အခန်း (၂၁၈၀-၂၁၈၂)

အခန်း (၂၁၈၀) မိစ္ဆာနတ်ဘုရားလေး

သံမဏိခံတပ်၏ မြို့ရိုးထက်မှ လှမ်းကြည့်လိုက်ပါက လောကတစ်ခုလုံးမှာ ဖရိုဖရဲဖြစ်နေပြီး ပေအနည်းငယ်မျှအကွာရှိ လူရိပ်လူခြေကိုပင် ခွဲခြား၍မရနိုင်တော့ချေ။ နှင်းမုန်တိုင်းနှင့် နှင်းမှုန်များ ပျံ့နှံ့လာသည့်အရှိန်မှာ အလွန်ပင်မြန်ဆန်လှရာ မြို့ရိုးပြင်ပရှိ စစ်မြေပြင်သာမက သံမဏိခံတပ်၏ အတွင်းပိုင်းအထိပါ သက်ရောက်မှုရှိလာပြီး နယ်မြေတစ်ခုလုံးမှာ ဘာမှမမြင်ရတော့ဘဲ ပိတ်ဆို့သွားတော့သည်။

"ဘာဖြစ်တာလဲ၊ တကယ်ပဲ ဘာတွေဖြစ်ကုန်တာလဲ"

မြို့ရိုးထက်ရှိ မြို့စောင့်တပ်ဖွဲ့ဝင်များကြားတွင် စိုးရိမ်ထိတ်လန့်မှုများ စတင်ဖြစ်ပေါ်လာသည်။ မြို့စောင့်တပ်ဖွဲ့မှာ ခြောက်ယောက်တစ်ဖွဲ့စီ စနစ်တကျပူးပေါင်းဆောင်ရွက်ခြင်းကို အခြေခံ၍ လေ့ကျင့်ထားသည့်တိုင် ယခုအခါတွင်မူ ထိုခြောက်ယောက်အဖွဲ့သည်ပင် တစ်ဦးကိုတစ်ဦး မြင်တွေ့ရန် ခဲယဉ်းနေကြသည်။ အချင်းချင်း နီးကပ်အောင် ကြိုးစားကြည့်ကြသော်လည်း ဝေဝါးနေသည့် အရိပ်များကိုသာ မြင်တွေ့နေရတော့သည်။

"ဒါ ဘာဖြစ်တာလဲ၊ အန်းလုရှန်းရဲ့ လက်ချက်လား"

သံမဏိခံတပ်၏ အလယ်ဗဟိုတွင် နှင်းမှုန်များ လျင်မြန်စွာဖုံးလွှမ်းသွားသည့် စစ်မြေပြင်ကိုကြည့်ရင်း အာပုစစ၊ ချူးလော့ဟိုနှင့် အခြားသော ဗိုလ်ချုပ်များအားလုံးမှာ ထိတ်လန့်တုန်လှုပ်သွားကြပြီး နေရာမှထရပ်လိုက်ကြသည်။ လူတိုင်း၏အမြင်တွင် ရန်သူဘက်၌ ရာသီဥတုကို ထိန်းချုပ်နိုင်စွမ်းရှိသူမှာ အန်းလုရှန်းတစ်ဦးတည်းသာ ရှိသည်ဟု မှတ်ယူထားကြသည်။ သို့သော် အန်းလုရှန်း၏ ထိုစွမ်းရည်ကို ဝမ်ချောင်က ပယ်ဖျက်လိုက်ပြီဖြစ်ရာ အခြားသော အပြောင်းအလဲများ ဖြစ်ပေါ်လာသည်လားဟု သံသယဝင်နေကြခြင်းပင်။ အာပုစစ်သည် မသိစိတ်ဖြင့် ဘေးနားရှိ ဝမ်ချောင်ကို လှမ်းကြည့်လိုက်မိသည်။ နှင်းမှုန်များမှာ ထူထဲလှပါသော်လည်း အာပုစစ်ကဲ့သို့သော ဗိုလ်ချုပ်ကြီး တစ်ဦးအတွက်မူ များစွာ ထိခိုက်မှုမရှိပါချေ။

"မဟုတ်ဘူး၊ ဒါက ရာသီဥတုကို ထိန်းချုပ်တဲ့စွမ်းအား မဟုတ်ဘူး"

ဝမ်ချောင်က ရှေ့တည့်တည့်ကို စိုက်ကြည့်ရင်း ခေါင်းယမ်းလိုက်သည်။ လက်ရှိအခြေအနေမှာ ရာသီဥတုကို ထိန်းချုပ်သည့် နှင်းမှုန်များနှင့် ဆင်တူနေပါသော်လည်း ဝမ်ချောင်၏ စိတ်စွမ်းအင်များ စစ်မြေပြင်ကို ဖုံးလွှမ်းလိုက်သည့်အခါတွင်မူ ထူးခြားသည့် ကွာခြားချက်တစ်ခုကို ခံစားလိုက်ရသည်။ များမကြာမီမှာပင် ဝမ်ချောင်သည် စစ်မြေပြင်၌ ရှိနေသော ထူးခြားသည့် အရှိန်အဝါတစ်ခုကို သတိပြုမိသွားတော့သည်။

"ဒါက သိုင်းပညာပဲ၊ ရှီဘုရင်မရဲ့ စွမ်းရည်ပဲ"

ဝမ်ချောင်သည် ယခင်က ရှီဘုရင်မနှင့် ဆုံတွေ့ဖူးခြင်းမရှိသလို နိုင်ငံအသီးသီးမှ ဘုရင်များကြားတွင်လည်း သူမ၏စွမ်းအားမှာ ထင်ရှားပေါ်လွင်ခြင်း မရှိပါချေ။ သို့သော် ဝမ်ချောင်ကမူ တစ်ချက်ကြည့်ရုံနှင့်ပင် ချက်ချင်းခွဲခြားသိမြင်လိုက်သည်။ လောကပျက်သုဉ်းမည့်ခေတ်ကာလတွင် အန်းလုရှန်း၏ ပုန်ကန်မှုက တစ်လောကလုံး၏ အာရုံကို ဆွဲဆောင်ထားခဲ့သလို ရှီဘုရင်မမှာလည်း အမျိုးသမီးတစ်ဦးဖြစ်နေသဖြင့် သူမနှင့်ပတ်သက်သည့် ကောလာဟလများမှာ များစွာမရှိလှပါချေ။

"တကယ်ကို အံ့ဩစရာပဲ၊ ရှီးမျိုးနွယ်စုရဲ့ ခေါင်းဆောင်မှာ ဒီလို ထူးခြားတဲ့ကျင့်စဉ်အဆင့် ရှိနေလိမ့်မယ်လို့ မထင်ထားမိဘူး"

ဝမ်ချောင်က ရှေ့ကိုကြည့်ရင်း နှုတ်ခမ်းထောင့်တွင် မသိမသာ ပြုံးလိုက်မိသည်။ ရှီဘုရင်မ၏ စွမ်းရည်မှာ တကယ်တော့ သူ၏ တတိယမြောက် ရှန်ထိုက်၏ စွမ်းရည်နှင့် အနည်းငယ်ဆင်တူနေခြင်းပင်။ သို့သော် လက်ရှိအခြေအနေတွင် ဝမ်ချောင်အနေဖြင့် သူမကို ကိုယ်တိုင်ထွက်၍ ရင်ဆိုင်ရန် အစီအစဉ်မရှိသေးပါချေ။

"ချူးလော့ဟို ရှီဘုရင်မကို မင်းပဲ ကိုင်တွယ်လိုက်တော့"

ဝမ်ချောင်က အာပုစစ်၏ အနောက်တွင် ရပ်နေသည့် ထုံလော့သံချပ်ကာမြင်းတပ်၏ ဒုတိယခေါင်းဆောင် ချူးလော့ဟိုကို လှမ်းကြည့်ရင်း ရုတ်တရက် အမိန့်ပေးလိုက်သည်။

"ဟုတ်ကဲ့"

ချူးလော့ဟိုက အမူအရာ လေးနက်သွားပြီး ခေါင်းငုံ့ကာ ချက်ချင်းပင် ပြန်လည်ထူးလိုက်သည်။ သူ၏ဟန်ပန်မှာ အလွန်ပင် ရိုသေကိုင်းညွတ်နေတော့သည်။ ယခင် တာ့လာစ်တိုက်ပွဲတွင် ချူးလော့ဟိုမှာ မာန်မာနများ ပြည့်နှက်နေပြီး ဝမ်ချောင်၏အမိန့်ကိုပင် နာခံရန် ခဲယဉ်းခဲ့သူဖြစ်၏။ သို့သော် မင်းသားသုံးပါး ပုန်ကန်မှုကို ဖြတ်သန်းပြီးနောက်တွင်မူ ထုံလော့မျိုးနွယ်စုမှာ သေဘေးမှ သီသီလေး လွတ်မြောက်ခဲ့ရသလို ဝမ်ချောင်သည်လည်း တစ်လောကလုံး၏ ထိပ်တန်းပုဂ္ဂိုလ်ဖြစ်လာခဲ့သဖြင့် ချူးလော့ဟို၏ သဘောထားမှာ အလုံးစုံ ပြောင်းလဲသွားခဲ့ပြီး ဝမ်ချောင်ကို အရင်ကထက် ပို၍ကြည်ညိုလေးစားလာခဲ့ခြင်းပင်။

ခွန်အားကြီးသူကသာ အုပ်စိုးသည့် မူဝါဒမှာ ထုံလော့မျိုးနွယ်စု၏ အခြေခံစည်းမျဉ်းတစ်ခု ဖြစ်သည်။ ယခုအခါ ဝမ်ချောင်၏ခွန်အားမှာ ထုံလော့မျိုးနွယ်စုတစ်ခုလုံးကို ဖိနှိပ်ထားနိုင်ရုံတင်မကဘဲ တစ်လောကလုံးကပါ သူ့ကို စစ်နတ်ဘုရားဟု ခေါ်ဆိုနေကြပြီဖြစ်ရာ ချူးလော့ဟိုအနေဖြင့် ဝမ်ချောင်အပေါ် ထားရှိသည့် သဘောထားမှာ သဘာဝကျကျပင် ပြောင်းလဲသွားခဲ့ရသည်။ သူသည် အနည်းငယ်မျှ တွေဝေခြင်းမရှိဘဲ ချက်ချင်းပင် လှည့်ထွက်သွားတော့သည်။

"ခဏနေဦး"

ချူးလော့ဟို ခြေလှမ်းအနည်းငယ် လှမ်းရုံရှိသေးမီမှာပင် ဝမ်ချောင်က သူ့ကို လှမ်းတားလိုက်သည်။

"ဒီလက်နက်ကို ယူသွားလိုက်၊ ဒါကိုသုံးပြီး ရှီဘုရင်မကို ရင်ဆိုင်လိုက်"

ဝမ်ချောင်က ပြောရင်းနှင့် သူ့အနောက်ရှိ သိန်းငှက်၏ ကျောပေါ်မှ အထုပ်ရှည်ကြီးတစ်ခုကို ယူလိုက်သည်။ လက်နှစ်ဖက်နှင့် ဆွဲဖြဲလိုက်သည့်အခါတွင်မူ ရွှေရောင်အလင်းတန်းတစ်ခုက မျက်စိရှေ့သို့ တိုးဝင်လာတော့သည်။ ဝမ်ချောင်၏လက်ထဲမှ အရာကို မြင်လိုက်ရသည့်အခါတွင်မူ ချူးလော့ဟို ပင်လျှင် မျက်ခွံများ လှုပ်ခါသွားပြီး မျက်နှာမှာလည်း မသိမသာ ပြောင်းလဲသွားခဲ့ရသည်။ ဝမ်ချောင်၏လက်ထဲတွင် ရှိနေသည်မှာ ရှေးဆန်လှသည့် ရွှေရောင် ဧရာမလေးကြီးတစ်စင်းဖြစ်သည်။ ထိုလေးကြီးမှာ ပေငါးပေကျော်ခန့် ရှည်လျားပြီး လေးကိုယ်ထည်ပေါ်တွင်လည်း လှပသည့် ပန်းနွယ်ပုံစံများ ရှိနေပေသည်။

"မန္တန်တွေပဲ"

တစ်ချက်ကြည့်ရုံနှင့်ပင် ချူးလော့ဟိုသည် ၎င်းမှာ အလွန်ပင် အစွမ်းထက်လှသည့် ရှေးဟောင်းမန္တန်များဖြစ်ကြောင်း ချက်ချင်းသိမြင်လိုက်သည်။ ထို့ပြင် သေသေချာချာ ကြည့်လိုက်မည်ဆိုပါက လေးတစ်စင်းလုံးပေါ်တွင် မသိရသည့် မှောင်မည်းနေသော ရွှေရောင်သတ္တုများဖြင့် ပြုလုပ်ထားသည့် ဖောင်းကြွရုပ်ပုံများစွာ ရှိနေသည်ကို မြင်တွေ့ရလိမ့်မည်။ ထိုအရာများမှာ အာရပ်ဒဏ္ဍာရီထဲရှိ မိစ္ဆာနတ်ဘုရား၇၂ ပါး၏ ပုံရိပ်များပင် ဖြစ်တော့သည်။ လေးပေါ်ရှိ မိစ္ဆာနတ်ဘုရားများမှာ နက်မှောင်လှသော လှိုင်းလုံးများကို နင်းထားကြပြီး လက်ဝါးများကို ဆန့်တန်းကာ ကောင်းကင်ကိုမော့၍ ဟိန်းဟောက်နေကြသည်။ ၎င်းမှာ ဒဏ္ဍာရီထဲရှိ မိစ္ဆာနတ်ဘုရား ၇၂ ပါး သမုဒ္ဒရာထဲ၌ ကောင်းကင်နတ်ဘုရား၏ နှိမ်နင်းခြင်းကို ခံနေရသည့် ပုံစံပင်ဖြစ်၏။

မိစ္ဆာနတ်ဘုရား ၄

ဤသည်မှာ ဝမ်ချောင်က အာရပ်ဘဏ္ဍာတိုက်အတွင်းမှ ရရှိခဲ့သည့် အစွမ်းထက်လှသော လက်နက်တစ်ခု ဖြစ်သည်။ ဝမ်ချောင်သည် ဤလက်နက်ကို ရရှိထားသည်မှာ ကြာပြီဖြစ်သော်လည်း သူကိုယ်တိုင်မှာ လေးမြားအတတ်တွင် အထူးပြုသူ မဟုတ်သဖြင့် မသုံးဖြစ်ခဲ့ပါချေ။ သို့သော် ချူးလော့ဟိုမှာမူ မတူညီပါချေ။ ထုံလော့မျိုးနွယ်စုအတွက်မူ မြင်းစီးလေးမြားအတတ်မှာ အခြေခံအကျဆုံး ပညာရပ်ဖြစ်သလို ချူးလော့ဟိုမှာလည်း လေးမြားအတတ်တွင် ထိပ်တန်းကျွမ်းကျင်သူ တစ်ဦးပင် ဖြစ်တော့သည်။

အရှ့င်ကို ကျေးဇူးတင်ပါတယ်"

ချူးလော့ဟိုက မိစ္ဆာနတ်ဘုရားလေးကို လှမ်းယူလိုက်ပြီးနောက် လျင်မြန်စွာပင် လှည့်ထွက်သွားတော့သည်။

"ရှီဘုရင်မ၊ ငါ သုံးအထိ ရေတွက်မယ်၊ အခု ထွက်သွားမယ်ဆိုရင်တော့ အချိန်မီသေးတယ်၊ မဟုတ်ရင်တော့ ငါ့ရဲ့ ရက်စက်ကြမ်းတမ်းမှုအတွက် ငါ့ကို အပြစ်မတင်နဲ့တော့"

မြို့ရိုးအပြင်ဘက်၊ နှင်းမှုန်များ အထူထပ်ဆုံးဖြစ်နေသည့် အချိန်မှာပင် အေးစိမ့်လှသည့် အသံကြီးတစ်ခုမှာ စစ်မြေပြင်တစ်ခုလုံး၌ ကျယ်လောင်စွာ ပဲ့တင်ထပ်သွားသည်။ မျက်တောင်တစ်ခတ်အတွင်းမှာပင် စစ်မြေပြင်တစ်ခုလုံး ရုတ်တရက် တိတ်ဆိတ်သွားခဲ့ပြီး လေပြင်းများပင် အနည်းငယ် ငြိမ်ကျသွားတော့သည်။

"ဝမ်ချောင်"

အဝေးဆီမှ အန်းလုရှန်း၊ ကောင်းရှန်နှင့် ဝူဆူမစ်ရှ် ခါဂန်းတို့၏ မျက်ခွံများ လှုပ်ခါသွားပြီး ချက်ချင်းပင် မှတ်မိသွားကြသည်။

တစ်ချိန်တည်းမှာပင် သံမဏိခံတပ်ရှေ့ အဝေးတစ်နေရာ၌ ရှိနေသည့် ရှီဘုရင်မမှာ အမူအရာ မှင်တက်သွားခဲ့ပြီး မြင့်မားလှသော မြို့ရိုးဆီသို့ မသိစိတ်ဖြင့် မော့ကြည့်လိုက်မိသည်။ သို့သော် ခဏချင်းမှာပင် သူမ၏လှပသောပါးပြင်ကို လက်ချောင်းလေးဖြင့် အသာအယာ ပွတ်သပ်လိုက်ရင်း စွဲမက်ဖွယ်ကောင်းသည့် အပြုံးတစ်ခုနှင့်အတူ သာယာစွာ ရယ်မောလိုက်တော့သည်။

အရှင်... အရှင် ဘာလဲ ၊ ကျွန်မကို ကိုယ်တိုင်ထွက်ပြီး တိုက်မလို့လား"

အနောက်ဘက်တွင်မူ ထိုအသံကို ကြားလိုက်ရသည့် အန်းလုရှန်းနှင့် ခီတန်ဘုရင်တို့မှာ မျက်မှောင်ကြုတ်လိုက်မိကြသည်။ ဤသည်မှာ စစ်မြေပြင်ဖြစ်ပြီး သေမလား ရှင်မလား ဆုံးဖြတ်ရမည့် နေရာမျိုးတွင် ရှီဘုရင်မအနေဖြင့် အချိန်အခါကို မခွဲခြားတတ်သည်လားဟု တွေးတောနေကြခြင်းပင်။

"မတတ်နိုင်ဘူး၊ သူမက အမြဲတမ်း ဒီလိုပါပဲ"

ခီတန်ဘုရင်က လက်ကို ဖြန့်ပြရင်း စိတ်ပျက်လက်ပျက် ဆိုလိုက်သည်။

အခြားတစ်ဖက်တွင်မူ ဝမ်ချောင်၏အသံမှာ ထပ်မံထွက်ပေါ်လာပြန်သည်။

"မင်းကို ကိုင်တွယ်ဖို့ ငါကိုယ်တိုင် လှုပ်ရှားဖို့ မလိုပါဘူး"

"ဟုတ်လား"

ရှီဘုရင်မက ခဏမျှ မှင်တက်သွားသော်လည်း ပို၍ပင်စိတ်ဝင်စားသွားဟန် ရှိသည်။ သို့သော် ယခုတစ်ကြိမ်တွင်မူ ဝမ်ချောင်က သူမကို ပြန်လည်မဖြေကြားတော့ဘဲ ဂဏန်းများကိုသာ စတင်ရေတွက်ပါတော့သည်။

"၃"

"၂"

"၁"

ဝမ်ချောင်၏ အေးစိမ့်လှသောအသံမှာ ကောင်းကင်နှင့် မြေကြီးကြား၌ ပဲ့တင်ထပ်နေတော့သည်။

ရှီဘုရင်မမှာ ဝမ်ချောင်အနေဖြင့် ဤမျှအထိ ပြတ်သားလိမ့်မည်ဟု မထင်မှတ်ထားခဲ့ပါချေ။ သို့သော် ဝမ်ချောင်၏ ထိုအေးစိမ့်သည့် အသံကပင် သူမ၏ ရင်ထဲရှိ မာန်မာနများကို နှိုးဆွလိုက်သကဲ့သို့ ရှိနေတော့သည်။

"ဟွန်း… ရှင်က ဒီလိုဆိုမှတော့ ကျွန်မကို ဘယ်လိုများ လုပ်မလဲဆိုတာ ကြည့်ရသေးတာပေါ့"

ရှီဘုရင်မက သွားကို တင်းတင်းကြိတ်ရင်း နာကျည်းစွာ ဆိုလိုက်လေသည်။

အကယ်၍ ဝမ်ချောင်ကိုယ်တိုင်သာ ထွက်တိုက်မည်ဆိုပါက သူမ အနည်းငယ် စိုးရိမ်မိမည်မှာ သေချာသည်။ သို့သော် ဝမ်ချောင်က အခြားသူကို လွှတ်၍ သူမကို ကိုင်တွယ်မည်ဆိုခြင်းကိုမူ သူမ တကယ်ပင် မကြောက်ပါချေ။ ရှီဘုရင်မမှာ အမျိုးသမီးတစ်ဦး ဖြစ်လင့်ကစား ရှီးမျိုးနွယ်စု၏ ဘုရင်မနေရာကို ရယူထားနိုင်ပြီး အရှေ့မြောက်ဘက် နယ်မြေ၏ ထိပ်တန်းခေါင်းဆောင် တစ်ဦးဖြစ်နေသဖြင့် သူမမှာ သာမန်လူတစ်ယောက် မဟုတ်သည်မှာ သေချာလှပေသည်။ ထိုခွေးကောင်ကမူ လူကို အလွန်ပင် အထင်သေးလွန်းနေပြီဟု သူမ တွေးတောနေမိသည်။

"ဟွန်း"

ရှီဘုရင်မက လှုပ်ရှားခြင်းမရှိသည်ကို မြင်လိုက်ရသည့်အခါ မိုးကြိုးသံအလား ပြင်းထန်သည့် နှာခေါင်းရှုံ့သံတစ်ခု မြို့တွင်းမှ ထွက်ပေါ်လာသည်။ သံမဏိခံတပ်အတွင်း၌ ဝမ်ချောင်မှာ မတ်မတ်ရပ်နေလျက် အမူအရာမှာ အေးစိမ့်နေတော့သည်။ စကားဆုံးသည်နှင့်တစ်ပြိုင်နက် သူ၏လက်မောင်းကို ဖြည်းညင်းစွာ မြှောက်လိုက်ပြီး နောက်ဆုံးတွင် လက်ဝါးကို အနည်းငယ် တုန်ခါစေလိုက်သည့်အခါ သံမဏိခံတပ် တစ်ခုလုံးနှင့် စစ်မြေပြင်တစ်ခုလုံး၌ ထူးခြားသည့် အပြောင်းအလဲများ ပေါ်ထွက်လာတော့သည်

ဝုန်း

မြေပြင်ကြီးတစ်ခုလုံး တုန်ခါသွားပြီး ဝဲကရက်လေပြင်းတစ်ခုမှာ တဟုန်ထိုး တိုးထွက်လာသည်။ လူတိုင်း တုံ့ပြန်ရန် အချိန်မရလိုက်မီမှာပင် စစ်မြေပြင်၌ ရှီဘုရင်မ ဖန်တီးထားသည့် နှင်းမုန်တိုင်းကြီးမှာ မျက်တောင်တစ်ခတ်အတွင်း ပေါက်ကွဲပျက်စီးသွားခဲ့ပြီး တစ်ချိန်တည်းမှာပင် ဟာလာဟင်းလင်းပြင်၌ ဖုံးလွှမ်းနေသော ထူထဲလှသည့် နှင်းမှုန်များမှာလည်း အလွန်မြန်ဆန်သည့် အရှိန်ဖြင့် ပျောက်ကွယ်သွားတော့သည်။

မျက်တောင်တစ်ခတ်အတွင်းမှာပင် စစ်မြေပြင်တစ်ခုလုံး ပြန်လည်ရှင်းလင်းသွားခဲ့ပြီး လူတိုင်းမှာ သံမဏိခံတပ်ရှေ့မှ အခြေအနေများကို နောက်ဆုံး၌ ရှင်းရှင်းလင်းလင်း မြင်တွေ့လိုက်ရသည်။

ကျယ်ပြန့်လှသော စစ်မြေပြင်မှာ မူလက မဟာထန်၏ မီးဆီများကြောင့် မီးပင်လယ်ကြီးဖြစ်နေခဲ့ခြင်း ဖြစ်သည်။ သို့သော် ရှီဘုရင်မ၏ လှုပ်ရှားမှုအပြီးတွင်မူ မီးလျှံများ အားလုံးမှာ အလုံးစုံ ငြိမ်းသွားခဲ့ပြီဖြစ်သည်။ ၎င်းတင်မကသေးဘဲ မြေပြင်ပေါ်၌ ဖိတ်စင်နေသော များပြားလှသည့် မီးဆီများမှာလည်း ယခုအခါတွင်မူ အလောင်းများ၊ စစ်လက်နက် ကိရိယာများနှင့်အတူ ထူထဲလှသည့် ရေခဲလွှာများအောက်တွင် ပိတ်မိသွားခဲ့ရပြီ ဖြစ်သည်။

ရှေ့တည့်တည့်မှ မြင့်မားလှသော သံမဏိခံတပ်၏ မြို့ရိုးမှာလည်း ထူထဲသည့် ရေခဲများ ဖုံးလွှမ်းသွားခဲ့ပြီး ပျားအုံသေတ္တာများမှ ထွက်ပေါ်နေသော သံမဏိပိုက်များနှင့် မြို့သိမ်းလှေကားများကို ရိုက်ချခဲ့သည့် သံမဏိပြားများ အားလုံးမှာလည်း အေးခဲသွားခဲ့ရပြီ ဖြစ်သည်။

ဝုန်းခနဲ မြည်သံကြီးများနှင့်အတူ မြို့ရိုးအတွင်းပိုင်းမှ ယန္တရားမောင်းတံသံများ ထွက်ပေါ်နေပါသော်လည်း ပျားအုံသေတ္တာများနှင့် သံမဏိပိုက်များမှာ လုံးဝလှုပ်ရှား၍ မရတော့ပါချေ။ တိုက်ခိုက်ရန် နေနေသာသာ အနည်းငယ်မျှပင် လှုပ်ရှား၍ မရတော့ခြင်းပင်။ မျက်တောင်တစ်ခတ်အတွင်းမှာပင် သံမဏိခံတပ်အတွင်းရှိ ယန္တရား ထိန်းချုပ်နေသော စစ်သည်များအားလုံး မျက်နှာများ ပျက်ယွင်းကုန်ကြတော့သည်။

အခြားတစ်ဖက်တွင်မူ ရှီဘုရင်မသည် ဤမြင်ကွင်းကို ကြည့်ရင်း ကျေနပ်အားရသည့် အပြုံးတစ်ခုကို ပြုံးလိုက်မိသည်။ ရှီမျိုးနွယ်စုနှင့် ခီတန်မျိုးနွယ်စုတို့၏ ရှင်သန်မှုပုံစံမှာ အလွန်ပင် ဆင်တူလှပေသည်။ သာမန်အချိန်များတွင်မူ သူတို့၏ ပတ်ဝန်းကျင်က မည်မျှ ဆိုးရွားသည်ကို မသိသာပါသော်လည်း ဆောင်းရာသီ ရောက်လာသည့်အခါတွင်မူ တစ်နယ်မြေလုံး နှင်းများဖြင့် ဖုံးလွှမ်းသွားပြီး အပူချိန်မှာလည်း အနုတ်အဆင့်အထိ ကျဆင်းသွားကာ အလွန်အမင်း အေးစိမ့်လှခြင်းပင်။ ရှီဘုရင်မ၏ ကျင့်စဉ်စွမ်းအားမှာလည်း ထိုကဲ့သို့သော ပတ်ဝန်းကျင်မျိုး၌သာ လေ့ကျင့်ယူခဲ့ခြင်း ဖြစ်သည်။

"ရှင် ဘာနဲ့ ကျွန်မကို ပြန်တိုက်မလဲဆိုတာ ကြည့်ရသေးတာပေါ့"

ရှီဘုရင်မက မျက်နှာချင်းဆိုင်ရှိ သံမဏိခံတပ်ကို ကြည့်ရင်း ဂုဏ်ယူစွာဖြင့် ဆိုလိုက်သည်။

သူမသည် အန်းလုရှန်းတို့ရှေ့၌ ကြွားလုံးထုတ်ခဲ့ပါသော်လည်း လက်တွေ့တွင်မူ အလွန်ပင် သတိထားတတ်သူဖြစ်သည်။ ကောင်းရှန်းက သူမကို မြို့ရိုးနှင့် ပေ ၄၀၀ အတွင်း မဝင်ရန် သတိပေးခဲ့သော်လည်း ရှီဘုရင်မကမူ ပေ ၇၀၀၀ ကျော်ခန့် ဝေးသည့်နေရာ၌သာ နေခဲ့ခြင်းပင်။ ဤမျှလောက် ဝေးကွာသော အကွာအဝေးတွင်ဆိုလျှင် ဝမ်ချောင်ကိုယ်တိုင် ထွက်တိုက်မည်ဆိုပါကလည်း သူမအနေဖြင့် ရှောင်တိမ်းရန် အချိန်လုံလောက်စွာ ရနိုင်သလို ယခု ဝမ်ချောင်က အခြားသူကို လွှတ်မည်ဟု ဆိုသဖြင့် သူမ ပို၍ပင် စိတ်အေးနေမိတော့သည်။

"ဝုန်း"

သို့သော် စကားပြောရသည်မှာသာ ကြာပါသည်၊ ရှီဘုရင်မ၏ နှုတ်ခမ်းထောင့်မှ အပြုံးပင် မဆုံးသေးမီမှာပင် နောက်တစ်ခဏ၌ မိုးကြိုးသံအလား မြည်ဟည်းသံကြီးတစ်ခု သံမဏိခံတပ်အတွင်းပိုင်းမှ ထွက်ပေါ်လာတော့သည်။ တစ်ချိန်တည်းမှာပင် ပြင်းထန်လှသည့် စွမ်းအင်များမှာ ဒီရေများအလား လူတိုင်း၏ အာရုံထဲ၌ ပေါ်ထွက်လာပြီး ထိုစွမ်းအင်မှာ မည်မျှတောင် အားကောင်းသနည်းဆိုလျှင် သာမန်စစ်သည်များပင် ရှင်းရှင်းလင်းလင်း ခံစားနေရခြင်းပင်။

"ဟူး"

လေထုမှာ လှုပ်ခါသွားပြီး လေပြင်းများ တဟုန်ထိုး တိုက်ခတ်လာသည်။ သို့သော် ယခုတစ်ကြိမ်တွင်မူ ထိုလေပြင်းများက သံမဏိခံတပ်ဘက်မှနေ၍ ယိုကျိုးဘက်သို့ တိုက်ခတ်လာခြင်း ဖြစ်တော့သည်။

"မကောင်းတော့ဘူး"

ရှီဘုရင်မ၏မျက်နှာမှာ ချက်ချင်းပင် ပြောင်းလဲသွားပြီး ကြီးမားလှသည့် အန္တရာယ်တစ်ခုကို ခံစားလိုက်ရသည်။ သူမ၏နုပျိုလှပသော မျက်နှာလေးမှာလည်း မျက်တောင်တစ်ခတ်အတွင်း စက္ကူတစ်ချပ်အလား ဖြူလျော့သွားပါတော့သည်။

အများကြီး တွေးတောနေရန် အချိန်မရတော့ပါချေ။ ထိတ်လန့်စရာကောင်းသော ဗီဇအသိစိတ်၏ တွန်းအားပေးမှုကြောင့် ရှီဘုရင်မသည် ကိုယ်ကိုယိုင်လိုက်ပြီး ဘေးတိုက်သို့ အမြန်ဆုံး ခုန်ရှောင်လိုက်သည်။ သို့သော်ငြားလည်း သံမဏိခံတပ်အတွင်းမှ ချူးလော့ဟို ပစ်လွှတ်လိုက်သည့် ထိုမြားတစ်စင်းနှင့် နှိုင်းယှဉ်လျှင်မူ သူမ၏အရှိန်မှာ အလွန်ပင်နှေးကွေးလွန်းနေပါသေးသည်။

ရှူးခနဲ အသံနှင့်အတူ လျှပ်စစ်မီးပွင့်သည့်အလား မြန်ဆန်လှသော အဟုန်ဖြင့် ဝေဝါးနေသည့် မြားအရိပ်တစ်ခုမှာ ကောင်းကင်ယံမှ တဟုန်ထိုး ကျဆင်းလာပြီး မျက်တောင်တစ်ခတ်အတွင်း ဟာလာဟင်းလင်းပြင်များကို ဖြတ်ကျော်ကာ ရှီဘုရင်မဆီသို့ တိုက်ရိုက်ဦးတည်လာတော့သည်။ ရှီဘုရင်မသည် ဗီဇအသိဖြင့် ရှောင်တိမ်းလိုက်ပါသော်လည်း ရုတ်တရက်ဆိုသလို သူမ၏ ကျောပြင်မှတစ်ဆင့် ရင်ဘတ်အထိ စူးအောင့်သွားသည့် နာကျင်မှုကို ခံစားလိုက်ရပြီး တစ်ချိန်တည်းမှာပင် ထက်မြက်သည့် မြားတံက အသားထဲသို့ ထိုးစိုက်သွားသော အသံကိုလည်း နားထဲ၌ ကြားလိုက်ရပါတော့သည်။

******

အခန်း (၂၁၈၁) ရေခဲတံတား

ယခုအခိုက်အတန့်ကျမှသာ ရှီဘုရင်မသည် မိမိ မြင်တွေ့လိုက်ရသည်မှာ အရိပ်ယောင်မျှသာဖြစ်ပြီး၊ ထိုထက်ရှလှသော မြားတံမှာ လက်တွေ့တွင် မိမိအား ထိမှန်သွားခဲ့ပြီဖြစ်ကြောင်း သတိပြုမိလိုက်တော့သည်။ မှင်တက်သွားခြင်း၊ အံ့ဩတုန်လှုပ်ခြင်းနှင့် ထိတ်လန့်ခြောက်ခြားခြင်း စသည့် အမျိုးမျိုးသော ခံစားချက်တို့မှာ ရှီဘုရင်မ၏ မျက်ဝန်းအစုံ၌ တစ်ခဏချင်းအတွင်း ဖြတ်သန်းသွားကြသည်။

ဝုန်းခနဲ မြည်သံကြီးနှင့်အတူ နောက်တစ်ခဏတွင် ပြင်းထန်လှသော ခွန်အားကြီးတစ်ခုမှာ သူမ၏ ရင်ဘတ်ပေါ်ရှိ ထိုမြားတံအတွင်းမှနေ၍ ရုတ်တရက် ပေါက်ကွဲထွက်ပေါ်လာသည်။ ရှီဘုရင်မ၏ ခန္ဓာကိုယ်မှာ တုန်ခါသွားခဲ့ရပြီး နာကျင်စွာ အော်ဟစ်လိုက်မိကာ၊ မြားတံပေါ်ရှိ ထိုထိတ်လန့်စရာကောင်းသော ခွန်အားများကြောင့် လွင့်စဉ်ထွက်သွားခဲ့ရရာ ပေ၆၀ အကွာအဝေးနေရာသို့ ရောက်ရှိသွားခဲ့ပြီး ဝုန်းခနဲ မြည်သံနှင့်အတူ မြေပြင်ပေါ်သို့ ပြင်းထန်စွာ ရိုက်ကျသွားတော့သည်။

"ယုတ်မာလိုက်တဲ့ကောင်"

ခဏတာအတွင်းမှာပင် ရှီဘုရင်မသည် မြေပြင်ပေါ်မှနေ၍ ရုတ်တရက် ခုန်ထလိုက်ပြီးနောက် ဒူးထောက်ကာ ဝပ်စင်းနေလိုက်သည်။ သူမ၏ ဆံနွယ်ရှည်များမှာ ဖရိုဖရဲ ဖြစ်ကာ ပြန့်ကျဲနေခဲ့ပြီး၊ ဦးခေါင်းကို မော့ကာ မျက်နှာချင်းဆိုင်မှ မြို့ရိုးဆီသို့ နာကျည်းစွာဖြင့် စိုက်ကြည့်နေတော့သည်။ နောက်ဆုံးအခိုက်အတန့်တွင် ရှီဘုရင်မသည် ထိတ်လန့်စရာကောင်းသော ဗီဇအသိစိတ်၏ တွန်းအားပေးမှုကြောင့် ဘေးသို့ ရှောင်တိမ်းလိုက်ခြင်းက သူမ၏ အသက်ကို ကယ်တင်ပေးလိုက်ခြင်းပင် ဖြစ်သည်။ မူလက သူမ၏နှလုံးသားတည့်တည့်သို့ ဦးတည်လာသော မြားတံမှာ လက်မအနည်းငယ်ခန့် လွဲချော်သွားခဲ့သဖြင့် ဤရှီးမျိုးနွယ်စု၏ ဘုရင်မမှာ သေဆုံးခြင်းမှ လွတ်မြောက်သွားခဲ့ခြင်း ဖြစ်သည်။

ကံကောင်းထောက်မစွာဖြင့် အသက်ဘေးမှ လွတ်မြောက်ခဲ့ရသဖြင့် ရှီးမျိုးနွယ်စုဝင်တို့၏ ရက်စက်ကြမ်းတမ်းသော ဗီဇမှာလည်း တစ်ပြိုင်နက်တည်း ပေါက်ကွဲထွက်ပေါ်လာတော့သည်။

"ငါ့ကို ဒီလိုတောင် လုပ်ဝံ့တာလား၊ ဒီလိုဆိုမှတော့ ငါ့ကို အပြစ်မတင်နဲ့တော့"

ရှီဘုရင်မ၏ မျက်ဝန်းထဲ၌ ရက်စက်လှသော အလင်းတန်းတစ်ခု မသိမသာ ဖြတ်ပြေးသွားခဲ့ပြီး၊ နောက်တစ်ခဏတွင် သူမသည် ဖြူဖွေးသွယ်လျလှသော လက်နှစ်ဖက်ကို မြေပြင်ပေါ်သို့ ဖိချလိုက်ကာ အားကုန် ဆွဲယူလိုက်တော့သည်။

မြေအောက်နက်ရှိုင်းရာမှနေ၍ ထူးဆန်းသောမြည်သံများနှင့်အတူ အအေးလှိုင်းကြီးတစ်ခုကို ဆွဲထုတ်လိုက်သကဲ့သို့ပင် အလင်းတန်းတစ်ချက် လက်သွားခဲ့ပြီးနောက် မရေမတွက်နိုင်သော လူတွေ၏ တုန်လှုပ်ခြောက်ခြားနေသော အကြည့်များအောက်တွင် ပတ်ဝန်းကျင်တစ်ခုလုံး ရေခဲများ ဖုံးလွှမ်းသွားတော့သည်။ ရှီဘုရင်မ၏ ကိုယ်ပေါ်မှနေ၍ ဧရာမ ပုံသဏ္ဌာန်မဲ့သော ဆွဲငင်အားများ ရုတ်တရက် ပေါက်ကွဲထွက်ပေါ်လာခဲ့ပြီး၊ အနောက်ဘက်ရှိ နိုင်ငံအသီးသီးမှ မဟာမိတ်တပ်ဖွဲ့များ ရှိရာ အရပ်မှ နှင်းမှုန်များနှင့် အအေးလှိုင်းများကို ဆွဲယူလိုက်ကာ ကြည်လင်တောက်ပြောင်လှသော ရေခဲဆူးချွန်ကြီးများအဖြစ် ပြောင်းလဲလျက် မြေအောက်မှနေ၍ တဟုန်ထိုး ပန်းထွက်လာစေတော့သည်။

မျက်တောင်တစ်ခတ်အတွင်းမှာပင် ထိုရေခဲဆူးချွန်ကြီးများမှာ ပေပေါင်း ၁၀၀ ကျော်အထိ မြင့်မားသွားကြသည်။ ဤမျှသာမက ထိုရေခဲဆူးချွန်ကြီးများမှာ အဆမတန် များပြားလာသည်နှင့်အမျှ သက်ရှိများကဲ့သို့ပင် တစ်ခုနှင့်တစ်ခု ရစ်ပတ်နှောင်ဖွဲ့လိုက်ကြကာ၊ ခဏတာအတွင်းမှာပင် ကျယ်ပြန့်လှပြီး ကြည်လင်တောက်ပသည့် အိပ်မက်ကမ္ဘာတစ်ခုအလား လှပနေသော ကုန်းမြေ ရေခဲတံတားအဖြစ်သို့ ပြောင်းလဲသွားတော့သည်။ ဤအခိုက်အတန့်၌ လူတိုင်းမှာ မှင်တက်သွားကြရသည်။

"ရေခဲစွမ်းအား… ဒီရှီဘုရင်မမှာ ဒီလောက်အထိ ထိတ်လန့်စရာကောင်းတဲ့ ရေခဲကျင့်စဉ် အဆင့် ရှိနေလိမ့်မယ်လို့ မထင်ထားမိဘူး"

တဖျပ်ဖျပ် လွင့်ပျံနေသော စစ်အလံ ခြောက်ခုအောက်တွင် အန်းလုရှန်းသည် မျက်လုံးများကို ပြူးလျက် နှုတ်ခမ်းများမှာလည်း တုန်ရီနေတော့သည်။ သူသည် အလွန်အမင်းကို အံ့ဩနေခြင်းပင်။ စွမ်းအားကြီ ငါးမျိုးကို လေ့ကျင့်ရန်မှာ အလွန်ပင် ခဲယဉ်းလှပေရာ အခြေခံအဆင့်ကို ရောက်ရှိရန် လွယ်ကူပါသော်လည်း ကျွမ်းကျင်ရန်မှာမူ ခက်ခဲလှပေသည်။ မျက်စိရှေ့မှ ရှီဘုရင်မ၏ စွမ်းဆောင်ရည်ကို ကြည့်မည်ဆိုပါက သူမသည် ရေခဲစွမ်းအားရှင် တစ်ဦး ဖြစ်ရုံသာမကဘဲ အမြင့်ဆုံးသော အဆင့်သို့ပင် လေ့ကျင့်ထားပြီးဖြစ်ရာ၊ သေချာပေါက် တစ်လောကလုံး၌ လက်ချိုးရေတွက်ရမည့် ထိပ်တန်း ကျွမ်းကျင်သူတစ်ဦး ဖြစ်ကြောင်း ခေါ်ဆိုနိုင်ပေသည်။ ၎င်းမှာ အန်းလုရှန်း အတွက်မူ မထင်မှတ်ထားဘဲ ရရှိလိုက်သော ရလဒ်ကောင်းတစ်ခုပင် ဖြစ်တော့သည်။ အန်းလုရှန်း အနေဖြင့် ရှီဘုရင်မကို စတင် စည်းရုံးစဉ်က ဤအချက်ကို အနည်းငယ်မျှပင် မတွေးထားမိခဲ့ပါချေ။

အနောက်ဘက်တွင်မူ အန်းလုရှန်း သာမက ခီတန်ဘုရင်ပင်လျှင် မျက်နှာပေါ်၌ အံ့ဩမှင်တက်မှုများ ပြည့်နှက်နေတော့သည်။ သူနှင့် ရှီဘုရင်မ ဆုံတွေ့ခဲ့သည်မှာ ကြာမြင့်လှပြီ ဖြစ်ပါသော်လည်း သူမ၏ စွမ်းအားများကို အပြည့်အဝ ထုတ်ဖော်ကာ ဤကဲ့သို့သော ထိတ်လန့်စရာကောင်းသည့် ခွန်အားများကို ပြသခဲ့သည်ကို တစ်ခါမျှ မမြင်ဖူးခဲ့ပါချေ။ ဝမ်ချောင် အမိန့်ပေးလိုက်သဖြင့် ချူးလော့ဟို ပစ်လွှတ်လိုက်သော ထိုမြားတစ်စင်းက သူမအား အမှန်တကယ်ပင် ဒေါသထွက်သွားစေခဲ့ပုံရသည်။ ရှေ့တည့်တည့်မှ ရူးသွပ်နေသည့် ရှီဘုရင်မ၏ ပုံစံကို ကြည့်ရင်း ခီတန်ဘုရင် ပင်လျှင် မသိစိတ်ဖြင့် တစ်ကိုယ်လုံး အေးစိမ့်သွားခဲ့ရသည်။

ကောင်းကင်နှင့် မြေကြီးကြား၌ အအေးလှိုင်းများ တလိမ့်လိမ့် ထွက်ပေါ်နေခဲ့ပြီး ရှီဘုရင်မ၏ ကိုယ်တွင်းမှ ဂန်ချီစွမ်းအင်များမှာလည်း အလွန်မြန်ဆန်လှသော အရှိန်ဖြင့် ကုန်ဆုံးနေပါသော်လည်း သူမသည် ယခုအခါတွင်မူ ထိုအရာများကို ဂရုမစိုက်နိုင်တော့ပါချေ။ စစ်ပွဲမှာ အပြင်းထန်ဆုံး အဆင့်သို့ မရောက်ရှိသေးပါသော်လည်း ဝမ်ချောင်၏ အမိန့်ဖြင့် ချူးလော့ဟို ပစ်လွှတ်လိုက်သော မြားတစ်စင်း ထိမှန်သွားခဲ့ခြင်းက ရှီဘုရင်မအား လုံးဝဒေါသထွက်သွားစေခဲ့ခြင်းပင် ဖြစ်သည်။

ဂျောက်ဂျောက် မြည်သံများနှင့်အတူ ရေခဲတံတား ပျံ့နှံ့လာသည့် အရှိန်မှာ အလွန်ပင် မြန်ဆန်လှပေရာ လူတိုင်း၏ အကြည့်များအောက်တွင် ကွဲအက်သံများနှင့်အတူ ငါးမီတာ ခြောက်မီတာခန့် ကျယ်ဝန်းပြီး တစ်မီတာကျော် ထူထဲလှသော ရေခဲတံတား တစ်စင်းမှာ မြို့ရိုးဆီသို့ ပထမဆုံး စတင် ချိတ်ဆက်မိသွားတော့သည်။ ထို့နောက်တွင်မူ ဒုတိယတစ်စင်း၊ တတိယတစ်စင်း၊ စတုတ္ထတစ်စင်း... ခဏတာ အချိန်တိုအတွင်းမှာပင် သံမဏိခံတပ် မြို့ရိုးထိပ်ဆီသို့ တိုက်ရိုက် သွားနိုင်သော ဧရာမ ကုန်းမြေ ရေခဲတံတားများမှာ မျက်စိရှေ့၌ ပေါ်ထွက်လာတော့သည်။

"လူယုတ်မာ.. အခုတော့ ရှင် ဘာဆက်လုပ်မလဲဆိုတာ ကြည့်ရသေးတာပေါ့"

ရှီဘုရင်မက သွားကို တင်းတင်းကြိတ်ကာ နာကျည်းစွာဖြင့် ဆိုလိုက်သည်။ သို့သော်ငြားလည်း အစွမ်းထက်လှသော ရေခဲစွမ်းအားများကို အသုံးပြုကာ ဤကုန်းမြေ ရေခဲတံတားများကို ဖန်တီးပေးပြီးနောက်တွင်မူ ရှီဘုရင်မသည် ကိုယ်ကို တစ်ချက်မျှ လှုပ်ခါလိုက်ရင်း အနောက်သို့ပင် လှည့်မကြည့်ဘဲ အဝေးဆီသို့ လျင်မြန်စွာ ဆုတ်ခွာသွားတော့သည်။ သူမသည် ယခုအခါ ကျင့်စဉ်စွမ်းအားများ များစွာ လျော့နည်းသွားခဲ့ပြီ ဖြစ်ကာ၊ ဂန်ချီ စွမ်းအင် အမြောက်အမြားကိုလည်း အသုံးပြုခဲ့ရပြီး ဖြစ်သဖြင့် အင်ပါယာ ဗိုလ်ချုပ်ကြီးများနှင့် ရင်ဆိုင်နိုင်စွမ်း လုံးဝ မရှိတော့ပါချေ။ ဤအချိန်တွင် ဤနေရာ၌ ဆက်လက် ကျန်ရှိနေမည်ဆိုပါက သေချာပေါက် အသတ်ခံရမည်သာ ဖြစ်သည်။

"ဘာတွေ မှင်တက်နေကြတာလဲ၊ တက်ကြစမ်း"

စစ်သည် အုပ်စုတစ်ခု၏ဘေးမှ ဖြတ်ကျော်သွားစဉ်တွင် ရှီဘုရင်မက ပြင်းထန်စွာ ဟောက်လိုက်သည်။

"နင်တို့လို အမှိုက်တွေ၊ ငါ့ကို ကာကွယ်ဖို့ အမြန်လာကြစမ်း"

ဤစကားကို ကြားလိုက်ရသည့်အခါ အနီးနားရှိ ဗိုလ်ချုပ် အချို့မှာ ချက်ချင်းပင် ရှီဘုရင်မဆီသို့ ပြေးဝင်လာကြတော့သည်။ အဝေးဆီမှ ခီတန်ဘုရင်ပင်လျှင် တိုးညှင်းစွာ ဟောက်လိုက်ရင်း မြင်းကို အရှိန်တင်ကာ ရောက်ရှိလာခဲ့သည်။

စကားပြောရသည်မှာ ကြာပါသော်လည်း လက်တွေ့တွင်မူ အလွန်ပင် မြန်ဆန်လှပေသည်။ ဤအခိုက်အတန့်၌ အလင်းတန်း တစ်ချက် လက်သွားခဲ့ပြန်ပြီး ကျယ်လောင်သော မြည်ဟည်းသံနှင့်အတူ နောက်ထပ် မြားတစ်စင်းမှာ ရှီဘုရင်မဆီသို့ မိုးကြိုးလျှပ်စီးနှယ် တဟုန်ထိုး တိုးဝင်လာပြန်သည်။ သို့သော်လည်း ယခုတစ်ကြိမ်တွင်မူ ပြင်းထန်လှသော မြည်ဟည်းသံနှင့်အတူ ချူးလော့ဟို၏ ဤမြားတစ်စင်းမှာမူ အခြားသူတစ်ဦး၏ တားဆီးခြင်းကို ခံလိုက်ရတော့သည်။ ထိုသူမှာ အနီးနားတွင် ရှိနေသော ဗိုလ်ချုပ်ကြီး ပိလဲ့လီပင် ဖြစ်တော့သည်။ ပိလဲ့လီ ကိုယ်တိုင်မှာ အရှေ့ တာ့ခ် အင်ပါယာ၏ ထိပ်တန်း ဗိုလ်ချုပ်ကြီး တစ်ဦးဖြစ်ရာ၊ ကျန်းရှိုကွေးပင်လျှင် သူ့အား လွယ်လင့်တကူ မကိုင်တွယ်နိုင်ပါချေ။ သူ၏ အရည်အချင်းဖြင့် ဆိုပါက ဤမြားတစ်စင်းကို တားဆီးရန်အတွက်မူ လုံလောက်လှပေသည်။

"ယုတ်မာလိုက်တဲ့ကောင်"

အခြားတစ်ဖက်တွင်မူ ရှီဘုရင်မသည် ဘေးအန္တရာယ်မှ အောင်မြင်စွာ လွတ်မြောက်ခဲ့ရပါသော်လည်း သူမ၏ လှပသော မျက်နှာလေးမှာမူ ထိတ်လန့်လွန်းသဖြင့် ဖြူလျော့နေတော့သည်။ သူမသည် လေးကြိုးသံကြားရုံနှင့် ထိတ်လန့်နေသော ငှက်ကလေးတစ်ကောင်အလား အဝေးဆီသို့ အရှိန်အဟုန်ဖြင့် ထွက်ပြေးသွားတော့သည်။

"မိန်းမယုတ်…မင်းကတော့ တော်တော် လည်တာပဲ"

သံမဏိခံတပ် အတွင်းပိုင်းရှိ မြင့်မားစွာ ထိုးထွက်နေသော သံမဏိ အဆောက်အအုံတစ်ခု၏ အထက်တွင် ချူးလော့ဟိုသည် ခေါင်မိုးပေါ်၌ ရပ်နေလျက်၊ မျက်ဝန်းထဲ၌ အလင်းတန်း တစ်ချက် လက်သွားခဲ့ပြီးနောက် လက်ထဲရှိ မိစ္ဆာနတ်ဘုရားလေးကို ဖြည်းညင်းစွာ ချလိုက်တော့သည်။ ထုံလော့မျိုးနွယ်စု တစ်ခုလုံး၏ အထက်မှ အောက်အထိ လူတိုင်းမှာ အမျိုးသားကြီးစိုးရေးဝါဒကိုသာ လက်ကိုင်ထားကြသူများဖြစ်ရာ၊ အမျိုးသမီးများနှင့် ကလေးသူငယ်များကို လုံးဝ လက်ဖျားနှင့်ပင် မထိကြပါချေ။ ရှီဘုရင်မမှာ ရန်သူတစ်ဦး ဖြစ်ပါသော်လည်း ချူးလော့ဟိုအနေဖြင့် နောက်ဆုံးတွင်မူ သူမအား သတ်ဖြတ်ရန် လက်မရဲခဲ့ပါချေ၊ သို့မဟုတ်ပါက ရှီဘုရင်မအနေဖြင့် ဤမျှလောက် မြန်ဆန်စွာ ထွက်ပြေးနိုင်လိမ့်မည် မဟုတ်ပါချေ။

ထိုရေခဲတံတားနှင့် ပတ်သက်၍မူ ချူးလော့ဟို အနေဖြင့် အနည်းငယ်မျှ စိုးရိမ်ခြင်း မရှိပါချေ။ ရေခဲတံတား အနည်းငယ်မျှဖြင့် ဤသံမဏိခံတပ်ကြီးကို ဖောက်ထွင်းနိုင်မည်ဟု တွေးတောနေခြင်းမှာ အိပ်မက်ယောင်နေခြင်းမျှသာ ဖြစ်တော့သည်။ တစ်ခုတည်းသော ပြဿနာ ရှိသည်မှာ ရှီဘုရင်မက ထိုမီးဆီများကို အကုန်လုံး အေးခဲသွားအောင် လုပ်ဆောင်လိုက်ခြင်းက အမှန်တကယ်ပင် အချို့သော အခက်အခဲများကို ဖြစ်ပေါ်စေခဲ့ခြင်းပင်။

"ဗိုလ်ချုပ် ဘယ်လိုနေလဲ"

သူ စဉ်းစားနေစဉ်အတွင်းမှာပင် အသံတစ်ခုမှာ နားထဲသို့ ရုတ်တရက် တိုးဝင်လာခဲ့သည်။ ချူးလော့ဟိုက အသံထွက်ပေါ်ရာ ဆီသို့ လှမ်းကြည့်လိုက်ရာ မလှမ်းမကမ်းတွင် သေးငယ်လှသော ကိုယ်ဟန်ရှိသည့် လူရိပ်တစ်ခုမှာ သံမဏိ အဆောက်အအုံပေါ်သို့ ပျံတက်လာခဲ့ပြီးနောက်၊ လမ်းတစ်လျှောက်လုံး ခုန်ပျံကျော်လွှားလျက် မိမိဆီသို့ အလွန်မြန်သော အရှိန်ဖြင့် ရောက်ရှိလာသည်ကို မြင်တွေ့လိုက်ရသည်။ ထိုသူမှာ ဝမ်ချောင်၏ ဘေးနားမှ ယုံကြည်စိတ်ချရသော လူယုံတော် ကျန်းချွယ်ပင် ဖြစ်တော့သည်။

"အရှင့်ကို စိတ်ပျက်အောင် လုပ်မိပြီ၊ နည်းနည်းလေးပဲ လိုသွားတယ်၊ ငါ ရှီဘုရင်မကို မသတ်နိုင်ခဲ့ဘူး"

ချူးလော့ဟိုက ကိုယ်ကိုကိုင်းကာ အလေးပြုလိုက်ရင်း ဦးခေါင်းကို ငုံ့လိုက်ရာ သူ၏ မျက်ဝန်းထဲ၌ ရှက်ရွံ့မှု အရိပ်အယောင်များ ဖြတ်ပြေးသွားခဲ့သည်။ စစ်အမိန့်မှာ တောင်ကြီးတစ်လုံးအလား လေးလံလှပေရာ လက်အောက်ငယ်သား တစ်ဦးအနေဖြင့် အရေးကြီးဆုံးမှာ စစ်အမိန့်ကို အကောင်အထည်ဖော်ရန်သာ ဖြစ်သည်။ ဝမ်ချောင်က သူ့အား မိစ္ဆာနတ်ဘုရားလေးကို ပေးအပ်ခဲ့ပါသော်လည်း သူသည် ရှီဘုရင်မကို မသတ်နိုင်ခဲ့ပါချေ။ ပိလဲ့လီ ဝင်ရောက် ကူညီခဲ့သည်ဖြစ်စေ၊ မကူညီခဲ့သည်ဖြစ်စေ ၎င်းမှာ ငြင်းမရသော အမှန်တရားပင် ဖြစ်တော့သည်။

"ဟားဟား ဗိုလ်ချုပ် စိတ်ထဲ မထားပါနဲ့၊ အရှင်က ဒါကို ကြိုတင် ခန့်မှန်းထားပြီးသားပါ၊ ရှီဘုရင်မတစ်ယောက်တည်းနဲ့တော့ အခြေအနေတစ်ခုလုံးကို မပြောင်းလဲနိုင်ပါဘူး။ အရာရာကို အရှင်က စီစဉ်ထားပြီးသားပါ၊ ဗိုလ်ချုပ်လည်း အမြန်ပြန်ပြီး အစီရင်ခံလိုက်ပါဦး"

ကျန်းချွယ်က ကျယ်လောင်စွာ ရယ်မောလိုက်ရင်း အနည်းငယ်မျှ ဂရုမစိုက်သည့် ပုံစံမျိုး ပြသလိုက်သည်။ မျက်နှာချင်းဆိုင်တွင်မူ ချူးလော့ဟိုမှာ ဤစကားကို ကြားလိုက်ရသည့်အခါ ခဏမျှ မှင်တက်သွားခဲ့ပြီး မသိစိတ်ဖြင့် လှမ်းကြည့်လိုက်မိသည်။

သို့သော်လည်း များမကြာမီမှာပင် ချူးလော့ဟို သတိဝင်လာခဲ့သည်။ မျိုးနွယ်ခြားဘုရင်ကို စစ်နတ်ဘုရားဟု ခေါ်ဆိုကြပြီး၊ ရွက်ဖျင်တဲအတွင်းမှ စီမံကွပ်ကဲရုံဖြင့် မိုင်ထောင်ချီဝေးသော စစ်ပွဲကို အောင်နိုင်သူ မဟုတ်ပါလော။ သူသည် မိစ္ဆာနတ်ဘုရားလေးကို မိမိဆီသို့ ပေးအပ်ကာ ရှီဘုရင်မကို ကိုင်တွယ်ခိုင်းခြင်းမှာ နောက်ဆုံးတွင် မည်သည့်ရလဒ် ထွက်ပေါ်လာမည်ကို မသိရှိဘဲ နေပါမည်နည်း။ အရာရာမှာ သူ၏တွက်ချက်မှုအတွင်း၌သာ ရှိနေပုံရပေသည်။ ယခုအခါ အရေးအကြီးဆုံးမှာ ဝမ်ချောင်၏ နောက်ဆက်တွဲ ဗျူဟာများကို မထိခိုက်စေရန်သာ ဖြစ်၏။

"ကောင်းပါပြီ၊ ငါ အခုပဲ သွားပြီး အစီရင်ခံလိုက်ပါ့မယ်"

ချူးလော့ဟိုက မြို့ရိုးပေါ်မှနေ၍ လျင်မြန်စွာ ခုန်ဆင်းသွားခဲ့ပြီးနောက် အဝေးဆီသို့ ထွက်ခွာသွားတော့သည်။

...

"သတ်စမ်း"

အဝေးဆီတွင်မူ သံမဏိခံတပ် တစ်ခုလုံး၏ အပြင်ဘက်၌ သတ်ဖြတ်လိုသော အော်ဟစ်သံများမှာ တစ်လောကလုံး၌ ပဲ့တင်ထပ်သွားခဲ့ပြီး ရှီဘုရင်မ ဖန်တီးထားသော ခန့်ညားထည်ဝါပြီး ကျယ်ဝန်းလှသည့် လမ်းကြီးကို မြင်တွေ့လိုက်ရသည့်အခါတွင်မူ နိုင်ငံအသီးသီးမှ စစ်သည်များမှာ တစ်ခဏချင်းအတွင်း စိတ်လှုပ်ရှား သွားကြတော့သည်။ ကြိုးများနှင့် မြို့သိမ်းလှေကားများနှင့် နှိုင်းယှဉ်လျှင် ဤနည်းလမ်းမှာ သေချာပေါက် ပိုမိုလျင်မြန်လှပေသည်။ ပို၍အရေးကြီးသည့်အချက်မှာ ဤကဲ့သို့သော ဖြောင့်ဖြူးသည့် လမ်းကြောင်းရှိနေသဖြင့် မြင်းတပ်များပင်လျှင် မြို့ရိုးထိပ်သို့ တိုက်ရိုက် တဟုန်ထိုး တက်ရောက်နိုင်ခြင်းပင် ဖြစ်တော့သည်။

"လူတိုင်း၊ တက်ကြစမ်း"

လူအုပ်ကြီးအတွင်းမှ တာ့ခ်ဗိုလ်ချုပ်တစ်ဦးမှာ ဓားကောက်ကို မြှောက်ကိုင်လိုက်ရင်း ရေခဲတံတားပေါ်သို့ ပထမဆုံး စတင် တက်ရောက်လိုက်သည်။ အစပိုင်းတွင် သူသည် ဤရေခဲတံတားများမှာ ကျိုးလွယ်မည်ကို စိုးရိမ်သဖြင့် အလွန်ပင် သတိထားခဲ့ပါသော်လည်း၊ စစ်မြင်းက နင်းလိုက်သည့် အခါတွင်မူ ခြေအောက်ရှိ ခံစားချက်မှာ အလွန်ပင် ခိုင်မာနေလျက် ထူထဲလှသော ကုန်းမြေပြင်ပေါ်တွင် သွားလာနေရသကဲ့သို့ ရှိနေရုံတင်မကဘဲ သံမဏိများ ထိခတ်မိသကဲ့သို့သော အသံများပင် မသိမသာ ထွက်ပေါ်နေသေးသည်။

"သိပ်ကောင်းတာပဲ"

မျက်တောင်တစ်ခတ်အတွင်းမှာပင် ထိုဗိုလ်ချုပ်မှာ စိတ်ဓာတ်များ တဟုန်ထိုး မြင့်တက်သွားခဲ့ပြီး၊ လူနှင့်မြင်း တစ်သားတည်း ဖြစ်နေကြလျက် မြင်းဗိုက်ကို ညှပ်လိုက်ရာ လေးကြိုးမှ ထွက်ပေါ်သွားသော မြားတစ်စင်းအလား သံမဏိ မြို့ရိုးဆီသို့ တဟုန်ထိုး တိုးဝင်သွားတော့သည်။ ဤရေခဲတံတား၏ ခိုင်မာမှုမှာ ထင်မှတ်ထားသည်ထက် များစွာ သာလွန်လှပေရာ ပုံသဏ္ဌာန်မဲ့သော သံမဏိ ဒိုင်းလွှားတစ်ခု ထပ်တိုးလာသကဲ့သို့ပင် ဖြစ်နေပြီး၊ လူတိုင်းအား မြို့ရိုးပေါ်သို့ ပို့ဆောင်ပေးနေသည့် တစ်ချိန်တည်းမှာပင် နိုင်ငံအသီးသီးမှ မဟာမိတ်တပ်ဖွဲ့များအတွက်လည်း ကာကွယ်ရေး အလွှာတစ်ခုကို ပံ့ပိုးပေးထားသကဲ့သို့ ရှိနေတော့သည်။ ဤနည်းအားဖြင့် စစ်ရထားလေးများကြောင့် ဖြစ်ပေါ်လာနိုင်သော ခြိမ်းခြောက်မှုများပင်လျှင် လျော့ကျသွားခဲ့ရပြီ ဖြစ်၏

"ညီအစ်ကိုတို့၊ သတ်စမ်း"

အနောက်ဘက်တွင်မူ ဤမြင်ကွင်းကို မြင်တွေ့လိုက်ရသည့်အခါ များပြားလှသော စစ်သည်များမှာ တစ်ဦးချင်းစီ စိတ်ဓာတ်များ မြင့်တက်သွားကြပြီး သောင်းနှင့်ချီသော သံချပ်ကာမြင်းတပ်များမှာ ထိုဗိုလ်ချုပ်၏ အနောက်မှနေ၍ မိုးကြိုးလျှပ်စီးနှယ် အရှိန်အဟုန်ဖြင့် တဟုန်ထိုး ချီတက် တိုက်ခိုက်လိုက်ကြတော့သည်။ ပေပေါင်း ၇၀၀၀ ကျော် အကွာအဝေးမှာ ဝေးကွာပုံရပါသော်လည်း မြင်းတပ်များအတွက်မူ အရှိန်ကို အမြင့်ဆုံးသို့ တင်လိုက်မည်ဆိုပါက မျက်တောင်တစ်ခတ်အတွင်း ရောက်ရှိနိုင်သော အကွာအဝေးမျှသာ ဖြစ်တော့သည်။

ဝုန်းခနဲ မြည်သံများနှင့်အတူ တစ်လောကလုံးမှာ တုန်ဟိန်းနေတော့သည်။ မြင်းတပ်များ၏ အနောက်တွင်မူ ဂိုဂူလျော၊ ခီတန်၊ ရှီးမျိုးနွယ်စုများ နှင့် ယိုကျိုး စစ်သည်များမှာ တစ်ဦးပြီးတစ်ဦး ဟိန်းဟောက်လိုက်ကြရင်း ကုန်းမြေ ရေခဲတံတား ပေါ်သို့ တက်ရောက်လိုက်ကြကာ အဝေးဆီမှ သံမဏိခံတပ်ဆီသို့ တဟုန်ထိုး တိုးဝင်တိုက်ခိုက်လိုက်ကြတော့သည်။

ငါးပေ၊ ခြောက်ပေခန့် ရှည်လျားသော ဓားရှည်ကြီးတစ်စင်းမှ ချွင်ခနဲ အေးစိမ့်လှသော အလင်းတန်းများ လက်သွားခဲ့ပြီး မြို့ရိုးနှင့် ချိတ်ဆက်ထားသော ရေခဲတံတားပေါ်သို့ ပြင်းထန်စွာ ခုတ်ပိုင်းချလိုက်သည်။ သို့သော်လည်း အားကုန် သုံးထားသော ဤတစ်ချက် ခုတ်ပိုင်းမှုမှာ ရေခဲတံတားပေါ်၌ အက်ကြောင်းလေးတစ်ခုသာ ဖြစ်ပေါ်စေခဲ့ပြီး ဓားမှတစ်ဆင့် ပြင်းထန်လှသော တုန်ခါမှု စွမ်းအားများပင် ပြန်လည် ထွက်ပေါ်လာသေးရာ၊ မျက်တောင်တစ်ခတ်အတွင်း မြို့ရိုးတစ်ခုလုံးရှိ သံချပ်ကာအပြည့် ဆင်မြန်းထားကြလျက် ရေခဲတံတားကို ဖြတ်တောက်ရန် ကြိုးစားနေကြသော မြို့စောင့်စစ်သည်တို့၏ မျက်နှာများမှာ တစ်ဦးပြီးတစ်ဦး ပျက်ယွင်းကုန်ကြတော့သည်။

ရှီဘုရင်မ ဖန်တီးထားသော ဤရေခဲတံတားမှာ ထင်မှတ်ထားသည်ထက် များစွာ ပိုမိုထိတ်လန့်စရာ ကောင်းလှပေသည်။

"ခံစစ်ကို ပြန်ပြင်ကြစမ်း၊ တိုက်ပွဲဝင်ဖို့ ပြင်ကြ"

ပြင်းထန်လှသော ဟောက်သံကြီးတစ်ခုမှာ တစ်လောကလုံး၌ ပဲ့တင်ထပ်သွားတော့သည် မြို့ရိုးပေါ်တွင် ဗိုလ်ချုပ်တစ်ဦးက လျင်မြန်စွာ အမိန့်ပေးလိုက်သည်။

မြင်းတပ်တို့၏ တိုက်ခိုက်မှု အရှိန်မှာ အလွန်ပင် မြန်ဆန်လှပေရာ ရေခဲတံတားကို ဖြတ်တောက်ရန် ကြိုးစားနေခြင်းမှာ အချိန်ကုန် လူပင်ပန်း ဖြစ်ရုံသာမကဘဲ အချိန်လည်း မမီတော့ပါချေ။ ဝုန်းခနဲ မြည်သံများနှင့်အတူ ခဏတာအတွင်းမှာပင် မျက်နှာချင်းဆိုင်မှ နိုင်ငံအသီးသီး၏ မဟာမိတ်တပ်ဖွဲ့များမှာ တဟုန်ထိုး တိုက်ခိုက်လာကြပြီ ဖြစ်ရာ၊ ကုန်းမြေ ရေခဲတံတား၏အကျိုးသက်ရောက်မှုကြောင့် နှစ်ဖက် စစ်တပ်များမှာ အပြင်းအထန် စတင် တိုက်ခိုက်မိကြတော့သည်။

"ဟိန်းးးးး"

အဆက်မပြတ်သော မြင်းဟိန်းသံများကိုသာ ကြားလိုက်ရပြီး၊ သံချပ်ကာမြင်းစစ်သည် တစ်ဦးပြီးတစ်ဦးမှာ မြို့ရိုးပေါ်သို့ တဟုန်ထိုး တက်ရောက်လာကြရာ၊ မြို့စောင့်စစ်သည် အများအပြားမှာ တုံ့ပြန်ရန် အချိန်မရလိုက်ဘဲ စစ်မြင်းတို့၏ တိုက်ခိုက်ခြင်းကို ခံလိုက်ရကာ မြို့ရိုးပေါ်မှနေ၍ အောက်သို့ ပြုတ်ကျသွားကြရတော့သည်။

ဘုန်းခနဲ တိုက်ခိုက်သံများမှာ အဆက်မပြတ် မြည်ဟည်းနေတော့သည်။ မြင်းတပ်များ ပါဝင်လာမှုကြောင့် မြို့ရိုးတစ်ခုလုံးမှာ ချက်ချင်းပင် ရှုပ်ထွေးသွားခဲ့ရပြီ ဖြစ်၏။

"စစ်ကြောင်းဖွဲ့ကြစမ်း"

ကျယ်လောင်လှသော ဟိန်းဟောက်သံကြီးတစ်ခုမှာ တစ်လောကလုံး၌ ပဲ့တင်ထပ်သွားခဲ့ပြီး၊ မြို့ရိုးပေါ်ရှိ မဟာထန် စစ်တပ်မှာ လျင်မြန်စွာ အပြောင်းအလဲ ပြုလုပ်လိုက်ကြလျက် အစွမ်းထက်လှသော စစ်ကြောင်းများကို ဖန်တီးလိုက်ကြတော့သည်။ ခြောက်ယောက်တစ်ဖွဲ့စီ စနစ်ဖြင့် လူတိုင်း၏ ကျင့်စဉ်စွမ်းအားများကို တစ်သားတည်း ဖြစ်အောင် ပေါင်းစပ်လိုက်ကြရာ သံမဏိပြား တစ်ချပ်အလား ခိုင်မာသွားတော့သည်။

"ဘုန်း"

နောက်ထပ် သံချပ်ကာမြင်းစစ်သည်တစ်ဦးမှာ လူနှင့်မြင်း တစ်သားတည်း ဖြစ်နေလျက် တဟုန်ထိုး ပြေးဝင်လာပြန်သည်။ သို့သော်လည်း ယခုတစ်ကြိမ်တွင် သူ့အား ဆီးကြိုလိုက်သည်မှာမူ ပေါင်တစ်ထောင်ခန့် ခွန်အားများ ပါဝင်နေသည့် ထက်ရှလှသော ဓားရှည် ငါးစင်းပင် ဖြစ်တော့သည်။

******

အခန်း (၂၁၈၂) ဒုတိယအဆင့် အစီအစဉ်

ထိုစစ်သည်မှာ မြို့ရိုးပေါ်သို့ တဟုန်ထိုး တက်ရောက်လာသည်နှင့် တစ်ပြိုင်နက် လေးလံလှသော ဓားရှည်များဖြင့် ငါးပိုင်း သို့မဟုတ် ခြောက်ပိုင်းခန့် ပိုင်းဖြတ်ခြင်းကို ခံလိုက်ရပြီး၊ သူ၏အလောင်းမှာ ပြင်းထန်လှသော အရှိန်အဟုန်များကြောင့် မြို့ရိုးထိပ်မှနေ၍ အောက်သို့ တိုက်ရိုက်ပြုတ်ကျသွားတော့သည်။

မြို့စောင့်တပ်ဖွဲ့၏ တင်းကြပ်လှသော လေ့ကျင့်မှုများမှာ ဤအချိန်တွင် ချက်ချင်းပင် အကျိုးသက်ရောက်မှု ရှိလာခဲ့ပြီး ခဏတာအတွင်းမှာပင် မြို့ရိုးပေါ်၌ စည်းကမ်းတကျ ပြန်လည်ဖြစ်သွားတော့သည်။

များပြားလှသော စစ်တပ်ကြီးမှာ အဆက်မပြတ် တစ်သုတ်ပြီးတစ်သုတ် ရေခဲတံတားကို ဖြတ်ကျော်ကာ တဟုန်ထိုး တိုက်ခိုက်လာကြရာ၊ နှစ်ဖက်စစ်တပ်မှာ အနီးကပ် ဓားချင်းယှဉ် တိုက်ခိုက်မိကြပြီး အချိန်တိုင်းတွင် များပြားလှသော သူများ သေဆုံးနေကြရသည်။

သို့သော်လည်း ဝမ်ချောင်ကိုယ်တိုင် အထူးလေ့ကျင့်ပေးထားသော စစ်သည်တစ်သိန်းရှိသည့် မြို့စောင့်တပ်ဖွဲ့ကြီးကို ရင်ဆိုင်ရာတွင် ရှီဘုရင်မ ဖန်တီးပေးထားသည့် ရေခဲတံတား ရှိနေသည့်တိုင် ခဏတာအတွင်းမှာတော့ လွယ်လင့်တကူ ဖောက်ထွင်းနိုင်ရန် ခဲယဉ်းနေဆဲပင် ဖြစ်သည်။

ဤမျှသာမက…

ဝုန်းခနဲ မြည်သံနှင့်အတူ အလင်းတန်း တစ်ချက် လက်သွားခဲ့ပြီးနောက် ပေါက်ကွဲနိုင်သော စွမ်းအားများ ပါဝင်သည့် စစ်ရထားမြားတံ တစ်စင်းမှာ မျက်တောင်တစ်ခတ်အတွင်း တဟုန်ထိုး ထွက်ပေါ်လာခဲ့ပြီး ရေခဲတံတားကို ဖောက်ထွက်သွားသည်။ သံမဏိအလား ခိုင်မာနေသော ရေခဲတံတားပေါ်တွင် ဧရာမ အပေါက်ကြီး တစ်ပေါက် ဖြစ်ပေါ်သွားစေခဲ့ပြီး ထိုထိတ်လန့်စရာကောင်းသော ခွန်အားများကြောင့် ရေခဲအပိုင်းအစများမှာ နေရာအနှံ့ လွင့်စဉ်သွားတော့သည်။

ဤအခိုက်အတန့်၌ စစ်ရထားလေး အားလုံးမှာ လမ်းကြောင်း ပြောင်းလဲလိုက်ကြပြီး လေထဲရှိ ရေခဲတံတားဆီသို့ ဦးတည် ပစ်ခတ်လိုက်ကြတော့သည်။

"ဒီလိုဆိုရင် မဖြစ်ဘူး။ ဒီအတိုင်း ဆက်သွားရင် သံမဏိခံတပ်ကို လုံးဝဖောက်ထွင်းနိုင်မှာ မဟုတ်ဘူး"

အဝေးဆီမှ ကျယ်လောင်သော သတ်ဖြတ်လိုသော အော်ဟစ်သံများကို ကြည့်ရင်း စစ်တပ်ကြီး၏ အနောက်ဘက် ဧရာမ မဟာမိတ် စစ်အလံ ခြောက်ခုအောက်တွင် မတ်မတ်ရပ်နေသော အန်းလုရှန်းမှာမူ မျက်မှောင်ကြုတ်လိုက်မိသည်။

ရှီဘုရင်မ ဝင်ရောက် လှုပ်ရှားလိုက်သဖြင့် မီးဆီပြဿနာကို ဖြေရှင်းနိုင်ခဲ့ပါသော်လည်း လက်ရှိအခြေအနေကို ကြည့်မည်ဆိုပါက သံမဏိခံတပ်ကို ဖောက်ထွင်းပြီး ဤခံတပ်ကြီး၏ တံခါးကို ဖွင့်လှစ်နိုင်ရန်မှာ အလွန်ပင် ဝေးကွာနေသေးသည်။ ဝမ်ချောင်၏ ပြင်ဆင်မှုများမှာ သူထင်မှတ်ထားသည်ထက် များစွာ ပိုမိုပြည့်စုံလှပေရာ ဤခံစစ်မျဉ်း တစ်ခုတည်းဖြင့်ပင် ဝမ်ချောင်သည် သူနှင့်အတူ ကမ္ဘာပျက်သည့်တိုင်အောင် အချိန်ဆွဲ တိုက်ခိုက်နေနိုင်စွမ်း ရှိပေသည်။

သို့သော် ဝမ်ချောင်က အချိန်ဆွဲနိုင်ပါသော်လည်း အန်းလုရှန်းမှာမူ အချိန်ဆွဲ၍ မရနိုင်ပါချေ၊ ယခုအချိန်အထိ နိုင်ငံအသီးသီး၏ မဟာမိတ်တပ်ဖွဲ့ဘက်မှ စစ်သည် သုံးလေးသိန်းခန့် သေဆုံးခဲ့ပြီ ဖြစ်ပါသော်လည်း ဝမ်ချောင်၏ဘက်တွင်မူ အထိအခိုက် အနည်းငယ်မျှသာ ရှိနေသေးသည်။ ဤအတိုင်းသာ ဆက်သွားပြီး အခြေအနေကို မဖောက်ထွက်နိုင်ပါက နိုင်ငံအသီးသီး၏ စစ်သည်များ၏ စိတ်ဓာတ်အတွက် ဧရာမ ထိုးနှက်ချက်ကြီး တစ်ခု ဖြစ်လာပေလိမ့်မည်။

"ကောင်းရှန်း... ကြည့်ရတာ ဒုတိယအဆင့် အစီအစဉ်ကို အကောင်အထည် ဖော်ရတော့မယ် ထင်တယ်"

အန်းလုရှန်းက ရုတ်တရက် ခေါင်းလှည့်ကာ အနောက်ရှိ ကောင်းရှန်းကို လှမ်းကြည့်ရင်း ဆိုလိုက်သည်။

"အင်း"

ကောင်းရှန်းက ခေါင်းညိတ်လိုက်သည်။ တိုက်ပွဲ စတင်သည်မှာ များစွာ မကြာသေးမီမှာပင် ဤမျှလောက် မြန်မြန်ဆန်ဆန် ဒုတိယအဆင့် အစီအစဉ်ကို အသုံးပြုရလိမ့်မည်ဟု သူ့အနေဖြင့်လည်း မထင်မှတ်ထားခဲ့ပါချေ။ သို့သော် ရှေ့တန်းမှ တိုက်ပွဲအခြေအနေများကို ကြည့်မည်ဆိုပါက ဒုတိယအဆင့် အစီအစဉ်ကို အသုံးပြုခြင်းမှလွဲ၍ အခြား ပိုမိုကောင်းမွန်သော နည်းလမ်း မရှိတော့ပါချေ။

"ဒါပေမဲ့ ဒီလိုလုပ်လိုက်ရင် ကျွန်တော်တို့ဘက်က တော်တော်လေး အသာမရတဲ့ အခြေအနေ ဖြစ်သွားလိမ့်မယ်။ ဘာဖြစ်လို့လဲဆိုတော့ တစ်ဖက်လူရဲ့ ဗိုလ်ချုပ်တွေက အခုချိန်ထိ တစ်ယောက်မှ လှုပ်ရှားတာ မရှိသေးလို့ပဲ"

ကောင်းရှန်းက စကားဆိုလိုက်ရင်း သူ၏မျက်နှာပေါ်၌ အနည်းငယ် စိုးရိမ်ပူပန်မှု အရိပ်အယောင်များ ပေါ်ထွက်နေတော့သည်။

ကောင်းရှန်း၏ အစီအစဉ်အရဆိုလျှင် မူလက ဤစစ်ပွဲကြီးတွင် အနည်းဆုံး နှစ်ဖက်စလုံးမှ ဗိုလ်ချုပ်များ တစ်ဦးပြီးတစ်ဦး ဝင်ရောက် တိုက်ခိုက်လာမည့် အချိန်အထိ ရောက်ရှိသွားမှသာလျှင် သင့်တော်သော အချိန်အခါ ဖြစ်မည်ဟု တွက်ဆထားခဲ့ခြင်း ဖြစ်သည်။ သို့သော် အဝေးဆီသို့ လှမ်းကြည့်လိုက်ပါက မဟာထန် ဘက်မှ ခံစစ်မှာ အလွန်ပင် အစွမ်းထက်လှသဖြင့် ယခုအချိန်အထိ နှစ်ဖက်ဗိုလ်ချုပ်များမှာ တစ်ဦးမျှ ဝင်ရောက် တိုက်ခိုက်ခြင်း မရှိသေးပါချေ။

"ဂရုစိုက်မနေနိုင်တော့ဘူး"

အန်းလုရှန်း၏ မျက်ဝန်းထဲ၌ အလင်းတန်း တစ်ချက် လက်သွားခဲ့ပြီး လျင်မြန်စွာ ဆုံးဖြတ်ချက် ချလိုက်သည် -

"ရှန့်ကုန်းအကြီးအကဲ ... နောက်ပိုင်း ကိစ္စတွေကိုတော့ ခင်ဗျားကိုပဲ အပ်လိုက်တော့မယ်"

နောက်ဆုံးစကားကို ပြောလိုက်သည့်အခါတွင်မူ အန်းလုရှန်းသည် ဘေးနားရှိ ရှန့်ကုန်းအကြီးအကဲ ဆီသို့ လှည့်ကြည့်ကာ ဆိုလိုက်ခြင်းပင်။

"ဟားဟား…မင်းတို့တွေ သေချာ စဉ်းစားပြီးရင် ရပါပြီ။ ထိုက်ရှီ သခင်ကြီးက အစောကတည်းက မှာထားပြီးသားပါ၊ စစ်မြေပြင်ကို ရောက်တာနဲ့ ငါ အပါအဝင် လူတိုင်းက မင်းရဲ့အစီအစဉ်ကိုပဲ နာခံရမယ်လို့လေ"

ရှန့်ကုန်းအကြီးအကဲက မာနထောင်လွှားစွာ ရယ်မောလိုက်ရင်း အနည်းငယ်မျှ ဂရုမစိုက်သည့် ပုံစံဖြင့် ဆိုလိုက်သည်။

"ဒါပေမဲ့ ငါ အရင်ကြိုပြောထားပါရစေ။ မင်း လိုချင်တဲ့ အဲဒီပစ္စည်းက အရေအတွက် သိပ်မရှိဘူး။ စုစုပေါင်း သုံးလုံးပဲ ရှိတယ်၊ အဲဒါကလည်း အဖွဲ့အစည်းထဲမှာ ရှိတဲ့ လက်ကျန် အားလုံးပဲ။ တစ်ကြိမ် ကျရှုံးသွားတာနဲ့ မင်း အတွက် ဒုတိယအကြိမ် အခွင့်အရေး ဆိုတာ ရှိလာမှာ မဟုတ်ဘူးနော်။ ဒါ့အပြင် အဲဒီပစ္စည်းကို ပစ်လွှတ်ဖို့အတွက် စွမ်းအင် ဖြည့်တင်းဖို့ အချိန် အများကြီး လိုအပ်တယ်၊ အမှန်တကယ် စတင်လှုပ်ရှားဖို့အတွက် ခဏလောက် စောင့်ရပါလိမ့်ဦးမယ်"

"အင်း"

အန်းလုရှန်းက တစ်ခွန်းသာ ထူးလိုက်ပြီး နောက်ထပ် ဘာမှ ဆက်မပြောတော့ပါချေ။

အခြားတစ်ဖက်တွင်မူ ရှန့်ကုန်းအကြီးအကဲသည် ထိုအခြေအနေကို မြင်တွေ့လိုက်ရသည့်အခါ အေးစက်စက် ပြုံးလိုက်ရင်း လျင်မြန်စွာ လှည့်ထွက်သွားတော့သည်။

ရှေ့တန်းတွင်မူ တိုက်ပွဲများ ဆက်လက် ဖြစ်ပွားနေဆဲဖြစ်ကာ အချိန်တိုင်းတွင် များပြားလှသောစစ်သည်များ သေဆုံးနေကြရသည်။ နိုင်ငံအသီးသီး၏ မဟာမိတ်တပ်ဖွဲ့များဘက်မှ သေဆုံးမှုမှာ မဟာထန်ထက် များစွာပိုမိုများပြားလှပေသည်။

မြည်သံများနှင့်အတူ ရေခဲလွှာများ ကွဲအက်သွားသည့်အသံများမှာ နားထဲသို့ ရောက်ရှိလာတော့သည်။ သံမဏိခံတပ်၏ အရှေ့ဘက်ခြမ်းတွင် ပေရာချီ ကျယ်ဝန်းပြီး အလွန်အမင်း ခိုင်မာလှသော ရေခဲတံတားတစ်စင်းမှာ စစ်ရထားလေးများ၏ အဆက်မပြတ် တိုက်ခိုက်မှုများအောက်တွင် ရုတ်တရက် အက်ကြောင်းပေါင်းများစွာ ဖြစ်ပေါ်လာခဲ့ပြီး နောက်ဆုံးတွင် ဝုန်းခနဲ မြည်သံကြီးနှင့်အတူ လုံးဝပြိုကျသွားတော့သည်။ ရေခဲတံတားပေါ်ရှိ မရေမတွက်နိုင်သော နိုင်ငံအသီးသီးမှ စစ်သည်များမှာ အော်ဟစ်လိုက်ကြရင်း လူကောမြင်းပါ အောက်သို့ ချက်ချင်း ပြုတ်ကျသွားကြတော့သည်။

"အချိန်ကျလောက်ပြီ"

ထိုအချိန်မှာပင် သံမဏိခံတပ် အတွင်းပိုင်း၌ အေးစိမ့်လှသော လေပြေတစ်ခု တိုက်ခတ်သွားခဲ့ပြီး ဝမ်ချောင်၏ ဆံနွယ်ရှည်များမှာ လေထဲ၌ လွင့်ပျံနေတော့သည်။ သူသည် မြို့ရိုးအပြင်ဘက်သို့ မော့ကြည့်လိုက်ရင်း ကောင်းကင်ယံအထိ ပျံ့လွင့်နေသော သတ်ဖြတ်လိုသည့် အော်ဟစ်သံများကို နားထောင်ကာ သူ၏နှုတ်ခမ်းထောင့်တွင် ရုတ်တရက် အဓိပ္ပာယ် နက်ရှိုင်းလှသော အပြုံးတစ်ခု ပေါ်ထွက်လာတော့သည်။

"ဘာဖြစ်လို့လဲ"

ဘေးနားရှိ ထုံလော့ ဗိုလ်ချုပ်ကြီး အာပုစစ်သည် ရှေ့တန်းမှ တိုက်ပွဲအခြေအနေများကို အာရုံစိုက်နေခဲ့ရာ ဝမ်ချောင်၏စကားကို ကြားလိုက်ရသည့်အခါ တစ်စုံတစ်ရာကို လျင်မြန်စွာ ရိပ်မိသွားခဲ့ပြီး ချက်ချင်းပင် ခေါင်းလှည့်ကာ လှမ်းကြည့်လိုက်သည်။

"ဘာမှ မထူးခြားရင်တော့ ဟိုဘက်ကလည်း လှုပ်ရှားတော့မယ် ထင်တယ်"

ဝမ်ချောင်က မျက်နှာချင်းဆိုင်ကို လှမ်းကြည့်ရင်း တိုးညှင်းစွာ ရယ်မောကာ ဆိုလိုက်သည်။

"ဘာ"

အာပုစစ်၏ အမူအရာမှာ မှင်တက်သွားခဲ့ပြီး အလွန်အမင်း အံ့ဩသွားတော့သည်။

"အရှင် ဆိုလိုတာက အန်းလုရှန်းဘက်မှာ ဖုံးကွယ်ထားတဲ့ နည်းလမ်းတစ်ခုခု ရှိနေသေးတယ်ပေါ့"

"ဒီလောက်လေးနဲ့တင် မြို့ကို ဖောက်ထွင်းနိုင်မှာ မဟုတ်ဘူးဆိုတာကို အန်းလုရှန်းလည်း တော်တော်လေး နားလည်ထားမှာပါ၊ အကယ်၍ သူက ဒီလောက်လေးနဲ့တင် ရပ်သွားမယ်ဆိုရင်တော့ ငါ သူ့ကို အထင်ကြီးမိတာ မှားသွားပြီပေါ့"

ဝမ်ချောင်က လက်စွပ်ကို အသာအယာ ခါလိုက်ရင်း အေးဆေးစွာ ဆိုလိုက်သည်။

အမည်းရောင်ဝတ်စုံဝတ် အဖွဲ့အစည်း၏ မျက်စိကျခြင်းကို ခံရကာ ကိုယ်စားလှယ်အဖြစ် ရွေးချယ်ခံရရုံသာမက လောကဆန္ဒ၏ ရွေးချယ်ခြင်းကိုပါ ခံရပြီး ကမ္ဘာ့သားတော်အဖြစ် ခန့်အပ်ခံရသူ တစ်ဦးအနေဖြင့် ဤမျှလောက် နည်းလမ်းလေးသာ ရှိလိမ့်မည်တော့ မဟုတ်ပါချေ။ အန်းလုရှန်းတွင် အပြင်ပန်း၌ မြင်တွေ့နေရသည့် ခွန်အားမျှသာ ရှိနေမည် မဟုတ်ကြောင်းကို ဝမ်ချောင်ကောင်းကောင်း သိရှိထားပြီး ဖြစ်သည်။

တဖျပ်ဖျပ် မြည်သံများနှင့်အတူ စကားပြောနေစဉ်အတွင်းမှာပင် ရုတ်တရက်ဆိုသလို သိန်းငှက်တစ်ကောင်မှာ အတောင်ပံများကို ခတ်လိုက်ရင်း သံမဏိခံတပ်၏ ကောင်းကင်ယံတွင် အတောင်ပံများကို ချက်ချင်း ရုပ်သိမ်းလိုက်ကာ ထက်မြက်လှသော မြားတံတစ်စင်းအလား မြို့တွင်းသို့ ကျဆင်းလာတော့သည်။ ခဏတာအတွင်းမှာပင် မဟာထန်ဘက်မှ သတင်းပို့ စစ်သည်တစ်ဦးမှာ ခြေလှမ်းများကို ခပ်သွက်သွက် လှမ်းလာခဲ့ပြီး လက်ထဲတွင်လည်း လှံရှည်တစ်ခုကို ကိုင်ဆောင်ထားလျက် ဝမ်ချောင်ရှိရာ အရပ်ဆီသို့ လျင်မြန်စွာ ရောက်ရှိလာတော့သည်။

"အရှင် ဗိုလ်ချုပ်ရွှယ်ဆီက သတင်း ရောက်လာပါတယ်၊ ကြည့်ရှုတော်မူပါ"

"ဒါ့အပြင် မင်းဆရာ သခင်ကြီးဆီကလည်း သတင်းရောက်လာပါတယ်၊ အကုန်လုံး အဆင်သင့် ဖြစ်နေပါပြီ။ အရှင့်ရဲ့ အမိန့်ကို အချိန်မရွေး နာခံဖို့ အသင့်ပါပဲ"

ထိုသတင်းပို့ စစ်သည်မှာ ဒူးတစ်ဖက် ထောက်လိုက်ရင်း ရိုသေစွာ ဆိုလိုက်သည်။ ထို့နောက် စကားပြောနေစဉ်မှာပင် ဦးခေါင်းကို ငုံ့လိုက်ကာ လက်နှစ်ဖက်ကို အထက်သို့ မြှောက်လျက် လက်ထဲတွင် ယခုလေးတင် ရရှိထားသော စာတစ်စောင်ကို ဝမ်ချောင်ဆီသို့ ကမ်းပေးလိုက်သည်။

ဝမ်ချောင်က လက်ကို လှုပ်ရှားလိုက်ကာ သတင်းပို့ စစ်သည်၏လက်ထဲမှ စာကို လှမ်းယူလိုက်ပြီး တစ်ချက်မျှသာ ကြည့်လိုက်ရာ သူ၏ နှုတ်ခမ်းထောင့်တွင် အပြုံးတစ်ခု ချက်ချင်း ပေါ်ထွက်လာတော့သည်။

"အကုန် အသင့်ဖြစ်နေပြီ၊ အရှေ့လေ တိုက်ဖို့ပဲ လိုတော့တယ်။ အန်းလုရှန်း... အခုတော့ မင်းတစ်ယောက်ပဲ ကျန်တော့တယ်၊ မင်းမှာ ဘာအရည်အချင်းတွေ ရှိလို့ ပုန်ကန်ရဲပြီး မဟာထန်ကို အမြစ်ပြတ် သုတ်သင်ချင်နေတာလဲ ဆိုတာကို ငါ့ကို ပြစမ်းပါဦး"

ဝမ်ချောင်က လက်နှစ်ဖက်ကို အနောက်သို့ ပစ်ထားလိုက်ရင်း မြောက်ဘက်ရှိ နိုင်ငံအသီးသီး၏ မဟာမိတ်တပ်ဖွဲ့များ ရှိရာ အရပ်ဆီသို့ လှမ်းကြည့်လိုက်ရာ သူ၏ အမူအရာမှာ ခန့်မှန်းရ ခက်ခဲလှပေသည်။

"မြန်မြန်လုပ်ကြစမ်း… မင်းတို့လို အသုံးမကျတဲ့ ကောင်တွေ၊ မြန်မြန်လုပ်ကြစမ်း၊ သခင်ကြီးရဲ့ အမိန့်ကို မင်းတို့ မကြားဘူးလား"

"သခင်ကြီးရဲ့ ကိစ္စတွေ နှောင့်နှေးသွားရင် မင်းတို့ အားလုံး သေလမ်းပဲ ရှိတော့မယ်"

အချိန်များ ဖြည်းညင်းစွာ ကုန်လွန်သွားခဲ့ပြီးနောက် စစ်မြေပြင်၏ မြောက်ဘက်၊ နိုင်ငံအသီးသီး၏ စစ်တပ်ကြီး၏ အနောက်ဘက်တွင် ဒေါသတကြီး ဆဲဆိုသံများ ထွက်ပေါ်လာတော့သည်။

သေချာကြည့်ရှုလိုက်မည်ဆိုပါက ဟာလာဟင်းလင်းပြင် တစ်နေရာ၌ အမည်းရောင်ဝတ်စုံဝတ် ရာနှင့်ချီ၍ စစ်ကြောင်း ဆယ်ခုကျော်ခန့် ခွဲထားကြလျက် မြေပြင်ပေါ်တွင် ဝပ်စင်းကာ တစ်စုံတစ်ရာကို ရေးဆွဲနေကြသည်ကို မြင်တွေ့ရမည် ဖြစ်သည်။ ထိုအရာများမှာ ဧရာမ စစ်အစီအရင် ကြီးများပင် ဖြစ်တော့သည်။

ထိုအမည်းရောင်ဝတ်စုံဝတ်များ၏ အရှေ့တွင်မူ ခေါင်းဆောင်ပုံပေါက်သော လူတစ်ဦးမှာ လက်ထဲတွင် မီတာ ဆယ်ကျော်ခန့် ရှည်လျားသော အနက်ရောင် ကြာပွတ်ကြီးတစ်ခုကို ကိုင်ဆောင်ထားလျက် အားကုန် လွှဲယမ်းနေတော့သည်။

ဖျန်းခနဲ မြည်သံနှင့်အတူ ကြာပွတ်ရှည်ကြီးမှာ လွှဲယမ်းသွားခဲ့ပြီး လှုပ်ရှားမှု အနည်းငယ် နှေးကွေးနေသော အမည်းရောင်ဝတ်စုံဝတ်တစ်ဦး၏ ကိုယ်ပေါ်သို့ ပြင်းထန်စွာ ရိုက်ချလိုက်ရာ ဖြတ်ခနဲ အသံကိုသာ ကြားလိုက်ရပြီး ထိုသူ၏ ကိုယ်ပေါ်ရှိ အဝတ်အစားများမှာ စုတ်ပြဲသွားခဲ့ကာ ကြာပွတ်ရှည်ပေါ်ရှိ ဆူးချွန်များက သူ၏ကိုယ်ပေါ်တွင် သွေးထွက်နေသော ဒဏ်ရာကြီးတစ်ခုကို တိုက်ရိုက်ဖြစ်ပေါ်သွားစေခဲ့ပြီး သွေးများမှာ ရေပန်းအလား ပန်းထွက်လာတော့ရာ ဂန်ချီစွမ်းအင်များပင်လျှင် တားဆီးနိုင်စွမ်း မရှိတော့ပါချေ。

ထိုအမည်းရောင်ဝတ်စုံဝတ်မှာ ချက်ချင်းပင် နာကျင်လွန်းသဖြင့် တစ်ကိုယ်လုံး တုန်ခါသွားခဲ့ရပြီး မနေနိုင်ဘဲ လေအေးတစ်ချက် ရှူသွင်းလိုက်မိကာ နာကျင်စွာဖြင့် တိုးညှင်းစွာ ဟစ်အော်လိုက်မိသည်။

"မြန်မြန်လုပ်ကြစမ်း"

"မြန်မြန်လုပ်ကြစမ်း"

"မင်းတို့ အလှည့် ရောက်လုနီးပြီ၊ ဂန်ချီ စွမ်းအင်တွေ သွင်းပေးကြစမ်း"

နောက်ဆုံးစကားကို ပြောလိုက်သည့်အခါတွင်မူ ထိုအမည်းရောင်ဝတ်စုံဝတ် ခေါင်းဆောင်၏ မျက်ဝန်းများမှာ ရက်စက်ကြမ်းတမ်းသွားခဲ့ပြီး လက်ထဲရှိ ကြာပွတ်ရှည်မှာ ဘေးပတ်ဝန်းကျင်၌ စနစ်တကျ စစ်ကြောင်းများ ဖွဲ့စည်းကာ ရပ်နေကြသော သောင်းနှင့်ချီသည့် နိုင်ငံအသီးသီး၏ စစ်သည်များဆီသို့ ဦးတည်သွားတော့သည်။

လူတိုင်းမှာ အသက်ရှူပင် ရပ်တန့်သွားကြရပြီး မျက်နှာပေါ်၌ ထိတ်လန့်ကြောက်ရွံ့မှု အရိပ်အယောင်များ အထင်အရှား ပေါ်ထွက်လာကြပါသော်လည်း လျင်မြန်စွာပင် ရှေ့သို့ တက်သွားကြကာ ကိုယ်တွင်းရှိ တလိမ့်လိမ့် ထွက်ပေါ်နေသော ဂန်ချီ စွမ်းအင်များကို စစ်အစီအရင်၏ အောက်ခြေများအတွင်းသို့ သွင်းပေးလိုက်ကြတော့သည်။

ထိုဂန်ချီ စွမ်းအင်များ ဝင်ရောက်လာမှုနှင့်အတူ စစ်အစီအရင်၏ အရှိန်အဝါမှာ ပိုမို၍ အားကောင်းလာတော့သည်။

ဝုန်း…

မြည်ဟည်းသံနှင့်အတူ မြေကြီးများ တုန်ခါသွားခဲ့ပြီး အလယ်ဗဟို အကျဆုံး နေရာရှိ ဧရာမစစ်အစီအရင်ကြီး၏ စွမ်းအင်များ ပေါက်ကွဲထွက်ပေါ်လာကာ လျင်မြန်စွာ လည်ပတ်သွားသောကြောင့် မုန်တိုင်းအလား ပြင်းထန်လှသော အရှိန်အဝါကြီးတစ်ခုမှာ စစ်အစီအရင်၏ အလယ်ဗဟိုမှနေ၍ ကောင်းကင်ယံဆီသို့ တဟုန်ထိုး တက်သွားတော့သည်။

ခဏတာ အချိန်တိုအတွင်းမှာပင် ဧရာမ စစ်အစီအရင် ဆယ်ခုကျော်မှာ တစ်ခုပြီးတစ်ခု လင်းလက်လာခဲ့ကြပြီး အောင်မြင်စွာ လည်ပတ်သွားကြတော့သည်။ ထိုစစ်အစီအရင်များ အောင်မြင်စွာ လည်ပတ်သွားမှုနှင့်အတူ ကောင်းကင်နှင့် မြေကြီးကြား၌ ရုတ်တရက် အေးစိမ့်သွားခဲ့ပြီးနောက်၊ စစ်အစီအရင်များ၏ အနောက်ဘက် ယိုကျိုးနယ်မြေတစ်ခုလုံးရှိ လေပြင်းများနှင့် နှင်းမှုန်များမှာ မျက်တောင်တစ်ခတ်အတွင်း တစ်စုံတစ်ရာ၏ ဆွဲငင်ခြင်းကို ခံလိုက်ရသကဲ့သို့ ထိုစစ်အစီအရင် ဆယ်ခုကျော်ရှိရာ အရပ်ဆီသို့ စုစည်းရောက်ရှိလာကြပြီးနောက် လျင်မြန်စွာပင် ကောင်းကင်နှင့် မြေကြီးကို ဖုံးလွှမ်းသွားသော နှင်းမုန်တိုင်းကြီး တစ်ခုအဖြစ်သို့ ပြောင်းလဲသွားတော့သည်။

မျက်တောင်တစ်ခတ်အတွင်းမှာပင် အနောက်ဘက်မှ ဆွဲငင်လာသော ထိုနှင်းမှုန်များမှာ စစ်အစီအရင်ကိုယ်တိုင် ဖန်တီးထားသော နှင်းမှုန်များနှင့်အတူ ကောင်းကင်ကို ဖုံးလွှမ်းကာ မြေကြီးကို ကွယ်ဝှက်လျက် ရှေ့တည့်တည့်ရှိ စစ်မြေပြင်ရှိရာ အရပ်ဆီသို့ လျင်မြန်စွာ တဟုန်ထိုး တိုက်ခတ်လာတော့သည်။

ခဏတာအတွင်းမှာပင် နှင်းမှုန်များမှာ စစ်မြေပြင်ကို ဖုံးလွှမ်းသွားခဲ့ပြီး တလောကလုံးကိုပင် လွှမ်းခြုံသွားတော့သည်။ နှင်းမြူများ ထပ်မံထွက်ပေါ်လာပြန်ပြီ ဖြစ်၏။

"နောက်ဆုံးတော့ စတင်ပြီပေါ့"

သံမဏိခံတပ် အတွင်းပိုင်း၌ ဝမ်ချောင်သည် မျက်လုံးများကို အနည်းငယ် မှေးထားလိုက်ရင်း ကောင်းကင်ယံသို့ ဖြည်းညင်းစွာ မော့ကြည့်ကာ တိုးညှင်းစွာ ရေရွတ်လိုက်သည်။

ပုံမှန်မဟုတ်သော အခြေအနေများ ဖြစ်ပေါ်လာပါက သေချာပေါက် မကောင်းဆိုးဝါး တစ်စုံတစ်ရာ ရှိနေမည် ဖြစ်သည်

လက်ရှိအခြေအနေကို ကြည့်မည်ဆိုပါက ယိုကျိုးဘက်မှ သေချာပေါက် စတင်လှုပ်ရှားနေပြီ ဖြစ်ကြောင်း သံသယဖြစ်ဖွယ် မရှိပါချေ။

ဝုန်း

စကားပြောရသည်မှာ ကြာပါသော်လည်း လက်တွေ့တွင်မူ အလွန်ပင် မြန်ဆန်လှပေသည်။ ဤအတွေးလေးမှာ ဦးနှောက်ထဲ၌ ဖြတ်ပြေးသွားရုံ ရှိသေးမီမှာပင် နောက်တစ်ခဏ၌ အုတ်အော်သောင်းနင်း ဖြစ်နေသော အသံများမှာ နားထဲသို့ ချက်ချင်း ရောက်ရှိလာတော့သည်၊ ကျယ်လောင်သော သတ်ဖြတ်လိုသော အော်ဟစ်သံများ ဖြစ်ပါသော်လည်း မြို့ပြင်မှ ထွက်ပေါ်လာခြင်း မဟုတ်ဘဲ သံမဏိခံတပ် အတွင်းပိုင်းမှနေ၍ တိုက်ရိုက် ပေါက်ကွဲထွက်ပေါ်လာခြင်းပင်။

"သတင်းပို့ပါတယ်"

ခဏတာ အချိန်တိုအတွင်းမှာပင် နောက်ထပ် သတင်းပို့စစ်သည်တစ်ဦးမှာ ထိတ်လန့်တုန်လှုပ်နေသော အမူအရာဖြင့် စစ်မြင်းကို စီးနင်းကာ ဝမ်ချောင်ရှိရာ အရပ်ဆီသို့ အရှိန်အဟုန်ဖြင့် ပြေးဝင်လာတော့သည်။

"အရှင် မကောင်းတော့ဘူး၊ မြို့ထဲမှာ ပုန်ကန်မှု ဖြစ်နေပြီ။ သတ္တမ စစ်ကြောင်းက စစ်သည်တွေ ဘာဖြစ်လို့လဲ မသိဘူး၊ ရူးသွပ်သွားသလိုဖြစ်ပြီး ကျွန်တော်တို့ရဲ့ စစ်သည်တွေကို ရုတ်တရက် ဝင်တိုက်နေကြတယ်။ ပြီးတော့ မြို့တံခါးဆီကို မြန်မြန်ဆန်ဆန် သွားနေကြတယ်၊ ဗိုလ်ချုပ်တွေလည်း မတားဆီးနိုင်တော့လို့ အရှင်ရဲ့အမိန့်ကို တောင်းခံနေပါတယ်"

"ဘာ… ရိုင်းစိုင်းလိုက်တာ… သူတို့ ဘယ်နှစ်ယောက် ရှိလို့လဲ၊ ဘယ်လိုလုပ် မတားဆီးနိုင်ရတာလဲ"

အာပုစစ်သည် ထိုစကားကို ကြားလိုက်ရသည့်အခါ ပြင်းထန်စွာ ဒေါသထွက်သွားတော့သည်။ စစ်အမိန့်မှာ တောင်ကြီးတစ်လုံးအလား လေးလံလှပေရာ အမိန့်ကို ဖီဆန်သူတိုင်း သေဒဏ်သာ ဖြစ်၏။ ဤသည်မှာ မဟာထန်၏ အရေးကြီးဆုံးသော စစ်စည်းကမ်းပင်ဖြစ်ရာ ဤကဲ့သို့သော စစ်တပ်တွင်း ပုန်ကန်မှုမျိုး ယခင်က တစ်ခါမျှ မဖြစ်ဖူးခဲ့ပါချေ။

"ဗိုလ်ချုပ်ကို တင်ပြပါတယ်၊ သူတို့ အရေအတွက်က မများပါဘူး၊ အယောက် နှစ်ရာလောက်ပဲ ရှိတာပါ။ ဒါပေမဲ့ သူတို့ရဲ့ ခွန်အားကတော့ အရမ်းကို ကြီးမားလွန်းတယ်၊ စစ်တပ်ထဲမှာ ဘယ်သူမှ မတားဆီးနိုင်ဘူး၊ တပ်မှူးတွေတောင် သူတို့ရဲ့ ပြိုင်ဘက် မဟုတ်ဘူး ဖြစ်နေတယ်"

သတင်းပို့ စစ်သည်မှာ ခေါင်းကို ငုံ့ထားလျက် နဖူးမှ ချွေးစေးများ ပျံနေတော့သည်။

"ဒီကောင်တွေ"

အာပုစစ်၏မျက်နှာမှာ ပြာနှမ်းသွားခဲ့ပြီး သံမဏိ လက်သီးအစုံကို ချက်ချင်းပင် တင်းတင်းဆုပ်လိုက်ရာ မြည်သံများ ပေါ်ထွက်လာတော့သည်။

"မျိုးနွယ်ခြားဘုရင် မင်း ဒီမှာပဲ နေပြီး ကြီးကြပ်ပေးပါ၊ ငါ သွားပြီး ဖြေရှင်းလိုက်မယ်"

စစ်တပ်တွင်း ပုန်ကန်မှုဆိုသည်မှာ အလွန်အမင်း ရှက်ရွံ့ဖွယ်ကောင်းသော ကိစ္စရပ်ကြီးပင်ဖြစ်ရာ ဝမ်ချောင်မှာ စစ်တပ်ကြီး၏ ဗိုလ်ချုပ်ကြီး ဖြစ်သဖြင့် လွယ်လင့်တကူ ထွက်ခွာသွား၍ မဖြစ်ပါချေ။ ထို့ပြင် စစ်တပ်ကြီး၏ နေရာအနှံ့၌ သူ၏စီမံခန့်ခွဲမှုနှင့် ဆုံးဖြတ်ချက်များ လိုအပ်နေသေးရာ ယခုအချိန်တွင် လှုပ်ရှားနိုင်သူမှာ သူ တစ်ဦးတည်းသာ ရှိတော့သည်။ ၎င်းအပြင် ထုံလော့မျိုးနွယ်စုကြီး မဟာထန်သို့ ခိုလှုံလာခဲ့စဉ်ကတည်းက ထုံလော့ ဗိုလ်ချုပ်ကြီး ဟူသော ရာထူးမှာ ထိုက်ကျုံး ဧကရာဇ်လက်ထက်ကတည်းက စစ်တရားသူကြီး [Military Judge / 军法官] ရာထူးကိုပါ ပူးတွဲတာဝန်ယူထားရခြင်းဖြစ်ရာ၊ စစ်တပ်တွင်း ပုန်ကန်မှုများကို ဖြေရှင်းရန်မှာ မူလကတည်းက ထုံလော့ ဗိုလ်ချုပ်ကြီး၏ တာဝန်များထဲမှ တစ်ခုပင် ဖြစ်တော့သည်။

အာပုစစ်သည် ထိုစကားကို ပြောပြီးသည်နှင့် တစ်ပြိုင်နက် လှည့်ထွက်သွားခဲ့ပြီးနောက် နဂါးနှင့် ကျားများအလား ခန့်ညားလှသော ခြေလှမ်းများဖြင့် မိုးကြိုးလျှပ်စီးနှယ် ပြတ်သားမြန်ဆန်စွာ ပုန်ကန်မှုအသံများ ထွက်ပေါ်လာရာ အရပ်ဆီသို့ ခပ်သွက်သွက် လျှောက်သွားတော့သည်။

******