အခန်း ၇၈၅

အခန်း (၇၈၅) - မြေကမ္ဘာအင်မော်တယ် တာအိုအသီးကို စားသုံးခြင်း၊ အင်မော်တယ်သလင်းကျောက် သုံးထောင်နှင့် ဖူးစာရေးကြယ်လှုပ်ခတ်ခြင်း(၅)။

တစ်မိနစ်ခန့် ကြာပြီးနောက်။

ကျိုးစွေ့နှင့် ဟွားစစ်ချင်တို့၏ ပုံရိပ်မှာ မိုးကြိုးတောင်တန်း၏ အပြင်ဘက်ဧရိယာသို့ ရောက်ရှိလာလေသည်။ တိုတောင်းလှသော တစ်မိနစ်အတွင်းမှာပင် ၎င်းတို့သည် မိုင်သန်းပေါင်းများစွာကို ဖြတ်ကျော်လာခဲ့ပြီး ရွှေဝက်ဝံမျိုးနွယ်စု ကျင့်ကြံသူများ၏ လိုက်လံဖမ်းဆီးမှုမှ လုံးဝ လွတ်မြောက်လာခဲ့ပြီ ဖြစ်၏။

ယခုနေရာမှာ ဖုန်းရှီးမြို့တော်နှင့်လည်း သိပ်မဝေးတော့ချေ။

"မဖြစ်နိုင်တာ... ဒါ ဘယ်လိုတန်ခိုးစွမ်းအားလဲ...”

"တစ်ခဏအတွင်းမှာ မိုင်သန်းပေါင်းများစွာကို ဘယ်ကဘယ်လို ဖြတ်ကျော်လိုက်တာလဲ...”

ဟွားစစ်ချင်ခမျာ အံ့အားသင့်လွန်းသောကြောင့် မျက်လုံးအပြူးသားဖြင့် သူမ၏ရှေ့မှ အမျိုးသားကို မယုံနိုင်စဖွယ် ကြည့်နေမိသည်။ ယခုမှပင် သူမ၏ဟောကိန်းမှာ မမှားရုံသာမက အလွန်ပင် တိကျလှကြောင်း နားလည်သွားတော့၏။

ဤလူသားသည် သူမကို ဘေးကင်းရာသို့ ခေါ်ဆောင်သွားနိုင်စွမ်း အမှန်တကယ် ရှိပေသည်။ ဤတန်ခိုးစွမ်းအားမျိုးဆိုလျှင် ခန္ဓာပေါင်းစည်းခြင်းအဆင့် ကျင့်ကြံသူများနှင့် တွေ့လျှင်ပင် လွယ်လွယ်ကူကူ ထွက်ပြေးနိုင်ပေလိမ့်မည်။

“လူတစ်ယောက်ကို မှားယွင်းစွာ သတ်မှတ်နိုင်သော်လည်း၊ အမည်ပြောင်မှာမူ ဘယ်သောအခါမှ မမှားနိုင်ချေ” ဟူသော စကားမှာ အမှန်ပင် ဖြစ်၏။ လိပ်အိုကြီးဟူသော သူ၏ အမည်ပြောင်မှာ အလွန်ပင် လိုက်ဖက်လှပေသည်။

"စီနီယာဟွား..."

"ဒါက ကျုပ်ရဲ့ လျှို့ဝှက်ချက်ပဲလေ။ ခင်ဗျားက ကျုပ်ရဲ့ တာအိုလက်တွဲဖော် ဖြစ်လာမှပဲ ဒါကို သိခွင့်ရလိမ့်မယ်...”

ကျိုးစွေ့က သက်ပြင်းချကာ ပြောလိုက်၏။ မူလက သူသည် ဝင်ရောက်ပတ်သက်ရန် ရည်ရွယ်ချက် မရှိခဲ့သော်လည်း ဟွားစစ်ချင်မှာ ပိုင်စုကျဲ့၏ အစ်မဖြစ်နေပြီး ၎င်းတို့နှစ်ဦးမှာ ညီအစ်မအရင်းအချာကဲ့သို့ သံယောဇဉ် ကြီးမားသောကြောင့်သာ ဖြစ်ပေသည်။

သူသည် ဤအမျိုးသမီး သေဆုံးသွားသည်ကို ကြည့်မနေနိုင်ပေ။

မှန်ပေသည်၊ လေဟာနယ်သန့်စင်ခြင်းအဆင့်ရှိ ရွှေဝက်ဝံမျိုးနွယ် ကျင့်ကြံသူငါးဦးနှင့် တိုက်ခိုက်ခြင်းမှာ ဉာဏ်ရှိရာ မရောက်ပေ။

အဘယ်ကြောင့်ဆိုသော် အဝေးတစ်နေရာမှ ခန္ဓာပေါင်းစည်းခြင်းအဆင့် အစွမ်းထက်ပုဂ္ဂိုလ်တစ်ဦး လျင်မြန်စွာ ချဉ်းကပ်လာနေသည်ကို သူ အာရုံခံမိသောကြောင့် ဖြစ်၏။

ဆက်လက် တုံ့ဆိုင်းနေမည်ဆိုပါက သေလမ်းကို ရွေးချယ်သကဲ့သို့ ဖြစ်ပေလိမ့်မည်။

သူသည် တစ်ဖက်လူကို အနိုင်မတိုက်နိုင်သော်လည်း ထွက်ပြေးရန်မှာမူ အလွန်လွယ်ကူလှ၏။

ရန်သူနှင့် အသေအလဲ တိုက်ခိုက်နေရန် မလိုအပ်ပေ။

ယခုတွင် သူသည် မိမိ၏အစွမ်းကို အနည်းငယ် စမ်းသပ်ကြည့်လိုက်ရာ “အိပ်မက်နယ်မြေလျှောက်လှမ်းခြင်း” အစွမ်းသည် တည်နေရာရွှေ့ပြောင်းခြင်းအတတ်နှင့် အမှန်တကယ်ပင် ယှဉ်နိုင်ချေရှိပေသည်။

အံ့ဩဖွယ်ရာ ဆန်းကြယ်မှုများနှင့် ပြည့်နှက်နေ၏။

"ခစ်ခစ်... တာအိုလက်တွဲဖော်ဖြစ်မှ သိခွင့်ရှိမှာတဲ့လား...”

ဟွားစစ်ချင်က မျက်လုံးလေးများ ဝိုင်းသွားကာ တခစ်ခစ် ရယ်မောလိုက်၏။

"ပိုင်စုကျဲ့ ညီမလေးက မင်းကို မဖြည့်ဆည်းပေးနိုင်လို့လား... ဒါကြောင့် တာအိုလက်တွဲဖော်တွေ အများကြီး ထပ်ရှာချင်နေတာလား...”

"အခု ကျွန်မကိုများ မျက်စိကျနေတာလား...”

"မင်းရဲ့ အမြင်ကတော့ တကယ့်ကို ကောင်းလွန်းတယ်... ကျွန်မရဲ့ ကိုယ်လုံးကိုယ်ပေါက်နဲ့ ရုပ်ရည်က ဖုန်းရှီးမြို့တော်မှာ ထိပ်တန်းကပဲလေ...”

"ဒါပေမဲ့ ကျွန်မကို ရဖို့အတွက်ဆိုရင်တော့... အမျိုးသမီးနှစ်ယောက်က ယောက်ျားတစ်ယောက်တည်းကို မျှဝေပေါင်းသင်းရမှာဆိုတော့ မင်း တော်တော်လေး ကြိုးစားရလိမ့်မယ်နော်...”

ဟွားစစ်ချင်က ရယ်မောလိုက်ပြီး မြှူဆွယ်သော မျက်လုံးများဖြင့် ကြည့်လိုက်၏။ သူမသည် ရဲတင်းသော စရိုက်ရှိသူဖြစ်ရာ အမျိုးသမီးနှစ်ယောက်က ယောက်ျားတစ်ယောက်တည်းကို မျှဝေပေါင်းသင်းရမည့်ကိစ္စကို လုံးဝရှက်ရွံ့ခြင်း မရှိပေ။

သူမသည် အခြားအမျိုးသမီးနှင့် ယောက်ျားတစ်ယောက်ကို မျှဝေရခြင်းမှာလည်း မဖြစ်နိုင်စရာမရှိဟု ယူဆထား၏။

သို့သော် ထိုယောက်ျားမှာ လုံလောက်သော ထူးချွန်မှု ရှိရ‌ပေမည်။ သို့မဟုတ်ပါက သူမကဲ့သို့ အမျိုးသမီးမျိုးက မည်သို့ သဘောတူပါမည်နည်း။

သူမ ဟွားစစ်ချင်မှာ တန်ဖိုးပေါသော အမျိုးသမီးမျိုး မဟုတ်ပေ။

"ဟူး… စီနီယာဟွား... ခင်ဗျားကို အဲဒီမှာပဲ ပြန်ထားခဲ့သင့်တယ်လို့ ကျုပ် ထင်တယ်...”

"အဲဒီ ရွှေဝက်ဝံမျိုးနွယ် ကျင့်ကြံသူတွေက ခင်ဗျားနဲ့ စကားစမြည်ပြောဖို့ စိတ်ဝင်စားကြပါလိမ့်မယ်...”

ကျိုးစွေ့က မျက်နှာသေဖြင့် ပြောလိုက်၏။

သူသည် ဤအမျိုးသမီး၏ စရိုက်ဆိုးကို ကောင်းစွာ သိထားသည်။ သူမသည် အခြားသူများကို စနောက်ရသည်အား အလွန် ဝါသနာပါသူ ဖြစ်ပေသည်။

"မလုပ်... မလုပ်နဲ့လေ...”

"စတာပါ... စတာပါ… ဘာလို့ အဲဒီလောက် စိတ်ဆိုးနေရတာလဲ...”

ဟွားစစ်ချင်က သနားစဖွယ် အမူအရာဖြင့် ကျိုးစွေ့ကို ကြည့်လိုက်၏။

ဤယောက်ျားက သူမကို အမှန်တကယ် ပြန်ပစ်ချထားခဲ့မည်ကို သူမ ကြောက်ရွံ့မိသည်။ ထိုသို့ဆိုလျှင် သူမ သေချာပေါက် အသက်ပျောက်ရပေလိမ့်မည်။

"အင်း...”

ကျိုးစွေ့က ခေါင်းညိတ်လိုက်ပြီး ဟွားစစ်ချင်ကို ပွေ့ချီကာ ဖုန်းရှီးမြို့တော်ဘက်သို့ ပျံသန်းသွား၏။

"ကျွန်မ ဒီတစ်ခေါက် ဘယ်လို ရွှမ်ထျန်းရတနာမျိုး ရခဲ့လဲဆိုတာ မသိချင်ဘူးလား...”

"အခု ကျွန်မက ဒဏ်ရာအကြီးအကျယ် ရထားတာလေ...”

"မင်းသာ လိုချင်တယ်ဆိုရင် အချိန်မရွေးသတ်ပြီး လုယူလို့ရတာပဲ...”

ဟွားစစ်ချင်က မျက်တောင်လေးများအား ပုတ်ခတ်ပုတ်ခတ် လုပ်ပြလိုက်၏။

အမှန်အတိုင်းဆိုရလျှင် ရွှမ်ထျန်းရတနာမှာ အလွန်တန်ဖိုးကြီးလှပြီး အင်မော်တယ်လက်နက်၏ အောက်တစ်ဆင့်တွင်သာ ရှိသောအရာပင်။

မဟာယာနအဆင့် ကျင့်ကြံသူများပင် ထိုအရာကို လိုချင်တပ်မက်ကြပေလိမ့်မည်။

လူသားမျိုးနွယ်တစ်ခုလုံးတွင်ပင် ရွှမ်ထျန်းရတနာဟူ၍ လက်ချိုးရေတွက်နိုင်ရုံသာ ရှိပေသည်။

ထိုသို့သော ရတနာတစ်ခု ပေါ်ထွက်လာတိုင်း ခန္ဓာပေါင်းစည်းခြင်းအဆင့် အစွမ်းထက်ပုဂ္ဂိုလ်များ သို့မဟုတ် မဟာယာနအဆင့် ကျင့်ကြံသူများအကြား လုယက်တိုက်ခိုက်မှုများ ဖြစ်ပွားစေလေ့ရှိ၏။

လူသားကျင့်ကြံသူများ ဖြစ်နေစေကာမူ လောဘစိတ်များ ဝင်လာကာ ချက်ချင်းပင် လုယူချင်စိတ် ပေါ်လာနိုင်ပေသည်။

အဘယ်ကြောင့်ဆိုသော် မိမိ၏ တာအိုခရီးလမ်းနှင့်ယှဉ်လျှင် ကိုယ်ကျင့်တရားနှင့် လူသားချင်းစာနာမှုတို့မှာ အချည်းနှီးသာဖြစ်သောကြောင့်ပင်။

ရှေ့ကယောက်ျားမှာ မိမိညီမ၏ တာအိုလက်တွဲဖော် ဖြစ်နေသော်ငြား ထိုသို့ပင် ဖြစ်ပေလိမ့်မည်။

သို့သော် မည်သို့သော ကိစ္စမျိုးကို လုပ်ဆောင်သွားမည်ဆိုသည်ကိုမူ အမှန်တကယ်ပင် ခန့်မှန်းရန် ခက်ခဲလှပေသည်။

တာအိုလက်တွဲဖော် မဆိုထားနှင့်၊ ညီအစ်ကိုမောင်နှမ အရင်းအချာများပင် ထိုကဲ့သို့သော အကျိုးစီးပွားရှေ့တွင် မည်သို့ ပြုမူကြမည်ကို မည်သူမှ မခန့်မှန်းနိုင်ပေ။

"ခင်ဗျားဆီက ရွှမ်ထျန်းရတနာကို ကျုပ် လုံးဝ စိတ်မဝင်စားဘူး...”

"ဒါက ခင်ဗျား ရထားတဲ့ရတနာပဲ... ကျုပ် မလုပါဘူး...”

"ဒါ့အပြင် ခင်ဗျားက ပိုင်စုကျဲ့ရဲ့ အစ်မပဲ... ကျုပ် ခင်ဗျားကို ဘာမှ မလုပ်ပါဘူး...”

"ခင်ဗျား ကျုပ်ကို စမ်းသပ်နေဖို့ မလိုဘူး...”

ကျိုးစွေ့က မျက်ခုံးပင့်လိုက်ပြီး ဟွားစစ်ချင်ကို အလေးအနက် ကြည့်လိုက်၏။

သူသည် ဟွားစစ်ချင်၏ အတွေးကို ကောင်းစွာ နားလည်ထားသည်။

မှန်ပေသည်၊ ကျင့်ကြံသူအများစုမှာ ကိုယ်ကျိုးရှာသူများသာ ဖြစ်ကြပြီး အကျိုးစီးပွားအတွက်ဆိုလျှင် သတ်ဖြတ်လုယူရန် သို့မဟုတ် သားမယားကိုပင် စွန့်ပစ်ရန် ဝန်မလေးကြပေ။

ထိုသို့သော ကိစ္စရပ်များမှာ အလွန်ပင် များပြားလှသည်။

လက်ရှိ လူသားမျိုးနွယ်မှာ အလွန် စည်းလုံးနေသည်ဟု ဆိုသော်လည်း လူသားမျိုးနွယ်အတွင်း၌မူ ထိုသို့သော ကိစ္စများမှာ နေ့စဉ်နှင့်အမျှ ဖြစ်ပျက်နေဆဲပင်။

ဤသည်ကို မည်သူမှ မတားဆီးနိုင်ပေ။ လူ့နှလုံးသားမှာ ထိုအတိုင်းပင် ဖြစ်၏။

သူသည် ဟွားစစ်ချင်၏ ကိုယ်ပေါ်ရှိ ရွှမ်ထျန်းရတနာကို စိတ်မဝင်စားရခြင်းမှာ မိမိကိုယ်ပေါ်တွင် အင်မော်တယ်လက်နက် ရှိနေသောကြောင့်ပင် ဖြစ်ရာ အဘယ်ကြောင့် ဟွားစစ်ချင်၏ ရတနာကို လိုချင်တပ်မက်ပါမည်နည်း။

ဤသည်မှာ ဘီလျံနာတစ်ဦးက သူတောင်းစား၏ ပိုက်ဆံအိတ်ကို မမက်မောသကဲ့သို့ပင် ဖြစ်၏။

မှန်ပေသည်၊ အကယ်၍ ဟွားစစ်ချင်သာ ရန်သူဖြစ်ခဲ့ပါက သူသည် လှုပ်ရှားရန် ဝန်လေးနေမည်မဟုတ်ဘဲ အခွင့်အရေးကို အရယူကာ အမြတ်ထုတ်မည် ဖြစ်၏။

သို့သော် လုပ်ဖော်ကိုင်ဖက် ဖြစ်နေသည့်အတွက် ထိုသို့သော ကိစ္စမျိုးကို မလုပ်ဆောင်ခြင်းပင် ဖြစ်လေသည်။

"စုကျဲ့ ညီမလေးက မင်းကို ဘာလို့ မျက်စိကျသွားတာလဲဆိုတာ မဆန်းတော့ပါဘူး...”

"မင်းက တခြားယောက်ျားတွေနဲ့ တကယ်ကို မတူဘူးပဲ...”

"မင်းနဲ့သာ ဆက်ပြီး ပေါင်းသင်းနေမယ်ဆိုရင် ကျုပ်တောင် မင်းကို တကယ် ချစ်မိသွားမလား မသိဘူး...”

ဟွားစစ်ချင်က မျက်တောင်လေးများ ပုတ်ခတ်ပုတ်ခတ် လုပ်လိုက်ပြီး လှပသော မျက်ဝန်းများတွင် ထူးဆန်းသော အလင်းတန်းတစ်ခု ပေါ်ထွက်လာသည်။

ပိုင်စုကျဲ့တစ်ယောက် ဤယောက်ျားကို အဘယ်ကြောင့် မြင်မြင်ချင်း ချစ်မိသွားရသည်အား သူမ ယခုတွင် အနည်းငယ် နားလည်လာပြီ ဖြစ်၏။

ပိုင်စုကျဲ့မှာ ယခင်က မည်သည့်ယောက်ျားနှင့်မှ မပတ်သက်ခဲ့ဖူးသော်လည်း သူမ၏ ကိုယ်ပေါ်ရှိ ရွှေမွေးကျောက်စိမ်းမျက်နှာ မြေခွေးသွေးမျိုးဆက်က သူမကို အကောင်းဆုံး ခင်ပွန်းရှာဖွေနိုင်စွမ်း ပေးအပ်ထားခြင်းပင် ဖြစ်၏။

ဤသည်မှာ ရွှေမွေးကျောက်စိမ်းမျက်နှာ မြေခွေးသွေးမျိုးဆက်၏ ဗီဇအသိစိတ်ပင် ဖြစ်ပြီး အတွေ့အကြုံနှင့် အမြင်တို့ကို ကျော်လွန်နေပေသည်။

သွေးမျိုးဆက်၏ ထူးကဲအစွမ်းနှင့်ပင် တူညီပေ၏။

ယခင်က သူမ သံသယရှိခဲ့သော်လည်း ယခုအခါတွင်မူ ယောက်ျားရှာဖွေသည့် နေရာ၌ ရွှေမွေးကျောက်စိမ်းမျက်နှာ မြေခွေးသွေးမျိုးဆက်မှာ အမှန်တကယ်ပင် ထူးခြားသည့် အချက်ရှိကြောင်း ဝန်ခံရပေလိမ့်မည်။

အဘယ်ကြောင့်ဆိုသော် ပညာရပ်တိုင်းတွင် ကျွမ်းကျင်ရာနယ်ပယ် ရှိသောကြောင့် ဖြစ်၏။

ကျိုးစွေ့က ထိုစကားကို ကြားသော်လည်း ဘာမှ ပြန်မပြောဘဲ ခရီးကိုသာ ဆက်သွားနေ၏။

သူသည် ဤအမျိုးသမီး၏ စိတ်ထဲတွင် ဘာတွေ တွေးနေသည်ကို သိရှိပေသည်။

"အခု ရခဲ့တဲ့ ရွှမ်ထျန်းရတနာက ကျုပ်ရဲ့ တာအိုခရီးလမ်းနဲ့ ပတ်သက်နေတယ်...”

"ဒါကြောင့် ဘယ်သူပဲဖြစ်ဖြစ် ကျုပ် လက်လွှတ်မှာ မဟုတ်ဘူး...”

"ဒါပေမဲ့ မင်းက ကျုပ်ရဲ့ အသက်ကို ကယ်ခဲ့တဲ့ ကျေးဇူးရှင်ပဲ...”

"နောက်ပိုင်းမှာ မင်းမှာ ဘာအခက်အခဲပဲရှိရှိ ပွင့်ပွင့်လင်းလင်း ပြောလိုက်ပါ...”

"မီးထဲရေထဲ ဆင်းရဲဖို့ ဝန်မလေးပါဘူး...”

ဟွားစစ်ချင်က ကျိုးစွေ့ကို အလွန် အလေးအနက်ကြည့်ကာ သူမ၏ကတိကို ပေးလိုက်၏။

အကယ်၍ ဤယောက်ျားသာ မရှိခဲ့ပါက သူမသည် ရွှေဝက်ဝံမျိုးနွယ်၏ ဝိုင်းရံပိတ်ဆို့မှုကြားမှ အသက်ရှင်လျက် လွတ်မြောက်နိုင်မည် မဟုတ်ပေ။

ဤသည်မှာ အသက်ကယ်ကျေးဇူးဟု ဆိုနိုင်ပေသည်။ သူမအနေဖြင့် သဘာဝကျစွာပင် အတိုင်းအဆမရှိ ကျေးဇူးတင်နေမိလေသည်။

အဘယ်ကြောင့်ဆိုသော် သူမ ယခု ရရှိခဲ့သော ရွှမ်ထျန်းရတနာမှာ 'ကောင်းကင်နက္ခတ်တာရာမြေပုံ' ဟု အမည်ရသောကြောင့် ဖြစ်၏။

ဤသည်မှာ ထိပ်တန်း ဟောကိန်းထုတ်မှော်ရတနာပင် ဖြစ်ချေသည်။

၎င်းသည် ရွှမ်ထျန်းရတနာဟူ၍ ရိုးရှင်းလှသည်မဟုတ်ဘဲ အမှန်စင်စစ်တွင် အင်မော်တယ်လက်နက်တစ်ခုပင် ဖြစ်၏။

စစ်ပွဲကြီးတစ်ခုနှင့် ကြုံတွေ့ခဲ့ရသောကြောင့် ဤအင်မော်တယ်လက်နက်မှာ ပျက်စီးသွားကာ အဆင့်နိမ့်ကျသွားပြီး ရွှမ်ထျန်းရတနာ ဖြစ်သွားရခြင်းသာ ဖြစ်သည်။

အကယ်၍ ဤမှော်ရတနာကို ပြန်လည် ပြုပြင်ရန် အခွင့်အရေးရမည်ဆိုပါက ၎င်းသည် အင်မော်တယ်လက်နက်အဖြစ် ပြန်လည် အသွင်ပြောင်းသွားပေလိမ့်မည်။

သံသယဖြစ်ဖွယ်မရှိ၊ ဤရတနာမှာ သူမအတွက် ကျားကို အတောင်ပံ တပ်ပေးလိုက်သကဲ့သို့ပင် ဖြစ်၏။

၎င်းကို အပြည့်အဝ သန့်စင်နိုင်မည်ဆိုပါက မဟာယာနအဆင့် ကျင့်ကြံသူ ဖြစ်လာရန် ရဲရဲဝံ့ဝံ မဆိုနိုင်သော်လည်း ခန္ဓာပေါင်းစည်းခြင်းအဆင့် အစွမ်းထက်ပုဂ္ဂိုလ် ဖြစ်လာရန်မှာမူ လုံးဝ ပြဿနာမရှိပေ။ ထို့ကြောင့် သူမသည် သဘာဝကျစွာပင် လက်မလွှတ်နိုင်ခြင်း ဖြစ်၏။

ဤသည်မှာ သူမနှင့် အလွန်တရာ သင့်တော်လှသော မှော်ရတနာပင် ဖြစ်ချေသည်။

အကယ်၍ ဤအကြိမ်ကိုသာ လွဲချော်သွားပါက မည်သည့်အချိန်အထိ စောင့်ဆိုင်းရမည်ကို သူမ မသိနိုင်ပေ။ ထို့ကြောင့် မည်သို့ပင်ဖြစ်စေ သူမသည် စွန့်လွှတ်မည် မဟုတ်ပေ။

"အားနာစရာ မလိုပါဘူး... ဒါက အသေးအဖွဲကိစ္စလေးပါ...”

ကျိုးစွေ့က ပြောလိုက်၏။

နှစ်နာရီခန့် ကြာပြီးနောက်။

သူသည် ဒဏ်ရာရနေသော ဟွားစစ်ချင်ကို ဖုန်းရှီးမြို့တော်သို့ ခေါ်ဆောင်လာခဲ့ပြီး အခွန်နှင့် မြေယာဌာနသို့ ပြန်ရောက်သွားလေသည်။

ထို့နောက် သူသည် လှည့်ထွက်သွားကာ အမှတ် (၈၈) တာအိုကျောင်းတော်သို့ ပြန်သွားတော့သည်။

ယခုအချိန်တွင် ဟွားစစ်ချင်သည် အဆောက်အအုံမြင့်ပေါ်တွင် ရပ်နေပြီး ထွက်ခွာသွားသော ကျိုးစွေ့၏ကျောပြင်ကို ကြည့်ကာ သူမ၏ မျက်ဝန်းလှလှလေးများတွင် ရှုပ်ထွေးသော အရိပ်အယောင်များ ပေါ်ထွက်လာ၏။

'မဖြစ်နိုင်တာ... ငါနဲ့ ဒီယောက်ျားက တကယ်ပဲ ရေစက်ရှိနေတာလား...’

'ခုနကပဲ ဟောကိန်းတစ်ခု တွက်ကြည့်လိုက်တာ... ငါနဲ့ ဒီယောက်ျားက တကယ်ပဲ အိမ်ထောင်ဖက်ရေစက် ရှိနေတယ်တဲ့လား... ပြီးတော့ အခု ငါရဲ့ ဖူးစာရှင်ကြယ်ကလည်း လှုပ်ခတ်နေပြီ...’

‘လာနောက်နေတာလား... ဒီယောက်ျားက နောင်ကျရင် တကယ်ပဲ ငါနဲ့အတူ အိပ်စက်မှာလား... ငါ့အပေါ်မှာ စိတ်ကြိုက် ခြယ်လှယ်နိုင်မှာလား...’

ဟွားစစ်ချင်၏ မျက်ဝန်းလှလှလေးများမှာ လှုပ်ခတ်သွားပြီး ချောမောသော မျက်နှာလေးမှာလည်း အနည်းငယ် နီမြန်းသွားကာ ရှက်ဒေါသအရိပ်အယောင်ကို မထိန်းချုပ်နိုင်ဘဲ ဖော်ပြလိုက်မိတော့သည်။

ယခုလေးတင် သူမသည် မိမိကိုယ်တိုင်အတွက် အိမ်ထောင်ဖက်ဟောကိန်းတစ်ခု တွက်ကြည့်ရာ၊ မိမိ၏ အနာဂတ် တာအိုလက်တွဲဖော်မှာ အနီးအနားတွင်ပင် ရှိနေကြောင်း တွေ့ရှိရလေသည်။

ထိုသူမှာ ရှေ့က ယောက်ျားဖြစ်ကြောင်း ထင်ရှားလှပေသည်။ ဤသည်က သူမ၏ စိတ်ကို ရှုပ်ထွေးသွားစေသည်။

သူမသည် ပုံမှန်အားဖြင့် စကားပြောရဲတင်းတတ်သော်လည်း တကယ်တမ်း လက်တွေ့ကြုံလာရသောအခါတွင်မူ ကိစ္စနှစ်ခုမှာ သီးခြားစီပင် ဖြစ်နေလေသည်။

အဘယ်ကြောင့်ဆိုသော် သူမသည်လည်း အပျိုစင်စစ်စစ် တစ်ဦးသာ ဖြစ်သောကြောင့်ပင်။

ထို့အပြင် ဤဟောကိန်းမှာ အလွန်ပင် ကံကောင်းစေသော အရာဖြစ်နေ၏။

အကယ်၍ ဤယောက်ျားနှင့်သာ တာအိုလက်တွဲဖော် ဖြစ်လာခဲ့ပါက သူမသည် ကံကောင်းခြင်းများစွာ ရရှိမည်ဖြစ်ပြီး၊ အရာရာတိုင်းတွင် အဆင်ပြေချောမွေ့ကာ ဘေးဒုက္ခများမှ လွတ်မြောက်ပြီး ကံဆိုးမှုများက ကံကောင်းမှုများအဖြစ်သို့ ပြောင်းလဲသွားပေလိမ့်မည်။

သူမအတွက်ဆိုလျှင် အကျိုးကျေးဇူးများမှာ အတိုင်းအဆ မရှိလှဘဲ တာအိုအောင်မြင်မည့် အခွင့်အရေးသဖွယ် ဖြစ်နေချေသည်။

'တကယ်လို့ အဲဒီအတိုင်း ဖြစ်လာမယ်ဆိုရင် ငါနဲ့ စုကျဲ့ညီမလေးက ယောက်ျားတစ်ယောက်တည်းကို မျှဝေပေါင်းသင်းရမှာ မဟုတ်ဘူးလား…'

‘ဟွန့်... လုံးဝ အဓိပ္ပာယ် မရှိလိုက်တာ... ငါ ဟွားစစ်ချင်က ဘယ်လိုလုပ်ပြီး တခြားအမျိုးသမီးနဲ့ ယောက်ျားတစ်ယောက်ကို မျှဝေနိုင်မှာလဲ...’

‘အမှားပဲ... ဟောကိန်းက သေချာပေါက် အမှားပဲ ဖြစ်ရမယ်... ဒီတစ်ခေါက် သေချာပေါက် မှားသွားတာ ဖြစ်မှာပါ...’

ဟွားစစ်ချင်သည် အံကို တင်းတင်းကြိတ်လိုက်ပြီး သူမ၏ စိတ်အတွေးများမှာ ငွေလျှော်ပင်ကဲ့သို့ ရှုပ်ထွေးနေလေတော့သည်။

သူမသည် ထိုကဲ့သို့သော ကိစ္စကို လုံးဝ ဝန်ခံမည် မဟုတ်ပေ။ အဘယ်ကြောင့်ဆိုသော် ဤသည်မှာ အလွန်ပင် ရယ်စရာကောင်းလှသောကြောင့် ဖြစ်၏။

ထို့အပြင် သူမသည် ယခုအခါ အသက်ခြောက်ထောင်ခန့် ရှိနေပြီ ဖြစ်၏။

ရှေ့က ယောက်ျားမှာမူ အသက် ခြောက်ရာ သို့မဟုတ် ခုနစ်ရာခန့်သာ ရှိသေးသည်။

အသက်အရွယ်အရဆိုလျှင် သူမသည် သူ၏ဘိုးဘေးပင် လုပ်၍ရနေပြီ ဖြစ်၏။

အကယ်၍ အမှန်တကယ်သာ တာအိုလက်တွဲဖော် ဖြစ်လာခဲ့မည်ဆိုလျှင် သူမသည် နွားအိုမြက်နုစားသကဲ့သို့ ဖြစ်နေမည် မဟုတ်ပါလော။

ထိုအခါ သူမ၏ညီအစ်မများ အားလုံးက သူမကို လှောင်ပြောင်ကြမည်ဖြစ်ပြီး သူမသည်လည်း ဟာသတစ်ခု ဖြစ်လာပေလိမ့်မည်။

သူမ၏စိတ်များ ရှုပ်ထွေးသွားကြောင်းကိုမူ သူမကိုယ်တိုင် ဝန်ခံရမည်ဖြစ်ပြီး၊ ယခင်က တစ်ကြိမ်တစ်ခါမှ မဖြစ်ဖူးသော ထိတ်လန့်မှုကို ခံစားနေရတော့သည်။