တစ်ယောက်လုပ်ရပ် တစ်ယောက်တာဝန်ယူရမယ် ၂

ဤမြင်ကွင်းကို မြင်လိုက်ရသောအခါ အချိန်အတော်ကြာ လှုပ်ရှားမှုမရှိခဲ့သော အမည်ခံစစ်သူကြီးများစွာက ပြန်လည် နိုးကြားလာခဲ့ကြ၏။

"စုန်းဖုန်းစီရင်စု တိုက်ပွဲမှာ ငါတို့ နတ်ဘုရားမင်းဆက်က နန်ယန်စစ်သူကြီးရဲ့ဂုဏ်သတင်းက အဲဒီ အယုတ်တမာကောင်တွေရဲ့ ဝံပုလွေလို ရည်မှန်းချက်တွေကို ချေမှုန်းပစ်ဖို့ လုံလောက်ခဲ့တယ်။ လမ်းစဉ်သုံးသွယ်က အဆက်မပြတ် အတွင်းရေးပဋိပက္ခတွေဖြစ်ပြီး အကြီးအကျယ် အားနည်းနေချိန်မှာ နတ်ဘုရားမင်းဆက်အတွက် လောကကြီးကို ငြိမ်းချမ်းအောင် လုပ်နိုင်ဖို့ မျှော်လင့်ချက် ရှိလာပြီ" အောက်ဘက်မှ ဆွေးနွေးမှုများကို ကြားသောအခါ အဘိုးယန်လန်ထင်က နောက်ဆုံးတွင် မျက်ခုံးများကို ပင့်လိုက်သည်။

အချိန်အတော်ကြာ အထီးကျန်စွာ နေထိုင်ခဲ့ပြီးနောက် သူက ရှန်းယီ၏လုပ်ရပ်များကို အတော်လေး နားလည်သဘောပေါက်ခဲ့ပြီ ဖြစ်၏။

တိုက်ဆိုင်စွာတွေ့ဆုံခဲ့သော ထိုလူငယ်လေးက မဟာတောင်ပိုင်းတိုက်ကြီး တစ်ခုလုံးတွင် နာမည်ကျော်ကြားသော ပုဂ္ဂိုလ်တစ်ဦးဖြစ်လာခဲ့ပြီ ဖြစ်သည်။ လူငယ်မျိုးဆက်များထဲတွင် ကျားနဂါးဖိနှိပ်ခြင်းမဟာအလင်းဘုရင်နှင့် ထိုက်ရွှီဆေးဧကရာဇ်တို့သာ သူ့ကို ယှဉ်ပြိုင်နိုင်စွမ်း ရှိ၏။

သို့သော် သူတို့နှစ်ဦးစလုံးက ကျမ်းစာပို့ဆောင်စဉ်အတွင်း ပျောက်ကွယ်သွားခဲ့ပြီး ယနေ့တိုင် ပျောက်ဆုံးနေဆဲပင်။

ထို့ကြောင့် ရှန်းယီက လူငယ်မျိုးဆက်များထဲတွင် ပထမနေရာ၌ ထိုက်တန်စွာ ရှိနေသည်။

ဤကဲ့သို့သော ခွန်အားက တတိယအဆင့် ကျွမ်းကျင်သူများကို မခြိမ်းခြောက်နိုင်ကြောင်း ရှင်းလင်းနေသော်လည်း တတိယအဆင့်ရှိသူများထဲတွင် မည်သူက အခြားသူများအတွက် စမ်းသပ်ခံတစ်ဦးအဖြစ် စွန့်စားလုပ်ဆောင်လိုမည်နည်း။

သာမာန်အတွေးဖြင့်ဆိုလျှင် ဤကပ်ဘေးက ပြေလည်သွားပြီဟု သတ်မှတ်နိုင်ပါသည်။

ယခု စားပွဲပေါ်ရှိ စာရွက်စာတမ်းများက လူတိုင်း၏အတွေးများကို အတည်ပြုနေသကဲ့သို့ပင်။

"ငါ မင်းကိုသဘောမကျရင်တောင်မှ တောင်ပိုင်းတိုက်ကြီး တည်ငြိမ်နေတာ မင်းကြောင့်ဆိုတာ ဝန်ခံရမယ်"

ရန်မင်လီက သူ၏အကြည့်ကို ညာဘက်သို့ ပို့လိုက်သည်။

ယန်လန်ထင်က ပေါ့ပေါ့ပါးပါးလှမ်းကြည့်လိုက်ပြီး ပြန်ဖြေရန်ပင် ပျင်းရိနေ၏။ "အခုမှ ဒီအဘိုးကြီးရဲ့ထက်မြက်တဲ့ အမြင်ကို သဘောပေါက်လာတာလား၊ နောက်ကျသွားပြီ"

"..."

အဘိုးအို၏ဂုဏ်ယူနေသော အသွင်ကို မြင်လိုက်ရသဖြင့် ရန်မင်လီက ခေါင်းကိုညင်သာစွာ ယမ်းလိုက်ပြီး နန်ယန်စစ်သူကြီးကို မျက်နှာသာပေးသည့်အနေဖြင့် သူနှင့် မငြင်းခုံတော့ပေ။

"ဒါနဲ့ သူ ပြန်ရောက်နေပြီလား" ပြိုင်ဘက်အိုကြီး နှစ်ဦးကြားရှိလေထုက နောက်ဆုံးတွင် အနည်းငယ် သက်သာသွားသည်ကို မြင်သောအခါ ဖုန်းရှီက ပြုံးကာ မမေးဘဲ မနေနိုင်ခဲ့ပေ။

"သေချာမသိဘူး၊ ငါတို့ ကိုယ့်ကိစ္စကိုပဲ အာရုံစိုက်သင့်တယ်" ရန်မင်လီက တိုးညှင်းစွာပြန်ဖြေလိုက်၏။ ကျန်းယန်စီရင်စုတွင် နောက်ဆုံးတွေ့ဆုံပြီးကတည်းက သူက နန်ယန်စစ်သူကြီးထံ အာဏာလွှဲပြောင်းပေးရန် တွေးတောခဲ့သော်လည်း တစ်ဖက်လူက လက်မခံလိုသည့်အတွက်သာ ဝမ်းနည်းနေမိသည်။

သို့သော် သူ၏စိတ်နှလုံးထဲတွင် တစ်ဖက်လူကို အတိတ်က ဂျူနီယာတစ်ဦးအဖြစ် မဟုတ်ဘဲ အားကိုးရသောအဆင့်တူတစ်ဦးအဖြစ် သတ်မှတ်ထားဆဲ ဖြစ်၏။

ထို့ကြောင့် နန်ယန်က စကားပြောလာပြီး လုံးဝ ကိုယ်ပိုင်ဆုံးဖြတ်ခွင့်လိုအပ်ကြောင်း ပြောသောအခါ ရန်မင်လီက နောက်ထပ် ဝင်ရောက်စွက်ဖက်ခြင်းမပြုတော့ဘဲ တစ်ဖက်လူကိုယ်စား အင်ပါယာခုံရုံးသို့ ရှင်းပြရန် စာရွက်စာတမ်းများကိုပင် ကိုယ်တိုင် ရေးဆွဲပေးခဲ့သည်။

ထိုအခိုက်အတန့်တွင် တံခါးပေါက်ရှိ အမည်ခံစစ်သူကြီးထံမှ ကျယ်လောင်သော ကြေညာသံတစ်ခု ထွက်ပေါ်လာ၏။ "နန်ယန်စစ်သူကြီးထံမှ သခင်ယန် ဖတ်ရှုဖို့ လျှို့ဝှက်စာတစ်စောင် ပို့ဆောင်ပေးဖို့ ဘုန်းကြီးတစ်ပါး ရောက်လာပါတယ်"

ဤစကားသံများ ထွက်ပေါ်လာသည်။

လူအုပ်ထဲတွင် တိတ်ဆိတ်နေသော ယဲ့လန်က ရုတ်တရက်လှည့်ကြည့်လိုက်ပြီး အင်္ကျီလက်ကို တင်းကျပ်စွာ ဆုပ်ကိုင်ထားသော လက်ချောင်းငါးချောင်းက တိတ်ဆိတ်စွာအနည်းငယ် ဖြေလျော့သွား၏။

နောက်ဆုံးတော့ ပြန်ရောက်လာပြီပဲ...

"သူတို့ကို အမြန် ဖိတ်ခေါ်လိုက်ပါ" ဖုန်းရှီက တိုက်ရိုက် မတ်တပ်ရပ်လိုက်၏။ လက်ရှိ အခြေအနေတွင် ဘုန်းကြီးတစ်ပါး၏ကိုယ်ရေးအချက်အလက်က အလွန် အကဲဆတ်သော်လည်း နန်ယန်ဟူသော စကားလုံးကို ဖော်ပြထားသရွေ့ အခြေအနေက လုံးဝ ကွဲပြားသွားပြီ ဖြစ်၏။

မကြာမီ အမည်ခံစစ်သူကြီး၏ဦးဆောင်မှုအောက်တွင် ဘုန်းကြီးလေးကျစ်ခုန်းက ခန်းမကြီးအတွင်းသို့ လျင်မြန်စွာ လျှောက်ဝင်လာသည်။

ရန်မင်လီ၏ဆန့်တန်းထားသော လက်ဖဝါးကို ရင်ဆိုင်ရချိန်တွင် သူက လေးနက်စွာ ဦးညွှတ်လိုက်ပြီးနောက်ညာဘက်ရှိ အဘိုးအိုထံသို့ လှည့်သွားကာ လျှို့ဝှက်စာကို ထုတ်ယူပြီး ကမ်းပေးလိုက်၏။

"ဟမ့်"

ယန်လန်ထင်က မောက်မာစွာမျက်ခုံးပင့်လိုက်ပြီး လျှို့ဝှက်စာကိုယူရန် လက်မလှမ်းမီ ယန်ရင်လီကို လှမ်းကြည့်လိုက်၏။

အဘိုးအို၏ကလေးဆန်သော အမူအကျင့်ကို မြင်လိုက်ရသဖြင့် ရန်မင်လီက အနေခက်စွာလက်ကို ပြန်ရုပ်လိုက်ပြီး ဒေါသမထွက်ဘဲ လျှို့ဝှက်စာကိုသာ စူးစိုက်ကြည့်နေ၏။

ဖုန်းရှီနှင့်အတူ အခြား နတ်ဆိုးသုတ်သင်ရေးဗျူရို သံတမန်များကလည်း အနည်းငယ်မျှော်လင့်ချက်များဖြင့် ကြည့်နေကြသည်။

နတ်ဘုရားကဲ့သို့ ကျွမ်းကျင်သော ဤနန်ယန်စစ်သူကြီးက ယခုတစ်ကြိမ် မဟာတောင်ပိုင်းတိုက်ကြီးအတွက် မည်ကဲ့သို့သော အံ့သြစရာမျိုး ယူဆောင်လာမည်ကို မသေချာပေ။

ယဲ့လန်၏မျက်နှာကသာ အနည်းငယ် ပြောင်းလဲသွား၏။

ရှန်းယီအပေါ် သူမ၏နားလည်မှုအရ သူက အမှန်တကယ်တော့ အလွန် ဆန့်ကျင်ဘက်ဖြစ်နေသော လူတစ်ဦး ဖြစ်သည်။ အရေးကြီးသော ကိစ္စများတွင် တောင်ပိုင်းကာကွယ်ရေး စစ်သူကြီးချုပ်အသစ်က အနားမယူသကဲ့သို့ အလုပ်များနေတတ်သော်လည်းအချို့သော ကိစ္စရပ်များတွင် သူက အတိုင်းအတာတစ်ခုအထိ ပျင်းရိနေတတ်၏။

ဥပမာအားဖြင့် သူပြန်ရောက်ချိန်တွင် အခြားသူများကိုစိတ်အေးစေရန် နှုတ်ဆက်ခြင်းက ရှန်းယီ၏အမူအကျင့်နှင့် သိပ်မတူပေ။

မထွက်ခွာမီက သူက နတ်ဆိုးသုတ်သင်ရေးအမိန့်ပြားကို လုံခြုံစွာသိမ်းဆည်းထားရန် သူမထံ ယုံကြည်စွာ အပ်နှံခဲ့လောက်အောင်ပင် သတိထားခဲ့၏။

မျှော်လင့်ထားသည့်အတိုင်းပင် လျှို့ဝှက်စာကို ဖွင့်လိုက်သောအခါ..

ယန်လန်ထင်က အကြောင်းအရာကို ဂရုတစိုက် ဖတ်ရှုလိုက်ရာ အနည်းငယ်ဂုဏ်ယူနေသော သူ၏မျက်နှာက သိသိသာသာ မှုန်ကုပ်သွားသည်။

သူ၏နဖူးပေါ်တွင် ချွေးပေါက်များပင် ထွက်ပေါ်လာ၏။

"ဒီမှာ ဘာတွေဖြစ်နေတာလဲ" ရန်မင်လီက တစ်စုံတစ်ခု မှားယွင်းနေကြောင်း သတိပြုမိပြီး စားပွဲအနောက်မှ အလျင်စလို ထွက်လာခဲ့သည်။

"..."

ဤစာကို သူ၏ဆုံးဖြတ်ချက်အတိုင်း ကိုင်တွယ်ရန် ရှန်းယီက ပြောခဲ့သည်ကို တွေ့သောအခါ ယန်လန်ထင်က အချိန်အတော်ကြာတိတ်ဆိတ်နေပြီးနောက် လျှို့ဝှက်စာကို သူ့ထံ ကမ်းပေးလိုက်၏။

တောင်ပိုင်းကာကွယ်ရေး စစ်သူကြီးချုပ်က မဟာတောင်ပိုင်းတိုက်ကြီး၏အထွတ်အထိပ်တွင် ရပ်တည်နေပြီး တိုက်ကြီး၏စီရင်စု နှစ်ဆယ့်ခုနစ်ခုလုံး၏လုံခြုံရေးကို ကြီးကြပ်နေသူ ဖြစ်သည်။

သို့သော် ယခုအခါ စာတစ်စောင်က တောင်ပိုင်းကာကွယ်ရေး စစ်သူကြီးချုပ် နှစ်ဦးကို တူညီစွာ ထိတ်လန့်နေသော အမူအရာများဖော်ပြစေခဲ့၏။

စာကို ကိုင်ထားသော ရန်မင်လီ၏လက်ချောင်းများက အနည်းငယ်တုန်ယင်နေသည်။ "မင်းလာနောက်နေတာလား၊ ဒါက ဘယ်လိုလုပ် ဖြစ်နိုင်မှာလဲ"

"ပြောစမ်းပါ" ဖုန်းရှီက တိုးညှင်းစွာပြစ်တင်ပြောဆိုလိုက်၏။ ပြဿနာက မည်မျှပင်ကြီးမားပါစေ မိမိဤမျှတုန်လှုပ်စရာ အကြောင်းမရှိပေ။

အောက်ဘက်ရှိ အမည်ခံစစ်သူကြီးများစွာ၏ မျက်နှာအရောင်များ တညီတညွတ်တည်း ပြောင်းလဲသွားသည်ကို မမြင်ဘူးလော။

"တတိယအဆင့် နတ်ဆိုးအရှင်ရှစ်ပါး... ဗောဓိဂိုဏ်းနဲ့မသေမျိုးသုံးပါးဂိုဏ်းက အရမ်းမြင့်မြတ်ကျွမ်းကျင်ရင်တောင်မှ ဒီလောက်များပြားတဲ့ ပြိုင်ဘက်ကင်းမဟာနတ်ဆိုးကြီးတွေကို ဘယ်ကနေ စုဆောင်းနိုင်မှာလဲ" ရန်မင်လီက လှည့်လိုက်ပြီး သူ၏အသံက စူးရှနေ၏။

သူက နန်ယန်စစ်သူကြီးကို မယုံကြည်ခြင်း မဟုတ်ဘဲ စာ၏အကြောင်းအရာက အလွန် ထူးဆန်းပြီး အဓိပ္ပာယ်မဲ့လွန်းနေသောကြောင့်ပင်။

မဟာတောင်ပိုင်းတိုက်ကြီးရှိ မျက်နှာမပြဘဲ နေထိုင်သော နတ်ဆိုးအရှင်များ အားလုံးကို ထည့်တွက်လျှင်ပင် ဤမျှကြောက်မက်ဖွယ်ကောင်းသော အရေအတွက် မရှိပေ။

"ဟူး"

ဖုန်းရှီက နှုတ်ခမ်းကို ကိုက်လိုက်ပြီး သူမ၏မျက်နှာက ရုတ်တရက် ဖြူရော်သွား၏။

သူမက အချိန်အတော်ကြာ တုံ့ဆိုင်းနေပြီးနောက် ရုတ်တရက် ပြောလိုက်သည်။ "လှုပ်ရှားနေတာ အဲဒီလောက်မများပေမယ့် အဲဒါတွေကိုပါ ထည့်တွက်မယ်ဆိုရင်ရော"

ဤစကားကို ကြားသောအခါ ရန်မင်လီနှင့် ယန်လန်ထင်နှစ်ဦးစလုံးက ပြတ်သားစွာ လှမ်းကြည့်လိုက်ကြ၏။

အဲဒါတွေ... ဆိုသည်မှာ အစစ်အမှန် နတ်ဘုရားများ၏ကြီးကြပ်မှုအောက်ရှိ အလွန် ဆိုးသွမ်းသော နေရာများကို ရည်ညွှန်းခြင်းဖြစ်သည်။

"မဖြစ်နိုင်ဘူး၊ အစစ်အမှန် နတ်ဘုရားတွေက ကောင်းကင်တာအိုရဲ့ပြယုဒ်တွေပဲ၊ ကောင်းကင်နိယာမကိုဆန့်ကျင်တဲ့ အလုပ်မျိုးလုပ်ဖို့ ကျန်တဲ့ ဂိုဏ်းနှစ်ခုကဘယ်လိုလုပ် ပူးပေါင်းနိုင်မှာလဲ"

ရန်မင်လီက ငြင်းဆိုရန် အင်္ကျီလက်ကို ချက်ချင်း ဝှေ့ယမ်းလိုက်ပြီး အေးစက်စွာ ပြောလိုက်၏။ "သူတို့ကရူးနေလို့ အစစ်အမှန် နတ်ဘုရားရဲ့နှာခေါင်းအောက်မှာ ပြဿနာသွားရှာရဲတာကလွဲရင်ပေါ့"

"ဒါဆိုရင် ဒီစာရဲ့ အကြောင်းအရာကို ဘယ်လို ရှင်းပြမလဲ" ဖုန်းရှီက မျက်မှောင်ကြုတ်ကာ လှမ်းကြည့်လိုက်သည်။

"စာ... နန်ယန်စစ်သူကြီးရဲ့ပြိုင်ဘက်ကင်းတဲ့ အနေအထားနဲ့တောင်မှ ဘယ်လိုဘဲဖြစ်စေ ငယ်ရွယ်သေးတော့ သူ မှားယွင်းစွာ အကဲဖြတ်မိတဲ့ အချိန်တွေ ရှိကောင်း ရှိနိုင်ပါတယ်" ရန်မင်လီက ခေါင်းမာနေပုံရသော်လည်း အမှန်တကယ်တော့ ဤကိစ္စကို လုံးဝအကြောင်းပြချက် မရှိဟု သူ ထင်မြင်နေခြင်းသာ ဖြစ်၏။

"ဒါက လူငယ်တပည့် တစ်စုဆုံးရှုံးသွားတာ သက်သက်ပဲ။ သူတို့က အရှုံးမပေးချင်ရင်တောင်မှ ဖြည်းဖြည်းချင်းကြံစည်ပြီး ရှေ့ဆက်ဖို့ နည်းလမ်းအများကြီး ရှိပါသေးတယ်။ ဘာလို့ ဒီလောက်ကြီးမားတဲ့ အန္တရာယ်ကို ယူဖို့ ရွေးချယ်ရတာလဲ"

"အကြောင်းပြချက်လား" အသံက ခန်းမကြီးထဲတွင် ပဲ့တင်ထပ်သွား၏။

ယန်လန်ထင်၊ ယဲ့လန်နှင့် ခန်းမထဲရှိ ဘုန်းကြီးလေးတို့အပါအဝင် လူအနည်းငယ်၏မျက်နှာများ ပြောင်းလဲသွားသည်ကို ရန်မင်လီက ရုတ်တရက် သတိပြုမိသွားသည်။

အဘိုးကြီးယန်က ခေါင်းငုံ့ကာ သူ၏လက်ဖဝါးများကို စူးစိုက်ကြည့်နေ၏။

ကျန်းယန်စီရင်စုတွင် ထိုစဉ်က သူတွေ့ခဲ့သော အနက်ရောင်ခွေးကို ရုတ်တရက် ပြန်လည် အမှတ်ရမိသွားသည်။

ယဲ့လန်ကမူ ရွှေရောင်သပိတ်အောက်တွင် နစ်မြုပ်သွားသော ရှန်းရွှီဘိုးဘေးကို ပြန်လည် အမှတ်ရနေ၏။

ဖြစ်နိုင်သည်မှာ... ဤအရာများက ရန်မင်လီ ဇဝေဇဝါဖြစ်နေရသည့် အကြောင်းရင်း ဖြစ်နိုင်သည်။

သို့သော် သူတို့နှစ်ဦးစလုံးက တစ်ပြိုင်နက်တည်း တိတ်ဆိတ်နေကြ၏။

ဤသတင်း ထွက်ပေါ်သွားသည်နှင့် ရှန်းယီက မဟာတောင်ပိုင်းတိုက်ကြီး တစ်ခုလုံး၏အဓိက ကုသိုလ်ရှင်သူရဲကောင်းအဖြစ်မှ လူသတ်ပွဲကို လှုံ့ဆော်ခဲ့သော ရာဇဝတ်ကောင်အဖြစ်သို့ ပြောင်းလဲသွားဖွယ်ရှိကြောင်း နှစ်ဦးစလုံး သိထားကြ၏။

"မင်းတို့... မင်းတို့အားလုံး ဒီအဘိုးကြီးဆီကနေ ဖုံးကွယ်ထားကြတုန်းပဲလား" ရန်မင်လီက လက်ညှိုးထိုးလိုက်ပြီး သူ၏တစ်ကိုယ်လုံး တုန်ယင်နေ၏။

"ငါက အတိတ်မှာ အနည်းငယ် ကြမ်းတမ်းခဲ့ကောင်းကြမ်းတမ်းခဲ့နိုင်ပေမယ့် နတ်ဘုရားမင်းဆက်အပေါ် ငါ့ရဲ့ သစ္စာရှိမှုက ဘယ်တော့မှမမှားခဲ့ပါဘူး။ လုပ်ဖော်ကိုင်ဖက်တွေအနေနဲ့ မင်းတို့က ငါ့ကို ဘယ်တုန်းကများ အနည်းငယ်လောက်လေးတောင် ယုံကြည်ခဲ့ဖူးလို့လဲ"

ဤစကားကို ကြားသောအခါ ယန်လန်ထင်က အံကြိတ်လိုက်၏။ သူက တစ်ဖက်လူနှင့် နှစ်ပေါင်းများစွာငြင်းခုံနေခဲ့သော်လည်း တောင်ပိုင်းကာကွယ်ရေး စစ်သူကြီးချုပ်တစ်ဦးအတွက် လုပ်ဖော်ကိုင်ဖက်များ၏မယုံကြည်မှုကို ခံရခြင်းက တစ်ဖက်လူကို သတ်ပစ်ခြင်းထက်ပင် ပိုမို ဆိုးရွားသော အလွန် ရက်စက်သည့် ထိခိုက်မှုတစ်ခု ဖြစ်ကြောင်းကိုလည်း သူ နားလည်ထားသည်။

သို့သော် အချိန်အတော်ကြာ တုံ့ဆိုင်းနေပြီးနောက် သူက တိတ်ဆိတ်စွာဖြင့် တစ်ဖက်သို့ မျက်နှာလွှဲသွားဆဲပင်။

ယဲ့လန်က သူမ၏ခါးရှိ နတ်ဆိုးသုတ်သင်ရေးအမိန့်ပြားကို တင်းကျပ်စွာဆုပ်ကိုင်ထား၏။

"မင်းတို့..." ရန်မင်လီက တယိမ်းတယိုင်ဖြင့် အနောက်သို့ခြေလှမ်းအနည်းငယ် ဆုတ်သွားပြီး စားပွဲနှင့် ဝင်တိုက်မိကာ သူ၏မျက်လုံးများက သွေးရောင်လွှမ်းနေပြီဖြစ်သည်။

ဤအခိုက်အတန့်တွင် အံ့အားသင့်နေသော နတ်ဆိုးသုတ်သင်ရေးဌာန အရာရှိများကြားမှ ဘုန်းကြီးလေးကျစ်ခုန်းက ရှေ့သို့ ခြေလှမ်းအနည်းငယ် ထပ်မံတိုးလာခဲ့၏။

မထွက်ခွာမီ အရာရှိရှန်း၏ညွှန်ကြားချက်များကို ပြန်လည် အမှတ်ရမိသည်။

သူက သက်ပြင်းချကာ မျက်လုံးများကိုဖြည်းညှင်းစွာ ပင့်လိုက်၏။ "နန်ယန်စစ်သူကြီးက တစ်ချိန်က မဟာတောင်ပိုင်းတိုက်ကြီးအပြင်ဘက်မှာ ဗောဓိဂိုဏ်းက လက်တစ်ထောင် ဗောဓိသတ္တကို ခေါင်းဖြတ်သတ်ခဲ့ပြီး ကျန်းယန်စီရင်စုမှာ ရှန်းရွှီတောင် ဘိုးဘေးရဲ့ တာအိုခန္ဓာကိုယ်ကို ဖျက်ဆီးခဲ့ပါတယ်"

"ဒါတွေက သခင်ယန်ဇဝေဇဝါဖြစ်နေတဲ့ အကြောင်းရင်းတွေ ဖြစ်ပါမယ်"

"စာရဲ့အကြောင်းအရာက စကားလုံး တစ်လုံးမှ အလွဲအမှား မရှိပါဘူး၊ လူတိုင်း ငြင်းခုံနေတာကို ရပ်ပြီး စောစောစီးစီးပြင်ဆင်ကြဖို့ ကျုပ်တိုက်တွန်းပါတယ်"

ထိုသို့ ပြောဆိုပြီးနောက် ယန်လန်ထင်၏ သတ်ဖြတ်လိုသော အကြည့်နှင့် ရုတ်တရက် ဓားရိုးပေါ် ရောက်သွားသော ယဲ့လန်၏လက်ကို ရင်ဆိုင်ရချိန်တွင် ဘုန်းကြီးလေးကျစ်ခုန်းက သူ၏ လက်ဖဝါးများကို နောက်တစ်ကြိမ် ယှက်ကာ လူတိုင်းကို ထပ်မံ ဦးညွှတ်လိုက်၏။

ဤစကားများက အရာရှိရှန်း၏ညွှန်ကြားချက်များ ဖြစ်သည်။

နတ်ဘုရားမင်းဆက်သို့ ယခုလေးတင် ဝင်ရောက်လာပြီး စီရင်စုနှစ်ဆယ့်ခုနစ်ခုကို စောင့်ကြပ်နိုင်သူက တာဝန်ကို ရှောင်လွှဲရန် ဘယ်သောအခါမျှ မတွေးခဲ့ဖူးပေ။