အခန်း ၆၁၄

အခန်း (၆၁၄)။

“ဘာ..၊ အနောက်ဘက် နန်းဆောင်အတွက် ကိုယ်လုပ်တော်တွေ ရွေးချယ်မယ် ဟုတ်လား။ နတ်ဘုရားစွမ်းရည်တစ်ခုကို ကျင့်ကြံဖို့လား။ အဲဒါက ဘယ်လို မိစ္ဆာပညာရပ်မျိုးလဲ။ ခမည်းတော် နတ်ဆိုးပညာရပ်တစ်ခုခုကို ကျင့်ကြံတာက ပြဿနာမဟုတ်ပါဘူး။ နတ်ဆိုး စွမ်းအင်တွေကို စုစည်းတာ၊ ယုတ်ညံ့တဲ့ စွမ်းအင်တွေကို ပေါင်းစပ်တာမျိုးက လောကကြီး ကို ဒုက္ခမပေးသရွေ့တော့ မိစ္ဆာလမ်းစဉ်လို့ မသတ်မှတ်နိုင်ဘူး။ ဒါပေမဲ့ ‘ယင်ကိုစုပ်ယူပြီး ယန်ကိုအားဖြည့်တဲ့’ လိုမျိုး ယုတ်ညံ့တဲ့ တာအိုပညာရပ်မျိုးသာ ပြန့်သွားရင်တော့ သမီးတော်တို့ နတ်ဘုရားလေနိုင်ငံဟာ မိစ္ဆာတွေရဲ့ နယ်မြေဖြစ်သွားပြီး တစ်ကမ္ဘာလုံးရဲ့ ရွံရှာမုန်းတီးမှုကို ခံရပါလိမ့်မယ်။”

နတ်ဘုရားလေနိုင်ငံ ဘုရင်၏ စကားကို ကြားလိုက်ရသောအခါ လော်ယွင်၏ တစ်ကိုယ်လုံး တုန်လှုပ်သွားပြီး သူမ၏ ခမည်းတော်ကို သူမ လုံးဝမသိတော့သကဲ့သို့ စိမ်းစိမ်းကားကား ကြည့်နေမိတော့သည်။

ယခုလေးတင် သူမနေအိမ်တွင် ဟွမ်ယန်ယန်နှင့် ဟုန်ယွိတို့ တူနှစ်ဖော်ကျင့်စဉ် အကြောင်း ဆွေးနွေးနေသည်ကို ကြားခဲ့ရသော်လည်း၊ ယခုကဲ့သို့ သူမ၏ ခမည်းတော်ကိုယ်တိုင် ထိုလမ်းစဉ်ကို လက်တွေ့လုပ်ဆောင်လိမ့်မည်ဟု သူမ မထင်မှတ်ထားခဲ့ပေ။

လော်ယွင်သည်လည်း ပါရမီရှိသော ပညာရှင်တစ်ယောက်ဖြစ်ရာ၊ တူနှစ်ဖော်ကျင့်စဉ်နှင့် ‘ယင်ကိုစုပ်ယူပြီး ယန်ကိုအားဖြည့်သည့်’ ယုတ်ညံ့သော တာအိုလမ်းစဉ်များဖြင့် ကြီးကျယ် သော နတ်ဘုရားစွမ်းရည်ကို ရနိုင်လိမ့်မည်ဟု သူမ မယုံကြည်ပေ။

“ခမည်းတော်က အဲဒီလိုမျိုး ယုတ်ညံ့တဲ့ ယင်စုပ်ယူ ယန်အားဖြည့်တဲ့ လမ်းစဉ်ကို ကျင့်မှာ မဟုတ်ဘူး။” နတ်ဘုရားလေနိုင်ငံ ဘုရင်က မျက်မှောင်ကြုတ်ရင်း ပြောလိုက်သည်။ “ရှေးဟောင်း ‘ကဗျာကျမ်း’ တစ်ခုရဲ့ အစမှာ ‘မြစ်ထဲက ကျွန်းလေးတွေပေါ်မှာ လှပ နွဲ့နှောင်းတဲ့ မိန်းမလှလေးတွေကို လူကြီးလူကောင်းတွေက လိုက်လံရှာဖွေကြတယ်...’ လို့ ဆိုထားတယ်။ ရှေးဟောင်းကဗျာတွေ ထောင်နဲ့ချီရှိတဲ့အထဲမှာ အားလုံးနီးပါးက ယောက်ျား နဲ့ မိန်းမကြားက အချစ်အကြောင်းကိုပဲ ဖွဲ့ဆိုထားတာ။ ခမည်းတော် ကျင့်ကြံမယ့် ဒီနတ်ဘုရား စွမ်းရည်ဟာ ရှေးဟောင်း ‘အသက်ရှည်ခြင်း နတ်ဘုရားစွမ်းရည်’ တစ်ခုပဲ။ ဒါဟာ ခန္ဓာကိုယ်ချင်း ဆက်ဆံဖို့ မလိုသလို၊ စိတ်ဝိညာဉ်ချင်း ဆက်ဆံဖို့လည်း မလိုဘူး။ ယောက်ျားနဲ့ မိန်းမကြားက ‘အချစ်အငွေ့အသက်’ တစ်ခုကို ‘အစစ်မှန်စွမ်းအင်’ အဖြစ် ပြောင်းလဲပြီး ကိုယ့်ရဲ့ အတွေးစတွေထဲမှာ ပေါင်းစပ်ရတာ။ အဲဒီအချစ်စွမ်းအင်တွေ အများ ကြီး စုမိလာတဲ့အခါမှာတော့ ဉာဏ်ပညာဓား တစ်လက် ဖြစ်ပေါ်လာပြီး ဘယ်လို မိစ္ဆာ စွမ်းအင်မှ မပါဘဲ အတားအဆီးတွေကို ဖြတ်ကျော်နိုင်တယ်။ ဟိုးအရင်က ဧကရာဇ်ဖန်ရဲ့ အနောက်ဘက် နန်းဆောင်မှာလည်း သူ့ကို အထူးတလည် မြတ်နိုးကြတဲ့ မိန်းမလှတွေ ထောင်နဲ့ချီပြီး ရှိခဲ့တယ်။ ဒါပေမဲ့ သူ့တာအိုကျင့်စဉ် အောင်မြင်တဲ့အချိန်ထိ သူဟာ ပျိုလူစစ်စစ် (မူလကိုယ်ထည်) အဖြစ်ပဲ ရှိနေခဲ့တာ။ ဒီပညာရပ်ဟာ ယောက်ျားနဲ့ မိန်းမကြားက မမေ့နိုင်တဲ့ အချစ်နှောင်ကြိုးကိုပဲ အခြေခံတာ။ အချစ်နှောင်ကြိုးချင်း ရစ်ပတ်နှောင်ဖွဲ့ထားနိုင်ရင် တောင်တန်းတွေ၊ မြစ်တွေ ဘယ်လောက်ပဲ ခြားနေပါစေ တူနှစ်ဖော်ကျင့်စဉ်ကို ကျင့်နိုင်တယ်လေ။”

“ဒီလို နတ်ဘုရားစွမ်းရည်မျိုး ရှိနေတာလား။ အချစ်ကို စုဆောင်းပြီး ဉာဏ်ပညာဓားကို သွန်းလုပ်တာလား။” နတ်ဘုရားလေနိုင်ငံ ဘုရင်၏ စကားကို ကြားလိုက်ရသောအခါ လော်ယွင်သာမက ပုန်းကွယ်နေသော ဟုန်ယွိပါ အံ့အားသင့်သွားရသည်။ “ရှေးစကားအရ တော့ ဉာဏ်ပညာဓားဟာ အချစ်နှောင်ကြိုးတွေက ဖြတ်တောက်ပစ်ဖို့ ဖြစ်တယ်။ နက်ရှိုင်း တဲ့ အချစ်နှောင်ကြိုးဟာ ကြာရှည်မခံသလို၊ အစွန်းရောက် ထက်မြက်တဲ့ ဉာဏ်ပညာဟာ လည်း နာကျင်မှုကို ပေးတတ်တယ်။ တိုင်ရှန်တာအို (အထွက်အထိပ်တာအို) ဆိုတာ ခံစားချက်ကင်းမဲ့ခြင်းကို ကျင့်ကြံရတာ။ အချစ်နှောင်ကြိုးရှိလာတာနဲ့ တစ်ပြိုင်နက် ကိုယ့်ရဲ့တာအိုစွမ်းအင်တွေ အကုန် ဆုံးရှုံးသွားရလိမ့်မယ်။ ဒါပေမဲ့ အချစ်နှောင်ဖွဲ့ကို သုံးပြီး ဉာဏ်ပညာဓားကို သွန်းလုပ်တယ်ဆိုတဲ့ ဒီသီအိုရီဟာ ရှေးဟောင်း နတ်ဘုရားစွမ်းရည် တစ်ခု ဖြစ်ပုံရတယ်။”

‘ဒါကြောင့်ကိုး... ဒါကြောင့်လည်း ယူလူလက်နဲ့ ချန်ပီယံမြို့စားတို့ ဒီလောက်ကြာအောင် အတူရှိနေခဲ့တာတောင် သူမက အပျိုစင် ဖြစ်နေသေးတာပဲ။ ဟွမ်ယန်ယန်လည်း အပျိုစင် ဖြစ်နေတုန်းပဲ။ ချန်ပီယံမြို့စားဟာ သူတို့နဲ့ စစ်မှန်တဲ့ ခံစားချက်တွေ၊ မေ့မရနိုင်တဲ့ အချစ်နှောင်ကြိုးတွေကို မတည်ဆောက်ရသေးလို့ ဖြစ်ရမယ်။’

ဟုန်ယွိသည် ဖန်ဆင်းရှင်အဆင့် ကျွမ်းကျင်သူတစ်ယောက် ဖြစ်သဖြင့် လောကနိယာမ များကို ကောင်းစွာ နားလည်သူဖြစ်သည်။ နတ်ဘုရားလေနိုင်ငံ ဘုရင်၏ ရှင်းပြချက်ကို ကြားလိုက်ရသောအခါ သူ ချက်ချင်း သဘောပေါက်သွားသည်။ ၎င်းမှာ ရုပ်နှင့်နာမ် တူနှစ်ဖော်ကျင့်ကြံခြင်းလမ်းစဉ်၏ စစ်မှန်သော အနက်အဓိပ္ပာယ်ပင် ဖြစ်သည်။

ယောက်ျားနှင့် မိန်းမသည် တစ်ဦးကိုတစ်ဦး နက်နက်ရှိုင်းရှိုင်း ချစ်မြတ်နိုးကြသောအခါ ၎င်းတို့၏ အတွေးစများတွင် အချစ်အငွေ့အသက်များ ရစ်ပတ်နှောင်ဖွဲ့လာကြသည်။ ကျင့်ကြံသူများသည် ထိုအချစ်အငွေ့အသက်များကို သုံးကာ ဉာဏ်ပညာဓားကို သွန်းလုပ် ကြသည်၊ အတိုင်းအဆမရှိသော အသိပညာများကို စုဆောင်းပြီး ထိုအချစ်စွမ်းအင်မှ တစ်ဆင့် တာအိုသို့ ဝင်ရောက်ကြခြင်းဖြစ်သည်။

ရှေးဟောင်း ဧကရာဇ်ဖန်သည် ရှေးဟောင်းခေတ်ကို နှစ်ပေါင်းသောင်းနှင့်ချီ၍ အုပ်စိုးခဲ့ သည်။ သူ့ကို မြတ်နိုးသော မိန်းမလှများမှာ အဆမတန် များပြားလှသည်။ သူတို့ တစ်ဦး ချင်းစီသည် စိတ်ချင်းဆက်သွယ်မှု ရှိကြပြီး နှလုံးသားချင်း၊ ခံစားချက်ချင်း နီးကပ်စွာ ရစ်ပတ်နေကြ၏။ နောက်ဆုံးတွင် သူသည် ထိုမရေမတွက်နိုင်သော ထိုခံစားချက် အငွေ့အသက် စွမ်းအင်များကို စုစည်း၍ ဉာဏ်ပညာဓားအဖြစ် သွန်းလုပ်ကာ ယန်နတ်ဘုရား အဆင့်သို့ တက်လှမ်းခဲ့ခြင်း ဖြစ်သည်။ သို့သော်လည်း ဧကရာဇ်ဖန်သည် အဆုံးတိုင်အောင် လူပျိုစင်စစ်စစ် အဖြစ်သာ ရှိနေခဲ့သည်။

ဤသည်မှာ တော်ဝင်မင်းသမီးနှင့် ယန်နတ်ဘုရားတို့၏ ‘ဧကရာဇ်ဖန် တက်လှမ်းခြင်း သမိုင်းကြောင်း’ ဖြစ်သည်။ ၎င်းမှာ တိုင်ရှန်တာအိုဂိုဏ်း၏ ‘အမြင့်ဆုံး ခံစားချက်မဲ့လမ်းစဉ်’ နှင့် လုံးဝ ကွဲပြားသော လမ်းစဉ်တစ်ခုဖြစ်သည်။

ရှေးစကားအတိုင်း ကျင့်ကြံခြင်းလမ်းစဉ် မတူပါက အတူတူ အလုပ်လုပ်၍ မရပေ။ ထို့ကြောင့် တိုင်ရှန်တာအိုဂိုဏ်း၏ ဂိုဏ်းချုပ်သည် ဧကရာဇ်ဖန် နန်းစွန့်သည်ကို မြင်လိုက် ရသောအခါ နားများကို ချက်ချင်း ဆေးကြောပစ်ခဲ့ကြခြင်း (မကြားချင်ယောင် ဆောင်ခဲ့ကြ ခြင်း) ဖြစ်သည်။

“အချစ်စွမ်းအင် အငွေ့အသက်တွေကို ဉာဏ်ပညာအဖြစ် ပြောင်းလဲတဲ့ ဒီပညာရပ်ဟာ တကယ့်ကို အမြင့်ဆုံး နတ်ဘုရားစွမ်းရည်ပဲ။ နတ်ဘုရားလေနိုင်ငံ ဘုရင်က ဒါကို ဘယ်လို လုပ်ပြီး သိနေတာလဲ။ ဒါတွေအားလုံးဟာ ကောင်းကင်အပြင်ပနယ်မြေက လျှို့ဝှက်တဲ့ ဂြိုဟ်ကမ္ဘာတွေနဲ့ ဆက်စပ်နေရမယ်။ ချန်ပီယံမြို့စား လာခဲ့တဲ့ ကမ္ဘာပဲ။ ဒါ့အပြင် ဟွမ်ယန်ယန် ပြောစကားအရ ချန်ပီယံမြို့စားကလည်း ဒီနည်းပညာကို သိနေတယ်။ ဒီတာအိုပညာရပ်ဟာ ဧကရာဇ်ချန်ရှန်းက ဧကရာဇ်ဖန်ကို လက်ဆင့်ကမ်းပေးခဲ့တဲ့ အမြင့်ဆုံး စွမ်းရည်ပဲ။ အဲဒါဟာ အချစ်နဲ့ စတင်ပြီး စည်းစနစ်နဲ့ အဆုံးသတ်တယ်။ ဒါပေမဲ့ လူသားတို့ရဲ့ သဘာဝကိုတော့ ဖိနှိပ်မထားဘဲ၊ ကောင်းကင်နိယာမနဲ့ လူသားသဘာဝကို အဆုံးမရှိ ပေါင်းစပ်ပေးထားတာပဲ...’

ဟုန်ယွိသည် ဤရုပ်နှင့်နာမ် တူနှစ်ဖော်ကျင့်စဉ်အပေါ် ချက်ချင်းပင် ပိုမိုနက်ရှိုင်းသော နားလည်မှုအသစ် ရရှိသွားခဲ့သည်။ ၎င်းမှာ တကယ့်ကို ချစ်ချင်းတရားများ လွှမ်းခြုံနေ သည့် လူ့လောက၏ မှန်ကန်သော တာအိုလမ်းစဉ်ပင် ဖြစ်ပေသည်။

“ငါသာ ဒီအချစ်နှောင်ကြိုးကို ဉာဏ်ပညာ အတွေးစအဖြစ် ပြောင်းလဲပြီး ဓားတစ်လက် အဖြစ် သွန်းလုပ်နိုင်မယ်ဆိုရင် ဒါဟာ တကယ့်ကို အမြင့်ဆုံး နတ်ဘုရားစွမ်းရည် ဖြစ်မှာပဲ ။”

ဟုန်ယွိ၏အတွေးများသည် သူ့ရှေ့မှ လော်ယွင်ဆီသို့ ရောင်ပြန် ဟပ်သွားခဲ့သည်။ ဤကျန်းနန် မင်းသမီးလေးတွင်လည်း သူ့အပေါ်ထားရှိသော အချစ်နှောင်ကြိုးလေး တစ်ခု ရှိနေသည်မှာ ထင်ရှားနေသလို၊ ဟုန်ယွိကိုယ်တိုင်လည်း ဤမင်းသမီးလေးအပေါ် သဘာဝ ကျကျပင် ခံစားချက်ကောင်းများ ရှိနေသည်။ ဤအချစ်နှောင်ကြိုးလေးများမှ အချစ် အတွေးစများ ပေါက်ဖွားလာခဲ့သည်။ ၎င်းမှာ အချစ်နှောင်ကြိုးတစ်ခုပင် ဖြစ်သော်လည်း မျက်စိတစ်မှိတ်အတွင်းမှာပင် ဟုန်ယွိက ထိုနှောင်ကြိုးကို ဘာအစအနမျှ မကျန်အောင် ဖြတ်တောက်ပစ်လိုက်သည်။ မဟုတ်ပါက ဤအချစ်နှောင်ကြိုးသာ စွဲကပ် ကျန်ရှိနေပါက ကျင့်ကြံမှုအပေါ် အကြီးအကျယ် သက်ရောက်မှု ရှိနိုင်သောကြောင့် ဖြစ်သည်။

ဟုန်ယွိသည် ဖန်ဆင်းရှင် တစ်ဦး ဖြစ်နေပြီ ဆိုသော်လည်း မုန့်ရှန်းကျီ၏ အဆုံးအဖြတ် တိုက်ပွဲ စိန်ခေါ်မှုကိုလည်း လက်ခံထားရသည်။ တစ်ချိန်တည်းမှာပင် မုန့်ရှန်းကျီသည် ဆယ်နှစ်အတွင်း ယန်နတ်ဘုရား ဖြစ်လာရန် အနှိုင်းမဲ့ ယုံကြည်ချက်မျိုး ရှိနေသည်ကို လည်း ထိုစိန်ခေါ်မှုမှတစ်ဆင့် သူ သိရှိထားသည်။

ယန်နတ်ဘုရား အဆင့်သို့ ရောက်ရန်အတွက်မူ ဟုန်ယွိကိုယ်တိုင်ပင် အပြည့်အဝ ယုံကြည်ချက် မရှိသေးပေ။

သို့သော် ယခုအခါ ရုပ်နှင့်နာမ် တူနှစ်ဖော်ကျင့်စဉ်နှင့် ‘အချစ်နှောင်ကြိုးကို သုံး၍ ဓားသွန်း လုပ်ခြင်း’ ဟူသော သီအိုရီသည် ဟုန်ယွိအတွက် ယန်နတ်ဘုရားအဆင့်သို့ တက်လှမ်းရန် လမ်းစတစ်ခုကို ပေးလိုက်သကဲ့သို့ ဖြစ်နေသည်။

ဟုန်ယွိသည် ဤလမ်းစဉ်အတိုင်း သေချာပေါက် သွားချင်မှ သွားမည်ဖြစ်သော်လည်း၊ အနည်းဆုံးတော့ လမ်းကြောင်းတစ်ခု ရှိလာခဲ့ပြီ ဖြစ်သည်။ အနာဂတ်သည် အမှောင်ထုနှင့် ရှုပ်ထွေးမှုများ မဟုတ်တော့ဘဲ သူ၏ အမြင်အာရုံကို အဆမတန် ကျယ်ပြန့်သွားစေခဲ့သည်။

‘ဒီတစ်ခေါက် နတ်ဘုရားလေနိုင်ငံကို လာရတာ တကယ်ကို တန်ပါတယ်။ ငါ့ရဲ့ ‘ပြောင်းလဲ ခြင်းကျမ်း’ လမ်းစဉ်ဟာ ပိုပြီး တိုးတက်လာခဲ့ပြီ။ ဒီတူနှစ်ဖော်ကျင့်စဉ် သီအိုရီဟာ ငါ့ရဲ့ လမ်းကြောင်းအတွက် အများကြီး အထောက်အကူ ဖြစ်စေမှာပဲ...’

ဟုန်ယွိ သူ့ဘာသာ တွေးနေမိသည်။ သူသည် တစ်ကမ္ဘာလုံး ကျယ်ပြောသွားသကဲ့သို့ ခံစားလိုက်ရသည်။

သို့သော် ဤနတ်ဘုရားစွမ်းရည်မှာ အလွန် စေ့စပ်သေချာစွာ စုဆောင်းရမည့် လုပ်ငန်းစဉ် တစ်ခုလည်း ဖြစ်သည်။ မိန်းမလှများကို ဝမ်းယွမ်အရေတွက် (၁၂၉,၆၀၀) ထိန်းချုပ်ပြီးမှ ယန်နတ်ဘုရား ဖြစ်မည်ဟု ဆိုလိုသည်။ ဆိုလိုသည်မှာ စင်ကြယ်သော နှလုံးသားရှိပြီး၊ ဉာဏ်ရည်ထက်မြက်ကာ လှပသော မိန်းမလှလေးပေါင်း ၁၂၉,၆၀၀ နှင့် မမေ့နိုင်သော အချစ်နှောင်ကြိုးများဖြင့် ဆက်နွှယ်နေရမည် ဖြစ်သည်။ ထိုအချစ်နှောင်ကြိုးများကို စုဆောင်းကာ ‘အစစ်မှန်စွမ်းအင်’ အဖြစ် ပြောင်းလဲနိုင်မှသာ နောက်ဆုံး အတားအဆီးကို ဖြတ်ကျော်နိုင်မည် ဖြစ်သည်။

ဒါဟာ တကယ့်ကို မဖြစ်နိုင်သလောက် ခက်ခဲတဲ့ ကိစ္စပင်။

...

“ဒီလိုကိုး။ ခမည်းတော်က လှပပြီး ထက်မြက်တဲ့ မိန်းမလှလေးတွေကို နန်းဆောင်ထဲ ခေါ်ယူပြီး၊ သူတို့နဲ့အတူ နေ့ညမပြတ် နေထိုင်ရင်း ‘အချစ်နှောင်ကြိုး’ ကို ကျင့်ကြံမယ်၊ ပြီးမှ အဲဒါကို ဓားတစ်လက်အဖြစ် သွန်းလုပ်မယ်ပေါ့လေ။ ဒါပေမဲ့ ယောက်ျားနဲ့ မိန်းမကြားက အချစ်ဆိုတာ သဘာဝတရားနဲ့ ကံကြမ္မာပေါ်မှာပဲ မူတည်နေတာပါ။ ဒီလိုမျိုး ကျင့်ကြံဖို့ ဆိုတာ အရမ်း ခက်ခဲလိမ့်မယ်လို့ ထင်ပါတယ်” လော်ယွင်သည်လည်း နတ်ဘုရားလေနိုင်ငံ ဘုရင် ပြောသည်ကို နားလည်သွားခဲ့ပြီ။

“သမီး မသဘောတူဘူးဆိုရင်လည်း ခမည်းတော် ဒီနတ်ဘုရားစွမ်းရည်ကို မကျင့်တော့ပါ ဘူး။”

နတ်ဘုရားလေနိုင်ငံ ဘုရင်က ခန္ဓာကိုယ်ကို မတ်လိုက်သည်။ ‘သမင်အမဲလိုက်ခြင်း မျှော်စင်’ ပြင်ပမှ လေညင်းတစ်ချက် တိုက်ခတ်လာရာ သူ၏ ဝတ်ရုံများမှာ လေထဲတွင် လွင့်ပျံ့သွားခဲ့သည်။

“အရှင်မင်းကြီး... ဒါက မမှန်ကန်ပါဘူး။ အခုအချိန်မှာ နတ်ဘုရားလေနိုင်ငံဟာ ဧကရာဇ် အဖြစ် ကြေညာတော့မှာပါ။ ကြောက်မက်ဖွယ်ကောင်းတဲ့ တော်ဝင်ချန်ကို ရင်ဆိုင်ရတော့ မယ်၊ တကယ်လို့ ကျွန်ုပ်တို့ရဲ့ အင်အားကို အဆမတန် မမြှင့်တင်နိုင်ဘူးဆိုရင် တိုင်းပြည် ပျက်သုဉ်းမယ့် ဘေးဒုက္ခနဲ့ ရင်ဆိုင်ရနိုင်ပါတယ်။”

ရုတ်တရက် လေညင်းတစ်ချက် တိုက်ခတ်သွားပြီး မျှော်စင်ပေါ်တွင် ဝတ်စုံဖြူဝတ် လူငယ် တစ်ဦး ရုတ်တရက် ပေါ်လာခဲ့သည်။ ထိုလူငယ်မှာ မျက်ခုံးကောင်းကောင်း၊ တောက်ပသော မျက်ဝန်းတစ်စုံနှင့် ပုခုံးကျယ်ကျယ်၊ ခန္ဓာကိုယ်သွယ်သွယ် ရှိပြီး မျက်နှာတွင် အပြုံးတစ်ခု ရှိနေသည်။ သူ့ထံမှ ဖြောင့်မတ်ခြင်းနှင့် မိစ္ဆာဆန်ခြင်းတို့ ရောယှက်နေသော အရှိန်အဝါမျိုး ထွက်နေသကဲ့သို့၊ လောကကြီးတစ်ခုလုံးကို ငုံ့ကြည့်နေသော အထက်စီးဆန်သည့် အငွေ့အသက်မျိုးလည်း ရှိနေသည်။

ဟုန်ယွိသည် ဤသို့သော အရှိန်အဝါမျိုးကို ချန်ပီယံမြို့စား၏ မျက်လုံးများထဲတွင်လည်း မြင်ဖူးခဲ့သည်၊ ၎င်းမှာ ဤကမ္ဘာလောကထဲမှ လူများကို ‘လူရိုင်းများ’ ဟု သတ်မှတ်ထား သော အငွေ့အသက်မျိုးပင် ဖြစ်သည်။

‘ဒီလူငယ်ဟာ ဒီကမ္ဘာလောကကြီးက လူမဟုတ်ဘူး၊ ကောင်းကင်အပြင်ပနယ်မြေက လာတာပဲ။ ချန်ပီယံမြို့စား လာခဲ့တဲ့ ကမ္ဘာက ဖြစ်ဖို့ များတယ်။’

ထိုလူငယ်ကို မြင်လိုက်ရသည့် ပထမဆုံးအကြိမ်မှာပင် ဟုန်ယွိ၏ စိတ်ထဲမှာ သံသယတွေ ပြည့်နှက်သွားခဲ့သည်။

ဟုန်ယွိသည် ကောင်းကင်အပြင်ပနယ်မြေမှ ကျွမ်းကျင်သူတစ်ယောက်ကို အရင်က တွေ့ဖူးပါသည်၊ ၎င်းမှာ လျှို့ဝှက်ဆန်းကြယ်သော ‘ရှောက်ရွှိုက်’ ပင် ဖြစ်သည်။ သူ၏ ကျင့်ကြံမှုမှာ ‘လူသားအင်မော်တယ်’ အဆင့်၏ အထွက်အထိပ်သို့ ရောက်နေပြီး၊ သူ၏ အပ်စိုက်မှတ်များမှာ ဤလောက၏ လျှပ်စီးများနှင့် ဟန်ချက်ညီနေသည်။ သူသည် အလွန် အစွမ်းထက်လှပြီး ဤလောကမှ လူများကို ‘လူရိုင်းများ’ ဟုပင် မသတ်မှတ်ပေ။ ယခု ဝတ်စုံဖြူဝတ် လူငယ်မှာတော့ ထို ရှောက်ရွှိုက်နှင့် တစ်ဖွဲ့တည်း မဟုတ်သည်မှာ သေချာပါသည်။

“ခမည်းတော်... ဒါက ဘယ်သူလဲ။”

ဝတ်စုံဖြူဝတ် လူငယ် ရုတ်တရက် ပေါ်လာသည်ကို မြင်လိုက်ရသောအခါ လော်ယွင်၏ မျက်လုံးများ ဝင်းခနဲ ဖြစ်သွားပြီး မျက်မှောင် အနည်းငယ် ကြုတ်လိုက်မိသည်။

“မင်းသမီး... ကျွန်တော်က အရှင်မင်းကြီးရဲ့ ဖိတ်ကြားချက်အရ မင်းသမီးကို ကာကွယ်ပေး ဖို့နဲ့ ကူညီပေးဖို့ ရောက်လာတာပါ။” ဝတ်စုံဖြူဝတ် လူငယ်က လော်ယွင်ကို ကြည့်ကာ သူ့နှာခေါင်းထိပ်ကို လက်ဖြင့် တစ်ချက် တို့လိုက်သည်။ “အခုတစ်ခေါက် ‘မက်မွန် နတ်ဘုရားဂိုဏ်းရဲ့ ပြိုင်ဆိုင်မှုက အရမ်း ပြင်းထန်တယ်။ မင်းသမီးရဲ့ ပြိုင်ဘက်တွေထဲမှာ အကယ်ဒမီအချို့၊ မိသားစုကြီးအချို့နဲ့ မက်မွန်နတ်ဘုရားဂိုဏ်းရဲ့ မူလပါရမီရှင်တွေ ပါဝင်နေတယ်။ သူတို့ကို အနိုင်ယူချင်ရင်တော့ မင်းသမီးရဲ့ တာအိုပညာနဲ့ ကိုယ်ခံပညာကို အများကြီး မြှင့်တင်ရလိမ့်မယ်။”

“လုံအောက်ရဲ့ ကိုယ်ခံပညာက သာမန်မဟုတ်ဘူး။ သမီးနားမှာ ကာကွယ်ပေးမယ့် ကျွမ်းကျင်သူ မရှိသေးဘူးလေ။ တကယ်လို့ ကျင့်ကြံနေတုန်း တစ်ခုခု မှားယွင်းသွားရင် ဘယ်လိုလုပ်မလဲ။ ဘယ်သူမှ မရှိရင် အရမ်း အန္တရာယ်များတယ်။” နတ်ဘုရားလေနိုင်ငံ ဘုရင်က လက်ကာပြရင်း ပြောလိုက်သည်။ “မက်မွန်နတ်ဘုရားဂိုဏ်းချုပ် နေရာအတွက် ပြိုင်ဆိုင်မှုက သေးငယ်တဲ့ ကိစ္စမဟုတ်ဘူး။ ခမည်းတော်က သမီးအပေါ် အများကြီး မျှော်လင့်ထားတယ်။ အခုကစပြီး ဒီ ‘လုံအောက်’ က သမီးရဲ့ လက်အောက်ခံပဲ၊ သမီး ခိုင်းတာ မှန်သမျှကို လုပ်ပေးလိမ့်မယ်။”

“ကျွန်တော်မျိုး အရှင်မင်းကြီးရဲ့ အမိန့်ကို သေချာပေါက် နာခံပါ့မယ်။” လုံအောက် ဟု ခေါ်သော ဝတ်စုံဖြူဝတ် လူငယ်က ချက်ချင်း ပြန်ဖြေလိုက်သည်။

“ကောင်းပြီ၊ လော်ယွင်... သမီး သွားလို့ ရပြီ။ သမီးက ခမည်းတော် နတ်ဘုရားစွမ်းရည် ကျင့်တာကို မသဘောတူဘူးဆိုတော့လည်း ခမည်းတော် သေချာ ပြန်စဉ်းစားရဦးမှာပေါ့။ ဒီလို နန်းဆောင်အတွက် မိန်းမလှတွေ ရွေးချယ်တာကလည်း နာမည်ပျက်ရနိုင်တာကိုး။” နတ်ဘုရားလေနိုင်ငံ ဘုရင်က ဆိုသည်။

“ဟုတ်ကဲ့ပါ ခမည်းတော်၊ သမီး ခွင့်ပြုပါဦး။”

ကျန်းနန်မင်းသမီး လော်ယွင်သည် ‘သမင်အမဲလိုက်ခြင်း မျှော်စင်’ ပေါ်မှ တစ်လှမ်းချင်း ဆင်းလာခဲ့ပြီး၊ လျှို့ဝှက်သော ဝတ်စုံဖြူဝတ် လူငယ် လုံအောက်ကလည်း နောက်မှ လိုက်လာခဲ့သည်။ သူသည် နံပါတ်တစ် သက်တော်စောင့်တစ်ဦး ဖြစ်လာခဲ့ပြီ။ သူ၏ မျက်လုံးများမှာ ဝင်းခနဲ ဖြစ်နေပြီး သူ မည်သည်ကို ကြံစည်နေသနည်းဆိုသည်မှာ မည်သူ မျှ မသိနိုင်ပေ။

...

“သတင်းတွေအရတော့ ဟုန်ယွိဟာ ဖန်ဆင်းရှင်တစ်ပါး ဖြစ်သွားပြီ၊ ပြီးတော့ ချန်ယင်းရှာ ကို လော်ယွင်ဆီ ချဉ်းကပ်ဖို့ လွှတ်ထားတယ်လို့ သိရတယ်။ နတ်ဘုရားသခင်… လုံအောက် က အစွမ်းထက်တယ် ဆိုပေမဲ့ ဖန်ဆင်းရှင် တစ်ပါးကို တားဆီးဖို့တော့ မဖြစ်နိုင်ဘူး ထင်ပါ တယ်၊ သူက လော်ယွင်နဲ့ ဟုန်ယွိတို့ကို တကယ်ပဲ စောင့်ကြည့်နိုင်ပါ့မလား။”

လော်ယွင် မျှော်စင်ပေါ်မှ ထွက်သွားပြီးနောက် နတ်ဘုရားလေနိုင်ငံ ဘုရင်သည် တစ်စုံ တစ်ယောက်ကို သတင်းပို့နေသကဲ့သို့ တိုးတိုးလေး ရေရွတ်လိုက်သည်။ သူ၏ အသံမှာ အလွန် ရိုသေလေးစားမှု ရှိနေသည်။

သူ စကားပြောနေစဉ်မှာပင် သူ့ဘေးနားမှ နောက်ထပ် အသံတစ်ခု ထွက်ပေါ်လာခဲ့သည်။ ထိုအသံသည် ဟင်းလင်းပြင်ထဲမှ ထွက်လာခြင်း ဖြစ်ပြီး အဝေးကြီးမှ လာသကဲ့သို့ရှိသော် လည်း အရမ်း နီးနီးလေးတွင် ရှိနေသကဲ့သို့ပင်။

“ကိစ္စမရှိပါဘူး။ ဒီလုံအောက်ဆိုတာ ငါ မကြာသေးခင်ကမှ ကောင်းကင်အပြင်ပနယ်မြေ ကနေ ဆွဲခေါ်လာတဲ့ ဝိညာဉ်တွေထဲက တစ်ခုပဲ။ သူ ဆုံးရှုံးသွားလည်း ဘာမှ မဖြစ်ဘူး။ သူ့ရဲ့ ခန္ဓာကိုယ်ထဲမှာ ငါက ‘နတ်ဆိုးမျိုးစေ့’ တစ်ခု ထည့်ထားပြီးသား၊ သူ့ကို အမြဲတမ်း စောင့်ကြည့်နေမှာ။ သူက ဘယ်လိုလုပ် သိမှာလဲ။ ကောင်းကင်အပြင်ပနယ်မြေဆိုတာ အရမ်းကို လျှို့ဝှက်ဆန်းကြယ်တယ်။ ငါက ကျောက်စာတိုင်ထဲမှာ ပိတ်လှောင်ခံထားရတာ နှစ်ပေါင်းများစွာ ကြာခဲ့ပြီ၊ အခုမှပဲ ‘စိတ်စွမ်းအင်ပညာရပ်’ နဲ့ အရာအားလုံးကို ခံစားမိတာ။ ဒီလုံအောက်ကို သုံးပြီး ဟုန်ယွိကို ဆွဲထုတ်မယ်၊ ပြီးတော့ ဒီဟုန်ယွိမှာ ဘာလက်နက်တွေ ရှိနေသလဲဆိုတာကိုလည်း ငါ ကြည့်ချင်သေးတယ်။ သူ့ရဲ့ ‘သူတော်စင်ပေါင်းစုံ ခန်းမ’ ဆို တဲ့ ရတနာအကြောင်း ငါ တစ်ခါမှ မကြားဖူးဘူး။ တကယ်ကို မြင်ချင်မိပါတယ်။ ကမ္ဘာဦး ခေတ်မှာတောင် အဲဒီလို ရတနာမျိုး မရှိခဲ့ဘူး။ အဲဒါက ဘယ်လိုလုပ်ပြီး ဖန်ဆင်းခြင်း သင်္ဘောကို ယှဉ်နိုင်မှာလဲ။ ဖန်ဆင်းခြင်းသင်္ဘောဆိုတာ ကမ္ဘာဦးခေတ်က ယန်နတ်ဘုရား အဆင့်ကျွမ်းကျင်သူတွေ အများကြီး စုပေါင်းပြီး သွန်းလုပ်ခဲ့တာ။ အဲဒီ ဧကရာဇ်ချန်ရှန်းဆို တဲ့ကောင်က ဖန်ဆင်းခြင်းသင်္ဘောကို ထိန်းချုပ်ဖို့အတွက် ‘အင်မော်တယ် ကျောက်စာ တိုင်’ ကို သွန်းလုပ်ခဲ့တာလေ...”

ထိုအသံသည် ဟင်းလင်းပြင်ထဲမှ ထွက်ပေါ်လာခြင်း ဖြစ်သည်။ နားထောင်ရသည်မှာ အလွန်ပင် သာယာနာပျော်ဖွယ်ကောင်းလှပြီး နတ်သမီးတစ်ပါး၏ နတ်သံထက်ပင် မနိမ့်ကျသည့်အပြင် လူတိုင်းကို အဆမတန် ဆွဲဆောင်နိုင်သော (မိန်းမောသွားစေနိုင် သော) အစွမ်းမျိုးလည်း ရှိနေသည်။

“နတ်ဘုရားသခင်... တကယ်လို့ တော်ဝင်ချန်ရဲ့ ဖန်ဆင်းခြင်းသင်္ဘောသာ ကျွန်ုပ်တို့ နတ်ဘုရားလေနိုင်ငံကို တိုက်ခိုက်လာရင် ကျွန်ုပ်တို့ တားဆီးနိုင်ပါ့မလားဆိုတာ စိုးရိမ်မိပါ တယ်။” နတ်ဘုရားလေနိုင်ငံ ဘုရင်က ရိုသေစွာ မေးလိုက်သည်။

“ကိစ္စမရှိပါဘူး။ အခု ကောင်းကင်အပြင်ပနယ်မြေဆီ သွားတဲ့ လမ်းကြောင်းက ပွင့်နေပြီ။ တိုင်ရှန်တာအိုဂိုဏ်းရဲ့ ဆက်ခံသူ ‘မုန့်ရှန်းကျီ’ က အဲဒီလမ်းကြောင်းကို ပိတ်ချင်နေပေမဲ့ ရလဒ်ကတော့ ပြောင်းပြန်ပဲ။ ဖန်ဆင်းခြင်းသင်္ဘောကို ပိုင်ဆိုင်ထားတဲ့ တော်ဝင်ချန် ဧကရာဇ်ဟာ အိမ်ထဲကို ဝံပုလွေတွေ ဖိတ်ခေါ်လိုက်သလို ဖြစ်နေတာ။ သူကိုယ်တိုင်မှာ လည်း စိုးရိမ်စရာတွေ အများကြီး ရှိနေတယ်၊ ဒါဟာ ငါ့အတွက် အခွင့်အရေးပဲ။ နှမြောစရာ ကောင်းတာက ‘အင်မော်တယ် နတ်ဘုရားဘုရင်’ ရဲ့ အရေးကြီးတဲ့ နယ်ရုပ်ဖြစ်တဲ့ ချန်ပီယံ မြို့စားပဲ။ ‘အင်မော်တယ် နတ်ဘုရားဘုရင်’ ရဲ့ ချိပ်တံဆိပ်က ငါတို့ထဲမှာ အသန်မာဆုံးပဲ၊ သူက အမြဲတမ်း လွတ်မြောက်ချင်နေတာကြောင့် ချန်ပီယံမြို့စားကို စီစဉ်ခဲ့တာ။ ဒါပေမဲ့ ချန်ပီယံမြို့စားက အဲဒီဟုန်ယွိလက်ချက်နဲ့ အသတ်ခံလိုက်ရတော့ သူ့အကြံအစည်တွေ ပျက်ကုန်တာပေါ့။ အခုတစ်ခေါက်တော့ မင်း အရာအားလုံးကို သေချာ စီစဉ်ရမယ်... ဒီအစီအစဉ်ကို အကောင်အထည်ဖော်မှ ငါ တကယ် လွတ်မြောက်နိုင်မှာ။ ဟင်း... ငါ ဒီကျောက်စာတိုင်ထဲမှာ ပိတ်လှောင်ခံထားရတာ နှစ်ပေါင်းများစွာ ကြာလှပြီ၊ ငါ့ရဲ့ အသား၊ သွေးနဲ့ ဝိညာဉ်တွေဟာ ကျောက်စာတိုင်ရဲ့ မဟာဝင်္ကပါထဲမှာ ဖိနှိပ်ခံထားရတာ။ မကြာခင် မှာ ငါဟာ ဒီကျောက်စာတိုင်နဲ့ တစ်သားတည်း ဖြစ်သွားတော့မယ်။ ဧကရာဇ်ချန်ရှန်းရဲ့ တွက်ချက်မှုက အရမ်း တိကျတာပဲ။ ဒါဟာ လူသားလမ်းစဉ် တော်လှန်ပြောင်းလဲမှုရဲ့ ခေတ်ကြီးဖြစ်မှန်း သူ သိနေတယ်။ နှစ်ပေါင်းများစွာ ကြာပြီးတဲ့နောက်မှာတော့ ကျောက်စာတိုင်ရဲ့ ဝင်္ကပါဟာ ငါတို့ကို ဖျက်ဆီးမယ့် နောက်ဆုံးအချိန်ကို ရောက်လာခဲ့ပြီ... မင်းမှာ ငါ့ရဲ့ သွေးမျိုးဆက် ရှိနေတာမို့ မင်းဟာ ငါ့ရဲ့ စစ်မှန်တဲ့ သားစဉ်မြေးဆက်ပဲ။ ငါသာ လွတ်မြောက်သွားရင် ဒီကျောက်စာတိုင်ကို ထိန်းချုပ်ပြီး မင်းကို လူသားလောကကြီး တစ်ခုလုံးကို သိမ်းပိုက်ခိုင်းမယ်... ငါ မင်းကို သင်ပေးထားတဲ့ တူနှစ်ဖော်ကျင့်စဉ်ဟာ ဧကရာဇ်ချန်ရှန်းရဲ့ အချစ်နှောင်ကြိုးကတစ်ဆင့် တာအိုကျင့်စဉ်ထဲ ဝင်ရောက်တဲ့ နည်းလမ်းပဲ။ အဲဒါကို မင်း သေချာပေါက် ကျင့်ရမယ်... ငါ့ရဲ့စွမ်းအားနဲ့ ကျောက်စာတိုင်ရဲ့ မဟာဝင်္ကပါကို အပြည့်အဝ ပြန်တိုက်နိုင်ရမယ်။ မင်း ကိုယ့်ဘာသာကိုယ် ကြိုးစားရမယ်၊ အောင်မြင်ဖို့ပဲ ရှိတယ်၊ ကျရှုံးလို့ လုံးဝ မရဘူး...”

ထိုအသံသည် နတ်ဘုရားလေနိုင်ငံ ဘုရင်၏ အသိစိတ်ထဲတွင် တဖြည်းဖြည်း တိုးသွားပြီး ပျောက်ကွယ်သွားခဲ့သည်။

...

“အို... မင်းသမီး၊ ကျွန်တော် ကူညီပါရစေ...”

လော်ယွင်၏ ဝေါယာဉ်သည် နန်းတော်မှ ပြန်လာပြီး မင်းသမီးနေအိမ်သို့ ရောက်သောအခါ၊ သူမ ဝေါယာဉ်ပေါ်မှ ဆင်းရန် ပြင်လိုက်စဉ်မှာပင် ဝတ်စုံဖြူဝတ် လုံအောက်သည် အနားသို့ အပြေးအလွှား ရောက်လာခဲ့သည်။

“လော်ယွင်... ဒီလုံအောက်ကို ဖမ်းလိုက်တော့။ သူ့နောက်ခံက မရိုးရှင်းဘူး၊ ငါတို့ သူ့ကို သေချာ စစ်မေးရမယ်...”

ဟုန်ယွိ၏ စကားသံသည် လော်ယွင်၏ နဖူးဆီမှ တိုးတိုးလေး ထွက်ပေါ်လာခဲ့ပါသည်။