အခန်း ၁၁၉၉

အခန်း (၁၁၉၉) ရှန်းရွှီတောင်သို့ ပြန်သွားခြင်း

ဓမ္မကိုယ်ထည်က ရွှေရောင်သဲများကဲ့သို့လွင့်စင်သွားပြီး ပန်းရောင်အလင်းတန်းများနှင့်အတူ လေထဲတွင် ပျောက်ကွယ်သွားသည်။

ခမ်းနားကြီးကျယ်သော ပုံရိပ်က မှုန်ဝါးကာကောင်းကင်ကန့်လန့်ကာထဲတွင် တဖြည်းဖြည်း မှေးမှိန်သွားပါသည်။

ရှန်းယီက ပုံမှန်လုပ်နေကျအတိုင်း တိတ်ဆိတ်စွာ ဆုတ်ခွာမသွားဘဲမြို့ရိုးပေါ်သို့ ဆင်းသက်လာကာ မြို့ထဲသို့ ဖြည်းညှင်းစွာလှည့်ကြည့်လိုက်၏။

ကျယ်ပြောလှသော ကောင်းကင်နှင့် မြေပြင်ကြားတွင် ဤအနက်ရောင်ပုံရိပ်တစ်ခုတည်းသာ ကျန်ရစ်ပြီး ဗောဓိသတ္တဓမ္မကိုယ်ထည်နှင့် နှိုင်းယှဉ်ပါက ပိန်ပါးပြီးသေးငယ်နေပုံပေါ်သော်လည်း ၎င်းက လူတိုင်း၏အကြည့်ကို ဖမ်းစားထားဆဲပင်။

ရှန်းယီက ဤကဲ့သို့သောအခြေအနေမျိုးကို မကြိုက်နှစ်သက်ရုံသာဖြစ်သော်လည်း ဗောဓိဂိုဏ်းကိုအကြောင်းပြချက်မရှိဘဲ အနိုင်ရရှိ‌ခွင့်ပြုလောက်အောင် သူက မိုက်မဲနေသည်ဟု မဆိုလိုပေ။

ယနေ့တွင် အကယ်၍အခြားတစ်ယောက်ယောက်သာဖြစ်နေခဲ့မည်ဆိုပါက အခြား တောင်ပိုင်းကာကွယ်ရေး စစ်သူကြီးချုပ်များထဲမှ တစ်ဦးပင် ဖြစ်နေပါစေ နတ်ဘုရားမင်းဆက်၏ပြည်သူများက မဟာနတ်ဆိုးကြီးကိုနှိမ်နင်းခဲ့သူမှာ ဗောဓိသတ္တတစ်ပါးဟုယုံကြည်သွားကြပါလိမ့်မည်။

သို့သော် စုန်းဖုန်းစီရင်စုတွင် နောက်ဆုံးဖြစ်ခဲ့သော အဖြစ်အပျက်ပြီးကတည်းက လောကအနှံ့နာမည်ကျော်ကြားနေပြီဖြစ်သော ရှန်းယီမှာမူ ၎င်းတို့ထဲတွင် မပါဝင်ခဲ့ပေ။

မျှော်လင့်ထားသည့်အတိုင်းပင် စီရင်စုမြို့တော်မှ ပြည်သူများက သူတို့၏အံ့သြထိတ်လန့်မှုမှ အနည်းငယ် သတိပြန်ဝင်လာပြီးနောက်.အတွေ့အကြုံရှိသူများက အံ့အားသင့်စွာဖြင့် အော်ဟစ်လိုက်ကြ၏။ "စစ်သူကြီးနန်ယန်"

လူအများစုက ဤစစ်သူကြီးက မည်သည့် အစိုးရရုံးနှင့် သက်ဆိုင်သည် သို့မဟုတ် မည်သည့် စစ်တပ်ကိုကွပ်ကဲသည်ကိုပင် မသိကြသော်လည်း ဤရိုးရှင်းသောစကားလုံးလေးလုံးက သူတို့ကို ရူးသွပ်စွာအားပေးကြွေးကြော်စေရန် လုံလောက်ခဲ့သည်။

စုန်းဖုန်းစီရင်စု အပြင်ဘက်ရှိ နတ်ဆိုးစစ်တပ်ကို တစ်ယောက်တည်း အကုန်အစင်သုတ်သင်ရှင်းလင်းခဲ့သည့် လုပ်ရပ်များက ပုံပြင်များအဖြစ် ပြောင်းလဲသွားသည်မှာ ကြာမြင့်နေပြီဖြစ်ပြီး ပြည်သူများကြားတွင် လက်ဆင့်ကမ်းပြောဆိုနေကြဆဲပင်။

လုံလောက်ပြီဟုထင်သည့်အချိန်မှ ရှန်းယီက စံအိမ်အတွင်းသို့ ခုန်ဆင်းသွားသည်။

ခြံဝင်းအတွင်းသို့ ခြေချလိုက်သည်နှင့် တပြိုင်နက် တိုက်ပွဲတစ်ခုလုံးကို ကိုယ်တိုင်မျက်မြင်တွေ့ခဲ့ရသော ဘုန်းကြီးလေးကျစ်ခုန်းက တောက်ပနေသော မျက်လုံးများဖြင့် သူ့ကို ကြိုဆိုလိုက်၏။

အစပိုင်းရှိ စိုးရိမ်ထိတ်လန့်မှုမှ အရာရှိရှန်းက သူ၏ ဓမ္မကိုယ်ထည်ကိုဖော်ထုတ်ကာ အနက်ရောင်ပင်လယ်ကိုနောက်ပြန်ဆုတ်သွားစေသည့် အချိန်အထိ ဗောဓိဂိုဏ်း၏လောကခရီးသည်တစ်ဦးဖြစ်သောကျစ်ခုန်းက ဒဏ္ဍာရီလာ ဗောဓိသတ္တ၏နတ်ဘုရားစွမ်းအားကို နောက်ဆုံးတွင် ကိုယ်တိုင်ကိုယ်ကျ မျက်မြင်တွေ့ခဲ့ရသည်။

ကောင်းကင်အားပုံဖော်ထားသော အလင်းဘီးက ဗုဒ္ဓလမ်းစဥ်၏သွင်ပြင်လက္ခဏာတစ်ခုကို မသိမသာယူဆောင်ထားပြီးဖြစ်ချေ၏။

အခြားသူများကို မသိစိတ်အရ ကိုးကွယ်ချင်စိတ် ပေါ်လာစေရန် လှုံ့ဆော်ပေးနေသည်။

ဤအခိုက်အတန့်တွင် သူက ပါးစပ်ကို အကြိမ်ကြိမ်ဖွင့်လိုက်သော်လည်း မည်သည့် စကားတစ်ခွန်းမျှ မပြောနိုင်ခဲ့ပေ။

"ကျွန်တော်မှာ အရေးကြီးတဲ့ကိစ္စတွေ ရှိနေလို့ ဆရာတော်ကို ဒီမှာ ခဏလောက်ဆက်နေပေးဖို့ လိုပါတယ်" ရှန်းယီက လက်များကို အောက်ချလျက် ရပ်နေပြီး တစ်ဖက်လူ၏မှင်တက်နေမှုကို ကြားဖြတ်ပြောလိုက်၏။

ရိုးရိုးသားသား ပြောရလျှင် ယနေ့၏ကပ်ဘေးမှ အသက်ရှင်ကျန်ရစ်ခြင်းက သူ့ကိုပင် အနည်းငယ် ကံကောင်းသည်ဟု ခံစားရစေသည်။

တောင်ပိုင်းဧကရာဇ်၏ရည်ရွယ်ချက်များကို ခန့်မှန်းရန် သူ အစွမ်းကုန်ကြိုးစားခဲ့သော်လည်း လုပ်ငန်းစဉ် တစ်လျှောက်လုံးတွင် အကယ်၍ သူက အချက်တစ်ချက်ကိုပင် မှားယွင်းစွာအကဲဖြတ်မိခဲ့ပါက မဟာတောင်ပိုင်းတိုက်ကြီးက ညတွင်းချင်း ဖျက်ဆီးခံလိုက်ရနိုင်ချေရှိ၏။

ထိုအချိန်က သူ ထွက်ခွာသွားစဉ် ရှန်းယီက ဤမဟာနတ်ဆိုးကြီး၏စရိုက်လက္ခဏာကို စမ်းသပ်ရန်အတွက် မောက်မာသော သဘောထားကို တမင်တကာပြသခဲ့လေသည်။

သို့သော် ပြိုင်ဘက်၏တုံ့ပြန်မှုက အနည်းငယ် နှိမ့်ချနေပုံရပါသည်။

ဗောဓိဂိုဏ်း၏အရှင်ကို အမှန်တကယ် လက်ရောက်မတုံ့ပြန်ရဲလျှင်ပင် အနည်းဆုံးတော့ စကားဖြင့်ဖြစ်စေ မျက်နှာကိုပြန်လည်ဆယ်ယူမှုအချို့ရှိသင့်သော်လည်း တောင်ပိုင်းဧကရာဇ်က ထိုအတိုင်းပင် လက်ခံခဲ့လေ၏။

သာမန်လူများ သည်းမခံနိုင်သောအရာကို သည်းခံနိုင်သူတိုင်းတွင် သေချာပေါက်ကြီးမားသော အကြံအစည်များ ရှိပါသည်။

ထို့အပြင် ဤကဲ့သို့သော မဟာနတ်ဆိုးကြီးက ဗောဓိဂိုဏ်း၏လက်ထဲရှိ ကိရိယာတစ်ခု ဖြစ်လာရန်မျှဖြင့် ကျေနပ်လိမ့်မည် မဟုတ်ချေ။

၎င်းက နတ်ဘုရားနယ်မြေမှ ထွက်ပြေးခဲ့သည်မှာ နှစ်ပေါင်းများစွာကြာမြင့်ခဲ့ပြီဖြစ်ရာ နတ်ဘုရားမင်းဆက်၏ပြည်သူများအတွက် ၎င်း၏ရက်စက်ကြမ်းကြုတ်မှုများကို ပြန်လည်အမှတ်ရစေပြီး ၎င်း၏နာမည်ကို အမည်းစက်ထင်ခံလိုမည် မဟုတ်ပေ။

ကံကောင်းစွာဖြင့် လောင်းကစားက အောင်မြင်သွားခဲ့သည်။

ဤနည်းဖြင့် ရှန်းယီက နောက်ဆုံးတွင် အောင်ပွဲအတွက် အခွင့်အရေးအချို့ကို မြင်တွေ့လိုက်ရပါသည်။

[တတိယအဆင့် ငရဲပင်လယ် မျောက်ဝံဘုရင် ကို သတ်ဖြတ်ပြီး၊ စုစုပေါင်းသက်တမ်း ကပ်ဘေး တစ်သောင်း၊ ကျန်ရှိသောသက်တမ်း ကပ်ဘေး ခုနစ်ထောင် နှစ်ရာ၊စုပ်ယူပြီး]

[တတိယအဆင့် လည်ဆံမွေးထူနွားဖြူ ကို သတ်ဖြတ်ပြီး၊ စုစုပေါင်းသက်တမ်း ကပ်ဘေး တစ်သောင်း၊ ကျန်ရှိသောသက်တမ်း ကပ်ဘေး ရှစ်ထောင် ရှစ်ရာ၊စုပ်ယူပြီး]

[တတိယအဆင့် လင်းဟွာကောင်းကင်စပါးအုံးမြွေ ကို သတ်ဖြတ်ပြီး၊ စုစုပေါင်းသက်တမ်း ကပ်ဘေး တစ်သောင်း၊ ကျန်ရှိသောသက်တမ်း ကပ်ဘေး ရှစ်ထောင် ကိုးရာ၊ စုပ်ယူပြီး]

[လက်ကျန် နတ်ဆိုးသက်တမ်း- ကပ်ဘေး နှစ်သောင်းငါးထောင်တစ်ရာ]

ပုံမှန်မဟုတ်သောအရာ တစ်စုံတစ်ရာ မဖြစ်ပေါ်ပါက ဤနတ်ဆိုးသက်တမ်းက မိမိ၏ကျင့်ကြံခြင်းကို အရေအတွက် ကိုးဆယ့်ခြောက်အထိ မြှင့်တင်ရန် လုံလောက်နိုင်ပြီး တတိယအဆင့်ပြီးပြည့်စုံခြင်းဖြစ်သော ကိုးနှင့်ကိုးအသွင်ပြောင်းလဲခြင်းနှင့် ခြေတစ်လှမ်းသာ ကွာဝေးတော့မည်။

ခြောက်နှင့်ခြောက် အသွင်ပြောင်းလဲခြင်းကို ပြီးမြောက်ပြီးနောက် ဗောဓိသတ္တဓမ္မကိုယ်ထည်၏ အဝိုင်းစက်ကွင်းအား ဖွဲ့စည်းပြီးဖြစ်ကာ ၎င်းကို ပြီးပြည့်စုံအောင် လုပ်ရန်သာ ကျန်တော့၏။

သို့သော် ပြဿနာမှာကျန်ရှိနေသောသက်တမ်း နှစ်ထောင်ကို စုဆောင်းရန် ခက်ခဲနေပြီဖြစ်သည်။

တတိယအဆင့်အောက်မှာ နတ်ဘုရားမင်းဆက်၌များများစားစားမရှိတော့ဘဲ အများစုမှာ ဤတိုက်ပွဲအပြီးတွင် သူတို့က မျိုးတုံးလုနီးပါးဖြစ်သွားပြီဖြစ်ရာ ဒါဇင်နှင့်ချီ၍ ထပ်မံရှာဖွေတွေ့ရန်မှာ မဖြစ်နိုင်သလောက်ပင်။

တတိယအဆင့် အထက်နှင့် ပတ်သက်၍ မဟာတောင်ပိုင်းတိုက်ကြီး တစ်ခုလုံးတွင် ရှန်းယီက လက်ရှိ၌တောင်ပိုင်းဧကရာဇ်နှင့် အခြား မဟာနတ်ဆိုးကြီးတစ်ကောင်ကိုသာ သိထားလေသည်။

သူက အပြင်ဘက်မှ အခြားနည်းလမ်းများကိုသာ စဉ်းစားနိုင်ကောင်း စဉ်းစားနိုင်ပေလိမ့်မည်။

သို့သော် ဤသည်က အမှန်တကယ်တော့ အရေးတကြီးဆုံးကိစ္စမဟုတ်ပေ။

ဤနတ်ဆိုးကပ်ဘေးကို ဖြေရှင်းပြီးနောက် တောင်ပိုင်းဧကရာဇ်က သေချာပေါက်ကတိဖျက်မည်ဖြစ်ပြီး သူကိုယ်တိုင်လည်း မသေမျိုးသုံးပါးဂိုဏ်း၏ပြဿနာများကို ကိုင်တွယ်ဖြေရှင်းရာတွင် ခေါင်းကိုက်ရပါလိမ့်မည်။

"အရာရှိရှန်းရဲ့အစီအစဉ်ကို နာခံပါ့မယ်" ဘုန်းကြီးလေးကျစ်ခုန်းက မဟာကပ်ဘေးတစ်ခုဖြစ်ပေါ်လာတိုင်းတုံ့ပြန်ရန် ပြိုင်ဘက်ကင်းသော ပုဂ္ဂိုလ်တစ်ဦး မလွဲမသွေ ပေါ်ထွက်လာစမြဲဖြစ်ကြောင်း အမြဲ ကြားဖူးခဲ့၏။

သို့သော် သူက ၎င်းကိုလှပသော အိပ်မက်တစ်ခုအဖြစ်သာ သတ်မှတ်ခဲ့ပါသည်။

အရာရှိရှန်းကို ကိုယ်တိုင်မြင်တွေ့လိုက်ရချိန်အထိ ဤပြိုင်ဘက်ကင်းသည်ဟု ခေါ်သော အရာ၏စစ်မှန်သော အဓိပ္ပာယ်ကို သူ နောက်ဆုံးတွင် နားလည်သွားခဲ့သည်။

သာမာန်အမြင်နားလည်မှုကိုကျော်လွန်ပြီး သာမန် ယုတ္တိဗေဒအားလုံးကို ကျော်လွန်နေပါသည်။

သတ္တမအဆင့် လောကခရီးသည်များကို တိုက်ခိုက်ခြင်းမှ မဟာနတ်ဆိုးအရှင်သုံးပါးကိုသတ်ဖြတ်ခြင်းအထိ ကျင့်ကြံသူအများစုက တစ်သက်တာလုံးတွင် ဘယ်သောအခါမျှမပြီးမြောက်နိုင်သောအရာကိုအရာရှိရှန်းက မျက်တောင်တစ်ခတ်အတွင်း အောင်မြင်ခဲ့သည်။

"ဒါပေမယ့်..." ဘုန်းကြီးလေးကျစ်ခုန်းက ခေါင်းကို မော့လိုက်ပြီး တစ်ခုခုကိုရုတ်တရက် အမှတ်ရသွား၏။

"ဒီနည်းနဲ့ဆိုရင် နတ်ဘုရားမင်းဆက်ရဲ့ပြည်သူတွေက နတ်ဆိုးသုတ်သင်သူဟာ ဗောဓိဂိုဏ်းက မဟုတ်ဘူးဆိုတာကိုသိသွားကြပေမယ့် ခင်ဗျားရဲ့နန်ယန်စစ်သူကြီးဆိုတဲ့အမှတ်အသားက ဗောဓိဂိုဏ်းဆီ ပေါက်ကြားသွားနိုင်တယ်"

အကယ်၍ မဟာလွတ်လပ်ခြင်းသန့်စင်သောကမ္ဘာ ဗောဓိသတ္တက တောင်ပိုင်းတိုက်ကြီးကို ဖောက်ထွင်း၍မရခြင်း၏အကြောင်းရင်းမှာ ဂိုဏ်းအတွင်း၌ရှိနေကြောင်းကို သိရှိသွားပါက အကျိုးဆက်များက စိတ်ကူး၍ပင် ရမည်မဟုတ်ချေ။

"ဒီနေရာက သတင်းကို သူတို့ယူသွားနိုင်မှာ မဟုတ်ဘူးလို့ ကျွန်တော်ပြောခဲ့တယ်"

သို့သော် ရှန်းယီက ပေါ့ပေါ့ပါးပါးပြုံးလိုက်ပြီး သူ၏စကားများတွင် ယုံကြည်မှုများ ပြည့်နှက်နေပါသည်။

သူ၏ယုံကြည်မှုက အခြေအမြစ် မရှိသည်တော့ မဟုတ်ပေ။

ယနေ့ပြီးနောက် မဟာတောင်ပိုင်းတိုက်ကြီးတွင် ၎င်းကို စောင့်ကြပ်နေသော တတိယအဆင့် နတ်ဆိုးကျောက်တုံး ခုနစ်ခုရှိလာမည်ဖြစ်ပြီး အခြား မရေမတွက်နိုင်သော နတ်ဆိုးကျောက်တုံးများလည်းကျန်နေသေး၏။

မဟာလွတ်လပ်ခြင်း သန့်စင်သောကမ္ဘာ ဗောဓိသတ္တ ကိုယ်တိုင်ကိုယ်ကျ မလာသရွေ့နတ်ဘုရားမင်းဆက်တွင် ဖြစ်ပျက်နေသည်များကို ပြင်ပလောကသို့ မည်သူကမျှသတင်းပို့နိုင်မည် မဟုတ်ပေ။

ထိုသို့ပြောပြီးနောက် သူက စံအိမ်အတွင်းသို့ တည့်မတ်စွာ လျှောက်ဝင်သွားသည်။

အကယ်၍ သူက လောလောဆယ် ကိုးနှင့်ကိုးသို့ မရောက်နိုင်သေးပါက ပြိုင်ဘက်ကင်းသော နတ်ဆိုးကျောက်တုံးစစ်တပ်တစ်ခုကို အရင်ဆုံးဖန်တီးရမည်ဖြစ်သည်။