အခန်း ၉၀၇
Vol. 66 Ch. 907
အခန်း ၉၀၇ သိုလှောင်ထားသော အင်အားကြောင့် တစ်ဟုန်ထိုး အစွမ်းထက်လာခြင်း
စုမင် စကားပြောလိုက်ချိန်တွင် အဘိုးအိုကိုးဦး၏ မျက်နှာထက်၌ တည်ငြိမ်သော အမူအရာများ ရှိနေကြသည်။ သိသာသည်မှာ ထိပ်ပြောင်ကြိုးကြာနှင့် အသူရာ နဂါးတို့ဖြစ်ကြသော ထိုအမျိုးသားနှစ်ဦးသည် သူတို့၏ ကျင့်ကြံခြင်းအဆင့်အရ အဘိုးအိုများ၏ အာရုံစိုက်မှုကို များစွာ ဆွဲဆောင်နိုင်ခြင်း မရှိပေ။
စုမင် နောက်ကွယ်ရှိ ကြောက်ရွံ့ခြင်းကင်းသော စစ်သည်သုံးထောင်၏ မျက်နှာများထက်တွင်လည်း အမူအရာ ပြောင်းလဲခြင်း များစွာ မရှိပေ။ သို့သော်လည်း သူတို့၏ ခန္ဓာကိုယ်များထဲမှ မျက်စိတစ်မှိတ်အတွင်း ပြင်းထန်သော အရှိန်အဝါတစ်ခု ပေါက်ကွဲထွက်လာသည်။ ၎င်းသည် လောကကြယ်ဂြိုဟ် တစ်ဂြိုဟ်လုံးကို လွှမ်းခြုံသွားသည့် ကြီးမားပြီး အစွမ်းထက်သော ဖိအားတစ်ခုအဖြစ် ပြောင်းလဲသွားပြီး အထူးသဖြင့် ထိပ်ပြောင်ကြိုးကြာနှင့် အသူရာ နဂါးတို့ဖြစ်ကြသော ထိုအမျိုးသားနှစ်ဦးအပေါ်သို့ ကျရောက်သွားသည်။
တစ်ချိန်တည်းမှာပင် စုမင်ဘေး၌ ရှိနေသော ကြောင်အမျိုးသမီး၏ မျက်ဝန်းထဲတွင် အလင်းတစ်ချက် လက်သွားသည်။ သူမ၏ နားရွက်များမှာ ချက်ချင်းပင် ပိုမိုချွန်ထက်သွားပြီး လှုပ်ရှားမှုတစ်ခုနှင့်အတူ သူမသည် ထိပ်ပြောင်ကြိုးကြာနှင့် အသူရာ နဂါးတို့ဖြစ်ကြသော ထိုအမျိုးသားနှစ်ဦး ဘေး၌ လျှပ်တစ်ပြက် ပေါ်လာခဲ့သည်။ သူမ၏ အရှိန်မှာ အလွန်ပင် မြန်ဆန်လှသဖြင့် စုမင်၏ မျက်သူငယ်အိမ်များကိုပင် အနည်းငယ် ကျဉ်းမြောင်းသွားစေသည်။
"သူတို့ကို ဒဏ်ရာမရစေနဲ့။ အရှင်လတ်လတ် ဖမ်းခဲ့" စုမင်သည် လက်မောင်းကို ဝှေ့ယမ်းလိုက်ပြီး ကောင်းကင်ယံဆီသို့ လှည့်ထွက် လျှောက်လှမ်းသွားသည်။ အဘိုးအိုကိုးဦးက သူ့နောက်မှ လိုက်ပါသွားပြီး ကြောက်ရွံ့ခြင်းကင်းသော စစ်သည်သုံးထောင်က သူ့ကို ဝန်းရံလိုက်ကြသည်။
ထိပ်ပြောင်ကြိုးကြာမှာ အံ့အားသင့်သွားသည်။ ၎င်းသည် စောစောက သူ၏ သရုပ်ဆောင်မှုထဲတွင် အလွန်အကျွံ စိတ်နစ်နေခဲ့သဖြင့် ကောင်းကင်ယံ၌ ဤမျှ လူအမြောက်အမြား ပေါ်လာသည်ကို သတိမပြုမိဘဲ ဖြစ်သွားခဲ့ရသည်။ ထိုအခိုက်အတန့်တွင် ၎င်းသည် ပြင်းထန်သော ဖိအားကြောင့် တုန်လှုပ်သွားပြီး ခေါင်းမော့ကြည့်လိုက်ချိန်၌ ချက်ချင်းပင် ကျယ်လောင်စွာ အော်ဟစ်လိုက်တော့သည်။
စုမင် ခေါင်းလှည့်မကြည့်ခဲ့ပေ။ ထိပ်ပြောင်ကြိုးကြာကို သင်ခန်းစာတစ်ခု ပေးသင့်သည်ဖြစ်ရာ ထို့ကြောင့် စုမင်သည် လူများ၏ ဝန်းရံခြင်းကို ခံရရင်း စိတ်အေးလက်အေး ရှိသော အမူအရာဖြင့် ကောင်းကင်ယံဆီသို့ ပျံသန်းသွားခဲ့သည်။ သူသည် မင်နက်ဂြိုဟ်၏ အမြင့်ဆုံး လေထုအလွှာကို ဖြတ်သန်း ပျံသန်းသွားသောအခါ နဂါးငွေ့တန်းထဲတွင် ရပ်တန့်လိုက်ပြီး ကြီးမားသည့် လွန်းပျံသင်္ဘော ဆယ့်သုံးစင်းကို မြင်တွေ့လိုက်ရသည်။
ဝေးကွာသော နေရာမှကြည့်လျှင် ဤလွန်းပျံသင်္ဘော ဆယ့်သုံးစင်းမှာ ကြောက်မက်ဖွယ်ကောင်းလှသည်။ ၎င်းတို့သည် တစ်စင်းလုံး အနက်ရောင်ဖြစ်ပြီး သူတို့ထံမှ ထိတ်လန့်ဖွယ်ရာ လေထုတစ်ခု ထွက်ပေါ်နေသည်။ ဦးဆောင်နေသော သင်္ဘော၏ ဦးခေါင်းပိုင်းတွင်မူ လူသတ်ငွေ့တစ်ခု ရှိနေသည်။ ထိုလူသတ်ငွေ့မှာ ထိုနေရာတွင် စုစည်းနေပြီး ပျယ်လွင့် မသွားပေ။ သို့သော် ၎င်းသာ ပြန့်နှံ့သွားမည်ဆိုပါက လောကကြီးကို ဖျက်ဆီးနိုင်သော စွမ်းအားတစ်ခုအား ဖြစ်ပေါ်စေပေမည်။
နံနက်ခင်း တာအိုလောကမှ လွန်းပျံသင်္ဘော တစ်စင်းချင်းစီမှာ အလွန်ပင် တန်ဖိုးကြီးမားလှသည်။ ၎င်းတို့သည် နံနက်ခင်း တာအိုဂိုဏ်း၏ ထိန်းချုပ်မှုအောက်တွင် ရှိပြီး အစစ်အမှန် ယင်လောက၏ ရှေးဟောင်း ကြေးညိုဓားများနှင့် တူညီသော အရှိန်ဖြင့် ခရီးနှင်နိုင်သည့် ကြီးမားသော မှော်ရတနာ သင်္ဘောကြီးများ ဖြစ်ကြသည်။
စုမင် ဤလွန်းပျံသင်္ဘော ဆယ့်သုံးစင်းကို မြင်လိုက်သည့် အချိန်နှင့် တစ်ပြိုင်နက်တည်း နီးပါးမှာပင် လွန်းပျံသင်္ဘောများထဲမှ လူပေါင်း ရာချီ၍ ချက်ချင်း အတူတူ ပျံသန်းထွက်လာကြသည်။ သူတို့ထဲတွင် အမျိုးသားများနှင့် အမျိုးသမီးများ ပါဝင်ပြီး အမူအရာများမှာ ရိုသေကိုင်းညွတ်မှုများ ရှိနေကြကာ သူတို့၏ လက်သီးကို လက်ဝါးဖြင့် ဆုပ်လျက် စုမင်အား ဦးညွှတ်လိုက်ကြသည်။
"သခင်လေး ပြန်လာတာကို ကြိုဆိုပါတယ်"
စုမင် ညင်သာစွာ ပြုံးလိုက်သည်။ သူ စကားမဆိုဘဲ ရှေ့သို့ ခြေလှမ်းကြီး တစ်လှမ်း လှမ်းလိုက်သည်။ သူသည် သင်္ဘောများနှင့် နီးကပ်လာသောအခါ သူတို့အပေါ်သို့ အကြည့်ကို ဝှေ့ယမ်းကြည့်ရှုလိုက်ပြီး ထို့နောက် သူ့မျက်လုံးများသည် ဆယ့်သုံးစင်းအနက် အကြီးဆုံးဖြစ်သော သင်္ဘောကြီးပေါ်သို့ ကျရောက်သွားကာ ထိုနေရာဆီသို့ လျှောက်လှမ်းသွားခဲ့သည်။
သူ လွန်းပျံသင်္ဘောပေါ်သို့ ခြေချလိုက်သည့် အခိုက်အတန့်တွင် အဘိုးအိုကိုးဦးက သူ့နောက်မှ လိုက်ပါလာခဲ့ကြသည်။ ကြောက်ရွံ့ခြင်းကင်းသော စစ်သည်သုံးထောင်နှင့် ပတ်သက်၍မူ သူတို့သည် လမ်းခွဲလိုက်ကြပြီး ကျန်ရှိသော လွန်းပျံသင်္ဘောများဆီသို့ သွားရောက်ကြသည်။
မူလက တာအိုခုန်းပိုင်ဆိုင်သော ဤလွန်းပျံသင်္ဘောပေါ်တွင် စုမင်သည် မျက်လုံးများကို မှိတ်လိုက်သည်။ သူသည် လွန်းပျံသင်္ဘော တစ်စင်းလုံးကို လွှမ်းခြုံနိုင်ရန် ဝိညာဉ်အသိအား ပြန့်နှံ့စေခဲ့ပြီး အချိန်အတန်ကြာပြီးနောက် တာအိုခုန်း၏ မှတ်ဉာဏ်များအား အခြေခံ၍ ကောက်ချက်တစ်ခု ချမှတ်ကာ လွန်းပျံသင်္ဘောနှင့် ပတ်သက်၍ ဘက်လိုက်မှုမရှိသော နားလည်မှုတစ်ခုကို ရရှိခဲ့သည်။
ထိုအခိုက်အတန့်တွင် စူးစူးဝါးဝါး အော်ဟစ်သံများသည် ဝေးကွာသော နေရာမှ ထွက်ပေါ်လာပြီး အချိန်နှင့်အမျှ ပိုမိုနီးကပ်လာခဲ့သည်။ မျက်စိတစ်မှိတ်အတွင်းမှာပင် ထိုစူးစူးဝါးဝါး အော်ဟစ်သံများသည် စုမင် လက်ရှိ ရှိနေသော လွန်းပျံသင်္ဘောထဲ၌ ပဲ့တင်ထပ်သွားတော့သည်။
"တောက်… မင်းတို့ အခု ဘယ်သူ့ကို ဖမ်းမိလိုက်လဲဆိုတာ သိရဲ့လား။ ငါ မင်းတို့ကို ပြောလိုက်မယ်၊ ငါ့ကို ရန်စတာ မင်းတို့အတွက် ကောင်းမှာ မဟုတ်ဘူး။ ငါ့ကို ဖမ်းရဲတယ်ပေါ့လေ။ မင်းတို့ အခု သေပြီသာမှတ်။ ဒီအတိုင်း စောင့်နေလိုက်ကြစမ်းပါ"
"ကောင်လေးစုက ငါတို့ကို လာကယ်လိမ့်မယ်"
စုမင်သည် သူ၏ မျက်လုံးများကို ဖွင့်လိုက်ပြီး လှပသော အမျိုးသမီးကို ကြည့်လိုက်သည်။ သူမသည် လက်တစ်ဖက်စီတွင် အမျိုးသားတစ်ဦးစီကို ကိုင်ဆောင်ထားသည်။ သူမ လွန်းပျံသင်္ဘောပေါ်သို့ ရောက်ရှိလာသောအခါ ထိပ်ပြောင်ကြိုးကြာနှင့် အသူရာ နဂါးတို့ကို လွှတ်ပေးလိုက်ပြီး ထို့နောက် ခေါင်းငုံ့လျက် ရိုသေမှု အပြည့်ဖြင့် စုမင်၏ ဘေးတွင် ရပ်နေခဲ့သည်။
"ငါ မင်းတို့ကို ပြောလိုက်မယ်။ မင်းတို့ရဲ့ ဘိုးဘိုးကြိုးကြာက တကယ့်ကို အစွမ်းထက်တာ။ မ… မ… မင်းတို့… ဒီအတိုင်း စောင့်နေလိုက်ကြ။ မကြာခင်မှာ မင်းတို့ အားလုံး ပေးဆပ်ရလိမ့်မယ်" ထိပ်ပြောင်ကြိုးကြာသည် သွားများကို ဖြဲပြပြီး သူ၏ ခြေသည်းလက်သည်းများကို ဝှေ့ယမ်းလျက် ပြင်းထန်သော လေသံဖြင့် ပြောဆိုနေသော်လည်း ၎င်း၏ လုပ်ရပ်များနှင့် ရင်းနှီးပြီးဖြစ်သော စုမင်မှာမူ ထိပ်ပြောင်ကြိုးကြာ ကြောက်နေကြောင်း ပြောနိုင်လေသည်။
အသူရာ နဂါးမှာမူ ၎င်းဘေးတွင် တိတ်ဆိတ်နေခဲ့သည်။
"မင်းတို့ ကိုယ့်အခြေအနေကိုယ် သိတယ်ဆိုရင် ငါတို့ကို မင်နက်ဂြိုဟ်ဆီ အမြန်ဆုံး ပြန်ပို့ပေးကြ။ မဟုတ်ရင်တော့… ဟဲဟဲ၊ မင်းတို့ နံနက်ခင်း တာအိုလောကက ဖြစ်နေရင်တောင်မှ ကောင်လေးစုရဲ့ ဒေါသကို ခံနိုင်ရည်ရှိမှာ မဟုတ်ဘူး" ထိပ်ပြောင်ကြိုးကြာသည် စူးစူးဝါးဝါး လေသံဖြင့် နောက်တစ်ကြိမ် ထပ်မံ ပြောဆိုပြန်သည်။ ၎င်းသည် လက်ရှိတွင် အလွန်အမင်း ထိတ်လန့်ကြောက်ရွံ့နေပြီး ၎င်းပတ်ပတ်လည်ရှိ ကျင့်ကြံသူအားလုံးမှာ သူတို့၏ မျက်နှာများထက်တွင် ထိုသို့သော မောက်မာသည့် အမူအရာများကိုသာ ထိန်းသိမ်းထားကြပြီး ၎င်းက မည်သို့ပင် ခြိမ်းခြောက်ပါစေ လုံးဝ ဂရုမစိုက်ဘဲ နေကြသည်အား မြင်တွေ့ရသောအခါ ၎င်း၏ နှလုံးသားမှာ စတင် တုန်လှုပ်လာခဲ့ရသည်။
၎င်းသည် သူ့ရှေ့ရှိ ချောမောသော လူငယ်၏ မျက်နှာကို ရံဖန်ရံခါ ခန့်မှန်းကြည့်ရှုနေပြီး ၎င်း၏ ခေါင်းထဲတွင် အတွေးပေါင်းစုံ ပြေးလွှားနေခဲ့သည်။
'တောက်… ဒီလူက ငါ အတိတ်တုန်းက လှည့်စားခဲ့တဲ့ လူတွေရဲ့ စာရင်းထဲမှာ မပါပါဘူး'
'သူ ဘာဖြစ်လို့ ငါ့ကို ဖမ်းတာလဲ။ ဒါ… ဒါက သူက ကောင်လေးစုရဲ့ ရန်သူ ဖြစ်နေလို့လား။ အား… စုမင်၊ အို… စုမင်၊ မင်း ငါ့ခေါင်းပေါ်ကို တကယ့် ကပ်ဘေးတစ်ခု ယူဆောင်လာခဲ့တာပဲ' ထိပ်ပြောင်ကြိုးကြာသည် ၎င်း၏ ခန့်မှန်းချက်အပေါ် လုံလောက်သော ယုံကြည်မှု မရှိသော်လည်း ၎င်းတွင် အစွမ်းထက်သော နောက်ခံတစ်ခု ရှိနေသည့်အလား ကျယ်လောင်စွာ ဆက်လက် အော်ဟစ်နေဆဲ ဖြစ်သည်။
စုမင် ညင်သာစွာ ပြုံးလိုက်သည်။ သူသည် သူ့ရှေ့တွင် ဆက်လက် ဆူညံပူညံ လုပ်နေသော ထိပ်ပြောင်ကြိုးကြာကို ကြည့်လိုက်ပြီး ထို့နောက် သူ၏ ညာလက်ကို ဖြည်းညှင်းစွာ မြှောက်ကာ သိုလှောင်အိတ်ပေါ်သို့ လက်ဝါးဖြင့် ညင်သာစွာ ပွတ်သပ်လိုက်ရာ ချက်ချင်းပင် သူ့လက်ဝါးထက်၌ သလင်းကျောက် တစ်တုံး ပေါ်လာသည်။
သူသည် ထိုသလင်းကျောက်ကို မြေပြင်ပေါ်သို့ ပစ်ချလိုက်သည်။
ကြည်လင်သော သလင်းကျောက် မြေပြင်ပေါ်သို့ ကျရောက်သွားသည့် အသံမှာ ထိပ်ပြောင်ကြိုးကြာ၏ အော်ဟစ်သံများကြားထဲ၌ သတိမပြုမိနိုင်လောက်အောင် ဖြစ်နေသော်လည် ထိုအသံ ပေါ်ထွက်လာသည့် အချိန်၌ပင် ထိပ်ပြောင်ကြိုးကြာ၏ အသံသည် ချက်ချင်း တိခနဲ ငြိမ်သက်သွားခဲ့ပြီး ၎င်း၏ မျက်လုံးများသည် သလင်းကျောက်ပေါ်သို့ ချက်ချင်း စိုက်ကျသွားတော့သည်။ ထို့နောက် ၎င်းသည် ဗီဇအတိုင်း သလင်းကျောက်ပေါ်သို့ ခုန်အုပ်လိုက်ပြီး ၎င်း၏ အရှိန်မှာ အလွန်ပင် မြန်ဆန်လှသဖြင့် မျက်စိတစ်မှိတ်အတွင်းမှာပင် ၎င်းသည် သလင်းကျောက်ကို လက်ထဲ၌ ဆုပ်ကိုင်ထားပြီး ဖြစ်နေသည်။
၎င်းသည် ကျောက်တုံးကို ပါးစပ်ထဲသို့ ထည့်ကာ ကိုက်ကြည့်လိုက်သေးသည်။ ၎င်း၏ မျက်နှာထက်၌ စိတ်လှုပ်ရှားမှုနှင့် ပျော်ရွှင်ကြည်နူးမှုများ ပေါ်ထွက်လာသည်။
"ငါ့ဘေးနားမှာ အစေခံ နှစ်ယောက် လိုနေတယ်" စုမင်က တည်ငြိမ်စွာ ပြောလိုက်သည်။
ထိပ်ပြောင်ကြိုးကြာသည် သလင်းကျောက်ကို ချက်ချင်း သိမ်းဆည်းလိုက်ပြီး စုမင်အား မကြည့်မီ သူ၏ ရင်ဘတ်ကို ပုတ်လျက် ကျယ်လောင်စွာ ပြောဆိုလိုက်သည်။
"ငါ… ငါ… ငါ မင်းရဲ့ အစေခံ ဖြစ်ဖို့ ဆန္ဒရှိတယ်။ ဒါပေမယ့် မင်း ငါ့ကို တစ်ရက်ကို သလင်းကျောက် တစ်တုံး ပေးရမယ်" ၎င်းက အော်ဟစ်လိုက်ရင်း အသူရာ နဂါးကိုပင် တစ်ချက် ကန်လိုက်ပြီးနောက် စုမင်အား နောက်တစ်ကြိမ် ထပ်ကြည့်လိုက်သည်။
"သူ့ကိုပါ ထည့်မယ်ဆိုရင် မင်း ငါတို့ကို တစ်ရက်ကို သလင်းကျောက် နှစ်တုံး ပေးရမယ်"
"ထိပ်ပြောင်ကောင်" အသူရာ နဂါးဖြစ်သော ထိုအမျိုးသားသည် ထိပ်ပြောင်ကြိုးကြာကို စူးစိုက်ကြည့်လိုက်သည်။ ၎င်း စကားပြောရန် ပြင်လိုက်စဉ်မှာပင် ထိပ်ပြောင်ကြိုးကြာ၏ ကန်ခြင်းကို နောက်ထပ် နှစ်ကြိမ် ခံလိုက်ရပြန်သည်။ ၎င်းမှာ ဆွံ့အသွားရသည်။ နှစ်ကြိမ် ကန်ခံရခြင်းမှာ သူတို့နှစ်ဦးကြားတွင် ဖွဲ့စည်းထားသော အချက်ပြမှုတစ်ခု ဖြစ်သည်။
အသူရာ နဂါးသည် နှာခေါင်းရှုံ့လိုက်ပြီး နောက်ထပ် စကားမဆိုတော့ပေ။
"ကောင်းပြီ၊ မင်းတို့ နှစ်ယောက် အခု ထွက်သွားလို့ရပြီ။ အခြား လွန်းပျံသင်္ဘောတွေကို အကြောင်းကြားလိုက်ပါ။ ငါတို့… နတ်ဘုရား အနှစ်သာရ ကြယ်ပင်လယ်ဆီ ဦးတည်မယ်" စုမင်၏ မျက်ဝန်းထဲတွင် အလင်းတစ်ချက် လက်သွားသည်။ သူသည် ဤစကားလုံးများကို တည်ငြိမ်စွာ ပြောဆိုလိုက်ပြီး သင်္ဘောပေါ်တွင် တင်ပျဉ်ခွေ ထိုင်လိုက်သည်။
စုမင်၏ အမိန့်သည် လွန်းပျံသင်္ဘော ဆယ့်သုံးစင်းလုံးအပေါ်၌ မြင့်မြတ်ပြီး ပြင်းထန်သော ဖိအားတစ်ခု ဖြစ်သည်။ သူ့အသံသည် အပြင်ဘက်သို့ ပြန့်နှံ့သွားသည်နှင့် ခေတ္တအကြာတွင် လွန်းပျံသင်္ဘော ဆယ့်သုံးစင်းထဲမှ လေတိုးသံများ ချက်ချင်း ထွက်ပေါ်လာပြီးနောက် သူတို့သည် လမ်းကြောင်းကို ပြောင်းလဲလိုက်ကြကာ မင်နက်ဂြိုဟ်အား လျင်မြန်စွာ ဖြတ်ကျော်၍ မင်နက်ဂြိုဟ်၏ နောက်ကွယ်တွင် ရှိနေသေ နတ်ဘုရား အနှစ်သာရ ကြယ်ပင်လယ်ဆီသို့ တည့်မတ်စွာ ဦးတည် ခရီးနှင်ကြတော့သည်။
ရွှီဟွေ့ပင်လျှင် ခေတ္တမျှ ဝေခွဲမရ ဖြစ်ပြီးနောက် စုမင်ကို မေးခွန်းထုတ်ခြင်း မပြုခဲ့ပေ။ သူမသည် တာအိုခုန်း မင်နက်ဂြိုဟ်တွင် လုပ်ဆောင်ရမည့် တာဝန်များမှာ အတိအကျ မည်သည်ဖြစ်ကြောင်း သေချာမသိခဲ့ပေ။ သူမသည် နတ်ဘုရား အနှစ်သာရ ကြယ်ပင်လယ်သို့ ဦးတည်သွားခြင်းမှာလည်း တာအိုခုန်း၏ တာဝန်များထဲမှ တစ်ခု ဖြစ်လိမ့်မည်ဟု ထင်မှတ်ခဲ့သည်။
လွန်းပျံသင်္ဘော ဆယ့်သုံးစင်းသည် နဂါးငွေ့တန်းထဲတွင် အတူတူ ထွက်ခွာ ခရီးနှင်ကြသည်။ လှိုင်းတံပိုးများ လှုပ်ခတ်သွားပြီး သူတို့ သွားလေရာနေရာတိုင်း၌ နဂါးငွေ့တန်းသည် ရေမျက်နှာပြင်ကဲ့သို့ ထင်မှတ်ရကာ လှိုင်းတွန့်ကလေးများ ပေါ်ထွက်လာသည်။
စုမင်သည် တင်ပျဉ်ခွေ ထိုင်လျက် မျက်လုံးများကို မှိတ်ထားသည်။ သူသည် သူ၏ ညာလက်ကို မြှောက်ကာ စည်းတံဆိပ် တစ်ခု ဖွဲ့စည်းလိုက်ပြီးနောက် လက်ဝါးဖြင့် သင်္ဘောပေါ်သို့ တွန်းပို့လိုက်သည်။ ချက်ချင်းပင် သူ့ပတ်ပတ်လည်၌ ပုံရိပ်ယောင် အလင်းမျက်နှာပြင် တစ်ပြင် ပေါ်ထွက်လာသည်။ ထိုအလင်းမျက်နှာပြင်သည် အပြင်ဘက်သို့ ပြန့်နှံ့သွားပြီး သူ့အထက်ရှိ လေထုနှင့် ပေါင်းစပ်သွားကာ စုမင်ကို ဗဟိုပြု၍ လွတ်လပ်သော ဟင်းလင်းပြင်တစ်ခုကို ဖွဲ့စည်းလိုက်သည်။
၎င်းမှာ နဂါးငွေ့တန်း လွန်းပျံသင်္ဘော ပိုင်ဆိုင်သော မှော်ပညာတစ်ခု ဖြစ်သည်။ ၎င်းသည် အခြားသူများ ဝင်ရောက်ရန် ခက်ခဲသော လျှို့ဝှက်အခန်း တစ်ခန်းကို ဖွဲ့စည်းနိုင်သည်။ လွန်းပျံသင်္ဘော၏ သခင်သာလျှင် ဤသို့ လုပ်ဆောင်နိုင်ပြီး စုမင်သည် တာအိုခုန်းကို သိမ်းပိုက်ထားပြီးဖြစ်ရာ သူသည် သဘာဝကျစွာပင် ဤသို့ လုပ်ဆောင်နိုင်သည်။
သူသည် လျှို့ဝှက်အခန်းထဲတွင် တစ်ဦးတည်းသာ ရှိနေပြီး အခြားလူအားလုံးကို ဖယ်ရှားပြီးဖြစ်သည်။ ရွှီဟွေ့ပင်လျှင် လွန်းပျံသင်္ဘောပေါ်ရှိ ဤလျှို့ဝှက်အခန်းထဲသို့ အသံမထွက်ဘဲ ဝင်ရောက်နိုင်ခြင်း မရှိပေ။
ဤနေရာသည် စုမင်အတွက် လုံးဝ ဥဿုံ ဘေးကင်းမှုကို ပေးစွမ်းနိုင်သော နယ်မြေတစ်ခု ဖြစ်သည်။
'ထိပ်ပြောင်ကြိုးကြာရဲ့ ဉာဏ်ရည်နဲ့ဆိုရင် ဘာတွေ ဖြစ်ပျက်နေလဲ ဆိုတာကို ဒီကောင် သေချာပေါက် သဘောပေါက်သွားလိမ့်မယ်။ ဒါကြောင့် ငါ ဒီကောင်ကို သတိပေးဖို့ မလိုအပ်တော့ဘူး' စုမင်၏ မျက်လုံးများ မှိတ်လိုက် ဖွင့်လိုက် ဖြစ်နေစဉ် သူတို့ထဲ၌ တောက်ပသော အလင်းရောင်တစ်စ ခဏမျှ လင်းလက်သွားသည်။
'အခုလောလောဆယ် ငါ့အတွက် အရေးကြီးဆုံးအရာက ငါ့ရဲ့ ကျင့်ကြံခြင်း အဆင့်ကို မြှင့်တင်ဖို့ပဲ' စုမင်၏ မျက်ဝန်းထဲတွင် မျှော်လင့်တောင့်တမှု အရိပ်အယောင်တစ်ခု ပေါ်လာသည်။ သူသည် အသက်ကို ပြင်းထန်စွာ ရှူသွင်းလိုက်ပြီး မျက်လုံးများ ဖြည်းညှင်းစွာ မှိတ်ကျသွားသည့် အခိုက်အတန့်တွင် သူသည် ကျင့်ကြံခြင်း အခြေခံကို ချက်ချင်း လည်ပတ်စေခဲ့သည်။
သူ တာအိုခုန်းကို သိမ်းပိုက်လိုက်သည်နှင့် ခန္ဓာကိုယ်ထဲတွင် တည်ရှိနေသော တာအိုခုန်း၏ မူလ ကျင့်ကြံခြင်းအခြေခံသည်လည်း ပုံရိပ်ယောင်တစ်ခုအဖြစ် ပြောင်းလဲသွားပြီး ရုပ်ပိုင်းဆိုင်ရာ ပုံသဏ္ဌာန် မရှိတော့ပေ။ ယင်းအစား တာအိုခုန်း သေဆုံးသွားသည်နှင့်အမျှ ၎င်းသည်လည်း စတင် ပျယ်လွင့်သွားခဲ့သည်။
အမှန်တရားမှာ စုမင်၏ ကျင့်ကြံခြင်းအဆင့်သည် ကောင်းကင်ဘုံ ကျင့်ကြံခြင်း အဆင့်၌သာ ရှိနေဆဲ ဖြစ်သည်။
သို့သော်လည်း တာအိုခုန်း၏ ပါရမီ အရည်အသွေးနှင့် စုမင် နှစ်ပေါင်းများစွာ သိုလှောင်ထားခဲ့သော စွမ်းအင်များနှင့်ဆိုလျှင် သူသည် ကမ္ဘာမြေပြင် နယ်ပယ်သို့ အလွယ်တကူ ရောက်ရှိနိုင်ကြောင်း ယုံကြည်မှု ရှိနေသည်။
စုမင် မျက်လုံးမှိတ်လိုက်သည့် အခိုက်အတန့်၌ပင် ကျင့်ကြံခြင်းအခြေခံသည် ကျယ်လောင်သော အသံနှင့်အတူ လည်ပတ်သွားသည့်အလား အနောက်ငွေ့ရည်တိမ်တိုက် သီးခြားနယ်မြေတွင် ရှိနေသော စုမင်၏ အိစန်းကိုယ်ပွားသည် မျက်လုံးများကို ဖွင့်လိုက်သည်။ အိစန်းကိုယ်ပွားပေါ်တွင် နတ်ဘုရား အနှစ်သာရ လှိုင်းတံပိုးများ ပေါ်ထွက်လာပြီး သူတို့သည် အတိုင်းအဆမရှိ ဝေးကွာသော အကွာအဝေးဖြင့် ပိုင်းခြားခံထားရသော်လည်း သူနှင့် စုမင်၏ ကျင့်ကြံခြင်း အခြေခံ ကိုယ်ပွားကြားတွင် ဆက်သွယ်မှုတစ်ခု ရှိနေသည့်အလား ဖြစ်ပေါ်လာသည်။
'ကမ္ဘာမြေပြင် နယ်ပယ်ကို တက်လှမ်းဖို့အတွက် ငါဟာ ကမ္ဘာတစ်လုံးရဲ့ အသိအမှတ်ပြုခြင်းကို ရယူဖို့ လိုအပ်ပြီး အဲဒီကမ္ဘာထဲမှာ ရှိတဲ့ ကမ္ဘာမြေပြင် စွမ်းအားကို အသုံးပြုပြီး ကမ္ဘာမြေပြင် နယ်ပယ်ကို တက်လှမ်းရမယ်'
'ငါ့မှာ ကမ္ဘာတစ်လုံးရဲ့ အသိအမှတ်ပြုမှုကို ခံရဖို့ အခွင့်အရေး မရှိဘူး။ ဒါပေမယ့် ငါက အခြားကမ္ဘာတွေရဲ့ အသိအမှတ်ပြုမှုကိုလည်း မလိုအပ်ဘူး။ ငါ့မှာ ငါ့ရဲ့ ကိုယ်ပိုင် အိစန်းကမ္ဘာ ရှိတယ်'
'အရင်တုန်းက ငါ့ရဲ့ ပါရမီ အရည်အသွေး အကန့်အသတ်ကြောင့် အချိန်အတော်ကြာ ကုန်လွန်သွားခဲ့ရင်တောင်မှ ငါဟာ ကမ္ဘာမြေပြင် နယ်ပယ် ကျင့်ကြံသူတစ်ဦး ဖြစ်မလာနိုင်ခဲ့ဘူး။ ဒါပေမယ့် အခုတော့ ငါ့ရဲ့ ပါရမီ အရည်အသွေးကြောင့် ဖြစ်ရတဲ့ အကန့်အသတ်ဟာ မရှိတော့ဘူး။ ဒါကြောင့် ငါ ကမ္ဘာမြေပြင် နယ်ပယ်ကို တက်လှမ်းတော့မယ်' စုမင်၏ မျက်ဝန်းထဲတွင် တောက်ပသော အလင်းရောင်တစ်ခု လင်းလက်သွားသည်။ သူသည် စည်းတံဆိပ်တစ်ခု ဖွဲ့စည်းလိုက်ပြီး လက်များကို ဒူးနှစ်ဖက်ပေါ်တွင် တင်လိုက်သည်။ သူသည် အသက်ကို ပြင်းထန်စွာ ရှူသွင်းလိုက်ပြီးနောက် မျက်လုံးများအား ဖြည်းညှင်းစွာ မှိတ်လိုက်သည်။
သူ မျက်လုံးမှိတ်လိုက်သည့် အခိုက်အတန့်တွင် အိစန်းကိုယ်ပွား ရှိနေသော အိစန်းကမ္ဘာသည် ချက်ချင်းပင် စိတ်လှုပ်ရှားမှုများဖြင့် ဆူပွက်လာတော့သည်။ နတ်ဘုရား အနှစ်သာရ စွမ်းအားသည် ကမ္ဘာများကို ပြည့်နှက်သွားပြီး စုမင်သည် မူလက ထိုနေရာတွင် သူ၏ ဝိညာဉ် အမှတ်အသားတစ်ခုကို ချန်ထားခဲ့ဖူးသဖြင့် မျက်စိတစ်မှိတ်အတွင်း၌ပင် ထိုကမ္ဘာပေါင်း တစ်သိန်းထဲရှိ နတ်ဘုရား အနှစ်သာရထဲမှ သိပ်သည်းလှသော ကမ္ဘာမြေပြင် စွမ်းအားလှိုင်းများမှာ သီးခြားစီ ကွဲထွက်လာကြသည်။
စုမင်၏ ဝိညာဉ်မှ အမှတ်အသားသည် ဤကမ္ဘာမြေပြင် နယ်ပယ် စွမ်းအားထဲတွင် ပါဝင်နေသည်။ သူတို့သည် စိတ်လှုပ်ရှားမှုများဖြင့် ဆူပွက်လာကြစဉ် စုမင်၏ ကျင့်ကြံခြင်း အခြေခံ ကိုယ်ပွားထဲရှိ အရှိန်အဝါကို လှုပ်ခတ်စေခဲ့ပြီး လွန်းပျံသင်္ဘောထဲ၌ မျက်လုံးမှိတ်ထားသော စုမင်၏ ကျင့်ကြံခြင်းအဆင့်အား ကျယ်လောင်သော အသံနှင့်အတူ ဆတိုးအလိုက် တိုးတက်လာစေတော့သည်။
ဝုန်း...
ပြင်းထန်သော ပေါက်ကွဲသံများသည် စုမင်၏ ခေါင်းထဲတွင် ပဲ့တင်ထပ်သွားသည်။ ၎င်းမှာ ကောင်းကင်ဘုံ ကျင့်ကြံခြင်း အဆင့်ရှိ ကျင့်ကြံသူတစ်ဦးက ကမ္ဘာမြေပြင် နယ်ပယ်သို့ တက်လှမ်းရန် ကြိုးပမ်းခြင်းကြောင့် ဖြစ်ပေါ်လာသော ရိုက်ခတ်မှု ဖြစ်သည်။ ထိုရိုက်ခတ်မှု တစ်ခုတည်းကပင် စုမင်၏ ခန္ဓာကိုယ်ကို ပြင်းထန်စွာ တုန်ရီသွားစေရန် လုံလောက်သည်။ မျက်စိတစ်မှိတ်အတွင်းမှာပင် သူ့ခန္ဓာကိုယ်ထဲရှိ ကျင့်ကြံခြင်း အခြေခံသည် ၎င်း၏ မူလပမာဏထက် အဆပေါင်းများစွာ တိုးပွားလာခဲ့ပြီး ကောင်းကင်ဘုံ ကျင့်ကြံခြင်း အဆင့်၏ အထွတ်အထိပ်မှနေ၍ ကမ္ဘာမြေပြင် နယ်ပယ် အစောပိုင်းအဆင့်သို့ လျင်မြန်စွာ ကူးပြောင်း တက်လှမ်းသွားတော့သည်။
သူ ကမ္ဘာမြေပြင် နယ်ပယ်သို့ ဝင်ရောက်သွားသည်နှင့် စုမင်၏ ဝိညာဉ်အာရုံသည် ချက်ချင်းပင် အရွယ်အစားအားဖြင့် အဆပေါင်းများစွာ ကြီးထွားလာခဲ့သည်။ သူသည် ဉာဏ်အလင်း ရသွားသည့် ခံစားချက်တစ်ခုနှင့်အတူ နဂါးငွေ့တန်းနှင့် တစ်နည်းနည်းဖြင့် ပေါင်းစပ်နိုင်သည့်အလား ခံစားချက်တစ်ခုသည် စုမင်၏ နှလုံးသားထဲတွင် ချက်ချင်း ပေါ်ထွက်လာသည်။
ဤခံစားချက်မျိုးမှာ သူ တစ်ခါမျှ မခံစားဖူးသေးသောအရာ ဖြစ်သည်။ ထိုအချိန်တွင် ၎င်းသည် ပထမဆုံးအကြိမ် ပေါ်ထွက်လာခြင်းဖြစ်ရာ သူသည် ၎င်းထဲ၌ စိတ်မမြှုပ်နှံဘဲ မနေနိုင် ဖြစ်သွားခဲ့ရသည်။
"ငါ နောက်ဆုံးတော့ အောင်မြင်မှုတစ်ခုကို ရရှိပြီး ကမ္ဘာမြေပြင် နယ်ပယ်ကို တက်လှမ်းနိုင်ခဲ့ပြီပဲ" စုမင်က တိုးညှင်းစွာ ရေရွတ်လိုက်သည်။ သူ၏ ရုပ်ပိုင်းဆိုင်ရာ ခန္ဓာကိုယ်မှာ အလွန်ပင် သန်မာနိုင်ပြီး အိစန်းကိုယ်ပွားမှာလည်း ပုံရိပ်ဝါးမြိုခြင်း ပညာရပ် ကျင့်ကြံသည့် ကိုယ်ပွားထက် များစွာ ပိုမိုသန်မာနိုင်သော်လည်း သူ့ပါရမီ အရည်အသွေးကြောင့် ကျင့်ကြံခြင်း အခြေခံသည် သူတို့နှင့် နှိုင်းယှဉ်ရန် မျှော်လင့်နိုင်ခြင်း မရှိခဲ့ပေ။
သို့သော်လည်း ယခုအခါတွင်မူ သူသည် ကမ္ဘာမြေပြင် နယ်ပယ်၏ စွမ်းအားကို ခံစားနေရပြီ ဖြစ်သည်။ စင်စစ် သူ၏ စွမ်းအား တိုးတက်လာသည်နှင့်အမျှ ဝိညာဉ်သည်လည်း ယခင်ကထက် များစွာ ကွဲပြားခြားနားသွားပုံရကြောင်း သူ ခံစားလိုက်ရသည်။
"ငါ့ရဲ့ စွမ်းအားကို ဆက်ပြီး မြှင့်တင်နိုင်သေးတယ်" စုမင်သည် မျက်လုံးများကို အနည်းငယ် ဖွင့်လိုက်သည်။ သူ့မျက်ဝန်းထဲရှိ နက်နဲသော အကြည့်များမှာ စကြဝဠာကြီးကို ၎င်းတို့ထဲ၌ ထည့်သွင်းထားသည့်အလား ထင်မှတ်ရစေသည်။ သူသည် တိုးညှင်းစွာ ရေရွတ်လိုက်ပြီး အိစန်းကိုယ်ပွား တည်ရှိရာ ကမ္ဘာများအား လှုပ်ခတ်စေရန် ကျင့်ကြံခြင်း အခြေခံကို နောက်တစ်ကြိမ် ထပ်မံ လည်ပတ်စေခဲ့သည်။ သူ၏ ခန္ဓာကိုယ်ထဲ၌ ကျင့်ကြံခြင်း အခြေခံမှာ ထပ်တလဲလဲ လည်ပတ်နေစဉ် သူသည် ကမ္ဘာမြေပြင် နယ်ပယ် အလယ်အလတ် အဆင့်သို့ တက်လှမ်းရန် ကြိုးပမ်းလိုက်တော့သည်။
သိုလှောင်ထားသော အင်အားကြောင့် တစ်ဟုန်ထိုး အစွမ်းထက်လာခြင်း။ ထိုအခိုက်အတန့်တွင် ဤစကားစုသည် စုမင်အတွက် အသင့်တော်ဆုံးသော ဖော်ပြချက်တစ်ခု ဖြစ်ပေတော့သည်။