အခန်း ၇၈၁

အခန်း (၇၈၁) - မြေကမ္ဘာအင်မော်တယ် တာအိုအသီးကို စားသုံးခြင်း၊ အင်မော်တယ်သလင်းကျောက် သုံးထောင်နှင့် ဖူးစာရေးကြယ်လှုပ်ခတ်ခြင်း(၁)။

"အကယ်လို့ မကောင်းဆိုးဝါး အငွေ့အသက်တွေသာ ပိုပြီး ပြင်းထန်လာမယ်ဆိုရင် မိစ္ဆာကပ်ဘေးကြီးတစ်ခု ဖြစ်မလာနိုင်ဘူးလား...”

ကျိုးစွေ့က သူ၏မေးစေ့ကို ပွတ်သပ်လိုက်၏။

ဤအိပ်မက်ကမ္ဘာအတွင်း၌ အချိန်တိုင်းလိုလိုပင် များပြားလှသော အတွေးများနှင့် မကောင်းဆိုးဝါး အငွေ့အသက်များ စိမ့်ဝင်နေသည်ကို သူ ခံစားမိလေသည်။ ၎င်းမှာ အမှိုက်ပုံကြီးတစ်ခုကဲ့သို့ ရေတွက်မရနိုင်သော နှစ်ပေါင်းများစွာကတည်းက စုပုံနေခဲ့သည့် မကောင်းဆိုးဝါး အငွေ့အသက်များပင် ဖြစ်၏။

ဤမျှ ကြီးမားလှသော မကောင်းမှု၊ မိစ္ဆာစိတ်နှင့် နာကြည်းချက်များကြောင့်ပင် ကောင်းကင်မိစ္ဆာများကို တစ်ကောင်ပြီးတစ်ကောင် ပေါက်ဖွားလာစေခြင်း ဖြစ်ပေ၏။ ထိုကောင်းကင်မိစ္ဆာများသည်လည်း ဤမကောင်းဆိုးဝါး အငွေ့အသက်များကို မရပ်မနား စုပ်ယူနေကြပြီး ၎င်းတို့၏ စွမ်းအားများကို ရူးသွပ်စွာ ကြီးထွားလာစေကြသည်။

အကယ်၍ ကျင့်ကြံသူတစ်ဦးဦးသာ ကပ်ဘေးဖြတ်ကျော်မည်ဆိုပါက ကောင်းကင်ကပ်ဘေး ကျရောက်လာမှုကြောင့် လေဟာနယ်များ အက်ကွဲသွားမည်ဖြစ်ပြီး၊ ထိုအချိန်တွင် များစွာသော ကောင်းကင်မိစ္ဆာများသည် ဤကမ္ဘာမှနေ၍ အခွင့်ကောင်းယူကာ လွတ်မြောက်သွားနိုင်ပေသည်။ ထို့နောက် လူ့လောကကို ဖျက်ဆီးကာ အခြားသော သက်ရှိများ၏ ခန္ဓာကိုယ်များကို လုယူကြမည် ဖြစ်၏။

ကောင်းကင်မိစ္ဆာများ၏ အရေအတွက်သည် အတိုင်းအတာတစ်ခုအထိ စုပုံလာပါက မိစ္ဆာကပ်ဘေးတစ်ခု ဖြစ်ပေါ်လာပြီး လောကတစ်ခွင်လုံးကို ဖုံးလွှမ်းသွားမည်မှာ သံသယဖြစ်ဖွယ်မရှိပေ။

“ဒီမကောင်းဆိုးဝါး အငွေ့အသက်တွေထဲမှာ အချို့က ကျင့်ကြံသူတွေဆီက လာတာပဲ…”“အချို့ကတော့ သာမန်လူတွေဆီကပဲ…”

“သူတို့တွေ သေဆုံးပြီး ဝိညာဉ်တွေ ပြိုကွဲသွားရင်တောင် မကောင်းတဲ့စိတ်အခံနဲ့ စွဲလမ်းမှုတွေကတော့ ထာဝရ တည်ရှိနေခဲ့တယ်…”

“သေခါနီးမှာ နာကြည်းမှုပိုများတဲ့ ဝိညာဉ်တွေက ကောင်းကင်မိစ္ဆာအဖြစ် ပြောင်းလဲသွားဖို့ အခွင့်အရေးပိုများတယ်…”

ကျိုးစွေ့က မျက်လုံးများကို မှေးကျဉ်းလိုက်လေသည်။

အိပ်မက်ကမ္ဘာမှ သက်ရှိများနှင့် ကောင်းကင်မိစ္ဆာများသည် အမှန်တကယ်တမ်း အခြေခံသဘောတရားချင်း တူညီနေပြီး ၎င်းတို့နှစ်ခုစလုံးမှာ မျိုးစိတ်တစ်ခုတည်းအောက်တွင် အကျုံးဝင်သည်ကို သူ ခံစားလိုက်ရ၏။

သို့သော် ကောင်းကင်မိစ္ဆာများက ပိုမို ဆိုးယုတ်ကြပြီး မကောင်းဆိုးဝါး အငွေ့အသက် သက်သက်ဖြင့်သာ ပေါက်ဖွားလာကြခြင်း ဖြစ်ပေသည်။

လူသားများထဲတွင် လူကောင်းများ ရှိနိုင်သော်လည်း၊ ကောင်းကင်မိစ္ဆာများထဲတွင်မူ မိစ္ဆာကောင်းဟူ၍ လုံးဝ မရှိနိုင်ပေ။ ဤသည်မှာ ၎င်းတို့၏ သက်ရှိဖြစ်တည်မှု အခြေခံသဘာဝက သတ်မှတ်ထားခြင်းပင် ဖြစ်လေသည်။

ဝုန်း...။

ထိုအချိန်တွင် ကျိုးစွေ့သည် အိပ်မက်ကမ္ဘာမှနေ၍ ရုန်းထွက်လာခဲ့ပြီး လက်တွေ့ကမ္ဘာဆီသို့ ပြန်လည်ရောက်ရှိလာခဲ့လေ၏။ အစောပိုင်းက မြင်ကွင်းသည် သူ့အတွက် အနည်းအကျဉ်းမျှမဟုတ်သော တုန်လှုပ်မှုကို အမှန်တကယ် ဆောင်ကြဉ်းပေးခဲ့သည်။ ၎င်းက ဤကမ္ဘာလောကနှင့် ပတ်သက်၍ သူ့အား ပိုမိုနက်ရှိုင်းသော နားလည်သဘောပေါက်မှုများကိုလည်း ရရှိစေခဲ့၏။

‘ဒီမြေကမ္ဘာအင်မော်တယ် တာအိုအသီးကို မင်းက စားချင်နေတာလား…’

ကျိုးစွေ့က စိတ်ထဲတွင် တွေးလိုက်ရင်း သူ၏ခန္ဓာကိုယ်ပေါ်ရှိ မြေကမ္ဘာအင်မော်တယ် တာအိုအသီးကို ထုတ်ယူကာ ‘နဂါးဆင်ကူ’ထံသို့ ပေးအပ်လိုက်လေသည်။

ဂလု…။

‘နဂါးဆင်ကူ’သည် အလွန်စိတ်လှုပ်ရှားနေပြီး မြေကမ္ဘာအင်မော်တယ် တာအိုအသီးကို ဂျယ်လီတစ်ခဲ စားလိုက်သကဲ့သို့ တစ်လုပ်တည်းဖြင့် ဝါးမျိုလိုက်၏။

ဝုန်း...။

ချက်ချင်းပင် မြေကမ္ဘာအင်မော်တယ်စွမ်းအင် အမျှင်တန်းများသည် ‘နဂါးဆင်ကူ’၏ ခန္ဓာကိုယ်အတွင်းသို့ စက္ကန့်ပိုင်းအတွင်း ဝင်ရောက်သွားပြီး ‘နဂါးဆင်ကူ’၏ စွမ်းအားကို လျင်မြန်စွာ တိုးတက်လာစေရန် ကူညီပေးလေ၏။

'ဆဌမအဆင့်ကို တက်လှမ်းဖို့ နီးစပ်နေပြီ ထင်တယ်...’

'ဒါပေမဲ့ အချိန်အတိုင်းအတာတစ်ခုတော့ လိုအပ်သေးတာပဲ...’

မြေကမ္ဘာအင်မော်တယ် တာအိုအသီးတွင် စိတ်ကူးယဉ်နိုင်စွမ်းထက် ကျော်လွန်နေသော ကြီးမားလှသည့် စွမ်းအင်များ ပါဝင်နေသည်မှာ အသေအချာပင် ဖြစ်သော်လည်း၊ ဤစွမ်းအင်များကို ချေဖျက်ရန်မှာမူ နေ့ချင်းညချင်း ဖြစ်လာနိုင်မည့် ကိစ္စမဟုတ်ကြောင်း ကျိုးစွေ့ ခံစားသိရှိနေသည်။

၎င်းကို ပြီးမြောက်ရန်အတွက် သေချာပေါက် အချိန်ကြာမြင့်စွာ လိုအပ်ပေလိမ့်မည်။ သို့သော် မည်သို့ပင်ဆိုစေကာမူ ‘နဂါးဆင်ကူ’၏ ဆင့်ကဲပြောင်းလဲမှု အမြန်နှုန်းကို သေချာပေါက် အရှိန်မြှင့်တင်ပေးနိုင်မည် ဖြစ်လေ၏။

ယခုအချိန်မှစ၍ ‘နဂါးဆင်ကူ’အနေဖြင့် မိစ္ဆာသားရဲများ၏ သွေးသားများကို များများစားစား ဝါးမျိုရန် မလိုအပ်တော့ချေ။ မြေကမ္ဘာအင်မော်တယ် တာအိုအသီး၏ စွမ်းအင်သက်သက်ဖြင့်ပင် အချိန်ကာလတစ်ခုအထိ ၎င်း၏ အစားအစာလိုအပ်ချက်ကို ဖြည့်ဆည်းပေးရန် လုံလောက်နေပြီ ဖြစ်၏။

နောက်ထပ် အချိန်အတိုင်းအတာတစ်ခု ကြာမြင့်ပြီးနောက်တွင် ၎င်းသည် ဆဌမအဆင့်သို့ အမှန်တကယ် လှမ်းတက်နိုင်လိမ့်မည်ဖြစ်ကြောင်း ခန့်မှန်းရပေသည်။

'နှမြောစရာပဲ၊ ဒီချီလေ့အင်မော်တယ်ရဲ့ မှတ်ဉာဏ်တွေကို မရလိုက်ဘူး...’

'ဒီလိုမှမဟုတ်ရင် အင်မော်တယ်ကမ္ဘာနဲ့ ပတ်သက်တဲ့ အချက်အလက်တချို့ကို သေချာပေါက် သိနိုင်မှာပဲ...’

ကျိုးစွေ့မှာ အနည်းငယ် နှမြောတသ ဖြစ်သွားမိသည်။

မူလက ‘အိပ်မက်ဝိညာဉ်ကူ’သည် ချီလေ့အင်မော်တယ်၏ ဝိညာဉ်ကို ဝါးမျိုပြီးနောက် ၎င်း၏ မှတ်ဉာဏ်များကို ရရှိနိုင်မည်ကို သူ ထင်မှတ်ထားခဲ့ခြင်း ဖြစ်၏။ သို့သော် ထိုသူသည် အလွန်အမင်း ရက်စက်ပြတ်သားလွန်းလှရာ သေဆုံးခါနီးအချိန်တွင် သူ၏ မှတ်ဉာဏ်များကို အပြီးတိုင် ဖျက်ဆီးပစ်ခဲ့ပြီး အားလုံးကို ရှင်းလင်းပစ်ခဲ့လေသည်။

ထို့ကြောင့် ဤအင်မော်တယ်ဝိညာဉ်အကြွင်းအကျန်ကို ဝါးမျိုနိုင်ခဲ့လျှင်ပင် ချီလေ့အင်မော်တယ်နှင့် ပတ်သက်၍သော်လည်းကောင်း၊ အင်မော်တယ်ကမ္ဘာနှင့် ပတ်သက်သည့် အမျိုးမျိုးသော သတင်းအချက်အလက်များနှင့် ထောက်လှမ်းရေးသတင်းများကိုသော်လည်းကောင်း မည်သို့မျှ ရယူနိုင်စွမ်း မရှိခဲ့ပေ။

သို့သော် သူသည် ခဏမျှသာ နှမြောတသဖြစ်ခဲ့ပြီး ထိုခံစားချက်ကို ချက်ချင်းပင် ဖယ်ရှားပစ်လိုက်လေသည်။ အဘယ်ကြောင့်ဆိုသော် သူ၏အမြင်တွင် ယခုလက်ရှိ အင်မော်တယ်ကမ္ဘာ၏ သတင်းအချက်အလက်များသည် အထူးအဆန်း ကောလာဟလအမျိုးမျိုးနှင့်သာ တူညီနေသောကြောင့် ဖြစ်၏။

လက်ရှိအချိန်ရှိ သူ့အတွက်လည်း ကြီးမားသော အကူအညီများစွာ မပေးနိုင်ပေ။ ထိုသို့သော ကောလာဟလများနှင့် ပတ်သက်၍ မသိရှိထားလျှင်ပင် အမှန်တကယ်တမ်း ပြဿနာ သိပ်မကြီးမားလှချေ။

'အခု ဖုန်းရှီးမြို့တော်ကို ပြန်သွားသင့်လား...’

'အင်း... ‘ကံကြမ္မာကူ’ရဲ့ သတင်းအချက်အလက်တွေအရ ဆိုရင်တော့ အခုအချိန်က ဖုန်းရှီးမြို့တော်ကို ပြန်ဖို့ မသင့်တော်သေးဘူး...’

'မိုးကြိုးတောင်တန်းက အရမ်းကို ကမောက်ကမဖြစ်နေတယ်။ ဒီအချိန်သာ ပြန်သွားမယ်ဆိုရင် ပြဿနာတွေနဲ့ ကြုံတွေ့ရနိုင်တယ်...’

'ပြီးတော့ ဒီမှာဆက်နေမယ်ဆိုရင် ကံကောင်းတဲ့ အခွင့်အလမ်းတွေ ရနိုင်သေးတယ်...’

ကျိုးစွေ့သည် မျက်လုံးများကို မှေးကျဉ်းလိုက်လေ၏။

‘ကံကြမ္မာကူ’ထံမှ ပေးပို့လာသော သတင်းအချက်အလက် အမျှင်တန်းများကို သူ ခံစားလိုက်ရသည်။ ယခုတစ်ကြိမ် သူ၏ကံကောင်းမှု အခွင့်အလမ်းမှာ လုံးဝ ပြီးဆုံးသွားခြင်း မရှိသေးသည်မှာ ထင်ရှားပေသည်။

အကယ်၍ ဤနေရာတွင်သာ ဆက်နေမည်ဆိုပါက နောက်ထပ် အကျိုးအမြတ်များစွာကို ရရှိနိုင်သေးသည်။ ထွက်ခွာသွားမည်ဆိုပါက အခြားသော မျိုးနွယ်စုဝင် သက်ရှိများ၏ တားဆီးပိတ်ဆို့မှုများနှင့် ကြုံတွေ့ရနိုင်ပေသည်။

ထို့ထက်မက အခြားသော လူသားမျိုးနွယ် ကျင့်ကြံသူများ၏ လောဘတကြီး မျက်စိကျခံရခြင်းကိုလည်း ကြုံတွေ့ရနိုင်သေး၏။ ထိုအချိန်ကျလျှင် အကျိုးအမြတ်များစွာ မရရှိနိုင်မည့်အပြင် မိမိကိုယ်ကိုပင် ဖော်ထုတ်မိသကဲ့သို့ ဖြစ်သွားကာ ကပ်ဘေးများစွာနှင့် ကြုံတွေ့ရပေလိမ့်မည် ဖြစ်၏။ ထိုသို့ဖြစ်မည့်အစား ဤနေရာတွင် ဆက်နေခြင်းက ပို၍ ကောင်းမွန်ပေသည်။

............

နောက်ထပ် ရက်အနည်းငယ် ကြာမြင့်သွားခဲ့လေ၏။

မိုးကြိုးအင်မော်တယ်စံအိမ်မှ ရတနာများသည် အရပ်လေးမျက်နှာသို့ လွင့်စင်ထွက်သွားသည်နှင့်အမျှ မိုးကြိုးတောင်တန်း၏ နေရာအနှံ့အပြားတွင် ရတနာများ ပြည့်နှက်နေခဲ့သည်မှာ ထင်ရှားပေသည်။

ဤရတနာများကို လုယူရန်အတွက် အင်အားကြီး မျိုးနွယ်စုအသီးသီးမှ ကျင့်ကြံသူများသည် အချင်းချင်း လုံးထွေးတိုက်ခိုက်လာကြတော့သည်။ အခြေခံအားဖြင့် မိုးကြိုးတောင်တန်း၏ နေရာအနှံ့အပြားမှ ပြင်းထန်လှသော တိုက်ပွဲအသံများ ထွက်ပေါ်လာနေခဲ့၏။

နတ်ဘုရားအသွင်ပြောင်းအဆင့် အရှင်သခင်များနှင့် လေဟာနယ်သန့်စင်ခြင်းအဆင့် ဘိုးဘေးများသာမကဘဲ၊ ခန္ဓာပေါင်းစည်းခြင်းအဆင့် ကျွမ်းကျင်သူများပင်လျှင် ထိုနည်းတူပင် ဖြစ်လေသည်။

အချို့သော ခန္ဓာပေါင်းစည်းခြင်းအဆင့် ကျွမ်းကျင်သူများသည် ပြိုင်ဘက်ကို မယှဉ်နိုင်ဘဲ မိုးကြိုးတောင်တန်းတွင် သွေးမြေကျကာ ဤနေရာ၌ပင် ကျဆုံးသွားခဲ့ကြရသည်။ တောင်ကုန်းကြီးများစွာ ပြိုကျပျက်စီးသွားကြသလို၊ မြေကြီးများ အက်ကွဲသွားပြီး မြည်ဟည်းသံများ ထွက်ပေါ်နေခဲ့၏။

ကောင်းကင်နှင့်မြေကြီး မှောက်ခုံလန်သွားသကဲ့သို့ တောင်တန်းမြစ်ချောင်းများ ပျက်စီးသွားပြီး မရေမတွက်နိုင်သော သေဆုံးဒဏ်ရာရမှုများ ဖြစ်ပေါ်နေခဲ့ခြင်းပင်။

ရက်အနည်းငယ်မျှ အချိန်အတွင်းမှာပင် ဤနေရာ၌ ကျင့်ကြံသူ မည်မျှကျဆုံးသွားခဲ့သည်ကို မည်သူမျှ မသိနိုင်တော့ချေ။

ရွှီး...။

အပြာရောင် အမွေးအမျှင်များရှိသော လေကျားသစ်မျိုးနွယ်မှ လေဟာနယ်သန့်စင်ခြင်းအဆင့် အစောပိုင်း ကျင့်ကြံသူတစ်ဦးသည် တောအုပ်အတွင်း၌ လျင်မြန်စွာ ထွက်ပြေးနေခဲ့သည်။ ၎င်းသည် အပြာရောင် မိစ္ဆာလေဆင်နှာမောင်းကို စီးနင်းကာ ဤနေရာမှ လွတ်မြောက်ရန် ကြိုးစားနေခြင်း ဖြစ်၏။

သို့သော် ၎င်း၏ ခန္ဓာကိုယ်ပေါ်တွင် ပြည့်နှက်နေသော ဒဏ်ရာများနှင့် သွေးများ ယိုစီးနေသည်ကို ကြည့်ခြင်းအားဖြင့် ယခင်က အနည်းအကျဉ်းမျှမဟုတ်သော ဒဏ်ရာများ ရရှိထားခဲ့သည်မှာ ထင်ရှားပေသည်။

၎င်း၏နောက်တွင်မူ မြွေပျံမျိုးနွယ်မှ လေဟာနယ်သန့်စင်ခြင်းအဆင့် ကျင့်ကြံသူ ငါးဦး ရှိနေလေ၏။ ၎င်းတို့သည် လုံးဝကို အရှုံးမပေးဘဲ အနောက်မှ ထပ်ကြပ်မကွာ လိုက်လံဖမ်းဆီးနေကြခြင်းပင်။

"ပေါက်ချင်းရှု... မင်း ရထားတဲ့ ရတနာတွေကို ချက်ချင်း ထုတ်ပေးလိုက်စမ်း။ ဒါဆို မင်းကို အသက်ချမ်းသာပေးမယ်...”

မြွေပျံမျိုးနွယ် လေဟာနယ်သန့်စင်ခြင်းအဆင့် ကျင့်ကြံသူတစ်ဦးက အော်ဟစ်လိုက်လေသည်။

၎င်းတို့အနေဖြင့် ဤလေကျားသစ်မျိုးနွယ် လေဟာနယ်သန့်စင်ခြင်းအဆင့် ကျင့်ကြံသူအား လိုက်လံသတ်ဖြတ်နေရခြင်းမှာ တစ်ဖက်လူသည် မိုးကြိုးအင်မော်တယ်စံအိမ်မှ ထွက်ပေါ်လာသော အာကာသလက်စွပ်တစ်ကွင်းကို ရရှိသွားသောကြောင့်ပင် ဖြစ်၏။

ထိုအာကာသလက်စွပ်ထဲတွင် မည်မျှများပြားသော ရတနာများ သိမ်းဆည်းထားသည်ကိုမူ မည်သူမျှ မသိနိုင်ချေ။ ၎င်းသည် များစွာသော လေဟာနယ်သန့်စင်ခြင်းအဆင့် ဘိုးဘေးများကိုပင် တံတွေးမျိုချရလောက်သည်အထိ လောဘတက်စေရန် လုံလောက်ပေသည်။

ထို့ကြောင့် မည်သို့ပင်ဖြစ်စေကာမူ ၎င်းတို့သည် ဤလေကျားသစ်မျိုးနွယ် လေဟာနယ်သန့်စင်ခြင်းအဆင့် ကျင့်ကြံသူ အာကာသလက်စွပ် ယူဆောင်သွားသည်ကို ဒီအတိုင်း လွှတ်ပေးထားမည် မဟုတ်ပေ။

မှန်ပေသည်၊ ဤကဲ့သို့သော ကိစ္စရပ်များသည် မိုးကြိုးတောင်တန်းအတွင်း၌ မကြာခဏ ဖြစ်ပွားလေ့ရှိ၏။ ရတနာရရှိသွားရုံဖြင့် အရာအားလုံး အဆင်ပြေသွားပြီဖြစ်ကြောင်း ဆိုလိုခြင်း မဟုတ်ပေ။

အကယ်၍ အခြားသူများ၏ တွေ့ရှိခြင်းကို ခံရပါက ရတနာကို ဆက်လက်ထိန်းသိမ်းထားနိုင်ခြင်း ရှိမရှိဆိုသည်မှာ မိမိ၏ ကိုယ်ပိုင်စွမ်းရည်အပေါ်တွင်သာ မူတည်နေလေသည်။