အခန်း ၇၈၄

အခန်း (၇၈၄) - မြေကမ္ဘာအင်မော်တယ် တာအိုအသီးကို စားသုံးခြင်း၊ အင်မော်တယ်သလင်းကျောက် သုံးထောင်နှင့် ဖူးစာရေးကြယ်လှုပ်ခတ်ခြင်း(၄)။

ရွှေဝက်ဝံမျိုးနွယ်စုသည် မိုးကြိုးတောင်တန်းတွင် နာမည်ကျော်ကြားလှသော မျိုးနွယ်စု ဖြစ်ပေသည်။ ၎င်းတို့သည် အင်အား ကြီးမားရုံသာမက အရေပြားမှာလည်း ထူထဲလှ၏။

ဂန်းသတ္တုချီကို ကျွမ်းကျင်စွာ အသုံးချနိုင်ပြီး ခန္ဓာကိုယ်မှာလည်း စိန်ခန္ဓာကဲ့သို့ပင် ဓားမခ၊ လှံမတိုးပေ။ သာမန် မန္တန်များနှင့် ဓားချီများသည် ၎င်းတို့၏ ခန္ဓာကိုယ်ပေါ် ကျရောက်သည့်တိုင် မည်သည့် ထိခိုက်မှုမျှမရှိဘဲ ပုရွက်ဆိတ်ကိုက်သလောက်ပင် မခံစားရချေ။

မည်သည့်မျိုးနွယ်စုမဆို ရွှေဝက်ဝံမျိုးနွယ်စုနှင့် ရင်ဆိုင်ရလျှင် ခေါင်းခဲရလေ့ ရှိ၏။ အဘယ်ကြောင့်ဆိုသော် ၎င်းတို့၏ တိုက်ခိုက်ရေးစွမ်းရည်မှာ အလွန်အမင်း မြင့်မားသောကြောင့် ဖြစ်ပေသည်။

အထူးသဖြင့် ၎င်းတို့ ဒေါသထွက်လာလျှင် မည်သူမျှ တားဆီးနိုင်ခြင်း မရှိချေ။ သာမန် ကျင့်ကြံသူများကို မျက်စိတစ်မှိတ်အတွင်း ဆွဲဖြတ်ပစ်နိုင်ပြီး လူသားမျိုးနွယ်အတွက် ကြောက်မက်ဖွယ် လက်နက်ကြီးများသဖွယ် ဖြစ်လေသည်။

"ဘယ်လိုလုပ်ပြီး ဒီလောက်တောင် မြန်နေရတာလဲ...”

ဟွားစစ်ချင်မှာ ထိတ်လန့်သွားပြီး မျက်နှာမှာလည်း အလွန်ပင် ပျက်ယွင်းသွားရ၏။ ရွှေဝက်ဝံမျိုးနွယ်စု၏ အရှိန်မှာ သူမ ထင်ထားသည်ထက်ပင် ပိုမိုမြန်ဆန်နေပေသည်။

ဆိုလိုသည်မှာ ယခုအချိန်တွင် သူမ ထွက်ပြေးရန် ကြိုးစားလျှင်ပင် မဖြစ်နိုင်တော့ချေ။ သူမ၏ တည်နေရာကို ရန်သူများက ချက်ချင်းပင် ပစ်မှတ်ထားလိုက်ပြီ ဖြစ်ကြောင်း အာရုံခံမိလိုက်၏။ မည်သည့်ဘက်သို့ ထွက်ပြေးစေကာမူ အချည်းနှီးသာ ဖြစ်ပေလိမ့်မည်။

"လူသားကျင့်ကြံသူ... မင်းဆီမှာရှိတဲ့ ရွှမ်ထျန်းရတနာကို ချက်ချင်းအပ်စမ်း။ မဟုတ်ရင်တော့ ဒီနေ့ မင်း အသက်ရှင်လျက် ထွက်သွားနိုင်မှာ မဟုတ်ဘူး...”

လေဟာနယ်သန့်စင်ခြင်း နှောင်းပိုင်းအဆင့်တွင် ရှိသော ရွှေဝက်ဝံမျိုးနွယ် ကျင့်ကြံသူတစ်ဦးက ဩရှရှအသံဖြင့် ပြောလိုက်၏။ သူ၏ ဝက်ဝံမျက်လုံးများမှ ရက်စက်သော အလင်းတန်းများ ထွက်ပေါ်နေပြီး တစ်ကိုယ်လုံးမှ သတ်ဖြတ်လိုသော အငွေ့အသက်များသည်လည်း ကောင်းကင်နှင့် မြေကြီးကို တုန်လှုပ်စေမတတ် ဖြန့်ကျက်နေလေသည်။

မှန်ပေသည်၊ ဟွားစစ်ချင် ရရှိထားသော ရတနာမှာ အလွန်ပင် ထူးခြားလှပြီး အင်မော်တယ်တစ်ပိုင်းလက်နက်နှင့် ညီမျှသော ရွှမ်ထျန်းရတနာ ဖြစ်ပေသည်။

ယင်း၏တန်ဖိုးမှာ မည်မျှ ကြီးမားမည်ကို ခန့်မှန်းကြည့်နိုင်၏။ ခန္ဓာပေါင်းစည်းခြင်းအဆင့် ကျင့်ကြံသူကြီးများပင်လျှင် စိတ်လှုပ်ရှားသွားနိုင်သော အရာပင်။

အကယ်၍ ခန္ဓာပေါင်းစည်းခြင်းအဆင့် ကျင့်ကြံသူ အများအပြားမှာ အင်မော်တယ်လက်နက်ကိစ္စဖြင့် အာရုံများမနေပါက ၎င်းတို့ကိုယ်တိုင်ပင် ဟွားစစ်ချင်နောက်သို့ လိုက်လံ ဖမ်းဆီးပေလိမ့်မည်။

ယခု လေဟာနယ်သန့်စင်ခြင်းအဆင့် ကျင့်ကြံသူငါးဦးသာ ရောက်လာခြင်းမှာ အင်အားနည်းလှသည်ဟုပင် ဆိုနိုင်သေးသည်။

"ရွှမ်ထျန်းရတနာကို ပေးလို့မရတာတော့ မဟုတ်ဘူး။ ဒါပေမဲ့ ရှင်တို့အနေနဲ့ ငါတို့နှစ်ယောက်လုံးရဲ့ အသက်ကို ဘာမှမဖြစ်စေရဘူးလို့ အာမခံရမယ်...”

ဟွားစစ်ချင်မှာ ရွေးချယ်စရာ မရှိတော့ပေ။ သူမ တစ်ယောက်တည်းသာဆိုလျှင် လွတ်မြောက်နိုင်ကောင်း လွတ်မြောက်နိုင်သော်လည်း၊ ကျိုးစွေ့ကဲ့သို့ အားနည်းသော ဝန်ထုပ်ဝန်ပိုးတစ်ခု ပါလာသဖြင့် မဖြစ်နိုင်တော့ချေ။

သူမ၏ ညီမလေးဖြစ်သူ ပိုင်စုကျဲ့ကို မုဆိုးမဘဝ မရောက်စေလိုသကဲ့သို့ ယခု အန္တရာယ်မှာလည်း သူမကြောင့် ဖြစ်ရသဖြင့် ဤလူသားကို မသေစေချင်ပေ။

"မိုက်မဲတဲ့ လူသားကျင့်ကြံသူမ... မင်းမှာ ရွေးချယ်စရာ ရှိသေးတယ်လို့ ထင်နေတာလား...”

"ရွှမ်ထျန်းရတနာကို အခုချက်ချင်း အပ်စမ်း... မဟုတ်ရင်တော့ သေဖို့သာပြင်ပေရော့...”

လေဟာနယ်သန့်စင်ခြင်း နှောင်းပိုင်းအဆင့်ရှိ ရွှေဝက်ဝံကျင့်ကြံသူက လှောင်ပြောင်လိုက်၏။

အကယ်၍ ဤလူသားကျင့်ကြံသူမက အသက်ချင်းလဲကာ တိုက်ခိုက်လာမည်ကို မစိုးရိမ်ပါက ၎င်းအနေဖြင့် ဤမျှ စကားများနေလိမ့်မည် မဟုတ်ချေ။

လေဟာနယ်သန့်စင်ခြင်းအဆင့် ကျင့်ကြံသူတစ်ဦး အသက်နှင့်လဲ၍ တိုက်ခိုက်လာပါက ၎င်းတို့ဘက်မှ အဖော်တစ်ဦး သို့မဟုတ် နှစ်ဦးမှာလည်း သေချာပေါက် အတူပါသွားပေလိမ့်မည်။

၎င်းသည် ရတနာကိုလည်း ရလိုသကဲ့သို့ အဖော်များကိုလည်း အသေမခံလိုသဖြင့်သာ စကားပြောနေခြင်း ဖြစ်၏။ မည်သို့ပင်ဆိုစေကာမူ စောစောက တိုက်ပွဲတွင် ဤလူသားကျင့်ကြံသူမ၏ အရည်အချင်းကို ၎င်း အသိအမှတ်ပြုထားရပေသည်။

သူမတွင် ၎င်းတို့ကို အန္တရာယ်ပေးနိုင်သော လျှို့ဝှက်နည်းလမ်းများ ရှိနေသဖြင့်သာ ဤသို့ စကားပြောနေခြင်း ဖြစ်ပြီး၊ သို့မဟုတ်ပါက လွန်ခဲ့သော အချိန်ကတည်းကပင် သတ်ဖြတ်ပစ်လိုက်ပြီ ဖြစ်၏။

"ကြည့်ရတာတော့ ညှိနှိုင်းလို့ရမှာ မဟုတ်တော့ဘူး ထင်တယ်...”

ဟွားစစ်ချင်၏ လှပသော မျက်လုံးအစုံ၌ အေးစက်သော အလင်းတန်းများ ဖြတ်ပြေးသွားပြီး စိတ်နှလုံးမှာလည်း လေးလံသွားလေသည်။ ဤရွှေဝက်ဝံကျင့်ကြံသူ ငါးဦးမှာ သူတို့ကို အသက်ရှင်လျက် လွှတ်ပေးရန် ရည်ရွယ်ချက် မရှိကြောင်း ထင်ရှားလှ၏။ ယခု စကားပြောနေခြင်းမှာ သူမ၏ တိုက်ခိုက်လိုစိတ်ကို လျော့ပါးစေပြီး အနည်းဆုံးသော ဆုံးရှုံးမှုဖြင့် ရတနာကို ရယူလို၍သာ ဖြစ်ပေသည်။

အကယ်၍ သူမသာ ရန်သူ့စကားကို အမှန်တကယ် ယုံကြည်မိပါက သူမအတွက် သေလမ်းသာ ရှိတော့ပေလိမ့်မည်။

'ကျိုးစွေ့... ငါ တိုက်ခိုက်နေတုန်း မင်း တတ်နိုင်သမျှ အဝေးဆုံးကို အမြန်ဆုံး ထွက်ပြေးတော့...’

'ငါ ဒီရွှေဝက်ဝံကျင့်ကြံသူ ငါးယောက်ကို တားထားပေးမယ်...’

ယခုအချိန်တွင် ဟွားစစ်ချင်၏ မျက်လုံးများမှာ ဝေဝါးနေပြီး ကျိုးစွေ့ထံသို့ တိတ်တဆိတ် အသံလွှင့်ကာ ပြောလိုက်၏။

"တကယ်တော့ ဒီလောက်အထိ ဒုက္ခခံစရာ မလိုပါဘူး...”

ကျိုးစွေ့က ရုတ်တရက် ဟွားစစ်ချင်ကို ခါးမှ ဆွဲဖက်ကာ ပွေ့ချီလိုက်လေသည်။

"ဘာ..."

ဟွားစစ်ချင်မှာ ဆွံ့အသွားပြီး မျက်နှာလေးမှာလည်း နီမြန်းသွား၏။ ဤမျှ အတင့်ရဲစွာဖြင့် သူမကို ဖက်ရဲသည့် အမျိုးသားမျိုးကို သူမ တစ်ခါမျှ မတွေ့ဖူးခဲ့ပေ။

ကျိုးစွေ့၏ ကိုယ်ပေါ်မှ ထွက်ပေါ်လာသော ရနံ့များက သူမ၏ နှာခေါင်းထဲသို့ တိုးဝင်လာပြီး ခန္ဓာကိုယ်တစ်ခုလုံးရှိ ခုခံနိုင်စွမ်းကို ဖျက်ဆီးပစ်သကဲ့သို့ ခံစားလိုက်ရ၏။ သူမသည် လေဟာနယ်သန့်စင်ခြင်းအဆင့် ကျင့်ကြံသူ ဖြစ်သော်လည်း ယခုအချိန်တွင်မူ သူမ၏ ကျင့်စဉ်အာဏာများကို အနည်းငယ်မျှပင် အသုံးမပြုနိုင်တော့ချေ။

'ဒီအကောင် ငါ့ကို ဘာလုပ်လိုက်တာလဲ...’

ဟွားစစ်ချင်မှာ ဒေါသလည်း ထွက်၊ ရှက်လည်း ရှက်နေမိတော့သည်။

ဝှစ်…။

ဟွားစစ်ချင် တစ်စုံတစ်ခု ပြောရန် ကြိုးစားသော်လည်း ကျိုးစွေ့၏ပုံရိပ်မှာ လျှပ်စီးပမာ လက်သွားပြီး 'အိပ်မက်နယ်မြေလျှောက်လှမ်းခြင်း' ဟူသော တန်ခိုးစွမ်းအားကို ထုတ်ဖော်လိုက်လေသည်။

အိပ်မက်နယ်မြေ၏ စွမ်းအင်များက သူတို့နှစ်ဦးကို ဖုံးလွှမ်းသွားပြီး ပုံရိပ်များမှာ ဝေဝါးလာကာ အိပ်မက်ကမ္ဘာထဲသို့ ပျော်ဝင်သွားတော့သည်။ မျက်စိတစ်မှိတ်အတွင်းမှာပင် ရွှေဝက်ဝံမျိုးနွယ် ကျင့်ကြံသူငါးဦး၏ ရှေ့မှောက်မှ ပျောက်ကွယ်သွားလေတော့သည်။

"ဒါက ဘာဖြစ်တာလဲ။ အဲဒီလူသား ကျင့်ကြံသူနှစ်ယောက် ဘယ်ရောက်သွားတာလဲ။ ဘာလို့ ရုတ်တရက်ကြီး ပျောက်သွားရတာလဲ...”

လေဟာနယ်သန့်စင်ခြင်း နှောင်းပိုင်းအဆင့်ရှိ ရွှေဝက်ဝံကျင့်ကြံသူမှာ ဆွံ့အသွားပြီး ပါးစပ်အဟောင်းသား ဖြစ်သွားရ၏။

၎င်းသည် ကျိုးစွေ့နှင့် ဟွားစစ်ချင်တို့၏ အငွေ့အသက်ကို ရှာဖွေရန် တတ်နိုင်သမျှ ကြိုးစားသော်လည်း ၎င်းတို့မှာ အစအနပင် မကျန်တော့ကြောင်း တွေ့လိုက်ရသည်။

သို့မဟုတ်လျှင်လည်း ရန်သူ၏ အငွေ့အသက်မှာ ၎င်း၏ အာရုံခံနိုင်စွမ်းထက် ကျော်လွန်သွားခြင်း ဖြစ်ပေလိမ့်မည်။ ၎င်းအနေဖြင့် ယခုကဲ့သို့ ထူးဆန်းသော ကိစ္စမျိုးကို တစ်သက်တွင် တစ်ခါမျှ မကြုံဖူးချေ။

"ဒီနတ်ဘုရားအသွင်ပြောင်းအဆင့် လူသားမှာ တစ်ခုခု ထူးခြားနေတယ်လို့ ငါ ပြောသားပဲ...”

"ငါတို့ လေဟာနယ်သန့်စင်ခြင်းအဆင့် ငါးယောက်ကို ရင်ဆိုင်နေရတာတောင် သူက အေးအေးဆေးဆေး ရှိနေတာ...”

"ဒီကောင်က မဟာတည်နေရာရွှေ့ပြောင်းခြင်း မန္တန်အဆောင်ကို သုံးပြီး ဒီနေရာကနေ ချက်ချင်း ထွက်သွားတာ ဖြစ်ရမယ်...”

"မဟာတည်နေရာရွှေ့ပြောင်းခြင်း မန္တန်အဆောင်လား။ ဒါက သတ္တမအဆင့် မန္တန်အဆောင်လေ... မိုင်သန်းပေါင်းများစွာကို တစ်ခဏအတွင်း ရွှေ့ပြောင်းနိုင်တာ။ အဲဒီလူသားဆီမှာ ဒီလိုအရာ ရှိနေတာလား...”

"ဘယ်ကျင့်ကြံသူကိုမှ အထင်မသေးနဲ့။ သူတို့မှာလည်း ကံကောင်းခြင်းတွေနဲ့ ထူးခြားတဲ့အရာတွေ ရှိနိုင်တာပဲ...”

"အဲဒါသာ အမှန်ဆိုရင် ဒီတစ်ခေါက်တော့ ငါတို့ ရွှမ်ထျန်းရတနာကို လက်လွှတ်လိုက်ရပြီပေါ့...”

"ဟဲဟဲ... စိတ်မပူပါနဲ့။ ဒီတစ်ခေါက် လူသားကျင့်ကြံသူတွေမှာ ရတနာတွေ အများကြီး ရထားတယ်။ ဒါပေမဲ့ သူတို့ တစ်ယောက်တည်း အကုန်သိမ်းထားလို့ မရစေရဘူး။ ငါတို့ စစ်သည်တွေကို စုစည်းပြီး ဖုန်းရှီးမြို့တော်ကို သွားတိုက်မယ်။ ရတနာတွေကို ပြန်တောင်းရမယ်...”

"မှန်တယ်။ လူက ပြေးနိုင်ပေမဲ့ မြို့တော်ကတော့ ပြေးလို့ မရဘူးလေ...”

ရွှေဝက်ဝံမျိုးနွယ်စု ကျင့်ကြံသူများမှာ အလွန်ပင် မကျေမနပ် ဖြစ်နေသော်လည်း မည်သို့မျှ မတတ်နိုင်တော့ချေ။ အဘယ်ကြောင့်ဆိုသော် ရန်သူမှာ လုံးဝ ပျောက်ကွယ်သွားပြီ ဖြစ်ရာ လိုက်ဖမ်းရန်ပင် အချိန်မမီတော့သောကြောင့် ဖြစ်၏။

သို့သော် ၎င်းတို့သည် လက်လျှော့ရန် ရည်ရွယ်ချက် မရှိပေ။ လူသားမျိုးနွယ်သည် ယခုအကြိမ်တွင် အကျိုးအမြတ်များစွာ ရရှိခဲ့သော်လည်း ယင်းတို့ကို ထိန်းသိမ်းထားနိုင်ခြင်း ရှိ၊ မရှိမှာမူ မသေချာသေးချေ။

............