အခန်း ၃၂၉

အခန်း။ ၃၂၉

မရေမတွက်နိုင်သော မျက်ဝန်းများကြားတွင် ချန်ကျီရှင်းမှာ တည်ငြိမ်စွာပင် ရပ်တန့်နေပြီး ပင်လယ်ကမ်းစပ်မှတစ်ဆင့် ခြေလှမ်းတစ်လှမ်း လှမ်းလိုက်သည်။

ပင်လယ်လှိုင်းလုံးတို့က သူ၏ ဘောင်းဘီကို စိုစွတ်သွားစေသည်။

"လီချန်းရှင်းလား"

ချန်ကျီရှင်းက အပေါ်သို့ မော့ကြည့်လိုက်ရာ သူ၏ မျက်ဝန်းတို့တွင် တောက်ပသော နတ်ဘုရားအလင်းတန်းများ လျှပ်တစ်ပြက် ဖြတ်ပြေးသွားသည်။

"စောင့်ခိုင်းမိတာ တောင်းပန်ပါတယ်။ မင်းကို သတ်ဖို့ ငါ ရောက်လာပြီ"

စကားဆုံးသည်နှင့် ချန်ကျီရှင်းမှာ ရှေ့သို့ ခြေလှမ်းလိုက်ပြီး ပင်လယ်ရေပြင်ပေါ်သို့ သက်ဆင်းလိုက်သည်။

ဘုန်း….

တစ်ခဏချင်းတွင်ပင် တည်ငြိမ်နေသော အရှေ့ပင်လယ်ပြင်တွင် ဧရာမ ချိုင့်ဝှမ်းကြီးတစ်ခု ပေါက်ကွဲထွက်လာပြီး ကောင်းကင်ထိတိုင်အောင် မြင့်မားသော လှိုင်းလုံးကြီးများ ပေါ်ထွက်လာသည်။

ကမ်းခြေတွင် ဆိုက်ကပ်ထားသော သင်္ဘောကြီးများမှာ မုန်တိုင်းထန်သော ပင်လယ်ပြင်တွင် ရှိနေသကဲ့သို့ ပြင်းထန်စွာ ယိမ်းထိုးသွားတော့သည်။

နောက်တစ်ခဏတွင် ချန်ကျီရှင်း၏ ပုံရိပ်မှာ ကောင်းကင်နှင့် မြေကြီးကို ပြောင်းပြန်လှန်လိုက်သကဲ့သို့ လီချန်းရှင်း၏ ရှေ့သို့ ရောက်ရှိလာသည်။

မလိုအပ်သော စကားများ မပြောတော့ဘဲ ချန်ကျီရှင်းမှာ သူ၏ ခေါင်းကို တန်းတန်းမတ်မတ် ပိတ်ထိုးလိုက်သည်။

ရိုးရှင်းသော ထိုးချက်တစ်ခုသာ ဖြစ်သော်လည်း မဟာတာအို နတ်ဘုရားကွင်းဆက်ကို ချက်ချင်း ပျက်စီးစေပြီး အာကာသတစ်ခုလုံးကို ပြိုလဲသွားစေအောင် ဖိသိပ်လိုက်သည်။

"ကောင်းပြီ"

လီချန်းရှင်း၏ မျက်ဝန်းတို့တွင် မီးခိုးရောင် အလင်းတန်းများ ဖြတ်ပြေးသွားပြီး သူ၏ လက်ထဲတွင် တိတ်တဆိတ် ကိုင်ဆောင်ထားသော ဝါးငါးမျှားတံကို အပေါ်သို့ မြှောက်လိုက်သည်။

ဘုန်း….

ပေတစ်ထောင်အထူရှိသော ရေခဲပြင်ကြီးမှာ ချက်ချင်းဆိုသလိုပင် ပေါက်ကွဲသွားသည်။

ဝါးလုံးနှစ်ခုဖြင့် ရုပ်ရည်က စက်ဆုပ်ဖွယ်ကောင်းသော ပင်လယ်သားရဲဘုရင်တစ်ကောင်မှာ ရေခဲပြင်ကို ဖောက်ထွက်ပြီး မြင့်မားစွာ ခုန်တက်လာကာ ကြီးမားသော မေးရိုးကို ဟ၍ ချန်ကျီရှင်းကို ဝါးမြိုရန် ကြိုးစားလိုက်သည်။

ဤမြင်ကွင်းကို မြင်လိုက်ရသော လူအများအပြားမှာ ထိတ်လန့်စွာ အော်ဟစ်လိုက်ကြသည်။

"နိဗ္ဗာနအဆင့်ပင်လယ်သားရဲဘုရင်"

ငါးမျှားနေသည်ဟု ထင်ရသော လီချန်းရှင်းမှာ နိဗ္ဗာနအဆင့်ပင်လယ်သားရဲဘုရင်ကို ဖမ်းဆီးထားလိမ့်မည်ဟု မည်သူမျှ မထင်မှတ်ထားကြပေ။

"လှည့်ကွက်တွေ"

ချန်ကျီရှင်း၏ မျက်နှာမှာ အမူအရာမဲ့နေပြီး လက်ကို ဖြန့်လိုက်ကာ အတင်းအကျပ် ဝါးမြိုရန် ကြိုးစားနေသည့် ပင်လယ်သားရဲဘုရင်၏ ပါးစပ်ကို တိုက်ရိုက် ဆွဲကိုင်လိုက်သည်။ ပင်လယ်သားရဲဘုရင်မှာ ခန္ဓာကိုယ်ကို ရူးသွပ်စွာ လိမ်ခေါက်ကာ အမြီးကို ဝှေ့ယမ်းသဖြင့် အဆောက်အအုံများပမာ မြင့်မားသော လှိုင်းလုံးကြီးများ ထွက်ပေါ်လာသည်။

သို့သော် ပင်လယ်သားရဲဘုရင် မည်မျှပင် ရုန်းကန်ပါစေ ချန်ကျီရှင်းကမူ ကျောက်တုံးတစ်တုံးကဲ့သို့ မလှုပ်မယှက် ဆွဲကိုင်ထားဆဲပင်။

"ကျိုး"

ချန်ကျီရှင်းက တစ်ခွန်းတည်း ပြောလိုက်ရာ သူ၏ လက်ထဲမှ အဆုံးမရှိသော လျှပ်စီးတန်းများ ပေါ်ထွက်လာပြီး ကောင်းကင်ယံကို လင်းထိန်သွားစေသည်။

ဘုန်း ဘုန်း ဘုန်း….

ချန်ကျီရှင်း၏ လက်ချောင်းငါးချောင်းမှ ကြောက်မက်ဖွယ် လျှပ်စီးများ ပေါက်ကွဲထွက်လာပြီး ပင်လယ်သားရဲဘုရင်ကို အပိုင်းပိုင်း အစအစ ဖြစ်သွားစေသည်။

ကောင်းကင်မှ သွေးမိုးများမှာ မုန်တိုင်းကဲ့သို့ ရွာကျလာပြီး ပင်လယ်ပြင်တစ်ခုလုံးကို သွေးရောင်လွှမ်းသွားစေသည်။

"ချန်ကျီရှင်း မင်း တကယ်ပဲ နိဗ္ဗာနအဆင့်ကို ရောက်သွားပြီပဲ"

လီချန်းရှင်း၏ မျက်ဝန်းတို့တွင် အေးစက်သော အလင်းများ ဖြတ်ပြေးသွားသည်။

ရွှေရောင်ရထားကြီးထဲရှိ စီကုံးရွှမ်းကျီမှာမူ ပို၍ပင် တုန်လှုပ်သွားပြီး မျက်လုံးများ ကျဉ်းမြောင်းသွားသည်။

တစ်နှစ်အတွင်းမှာပင် ချန်ကျီရှင်းက နိဗ္ဗာနအဆင့်သို့ ရောက်ရှိသွားခဲ့ပြီ ဖြစ်သည်။

နောက်တစ်ခဏတွင်….

ဘုန်း….

သွေးမိုးများကြားတွင် ချန်ကျီရှင်းနှင့် လီချန်းရှင်းတို့၏ ခန္ဓာကိုယ်များမှာ ထပ်တူကျသွားပြီး တစ်ဦးကိုတစ်ဦး လက်သီးဖြင့် အပြန်အလှန် ထိုးနှက်လိုက်ကြသည်။

ထိုးချက်တစ်ခုတည်းဖြင့်ပင် ကောင်းကင်နှင့် မြေကြီးမှာ ပြိုလဲသွားပြီး မိုင်ပေါင်းထောင်ချီရှိသော ပင်လယ်ရေခဲပြင်မှာ အစိတ်စိတ်အမွှာမွှာ ဖြစ်သွားသည်။

ပင်လယ်ရေများမှာ လှိုင်းလုံးကြီးများအဖြစ် ပြောင်းလဲကာ တိမ်တိုက်များထဲအထိ ရောက်ရှိသွားသည်။

"နိဗ္ဗာနအဆင့် ၃ပဲ ရှိသေးပေမဲ့ မင်းရဲ့ ရုပ်ပိုင်းဆိုင်ရာ စွမ်းအားက ငါ့နဲ့ အပြိုင် ဖြစ်နေတယ်။ မင်းရဲ့ ရုပ်ခန္ဓာက ကောင်းကင်ကိုတောင် လက်ဗလာနဲ့ ဆွဲဖြဲနိုင်တယ်ဆိုတာ တကယ်ပဲ ဖြစ်နေတာကိုး"

လီချန်းရှင်းမှာ သူ၏ လက်သီးပေါ်မှ ဖြူသော အမှတ်အသားကို ငေးကြည့်ရင်း ချီးကျူးဟန်ဖြင့် ပြောလိုက်သည်။

"မင်းလည်း မဆိုးပါဘူး။ နှစ်အနည်းငယ်အတွင်းမှာပဲ နိဗ္ဗာနအဆင့် ၄ကနေ နိဗ္ဗာနအဆင့် ၈အထိ ရောက်သွားပြီပဲ"

ချန်ကျီရှင်းမှာ နောက်သို့ ခြေလှမ်းအနည်းငယ် ဆုတ်လိုက်ပြီး လက်ကောက်ဝတ်ကို ခါလိုက်ကာ အမူအရာမဲ့စွာ ပြောသည်။

"ဟက်... နိဗ္ဗာနအဆင့် ၈က ဘာတန်ဖိုးရှိလို့လဲ... ငါ့မျိုးဆက်တွေကိုသာ မင်း မသတ်ဖြတ်ခဲ့ရင် ငါ့မှာသာ ဒီလို စိတ်ဝိညာဉ် အတားအဆီးတွေ မရှိရင် ငါ ဒီလောက်နဲ့ပဲ ရပ်တန့်နေမှာ မဟုတ်ဘူး"

လီချန်းရှင်းက ခပ်အေးအေး ပြုံးလိုက်သည်။ တစ်ခဏချင်းတွင် သူ၏ လက်ယာဘက်မှာ အေးခဲသွားပြီး လေတိုက်ရာသို့ လိုက်၍ တဖြည်းဖြည်း ကြီးမားလာတော့သည်။

တစ်စက္ကန့်၏ အပိုင်းအစမျှသော အချိန်အတွင်းမှာပင် ထိုလက်သီးမှာ တောင်တစ်လုံးပမာ ကြီးမားသည့် ရေခဲလက်သီးကြီးအဖြစ် ပြောင်းလဲသွားကာ ကမ္ဘာလောကတစ်ခုလုံးကို ဖုံးလွှမ်းသွားတော့သည်။

ထိုလက်သီးချက်မှာ ချန်ကျီရှင်း၏ ခေါင်းပေါ်သို့ အရိုးများကိုပါ တုန်ခါသွားစေနိုင်သည့် အေးစက်မှုနှင့် ဖိအားတို့ဖြင့် ပြင်းထန်စွာ ဆင်းသက်လာတော့သည်။

ဤထိုးချက်တစ်ခုတည်းဖြင့်ပင် ကုန်းမြေတိုက်ကြီးတစ်ခုလုံးကို အလယ်မှ ပေါက်ထွက်သွားစေရန် လုံလောက်သည်။

"ငါလည်း ရေခဲတာအိုကို ကျွမ်းကျင်တယ်ဆိုတာ မင်း မေ့သွားပုံပဲ"

ချန်ကျီရှင်းက မော့ကြည့်လိုက်သည်။

သူ၏ နက်မှောင်သော ဆံပင်များမှာ ချက်ချင်းပင် နှင်းကဲ့သို့ ဖြူဖွေးသွားကာ သူ၏ မျက်ဝန်းထဲမှ အနက်ရောင် ကျောက်မျက်တို့သည် လှည့်ပတ်သွားပြီးနောက် ရေခဲဝိညာဉ်တို့ပမာ ငွေရောင်မှ ပြာလဲ့လဲ့ အရောင်သို့ ပြောင်းလဲသွားသည်။

ဂီးးးးး

ချန်ကျီရှင်း၏ နောက်ကျောရှိ ပင်လယ်ရေပြင်မှ တောင်တစ်လုံးပမာ ကြီးမားသော ရှေးဟောင်းရေခဲနဂါးတစ်ကောင် ပေါ်ထွက်လာသည်။

ကောင်းကင်ကို ဖောက်ထွက်နိုင်မည့် အပြာရောင် ဦးချိုများဖြင့် နဂါးကြီးမှာ ကောင်းကင်သို့ ပျံတက်သွားပြီး တောင်ကြီးပမာ ဆင်းသက်လာသည့် ရေခဲလက်သီးကြီးကို ရင်ဆိုင်ရန်အတွက် အော်ဟစ်ကာ ဝင်တိုးလိုက်သည်။

နှစ်ခုလုံး ထိခိုက်မိချိန်တွင် အသံတိတ်ဆိတ်သွားပြီးနောက် စကြဝဠာတစ်ခုလုံးကို တုန်ခါစေမည့် ဧရာမ ပေါက်ကွဲသံကြီး ပေါ်ထွက်လာသည်။

သူတို့၏ ခြေအောက်မှ ပင်လယ်ကြမ်းပြင်မှာ အပေါ်သို့ ပေါက်ကွဲထွက်လာပြီး ပင်လယ်ကြမ်းပြင်ရှိ တောင်တန်းများပင် ထင်ရှားစွာ ပေါ်လာတော့သည်။

ပတ်ဝန်းကျင်ရှိ မရေမတွက်နိုင်သော ပင်လယ်သားရဲများနှင့် စစ်မှန်သောကိုယ်ပိုင်အဆင့်ကျင့်ကြံသူများပင် ချက်ချင်းဆိုသလို ဖုန်မှုန့်အဖြစ် ပြောင်းလဲသွားကြသည်။

ဖူဘိုမြို့၊ ကမ်းခြေအနီးတွင် လူအများမှာ ကောင်းကင်ကိုပင် ဖုံးလွှမ်းသွားမည့် ကမ္ဘာပျက်ကပ်ကဲ့သို့ လှိုင်းလုံးကြီးများကို ကြည့်ရင်း ကြောက်လန့်တုန်လှုပ်နေကြသည်။

ကမ္ဘာပျက်ကပ်ကြီး ကျရောက်လာသလိုပဲ…….

သူတို့နှစ်ဦး၏ လှုပ်ရှားမှုအနည်းငယ်မှာပင် သက်ရှိအားလုံးကို သုတ်သင်နိုင်သည့် ကမ္ဘာပျက်ကပ်ကို ဖန်တီးပေးနေသည်။

"ဒီလှိုင်းကို တားဆီးကြ မဟုတ်ရင် ဖူဘိုမြို့တင်မကဘူး။ ကုန်းတွင်းပိုင်းအထိ ရောက်သွားပြီး လူသန်းပေါင်းများစွာကို ဘေးအန္တရာယ် ကျရောက်လိမ့်မယ်"

အင်အားကြီး မျိုးနွယ်စုများ၏ ခေါင်းဆောင်များမှာ အကြည့်တို့ စူးရှသွားပြီး ချန်ကျီရှင်းနှင့် လီချန်းရှင်းတို့၏ တိုက်ပွဲကြောင့် ဖြစ်ပေါ်လာသည့် ကမ္ဘာပျက်ကပ် လှိုင်းလုံးကြီးကို တားဆီးရန် ဧရာမ အကာအကွယ်တစ်ခုကို ဖန်တီးလိုက်ကြသည်။

ဘုန်း…ဍ

လှိုင်းလုံးကြီးမှာ အကာအကွယ်ကို ရိုက်ခတ်သွားပြီး ပိုမိုပြင်းထန်စွာ ပြန်လည် လှည့်ပတ်သွားကာ ရေလွှမ်းမိုးမှုကြောင့် ပင်လယ်ကြမ်းပြင်တွင် ရှိနေကြသော ချန်ကျီရှင်းနှင့် လီချန်းရှင်းတို့ပေါ်သို့ လွှမ်းမိုးသွားသလိုပင်။

ပင်လယ်ပြင်မှာ ပွက်ပွက်ဆူလျက် ရှိနေပြီး ပင်လယ်အောက် မိုင်ပေါင်း သုံးသောင်းတွင် ရှေးဟောင်း နတ်ဘုရားနှစ်ပါး တိုက်ခိုက်နေသကဲ့သို့ တုန်ခါနေသည်။

နောက်တစ်ခဏတွင်

ချွမ်…ဍဍ

တောက်ပသော ဓားအလင်းတန်းတစ်ခု ဖြတ်သန်းသွားပြီး ပင်လယ်ပြင်တစ်ခုလုံးကို နှစ်ပိုင်း ခွဲထုတ်သွားသည်။

ပျက်စီးယိုယွင်းနေသည့် ပင်လယ်ကြမ်းပြင် မြင်ကွင်းမှာ ထင်ရှားစွာ ပေါ်လာသည်။ ပင်လယ်အောက် မိုင်ပေါင်း သုံးသောင်းမှ လူနှစ်ဦးမှာ တစ်ပြိုင်နက်တည်း ကောင်းကင်သို့ ပျံတက်လာကြသည်။

"ရေခဲမီးတောက် ကောင်းကင်ကို လောင်ကျွမ်းစေ"

ချန်ကျီရှင်းမှာ သူ၏ ဆံပင်များ လွင့်စဉ်လျက် လက်နှစ်ဖက်ကို ရှေ့သို့ ပြင်းထန်စွာ တွန်းထုတ်လိုက်သည်။

တစ်ခဏချင်းတွင် အာကာသတစ်ခုလုံးကို အေးခဲစေသည့် အေးစက်စက် အရှိန်အဝါနှင့် တောင်များကိုပင် အရည်ပျော်စေနိုင်သည့် နတ်ဘုရားမီးတောက်တို့မှာ ချန်ကျီရှင်း၏ လက်မောင်းများမှတစ်ဆင့် လီချန်းရှင်းဆီသို့ ပျံသန်းသွားသည်။

တာအိုပညာရပ်ကြီးနှစ်ခု လာရောက်ခြင်းကို မြင်သောအခါ လီချန်းရှင်းမှာ ကျယ်လောင်စွာ ရယ်မောသည်။

"ချန်ကျီရှင်း... ကမ္ဘာကြီးက မင်းကို မဟာတာအို ကိုးခုကို ပိုင်ဆိုင်ထားလို့ ပြိုင်ဘက်ကင်းတယ်လို့ ထင်နေတာ"

"ဒါပေမဲ့ ငါ လီချန်းရှင်း ပိုင်ဆိုင်ထားတဲ့ တာအိုပညာရပ်တွေက ကိုးခုထက် ပိုများတယ်ဆိုတာ သူတို့ ဘယ်သိနိုင်ပါ့မလဲ"

စကားဆုံးသည်နှင့် လီချန်းရှင်းမှာ ခေါင်းကို ငုံ့လိုက်ပြီး သူ၏ မျက်ဝန်းတို့တွင် ရက်စက်သော သတ်ဖြတ်လိုစိတ်များ တောက်ပလာသည်။

"ယင်ယန်းတာအို... ယင်ယန်း အသက်သေဆုံးခြင်း မြေပုံ"

"ရေခဲမြစ်တာအို... ကောင်းကင်မြစ်"

"သစ်သားလမ်းကြောင်း... စိမ်းလန်းသော ကောင်းကင်သစ်ပင်"

ဘုန်း…

ထိုအခိုက်တွင် သူ၏ နောက်ကျောတွင် ဧရာမ ယင်ယန်း ငါးပုံစံ ပုံရိပ်တစ်ခု ပေါ်လာသည်။ ယင်နှင့်ယန်း လှည့်ပတ်နေပြီး အသက်နှင့် သေခြင်းတို့မှာ တစ်သားတည်း ဖြစ်နေသည်။

၎င်းမှာ ကမ္ဘာလောကရှိ အရာအားလုံးကို ကြိတ်ခြေပစ်မည့် ပုံစံဖြင့် ချန်ကျီရှင်းဆီသို့ အရှိန်အဟုန်ဖြင့် ဝင်တိုးလာသည်။

ယင်ယန်း မြေပုံမှ ထွက်ပေါ်လာသည့် အသက်သေဆုံးခြင်း အရှိန်အဝါမှာ သက်ရှိအားလုံးကို သုတ်သင်ပစ်ရန် ကြိုးစားနေသည်။

ထိုအရာတင်မကသေးပေ လီချန်းရှင်း၏ လက်ဖဝါးမှ အေးစက်စက် လေစီးကြောင်းများမှာ ရှေ့သို့ လျင်မြန်စွာ တိုးဝင်သွားသည်။

တစ်ခဏအတွင်းမှာပင် ထိုအေးစက်စက် လေစီးကြောင်းများမှာ ကောင်းကင်တစ်ခွင်လုံးကို ဖုံးလွှမ်းသွားပြီး ပေပေါင်း တစ်သောင်းအတွင်းရှိ အရာအားလုံးကို တောက်ပကြည်လင်သည့် ရေခဲတောင်များအဖြစ် ပြောင်းလဲပစ်လိုက်သည်။

ကောင်းကင်ထက်တွင် ရေခဲတောင်များမှာ တောအုပ်တစ်ခုကဲ့သို့ ထူထပ်စွာ ရှိနေသည်။

ထို့နောက် ပေပေါင်း တစ်ထောင်အချင်းရှိသော ဧရာမ သစ်ပင်ကြီးတစ်ပင်မှာ အာကာသထဲတွင် အမြစ်တွယ်ကာ ကောင်းကင်ထိတိုင်အောင် ကြီးထွားလာသည်။

ထိုသစ်ပင်ကြီးမှာ စိမ်းလန်းစိုပြေနေပြီး ရှုပ်ထွေးသော နတ်ဘုရားအလင်းတန်းများဖြင့် ဝန်းရံထားသည်။

အကိုင်းအခက် သုံးထောင်တို့မှာ လှုပ်ရှားနေပြီး တကယ့် ဒဏ္ဍာရီလာ နတ်ဘုရားသစ်ပင်ကြီးပမာ တောက်ပနေသည်။

ကောင်းကင်ကြီးတစ်ခုလုံးမှာ စိမ်းလန်းသော အရောင်အသွေးဖြင့် လွှမ်းခြုံသွားသည်။

ဤအခိုက်အတန့်တွင် အမြင့်ဆုံး တာအိုပညာရပ် သုံးခုမှာ ချန်ကျီရှင်းကို တစ်ပြိုင်နက်တည်း ဖိနှိပ်လိုက်သဖြင့် သူသည် ချက်ချင်းဆိုသလို အန္တရာယ်ကြီးမားသော အခြေအနေသို့ ရောက်ရှိသွားတော့သည်။