အခန်း (၉၀၆-၉၀၈)

အခန်း ၉၀၆ - ဥပဒေသဆိုင်ရာဓား

မြေခွေးဖြူမင်းသမီး၏ ကြောက်မက်ဖွယ်ကောင်းသော တိုက်ခိုက်ရေးစွမ်းအားနှင့် ကောင်းကင်မြေခွေးမျက်ဝန်း၏ ဖိအားကို မြင်တွေ့လိုက်ရပြီးနောက် လော့မျိုးနွယ်စု တပည့်များ၏ နှလုံးသားမှာ လေးလံသွားခဲ့သည်။ ကျန်ကျူးအပေါ် ထားရှိသည့် သူတို့၏ မျှော်လင့်ချက်များမှာလည်း လေထဲတွင် လွင့်ပါးသွားသယောင်။

သူတို့သည် ကျန်ကျူးတစ်ယောက် အမြန်ဆုံး သတ်ဖြတ်နိုင်ရန် မတောင်းဆိုတော့ဘဲ၊ တတိယမြောက် ရှေးဟောင်းဖေး ကို အနည်းဆုံး အနိုင်ရရှိပေးရန်သာ ဆုတောင်းနေကြသည်။

သို့သော်လည်း… ထိုအရာမှာ ပြောသလောက် မလွယ်ကူ။ တတိယမြောက် ရှေးဟောင်းဖေးမှာ အသက်ရှူရပင် ခက်ခဲလောက်အောင် စွမ်းအားကြီးမားလွန်းလှသည်။ ထိုအချိန်တွင် ကျန်ကျူးသည် ဒုတိယမြောက် ဖေးနဂါးကို ယခုမှ သတ်ဖြတ်နိုင်ခဲ့သည်။

မျက်စိတစ်မှိတ်အတွင်းမှာပင် ကျန်ကျူးနှင့် မြေခွေးဖြူမင်းသမီးအကြား ကြီးမားသော ကွာဟချက်တစ်ခု ချောက်ကမ်းပါးကြီးသဖွယ် ဖြစ်ပေါ်နေခဲ့ပြီဖြစ်သည်။

“ယီယွင်သာ တတိယမြောက် ရှေးဟောင်းဖေးနဲ့ ရင်ဆိုင်ရရင် ဘယ်လိုဖြစ်မလဲ”

တပည့်များက တီးတိုးပြောဆိုရင်း စောင့်မျှော်နေကြသည်။ ယီယွင်သည် ဒုတိယမြောက် ရှေးဟောင်းဖေးကို ကျန်ကျူးထက် စောစီးစွာ သတ်ဖြတ်နိုင်ခဲ့သူဖြစ်ရာ၊ သူ၏ တိုက်ပွဲမှာ အားလုံးအတွက် စိတ်ဝင်စားစရာ အကောင်းဆုံးဖြစ်နေသည်။

ထိုစဉ်မှာပင် တိုက်ပွဲနယ်မြေမှ တပည့်အချို့ ထွက်ပေါ်လာကြသည်။ သူတို့မှာ မောပန်းနွမ်းနယ်နေပြီး မျက်နှာများမှာ ဖြူဖျော့နေသည်။ သူတို့ထဲတွင် ရန်ရွှဲ့ယီလည်း ပါဝင်သည်။ သူသည် ပထမဆုံး ဖေးကို သတ်နိုင်ခဲ့ပြီး ဒုတိယမြောက် ဖေးကို ဒဏ်ရာရအောင် ပြုလုပ်နိုင်ခဲ့သည်။

ခုနစ်နှစ်တာကာလအတွင်း သူ၏ အကောင်းဆုံး ရလဒ်ဟု ဆိုရပေမည်။ သူသည် အလွန်အမင်း စိတ်လှုပ်ရှားစွာဖြင့် “နှမြောစရာကောင်းလိုက်တာ၊ ဒုတိယမြောက် ဖေးကို သတ်လုနီးပါးပဲ” ဟု ကြွားဝါပြောဆိုလိုက်သည်။

သို့သော် သူ၏ စကားမဆုံးခင်မှာပင် ပတ်ဝန်းကျင်ရှိ တပည့်များ၏ အမူအရာကို သတိပြုမိလိုက်သည်။ သူတို့အားလုံးမှာ အထက်ကို မော့ကြည့်ရင်း အံ့ဩတုန်လှုပ်နေကြသည်။ အထက်ရှိ ပုံရိပ်ယောင် ဖန်သားပြင်ပေါ်တွင် သူတို့၏ တိုက်ပွဲကို အကြီးအကဲများနှင့် မြေခွေးဖြူမျိုးနွယ်စု၏ တတိယမင်းသားပါမကျန် အားလုံး ကြည့်ရှုနေခဲ့ခြင်းဖြစ်သည်။

ရန်ရွှဲ့ယီ၏ မျက်နှာမှာ ရှက်ရွံ့မှုကြောင့် ပူထူသွားသည်။ သူသည် အပိုအလိုထည့်၍ ပြောဆိုခဲ့ခြင်းဖြစ်ပြီး တကယ်တမ်းတွင် ဒုတိယမြောက် ဖေးကို ပြင်းထန်စွာ ဒဏ်ရာရအောင်ပင် မလုပ်နိုင်ခဲ့ပေ။

ထိုအခိုက်အတန့်တွင် သူ၏ မျက်လုံးများ ပြူးကျယ်သွားသည်။ အလယ်ဗဟိုရှိ ချဲ့ထားသော ပုံရိပ်ကြီးမှာ ကျန်ကျူး သို့မဟုတ် မြေခွေးဖြူမင်းသမီး မဟုတ်ဘဲ… ယီယွင်ဖြစ်နေသည်။ သူ၏ ရင်ထဲတွင် ဒေါသနှင့် အံ့ဩမှုများ ရောထွေးသွားသည်။ သူသည် ယီယွင်ကို အထင်သေးစေရန် ကြိုးစားခဲ့သော်လည်း ယခုမူ မည်သူကမျှ သူ့ကို ဂရုမစိုက်ကြတော့ပေ။

“ယီယွင်ရဲ့ တိုက်ပွဲ စပြီ” ဟု တပည့်တစ်ဦးက ဝင်ပြောသည်။

“ဒုတိယမြောက်တိုက်ပွဲပဲ မဟုတ်လား၊ ဘာကြည့်စရာရှိလို့လဲ” ဟု ရန်ရွှဲ့ယီက ဒေါသတကြီး ပြောသည်။

“ဒုတိယမဟုတ်ဘူး၊ ဒါ ယီယွင်ရဲ့ တတိယမြောက်တိုက်ပွဲ”

တတိယမြောက် ရန်ရွှဲ့ယီ နားမယုံနိုင်အောင် ဖြစ်သွားသည်။ ဖန်သားပြင်ပေါ်တွင် ယီယွင်၏ တိုက်ပွဲမှာ စတင်နေပြီဖြစ်သည်။ မည်းမှောင်နေသော ပင်လယ်ပြင်တွင် ယီယွင်သည် ဓားကိုကိုင်ကာ ရန်ယီငါးကို ရင်ဆိုင်နေသည်။ ရန်ရွှဲ့ယီ၏ ခန္ဓာကိုယ်မှာ တုန်ယင်သွားသည်။

ထိုငါးမှာ သူရင်ဆိုင်ခဲ့ရသော ဖေးထက် များစွာ သာလွန်သည့် အရှိန်အဝါမျိုး ရှိနေသည်။ ပို၍ဆိုးသည်မှာ ယီယွင်ရင်ဆိုင်နေရသည်မှာ ရန်ရွှဲ့ယီတို့၏ ဘိုးဘေးဖြစ်သော ရန်ယီငါးပင် ဖြစ်သည်။

ယီယွင် လှုပ်ရှားလိုက်သည်။ မိုးသက်မုန်တိုင်းအကြား သူသည် ဓားကိုကိုင်ကာ ရန်ယီငါးထံသို့ လျှပ်တစ်ပြက် ခုန်ဆင်းသွားသည်။ ရန်ယီငါးက ပါးစပ်ကိုဟကာ ပင်လယ်ရေများကို စုတ်ယူပြီးနောက် ယီယွင်ထံသို့ ဧရာမရေတံခွန်ကြီးသဖွယ် ပန်းထုတ်လိုက်သည်။

ယီယွင်သည် ရှောင်တိမ်းခြင်း မပြုဘဲ သူ၏ ခန္ဓာကိုယ်မှ ရွှေရောင်အလင်းတန်းများ ပေါက်ကွဲထွက်လာစေကာ "သန့်စင်ယန်ငရဲမီး" ကို အသုံးပြု၍ ရေတံခွန်ကြီးကို အပိုင်းပိုင်းခွဲပစ်လိုက်သည်။

ထိုအချိန်တွင် ယီယွင်၏ ဓားပေါ်၌ လျှို့ဝှက်ဆန်းကြယ်သော ချိတ်တံဆိပ် ပုံစံများ ပေါ်လာသည်။ ဤသည်မှာ "မိစ္ဆာစက်ဝန်းတစ်သောင်း" ကို အသုံးပြုသည့် နည်းလမ်းတစ်ခုဖြစ်သည်။

ယီယွင်သည် ရန်ယီငါး၏ ခန္ဓာကိုယ်ကိုသာမက ၎င်း၏ ရေဓာတ်ဆိုင်ရာ ဥပဒေသများကိုပါ တိုက်ခိုက်လိုက်ခြင်းဖြစ်သည်။

ရန်ယီငါးမှာ ဒေါသထွက်ကာ ပင်လယ်ရေများကို ကောင်းကင်သို့ ပန်းထုတ်သည်။ ယီယွင်သည် ဓားအိမ်ငယ် ၉၉၉ ခုကို ထုတ်လွှတ်လိုက်ပြီး "နှင်းတစ်ထောင် ဓားအစီအရင်"ကို ဖန်တီးလိုက်သည်။

"ဒီအစီအရင်မှာ ဥပဒေသ တစ်ထောင်ကျော် ပါဝင်တယ်။ မင်းရဲ့ ရေဓာတ်ဆိုင်ရာ ဥပဒေသတွေကို ဖောက်ခွဲပစ်နိုင်တယ်ကွ..ငါးစုတ်ရဲ့"

ယီယွင်သည် ဓားအစီအရင်နောက်မှ လိုက်ပါကာ နောက်ဆုံးအချက်ကို ထိုးသွင်းလိုက်သည်။

"သေလိုက်တော့"

ပေါက်ကွဲမှုကြီးနှင့်အတူ ရန်ယီငါး၏ ဧရာမပါးစပ်မှာ ပေါက်ကွဲသွားပြီး သွေးနှင့် ပင်လယ်ရေများ လွင့်စင်သွားသည်။ ယီယွင်သည် ရန်ယီငါး၏ အလောင်းပေါ်တွင် ရပ်လျက် ဓားဖျားမှ သွေးစက်များ စီးကျနေသည်။ တတိယမြောက် ရှေးဟောင်းဖေးမှာ သေဆုံးသွားလေပြီ။

ထိုမြင်ကွင်းကို မြင်လိုက်ရသောအခါ ပိုင်ယွီချင်း၏ လက်ထဲမှ ယပ်တောင်ကို ဒေါသတကြီး “ဖြတ်” ခနဲ မြည်သံနှင့်အတူ ပိတ်လိုက်တော့သည်။

ဤသည်မှာ ယီယွင်၏ စွမ်းအားကို သူ အသိအမှတ်ပြုလိုက်ရခြင်းပင် ဖြစ်သည်။

အခန်း ၉၀၇ - ကိုးမြီးမြေခွေးဖြူ

ယီယွင်တစ်ယောက် ဒုတိယမြောက် ရှေးဟောင်းဖေးကို အောင်မြင်စွာ သတ်ဖြတ်နိုင်ခဲ့ခြင်းမှာ အစကတည်းက အံ့ဩစရာ မဟုတ်ခဲ့ပေ။ အကြောင်းမှာ ကျန်ကျူး၊ ဝူဖုန်းနှင့် အခြားသော ထိပ်တန်းတပည့်များသည်လည်း ထိုအဆင့်ကို ကျော်ဖြတ်နိုင်ခဲ့ကြသောကြောင့်ဖြစ်သည်။ သို့သော် ယခု တတိယမြောက် ရှေးဟောင်းဖေးကို သတ်ဖြတ်လိုက်သည့် ယီယွင်၏ အရှိန်အဟုန်မှာ မြေခွေးဖြူမင်းသမီးနှင့် ကွာဟချက် အလွန်ပင် နည်းပါးသွားပြီဖြစ်သည်။

ယီယွင်သည် ကျန်ကျူးတို့၏ အဆင့်ထက် လုံးဝကျော်လွန်သွားပြီဖြစ်သည်။ ကျန်ကျူး၊ အရိပ်အမွှာညီအစ်မများနှင့် ဝူဖုန်းတို့သည် ဒုတိယမြောက် ရှေးဟောင်းဖေးကိုသာ အလွယ်တကူ ရင်ဆိုင်နိုင်ကြပြီး တတိယမြောက်ကို ရင်ဆိုင်ရလျှင်မူ ချွေးပြန်အောင် တိုက်ခိုက်ရမည်ဖြစ်သည်။

ယီယွင်မှာမူ ဤအဆင့်အားလုံးကို ကျော်ဖြတ်ပြီး မြေခွေးဖြူမင်းသမီး၏ ပြိုင်ဘက်အဖြစ် တကယ့်ထိပ်တန်းအဆင့်သို့ ရောက်ရှိသွားပြီဖြစ်သည်။ ဤအချိန်တွင် ပိုင်ယွီချင်းအနေဖြင့် ယီယွင်ကို လျစ်လျူရှုထား၍ မရတော့ပေ။

ပိုင်ယွီချင်းမှာ စိတ်မသက်မသာ ဖြစ်နေပြီး အနားရှိ အကြီးအကဲ တွမ့်မုကို စူးရဲစွာကြည့်ကာ “ယီယွင်ရဲ့ စွမ်းဆောင်ရည်က ငါတို့ကို အံ့အားသင့်စေတာ အမှန်ပဲ။ သူက ရွှယ်အာ (မင်းသမီး) နဲ့ တပြိုင်တည်း စတုတ္ထမြောက်ဖေးကို ရင်ဆိုင်ရတော့မယ်။ ဒါပေမဲ့ သူ့ရဲ့ ပြိုင်ဘက်ဖြစ်တဲ့ ရန်ယီငါးက တခြားသူတွေနဲ့ ယှဉ်ရင် အရမ်းအားနည်းနေတာ မဟုတ်ဘူးလား” ဟု မေးခွန်းထုတ်လိုက်သည်။

ဤစကားကြောင့် လော့မျိုးနွယ်စု တပည့်များ၏ မျက်နှာပေါ်တွင် ပျော်ရွှင်နေသော အရိပ်အယောင်များ ချက်ချင်း ပျောက်ကွယ်သွားသည်။

ပိုင်ယွီချင်း၏ ရည်ရွယ်ချက်မှာ ရန်ယီငါးသည် ဖေးနဂါးလောက် မပြင်းထန်ကြောင်း၊ ယီယွင်၏ အောင်မြင်မှုမှာလည်း ပြိုင်ဘက် အားနည်းခြင်းကြောင့်သာဖြစ်ကြောင်း၊ ယီယွင်သည် မြေခွေးဖြူမင်းသမီးထက် များစွာအားနည်းနေသေးကြောင်း ထင်ဟပ်ပြောဆိုလိုက်ခြင်းဖြစ်သည်။

ထိုစကားကို ကြားသောအခါ ရန်ရွှဲ့ယီ၏ ရင်ဘတ်ထဲတွင် မီးတောက်များ ထတောက်လာသလို ခံစားလိုက်ရသည်။ ယီယွင်သည် သူတို့၏ ဘိုးဘေး ရန်ယီငါးကို သတ်ဖြတ်နေခြင်းမှာ ဟုတ်သော်လည်း၊ ယခုတွင်မူ ထိုဘိုးဘေးမှာ အားနည်းသည်ဟု ပြစ်တင်ခံနေရပြီဖြစ်သည်။

ရန်ရွှဲ့ယီသည် ယီယွင်ကို အနိုင်ပိုင်းရန် အချိန်ကြာမြင့်စွာ ကြိုးစားခဲ့သော်လည်း၊ ယခုတွင်မူ သူသည် ယီယွင်နှင့် ယှဉ်ပြိုင်ရန် အရည်အချင်းပင် မရှိတော့ကြောင်း နားလည်သွားသည်။

“မင်းက ပြိုင်ဘက်ကို အားနည်းလွန်းတယ်လို့ ထင်နေရင်၊ ဒါကို ပြောင်းလဲပေးဖို့က အခက်အခဲ မရှိပါဘူး” ဟု အကြီးအကဲ ရှီက အေးစက်စက် အသံဖြင့် ပြောကာ လက်ကို ဝှေ့ယမ်းလိုက်သည်။

ထိုအခိုက်တွင် မြေခွေးဖြူမင်းသမီး၏ စတုတ္ထမြောက် တိုက်ပွဲမှာ စတင်နေပြီဖြစ်သည်။ စတုတ္ထမြောက် ဖေးသည် ယခင်ဖေးများထက် အဆပေါင်းများစွာ ပိုမိုပြင်းထန်သည်။

တိုက်ပွဲဝင်သူများအနေဖြင့် ပြင်ဆင်ရန် အချိန် တစ်မိနစ်သာ ရရှိသဖြင့် အသက်ပင် ဝအောင်မရှူနိုင်ကြပေ။ မြေခွေးဖြူမင်းသမီးသည် စတုတ္ထမြောက် ဖေးနဂါးကို ရင်ဆိုင်ရန်အတွက် သူမ၏ အဓိက လက်နက်ဖြစ်သော

"ကောင်းကင်မြေခွေးမျက်ဝန်း" ကို ချက်ချင်း ဆင့်ခေါ်လိုက်သည်။ သူမသည် တိုက်ပွဲကို အချိန်ကြာမြင့်စွာ မဆွဲထားချင်သဖြင့် အစွမ်းကုန် အသုံးပြုလိုက်ခြင်းဖြစ်သည်။

သို့သော် ပိုင်ယွီချင်း၏ အကြည့်မှာ ယီယွင်၏ ဖန်သားပြင်ဆီသို့ ရောက်သွားသည့်အခါ သူ၏ မျက်နှာမှာ တစ်စက္ကန့်အတွင်း ပြောင်းလဲသွားသည်။ ရန်ယီငါး၏ အလောင်းမှာ ရုတ်တရက် ပျောက်ကွယ်သွားပြီး ယီယွင်သည် အဖြူရောင် တိမ်လွှာများထက်တွင် တစ်ယောက်တည်း ရောက်ရှိနေသည်။

ထိုစဉ်မှာပင် ယီယွင်၏ နောက်ကျောတွင် ဧရာမ အရိပ်ကြီးတစ်ခု ပေါ်လာသည်။ လှည့်ကြည့်လိုက်သောအခါ ကိုးမြီးရှိသော ဧရာမမြေခွေးဖြူတစ်ကောင်က သူ့ကို အေးစက်စက် စိုက်ကြည့်နေသည်။ ၎င်းမှာ အလွန်ပင် ခန့်ညားပြီး သာမန်သတ္တဝါများကို အထင်သေးစွာ ကြည့်နေသည့် ပုံစံမျိုးဖြစ်သည်။

ရန်ယီငါးသည် ကိုးမြီးမြေခွေးဖြူအဖြစ် ပြောင်းလဲသွားပြီလော။ ယီယွင်သည် အံ့အားသင့်သွားသော်လည်း သူ၏ စိတ်ထဲတွင် ကြောက်ရွံ့ခြင်းမရှိဘဲ တိုက်ခိုက်လိုစိတ်များ ပေါ်ပေါက်လာသည်။

ရန်ယီငါး၏ ရေဓာတ်ဆိုင်ရာ ဥပဒေသများကို သူ ကျွမ်းကျင်သွားပြီဖြစ်ရာ၊ ယခုကဲ့သို့ ပိုမိုပြင်းထန်သော ပြိုင်ဘက်နှင့် ရင်ဆိုင်မှသာ သူ၏ စွမ်းအားကို အတည်ပြုနိုင်မည်ဖြစ်သည်။

အပြင်ဘက်တွင် ပိုင်ယွီချင်းက အကြီးအကဲ ရှီကို မကျေမနပ်ဖြင့် မေးလိုက်သည်။

“အကြီးအကဲရှီ၊ ဒါ ဘာသဘောလဲ။ ကျွန်တော်တို့ မျိုးနွယ်စုရဲ့ ဘိုးဘေးကို ယီယွင်နဲ့ ရင်ဆိုင်ခိုင်းတာလား”

“ကိုးမြီးမြေခွေးဖြူရဲ့ စွမ်းအားက ဖေးနဂါးနဲ့ အဆင့်တူတယ်။ ဒါ့အပြင် ယီယွင်က အတွေ့အကြုံမရှိဘဲ စတုတ္ထအဆင့်ကို ချက်ချင်း ရင်ဆိုင်ရမှာဖြစ်လို့ သူ အရင်ကရခဲ့တဲ့ အားသာချက်တွေ ပြေပျောက်သွားလိမ့်မယ်” ဟု အကြီးအကဲ ရှီက ပိုင်ယွီချင်း၏ ဒေါသထွက်နေသော မျက်နှာကို ဂရုမစိုက်ဘဲ ပြန်ပြောသည်။

ပိုင်ယွီချင်းမှာ စိတ်ထဲတွင် ဒေါသထွက်နေသော်လည်း အကြီးအကဲများကို တိုက်ရိုက် ရန်မစရဲပေ။ သူက ယီယွင်အနေဖြင့် ကိုးမြီးမြေခွေးဖြူနှင့် ရင်ဆိုင်ရလျှင် ပိုမို မြန်ဆန်စွာ ရှုံးနိမ့်ပြီး အရှက်ကွဲတော့မည်ဟု တွေးကာ ကျေနပ်နေသည်။

တိုက်ပွဲ စတင်ချိန်တွင် ကိုးမြီးမြေခွေးဖြူသည် တိမ်တိုက်များကြားတွင် ပုန်းကွယ်နေပြီး ယီယွင်ကို အေးစက်စွာ စိုက်ကြည့်နေသည်။

ယီယွင်သည် ဓားကိုကိုင်ကာ ရွှေရောင်အလင်းတန်းဖြင့် ဝင်ရောက် တိုက်ခိုက်လိုက်သည်။ သို့သော် မြေခွေးဖြူက မလှုပ်မယှက်ဖြင့် အကြည့်တစ်ချက်သာ ကြည့်လိုက်သည်။

“ခလွတ်.........ချွမ်”

ယီယွင်၏ ဓားရောင်ခြည်မှာ ထိုအကြည့်တစ်ချက်အောက်တွင် အပိုင်းပိုင်း အစအနများ ဖြစ်သွားသည်။ ယီယွင်မှာ အံ့အားသင့်သွားပြီး အနောက်သို့ ပေရာနှင့်ချီ ဆုတ်ခွာလိုက်ရသည်။

အကြည့်တစ်ချက်တည်းနှင့် ဓားရောင်ခြည်ကို ဖျက်ဆီးပစ်လိုက်ခြင်းလော။

“ဒါ… ဒါ ကောင်းကင်မြေခွေးမျက်ဝန်းပဲ” မြေခွေးဖြူမျိုးနွယ်စု တပည့်များမှာ စိတ်လှုပ်ရှားစွာ အော်ဟစ်လိုက်ကြသည်။

ဤသည်မှာ သွေးမျိုးဆက်မှ လာသော မင်းသမီး၏ မျက်ဝန်းထက် များစွာ ပိုမိုပြင်းထန်သော စစ်မှန်သည့် ရှေးဟောင်းဖေး၏ အစွမ်းပင် ဖြစ်သည်။

ယခုအခါ စစ်မှန်သော ရှေးဟောင်းဖေးတစ်ကောင်၏ အစွမ်းနှင့် ယီယွင်၏ ဓားပညာတို့ မည်သူက ပိုမိုသာလွန်မည်နည်း။

အခန်း ၉၀၈ - ကိုးမြီးနယ်ပယ်

“ဒီကောင်လေးကို ငါတို့မြေခွေးဖြူမျိုးနွယ်စုရဲ့ ဘိုးဘေးနဲ့ ရင်ဆိုင်ခိုင်းလိုက်စမ်းပါ။ ငါတို့မြေခွေးဖြူမျိုးနွယ်စုရဲ့ ကောင်းကင်မြေခွေးမျက်ဝန်း ဘယ်လောက်အစွမ်းထက်လဲဆိုတာ သူကိုယ်တိုင် မြင်တွေ့ပါစေ”

ပွဲကြည့်စင်ပေါ်ရှိ မြေခွေးဖြူမျိုးနွယ်စုမှ ထိပ်တန်းတပည့်များမှာ စိတ်ကျေနပ်မှု ရှိနေကြသည်။ မြေခွေးဖြူမျိုးနွယ်စု၏ ဘိုးဘေးဖြစ်သော ကိုးမြီးမြေခွေးဖြူသည် သူတို့အတွက် ရိုသေကိုးကွယ်ရသည့် အမြင့်မြတ်ဆုံး ပုဂ္ဂိုလ်ဖြစ်သည်။ အကြီးအကဲ ရှီက ယီယွင်ကို ကိုးမြီးမြေခွေးဖြူနှင့် တိုက်ခိုက်စေခြင်းမှာ သူတို့ကို အစပိုင်းတွင် မသက်မသာ ဖြစ်စေခဲ့သော်လည်း၊ ယခုတွင်မူ သူတို့၏ ဒေါသများ ပြေပျောက်သွားသည်။

ကိုးမြီးမြေခွေးဖြူမှာ စွမ်းအားကြီးရုံသာမက ဥပဒေသများကိုလည်း ကျွမ်းကျင်ပြီး တိုက်ခိုက်ပုံမှာ ထူးဆန်းလွန်းလှသည်။ အကယ်၍ မည်သို့ရင်ဆိုင်ရမည်ကို မသိပါက အလွယ်တကူ ရှုံးနိမ့်သွားလိမ့်မည်ဖြစ်သည်။

ထိုအချိန်တွင် အစီအရင်အတွင်း၌ ယီယွင်နှင့် ကိုးမြီးမြေခွေးဖြူတို့ အပြန်အလှန် စိုက်ကြည့်နေကြသည်။ မြေခွေးဖြူ၏ မျက်လုံးများမှာ နက်နဲတောက်ပနေပြီး အခြားစကြာဝဠာတစ်ခုနှင့် ချိတ်ဆက်နေသည့် ဂလက်ဆီများကို သိမ်းပိုက်ထားသည့်နှယ် ဖြစ်သည်။

ယီယွင်သည် ထိုမျက်လုံးများကို ကြည့်မိစဉ် ခဏတာ ငေးမောသွားသည်။ ၎င်းမှာ အမှောင်ထု၏ ဗဟိုချက်မနှင့် အမှောင်၏ အရင်းအမြစ်ဟု သူခံစားလိုက်ရသည်။ သို့သော် မြေခွေးဖြူ၏ အမွေးများမှာ နှင်းဆွတ်သကဲ့သို့ အဖြူရောင်စင်ဖြစ်နေသဖြင့် အနက်နှင့်အဖြူတို့မှာ ပြတ်သားစွာ ဆန့်ကျင်နေသည်။

မျက်ဝန်းပညာလား။ ယီယွင် အံ့အားသင့်သွားသည်။ မျက်ဝန်းပညာများမှာ များသောအားဖြင့် စိတ်အလိမ်အညာနှင့် ဝိညာဉ်ရေးရာ တိုက်ခိုက်မှုများနှင့် ဆက်စပ်နေလေ့ရှိသည်။

သို့သော် ယခုမြေခွေးဖြူ၏ မျက်လုံးများမှာ သာမန်မျက်ဝန်းပညာထက် ပိုမိုနက်နဲပြီး မဟာတာအို၏ ဥပဒေသများကို ရောင်ပြန်ဟပ်နေကာ ကမ္ဘာလောကတို့၏ ဖြစ်တည်ခြင်းနှင့် ပျက်သုဉ်းခြင်းတို့ကို မြင်တွေ့နေရသကဲ့သို့ ရှိသည်။

ထိုစဉ်မှာပင် ယီယွင်သည် မြေခွေးဖြူ၏ မျက်လုံးများထဲမှ ထွက်ပေါ်လာသော အမှောင်ထုတစ်ခုကို ခံစားလိုက်ရသည်။ ထိုအမှောင်ထုမှာ တကယ့်အရာဝတ္ထုကဲ့သို့ ဖြစ်လာပြီး သူ၏ ပတ်ဝန်းကျင်ရှိ အာကာသကို စားမြိုကာ သူ့ထံသို့ တိုးဝင်လာသည်။

ယီယွင်သည် အဆုံးမဲ့အမှောင်ထုထဲသို့ ရောက်သွားသကဲ့သို့ ခံစားလိုက်ရသည်။ သူ၏ အဝေးတစ်နေရာတွင် မြေခွေးဖြူတစ်ကောင်ကို ဝါးတားတား မြင်နေရသည်။ ၎င်းသည် သူနှင့် ဝေးကွာသွားသကဲ့သို့ အရွယ်အစားများ လျော့ကျလာပြီး နောက်ဆုံးတွင် ဆန်စေ့ခန့်သာ ကျန်ရှိတော့ကာ ပျောက်ကွယ်တော့မည့်ပုံစံ ဖြစ်သည်။

အကယ်၍သာ ထိုမြေခွေးပျောက်ကွယ်သွားပါက သူသည် အဆုံးမဲ့အာကာသထဲတွင် တစ်ယောက်တည်း ကျန်ရစ်ခဲ့လိမ့်မည်။

ပိတ်လှောင်တဲ့ မျက်ဝန်းပညာလား။ ယီယွင် ချက်ချင်းပင် ရိပ်မိလိုက်သည်။

သူ အပိတ်လှောင်ခံရပါက ဤပွဲတွင် ရှုံးနိမ့်တော့မည်ဖြစ်သည်။ ပိတ်လှောင်မှုများ တိုးဝင်လာသည်နှင့်အမျှ ယီယွင်သည် ဒေါသတကြီး အော်ဟစ်လိုက်သည်။

“ဘုန်း”

ယီယွင်၏ နောက်ကျောတွင် သုံးချောင်းထောက် ရွှေကျီးကန်းကြီးက အတောင်ပံများ ဖြန့်ကားလိုက်ပြီး ပြင်းထန်သော ယန်မီးတောက်များ အနားတွင် ဝန်းရံသွားသည်။ အမှောင်ထုကို မီးတောက်များက စားမြိုသွားသည်။

စကြာဝဠာသည် အစကတည်းက တိတ်ဆိတ်အေးစက်သော အမှောင်ထုသာ ဖြစ်သော်လည်း ကြယ်တာရာများ ရှိနေခြင်းကြောင့်သာ အလင်းရောင် ရရှိခြင်းဖြစ်သည်။ ထိုကြယ်များမှာ ယန်မီးတောက်များဖြင့် လောင်ကျွမ်းနေကြခြင်းပင်။

“ငါ့ကို လွှတ်ပေးစမ်း”

ယီယွင်သည် လက်ထဲရှိ ဓားကို တုန်ခါလိုက်ရာ ဥပဒေသချိတ်တံဆိပ်များ စုဝေးလာသည်။

"နှင်းတစ်ထောင်နယ်မြေ" အစီအရင်ကို ဆင့်ခေါ်လိုက်ပြီး အရပ်ရှစ်မျက်နှာသို့ ဖြန့်ကျက်လိုက်သည်။ နှင်းပွင့်များကြားမှ ဓားရောင်ခြည်များက အာကာသကို ဖောက်ထွက်သွားသည်။

“ယား.........ချွင်....ချွင်.....ဝုန်း”

အမှောင်ထုကို ယီယွင်၏ ဓားချက်က ဖောက်ခွဲလိုက်သည်။ လက်ထဲတွင် ဓားကိုကိုင်ကာ ဓားပေါင်း ၉၉၉ ချောင်းကို ဝန်းရံထားလျက် ရွှေကျီးကန်းပေါ်တွင် ရပ်ကာ အမှောင်ထုထဲမှ ထွက်ပြေးလွတ်မြောက်လာသည်။

အပြင်ဘက်ရှိ ကြည့်ရှုသူများသည် ယီယွင် အမှောင်ထုထဲသို့ စားမြိုခံလိုက်ရစဉ်က အသက်ရှူပင် မှားယွင်းသွားကြသော်လည်း၊ စက္ကန့် ၃၀ အကြာတွင် ပြန်လည်ထွက်ပေါ်လာသည်ကို မြင်လိုက်ရသည်။

“ကံကောင်းလိုက်တာ”

“ယီယွင် အခက်တွေ့နေပုံပဲ”

လော့မျိုးနွယ်စု တပည့်များမှာ စိုးရိမ်နေကြသည်။ ယီယွင် အစကတည်းက အနိုင်ရနေခဲ့သော်လည်း ယခုမူ ရုန်းရင်းဆန်ခတ် ဖြစ်နေသည်။ တဖက်တွင်မူ မြေခွေးဖြူမင်းသမီးသည် စတုတ္ထမြောက် ဖေးနဂါးကို ဓားဖြင့် ထိုးသွင်းပြီး သွေးများ ပန်းထွက်စေခဲ့ပြီဖြစ်သည်။

ပိုင်ယွီချင်းမှာ ကျေနပ်စွာ ပြုံးလိုက်သည်။ ယီယွင်အနေဖြင့် ရန်ယီငါးနှင့် တိုက်ခိုက်ရလျှင် ပိုမိုလွယ်ကူမည်ဖြစ်သော်လည်း၊ ယခုမူ ထူးဆန်းသော တိုက်ခိုက်မှုများရှိသည့် ကိုးမြီးမြေခွေးဖြူကို ရင်ဆိုင်နေရသဖြင့် သူ၏ စွမ်းအားကို အပြည့်အဝ မထုတ်နိုင်ပေ။ ဤသည်မှာ ဥပဒေသများ၏ ဖိအားပေးမှုပင် ဖြစ်သည်။

ထိုစဉ်တွင် ကိုးမြီးမြေခွေးဖြူသည် လှုပ်ရှားလိုက်သည်။ ၎င်း၏ ကိုးမြီးမှာ အဖြူရောင်မီးတောက်များကဲ့သို့ လှုပ်ခါနေပြီး ယီယွင်ကို စိုက်ကြည့်နေသည်။

မြေခွေးဖြူ၏ မျက်လုံးမှ အရောင်အမျိုးမျိုးရှိသော စက်ဝိုင်းများ ထွက်ပေါ်လာပြီး အာကာသထဲသို့ ပျံ့နှံ့သွားသည်။ ၎င်းတို့မှာ ပျောက်ကွယ်သွားခြင်းမဟုတ်ဘဲ အာကာသကို ပိတ်လှောင်လိုက်ခြင်းဖြစ်သည်။

“ပိတ်လှောင်နယ်ပယ် လား။” လော့မျိုးနွယ်စု တပည့်များ အံ့အားသင့်သွားကြသည်။

ထိုစက်ဝိုင်းများသည် နယ်ပယ်တစ်ခုကို ဖန်တီးလိုက်ခြင်းဖြစ်ပြီး ကိုးမြီးမြေခွေးဖြူတွင် နယ်ပယ်ကိုးခု ရှိကြောင်း မြေခွေးဖြူမျိုးနွယ်စုမှ မိန်းကလေးတစ်ယောက်က ဂုဏ်ယူစွာ ပြောလိုက်သည်။ ထိုနယ်ပယ်ကိုးခု ပေါင်းစပ်လိုက်လျှင် မည်သည့်အရာမဆို ဖျက်ဆီးပစ်နိုင်သော တည်ဆောက်မှု ဖြစ်သွားမည်ဖြစ်သည်။

ကိုးမြီးနယ်ပယ်ထဲတွင် ယီယွင်၏ အမူအရာမှာ တင်းမာသွားသည်။ သူ၏ ထောင်ပေါင်းများစွာသော နှင်းဓားများကို အစီအရင်ဖြင့် ထုတ်လွှတ်လိုက်သော်လည်း ဓားရောင်ခြည်များမှာ ပေ ၁၀၀၀ အကွာတွင် မမြင်နိုင်သော နံရံတစ်ခုနှင့် တိုက်မိပြီး ပြန်လည်ကွဲကြေသွားတော့သည်။