အခန်း ၁၃၄၉

အခန်း (၁၃၄၉) နတ်ဆိုးချိတ်ပိတ် လိုဏ်ဂူနတ်ဘုရားဘုံ - သရဲတစ္ဆေ နယ်ပယ်သို့

လူတိုင်းမှာ အံ့အားသင့် မှင်သက်သွားကြသည်။ အဓိက လိုဏ်ဂူနတ်ဘုရားဘုံကြီး ခုနစ်ခုကို ပေါင်းစည်းမယ်တဲ့လား။

ဤအကြံအစည်မှာ လုံးဝကို မထင်မှတ်ထားသောအရာ ဖြစ်သော်လည်း သေချာစွာ စဉ်းစားကြည့်သောအခါ အတော်လေး ယုတ္တိတန်နေကြောင်း တွေ့ရသည်။

ယခင်ကဆိုလျှင် ဤကဲ့သို့သော အကြံအစည်မျိုးမှာ လုံးဝ မဖြစ်နိုင်ချေ။

လိုဏ်ဂူနတ်ဘုရားဘုံကြီး ခုနစ်ခုစလုံးတွင် ကိုယ်ပိုင် တာအိုဆက်ခံမှုနှင့် အမွေအနှစ်များ အသီးသီး ရှိကြသည်။ စွမ်းအား ကွာဟချက်များ ရှိနေသည့်တိုင်အောင် သူတို့အားလုံးသည် တစ်ဦးနှင့်တစ်ဦး အလျှော့မပေးဘဲ အာခံလိုစိတ်ရှိသည်။

မင်ရှင်းနန်းတော်ကို ယခင်က ထိပ်ဆုံးအဖြစ် အသိအမှတ်ပြုထားခဲ့စဉ်ကပင် အခြားသော လိုဏ်ဂူနတ်ဘုရားဘုံများက ဟန်ပြမျှသာ ရိုသေမှုပေးခဲ့ကြခြင်း ဖြစ်သည်။

၎င်းမှာ ပေါင်းစည်းခြင်းကို တွန်းအားပေးနိုင်မည့် အစွမ်းထက်သော အင်အားတစ်ခု မရှိခဲ့ခြင်းကြောင့်ပင် ဖြစ်လေသည်။ သို့သော် ယခုအခါတွင်မူ ထိုကဲ့သို့သော အတားအဆီးများမှာ သိသာထင်ရှားစွာပင် ပျောက်ကွယ်သွားခဲ့သည်။

ရွှယ်အန်း၏ ပေါ်ထွက်လာမှုက အရာအားလုံးကို သဘာဝကျကျပင် နေရာတကျ ဖြစ်သွားစေခဲ့သည်။ ခွန်အားနှင့် ပတ်သက်၍ဆိုရလျှင် သူသည် ဤနယ်ပယ်တွင် သံသယဝင်စရာ မလိုလောက်အောင် အစွမ်းအထက်ဆုံး ဖြစ်လေသည်။

ဂုဏ်သတင်းနှင့် ပတ်သက်၍ ဆိုရလျှင် သူ့အပေါ် သစ္စာစောင့်သိမှု လုံးဝ မယိမ်းယိုင်သော ရွှေရောင်အလင်း လိုဏ်ဂူနတ်ဘုရားဘုံကို ဖယ်ထားလိုက်လျှင်ပင် မင်ရှင်းနန်းတော်မှ လူများ၏ သဘောထားကို ကြည့်၍ ဆုံးဖြတ်မည်ဆိုလျှင်ပင် သူ၏ လွှမ်းမိုးနိုင်မှုမှာ အလွန်တရာ ကြီးမားကြောင်း သိသာထင်ရှားလှပေသည်။

ထို့ကြောင့် ဤစကားများ ရွှယ်အန်း၏ ပါးစပ်မှ ထွက်ပေါ်လာသောအခါ လူအုပ်ကြီးသည် အချင်းချင်း မျက်နှာချင်းဆိုင် ကြည့်လိုက်ကြပြီးနောက် ရိုသေလေးစားစွာဖြင့် ခေါင်းငုံ့လိုက်ကြသည်။

"မင်းတို့ ကျင့်ကြံနေကြတဲ့ တာအိုဆက်ခံမှုတွေက တူညီတဲ့ မူလဇာစ်မြစ်ကနေ ဆင်းသက်လာကြတာပဲ၊ ပေါင်းစည်းသွားပြီ ဆိုရင်တော့ မင်းတို့ကို တာအိုလမ်းစဉ်နဲ့ ပတ်သက်ပြီး ငါ လမ်းညွှန်မှုတွေ ပေးမယ်၊ မင်းတို့ ဘယ်လိုသဘောရလဲ"

ဝုန်း...

လူအုပ်ကြီးကြားတွင် ပွက်လောရိုက်သွားပြီး သူတို့၏ မျက်နှာများသည် ဝမ်းမြောက်ဝမ်းသာ ဖြစ်မှု၊ စိတ်လှုပ်ရှားမှုများဖြင့် တောက်ပသွားကြသည်။ ရွှယ်အန်း၏ စွမ်းအားမှာ ငြင်းခုံစရာမလိုလောက်အောင် ကြီးမားလှပြီး သူ၏ လမ်းညွှန်မှုကို ရရှိခြင်းက တိုင်းတာ၍ မရနိုင်လောက်အောင် ကြီးမားသော အကျိုးကျေးဇူးကြီး တစ်ခုဖြစ်သည်။

ဤအရာနှင့် နှိုင်းယှဉ်လိုက်လျှင် ဂုဏ်ပုဒ်နှင့် နေရာအတွက် ငြင်းခုံမှုများမှာ အရေးမပါတော့ချေ။ သူတို့သည် မဆိုင်းမတွပင် တစ်ပြိုင်နက်တည်း ဦးညွှတ်လိုက်ကြပြီး ကြေညာလိုက်ကြသည်။

"သခင်ကြီးရဲ့ အမိန့်အတိုင်း နာခံပါ့မယ်"

ရွှယ်အန်းက အနည်းငယ် ခေါင်းညိတ်လိုက်သည်။

"ကောင်းပြီ၊ အခုကစပြီး အဓိက လိုဏ်ဂူနတ်ဘုရားဘုံကြီး ခုနစ်ခုစလုံး နာမည်တစ်ခုတည်းအောက်မှာ ပေါင်းစည်းရမယ်၊ နတ်ဆိုးချိတ်ပိတ် လိုဏ်ဂူနတ်ဘုရားဘုံပဲ"

"နားလည်ပါပြီ"

ယခင်က တစ်ခါမှ မကြုံဖူးသော ကြီးမားသည့် အပြောင်းအလဲကြီး တစ်ခုသည် နယ်ပယ် တစ်ခွင်လုံးသို့ တိုက်ခတ်သွားသည်။ လိုဏ်ဂူနတ်ဘုရားဘုံကြီး ခုနစ်ခုသည် သူတို့၏ ကွဲပြားမှုများကို စွန့်လွှတ်ကာ တစ်ခုတည်းအဖြစ် ပေါင်းစည်းသွားကြသည်။

ဤကဲ့သို့သော ကြီးကျယ်ခမ်းနားသည့် ဖြစ်ရပ်ကြီးသည် နယ်ပယ်ရှိ နေထိုင်သူ အားလုံးကြားတွင် သဘာဝကျကျပင် တုန်လှုပ်မှု လှိုင်းတံပိုးများကို ဖြစ်ပေါ်စေခဲ့သည်။

သာမန် ပြည်သူပြည်သားများက ၎င်း၏ အရေးပါမှုကို နားမလည်နိုင်ကြပေ။ ဤနယ်ပယ်သည် လိုဏ်ဂူနတ်ဘုရားဘုံကြီး ခုနစ်ခု၏ နေရာဖြစ်ရုံသာမက ပြန့်ကျဲနေသော ဂိုဏ်းငယ်များနှင့် လွတ်လပ်သည့် ကျင့်ကြံသူများလည်း အနှံ့အပြား ရှိနေသည်။

ဤသတင်း ထွက်ပေါ်လာသောအခါ သူတို့၏ ပထမဆုံး တုံ့ပြန်မှုမှာ မယုံကြည်နိုင်ဘဲ လှောင်ပြောင်မှုများ ဖြစ်ကြပြီး မဖြစ်နိုင်ဘူးဟု မှတ်ယူခဲ့ကြသည်။ သို့သော် အံ့သြစရာ ကောင်းလောက်အောင်ပင် အမှန်တရားသည် သူတို့ကို ခွင့်လွှတ်မှု ကင်းမဲ့သော ပါးရိုက်ချက် တစ်ခုကဲ့သို့ မကြာမီမှာပင် ရိုက်ပုတ်သွားသည်။

ကောလာဟလများက အမှန်တကယ်ပင် ဖြစ်နေသည်။ အထူးသဖြင့် ဤအရာ၏ နောက်ကွယ်မှ တွန်းအားပေးသူမှာ လိုဏ်ဂူနတ်ဘုရားဘုံကြီး ခုနစ်ခုကို စတင်တည်ထောင်ခဲ့သော ဘိုးဘေးကြီးများ ဆင်းသက်လာရာ နေရာမှ ရောက်ရှိလာသည့် ထူးချွန်ထက်မြက်သော လူငယ်လေး တစ်ဦးဖြစ်ကြောင်း သူတို့ သိရှိသွားသောအခါ ပို၍ပင် အံ့အားသင့် သွားကြသည်။

တာအို ဆက်ခံမှု ပြိုင်ပွဲတွင် အောင်ပွဲခံခြင်း၊ နတ်ဆိုးတစ္ဆေများကို အမြစ်ပြတ် ချေမှုန်းခြင်းနှင့် ကျင်းနိုင်ငံကို ဖျက်ဆီးပစ်ခြင်းစသည့် သူ၏ စွမ်းဆောင်ရည် ဇာတ်လမ်းများသည် အရပ်မျက်နှာ အနှံ့အပြားသို့ စတင် ပျံ့နှံ့သွားသည်။

ဤလုပ်ရပ်များနှင့်အတူ ရွှယ်အန်းသည် နယ်ပယ် တစ်ခုလုံးကို လွှမ်းမိုး အုပ်စိုးနိုင်သော တည်ရှိမှုတစ်ခု ဖြစ်လာခဲ့သည်။

ဂိုဏ်းငယ်လေးများနှင့် လွတ်လပ်သည့် ကျင့်ကြံသူများသည် သူတို့အချင်းချင်း တိုင်ပင် ဆွေးနွေးကြပြီး လိုဏ်ဂူနတ်ဘုရားဘုံကြီး ခုနစ်ခုတောင်မှ ကိုယ့်သဘောနဲ့ကိုယ်အညံ့ခံ ပေါင်းစည်းသေးတာပဲ၊ ငါတို့ကရော ဘာလို့ မဝင်ရောက်ရမှာလဲဟု တွေးတောလာသည်။

ထိုမျှမက နတ်ဆိုးချိတ်ပိတ် လိုဏ်ဂူနတ်ဘုရားဘုံသို့ ဝင်ရောက်ခြင်းဖြင့် ပိုမို နက်နဲသော တာအိုကျင့်စဉ်များကို ရရှိနိုင်မည်ဆိုသည့် ကောလာဟလများလည်း ထွက်ပေါ်နေသေးသည်။

ဤမျှော်လင့်ချက်ကြောင့် မရေမတွက်နိုင်သော လွတ်လပ်သည့် ကျင့်ကြံသူများနှင့် ဂိုဏ်းငယ်လေးများသည် ဝင်ရောက်ရန် အလုံးအရင်းဖြင့် ရောက်ရှိလာကြသည်။ အချိန်တိုလေး အတွင်းမှာပင် နတ်ဆိုးချိတ်ပိတ်မြို့လေးသည် ယခင်က တစ်ခါမျှ မကြုံဖူးလောက်အောင် ပြိုင်ဘက်ကင်းစွာ စည်ကားသိုက်မြိုက်လာတော့သည်။

သို့သော် အရာအားလုံးသည် ချောမွေ့စွာပင် ဖြစ်ပျက်သွားခဲ့ပြီး တစ်လမျှ အချိန်အတွင်းမှာပင် လိုဏ်ဂူနတ်ဘုရားဘုံကြီး ခုနစ်ခုသည် တစ်ခုတည်းအဖြစ် ပေါင်းစည်းသွားခဲ့သညခ။ ရွှယ်အန်းကမူ လုပ်ငန်းစဉ် တစ်လျှောက်လုံးတွင် တိုက်ရိုက် ပါဝင်ပတ်သက်ခဲ့ခြင်း မရှိချေ။ ထိုအစား သူသည် နတ်ဆိုးချိတ်ပိတ်မြို့ကို လိုဏ်ဂူနတ်ဘုရားဘုံတစ်ခု အဖြစ်သို့ အသွင်ပြောင်းရန် သူ၏ စွမ်းရည်များကို အသုံးပြုခဲ့သည်။

သူ၏ ပြိုင်ဘက်ကင်းသော စွမ်းအားနှင့် အမြင်ကျယ်မှုတို့က ဤလိုဏ်ဂူနတ်ဘုရားဘုံကို လိုဏ်ဂူနတ်ဘုရားဘုံကြီး ခုနစ်ခု ပေါင်းစည်းထားသည်ထက် များစွာ သာလွန်သွားစေခဲ့လေသည်။

ဤသည်ကို မြင်သောအခါ ခေါင်းမာဆုံးသော ရှေးရိုးစွဲသမားများပင်လျှင် သူတို့၏ ရပ်တည်ချက်ကို ပြောင်းလဲသွားကြပြီး အခွင့်အရေးယူတတ်သော ဂိုဏ်းများသည် သူတို့၏ တောင်ထွတ်များနှင့် အိမ်ရာများကို နတ်ဆိုးချိတ်ပိတ်မြို့ ပတ်လည်သို့ အလျင်အမြန် ပြောင်းရွှေ့လာကြသည်။

ထို့ကြောင့် လအနည်းငယ်အတွင်း နတ်ဆိုးချိတ်ပိတ်မြို့လေးသည် မယုံကြည်နိုင်လောက်အောင် အသွင်ပြောင်းလဲမှု တစ်ခုကို ဖြတ်သန်းခဲ့ရသည်။ တစ်ချိန်က နိမ့်ကျပြီး ရိုးရှင်းသော မြို့ရိုးများကို ခမ်းနားကြီးကျယ်သော ကာကွယ်ရေး အစီအရင်ကြီး တစ်ခုဖြင့် အစားထိုးလိုက်သည်။ အဆောက်အအုံများမှာ ၎င်းတို့၏ မူလအသွင်အပြင်ကို အများအားဖြင့် ထိန်းသိမ်းထားသော်လည်း ၎င်း၏ အတွင်းပိုင်းမှာမူ လောကနှင့် မသက်ဆိုင်သည့်အလား အလွန် ထူးခြားဆန်းကြယ် နေလေသည်။

ယခုအခါ မြို့ကို ဝန်းရံထားသည်မှာ လိုဏ်ဂူနတ်ဘုရားဘုံကြီး ခုနစ်ခု၏ တောင်ထွတ် အိမ်ရာများဖြစ်ပြီး နတ်ဆိုးချိတ်ပိတ်မြို့ကို ခုခံကာကွယ်ရန်နှင့် အားဖြည့်ရန်အတွက် မဟာဗျူဟာကျကျ နေရာချထားသည်။

ထိုသို့ဖြင့် နတ်ဆိုးချိတ်ပိတ် လိုဏ်ဂူနတ်ဘုရားဘုံကြီးသည် နောက်ဆုံးတွင် ပုံပေါ်လာခဲ့တော့သည်။ ရွှယ်အန်းသည် လိုဏ်ဂူနတ်ဘုရားဘုံကြီး ခုနစ်ခု၏ တာအို ဆက်ခံမှုများကို ပေါင်းစည်းပေးခြင်းဖြင့် သူ၏ ကတိကိုလည်း ဖြည့်ဆည်းပေးခဲ့သည်။

မရေမတွက်နိုင်သော နှစ်များစွာ တစ်လျှောက် ဤဆက်ခံမှုများသည် သိသိသာသာ ယိုယွင်းပျက်စီးနေခဲ့ကြောင်းကို သတိပြုရပေမည်။ မျိုးဆက်အဆက်ဆက်မှ ဂိုဏ်းခေါင်းဆောင်များက အားဖြည့်ရန် ကြိုးစားခဲ့ကြသော်လည်း ကျင့်စဉ်များသည် ၎င်းတို့၏ မူလပုံစံများမှ များစွာ ကင်းကွာနေခဲ့သည်။

ထို့အပြင် လိုဏ်ဂူနတ်ဘုရားဘုံကြီး ခုနစ်ခုကို လူတစ်ယောက်တည်းက တည်ထောင်ခဲ့ခြင်း မဟုတ်ဘဲ ဟွာလူမျိုး ဘိုးဘေး ခုနစ်ဦးက တည်ထောင်ခဲ့ခြင်း ဖြစ်သည်။ ထိုကဲ့သို့သော အခြေအနေများအောက်တွင် ဆက်ခံမှု ခုနစ်ခုကို ပေါင်းစည်းရန်မှာ လွယ်ကူသော အလုပ်တစ်ခု မဟုတ်ချေ။

လူများစွာက ၎င်းကို မဖြစ်နိုင်သော တာဝန်တစ်ခုအဖြစ် မှတ်ယူထားခဲ့ကြသည်။ ရွှယ်အန်းက အောင်မြင်စွာ လုပ်ဆောင်နိုင်မည်ဆိုလျှင်တောင်မှ ၎င်းသည် ရှည်လျားပြီး ခက်ခဲကြမ်းတမ်းသော လုပ်ငန်းစဉ် တစ်ခု လိုအပ်လိမ့်မည်ဟု သူတို့ ယုံကြည်ထားခဲ့ကြသည်။

သို့သော် သူတို့ကို အံ့အားသင့်စေသည်မှာ ရွှယ်အန်းသည် ပြင်ဆင်ပေါင်းစည်းထားသော တာအို ကျင့်စဉ်တစ်ခုကို ထုတ်ဖော်ရန်အတွက် တံခါးပိတ် ကျင့်ကြံခြင်း တစ်ရက်သာ အချိန်ယူခဲ့ခြင်းပင် ဖြစ်သည်။

၎င်းမှာ ဟွာလူမျိုးဘိုးဘေး ခုနစ်ဦးအပေါ် သူ၏ လေးစားမှုကြောင့်သာ ဖြစ်သည်။ သို့မဟုတ်ပါက သူသည် တစ်နာရီတည်းနှင့်ပင် ပြီးမြောက်အောင် လုပ်ဆောင်နိုင်ပေသည်။

မည်သို့ပင်ဆိုစေကာမူ ရွှယ်အန်း၏ အမြင်သည် အခြားသူများအားလုံး၏ နားလည်သဘောပေါက်နိုင်စွမ်းထက် ကျော်လွန်နေခဲ့ပြီဖြစ်သည်။

မကြာမီမှာပင် လိုဏ်ဂူနတ်ဘုရားဘုံကြီး ခုနစ်ခုမှ ကျင့်ကြံသူများသည် ရွှယ်အန်း၏ ဘေးမှ လမ်းညွှန်မှုနှင့်အတူ သူ သန့်စင်ပေးထားသော တာအို ကျင့်စဉ်များကို စတင် ကျင့်ကြံခဲ့ကြသည်။ တစ်လတည်း အချိန်အတွင်းမှာပင် သူတို့ တစ်ယောက်ချင်းစီ၏ စွမ်းအားများသည် သိသိသာသာ တိုးတက်လာသည်။

အနည်းဆုံးတော့ ယခုအခါ ယခင်က နတ်ဆိုးဧကရီနှင့် ရင်ဆိုင်ရလျှင်ပင် နတ်ဆိုးချိတ်ပိတ် လိုဏ်ဂူနတ်ဘုရားဘုံသည် တစ်ယောက်ပြီးတစ်ယောက် ရှုံးနိမ့်သွားမည့်အစား ကြံ့ကြံ့ခံ ရပ်တည်နိုင်နေခဲ့ပြီ ဖြစ်သည်။

အဆုံးတွင်တော့ ကိစ္စရပ်များ အားလုံးကို ဖြေရှင်းပြီးနောက် ရွှယ်အန်းသည် သရဲတစ္ဆေ နယ်ပယ်ကြီးထဲသို့ ဝင်ရောက်ရန် သူ၏ ပြင်ဆင်မှုများကို စတင်ခဲ့သည်။

"သခင်ကြီး... ကျွန်တော့်ကို သခင်ကြီးနဲ့အတူ ခေါ်သွားပါဗျာ၊ ကျွန်တော် သခင်ကြီးရဲ့ ဓားလွယ်အစေခံအဖြစ် အလုပ်အကျွေး ပြုရမယ် ဆိုရင်တောင်မှပါ"

ရှီကျန်းက ဖားယားမြှောက်ပင့်သော လေသံဖြင့် ပြောလာသည်။ ယခုအခါ ရှီကျန်းသည် ရွှယ်အန်းကို နတ်ဘုရားတစ်ပါးကဲ့သို့ ရိုသေလေးစားနေသည်။ သူသည် ရွှယ်အန်းထံတွင် တပည့်အဖြစ် တရားဝင် ခံယူရန် အကြိမ်ကြိမ် ကြိုးစားခဲ့သော်လည်း ညင်သာစွာ ငြင်းပယ်ခြင်းကိုသာ ခံခဲ့ရလေသည်။

သို့တိုင်အောင် ရွှယ်အန်းနှင့်အတူ ရှိနေစဉ်အတွင်း သူသည် တိုင်းတာ၍ မရနိုင်လောက်အောင် ကြီးမားသော အကျိုးကျေးဇူးများကို ရရှိခဲ့သောကြောင့် ရှီကျန်းသည် သူ့ကိုယ်သူ တပည့်တစ်ဦးကဲ့သို့ ဆက်လက် ပြုမူနေခဲ့လေသည်။

သူ၏ ဓားနှလုံးသားသည် မျက်စိကျိန်းမတတ် တောက်ပ ကြည်လင်သော အဆင့်များအထိ ရောက်ရှိနေပြီဖြစ်ပြီး သူ၏ လက်ရှိ ဓားတစ်သောင်း ခန္ဓာကိုယ်နှင့်အတူ အနာဂတ် အလားအလာများသည် အဆုံးအစမရှိ ဖြစ်နေသည်။

ဤအရာအားလုံးသည် ရွှယ်အန်း၏ လမ်းညွှန်မှုကြောင့် ဖြစ်ကြောင်းကို သူ၏ ရင်ထဲတွင် နက်ရှိုင်းစွာ သိရှိထားလေသည်။ ထို့ကြောင့် သရဲတစ္ဆေ နယ်ပယ်ကြီးထဲသို့ ရွှယ်အန်းနှင့်အတူ လိုက်ပါသွားလိုခြင်း ဖြစ်သည်။ ရွှယ်အန်းက ရယ်မောလာသည်။

"အဲ့ဒါက မလိုအပ်ပါဘူးကွာ၊ မင်း ထင်နေသလို ကြီးမားကျယ်ပြန့်ပြီး အန္တရာယ်များကာ ခန့်မှန်းရခက်တဲ့ တစ္ဆေနယ်ပယ်ကြီး ဆိုတာက ငါ့အတွက်တော့ ဘာမှ ကြီးကြီးမားမား ပြင်ဆင်နေစရာ မလိုတဲ့ သာမန် နယ်ပယ်လေး တစ်ခု သက်သက်ပါပဲ၊ ပြီးတော့ အခုလောလောဆယ် ဒီနယ်ပယ်မှာ အစွမ်းအထက်ဆုံး ဓားကျင့်ကြံသူ တစ်ယောက်အနေနဲ့ မင်းက ဒီနယ်ပယ်ကို ကာကွယ်ဖို့ ဒီမှာပဲ နေခဲ့သင့်တယ်၊ တကယ်လို့ နတ်ဆိုးတွေ ရောက်လာခဲ့ရင် ဒီနယ်ပယ်က အကာအကွယ်မဲ့ ဖြစ်မနေဘူးလား"

ရွှယ်အန်း၏ စကားများကြောင့် ၎င်းတို့မှာ အမှန်တရားဖြစ်ကြောင်း သိထားသဖြင့် ရှီကျန်းသည် နောင်တရစွာဖြင့် ခေါင်းငုံ့လိုက်လေသည်။

"ဒါဆိုရင် သခင်ကြီး... ဘယ်တော့လောက် ပြန်လာမလဲ"

ရွှယ်အန်းက အဝေးမှ မိုးကုတ်စက်ဝိုင်းကို ငေးကြည့်ရင်း ပြုံးယောင်သန်းလျက် ပြုံးလိုက်လေသည်။

"အရမ်းတော့ မကြာလောက်ပါဘူး၊ ဘာပဲဖြစ်ဖြစ် ရှောင်ရွေ့ကို လုံလုံခြုံခြုံ ကယ်တင်ပေးမယ်လို့ ထောင်နျန်ကို ငါ ကတိပေးထားတယ်လေ"

သေချာသည်မှာ လွန်ခဲ့သော အချိန်က နတ်ဘုရားနယ်ပယ် တိုက်ပွဲအတွင်း ဝင်ရောက် စွက်ဖက်ခဲ့သော အလွန်အမင်း ပြင်းထန်လှသည့် ယင်စွမ်းအင်၏ မူလဇာစ်မြစ်ကို စုံစမ်းစစ်ဆေးရန်အတွက် သူ၏ သရဲတစ္ဆေ နယ်ပယ်ကြီး ခရီးစဉ်ကို အသုံးပြုမည် ဆိုသည်ကို ရွှယ်အန်းက ထုတ်ဖော် ပြောဆိုခဲ့ခြင်း မရှိချေ။

"ဂရုစိုက်သွားပါ သခင်ကြီး... သခင်ကြီးရဲ့ အောင်ပွဲခံ အပြန်ခရီးကို စောင့်မျှော်ရင်း ဒီနေရာမှာ ကျွန်တော့်ရဲ့ ဓားနဲ့ ကင်းစောင့်နေပါ့မယ်"

ရှီကျန်းက လေးနက်တည်ကြည်စွာဖြင့် ပြောကာ ရိုသေစွာ ဦးညွှတ်လိုက်လေသည်။ ရွှယ်အန်းက ရှီကျန်း၏ ပခုံးကို ပုတ်ကာ အားရပါးရ ရယ်မောသည်။

"ကောင်းပြီလေ"

ထိုသို့ပြောပြီးသည်နှင့် ရွှယ်အန်း၏ ပုံရိပ်သည် လင်းလက်သွားကာ မျက်တောင်တစ်ခတ်အတွင်း ကောင်းကင်ယံသို့ ပျံတက်သွားပြီး ဟင်းလင်းပြင်ကို ခုတ်ပိုင်းသွားသော တောက်ပသည့် ဓားအလင်းတန်း တစ်ခုအဖြစ် ပြောင်းလဲသွားကာ ပျောက်ကွယ်သွားတော့သည်။

ထိုအချိန်မှာပင် ရှင်းယွီရှုသည် ရှန်းမြောင်ထုံ၊ နျဲ့ရွှယ်ရှင်းနှင့် အခြားသူများ လိုက်ပါလျက် အပြေးအလွှား ရောက်ရှိလာသည်။ သို့သော် သူတို့သည် တစ်လှမ်း နောက်ကျသွားခဲ့ပြီး ဟင်းလင်းပြင် အက်ကြောင်းထဲသို့ ပျောက်ကွယ်သွားသော ရွှယ်အန်း၏ ကျောပြင်ကိုသာ ဖျတ်ခနဲ မြင်လိုက်ရသည်။

ဖြူလျော့နေသော မျက်နှာနှင့်အတူ ရှင်းယွီရှုသည် ကောင်းကင်ယံဆီသို့ လက်အုပ်ချီကာ သူ၏ အသံမှာ လေးနက်တည်ကြည်နေသည်။

"သခင်ကြီးရဲ့ ခရီးစဉ် ဘေးကင်းချောမွေ့ပါစေလို့ ကျွန်တော်တို့ ရိုသေစွာ ဆုတောင်းပေးလိုက်ပါတယ်”

--