အခန်း (၂၅၇၇-၂၅၇၈)

အပိုင်း(၂၅၇၇)

"ရိုင်းစိုင်းလှချည်လား..."

ထိုအသံသည် လေထုကို ပေါက်ကွဲသွားစေပြီး ၎င်း၏ စွမ်းအားတိုင်းက ဝေ့ဝူယင် ထံသို့ တိုက်ရိုက် ဦးတည်သွားခဲ့သည်။ ဝိညာဉ် စွမ်းအား လှိုင်းတံပိုးများသည် သူ့ ဆီသို့ တရစပ် ရိုက်ခတ်လာသော်လည်း ပတ်ဝန်းကျင်ကိုမူ အနည်းငယ်မျှသာ ထိခိုက်စေခဲ့သည်။ ထိန်းချုပ်နိုင်စွမ်းမှာ အထွတ်အထိပ်သို့ ရောက်ရှိနေပြီး ၎င်း၏ နောက်ကွယ်ရှိ ဝိညာဉ်အင်အား မှာလည်း ကြောက်မက်ဖွယ် ကောင်းအောင် မြင့်မားလှသည်။ ထိုလှိုင်းတံပိုးများသည် ချေမှုန်းနိုင်သော စွမ်းအားတစ်ခုအဖြစ် ပြောင်းလဲသွားပြီး သူ၏ အသိစိတ် ပင်လယ် ကို ထိုးနှက်ရန် ရည်ရွယ်ထားခြင်း ဖြစ်သည်။

ဝေ့ဝူယင်က ဆက်လက် ပြုံးထားဆဲပင်။ စုရီသည် သဘာဝအလျောက် တုံ့ပြန်လိုက်ပြီး တုန်ခါနေသော ဝိညာဉ်အင်အားနှင့် အတူ သူ၏ မျက်ခုံးနှစ်ခုကြားကို ကာကွယ်ရန် သေးငယ်သော ဝိညာဉ် ဓားတစ်လက်ကို ဖန်တီးလိုက်လေသည်။

ထို့နောက် ဖြစ်ပျက်သွားသောအရာက လူတိုင်းကို အံ့အားသင့်သွားစေခဲ့သည်။ ဧကရာဇ်ငယ်သည် ထိုနေရာတွင်သာ မတ်တတ်ရပ်နေခဲ့သည်။ လှိုင်းလုံးများသည် သူ၏ ခန္ဓာကိုယ်တစ်ခုလုံးကို ရိုက်ခတ်ကာ သူ၏ အသိစိတ် ပင်လယ် ထဲသို့ ကျူးကျော်ဝင်ရောက်လာပြီး သူ၏ ဝတ်ရုံများကို ခပသဲ့သဲ့မျှသော လေပြေဖြင့် လွင့်လူးသွားစေခဲ့သည်။

သို့သော် သူ၏ အကြည့်များက ကောင်းကင်ရှန့်ထို ရှေးဟောင်း မိုးကုပ်စက်ဝိုင်း ထံမှ ဖယ်ခွာမသွားခဲ့သလို သူ၏ အပြုံးကလည်း ပျောက်ကွယ်မသွားခဲ့ပေ။ လောကပြင်ပမှ ဆင်းသက်လာသကဲ့သို့ ချောမောခန့်ညားသော မျက်နှာပေါ်သို့ လေပြေညင်းလေးတစ်ခု ဖြတ်တိုက်သွားသကဲ့သို့ပင် ဖြစ်ပြီး ထိုသဘာဝလေရူးများက သူ့ကို ပိုမိုထင်ရှားသွားစေခဲ့သည်။

ထိုမိုးချုန်းသံကဲ့သို့ ဟစ်အော်သံသည် တန်ဖိုးမရှိသော လေမှုတ်ထုတ်မှု တစ်ခုကဲ့သို့ပင် ဝေ့ဝူယင် သည် တုန်လှုပ်ခြင်းမရှိ၊ ထိခိုက်ဒဏ်ရာရခြင်းမရှိ၊ အကျိုးသက်ရောက်မှုမရှိဘဲ တည်ငြိမ်နေခဲ့လေသည်။

တိုက်ခိုက်သူမှာ အဂ္ဂိရတ် သူရဲကောင်း တစ်ယောက်ဖြစ်ပြီး ကောင်းကင်ငယ် တမန်တော် အဆင့်ရှိ အစစ်အမှန် အထွတ်အထိပ် သူတော်စင် တစ်ပါး ဖြစ်သည်။ သူသည် ရွှေဝါရောင် ဆံပင်နှင့် အစိမ်းရောင် မျက်လုံးများရှိသည့် ငယ်ရွယ်ပြီး အရပ်ရှည်သော အမျိုးသားတစ်ဦး ဖြစ်သည်။ အဝေးမှနေ၍ အစောင့်အဖြစ် ရပ်နေကာ ရှေးဟောင်း မိုးကုပ်စက်ဝိုင်း ၏ ထူးခြားသော အမှတ်အသားကို ဆောင်ထားသူလည်း ဖြစ်လေသည်။

အဂ္ဂိရတ် သူရဲကောင်း များသည် စုဝေးမှု၏ အဓိကနေရာတွင် မရှိဘဲ အစွန်ဆုံး နေရာများတွင်သာ ရပ်နေခဲ့ကြသည်။ အချို့သော အဆင့်သတ်မှတ်ချက်ရှိသည့် အဂ္ဂိရတ် သူရဲကောင်း များကိုသာ ဝင်ခွင့်ပြုထားခြင်း ဖြစ်သည်။ ဥပမာအားဖြင့် ဖိတ်ကြားမှုအတွင်း ပါခက် တစ်ဦးတည်းသာ ဝင်ခွင့်ရရှိခဲ့ပြီး ကန်မင်ဂျီ နှင့် ဟုန်ရွှမ်နူ တို့သည် အခန်းပြင်တွင်သာ နေခဲ့ရလေသည်။

"ဒါက ထိုင်ဖို့ နေရာကောင်းတစ်ခုလိုပဲ..."

ဝေ့ဝူယင်က နှုတ်မှဖွင့်ဟ ပြောဆိုလိုက်ပြီးနောက် ကောင်းကင်ရှန့်ထို ရှေးဟောင်း မိုးကုပ်စက်ဝိုင်း ထံသို့ လျှောက်သွားခဲ့သည်။ အရပ်မျက်နှာ အသီးသီးမှ အာရုံစိုက်မှုကို ဆွဲဆောင်နိုင်ရန် ဗဟိုချက်တွင် နေရာအလုံအလောက် ပေးထားသဖြင့် သူမသည် အနည်းငယ် သီးခြားဖြစ်နေပြီး လွတ်လပ်သော နေရာအဝိုင်းလေးတစ်ခု ဖြစ်ပေါ်နေလေသည်။

ဝေ့ဝူယင်သည် ထိုနေရာလွတ်ထဲသို့ ဝင်ရောက်သွားပြီး ကောင်းကင်ရှန့်ထို ရှေးဟောင်း မိုးကုပ်စက်ဝိုင်း ၏ မျက်နှာချင်းဆိုင် တည့်တည့်တွင် ရပ်လိုက်သည်။ သူတို့ကြားတွင် ခုနစ်ပေခန့်သာ ကွာဝေး၏။

ဝှစ်...

ဝေ့ဝူယင်သည် သူမ၏ ထိုင်ခုံနှင့် အဆင့်တူညီလောက်သော ခမ်းနားသည့် ငွေရောင် ရာဇပလ္လင် တစ်ခုကို ဖန်တီးလိုက်သည်။ ထို့နောက် ဤသည်မှာ အခန်းတွင်းရှိ အကောင်းဆုံး ထိုင်ခုံဖြစ်သကဲ့သို့ တည်ငြိမ်စွာ၊ လွယ်ကူသက်သာစွာဖြင့် ထိုင်ချလိုက်လေသည်။ ထိုနေရာသည် ဂလက်ဆီ တစ်ခုလုံး၏ ကြယ်တာရာ ကဲ့သို့ လှပသော အမျိုးသမီးကို သူမ၏ အသွင်အပြင်တစ်ခုလုံး အသေးစိတ် အကဲခတ်နိုင်သည့် နေရာတစ်ခု ဖြစ်ပေသည်။

ဝိညာဉ် ဟစ်အော်သံကို ထုတ်လွှတ်ခဲ့သော အဂ္ဂိရတ် သူရဲကောင်း မှာ အံ့ဩမှင်တက်သွားကာ မယုံကြည်နိုင်လောက်အောင် ဖြစ်သွားခဲ့သည်။ ဤမျှ ရဲတင်းပြီး မိုက်မဲသော လုပ်ရပ်ကြောင့် မည်သို့ဖြစ်ပျက်နေသည်ကိုပင် သူ နားမလည်နိုင်အောင် ဖြစ်သွားခဲ့ရလေသည်။

ပါခက်သည် အခြားသော လျှို့ဝှက်အရှင် များ၊ သူတော်စင်များ၊ ဉာဏ်အလင်းရ သူတော်စင် များနှင့်အတူ အဂ္ဂိရတ် သူရဲကောင်း များ ရှိရာ နေရာသို့ တိတ်တဆိတ် ရွှေ့သွားခဲ့သည်။

ဝေ့ဝူယင်သည် ရှေးဟောင်း မိုးကုပ်စက်ဝိုင်း ၏ မျက်နှာချင်းဆိုင် တည့်တည့်တွင် ထိုင်ကာ သူမ၏ မျက်လုံးများကို စိုက်ကြည့်နေခဲ့သည်။ တိတ်ဆိတ်စွာပင် သူ၏ အတုမဲ့ ဖန်တီးခြင်း အဂ္ဂိရတ် ကြယ်တာရာများ က အသက်ဝင်လာခဲ့သည်။

ထို့နောက် လူအားလုံး၏ တုန်လှုပ်ခြင်း၊ မယုံကြည်နိုင်ခြင်းနှင့် ဒေါသထွက်ခြင်းတို့ ပြည့်နှက်နေသော အကြည့်များရှေ့တွင် သူမ၏ ကိုယ်ပိုင် အဂ္ဂိရတ် ကြယ်တာရာများ က တုံ့ပြန်လာခဲ့သည်။

သူမ ရည်ရွယ်ချက် ရှိရှိ ထုတ်ဖော်ပြသထားသည့် သာလွန် သန့်စင် အဂ္ဂိရတ် ကြယ်တာရာများသည် ဝေ့ဝူယင် ၏ ကြယ်တာရာများနှင့် မတူညီပေ။ မျက်တောင်မွေးများ၏ အစွန်းများကို ထိလုနီးပါးဖြစ်နေသော မျက်လုံးအိမ်၏ အလယ်ဗဟိုတွင် ထောင့်လေးခုပါရှိသော ကြယ်တစ်ပွင့်ရှိသည်။ တစ်ခုတည်းသော ကွာခြားချက်မှာ ၎င်းမှ ထုတ်လွှတ်နေသော အော်ရာ ပင် ဖြစ်သည်။ ၎င်းသည် ရှေးဟောင်းဆန်ပြီး ကောင်းကင်ဘုံကဲ့သို့ ခမ်းနားကာ အဆုံးအစမဲ့သော အလားအလာများ ရှိနေလေသည်။

သို့သော်လည်း... ဝေ့ဝူယင်၏ အတုမဲ့ ဖန်တီးခြင်း ကြယ်တာရာများနှင့် ဆုံတွေ့သည်နှင့် ထောင့်လေးခုပါသော ကြယ်သည် ထောင့်ငါးခုပါသော ကြယ်အဖြစ် ပြောင်းလဲသွားပြီး မျက်လုံးအိမ်တစ်ခုလုံးကို လွှမ်းမိုးသွားခဲ့သည်။ ၎င်းသည် မျက်ဖြူသားကို ကျော်လွန်ကာ သူမ၏ မျက်လုံးအစွန်းများဆီသို့ ရောက်ရှိသွားပြီး မီးခိုးရောင် အစွမ်းကုန် သန့်စင်ခြင်း မြူခိုး များနှင့် တောက်ပသော အဂ္ဂိရတ် ဝိညာဉ် အလင်းများ ရောယှက်ကာ အပြင်သို့ ထုတ်လွှတ်နေလေသည်။ ၎င်းက သူမအား အဂ္ဂိရတ် တာအို ၏ အမတေ များ ပါဝင်နေပုံရသည့် နတ်ဘုရားဆန်သော အကြည့်တစ်ခုကို ပေးစွမ်းနေခဲ့သည်။ သူမသည် အဂ္ဂိရတ် ပညာရပ်၏ အဓိက အနှစ်သာရကို ထိတွေ့မိသွားပုံရသည်။ ၎င်းသည် လူအနည်းငယ်သာ ကိုယ်တိုင် ကိုယ်ကျ မြင်တွေ့နိုင်သည့် အနှစ်သာရတစ်ခု ဖြစ်ပေသည်။

အခန်းတွင်းရှိ အဂ္ဂိရတ် ပညာရှင် တိုင်းသည် နှလုံးသားများ ခုန်ပေါက်ကာ ဝိညာဉ်များ တုန်ခါသွားသလို ခံစားလိုက်ရသည်။ ထိုအထဲတွင် ဤဘဝတွင်မှ အဂ္ဂိရတ် ပညာရှင် အဖြစ် အသိအမှတ်ပြုခံရသော စုရီ လည်း ပါဝင်လေသည်။ သူ၏ ယခင်ဘဝတွင် အဂ္ဂိရတ် တာအိုသည် အရန် ဖန်တီးခြင်း အသက်မွေးဝမ်းကျောင်း တစ်ခုသာဖြစ်ပြီး သူ၏ အသက်အရွယ်နှင့် ကျင့်ကြံခြင်း အဆင့်ကြောင့်သာ မြင့်မားသော အဆင့်များသို့ ရောက်ရှိခဲ့ခြင်း ဖြစ်သည်။ အခြားသော ဖန်တီးခြင်း ပညာရှင် များ၏ အသက်မွေးဝမ်းကျောင်း အလုပ်များအတွက်လည်း ဤအချက်က မှန်ကန်လေသည်။

"မင်္ဂလာပါ..."

ဝေ့ဝူယင် က နှုတ်ဆက်လိုက်သည်။ သူ၏ နှုတ်ဆက်ပုံမှာ အနည်းငယ် အဆင်အခြင်မဲ့နေပြီး နောက်ဆုံးတွင်တော့ သူမ၏ စစ်မှန်သော အသွင် တစ်နည်းအားဖြင့် အစစ်အမှန် အဂ္ဂိရတ် ကြယ်တာရာများကို မြင်တွေ့လိုက်ရပြီဟု အရိပ်အမြွက် ပြောဆိုနေသကဲ့သို့ပင် ဖြစ်လေသည်။

ရှေးဟောင်း မိုးကုပ်စက်ဝိုင်း၏ ဟန်ပန်အမူအရာသည် အဂ္ဂိရတ် တာအို ၏ အမြင့်မြတ်ဆုံး အာဏာပိုင် တစ်ဦးအဖြစ်သို့ ပြောင်းလဲသွားခဲ့သည်။ သူမသည် ခါးကို အနည်းငယ် ပိုမတ်လိုက်သည်။ သူမ၏ တည်ရှိမှုသည် ကောင်းကင်ကိုပင် တုန်လှုပ်သွားစေနိုင်သော အပြောင်းအလဲတစ်ခု ဖြစ်ပေါ်သွားခဲ့ပြီး စိတ်ပိုင်းဆိုင်ရာနှင့် ကျွမ်းကျင်မှုပိုင်းဆိုင်ရာ သာလွန်မှုများကို ထုတ်လွှတ်နေခဲ့လေသည်။

ဝေ့ဝူယင်သည် ပေါ့ပေါ့ပါးပါး အမူအကျင့်များနှင့် အတူ အခန်းတွင်းရှိ အာရုံစိုက်မှုနှင့် အရှိန်အဟုန်ကို ချက်ချင်း သိမ်းပိုက်လိုက်ပြီးနောက် ၎င်းတို့ကို ကောင်းကင်ရှန့်ထို ရှေးဟောင်း မိုးကုပ်စက်ဝိုင်း နှင့် တန်းတူညီမျှ ခွဲဝေယူလိုက်လေသည်။ ၎င်းက သူသည် နိမ့်ကျသူ တစ်ယောက်မဟုတ်ဘဲ တန်းတူအဆင့်အတန်း ရှိကြောင်း ပြသနေသည့် လက္ခဏာ တစ်ရပ်ပင် ဖြစ်သည်။

ကောင်းကင်ရှန့်ထို ရှေးဟောင်း မိုးကုပ်စက်ဝိုင်းသည် ဝေ့ဝူယင် ကို စူးစိုက် ကြည့်လိုက်သည်။ သူမ၏ အကြည့်များက လောကပြင်ပမှ ဆင်းသက်လာသကဲ့သို့ ချောမောခန့်ညားသော သူ၏ မျက်နှာပေါ်မှတစ်ဆင့် သူ၏ နှုတ်ခမ်းများဆီသို့ ရောက်ရှိသွားသည်။ ထိုမှတစ်ဆင့် ငြိမ်သက်နေသော သူ၏ နဂါး အပါအဝင် သူ၏ ခန္ဓာကိုယ် အစိတ်အပိုင်း အားလုံးကို အကဲခတ်ကြည့်ရှုလိုက်ပြီး... နောက်ဆုံးတွင် သူ၏ အတုမဲ့ ဖန်တီးခြင်း အဂ္ဂိရတ် ကြယ်တာရာများ ဆီသို့ ပြန်လည် ရောက်ရှိသွားခဲ့သည်။

"မင်္ဂလာပါ..."

ဝိညာဉ်များကို တုန်လှုပ်စေပြီး နှလုံးသားများကို ဖမ်းစားနိုင်သော ဆွဲဆောင်မှုအပြည့်ပါသည့် အပြုံးတစ်ခုဖြင့် သူမက ပြန်လည် နှုတ်ဆက်လိုက်သည်။

ဝေ့ဝူယင်၏ အပြုံးက ပိုမို တောက်ပလာခဲ့သည်။ ဤအခိုက်အတန့်လေးတွင် ကောင်းကင်တာအိုများ၏ ကောင်းချီးခံများ ပြည့်နှက်နေသော အခန်းတွင်း၌ သူတို့နှစ်ဦးတည်းသာ အဓိက ဇာတ်ကောင်များ ဖြစ်နေကြောင်း ထင်ရှားနေခဲ့သည်။ အခြားသူများ အားလုံးမှာ တည်ရှိမနေသကဲ့သို့ပင် ဖြစ်လေသည်။

သူက ပြုံးလျက် စိုက်ကြည့်နေစဉ် သူမက တိုးညင်းစွာ ရယ်မောလိုက်သည်။ ဝေ့ဝူယင်က သူ၏ မျက်ခုံးများကို ပင့်ကာ စိတ်အားထက်သန်စွာဖြင့် ရှေ့သို့ ကိုင်းညွတ်လိုက်သည်။

ထို့နောက်... ရှိနေသူအားလုံး၏ ရှေ့တွင်ပင် သူမက အဂ္ဂိရတ် တာအို ၏ အနှစ်သာရများ ပါဝင်နေသော သူမ၏ မျက်လုံးများကို နောက်ပြောင်သလို လှန်ပြလိုက်လေသည်။ ၎င်းကို တုံ့ပြန်သည့်အနေဖြင့် ဝေ့ဝူယင် က သဘောကျစွာ ရယ်မောလိုက်သည်။

ထို့နောက် သူ၏ အလုပ်ပြီးမြောက်သွားသကဲ့သို့ သက်တောင့်သက်သာရှိသော အနေအထားဖြင့် နောက်သို့ မှီထိုင်လိုက်လေသည်။

လောကကြီးတွင် သူတို့နှစ်ဦးတည်းသာ ရှိနေသကဲ့သို့ မမြင်နိုင်၊ မကြားနိုင်၊ မသိနိုင်သော အပြန်အလှန် ဖလှယ်မှုတစ်ခုက သူတို့ကြား၌ ဖြစ်ပေါ်နေခဲ့သည်။

ရှေးဟောင်း မိုးကုပ်စက်ဝိုင်း ၏ အဂ္ဂိရတ် သူရဲကောင်း သည် ပြင်းထန်သော ဒေါသများဖြင့် ပွက်ပွက်ဆူနေခဲ့သည်။ သူ၏ အကြည့်များထဲတွင် အလွန်အမင်း မနာလိုမှု အရိပ်အယောင်များ လောင်ကျွမ်းနေကြောင်းကို သိသာထင်ရှားစွာ တွေ့မြင်နေရလေသည်။

"တာအို ကျင့်ကြံသူစု... ထိုင်ပါ..."

ကောင်းကင်ရှန့်ထို ရှေးဟောင်း မိုးကုပ်စက်ဝိုင်းက လွတ်နေသော နေရာတစ်ခုဆီသို့ တည်ငြိမ်စွာ လက်ဟန်ပြလိုက်သည်။

၎င်းမှာ အခြားသော အစစ်အမှန် သူတော်စင် အဆင့် ပါရမီရှင်များနှင့်အတူ ရှိနေသည့် နေရာဖြစ်သည်။ ထို့ပြင် ပဲ့တင်ထပ် ဝိညာဉ် အဆင့် ကျင့်ကြံခြင်း အခြေခံများရှိသော ကောင်းကင်ရှန့်ထို အဂ္ဂိရတ် ပညာရှင် သုံးဦးခန့်၏ ဘေးတွင် အခြား ထိုင်ခုံတစ်ခုလည်း ရှိနေခဲ့သည်။ ၎င်းမှာ ဝေ့ဝူယင် အတွက် ရည်ရွယ်ထားကြောင်း သိသာထင်ရှားလှသည်။

အခြားတစ်ဖက်၌... စုရီ မှာ ခေတ္တမျှ ဇဝေဇဝါ ဖြစ်သွားခဲ့သည်။ သူသည် သူ ပိုင်ဆိုင်ထားသော စွမ်းအားများအရ ရိုးရွဲ သူတော်စင်များ နှင့်အတူ ရှိသင့်သည်ဟု တွေးမိလိုက်သည်။ ယခုတွင်တော့ အစစ်အမှန် သူတော်စင် အဆင့် ပါရမီရှင်များကြားတွင်သာ နေရာချထားပေးခံခဲ့ရသည်။ သို့သော် ဝေ့ဝူယင် က လူအုပ်ကြားထဲတွင် ကိုယ်ပိုင် နေရာရွေးချယ်သွားသည်ကို မြင်ပြီးနောက် သူသည်လည်း ထင်ပေါ်အောင် နေသင့်သလား၊ စီစဉ်ထားသည့်အတိုင်း လိုက်နာသင့်သလား ဟု တုံ့ဆိုင်းနေခဲ့လေသည်။

သူ၏ တုံ့ဆိုင်းမှုသည် ခဏတာမျှသာ ဖြစ်သော်လည်း သိသာထင်ရှားနေခဲ့သည်။ နောက်ဆုံးတွင် လူတိုင်း၏ အကြည့်များအောက်၌ သူသည် သတ်မှတ်ထားသော နေရာသို့ သွားထိုင်လိုက်သည်။ အချို့ကမူ သူသည် ဝေ့ဝူယင် ကဲ့သို့ အဆင်အခြင်မဲ့စွာ ပြုမူလိမ့်မည်ဟု မျှော်လင့်နေခဲ့ကြသည်။ သို့သော် ပြဿနာမရှာခြင်းက အကောင်းဆုံးပင် ဖြစ်သည်။

ဝေ့ဝူယင်က လှမ်းကြည့်လိုက်၏။ သူ၏ အကြည့်များထဲတွင် စိတ်ပျက်မှု အရိပ်အယောင် အနည်းငယ် လင်းလက်သွားခဲ့သည်။ ထို့နောက် သူက ပွင့်ပွင့်လင်းလင်းပင် ဖွင့်ဟပြောဆိုလိုက်သည်။

"တာအိုရောင်းရင်းစု... ခင်ဗျားက ရိုးရွဲ သူတော်စင်စူး ရဲ့ ဘေးမှာ ထိုင်တာ အကောင်းဆုံးပဲ။ ခင်ဗျားရော အဲ့ဒီလို မထင်ဘူးလား..."

ဝေ့ဝူယင် က ကောင်းကင်ရှန့်ထို ရှေးဟောင်း မိုးကုပ်စက်ဝိုင်း အား မေးမြန်းလိုက်သည်။

"သူ ဆန္ဒရှိတယ် ဆိုရင်ပေါ့..."

သူမက ဖြေကြားလိုက်လေသည်။

***

အပိုင်း(၂၅၇၈)

စုရီ ၏ ခြေလှမ်းများ ရပ်တန့်သွားခဲ့၏။ ချက်ချင်းဆိုသလို သူက လှည့်ကြည့်လိုက်ရာ ဝေ့ဝူယင် ၏ စိတ်ပျက်မှု အရိပ်အယောင်များကို မြင်တွေ့လိုက်ရသည်။ သူက ခေတ္တမျှ စဉ်းစားလိုက်ပြီးနောက် ဝေ့ဝူယင်သည် သူနှင့်အတူ ရောက်ရှိလာခဲ့ပြီး အခမ်းအနားသို့ပင် အတူတကွ လျှောက်ဝင်လာခဲ့ကြကြောင်း သဘောပေါက်သွားခဲ့သည်။ သူက သာမန် စီစဉ်ထားသည့်အတိုင်း လိုက်နာပြုမူလိုက်ခြင်းသည် ဝေ့ဝူယင်၏ ကိုယ်ပိုင် အရှိန်အဟုန်ကို နှိမ့်ချလိုက်ခြင်းနှင့် မခြားနားပေ။

ဝေ့ဝူယင်၏ စွမ်းရည်များအရ သူသည် ဤမျှ နောက်ကျမှ ရောက်ရှိလာရန် အကြောင်းမရှိပေ။ သိသာထင်ရှားစွာပင် သူတို့ နှစ်ဦး အတူဝင်လာသည့် လုပ်ရပ်က ဤနေရာရှိ အခြားသူများကို ဆန့်ကျင်သည့် သိမ်မွေ့သော ပူးပေါင်းတပ်ဦးတစ်ခုကို တည်ဆောက်ထားခြင်း ဖြစ်သည်။ ဤဖိတ်ကြားချက်သည် အနာဂတ် အခွင့်အလမ်းများအတွက် ကြီးမားပြင်းထန်သော အဓိပ္ပာယ် သက်ရောက်မှုများ ရှိနိုင်ကြောင်းကို သူ လုံးဝ နီးပါး မေ့လျော့နေခဲ့လေသည်။

ဝေ့ဝူယင်ကို ကြည့်လိုက်ရင်း စုရီ၏ မျက်လုံးများထဲတွင် ကျေးဇူးတင်မှု အရိပ်အယောင်တစ်ခု ဝင်ရောက်လာခဲ့သည်။ ထပ်မံ စကားမဆိုတော့ဘဲ သူသည် ရိုးရွဲ သူတော်စင်များ ထံသို့ လျှောက်သွားကာ သူတို့၏ ဘေးတွင် ထိုင်လိုက်လေသည်။

ထိုရိုးရွဲ သူတော်စင်များ ၏ အကြည့်များက သူ့အပေါ်သို့ စူးစမ်းစွာ ကျဆင်းလာခဲ့သည်။ ထိုအထဲတွင် စူးဟောင်ရန် နှင့် ကာမရာဂ ဆွဲဆောင်မှု အားကြီးမားသော အဝတ်အစားပါးပါး ဝတ်ဆင်ထားသည့် အမျိုးသမီး အပါအဝင် အနည်းဆုံး ခြောက်ဦးခန့် ရှိနေလေသည်။

တိတ်ဆိတ်စွာပင် အခန်းတွင်း၌ သူ၏ အဆင့်အတန်းမှာ မြင့်တက်သွားခဲ့သည်။ ဝေ့ဝူယင် ၏ စွမ်းအားနှင့် အဂ္ဂိရတ် တာအို အပေါ် တန်းတူညီမျှရှိသော အခွင့်အာဏာ ပြသမှုအပါအဝင်... သူတို့ နှစ်ဦး အတူတကွ ရောက်ရှိလာပြီးနောက်တွင် သူ၏ နေရာကို မည်သူကမျှ မေးခွန်းမထုတ်ဝံ့တော့ပေ။ ထိုမြင်ကွင်းကို နက်နက်ရှိုင်းရှိုင်း နားလည်သူ အနည်းငယ်သာ ရှိသော်လည်း ထိုနားလည်သူများမှာ သူတို့၏ အစစ်အမှန် ဝိညာဉ်များ အထိပင် တုန်လှုပ်သွားခဲ့ကြရသည်။

တိတ်ဆိတ်စွာပင်... မည်သည့်အချိန်ကမှန်း မသိလိုက်ဘဲ ပါခက် သည် အဂ္ဂိရတ် သူရဲကောင်း များ၏ အထွတ်အထိပ် သူတော်စင် ဧရိယာဆီသို့ ရွှေ့သွားခဲ့လေသည်။

'စုရီက သေချာပေါက် အမြတ်ထုတ် ကောင်းချီးခံ တစ်ယောက် မဟုတ်ဘူး...'

ဝေ့ဝူယင်က တွေးလိုက်သည်။ ထို့နောက် လူအုပ်ကြီးအား စကားအနည်းငယ် ပြောဆိုပြီး လူစုံပြီဖြစ်ကြောင်း ကြေညာလိုက်သော ကောင်းကင်ရှန့်ထို ရှေးဟောင်း မိုးကုပ်စက်ဝိုင်း ထံသို့သာ အာရုံစိုက်ထားလိုက်သည်။

အခြားလာမည့်သူ မရှိတော့သဖြင့် သူမက ဤသို့စုဝေးရခြင်း၏ ရည်ရွယ်ချက်ကို စတင်ပြောဆိုလိုက်လေသည်။

"ရှင်တို့ထဲက အများစုက ရှင်တို့အားလုံးကို စုစည်းရတဲ့ ကျွန်မရဲ့ ရည်ရွယ်ချက်ကို သိပြီးသား ဖြစ်ကြမှာပါ... နားလည်မှုလွဲတာမျိုး မရှိရအောင်၊ ဒါမှမဟုတ် မသိသေးတဲ့သူတွေ အတွက် ကျွန်မရဲ့ ရည်ရွယ်ချက်တွေကို ထပ်ပြောပြပါမယ်... ကျွန်မက အဂ္ဂိရတ် ပညာရှင်တွေနဲ့ တိုက်ခိုက်ရေးသမားတွေဆိုပြီး ထိပ်တန်း အဖွဲ့နှစ်ဖွဲ့ ခွဲပြီးတော့ ဂလက်ဆီ စစ်မြေပြင်ကို ခေါ်သွားဖို့ ရည်ရွယ်ထားပါတယ်..."

"ကျွန်မရဲ့ ရည်ရွယ်ချက်က အသစ်ထွက်ပေါ်လာတဲ့ ပစ္စည်းနှစ်ခုကို ရယူဖို့ လုံလောက်တဲ့ စစ်ဝိညာဉ်တွေ စုဆောင်းဖို့ပါပဲ... အဲ့ဒီပစ္စည်းတွေက လျှို့ဝှက်ဝိညာဉ် အဆင့် ဆေးဖော်စပ်ခြင်း နည်းလမ်းတစ်ခုနဲ့ တာအိုမီးပွား ကောင်းကင် ရတနာ တစ်ခုဖြစ်ပါတယ်..."

"..."

တစ်ချိန်က ရွှင်လန်းပြီး ပေါ့ပါးနေခဲ့သော လေထုမှာ ချက်ချင်းဆိုသလို တင်းမာပြီး မှုန်မှိုင်းသွားခဲ့လေသည်။

"တိုက်ခိုက်ရေး အဖွဲ့ထဲက သူတွေကို အဂ္ဂိရတ် အဖွဲ့က စိတ်ရောကိုယ်ပါ ပြုစုပျိုးထောင်ပေးမှာ ဖြစ်ပြီး သူတို့ရဲ့ ကျင့်ကြံခြင်း ကဏ္ဍတိုင်းမှာ ထောက်ပံ့ကူညီပေးသွားမှာပါ... တိုက်ခိုက်ရေးသမား တစ်ယောက်အနေနဲ့ ရှင်တို့ ယုံကြည်ရတဲ့ လုပ်ဖော်ကိုင်ဖက် စစ်သည် ၉၉၉ ယောက်အထိ ခေါ်ဆောင်ခွင့် ပြုထားပြီး အဲ့ဒီစစ်သည်တွေကလည်း ဒီလိုပြုစုပျိုးထောင်မှုတွေနဲ့ အန္တရာယ်တွေကို မျှဝေခံစားရမှာ ဖြစ်ပါတယ်... အဂ္ဂိရတ် ပညာရှင်တွေကတော့ သူတို့ရဲ့ ဆေးဖော်စပ်ခြင်း အားထုတ်မှုတွေမှာ ကူညီဖို့ လက်ထောက် ၇၆ ယောက်အထိ ခေါ်ဆောင်နိုင်ပါတယ်..."

"အဲ့ဒီမတိုင်ခင် ရှင်တို့ သဘောတူတယ်ဆိုရင်၊ ပြီးတော့ ပြန်ကုစားလို့ မရနိုင်တဲ့ တစ်ခုခု ရှင်တို့အပေါ် ကျရောက်လာခဲ့ရင် ရှင်တို့ရဲ့ မိသားစုတွေကို ရှေးဟောင်း မိုးကုပ်စက်ဝိုင်း မျှော်စင် ရဲ့ အကာအကွယ်အောက်မှာ နှစ်ပေါင်း ခုနစ်သိန်းကြာ စောင့်ရှောက်ပေးမယ်လို့ အာမခံပါတယ်..."

မရေမတွက်နိုင်သော မျက်လုံးများစွာသည် တောက်ပသွားခဲ့သည်။ ရည်မှန်းချက်ကြီးမားသော ထိုလူငယ်များသည် သူတို့၏ အကြည့်များကို ရွှေ့ပြောင်းလိုက်ကြပြီး ဂလက်ဆီ ခြောက်ခုမှ ထင်ရှားသော လောကရှန့်ထို အဂ္ဂိရတ် ပညာရှင်များနှင့် ကောင်းကင်ရှန့်ထို အဂ္ဂိရတ် ပညာရှင်များကို ရှာဖွေလိုက်ကြလေသည်။

အားလုံး၏ မျက်လုံးများ၌ အလွန်အမင်း အံ့ဩခြင်း၊ လေးနက်စွာ တွေးတောခြင်း၊ သို့မဟုတ် ပြင်းပြသော ဆုံးဖြတ်ချက်ချခြင်း စသည့် စိတ်ခံစားမှု အဖုံဖုံတို့ဖြင့် တောက်ပနေခဲ့သည်။ ဤဆွဲဆောင်မှုရှိသော ကမ်းလှမ်းချက်ကို ပထမဆုံးအကြိမ် ကြားရသူ အနည်းငယ်ထဲတွင် တစ်ဦးအပါအဝင်ဖြစ်သော စုရီ၏ ရင်ဘတ်ထဲ၌ နှလုံးခုန်သံများ ပြင်းထန်စွာ မြည်ဟည်းနေခဲ့၏။

ဂလက်ဆီ စစ်မြေပြင်...။

သူ၏ စိတ်ထဲ၌ အတွေးများ အလိုလို ပေါ်ပေါက်လာခဲ့ပြီး အတိတ်က မှတ်ဉာဏ်များ သည်းထန်စွာ တိုးဝင်လာခဲ့သည်။ အတိတ်ဘဝက သူ၏ သမိုင်းကြောင်းသည် စစ်မြေပြင်၏ အစွန်အဖျား၌ ရုန်းကန်ခဲ့ရခြင်းများ ပါဝင်နေခဲ့၏။ ထိုနေရာ၌ သူသည် သေဆုံးခြင်း၊ သွေးထွက်သံယိုမှုများနှင့် စစ်ပွဲများကြားတွင် အခွင့်အရေးများကို ရှာဖွေခဲ့ရသည်။ ထိုအရာက နှိုင်းယှဉ်၍မရနိုင်လောက်အောင် အလွန်ပင် အဖြစ်ဆိုးလှသည်။ သူ၏ ငယ်ရွယ်သော မဟာမိတ်များစွာကို ဆုံးရှုံးခဲ့ရ၏။ သူတို့၏ အသက်များမှာ ရိုးရှင်းသော ဓားတစ်ချက်ဝှေ့ယမ်းမှု၊ ပျံသန်းလာသော မြှားတစ်စင်း၏ အပေါက်ခံရမှု သို့မဟုတ် ပြင်းထန်သော တင်းပုတ်တစ်ခုဖြင့် ဦးခေါင်းခွံများ ရိုက်ချိုးခံရမှုတို့ဖြင့် အဆုံးသတ်သွားခဲ့ရ၏။ သွေးရောင်လွှမ်းနေသော ထိုနေ့ရက်များကို သူက ကွင်းကွင်းကွက်ကွက် ပြန်လည်သတိရလာခဲ့သည်။

သို့သော်လည်း ထိုအရာက ကြယ်တာရာ စစ်မြေပြင်သာ ဖြစ်ခဲ့သည်။ ထိုနေရာတွင် သေမျိုး နယ်ပယ်များမှ ကြယ်တာရာသခင်များသည် အဓိက စစ်သည်များအဖြစ် ကျက်စားကြပြီး အရပ်မျက်နှာအားလုံး၌ အန္တရာယ်များဖြင့် ပြည့်နှက်နေခဲ့၏။ သူတို့ကို မဟာ တာအို၏ အသိအမှတ်ပြုမှုကို အပြည့်အဝ မရရှိသေးသည့် အာဏာရှင်များက ဦးဆောင်ခဲ့ကြသည်။ ထို့ကြောင့် သူတို့၏ ကျင့်ကြံခြင်း အဆင့်များမှာ အများဆုံးအနေဖြင့် သေမျိုးတစ်ပိုင်း အရှင်သခင် အဆင့်တွင်သာ ကန့်သတ်ခံထားရပေသည်။

ထိုစစ်မြေပြင်၏ ပျက်စီးဆုံးရှုံးမှုနှင့် ရက်စက်ကြမ်းကြုတ်မှုများကို စုရီ ပြန်လည်သတိရနေစဉ်တွင် လူပုပု၊ ကြေးနီရောင်အသားအရေနှင့် မုတ်ဆိတ်မွေးပါးပါးရှိသော အမျိုးသားတစ်ဦးက မေးခွန်းတစ်ခုကို မေးမြန်းလိုက်သည်။

"ဂလက်ဆီ စစ်မြေပြင်လား၊ အာဏာရှင် စစ်မြေပြင် မဟုတ်ဘူးလား..."

ထိုအမျိုးသားသည် အခြားလူအနည်းငယ်၏ နှလုံးသားထဲတွင် ကြီးစိုးနေသော မေးခွန်းတစ်ခုကို ထုတ်မေးလိုက်ခြင်းပင် ဖြစ်၏။

သူသည် စည်းစိမ် တားမြစ်ချက် ဂလက်ဆီ အတွင်းရှိ ပြင်ပကောင်းကင် ထွန်းသစ်စ ခုနစ်ပါး အဆင့်သတ်မှတ်ချက်တွင် စာရင်းဝင်ထားသော နာမည်ကျော် မဟာ လောက အဂ္ဂိရတ် ရှန့်ထို လောကရှန့်ထို ‘မြူခိုးခြေလှမ်း’ ဖြစ်သည်။ ပြင်ပကောင်းကင် ထွန်းသစ်စ ခုနစ်ပါး အဆင့် သတ်မှတ်ချက်မှာ ထျန်းရှီယာ နှင့် ယွီပေါင်ယွဲ့ တို့ကဲ့သို့ အစစ်အမှန် ကောင်းကင်ရှန့်ထို အဂ္ဂိရတ်ပညာရှင်များ ဖြစ်လာရန် အခွင့်အလမ်းရှိသော ထိပ်တန်း အဂ္ဂိရတ် ပါရမီရှင်များအတွက် ပြင်ပအဆင့်သတ်မှတ်ချက်တစ်ခု ဖြစ်၏။

သို့သော်လည်း ထိုအဆင့်သတ်မှတ်ချက်မှ ကောင်းကင်ရှန့်ထို အဆင့်သို့ တက်လှမ်းရန် အခွင့်အလမ်းမှာ သိသိသာသာ နည်းပါးလှသည်။ စည်းစိမ် တားမြစ်ချက် ဂလက်ဆီ၏ မူလ အဂ္ဂိရတ် ပါရမီရှင်များသည် အစွမ်းကုန် သန့်စင်ခြင်း ဂလက်ဆီ ၏ စံနှုန်းများအရ အနည်းဆုံး နှစ်ပေါင်း တစ်သိန်းတစ်သောင်းနှစ်ထောင် နီးပါးအတွင်း အစစ်အမှန် ကောင်းကင်ရှန့်ထို အဂ္ဂိရတ်ပညာရှင် အဆင့်သို့ မရောက်ရှိခဲ့ကြပေ။

အခြားတစ်ဖက်၌... စုရီ၏ မျက်လုံးများက တောက်ပလင်းလက်သွားခဲ့သည်။ ထိုနေရာရှိ လူတိုင်းနီးပါး သိထားကြသည့်အတိုင်း စစ်ပွဲနှင့် စည်းမျဉ်း စစ်မြေပြင်များကို ကြယ်တာရာ စစ်မြေပြင်၊ အာဏာရှင် စစ်မြေပြင် နှင့် ဂလက်ဆီ စစ်မြေပြင် ဟူ၍ စစ်မြေပြင် သုံးခု ခွဲခြားထား၏။ ၎င်းတို့ကို အတွင်းပိုင်း၊ ပြင်ပပိုင်း နှင့် အချက်အချာ ဟူ၍ အဆင့်သုံးဆင့် ထပ်မံ၍ ခွဲခြားထားသေးသည်။

စစ်မြေပြင်၏ အတွင်းပိုင်း အမျိုးအစားများကို သတ်မှတ်နယ်မြေများ၌ ကန့်သတ်ထားပြီး များသောအားဖြင့် ဂလက်ဆီ တစ်ခုတည်း သို့မဟုတ် ကြယ်ကွင်းပြင် တစ်ခုတည်းတွင်သာ ဖြစ်သည်။ အံ့ဩစရာကောင်းသည်မှာ ၎င်းတို့၌ ပါဝင်သူဦးရေ အနည်းဆုံးနှင့် အများဆုံး ရှိနေတတ်ပြီး စစ်မြေပြင် အမျိုးအစားနှင့် သက်ဆိုင်ရာ ကောင်းကင်နယ်မြေအပေါ် မူတည်နေ၏။ ဂလက်ဆီက ပိုမိုအားကောင်းလေ လူဦးရေက ပိုနည်းလေဖြစ်သည်။ ဂလက်ဆီ က ပို၍ အားနည်းလေ လူဦးရေက ပိုများလေပင် ဖြစ်သည်။

စစ်မြေပြင်၏ ပြင်ပပိုင်း အမျိုးအစားကို ကျင့်ကြံခြင်းနှင့် သက်ဆိုင်သော လူမှုအသိုင်းအဝိုင်း ဆက်နွှယ်မှုများ၌သာ ကနဦးက ကန့်သတ်ထားခဲ့၏။ ၎င်းသည် ကောင်းကင်နယ်မြေ အများအပြား ပါဝင်သော စစ်မြေပြင်တစ်ခု ဖြစ်သည်။ ထိုနေရာတွင် စွမ်းအားနှင့် နှိုင်းယှဉ်ပါက လူဦးရေ အရွယ်အစားမှာ ပြောင်းပြန်အချိုးကျ ဖြစ်နေတတ်ပေသည်။

စစ်မြေပြင်၏ အချက်အချာ အမျိုးအစားတွင်မူ အားလုံး အားလုံး ပါဝင်နေခဲ့သည်။ ဤအခြေအနေ၌ အားလုံးဟူသည့် စကားလုံးကို အဓိပ္ပာယ်ဖွင့်ဆိုရန် ခက်ခဲလှပေသည်။ သို့သော် အခြားသော စည်ပင်နေသည့် ဂလက်ဆီ အစုအဝေးများမှ ဆင်းသက်လာသော ဂလက်ဆီ အစုအဝေးအပြင်ဘက်မှ သူများပင် ထိုနေရာ၌ ရှိနေခဲ့ကြ၏။ ထို့ပြင် ၎င်းသည် အန္တရာယ်အများဆုံး စစ်မြေပြင်လည်း ဖြစ်သည်။ ပျမ်းမျှ အသုံးတော်ခံများနှင့် ခြားနားစွာပင် တစ်ခေတ်လုံး၏ အကြီးကျယ်ဆုံးသော အထက်တန်းလွှာများ ပါဝင်နေသောကြောင့် ကြီးမားသော သက်ရောက်မှုစကေးဖြင့် သေဆုံးမှုများကို မကြာခဏ ဖြစ်ပေါ်စေတတ်ပေသည်။ ယင်းမှာ အသက်နှင့် ပါရမီများကို ကြိတ်ချေဖျက်ဆီးပစ်သည့် နေရာတစ်ခုပင် ဖြစ်သည်။

အကယ်၍ စွမ်းအားကသာ ပြဿနာတစ်ခုဖြစ်နေခဲ့ပါက သင့်ဘဝ၏ အဆုံးသတ်အထိ နေထိုင်သွားရမည့် အကျဉ်းထောင်တစ်ခု ဖြစ်လာပေလိမ့်မည်။

ဝေ့ဝူယင်သည် ဗဟုသုတကြွယ်ဝသူများ၏ အတွေးများထဲသို့ တိတ်တဆိတ် ဝင်ရောက်ကြည့်ရှုလိုက်၏။ သူသည် မတူညီသော သတင်းအချက်အလက် လမ်းကြောင်းများမှတစ်ဆင့် စုဆောင်းရရှိထားသည့် အသိပညာများကို အတည်ပြုနေခြင်း ဖြစ်သည်။

သူ စစ်မြေပြင်ထဲသို့ စတင်ဝင်ရောက်ခဲ့စဉ်က ကောင်းကင် တာအိုများ သည် သူ့အား စစ်မြေပြင်သို့ ဝင်ရောက်ရန် မည်သည့်အခါကမျှ ရည်ရွယ်ထားခြင်းမရှိကြောင်း သူ အနည်းနှင့်အများ ခန့်မှန်းမိခဲ့၏။ အထူးသဖြင့် ထိုအချိန်က သူ၏ ကျင့်ကြံခြင်း အဆင့်မှာ အလွန်နိမ့်ကျနေခဲ့သည်။ စစ်မြေပြင် တစ်ခုလုံးတွင် ကြယ်တာရာ သခင် အဆင့် သို့မဟုတ် ထိုထက်မြင့်မားသော ကျင့်ကြံခြင်းမရှိသည့် တစ်ဦးတည်းသော သူအဖြစ် ရှိနေနိုင်ပေသည်။

သို့သော်... သူက မည်သူနည်း။ အမြတ်ထုတ်သော ကောင်းချီးခံ တစ်ယောက်အနေဖြင့် သူသည် အရာအားလုံးကို ပိုင်ဆိုင်နိုင်ရန် ကြိုးစားခဲ့သည်။ ထို့အပြင်... သူ လုပ်နိုင်ခဲ့သည်။

စစ်မြေပြင် သည် ကန့်သတ်ချက်များနှင့် ဖိနှိပ်မှုများ ပြည့်နှက်နေသည့် နေရာတစ်ခု ဖြစ်၏။ သွေးထွက်သံယို ပြင်းထန်မှုများ၊ ဆုလာဘ်များရရှိနိုင်မည့် အလားအလာများနှင့် နှိုင်းယှဉ်၍မရနိုင်သော ရက်စက်ကြမ်းကြုတ်သည့် အန္တရာယ်များနှင့် စင်မြင့်တစ်ခု ဖြစ်သည်။ ၎င်းသည် ကောင်းကင်စစ်ပွဲနယ်မြေနှင့် ဆင်တူနေပေသည်။ ထို့ကြောင့် ကောင်းကင်စစ်မြေပြင်၌ လှည့်လည်စစ်ခင်းခဲ့စဉ်အတွင်း သူက ထိုမျှလောက် ရင်းနှီးကျွမ်းဝင်နေခဲ့ခြင်း ဖြစ်၏။

ထို့အပြင်... ထိုစဉ်က သူ ဝင်ရောက်ခဲ့ချိန်တွင် စစ်မြေပြင်၏ အနိမ့်ဆုံးအဆင့်ဖြစ်သော အတွင်းပိုင်း ကြယ်တာရာ စစ်မြေပြင် သို့ ဝင်ရောက်ခဲ့ခြင်း ဖြစ်သည်။

လုံလောက်သော စစ်ဝိညာဉ်များကို ရရှိခဲ့ပြီးနောက်တွင် သူသည် အချက်အချာ ကြယ်တာရာ စစ်မြေပြင် (ဆက်စက်မှု စစ်မြေပြင်) သို့ တိုက်ရိုက် ဖိတ်ကြားခံခဲ့ရ၏။ ထိုနေရာသည် စစ်ပွဲအတွက် ပိုမိုကြီးမားသော ပါရမီပါသည့် လူများနှင့် စစ်လိုလားသူများအတွက် သီးသန့်ဖယ်ထားသော နေရာတစ်ခု ဖြစ်သည်။

ကျန်ရှိနေသော ဇာတ်လမ်းကိုမူ လူတိုင်း ကောင်းစွာ သိရှိထားပြီး ဖြစ်ပေလိမ့်မည်။

***