အခန်း (၁၄၇၂-၁၄၇၄)

အခန်း ၁၄၇၂ မဝယ်တော့ပါ

ဖုန်းယွီသည် ဖီးမြို့ရှိ စက်မှုကုန်ထုတ်လုပ်ငန်းစု၏ ငွေကြေးအစီရင်ခံစာကို ကြည့်ရှုနေစဉ်အတွင်း လျူချွမ်းကျစ်ထံမှ ဖုန်းခေါ်ဆိုမှု ရောက်ရှိလာခဲ့သည်။

"မစ္စတာလျူ... ဘာကိစ္စရှိလို့လဲ” ဖုန်းယွီက ပေါ့ပေါ့ပါးပါးပင် မေးမြန်းလိုက်သည်။

ဤအချိန်တွင် ဖုန်းခေါ်ဆိုခြင်းမှာ သေချာပေါက် Lenovo Group သို့မဟုတ် Lenovo-Kingsoft တို့နှင့် ပတ်သက်သော ကိစ္စ ဖြစ်ပေလိမ့်မည်။ အကယ်၍ အခြားသော လုပ်ငန်းခွဲများ၏ ကိစ္စဆိုပါက လျူချွမ်းကျစ်နှင့်ကျုံးချင်းရှန်တို့ တိုင်ပင်လိုက်သည်နှင့် အခြေခံအားဖြင့် ဆုံးဖြတ်ပြီး ဖြစ်လိမ့်မည်။

"မန်နေဂျာဖုန်း... ခင်ဗျား မှတ်မိသေးလား၊ အဲဒီတုန်းက ကျွန်တော် IBMရဲ့ PC လုပ်ငန်းကို ဝယ်ယူဖို့ စိတ်ကူးရှိတယ်လို့ ပြောခဲ့တာလေ”

"မှတ်မိတာပေါ့၊ နောက်ပိုင်းမှာ သူတို့က မရောင်းဘူးလို့ ငြင်းလိုက်တာ မဟုတ်ဘူးလား။ ကျွန်တော်တို့တောင် ငွေသားနဲ့ ရှယ်ယာပေးပြီး ဝယ်ဖို့ စီစဉ်ထားတာတောင် သူတို့က လက်မခံခဲ့တာလေ၊ ဘာလဲ... ခင်ဗျား အခုထိ ဝယ်ချင်နေတုန်းလား”

IBMကို ဝယ်ယူလိုက်ပါက အလွန်ကောင်းမွန်သော နည်းပညာအချို့ကို ရရှိနိုင်မည်ဖြစ်သလို၊ Think အစရှိသော အမှတ်တံဆိပ်များကိုလည်း ရရှိနိုင်မည် ဖြစ်သည်။ ထို့ပြင် ၎င်းတို့၏ အရောင်းလမ်းကြောင်းများနှင့် စက်ရုံများကိုပါ ရရှိလိုက်ပါက Lenovo Group သည် ကမ္ဘာ့PC လုပ်ငန်းနယ်ပယ်တွင် ထုတ်လုပ်မှုနှင့် ရောင်းချမှု ပမာဏ ပထမနေရာသို့ ချက်ချင်း ရောက်ရှိသွားနိုင်မည်ဖြစ်ရာ၊ ဤသည်မှာ ယခင်ဘဝထက် ပိုမို စောစီးစွာ အောင်မြင်နိုင်မည် ဖြစ်သည်။

သို့သော် ဆိုးကျိုးများလည်း ရှိနေသည်။ ၎င်းမှာ IBM၏ လက်ရှိ PC လုပ်ငန်းတွင် အမြတ်အစွန်းမှာ များစွာ မရှိသလို၊ ကြွေးမြီများလည်း အမြောက်အမြား ရှိနေခြင်းပင် ဖြစ်သည်။ ထို့ပြင် Lenovo Group က မဝယ်ယူမီတွင်၊ IBMဘက်က ၎င်းတို့၏ စုစုပေါင်း ကြွေးမြီအချိုးကို လျှော့ချရန်အတွက် PC လုပ်ငန်းဌာနအတွင်းသို့ ကြွေးမြီအချို့ကို တမင်လွှဲပြောင်းထည့်သွင်းပေးထားရန် အခွင့်အရေးကို အသုံးချသွားနိုင်ပေသည်။

IBM၏ လုပ်ငန်း အဓိက ဦးတည်ချက်မှာ Hardware မှ Softwareဘက်သို့ ပြောင်းလဲသွားခဲ့ပြီ ဖြစ်သည်။ ၎င်းတို့၏ PCဌာနကို ရောင်းထုတ်လိုက်သော်လည်း Hardware လုပ်ငန်းတစ်ခုလုံးကို ရောင်းထုတ်လိုက်ခြင်း မဟုတ်ပါချေ။ နောက်ပိုင်းတွင် ၎င်းတို့သည် PC ထုတ်လုပ်သူမှ ဒီဇိုင်းထုတ်သူအဖြစ် ပြောင်းလဲသွားမည် ဖြစ်သည်။ ဤသို့ဖြင့် ကုန်ကျစရိတ်များကို များစွာ လျှော့ချနိုင်မည်ဖြစ်ပြီး၊ PC ဈေးနှုန်း ကျဆင်းမှုကြောင့် မိမိတို့အပေါ် သက်ရောက်မှု ရှိလာမည်ကိုလည်း စိုးရိမ်စရာ မလိုတော့ပါချေ။

လက်ရှိတွင် PC ရောင်းဈေး အမြင့်ဆုံးမှာ IBMနှင့် Appleတို့ ဖြစ်ကြသည်။ အကယ်၍ PC ဈေးနှုန်းများ ထပ်မံကျဆင်းလာပါက ၎င်းတို့၏ အမြတ်အစွန်းများကို ပြင်းထန်စွာ ထိခိုက်စေမည်ဖြစ်ပြီး၊ အခြေအနေ မကောင်းပါက အရှုံးပေါ်သည်အထိ ဖြစ်သွားနိုင်သည်။

"မန်နေဂျာဖုန်း... ကျွန်တော် တကယ်ပဲ ဝယ်ယူချင်နေတာပါ၊ ပြီးတော့ ဒီတစ်ခါမှာတော့ သူတို့ဘက်ကပဲ ကျွန်တော့်ကို အရင်ဆက်သွယ်လာတာပါ၊ စိတ်ရင်းအမှန် အပြည့်အဝ ရှိနေပုံရတယ်။ ပြီးတော့ အဓိက အခွင့်အရေးကလည်း ကျွန်တော်တို့ လက်ထဲမှာ ရှိနေတာမို့၊ တစ်ချက်လောက် ဆွေးနွေးကြည့်တာ ဘာမှ မဖြစ်နိုင်ပါဘူး"

လျူချွမ်းကျစ်သည် IBM၏ PC လုပ်ငန်းအပေါ် အမြဲတမ်း စိတ်အားထက်သန်နေခဲ့သူ ဖြစ်ပြီး၊ ယခုအခါ အခွင့်အရေး ပေါ်လာပြီ ဖြစ်သဖြင့် လက်လွှတ်ရရန် အလွန်ပင် ခက်ခဲနေခဲ့သည်။ သူ၏ ထိုကာလတွင် IBMမှာ ကမ္ဘာ့PC လုပ်ငန်း၏ ခေါင်းဆောင် ဖြစ်ခဲ့သလို၊ IT လုပ်ငန်းနယ်ပယ် တစ်ခုလုံး၏ ခေါင်းဆောင်လည်း ဖြစ်ခဲ့သည်။

IBMကို ဝယ်ယူနိုင်မည်ဆိုပါက လုပ်ငန်းတစ်ခုတည်း ဖြစ်စေကာမူ အလွန်ပင် ဂုဏ်ယူစရာ ကောင်းလှပေသည်။

ဖုန်းယွီက သတိပေးလိုက်သည်။ - "မစ္စတာလျူ... ခင်ဗျား အရင်က IBMကို ကမ္ဘာ့PC လုပ်ငန်းရဲ့ ခေါင်းဆောင်လို့ အမြဲထင်မှတ်နေခဲ့တာ မဟုတ်လား။ သူတို့ရဲ့ လုပ်ငန်းကို ဝယ်ယူလိုက်ရင် ငါတို့ အောင်မြင်သွားပြီ၊ အခွင့်အရေး ရသွားပြီလို့ ခံစားနေရတာ မဟုတ်လား”

"မစ္စတာလျူ... ခင်ဗျား IBMရဲ့ PC လုပ်ငန်းကို ဝယ်ယူတာ မလုပ်သင့်ဘူးလို့ မပြောပါဘူး၊ ဒါပေမဲ့ ကျွန်တော် သတိပေးချင်တာက IBMရဲ့ PC လုပ်ငန်းဟာ အခု ခေါင်းဆောင် မဟုတ်တော့ပါဘူး၊ ငါတို့ထက်တောင် အောက်ရောက်နေပါပြီ။ သူတို့ရဲ့ ထုတ်ကုန် ဒီဇိုင်းတွေက ခေတ်နောက်ကျနေသလို၊ မူပိုင်ခွင့်အချို့ကို ဖက်တွယ်ထားပေမဲ့ လိုင်စင် ပေးမချထားသလို တခြားသူတွေကိုလည်း မတားဆီးနိုင်ပါဘူး"

"သူတို့ရဲ့ PC လုပ်ငန်းက ကျဆင်းနေတာကို ခင်ဗျား ရှင်းရှင်းလင်းလင်း မြင်အောင် ကြည့်ပါ။ IBMမှာ အော်ဒါတွေ အများကြီး ရှိနေသေးတယ်ဆိုပြီး ငါတို့ လက်ခံလိုက်ရင် အမြတ်ရမယ်လို့ မထင်ပါနဲ့။ စဉ်းစားကြည့်ပါဦး၊ IBMရဲ့ အော်ဒါအများစုဟာ အမေရိကန် အစိုးရနဲ့ ကုမ္ပဏီကြီးတွေရဲ့ အော်ဒါတွေပါ။ ကျွန်တော်တို့ Lenovo က ကိုယ်ပိုင် ကွန်ပျူတာတွေ ထုတ်လုပ်လိုက်တဲ့ အချိန်ကစပြီး၊ ကျွန်တော်တို့ အစိုးရက IBMကွန်ပျူတာတွေကို ဆက်ပြီး ဝယ်ယူသေးလား”

"ကွန်ပျူတာမှာ နောက်ပေါက်တစ်ခု ဖောက်ပြီး စောင့်ကြည့်ဖို့နဲ့ သတင်းအချက်အလက် ခိုးယူဖို့ ဆိုတာ ဖြစ်နိုင်တာပဲ မဟုတ်လား။ ကျွန်တော်တို့ နိုင်ငံက ဘာကြောင့် Lenovoကို ထူထောင်ရတာလဲ၊ ကွန်ပျူတာ လုံခြုံရေးအတွက် မဟုတ်ဘူးလား။ ဒီအချက်ကို အမေရိကန် ဘက်က မစဉ်းစားတော့ဘူးလို့ ခင်ဗျား ထင်သလား။ IBMရဲ့ PC လုပ်ငန်း ငါတို့ လက်ထဲ ရောက်လာတဲ့အခါ၊ အဲဒီ အစိုးရတွေက ငါတို့ဆီကို အော်ဒါတွေ ဆက်ပေးမယ်လို့ ထင်သလား”

"ငါတို့ ဝယ်ယူလိုက်ရင် အော်ဒါတွေက သေချာပေါက် အကြီးအကျယ် လျော့ကျသွားမှာပါ။ IBMရဲ့ ထုတ်ကုန် ဒီဇိုင်း အယူအဆတွေက ငါတို့ Lenovo နဲ့ လုံးဝ ကွာခြားပါတယ်၊ သူတို့က ရုံးသုံးကို အဓိကထားပြီး ငါတို့က ဖျော်ဖြေရေးကို အဓိကထားတာပါ။ သူတို့ကို ဝယ်ယူလိုက်ရင် ရုံးသုံး ကွန်ပျူတာ နည်းပညာပိုင်းမှာ အနည်းငယ် အကူအညီ ရနိုင်ပေမဲ့ ဘယ်လောက်အထိ အသုံးဝင်မှာလဲ”

"အကောင်းဆုံး နည်းလမ်းကတော့ IBMဆီက ငါတို့ စိတ်ကြိုက် နည်းပညာတွေကိုပဲ ဝယ်ယူဖို့ပါ။ သူတို့ရဲ့ စက်ရုံတွေက ငါတို့ မလိုပါဘူး၊ သူတို့ရဲ့ အရောင်းလမ်းကြောင်းတွေလည်း အခု ငါတို့ မလိုတော့ပါဘူး၊ သူတို့ရဲ့ အမှတ်တံဆိပ်ဆိုတာကတော့ ပိုတောင်မလိုပါဘူး။ အမှတ်တံဆိပ် အများအပြားကို တစ်ပြိုင်တည်း လုပ်ကိုင်တာက အားသာချက် အနည်းငယ် ရှိပေမဲ့ အားနည်းချက်တွေက ပိုများပါတယ်"

"ကျွန်တော် ခင်ဗျားတို့ကို ပြောပြဖူးတဲ့ General Motors Company အကြောင်း မှတ်မိလား။ သူတို့မှာ အမှတ်တံဆိပ်တွေ အများကြီး ရှိပေမဲ့၊ ကြော်ငြာပိုင်းမှာ အဓိက ဦးတည်ချက် မရှိသလို အမှတ်တံဆိပ်တွေကြားမှာလည်း ချိတ်ဆက်မှု မရှိခဲ့ပါဘူး၊ ဒါကြောင့် ရောင်းအားနဲ့ အမြတ်အစွန်းတွေ ကျဆင်းပြီး ဂျပန်၊ ဥရောပ ကုမ္ပဏီတွေကို ဈေးကွက် လုယူခံလိုက်ရတာပါ"

"ကျွန်တော်တို့က အခုထုတ်ကုန်စွမ်းဆောင်ရည်အလိုက် စီးရီး ခွဲပြီး သတ်မှတ်ထားတာက အသုံးပြုသူ အားလုံးအတွက် လုံလောက်နေပါပြီ။ နည်းပညာအသစ်တွေကို ဝယ်ပြီး ထုတ်ကုန်ကို အဆင့်မြှင့်တင်ပြီး မော်ဒယ်အသစ် ထွက်လိုက်ရုံပါပဲ၊ အမှတ်တံဆိပ်တွေ ထပ်တိုးဖို့ လုံးဝ မလိုပါဘူး။ အထူးသဖြင့် IBMက အမှတ်တံဆိပ်တစ်ခုလုံးကို ရောင်းမှာ မဟုတ်ဘဲ လိုင်စင်ပဲ ပေးမှာပါ"

"ငါတို့က ထုတ်ကုန် ရောင်းရင်းနဲ့ သူတို့ အမှတ်တံဆိပ်အတွက် ကြော်ငြာပေးသလို ဖြစ်နေမှာပေါ့၊ အဲဒီလိုဆိုရင် Lenovo က OEM စက်ရုံ ဖြစ်မသွားဘူးလား။ IBMက အရင်က IBMမဟုတ်တော့ပါဘူး၊ ငါတို့က ပိုင်ဆိုင်မှုပိုင်းမှာ သူတို့ထက် မသာလွန်သေးပေမဲ့ သြဇာအာဏာပိုင်းမှာ သူတို့နဲ့ မနိမ့်ကျတော့ပါဘူး"

"IBMရဲ့ ဒီPC လုပ်ငန်းက သူတို့ကို ဆွဲချနေတဲ့ ဝန်ထုပ်ဝန်ပိုးပဲ၊ ငါတို့က အဲဒါကို ရအောင် ယူလိုက်ရင် သူတို့ထက် ပိုမြန်မြန် ကျော်တက်နိုင်မှာပေါ့! ဒါကြောင့် ကျွန်တော့်ရဲ့ အကြံပေးချက်က IBMရဲ့ PC လုပ်ငန်းကို မဝယ်ဖို့ပါ၊ သူတို့ရဲ့ မူပိုင်ခွင့် နည်းပညာအချို့ကိုပဲ ဝယ်ယူဖို့ပါ။ အကယ်၍ ခင်ဗျားက မဖြစ်မနေ ဝယ်ချင်တယ်ဆိုရင်တောင် IBMကို Lenovo Group ရဲ့ ရှယ်ယာပေးဖို့ကိုတော့ ကျွန်တော် သဘောမတူပါဘူး၊ ကျွန်တော်တို့ရဲ့ အနာဂတ် တန်ဖိုးတက်လာမဲ့ အလားအလာက သူတို့ထက် ပိုများပါတယ်"

ဖုန်းယွီ၏ ဤစကားများအပြီးတွင် လျူချွမ်းကျစ် တစ်ယောက် ခဏမျှ မှင်တက်သွားခဲ့သည်။ ဟုတ်တယ်လေ၊ သူ ဘာလို့ IBMရဲ့ PC လုပ်ငန်းကိုပဲ အတင်းအကျပ် ဝယ်ချင်နေရတာလဲ။ ဤအထဲတွင် အရင်က ပိုင်ဆိုင်လိုခဲ့သော အိပ်မက်များကပဲ လွှမ်းမိုးနေသလား။ သို့သော် IBMရဲ့ PC လုပ်ငန်းဟာ Lenovoထက်တောင် အောက်ရောက်နေပြီ မဟုတ်ပါလား။

IBM၏ အဆင့်မြင့် နည်းပညာအချို့ကို စိတ်ဝင်စားပါက ဝယ်ယူနိုင်သည်၊ သို့မဟုတ် လိုင်စင်ရယူခြင်းက တစ်လုံးတည်း ဝယ်ယူခြင်းထက် ပို၍ တွက်ခြေကိုက်သည်။

အရင်က IBMတွင် အမေရိကန်၏ ကြီးမားလှသော ဈေးကွက် ရှိနေသေးသည်ဟု ထင်ခဲ့ရသော်လည်း၊ Lenovo ဝယ်ယူပြီးပါက ဖုန်းယွီပြောသကဲ့သို့ အစိုးရနှင့် ကုမ္ပဏီကြီးများ၏ အော်ဒါများ ပျောက်ကွယ်သွားနိုင်ခြေ ရှိနေသည်။

IBM၏ စက်ရုံများအတွက်မူ Lenovoအနေဖြင့် လုံးဝ စိတ်မဝင်စားပါချေ။ စက်ရုံဟောင်းများ၏ ထုတ်လုပ်မှု စွမ်းအားမှာ နိမ့်ကျသည့်အပြင် လုပ်အားခမှာလည်း မြင့်မားနေသည်။ Lenovo သည် ဘရာဇီးတွင် စက်ရုံ တည်ဆောက်ပြီးဖြစ်ရာ၊ နောင်တွင် အမေရိကဘက်သို့ ဘရာဇီးစက်ရုံမှသာ ထောက်ပံ့ပေးသွားမည် ဖြစ်သည်။

ဆိုလိုသည်မှာ IBM၏ အမြင်တွင် တန်ဖိုးရှိနေသော PC လုပ်ငန်းဌာနသည် Lenovo Group အတွက်မူ အသုံးမဝင်သော အရာ ဖြစ်နေသည်။ အကယ်၍ ဝယ်ယူလိုက်မည်ဆိုပါက Lenovo Group အား အာရုံလွှဲသွားစေရုံသာ ရှိမည်ဖြစ်ရာ အလွန်ပင် မတန်ပါချေ။

လျူချွမ်းကျစ်သည် ယခုအခါတွင် နားလည်သွားခဲ့ပြီ ဖြစ်သည်၊ IBMက ထိုစဉ်က မရောင်းခဲ့ခြင်းမှာ အမြတ်အစွန်း ကောင်းမွန်သည်ဟု ထင်မှတ်ထား၍ဖြစ်ပြီး၊ ယခု ရောင်းချရန် စဉ်းစားခြင်းမှာ အမြတ်အစွန်း နည်းပါးသွား၍ သို့မဟုတ် အရှုံးပေါ်တော့မည် ဖြစ်၍သာ ဖြစ်သည်။

IBMသည် Lenovo ကို ကူညီခြင်း မဟုတ်ဘဲ၊ လေးလံသော ဝန်ထုပ်ဝန်ပိုးတစ်ခုကို Lenovoထံသို့ လွှဲပြောင်းပေးခြင်းသာ ဖြစ်ပေသည်။

ဤအချက်ကို သဘောပေါက်သွားသောအခါ လျူချွမ်းကျစ် သည် IBMအား မည်သို့ ပြန်လည် တုံ့ပြန်ရမည်ကို သိရှိသွားလေတော့သည်။

IBM၏ PC လုပ်ငန်းဌာန တာဝန်ခံသည် လျူချွမ်းကျစ် ၏ ဖုန်းခေါ်ဆိုမှုကို လက်ခံရရှိချိန်တွင် နှုတ်ခမ်း၌ အပြုံးတစ်ခု ပေါ်ပေါက်လာခဲ့သည်။ PC လုပ်ငန်းကို ရောင်းထုတ်လိုက်ပြီးနောက်တွင် သူသည် ဆာဗာပိုင်းကို တာဝန်ယူရတော့မည်ဖြစ်ပြီး၊ ဤအောင်မြင်မှုအတွက် သူ၏လစာငွေကိုပင် တိုးမြှင့်ရရှိနိုင်ပေလိမ့်မည်။

သို့သော် ဖုန်းခေါ်ဆိုမှုအတွင်းမှ စကားသံကြောင့် သူ၏မျက်နှာအမူအရာမှာ ချက်ချင်းပင် ပြောင်းလဲသွားခဲ့ရသည်။

"မီလာ... ကျွန်တော်တို့ Lenovo Group အနေနဲ့ စေ့စပ်ညှိနှိုင်းမှုတွေ အပြီးမှာ IBMရဲ့ PC လုပ်ငန်းကို ဝယ်ယူတော့မှာ မဟုတ်ဘူးလို့ ဆုံးဖြတ်လိုက်ပါတယ်"

ဘာ… Lenovo က မဝယ်တော့ဘူးလား။

...

******

အခန်း ၁၄၇၃ ယခင်အချိန်များနှင့် မတူညီတော့သော ယခုအချိန်

IBMအုပ်စုသည် အစည်းအဝေးကို ချက်ချင်း ခေါ်ယူကျင်းပလိုက်ကြပြီး ၎င်းတို့၏ မူလအထင်တွင် Lenovoအုပ်စုသည် သူတို့၏ တစ်ကိုယ်ရည်သုံး ကွန်ပျူတာလုပ်ငန်းကို စိတ်ဝင်စားနေခဲ့သည်မှာ ကြာပြီဖြစ်ကာ ဝယ်ယူလိုကြောင်းကိုလည်း တစ်ကြိမ်မက ဖော်ပြခဲ့ဖူးသည်ဟု မှတ်ယူထားခဲ့ကြသည်။

သူတို့ဘက်မှ သဘောတူညီလိုက်သည့်အခါ Lenovoအုပ်စုအနေဖြင့် အလွန်တရာ ဝမ်းမြောက်ဝမ်းသာ ဖြစ်သွားသင့်ပေသည်။

အစပိုင်းတွင် လျူချွမ်းကျစ်၏ လေသံမှာ အလွန်တရာ ဝမ်းသာနေသည့်ဟန် ပေါက်နေသော်လည်း အချိန်တစ်နာရီပင် မပြည့်သေးမီ မည်သို့မည်ပုံဖြစ်၍ ကိစ္စရပ်များက ဤမျှကြီးမားစွာ ပြောင်းလဲသွားရသနည်း။

လျူချွမ်းကျစ်သည် Lenovoအုပ်စုတွင် အလွန်တရာ သြဇာကြီးမားလှသည် မဟုတ်ပါလော။ သူသည် အစုရှယ်ယာရှင်အသေးစားသာ ဖြစ်သော်ငြားလည်း ဥက္ကဋ္ဌဖြစ်သလို Taihua Holding၏ အမှုဆောင်အရာရှိချုပ်လည်း ဖြစ်ပေရာ သူသဘောတူထားသော ကိစ္စရပ်က အဘယ်ကြောင့် အောင်မြင်မှု မရနိုင်ရသနည်း။

သို့တည်းမဟုတ် အခြားသူတစ်ဦးဦးကများ လျူချွမ်းကျစ်၏ ဆုံးဖြတ်ချက်ကို လွှမ်းမိုးသွားလေသလော ထိုသူသည် လျူချွမ်းကျစ်အပေါ် အလွန်တရာ ကြီးမားသော လွှမ်းမိုးနိုင်စွမ်းရှိသူလည်း ဖြစ်ပေမည်။ သို့ဆိုလျှင် ထိုသူက မည်သူမည်ဝါဖြစ်ကြောင်းကို ခန့်မှန်းကြည့်ရန်ပင် မလိုတော့ချေ။

ဖုန်းယွီပင် ဖြစ်ရမည် ဖုန်းယွီတစ်ခုခု ပြောလိုက်သောကြောင့်သာ လျူချွမ်းကျစ်က ရုတ်တရက် စိတ်ပြောင်းသွားခြင်းဖြစ်ကြောင်း သေချာလှပေသည်။

တကယ်တမ်းတွင် ဖုန်းယွီ၏ ခန့်မှန်းချက်မှာ မမှားယွင်းခဲ့ပေ IBM၏ တစ်ကိုယ်ရည်သုံးကွန်ပျူတာလုပ်ငန်းတွင် အမှန်တကယ်ပင် ပြဿနာများ ပေါ်ပေါက်နေခဲ့သည်။ ၎င်းတို့၏ ထုတ်ကုန်များမှာ ဈေးနှုန်းနှင့် အရည်အသွေး မျှတမှုမရှိဘဲ အဆင့်မြင့် လက်တော့ပ်ကွန်ပျူတာများကိုသာ အဓိကထား၍ ထုတ်လုပ်နေခဲ့ခြင်းဖြစ်ကာ စားပွဲတင်ကွန်ပျူတာများ၏ ရောင်းအားမှာမူ အဆိုးရွားဆုံး ကျဆင်းနေခဲ့ပြီး ၎င်းတို့၏ ThinkCentre ခေါ် စားပွဲတင်ကွန်ပျူတာလုပ်ငန်းမှာ အစိုးရထံမှ အမှာစာများမှလွဲ၍ ဈေးကွက် လုံးဝနီးပါး ပျောက်ဆုံးနေပြီ ဖြစ်သည်။

၎င်းတို့၏ ThinkPad ခေါ် လက်တော့ပ်ကွန်ပျူတာလုပ်ငန်းမှာမူ အတော်အသင့် ကောင်းမွန်နေသေးပြီး အဆင့်မြင့် စီးပွားရေးသုံး လက်တော့ပ်များကို အဓိကထား ရောင်းချရာတွင် ၎င်းတို့နှင့် ယှဉ်ပြိုင်နိုင်သူ သိပ်မရှိလှပေ။

ဥပမာအားဖြင့် ၎င်းတို့သည် လက်ဗွေရာလော့ခ်စနစ်ကို အစောဆုံး မိတ်ဆက်နိုင်ခဲ့ပြီး လုံခြုံရေးအတွက် စကားဝှက်စနစ်များစွာလည်း ပါဝင်သောကြောင့် အဆိုပါအချက်များက အခြားသော တစ်ကိုယ်ရည်သုံးကွန်ပျူတာထုတ်လုပ်သူများထက် များစွာ သာလွန်နေခဲ့သည်။

သို့သော်ငြားလည်း ဤအချက်က ၎င်းတို့၏ တစ်ကိုယ်ရည်သုံးကွန်ပျူတာလုပ်ငန်း တစ်ခုလုံး ကျဆင်းနေပြီး မကြာမီ အရှုံးပေါ်တော့မည့် အခြေအနေကိုမူ ဖုံးကွယ်မထားနိုင်ခဲ့ပေ။ အကယ်၍ ၎င်းတို့သာ စားပွဲတင်ကွန်ပျူတာလုပ်ငန်းကို အချိန်မီ လျှော့ချမပစ်ခဲ့ပါက ယခုအချိန်တွင် အရှုံးပေါ်နေလောက်ပြီ ဖြစ်သည်။

သို့သော် စားပွဲတင်ကွန်ပျူတာလုပ်ငန်း မရှိတော့သည့်နောက်တွင် ၎င်းတို့၏ ဝန်ထမ်းအရေအတွက်မှာ အလွန်တရာ များပြားနေခဲ့ရာ အရှုံးမပေါ်စေရန် ဆက်လက်ထိန်းသိမ်းထားလိုပါက အတည့်မတ်ဆုံးသော နည်းလမ်းမှာ ဝန်ထမ်းလျှော့ချရေးပင် ဖြစ်သည်။

ဝန်ထမ်းလျှော့ချခြင်းသည် စီးပွားရေးလုပ်ငန်းတစ်ခုအတွက် အလွန်တရာ ဆိုးရွားသော သက်ရောက်မှုများ ရှိစေသည်။ ဝန်ထမ်းများ၏ လုပ်ငန်းခွင် စိတ်ခံစားမှုနှင့် လုပ်ငန်းခွင် ပတ်ဝန်းကျင်ကို များစွာထိခိုက်စေမည့်အပြင် စီးပွားရေးလုပ်ငန်းအနေဖြင့် ဤမျှများပြားလှသော ကုန်ကျစရိတ်များကို မခံနိုင်တော့ကြောင်းကိုလည်း အခြားသူများ မြင်တွေ့သွားစေမည် ဖြစ်သည်။

အကယ်၍ ဝန်ထမ်းမလျှော့ချပါက အခြားသော နည်းလမ်းတစ်ခု ရှိနေသေးရာ ယင်းမှာ လစာလျှော့ချခြင်းပင် ဖြစ်ပြီး ဝန်ထမ်းလျှော့ချခြင်းကဲ့သို့ပင် ဝန်ထမ်းများ၏ စိတ်ခံစားမှုကို များစွာထိခိုက်စေမည်ဖြစ်ကာ လုပ်ငန်း၏ ပုံရိပ်ကိုလည်း ကျဆင်းသွားစေမည် ဖြစ်သည်။

ဝန်ထမ်းလည်းမလျှော့ လစာလည်းမလျှော့ပါက IBMအနေဖြင့် အရှုံးပေါ်ပေတော့မည်။ ဤအရှုံးကို ၎င်းတို့ ခံနိုင်ရည်ရှိသည်ဆိုစေကာမူ မည်သည့်အစုရှယ်ယာရှင်က အရှုံးခံလိုမည်နည်း။ အချိန်ကြာလာသည်နှင့်အမျှ အရှုံးပေါ်နေခြင်းမှ အမြတ်အစွန်းရရှိလာအောင် မစွမ်းဆောင်နိုင်ပါက လုပ်ငန်း၏ တိုးတက်မှုကို နှောင့်နှေးစေမည်ဖြစ်ပြီး ထိုအချိန်ကျလျှင်လည်း ဝန်ထမ်းလျှော့ချခြင်း သို့မဟုတ် လစာလျှော့ချခြင်း လမ်းကြောင်းပေါ်သို့ လျှောက်လှမ်းရမည်သာ မဟုတ်ပါလော။

ထို့ကြောင့် ယခုအချိန်တွင် တစ်ကိုယ်ရည်သုံးကွန်ပျူတာလုပ်ငန်း တစ်ခုလုံးကို ရောင်းချပစ်ခြင်းက အတန်ဆုံးပင် ဖြစ်သည်။ အသုံးစရိတ်များကို လျှော့ချနိုင်သည့်အပြင် ဝင်ငွေလည်း ရရှိမည်ဖြစ်ကာ ဆော့ဖ်ဝဲလ်နှင့် ဆာဗာများကဲ့သို့သော အဓိက အမြတ်ရနေသည့် လုပ်ငန်းများကိုလည်း ပိုမိုအာရုံစိုက် လုပ်ကိုင်နိုင်မည်ဖြစ်ပြီး IBM၏ အမှတ်တံဆိပ်တန်ဖိုး ကျဆင်းမသွားစေရန်လည်း အာမခံနိုင်မည် ဖြစ်သည်။

အကောင်းဆုံးမှာ Lenovoအုပ်စု၏ ရှယ်ယာတစ်စိတ်တစ်ပိုင်းကို ရရှိနိုင်ရန်ဖြစ်ပြီး ယင်းမှတစ်ဆင့် ၎င်းတို့အနေဖြင့် တစ်ကိုယ်ရည်သုံးကွန်ပျူတာလုပ်ငန်းကို လုံးဝ လက်လွှတ်လိုက်ရခြင်းမျိုး မဖြစ်စေတော့ပေ။ Lenovoအုပ်စု အရှိန်အဟုန် ကောင်းမွန်နေသည့် အခွင့်အရေးကို အသုံးချကာ ၎င်းတို့လည်း အကျိုးအမြတ် တစ်ပတ် ရရှိနိုင်မည် ဖြစ်သည်။

ထို့အပြင် Lenovoအုပ်စု၏ ဖြန့်ချိရေးလမ်းကြောင်းများကို အသုံးချကာ အာရှနှင့် အရှေ့ဥရောပဈေးကွက်များရှိ ၎င်းတို့၏ အခြားသောထုတ်ကုန်များ၏ ဝေစုကိုလည်း ချဲ့ထွင်နိုင်မည်ဖြစ်ရာ ၎င်းတို့၏ အမြတ်အစွန်းများကိုပါ တိုးမြှင့်နိုင်မည် ဖြစ်သည်။

Lenovoအုပ်စု၏ လုပ်ငန်းများ ဖောင်းပွလာပြီး မဖြစ်မနေ လျှော့ချရမည့်အချိန်သို့ ရောက်လာသောအခါ ၎င်းတို့က ရှယ်ယာများကို ရောင်းထုတ်လိုက်မည်ဆိုပါကလည်း မဆိုးလှသော ဝင်ငွေတစ်ရပ် ဖြစ်လာဦးမည် ဖြစ်သည်။

သို့သော် ဤသို့ စေ့စပ်သေချာလှသော တွက်ဆမှုများမှာ ယခုအခါ ရှေ့ဆက်၍ မရနိုင်တော့ချေ လျူချွမ်းကျစ်က ၎င်းတို့ကို IBM၏ တစ်ကိုယ်ရည်သုံးကွန်ပျူတာလုပ်ငန်းကို မဝယ်လိုတော့ကြောင်း ပြောကြားလာခဲ့လေပြီ။

၎င်းတို့မှာ အချိန်အတော်ကြာ တိုင်ပင်ဆွေးနွေးခဲ့ကြပြီးနောက် IBMအနေဖြင့် ဝန်ထမ်းလျှော့ချခြင်းကိုသာ လုပ်ဆောင်နိုင်တော့မည်လော။ သို့တည်းမဟုတ် လုပ်ငန်းကို အခြားသော တစ်ကိုယ်ရည်သုံးကွန်ပျူတာထုတ်လုပ်သူများထံ ရောင်းချပစ်မည်လော။ သို့သော် အခြားသော တစ်ကိုယ်ရည်သုံးကွန်ပျူတာထုတ်လုပ်သူများကရော ၎င်းတို့၏ လုပ်ငန်းအပေါ် စိတ်ဝင်စားမှု ရှိပါမည်လော။

အကယ်၍ စိတ်ဝင်စားမှုရှိလျှင်ပင် အခြားသော တစ်ကိုယ်ရည်သုံး ကွန်ပျူတာထုတ်လုပ်သူများအနေဖြင့် IBM၏ အခြားသောလုပ်ငန်းများ အာရှနှင့် အရှေ့ဥရောပဈေးကွက်အတွင်း ဝေစုပိုမိုရရှိလာစေရန် ကူညီပေးနိုင်စွမ်း ရှိမည်မဟုတ်ပေ Lenovoအုပ်စုသည်ကား အာရှနှင့် အရှေ့ဥရောပတွင် ထိပ်သီးကြီး ဖြစ်ပေသည်။

ထိုအချိန်တွင် IBM၏ အဆင့်မြင့်စီမံခန့်ခွဲသူများမှာ ရုတ်တရက် နောင်တရသွားခဲ့ကြပြီး ဤသို့ဖြစ်မည်ကို ကြိုသိခဲ့ပါလျှင် ပြီးခဲ့သည့်နှစ်ကတည်းက Lenovoအုပ်စုကို သဘောတူခဲ့သင့်ပေသည်။ Lenovo-Kingsoft အနေဖြင့် XOSစနစ်ကို မိတ်ဆက်ချိန်တွင် ထောက်ခံအားပေးမှုကို အလိုအပ်ဆုံးဖြစ်ခဲ့သော်လည်း ၎င်းတို့က ထိုအခွင့်အရေးကို လက်လွှတ်ခဲ့ကြလေပြီ။

အကယ်၍ ထိုအချိန်ကသာ တစ်ကိုယ်ရည်သုံးကွန်ပျူတာလုပ်ငန်းကို ရောင်းချပစ်ခဲ့ပါက Lenovoအုပ်စု၏ ရှယ်ယာများကို ရရှိနိုင်မည့်အပြင် Lenovo-Kingsoft နှင့်လည်း ဆက်ဆံရေး တည်ဆောက်နိုင်မည်ဖြစ်ကာ အင်အားကြီးနှစ်ဦး ပူးပေါင်းလိုက်ခြင်းဖြင့် IBMအနေဖြင့် ကမ္ဘာ့အိုင်တီစက်မှုလုပ်ငန်းလောက၏ ထိပ်သီးကြီး ပြန်လည်ဖြစ်လာနိုင်မည်မှာလည်း မဖြစ်နိုင်စရာ မရှိပေ။

သို့သော် ဤအခွင့်အရေးအားလုံးကို ၎င်းတို့ကိုယ်တိုင် ဖြုန်းတီးပစ်ခဲ့ကြလေပြီ ယခုအချိန်မှာ ယခင်အချိန်များနှင့် မတူညီတော့ပေ။

အဘယ်ကြောင့်ဆိုသော် ထိုအချိန်က ၎င်းတို့မှာ မစွန့်လွှတ်ရက်ခဲ့ကြဘဲ အခြေအနေကို ရှင်းလင်းစွာ မမြင်နိုင်ခဲ့ကြသည့်အပြင် ၎င်းတို့၏ မာနကြီးမှုကြောင့်လည်း Lenovoအုပ်စုကဲ့သို့သော နှောင်းမှပေါ်လာသည့် ထူးချွန်သူများ၏ ဝယ်ယူခြင်းကို မခံလိုခဲ့ကြသောကြောင့် ဖြစ်သည်။

"မီလာ လျူရဲ့ သဘောထားက အရမ်းကို ပြတ်သားနေတာလား" ဒါရိုက်တာတစ်ဦးက မေးမြန်းလိုက်သည်။

"အရမ်းကို ပြတ်သားပါတယ်။ သူတို့ရဲ့ စေ့စပ်ညှိနှိုင်းရေး ဗျူဟာတော့ သေချာပေါက် မဟုတ်ပါဘူး" မီလာက အကယ်၍ တစ်ဖက်လူ၏ စေ့စပ်ညှိနှိုင်းရေးဗျူဟာ ဖြစ်နေလျှင်ပင် မိမိတို့အနေဖြင့် အောင့်အည်း သည်းခံကာ လက်ခံရုံမှတစ်ပါး အခြားမရှိကြောင်း ပြောလိုက်ချင်စိတ် ပေါက်သွားသည်။

သို့သော် တစ်ဖက်လူမှာ အမှန်တကယ်ပင် သဘောထား ပြတ်သားနေခဲ့ပြီး ဝယ်ယူလိုစိတ် လုံးဝ မရှိတော့ပေ။

"မီလာ တခြားထုတ်လုပ်သူတွေကို သွားပြီး ဆက်သွယ်လိုက်ပါ။ ပြီးတော့ စားပွဲတင်ကွန်ပျူတာလုပ်ငန်းကိုလည်း ထပ်ပြီး နည်းနည်း လျှော့ချလိုက်ပါ။ နောက်ဆိုရင် အစိုးရဘက်ကိုလည်း ကျွန်တော်တို့ လက်တော့ပ်တွေပဲ ရောင်းကြတာပေါ့" IBM၏ အမှုဆောင်အရာရှိချုပ်က ပြောကြားလိုက်သည်။

"စားပွဲတင်ကွန်ပျူတာလုပ်ငန်းကို ထပ်ပြီး လျှော့ချမဲ့ကိစ္စကိုတော့ ကျွန်တော် သဘောမတူသေးပါဘူး။ အစိုးရရဲ့ ဝယ်ယူမှုတွေမှာ ကျွန်တော်တို့ရဲ့ ရောင်းအားက မဆိုးဘူး ဆိုပေမဲ့ စားပွဲတင်ကွန်ပျူတာတွေ မရှိတော့ရင် ကျွန်တော်တို့ရဲ့ ယှဉ်ပြိုင်နိုင်စွမ်း အားသာချက်က အဲဒီလောက် ကြီးမားတော့မှာ မဟုတ်ပါဘူး။ လက်တော့ပ်တွေရဲ့ ဈေးနှုန်းက ဘာပဲဖြစ်ဖြစ် စားပွဲတင်ကွန်ပျူတာတွေထက် အများကြီး ပိုဈေးကြီးနေတာကိုး" ဒါရိုက်တာတစ်ဦးက ပြောဆိုလိုက်သည်။

"တခြားထုတ်လုပ်သူတွေကို ကိုယ့်ဘက်က စပြီး ဆက်သွယ်ပြီး ကျွန်တော်တို့ရဲ့ တစ်ကိုယ်ရည်သုံးကွန်ပျူတာလုပ်ငန်းကို ရောင်းချတာကလည်း မသင့်တော်ဘူးလို့ ကျွန်တော် ထင်ပါတယ်။ ရောင်းထွက်သွားခဲ့ရင်တောင် ဈေးနှုန်းက သိပ်မြင့်မှာ မဟုတ်ပါဘူး။ ပြီးတော့ ကျွန်တော်တို့က စားပွဲတင်ကွန်ပျူတာလုပ်ငန်းကို လက်လွှတ်လိုက်ရပြီးရင် ရောင်းဈေးက ပိုတောင် နိမ့်သွားပါဦးမယ်။ ဒါကြောင့် လုပ်ငန်းကို လျှော့ချတာနဲ့ လုပ်ငန်းတစ်ခုလုံးကို ရောင်းချတာ နှစ်ခုကြားမှာ ပဋိပက္ခ ဖြစ်နေပါတယ်" အခြားသူတစ်ဦးကလည်း သဘောထား အမြင်ကို ထုတ်ဖော်ပြောဆိုလိုက်သည်။

"ကျွန်တော်တို့ လျူကို သွားပြီး ထပ်ဆွေးနွေးကြည့်ရင်ကော ဒါမှမဟုတ် ဖုန်းကို တိုက်ရိုက် သွားတွေ့ကြမလား။ ကျွန်တော်တို့ဆီမှာ မူပိုင်ခွင့်နည်းပညာတွေ အများကြီး ရှိနေတာပဲ။ ဒီတစ်ခါ လုပ်ငန်းတစ်ခုလုံးကို ရောင်းချတဲ့နေရာမှာ အဲဒီမူပိုင်ခွင့်နည်းပညာတွေ အများကြီး ပါဝင်နေတာပဲလေ ဒါတွေက Lenovoအုပ်စုရဲ့ နည်းပညာ မြှင့်တင်ရေးအတွက် အရမ်းကို ကြီးမားတဲ့ အကျိုးကျေးဇူးတွေ ရှိစေမှာပါ ကျွန်တော်တို့ကြားက သုတေသနနဲ့ ဖွံ့ဖြိုးတိုးတက်ရေး ဦးတည်ချက်တွေကမှ မတူညီကြတာပဲ"

ထိုအချိန်တွင် မီလာမှာ တစ်စုံတစ်ခုကို သတိရသွားပြီး အချိန်အတော်ကြာ တုံ့ဆိုင်းနေပြီးမှ စကားစလိုက်သည်။ "လျူက ကျွန်တော်တို့ရဲ့ တစ်ကိုယ်ရည်သုံးကွန်ပျူတာ မူပိုင်ခွင့်နည်းပညာတချို့ကို သူအကြိုက်ဆုံးပဲလို့ ကျွန်တော့်ကို ပြောဖူးတာ ကျွန်တော် မှတ်မိနေသေးတယ်။ အဲဒီမူပိုင်ခွင့်နည်းပညာတွေကို Lenovoအုပ်စုကို လုပ်ပိုင်ခွင့်ပေးလိုက်ပြီး အဲဒီကနေ ငွေသားတချို့ ပြန်ရယူလိုက်ရင်ကော"

"ကျွန်တော်တို့ရဲ့ ရောင်းအားကလည်း ပြင်းပြင်းထန်ထန် ထိခိုက်နေပြီ ဆိုမှတော့ ပြီးတော့ ကျွန်တော်တို့ရဲ့ မူလအစီအစဉ်ကလည်း နောက်ပိုင်းမှာ နည်းပညာ ဖော်ထုတ်ရေးကို လုပ်ဖို့ ဆိုတော့ ဒါက နည်းပညာ ရောင်းချတာပဲ မဟုတ်ဘူးလား။ ကျွန်တော်တို့ရဲ့ တစ်ကိုယ်ရည်သုံးကွန်ပျူတာလုပ်ငန်း တစ်ခုလုံးနဲ့ ပတ်သက်ပြီးတော့ကတော့ ဂျပန်နိုင်ငံက ထုတ်လုပ်သူတွေနဲ့ တောင်ကိုရီးယား ဒါမှမဟုတ် ထိုင်ဝမ်က ထုတ်လုပ်သူတွေကို ဆက်သွယ်သင့်တယ်လို့ ကျွန်တော် ထင်ပါတယ်။ မြောက်အမေရိကက ဒီထုတ်လုပ်သူတွေက ကျွန်တော်တို့ရဲ့ ဈေးကွက်နဲ့ ထပ်တူကျနေတော့ ကျွန်တော်တို့ရဲ့ တန်ဖိုးကို အကြီးအကျယ် ကျဆင်းသွားစေပါတယ်"

မီလာ၏ ဤစကားများက ဒါရိုက်တာအဖွဲ့၏ တညီတညွတ်တည်း သဘောတူညီချက်ကို ရရှိသွားခဲ့သည်။ ၎င်းတို့ စဉ်းစားကြည့်လိုက်ရာ ဤသည်မှာ အလွယ်ကူဆုံး နည်းလမ်းများထဲမှ တစ်ခုပင် ဖြစ်ပေသည်။ ထိုကျွန်းနိုင်ငံက ထုတ်လုပ်သူများကလည်း ၎င်းတို့၏ တစ်ကိုယ်ရည်သုံးကွန်ပျူတာလုပ်ငန်းကို အစဉ်အမြဲ ဝယ်ယူလိုနေခဲ့ကြသည် မဟုတ်ပါလော… ထို့ကြောင့် ၎င်းတို့ဘက်မှ ကိုယ်တိုင် ဆက်သွယ်လာစေရန် အရိပ်အမြွက် ပြလိုက်ခြင်းက ပိုကောင်းပေမည်။ ထို့နောက် မူပိုင်ခွင့်များကို သီးသန့်ထုတ်နုတ်ကာ နေရာအနှံ့ လုပ်ပိုင်ခွင့်ပေးပြီး အခကြေးငွေများ ကောက်ခံခြင်းက ဤသို့ဆိုလျှင် အကျိုးစီးပွားနှင့် အကိုက်ညီဆုံးပင် ဖြစ်သည်။

လျူချွမ်းကျစ်တစ်ယောက် တစ်ဖက်လူ၏ မူပိုင်ခွင့်နည်းပညာများကို ဝယ်ယူရန်အတွက် IBMနှင့် မည်သို့မည်ပုံ ဆွေးနွေးရမည်ကို တွေးတောနေစဉ်မှာပင် မီလာ၏ ဖုန်း ဝင်လာခဲ့လေသည်။

"မီလာ ကျွန်တော် ပြောခဲ့ပြီးပြီလေ… ကျွန်တော်တို့ Lenovoအုပ်စုက ဒီတစ်ကြိမ် ဝယ်ယူမဲ့ အစီအစဉ်ကို စွန့်လွှတ်လိုက်ပြီလို့"

"မဟုတ်ပါဘူး လျူရယ်… ကျွန်တော် ခင်ဗျားနဲ့ ဆွေးနွေးမဲ့ ဒီအရောင်းအဝယ်ကို ခင်ဗျား သေချာပေါက် စိတ်ဝင်စားလိမ့်မယ်လို့ ကျွန်တော် ထင်ပါတယ်။ ကျွန်တော်တို့ IBMရဲ့ တစ်ကိုယ်ရည်သုံးကွန်ပျူတာဘက်က မူပိုင်ခွင့်နည်းပညာတွေကို ခင်ဗျားကများ မလိုချင်လို့လား"

……

******

အခန်း ၁၄၇၄ ဈေးတင်ခြင်း

"မန်နေဂျာဖုန်း IBMက လူတွေ ကျွန်တော်နဲ့ ထပ်ပြီး ဆက်သွယ်လာတယ်။ သူတို့က ကျွန်တော်တို့ကို အကူအညီတစ်ခုလောက် တောင်းချင်နေကြတယ်"

"ဘာအကူအညီလဲ" ဖုန်းယွီက အလွန်တရာ သိချင်သွားကာ နှစ်ဖက် ပူးပေါင်းဆောင်ရွက်မှု မရှိတော့သည့်အပြင် ဝယ်ယူမည့်ကိစ္စကိုလည်း ဆွေးနွေးတော့မည် မဟုတ်သည်ကို မည်သည့်အကူအညီ လိုအပ်နေသေးသနည်း။ ၎င်းတို့နှင့် အလွန်တရာ ရင်းနှီးနေ၍လော ဟု တွေးလိုက်သည်။

"ဈေးတင်ပေးဖို့ပါ"

ဈေးတင်ပေးရန် ဟုတ်လော ဖုန်းယွီ သဘောပေါက်သွားလေပြီ IBMသည် ဝယ်လက်အသစ်များကို ရှာဖွေထားပြီး တစ်ဖက်လူမှ ဈေးနှိမ်မည်ကို စိုးရိမ်သောကြောင့် Lenovoအုပ်စုကို ဝယ်ယူမည့်ဟန်ဆောင်ခိုင်းကာ ဈေးနှုန်းကို မြှင့်တင်လိုခြင်း ဖြစ်သည်။

"သြော်…. ဒါဆိုရင် ကျွန်တော်တို့က ဘာအကျိုးအမြတ် ရမှာလဲ" အလကားသက်သက် ကူညီပေးရန်မှာ သေချာပေါက် မဖြစ်နိုင်ပေ။ IBMသည် တရုတ်စီးပွားရေးလုပ်ငန်းတစ်ခု မဟုတ်သည့်အပြင် ယှဉ်ပြိုင်ဘက်များသာ ဖြစ်နေပြီး ကိုယ့်လူများ လုံးဝ မဟုတ်ချေ။

"IBMရဲ့ တစ်ကိုယ်ရည်သုံးကွန်ပျူတာနဲ့ ပတ်သက်တဲ့ မူပိုင်ခွင့်နည်းပညာ အားလုံးကို ကျွန်တော်တို့ကို လုပ်ပိုင်ခွင့် တစ်စိတ်တစ်ပိုင်း ပေးမယ်တဲ့… ကာလတို လုပ်ပိုင်ခွင့် မဟုတ်ဘဲ ရေရှည်အသုံးပြုဖို့ လုပ်ပိုင်ခွင့် ပေးမှာပါ"

လုပ်ပိုင်ခွင့်ပေးခြင်းမှာ ရောင်းချခြင်းနှင့် မတူညီပေ Lenovoအုပ်စုကို လုပ်ပိုင်ခွင့်ပေးခြင်းသည် Lenovoအုပ်စုအနေဖြင့် အဆိုပါနည်းပညာများကို အသုံးပြုနိုင်ပြီး လက်ရှိအခြေခံအပေါ်မှနေ၍ သုတေသနနှင့် ဖွံ့ဖြိုးတိုးတက်မှုများ ပြုလုပ်ကာ နည်းပညာကို မြှင့်တင်နိုင်မည်ဖြစ်ကြောင်း ကိုယ်စားပြုသည်။ သို့သော် ကန့်သတ်ချက်များလည်း ရှိနေပြီး ယင်းမှာ Lenovoအုပ်စုတွင် အသုံးပြုခွင့်သာရှိပြီး ပိုင်ဆိုင်ခွင့် မရှိသောကြောင့် အဆိုပါနည်းပညာများကို အခြားသော စီးပွားရေးလုပ်ငန်းများထံ ထပ်မံ၍ လုပ်ပိုင်ခွင့် ပေးအပ်နိုင်မည် မဟုတ်ချေ။

သို့သော် ဤရေရှည်လုပ်ပိုင်ခွင့်ကပင် လုံလောက်နေပြီ ဖြစ်သည်။ မူပိုင်ခွင့် ကာကွယ်ရေးကာလအတွင်း Lenovoအုပ်စုအနေဖြင့် အစဉ်တစိုက် အသုံးပြုနိုင်မည်ဖြစ်ပြီး လုပ်ပိုင်ခွင့်အတွက် အခကြေးငွေ တစ်ကြိမ်သာ ပေးချေရန် လိုအပ်သည့်အပြင် ဈေးနှုန်းမှာလည်း နှိုင်းယှဉ်ကြည့်ပါက များစွာ သက်သာပေလိမ့်မည်။

ဤသို့ဆိုလျှင် Lenovoအုပ်စု၏ နည်းပညာများမှာ ကြီးမားသော ဖြည့်ဆည်းမှုနှင့် မြှင့်တင်မှုများကို ရရှိသွားမည်ဖြစ်ကာ အဆင့်မြင့်ဈေးကွက်သို့ အပြည့်အဝ ဝင်ရောက်နိုင်ရန် ၎င်းတို့ကို အခွင့်အလမ်း ပေးစွမ်းနိုင်မည် ဖြစ်သည်။

"လုပ်ပိုင်ခွင့်ဈေးနှုန်းကကော သက်သာခွင့်တွေ ရှိသေးလား" ဖုန်းယွီက ထပ်မံ၍ မေးမြန်းလိုက်သည်။

"မရှိပါဘူး။ ဒါပေမဲ့ အတော်လေးကို သင့်တင့်ပါတယ်… ကျွန်တော်တို့ အစတုန်းက ဝယ်ချင်ခဲ့တဲ့ အချိန်က ဈေးနှုန်းထက်တော့ နည်းနည်း ပိုသက်သာပါလိမ့်မယ်" လျူချွမ်းကျစ်အနေဖြင့် ဤမျှနှင့်ပင် အလွန်တရာ ကောင်းမွန်နေပြီဟု ယူဆထားသည် အဘယ်ကြောင့်ဆိုသော် ယခင်က Lenovoအုပ်စုဘက်မှ ဈေးနှုန်းမြင့်မြင့် ပေးခဲ့စဉ်ကပင် IBMက အချို့သော အဓိကကျသည့် နည်းပညာများကို လုပ်ပိုင်ခွင့်ပေးရန် ငြင်းဆန်ခဲ့ဖူးသောကြောင့် ဖြစ်သည်။

ယခုတစ်ကြိမ်တွင်မူ ပြဇာတ်တစ်ပုဒ် ကပြရာ၌ ကူညီပေးရုံဖြင့် ဤမူပိုင်ခွင့်နည်းပညာ လုပ်ပိုင်ခွင့်များကို သာမန်ဈေးနှုန်းဖြင့် ဝယ်ယူခွင့် ရရှိနိုင်မည်ဖြစ်ရာ လျူချွမ်းကျစ်မှာ အလွန်တရာ စိတ်လှုပ်ရှားနေမိသည်။

ပိုမိုများပြားသော သက်သာခွင့်များ မရရှိကြောင်းကို ကြားလိုက်ရသည့်အခါ ဖုန်းယွီမှာ အနည်းငယ် နှမြောသွားကာ ဤသို့ အခွင့်အရေး မရလိုက်ခြင်းက အဘယ်ကြောင့် အရှုံးပေါ်သွားသကဲ့သို့ ခံစားချက်မျိုး ဖြစ်ပေါ်လာစေသနည်း။

"ခင်ဗျား ဆုံးဖြတ်ပြီးရင်တော့ ကျွန်တော်က ခင်ဗျားကို ထောက်ခံမှာပါပဲ။ ဒါနဲ့ IBMရှာတွေ့ထားတဲ့ ဝယ်လက်သစ်တွေက ဘယ်သူတွေလဲ"

"ကုမ္ပဏီနှစ်ခုပါ တစ်ခုက Samsung အုပ်စု ဖြစ်ပြီး နောက်တစ်ခုက Sony အုပ်စုပါ"

Samsung နှင့် Sony ဟုတ်လော နှစ်ခုစလုံးက အာရှ၏ အီလက်ထရောနစ် လူသုံးကုန်ပစ္စည်း ထိပ်သီးကုမ္ပဏီကြီးများပင် ဖြစ်သည်။ ဖုန်းယွီခေတ္တမျှ တွေးတောလိုက်သည်နှင့် သဘောပေါက်သွားလေသည်။ အကယ်၍ IBMက မြောက်အမေရိကမှ စီးပွားရေးလုပ်ငန်းများထံ ရောင်းချခဲ့ပါက အရောင်းလမ်းကြောင်းများ စက်ရုံများနှင့် အမှတ်တံဆိပ် စသည်တို့၏ တန်ဖိုးမှာ များစွာ ကျဆင်းသွားမည် ဖြစ်သည်။

သို့သော် အာရှမှ စီးပွားရေးလုပ်ငန်းများမှာမူ IBM၏ တစ်ကိုယ်ရည်သုံးကွန်ပျူတာလုပ်ငန်းကို အသုံးချကာ ဥရောပနှင့် အမေရိကသို့ ဝင်ရောက်ထိုးဖောက်နိုင်မည်ဖြစ်ရာ ဤသို့ဖြင့် တန်ဖိုးကို အမြင့်မားဆုံးဖြစ်အောင် ပြုလုပ်နိုင်မည် ဖြစ်သည်။

ထို့ကြောင့် IBMအနေဖြင့် Dell စသည်တို့ကို ရှာဖွေ၍ ဈေးတင်ပေးရန်မှာလည်း မဖြစ်နိုင်ပေ။ Sony တို့ကလည်း အရူးများ မဟုတ်သောကြောင့် လုံးဝ ယုံကြည်မည် မဟုတ်ချေ။ သို့သော် အကယ်၍ Lenovoအုပ်စုသာ ယှဉ်ပြိုင်မှုထဲသို့ ဝင်ရောက်လာပါက အဆိုပါ စီးပွားရေးလုပ်ငန်း နှစ်ခုစလုံးက သေချာပေါက် ယုံကြည်လာမည် ဖြစ်သည်။ အဘယ်ကြောင့်ဆိုသော် အစောပိုင်းကာလကတည်းက လျူချွမ်းကျစ်သည် IBM၏ တစ်ကိုယ်ရည်သုံး ကွန်ပျူတာလုပ်ငန်းကို ဝယ်ယူလိုကြောင်း ဖော်ပြခဲ့ဖူးသည်မှာ လျှို့ဝှက်ချက် တစ်ခု မဟုတ်သောကြောင့်ပင် ဖြစ်သည်။

"သွားလုပ်လိုက်ပါ…. ကျွန်တော် ခင်ဗျားကို ယုံကြည်ပါတယ်"

မိမိတို့ လိုချင်သော နည်းပညာများကို ရရှိနိုင်သည့်အပြင် ယှဉ်ပြိုင်ဘက်များကိုလည်း ဒုက္ခတွင်းထဲသို့ ဆွဲချနိုင်မည်ဖြစ်ရာ မျှားတစ်စင်းဖြင့် ငှက်နှစ်ကောင် ပစ်ချနိုင်ခြင်းပင် ဖြစ်သည် ဤစီးပွားရေးလုပ်ငန်း နှစ်ခုစလုံးကို ဖုန်းယွီက တကယ်တမ်းတွင် သိပ်ပြီး သဘောမကျလှချေ။

အင်း….. ထိုစီးပွားရေးလုပ်ငန်း နှစ်ခုကလည်း Lenovoအုပ်စုကို သဘောမကျသလို ဖုန်းယွီကိုလည်း သဘောမကျလောက်ပေ။

……

"ဥက္ကဋ္ဌကြီး IBMက သူတို့ရဲ့ တစ်ကိုယ်ရည်သုံးကွန်ပျူတာလုပ်ငန်းကို တကယ်ပဲ ရောင်းချတော့မှာပါ။ Lenovoအုပ်စုက လျူချွမ်းကျစ်ကို ကိုယ်တိုင် သွားရောက် ဆွေးနွေးဖို့ စေလွှတ်လိုက်ပါပြီ။ ပြီးတော့ Samsung အီလက်ထရောနစ် ကော်ပိုရေးရှင်းက ဥက္ကဋ္ဌ ပတ်အီချွန်းကလည်း အမေရိကကို သွားနေပါပြီ။ သူတို့ရဲ့ ရည်မှန်းချက်ကလည်း ဒါပါပဲ… ဒီသတင်းက သေချာပေါက် အမှန်ပါ။ ကျွန်တော်တို့က သွားပြီး မဆွေးနွေးကြည့်တော့ဘူးလား"

အိုဂါ နိုရီအိုသည် လက်အောက်ခံ၏ သတင်းပို့ချက်ကို နားထောင်နေရင်း မျက်လုံးများက နံရံပေါ်ရှိ ကမ္ဘာ့မြေပုံကို စိုက်ကြည့်ကာ ငေးမောတွေဝေနေခဲ့သည်။

အခွင့်အရေး ဤသည်မှာ ကောင်းမွန်သော အခွင့်အရေးတစ်ခုပင် ဖြစ်သည် IBMသည် တစ်ချိန်က အိုင်တီစက်မှုလုပ်ငန်းလောက၏ တစ်ဦးတည်းသော အရှင်သခင်ကြီး ဖြစ်ခဲ့ပြီး ယခုအချိန်တွင်ပင် ထိပ်တန်း စီးပွားရေးလုပ်ငန်းများထဲမှ တစ်ခု ဖြစ်နေဆဲပင် ဖြစ်သည်။ ယခုလက်ရှိ တစ်ကိုယ်ရည်သုံးကွန်ပျူတာ စံနှုန်းအများစုမှာ IBMမှ သတ်မှတ်ပြဋ္ဌာန်းခဲ့သည့် အရာများပင် ဖြစ်နေဆဲဖြစ်သည်။ ၎င်းတို့က တစ်ကိုယ်ရည်သုံးကွန်ပျူတာလုပ်ငန်းကို ရောင်းချပစ်မည်ဆိုသည်မှာ ဆော့ဖ်ဝဲလ်နှင့် ဆာဗာပိုင်းကိုသာ အဓိက အာရုံစိုက်တော့မည်ဟူသော သဘောလော။

အကယ်၍ IBM၏ တစ်ကိုယ်ရည်သုံးကွန်ပျူတာလုပ်ငန်းကို လက်အောက်ခံအဖြစ် သိမ်းသွင်းနိုင်မည်ဆိုပါက Sony ၏ တစ်ကိုယ်ရည်သုံးကွန်ပျူတာ ရောင်းအားမှာ သေချာပေါက် အကြီးအကျယ် တိုးတက်လာမည်ဖြစ်ပြီး ကမ္ဘာ့ထိပ်တန်း ငါးခုစာရင်းသို့ တစ်ဟုန်ထိုး ရောက်ရှိသွားမည် ဖြစ်သည်။

IBMနှင့် Sony တို့၏ နည်းပညာပိုင်းဆိုင်ရာ အားသာချက်များကို ပေါင်းစပ်ကာ သုတေသနပြု တီထွင်ဖန်တီးနိုင်မည်ဆိုပါက အချိန်သိပ်ကြာကြာ ယူစရာမလိုဘဲ ကမ္ဘာ့ထိပ်တန်း သုံးခုစာရင်းသို့သာမက ကမ္ဘာ့နံပါတ်တစ်ပင် ဖြစ်လာနိုင်ကောင်းပေသည်။

လျူချွမ်းကျစ်ပင် ကိုယ်တိုင် သွားရောက်ခဲ့ရာ Samsung အုပ်စုအနေဖြင့် အီလက်ထရောနစ် ကော်ပိုရေးရှင်း၏ ဥက္ကဋ္ဌကိုသာ စေလွှတ်လိုက်သည်မှာ အလွန်တရာ အလေးမထားရာ ကျလွန်းလှပေသည်။ အိုဂါ နိုရီအိုက သူကိုယ်တိုင် သွားရောက်ဆွေးနွေးရန် ဆုံးဖြတ်ချက် ချလိုက်လေသည်။

"ငါ သိပါပြီ… မင်း သွားပြီး ဒုဥက္ကဋ္ဌ ကိုအီဇူမီနဲ့ အီနိုအူဝဲကို သွားခေါ်လိုက်… ငါ သူတို့ကို မှာကြားစရာ ကိစ္စတချို့ ရှိတယ်" ကိစ္စရပ်များကို မှာကြားပြီးသည်နှင့် သူသည် အမေရိကသို့ ထွက်ခွာတော့မည် ဖြစ်သည်။

လေယာဉ် အတက်အဆင်း ပြုလုပ်ပြီးနောက် အိုဂါ နိုရီအိုသည် နယူးယောက်၌ ပေါ်လာခဲ့သည်။

ဤဘက်ရှိ Sony ရုံးခွဲမှ လူများမှာ လေဆိပ်သို့ ကြိုဆိုရန် အစောကြီးကတည်းက လူလွှတ်ထားခဲ့ပြီး ကားပေါ်ရောက်သည်နှင့် အိုဂါ နိုရီအိုထံသို့ လုပ်ငန်းဆောင်တာများကို စတင်သတင်းပို့လေတော့သည်။

"တခြားကိစ္စတွေကို နောက်မှပဲ ဆက်ပြောကြတာပေါ့… လျူချွမ်းကျစ်နဲ့ ပတ်အီချွန်းတို့က IBMက လူတွေနဲ့ အဆက်အသွယ် ရသွားကြပြီလား" အိုဂါ နိုရီအိုက လေးနက်သော လေသံဖြင့် မေးမြန်းလိုက်သည်။

"လျူချွမ်းကျစ်က IBMနဲ့ အဆက်အသွယ် ရနေတာ ကြာပါပြီ။ မရရအောင် ယူမဲ့ ပုံစံမျိုးပါပဲ… ဒါပေမဲ့ ကျွန်တော့်အမြင်ကတော့ သူတို့ရဲ့ အခွင့်အရေးက အနည်းဆုံး ဖြစ်နေလိမ့်မယ် ထင်တယ်။ ဘာဖြစ်လို့လဲဆိုတော့ Lenovoအုပ်စုက လွန်ခဲ့တဲ့ အချိန်တုန်းက Lenovo-Kingsoft ကုမ္ပဏီကို ရင်းနှီးမြှုပ်နှံမှုတွေ လုပ်ခဲ့တယ်လေ။ Lenovo-Kingsoft ကို XOSနဲ့ သူတို့ရဲ့ WPS ရုံးသုံးဆော့ဖ်ဝဲလ် ဖြန့်ချိရေးမှာ ကူညီဖို့အတွက်ဆိုတော့ သူတို့ဆီမှာ ရန်ပုံငွေ လုံလုံလောက်လောက် မရှိလောက်တော့ဘူး"

"Samsung အီလက်ထရောနစ် ကော်ပိုရေးရှင်းကတော့ အခွင့်အရေး အရမ်းကြီးမားနေပါတယ်။ ဒီနှစ်ပိုင်းတွေမှာ သူတို့ရဲ့ တိုးတက်မှုက မဆိုးဘူးလေ။ ရန်ပုံငွေလည်း လုံလောက်တယ်ဆိုတော့ ကျွန်တော်တို့ရဲ့ အကြီးမားဆုံး ယှဉ်ပြိုင်ဘက် ဖြစ်လာဖို့ အများကြီး ကျိန်းသေနေပါတယ်"

"မဟုတ်ဘူး… ကျွန်တော်တို့ရဲ့ အကြီးမားဆုံး ယှဉ်ပြိုင်ဘက်က Lenovoအုပ်စုပါပဲ။ ပထမအချက်အနေနဲ့ Lenovoအုပ်စုက IBMနဲ့ အစောကြီးကတည်းက ပူးပေါင်းဆောင်ရွက်မှုတွေ လုပ်ခဲ့တယ်။ နှစ်ဖက် ဆက်ဆံရေး ပိုများတဲ့အတွက် ဆွေးနွေးမှု တိုးတက်မှုက အရမ်းကို မြန်ဆန်လိမ့်မယ်။ ဒုတိယအချက်အနေနဲ့ လျူချွမ်းကျစ်က IBMရဲ့ တစ်ကိုယ်ရည်သုံးကွန်ပျူတာလုပ်ငန်းကို ဝယ်ယူဖို့ အစောကြီးကတည်းက ရည်ရွယ်ချက် ရှိခဲ့တယ်ဆိုတာကို ဒီလုပ်ငန်းလောကထဲက လူတော်တော်များများက သိကြတယ်။ မင်းပြောတဲ့ ရန်ပုံငွေ ပြဿနာနဲ့ ပတ်သက်လို့ကတော့ ဒါက ပိုလို့တောင် ပြဿနာ မဟုတ်သေးဘူး။ လုံလောက်တဲ့ ရန်ပုံငွေ မရှိရင်တောင် သူတို့က ရှယ်ယာတွေကို အသုံးပြုပြီး ဈေးလျှော့တွက်လို့ ရတာပဲ။ IBMက ပိုတောင် သဘောကျလောက်ဦးမယ်" အိုဂါ နိုရီအိုက လုံးဝဆန့်ကျင်ဘက်ဖြစ်သော အမြင်ကို ထုတ်ဖော်လိုက်သည်။

Lenovoအုပ်စုသည်လည်း တိုးတက်မှု အရှိန်အဟုန် ပြင်းထန်နေသော စီးပွားရေးလုပ်ငန်းတစ်ခုဖြစ်ရာ ဤသို့သော စီးပွားရေးလုပ်ငန်းမျိုး၏ ရှယ်ယာများမှာ သေချာပေါက် အရည်အသွေးမြင့် ရှယ်ယာများပင် ဖြစ်သည်။ အခြားသူများ ဝယ်ချင်လျှင်ပင် ဝယ်၍ရမည် မဟုတ်ပေရာ IBMအတွက်မူ ဤသည်မှာ ကောင်းမွန်သော ရင်းနှီးမြှုပ်နှံမှု တစ်ခုဟု ဆိုနိုင်ပြီး အစုရှယ်ယာရှင်များကလည်း သေချာပေါက် ကျေနပ်ကြပေလိမ့်မည်။

သို့ဆိုလျှင် Sony ၏ ယှဉ်ပြိုင်ဘက်မှာ အလွန်တရာ အင်အားကြီးမားနေပေသည်။ စီးပွားရေးလုပ်ငန်း နှစ်ခုစလုံးမှာ ရင်ဆိုင်ဖြေရှင်းရန် လွယ်ကူမည် မဟုတ်ချေ။ သို့သော် နောက်ဆုံးတွင် မည်သူက ဈေးပိုပေးနိုင်မည်နည်း။ မည်သူ၏ အခြေအနေက IBMကို ပို၍ ကျေနပ်စေမည်နည်း ဟူသည်ကိုသာ ကြည့်ရပေမည်။

"IBMနဲ့ အမြန်ဆုံး ဆက်သွယ်လိုက်ပါ။ ငါ သူတို့နဲ့ အမြန်ဆုံး တွေ့ဆုံပြီး အကဲစမ်းကြည့်ရမယ်"

အချိန်ဆွဲထားလေလေ IBMနှင့် Lenovoအုပ်စုတို့ကြား ဆွေးနွေးမှု အောင်မြင်သွားနိုင်ချေက ပိုမိုကြီးမားလေလေ ဖြစ်သည်။ ထိုအချိန်သို့ ရောက်သောအခါ မိမိဘက်မှ ကောင်းမွန်သော အခြေအနေများကို ကမ်းလှမ်းနိုင်မည်ဆိုလျှင်ပင် ကြားဖြတ်လုယူနိုင်ရန် မသေချာတော့ပေရာ အိုဂါ နိုရီအိုမှာ ဤကိစ္စနှင့် ပတ်သက်၍ အနည်းငယ် စိတ်လောနေခဲ့သည်။

သူ့ကို အစိုးရိမ်ရဆုံး ဖြစ်စေသည့် အချက်မှာ Lenovoအုပ်စုမှ လျူချွမ်းကျစ်သည် ဖုန်းယွီကဲ့သို့ မျက်စိကျထားသော စီးပွားရေးလုပ်ငန်းများကို ဝယ်ယူရာတွင် အမြန်ဗျူဟာကို အဓိကထား အသုံးပြုမည်ဆိုလျှင် မိမိတို့ဘက်မှ မဆွေးနွေးရသေးမီ တစ်ဖက်လူက စာချုပ်ချုပ်ဆိုသွားနိုင်ခြင်းပင် ဖြစ်သည်။

ထိုအချိန်တွင် လျူချွမ်းကျစ်သည် IBM၏ အဆင့်မြင့်အရာရှိများနှင့် အမှန်တကယ်ပင် ဆွေးနွေးညှိနှိုင်းမှုများ ပြုလုပ်နေခဲ့သည်။ သို့သော် ၎င်းတို့၏ တစ်ကိုယ်ရည်သုံး ကွန်ပျူတာလုပ်ငန်းကို ဝယ်ယူရန် မဟုတ်ဘဲ တစ်ကိုယ်ရည်သုံးကွန်ပျူတာ မူပိုင်ခွင့်နည်းပညာများ၏ လုပ်ပိုင်ခွင့်ကို ရယူရန်အတွက် ဖြစ်သည်။

ယခုအချိန်တွင် လျူချွမ်းကျစ်သည် နည်းပညာပညာရှင်များကို ခေါ်ဆောင်လာကာ စိတ်ကြိုက် မူပိုင်ခွင့်နည်းပညာများကို ရွေးချယ်ထားပြီးဖြစ်သည်။ ခေတ်နောက်ကျနေသော နည်းပညာအချို့ကို ဖယ်ထုတ်လိုက်ကာ Lenovoအုပ်စုတွင် ရှိထားပြီးဖြစ်သော ဆင်တူနည်းပညာအချို့ကိုပါ ထပ်မံ ဖယ်ရှားလိုက်ပြီး ကျန်ရစ်သော နည်းပညာများကိုမှ ဆွေးနွေးညှိနှိုင်းရန် အသုံးပြုခဲ့ခြင်း ဖြစ်သည်။

"လုမီလာ…ဒါတွေက ကျွန်တော်တို့ လုပ်ပိုင်ခွင့် ရယူချင်တဲ့ မူပိုင်ခွင့်နည်းပညာ စာရင်းတွေပါပဲ… ကျေးဇူးပြုပြီး ခင်ဗျားတို့ ကုမ္ပဏီက အမြန်ဆုံး ဈေးနှုန်း သတ်မှတ်ပေးပါ" လျူချွမ်းကျစ်က ပရင့်ထုတ်ထားသော စာရင်းကို IBMမှ လူများထံသို့ ပေးအပ်လိုက်သည်။

"ကောင်းပါပြီ သုံးရက်အတွင်းမှာ ကျွန်တော်တို့က လုံးဝကို သင့်တင့်တဲ့ ဈေးနှုန်းကို ပေးပါ့မယ်။ ပြီးတော့ သုံးရက်အတွင်းမှာ Lenovoအုပ်စုကလည်း ကျွန်တော်တို့ကို သင့်တင့်တဲ့ ဈေးနှုန်းတစ်ခု ပေးနိုင်ဖို့ မျှော်လင့်ပါတယ်"

လျူချွမ်းကျစ်က ပြုံးရုံသာ ပြုံးလိုက်ပြီး "သေချာပေါက် ပြဿနာ မရှိပါဘူး ကျွန်တော်တို့က နှစ်ဦးနှစ်ဖက် အကျိုးရှိမဲ့ အခြေအနေကို ဖော်ဆောင်နိုင်မှာပါ"

……

******