အကန့်အသတ် ရှိကာ မရှိတာထက် စာရင် ပိုကောင်းရုံမျှသာ ဖြစ်သည်။

အကျိုးသက်ရောက်မှု သိသာထင်ရှားသော နှလုံးသားကျောက်တုံး များမှာလည်း အရေအတွက် အလွန် အကန့်အသတ် ရှိပြီး ချန်ဖေး အနေဖြင့် ရှာဖွေရန် အကြိမ်များစွာ ဝင်ရောက်ခဲ့သော်လည်း နှလုံးသားကျောက်တုံး တစ်တုံးကိုပင် မရှာတွေ့နိုင်ခဲ့သည့် အကြိမ်များလည်း ရှိခဲ့သည်။

နှလုံးသားနယ်မြေ အတွင်းရှိ မိစ္ဆာများကိစ္စနှင့် ပတ်သက်၍မူ ချန်ဖေးက ဝိညာဉ်သတ်ဖြတ်ခြင်း ကျင့်စဉ်ကို အသုံးပြု၍ ဝိညာဉ်အနှစ်သာရများကို ထုတ်ယူရန် စမ်းသပ်ခဲ့ဖူးသည်။

သို့သော် ဤဝိညာဉ်အနှစ်သာရ များကို ချန်ဖေးက အနည်းငယ် အာရုံခံကြည့်ပြီးနောက် မိမိ၏ ခန္ဓာကိုယ်ထဲသို့ ပေါင်းစပ်ထည့်သွင်းမည့် အစီအစဉ်ကို လက်လျှော့ခဲ့ရသည်။

ပြင်ပလောကတွင် မိစ္ဆာသားရဲများကို ဖြစ်စေ၊ လူများကို ဖြစ်စေ၊ သို့မဟုတ် ထူးဆန်းသော အရာများကို ဖြစ်စေ သတ်ဖြတ်ပြီးနောက် ဝိညာဉ်သတ်ဖြတ်ခြင်း ကျင့်စဉ်ဖြင့် ရရှိလာသော ဝိညာဉ်အနှစ်သာရ များထဲတွင် စိတ်စွမ်းအား အပိုင်းအစ အနည်းငယ်မျှသာ ပါဝင်ပြီး ဝိညာဉ်လက်နက်များထဲသို့ ပေါင်းစပ်ထည့်သွင်းကာ အချင်းချင်း အထောက်အကူ ပြုစေသည်။

သို့သော် နှလုံးသားနယ်မြေ အတွင်းရှိ မိစ္ဆာများကို သတ်ဖြတ်ပြီးနောက် ရရှိလာသော ဝိညာဉ်အနှစ်သာရ များထဲတွင် အခြား မည်သည့်အရာမျှ မပါဝင်ဘဲ အဆုံးစွန် ရူးသွပ်မှုများသာ ပါဝင်နေသည်။

ဤအရာက နှလုံးသားနယ်မြေ အတွင်းရှိ နေရာအနှံ့ ပျံ့နှံ့နေသော ညစ်ညမ်းမှုများ၊ နှလုံးသားကျောက်တုံး များထဲရှိ စွမ်းအင်များနှင့် လုံးဝ ကွဲပြားခြားနားပေသည်။

နှလုံးသားနယ်မြေ အတွင်းရှိ မိစ္ဆာများတွင် ဤကဲ့သို့သော ဗီဇများသာ ကျန်ရှိနေပုံ ရသည်။ ဝိညာဉ်သတ်ဖြတ်ခြင်း ကျင့်စဉ်က နှလုံးသားနယ်မြေတွင် အနည်းငယ် အဆင်မပြေ ဖြစ်နေခြင်းကြောင့်လည်း ဖြစ်နိုင်သည်။

မည်သို့ပင်ဆိုစေ ဝိညာဉ်သတ်ဖြတ်ခြင်း ကျင့်စဉ်က အစပိုင်းတွင် စိတ်စွမ်းအား အပေါ် သက်ရောက်မှု မရှိနိုင်ခဲ့ချေ။

ချန်ဖေးက ပြီးပြည့်စုံခြင်း အဆင့်ထိ ကျင့်ကြံပြီးနောက် အရည်အသွေး ပြောင်းလဲမှုများ ဖြစ်ပေါ်လာကာ ချန်ဖေး အနေဖြင့် နတ်ဘုရား သတ်ဖြတ်ခြင်းဓား ပေါ်တွင် ပူးတွဲ၍ နှလုံးသားနယ်မြေ အတွင်း၌ အသုံးပြုနိုင်ခဲ့ခြင်း ဖြစ်သည်။

ချန်ဖေးက လက်ထဲရှိ ကျောက်စိမ်းစာလိပ်ကို ချထားလိုက်ပြီး နောက်ဆုံး ကျန်ရှိနေသော ကျောက်စိမ်းစာလိပ် နှစ်ခုကို ကောက်ယူကာ တစ်ပြိုင်နက်တည်း စတင် ဖြေရှင်းလိုက်သည်။

သို့သော် ဆယ့်ငါးမိနစ် အကြာတွင် ကျောက်စိမ်းစာလိပ် နှစ်ခုပေါ်ရှိ စိတ်စွမ်းအား ရစ်ပတ်မှုများကို ဖြေရှင်းနိုင်ခဲ့ပြီး ချန်ဖေးက အတွင်းရှိ အကြောင်းအရာများကို စူးစမ်း ရှာဖွေလိုက်သည်။

တစ်ခဏ အကြာတွင် ချန်ဖေးက ပြန်လည် ရုပ်သိမ်းလိုက်သည်။

ကျောက်စိမ်းစာလိပ် နှစ်ခုထဲတွင် ဂိုဏ်းကြီးများအတွင်း ပုန်းအောင်းနေသော မိုးမျှော်စင်၏ လူစာရင်း အများအပြားကို မှတ်တမ်းတင်ထားပြီး ယွမ်ချန်ဓားဂိုဏ်းတွင်ပင် ရှိနေသည်။

သို့သော် သူတို့၏ ရာထူးများက သာမန်မျှသာ ဖြစ်ပြီး အမြင့်ဆုံးမှာ အတွင်းတပည့် အဆင့်သို့သာ ရောက်ရှိနိုင်ကာ သတင်းအချို့ကို စုံစမ်းရန် သက်သက်သာ ဖြစ်သည်။

မည်သို့ပင်ဆိုစေ အစစ်အမှန်တပည့် အဆင့်သို့ ရောက်ရှိလာပါက စိတ်ပိုင်းဆိုင်ရာ စမ်းသပ်မှုများကို ဖြတ်သန်းရမည် ဖြစ်ရာ အောင်မြင်နိုင်ခြေ လုံးဝ မရှိသလောက်ပင် ဖြစ်သည်။

ချန်ဖေးက လူအနည်းငယ်၏ နာမည်များကို မှတ်သားထားလိုက်ပြီး နောက်ပိုင်းတွင် ဂိုဏ်းချုပ် ချွီချင်းရှန်းကို သတင်းပို့လိုက်လျှင် အဆင်ပြေပေမည်။

ချန်ဖေးသည် ချွီချင်းရှန်း အနေဖြင့်လည်း ဂိုဏ်းအတွင်း မည်သည့် သူလျှိုများ ရှိနေသနည်း ဆိုသည်ကို အလွန် ရှင်းလင်းစွာ သိရှိထားလိမ့်မည်ဟု ထင်သည်။

မြောင်ချီရှန်း၏ စာကြည့်ခန်းထဲမှ ရရှိခဲ့သော ကျောက်စိမ်းစာလိပ်များ အားလုံးကို ဖောက်ထွင်းပြီးစီးသွားပြီ ဖြစ်ရာ ချန်ဖေးက မြောင်ချီရှန်း၏ ဒိုင်ယာရီ မှတ်တမ်းတင်ထားသော ကျောက်စိမ်းစာလိပ်ကို ကောက်ယူလိုက်ပြီး နောက်ဆုံး အကြောင်းအရာများမှ စတင် ဖတ်ရှုလိုက်သည်။

တစ်နာရီ ကြာပြီးနောက် ချန်ဖေးက လက်ထဲရှိ ကျောက်စိမ်းစာလိပ်ကို ချထားလိုက်ရာ သူ၏ မျက်နှာပေါ်တွင် အပြုံးတစ်ခု အလိုအလျောက် ပေါ်လာခဲ့ပြီ ဖြစ်သည်။

အစောက ချန်ဖေး ခန့်မှန်းခဲ့သည့်အတိုင်း မြောင်ချီရှန်း၏ စိတ်စွမ်းအား တဟုန်ထိုး တိုးတက်လာရခြင်း၏ အကြောင်းရင်းမှာ အမှန်တကယ်ပင် နှလုံးသားနယ်မြေ အတွင်း၌ ရှိနေပြီး ထိုအစီအရင်၏ လုပ်ဆောင်ချက်မှာ နှလုံးသားနယ်မြေရှိ မိစ္ဆာများကို သတ်ဖြတ်ပြီးနောက် သန့်စင်ရန် အသုံးပြုခြင်း ဖြစ်သည်။

သန့်စင်ပြီးနောက် ရရှိလာသော မိစ္ဆာ မူလအစစွမ်းအင်များကို စိတ်စွမ်းအားထဲသို့ စုပ်ယူနိုင်ပြီး စိတ်စွမ်းအား ကြီးထွားမှုကို ကူညီပေးနိုင်သည်။

သို့သော် ဤနှလုံးသား မိစ္ဆာများ၏ မူလအစစွမ်းအင်များကို စုပ်ယူရာတွင် အားနည်းချက် တစ်ခု ရှိပြီး မူလအစစွမ်းအင်များက မသန့်စင်ဘဲ မိမိ၏ စိတ်ကို ညစ်ညမ်းစေရန် အလွန် လွယ်ကူခြင်း ဖြစ်သည်။

နှလုံးသား မိစ္ဆာများ၏ မူလအစစွမ်းအင်များထဲရှိ ရူးသွပ်မှုများက အနည်းငယ် ပေါ့ဆမိပါက စိတ်ကို တိုက်ရိုက် ပြိုကျသွားစေပြီး လမ်းလျှောက်နေသော အလောင်းကောင် တစ်လောင်း အဖြစ်သို့ ပြောင်းလဲသွားစေနိုင်သည်။

မြောင်ချီရှန်း၏ ဖြေရှင်းနည်းမှာ အားနည်းသော နှလုံးသား မိစ္ဆာများကို သတ်ဖြတ်ရန် ဖြစ်ပြီး ထိုမြေပုံတွင် မှတ်တမ်းတင်ထားသည်များမှာ အားနည်းသော နှလုံးသား မိစ္ဆာများ ရှိရာ နေရာအချို့ ဖြစ်သည်။

နှလုံးသား မိစ္ဆာများ အားနည်းသောကြောင့် သန့်စင်ပြီးနောက် မိစ္ဆာများအတွင်း ပါဝင်သော ရူးသွပ်မှုများကလည်း သဘာဝကျကျ များစွာ အားနည်းသွားမည် ဖြစ်သည်။

အချိန်အတိုင်းအတာ တစ်ခုအထိ ချေဖျက်ပြီးနောက် တိတ်ဆိတ်သော အန္တရာယ်များကို ယေဘုယျအားဖြင့် ဖယ်ရှားပစ်နိုင်သည်။

မြောင်ချီရှန်းကလည်း ဤအစီအရင် အပေါ် သူ၏ နားလည်သဘောပေါက်မှုကို အဆက်မပြတ် တိုးတက်အောင် လုပ်ဆောင်နေခဲ့ပြီး အစီအရင် နားလည်သဘောပေါက်မှု မြင့်မားလေလေ သန့်စင်နိုင်စွမ်း မြင့်မားလေလေ ဖြစ်ကာ နှလုံးသား မိစ္ဆာများ၏ မူလအစစွမ်းအင် များထဲတွင် ရူးသွပ်မှုများ ကျန်ရစ်မှု နည်းပါးလေလေ ဖြစ်သည်။

ထိုမျှသာမက အကယ်၍ စွမ်းရည် လုံလောက်ပါက အစီအရင် နှစ်ခုကို တစ်ပြိုင်နက်တည်း ချထားပြီး အစီအရင် တစ်ခုအတွင်း အစီအရင် တစ်ခု ထပ်မံ ထည့်သွင်းထားပါက သန့်စင်နိုင်စွမ်းကို သိသိသာသာ တိုးမြှင့်ပေးနိုင်သည်။

မြောင်ချီရှန်းက ဤအရာကို အမြဲတမ်း ရည်မှန်းချက်ထားပြီး အစီအရင်ကို ဆက်လက် လေ့ကျင့်နေခဲ့သည်။

ထို့ကြောင့် ကျောက်စိမ်းစာလိပ် အတွင်း၌ မြောင်ချီရှန်းက သူ၏ အစီအရင် အပေါ် နားလည်သဘောပေါက်မှုများကို ရံဖန်ရံခါ မှတ်တမ်းတင်ထားလေ့ ရှိပြီး ဤအစီအရင်ကို တတ်နိုင်သမျှ အမြန်ဆုံး အပြည့်အဝ ထိန်းချုပ်နိုင်ရန်သာ ဖြစ်သည်။

ကံမကောင်းစွာဖြင့် အစီအရင်များ ပိုင်းတွင် မြောင်ချီရှန်း၏ ပါရမီက မဆိုးလှသော်လည်း သာမန် အဆင့်တွင်သာ ရှိနေသေးသည်။

ထို့အပြင် ဤစိတ်ဝိညာဉ် သန့်စင်ရေး အစီအရင်၏ ပြင်ဆင်မှု နည်းလမ်းများက သာမန် အစီအရင်များနှင့် အနည်းငယ် ကွာခြားမှု ရှိသဖြင့် မြောင်ချီရှန်း အနေဖြင့် ရံဖန်ရံခါသာ တိုးတက်မှု အချို့ ရှိခဲ့သည်။

"အစီအရင် နှစ်ခုလား... အကယ်၍ ဒီစိတ်ဝိညာဉ် သန့်စင်ရေး အစီအရင်ကို ပြီးပြည့်စုံခြင်း အဆင့်ထိ ကျင့်ကြံနိုင်ရင်... အထပ် ဘယ်နှစ်ထပ် ထပ်လို့ ရမလဲ..."

ချန်ဖေးက စိတ်ဝိညာဉ် သန့်စင်ရေး အစီအရင်၏ ကျောက်စိမ်းစာလိပ်ကို ကောက်ယူ၍ သေချာစွာ လေ့လာကြည့်လိုက်ရာ တစ်နာရီ အကြာတွင် စနစ်ပြားပေါ်၌ စိတ်ဝိညာဉ် သန့်စင်ရေး အစီအရင်၏ အချက်အလက်များ ပေါ်လာ၏။

"အစီအရင် တစ်ခုကို တွေ့ရှိပါသည်... ဝိညာဉ်ကျောက်တုံး ၁၆ တုံး အသုံးပြု၍ စိတ်ဝိညာဉ် သန့်စင်ရေး အစီအရင်ကို ရိုးရှင်းအောင် ပြုလုပ်မည်လား..."

"စိတ်ဝိညာဉ် သန့်စင်ရေး အစီအရင်ကို ရိုးရှင်းအောင် ပြုလုပ်နေပါသည်... ရိုးရှင်းအောင် ပြုလုပ်ခြင်း အောင်မြင်ပါသည်... စိတ်ဝိညာဉ် သန့်စင်ရေး အစီအရင်မှ အစီအရင် ပုံကြမ်းဆွဲခြင်းသို့..."

ရိုးရှင်းအောင် ပြုလုပ်ရန် ကုန်ကျစရိတ်က ချန်ဖေး မျှော်လင့်ထားသည်ထက် အနည်းငယ် ကျော်လွန်နေ၏။

ချန်ဖေး ရိုးရှင်းအောင် ပြုလုပ်ခဲ့သော ယွမ်ချန်ဓားဂိုဏ်း၏ ကျင့်စဉ် အနည်းငယ်တွင် မည်သည့် အရာကမျှ ဤကုန်ကျစရိတ်ထက် မကျော်လွန်ခဲ့ချေ။

ဤအချက်ကို ကြည့်ခြင်းအားဖြင့် ဤစိတ်ဝိညာဉ် သန့်စင်ရေး အစီအရင်ကို ကျွမ်းကျင်ရန် ခက်ခဲမှုက အမှန်တကယ်ပင် အလွန် မြင့်မားကြောင်း တွေ့မြင်နိုင်ပြီး ပြည့်စုံသော အမွေအနှစ် တစ်ခုကို ကျင့်ကြံခြင်းနှင့် နှိုင်းယှဉ်၍ မရနိုင်တော့သလို မည်သို့ လွယ်ကူနိုင်မည်နည်း။

ချန်ဖေး၏ အသိစိတ်ပင်လယ် အတွင်း၌ ဝိညာဉ်ကြိုးမျှင် ကျင့်စဉ်က အနည်းငယ် တုန်ခါသွားပြီး စိတ်စွမ်းအားများကို ကြိုးမျှင် ရာဂဏန်းခန့် အဖြစ် ခွဲခြားလိုက်ကာ လေထဲတွင် စိတ်ဝိညာဉ် သန့်စင်ရေး အစီအရင်၏ ပုံကြမ်းကို စတင် ရေးဆွဲတော့သည်။

လက်ဖြင့် ရေးဆွဲခြင်းနှင့် နှိုင်းယှဉ်ပါက စိတ်စွမ်းအား ကြိုးမျှင် ရာဂဏန်းခန့်ဖြင့် တစ်ပြိုင်နက်တည်း ရေးဆွဲခြင်း၏ စွမ်းဆောင်ရည်ကို မည်သို့ နှိုင်းယှဉ်နိုင်မည်နည်း။

စိတ်ဝိညာဉ် သန့်စင်ရေး အစီအရင်၏ ရှုပ်ထွေးမှုမှာ အစီအရင်၏ အသေးစိတ် အချက်အလက်များ ဖြစ်ပြီး အစီအရင် ပုံကြမ်းမှာမူ အနည်းငယ်မျှ မရှုပ်ထွေးချေ။

ထို့ကြောင့် ချန်ဖေးက ဤသို့ တစ်ပြိုင်နက်တည်း အသုံးပြုရခြင်း ဖြစ်ပြီး ဘယ်နှင့် ညာ လက်နှစ်ဖက်ဖြင့် တစ်ပြိုင်နက်တည်း စက်ဝိုင်း ရေးဆွဲနေရခြင်းနှင့် အတူတူပင် ဖြစ်သည်။

မျက်တောင်တစ်ခတ် အတွင်းမှာပင် စိတ်စွမ်းအားဖြင့် ရေးဆွဲထားသော အစီအရင် ပုံကြမ်းက တစ်ကြိမ် ပြီးစီးသွားခဲ့ပြီး တစ်ခဏချင်းမှာပင် နားလည်သဘောပေါက်မှု ရာဂဏန်းခန့်က ချန်ဖေး၏ စိတ်ထဲတွင် ပေါ်လာသဖြင့် ချန်ဖေး အနေဖြင့် မျက်လုံးများကို မှိတ်၍ ဤနားလည်သဘောပေါက်မှုများကို တစ်ခုပြီးတစ်ခု စုပ်ယူလိုက်ရတော့သည်။