အခန်း ၇၉၂

အခန်း (၇၉၂) - ကြယ်ကွဲပင်လယ်သို့ ဆိုက်ရောက်ခြင်း၊ ကမ္ဘာဦးနဂါးလက်သီးနှင့် လေဟာနယ်သန့်စင်ခြင်းအဆင့် ကန္တာရသားရဲအား ချေမှုန်းခြင်း(၂)။

ဤအချိန်တွင် အမှတ် (၈၈) တာအိုကျောင်းတော်၏ စံအိမ်တော်အတွင်း၌...။

'နောက်ဆုံးတော့ ရောက်လာပြီပေါ့...'

ကျိုးစွေ့က မျက်လုံးများကို အသာမှေးစင်းလိုက်၏။ သူ၏ ကိုယ်ပေါ်တွင် လွှမ်းမိုးနေသည့် မည်းမှောင်သော ဘေးဒုက္ခအငွေ့အသက်များမှာ ခဏချင်းအတွင်း ပျောက်ကွယ်သွားပြီး သွေးပျက်ဖွယ်ကပ်ဘေးများလည်း အစအနဖျောက်သွားလေပြီ။

ဖုန်းရှီးမြို့တော်ကို ကြယ်ကွဲပင်လယ်သို့ ပြောင်းရွှေ့ရန် ဆုံးဖြတ်ချက်မှာ အမှန်တကယ်ပင် ကြီးမားသော ဘေးဒုက္ခတစ်ခုကို ကျော်လွှားနိုင်ခဲ့ခြင်းပင် ဖြစ်၏။ အကယ်၍ အချိန်မီ မပြောင်းရွှေ့နိုင်ခဲ့လျှင် ဖုန်းရှီးမြို့တော်တစ်ခုလုံး မည်မျှ သေကြေပျက်စီးသွားမည်ကို မည်သူမျှ မသိနိုင်ပေ။

သို့သော်လည်း ဖုန်းရှီးမြို့တော်၏ အထက်တွင် ဘေးဒုက္ခအငွေ့အသက်အချို့ လွှမ်းမိုးနေဆဲပင်။ အဘယ်ကြောင့်ဆိုသော် ကြယ်ကွဲပင်လယ်သည်လည်း လုံခြုံဘေးကင်းသော နေရာတစ်ခု မဟုတ်သောကြောင့် ဖြစ်သည်။

ဤနေရာသည် ကန္တာရသားရဲများ၏ နယ်မြေဖြစ်ပြီး ထိပ်တန်းမျိုးနွယ်စုကြီးများ ကြီးစိုးရာ နေရာတစ်ခုလည်း ဖြစ်ပေသည်။ ထိုနေရာ၌ အစစ်အမှန်ဝိညာဉ်အဆင့် သတ္တဝါများပင် ရှင်သန်နေထိုင်ကြ၏။

အနည်းငယ်မျှ သတိလွတ်သွားသည်နှင့် ကြီးမားသော ဘေးဒုက္ခနှင့် ကြုံတွေ့ရနိုင်ပေသည်။ ထို့ကြောင့်ပင် နဂါးပြာတိုက်ကြီးရှိ မျိုးနွယ်စုအသီးသီးသည် ကြယ်ကွဲပင်လယ်ပြင်တွင် အရင်းအမြစ်များ ပေါများလှသည်ကို သိကြသော်လည်း ဤနေရာသို့ လာရောက်အခြေချရန် မဝံ့မရဲ ဖြစ်နေကြခြင်းပင်။

"ယောက်ျား... ကျွန်မ အခုလေးတင် သတင်းတစ်ခု ရထားတယ်။ အစ်မတော်ဖုန်းရှီးက တခြားမျိုးနွယ်စုက ခန္ဓာပေါင်းစည်းခြင်းအဆင့် ကျင့်ကြံသူတွေနဲ့ တိုက်ခိုက်ရင်း ဒဏ်ရာအတော်လေး ရသွားခဲ့တယ်တဲ့။ သူမအနေနဲ့ ဒဏ်ရာတွေ သက်သာဖို့အတွက် အချိန်အတော်ကြာ တံခါးပိတ်ကျင့်ကြံပြီး ကုသရမယ် ထင်တယ်။ ဒါကြောင့် အချိန်တိုအတွင်းမှာ အစ်မတော်ဖုန်းရှီးက ကျွန်မတို့ကို ကူညီပေးနိုင်မှာ မဟုတ်တော့ဘူး...”

ပိုင်စုကျဲ့က အလွန်လေးနက်သော မျက်နှာထားဖြင့် ပြောလိုက်၏။

အဘယ်ကြောင့်ဆိုသော် ဖုန်းရှီးတာအိုအရှင်သည် ဖုန်းရှီးမြို့တော်၏ တစ်ဦးတည်းသော ခန္ဓာပေါင်းစည်းခြင်းအဆင့် အစွမ်းထက်သူ ဖြစ်သောကြောင့်ပင်။

ထိုကဲ့သို့သော ပုဂ္ဂိုလ်မျိုး လက်မလှုပ်နိုင်တော့ပါက ဖုန်းရှီးမြို့တော်အတွက် ကြီးမားသော ဆုံးရှုံးမှု ဖြစ်လာပေမည်။ အကယ်၍ ခန္ဓာပေါင်းစည်းခြင်းအဆင့် ကန္တာရသားရဲများ၏ တိုက်ခိုက်မှုကို ခံရပါက တစ်မြို့တော်လုံး ဘေးဒုက္ခနှင့် ရင်ဆိုင်ရနိုင်ချေ ရှိသည်။

"ဒီအနီးအနားမှာ ဖုန်းရှီးမြို့တော်ကို ခြိမ်းခြောက်နိုင်တဲ့ သတ္တဝါတွေ ရှိနေသလား...”

ကျိုးစွေ့က မေးလိုက်၏။

"ဒါကတော့... အစ်မတော်ဖုန်းရှီးရဲ့ ပြောပြချက်အရဆိုရင်တော့ မရှိနိုင်ပါဘူး။ အရင်က သူမ ဒီအမည်မသိကျွန်းကို ရောက်လာတုန်းက ခန္ဓာပေါင်းစည်းခြင်းအဆင့် ကန္တာရသားရဲသုံးကောင်ကို တွေ့ခဲ့ဖူးတယ်တဲ့။ ဒါပေမဲ့ အားလုံးကို သူမကပဲ လက်စသတ်ခဲ့ပြီးပါပြီ…”

“လောလောဆယ် ဒီကျွန်းပေါ်မှာ အမြင့်ဆုံးအနေနဲ့ လေဟာနယ်သန့်စင်ခြင်းအဆင့် ကန္တာရသားရဲတွေပဲ ရှိနိုင်ပါတော့တယ်။ ဒါပေမဲ့ ကျွန်းရဲ့အပြင်ဘက်မှာ ဘာတွေရှိနေမလဲဆိုတာကိုတော့ မသိရသေးဘူး...”

ပိုင်စုကျဲ့က ဆက်လက်ပြောကြားလိုက်သည်။

"ဒါပေမဲ့လည်း အချိန်တိုအတွင်းမှာတော့ ကျွန်မတို့ ဒီကျွန်းကနေ ထွက်သွားဖြစ်မှာ မဟုတ်ပါဘူး။ ကျွန်းပေါ်မှာရှိတဲ့ အရင်းအမြစ်တွေနဲ့တင် ကျွန်မတို့ကို အချိန်အတော်ကြာ ထောက်ပံ့ပေးဖို့ လုံလောက်ပါတယ်...”

"တကယ်တော့ ဒီကျွန်းရဲ့ အကျယ်အဝန်းကလည်း မသေးဘူးလေ။ အချင်းက ကီလိုမီတာနှစ်သန်းလောက် ရှိတာပဲ။ မိုးကြိုးတောင်တန်းရဲ့ ကီလိုမီတာ သန်းပေါင်းများစွာ ရှည်လျားမှုနဲ့ မနှိုင်းယှဉ်နိုင်ပေမဲ့ ခြေကုပ်ယူဖို့အတွက်တော့ နေရာကောင်းတစ်ခုပါပဲ...”

ပိုင်စုကျဲ့က ကျွန်း၏အခြေအနေကို အကျဉ်းချုံး ရှင်းပြလိုက်၏။

လက်ရှိအခြေအနေအရ ဤကျွန်းပေါ်တွင် နေထိုင်ခြင်းသည် ဘေးကင်းသည်ဟု ဆိုနိုင်၏။ အနည်းဆုံး ကျွန်းအတွင်းပိုင်းရှိ ကန္တာရသားရဲများသည် ဖုန်းရှီးမြို့တော်ကို ခြိမ်းခြောက်နိုင်စွမ်း မရှိချေ။

အဘယ်ကြောင့်ဆိုသော် ဤကျွန်းသည် ဖုန်းရှီးတာအိုအရှင်ကိုယ်တိုင် စေ့စေ့စပ်စပ် ရွေးချယ်ထားခြင်း ဖြစ်သောကြောင့် လူသားကျင့်ကြံသူများ အခြေချနေထိုင်ရန် အလွန်သင့်တော်ပေသည်။

ထို့အပြင် ဤကျွန်းတွင် သတ္တမအဆင့် စိတ်ဝိညာဉ်ကြောလည်း ရှိနေပြီး စိတ်ဝိညာဉ်စွမ်းအင်မှာလည်း အတော်လေး သိပ်သည်းလှရာ ဖုန်းရှီးမြို့တော်၏ သတ္တမအဆင့် အစီအရင်ကြီးကို အပြည့်အဝ ထောက်ပံ့ပေးနိုင်သည်။

"ဖုန်းရှီးတာအိုအရှင်က ဒီကျွန်းကို ဘယ်လိုများ ရှာတွေ့ခဲ့တာလဲ...”

ကျိုးစွေ့က စူးစမ်းလိုစိတ်ဖြင့် မေးလိုက်၏။

အဘယ်ကြောင့်ဆိုသော် မိုးကြိုးတောင်တန်းသည် နဂါးပြာတိုက်ကြီးအတွင်း ပင်လယ်နှင့် နီးစပ်သည်ဟု ဆိုနိုင်သော်လည်း ကြယ်ကွဲပင်လယ်နှင့်မူ အလွန်ပင် ဝေးကွာလှသောကြောင့် ဖြစ်၏။

ကြယ်ကွဲပင်လယ်၏ အတွင်းပိုင်းအထိ ဝင်ရောက်ပြီး သင့်တော်သော ခြေကုပ်စခန်းတစ်ခု ရှာဖွေရန်မှာ မလွယ်ကူလှချေ။ ကျွန်းအများစုကို မျိုးနွယ်စုကြီးများက သိမ်းပိုက်ထားပြီးဖြစ်ရာ မျိုးနွယ်စုငယ်များ လက်ထဲသို့ ကျရောက်ရန် အခွင့်အရေးမှာ မရှိသလောက်ပင်။

"ဒါကတော့ အစ်မတော်ဖုန်းရှီးရဲ့ ပင်ကိုယ်စွမ်းရည် မန္တန်အတတ်နဲ့ သက်ဆိုင်တယ်။ ကြားဖူးတာကတော့ အစ်မတော်ဖုန်းရှီးက ဟင်းလင်းပြင်မန္တန်တစ်ခုကို တတ်ကျွမ်းထားတယ်တဲ့။ ဒါကြောင့် သူမရဲ့ အလျင်နှုန်းက ခန္ဓာပေါင်းစည်းခြင်းအဆင့် ကျင့်ကြံသူတွေထဲမှာ ထိပ်ဆုံးကရှိနေပြီး အလွန်ကို မြန်ဆန်လှတယ်...”

"ပုံမှန်ဆိုရင် အစ်မတော်ဖုန်းရှီးက အပြင်လောကမှာ လှည့်လည်သွားလာပြီး အခွင့်အရေးတွေ ရှာဖွေလေ့ရှိတယ်။ ကြယ်ကွဲပင်လယ်ရဲ့ အတွင်းပိုင်းအထိလည်း ရောက်ဖူးတော့ ဒီပင်လယ်အကြောင်းကို အတော်လေး သိထားတာပေါ့။ ဒါကြောင့်လည်း လူသားတွေ အခြေချဖို့ သင့်တော်တဲ့ ဒီကျွန်းကို ရှာတွေ့ပြီး ဖုန်းရှီးမြို့တော်အတွက် ခိုလှုံရာအဖြစ် သတ်မှတ်ခဲ့တာ ဖြစ်မှာပါ...”

ပိုင်စုကျဲ့က ရှင်းပြလိုက်၏။

"ဒါကြောင့်ကိုး...”

ကျိုးစွေ့က ခေါင်းညိတ်လိုက်၏။

ဤဖုန်းရှီးတာအိုအရှင်သည် အမှန်တကယ်ပင် ပါရမီထူးချွန်ပြီး အလွန်လည်း သတိကြီးလှပေသည်။ ဘေးမသီ ရန်မခစေရန်အတွက် ကြိုတင်ပြင်ဆင်တတ်သူ ဖြစ်ရာ ထင်မှတ်မထားသော ဘေးဒုက္ခများနှင့် ကြုံတွေ့ရလျှင်ပင် အေးအေးဆေးဆေး ကျော်ဖြတ်နိုင်ပေသည်။

ဖုန်းရှီးတာအိုအရှင်ကဲ့သို့ တာဝန်သိတတ်သော ခန္ဓာပေါင်းစည်းခြင်းအဆင့် အစွမ်းထက်သူ ရှိနေ၍သာ ဖုန်းရှီးမြို့တော်မှ လူသားများ အသက်ရှင်ကျန်ရစ်ခဲ့ခြင်း ဖြစ်၏။

သို့မဟုတ်ပါက အခြားမျိုးနွယ်စုများ၏ လက်ချက်ဖြင့် ပျက်စီးဆုံးရှုံးခဲ့ရသည်မှာ ကြာပြီဖြစ်ရာ ယနေ့အထိ ရှင်သန်နိုင်ရန် မဖြစ်နိုင်ပေ။

ဝုန်း... ဝုန်း...

ထိုအခိုက်တွင် ဖုန်းရှီးမြို့တော်တစ်ခုလုံး၌ ကြီးမားလှသော အနီရောင်အစီအရင် အလင်းကာရံကြီးတစ်ခု ပေါ်ပေါက်လာပြီး တစ်မြို့လုံးကို လွှမ်းခြုံသွားကာ အကာအကွယ် ပေးထားလေ၏။ တစ်ချိန်တည်းမှာပင် အစွမ်းထက်သော ကန္တာရသားရဲများသည် အရပ်မျက်နှာ အသီးသီးမှ ဝိုင်းရံလာပြီး ဖုန်းရှီးမြို့တော်ကို စတင်တိုက်ခိုက်ကြတော့သည်။

နတ်ဘုရားအသွင်ပြောင်းအဆင့်နှင့် လေဟာနယ်သန့်စင်ခြင်းအဆင့် ကန္တာရသားရဲ အမြောက်အမြားသည် ဒီရေအလား တိုးဝှေ့လာပြီး ဟိန်းဟောက်သံများ ပေးနေကြ၏။

ကြောက်မက်ဖွယ်ကောင်းသော မန္တန်များနှင့် စွမ်းရည်များသည် ဖုန်းရှီးမြို့တော်၏ အစီအရင်ပေါ်သို့ တစ်ခုပြီးတစ်ခု ကျရောက်လာပြီး ဖျက်ဆီးအား အလွန်ပြင်းထန်လှသည်။

ဖုန်းရှီးမြို့တော် ရုတ်တရက် ပေါ်ပေါက်လာခြင်းက ဤကျွန်းပေါ်ရှိ ကန္တာရသားရဲများကို တုန်လှုပ်သွားစေသည်မှာ သိသာလှ၏။ ၎င်းတို့သည် အန္တရာယ်ရှိသည်ဟု ခံစားမိသဖြင့် စုရုံးရောက်ရှိလာကာ ဤကျူးကျော်သူကို မောင်းထုတ်ရန် ကြိုးပမ်းနေကြခြင်းပင်။

"ဒုက္ခပါပဲ ယောက်ျား... ဖုန်းရှီးမြို့တော်က ကန္တာရသားရဲတွေရဲ့ တိုက်ခိုက်မှုကို ခံနေရပြီ။ လေဟာနယ်သန့်စင်ခြင်းအဆင့် ကန္တာရသားရဲ ရာနဲ့ချီပြီး ဝိုင်းထားကြတာ။ ဒီသားရဲဒီရေကို ခုခံဖို့အတွက် မြို့စားနန်းတော်က ကျင့်ကြံသူအားလုံးကို စုရုံးနေပြီ...”

ပိုင်စုကျဲ့၏မျက်နှာမှာ ပျက်ယွင်းသွားပြီး မြို့စားနန်းတော်မှ ပေးပို့လာသော သတင်းစကားကို ချက်ချင်း ရရှိလိုက်၏။

လေဟာနယ်သန့်စင်ခြင်းအဆင့်နှင့် နတ်ဘုရားအသွင်ပြောင်းအဆင့် ကျင့်ကြံသူတိုင်း ထိုသတင်းကို ရရှိကြသည်။ ဖုန်းရှီးတာအိုအရှင် လက်မလှုပ်နိုင်သည့် အချိန်တွင် လေဟာနယ်သန့်စင်ခြင်းအဆင့် ကျင့်ကြံသူများသည် အမြင့်ဆုံး တိုက်ခိုက်ရေးအင်အားစု ဖြစ်လာတော့သည်။

နတ်ဘုရားအသွင်ပြောင်းအဆင့် ကျင့်ကြံသူများမှာလည်း အရေးပါသော အင်အားစုများဖြစ်ကြရာ မရှိမဖြစ်ဟု ဆိုရပေမည်။

"စိတ်မပူပါနဲ့။ ဖုန်းရှီးမြို့တော်မှာ သတ္တမအဆင့်အစီအရင်ကြီးရဲ့ အကာအကွယ် ရှိနေတာပဲ။ ဒီလို လေဟာနယ်သန့်စင်ခြင်းအဆင့် ကန္တာရသားရဲတွေလောက်ကတော့ ဘာမှမဟုတ်ပါဘူး။ မြို့တော်ရဲ့ အစီအရင်ကို ဖောက်ထွက်နိုင်မှာ မဟုတ်ဘူး...”

ကျိုးစွေ့က တည်ငြိမ်စွာ ပြောလိုက်၏။

"ဟုတ်သားပဲ... ဒီကန္တာရသားရဲတွေလောက်နဲ့ ကျွန်မတို့ ဖုန်းရှီးမြို့တော်ရဲ့ သတ္တမအဆင့်အစီအရင်ကို ဘယ်လိုလုပ် ဖျက်ဆီးနိုင်မှာလဲ...”

ထိုစကားကို ကြားရမှသာ ပိုင်စုကျဲ့၏ စိတ်အနည်းငယ် လျော့ပါးသွားရချေသည်။

"ဒါပေမဲ့ မြို့စားနန်းတော်က လေဟာနယ်သန့်စင်ခြင်းအဆင့်နဲ့ နတ်ဘုရားအသွင်ပြောင်းအဆင့် ကျင့်ကြံသူတွေကို စုရုံးခိုင်းနေတယ်။ တစ်ခုခု ဆွေးနွေးစရာရှိလို့ ထင်တယ်..."

"ကောင်းပြီလေ... သွားကြည့်ကြတာပေါ့...”

ကျိုးစွေ့က ခေါင်းညိတ်လိုက်၏။