အခန်း ၇၉၃

အခန်း (၇၉၃) - ကြယ်ကွဲပင်လယ်သို့ ဆိုက်ရောက်ခြင်း၊ ကမ္ဘာဦးနဂါးလက်သီးနှင့် လေဟာနယ်သန့်စင်ခြင်းအဆင့် ကန္တာရသားရဲအား ချေမှုန်းခြင်း(၃)။

နာရီဝက်ခန့် ကြာပြီးနောက်။

ဖုန်းရှီးမြို့တော်၏ မြို့စားနန်းတော်ရှိ ကွင်းပြင်ကျယ်တစ်ခုတွင် လေဟာနယ်သန့်စင်ခြင်းအဆင့်နှင့် နတ်ဘုရားအသွင်ပြောင်းအဆင့် ကျင့်ကြံသူများ အားလုံး စုရုံးရောက်ရှိနေကြ၏။ ဖုန်းရှီးမြို့တော်၏ အထူးချွန်ဆုံး ကျင့်ကြံသူများအားလုံး ဤနေရာသို့ ရောက်ရှိလာကြပြီး မကြုံစဖူးသော အစည်းအဝေးကြီးတစ်ခုကို ပြုလုပ်ကြတော့သည်။

'ဒါက...'

ကျိုးစွေ့က နှလုံးသားမျက်လုံးစွမ်းအားကို အသာအယာ အသုံးပြုလိုက်ရာ ဤနေရာတွင် ရှိနေသော ကျင့်ကြံသူများ၏ အဆင့်အတန်းကို ချက်ချင်း သိရှိလိုက်၏။ ကျင့်ကြံသူအများစုမှာမူ သူ၏စူးစမ်းမှုကို လုံးဝ သတိမထားမိကြချေ။

အဘယ်ကြောင့်ဆိုသော် ဤသည်မှာ ပိုမိုမြင့်မားသော အဆင့်မှ စွမ်းအားဖြစ်သောကြောင့်ပင်။

နတ်ဘုရားအသွင်ပြောင်းအဆင့် ကျင့်ကြံသူများကို ထည့်မတွက်လျှင်ပင် ပိုင်စုကျဲ့အပါအဝင် လေဟာနယ်သန့်စင်ခြင်းအဆင့် ကျင့်ကြံသူစုစုပေါင်း သုံးရာငါးဆယ်ခြောက်ဦး ရှိနေလေသည်။

လေဟာနယ်သန့်စင်ခြင်းအဆင့် ဘိုးဘေးများ၏ အဆင့်အတန်းက အဘယ်ကြောင့် ဤမျှ မြင့်မားနေရသည်ကို နားလည်နိုင်ပေသည်။ ကြီးမားလှသော ဖုန်းရှီးမြို့တော်ကြီးတွင်ပင် ထိုမျှလောက်သာ ရှိသဖြင့် သူတို့၏ အဆင့်အတန်းမှာ ခန့်မှန်း၍မရနိုင်အောင် မြင့်မားနေခြင်း ဖြစ်၏။

ထို့အပြင် လေဟာနယ်သန့်စင်ခြင်းအဆင့်၏ အစွမ်းအစနှင့်လည်း သက်ဆိုင်ပေသည်။ စိတ်ဝိညာဉ်လောကတွင် လေဟာနယ်သန့်စင်ခြင်းအဆင့်သို့ ရောက်ရှိသူတိုင်းအား ထိပ်တန်းကျွမ်းကျင်သူဟု သတ်မှတ်၍ ရနိုင်သည်။

အဘယ်ကြောင့်ဆိုသော် မျိုးနွယ်စုတစ်စုလုံးတွင် ခန္ဓာပေါင်းစည်းခြင်းအဆင့် ကျင့်ကြံသူမှာ တစ်ရာကျော်မျှသာ ရှိသောကြောင့် ဖြစ်၏။

"အားလုံးပဲ... အခုအခြေအနေကို နားလည်ကြလိမ့်မယ်လို့ ယုံကြည်ပါတယ်။ ကျွန်မတို့ အခုရောက်နေတာက ကြယ်ကွဲပင်လယ်ဖြစ်ပြီး အလွန်အန္တရာယ်များတဲ့ ပင်လယ်ပြင်တစ်ခုပါ...”

"ကံကောင်းတာတစ်ခုကတော့ ကျွန်မတို့ ရောက်နေတဲ့ကျွန်းက ကြယ်ကွဲပင်လယ်ရဲ့ လူသူမနီးတဲ့ အရပ်မှာ ရှိနေတာပဲ။ စူးစမ်းချက်တွေအရ ဒီအနီးအနားမှာ အစွမ်းထက်တဲ့ မျိုးနွယ်စုတွေ မရှိတာကြောင့် လူသားတွေ အခြေချဖို့ သင့်တော်တယ်...”

"ဒါကြောင့် ဖုန်းရှီးမြို့တော်ရဲ့ ပထမဆုံးခြေလှမ်းကတော့ ဒီကျွန်းပေါ်က ကန္တာရသားရဲတွေကို ရှင်းလင်းဖို့ပါပဲ။ ဒါမှသာ ဒီကျွန်းဟာ ကျွန်မတို့ လူသားတွေရဲ့ နယ်မြေအစစ်အမှန် ဖြစ်လာမှာပါ...”

စကားပြောနေသူမှာ ထောင်ချီလီ ဖြစ်၏။

သူမသည် ကျမ်းစာတိုက်၏ ဌာနမှုးဖြစ်သလို၊ တစ်ဦးတည်းသော သတ္တမအဆင့် အစီအရင်ပညာရှင်နှင့် ဖုန်းရှီးမြို့တော်၏ ဒုတိယမြို့စားလည်း ဖြစ်ပေသည်။ လေဟာနယ်သန့်စင်ခြင်း ပြည့်စုံခြင်းအဆင့်သို့ ရောက်ရှိထားသူဖြစ်ရာ သူမ၏ အစွမ်းအစနှင့် အဆင့်အတန်းမှာ ပြောစရာမလိုအောင်ပင်။

ဖုန်းရှီးတာအိုအရှင် တံခါးပိတ်ကျင့်ကြံနေချိန်တွင် သူမသည် မြို့စားအရာကို ကိုယ်စားယူထားသူ ဖြစ်၏။ သူမက လူအများကို တစ်ချက်ဝေ့ကြည့်လိုက်ရာ ကိုယ်မှ ခန့်ညားထည်ဝါသော အရှိန်အဝါများ ထွက်ပေါ်နေချေသည်။

"မြို့စားမင်း... ကျွန်တော်တို့ အခု ဘာတွေလုပ်ရမလဲ...”

လေဟာနယ်သန့်စင်ခြင်းအဆင့် ဘိုးဘေးတစ်ဦးက ဖုန်းရှီးမြို့တော်၏ အစီအစဉ်ကို သိလိုသဖြင့် မေးလိုက်၏။

"နတ်ဘုရားအသွင်ပြောင်းအဆင့်နဲ့ အထက်က ကျင့်ကြံသူတိုင်း ဒီသားရဲရှင်းလင်းရေးမှာ ပါဝင်ရမယ်။ နောင်နှစ်ပေါင်း တစ်ရာအတွင်း လေဟာနယ်သန့်စင်ခြင်းအဆင့် ကျင့်ကြံသူတိုင်းဟာ လေဟာနယ်သန့်စင်ခြင်းအဆင့် သားရဲတစ်ကောင်ကို သတ်ရမယ်...”

"နတ်ဘုရားအသွင်ပြောင်းအဆင့် ကျင့်ကြံသူတိုင်းကတော့ အဲ့ဒီအဆင့်တူ သားရဲဆယ်ကောင်ကို သတ်ရပါမယ်။ သတ်ဖြတ်နိုင်တဲ့ သားရဲအရေအတွက် များလေလေ ရရှိမယ့် အကျိုးခံစားခွင့်တွေကလည်း များလေလေပဲ...”

"ဒီတာဝန်က ရေရှည်စီမံကိန်းပဲ။ ဒီကျွန်းပေါ်က သားရဲတွေအားလုံးကို ရှင်းလင်းပြီးတဲ့အထိ ဆက်လုပ်သွားမှာပါ...”

ထောင်ချီလီက သတ်ဖြတ်လိုသော အငွေ့အသက်များဖြင့် ရှင်းပြလိုက်လေသည်။

လူသားမျိုးနွယ်သည် ကြယ်ကွဲပင်လယ်တွင် အတည်တကျ ရှင်သန်လိုပါက ဤကျွန်းကို အပြည့်အဝ ထိန်းချုပ်နိုင်ရန် လိုအပ်ပေသည်။ အကယ်၍ ဤကျွန်းကိုပင် မထိန်းချုပ်နိုင်ပါက အခြားနေရာများအကြောင်း စဉ်းစားနေရန်ပင် မလိုတော့ချေ။

"မြို့စားမင်း... ဒီကျွန်းပေါ်မှာ သားရဲတွေ ဘယ်လောက်တောင် ရှိနေတာလဲ။ သူတို့ရဲ့ အစွမ်းကရော ဘယ်လောက်အထိ ရှိသလဲ...”

လေဟာနယ်သန့်စင်ခြင်းအဆင့် ဘိုးဘေးတစ်ဦးက ထပ်မံမေးမြန်းလိုက်၏။

"ဒါကိုတော့ စိတ်ချထားလိုက်ပါ။ အရင်က မြို့စားမင်းကိုယ်တိုင် ဒီကျွန်းကို ရောက်ခဲ့ပြီး ခန္ဓာပေါင်းစည်းခြင်းအဆင့် ကန္တာရသားရဲအားလုံးကို သုတ်သင်ခဲ့ပြီးပါပြီ။ အခု ဒီကျွန်းပေါ်မှာ အဲ့ဒီအဆင့်ရှိတဲ့ သားရဲတစ်ကောင်မှ မရှိတော့ဘူး။ လေဟာနယ်သန့်စင်ခြင်းအဆင့်နဲ့ အောက်က သားရဲတွေပဲ ရှိတော့တယ်...”

"ဒါပေမဲ့ ဒီနေရာက ကြယ်ကွဲပင်လယ်ဖြစ်တဲ့အတွက် သားရဲတွေရဲ့ နယ်မြေဖြစ်နေတော့ အရေအတွက်ကတော့ အတော်လေး များတယ်။ အနည်းဆုံးတော့ လေဟာနယ်သန့်စင်ခြင်းအဆင့် သားရဲနှစ်ထောင်ကျော်လောက် ရှိနေသေးတာပေါ့။ နတ်ဘုရားအသွင်ပြောင်းအဆင့်ရှိတဲ့ ကန္တာရသားရဲတွေကတော့ ပိုတောင်များပါသေးတယ်...”

ထောင်ချီလီက အေးအေးလူလူပင် ပြောလိုက်သည်။

"ဘာ..."

ထိုစကားကို ကြားလိုက်ရချိန်တွင် ကျင့်ကြံသူအများအပြား၏ မျက်နှာများမှာ ဖြူလျော့သွားကြလေသည်။

လေဟာနယ်သန့်စင်ခြင်းအဆင့်ရှိ ကန္တာရသားရဲပေါင်း နှစ်ထောင်ကျော်ဆိုသည်မှာ အလွန်ပင် လွန်လွန်းလှပေသည်။ ဤသည်မှာ ကျွန်းတစ်ကျွန်းတည်း၌သာ ရှိသေးခြင်းပင် ဖြစ်၏။

ကြယ်ကွဲပင်လယ် ပင်လယ်ပြင်ပေါ်တွင် ကျွန်းပေါင်း မည်မျှရှိနေပြီး လေဟာနယ်သန့်စင်ခြင်းအဆင့် ကန္တာရသားရဲပေါင်း မည်မျှရှိနေမည်ကို မည်သူကမျှ မသိနိုင်ပေ။

ယခင်က ဤပင်လယ်ပြင်သည် အလွန်အန္တရာယ်များကြောင်း ကြားဖူးခဲ့ကြသော်လည်း ယခုကဲ့သို့ အန္တရာယ်ကြီးမားလိမ့်မည်ဟု မထင်မှတ်ထားခဲ့ကြပေ။ ကျွန်းတစ်ကျွန်းတည်းရှိ ကန္တာရသားရဲများကပင် သူတို့ကို အခက်တွေ့စေရန် လုံလောက်နေလေပြီ။

"စီနီယာထောင်... ကန္တာရသားရဲတွေရဲ့ အရေအတွက်က အရမ်းများလွန်းနေတာပဲ။ ကျုပ်တို့ရဲ့ အစွမ်းနဲ့ဆိုရင် ကျွန်းပေါ်မှာရှိတဲ့ ကန္တာရသားရဲတွေကို အကုန်လုံး ရှင်းလင်းပစ်ဖို့ဆိုတာ မဖြစ်နိုင်သလောက်ပါပဲ...”

လေဟာနယ်သန့်စင်ခြင်းအဆင့် ဘိုးဘေးများစွာက ကူကယ်ရာမဲ့ ပြောလိုက်ကြ၏။

သူတို့သည် မိမိ၏အစွမ်းအစကို သိကြပေသည်။ ကန္တာရသားရဲများသည် အသိဉာဏ်မရှိသော တိရစ္ဆာန်ရိုင်းများသာ ဖြစ်သော်လည်း၊ သူတို့၏ခန္ဓာကိုယ်မှာ အလွန်သန်မာ၍ သွေးမျိုးဆက်လျှို့ဝှက်စွမ်းရည်များစွာလည်း ရှိကြပေသည်။

အကယ်၍ အသက်နှင့်လဲ၍ တိုက်ခိုက်လာပါက လေဟာနယ်သန့်စင်ခြင်းအဆင့် ဘိုးဘေးအနည်းငယ်သာ တစ်ဦးချင်း တိုက်ခိုက်ပြီး အနိုင်ယူနိုင်ပေလိမ့်မည်။ မိုးကြိုးတောင်တန်းတွင် ဖြစ်ပွားခဲ့စဉ်ကပင် သူတို့သည် လူအများစုပေါင်း ဝိုင်းဝန်းတိုက်ခိုက်မှသာ အနိုင်ရရှိခဲ့ကြခြင်း မဟုတ်ပါလော။

လေဟာနယ်သန့်စင်ခြင်းအဆင့် ကန္တာရသားရဲ နှစ်ထောင်ကျော်ကို မည်သည့်အချိန်အထိ သတ်ဖြတ်ရမည်ကို သူတို့ မခန့်မှန်းနိုင်ကြတော့ပေ။

"ဒါအတွက်တော့ စိတ်ပူစရာ မလိုပါဘူး။ ကျုပ်တို့က ခင်ဗျားတို့ကို ကန္တာရသားရဲတွေအားလုံး တစ်ခါတည်း ရှင်းခိုင်းမှာ မဟုတ်ပါဘူး...”

ထောင်ချီလီက လူအများ၏ စိုးရိမ်မှုကို လျှော့ချပေးရန်အတွက် ဆက်လက်ပြောကြားလိုက်၏။

"တကယ်တော့ ကျုပ်တို့အနေနဲ့ အလျင်လိုစရာ မရှိပါဘူး။ ရှင်းလင်းရေးတာဝန်က နှစ်ပေါင်း ရာချီကြာသွားရင်တောင် ပြဿနာ မရှိဘူး…”

"အကယ်၍ နှစ်ပေါင်းသုံးရာအတွင်းမှာ ဒီကျွန်းကို တစ်သားတည်းဖြစ်အောင် လုပ်နိုင်ပြီး ကန္တာရသားရဲအားလုံးကို သတ်နိုင်ခဲ့ရင် ဒါဟာ တာဝန်ထက်တောင် ကျော်လွန်ပြီး ပြီးမြောက်တာလို့ ဆိုရမှာပါ...”

"လက်ရှိမှာတော့ ဖုန်းရှီးမြို့တော်ရဲ့ ဖိအားကို လျော့ကျသွားအောင် လေဟာနယ်သန့်စင်ခြင်းအဆင့် ကန္တာရသားရဲတစ်စိတ်တစ်ပိုင်းကို ရှင်းပေးရင်ပဲ လုံလောက်ပါပြီ...”

"မြို့တော်ဝန်ကြီးရဲ့ ဒဏ်ရာတွေ အရှင်းပျောက်သွားတာနဲ့ အဲဒီ ကန္တာရသားရဲတွေကို လက်တစ်ဖျောက်တီးရုံနဲ့ ရှင်းပစ်နိုင်မှာပါ...”

ထောင်ချီလီက နှစ်သိမ့်စကား ပြောလိုက်သည်။

"ဪ... ဒီလိုကိုး...”

ထိုစကားကို ကြားရလျှင် လေဟာနယ်သန့်စင်ခြင်းအဆင့် ဘိုးဘေးများစွာက တပြိုင်နက်တည်း ခေါင်းညိတ်လိုက်ကြလေ၏။ အကယ်၍ ထိုသို့ဆိုလျှင်မူ အလွန်အမင်း စိုးရိမ်ရန် မလိုတော့ပေ။ အဘယ်ကြောင့်ဆိုသော် တာဝန်ကာလမှာ အလွန်ပင် လွတ်လပ်မှုရှိနေသောကြောင့် ဖြစ်၏။

တစ်ဦးချင်း တိုက်ခိုက်လျှင် အဆင့်တူကန္တာရသားရဲကို မနိုင်နိုင်သော်လည်း လေဟာနယ်သန့်စင်ခြင်းအဆင့် အဖွဲ့ငယ်တစ်ဖွဲ့ ဖွဲ့စည်းကာ ဝိုင်းတိုက်လျှင်မူ ကန္တာရသားရဲများကို တစ်ကောင်ပြီးတစ်ကောင် သတ်ဖြတ်နိုင်သည်။ ထိုအခါ လူတိုင်း တာဝန်ပြီးမြောက်နိုင်ပေလိမ့်မည်။

အမှန်တကယ်တွင် သူတို့သည် ဖုန်းရှီးတာအိုအရှင်၏ ဒဏ်ရာများ ပျောက်ကင်းသည်အထိ အချိန်ဆွဲနေကြခြင်းသာ ဖြစ်၏။

သူတို့အတွက်လည်း လေဟာနယ်သန့်စင်ခြင်းအဆင့် ကန္တာရသားရဲများဆီမှ ရရှိသည့် ပစ္စည်းများသည် တန်ဖိုးအလွန်ကြီးမားလှပေသည်။ ၎င်းတို့၏အသားမှာ ခန္ဓာကိုယ်ကြံ့ခိုင်မှု တိုးတက်စေသည့် ဆေးဝါးများ ထုတ်လုပ်နိုင်ပြီး သွေးများမှာလည်း အဆောင်မန္တန်ရေးဆွဲရာတွင် အသုံးပြုနိုင်သည်။

အမွေးအမျှင်နှင့် အကြေးခွံများမှာလည်း ရတနာများ ပြုလုပ်ရန် အသုံးဝင်သည်။ လေဟာနယ်သန့်စင်ခြင်းအဆင့် ကန္တာရသားရဲတစ်ကောင်ကို သတ်နိုင်ခြင်းမှာပင် အမြတ်အစွန်းကြီးမားသော ကိစ္စတစ်ခု ဖြစ်လေသည်။

"စီနီယာထောင်... ကျုပ်တို့ ဘယ်တော့ စလှုပ်ရှားရမလဲ...”

တစ်ဦးက မအောင့်အီးနိုင်စွာ မေးလိုက်၏။

"မလောပါနဲ့ဦး...”

"အခု ဖုန်းရှီးမြို့တော်က ကန္တာရသားရဲတွေရဲ့ ဝိုင်းရံတိုက်ခိုက်မှုကို ခံနေရတာမို့ လှုပ်ရှားဖို့ မသင့်တော်သေးဘူး...”

"သူတို့တွေ ပင်ပန်းသွားပြီး ထွက်ခွာသွားတဲ့အချိန်မှ ကျုပ်တို့က တစ်ကောင်ချင်းစီကို ခွဲထုတ်ပြီး သတ်ဖြတ်ရမယ်...”

"အရင်ဆုံး အစီအရင်ရဲ့အစွမ်းကို သုံးပြီး သူတို့ရဲ့ခွန်အားတွေကို အရင်ကုန်ခမ်းအောင် လုပ်ကြတာပေါ့...”

ထောင်ချီလီက လေးနက်စွာ ပြောလိုက်ချေသည်။

"ကောင်းပါပြီ စီနီယာထောင်...”

လေဟာနယ်သန့်စင်ခြင်းအဆင့် ဘိုးဘေးများက ခေါင်းညိတ်လိုက်ကြ၏။

အစီအရင်ကို သုံး၍ ကန္တာရသားရဲများ၏ခွန်အားကို လျှော့ချပြီးမှ တိုက်ခိုက်ခြင်းက အနိုင်ရနိုင်ခြေ ပိုများပေသည်။ သူတို့၏အသာစီးရချက်မှာ ဉာဏ်ပညာရှိခြင်းပင်ဖြစ်ပြီး ကန္တာရသားရဲများမှာမူ ဉာဏ်ပညာ မရှိကြပေ။

ရက်အနည်းငယ် ထပ်မံကုန်ဆုံးသွားပြီးနောက် ဖုန်းရှီးမြို့တော်ကို ဝိုင်းရံထားသော ကန္တာရသားရဲများသည်လည်း ပင်ပန်းနွမ်းနယ်လာကြလေပြီ။

၎င်းတို့သည် အဆက်မပြတ် တိုက်ခိုက်ခဲ့သော်လည်း ဖုန်းရှီးမြို့တော်၏ သတ္တမအဆင့်အစီအရင်ကို မဖျက်ဆီးနိုင်ခဲ့ကြပေ။ ထိုအစီအရင်မှာ လိပ်ခွံကြီးတစ်ခုကဲ့သို့ ခိုင်ခံ့လွန်းလှပေသည်။

၎င်းတို့မှာ အသိဉာဏ်မရှိသော်လည်း ခေါင်းမာလွန်းသည့် လူမိုက်များ မဟုတ်ကြသဖြင့်၊ မတတ်နိုင်မှန်း သိလာသောအခါ တစ်ကောင်ပြီးတစ်ကောင် တောနက်ထဲသို့ ပြန်လည်ဆုတ်ခွာသွားကြလေသည်။

ဤသည်ကို မြင်လိုက်ရသောအခါ ဖုန်းရှီးမြို့တော်ရှိ လေဟာနယ်သန့်စင်ခြင်းအဆင့် ဘိုးဘေးများမှာ စိတ်လှုပ်ရှားသွားကြပြီး အခွင့်အရေး ရောက်လာပြီဖြစ်ကြောင်း သိလိုက်ကြ၏။ ထို့ကြောင့် သူတို့သည် အဖွဲ့များဖွဲ့ကာ မြို့ပြင်သို့ ထွက်ခွာ၍ သင်းကွဲဖြစ်နေသော ကန္တာရသားရဲများကို စတင်လိုက်လံ သတ်ဖြတ်ကြတော့သည်။