အခန်း (၉၀၉-၉၁၁)

အခန်း ၉၀၉ - စိတ်အာရုံယောင်တို့၏ ပိတ်လှောင်မှု

“အော်… ကိုးမြီးမြေခွေးဖြူရဲ့ နယ်မြေအကန့်အသတ်က ဒီလောက်ထိတောင် အစွမ်းထက်တာလား”

ယီယွင်သည် သူ့ပတ်ဝန်းကျင်ကို ဝေ့ကြည့်လိုက်သည်။ သူရောက်ရှိနေသည့် နေရာမှာ မမြင်နိုင်သော အတားအဆီးများဖြင့် ပိတ်လှောင်ခံထားရသယောင် ရှိနေသည်။ သို့သော် ထိုအတားအဆီးတို့မှာ အမှန်တကယ် တည်ရှိနေခြင်းမဟုတ်ဘဲ သဘာဝတရား၏ နိယာမများ ပြောင်းလဲသွားခြင်းကြောင့် ဖြစ်ပေါ်လာသည့် အတိုင်းအဆမရှိသော ဖိအားများသာဖြစ်သည်။

ထိုအရာက သူ့၏ နှင်းတစ်ထောင် ဓားပျံများကို ဝဲပျံခွင့်မပေးဘဲ လေဟာနယ်တွင် အမြစ်တွယ်ထားသကဲ့သို့ တားဆီးထားခြင်း ဖြစ်သည်။

ယင်းမျှသာမကဘဲ၊ ထိုနယ်မြေသည် စိတ်ဝိညာဉ်ကိုပါ တိုက်ရိုက်ဖိအားပေးနေသည့် အခြားသော မမြင်နိုင်သည့် အစွမ်းတစ်ခုကို ပိုင်ဆိုင်ထားသည်။ ကိုးမြီးမြေခွေးဖြူက အုပ်စိုးထားသော ထိုနယ်မြေ၏ ဖိအားမှာ ခန္ဓာကိုယ်နှင့် စွမ်းအင်ကိုတင်မကဘဲ စိတ်ဝိညာဉ်၏ အနက်ရှိုင်းဆုံးနေရာအထိ တိုက်ရိုက်သက်ရောက်နေသည်။

ယီယွင်၏ မျက်စိရှေ့တွင် သေခြင်းတရားနှင့် ငရဲခန်းများ ပေါ်လာသည်။ သူမြင်နေရသည်မှာ ထျန်းယွမ်လောက၌ သူအောင်နိုင်ခဲ့ပြီးဖြစ်သည့် ချပ်ဝတ်နက်နတ်ဆိုးပင် ဖြစ်သည်။ ထိုနတ်မိစာမှာ ယခုအခါ ယီယွင်၏ စိတ်ကမ္ဘာထဲတွင် ပြန်လည်ရောက်ရှိလာပြီး သူသွားရာလမ်းတစ်လျှောက် အသက်ပေါင်းများစွာကို သတ်ဖြတ်နေလေသည်။ သူ၏ လှံရှည်မှာ လေထဲတွင် တဝီဝီမြည်ဟည်းကာ သွေးစက်များဖြင့် စွန်းထင်းနေသည်။

“ဒါ… စိတ်အာရုံပုံရိပ်ယောင်တစ်ခုလား။ ငါ့ရဲ့ စိတ်ထဲမှာ အမှန်တကယ် ကြောက်ရွံ့နေတဲ့ အရာတွေပေါ့လေ”

ယီယွင် သတိပြုမိသွားသည်။ စိတ်အာရုံယောင် တိုက်ခိုက်မှုများသည် လူတစ်ဦး၏ စိတ်အတွင်းရှိ အတိတ်က အကြောက်တရားများကို ထုတ်နှုတ်ပြသတတ်သည်။ ထိုနတ်ဆိုးမှာ အတိတ်က ယီယွင်ရင်ဆိုင်ခဲ့ရသည့် အခက်အခဲကြီးတစ်ခုဖြစ်သောကြောင့် ယခုကဲ့သို့ သူ့စိတ်စွမ်းအားကို ခြိမ်းခြောက်နေခြင်း ဖြစ်သည်။

“ဟား ဟား ဟား”

နတ်ဆိုး၏ အော်ဟစ်သံမှာ ပဲ့တင်ထပ်နေသည်။ ယီယွင်သည် သွေးစက်များ လွင့်စင်ကာ သူ၏ခန္ဓာကိုယ်ကို အပိုင်းပိုင်းဖြတ်တောက်နေသည့်အလား ခံစားလိုက်ရသည်။

ဤအခြေအနေမှာ ယီယွင်အတွက်သာ မဟုတ်ပါ။ ဖေး ကျောက်တုံးအပြင်ဘက်ရှိ လူငယ်အကျော်အမော်များသည်လည်း ကိုးမြီးမြေခွေးဖြူ၏ နယ်မြေအတွင်းမှ စိတ်အာရုံယောင်များကို ခံစားနေရသည်။ စစ်ပွဲများ၊ သွေးစက်များ၊ သတ်ဖြတ်မှုများနှင့် အတိတ်က အကြောက်တရားတို့မှာ ရေလွှမ်းမိုးသကဲ့သို့ သူတို့၏ စိတ်ကို တိုက်ခိုက်နေသည်။

မသိလိုက်ဘဲနှင့်ပင် လူအများ၏ နဖူးပြင်တွင် ချွေးစက်များ ပျံလာသည်။ ထိုအရာများမှာ အိပ်မက်နှင့် တူသော်လည်း အလွန်ပင် ရုပ်ဝတ္ထုဆန်နေသောကြောင့် သူတို့အနေဖြင့် မိမိ၏ အကြောက်တရားထဲမှ ရုန်းမထွက်နိုင်ကြပေ။

ထိုအချိန်တွင် အကြီးအကဲ ရှီ က အေးစက်စွာ နှာခေါင်းရှုံ့လိုက်သည်။ ထိုအသံမှာ လူတိုင်း၏ နားထဲတွင် ဂေါင်သံကဲ့သို့ ပဲ့တင်ထပ်သွားပြီး အားနည်းသူများမှာ သတိပြန်ဝင်လာကာ အမောတကော အသက်ရှူနေကြရသည်။

လော့မျိုးနွယ်စုဝင်တစ်ဦးက ရယ်ရယ်မောမောနှင့် “မြေခွေးတွေကလည်း ငါတို့လိုပဲ အခြေအနေဆိုးနေတာပဲလေ” ဟု ပြောလိုက်ရာ မြေခွေးဖြူမျိုးနွယ်စုဝင်များ၏ မျက်နှာမှာ အလွန်ပင် မည်းမှောင်သွားသည်။

မြေခွေးဖြူမျိုးနွယ်စုဝင်တစ်ဦးက “ငါတို့ရဲ့ အတတ်ပညာနဲ့ သွေးစပ်က မပြည့်စုံလို့သာ အခုလိုဖြစ်ရတာ။ တကယ်တမ်းသာ ကိုးမြီးမြေခွေးဖြူရဲ့ နယ်မြေအစစ်ထဲ ရောက်သွားရင် မင်းတို့စိတ်တွေ ပြိုကွဲသွားမှာ အသေအချာပဲ” ဟု ပြန်လည်ချေပသည်။

လော့မျိုးနွယ်စုဝင်များမှာ ယီယွင်၏ အခြေအနေကို စိုးရိမ်တကြီး ကြည့်လိုက်ကြသည်။ ယီယွင်မှာ လှုပ်ရှားမှုမရှိဘဲ ကျောက်ရုပ်ကဲ့သို့ ငြိမ်သက်နေသည်။ သူ၏ ပတ်လည်တွင် မီးခိုးရောင် မြူခိုးများ လွှမ်းခြုံထားပြီး စိတ်အာရုံယောင်များက သူ့ကို ဝါးမြိုရန် ကြိုးစားနေသည်။

“အစ်ကိုယီယွင် ဘာမှမဖြစ်ပါစေနဲ့။ သူ တိုက်ပွဲဝင်နေတာ ဖြစ်ပါလိမ့်မယ်” ဟု တစ်ဦးက ဆိုသည်။

မြေခွေးဖြူမျိုးနွယ်စုဝင်များကမူ “မြေခွေးဖြူဘိုးဘေးရဲ့ စိတ်အာရုံယောင်ကို လူသားတစ်ယောက်က ဘယ်လိုလုပ် အနိုင်ယူနိုင်မှာလဲ” ဟု မထီတရီ ပြောဆိုနေကြသည်။

သို့သော် ထိုစကားဆုံးသည်နှင့် တစ်ပြိုင်နက်

“ဝှစ်”

ယီယွင်၏ နဖူးအလယ်မှ အနက်ရောင် အလင်းတန်းတစ်ခု ပစ်လွှတ်လိုက်ပြီး ကောင်းကင်ကို ဖောက်ထွက်သွားသည်။ ထိုအရာမှာ ဓားဆန္ဒ ဖြစ်သည်။ ထိုဓားမှာ အနက်ရောင်ဖြစ်သော်လည်း အလွန်ပင် ပြတ်သားလှသည်။ ထိုဓားချက်ကြောင့် ယီယွင်ကို လွှမ်းခြုံထားသော မီးခိုးရောင် မြူခိုးများမှာ တစ်ချက်တည်းဖြင့် ပျက်စီးသွားသည်။

ကိုးမြီးမြေခွေးဖြူ၏ ရုပ်ပုံမှာလည်း ထိုဓားချက်ကြောင့် တုန်ခါသွားပြီး နောက်သို့ ဆုတ်ခွာသွားရသည်။ ကိုးမြီးမြေခွေးဖြူ၏ စိတ်အာရုံယောင်နယ်မြေမှာ ယီယွင်၏ ဓားချက်အောက်တွင် အပိုင်းပိုင်းပြတ်တောက်သွားခဲ့ပြီဖြစ်သည်။

မြင်နေရသူအားလုံးမှာ အသက်ရှူမှားလောက်အောင်ပင် အံ့အားသင့်သွားကြသည်။ ခုနစ်နှစ်တိုင်တိုင် တရားကျင့်ကြံရင်း ရရှိလာသော ယီယွင်၏ စိတ်စွမ်းအားမှာ ဤမျှအထိ ကြောက်မက်ဖွယ်ကောင်းလိမ့်မည်ဟု မည်သူမျှ မတွေးထားခဲ့ကြပေ။

ထိုသို့ အစွမ်းထက်သော စိတ်အာရုံယောင်နယ်မြေကို တစ်ချက်တည်းဖြင့် ဖောက်ထွက်နိုင်ခြင်းသည် ယီယွင်နှင့် သူတို့အကြား ကွာဟချက်မှာ ကောင်းကင်နှင့် မြေကြီးကဲ့သို့ ဝေးကွာကြောင်း သက်သေပြလိုက်ခြင်းပင် ဖြစ်သည်။

အခန်း ၉၁၀ - ကောင်းကင်နှင့်မြေကြီးနှင့် ပေါင်းစပ်ခြင်း

“အဲ့ဒီကောင်စုတ်… ကံကောင်းသွားတာပါ။ စိတ်စွမ်းအားဆိုင်ရာ တိုက်ပွဲတွေက သူကျွမ်းကျင်တဲ့နေရာဖြစ်နေလို့ သူ့ရဲ့ ဓားဆန္ဒ က အာရုံယောင်တွေကို အလွယ်တကူ ချိုးဖျက်နိုင်ခဲ့တာ ဖြစ်လိမ့်မယ်”

မြေခွေးဖြူမျိုးနွယ်စုဝင်များမှာ စိတ်ပျက်လက်ပျက် ဖြစ်နေကြသည်။ ကိုးမြီးမြေခွေးဖြူ၏ အားသာဆုံးအချက်ဖြစ်သော စိတ်အာရုံယောင်တိုက်ခိုက်မှုကို ယီယွင်က ပြန်လည်ခုခံနိုင်ခဲ့ခြင်းကြောင့် သူတို့ အံ့အားသင့်နေရသည်။

“ကိစ္စမရှိပါဘူး။ ကိုးမြီးမြေခွေးဖြူရဲ့ စွမ်းရည်က အဲ့လောက်နဲ့ မပြီးသေးဘူး။ မြူခိုးတွေကို ဖျက်ဆီးနိုင်ခဲ့ရင်တောင် ကိုးမြီးနယ်မြေ ကိုတော့ သူ ဘယ်လိုမှ ဖောက်ထွက်နိုင်မှာ မဟုတ်ဘူး။ ကိုးမြီးနယ်မြေထဲမှာဆိုရင် ကိုးမြီးမြေခွေးဖြူက အနိုင်မရှိသူပဲ”

ကိုးမြီးနယ်မြေမှာ ကိုးခုသော နယ်မြေများ ပေါင်းစပ်ထားသည့်အပြင် ကိုးမြီးမြေခွေးဖြူ၏ နိယာမများအနက် အမြင့်ဆုံးသော တင်ပြမှုဖြစ်သည်။ ယီယွင်သာ ကြိုတင်၍သာ နည်းဗျူဟာကို သိထားလျှင် ရှောင်တိမ်းနိုင်မည်ဖြစ်သော်လည်း ယခုအခါတွင်မူ သူသည် နယ်မြေအတွင်း၌ ပိတ်မိနေပြီဖြစ်သည်။

ကိုးမြီးနယ်မြေထဲတွင် ယီယွင်သည် ကိုးမြီးမြေခွေးဖြူကို ကြည့်ကာ ထူးဆန်းသော ခံစားချက်တစ်ခုကို ရရှိနေသည်။ မြေခွေးဖြူသည် ဤကမ္ဘာကြီးတစ်ခုလုံး ဖြစ်နေသကဲ့သို့ သူ ခံစားလိုက်ရသည်။

“ဒါက နယ်မြေတစ်ခုရဲ့ အစွမ်းသတ္တိလား…”

ယီယွင်၏ စိတ်ကူးနှင့်အတူ သူ၏နောက်ကျောတွင် ရွှေကျီးကန်း ပုံရိပ်ယောင် ပေါ်ထွက်လာသည်။ထျန်တောင်ကြား နှင့် ဖူဆန် သစ်ပင်၏ ပုံရိပ်များမှာလည်း လိုက်ပါလာသည်။

ယီယွင်သည် လက်ထဲမှ ဓားကို တင်းကျပ်စွာကိုင်ပြီး ကိုးမြီးမြေခွေးဖြူကို ခုတ်ပိုင်းလိုက်သည်။

“ချလွမ်.........ဝုန်း........အုန်း..........”

ဓားအလင်းတန်းမှာ လေဟာနယ်ကို ဖောက်ထွက်သွားပြီး မြေခွေးဖြူ၏ ဦးခေါင်းကို တည့်တည့်ထိမှန်သွားသည်။ သို့သော် ထိမိမည့်ဆဲဆဲတွင် ထူးဆန်းသော ဖြစ်ရပ်တစ်ခု ဖြစ်ပွားသည်။ ရေပြင်ပေါ်ရှိ လှိုင်းများကဲ့သို့ပင် မြေခွေးဖြူ၏ ခန္ဓာကိုယ်မှာ ကွဲထွက်သွားပြီး ဓားအလင်းတန်းကို ဖြတ်သန်းသွားခွင့် ပေးလိုက်သည်။

ယီယွင်သည် အရိပ်တစ်ခုကို ခုတ်နေရသကဲ့သို့ ခံစားလိုက်ရသည်။ ယန်ယီ ငါး၏ ရေဓာတ်နိယာမနှင့် အသုံးပြု၍ ရှောင်တိမ်းသည့် နည်းလမ်းထက်ပင် ပိုမိုမြင့်မားနေသည်။ ယန်ယီငါးဆိုလျှင် ထိုနည်းကိုသုံးလျှင်ပင် ဒဏ်ရာရနိုင်သေးသည်၊ သို့သော် ကိုးမြီးမြေခွေးဖြူမှာမူ လုံးဝ ထိခိုက်မှုမရှိဘဲ အလွယ်တကူ ရှောင်တိမ်းသွားသည်။

“စိတ်အာရုံယောင်လား” လော့မျိုးနွယ်စုဝင်များမှာ ထိုမြင်ကွင်းကို ကြည့်ကာ အံ့အားသင့်နေကြသည်။

မြေခွေးဖြူ၏ ခန္ဓာကိုယ်ကိုယ်တိုင်က စိတ်အာရုံယောင်အဖြစ် ပြောင်းလဲသွားနိုင်သလော။

ထိုသို့ တွေးနေဆဲမှာပင်

“ခလွတ်”

ဓားကဲ့သို့ ထက်မြက်သော မြေခွေး၏ခြေထောက်သည် ယီယွင်၏ ဘေးသို့ ဝင်ရောက်လာသည်။

ကြောက်မက်ဖွယ်ကောင်းသော ထက်မြက်မှုဖြင့် ယီယွင်၏ ဘေးတစ်ဖက်ကို ခြစ်ထုတ်လိုက်သည်။ ယီယွင် အမြန်ရှောင်လိုက်သော်လည်း သူဝတ်ဆင်ထားသည့် ဝတ်ရုံမှာ ခြေသည်းမှ ထွက်ပေါ်လာသော လေပြင်းတိုက်ခတ်မှုကြောင့် အပိုင်းပိုင်း ပြတ်ထွက်သွားရသည်။

“ဒါ စိတ်အာရုံယောင် မဟုတ်ဘူး”

တိုက်ခိုက်ချိန်တွင် စစ်မှန်ပြီး ကာကွယ်ချိန်တွင် စိတ်အာရုံယောင်အဖြစ် ပြောင်းလဲသွားသည်။ ဤသည်မှာ မည်သို့မျှ အနိုင်မရနိုင်သော နည်းလမ်းဖြစ်နေပေသည်။

ယီယွင်၏ စိတ်မှာမူ နယ်မြေအတွင်း၌ အလွန်ပင် ကြည်လင်နေသည်။ သူ့အတွေးမှန်ကန်ကြောင်း သူသိလိုက်သည်။ ကိုးမြီးမြေခွေးဖြူသည် သူ၏နယ်မြေနှင့် ပေါင်းစပ်သွားခဲ့ပြီဖြစ်သည်။ နယ်မြေသည် မြေခွေးဖြူဖြစ်ပြီး၊ မြေခွေးဖြူသည် နယ်မြေဖြစ်သည်။ နယ်မြေကို မဖျက်ဆီးနိုင်သမျှ မြေခွေးဖြူကို အနိုင်ယူနိုင်မည် မဟုတ်ပေ။

“အစ်ကိုကြီး၊ အစ်ကိုလွန်သွားပြီလား”

ဖေးကျောက်တုံးအပြင်ဘက်တွင် အကြီးအကဲ တွမ့်မု က အကြီးအကဲ ရှီ ကို တိုးတိုးလေး ပြောလိုက်သည်။

ယီယွင်သာ ယန်ယီငါးကို တိုက်ခိုက်နေလျှင် ယခုဆိုလျှင် အနိုင်ယူပြီးလောက်ပြီဖြစ်သည်။ သို့သော် ယခုမူ ကိုးမြီးမြေခွေးဖြူ၏ ထူးဆန်းသော တိုက်ခိုက်နည်းများကို ရင်ဆိုင်နေရသောကြောင့် ယီယွင်မှာ အလွန်ပင် အားနည်းသော အနေအထားသို့ ရောက်ရှိနေသည်။

အကြီးအကဲ ရှီ က ခပ်ဖွဖွ ပြုံးလိုက်သည်။

“ဒီနယ်မြေမှာ အားနည်းချက်မရှိဘူးလို့တော့ မဆိုလိုပါဘူး။ ဒါပေမဲ့ ယီယွင် အဲ့ဒီအားနည်းချက်ကို ရှာတွေ့ဖို့က ခက်ခဲလိမ့်မယ်။ ဘာပဲဖြစ်ဖြစ်ပါ၊ သူဒီလို ထူးဆန်းတဲ့ တိုက်ခိုက်နည်းတွေကို ကြုံတွေ့ဖူးသွားတာက မြေခွေးဖြူမျိုးနွယ်စုရဲ့ ကောင်မလေးဆီမှာ အရေးနိမ့်သွားတာထက် ပိုတန်ဖိုးရှိပါတယ်။”

ထိုစကားပြောနေစဉ်အတွင်း၌ပင် မင်းသမီး ရွှယ်အာ သည် စတုတ္ထမြောက် ရှေးဟောင်းဖေးနဂါး ကို ပြင်းထန်စွာ ဒဏ်ရာရစေခဲ့ပြီဖြစ်သည်။

အခြားသူများဖြစ်သည့် ကျန်ကျူး၊ အရိပ်အမြွှာ နှင့် ဝူဖုန်း တို့မှာမူ အရေးနိမ့်ကာ ထွက်ခွာခဲ့ရပြီးဖြစ်သည်။ သူတို့မှာ တတိယမြောက် ဖေးနဂါးကိုပင် မနည်းအောင်နိုင်ခဲ့ကြပြီး စတုတ္ထမြောက်ကိုမူ မယှဉ်နိုင်ကြပေ။

ထွက်ခွာလာရသည့်အချိန်တွင် သူတို့သည် ဖေးကျောက်တုံးပေါ်တွင် ပြသနေသော ရုပ်ပုံကို မြင်လိုက်ရသည်။

“မင်းသမီး ရွှယ်အာ… ပြီးတော့ ဟိုတစ်ယောက်က ယီယွင်လား”

“ယီယွင်က ကိုးမြီးမြေခွေးဖြူနဲ့ တိုက်နေတာလား။ ဒါတင်မကဘဲ မြေခွေးနယ်မြေကိုးပါးကိုပါ ထုတ်သုံးထားတယ်”

သူတို့မှာ အံ့အားသင့်သွားကြသည်။ ကိုးမြီးမြေခွေးဖြူ၏ အရှိန်အဝါကို ခံစားမိလိုက်သည်နှင့် ထိုဖေးမှာ သူတို့တိုက်ခိုက်ခဲ့သော တတိယမြောက်နဂါးထက် များစွာ သန်မာကြောင်း သိလိုက်ရသည်။

“ယီယွင်က စတုတ္ထမြောက် ရှေးဟောင်းဖေးကို တိုက်နေတာလား”

အမွှာညီအစ်မမှာ ယုံကြည်နိုင်စွမ်း မရှိကြပေ။

“ဟုတ်တယ် စတုတ္ထမြောက်ကောင်ပဲ” ပိုင်ယွီချင်း က လက်ထဲရှိ ယပ်တောင်ကို တင်းကျပ်စွာ ဆုပ်ကိုင်ထားရင်း ပြောလိုက်သည်။ ယီယွင်မှာ အခက်အခဲနှင့် ကြုံနေရသော်လည်း သူ ဘာကြောင့် ဤမျှ သန်မာနေရသလဲဆိုသည်ကို သူ နားမလည်နိုင်ပေ။

“ခလွတ်.........ချွမ်.....”

နယ်မြေထဲတွင် မြေခွေး၏ ခြေသည်းမှာ ယီယွင်ကို ထပ်မံ၍ ခြစ်ထုတ်လိုက်သည်။ ယီယွင်မှာ အချိန်မီ ရှောင်တိမ်းနိုင်ခဲ့သည်။ ယီယွင်သည် အလွန်ပင် ငြိမ်သက်နေဆဲဖြစ်သည်။

ကိုးမြီးနယ်မြေဆိုသည်မှာ သူ တစ်ခါမျှ မတွေ့ကြုံဖူးသော အရာဖြစ်သည်။ ဤသည်မှာ စိန်ခေါ်မှုတစ်ခုသာမက သူ၏ တရားကျင့်ကြံမှုကို အဆင့်မြှင့်တင်ပေးမည့် အခွင့်အရေးတစ်ခုလည်း ဖြစ်သည်။

ယီယွင်သည် မိစ္ဆာစက်ဝန်းတစ်သောင်းကို ခုနစ်နှစ်တိုင်တိုင် ကျင့်ကြံခဲ့သော်လည်း လက်တွေ့တိုက်ခိုက်မှုတွင် အသုံးပြုရန်မှာ မတူညီသော လုပ်ငန်းစဉ်တစ်ခု ဖြစ်သည်။ သူသည် ဤတိုက်ပွဲကို အသုံးချကာ နိယာမများနှင့် လက်တွေ့တိုက်ခိုက်နည်းကို ပေါင်းစပ်ရန် ကြိုးစားနေသည်။

ချွမ်.........အုန်း........

ယီယွင်သည် ရှောင်တိမ်းရုံသာမက ပြန်လည်၍လည်း တိုက်ခိုက်လိုက်သည်။ ယီယွင်၏ ဓားတွင် ခရမ်းရောင် သင်္ကေတများ တောက်ပနေသည်။ ထိုသင်္ကေတများမှာ မိစ္ဆာစက်ဝန်းတစ်သောင်း မှ ဆင်းသက်လာခြင်းဖြစ်သည်။

မိစ္ဆာစက်ဝန်းတစ်သောင်း တစ်ခုလုံးကို အပြည့်အဝ ဆင့်ခေါ်ခြင်းမှာ ယီယွင်အတွက် စွမ်းအင်အလွန် ကုန်ကျစေသောကြောင့် သူသည် နိယာမ သင်္ကေတများကိုသာ ဓားတွင် ပေါင်းစပ်လိုက်သည်။

ယီယွင်၏ ပတ်လည်မှ ဓားပျံ ၉၉၉ စင်းမှာ နယ်မြေ၏ အစွန်းဆီသို့ ပျံသန်းသွားသည်။ ဓားတစ်စင်းစီတွင် နိယာမ သင်္ကေတများ ရေးထိုးထားသည်။

“ဒင် ဒင် ဒင်”

နိယာမအတားအဆီးနှင့် ထိတွေ့မိရာတွင် စူးရှသော အသံများ ထွက်ပေါ်လာသည်။ ယီယွင်သည် ဓားပျံများကို နယ်မြေကို ဖောက်ထွက်ရန် မသုံးဘဲ နယ်မြေ၏ တည်ဆောက်ပုံကို လေ့လာရန်အတွက် နေရာအနှံ့သို့ တိုက်ခိုက်နေခြင်းဖြစ်သည်။

ဤသည်မှာ နိယာမနှင့် နိယာမ အချင်းချင်း တိုက်ခိုက်မှုဖြစ်သည်။ ဤတိုက်ပွဲမှတစ်ဆင့် သူသည် ကိုးမြီးနယ်မြေ၏ အားနည်းချက်ကို ရှာဖွေနေခြင်း ဖြစ်သည်။

ထိုအချိန်တွင်ပင် လူအများကြားမှ ဟစ်အော်သံတစ်ခု ထွက်ပေါ်လာသည်။

“မင်းသမီး ရွှယ်အာ… မင်းသမီး ရွှယ်အာက စတုတ္ထမြောက် ဖေးနဂါးကို သတ်လိုက်ပြီ”

လော့မျိုးနွယ်စုဝင်များမှာ လှည့်ကြည့်လိုက်ရာ နက်ပြာရောင် ပင်လယ်ပြင်အထက်တွင် နဂါးတစ်ကောင်၏ ရုပ်အလောင်းမှာ ဒဏ်ရာဒဏ်ချက်များဖြင့် ပေါ်နေသည်ကို တွေ့လိုက်ရသည်။ မင်းသမီး ရွှယ်အာ မှာမူ လေထဲတွင် ဝဲပျံနေပြီး ဓားဖျားမှ နဂါးသွေးများမှာ ပင်လယ်ပြင်သို့ တစ်စက်စက် ကျဆင်းနေသည်။

“ဖြုတ် ဖြုတ်”

နှင်းကဲ့သို့ ဖြူစင်သော ဝတ်ရုံနှင့် နဂါးသွေးများ စွန်းထင်းနေသော မြင်ကွင်းမှာ လူတိုင်း၏ စိတ်ထဲတွင် စွဲထင်သွားသည်။ လော့မျိုးနွယ်စုဝင်များမှာ တိတ်ဆိတ်သွားကြသည်။ မင်းသမီး ရွှယ်အာ မှာ အလွန်ပင် သန်မာလွန်းလှသည်။ လော့မျိုးနွယ်စုတွင်လည်း သူမကို ယှဉ်နိုင်မည့် လော့ဟော်အာ ရှိနေသေးသည်မှာ ကံကောင်းပေစွ။

အခန်း ၉၁၁ - မြေခွေးသွေးစွန်းသော ဝတ်ရုံ

စတုတ္ထမြောက် ရှေးဟောင်းဖေးနဂါး ကို သတ်ဖြတ်ပြီးနောက် ပဉ္စမမြောက် ဖေးနဂါးနှင့် တိုက်ပွဲမစတင်မီ နှစ်မိနစ်မျှ အနားယူချိန် ရရှိသည်။ ထိုအချိန်သည် တိုတောင်းလှသော်လည်း သွေးစပ်အလွန်အစွမ်းထက်သော မင်းသမီး ရွှယ်အာ အတွက်မူ ယွမ်ချီ စွမ်းအင်အချို့ကို သိသာထင်ရှားစွာ ပြန်လည်ဖြည့်တင်းရန် လုံလောက်သည်။

မင်းသမီး ရွှယ်အာ သည် ပဉ္စမမြောက် ဖေးနဂါးကို စိန်ခေါ်ရန် ပြင်ဆင်နေသည်။

ဤအချက်နှင့် ပတ်သက်၍ မြေခွေးဖြူမျိုးနွယ်စုဝင်များမှာ စိတ်လှုပ်ရှားနေကြသည်။ သို့သော် ထိုအချိန်တွင်ပင် မင်းသမီး ရွှယ်အာ သည် ပဉ္စမမြောက် ဖေးနဂါးကို သတ်ဖြတ်နိုင်လိမ့်မည်ဟု သူတို့ကိုယ်တိုင်ပင် အကောင်းမြင်မနေကြပေ။

သူမသည် စတုတ္ထမြောက် ဖေးနဂါးကို သတ်ဖြတ်ရာတွင် အလွယ်တကူ မဟုတ်ခဲ့ချေ။ စတုတ္ထမြောက်ထက် ပိုမိုသန်မာသော ပဉ္စမမြောက် ဖေးနဂါးကို အနိုင်ယူရန်မှာမူ ခက်ခဲလှသည်။

အချိန်များ ကုန်ဆုံးသွားပြီး မင်းသမီး ရွှယ်အာ သည် တရားမှတ်ကာ အသက်ရှူခြင်းကို ထိန်းညှိနေသည်။ ထိုအချိန်တွင် ဖေးကျောက်တုံး၏ အပြင်ဘက်၌ လော့မျိုးနွယ်စုဝင်များသည် ယီယွင်နှင့် ကိုးမြီးမြေခွေးဖြူတို့၏ တိုက်ပွဲကို စိုးရိမ်တကြီး ကြည့်ရှုနေကြသည်။

ကိုးမြီးနယ်မြေအတွင်းတွင် ယီယွင်သည် ကိုးမြီးမြေခွေးဖြူ၏ ခန္ဓာကိုယ်ကို တိုက်ခိုက်ရန် နည်းလမ်းမရှိပေ။ သူသည် အကာအကွယ်သာ ပေးနိုင်ပြီး နယ်မြေ၏ နယ်နိမိတ်များကို အချည်းနှီး တိုက်ခိုက်နေရသကဲ့သို့ ဖြစ်နေသည်။

နှင်းနယ်မြေတစ်ထောင် ဓားပျံများသည် စက္ကန့်ပိုင်းအတွင်း တိုက်ခိုက်မှု အကြိမ်ထောင်ချီ ပြုလုပ်သော်လည်း တိုက်ခိုက်မှုတိုင်းမှာ နယ်မြေနယ်နိမိတ်များကြောင့် ပြန်လည်ရိုက်ထုတ်ခံနေရသည်။

“သူ မဖောက်ထွက်နိုင်သေးဘူး”

“အစ်ကိုယီယွင်ရဲ့ ယွမ်ချီတွေ တဖြည်းဖြည်း လျော့ကျလာပြီ”

ဖေးကျောက်တုံးမှ ပြသနေသည့် ရုပ်ပုံသည် လူတိုင်းကို ကိုယ်တိုင်တိုက်ပွဲဝင်နေရသည့်အလား ခံစားရစေသည်။ ယီယွင်၏ ယွမ်ချီမှာ အမြင့်ဆုံးအဆင့်၏ ၈၀ ရာခိုင်နှုန်းသာ ကျန်ရှိတော့ကြောင်း အားလုံးက ရှင်းလင်းစွာ ခံစားသိရှိနေကြသည်။

ယွမ်ချီ ပြင်းအားမှာ အကောင်းဆုံးအခြေအနေအောက်သို့ ကျဆင်းသွားသည်နှင့် တိုက်ခိုက်မှုဖြစ်စေ၊ ခုခံမှုဖြစ်စေ ပိုမိုပင်ပန်းလာမည်ဖြစ်သည်။ ထို့ကြောင့် ယွမ်ချီသည် ပိုမိုမြန်ဆန်စွာ ကုန်ဆုံးသွားပြီး အဆိုးသံသရာထဲသို့ ကျရောက်သွားမည်ဖြစ်သည်။ ဤအတိုင်းသာ ဆက်သွားပါက ရှုံးနိမ့်ခြင်းမှာ အချိန်သာ လိုတော့သည်။

ထိုအချိန်တွင်…

“ဖြုန်း”

သတ္တုကွဲအက်သံနှင့်အတူ ယီယွင်၏ ဓားပျံတစ်စင်းမှာ ကိုးမြီးနယ်မြေအတွင်း ပေါက်ကွဲသွားသည်။

“သူ့ဓား ကွဲသွားတာလား”

လော့မျိုးနွယ်စုဝင်များသည် ရုပ်ပုံကို ငေးကြည့်နေကြသည်။ သူတို့သည် နှင်းနယ်မြေတစ်ထောင် ဓားပျံအကြောင်း နားမလည်ကြသော်လည်း ယီယွင်သည် ဓားပျံအစီအရင်တစ်မျိုးကို အသုံးပြုနေကြောင်း သိကြသည်။ ဓားပျံတစ်စင်း လျော့သွားသည်နှင့် ဓားပျံအစီအရင်မှာ မပြည့်စုံတော့ဘဲ အားနည်းသွားမည်ဖြစ်သည်။

ယီယွင်သည် ဓားပျံ ၉၉၉ စင်းကို ထိန်းချုပ်ထားရပြီး ယွမ်ချီကို အပိုင်းပိုင်း ခွဲဝေထားရခြင်း၊ ထို့ပြင် ပင်ပန်းနွမ်းနယ်မှု လျော့ကျလာခြင်းတို့ကြောင့် ဓားပျံတစ်စင်း ပေါက်ကွဲသွားခြင်းဖြစ်သည်။

လူများ ထိုသို့ တွေးတောနေစဉ်မှာပင် နောက်ထပ် ဓားပျံတစ်စင်း ကွဲအက်သွားသည့် အသံကို ကြားလိုက်ရပြန်သည်။ ဓားပျံတိုင်း ကွဲအက်သွားတိုင်း ယီယွင်၏ တိုက်စစ်မှာ အားနည်းသွားသည်။

“ဒီကောင်စုတ် နောက်ဆုံးတော့ မခံနိုင်တော့ဘူး။ ငါ့ကို တကယ်ပဲ ကြောက်လန့်သွားအောင် လုပ်တာပဲ”

ဟု ပိုင်ယွီချင်းက စိတ်သက်သာရာရစွာ တွေးလိုက်သည်။

သူသည် ယီယွင် ကိုးမြီးမြေခွေးဖြူကို အနိုင်ယူနိုင်သွားမည်ကို အမှန်တကယ်ပင် ကြောက်ရွံ့ခဲ့ခြင်းဖြစ်သည်။ အကယ်၍ ထိုသို့ဖြစ်ခဲ့ပါက ယီယွင်သည် မင်းသမီး ရွှယ်အာ နှင့် တန်းတူ ဖြစ်သွားပေလိမ့်မည်။ မင်းသမီး ရွှယ်အာ ကိုယ်တိုင် ပဉ္စမမြောက် ဖေးနဂါးကို သတ်နိုင်မည်ဟု မသေချာသည့်အတွက် ယီယွင်သာ အနိုင်ရသွားပါက သူမအတွက် ပိုမိုခက်ခဲသွားလိမ့်မည်။

ထိုသို့ တွေးလိုက်ပြီး ပိုင်ယွီချင်း စိတ်သက်သာရာရသွားသည်။ သူက ယပ်တောင်ကို ခတ်ရင်း “ယီယွင်ကလည်း မဆိုးပါဘူး။ ကံမကောင်းတာက သူ ကိုးမြီးမြေခွေးဖြူကို စိန်ခေါ်နေမိတာပဲ။ ငါတို့ မြေခွေးဖြူမျိုးနွယ်စုရဲ့ ဘိုးဘေး ဖြစ်တဲ့အတွက် သူ့ရဲ့ စိတ်ဝိညာဉ် အငွေ့အသက်တစ်စကတောင် သူ စိတ်ကူးယဉ်နိုင်တာထက် ပိုသန်မာတယ်။ သူ ဘယ်လိုလုပ်ပြီး ရင်ဆိုင်နိုင်မှာလဲ” ဟု ပြောလိုက်သည်။

ပိုင်ယွီချင်း၏ စကားကြောင့် လော့မျိုးနွယ်စုဝင်များ မျက်မှောင်ကြုတ်သွားကြသော်လည်း ပြန်မပြောခဲ့ကြပေ။ ယီယွင်၏ ဓားပျံများသည် နယ်မြေအတွင်းတွင် အဆက်မပြတ် ကွဲအက်နေသည်မှာ အမှန်ပင်။ အချိန်တိုအတွင်းမှာပင် ဆယ်စင်းကျော် ကွဲအက်သွားခဲ့ပြီဖြစ်သည်။

လော့မျိုးနွယ်စုဝင်များ၏ ရင်ထဲတွင် စိတ်ပျက်အားငယ်သွားကြသည်။ မင်းသမီး ရွှယ်အာ ကို ပြန်ကြည့်လိုက်ရာ နှစ်မိနစ်ဆိုသည်မှာ သူမအတွက် ယွမ်ချီအများအပြား ပြန်လည်ဖြည့်တင်းရန် လုံလောက်သည်။ သူမသည် ပဉ္စမမြောက် ဖေးနဂါးကို စိန်ခေါ်တော့မည်ဖြစ်သည်။ ကွာဟချက်မှာ ပိုမိုကြီးမားလာနေသည်။

သို့သော် ထိုသို့ဖြစ်လင့်ကစား ယီယွင်သည် မိမိကိုယ်ကို ဂုဏ်ယူနိုင်ပါသည်။ သူ၏ နောက်ခံနှင့် အသက်အရွယ်အရ ယခုအထိ အောင်မြင်မှုများ ရရှိခဲ့ခြင်းမှာ အံ့ဖွယ်တစ်ခုပင်ဖြစ်သည်။

ကိုးမြီးနယ်မြေအတွင်းတွင် ယီယွင်၏ နဖူးပေါ်မှ ချွေးစက်များ စီးကျနေပြီး သူသည် မောဟိုက်နေသည်။ မိစ္ဆာစက်ဝန်းတစ်သောင်း ၏ နိယာမများကို လက်တွေ့တိုက်ပွဲတွင် အသုံးပြုရာတွင် သူ၏ စွမ်းအားကို အကန့်အသတ်ဖြစ်စေသည်မှာ သူ၏ ကျင့်စဉ်အဆင့် အားနည်းခြင်းပင်ဖြစ်သည်။

ယီယွင်၏ ယွမ်ချီသည် မိစ္ဆာစက်ဝန်းတစ်သောင်းကို အသုံးပြုရန် လုံလောက်မှု မရှိပေ။ နိယာမ အပိုင်းအစများကိုသာ အသုံးပြုနေလျှင်ပင် သူ၏ စွမ်းအင်များ လျင်မြန်စွာ ကုန်ဆုံးနေသည်။

“အနည်းဆုံး ပဉ္စမအဆင့်ထိ ရောက်ဖို့ ငါ့ရဲ့ ပင်ပန်းနွမ်းနယ်မှုကို ၇၀ ရာခိုင်နှုန်းထိ ထိန်းထားရမယ်။ အဲ့ဒီကျမှပဲ အနိုင်ရဖို့ အနည်းဆုံး အခွင့်အရေး ရှိလိမ့်မယ်။ အခုလောလောဆယ်တော့ ဒီကိုးမြီးနယ်မြေကို ဖောက်ထွက်ဖို့ ငါ့စွမ်းအင်ရဲ့ ၁၀ ရာခိုင်နှုန်းကိုပဲ သုံးနိုင်တော့မယ်”

ယီယွင်သည် မဟာဧကရီနှလုံးသားကျမ်း ကို အစွမ်းကုန် အသုံးပြုလိုက်သည်။

မိစ္ဆာစက်ဝန်းတစ်သောင်းမှာ တိုက်ခိုက်ရေးနည်းလမ်းသာဖြစ်သည်။ စစ်သည်တစ်ဦး၏ ကျင့်စဉ်အဆင့်နှင့် ယွမ်ချီအရန်ကို အမှန်တကယ် ထိခိုက်စေသည်မှာ သူ၏ ကျင့်စဉ်ပင်ဖြစ်သည်။

တစ်ချိန်က မဟာဧကရီနှလုံးသားကျမ်း မှာ ယီယွင်ပိုင်ဆိုင်သည့် ထိပ်တန်းကျင့်စဉ်ဖြစ်သည်။ သို့သော် ယခု မိစ္ဆာစက်ဝန်းတစ်သောင်းနှင့်ဆိုလျှင် မဟာဧကရီနှလုံးသားကျမ်း မှာ မလုံလောက်တော့ပေ။ ၎င်းသည် ယီယွင်၏ ယွမ်ချီ အရန်အားနည်းခြင်းကို ဖြစ်စေသည်။

“ဓားပျံ နှစ်ဆယ်ကျော် ကွဲသွားပြီ။ ဒီကောင်စုတ် တကယ်ကို အဆုံးထိ ရောက်နေပြီ”

အကြီးအကဲ တွမ့်မု က သက်ပြင်းချရင်း ပြောလိုက်သည်။

ယီယွင်၏ စွမ်းဆောင်ရည်မှာ အံ့အားသင့်စရာကောင်းကြောင်း သိထားသော်လည်း ယီယွင် ပိုမိုကြီးမားသော အံ့ဖွယ်တစ်ခုကို ဖန်တီးပေးလိမ့်မည်ဟု သူ မသိစိတ်က မျှော်လင့်နေမိသည်။

“ကွဲအက်တာတွေ များလှပြီ၊ ဒါပေမဲ့ ထူးဆန်းတယ်လို့ မထင်ဘူးလား ဒီကောင်စုတ်လေးက ဒီအချိန်မှာ တမင်တကာ စွမ်းအင်ကို ထိန်းထားသလိုပဲ” ဟု အကြီးအကဲ ရှီ က ရုတ်တရက် ပြောလိုက်သည်။

အကြီးအကဲ တွမ့်မု အံ့အားသင့်သွားပြီး ရုပ်ပုံကို ကြည့်လိုက်သည်။ ယီယွင်သည် အစွမ်းကုန် တိုက်ခိုက်နေပုံမရဘဲ တစ်စုံတစ်ခုကို ချန်ထားသကဲ့သို့ သူ သတိပြုမိသွားသည်။

“ဒီကောင်စုတ်လေး ဘာလုပ်နေတာလဲ အခြေအနေ အရေးတကြီးဖြစ်နေတာကို သူ မသိဘူးလား ဘာကြောင့် သူ အစွမ်းကုန် မသုံးတာလဲ ကိုးမြီးနယ်မြေကို မဖောက်ထွက်နိုင်ရင်တောင် အစွမ်းကုန် တိုက်ခိုက်မှသာ ရလဒ်တွေက ပိုကောင်းလာမှာလေ”

အကြီးအကဲ တွမ့်မု မှာ နားမလည်နိုင် ဖြစ်နေသည်။ ဖေးကျောက်တုံး၏ အောင်မြင်မှုများအပေါ် မူတည်၍ ဆုလာဘ်များ ချီးမြှင့်သည်။ ရလဒ် ပိုကောင်းလေ ဆုလာဘ် ပိုကောင်းလေဖြစ်သည်။

“ယီယွင်က ခက်ခဲတဲ့ အခြေအနေမှာ တကယ်ကို ဇွဲရှိရှိ ကြိုးစားနေတာပါ။ သူ နည်းလမ်းတိုင်းကို သုံးနေပေမဲ့ ကွဲသွားတဲ့ ဓားပျံတွေက စိတ်ဝင်စားဖို့ကောင်းတယ်။ ကွဲသွားတဲ့ ဓားပျံ အနှစ်နှစ်ဆယ်လောက်က တစ်ခုနဲ့တစ်ခု ဆက်စပ်ကြည့်လိုက်ရင် ငါ့ကို ထူးခြားတဲ့ ခံစားချက်တစ်ခု ပေးတယ်…”

“အော်”

အကြီးအကဲ တွမ့်မု မျက်ခုံးပင့်လိုက်သည်။

“အစ်ကိုကြီး၊ ဘာကို ဆိုလိုတာလဲ ယီယွင် နယ်မြေကို ဖောက်ထွက်နိုင်မယ့် နည်းလမ်းကို ရှာတွေ့သွားပြီလို့ ပြောချင်တာလား”

အကြီးအကဲ ရှီ က ပယ်ချလိုက်သည်။

“မဖြစ်နိုင်ပါဘူး။ အဲ့ဒါ ငါသာဆိုရင်တောင် ကောင်းကင်အဆင့် ကျင့်စဉ်ရှိရင်တောင် ကိုးမြီးနယ်မြေကို ဖောက်ထွက်ဖို့ နည်းလမ်း တစ်ရာလောက် ရှိတယ်။ ဒါပေမဲ့ ယီယွင်က အဲ့ဒီနည်းလမ်း တစ်ခုမှ မသုံးဘူး။ ငါ့ရဲ့ နည်းလမ်းတွေထက် သာလွန်တဲ့ နည်းလမ်းကို သူ ရှာတွေ့နိုင်မယ်လို့ မထင်ဘူး”

“ဒါပေမဲ့ သူ ဖြေရှင်းချက် မရှာတွေ့သေးပေမဲ့ ယီယွင် ကြိုးစားနေဆဲပါပဲ။ သူ ကြိုးစားနေပုံက ငါ့ကို ထူးခြားတယ်လို့ ခံစားရစေတယ်။ တစ်စုံတစ်ခု နက်နဲတယ်လို့ ပြောရရင်တော့ မဖြစ်နိုင်ပါဘူး”

အကြီးအကဲ ရှီ ခေါင်းခါလိုက်သည်။ သူသည် နှစ်ပေါင်း သိန်းချီ နေထိုင်ခဲ့သူဖြစ်သည်။ သူ၏ ကျင့်စဉ်အဆင့်မှာ အားကောင်းပြီး အတွေ့အကြုံလည်း ရှိသည်။ သူသည် လူငယ်တစ်ဦး၏ နိယာမများနှင့် နည်းလမ်းများ၏ နက်နဲမှုကို ပထမဆုံး မြင်ရလျှင်ပင် နားလည်နိုင်သည်။

သူသည် ယီယွင်၏ နည်းလမ်းများတွင် နက်နဲမှုကို နားမလည်နိုင်ခြင်းမှာ ၎င်းတွင် နက်နဲမှု မရှိခြင်းကြောင့်သာ ဖြစ်လိမ့်မည်။

အကြီးအကဲ ရှီ ထိုသို့ ပြောလိုက်သည့်အချိန်တွင်ပင်

ပေါင်.... ပေါင်.... ပေါင်.... ပေါင်.... ပေါင်

ဟူသော အသံများ ကြားလိုက်ရသည်။ ဓားပျံများစွာ ထိုအချိန်တွင် ကွဲအက်သွားသည်။ ယခင်က ကွဲသွားသည်များနှင့် ပေါင်းလျှင် ဓားပျံပေါင်း တစ်ရာ ကွဲအက်သွားပြီဖြစ်သည်။

ဓားပျံတစ်စင်းစီ ကွဲအက်သွားပြီးနောက် ဓားပျံအတွင်းသို့ ထည့်သွင်းထားသော နိယာမ အပိုင်းအစများမှာ ရွှေရောင် သင်္ကေတများအဖြစ် ပြောင်းလဲသွားပြီး ကိုးမြီးနယ်မြေ၏ နယ်နိမိတ်တွင် ကပ်ငြိသွားသည်ကို မည်သူမျှ သတိမထားမိခဲ့ကြပေ။

ဓားပျံတစ်ရာသည် ရွှေရောင် သင်္ကေတ တစ်ရာကို ချန်ထားခဲ့သည်။ သင်္ကေတများ ဆက်စပ်သွားသောအခါ ဧရာမစက်ဝန်းတစ်ခုကို ပုံဖော်သကဲ့သို့ ဖြစ်လာသည်။

ထိုအချိန်တွင် ယီယွင်၏ ခန္ဓာကိုယ်သည် ရုတ်တရက် ရွေ့လျားသွားပြီး ထိုစက်ဝန်း၏ ဗဟိုချက်ဆီသို့ ရောက်ရှိသွားသည်။ သူသည် ကိုးမြီးမြေခွေးဖြူကို ကျောပေးကာ အာကာသ နယ်နိမိတ်ကို ရင်ဆိုင်လိုက်သည်။

သူသည် အရာအားလုံးကို လျစ်လျူရှုပြီး ဤနေရာသို့ ပျံသန်းလာခဲ့သောကြောင့် ကိုးမြီးမြေခွေးဖြူ၏ တိုက်ခိုက်မှုကို အချိန်မီ မကာကွယ်နိုင်ခဲ့ပေ။ မြေခွေးခြေသည်းမှာ ယီယွင်၏ နောက်မှ လိုက်ပါလာသည်။ ယီယွင်မှာ အပိုင်းပိုင်း ပြတ်ထွက်သွားတော့မည့် အနေအထားဖြစ်သည်။

“အစ်ကိုယီယွင်”

လူများ အော်ဟစ်လိုက်ကြသည်။ ယီယွင်သည် ကိုးမြီးမြေခွေးဖြူ သူ့ကို တိုက်ခိုက်နေသည်ကို မသိခြင်းနှင့် တူနေသည်။

အကြီးအကဲ တွမ့်မု နှင့် အကြီးအကဲ ရှီ တို့သည် သူတို့၏ ယွမ်ချီကို လည်ပတ်ရင်း တုန်လှုပ်သွားကြသည်။ ယီယွင်ကို အချိန်မီ ကယ်တင်ရန် သူတို့ ရည်ရွယ်ထားကြသည်။

သို့သော် ထိုအချိန်တွင် ယီယွင်သည် ကိုးမြီးမြေခွေးဖြူကို လျစ်လျူရှုလိုက်သည်။ သူသည် လက်ထဲတွင် ဓားကိုကိုင်ကာ စက်ဝန်း၏ ဗဟိုချက်ကို ထိုးစိုက်လိုက်သည်။

“ဖောက်ထွက်စမ်း”

“ဘုန်း”

ရွှေရောင် သင်္ကေတ တစ်ရာသည် တစ်ပြိုင်နက် ပေါက်ကွဲသွားသည်။ ကိုးမြီးနယ်မြေ၏ တစ်ခုလုံးသော အာကာသ နယ်နိမိတ်မှာ ဤပြင်းထန်သော ပေါက်ကွဲမှုကြောင့် ကြက်ဥခွံကဲ့သို့ ကွဲအက်သွားသည်။

ကိုးမြီးနယ်မြေ၏ အလယ်တွင် ရှိနေသည့် ကိုးမြီးမြေခွေးဖြူမှာမူ နယ်မြေနှင့် ပေါင်းစပ်ပြီးသား ဖြစ်သည်။ ၎င်းသည် နယ်မြေဖြစ်ပြီး နယ်မြေမှာလည်း ၎င်းပင်ဖြစ်သည်။

နယ်မြေ ကွဲအက်သွားသည့်အချိန်တွင် ကိုးမြီးမြေခွေးဖြူ၏ ခန္ဓာကိုယ်မှာလည်း အပိုင်းပိုင်း ကွဲအက်သွားသည်။ ၎င်း၏ ခန္ဓာကိုယ်မှာ အပိုင်းပိုင်း ပြတ်တောက်သွားပြီး သွေးများ ပန်းထွက်သွားကာ ကြောက်မက်ဖွယ် အော်ဟစ်သံကို ထွက်ပေါ်စေသည်။

သေစေနိုင်သော ခြေသည်းမှာ ယီယွင်၏ ကျောကို ထိခိုက်တော့မည့်အချိန်တွင် ပြာမှုန့်အဖြစ် ပြောင်းလဲသွားသည်။

လက်ထဲတွင် ဓားကိုကိုင်ကာ ယီယွင်၏ ကျောပြင်သည် ပြိုလဲနေသော ကိုးမြီးမြေခွေးဖြူကို ရင်ဆိုင်ထားသည်။ သူ၏ ခန္ဓာကိုယ်မှာ မြေခွေးသွေးများဖြင့် စိုရွှဲနေပြီး သွေးစွန်းနေသော အဝတ်အစားများ ဖြစ်နေသည်။

ဤရုတ်တရက် ပြောင်းလဲသွားသော မြင်ကွင်းမှာ လူတိုင်း၏ မျှော်လင့်ချက်ကို ကျော်လွန်သွားသည်။ ယီယွင်သည် ရှုံးနိမ့်တော့မည့် အချိန်တွင်ပင် မြေခွေး၏ ခြေသည်းနှင့် ထိမှန်တော့မည့် အချိန်တွင် တစ်ခဏအတွင်း အရာအားလုံး ပြောင်းပြန်လှန်သွားသည်။ ယီယွင်၏ ဓားမှာ ကိုးမြီးနယ်မြေကို ဖောက်ထွက်သွားပြီး ကိုးမြီးမြေခွေးဖြူမှာလည်း သေဆုံးသွားခဲ့သည်။

အကြီးအကဲ တွမ့်မု နှင့် အကြီးအကဲ ရှီ တို့သည် ယီယွင်ကို သူတို့၏ ပုံမှန် အေးစက်သော မျက်နှာများအောက်တွင် မယုံနိုင်စရာ အံ့အားသင့်မှုများဖြင့် ငေးကြည့်နေကြသည်။

လော့မျိုးနွယ်စုဝင်များနှင့် မြေခွေးဖြူ မျိုးနွယ်စုဝင်များမှာမူ အံ့အားသင့်ကာ ကြောင်တောင်တောင် ဖြစ်နေကြသည်။

ဘာတွေဖြစ်ပျက်သွားတာလဲ.......