အခန်း (၂၅၅-၂၅၆)

အပိုင်း(၂၅၅)

တောင်းဆိုထားသော အချက်အလက် - တရားသူကြီး သတ်ဖြတ်သူများ။

အစီရင်ခံစာ စတင်နေပါပြီ...

ဗရိုရှာ -

ဗရိုရှာ ကမ္ဘာများနှင့် ပတ်သက်သော ကျွန်ုပ်တို့၏ အချက်အလက်များမှာ ကန့်သတ်ချက်များ ရှိနေသည်။ ထို့ကြောင့် ဗရိုရှာ များ၏ စွမ်းဆောင်ရည်များကို အများအားဖြင့် မသိရှိကြသေးပေ။ လက်တစ်ဆုပ်စာမျှသာလျှင် တရားသူကြီး တစ်ဦးနှင့် ရင်ပေါင်တန်းနိုင်သော တိုက်ခိုက်ရေးစွမ်းအားများ ပိုင်ဆိုင်ထားကြောင်း ခန့်မှန်းရ၏။

ငွေရောင်သခင်များသည် သူတို့ သိမ်းပိုက်ထားသော ကမ္ဘာများမှ စစ်တပ်များကို စုဆောင်းလေ့ရှိကြသည်။ ထိုသူများအကြားတွင် အော့ဇရီရယ် သတိလက်လွတ်ဖြစ်နေချိန် ဖမ်းဆီးနိုင်စွမ်းရှိသော ကျွမ်းကျင်သူများနှင့် လုပ်ကြံသတ်ဖြတ်သူများ ပေါင်းစပ်ပါဝင်နေနိုင်ပေသည်။

မြင်းစီးသူရဲသည် ကမ္ဘာတစ်ခုမှ တစ်ခုသို့ သွားလာကာ စွမ်းအင်စနစ်များကို စုဆောင်းပြီး ၎င်းတို့၏ အကျိုးသက်ရောက်မှုများကို ပုံတူကူးယူလေ့ရှိသည်။ သူသည် ပျက်စီးသွားသော ကမ္ဘာ အနည်းဆုံး ဆယ့်သုံးခုမှ စွမ်းဆောင်ရည်များကို ပြသနိုင်ခဲ့၏။ အချို့သော အခြေအနေများအောက်တွင် သူသည် အော့ဇရီရယ် ၏ ကာကွယ်မှုကို ကျော်ဖြတ်နိုင်စွမ်း ရှိကောင်း ရှိနေနိုင်သည်။

အရူး ဘုရင် သည် ယခင်က တရားသူကြီး များကို သတ်ဖြတ်ခဲ့ဖူးသော အရာတစ်ခုကို သူ၏ကိုယ်တွင်း၌ လက်ခံထားရှိသူ ဖြစ်သည်။ သို့သော် သူ၏ ကမ္ဘာစဉ် ကို စွန့်ခွာသွားခဲ့ပါက အဘီဒန် တရားရုံး သို့ အသိပေးအကြောင်းကြားမှု ရောက်ရှိလာမည် ဖြစ်၏။ အကယ်၍ သူသည် ကဏ္ဍ ထိန်းချုပ်ရေး ကို အသိမပေးဘဲ မဟာလမ်းစဉ် ကို ဖြတ်ကူးရန် နည်းလမ်းတစ်ခု ရှာတွေ့ခဲ့မည်ဆိုလျှင် သူသည် အဆင့်တစ် ခြိမ်းခြောက်မှုကြီး တစ်ခု ဖြစ်လာပေမည်။

ငါးမျှားသူသည် အဘီဒန် ကမ္ဘာစဉ် များမှ လက်နက် ခြောက်ခုကို ခိုးယူခဲ့ပြီး လွတ်မြောက်နေဆဲ ဖြစ်သည်။ အတည်ပြုထားသော သူမ၏ လက်နက်တိုက်ထဲတွင် ရိတ်သိမ်းသူ(အော့ဇရီရယ်) ကို ခြိမ်းခြောက်နိုင်စွမ်းရှိသော အရာ မရှိပေ။ သို့သော် တရားရုံး ၏ အသိပညာထက် ကျော်လွန်သော အခြား လက်နက်များကို သူမ ပိုင်ဆိုင်ထားမည်မှာ သေချာလှ၏။

ကမောက်ကမ မိစ္ဆာများ -

အစစ်အမှန် မိစ္ဆာများသည် သဘာဝအားဖြင့် အမျိုးအစားခွဲခြား၍ မရနိုင်ပေ။ တရားသူကြီး များကို ခြိမ်းခြောက်နိုင်စွမ်းရှိသည်ဟု သိထားသော တစ်ခုတည်းသော မိစ္ဆာများမှာ အက်ဆိုင်းလမ် တွင် အကျဉ်းချခံထားရဆဲ ဖြစ်သည်။ ထို့အပြင် မည်သည့် မိစ္ဆာကမျှ မဟာလမ်းစဉ် ကို မနှောင့်ယှက်ဘဲ ဖြစ်တည်မှုတစ်ခုအတွင်းသို့ ဝင်ရောက်နိုင်စွမ်း မရှိခဲ့ချေ။ ပင့်ကူ တပ်ဖွဲ့ ကလည်း လစ်မစ် မပျက်စီးမီက ဟာရိုး သို့မဟုတ် လစ်မစ် အနီးတွင် ထိုကဲ့သို့သော ကျူးလွန်ဖောက်ဖျက်မှုမျိုး ရှိခဲ့ကြောင်း အစီရင်ခံထားခြင်း မရှိပေ။

အကယ်၍ အော့ဇရီရယ် နှင့် တိုက်ခိုက်နိုင်စွမ်းရှိသော မိစ္ဆာ တစ်ကောင်သည် မဟာလမ်းစဉ် ကို မသိမသာ ဖြတ်သန်းသွားခဲ့မည်ဆိုလျှင် လက်ရှိ ကန့်သတ်တားဆီးမှု အဆင့်များသည် လုံလောက်တော့မည် မဟုတ်ပေ။ စနစ်ကြီးတစ်ခုလုံး ပြိုကျပျက်စီးမှုကို ပြင်ဆင်ရန်အတွက် အခြား တရားသူကြီး များကို ဆက်သွယ်ရမည် ဖြစ်၏။

အဘီဒန် -

လုံခြုံရေး အကြောင်းပြချက်များကြောင့် တရားသူကြီး တစ်ဦးစီ၏ တိုက်ခိုက်ရေးစွမ်းရည် အလားအလာများကို ဝင်ရောက်ကြည့်ရှုခွင့် မရှိပေ။ သို့သော် လူသိရှင်ကြား ရရှိနိုင်သော အချက်အလက်များမှတစ်ဆင့် ကောက်ချက်ချမှုများ ပြုလုပ်နိုင်ပါသည်။

ဝံပုလွေ ဟု လူသိများသော ရာဇီရယ်သည် ရိတ်သိမ်းသူ ၏ ရုံးခန်းကို စတင်တည်ထောင်ကတည်းက အော့ဇရီရယ် အပေါ် ပုဂ္ဂိုလ်ရေးအရ အငြိုးအတေး ရှိခဲ့သည်။ သူမသည် မဟာလမ်းစဉ် နှင့် ပထမဆုံး အသိစိတ်ဖြင့် မထိတွေ့မီကပင် ကမ္ဘာစဉ် တစ်ခုလုံး၏ လူဦးရေကို ရှင်းလင်းဖျက်ဆီးနိုင်စွမ်း ရှိခဲ့၏။ ထို့အပြင် ရာဇီရယ်၏ ဓားသည် တရားသူကြီး များနှင့် အဆင့်တစ် ခြိမ်းခြောက်မှုများကို ကွပ်မျက်ရန်အတွက် ဒီဇိုင်းထုတ်ထားခြင်း ဖြစ်သည်။ ဝံပုလွေ တပ်ဖွဲ့ တွင် လူသိရှင်ကြား မှတ်တမ်းတင်ထားခြင်း မရှိသော ဖျက်ဆီးနိုင်စွမ်းများစွာ ရှိနေပြီး အော့ဇရီရယ် အနေဖြင့် ၎င်းတို့ကို အထင်သေးမိခြင်း ဖြစ်နိုင်ပေသည်။

ခွေးဘီလူး ဟု လူသိများသော မာကီရယ်... ကံကြမ္မာ ၏ တရားသူကြီး အနေဖြင့် သူသည် အော့ဇရီရယ် ၏ ဟောကိန်းထုတ်နိုင်စွမ်းကို ရင်ပေါင်တန်းနိုင်သော တစ်ဦးတည်းသော သူ ဖြစ်သည်။ တိုက်ခိုက်ရေး စွမ်းအား တစ်ခုတည်းနှင့်ပင် သူသည် ရာဇီရယ် ၏ နေရာကို ယူနိုင်စွမ်းရှိသည်ဟု တစ်ခါက သတ်မှတ်ခံခဲ့ရဖူးသည်။ သို့သော် သူက ထို ဂုဏ်ကျက်သရေ ဝတ်ရုံ ကို ငြင်းပယ်ခဲ့၏။ သူသည် အော့ဇရီရယ် ကို အစားထိုးရန် အကြိမ်ကြိမ် ကြိုးစားခဲ့ပြီး အော့ဇရီရယ် အား တရားသူကြီး ရာထူး မပေးရန်အတွက်လည်း တိုက်ပွဲဝင်ခဲ့သည်။ ထို့အပြင် အယ်လီဒါရီ သဘောတူညီချက်အား ပြုပြင်ပြောင်းလဲရန် အော့ဇရီရယ် ၏ အဆိုပြုချက်များအားလုံးကို ဆန့်ကျင်ရာတွင်လည်း ဦးဆောင်ခဲ့၏။ ရိတ်သိမ်းသူ မရှိတော့သည့်အတွက် သူသည် စံသတ်မှတ်နှစ် တစ်နှစ်အတွင်း ပြီးပြည့်စုံမှုမရှိသော အစားထိုးမှုတစ်ခုကို အဆိုပြုလာပေလိမ့်မည်။ တရားဝင်မဟုတ်သော အစီရင်ခံစာများအရ သူသည် သူ၏ကိုယ်ပိုင် တံစဉ် ကို တီထွင်ဖန်တီးနေကြောင်း သိရသည်။

ပုဂ္ဂိုလ်ရေး ဘက်လိုက်မှုများ ပါဝင်နေသောကြောင့် မာကီရယ် နှင့် အော့ဇရီရယ် တို့၏ တွေ့ဆုံမှုသည် ပဋိပက္ခဖြင့် အဆုံးသတ်သွားရန် သေချာသလောက် ရှိနေပေသည်။

အစီရင်ခံစာ ပြီးဆုံးပါပြီ။

...

အစီရင်ခံစာ မှေးမှိန်ပျောက်ကွယ်သွားသည်နှင့်အမျှ ဟာရိုး သည်လည်း ပျောက်ကွယ်သွားခဲ့၏။ ဆူရီရယ် သည် ကြယ်များအစား လည်ပတ်နေသော အရောင်အသွေးစုံ ဘောလုံးများရှိသည့် အာကာသ၏ အမှောင်ထုကဲ့သို့ အမည်းရောင် ဟင်းလင်းပြင်ကြီးထဲတွင် လွင့်မျောနေခဲ့သည်။ ထိုအရာများသည် ကမ္ဘာ့အပိုင်းအစများ ဖြစ်ကြ၏။ ပိုမိုနီးကပ်သော အစက်အပြောက်များထဲမှ တစ်ခုသည် ဟာရိုး မှ ကျိုးပဲ့နေသော အနက်ရောင် ရဲတိုက်ကြီးကို သယ်ဆောင်ထားသည်။ အခြား အပိုင်းအစတစ်ခုမှာမူ အတွင်း၌ ကျွန်းတစ်ကျွန်း ပေါလောပေါ်နေသော တောက်ပသည့် အပြာရောင် ပူဖောင်းတစ်ခု ဖြစ်၏။ ထိုကျွန်းပေါ်မှ ရေများသည် စီးဆင်းသွားပြီး ပူဖောင်းကို ရိုက်ခတ်ကာ မိုးရေများအဖြစ် ကျဆင်းရန်အတွက် အတွင်းဘက်သို့ ကွေးတက်သွားကြသည်။

ကမောက်ကမဖြစ်မှုများ ကြီးထွားနေသော ဤနေရာတွင် မဟာလမ်းစဉ် ၏ စွမ်းအားမှာ အားနည်းနေခဲ့သည်။ အပိုင်းအစတစ်ခုစီတိုင်းသည် စည်းစနစ်နှင့် စွမ်းအင်များ ပါဝင်သော အိတ်ကပ်လေးတစ်ခု ဖြစ်၏။ ၎င်းတို့ကို တစ်နေ့နေ့တွင် ကမ္ဘာစဉ် အသစ်တစ်ခုအဖြစ် နောက်တစ်ကြိမ် ပြန်လည်ပေါင်းစပ်နိုင်ပေလိမ့်မည်။

ဂါဒရယ်၏ အထီးကျန်ဖယ်ခွာနေမှု မရှိတော့သည့်အခါ နတ်ဘုရားပုခက် ထံမှ သူမ၏ အချက်အလက် တောင်းဆိုမှုများသည် တစ်ခုပြီးတစ်ခု ရောက်ရှိလာခဲ့၏။

လင်းတုန်း နှင့် ယီရင် တို့သည် အထွတ်အမြတ် တောင်ကြား မှ အတူတကွ ထွက်ခွာခဲ့ပြီး လူသူကင်းမဲ့သော တောရိုင်းမြေ အတွင်းသို့ ဝင်ရောက်သွားခဲ့ကြသည်။

သူသည် ဒေသခံ ဝိညာဉ်ပန်းပဲဆရာ တစ်ဦးထံမှ ထိုပညာရပ်၏ အခြေခံအကျဆုံး အရာများကို သင်ယူခဲ့ရ၏။

သူတို့သည် ထူးကဲသော ရှေးဟောင်း အပျက်အစီး နှင့် ကြုံတွေ့ခဲ့ရပြီး ထိပ်ဆုံးရှိ ရတနာကို ပထမဆုံး ရယူနိုင်သူများ ဖြစ်လာခဲ့ကြသည်။

လင်းတုန်းသည် အဆင့်မြင့် ရွှေအဆင့် တစ်ဦးကို သတ်ဖြတ်ခဲ့ပြီး ကျင်းလုံ အမည်ရှိ လူငယ်တစ်ဦးနှင့် ပြိုင်ဘက်အဖြစ် စတင်ခဲ့သည်။ ကောင်း၏။ ဖိအားပေးမှုများက သူ့ကို ကြီးထွားလာစေရန် ကူညီပေးလိမ့်မည်။

သူ့ညီမ (ကျင်းချန်) က ပို၍ စိတ်ဝင်စားစရာ ကောင်းပေသည်။ ဆူရီရယ် ၏ ဝင်ရောက်စွက်ဖက်မှုသာ မရှိခဲ့လျှင် သူမသည် နောက်ထပ် နှစ်အနည်းငယ်အကြာတွင် လင်းတုန်း နှင့် တွေ့ဆုံခဲ့ရမည် ဖြစ်၏။

သူတို့ဆက်ဆံရေး၏ တိကျသော သဘောသဘာဝသည် အချက်အလက် အနည်းငယ်အပေါ် မူတည်၍ ပြောင်းလဲသွားနိုင်ပေသည်။ သို့သော် လင်းတုန်း ၏ လမ်းကြောင်းသွေဖည်မှုမှ လွတ်မြောက်နိုင်ရန် သူတို့နှစ်ဦးကြားရှိ ကံကြမ္မာ သည် အတော်လေး ခိုင်မာအားကောင်းနေရမည် ဖြစ်၏။

အနည်းငယ်မျှသာ စိတ်ဝင်စားစရာကောင်းသောအချက် ဖြစ်ပြီး စိုးရိမ်စရာတော့ မရှိပေ။ ကံကြမ္မာ သည် ဤမျှသေးငယ်သော ပြောင်းလဲမှုများကို ဖြစ်ရိုးဖြစ်စဉ် တစ်ခုအဖြစ် ညှိနှိုင်းပေးလေ့ရှိသည်။

လင်းတုန်း နှင့် ကျင်းလုံ တို့အတွက် သူမ၏ လက်ထောက် အကူက ဟောကိန်းထုတ်ပေးထားသော အနာဂတ်ကို အတန်ကြာ ပြန်လည်သုံးသပ်ကြည့်ပြီးနောက် ဆူရီရယ် သည် ကွာဟချက် အနည်းငယ်ကို သတိပြုမိသွားခဲ့၏။ သူမသည် အချက်အလက်များကို ပြန်လည်စစ်ဆေးကာ အပိုအချက်အလက်များကို ဆွဲထုတ်၍ အစီရင်ခံစာများနှင့် နှိုင်းယှဉ်ကြည့်လိုက်သည်။

နောက်ဆုံးတွင် သူမ၏ အလိုအလျောက် တောင်းဆိုချက်များက လစ်လျူရှုထားခဲ့မိသော အရာတစ်ခုကို သူမ ရှာတွေ့သွားခဲ့၏။

အာရီလီယပ် မိသားစု ပင်...။

ငယ်ရွယ်သော အဆင့်နိမ့် အရှင်သခင် တစ်ဦးသည် လင်းတုန်း နှင့် ယီရင် တို့ကို တွေ့ရှိခဲ့၏။ ထို့နောက် သူတို့ကို လက်ခံစောင့်ရှောက်ကာ လေ့ကျင့်ပေးရန်အတွက် မဟူရာ မီးတောက် အင်ပါယာ အတွင်းသို့ ပြန်လည်ခေါ်ဆောင်သွားခဲ့သည်။

ဆူရီရယ် မျက်မှောင်ကြုတ်လိုက်၏။ ၎င်းသည် ပြဿနာတစ်ခု ဖြစ်လာနိုင်သည်။ သူမသည် အာရီလီယပ် မိသားစု နှင့် ရင်းနှီးကျွမ်းဝင်မှု ရှိခဲ့သည်။ သို့မဟုတ် သူတို့၏ ဘိုးဘေးများနှင့် ရင်းနှီးခဲ့ခြင်းဟု ဆိုရမည်။ သူမ၏ ဟောကိန်းထုတ်မှုများထဲမှ မည်သည့်နေရာတွင်မျှ ထိုမိသားစုသည် လင်းတုန်း ၏အနီးအနားသို့ ရောက်ရှိလာခဲ့ခြင်း မရှိပေ။ သူတို့က ဘာအတွက်ကြောင့် ရောက်လာရမည်နည်း။ သူသည် အမည်မသိ နေရာတစ်ခုမှ ထွက်ပေါ်လာသော အားနည်းသည့် ကလေးငယ်တစ်ဦးသာ ဖြစ်သည်။

သူမသည် ဟင်းလင်းပြင် အတွင်း၌ အပြာရောင် အပေါက်တစ်ခုကို ဆွဲဖြဲလိုက်ပြီး မဟာလမ်းစဉ် အတွင်းသို့ ခြေလှမ်းလိုက်၏။ စည်းစနစ်တကျရှိသော စွမ်းအားများသည် သူမ၏အပေါ်သို့ လွှမ်းခြုံသွားပြီး သက်သောင့်သက်သာဖြစ်မှုနှင့် ခွန်အားများကို ပေးစွမ်းသည်။ ထိုစွမ်းအားများသည် သူမ၏ ခန္ဓာကိုယ်နှင့် စိတ်ကို သက်သာရာရစေမှုများဖြင့် စိမ့်ဝင်သွားစေခဲ့၏။

ဤနေရာတွင် သူမသည် လက်တွေ့ကမ္ဘာ၏ ကမ္ဘာစဉ် တိုင်းနှင့် နီးကပ်နေခဲ့သည်။ ထို့ကြောင့် အဖြေအချို့ကို သူမ ရရှိနိုင်ပေမည်။

သူမသည် သူမ၏ လက်ထောက်အကူမှတစ်ဆင့် နတ်ဘုရားပုခက် ထံသို့ ဆက်သွယ်လိုက်သည်။ ထို့နောက် ဝေ့ရှီလင်းတုန်း နှင့် ပတ်သက်သော အချက်အလက်များကို တောင်းဆိုလိုက်၏။

***

အပိုင်း(၂၅၆)

[သိသာထင်ရှားသော လမ်းကြောင်းသွေဖည်မှုများကို ထောက်လှမ်းတွေ့ရှိရပါသည်...]

သူမ၏ လက်ထောက် အကူက ကြေညာလိုက်သည်။

[ဖြစ်တည်မှု ဝေ့ရှီလင်းတုန်း သည် အဓိက လမ်းကြောင်းမှ သွေဖည်သွားခဲ့ပါပြီ... လက်ရှိ အခြေအနေများကို ခွဲခြမ်းစိတ်ဖြာမှု သို့မဟုတ် အနာဂတ် လှုပ်ရှားမှုများအတွက် ဟောကိန်းထုတ်မှုတိုင်းသည် တိကျမှု အဆင့်အတန်း နိမ့်ကျနေပါလိမ့်မည်...]

သူမ တစ်နေရာရာတွင် အမှားတစ်ခုခု လုပ်မိခဲ့ခြင်း ဖြစ်မည်။ သို့သော် သူမ၏ လုပ်ရပ်များကို အမြန် ပြန်လည်သုံးသပ်ကြည့်သောအခါ ဤမျှ ကြီးမားသော အပြောင်းအလဲကို ဖြစ်ပေါ်စေနိုင်သည့် အရာတစ်ခုကိုမျှ မတွေ့ရှိရချေ။ သူမသည် သူ၏ အနာဂတ်ကို ပြောင်းလဲခဲ့သည်မှာ မှန်ပါသည်။ သို့သော် သူ၏ လက်ရှိ အခြေအနေနှင့် ပတ်သက်သော အချက်အလက်များကို သူမ ခေါ်ယူကြည့်ရှုနိုင်စွမ်း ရှိနေသင့်သေး၏။

အကယ်၍ သူမ၏ လက်ထောက်အကူသည် နတ်ဘုရားပုခက် ၏ ကံကြမ္မာ နှင့်ပင် မချိတ်ဆက်နိုင်တော့ပါက တစ်စုံတစ်ခုသည် လမ်းကြောင်းမှ အလွန်အမင်း သွေဖည်သွားခဲ့ပြီ ဖြစ်သည်။ သူမ၏ ယူဆချက်များထဲမှ မည်သည့်အရာကမျှ ထပ်မံ ယုံကြည်စိတ်ချရတော့မည် မဟုတ်ပေ။

ထို့အပြင် သူမ၏ ဟောကိန်းထုတ်မှုများ အားလုံးလည်း မှားယွင်းသွားခဲ့ပြီ ဖြစ်၏။

စိတ်အနှောင့်အယှက်ဖြစ်မှုများ ကြီးထွားလာသည်နှင့်အမျှ သူမသည် ကမ္ဘာစဉ် ၁-၁-၀ ၏ အခြေအနေနှင့် ပတ်သက်သော အထွေထွေ အချက်အလက်များကို တောင်းဆိုလိုက်သည်။

[ကမ္ဘာစဉ် ၁-၁-၀ သည် အဓိက လမ်းကြောင်းမှ သွေဖည်သွားခဲ့ပါပြီ... သက်ဆိုင်ရာ အချက်အလက်တိုင်းသည် တိကျမှု အဆင့်အတန်း နိမ့်ကျနေပါလိမ့်မည်... တိကျသေချာစေရန်အတွက် ကမ္ဘာစဉ် နှင့် တိုက်ရိုက် ဆက်သွယ်ရန် အကြံပြုအပ်ပါသည်...]

ဆူရီရယ် သည် စိတ်အနှောင့်အယှက်ဖြစ်မှု၊ ဒေါသနှင့် မသေချာမရေရာမှုတို့ကို မခံစားရမီ သူမ၏ ရုပ်ပိုင်းဆိုင်ရာ တုံ့ပြန်မှုများကို ဖြတ်တောက်လိုက်၏။

အဘီဒန် တို့သည် အာကာသ သို့မဟုတ် အချိန်ပိုင်းဆိုင်ရာ ဖောက်ဖျက်ကျူးလွန်မှုတစ်ခုကို တုံ့ပြန်ရာတွင် အတိုင်းအတာတစ်ခုအထိ ကိုယ်ပိုင်ဆုံးဖြတ်ခွင့် ရရှိထားကြသည်။ အထူးသဖြင့် တရားသူကြီး များ ဖြစ်ကြ၏။ ကမ္ဘာကြီး၏ ကံကြမ္မာ သည် မူလအတိုင်း မပျက်မယွင်း ရှိနေသရွေ့ လူတစ်ဦးချင်းစီ၏ ဘဝလမ်းကြောင်းများစွာကို ပြောင်းလဲရန် သူမ ခွင့်ပြုချက် ရရှိထားသည်။

သူမ လုပ်ခဲ့သော မည်သည့်အရာကမျှ ထိုကန့်သတ်ချက်များကို ချိုးဖောက်မိမည် မဟုတ်ပေ။ အကယ်၍ ဝေ့ရှီလင်းတုန်းသည် အခက်အခဲအားလုံးကို ကျော်လွှားကာ နတ်ဘုရားပုခက် ကို လွန်မြောက်သွားခဲ့မည်ဆိုလျှင်ပင် အလားအလာရှိသော အဘီဒန် လူသစ်တစ်ဦး တိုးလာခြင်းသာ ဖြစ်ပေလိမ့်မည်။ စကြဝဠာ အတိုင်းအတာအရဆိုလျှင် ၎င်းသည် လုံးဝနီးပါး အရေးမပါသောအရာ ဖြစ်၏။ သူ ထွက်ခွာသွားချိန်တွင် နတ်ဘုရားပုခက် သည်ပင် သတိပြုမိမည် မဟုတ်ချေ။

အခြား တစ်စုံတစ်ခုက ပြောင်းလဲသွားခဲ့ခြင်း ဖြစ်သည်။

ခွေးဘီလူး တပ်ဖွဲ့ က ဤအရာကို မြင်တွေ့သွားပေလိမ့်မည်။ ထို့ကြောင့် သူမသည် နတ်ဘုရားပုခက် ထံသို့ ပြန်သွားပြီး ဤလမ်းကြောင်းသွေဖည်မှု၏ ဇာစ်မြစ်ကို အတိအကျ မရှာဖွေမီ...

သူမ၏ ခေါင်းအရွယ်အစားခန့်ရှိသော မျက်လုံးတစ်လုံးသည် သူမ၏ရှေ့တွင် ရုတ်တရက် ထွက်ပေါ်လာ၏။ အသွင်အပြင်အရ လူ့မျက်လုံးတစ်လုံးဖြစ်ပြီး ဖြူဖွေးသော မျက်ဖြူလွှာ၊ အနက်ရောင် သူငယ်အိမ်နှင့် ခရမ်းရောင် မျက်ဝန်းတို့ ပါဝင်သည်။ မျက်ဝန်း၏ ပတ်လည်တွင် နတ်ဘုရားပုခက် ၏ မှော်သင်္ကေတ စက်ဝိုင်းတစ်ခုကဲ့သို့ သင်္ကေတများဖြင့် ဝန်းရံထား၏။

အမှန်တကယ်တွင် ထိုအရာသည် အရွယ်အစား ပိုကြီးသည်မှလွဲ၍ သူမ၏ မျက်လုံးများထဲမှ တစ်လုံးနှင့် အလွန် တူနေခဲ့သည်။

[တရားသူကြီး သတ်မှတ်ချက် ၀-၀-၆၊ ဆူရီရယ်...]

နှုတ်ခွန်းဆက်သသည့်အနေဖြင့် မာကီရယ် ၏ လက်ထောက်အကူက ပြောလိုက်သည်။

[အောက်ပါ သြဒိနိတ်များဆီသို့ လာရောက်ပေးပါ... တရားသူကြီး သတ်မှတ်ချက် ၀-၀-၁၊ မာကီရယ် က တွေ့ဆုံရန် တောင်းဆိုထားပါသည်…]

...

ရန်ဖေး...

လွန်ခဲ့သော နှစ်များစွာ ရန်ဖေး စကိုင်းဆွန်း တပ်ဖွဲ့သို့ ပထမဆုံး ဝင်ရောက်ခွင့်ရခဲ့စဉ်က သူမ၏ နည်းပြဖြစ်သူသည် အောက်ပါစကားများဖြင့် ဂုဏ်ပြုစကား ဆိုခဲ့၏။

"မင်းဟာ အင်ပါယာ တစ်ဝန်းက သူပုန်တွေ၊ ပြိုင်ဘက်တွေနဲ့ ထွက်ပြေးလွတ်မြောက်နေတဲ့ လူသတ်သမားတွေကို တားဆီးရလိမ့်မယ်... ပြီးတော့ ဧကရာဇ် အတွက် ကြီးမားတဲ့ အမှုထမ်းကောင်း တစ်ယောက် ဖြစ်လာလိမ့်မယ်... ဒါပေမဲ့ တစ်နေရာရာ၊ တစ်နေ့နေ့ကျရင်တော့ မဟူရာ မီးတောက် လမ်းစဉ် ကို ပြန်လည်အသက်သွင်းဖို့ ကြိုးစားနေတဲ့သူ တစ်ယောက်ယောက်နဲ့ မင်း ကြုံတွေ့ရလိမ့်မယ်..."

သူသည် စကားပြောနေစဉ် ကောက်ရိုးတစ်မျှင်ကို ဝါးနေခဲ့ပြီး မီးလောင်ထားသော သူ၏ မျက်နှာတစ်ဝက်ကို ပုတ်ပြလိုက်သည်။

"မဟူရာ မီးတောက် တွေ ပြန်ရောက်လာတဲ့အချိန်ကျရင်တော့ မင်းရဲ့ ကတိသစ္စာက တကယ်ကို စမ်းသပ်ခံရတော့မှာပဲ... မင်း တိုက်ခိုက်မလား၊ ဒါမှမဟုတ် မင်းရဲ့ ဂုဏ်သိက္ခာကို စွန့်ပစ်လိုက်မလားဆိုတာ ငါ တကယ်ကို သိချင်နေမိတယ်..."

ထိုစိန်ခေါ်မှုသည် အဖြေမရဘဲ ဆယ့်နှစ်နှစ်တိုင်တိုင် သူမ၏အပေါ်တွင် ဝဲပျံနေခဲ့၏။ သူမသည် လမ်းကြောင်းမဲ့ ပင်လယ် ၏ ကမ်းခြေများတွင် လမ်းလျှောက်နေသော ငါးမန်းများကို တိုက်ခိုက်ခဲ့သည်။ အရှေ့ဘက် နယ်စပ်မှတစ်ဆင့် ခိုးဝင်ရန် ကြိုးစားသော ပြည်နှင်ဒဏ်ပေးခံရသည့် ရာဇဝတ်ကောင်များကို ကွပ်မျက်ခဲ့၏။ ထို့အပြင် ကျောက်တုံးနက် သတ္တုတွင်း များမှ ထွက်ပြေးလွတ်မြောက်လာသူများကိုလည်း ပြန်လည်ဖမ်းဆီးပေးခဲ့သည်။ သို့သော် သူမသည် အထူး သတိထားမှုဖြင့် သူမ၏ ဝိညာဉ် ကို အမြဲတမ်း ဖွင့်ထားခဲ့သော်လည်း မဟူရာ မီးတောက် တစ်ဦးနှင့် တစ်ခါမျှ မကြုံတွေ့ခဲ့ရချေ။

လွန်ခဲ့သော တစ်ပတ်အလိုအထိ ဖြစ်၏။

သူမနှင့် သူမ၏ လုပ်ဖော်ကိုင်ဖက်တို့သည် မြွေ သင်္ချိုင်း အနီးတွင် ကင်းလှည့်နေခဲ့ကြပြီး မြို့တွင်းရှိ တိုက်ပွဲကို ဝိညာဉ် အာရုံခံစားမှုဖြင့် စောင့်ကြည့်နေခဲ့ကြသည်။ သူတို့သည် ထိုတိုက်ပွဲတွင် ဝင်ရောက်စွက်ဖက်မည် မဟုတ်ပေ။ ကလန် တစ်ခုသည် သူတို့၏ နယ်မြေအတွင်းရှိ နိုင်ငံသားများကို အပြစ်ပေးစီရင်ရန် အခွင့်အရေး အပြည့်အဝ ရှိသည်။ သို့သော် ပဋိပက္ခများသည် ရာဇဝတ်မှုများကို ဖြစ်ပေါ်စေတတ်သဖြင့် ဓားများ ထုတ်ယူထားသော မည်သည့်နေရာတွင်မဆို သူတို့က နိုးနိုးကြားကြား ရှိနေခဲ့ကြ၏။

ထိုညတွင် သူတို့ ခံစားရသော အရာများစွာထဲမှ တစ်ခုသည် ပုပ်သိုးနေသော အသားများဆီသို့ ယင်ကောင်များ ရောက်ရှိလာသကဲ့သို့ သူတို့ကို မြွေ သင်္ချိုင်း ထံသို့ ဆွဲဆောင်သွားခဲ့သည်။ ၎င်းမှာ မဟူရာ မီးတောက် ၏ စွမ်းအားပင် ဖြစ်၏။

အာရီလီယပ် တို့၏ လိပ်ဖြစ်သော အော်သိုကို သူတို့ သိရှိထားပြီး ဖြစ်သည်။ တိုက်ပွဲအတွင်း သူ၏ မာဒြာ များ တောက်လောင်လာခြင်းသည် မျှော်လင့်ထားသည့်အတိုင်းပင် ဖြစ်၏။ သို့သော် သူတို့ မမျှော်လင့်ထားသောအရာမှာ မဟူရာ မီးတောက် လမ်းစဉ် ၏ ဒုတိယမြောက် အရင်းအမြစ်တစ်ခု ဖြစ်သည်။

လွန်ခဲ့သော ခုနစ်ရက်ကဲ့သို့ပင် ရန်ဖေး သည် ကောင်းကင်ယံသို့ ကုတ်ခြစ်နေသော ဦးချိုပါသည့် ဦးခေါင်းခွံများနှင့် အဝါရောင် နံရိုးများကို ရှောင်တိမ်းရင်း နဂါးအရိုး မြို့တော်အထက်တွင် ပိုင်ရို၏ဘေး၌ လွင့်မျောနေခဲ့သည်။ သူတို့သည် စကိုင်းဆွန်း တို့၏ သင်္ကေတများဖြစ်သော မြစိမ်းရောင် မိုင်တစ်ထောင် တိမ်တိုက် များပေါ်တွင် ပျံသန်းနေကြ၏။

သည်တစ်ပတ်အတွင်း မြို့တော်အနှံ့တွင် မဟူရာ မီးတောက် များ ရံဖန်ရံခါ လင်းလက်သွားသည်ကို သူတို့ ခံစားခဲ့ရသော်လည်း ခြေရာခံနိုင်လောက်သည်အထိ အများအပြား မရှိခဲ့ပေ။

"တောင်... အရှေ့တောင်လား..."

ပိုင်ရို က မေးလိုက်သည်။ သူ၏ အသံသည် ကျယ်ဝန်းသော ဝါးခမောက်အောက်ရှိ အရိပ်ထဲမှ ထွက်ပေါ်လာ၏။ သူ၏ ကြီးမားသော ခန္ဓာကိုယ်ကို ပခုံးမှ ခြေဖျားအထိ လွှမ်းခြုံထားသော ကြီးမားလေးလံသည့် အင်္ကျီကြီးတစ်ခုဖြင့် ဖုံးကွယ်ထားသည်။ မျက်နှာပေါ်ရှိ အရိပ်များအတွင်းမှ သူ၏ မျက်လုံးများ၊ သူ၏ ရွှေအဆင့် အမှတ်အသား သည် အဝါရောင် တောက်ပနေ၏။

သူမသည် သူမ၏ ကိုယ်ပိုင် အာရုံခံစားမှုကို ဖြန့်ကျက်ကာ စစ်ဆေးကြည့်လိုက်သည်။ မဟူရာ မီးတောက် တစ်ဦး မဟုတ်ဘဲ မီး ကျင့်ကြံသူ တစ်ဦး လေ့ကျင့်နေခြင်းသာ ဖြစ်၏။

"မဟုတ်ဘူး... နောက်ထပ် နှစ်ရက်လောက်နေရင်တော့ ကျင်း အဆင့်နိမ့် အရှင်သခင် ကို ငါတို့ သွားတွေ့ရမယ်..."

ရန်ဖေးသည် သူမ၏ ကိုယ်ပိုင် ကောက်ချက်ချမှုတစ်ခုကို ပြုလုပ်ခဲ့၏။ သူတို့ လိုက်နေသည့် လျှို့ဝှက်ဆန်းကြယ်သော အရင်းအမြစ်သည် ကျင့်ကြံသူ တစ်ဦး မဟုတ်ခြင်း ဖြစ်နိုင်သည်။ မြွေ သင်္ချိုင်း မှ အဆင့်နိမ့် အရှင်သခင် နှစ်ဦးထဲမှ တစ်ဦးက သူတို့၏ တိုက်ပွဲအတွက် တူးဖော်ရယူခဲ့သော မဟူရာ မီးတောက် လက်နက်တစ်ခု ဖြစ်ရပေမည်။ ထိုအချိန်မှစ၍ သူတို့ရရှိခဲ့သော အရိပ်အမြွက်များသည် ထိုလက်နက်ကို မြို့တော်အနှံ့ သယ်ဆောင်သွားခြင်းသာ ဖြစ်၏။

ထိုလက်နက်တည်ရှိကြောင်း အထောက်အထားများ ရရှိသည်နှင့် အဆင့်နိမ့် အရှင်သခင် နှစ်ဦးစလုံးကို ရင်ဆိုင်ရန် သူတို့ စီစဉ်ထားခဲ့ကြသည်။ သို့သော် ယခုအချိန်အထိ သူတို့ ဘာတစ်ခုမျှ ရှာမတွေ့ခဲ့ချေ။ ထို့အပြင် အာရီလီယပ် ခေါင်းဆောင်ကြီး သည် စကိုင်းဆွန်း များ မရောက်လာမီကပင် မြို့မှ ထွက်ပြေးသွားခဲ့သည်။ ထိုအချက်က ရန်ဖေး အတွက် အပြစ်ရှိသကဲ့သို့ ခံစားရစေသော်လည်း အရှင်သခင် တစ်ဦးကို စွပ်စွဲရန်အတွက် သံသယထက် ပိုသောအရာများ လိုအပ်နေခဲ့၏။

ထို့ကြောင့် မကြာမီ အချိန်အတွင်း လက်နက်၏ အရိပ်အယောင်ကို ထပ်မံ မတွေ့ရှိရပါက သူတို့သည် ကျင်းတိုင်ရှို့ ၏ ထွက်ဆိုချက်ကို မည်သို့ပင်ဖြစ်စေ ရယူရမည် ဖြစ်သည်။

ပိုင်ရို သည် စကားမဆိုဘဲ သဘောတူလိုက်၏။ သူသည် စကိုင်းဆွန်း အစစ်အမှန် ရွှေအဆင့် များထဲတွင် အဆင့် နှစ်ဆယ့်ရှစ်သာ ရှိပြီး သူမကမူ အဆင့် ဆယ့်သုံးရှိကာ ဂုဏ်သတင်းကြီးမားသော တိမ်တိုက် တူ ကျောင်းတော် ၏ တပည့်တစ်ဦး ဖြစ်သည်။ သူတို့ အတူတကွ တာဝန်ကျနေချိန်တွင် သူမ၏ ထင်မြင်ယူဆချက်က သူ၏ အယူအဆအပေါ် လွှမ်းမိုးမှု ရှိပေမည်။

မြို့တော်ကို လွှမ်းမိုးထားသော အနက်ရောင် တောင်ကြီးဆီမှ သေစေလောက်သော အပူချိန်တစ်ခု ထွက်ပေါ်လာရာ သူမသည် ပိုင်ရိုကို ထိုနေရာအား လှမ်းပြောရန် ပြင်လိုက်၏。

ထိုအချိန်တွင် ရှီရူး တောင်ထိပ်မှ ကောင်းကင်ယံသို့ မီးတောက်များ ပေါက်ကွဲထွက်လာတော့သည်။

မီးတောက်များတွင် အနီရောင်နှင့် အနက်ရောင် အစင်းကြောင်းများ ပါဝင်နေပြီး မဟူရာ မီးတောက် အော်ရာ များသည် ကောင်းကင်ယံသို့ လျှံကျလာ၏။ မြို့တော်အနှံ့ရှိ အစီအရင် များသည် အသက်ဝင်လာပြီး ကျင့်ကြံသူ များသည် နောက်ထပ် တိုက်ခိုက်မှုတစ်ခုမှ ကာကွယ်ရန် အလုအယက် ပြင်ဆင်နေကြသည်။

ရန်ဖေး နှင့် ပိုင်ရို တို့သည် သူတို့၏ တိမ်တိုက် များမှ အစိမ်းရောင် လမ်းကြောင်းများကို ချန်ရစ်ခဲ့ကာ အမှောင်ထု တောင်ထိပ်ဆီသို့ အပြေးအလွှား သွားကြ၏။

***