အခန်း ၇၈၉

အခန်း (၇၈၉) - လေဟာနယ်သန့်စင်ခြင်းအဆင့် ခန္ဓာကျင့်ကြံသူအဖြစ်သို့ တက်လှမ်းခြင်း၊ အစစ်အမှန်နဂါး၏ ရိုးတွင်းခြင်ဆီ၊ နဂါးဆင်ဓမ္မသဏ္ဌာန်နှင့် သက်တမ်းနှစ်သိန်း(၄)။

ဤအခိုက်အတန့်၌ အခြားတစ်ဖက်တွင်။

ဖုန်းရှီးမြို့တော်၊ မြို့စားအိမ်တော်။

လူသားမျိုးနွယ် ခန္ဓာပေါင်းစည်းခြင်းအဆင့် ကျွမ်းကျင်သူများသည် ဖုန်းရှီးမြို့တော်သို့ ပြန်လည်ရောက်ရှိလာကြလေ၏။

သူတို့၏ ခန္ဓာကိုယ်များတွင် မသေးငယ်သော ဒဏ်ရာများ ရရှိထားကြပြီး အမာရွတ်များစွာ ပေါ်ပေါက်နေသည်မှာ ဒဏ်ရာအပြင်းအထန် ရရှိထားကြောင်း သိသာထင်ရှားလှသည်။

သို့သော်လည်း သူတို့၏ စိတ်နှလုံးအတွင်းပိုင်းရှိ စိတ်လှုပ်ရှားမှုများကို ဖုံးကွယ်ထားနိုင်ရန် ခက်ခဲနေကြလေသည်။

"ဟားဟား၊ ဒီတစ်ကြိမ်တော့ ငါတို့ လူသားမျိုးနွယ် လုံးဝ ချမ်းသာသွားပြီပဲ...”

"ဒီတစ်ကြိမ် မိုးကြိုးအင်မော်တယ်စံအိမ်ထဲက ပျံသန်းထွက်ပေါ်လာတဲ့ အင်မော်တယ်ရတနာ မိုးကြိုးနီအင်မော်တယ်ပေတံကို ငါတို့ ရရှိခဲ့ပြီ...”

"ငါတို့ လူသားမျိုးနွယ် ကြီးပွားတိုးတက်ဖို့ အချိန်တန်ပြီ...”

ယွီလိန်တာအိုအရှင်သည် ဟားတိုက်ရယ်မောလိုက်ပြီး သူ၏ ဝမ်းသာပျော်ရွှင်မှုများကို ထိန်းချုပ်မထားနိုင်တော့ချေ။

အမှန်အတိုင်းပြောရလျှင် ဤတစ်ကြိမ်တွင် ဝင်ရောက်လှုပ်ရှားခဲ့ကြသော ခန္ဓာပေါင်းစည်းခြင်းအဆင့် ကျွမ်းကျင်သူများမှာ အလွန်တရာ များပြားလှသည်။

အစကတည်းက သူတို့သည် ရတနာများစွာကို ရရှိနိုင်မည်ဟု မျှော်လင့်ထားခြင်း မရှိခဲ့ကြပေ။

သို့သော် မည်သူက ထင်မှတ်ထားပါမည်နည်း။ အရေးကြီးသော အချိန်တွင် ဖုန်းရှီးတာအိုအရှင်ကိုယ်တိုင် ဝင်ရောက်လှုပ်ရှားခဲ့ပြီး မိုးကြိုးကဲ့သို့သော အဟုန်ဖြင့် အခြားမျိုးနွယ်စုမှ ခန္ဓာပေါင်းစည်းခြင်းအဆင့် ကျွမ်းကျင်သူတစ်ဦးကို မျက်စိတစ်မှိတ်အတွင်း သတ်ဖြတ်ကာ ဤအင်မော်တယ်ရတနာကို အလွယ်တကူ လုယူနိုင်ခဲ့လေသည်။

ထို့နောက် လူသားမျိုးနွယ် ခန္ဓာပေါင်းစည်းခြင်းအဆင့် ကျွမ်းကျင်သူများစွာသည် တုံ့ဆိုင်းမနေတော့ဘဲ ဖုန်းရှီးမြို့တော်သို့ ချက်ချင်း ပြေးလာခဲ့ကြခြင်း ဖြစ်သည်။

ဖုန်းရှီးမြို့တော်၏ သတ္တမအဆင့် အစီအရင်အကူအညီဖြင့် အခြားသော မျိုးနွယ်ခြား ခန္ဓာပေါင်းစည်းခြင်းအဆင့်များမှာလည်း မည်သို့မျှမတတ်နိုင်ဘဲ သက်ပြင်းချရုံသာ တတ်နိုင်ပေမည်။

ဖုန်းရှီးတာအိုအရှင်ကမူ ဤအခြေအနေမှ အန္တရာယ်များကို ထောက်ပြလျက် လေးနက်သောအသံဖြင့် ပြောလိုက်၏။

"အင်မော်တယ်ရတနာကို ရလိုက်တာက ကောင်းတဲ့ကိစ္စ ဖြစ်ချင်မှဖြစ်မှာ။ အရင်တုန်းက မျိုးနွယ်ခြားတွေဟာ ငါတို့လူသားမျိုးနွယ်ရဲ့ အင်အားကို အထင်သေးပြီး လျစ်လျူရှုထားခဲ့ကြတယ်။ ဒါကြောင့်ပဲ ငါတို့လူသားမျိုးနွယ်က ချောချောမွေ့မွေ့ တိုးတက်လာနိုင်ခဲ့တာပဲ…”

“ဒါပေမဲ့ အခု မိုးကြိုးနီအင်မော်တယ်ပေတံကို ရလိုက်တဲ့အတွက် လူတိုင်းရဲ့ပစ်မှတ် ဖြစ်လာတော့မယ်။ အထူးသဖြင့် ရုပ်သေးမျိုးနွယ်၊ မြွေပျံမျိုးနွယ်၊ ရွှေဖားပြုပ်မျိုးနွယ်နဲ့ အခြားမျိုးနွယ်တွေက ကျုပ်တို့လူသားမျိုးနွယ်ကို တိုက်ခိုက်ဖို့ ဆုံးဖြတ်ထားပြီးသား…. တစ်ကြိမ်လေး ခုခံလို့မနိုင်ဘူးဆိုတာနဲ့ ငါတို့လူသားမျိုးနွယ် ဒီမှာတင် မျိုးသုဉ်းသွားနိုင်တယ်...”

အင်မော်တယ်ရတနာတစ်ခုကို ရရှိခြင်းသည် ကောင်းမွန်သောကိစ္စဖြစ်သည်မှာ ထင်ရှားသည်။ သို့ရာတွင် ရန်သူများ၏ တိုက်ခိုက်မှုကို မခုခံနိုင်ပါက သေချာပေါက် သေဆုံးရမည်သာ ဖြစ်၏။

သန့်စင်ခြင်္သေ့မျိုးနွယ်၏ လမ်းစဉ်အတိုင်း လိုက်သွားမိနိုင်ခြေလည်း ရှိလေသည်။

"ချမ်းသာကြွယ်ဝမှုဆိုတာ အန္တရာယ်ထဲကနေ ရှာဖွေရတာပဲ။ ကျုပ်တို့လူသားမျိုးနွယ် ကြီးပွားတိုးတက်လာနိုင်တာဟာ ခေတ်အဆက်ဆက်က ဘိုးဘေးတွေ အန္တရာယ်ကို မကြောက်ဘဲ ရတနာတွေကို ရယူခဲ့လို့ပဲလေ။ အဲဒါက လူသားမျိုးနွယ် ကြီးပွားလာဖို့ အုတ်မြစ်ချပေးခဲ့တာပဲ…

အခု ကျုပ်တို့လူသားမျိုးနွယ်က အမြင့်ကို ပျံသန်းဖို့ အခြေခံအုတ်မြစ်ကို ရရှိနေပြီမို့လို့ ဒီအခွင့်အရေးကို လုံးဝလက်လွတ်ခံလို့ မဖြစ်ဘူး။ ကြီးမားတဲ့ တန်ဖိုးပေးဆပ်ရမယ်ဆိုရင်တောင် အရာအားလုံးက တန်ပါတယ်...”

ဟာယွန်းတာအိုအရှင်က လေးနက်သောအသံဖြင့် ဆိုလေသည်။

အင်မော်တယ်ရတနာတစ်ခုကို ထိန်းသိမ်းထားရန် မည်မျှခက်ခဲသည်ကို သူ အသေအချာ သိထားသည်။ အစစ်အမှန်ဝိညာဉ်မျိုးနွယ်စု၏ အာရုံစိုက်မှုကိုပင် ဆွဲဆောင်နိုင်ပြီး ကပ်ဘေးတစ်ခုကို ဖိတ်ခေါ်လာနိုင်ခြေ ရှိပေသည်။

သို့သော် သူတို့အား အင်မော်တယ်ရတနာကို စွန့်လွှတ်ခိုင်းရန်မှာမူ ပို၍ပင် မဖြစ်နိုင်သော ကိစ္စတစ်ခု ဖြစ်လေသည်။

"ဒါပေမဲ့ အခြားမျိုးနွယ်တွေသာ ပူးပေါင်းပြီး အကြီးအကျယ် တိုက်ခိုက်လာမယ်ဆိုရင်ကော… လက်ရှိ လူသားမျိုးနွယ်ရဲ့ မြို့တော် တစ်ရာ့ရှစ်မြို့မှာ ဘယ်နှမြို့က အသက်ရှင်ကျန်ရစ်နိုင်မှာလဲ...”

ဖုန်းရှီးတာအိုအရှင်က ဤအချက်ကို ထောက်ပြလိုက်၏။

လူသားမျိုးနွယ်၏ မြို့တော်များစွာတွင် သတ္တမအဆင့် အစီအရင်၏ အကာအကွယ်ရှိသော်လည်း အခြားမျိုးနွယ်များတွင်လည်း သတ္တမအဆင့် အစီအရင်ကို ရင်ဆိုင်နိုင်သော နည်းလမ်းများ ရှိပေသည်။

မဟာယာနအဆင့် ကျင့်ကြံသူများသာ ကိုယ်တိုင်ပါဝင်လာပါက သာမန် သတ္တမအဆင့် အစီအရင်လောက်သည် အဘယ်မှာ အရာဝင်ပါမည်နည်း။

လူသားမျိုးနွယ်၏ တော်ဝင်မြို့တော်ရှိ အဋ္ဌမအဆင့် အစီအရင်သာလျှင် မဟာယာနအဆင့် ကျင့်ကြံသူများကို တားဆီးနိုင်မည် ဖြစ်၏။ ပြဿနာမှာ တော်ဝင်မြို့တော်တစ်ခုလုံးသည် ထိုမျှလောက်သာ ကျယ်ဝန်းခြင်းပင်။

လူဦးရေ အမြောက်အမြားကို လက်ခံရန် လုံးဝမဖြစ်နိုင်ပေ။ လူသားအားလုံးကိုလည်း ကာကွယ်ပေးနိုင်စွမ်း မရှိချေ။ ရန်သူများသာ တိုက်ခိုက်လာပါက တော်ဝင်မြို့တော်မှလွဲ၍ အခြားလူသားမြို့တော်များအားလုံး ကပ်ဘေးနှင့် ကြုံတွေ့ရဖွယ်ရှိသည်။

ဖုန်းရှီးမြို့တော်မှာမူ ရှေ့ဆုံးမှ ရင်ဆိုင်ရမည် ဖြစ်၏။ အန္တရာယ်အများဆုံး နေရာဖြစ်သည်မှာ အသေအချာပင်။

"လူသားမြို့တော်တွေ အားလုံးကို စတေးလိုက်ရပြီး တော်ဝင်မြို့တော် တစ်မြို့ပဲ ကျန်ခဲ့မယ်ဆိုရင်တောင် အဲဒါက တန်ပါတယ်။ ဒီမိုးကြိုးနီအင်မော်တယ်ပေတံက ကောင်းကင်ဘုံကပ်ဘေးကို ကာကွယ်ပေးနိုင်တဲ့ စွမ်းအားရှိတယ်…”

လူသားဧကရာဇ်ဆီသာ ရောက်သွားခဲ့မယ်ဆိုရင် နောင်တစ်ချိန်မှာ ကျုပ်တို့လူသားမျိုးနွယ်ကနေ လေဟာနယ်သန့်စင်ခြင်းအဆင့်နဲ့ ခန္ဓာပေါင်းစည်းခြင်းအဆင့် ကျင့်ကြံသူတွေ ဘယ်လောက်တောင် ပေါ်ထွက်လာမလဲဆိုတာ မသိနိုင်တော့ဘူးလေ…

သာမန်လူသားတချို့ကို စတေးပြီး လူသားမျိုးနွယ်ရဲ့ ပိုမိုတောက်ပတဲ့ အနာဂတ်ကို လဲလှယ်ယူရမှာပဲ။ ဒီလိုလုပ်တာက ဘာမှမဖြစ်နိုင်စရာ မရှိဘူးလို့ ကျုပ်ထင်တယ်...”

ရှန်စွမ်းတာအိုအရှင်က အလွန်ရက်စက်သော လေသံဖြင့် လေးနက်စွာ ပြောလိုက်လေသည်။

ဤစကားကို ကြားသောအခါ ဖုန်းရှီးတာအိုအရှင်မှာလည်း တိတ်ဆိတ်သွားတော့သည်။

ခန္ဓာပေါင်းစည်းခြင်းအဆင့် ပါရမီရှင်တစ်ဦးဖြစ်သည့်အတွက် သူမတွင် လုံးဝတိကျသော ဆင်ခြင်တုံတရား ရှိသည်။ ရှန်စွမ်းတာအိုအရှင်၏ စကားများက မှန်ကန်ကြောင်းကို သဘာဝကျကျ သိရှိထားလေသည်။

သာမန်လူများသည် အရေးကြီးသည်မှာ မှန်သော်လည်း အဆင့်မြင့်ကျင့်ကြံသူများနှင့်မူ မယှဉ်နိုင်ချေ။

အဆင့်မြင့်ကျင့်ကြံသူ အမြောက်အမြား ပေါ်ထွက်လာမှသာလျှင် သာမန်လူများမှာ ဝိညာဉ်ကမ္ဘာတွင် အေးချမ်းစွာ အသက်ရှင်နေထိုင်နိုင်မည် ဖြစ်၏။ သို့မဟုတ်ပါက သာမန်လူများ မည်မျှပင် များပြားနေစေကာမူ အလကားပင်ဖြစ်ပြီး အနှေးနှင့်အမြန်ဆိုသလို မျိုးနွယ်ခြားများ၏ ဖျက်ဆီးခြင်းကို ခံရပေမည်။

ထို့ကြောင့်ပင် ကပ်ဘေးတစ်ခုကို သေချာပေါက် ဖိတ်ခေါ်လာမည်ကို သိထားသော်လည်း မိုးကြိုးအင်မော်တယ်စံအိမ်မှ အင်မော်တယ်ရတနာကို သူမ လုယူချင်ခဲ့ခြင်း ဖြစ်လေသည်။

သို့ရာတွင် စိတ်ခံစားချက်အရဆိုလျှင်မူ သူမအနေဖြင့် လက်မခံနိုင်ချေ။ ဤအကြောင်းကြောင့် ဖုန်းရှီးမြို့တော်ရှိ မရေမတွက်နိုင်သော လူသားများ သေဆုံးရမည်ကို တွေးမိသောအခါ၊ ဤသို့သောကိစ္စမျိုး ဖြစ်ပျက်နေသည်ကို မျက်လုံးဖွင့်၍ ကြည့်မနေနိုင်ဟု သူမ ခံစားရလေသည်။

"ဖုန်းရှီးတာအိုရောင်းရင်း၊ မိန်းမသားဆန်တဲ့ သနားကြင်နာမှုမျိုး မထားပါနဲ့။ စစ်သူကြီးကောင်းဆိုတာ ရက်စက်တတ်ရတယ်တဲ့။ ဒါက ကျုပ်တို့ ဆုံးဖြတ်ချက်ချရမယ့် ကိစ္စပဲ…”

“ကျုပ်တို့ ချက်ချင်းထွက်ခွာပြီး တည်နေရာပြောင်းအစီအရင်ကတစ်ဆင့် လူသားမျိုးနွယ်ရဲ့ တော်ဝင်မြို့တော်ကို ပြန်ကြမယ်။ အချိန်က အရမ်းတိုတောင်းလိမ့်မယ်။ နောက်ကျသွားမယ်ဆိုရင် ရန်သူတွေက ဝိုင်းရံထားလိုက်မှာမို့လို့ ကျုပ်တို့ ထွက်ပြေးဖို့ စဉ်းစားလို့တောင် ရတော့မှာ မဟုတ်ဘူး…”

“ကျုပ်တို့ ထွက်သွားတာနဲ့ တည်နေရာပြောင်းအစီအရင်ကို ချက်ချင်း ဖျက်ဆီးပစ်ရမယ်။ ဒါမှ ရန်သူတွေက တည်နေရာပြောင်းအစီအရင်ကနေတစ်ဆင့် လူသားမျိုးနွယ် တော်ဝင်မြို့တော်ရဲ့ ခြေရာကို ရှာမတွေ့နိုင်မှာ...”

ရှန်စွမ်းတာအိုအရှင်က လေးနက်သောအသံဖြင့် ပြောလိုက်၏။ သူ၏လေသံမှာ အလွန်ရက်စက်ကာ ပြတ်သားလွန်းလှပြီး သံသယဖြစ်ခွင့်ပင် မပေးချေ။

အခြားသော ခန္ဓာပေါင်းစည်းခြင်းအဆင့် ပါရမီရှင်များကလည်း ဖုန်းရှီးတာအိုအရှင်ကို ကြည့်လိုက်ကြသည်။ ဤသည်မှာ သူတို့၏ တညီတညွတ်တည်းသော ဆုံးဖြတ်ချက် ဖြစ်ကြောင်း ထင်ရှားပေသည်။

ဖုန်းရှီးတာအိုအရှင်က ခန္ဓာပေါင်းစည်းခြင်းအဆင့် ပါရမီရှင်များစွာကို ကြည့်လျက် သူမ၏ ဆုံးဖြတ်ချက်ကို ပြောလိုက်လေသည်။

သူမ၏ အကြည့်များမှာ အလွန်ပင် ခိုင်မာနေ၏။

"ကျွန်မ နားလည်ပါပြီ။ ရှင်တို့ရဲ့ ဆုံးဖြတ်ချက်ကို ကျွန်မ သဘောတူပါတယ်။ ဒါပေမဲ့ ဖုန်းရှီးမြို့တော်က လူတွေအများကြီး သေဆုံးသွားတာကိုလည်း ကျွန်မ မမြင်ချင်ဘူး…”

“သူတို့အားလုံးက လူသားမျိုးနွယ်ရဲ့ မြို့ကြီးတွေဆီကနေ ကျွန်မ ခေါ်လာခဲ့တာမို့လို့ မျိုးနွယ်ခြားတွေရဲ့ လက်ချက်နဲ့ သေဆုံးသွားမှာကို ကြည့်မနေနိုင်ဘူး။ ဒီလူတွေ သေနိုင်ပေမဲ့ ဒီလိုမျိုး အလကားတော့ အသေမခံနိုင်ဘူး...”

ယွီလိန်တာအိုအရှင်က မျက်မှောင်ကြုတ်လိုက်၏။

"ဖုန်းရှီးတာအိုရောင်းရင်း၊ ခင်ဗျားက ဖုန်းရှီးမြို့တော်မှာပဲ နေရစ်ပြီး ဒီက သာမန်လူတွေနဲ့အတူ အသေခံမလို့လား။ ဒါ အရူးထတာပဲ… ခမ်းနားကြီးကျယ်တဲ့ ခန္ဓာပေါင်းစည်းခြင်းအဆင့် ပါရမီရှင်တစ်ယောက်က ဘယ်လိုလုပ်ပြီး ဒီနေရာမှာ ကျဆုံးလို့ဖြစ်ပါ့မလဲ...”

ဤမိန်းမသည် သာမန်လူများအတွက် ဤအဆင့်အထိ လုပ်ဆောင်မည်ဟု သူ လုံးဝ ထင်မှတ်မထားခဲ့ပေ။

ဤသည်မှာ သေချာပေါက် အရူးလုပ်ရပ်ပင် ဖြစ်၏။

"ဟုတ်တယ်၊ ဖုန်းရှီးတာအိုရောင်းရင်း။ ကျုပ်တို့လူသားမျိုးနွယ်အတွက် ခင်ဗျား ဘယ်လောက်အရေးကြီးတယ်ဆိုတာ သိပါလိမ့်မယ်။ ဒီသာမန်လူတွေနဲ့အတူ လိုက်မသေပါနဲ့...”

ဟာယွန်းတာအိုအရှင်ကလည်း တားဆီးလိုက်လေသည်။

မည်သို့ပင်ဖြစ်စေ လူသားမျိုးနွယ်တစ်ခုလုံးတွင် ခန္ဓာပေါင်းစည်းခြင်းအဆင့် ပါရမီရှင် တစ်ရာကျော်သာ ရှိသောကြောင့် တစ်ဦးကျဆုံးသွားလျှင်ပင် ဆုံးရှုံးမှု ကြီးမားလွန်းလှပေသည်။ ဖုန်းရှီးတာအိုအရှင်ကဲ့သို့ အလွန်တရာ အစွမ်းထက်သော ခန္ဓာပေါင်းစည်းခြင်းအဆင့် ပါရမီရှင်မျိုးဆိုလျှင် ပို၍ပင် ပြောဖွယ်မရှိတော့ချေ။

"ကျွန်မ ဆုံးဖြတ်ပြီးသွားပြီ၊ တားဆီးဖို့ မလိုတော့ပါဘူး။ ပြီးတော့ ဒီကပ်ဘေးကို ကျွန်မတို့က ဆောင်ကြဉ်းလာတာဖြစ်ပြီး သာမန်လူတွေက အချောင်သပ်သပ် ဘေးဒုက္ခနဲ့ ကြုံတွေ့ခဲ့ရတာပဲ…”

“ဒီအတိုင်း ထွက်သွားမယ်ဆိုရင် ကျွန်မက ဖုန်းရှီးတာအိုအရှင် မဟုတ်တော့ဘူး။ ပိုအရေးကြီးတာက ကျွန်မလည်း ဒီမှာ သေဖို့စောင့်နေတာ မဟုတ်ပါဘူး။ ရှင်တို့ ထွက်သွားပြီးတာနဲ့ ဖုန်းရှီးမြို့တော်တစ်ခုလုံးကို ကြယ်ကွဲပင်လယ်ဆီ ပြောင်းရွှေ့ပစ်မယ်...”

ဖုန်းရှီးတာအိုအရှင်က လေသံအေးအေးဖြင့် ဆိုလိုက်လေသည်။

"ဘာ..."

ဤစကားထွက်လာသည်နှင့်တစ်ပြိုင်နက် ခန္ဓာပေါင်းစည်းခြင်းအဆင့် ပါရမီရှင်များမှာ သူငယ်အိမ်များ ကျုံ့ဝင်သွားကာ ဖုန်းရှီးတာအိုအရှင်ကို မယုံကြည်နိုင်စွာ စိုက်ကြည့်လိုက်ကြတော့သည်။

'ကြယ်ကွဲပင်လယ်' ဟု ခေါ်သောနေရာမှာ ဝိညာဉ်ကမ္ဘာ၏ အဆုံးအစမဲ့ ကျယ်ပြောလှသော ပင်လယ်ပြင်ကြီးတစ်ခုပင် ဖြစ်၏။ ဝိညာဉ်ကမ္ဘာတွင် ကုန်းမြေတိုက်ကြီး လေးခုသာ ရှိသော်လည်း တိုက်ကြီးများအကြားတွင် အလွန်ကျယ်ဝန်းသော ပင်လယ်ပြင်ကြီးများ ရှိနေသည်။ ဤပင်လယ်ပြင်မှာ 'ကြယ်ကွဲပင်လယ်' ပင် ဖြစ်ချေသည်။

ရှေးဟောင်းဒဏ္ဍာရီများအရ ထိုပင်လယ်ပြင်သို့ အင်မော်တယ်များ ဆင်းသက်လာကာ ကြယ်တာရာများကို ဖမ်းယူဆုပ်ကိုင်၍ တိုက်ပွဲများ ဆင်နွှဲခဲ့ကြဖူးသည်ဟု ဆိုကြ၏။

ကောင်းကင်ယံမှ ကြယ်တာရာများ တစ်လုံးပြီးတစ်လုံး ကြွေကျလာကာ ကျွန်းစုများ ဖြစ်ပေါ်လာခဲ့သည်။ ထိုကျွန်းစုများမှာ ကောင်းကင်ရှိ ကြယ်တာရာများကဲ့သို့ ပင်လယ်ပြင်အနှံ့ ပျံ့နှံ့တည်ရှိနေသောကြောင့် 'ကြယ်ကွဲပင်လယ်' ဟု ခေါ်တွင်ခြင်းပင်။

သို့သော် 'ကြယ်ကွဲပင်လယ်' သည် 'ချန်းလုံတိုက်ကြီး' ထက် ပို၍ အန္တရာယ်များလေသည်။ အဆုံးမဲ့သော ပင်လယ်ပြင်ထဲတွင် မရေမတွက်နိုင်သော သန်မာသည့် မျိုးနွယ်စုများသာမက ကြောက်မက်ဖွယ်ကောင်းသော ရှေးဟောင်းသားရဲကြီးများနှင့် ထူးဆန်းသော ရာသီဥတုများလည်း ရှိနေပေသည်။

အကယ်၍ လုံလောက်သော အစွမ်းမရှိပါက 'ကြယ်ကွဲပင်လယ်' ထဲတွင် အချိန်မရွေး အသက်ဆုံးရှုံးသွားနိုင်၏။ ထိုနေရာတွင် အခြေချနိုင်သော မျိုးနွယ်စုများမှာလည်း အလွန်အမင်း အစွမ်းထက်ကြလေသည်။ လူသားမျိုးနွယ်သည်ပင် ထိုပင်လယ်၏ အနက်ရှိုင်းဆုံးနေရာများသို့ သွားရောက်ရန် မဝံ့ရဲကြချေ။

"ဖုန်းရှီးမြို့တော်က စက်မှုမြို့တော်ဖြစ်လို့ လေထဲမှာ ပျံသန်းနိုင်တယ်ဆိုပေမဲ့ မိုးကြိုးတောင်တန်းကနေ ကြယ်ကွဲပင်လယ်အထိခရီးက အရမ်းဝေးလွန်းတယ်။ ဒါ့အပြင် မြို့တော်ရဲ့ ပျံသန်းနှုန်းကလည်း နှေးကွေးလွန်းတော့ ရန်သူတွေက အလွယ်တကူ လိုက်မီသွားနိုင်တယ်…”

“ခင်ဗျားက ဖုန်းရှီးမြို့တော်မှာ ကြယ်ကွဲပင်လယ်ကို တိုက်ရိုက်သွားနိုင်တဲ့ တည်နေရာပြောင်းအစီအရင်ကို ကြိုတင်ပြင်ဆင်ထားလို့လား...”

ရှန်စွမ်းတာအိုအရှင်က မျက်မှောင်ကြုတ်လျက် ပြောလိုက်၏။

ရှန်စွမ်းတာအိုအရှင်က ဖုန်းရှီးတာအိုအရှင်ကို စိုက်ကြည့်လိုက်၏။ သူသည် အကြိမ်ကြိမ် ဗေဒင်ဟောကိန်းထုတ်ကြည့်ရာ၌ အံ့ဩဖွယ်ကောင်းသော ရလဒ်များကို မြင်တွေ့လိုက်ရခြင်းပင်။

ဖုန်းရှီးမြို့တော်သည် ဤတစ်ကြိမ်တွင် သေမင်းတံခါးဝမှ ပြန်လည်လွတ်မြောက်နိုင်မည့် အခွင့်အရေးရှိနေသည်။ အကယ်၍ ကြယ်ကွဲပင်လယ်သို့ တကယ်တမ်း ပြောင်းရွှေ့နိုင်ခဲ့ပါက ဤကပ်ဘေးမှ သေချာပေါက် လွတ်မြောက်နိုင်မည် ဖြစ်၏။