အခန်း ၂၁၈

အခန်း (၂၁၈)

နေ့တစ်ဝက်လုံး မုရုံယင်၏ ပြောပြချက်များကို နားထောင်ပြီးနောက် အာတိုဘီသည် အရုဏ်ဦးတစ်ထောင်မျှော်စင်နှင့် ပတ်သက်၍ သဘာဝအတိုင်း ဗဟုသုတ အမြောက်အမြား ရရှိသွားခဲ့သည်။

အရုဏ်ဦးတစ်ထောင်မျှော်စင်နှင့် ရှစ်ထောင့်မျှော်စင်ကဲ့သို့သော ဂိုဏ်းများသည် အထူးသိုင်းနည်းစနစ်တစ်ခုတည်းကိုသာ အခြေခံ၍ ဆယ်စုနှစ်အနည်းငယ်အတွင်း လျင်မြန်စွာ ထိုးတက်လာကြခြင်း ဖြစ်သည်။ ၎င်းတို့၏ အင်အားသည် ရှောင်လင်၊ ရန်ဝူနှင့် ရှောင်ယောင်တို့ထက်ပင် သာလွန်နေပြီ ဖြစ်သော်ငြား နောက်ဆုံးတွင်မူ အခြေခံအုတ်မြစ် ခိုင်မာခြင်းမရှိသဖြင့် မကြာသေးခင်ကမှ ချမ်းသာလာသူဟူသော အတွေးအမြင်မျိုးကိုသာ ပေးစွမ်းနိုင်လေသည်။ ၎င်းတို့၏ တပည့်များလည်း ရောထွေးနေပြီး သူရဲကောင်းဆန်သူများ ရှိသကဲ့သို့ ဝမ်အောက်ကဲ့သို့သော သူရဲဘောကြောင်သူများလည်း ရှိကြသည်။

အခြားသိုင်းလောကသားများက ၎င်းတို့အပေါ် ထားရှိသည့် သဘောထားကို လုစန်း၏ စကားများနှင့် အပြုအမူများမှတစ်ဆင့် မြင်တွေ့နိုင်ပေသည်...။ ၎င်းသည် လုံးဝ ရိုသေလေးစားနေခြင်းမျိုး မဟုတ်သည့်တိုင် အတိုင်းအတာတစ်ခုအထိတော့ လေးစားမှု ရှိကြခြင်းဖြစ်သည်။ အဘယ်ကြောင့်ဆိုသော် ၎င်းတို့သည် မိစ္ဆာဂိုဏ်းများ မဟုတ်ကြသည့်အပြင် အင်အားကလည်း အမှန်တကယ် သန်မာလှသောကြောင့် ဖြစ်သည်။

သို့ဆိုလျှင်... အရုဏ်ဦးတစ်ထောင်မျှော်စင်ရဲ့ ဒုတိယခေါင်းဆောင်က အဆိပ်ခတ်ခြင်းကို ပြုလုပ်ပါ့မလား။

သေချာပေါက် မပြုလုပ်နိုင်ချေ...။ ကုန်းစွန်းလီ၏ ပါးနပ်မှုမျိုးအရ သူအမှန်တကယ် အဆိပ်ခတ်ချင်သည်ဆိုပါက ယခုကဲ့သို့သော အချိန်၊ ယခုကဲ့သို့သော နေရာမျိုးကို ရွေးချယ်မည်မဟုတ်သလို စားပွဲထိုးတစ်ဦးကိုလည်း ထိုကိစ္စထဲတွင် သေချာပေါက် ပါဝင်ပတ်သက်ခွင့် ပေးမည်မဟုတ်ချေ။

နေ့ခင်းဘက်က အရုဏ်ဦးတစ်ထောင်မျှော်စင်နှင့် ဓားကျိုးလက်ဖက်ရည်ခန်းမတို့သည် လူအများရှေ့မှောက်၌တင် ထိပ်တိုက်တွေ့ခဲ့ကြခြင်း ဖြစ်သည်။ အကယ်၍ ကုန်းစွန်းလီသည် ထိုညတွင်ပင် သူတို့ကို ချက်ချင်းအဆိပ်ခတ်လိုက်ပါက လက်စားချေမှုမှာ အလွန်စောလွန်းပြီး သိသာလွန်းလှသည်။ သိုင်းလောကရှိ မည်သူမဆို အရုဏ်ဦးတစ်ထောင်မျှော်စင်ကို သံသယဝင်ကြပေလိမ့်မည်။

ထို့ကြောင့်... ကုန်းစွန်းလီနှင့် စစ်ယန်ရန်တို့သည် သူတို့ကို အသည်းအသန် သတ်ပစ်ချင်စိတ်ပေါက်နေလျှင်ပင် လုပ်ရဲမည် မဟုတ်ချေ။ သူတို့သည် ဓားကျိုးလက်ဖက်ရည်ခန်းမမှ လူများထံ၌ ဘာမကောင်းတာမှ မဖြစ်ပါစေနှင့်ဟုသာ ဆုတောင်းနေရမည် ဖြစ်သည်။ အကယ်၍ သူတို့ထဲမှ တစ်ယောက်ယောက်သာ လျှို့ဝှက်ဆန်းကြယ်စွာ ပျောက်ဆုံးသွားခြင်း သို့မဟုတ် သေဆုံးသွားခြင်း ရှိခဲ့ပါက သူတို့နှစ်ယောက်သာ အပြစ်တင်ခံရပေလိမ့်မည်။

ယင်းကို ကြည့်ခြင်းအားဖြင့် ဖုန်းပုကြွယ်၏ အစောပိုင်းဗျူဟာသည် အလွန်ပြောင်မြောက်လှသော အကွက်တစ်ခုဖြစ်ကြောင်း သိသာလှသည်။ အကယ်၍ သူသည် ထိုနေ့မနက်ပိုင်း တည်းခိုခန်းခန်းမထဲ၌ ဝမ်အောက်သေဆုံးရခြင်း၏ အမှန်တရားကို ထုတ်ဖော်ပြောဆိုပြီး စစ်ယန်ရန်က လူသတ်သမားဖြစ်ကြောင်းနှင့် ကုန်းစွန်းလီက မဟုတ်မမှန် လုပ်ကြံဖန်တီးထားကြောင်း စွပ်စွဲခဲ့မည်ဆိုပါက အများစုက သူ့ကို ယုံကြည်ကြမည်မဟုတ်ပေ...။ သိုင်းလောကဆိုသည်မှာ အလွန်အမင်းလက်တွေ့ဆန်သော နေရာတစ်ခုသာ ဖြစ်သည်။

အမည်မသိဂိုဏ်းငယ်လေးတစ်ခုမှ အညတရလူတစ်ယောက်အနေဖြင့် သက်သေအထောက်အထား ခိုင်ခိုင်မာမာမရှိဘဲ အရုဏ်ဦးတစ်ထောင်မျှော်စင်ကဲ့သို့ အဆင့်အတန်းရှိသည့် ဂိုဏ်း၏ ဂိုဏ်းသခင်မ သို့မဟုတ် ဒုတိယခေါင်းဆောင်များနှင့် မညှိစွန်းမိစေရန် အကောင်းဆုံး အကြံပြုလိုပါသည်။ အကယ်၍ စကားလုံးများဖြင့် လာမည်ဆိုပါက လှည့်ပတ်ချေပရုံသာ ရှိသည်။ အကယ်၍ အင်အားသုံး၍ လာမည်ဆိုပါက ၎င်းသည် သူတို့၏ ရည်ရွယ်ချက်များနှင့် အကွက်ဝင်သွားပေလိမ့်မည်။

ထို့ကြောင့် ဖုန်းပုကြွယ်သည် ဖြစ်ရပ်များကို လုပ်ကြံဖန်တီးပြီး အခြေအနေကို ပြောင်းပြန်လှန်ကာ သူတို့၏ မရိုးမသားစိတ်ကို အခွင့်ကောင်းယူခဲ့ခြင်းဖြစ်သဖြင့် သူတို့ကို မငြင်းပယ်ဝံ့စေရန် ဖြစ်သွားစေရုံတင်မကဘဲ သူ့စကားများကိုပါ အလိုအလျောက် ထောက်ခံပေးရန် ဖိအားပေးလိုက်သကဲ့သို့ ဖြစ်သွားခဲ့သည်။

ထိုလှုပ်ရှားမှု၏ နောက်ဆက်တွဲရလဒ်မှာ စစ်ယန်ရန်နှင့် ကုန်းစွန်းလီတို့သည် ဓားကျိုးလက်ဖက်ရည်ခန်းမမှ လူများကို မတိုက်ခိုက်ဝံ့ကြတော့ရုံတင်မကဘဲ ဤလူများက လျှို့ဝှက်ချက်ကို ထုတ်ဖော်ပြောဆိုလိုက်မည် စိုးသဖြင့် ၎င်းတို့၏ ထိန်းချုပ်မှုကိုပါ ခံလိုက်ရတော့သည်။

စကားပုံတစ်ခု ရှိသည်မဟုတ်ပါလား... အချိန်တွေက ပြောင်းလဲသွားပြီ ဟူ၏။ ယခုတွင်မူ အခြေအနေက ကွာခြားသွားခဲ့ပြီ ဖြစ်သည်။အကယ်၍ ဖုန်းပုကြွယ်သာ ဝမ်အောက်သေဆုံးရခြင်း၏ အမှန်တရားကို ယခုအချိန်တွင် ပြောပြမည်ဆိုပါက ဘယ်သူမှ မယုံကြည်ကြမည့် အခြေအနေမျိုး မဟုတ်တော့ချေ။

ထို့ကြောင့် ကုန်းစွန်းလီ ပို့ခိုင်းလိုက်သော အစားအသောက်နှင့် ဝိုင်သည် အမှန်တကယ်တော့ မျက်နှာသာရရန်နှင့် စမ်းသပ်ရန်အတွက်သာဖြစ်ပြီး အခြားရည်ရွယ်ချက် မရှိပါချေ။

ဟင်းပွဲအနည်းငယ်မှာ သာမန်အတိုင်း ထူးခြားမှုမရှိခြင်းမှာလည်း ကျိုးကြောင်းဆီလျော်မှု ရှိပေသည်။ အဘယ်ကြောင့်ဆိုသော် ချန်လင်တည်းခိုခန်းကဲ့သို့ နေရာမျိုးသည် မြို့ပြင်မှ အရသာရှိသော အစားအစာများကို နေ့စဉ် အမြောက်အမြား တင်သွင်းနိုင်ခြင်း မရှိသောကြောင့် ဖြစ်သည်။ ၎င်းတို့အနေဖြင့် အစားအသောက်နှင့် အသားဟင်းများကို လုံလောက်အောင် ပြင်ဆင်ပေးနိုင်ခြင်းကပင် အတော်လေး ကောင်းမွန်နေပြီ ဖြစ်သည်။

သို့သော်လည်း တည်းခိုခန်းတွင် ဝိုင်ကောင်းများတော့ ရှိနေလေသည်။ အဘယ်ကြောင့်ဆိုသော် ဝိုင်သည် မြေအောက်ခန်းရှိနေသရွေ့ နှစ်ပေါင်းများစွာ သိမ်းဆည်းထားနိုင်သောကြောင့်ဖြစ်ရာ တစ်လ သို့မဟုတ် နှစ်လမျှ သိမ်းထားခြင်းကို ပြောနေစရာပင် မလိုတော့ချေ။ တစ်သုတ်တည်း ဝယ်ယူပြီး ဆယ်နှစ် သို့မဟုတ် ဆယ့်ရှစ်နှစ်ခန့် ထားရှိလျှင်ပင် ပြဿနာရှိမည်မဟုတ်ပေ။

တည်းခိုခန်းပိုင်ရှင်သည် တည်းခိုခန်းဖွင့်ပြီးနောက် ဝင်ရောက်လာမည့် ဧည့်သည်များသည် သိုင်းလောကသားများ ဖြစ်ကြမည်ကို သေချာပေါက် သိရှိထားပြီး ထိုလူများသည်... ဝိုင်ကို အလွန်နှစ်သက်ကြသူများ ဖြစ်သည်။ သူတို့သည် အစားအသောက်ကို လျှော့စားနိုင်သော်လည်း ဝိုင်ကိုတော့ အပြတ်ခံနိုင်မည် မဟုတ်ချေ။ ထို့ကြောင့် တည်းခိုခန်းတွင် ကောင်းသည်ဆိုးသည်၊ ဈေးကြီးသည်ဈေးပေါသည်မဟူ ဝိုင်များကို အပြည့်အဝ သိုလှောင်ထားခြင်း ဖြစ်တော့သည်။

ကုန်းစွန်းလီသည် ယခုတစ်ကြိမ်တွင် ဖုန်းပုကြွယ်ကို လက်ဆောင်ပေးရန်အတွက် "မြန်အန်ချို" (ခွင့်လွှတ်မေ့ပျောက်ခြင်းဟု အဓိပ္ပါယ်ရသည်) ဟုခေါ်သော ဝိုင်ပုလင်းငယ်လေးကို ဝယ်ယူရန် တကယ့်ကို အိတ်သွန်ဖန်မှောက် အသုံးချခဲ့ခြင်းဖြစ်သည်။

နာမည်ကြည့်ရုံဖြင့်ပင် ၎င်းသည် သာမန်ဝိုင်ကောင်းတစ်ခွက်မဟုတ်ဘဲ အဆင့်မြင့်လှသော ထိပ်တန်းချက်အရက်တစ်မျိုးဖြစ်ပြီး အလွန်လည်း ဈေးကြီးကြောင်း သိနိုင်ပေသည်။ ၎င်းသည် အမှန်တကယ်ပင် အေးမြလှသောအရည်ကဲ့သို့ နူးညံ့ပြီး နွေဦးနှင်းစက်ကဲ့သို့ ချိုမြိန်လှပေသည်။

"မြန်အန်ချို" က ဘာကို ဆိုလိုတာလဲ။ တစ်ခွက်သောက်ရုံဖြင့် လူအများကြားရှိ ရန်ငြိုးဟောင်းများ အားလုံးကို ပြေပျောက်စေနိုင်သည်ဟု ဆိုလိုခြင်း ဖြစ်သည်။ ယင်းသည် ဒဏ္ဍာရီလာ ဦးနှောက်ဆေးတတ်သော အရက်အမျိုးအစား ဖြစ်သည့် "ကျွေးရှန်းမုန်စိ" ( မူးယစ်အိမ်မက်ကမ္ဘာဟု အဓိပ္ပါယ်ရသည်) နှင့်ပင် နှိုင်းယှဉ်နိုင်လေသည်။ အကယ်၍လို့ ထန်ဆန်းကျန့်သာ တမလွန်ဘဝကနေ ယင်းကို သိသွားမည်ဆိုပါက သေချာပေါက် နောင်တရမိပေလိမ့်မည်။ မဟာယာနဗုဒ္ဓကျမ်းစာတွေကို ရဖို့အတွက် မိုင်ပေါင်းသောင်းချီ ခရီးနှင်ခဲ့ရတာ ဘာအဓိပ္ပါယ်ရှိလို့လဲ။ ဝိုင်ဘယ်လိုချက်ရမလဲဆိုတာကိုပဲ သင်လိုက်တာက မကောင်းဘူးလား။

ကောင်းပါပြီ၊ ဒါက ဟာသတစ်ခုပါပဲ။ ဘယ်လောက်ကောင်းတဲ့ ဝိုင်ပဲဖြစ်ဖြစ် နက်ရှိုင်းလှတဲ့ ရန်ငြိုးတွေကိုတော့ သေချာပေါက် ပြေပျောက်စေနိုင်မှာ မဟုတ်ဘူးလေ။ အများဆုံးရှိလှ "လွန်ခဲ့တဲ့ နှစ်အနည်းငယ်က မင်းငါ့ဆီက ငွေတေးနည်းနည်းချေးသွားပြီး ပြန်မဆပ်ရသေးဘူးနော်" သို့မဟုတ် "ဒီနေ့မနက်က မင်းငါ့ခြေထောက်ကို တက်နင်းသွားတယ်" စသည့် ရန်ငြိုးသေးသေးများကိုသာ ပြေပျောက်စေပေလိမ့်မည်။

ငါ့ရဲ့ ကိုယ်ပိုင်အမြင်နဲ့ပြောရရင် အခုလိုရန်ငြိုးမျိုးအတွက် ဝိုင်ဖိုးသုံးလိုက်ရတဲ့ ငွေတွေကို တစ်ဖက်လူကို ပေးလိုက်ရုံနဲ့ ဖြေရှင်းဖို့ လုံလောက်မယ်လို့ ထင်မိတယ်...။

အဓိကအကြောင်းအရာသို့ ပြန်သွားကြပါစို့။

သခင်လေးအာတိုဘီသည် ရှေ့တွင်ရှိနေသော အစားအသောက်နှင့် ဝိုင်ကို ကြည့်ရင်း ၎င်းတို့ထဲတွင် အဆိပ်ပါဝင်နေသည်မှာ သေချာကြောင်း ယုံကြည်နေသဖြင့် ၎င်းတို့ကို လုံးဝ စားသောက်မည်မဟုတ်ချေ။

ကစားသမားတစ်ဦးအနေဖြင့် သူသည် အစားအသောက်နှင့် ရေကို မလိုအပ်သလို ဤအစားအသောက်နှင့် ဝိုင်များသည် မိန်းမလှလေးများ မဟုတ်သဖြင့် သူ့စိတ်ကို မထိန်းချုပ်နိုင်စရာ အကြောင်းမရှိပေ။ ထို့ကြောင့် သူသည် အစားအသောက်များကို မတို့မထိဘဲ ထိုအတိုင်းသာ ထားလိုက်တော့သည်။

"ဒီနေရာတင် ချီးအဝစားပြလိုက်မယ်" ဟူသော စကားမှာ အမှန်တကယ်တော့ မဖြစ်နိုင်ပေ။ အဘယ်ကြောင့်ဆိုသော် သူသည် တစ်လုတ်တောင် မစားသဖြင့် ဤအစားအသောက်နှင့် ဝိုင်များထဲတွင် အဆိပ်ပါမပါကို သက်သေမပြနိုင်သောကြောင့် ဖြစ်သည်...။

အချိန်များ ဖြည်းညင်းစွာ ကုန်လွန်သွား၏။ စားပွဲထိုးက အစားအသောက်နှင့် ဝိုင်ကို လာပို့ပြီးနောက် တစ်နာရီခန့် ကြာမြင့်သွားခဲ့ပြီ ဖြစ်ပြီး အပြင်ဘက်တွင်လည်း လုံးဝမှောင်မိုက်နေပြီ ဖြစ်သည်။ ထိုခဏ၌ တံခါးခေါက်သံက ထပ်မံ ထွက်ပေါ်လာပြန်သည်။

"ဘယ်သူလဲ"

သခင်လေးအာတိုဘီသည် ထပ်မံ မတ်တတ်ရပ်လိုက်ရင်း တံခါးနားသို့ လျှောက်သွားကာ လှမ်းမေးလိုက်သည်။

တံခါးအပြင်က လူသည် ထိုစကားကို ကြားပြီးနောက် စက္ကန့်အနည်းငယ်မျှ တုံ့ဆိုင်းသွားပြီးမှ ပြန်ဖြေလာသည်။

"ငါ ကုန်းစွန်းလီပါ"

"စစ်ယန်ရန်ပါ"

ကုန်းစွန်းလီ စကားပြောပြီးနောက် အခြားအမျိုးသမီးတစ်ဦး၏ အသံ ထွက်ပေါ်လာခဲ့သည်။ သို့သော်လည်း စစ်ယန်ရန်၏ လေသံမှာ အနည်းငယ် မဖော်ရွေလှပေ။

ခဏတာ တိတ်ဆိတ်သွားခြင်းသည် တံခါးဝ၌ အာတိုဘီ၏ အသံကို ကြားလိုက်ရသဖြင့် အပြင်ဘက်ရှိ လူနှစ်ယောက်က တစ်ယောက်ကိုတစ်ယောက် အကြည့်ချင်း ဖလှယ်လိုက်ကြသောကြောင့် ဖြစ်သည်။

အာတိုဘီသည် တံခါးကို ချက်ချင်း မဖွင့်ပေးသေးဘဲ မေးလိုက်သည်။

"အခုက မှောင်နေပြီပဲ၊ လူကြီးမင်းတို့နှစ်ယောက် ဒီကို ဘာကိစ္စနဲ့ လာခဲ့တာလဲ သိပါရစေ"

ကုန်းစွန်းလီက "အာ... သခင်လေး၊ ငါတို့ အထဲဝင်ပြီး စကားပြောလို့ ရမလား"

အာတိုဘီ အနည်းငယ် တွေးတောလိုက်မိသည်။ အကယ်၍ သူတို့သာ အတင်းအဓမ္မ တိုးဝင်လာမည်ဆိုပါက သူ တားဆီးနိုင်မည်မဟုတ်သဖြင့် အခြေအနေကို မီးစင်ကြည့် ကရပေတော့မည်။ သူ တံခါးဖွင့်ပေးလိုက်ပြီး ထိုလူနှစ်ယောက်ကို ကြည့်ကာ တည်ငြိမ်သည့်အမူအရာမျိုး ဖော်ပြရန် ကြိုးစားရင်း ဘေးသို့ ဖယ်ပေးလိုက်သည်။

"လူကြီးမင်းတို့... ကြွပါ"

သူတို့ အခန်းထဲသို့ လှမ်းဝင်လာသည်နှင့် ကုန်းစွန်းလီနှင့် စစ်ယန်ရန်တို့၏ မျက်နှာအမူအရာများ အကြိမ်ကြိမ် ပြောင်းလဲသွားကြသည်။ ပထမအချက်မှာ သူတို့သည် စားပွဲပေါ်ရှိ အစားအသောက်နှင့် ဝိုင်များကို မတို့ထိဘဲ ဒီအတိုင်းရှိနေသည်ကို မြင်လိုက်ရခြင်းဖြစ်ပြီး ဒုတိယအချက်မှာ အခန်းပတ်ပတ်လည်ကို ကြည့်ရှုပြီးနောက် အာတိုဘီတစ်ဦးတည်းသာ ရှိနေကြောင်း သိလိုက်ရခြင်းကြောင့် ဖြစ်သည်။

တည်းခိုခန်းထဲတွင် သတင်းများသည် လျင်မြန်စွာ ပျံ့နှံ့တတ်စမြဲ ဖြစ်သည်။ ကုန်းစွန်းလီနှင့် စစ်ယန်ရန်တို့သည် အကဲခတ်ကောင်းသူများ ဖြစ်ကြသဖြင့် ဓားကျိုးလက်ဖက်ရည်ခန်းမမှ အခြားအဖွဲ့ဝင်များ နေ့ခင်းဘက် ထွက်ခွာသွားကြကြောင်း သဘာဝအတိုင်း သိရှိထားကြသည်။ သို့သော်လည်း အခြားလူလေးယောက်သည် ညဉ့်နက်သည်အထိ ပြန်မလာကြသေးဘဲ ထိုလူငယ်တစ်ယောက်တည်းသာ ကျန်ရှိနေလိမ့်မည်ဟု မထင်မှတ်ထားခဲ့ကြပေ။

"ဒီလူငယ်သူရဲကောင်းလေးရဲ့ နာမည်ကို... သိပါရစေလား"

ကုန်းစွန်းလီသည် ဖော်ရွေသောအမူအရာသို့ လျင်မြန်စွာ ပြောင်းလဲလိုက်ရင်း လက်နှစ်ဖက်ကို ဆုပ်ကာ နှုတ်ဆက်လိုက်သည်။

"ကျင်းဖူကွေ့ပါ"

အာတိုဘီက စိတ်ပျက်လက်ပျက်ဖြင့် ပြန်ဖြေလိုက်သည်။ သူသည် ထိုနာမည်ကို ဇာတ်လမ်းထဲတွင် အသုံးပြုခဲ့ပြီး ဖြစ်သဖြင့် ယင်းကိုသာ ဆက်လက်သုံးစွဲရန်မှတစ်ပါး ရွေးချယ်စရာ မရှိတော့ပေ။

သူ့ရှေ့မှ လူနှစ်ယောက်မှာမူ ထူးထူးခြားခြား တုံ့ပြန်မှုမျိုး မရှိပါချေ။

ကုန်းစွန်းလီက ဆက်ပြော၏။

"ဟဲ... ကြည့်ရတာ လူငယ်သူရဲကောင်းလေး ကျင်းပဲ ဖြစ်ရမယ်"

သူ့အကြည့်များ အခန်းတွင်းသို့ ထပ်မံ ဝေ့ဝဲကြည့်ရှုလိုက်မိပြန်သည်။ ဖြစ်နိုင်သည်မှာ မည်သူမဆို တစ်နေရာရာ၌ ပုန်းအောင်းနေမည်ကို စိုးရိမ်နေခြင်းကြောင့် ဖြစ်ပေမည်။

"ငါ စုံစမ်းချင်တာကတော့ သခင်လေးဖုန်းနဲ့ တခြားလူသုံးယောက်က..."

"သူတို့ကိစ္စရှိလို့ အပြင်သွားကြတယ်"

အာတိုဘီက တိုက်ရိုက်ပင် ပြန်ဖြေလိုက်သည်။

"အိုး... ဒါဆိုလည်း ဟုတ်ပါပြီ..."

ကုန်းစွန်းလီသည် တွေးတောနေပုံရပြီး သူ့အမူအရာက အနည်းငယ် မည်းမှောင်သွားသည်။

"ဒါနဲ့... သခင်လေးကျင်း၊ မနေ့ညက ဖြစ်ပျက်ခဲ့တဲ့ကိစ္စတွေနဲ့ ပတ်သက်လို့..."

"ကျုပ်က... ဂိုဏ်းချုပ်စီစဉ်သမျှအားလုံးကိုပဲ လိုက်နာတာပါ"

အာတိုဘီက သူ့စကားကို ထပ်မံ ဖြတ်ပြောလိုက်သည်။

"သူ ဒီနေ့မနက်က ပြောခဲ့တာက ပြောခဲ့တာပဲ၊ ကျုပ် တခြားဘာမှ မသိဘူး"

သူ၏ ပြန်လည်ဖြေကြားမှုသည် အတော်လေး ပါးနပ်လှပြီး... 'မင်းတို့နှစ်ယောက် ငါ့ကို နှုတ်ပိတ်ဖို့ သတ်နေစရာ မလိုပါဘူး၊ ငါက ဘာလျှို့ဝှက်ချက်ကိုမှ ထုတ်ပြောဖို့ အစီအစဉ် မရှိဘူး' ဟု ဆိုလိုခြင်း ဖြစ်သည်။

သို့သော်လည်း ကုန်းစွန်းလီသည် မွေးရာပါ သံသယစိတ်များသူဖြစ်ပြီး စစ်ယန်ရန်၏ လူသတ်ရခြင်း အကြောင်းရင်းမှာလည်း ဖောက်ပြန်မှုကြောင့်ဖြစ်ရာ သူတို့နှစ်ယောက်အနေဖြင့် မည်သို့ အလွယ်တကူ စိတ်အေးနိုင်ပါမည်နည်း။

စစ်ယန်ရန်က စကားဖြတ်ပြောလိုက်သည်။

"သခင်လေးကျင်း၊ ငါတို့ပို့လိုက်တဲ့ ဝိုင်နဲ့ ဟင်းပွဲတွေကို ဘာလို့ တစ်ချက်လေးမှ မထိရသေးတာလဲ၊ ဖြစ်နိုင်တာက... ငါတို့က အဆိပ်ခတ်ထားတယ်လို့ တွေးနေတာလား"

အာတိုဘီ အမှန်တကယ် ဆွံ့အသွားရသည်။ယင်းသည် သူ အမှန်တကယ် ကြောက်ရွံ့နေသည့်အချက် ဖြစ်သည်။ သို့သော်လည်း သူ့ဦးနှောက်က လျင်မြန်စွာ လည်ပတ်သွား၏။ သူသည် မောက်မာသော အမူအရာကို ဖော်ပြရင်း အေးစက်စွာ ဆိုလိုက်သည်။

"ဒီလို ဟင်းပွဲမျိုးတွေက ကျုပ်မျက်စိထဲဝင်မယ့် အစားအသောက်မျိုးတွေ မဟုတ်ဘူး"

သူက စားပွဲပေါ်ရှိ ဝိုင်ပုလင်းကို လှမ်းကြည့်လိုက်သည်။

"ဝိုင်ကတော့... တကယ် အဆင့်အတန်းရှိပါတယ်၊ ဒါပေမဲ့... လူကြီးမင်းတို့ နှစ်ယောက်က ဒီဝိုင်ကို ကျုပ်တို့ဂိုဏ်းချုပ်အတွက် လက်ဆောင်ပေးတာလို့ ပြောထားမှတော့ သူပြန်မလာခင် ကျုပ်က ဘယ်လိုလုပ် အရင်သောက်ရဲပါ့မလဲ"

ယင်းကို ကြားလိုက်သောအခါ စစ်ယန်ရန်က ကုန်းစွန်းလီကို လှမ်းကြည့်လိုက်ရာ သူကလည်း ခေါင်းကို အနည်းငယ် ညိတ်ပြလိုက်သဖြင့် သူ့စကားလုံးများသည် ကျိုးကြောင်းဆီလျော်မှု ရှိကြောင်း အသိပေးလိုက်သည်။

ကုန်းစွန်းလီ၏ အမြင်အရ ကျင်းမျိုးရိုး၏အဖြေမှာ အတော်လေး သင့်တော်လှသည်။ သူ၏ နူးညံ့ချောမွေ့သော ရုပ်ရည်ကို ကြည့်ခြင်းဖြင့် သူသည် သခင်လေးတစ်ဦး ဖြစ်ပုံရသည်။ ယခုတွင် သူသည် သာမန် ဖျင်ကြမ်းအဝတ်အစားများကို ဝတ်ဆင်ထားလင့်ကစား သူ၏ မြင့်မြတ်သော အရှိန်အဝါကိုတော့ လုပ်ကြံဖန်တီး၍ မရချေ။ သူသည် ဝိုင်ကို တစ်ငုံပင် မသောက်ရသေးဘဲ ဝိုင်ကောင်းတစ်ခွက်ဟု ပြောနိုင်ခဲ့သည့်အပြင် သူ့နာမည်ကလည်း "စည်းစိမ်ချမ်းသာ" ဟု အဓိပ္ပါယ်ရသဖြင့်... ထိုကလေးသည် သေချာပေါက် ချမ်းသာလှသော ကုန်သည်ကြီးတစ်ဦးဦး၏ သခင်လေးဖြစ်ရန် အလွန်နီးစပ်ပေသည်။ ယခုကဲ့သို့သော လူမျိုးက အဘယ်ကြောင့် ဓားကျိုးလက်ဖက်ရည်ခန်းမလို ဂိုဏ်းထဲသို့ ဝင်ရောက်လာခဲ့သလဲဟူသည်မှာမူ လျှို့ဝှက်ချက်တစ်ခု ဖြစ်ပေလိမ့်မည်။

စစ်ယန်ရန်ကမူ ကုန်းစွန်းလီကဲ့သို့ နက်နက်နဲနဲ တွေးတောခြင်း မရှိပေ။ သူမသည် သူ၏ နောက်ခံအသေးစိတ်ကို လိုက်လံစုံစမ်းနေမည် မဟုတ်ချေ။ အမျိုးသမီးတစ်ဦး၏ အလိုလိုသိစိတ်အရ အာတိုဘီ ပြောလိုက်သော "မျက်စိထဲမဝင်ဘူး" ဟူသော စကားမှာ အစစ်အမှန် ဖြစ်ကြောင်း သူမ ခံစားနေရသည်။ သူသည် သဘောမကျရုံတင်မကဘဲ စားပွဲပေါ်ရှိ ဟင်းပွဲများကိုပါ အထင်သေးနေခြင်း ဖြစ်သည်။

အာတိုဘီစကား၏ နောက်ဆုံးအပိုင်း ဖြစ်သော... "ဂိုဏ်းချုပ်ပြန်မလာခင် ပေးထားတဲ့အရာတွေကို ကျုပ်ဘယ်လိုလုပ် ထိရဲပါ့မလဲ" ဟူသော စကားမှာမူ အလိမ်အညာဖြစ်သော်လည်း အလွန်ပင် ယုံကြည်စရာ ကောင်းလှသည်။

ဖုန်းပုကြွယ်က လူအများအပေါ် ပေးစွမ်းသော အမြင်ကိုမူ တရုတ်ရုပ်သံဇာတ်လမ်းတွဲဖြစ်သည့် စုံထောက်ဒီး(Detective Dee) ထဲတွင် မကြာခဏ အသုံးပြုလေ့ရှိသော စကားစုတစ်ခုဖြင့် ဖော်ပြနိုင်သည်။

"သူက တကယ့်ကို ကြောက်စရာကောင်းတဲ့ လူတစ်ယောက်ပဲ"

ထိုဇာတ်လမ်းတွဲထဲရှိ ဗီလိန်အားလုံးနီးပါးသည် တိရန်ကျဲ သို့မဟုတ် လီယွမ်ဖန်းတို့၏ စွမ်းဆောင်ရည်ကို ဖော်ပြရန်အတွက် ယခုကဲ့သို့စကားစုကို တုံ့ဆိုင်းခြင်းမရှိဘဲ သုံးစွဲလေ့ရှိကြသည်။ မှန်ပေသည်... ဇာတ်လိုက်များကိုယ်တိုင်ပင် တစ်ခါတစ်ရံတွင် ဘော့စ်အဆင့်ရှိသော ဇာတ်ကောင်များကို ဖော်ပြရန် ဤစကားစုကို သုံးလေ့ရှိကြသည်။

ကျွန်ုပ်ကိုယ်ပိုင်အမြင်နဲ့ ပြောရလျှင် ဤဇာတ်လမ်းထဲရှိ "ကြောက်စရာကောင်းသော" ဟူသော စကားလုံးသည် အခြေခံအားဖြင့် အချက်သုံးချက်နှင့် ညီမျှပေသည်။ ပထမအချက်မှာ အလွန်မြင့်မားလှသော ဉာဏ်ရည်ဉာဏ်သွေး ရှိခြင်း၊ ဒုတိယအချက်မှာ အလွန်မြင့်မားလှသော သိုင်းပညာစွမ်းရည် ရှိခြင်းနှင့် တတိယအချက်မှာ အလွန်ရက်စက်တတ်ခြင်းတို့ ဖြစ်သည်။ အခြေခံအားဖြင့် လူတစ်ယောက်သည် ထိုအရည်အချင်းများထဲမှ တစ်ခုခုကို ပိုင်ဆိုင်ထားရုံဖြင့်ပင် ထိုသို့ဖော်ပြခံရတတ်သည်။ အကယ်၍ ၎င်းတို့က ထိုအချက်သုံးချက်လုံးကို ပိုင်ဆိုင်ထားမည်ဆိုပါက... မည်သို့ဖော်ပြရပါမည်နည်း...။ ပိုမိုကောင်းမွန်သော စကားစုတစ်ခုကို သုံးရမည်ဆိုလျှင် "ငါက အရမ်းသန်မာလွန်းလို့ ငါ့ကိုယ်ငါတောင် ကြောက်မိတယ်" ဟု ဖြစ်ပေလိမ့်မည်။

"ဟားဟားဟား..."

ကုန်းစွန်းလီက ကျယ်လောင်စွာ ရယ်မောလိုက်သည်။ သူ့ရယ်သံမှာ လုပ်ရယ်ထားမှန်း သိသာလှသည်။

"ကုန်းစွန်းလီရဲ့ ပေါ့ဆမှုကို ခွင့်လွှတ်ပါ သခင်လေးကျင်း၊ ငါစားပွဲထိုးကို စကားပါးခိုင်းတုန်းက ဂိုဏ်းချုပ်ရဲ့ နာမည်ကိုပဲ သိထားတာဆိုတော့ အသေးစိတ်အချက်အလက်တွေက မရှင်းမလင်း ဖြစ်သွားရတာပါ"

ထို့နောက် သူက စားပွဲနားသို့ လျှောက်သွားလိုက်သည်။

"ဒီဝိုင်က ငါတို့ရဲ့ ကျေးဇူးတင်မှုကို ဖော်ပြတဲ့ အထိမ်းအမှတ်သက်သက်ပါပဲ၊ ဓားကျိုးဂိုဏ်းက လူတိုင်းက သူရဲကောင်းတွေပါပဲ၊ ငါတို့က ဘာလို့ လူတစ်ယောက်တည်းကိုပဲ ပေးရမှာလဲ၊ တကယ်လို့ သခင်လေးကျင်း သဘောကျတယ်ဆိုရင် ငါစားပွဲထိုးကို နောက်ထပ်တစ်အိုး ထပ်ယူခိုင်းလိုက်ပါမယ်"

သူက ပုလင်းငယ်လေးကို ကောက်ကိုင်လိုက်ပြီး ခွက်သုံးခွက်ထဲသို့ ဝိုင်များကို စတင်ငှဲ့လိုက်တော့သည်။

"လာပါ၊ သခင်လေးကျင်း၊ သိုင်းလောကထဲမှာ ဝိုင်တစ်ခွက်က ရန်ငြိုးအားလုံးကို ပြေပျောက်စေနိုင်တယ်တဲ့၊ ငါတို့နှစ်ယောက် မင်းအတွက် တစ်ခွက်သောက်ပါ့မယ်"