အခန်း ၇၉၉

အခန်း (၇၉၉) - ယုံကြည်မှု

~ကျန်းကျွင့်လန်၏ အဆင့်အတန်းကို တွေးမိလိုက်သည့်အခါ လုထျန်းချန်သည်လည်း စိတ်ချလက်ချဖြင့် ထွက်ခွာသွားနိုင်ခဲ့၏။

အချိန်က မည်သူ့ကိုမျှ စောင့်ဆိုင်းနေမည် မဟုတ်ရာ လုထျန်းချန်အနေဖြင့် ဆေးဖက်ဝင်အပင်များကို ယူဆောင်၍ အမြန်ဆုံး ပြန်ရန် လိုအပ်လှသည်။

ချီကျွယ်တို့ လေးဦးမှာလည်း သူ့ကို တားဆီးရန် မကြိုးစားကြပါချေ။ အဘယ်ကြောင့်ဆိုသော် သူတို့၏ တစ်ဦးတည်းသော ပစ်မှတ်မှာ ကျန်းကျွင့်လန်သာ ဖြစ်သောကြောင့်ပင်။

“ကျန်းမိသားစုရဲ့ သခင်လေး၊ တိုက်ကြီးရဲ့ နံပါတ်တစ် ပါရမီရှင် အင်မော်တယ်လက်နက် သွန်းလုပ်သူဆိုတာ ဒီလောက်ပဲလား... မင်းရဲ့ ကျင့်ကြံခြင်းအဆင့်ကို အပြင်မှာ ပြောပြရင်တောင် ဘယ်သူမှ ယုံမှာ မဟုတ်ဘူးဗျ”

ကျောင်းသားတစ်ဦးက ကျန်းမိသားစု သခင်လေးကိုပင် ပြောင်ပြောင်တင်းတင်း လှောင်ပြောင်ရဲနေ၏။

အခြားကျောင်းသားတစ်ဦးကလည်း နှုတ်ခမ်းကို တွန့်လိုက်ပြီး မထီမဲ့မြင် ပြုံးလျက်...

“ကောင်းကင်ဘုံလူသားဘုံ အဆင့် (၉) ဆိုတာ အရမ်းကို အားနည်းလွန်းတယ်၊ ကျန်းမိသားစုအတွက် တကယ်ကို အရှက်ရစရာပဲ” ဟု ဆိုလိုက်၏။

ထိုစကားများကို ကြားရသော်လည်း ကျန်းကျွင့်လန်၏ မျက်နှာပေါ်တွင် မည်သည့် အပြောင်းအလဲမျှ မရှိသလို သူတို့ကိုလည်း ဂရုမစိုက်ပါချေ။ သူ၏ မျက်နှာတွင် ယုံကြည်မှုအပြည့်ရှိသော အပြုံးတစ်ခု ရှိနေဆဲ ဖြစ်ပါ၏။

“ကျန်းကျွင့်လန်... သူတို့ အကုန်လုံးက အရမ်း သန်မာတယ်နော်၊ မင်း တကယ်ပဲ ကိုင်တွယ်နိုင်ပါ့မလား”

ယဲ့ထျန်းဝေက တိုးတိုးလေး မေးလိုက်၏။

ထိုစကားကို ကြားသောအခါ ကျန်းကျွင့်လန်က ယုံကြည်ချက်အပြည့်ဖြင့်...

“တိုက်ခိုက်ရေးမှာတော့ ငါ သူတို့ကို နိုင်မှာ မဟုတ်ဘူး၊ ဒါပေမဲ့ သူက ဒီကို တိုက်ခိုက်ဖို့ လာတာ မဟုတ်ဘူးလေ... ပြီးခဲ့တဲ့ အင်မော်တယ်လက်နက် သွန်းလုပ်ရေး တွေ့ဆုံပွဲမှာ သူ ငါ့ကို ရှုံးသွားခဲ့တာ၊ အဲဒါကို သူ အခုထိ မမေ့နိုင်သေးဘဲ ငါ့ဆီကနေ သူ့မျက်နှာ ပြန်ဆယ်ချင်နေတာပဲ” ဟု ရှင်းပြလိုက်၏။

“အော်... အဲလိုလား၊ ဒါဆိုရင်တော့ မင်း ဘယ်လို ကိုင်တွယ်ရမလဲ သိမှာပေါ့”

ယဲ့ထျန်းဝေက ပခုံးတွန့်ပြလိုက်ပြီး အဝေးတစ်နေရာသို့ ဆုတ်ခွာသွားကာ ပွဲကြည့်ရန်သာ ပြင်ဆင်လိုက်၏။

ချီကျွယ်၏ မျက်နှာမှာ ရေခဲပမာ အေးစက်နေသော်လည်း ပါးစပ်မှ ဆဲဆိုခြင်း မပြုပါချေ။ အကြောင်းမူကား ကျန်းကျွင့်လန်သည် ရင်ဆိုင်ရ ခက်ခဲသော ပြိုင်ဘက်တစ်ဦး ဖြစ်ကြောင်း သူ သိထားသောကြောင့်ပင်။

တိုက်ကြီး၏ နံပါတ်တစ် ပါရမီရှင် အင်မော်တယ်လက်နက် သွန်းလုပ်သူ ဆိုသော ဘွဲ့နာမမှာ အကြောင်းမဲ့ ရရှိလာခြင်း မဟုတ်သည်ကို သူ ကောင်းစွာ သိရှိထားပါ၏။

“မတွေ့ရတာ ကြာပြီနော်... မင်းရဲ့ အင်မော်တယ်လက်နက် သွန်းလုပ်တဲ့ နယ်ပယ်က သိပ်ပြီး တိုးတက်လာပုံမရဘူး၊ မင်းရဲ့ အချိန်တွေ အကုန်လုံးကို ကျင့်ကြံခြင်းမှာပဲ ကုန်ဆုံးစေခဲ့ပုံရတယ်... ပြောစမ်း၊ မင်း ဘာလိုချင်တာလဲ”

ကျန်းကျွင့်လန်က အနည်းငယ်မျှ ကြောက်ရွံ့ခြင်း မရှိဘဲ ခပ်ပြုံးပြုံးဖြင့် မေးလိုက်၏။

ချီကျွယ်က အေးစက်စွာဖြင့်...

“စည်းကမ်းဟောင်းအတိုင်းပဲ... ဘယ်သူက ပိုပြီး အစွမ်းထက်တဲ့ မှော်လက်နက်ကို သွန်းလုပ်နိုင်မလဲ ဆိုတာနဲ့ အနိုင်အရှုံး ဆုံးဖြတ်ကြတာပေါ့” ဟု ဆိုလိုက်၏။

စကားပြောနေရင်းမှာပင် ချီကျွယ်သည် သူ၏ သံရည်ကျို ဖိုကို ထုတ်ယူလိုက်ပြီးနောက် လက်တစ်ချက် ဝှေ့ယမ်းလိုက်ရာ လက်နက်သွန်းလုပ်ရန် လိုအပ်သော ပစ္စည်းများ ပျံထွက်လာတော့သည်။ သူသည် သူ၏ ဝိညာဉ်စွမ်းအားများကို အစွမ်းကုန် အသက်သွင်းလိုက်ပြီး သံရည်ကျို ဖိုအတွင်းသို့ ထည့်သွင်းလိုက်၏။

ချီကျွယ်ဆီမှ ထွက်ပေါ်လာသော ဝိညာဉ်စွမ်းအား အရှိန်အဝါအရ သူသည် အဆင့် (၅) အင်မော်တယ်လက်နက် သွန်းလုပ်သူ နယ်ပယ်သို့ ရောက်ရှိနေကြောင်း သိသာလှပြီး သူ၏ ဝိညာဉ်စွမ်းအားမှာ အလွန်တရာ အားကောင်းလှသည်။

ဤမျှ ငယ်ရွယ်သော အသက်အရွယ်ဖြင့် ထိုကဲ့သို့ အင်အားကြီး နယ်ပယ်သို့ ရောက်ရှိနေခြင်းမှာ ချီကျွယ်သည် အမှန်တကယ်ပင် ပါရမီထူးခြားသော အင်မော်တယ်လက်နက် သွန်းလုပ်သူ တစ်ဦး ဖြစ်ကြောင်း ထင်ရှားလှပါ၏။

ထို့အပြင် ချီကျွယ်၏ ကျင့်ကြံခြင်းအဆင့်မှာ ထျန်းကျီဘုံ အဆင့် (၄) သို့ ရောက်ရှိနေတော့သည်။ ဤမျှ ကြီးမားသော ပါရမီဖြင့် သူသည် တိုက်ကြီး၏ ထိပ်တန်း ပါရမီရှင်များထဲမှ တစ်ဦးအဖြစ် သတ်မှတ်ခံရရန် ထိုက်တန်လှသည်။

‘ကျောင်းတော်က ပါရမီရှင်ဆိုတာ တကယ်ပါပဲ... သူ့ရဲ့ ကျင့်ကြံခြင်းအဆင့်က ကြောက်စရာကောင်းလိုက်တာ၊ ပြီးတော့ သူက အဆင့် (၅) အင်မော်တယ်လက်နက် သွန်းလုပ်သူတောင် ဖြစ်နေပြီပဲ’

ယဲ့ထျန်းဝေက အံ့အားသင့်စွာ တွေးလိုက်မိရင်း တစ်ချိန်တည်းမှာပင် အနည်းငယ် မနာလို ဖြစ်သွားရ၏။

သို့သော် မနာလိုခြင်းမှာ ခဏတာမျှသာ ဖြစ်ပါ၏။ ယဲ့ထျန်းဝေသည် သူ၏ ပါရမီမှာလည်း အားမနည်းလှသည်ကို သိထားပြီး သူသည် ဆေးဆရာ တစ်ဦးရော အင်မော်တယ်လက်နက် သွန်းလုပ်သူ တစ်ဦးပါ ဖြစ်နေသည်ဖြစ်ရာ အချိန်သာ ရမည်ဆိုပါက ချီကျွယ်နှင့် အခြား ထိပ်တန်း ပါရမီရှင်များကို သေချာပေါက် ကျော်လွန်သွားမည်ဟု ယုံကြည်ထား၏။

“အစ်ကိုကြီး ချီကျွယ်... ကြိုးစားထားဗျာ၊ ကျန်းကျွင့်လန်ကို အနိုင်ယူလိုက်စမ်းပါ... အဲဒါဆိုရင် အစ်ကိုကြီးက တိုက်ကြီးရဲ့ နံပါတ်တစ် ပါရမီရှင် အင်မော်တယ်လက်နက် သွန်းလုပ်သူ ဖြစ်လာမှာပဲ”

ကျောင်းသားတစ်ဦးက ချီကျွယ်အပေါ် အလွန် ယုံကြည်မှု ရှိနေပုံဖြင့် အားပေးစကား ဆိုလိုက်၏။

“ကျန်းမိသားစုရဲ့ သခင်လေးအနေနဲ့ သူ အင်မော်တယ်လက်နက် သွန်းလုပ်တဲ့ နေရာမှာ ဘယ်လောက်တောင် ထူးခြားတဲ့ အရည်အချင်းတွေ ရှိမလဲဆိုတာ ငါ တကယ်ပဲ ကြည့်ချင်သေးတယ်”

အခြားကျောင်းသားတစ်ဦးက အေးစက်စွာ လှောင်ရယ်ရင်း ပြောလိုက်၏။

“ကျန်းကျွင့်လန်... လှုပ်ရှားလိုက်စမ်း၊ မင်းရဲ့ ဆရာဆီကနေ ဘာတွေ ထပ်သင်ယူထားလဲဆိုတာ ငါ ကြည့်ပါရစေဦး”

ချီကျွယ်က အော်ဟစ်လိုက်ပြီး သူ၏ လက်နှစ်ဖက်ဖြင့် ဆန်းကြယ်လှသော လက်ကွက်များကို လျင်မြန်စွာ ဖော်လိုက်၏။ သူသည် လက်နက်သွန်းလုပ်မည့် ပစ္စည်းများကို ကျွမ်းကျင်လှသော လှုပ်ရှားမှုများဖြင့် အရူးအမူး အရည်ကျိုနေတော့သည်။ သူ၏ အရည်အချင်းမှာ ကောင်းစွာ ထိန်းသိမ်းထားသော မီးတောက်တစ်ခုကဲ့သို့ တည်ငြိမ်ပြီး အစွမ်းထက်လှသည်။

အလွန်တရာ အားကောင်းလှသော ဝိညာဉ်စွမ်းအားများမှာ အဆက်မပြတ် စီးထွက်လာပြီး သူ၏ အရှိန်အဝါမှာ တစ်နေရာလုံးကို လွှမ်းမိုးသွားတော့သည်။

‘ဘယ်လောက်တောင် ပြင်းထန်တဲ့ ဝိညာဉ်စွမ်းအားလဲ... ဒါက အဆင့် (၆) နယ်ပယ်ကိုတောင် ရောက်တော့မှာပဲ’

ယဲ့ထျန်းဝေက မျက်မှောင် အနည်းငယ် တွန့်ချိုးလိုက်ပြီး ချီကျွယ်၏ အားကောင်းလှသော ဝိညာဉ်စွမ်းအားကြောင့် နောက်တစ်ဖန် အံ့အားသင့်သွားရ၏။

သန့်ရှင်းသော ဝိညာဉ် ကျောင်းတော်၏ နံပါတ်တစ် ပါရမီရှင် အင်မော်တယ်လက်နက် သွန်းလုပ်သူ အနေဖြင့် ချီကျွယ်၏ အောင်မြင်မှုများမှာ ထူးခြားလှပြီး အင်မော်တယ်လက်နက် အဆောက်အအုံမှ ဂိုဏ်းချုပ်ငယ် ချီခုန့်နှင့်ပင် ရင်ပေါင်တန်းနိုင်လောက်သည်။ လာမည့် နှစ်အနည်းငယ်အတွင်း သူသည် အဆင့် (၆) အင်မော်တယ်လက်နက် သွန်းလုပ်သူ နယ်ပယ်သို့ သေချာပေါက် ခြေလှမ်းလှမ်းနိုင်မည်မှာ အမှန်ပင် ဖြစ်ပါ၏။

အင်မော်တယ်လက်နက် သွန်းလုပ်ခြင်း နယ်ပယ်တွင် ဤမျှ မြင့်မားသော ကျွမ်းကျင်မှု ရှိနေခြင်းကြောင့် သန့်ရှင်းသော ဝိညာဉ် ကျောင်းတော်မှ လက်နက်သွန်းလုပ်ရေး အကြီးအကဲများပင်လျှင် မိမိတို့ကိုယ်ကို နှိမ့်ချစွာ ခံစားကြရပြီး ချီကျွယ်အား ချီးမွမ်းခြင်း မရပ်နိုင်အောင် ဖြစ်နေကြကာ သူ့ကို ကျောင်းတော်၏ အနာဂတ် လက်နက်သွန်းလုပ်ရေး အကြီးအကဲအဖြစ်ပင် လျာထားကြ၏။

“မင်းရဲ့ နယ်ပယ်ကတော့ သိပ်ပြီး တိုးတက်မလာသေးဘူး... ဒါပေမဲ့ မင်းရဲ့ ဝိညာဉ်စွမ်းအားကတော့ အရင်ကထက် အများကြီး ပိုပြီး အားကောင်းလာတာပဲ”

ကျန်းကျွင့်လန်ကလည်း အနည်းငယ် အံ့အားသင့်စွာဖြင့် ပြောလိုက်သော်လည်း ထိုအံ့အားသင့်မှုမှာ ခဏတာမျှသာ ဖြစ်ပါ၏။

ကျန်းကျွင့်လန်သည် လက်တစ်ချက် ဝှေ့ယမ်းလိုက်ရာ အဆင့်မြင့် ဝိညာဉ်လက်နက် သံရည်ကျိုဖို တစ်ခု ဟင်းလင်းပြင်ထဲမှ ထွက်ပေါ်လာ၏။ စစ်မှန်သော မီးတောက်များမှာ လောင်ကျွမ်းလာပြီး သူသည် လက်ချောင်းလေးဖြင့် အသာအယာ တောက်လိုက်ရာ ပစ္စည်းများမှာ သဘာဝကျကျနှင့် လှပစွာဖြင့် ဖိုအတွင်းသို့ ပျံဝင်သွားတော့သည်။

“တရားမျှတတဲ့ ပြိုင်ပွဲဖြစ်အောင် ငါ အင်မော်တယ်လက်နက် သံရည်ကျိုဖိုကို သုံးမှာ မဟုတ်ဘူး... မဟုတ်ရင် ငါ့ရဲ့ နိုင်ပွဲက မထိုက်တန်ဘူးလို့ တခြားသူတွေ ပြောနေကြဦးမယ်”

ကျန်းကျွင့်လန်က ယုံကြည်ချက်အပြည့်ရှိသော အပြုံးဖြင့် ဆိုလိုက်၏။

ဖုန်းဝူချန်၏ တပည့်တစ်ဦး အနေဖြင့် ကျန်းကျွင့်လန်၏ လက်နက်သွန်းလုပ်ခြင်း အရည်အချင်းမှာ ဖုန်းဝူချန်၏ တစ်သောင်းပုံ တစ်ပုံပင် မရှိသော်လည်း အခြားသော လက်နက်သွန်းလုပ်သူများကို ရင်ဆိုင်ရာတွင်မူ သူသည် အလွန်ပင် ယုံကြည်မှု ရှိနေဆဲ ဖြစ်ပါ၏။

ကျန်းကျွင့်လန်က လက်တစ်ချက် ထပ်မံ ဝှေ့ယမ်းလိုက်ရာ သူ၏ ဝိညာဉ်စွမ်းအားများမှာ မီးတောင်တစ်ခု ပေါက်ကွဲထွက်လာသည့်အလား အရှိန်အဟုန်ပြင်းစွာဖြင့် ထွက်ပေါ်လာပြီး ခန့်ညားထည်ဝါလှသော အရှိန်အဝါကြီး တစ်ခုကို ဖြစ်ပေါ်စေတော့သည်။

“ဒါ... ဒါက အဆင့် (၆) အင်မော်တယ်လက်နက် သွန်းလုပ်သူရဲ့ စွမ်းအားပဲ... ဒါ ဘယ်လိုလုပ် ဖြစ်နိုင်မှာလဲ”

ကျန်းကျွင့်လန်၏ ပြင်းထန်လှသော ဝိညာဉ်စွမ်းအားကို အာရုံခံမိလိုက်သည့်အခါ ချီကျွယ်၏ မျက်နှာထားမှာ သိသိသာသာ ပြောင်းလဲသွားပြီး အလွန်အမင်း အံ့အားသင့်ကာ မယုံကြည်နိုင်သော အမူအရာဖြင့် အော်ဟစ်လိုက်မိ၏။

“ဘာ... အဆင့် (၆) အင်မော်တယ်လက်နက် သွန်းလုပ်သူ ဟုတ်လား”

ချီကျွယ်၏ အော်ဟစ်သံကို ကြားလိုက်ရသည့်အခါ ကျန်သော ကျောင်းသား သုံးဦးမှာလည်း ထိတ်လန့်သွားကြပြီး သူတို့၏ မျက်လုံးများမှာ ပြူးကျယ်သွားတော့သည်။

“တစ်နှစ်ကျော်လောက်ပဲ ရှိသေးတာကို သူက တကယ်ကြီး အဆင့် (၆) ကို ချိုးဖြတ်သွားတာလား”

ချီကျွယ်မှာ ၎င်းကို ပို၍ပို၍ မယုံကြည်နိုင်အောင် ဖြစ်လာသော်လည်း သူ၏ မျက်စိရှေ့မှ လက်တွေ့ အခြေအနေက သူ့ကို ယုံကြည်ရန် အတင်းအကြပ် ဖိအားပေးနေတော့သည်။

သူတို့၏ အံ့အားသင့်နေသော အမူအရာများကို မြင်လိုက်ရသည့်အခါ ကျန်းကျွင့်လန်က ခပ်ပြုံးပြုံးဖြင့်...

“ငါ့ဆရာဆီကနေ ဘာတွေ သင်ယူထားလဲဆိုတာ မင်း မကြာခင် သိစေရမှာပါ... ပြီးတော့ ငါက ငါ့ရဲ့ အချိန် အတော်များများကို ဒီနေရာမှာပဲ ရင်းနှီးမြှုပ်နှံခဲ့တာလေ၊ မဟုတ်ရင် အခုလို အဆင့် (၆) နယ်ပယ်ကို ရောက်လာမှာ မဟုတ်ဘူး” ဟု ဆိုလိုက်၏။

တစ်ချိန်တည်းမှာပင် လက်နက်သွန်းလုပ်မည့် ပစ္စည်းများမှာ သံရည်ကျိုဖို အတွင်းသို့ ရောက်ရှိနေပြီဖြစ်ပြီး ပြင်းထန်လှသော ဝိညာဉ်စွမ်းအားများမှာလည်း အဆက်မပြတ် စီးဝင်နေတော့သည်။

‘သူက လက်နက်သွန်းလုပ်မယ့် ပစ္စည်းတွေ အကုန်လုံးကို ဖိုထဲကို တစ်ခါတည်း ပစ်ထည့်လိုက်တာလား... ဒါက ဘယ်လို နည်းစနစ်မျိုးလဲ’

ကျောင်းသား သုံးဦးလုံးမှာ အံ့အားသင့်မှုများဖြင့် ပြည့်နှက်နေတော့သည်။ သူတို့သည် လက်နက်သွန်းလုပ်သူများ မဟုတ်ကြသော်လည်း လက်နက်သွန်းလုပ်ခြင်းကို မြင်ဖူးကြပါ၏။ သို့သော် ကျန်းကျွင့်လန်ကဲ့သို့ နည်းလမ်းမျိုးဖြင့် လက်နက်သွန်းလုပ်သူကိုမူ တစ်ခါမှ မမြင်ဖူးခဲ့ကြပါချေ။

အကယ်၍သာ ကျန်းကျွင့်လန်၏ အဆင့်အတန်းကို သူတို့ မသိခဲ့ကြပါက သူသည် လက်နက်သွန်းလုပ်ခြင်း အကြောင်းကို လုံးဝ မသိနားမလည်သော လူမိုက်တစ်ယောက်ဟုပင် သူတို့ ထင်မှတ်မိကြပေလိမ့်မည်။

သို့သော် ကျန်းကျွင့်လန်သည် တိုက်ကြီး၏ နံပါတ်တစ် ပါရမီရှင် အင်မော်တယ်လက်နက် သွန်းလုပ်သူဟု လူသိများသူဖြစ်ရာ မည်သူကမျှ သူ၏ လက်နက်သွန်းလုပ်ခြင်း စွမ်းရည်အပေါ် သံသယ မဝင်ရဲကြပါချေ။

‘ဒါက သူ အရင်က သုံးခဲ့တဲ့ နည်းစနစ်တွေနဲ့ လုံးဝ မတူတော့ဘူး... ဒါ ဘယ်လို နည်းစနစ်မျိုးလဲ’

ချီကျွယ်မှာ အလွန်တရာ ဇဝေဇဝါ ဖြစ်နေရပြီး သူ၏ မျက်နှာထားမှာလည်း ပို၍ တောင့်တင်းလာတော့သည်။

ချီကျွယ်နှင့် အခြားသူများ ပိုမို အံ့အားသင့်လာသည်ကို ကြည့်ရင်း ကျန်းကျွင့်လန်က အောင်နိုင်သူပမာ ရယ်လိုက်ပြီး...

“ချီကျွယ်... ငါ မင်းကို အနိုင်ကျင့်တယ်လို့တော့ မပြောနဲ့ဦးနော်၊ ငါက အလတ်စား ဝိညာဉ်လက်နက် တစ်ခုပဲ သွန်းလုပ်မယ်... မင်းကတော့ အဆင့်မြင့် တစ်ခုကို သွန်းလုပ်လိုက်၊ တကယ်လို့ မင်းရဲ့ လက်နက်က ထွက်ပေါ်လာတဲ့ အရှိန်အဝါက ငါ့လက်နက်ထက် ပိုပြီး အားကောင်းမယ်ဆိုရင် မင်း နိုင်တယ်လို့ သတ်မှတ်ပေးမယ်” ဟု စိန်ခေါ်လိုက်၏။

“...”

ချီကျွယ်မှာ သစ်သားရုပ်ကြီး တစ်ရုပ်ပမာ မှင်သက်သွားရ၏။ ကျန်းကျွင့်လန်က သူ့ကို လုံးဝ အလေးအနက် မထားသည်ကို သူ ခံစားလိုက်ရသောကြောင့်ပင် ဖြစ်ပါ၏။

‘အလတ်စား ဝိညာဉ်လက်နက်တစ်ခုက အဆင့်မြင့်တစ်ခုထက် ပိုပြီး အရှိန်အဝါ အားကောင်းတယ် ဟုတ်လား’

‘သူ နောက်နေတာလား... အလတ်စား ဝိညာဉ်လက်နက်တစ်ခုက အဆင့်မြင့်တစ်ခုထက် တကယ်ကြီး ပိုပြီး အစွမ်းထက်နိုင်လို့လား’

ကျောင်းသား သုံးဦးမှာလည်း ကျန်းကျွင့်လန်၏ မောက်မာမှုကြောင့် လုံးဝ ဆွံ့အသွားကြ၏။

‘ဒီကောင်လေးကတော့ နန်းတော်သခင်ရဲ့ နတ်ဘုရားသဖွယ် စွမ်းရည်တွေကို ထပ်ပြီး ကြွားလုံးထုတ်နေပြန်ပြီ’

ယဲ့ထျန်းဝေက ခေါင်းကို အသာအယာ ခါယမ်းလိုက်၏။

(၁၀) မိနစ်ကျော်ခန့် ကြာပြီးနောက် ကျန်းကျွင့်လန်သည် သူ၏ ဝိညာဉ်စွမ်းအားများကို ဖိုအတွင်းသို့ ထပ်မံ ထည့်သွင်းလိုက်ပြီး သူ၏ လက်နှစ်ဖက်ဖြင့် ဆန်းကြယ်သော လက်ကွက်များကို လျင်မြန်စွာ ဖော်လိုက်၏။

“ပွင့်စမ်း”

“ဘုန်း”

ရုတ်တရက် ကျန်းကျွင့်လန်က တိုးညှင်းစွာ အော်ဟစ်လိုက်ရာ တုံးအသော ပေါက်ကွဲသံ တစ်သံနှင့်အတူ သံရည်ကျိုဖို ပွင့်သွားပြီး အလွန်တရာ အစွမ်းထက်လှသော အရှိန်အဝါတစ်ခု ဖိုအတွင်းမှ ထွက်ပေါ်လာကာ ပတ်ဝန်းကျင် တစ်ခုလုံးကို ဖုံးလွှမ်းသွားတော့သည်။

“အလတ်စား ဝိညာဉ်လက်နက်တဲ့လား... သူက ဒီလောက်တောင် မြန်မြန် သွန်းလုပ်နိုင်တာလား”

ချီကျွယ်နှင့် အခြားသူများမှာ နောက်တစ်ဖန် အံ့အားသင့်သွားကြပြီး တစ်ကိုယ်လုံး တုန်ရီသွားကြရ၏။

သံရည်ကျိုဖို၏ နှုတ်ခမ်းဝတွင် အလတ်စား ဝိညာဉ်လက်နက် သိုလှောင်လက်စွပ်လေး တစ်ခုသည် လေထဲတွင် ဝဲပျံနေပြီး တောက်ပသော အပြာရောင် အလင်းတန်းများ ဝင်းလက်နေကာ လွှမ်းမိုးဖိနှိပ်နိုင်သော အရှိန်အဝါကြီး တစ်ခုကို ထုတ်လွှတ်နေတော့သည်။

“ငါ့မှာ အရေးကြီးတဲ့ ကိစ္စတွေ ရှိသေးလို့ ဒါကိုတော့ မင်းအတွက် အမှတ်တရ အဖြစ် ထားခဲ့ပါ့မယ်... သွားပြီနော်”

ကျန်းကျွင့်လန်က ယုံကြည်ချက်အပြည့်ရှိသော အပြုံးဖြင့် ဆိုလိုက်ပြီး သူ၏ သံရည်ကျိုဖိုကို ပြန်လည် သိမ်းဆည်းကာ ချီကျွယ် သူ၏ လက်နက်ကို သွန်းလုပ်ပြီးသည်အထိပင် မစောင့်တော့ဘဲ ယဲ့ထျန်းဝေနှင့်အတူ ထွက်ခွာသွားလေတော့သည်။

ဒါဟာ ယုံကြည်မှုပါပင်။

--