အခန်း ၁၂၈၃

အခန်း (၁၂၈၃) နောက်ထပ် ယောက်ဖတစ်ယောက် လိုချင်သေးလား

"သူမက ဘာလို့ ဒီရောက်နေတာလဲ။ ပြီးတော့ သူမ ဘာလို့ ငါ့ကို မပြောတာလဲ။"

ဟန်ရှောင်း အံ့အားသင့်သွားသည်။

ဤအမျိုးသမီးသည် လူကောင်းတစ်ယောက်မဟုတ်ပေ။ သူမသည် ဆယ်စုနှစ်များစွာကတည်းက ဘလက်စတား စစ်တပ်မှ ထွက်ခွာသွားပြီး ငွေရောင်တော်လှန်ရေးတပ်မတော် နောက်သို့လိုက်ကာ ပြဿနာရှာရန် သွားခဲ့သည်။ ယခု သူမက ရုတ်တရက် ပြန်ရောက်လာသောကြောင့် သူမ ဘာလိုချင်သည်ကို မည်သူမျှ မသိကြပေ။

"စစ်တပ်ကွပ်ကဲရေးမှူး၊ သူမကို တွေ့မလား။"

"... သူမကို ခဏလောက် တွေ့ကြတာပေါ့။"

ဟန်ရှောင်းက ခေါင်းညိတ်လိုက်သည်။ သူက ရော့ဆယ်လင်၏ ရည်ရွယ်ချက်များကို အတော်လေး သိချင်နေသည်။

သူ ဖြစ်ပေါ်စေခဲ့သော လိပ်ပြာအကျိုးသက်ရောက်မှုအပြီးတွင် ငွေရောင်တော်လှန်ရေးတပ်မတော်သည် အခြေခံအားဖြင့် သူ၏ယခင်ဘဝကကဲ့သို့ ကြီးမားသော ဗားရှင်းဖြစ်ရပ်တစ်ခုအဖြစ်သို့ ပြောင်းလဲရန် အခွင့်အရေး မရှိတော့ပေ။ ဤအုပ်စု ဘာဖြစ်သွားမည်ကို သူ မသိခဲ့ပေ။ ရော့ဆယ်လင်က သူ့ထံ အကူအညီတောင်းရန် လာခဲ့ခြင်း ဖြစ်နိုင်မည်လား။

ခန့်မှန်းနေရင်း ဟန်ရှောင်းက မတ်တတ်ရပ်ကာ ရုံးခန်းထဲမှ ထွက်လာသည်။ သူက စင်္ကြံတစ်လျှောက် ဧည့်ခန်းဆီသို့ လျှောက်သွား၏။ ထောက်ပံ့ပို့ဆောင်ရေးဌာနသို့ အသွားလမ်းတွင် သူက အလွန်ကြိုးစားလုပ်ကိုင်နေသော ရေနိုးကိုခေါ်ကာ သူ၏အစ်မကို တွေ့ရန် ခေါ်ဆောင်လာခဲ့သည်။

အလွန်လျင်မြန်စွာပင် သူတို့နှစ်ဦးက ဧည့်ခန်းအပြင်ဘက်သို့ ရောက်ရှိလာကြသည်။ တံခါးပွင့်လာပြီး ရော့ဆယ်လင်ကို သူတို့ မြင်လိုက်ရသည်။

"မတွေ့ရတာ ကြာပြီပဲ။"

ဟန်ရှောင်းက ရော့ဆယ်လင်ကို အကဲခတ်ရင်း ပေါ့ပေါ့ပါးပါး နှုတ်ဆက်လိုက်သည်။

သူတို့ နောက်ဆုံးတွေ့ပြီးကတည်းက နှစ်ပေါင်းများစွာ ကြာခဲ့ပြီဖြစ်ပြီး ရော့ဆယ်လင်၏ အသွင်အပြင်က သိပ်ပြောင်းလဲသွားပုံမရပေ။ သူမက အပြာရင့်ရောင် ဆရာမဝတ်ရုံကို ဝတ်ဆင်ထားပြီး သူမ၏ စိတ်နေသဘောထားက ဆယ်စုနှစ်များစွာကထက်ပင် ပိုမိုတည်ငြိမ်နေသည်။

"ဟုတ်ပါတယ်။ နှစ်တွေအများကြီးကြာသွားပြီ၊ ပြီးတော့ နင်က စကြဝဠာထဲမှာ ဒဏ္ဍာရီလာပုဂ္ဂိုလ်တစ်ယောက် ဖြစ်နေပြီပဲ။ စကြဝဠာ လူမှုအဖွဲ့အစည်း ၃ခုကတောင် နင့်ကို အန္တရာယ်အများဆုံးလူအဖြစ် သတ်မှတ်ထားကြတယ်။ အင်ပါယာနဲ့ နင့်ရဲ့ ပျားရည်ဆမ်းခရီးကာလကို ပြန်တွေးကြည့်ရင် တကယ်ကို နှမြောစရာကောင်းတယ်။" ရော့ဆယ်လင်က ပြုံးလိုက်သည်။

ဟန်ရှောင်းက ရော့ဆယ်လင်၏ မျက်နှာချင်းဆိုင်တွင် ထိုင်ကာ ပေါ့ပေါ့ပါးပါး ပြန်ဖြေလိုက်သည်။ "ဝမ်းနည်းစရာ ဘာရှိလို့လဲ။ မတူညီတဲ့ ရပ်တည်ချက်တွေမှာ စဉ်းစားရမယ့် ပြဿနာတွေက မတူညီကြဘူးလေ။ ဘယ်ကိစ္စရဲ့ တိုးတက်မှုမဆို အမြဲတမ်း အပေါ်ကို ဝက်အူရစ်ပုံစံ တက်သွားတတ်တယ်၊ ဒါပေမယ့် အတက်အကျတွေ ကြုံရတာက အရမ်းပုံမှန်ပါပဲ။"

"ဒါပေမယ့် ဒါက ဝက်အူရစ်ပုံစံ တက်တာမဟုတ်ဘူးလေ ဟုတ်တယ်မလား။ နင်ဖန်တီးခဲ့တဲ့ မြင့်မြတ်သောနေရာ ပြန်လည်ရှင်သန်ခြင်းသာ မရှိခဲ့ရင် ဒီခေတ်က အခုလိုဖြစ်လာမှာမဟုတ်ဘူး။ နင့်ဆီက မျှော်လင့်ထားတဲ့အတိုင်းပဲ၊ ငါမလုပ်နိုင်ခဲ့တဲ့အရာကို နင်က အလွယ်တကူ လုပ်ဆောင်နိုင်ခဲ့တယ်။ အခြေအနေကို ပြောင်းပြန်လှန်ပစ်နိုင်တဲ့ နင့်ရဲ့စွမ်းရည်က ငါ့ထက် အများကြီး ပိုသန်မာတယ်။ နင့်မှာ အောင်မြင်မှုခံစားချက် ဘာမှမရှိဘူးလား။" ရော့ဆယ်လင်က မျက်တောင်ခတ်ကာ သူ့ကို နောက်ပြောင်လိုက်သည်။

"နင်က ငါ့ကို အောင်မြင်မှုခံစားချက် ခံစားရအောင် လုပ်ပေးဖို့ မတန်သေးပါဘူး။" ဟန်ရှောင်းက ပြုံးလိုက်သည်။

ရော့ဆယ်လင်က ဒေါသမထွက်ပေ။ သူမက ပြုံးကာ ရေနိုးကို ယခုမှ သတိထားမိသည့်အလား လှည့်ကြည့်လိုက်သည်။ သူမက အံ့ဩသွားဟန်ဆောင်ကာ "ဟေး၊ မောင်လေး၊ နင် အသက်ရှင်နေသေးတာပဲ။ အခုလောက်ဆို နင် အလုပ်တွေအရမ်းလုပ်လို့ သေလောက်ပြီလို့ ငါ ထင်နေတာ။"

ရေနိုးက မည်သို့တုံ့ပြန်ရမည်ကို မသိပေ။

နင်က ငါ့အစ်မဖြစ်ပေမယ့် အဓိပ္ပါယ်မရှိတာတွေ ဆက်ပြောနေရင် နင့်ကို ငါ ဖြတ်ရိုက်ပစ်မယ်ဆိုတာ ယုံလား။

ဟန်ရှောင်းက ခေါင်းခါကာ ပြုံးလိုက်သည်။ "လောလောဆယ် ငါ့အကြောင်း မပြောကြတာပေါ့။ နင်ကတော့ ဆယ်စုနှစ်များစွာကြာတဲ့အထိ လှုပ်ရှားမှုတစ်ခုလေးတောင် မလုပ်ခဲ့ဘူး၊ အများဆုံးက မိုဒိုမှာ ငါ့ကို နည်းနည်းလေး ကူညီပေးရုံပဲ။ နင့်ရဲ့ အလုပ်အကိုင်ဆိုတာကြီးက ဘယ်လိုနေလဲ။"

"ဘာမှမထူးပါဘူး။ နင်လုပ်ခဲ့တာတွေက ငါတို့ရဲ့ အလုပ်အကိုင်ကို သွယ်ဝိုက်ပြီး အဟန့်အတားဖြစ်စေခဲ့တယ်။ ငါတို့ ဘာလုပ်နိုင်ဦးမှာလဲ။ ဒါပေမယ့် ဒါက ငါနဲ့ မဆိုင်ပါဘူး။ ငါ ထွက်လိုက်ပြီ။"

ရော့ဆယ်လင်က သူမ၏အချိန် ဆယ်စုနှစ်များစွာကို အလဟဿဖြုန်းတီးလိုက်ရခြင်းကို ဂရုမစိုက်သည့်အလား ဂရုမစိုက်သောလေသံဖြင့် ပခုံးတွန့်လိုက်သည်။

AI ကပ်ရောဂါ ဖြစ်ရပ်က စကြဝဠာ လူမှုအဖွဲ့အစည်း ၃ခု၏ နှလုံးသားများကို စုစည်းပေးခဲ့ပြီး မကြာသေးမီက အဆင့် အေ အထက်ဆင့် အသင်းအဖွဲ့အပေါ် ဒဏ်ခတ်ပိတ်ဆို့မှုများကလည်း အင်အားကြီးသူများကို မုန်းတီးသော သာမန်လူအများအပြား၏ ထောက်ခံမှုကို ရရှိခဲ့သည်။ ငွေရောင်တော်လှန်ရေးတပ်မတော်သည် စကြဝဠာ လူမှုအဖွဲ့အစည်း ၃ခုရှိ သာမန်နိုင်ငံသားများ၏ အခြေခံအုတ်မြစ်ကို မချိုးဖောက်နိုင်ခဲ့သောကြောင့် သူတို့၏ လုပ်ငန်းသည် ရပ်တန့်သွားခဲ့သည်။

ဟန်ရှောင်းက မျက်လုံးများကို ကျဉ်းမြောင်းလိုက်သည်။

ဤအမျိုးသမီးက ငွေရောင်တော်လှန်ရေးတပ်မတော်မှ တကယ်ပဲ ထွက်လိုက်တာလား... ၎င်းသည် သူ၏မျှော်လင့်ချက်များထက် ကျော်လွန်နေသည်။

"ဒါဆို ဒီနေ့ ဘာလို့ ပြန်လာတာလဲ။"

၎င်းကိုကြားသောအခါ ရော့ဆယ်လင်က သူမ၏လက်များကို ဖြန့်ကာ ပြုံးလိုက်သည်။

"ငါ အလုပ်မလုပ်ဘဲ မနေနိုင်ဘူး။ အလုပ်ပြုတ်သွားရင် အလုပ်သစ်ရှာရမှာပေါ့။ ဘယ်လိုထင်လဲ၊ ကြီးမြတ်တဲ့ စစ်တပ်ကွပ်ကဲရေးမှူး။ ငါ့ကို လက်ခံမှာလား။"

"ငါက ဟင့်အင်းလို့ ပြောရင် နင် ဘာလုပ်မလဲ။" ဟန်ရှောင်းက မျက်ခုံးပင့်လိုက်သည်။

"ဒါဆိုရင် ငါက နင့်ကို ဒုက္ခပေးရုံပဲရှိတော့မှာပေါ့..." ရော့ဆယ်လင်က မျက်လုံးလှန်ကာ ငိုတော့မည့်ပုံစံကို တမင်သက်သက် ဟန်ဆောင်လိုက်သည်။ "ငါတို့ရဲ့ ဆက်ဆံရေးနဲ့ဆို နင်က ငါ တခြားတစ်ယောက်ရဲ့ လက်မောင်းထဲ ရောက်သွားတာကို ကြည့်မနေရက်ပါဘူး ဟုတ်တယ်မလား။"

"... ကောင်းကောင်းပြောပါ၊ အဲဒီလိုကိစ္စတွေ မပြောနဲ့။" ဟန်ရှောင်းက ချောင်းဟန့်လိုက်သည်။ "အခု စကြဝဠာ လူမှုအဖွဲ့အစည်း ၃ခုက ငါတို့ကို အပြစ်ပေးနေတာဆိုတော့ နင် ရုတ်တရက် ပြန်လာရတဲ့ တခြားအကြောင်းပြချက်တွေ ရှိရမယ်။"

ရော့ဆယ်လင်က မပြုံးမီ ပုံဆောင်သဘောအရ သူမ၏လက်များကို နှစ်ချက်ခုပ်လိုက်သည်။

"ငါ နင့်မျက်လုံးတွေကနေ တကယ်ကို ဖုံးကွယ်ထားလို့ မရဘူးပဲ။ ငါ့ရဲ့ ရည်မှန်းချက်က စကြဝဠာ လူမှုအဖွဲ့အစည်း ၃ခုကို ကိုင်တွယ်ဖြေရှင်းဖို့ဆိုတာ နင်လည်း သိပါတယ်... ဒါပေမယ့် မကြာသေးခင်က အသင်းအဖွဲ့ရဲ့ အုပ်စုထဲဝင်တာက ပိုပြီး အလားအလာကောင်းပုံရတယ်လို့ ငါ ရုတ်တရက် သဘောပေါက်လာတယ်။"

ဟန်ရှောင်းက စကားမပြောနိုင်ဖြစ်သွားသည်။

၎င်းက ထိုသို့ဖြစ်ပုံရသည်။ အတိုင်းအတာတစ်ခုအထိ အဆင့် အေ အထက်ဆင့် အသင်းအဖွဲ့က သူ၏ယခင်ဘဝရှိ ငွေရောင်တော်လှန်ရေးတပ်မတော်၏ အခန်းကဏ္ဍတစ်စိတ်တစ်ပိုင်းကို အောင်မြင်ပြီးဖြစ်နေပြီဖြစ်သည်။ ယခုအခါ သူတို့က စကြဝဠာ လူမှုအဖွဲ့အစည်း ၃ခုနှင့် ဆန့်ကျင်ဘက်အုပ်စုတစ်ခုကို ဖွဲ့စည်းလိုက်ပြီဖြစ်သောကြောင့် သူတို့ ဖြစ်ပေါ်စေခဲ့သော ဆူပူအုံကြွမှုသည် ထိုစဉ်က ငွေရောင်တော်လှန်ရေးတပ်မတော် ဖြစ်ပေါ်စေခဲ့သောအရာထက် များစွာမသေးငယ်ပေ။

သို့သော်လည်း ဤဘဝရှိ ငွေရောင်တော်လှန်ရေးတပ်မတော်က လုံးဝတိုးတက်လာခြင်းမရှိသောကြောင့် ရော့ဆယ်လင်က သူမ၏အနာဂတ်သည် မျှော်လင့်ချက်မဲ့နေသည်ဟု ခံစားခဲ့ရသည်။ ထို့ကြောင့် သူမက သူမ၏အလုပ်ရှင်ဟောင်းနှင့် ပူးပေါင်းရန် ပြန်ပြေးလာခဲ့ပြီး စကြဝဠာ လူမှုအဖွဲ့အစည်း ၃ခုကို ကိုင်တွယ်ဖြေရှင်းရန် အခြားနည်းလမ်းတစ်ခုကို အသုံးပြုခဲ့သည်။ သူမ၏ရည်မှန်းချက်က ပြောင်းလဲမသွားဘဲ သူမ၏ကိုယ်ရည်ကိုယ်သွေးနှင့်ဆိုလျှင် သူမက ဤကဲ့သို့သောအရာမျိုးကို သေချာပေါက် လုပ်ဆောင်မည်ဖြစ်သည်။

ပြီးတော့ ဤ 'ဝိညာဉ် ဇာတ်ကောင်' သာ ထွက်သွားခဲ့လျှင် ငွေရောင်တော်လှန်ရေးတပ်မတော်တွင် ကြောင်ပေါက်လေး နှစ်ကောင် သို့မဟုတ် သုံးကောင်သာ ကျန်တော့မည်ဖြစ်သည်။ ထကြွရန် အခွင့်အရေးရှိမည်မဟုတ်ပေ။

ဆိုလိုသည်မှာ သူက ငွေရောင်တော်လှန်ရေးတပ်မတော်ကို တမင်သက်သက် ပစ်မှတ်မထားခဲ့သော်လည်း သူဖြစ်ပေါ်စေခဲ့သော လိပ်ပြာအကျိုးသက်ရောက်မှုက နောက်ဆုံးတွင် သူတို့ကို သွယ်ဝိုက်၍ သတ်ပစ်လိုက်ပုံရသည်။

ဒါဆို ရော့ဆယ်လင်က အလင်းရောင်ကို ပွေ့ဖက်ဖို့ အမှောင်ထုကို စွန့်လွှတ်လိုက်တာလား။

ဟန်ရှောင်းက စကားမပြောမီ သူ၏ လေးနက်မှုကို အလေးပေးရင်း ခေါင်းခါလိုက်သည်။

"... ကောင်းပြီ၊ နင်က အခက်အခဲတွေကို ခံစားပြီး စစ်တပ်ထဲ ပြန်ဝင်ဖို့ ဆန္ဒရှိနေမှတော့ နင့်ကို ငါ ဝင်ခွင့်ပြုနိုင်ပါတယ်။ သို့သော်လည်း အခုကစပြီး နင်က ငွေရောင်တော်လှန်ရေးတပ်မတော်နဲ့ ဘယ်လိုအဆက်အသွယ်မှ မလုပ်ရတော့ဘူး။ နင် စစ်တပ်ကနေ ထပ်ထွက်သွားရင် ရေနိုးရှိနေရင်တောင် နင့်ကို ငါ ပြန်လာခွင့်ပေးမှာမဟုတ်ဘူး။ နားလည်လား။"

သူက ရော့ဆယ်လင်ကို ထပ်မံစုဆောင်းရန် ဝန်လေးမနေခဲ့ပေ။ ဤအမျိုးသမီး၏ စိတ်က အန္တရာယ်များသော်လည်း သူမ၏စွမ်းရည်က အမှန်တကယ် ရှားပါးပြီး မဟာဗျူဟာမြောက် အရေးပါမှုရှိသည်။ သူမသည် လက်တွေ့အားဖြင့် တစ်စုံတစ်ယောက်၏ အုပ်ချုပ်မှုကို ဖြုတ်ချရန် ဝှက်ဖဲတစ်ခုဖြစ်သည်။ ဤကဲ့သို့သော ပါရမီရှင်မျိုးကို သူ၏လက်ထဲတွင် ထားရှိခြင်းက အကောင်းဆုံးဖြစ်သည်။

"ကောင်းပါပြီ၊ ဒီတစ်ခါတော့ ငါ နင့်ကို ထားမသွားပါဘူး။" ရော့ဆယ်လင်က မျက်တောင်များ ထပ်မံခတ်လိုက်သည်။

၎င်းကိုကြားသောအခါ ရေနိုးက မျက်မှောင်ကြုတ်လိုက်သည်။

ဤအမျိုးသမီးက သိပ်မမှန်ပေ။ သူမက စစ်တပ်ကွပ်ကဲရေးမှူးကို သူ၏ ယောက်ဖဖြစ်လာစေရန် ဘလက်စတားကို ဖြားယောင်းနေတာလား။

ကျစ်၊ ဘယ်လောက်တောင် အရှက်မရှိလိုက်သလဲ။

ဟန်ရှောင်းက မတုန်မလှုပ်ဘဲ မတ်တတ်ရပ်ကာ စကားပြောလိုက်သည်။ "ကောင်းပြီ၊ နင့်ရဲ့တာဝန်တွေကို စီစဉ်ပေးဖို့ တစ်ယောက်ယောက်ကို ငါ ခိုင်းလိုက်မယ်။ နင်တို့နှစ်ယောက် မတွေ့ရတာ နှစ်တွေအများကြီး ကြာပြီဆိုတော့ ပြောစရာတွေ အများကြီးရှိမှာပဲ။ ငါ လုပ်စရာတွေ ရှိသေးတယ်၊ ဒါကြောင့် ငါ အရင် သွားနှင့်တော့မယ်။"

သူ စကားပြောရင်း လှည့်ကာ ဧည့်ခန်းထဲမှ ထွက်သွားသည်။

ဟန်ရှောင်း ထွက်သွားသည်ကို ကြည့်ပြီးနောက် ရေနိုးက ရော့ဆယ်လင်ကို လှည့်ကြည့်ကာ မျက်မှောင်ကြုတ်ရင်း ပြောလိုက်သည်။ "ငါ နင့်ကို သတိပေးလိုက်မယ်၊ နင်က မကောင်းတဲ့ ရည်ရွယ်ချက်တွေနဲ့ ပြန်လာတာဆိုရင် ငါက နင့်ကို ပထမဆုံး ဖမ်းမယ့်သူပဲ။"

"နင် ငါ့ကို မယုံဘူးလား။" ရော့ဆယ်လင်က မျက်ခုံးပင့်လိုက်သည်။

"ဟွန့်၊ နင် ဘယ်လိုလူစားမျိုးလဲဆိုတာ ငါ ကောင်းကောင်းသိတယ်။" ရေနိုးက လက်မောင်းများကိုပိုက်ကာ ခံစားချက်မဲ့စွာ ပြောလိုက်သည်။ "ပြီးတော့ စစ်တပ်ကွပ်ကဲရေးမှူးကို ပိုပြီး လေးလေးစားစား ဆက်ဆံဖို့ နင့်ကို ငါ အကြံပေးချင်တယ်။ လက်အောက်ငယ်သားဆိုတာ လက်အောက်ငယ်သားလို နေသင့်တယ်။"

"ယို၊ ငါတို့ နောက်ဆုံးတွေ့ပြီးကတည်းက ဆယ်စုနှစ်တွေ ကြာသွားပြီ၊ ပြီးတော့ နင်က ဘလက်စတားအပေါ် ဒီလောက်တောင် သစ္စာရှိနေတာလား။" ရော့ဆယ်လင်က အံ့ဩစွာ စုပ်သပ်လိုက်သည်။ ရုတ်တရက် သူမက မျက်လုံးလှန်ကာ လေသံကိုနှိမ့်ပြီး တခစ်ခစ်ရယ်လိုက်သည်။ "ဘယ်လိုလဲ။ မောင်လေးက ယောက်ဖတစ်ယောက် လိုချင်သလား။"

"နင် ဘာလုပ်နေတာလဲ။" ရေနိုးက ပို၍ပင် မျက်မှောင်ကြုတ်လိုက်သည်။

"စကြဝဠာကို ဇောက်ထိုးမိုးမျှော်ဖြစ်အောင် လုပ်နိုင်တဲ့ ဘလက်စတားလို ယောက်ျားမျိုးက ငါနဲ့ အရမ်းလိုက်ဖက်တယ်လို့ ငါ ထင်တယ်။ နင် ဘယ်လိုထင်လဲ။" ရော့ဆယ်လင်က နောက်ပြောင်လိုက်သည်။

ရေနိုးက မထီမဲ့မြင် နှာမှုတ်လိုက်သည်။

"ဘလက်စတားကို မျက်စိကျနေတဲ့သူတွေက ဒီအခြေစိုက်စခန်းကို ခြောက်ကြိမ်လောက် ပတ်နိုင်တယ်။ နင် တစ်ယောက်တည်းနဲ့လား။ သွား တန်းစီလိုက်။"

စာစဉ် (၇၃)၊ အခန်း (၁၂၈၃) ပြီးပါပြီ။

လင်းဆက်

++++++