အခန်း ၈၀၀

အခန်း (၈၀၀) - နတ်ဘုရားအသွင်ပြောင်း ပြီးပြည့်စုံခြင်းအဆင့်၊ အာဏာရှင်မမကြီး ဟွားစစ်ချင်၊ စားပြီးနားမလည် မလုပ်ရ(၅)။

ညဉ့်နက်ချိန်...

ဖုန်းရှီးမြို့၊ အမှတ် (၈၈) တာအိုကျောင်းတော်။

ရွှစ်...။

ကျိုးစွေ့သည်လည်း သူ၏ လိုဏ်ဂူစံအိမ်ထဲမှ ထွက်ပေါ်လာခဲ့၏။ အချိန်အတိုင်းအတာတစ်ခုအထိ ခက်ခဲကြမ်းတမ်းစွာ ကျင့်ကြံပြီးနောက်တွင် သူ၏ ကျင့်ကြံမှုအဆင့်က သိသိသာသာ တိုးတက်လာခဲ့လေပြီ။

နောက်ထပ် ဆယ်နှစ် သို့မဟုတ် အနှစ်နှစ်ဆယ်ကြာလျှင် နတ်ဘုရားအသွင်ပြောင်းအဆင့် ပြီးပြည့်စုံခြင်းသို့ တက်လှမ်းနိုင်လိမ့်မည်ဟု သူ ခန့်မှန်းထားသည်။

ထိုအခါမှသာ လေဟာနယ်သန့်စင်ခြင်းအဆင့်သို့ တက်လှမ်းရန် သူ ကြိုးစားနိုင်မည် ဖြစ်၏။

ရိုးရိုးသားသားဆိုရလျှင် ဤမျှတိုတောင်းလှသော အချိန်ကာလအတွင်း လေဟာနယ်သန့်စင်ခြင်းအဆင့်သို့ မြန်ဆန်စွာ တက်လှမ်းနိုင်ခြင်းမျိုးက လူသားမျိုးနွယ်ကြား၌ အလွန်တရာ ရှားပါးလှပေသည်။

အမှန်တကယ်တွင် သူ၏ကျင့်ကြံမှု တိုးတက်နှုန်းနှင့် ပတ်သက်၍ သူကိုယ်တိုင် များစွာ ကျေနပ်အားရနေခဲ့၏။

သို့သော် သူ၏ကျင့်ကြံမှု စွမ်းဆောင်ရည်ကို နောက်ထပ် အနည်းငယ်မျှ ပို၍ မြန်ဆန်စေနိုင်မည်ဆိုလျှင် ပိုကောင်းပေမည်။

မည်သို့ပင်ဆိုစေကာမူ ကြယ်ကွဲပင်လယ်ကဲ့သို့ အန္တရာယ်များလှသော နေရာမျိုးတွင် နေထိုင်ရသည်ဖြစ်ရာ၊ ရှေ့ဆက်၍ မည်သို့သော အန္တရာယ်မျိုး ရှိနေနိုင်မည်ကို မည်သူက သိနိုင်ပါမည်နည်း။

နတ်ဘုရားအသွင်ပြောင်းအဆင့်၌သာ ရှိနေခြင်းက ကြယ်ကွဲပင်လယ်၏ အနက်ရှိုင်းဆုံးနေရာများရှိ အန္တရာယ်အမျိုးမျိုးကို ကိုင်တွယ်ဖြေရှင်းရန် လုံလောက်မည် မဟုတ်ပေ။

အနည်းဆုံးအနေဖြင့် မိမိကိုယ်ကို ကာကွယ်နိုင်စွမ်း အတိုင်းအတာတစ်ခုအထိ ရှိလာစေရန် လေဟာနယ်သန့်စင်ခြင်းအဆင့် ကျင့်ကြံသူတစ်ယောက် ဖြစ်လာရန် လိုအပ်ပေသည်။

ထိုသို့ဆိုမှသာ အန္တရာယ်တစ်စုံတစ်ရာနှင့် ရင်ဆိုင်ရချိန်တွင် မြေမြှုပ်စရာ နေရာလေးပင် မကျန်တော့သည်အထိ အဆုံးသတ်သွားရမည့် ဘေးမှ ကင်းဝေးနိုင်မည် ဖြစ်လေသည်။

ဝှစ်...။

ဤသို့ တွေးတောလိုက်ရင်း ကျိုးစွေ့က သူ၏ခြေလှမ်းများကို အရှိန်တင်လိုက်ကာ အိပ်ခန်းဆီသို့ အလျင်အမြန် ပြန်လာခဲ့လိုက်၏။

မည်သို့ပင်ဆိုစေကာမူ သူ၏အိပ်ခန်းထဲတွင် အလွန်တရာ ဆွဲဆောင်မှုရှိပြီး အလှတရားများ ပြည့်နှက်နေသည့် ပြိုင်ဘက်ကင်း အလှလေးတစ်ဦးက သူ့ကို စောင့်ကြိုနေသည် မဟုတ်ပါလော။

သူ၏ အတွင်းပိုင်းရှိ နဂါးဆင်သွေးမျိုးဆက်သည်လည်း ထိန်းချုပ်၍မရအောင် ဆူပွက်လာသည်ကို သူ ခံစားလိုက်ရသည်။

သူက အိပ်ခန်းတံခါးကို ပေါ့ပေါ့ပါးပါးပင် တွန်းဖွင့်လိုက်သော်လည်း မီးများ ပိတ်ထားသဖြင့် မှောင်မည်းနေခဲ့လေသည်။

ဖတ်...။

ကျိုးစွေ့ စကားတစ်ခွန်းမျှ မဆိုနိုင်သေးခင်မှာပင် နူးညံ့ပျော့ပျောင်းသော ခန္ဓာကိုယ်လေးတစ်ခုက ကျောဘက်မှနေ၍ သူ့အား ချက်ချင်းပင် သိုင်းဖက်လိုက်၏။

သူ၏ ကျောပြင်မှနေ၍ လှိုင်းထနေသော အိစက်ညက်ညောသည့် အထိအတွေ့ကို ခံစားလိုက်ရပြီး၊ အလွန်တရာ လန်းဆန်းသွားစေသော ညို့ငင်နိုင်စွမ်းရှိသည့် ရနံ့တစ်ခုကိုလည်း ရရှိလိုက်လေသည်။

'ပိုင်စုကျဲ့ မဟုတ်ပါလား...'

ကျိုးစွေ့ ချက်ချင်းပင် လန့်ဖြန့်သွားခဲ့၏။ လောကကြီး၏ အတွေ့အကြုံရင့်ကျက်လှသော ယောကျ်ားတစ်ယောက်အနေဖြင့် သူ၏ နောက်ကျောဘက်မှ အမျိုးသမီးမှာ ပိုင်စုကျဲ့ မဟုတ်ကြောင်းကို သူ ချက်ချင်းပင် သိလိုက်သည်။

မေးခွန်းထုတ်စရာဖြစ်နေသည်က သူ၏အိပ်ခန်းထဲတွင် အဘယ်ကြောင့် အခြားအမျိုးသမီးတစ်ယောက် ရှိနေရသနည်း ဟူသောအချက်ပင်။

သူက နှလုံးသားမျက်လုံးထိုးထွင်းသိမြင်ခြင်း ပညာရပ်ကို ညင်သာစွာ အသုံးပြုလိုက်သောအခါမှ သူ့အား ရုတ်တရက် သိုင်းဖက်ထားသည့် အမျိုးသမီးမှာ ပျင်းရိလေးတွဲတတ်ပြီး အာဏာပြတတ်သော အလွန်လှပသည့် ဟွားစစ်ချင်မှန်း ချက်ချင်းပင် သဘောပေါက်သွားတော့သည်။

ရိုးရိုးသားသားဆိုရလျှင် ဤအမျိုးသမီးက ညကြီးမင်းကြီး၌ သူ့ကို အဘယ်ကြောင့် ရုတ်တရက် လာရောက်ကာ တိုက်ပွဲခေါ်ရသနည်း ဆိုသည်ကို သူ မသိခဲ့ပေ။

သူ၏ ဇနီးဖြစ်သော ပိုင်စုကျဲ့မှာ မည်သည့်နေရာသို့ ရောက်သွားခဲ့သနည်း။

"ယောကျ်ား... လှည့်မကြည့်နဲ့လေ...”

"ကျွန်မ စုကျဲ့ပါ...”

ဟွားစစ်ချင်၏ ပါးပြင်လေးများက ရဲပဒေါင်းခတ်နေပြီး သူမ၏ မျက်လုံးဝိုင်းကြီးများက အလျင်အမြန် တဖျပ်ဖျပ် ခတ်နေကာ အလွန်တရာ စိတ်လှုပ်ရှားနေပုံ ရသည်။

သူမအတွက် ဤသည်မှာ တစ်ခါမှ မကြုံဖူးသေးသော အတွေ့အကြုံမျိုးပင် ဖြစ်လေသည်။

သူမ၏ ညီမလေးအဖြစ် ဟန်ဆောင်ကာ ယောကျ်ားတစ်ယောက်ကို အတင်းအဓမ္မ သွေးဆောင်ဖြားယောင်းခြင်း…။

‘သောက်ကျိုးနည်း... ‘ချစ်ခြင်းမေတ္တာကူ’...'

ကျိုးစွေ့က တစ်စုံတစ်ရာ ပြောချင်ခဲ့သော်လည်း ထိုအခိုက်အတန့်တွင် ဆဌမအဆင့် အထွတ်အထိပ် ‘ချစ်ခြင်းမေတ္တာကူ’က ပြင်းထန်သော ချစ်ခြင်းမေတ္တာကို ခံစားလိုက်ရပြီး၊ ချက်ချင်းပင် ၎င်း၏ အနှစ်သာရတစ်မျှင်က ဟွားစစ်ချင်၏ ခန္ဓာကိုယ်ထဲသို့ ဝင်ရောက်သွားခဲ့လေ၏။

‘ချစ်ခြင်းမေတ္တာကူ’က ချက်ချင်းပင် သူမနှင့် ပေါင်းစည်းသွားခဲ့သည်။

ဝုန်း...။

နောက်တစ်စက္ကန့်တွင် ‘ချစ်ခြင်းမေတ္တာကူ’ဆီမှ ပန်းရောင်စွမ်းအင် အငွေ့အသက်လှိုင်းများ ပေါက်ကွဲထွက်ပေါ်လာကာ သူတို့နှစ်ဦးလုံးကို ရစ်ပတ်လွှမ်းခြုံသွားခဲ့ပြီး၊ အခန်းတစ်ခုလုံးက ကြည်နူးဆွတ်ပျံ့ဖွယ်ကောင်းသော ပတ်ဝန်းကျင် အငွေ့အသက်များအောက်၌ ရစ်ပတ်ခံလိုက်ရသကဲ့သို့ ဖြစ်သွားတော့သည်။

ချက်ချင်းပင် ကျိုးစွေ့မှာ စကားတစ်ခွန်းမျှ မဆိုနိုင်တော့ဘဲ တစ်ဖက်လူကို သူ၏ဇနီးအဖြစ် မှတ်ယူလိုက်မိလေတော့သည်။

............

နောက်တစ်နေ့နံနက်ခင်း၌...။

ကျိုးစွေ့သည် သူ၏မျက်လုံးများကို ဖြည်းညင်းစွာ ဖွင့်လိုက်ပြီး ဘေး၌ လှဲလျောင်းနေသော အလွန်လှပသည့် "မမကြီး" ပုံစံ အမျိုးသမီးကို ကြည့်လိုက်ရင်း သူ၏မျက်နှာထက်တွင် ကူကယ်ရာမဲ့သော အမူအရာများ ပေါ်လွင်နေခဲ့သည်။

အမှန်အတိုင်းဆိုရလျှင် တစ်နေ့နေ့ တစ်ချိန်ချိန်၌ အမျိုးသမီးတစ်ဦး၏ ခြုံခိုတိုက်ခိုက်ခြင်းကို ခံရကာ အတင်းအဓမ္မ သိမ်းပိုက်ခံရလိမ့်မည်ဟု သူ တစ်ခါမှ ထင်မှတ်မထားခဲ့မိပေ။

ယခင်ကဆိုလျှင် သူသည် အမျိုးသမီးများကို ပိုးပန်းရာ၌ ‘ချစ်ခြင်းမေတ္တာကူ’ကို အမြဲတမ်း အသုံးပြုခဲ့ခြင်း ဖြစ်လေသည်။

သို့သော် ယခုအခါတွင် ဤကဲ့သို့သောအရာကို သူ မလိုအပ်တော့သော်လည်း မရေမတွက်နိုင်သော အမျိုးသမီးများက သူ့ထံသို့ ကိုယ်တိုင်ကိုယ်ကျ ရောက်လာကြဆဲပင်။

ထိုအစား သူသည် အမျိုးသမီးများနှင့် ပတ်သက်၍ ရွေးချယ်တတ်လာခဲ့ပြီး ‘ကူ’ ကို ပေါ့ပေါ့ဆဆ အသုံးမပြုတော့ပေ။

ထို့သို့ဖြစ်နေလင့်ကစား အမျိုးသမီးများနှင့် ပတ်သက်၍ အလွန်ကောင်းမွန်လှသော သူ၏ကံကြမ္မာ လွှမ်းမိုးမှုအောက်တွင် ပြိုင်ဘက်ကင်း အလှလေးများက တစ်ဦးပြီးတစ်ဦး သူ့အပေါ် မြတ်နိုးတွယ်တာသည့် ခံစားချက်များ ဖြစ်ပေါ်လာခဲ့ပြီး သူ ငြင်းဆန်ရန် ကြိုးစားခဲ့လျှင်ပင် ငြင်းဆန်နိုင်မည့် နည်းလမ်းကို ရှာမတွေ့နိုင်ခဲ့ချေ။

မည်သို့ပင်ဖြစ်စေကာမူ သူ၏ ခန္ဓာကိုယ်ဖွဲ့စည်းပုံက ပျားများက ပျားရည်ကို စွဲလမ်းသကဲ့သို့ အမျိုးသမီးများကို ဆွဲဆောင်နိုင်သောအရာတစ်ခု ဖြစ်လာခဲ့လေပြီ။

သူ့အနေဖြင့် အိမ်ထဲ၌သာ နေနေလျှင်ပင် အလွန်လှပသော အမျိုးသမီးများစွာကို ဆွဲဆောင်နိုင်ဆဲပင်။

သို့သော် ဤသည်က ဖုံးကွယ်ထားသော ကောင်းချီးတစ်ခုလည်း ဖြစ်ကောင်းဖြစ်နိုင်ပေသည်။

အဘယ်ကြောင့်ဆိုသော် ဟွားစစ်ချင်၏ ခန္ဓာကိုယ်ထဲမှ အလွန်များပြားလှသော ယင်အနှစ်သာရများကို ရရှိခဲ့သည့်အတွက် သူ၏ကျင့်ကြံမှုအဆင့်က နတ်ဘုရားအသွင်ပြောင်းအဆင့် ပြီးပြည့်စုံခြင်းသို့ ချက်ချင်းပင် တက်လှမ်းသွားခဲ့ပြီး နှစ်နှစ်ဆယ်ကျော်မျှ ခက်ခဲကြမ်းတမ်းစွာ ကျင့်ကြံရမည့်အချိန်ကို ထိရောက်စွာ ကယ်တင်ပေးနိုင်ခဲ့သောကြောင့် ဖြစ်လေသည်။

၎င်းက ပင်ပန်းခက်ခဲစွာ ကျင့်ကြံရမည့် သူ၏ အချိန်များစွာကို ကယ်တင်ပေးနိုင်ခဲ့သည်။

မူလက နတ်ဘုရားအသွင်ပြောင်းအဆင့် ပြီးပြည့်စုံခြင်းသို့ အမှန်တကယ် ရောက်ရှိရန် နောက်ထပ် ဆယ်နှစ် သို့မဟုတ် အနှစ်နှစ်ဆယ်မျှ လိုအပ်မည်ဖြစ်သော်လည်း ယခုအခါတွင် မျက်စိတစ်မှိတ်အတွင်း၌ပင် အောင်မြင်သွားခဲ့လေပြီ။

ထို့ပြင် ယင်အနှစ်သာရဆီမှ စွမ်းအင်များကလည်း အပြည့်အဝ ကုန်ခမ်းသွားခြင်း မရှိသေးပေ။

လေဟာနယ်သန့်စင်ခြင်းအဆင့်သို့ သူ တက်လှမ်းသွားသည်နှင့် တစ်ပြိုင်နက် ကနဦးအဆင့်များတွင် သူ၏ တိုးတက်မှုကိုလည်း များစွာ အရှိန်မြှင့်တင်ပေးနိုင်လိမ့်မည် ဖြစ်၏။

"ငါ နတ်ဘုရားအသွင်ပြောင်းအဆင့် ပြီးပြည့်စုံခြင်းကို တကယ် ရောက်သွားခဲ့ပြီပဲ...”

ကျိုးစွေ့က သူ၏အတွင်းပိုင်း၌ လှိုင်းထနေသော နတ်ဘုရားအသွင်ပြောင်းအဆင့် မှော်စွမ်းအင်များကို ခံစားလိုက်ရပြီး၊ ယန်စီမြစ်နှင့် မြစ်ဝါမြစ်ကြီးများကဲ့သို့ သွေးကြောများတစ်လျှောက် လှိမ့်တက်ကာ လည်ပတ်နေသည်ကို သိရှိလိုက်ရသည်။

ယခုအခါတွင် မှော်စွမ်းအင်၊ ခန္ဓာကိုယ်နှင့် မူလဝိညာဉ်တို့ အားလုံးမှာ ပြီးပြည့်စုံခြင်းအခြေအနေသို့ ရောက်ရှိနေပြီ ဖြစ်သည်။

သူသည် လေဟာနယ်သန့်စင်ခြင်းအဆင့်သို့ အချိန်မရွေး တက်လှမ်းနိုင်ပြီး ထိုအဆင့်ရှိ စီနီယာကျင့်ကြံသူတစ်ဦး ဖြစ်လာနိုင်သည်ဟု ဆိုနိုင်ပေသည်။

သို့သော် ယခုအချိန်သည် လေဟာနယ်သန့်စင်ခြင်းအဆင့်သို့ တက်လှမ်းရမည့် အချိန် မဟုတ်သေးချေ။

မည်သို့ပင်ဆိုစေကာမူ သူသည် ဟွားစစ်ချင်နှင့် ယခုလေးတင်မှ ချစ်ရေယာဉ်ကြော မျောပါခဲ့ရုံသာ ရှိသေးရာ လေဟာနယ်သန့်စင်ခြင်း ကောင်းကင်ဘုံကပ်ဘေးကို ယခုချက်ချင်း လှုံ့ဆော်နိုင်မည် မဟုတ်ပေ။

"ဟင်..."

"မဖြစ်နိုင်တာ... ငါ လေဟာနယ်သန့်စင်ခြင်း အလယ်အလတ်အဆင့် ပြီးပြည့်စုံခြင်းကို တကယ်ကြီး တက်လှမ်းသွားခဲ့တာလား...”

"ကောင်းကင်ဘုံကပ်ဘေး အသေးစားလေးကို ဖြတ်ကျော်နိုင်တာနဲ့ ငါဟာ လေဟာနယ်သန့်စင်ခြင်း နှောင်းပိုင်းအဆင့်ကို အမှန်တကယ် ဝင်ရောက်နိုင်တော့မှာပဲ...”

ဤအခိုက်အတန့်တွင် ဟွားစစ်ချင်သည်လည်း နိုးလာခဲ့ပြီး သူမ၏ ကျင့်ကြံမှုအဆင့်က ဧရာမတိုးတက်မှုကြီး ဖြစ်ပေါ်လာကာ လေဟာနယ်သန့်စင်ခြင်းအဆင့် အလယ်အလတ်အဆင့်ရှိ ပြီးပြည့်စုံခြင်းသို့ ရောက်ရှိသွားကြောင်းကို ချက်ချင်းပင် ခံစားလိုက်ရလေသည်။

စိတ်ဝိညာဉ်ကမ္ဘာ၌ လေဟာနယ်သန့်စင်ခြင်းအဆင့်သို့ ဝင်ရောက်ပြီးနောက် အဆင့်ငယ်အသစ်တစ်ခုသို့ တက်လှမ်းရာတွင် ကောင်းကင်ဘုံကပ်ဘေးကို အမြဲတမ်း ရင်ဆိုင်ရလေ့ ရှိသည်။

၎င်းကို မဖြတ်ကျော်နိုင်ဘဲနှင့် ရှေ့ဆက်၍ တက်လှမ်းနိုင်မည် မဟုတ်ပေ။

မှန်ပေသည်၊ ၎င်းကို ဖြတ်ကျော်နိုင်သွားသည်နှင့် တစ်ပြိုင်နက် ကျင့်ကြံမှုအဆင့် တိုးတက်လာမှုက သိသိသာသာ ကြီးမားလှသည်။

သာမန်အခြေအနေများအောက်တွင် လေဟာနယ်သန့်စင်ခြင်း အလယ်အလတ်အဆင့် ပြီးပြည့်စုံခြင်းသို့ ကျင့်ကြံရန် သူမအနေဖြင့် နှစ်ရာပေါင်းများစွာ လိုအပ်မည် ဖြစ်၏။

သို့သော် ယခုအခါတွင် သူမသည် ကျင့်ကြံခြင်း၌ သုံးစွဲရမည့် အချိန်များစွာကို ကယ်တင်နိုင်ခဲ့ပြီး၊ ဆဌမအဆင့် ရတနာဆေးလုံးတစ်လုံးကို စားသုံးရခြင်း၏ အကျိုးသက်ရောက်မှုများကိုပင် သာလွန်သွားခဲ့လေပြီ။

အသေအချာပင် သူမ၏ ဗေဒင်တွက်ချက်မှုက မှန်ကန်နေခဲ့လေသည်။ သူမရှေ့ရှိ ယောကျ်ားနှင့် လက်ထပ်လိုက်ခြင်းအားဖြင့် အနာဂတ်တွင် အင်မော်တယ်တစ်ပါး ဖြစ်လာရန် သူမ၏ အခွင့်အရေးများက ကောင်းမွန်လာခဲ့၏။

ဗေဒင်နိမိတ်လက္ခဏာများက ကြီးမားသော ကံကောင်းခြင်းများကို အမှန်တကယ် ပြသနေခဲ့သည်။

"တာအိုရောင်းရင်းဟွား... ဘယ်လိုလုပ် ခင်ဗျား ဖြစ်နေရတာလဲ...”

"စုကျဲ့က ဘယ်ရောက်သွားတာလဲ၊ သူမ ဘယ်ကို သွားလိုက်တာလဲ...”

ဤအခိုက်အတန့်၌ ကျိုးစွေ့က ဟွားစစ်ချင်ကို ကြည့်လိုက်သော သူ၏ မျက်လုံးများထဲတွင် အံ့ဩတုန်လှုပ်နေသော အမူအရာများ ပေါ်လွင်နေခဲ့သည်။

သူသည် ဘာမှမသိနားမလည်သူ တစ်ယောက်ကဲ့သို့ ဟန်ဆောင်လိုက်ပြီး သားကောင်တစ်ကောင်အဖြစ် ဟန်ဆောင်လိုက်၏။

အဘယ်ကြောင့်ဆိုသော် ‘ချစ်ခြင်းမေတ္တာကူ’၏ စွမ်းအားဖြင့် ဟွားစစ်ချင်၏ စရိုက်လက္ခဏာကို သူ ခံစားသိရှိနိုင်သောကြောင့် ဖြစ်လေသည်။

ဤအမျိုးသမီး၌ အရာအားလုံးကို သူမ၏ ထိန်းချုပ်မှုအောက်တွင် ထားရှိလိုသော ကြောက်မက်ဖွယ်ကောင်းသည့် သဘာဝစရိုက်တစ်ခု ရှိနေပေသည်။

သူမ၏ ဆုပ်ကိုင်နိုင်စွမ်းထက် ကျော်လွန်နေသောအရာများကို သူမ သဘောမကျပေ။

ထို့ကြောင့် သဘာဝကျကျပင် ဤအခြေအနေကို သူက နှောင့်ယှက်မည် မဟုတ်ချေ။

တစ်ဖက်လူ၏ ထိန်းချုပ်လိုသော ဆန္ဒကို ဖြည့်ဆည်းပေးရန်အတွက် ထိန်းချုပ်ခြင်းနှင့် ကစားခြင်းကို ခံရသည့် ယောကျ်ားတစ်ယောက်အဖြစ် သရုပ်ဆောင်ကာ ဆန္ဒအလျောက်ပင် လိုက်လျောညီထွေစွာ နေပေးလိုက်လေသည်။

"အာ..."

"ရှင်... ရှင် ကျွန်မကို ဘာတွေ လုပ်လိုက်တာလဲ...”

"အရှက်မရှိတဲ့ယောကျ်ား... ရှင် ဘာတွေ လုပ်ခဲ့လဲဆိုတာကို ကြည့်လိုက်စမ်း...”

"ကျွန်မရဲ့ အပြစ်ကင်းစင်မှုတွေ အားလုံးက ရှင့်ကြောင့် ပျက်စီးသွားရပြီ...”

"ရှင် ကျွန်မကို တာဝန်ယူရမယ်နော်...”

ဟွားစစ်ချင်သည်လည်း ကျယ်လောင်စွာ ငိုကြွေးလိုက်ပြီး သူ၏ဘေး၌ ကွေးကွေးလေး နေလိုက်ကာ အလွန်အမင်း နာကျင်ခံစားရသူ တစ်ယောက်ကဲ့သို့ ဟန်ဆောင်လိုက်လေရာ မျက်ရည်များ ရစ်သိုင်းနေသော သူမ၏ အသွင်အပြင်လေးက သနားစရာ ကောင်းလှသည်။

အမျိုးသမီးများက မွေးရာပါ သရုပ်ဆောင်ပညာရှင်များ ဖြစ်ကြသည်ဟုသာ ဆိုရပေမည်။

မည်သည့် လေ့ကျင့်မှုမျိုးမျှ မလိုအပ်ဘဲ မည်သို့ သရုပ်ဆောင်ရမည်ကို သဘာဝကျကျပင် သူတို့က သိရှိနေကြလေသည်။

ဝုန်း...။

ထိုအခိုက်တွင် အပြင်ဘက်ရှိ အိပ်ခန်းတံခါးက ပွင့်လာခဲ့ပြီး ပိုင်စုကျဲ့က 'တိုက်ဆိုင်စွာဖြင့်' ဝင်လာခဲ့ရာ ကုတင်ပေါ်၌ လဲလျောင်းနေသော ကျိုးစွေ့နှင့် ဟွားစစ်ချင်တို့ကို မြင်တွေ့လိုက်ရသဖြင့် သူမ၏ မျက်နှာထက်တွင် 'အံ့ဩတုန်လှုပ်မှု' များ ပေါ်လွင်နေခဲ့သည်။

၎င်းက လူတစ်ယောက်ကို သက်သေနှင့်တကွ လက်ပူးလက်ကြပ် ဖမ်းမိလိုက်သကဲ့သို့ပင်။

"ရှင်တို့နှစ်ယောက်က ဘာတွေ ဖြစ်နေကြတာလဲ...”

ပိုင်စုကျဲ့၏ လှပသော မျက်လုံးများက ပြူးကျယ်သွားခဲ့လေ၏။

သူမ၏ သရုပ်ဆောင်မှုက အနည်းငယ် တောင့်တင်းနေပြီး စကားပြောဟန်များက အနည်းငယ် အဆင်မပြေသကဲ့သို့ ဖြစ်နေသည်ကိုမူ ဝန်ခံရပေလိမ့်မည်။

သို့သော် လူတိုင်း၌ ကိုယ်ပိုင် အကြံအစည်များ အသီးသီး ရှိနေကြသဖြင့် သဘာဝကျကျပင် ဤအသေးစိတ်အချက်အလက်များကို ဂရုစိုက်နေပါဦးမည်လော။