အခန်း (၂၅၇၉-၂၅၈၀)

အပိုင်း(၂၅၇၉)

ပြင်ပ ကြယ်တာရာ စစ်မြေပြင် နှင့်ပတ်သက်၍ အခြေအနေမျိုးရှိသူများအတွက် ဝင်ရောက်နိုင်သည့် နည်းလမ်း သုံးခု ရှိနေခဲ့သည်။ ပထမတစ်ခုမှာ လုံလောက်သော စစ်ဝိညာဉ်များကို ရရှိထားသည့် အတွင်းပိုင်း စစ်မြေပြင်မှ တပ်မတော်တစ်ခုနှင့်အတူ ဝင်ရောက်ခြင်း ဖြစ်၏။ များသောအားဖြင့် စစ်သည်တစ်ဦးစီသည် စစ်ဝိညာဉ် ၁၀ ခု ရရှိရန် လိုအပ်ပြီး တပ်မှူးတစ်ဦးသည် စစ်ဝိညာဉ် ၁၀၀ ရရှိရန် လိုအပ်ပေသည်။ လိုအပ်ချက်များ ပြည့်မီသွားပြီးနောက် တပ်မှူးတစ်ဦးက ထိုဆုံးဖြတ်ချက်ကို ချမှတ်ရန် လိုအပ်၏။ အမိန့်နာခံရန် သတ်မှတ်ထားသော သာမန် စစ်သည်တစ်ဦးက ဆုံးဖြတ်နိုင်သည့် ကိစ္စမျိုး မဟုတ်ပေ။

ဒုတိယတစ်ခုမှာ မှန်ကန်သော အစီအရင်မှတစ်ဆင့် ဝင်ရောက်ပြီး သင့်တော်သော ကုန်ကျစရိတ်ကို ပေးချေခြင်းဖြင့် တိုက်ရိုက်ဝင်ရောက်ခြင်း ဖြစ်သည်။ ယင်းက မိမိ၏ တပ်မတော်ကို စစ်မြေပြင်သို့ တိုက်ရိုက် ခေါ်ဆောင်သွားခြင်းပင် ဖြစ်၏။

ဝေ့ဝူယင်သည် တစ်ဦးတည်းသော ပါဝင်သူအဖြစ် ဝင်ရောက်လာခဲ့၏။ ယင်းမှာ ထိုအချိန်က ကြီးကြပ်သူဖြစ်သော တိုက်တန် မျိုးနွယ်ဝင် ဗိုလ်ကြီး မာဂျာ သတိထားမိခဲ့သည့် အလွန်အမင်း ပုံမှန်မဟုတ်သော ကိစ္စတစ်ခု ဖြစ်သည်။

လုံချန်၏ စစ်မျိုးစေ့ ဖြစ်သော ဝင်ခွင့်စရိတ်နှင့် ၎င်းကို ခံနိုင်ရည်ရှိသည့် စွမ်းရည်များကို သူ ပိုင်ဆိုင်ပြီးနောက် အစောင့်က သူ့ကို ရွေးချယ်ခဲ့ခြင်း ဖြစ်ရမည်ဟု ထိုအချိန်က မာဂျာက မှတ်ချက်ပြုခဲ့ဖူး၏။

သို့သော်လည်း... မည်သည့် အစောင့်အကြပ်နှင့်မျှ မတွေ့ဖူးဘဲ ကောင်းကင် တာအိုများ ၏ ရည်ရွယ်ချက်ရှိရှိ ဆုံးဖြတ်မှုအောက်တွင် စစ်အမှတ်အသား ကို ချီးမြှင့်ခံခဲ့ရကြောင်း ဝေ့ဝူယင် သိထားခဲ့သည်။ ၎င်းမှာ ကောင်းကင် တာအိုများ ၏ ကြံစည်မှုပင် ဖြစ်၏။

ရှေးဟောင်း မိုးကုပ်စက်ဝိုင်းသည် ထိုနေရာရှိ လူများ မေးမြန်းသမျှ မေးခွန်းများကို တည်ငြိမ်ပြီး စိတ်ရှည်လက်ရှည် ဖြေကြားပေးခဲ့၏။ သူမသည် တွေးခေါ်မြော်မြင်တတ်ခြင်းနှင့် ခွန်အားတို့ဖြင့် ပုံဖော်ထားသော သဘောထားကြီးသည့် စရိုက်လက္ခဏာကို ပြသခဲ့သည်။

သူမ၏ စကားများနှင့် အဖြေများသည် ရောက်ရှိနေသူများ အပေါ် မေ့ဖျောက်မရနိုင်သော သက်ရောက်မှုတစ်ခု ဖြစ်စေခဲ့၏။ သူမသည် လေ့လာကြည့်ရှုရန် အံ့ဩဖွယ်ကောင်းလှပေသည်။ ထျန်းရှောင်လော့ ပိုင်ဆိုင်ထားသည့် ရင့်ကျက်မှုမရှိခြင်းများနှင့် ကင်းကွာနေသော်လည်း ပြိုင်ဘက်ကင်းသော ရည်မှန်းချက်ကြီးမားမှုများကိုမူ ပိုင်ဆိုင်ထားခဲ့၏။

ဝေ့ဝူယင်သည် လေးစားစွာ နားထောင်ရင်း အမြင့်မားဆုံးသော စွမ်းရည်၊ ကျင့်ကြံခြင်း နှင့် ဂလက်ဆီ အာဏာတို့ကို ပိုင်ဆိုင်ထားသည့် ဤအမျိုးသမီးအား အသိအမှတ်ပြုနေစဉ် မားဂတ် မှာမူ စိတ်လှုပ်ရှားမှုကြောင့် တုန်ယင်နေခဲ့သည်။

စစ်မြေပြင် နှင့် ပတ်သက်သော အမေး၊ အဖြေအချို့သည် သူ၏ အတွေးများနှင့် လေ့လာမှုများကို အချိန်ကြာမြင့်စွာ နှောင့်ယှက်နေခဲ့သည့် လျှို့ဝှက်ဆန်းကြယ်မှု အနည်းငယ်ကို ဖြေရှင်းရန် ကူညီပေးခဲ့၏။

"တာအိုမီးပွား ကောင်းကင် ရတနာ... ပိုမြင့်မားတဲ့ စွမ်းအားနဲ့ အရည်အသွေး နယ်ပယ်တွေအကြောင်း သတင်းအချက်အလက်ရဖို့ ဘာလို့ ဒီလောက် ခက်ခဲရတာလဲ... ချီးပဲ..."

မားဂတ်၏ လက်များသည် ရှည်လျားသော စက္ကူလိပ်တစ်ခုပေါ်တွင် လျင်မြန်စွာ ရွေ့လျားနေရင်း ညည်းညူလိုက်သည်။ သူ၏ လက်ချောင်းများက စုတ်တံဆယ်ချောင်းသဖွယ် လှုပ်ရှားနေပြီး ထိုစာလိပ်ပေါ်၌ ရေးသားနေခဲ့၏။

သူသည် မတူကွဲပြားသော စွမ်းအားနယ်ပယ်များကို တွေ့ကြုံခံစားဖူးပြီး ကျင့်ကြံခြင်း သည် ဘက်စုံထောင့်စုံရှိကာ လုံးဝ ကန့်သတ်ချက်မရှိကြောင်း နားလည်သဘောပေါက်ထားပြီး ဖြစ်သည်။ တာအိုမီးပွား ကောင်းကင်ရတနာများ နှင့် ချိတ်ဆက်၍ မားဂတ်သည် ပဲ့တင်ထပ် ဝိညာဉ် အဆင့် နှင့် ရတနာအမျိုးမျိုးတို့၏ အမှန်တရား အပေါ် ပိုမိုကြီးမားသော ထိုးထွင်းသိမြင်မှုကို ရရှိခဲ့၏။

အထူးသဖြင့် မဟာ တာအို များ၏ လက်နက်ကိရိယာများ၊ ကောင်းကင်နယ်ပယ် သုံးထောင်၏ ရတနာများနှင့် ပတ်သက်သော အမှန်တရားများပင် ဖြစ်သည်။

လက်နက်ကိရိယာများကို သေမျိုး၊ လျှို့ဝှက် နှင့် ထာဝရ တာအို ဟူသော ကျင့်ကြံခြင်း ၏ မဟာ တာအို သုံးခုအပေါ် အခြေခံ၍ အဆင့်ခွဲခြားထား၏။ ၎င်းတို့၏ ခွဲခြားမှုများမှာ ရိုးရှင်းလှသည်။ သေမျိုး အဆင့်အတွက် အခြေခံအဆင့်၊ ချီအဆင့် နှင့် ကြယ်တာရာ အဆင့်ဟူ၍ ဖြစ်ပြီး၊ လျှို့ဝှက် အဆင့်အတွက် လျှို့ဝှက်မြေကြီး၊ လျှို့ဝှက်လောက၊ လျှို့ဝှက်ကောင်းကင် နှင့် လျှို့ဝှက်ဝိညာဉ် ဟူ၍ ဖြစ်သည်။ အတုအယောင် ဝိညာဉ် အဆင့်သည် ဝေ့ဝူယင်နှင့် မားဂတ်တို့ ကြုံတွေ့ဖူးသမျှ တစ်ခုတည်းသော အဆင့် ဖြစ်၏။

သို့သော်လည်း... ကောင်းကင်နယ်ပယ်များ၏ ဥပဒေသ တစ်ခု သို့မဟုတ် တစ်ခုထက်ပိုသော အရာများနှင့် ရှင်းပြ၍မရနိုင်အောင် ဆက်စပ်နေသည့် ရတနာများအတွက်မူ ၎င်းတို့ကို ကောင်းကင်အဆင့်၊ အထွတ်အထိပ် ကောင်းကင်အဆင့် နှင့် တာအိုမီးပွား ကောင်းကင်အဆင့် ဟူ၍ ခွဲခြားထားသည်။ ၎င်းတို့အားလုံးသည် သန့်စင်ထားသော ဥပဒေသ အာဏာ၏ ပမာဏအတွင်း၌ တည်ရှိနေကြပြီး အာဏာပိုင် အဆောင် တစ်ခုကဲ့သို့ လုပ်ဆောင်ကြ၏။ ဥပဒေသ အာဏာ မရှိသူများပင်လျှင် ဤပြင်ပ အာဏာလုပ်ပိုင်ခွင့်များကို အသုံးပြုနိုင်ပေသည်။ ဤ အနည်းငယ်မျှသော သတင်းအချက်အလက် အသစ်လေးဖြင့် နောက်ထပ် အာဏာအဆင့်သည် မေးခွန်းထုတ်စရာဖြစ်နေသော တာအို ၏ အာဏာကို ထိတွေ့ခြင်းဖြစ်ကြောင်း မားဂတ်က ယုံကြည်မှုရှိရှိ ကောက်ချက်ချနိုင်ခဲ့၏။

သူတို့ ကောင်းကင်စစ်မြေပြင် အတွင်း စစ်ခင်းခဲ့ကြစဉ်က စစ်ပွဲ တာအို သို့မဟုတ် စစ်တာအိုနှင့် ပတ်သက်၍ ပိုမိုကြီးမားသော ထိုးထွင်းသိမြင်မှုကို ရရှိခဲ့သည်။ ကောင်းကင်စစ်မြေပြင် အတွင်း၌ မဟာ တာအို သုံးခုသည် မည်သည့် လွှမ်းမိုးမှု သို့မဟုတ် သက်ရောက်မှုမျှ မရှိပေ။ တစ်ခုတည်းသော ကျင့်ကြံခြင်း လမ်းကြောင်းမှာ စစ်တာအို သာ ဖြစ်သည်။

အကယ်၍ မပြည့်စုံသော ကောင်းကင်ရတနာများသည် စစ်မျိုးစေ့ အဆင့်တွင် ကောင်းကင်နယ်ပယ်များနှင့် ဆက်နွှယ်မှုကို သက်ရောက်စေပါက၊ ပြည့်စုံသော ကောင်းကင်ရတနာများသည် သာမည ဥပဒေသ အဆင့်ထက် မနိမ့်ကျသော ဆက်နွှယ်မှုအတိုင်းအတာတစ်ခုကို ပိုင်ဆိုင်ထားပေမည်။ ထို့ပြင် အထွတ်အထိပ် ကောင်းကင်ရတနာများသည် အဓိက အာဏာ အဆင့်တွင် ဆက်နွှယ်နေမည်ဆိုပါက တာအိုမီးပွား ကောင်းကင်ရတနာများသည် တာအို ကိုယ်တိုင်နှင့် ဆက်နွှယ်မှုတစ်ခုကို ဖွဲ့စည်းရမည်သာ ဖြစ်သည်။

အကယ်၍ ထိုသို့ဆိုလျှင်မူကား...

ဝေ့ဝူယင်သည် ဝိညာဉ်ကို လှုပ်ခတ်သွားစေနိုင်လောက်အောင် လှပသော ရှေးဟောင်း မိုးကုပ်စက်ဝိုင်း ကို စူးစိုက်ကြည့်နေခဲ့၏။ သူမ အခြားသူများ၏ မေးခွန်းများအား ဖြေရှင်းပေးနေသည်ကို စောင့်ဆိုင်းနေစဉ် အတွင်း သူ၏ အကြည့်တို့က သူမနှင့် တစ်ခါတစ်ရံ ဆုံတွေ့သွားတတ်သည်။ သူတို့၏ မျက်လုံးများ ဆုံတွေ့သွားသည့်အခါတိုင်း ဝေ့ဝူယင် ၏ အကြည့်များတွင် သိသာထင်ရှားသော လေးစားအားကျမှုနှင့် စိတ်ဝင်စားမှုတို့က လက်ကနဲ ဖြစ်သွားတတ်၏။ ထိုအရာကို သူမက ကျက်သရေရှိသော အပြုံးတစ်ပွင့်ဖြင့် တုံ့ပြန်ခဲ့သည်။ ယင်းတို့ထဲတွင် အသိအမှတ်ပြုမှုနှင့် ကျီစယ်မှု အရိပ်အယောင်လေး တစ်ခု ပါဝင်နေခဲ့ပေသည်။

သူမသည် သူ၏ အတ္တကို ဖြည့်ဆည်းပေးနေကြောင်း ဝေ့ဝူယင် က သေချာပေါက် သိရှိထားသော်လည်း သူသည် ဤအပြန်အလှန် ဆက်သွယ်မှုများကို အတော်လေး ကျေနပ်နေခဲ့၏။

"သူက အသီနာ ကို ရှာဖွေနေတာ မဟုတ်လား..."

အိုရီက ကောက်ချက်ချလိုက်သည်။ အကယ်၍ အိုရီက ထိုအရာကို တွေးတောသိမြင်နိုင်လျှင် ကျန်သောသူများလည်း သိနိုင်ပေမည်။ အထူးသဖြင့် မားဂတ်နှင့် ဧဒင် တို့ ဖြစ်၏။

ထိုအရာက မှန်ကန်ပေသည်။

အသီနာ သည် စစ်တာအို နှင့် စစ်ဥပဒေသ တို့၏ အမွေခံ အသိပညာများကို ပိုင်ဆိုင်ထားသည့် တာအို ဝိညာဉ် တစ်ခု ဖြစ်၏။ သူမသည် 'မီးပွား' တစ်ခု ဖြစ်နိုင်သည်။ မဖြစ်လျှင်ပင် အနည်းဆုံးအနေဖြင့် ထိုမီးပွားကို မွေးဖွားပေးမည့် 'မျိုးစေ့' တစ်ခု ဖြစ်နိုင်ပေသည်။ အကယ်၍ ဝေ့ဝူယင်၏ ကျင့်ကြံခြင်း အဆင့်သာ သူမအတွက် နိမ့်ကျမနေခဲ့ပါက၊ သူမသည် တာအို ဝိညာဉ် တစ်ခုအနေဖြင့် မျက်စိကျိန်းမတတ် တောက်ပမှုကို ကြာမြင့်စွာကတည်းက ထုတ်ဖော်ပြသပြီး ဖြစ်ပေလိမ့်မည်။ လွန်ခဲ့သောနှစ်များစွာက ပေါက်ကွဲမှုမရှိဘဲ သာလွန်ခြင်းအဆင့် လျှို့ဝှက်ကောင်းကင် အဆင့် ထုတ်ကုန်တစ်ခုကို ဖော်စပ်နိုင်ခဲ့သော၊ သို့မဟုတ် တားမြစ်ထားသော ထုတ်ကုန်တစ်ခုကို ဖန်တီးခြင်း၏ တားမြစ်ချက်ကို ခုခံနိုင်ခဲ့သော ပိုင်ရှု နှစ်ယောက်ထက် သူမက မည်သို့မျှ နိမ့်ကျနေမည်မဟုတ်ပေ။

အသီနာနှင့် ပိုင်ရှုတို့သည် သက်ဆိုင်ရာ တာအို များ၏ အထူး ဖြစ်တည်မှုများပင် ဖြစ်ကြ၏။

[ပစ္စည်း] -

[လဲလှယ်နှုန်း] စစ်ဝိညာဉ် ၅,၀၀၀,၀၀၀

[ရရှိနိုင်သူ] စစ်သည် နှင့် တပ်မှူး

[ဖော်ပြချက်] ကောင်းကင်စစ်ဝိညာဉ်

၎င်းမှာ ကြယ်တာရာ စစ်မြေပြင် ရှိ စစ်သည် နှင့် တပ်မှူး များအတွက် စာရင်းထဲမှ အသီနာ ၏ ရိုးရှင်းသော ဖော်ပြချက်ပင် ဖြစ်သည်။ ၎င်းက မရေမရာ ဖြစ်နေသော်လည်း စစ်ဝိညာဉ် ငါးသန်း ဆိုသည်မှာ လွန်ကဲသော ပမာဏတစ်ခု ဖြစ်နေခဲ့၏။

"..."

အသီနာသည် တိတ်ဆိတ်နေခဲ့၏။ သူ၏ စိတ်အာရုံထဲတွင်မူ သူမ၏ ဧရာမ ကောင်းကင်တံခါး ကြီးသည် စစ်ပွဲ၏ မြည်ဟည်းသံများဖြင့် တိုးညင်းစွာ လှုပ်ခတ်နေခဲ့၏။ ၎င်းမှာ အောင်ပွဲ၊ သတ်ဖြတ်မှု နှင့် သွေးထွက်သံယိုမှု၊ အသက်ဆုံးရှုံးမှု နှင့် ဝိညာဉ်များ ရိုက်ခတ်မှုတို့၏ စိတ်လှုပ်ရှားဖွယ်ရာများကို လိုလားတောင့်တနေသည့် ဝိညာဉ်၏ ရွတ်ဆိုသံများနှင့် စစ်စည်သံများ၏ ဓမ္မတေးသံပင် ဖြစ်သည်။

"အသီနာ... မင်းက တကယ့်ကို မိုက်တာပဲ၊ မင်းက တာအိုမီးပွား တစ်ခုပဲ..."

အိုရီသည် အသီနာ တည်ရှိရာ စိတ်အာရုံ၏ နာမ်ပိုင်းဆိုင်ရာ ဟင်းလင်းပြင် တစ်နည်းအားဖြင့် စိတ်မျက်လုံးဆီသို့ ချက်ချင်း သွားရောက်ခဲ့၏။ ထို့နောက်... ၎င်းသည် အသီနာ၏ စွမ်းရည်များနှင့် ပတ်သက်၍ သိမ်မွေ့သည့် မေးခွန်းများအပါအဝင် ချီးမွမ်းစကားများကို တစ်ခွန်းပြီးတစ်ခွန်း ဆိုနေခဲ့သည်။ အိုရီ ၏ စစ်မှန်သည့် ဝမ်းမြောက်မှုနှင့် စိတ်ဝင်စားမှုတို့ကြောင့် အသီနာ ၏ ဆူပွက်နေသော စိတ်ခံစားမှုများ ငြိမ်သက်သွားခဲ့၏။

"မတူညီတဲ့ တွက်ချက်မှုတွေ ပါဝင်နေတာရယ်၊ ကုသိုလ်ရလဒ်တိုင်းကို စုဆောင်းထားတာရယ်ကြောင့် အဲဒီတုန်းက မင်းက စစ်ဝိညာဉ် ငါးသန်းထက်မက အများကြီး ပိုရခဲ့တာပဲ... စစ်မြေပြင် ရဲ့ ယုတ္တိဗေဒက ကောင်းကင် တာအိုတွေနဲ့ အလုပ်လုပ်ပုံ ဆင်တူတယ်... ကောင်းကင် တာအိုတွေလိုမျိုးပဲ ပိုနိမ့်ကျတဲ့ ကျင့်ကြံခြင်း အဆင့်တွေအတွက် တာဝန်တွေ ပြီးမြောက်မှုအပေါ် ပိုပြီး ဆုချီးမြှင့်တာမျိုးပေါ့..."

တာအိုမီးပွား အဖြစ် အလားအလာ ရှိသည့် အသီနာ ၏ သရုပ်မှန် အပါအဝင် အသစ်သစ်သော သတင်း အချက်အလက်များကို စီမံခန့်ခွဲရင်း မားဂတ်က စတင်ပြောဆိုလိုက်သည်။

"တကယ်လို့ အဲဒီအချိန်တုန်းက မင်းသာ ကြယ်တာရာသခင် တစ်ယောက်ဖြစ်နေခဲ့ရင်၊ အခုလို အောင်မြင်ခဲ့ရင်တောင် ငါးသန်း ရဖို့ဆိုတာ သိပ်မဖြစ်နိုင်ဘူး၊ ဒါမှမဟုတ် အဲဒီ ကန့်သတ်ချက်ကို သီသီလေးပဲ ကျော်ဖြတ်နိုင်လောက်မယ်..."

ဝေ့ဝူယင်က တိတ်ဆိတ်စွာ သဘောတူလိုက်၏။ စစ်ဝိညာဉ်များ ချီးမြှင့်ခြင်းသည် ပြီးမြောက်အောင်မြင်ခဲ့သူ၏ ကျင့်ကြံခြင်း အဆင့်နှင့် နှိုင်းယှဉ်ပါက ရရှိခဲ့သော စွမ်းဆောင်ရည်များနှင့် ဆက်စပ်နေပေသည်။ မည်သို့ပင်ဆိုစေကာမူ... သူသည် တိုက်ကြီး အင်ပါယာတစ်ခုကို တစ်ကိုယ်တော် စစ်ခင်းပြီး အနိုင်ရရှိခဲ့သည့် တောင်သူလယ်သမားတစ်ဦးနှင့် ဘာမျှမကွာခြားခဲ့ပေ။ ထို့ကြောင့် သူသည် ကြယ်တာရာ စစ်မြေပြင် တစ်ခုတည်းတွင်ပင် စစ်ဝိညာဉ် ဆယ့်သုံးသန်းကျော် ရရှိခဲ့ခြင်း ဖြစ်၏။

အထွတ်အထိပ် သူတော်စင် တစ်ပါးသည် ဂလက်ဆီ စစ်မြေပြင်၏ စစ်သည် သို့မဟုတ် တပ်မှူး တစ်ဦးအဖြစ် ပါဝင်ခြင်းဖြင့် စစ်ဝိညာဉ် ၅,၀၀၀,၀၀၀ ရရှိရန် မည်မျှ ခက်ခဲမည်နည်း။ ထို့ပြင် ရှေးဟောင်း မိုးကုပ်စက်ဝိုင်း ၏ အဆိုအရ စစ်ဝိညာဉ်များ ကို ကြယ်တာရာအဆင့်၊ အာဏာရှင်အဆင့် နှင့် ဂလက်ဆီအဆင့် ဟူ၍ ခွဲခြားထားပြီး တစ်ခုစီတွင် ကွဲပြားသော အရည်အသွေးများ ရှိကြသည်။ လူတစ်ဦးက သူတို့၏ စစ်ဝိညာဉ်များ အနည်းငယ်ကို ကိုယ်ပိုင်အသုံးပြုရန် သိမ်းဆည်းထားနိုင်မလားဟု မေးမြန်းခဲ့ခြင်းကြောင့်သာ ဤမေးခွန်း ပေါ်ထွက်လာခြင်း ဖြစ်၏။ ထိုအရာကို ရှေးဟောင်း မိုးကုပ်စက်ဝိုင်း က သူမအနေဖြင့် ဂလက်ဆီအဆင့် ကိုသာ လိုအပ်ကြောင်း ရှင်းပြခဲ့သည်။

***

အပိုင်း(၂၅၈၀)

[ပစ္စည်း] စစ်အဆောင်

[လဲလှယ်နှုန်း] စစ်ဝိညာဉ် ၁,၀၀၀,၀၀၀

[ရရှိနိုင်သူ] ချန်ပီယံ

[ဖော်ပြချက်] အထွတ်အထိပ် စစ်ပွဲ ကျွမ်းကျင်သူတစ်ဦးက ဖန်တီးထားသော အဆောင်တစ်ခု။ ဆက်စပ်မှု စစ်မြေပြင် တွင် အနိုင်ယူခဲ့သော စစ်ဝိညာဉ် ၁၀,၀၀၀ လုံးကို မိမိ၏ အမိန့်အောက်တွင် အပြည့်အဝ နာခံစေလျက် ဆင့်ခေါ်နိုင်သည်။ အဆောင်ထဲသို့ စစ်ဝိညာဉ်များ ထည့်သွင်းခြင်း သို့မဟုတ် ဝိညာဉ်အလင်း ကို သန့်စင်ခြင်းဖြင့် အဆောင်ကို အဆင့်မြှင့်တင်နိုင်၏။

(၁) ခုသာ ရရှိနိုင်သည်။ ဤအဆောင်ကို အကန့်အသတ်မရှိ ထပ်ခါတလဲလဲ အသုံးပြုနိုင်သည်။ ဖျက်ဆီးခံရသော စစ်ဝိညာဉ်များ အားလုံးကို စစ်ဝိညာဉ်များ သို့မဟုတ် ဝိညာဉ်အလင်း ကို အသုံးပြု၍ ပြန်လည် ထူထောင်နိုင်သည်။

ဆက်စပ်မှု စစ်အလံ ဟုလည်း လူသိများသော စစ်အဆောင် ၏ ဖော်ပြချက်သည် ဝေ့ဝူယင် ၏ စိတ်ထဲတွင် ပေါ်ပေါက်လာခဲ့၏။ ပထမစာပိုဒ်၏ နောက်ဆုံးဝါကျက သူ၏ အာရုံကို ဖမ်းစားသွားခဲ့သည်။ ဗဟို စစ်မြေပြင် (ဆက်စပ်မှု စစ်မြေပြင်) အတွင်း အထူးအခြေအနေများအောက်တွင်သာ ရရှိနိုင်သည့် စစ်သည် နှင့် တပ်မှူး တို့ထက် ကျော်လွန်သော အထူးစာရင်းမှ အချက်အချာ စစ်ပွဲ အလံ ကို သူ ရရှိခဲ့ကတည်းက၊ ၎င်းအတွင်းရှိ စစ်ဝိညာဉ်များ ကို အားဖြည့်ရန် သူ၏ဝိညာဉ်အလင်း ကို အသုံးပြုနေခဲ့သည်။

သို့သော် အကယ်၍ သူသည် အဆောင်ထဲသို့ ဂလက်ဆီအဆင့် စစ်ဝိညာဉ်များ ကို ထည့်သွင်းလိုက်ပါက... မည်သို့သော အခြေခံအပြောင်းအလဲများ ဖြစ်ပေါ်လာမည်နည်း။ မည်သို့ပင်ဆိုစေကာမူ စစ်ဝိညာဉ်များ ကို ဖန်တီးခဲ့သည့် မူလ စစ်ဝိညာဉ်များ မှာ အချက်အချာ ကြယ်တာရာ စစ်မြေပြင် မှ ဆင်းသက်လာခြင်း ဖြစ်ပေသည်။

ဆက်စပ်မှု စစ်အလံ ဆိုသည်မှာ အဘယ်နည်း။ ယခုအချိန်အထိ ဝေ့ဝူယင် သည် ၎င်းကို ကောင်းကင်ရတနာ တစ်ခုအဖြစ် အချိန်အကြာကြီး ယူဆထားခဲ့သော်လည်း ကောင်းကင်ရတနာ သို့မဟုတ် မဟာ တာအို များ၏ လက်နက်ကိရိယာ တစ်ခုဟု အတိအကျ မပြောနိုင်သေးပေ။ သူ ထိုအရာကို အသီနာ အသွင်ပြောင်းပြီးမှ မေးမြန်းရန် သူ ဆုံးဖြတ်လိုက်၏။

"ကောင်းကင်ရှန့်ထို ရှေးဟောင်း မိုးကုပ်စက်ဝိုင်း... ခင်ဗျားက စစ်ဝိညာဉ် ဘယ်လောက် လိုအပ်တာလဲ..."

စုရီက သူ၏ ပထမဆုံး မေးခွန်းကို မေးလိုက်သည်။ သက်ဆိုင်ရာ ဂလက်ဆီ များ သို့မဟုတ် ဂလက်ဆီ များကြားရှိ နတ္ထိဟင်းလင်းပြင် ရှိ နယ်မြေများမှ ဤနေရာသို့ လာရာလမ်းတစ်လျှောက် အတိတ်က မေးမြန်းမှု ကဏ္ဍများတွင် ပါဝင်ခဲ့သူများပင်လျှင် အတော်များများက နားစွင့်သွားကြလေ၏။

ရှေးဟောင်း မိုးကုပ်စက်ဝိုင်းကလည်း ဖြေဆိုရန် တုံ့ဆိုင်းမနေခဲ့ပေ။

"တာအိုမီးပွား ကောင်းကင်ရတနာ အတွက်က စစ်ဝိညာဉ် တစ်သန်းကျော်လေးပဲ လိုအပ်တယ်... လျှို့ဝှက် ဝိညာဉ် ဆေးဖော်စပ်ခြင်း နည်းလမ်း အတွက်ကတော့ အရင်က ပြောခဲ့သလိုပဲ ရယူဖို့ လိုအပ်ချက်တွေက ကွာခြားတယ်... ဒါကို ရယူဖို့ ရှင်တို့ရဲ့ အံ့မခန်း အဂ္ဂိရတ် စွမ်းရည်တွေအားလုံးကို အသုံးချနိုင်ဖို့ ကျွန်မ မျှော်လင့်တယ်..."

"..."

ထိုအဖြေက လူအုပ်ကြီးကြားတွင် လှိုင်းဂယက်များ ရိုက်ခတ်သွားစေခဲ့၏။

"တစ်သန်းတည်းလား..."

ထျန်းရှီယာသည်လည်း အံ့အားသင့်သွားခဲ့သည်။ ယင်းမတိုင်မီလေးကပင် တာအိုမီးပွား ကောင်းကင်ရတနာ တစ်ခုအတွက် ကုန်ကျစရိတ်ကို ငါးသန်းဟု သတ်မှတ်ထားကြောင်း သူတို့ မေးမြန်းခဲ့ကြသည်။ စစ်မြေပြင် ၏ ဆုလာဘ်ချီးမြှင့်သည့် အဆင့်သို့ ရောက်ရှိပြီး စာရင်းကို လေ့လာဖူးသူတိုင်း ဤအချက်ကို သိရှိကြပေမည်။ မည်သို့ပင်ဆိုစေကာမူ ထိုအရာကို စစ်မြေပြင် အားလုံးတွင် အများပြည်သူသိရှိအောင် ဖော်ပြထားခြင်း ဖြစ်၏။

ရှေးဟောင်း မိုးကုပ်စက်ဝိုင်းက အံ့ဩဖွယ်ကောင်းလောက်အောင် ရိုးသားစွာဖြင့် ရှင်းပြခဲ့သည်။

"ကျွန်မက စစ်ပွဲနဲ့ စည်းမျဉ်း စစ်မြေပြင် ကို စူးစမ်းလေ့လာရေး ခြောက်ကြိမ် ပါဝင်ခဲ့ဖူးတယ်... အဲဒီကနေ စစ်ဝိညာဉ် စုစုပေါင်း လေးသန်း နီးပါးလောက် စုဆောင်းနိုင်ခဲ့ပြီး နည်းနည်းလောက်ကို အရန်အဖြစ် သိမ်းဆည်းထားတဲ့ ကျွမ်းကျင်သူတွေဆီကနေလည်း အရောင်းအဝယ် လုပ်ခဲ့တယ်... ကြိုးစားမှုတိုင်းက အရင်ကထက် ပိုမိုကြီးမားတဲ့ အကျိုးအမြတ်တွေကို ရရှိစေခဲ့တယ်... ဒီသတ္တမမြောက် စူးစမ်းလေ့လာရေးမှာ ကျွန်မရဲ့ ရည်မှန်းချက်ကို အပြီးသတ်ဖို့ ရည်ရွယ်ထားတယ်..."

သူမ၏ နောက်ဆုံးဝါကျ ပဲ့တင်ထပ်သွားသောအခါ ၎င်းအတွင်း၌ သံမဏိကဲ့သို့ ခိုင်မာသည့် ဆုံးဖြတ်ချက်တို့ ပါဝင်နေခဲ့၏။ သူမ၏ ယုံကြည်မှုနှင့် အလျှော့မပေးသော စိတ်ဓာတ်ကို သူတို့အားလုံး ခံစားသိရှိနိုင်ခဲ့ကြသည်။

"သူက အသီနာ ကို ဘာလို့ လိုအပ်နေတာလဲ မသိဘူး..."

အိုရီက မေးလိုက်ပြီးနောက် အဆက်မပြတ် အော်ဟစ်လိုက်သည်။

"ရှာကြည့်... ရှာကြည့်... ရှာ..."

အိုရီ၏ စကားမဆုံးမီ ဧဒင်က ၎င်းကို အမြစ်ထူထူများဖြင့် ရစ်ပတ်လိုက်၏။ ယင်းမှာ ပါးစပ်ကို လက်ဖြင့် အုပ်လိုက်သကဲ့သို့ ဖြစ်သွားပြီး ၎င်း၏ ဝိညာဉ်ရေးရာ ဆက်သွယ်မှုကို တိတ်ဆိတ်သွားစေခဲ့သည်။ လုံးထွေးသွားသော ၎င်း၏ အသံပဲ့တင်ရိုက်ခတ်မှုများက ဝေ့ဝူယင် ၏ အသိစိတ် ပင်လယ် ကို ရှုပ်ထွေးစွာ လှိုင်းထန်သွားစေခဲ့ပေသည်။

"ငါတို့ရဲ့ ရည်မှန်းချက်က အသီနာ ကို ပေးဖို့ မဟုတ်ဘူး၊ ရနိုင်သမျှ အခွင့်အရေးတိုင်းကို ဆုပ်ကိုင်ဖို့ပဲ..."

မားဂတ် က အိုရီ အား တင်းမာစွာ သတိပေးလိုက်ပြီး ဝေ့ဝူယင် ကို မေးလိုက်သည်။

"ဂလက်ဆီ စစ်မြေပြင် မှာရှိတဲ့ ချန်ပီယံ စာရင်း က ကြယ်တာရာ စစ်မြေပြင် နဲ့ အာဏာရှင် စစ်မြေပြင် က စာရင်းတွေနဲ့ မတူဘူးလို့ မင်းထင်လား..."

"ငါလည်း အဲဒီလိုပဲ တွေးနေတာ..."

ဘုရင်က ညင်သာစွာ ထောက်ခံလိုက်၏။ အကျိုးအမြတ်များကို အများဆုံးရရှိစေရန်အတွက် ဤအချက်မှာ အရေးကြီးလှပေသည်။

"အသီနာ... မင်းရော သိလား..."

ဝေ့ဝူယင် က မေးလိုက်သည်။ ထိုအချိန်က သူမသည် ကြယ်တာရာ စစ်မြေပြင် ၏ ကြီးကြပ်သူဖြစ်ခဲ့၏။ အခြားသော စစ်မြေပြင် ၏ အသေးစိတ်အချက်အလက်များကို သူမ မသိရှိနိုင်သော်လည်း အခွင့်အရေးတစ်ခုတော့ ရှိနေခဲ့သည်။

နောက်ဆုံးတွင် ဤအရာက အသီနာ၏ တိတ်ဆိတ်မှုကို ချိုးဖျက်သွားခဲ့သည်။ သူမက ပြန်ဖြေလိုက်၏။

"ဟုတ်တယ်... စာရင်းတစ်ခုစီတိုင်းမှာ ကွဲပြားမှုတွေ ရှိတယ်... ဥပမာအနေနဲ့ ကြယ်တာရာ စစ်မြေပြင် ရဲ့ စစ်သည် နဲ့ တပ်မှူး ကုသိုလ်မှတ် လဲလှယ်ရေး စာရင်းမှာ မြေကြီးရှန့်ထို အဆင့် ကို ကျော်လွန်တဲ့၊ ဒါမှမဟုတ် အစစ်အမှန် ဝိညာဉ်ကို ကျင့်ကြံတာနဲ့ ပတ်သက်တဲ့ နည်းလမ်းတွေ မပါဝင်ဘူး... ချန်ပီယံ စာရင်း ကလည်း နည်းနည်း ကွဲပြားတယ်..."

ဝေ့ဝူယင်၏ မျက်လုံးများက ဝမ်းမြောက်မှုဖြင့် တောက်ပလင်းလက်သွားခဲ့၏။ လျှို့ဝှက် ဝိညာဉ် ငါးခုသည်လည်း စိတ်လှုပ်ရှားစွာဖြင့် တုန်ခါသွားခဲ့ကြသည်။

"ဒါဆို ငါတို့ လုပ်ကြမလား..."

ခရာတို က ပေါက်ကွဲထွက်မတတ် ဟိန်းဟောက်သံဖြင့် မေးလိုက်သည်။

"တခြားသူတွေက စစ်မြေပြင် တွေကို မဖြတ်သန်းနိုင်ပေမဲ့ ငါတို့ကတော့... ငါတို့ကတော့ လုပ်နိုင်တယ်..."

၎င်း၏ စကားများထဲရှိ ယုံကြည်မှုသည် အခြေခံအားဖြင့် လုံးဝ အထွတ်အထိပ်သို့ ရောက်ရှိနေခဲ့လေ၏။

စစ်ပွဲနှင့် စည်းမျဉ်း စစ်မြေပြင် သို့ စူးစမ်းလေ့လာမည့် ခရီးစဉ်နှင့် ပတ်သက်သော မေးခွန်းများ၊ စိုးရိမ်ပူပန်မှုများ၊ ရှင်းလင်းချက်များနှင့် အသေးစိတ်အချက်အလက်များကို အပြန်အလှန် ဆွေးနွေးမှုသည် သုံးရက်တိုင်တိုင် မရပ်မနား ဆက်လက်ဖြစ်ပွားနေခဲ့၏။

ထိုနေရာရှိ ကျင့်ကြံသူများ အတွက်မူ ငယ်ရွယ်လွန်းလှသော ဝေ့ဝူယင် မှလွဲ၍ သုံးရက်ဟူသော အချိန်ကာလသည် ဖြတ်သန်းသွားသော အခိုက်အတန့် အနည်းငယ်မျှသာ ဖြစ်ပေသည်။

ဝေ့ဝူယင်သည် ဤကဲ့သို့သော ဆွေးနွေးမှုမျိုး၏ အစစ်အမှန် စိတ်ရှည်သည်းခံမှုကို ကိုယ်တွေ့ကြုံခဲ့ရ၏။ တစ်ခါတစ်ရံတွင် မည်သည့်အကြောင်းအရာကိုမျှ မဆွေးနွေးမီ တစ်နာရီခန့် အချိန်ယူရတတ်သည်။ ထိုအချိန်များကို ပရိသတ်များကြား တိတ်ဆိတ်စွာ တွေးတောခြင်းများနှင့် ဝိညာဉ် ဆက်သွယ်မှုများဖြင့်သာ ပြည့်နှက်နေတတ်၏။ ရှေးဟောင်း မိုးကုပ်စက်ဝိုင်းသည် အခြေအနေတိုင်းအပေါ် စိတ်ရှည်သည်းခံခဲ့ပြီး ဤအဖြစ်အပျက်များ၏ အရှိန်အဟုန်နှင့် သူမ၏ ရင်းနှီးကျွမ်းဝင်မှုကို ပြသနေခဲ့သည်။

ပုံမှန်အားဖြင့် ဝေ့ဝူယင် ကဲ့သို့ ငယ်ရွယ်သူတစ်ဦးသည် ရှည်လျားသော တိတ်ဆိတ်မှုများဖြင့် ပြည့်နှက်နေသည့် သုံးရက်တာ ကာလကြီးကို အလွန်အမင်း ငြီးငွေ့ဖွယ်ကောင်းသည်ဟု ခံစားရပေလိမ့်မည်။ သို့သော် ဝေ့ဝူယင် သည် လူအုပ်ထဲတွင် အတက်ကြွဆုံးသူ ဖြစ်နေပုံရ၏။ အိုရီ၊ ဘုရင်၊ ဧဒင်၊ ခရာတို၊ မားဂတ်၊ ဖီဆန်လေး၊ ဒြပ်စင် နှင့် အသီနာ တို့သည် အလွန်ပင် တက်ကြွနေခဲ့ကြသည်။ အထူးသဖြင့် အိုရီ နှင့် မားဂတ် တို့သည် တိတ်ဆိတ်ရန် အချိန်များများစားစား မရှိဘဲ အကြောင်းအရာအသစ်များကို အဆက်မပြတ် ယူဆောင်လာခဲ့ကြ၏။

ထို့ကြောင့် ဝေ့ဝူယင် သည် မည်သည့်အခါကမျှ အထီးကျန်သည်ဟု မခံစားခဲ့ရပေ။

တစ်ချိန်တည်းမှာပင် ဧဒင်သည် မကြာသေးမီက တိုက်ပွဲ အတွင်း ရရှိလာသည့် သေမျိုး အဆင့် အဂ္ဂိရတ် ထုတ်ကုန် အသီးသီးကို ဟင်းလင်းပြင် လက်စွပ်ထဲမှ နေ၍ အသိစိတ် ပင်လယ် အတွင်း နေရာ ရွှေ့ပြောင်း နေခဲ့သည်။ ဝေ့ဝူယင် တွင် ထိုအရာများ အလွန်များပြားနေခဲ့သည်။

၎င်းတို့ အသိစိတ် ပင်လယ် ထဲသို့ ဝင်ရောက်လာသောအခါ၊ ဧဒင်သည် အဋ္ဌမမြောက် ရင်းမြစ် အသွင်ပြောင်းလဲခြင်း အစီအရင်၏ အခြေခံအုတ်မြစ်ဖြင့် ပုံဖော်ထားသော အာဏာရှင် ကျင့်စဉ် လေးခုအနက် နောက်ဆုံးတစ်ခုကို အကောင်အထည်ဖော်လိုက်၏။

ထိုကျင့်စဉ်ကို လျှို့ဝှက် အမြုတေ တစ်ခုတည်းကိုသာ အသုံးပြုကာ ဖော်ထုတ်ထားသော်လည်း ၎င်း၏ အာကာရှစ် ပါရဂွန် မွေးရာပါ စွမ်းအင်များ နှင့် အတုမဲ့ ဖန်တီးခြင်း အဂ္ဂိရတ် ကြယ်တာရာများ ၏ ရှေးဟောင်း မြူခိုး ထုတ်လုပ်ခြင်းမှ ဖန်တီးလိုက်သော အဆင့်လေး အသန့်စင်ဆုံး မြူခိုး များအပေါ် အားကိုးခြင်းဖြင့် ယင်း၏ အကျိုးသက်ရောက်မှုက အံ့ဩဖွယ်ကောင်းလောက်အောင် နက်နဲလှပေသည်။ အတုမဲ့ ဖန်တီးခြင်း၏ အမှန်တရားများကို ပုံဖော်ထားသည့် အဂ္ဂိရတ် ကြယ်တာရာများ ၏ ဤစွမ်းရည်ကို ဝေ့ဝူယင် ပထမဆုံး စူးစမ်းလေ့လာခဲ့စဉ်က၊ သူ၏ လျှို့ဝှက် ကြယ်တာရာ အဆင့် ကျင့်ကြံခြင်း ကြောင့် အဆင့်သုံး အစွမ်းကုန် သန့်စင်ခြင်း မြူခိုး ကိုသာ ဖန်တီးရန် ကန့်သတ်ခံထားရ၏။ ယခု ဝေ့ဝူယင် ၏ အခြေအနေ၊ ဧဒင် ၏ လက်ရှိ အခြေအနေအရဆိုလျှင်မူ သိသာထင်ရှားသော ကုန်ကျစရိတ်တစ်စုံတစ်ရာ ပေးချေစရာမလိုဘဲ အဆင့်လေး အသန့်စင်ဆုံး မြူခိုးများကို ဖန်တီးနိုင်နေပြီ ဖြစ်သည်။

ဝေ့ဝူယင်၏ အသိစိတ် ပင်လယ်ထဲသို့ ဝင်ရောက်လာသော ထိုသေမျိုးအဆင့် ပစ္စည်းများသည် ပထမအဆင့် ဖြစ်စေ၊ နဝမအဆင့် ဖြစ်စေ၊ အဆင့်နိမ့် အရည်အသွေး ဖြစ်စေ၊ အထွတ်အထိပ် အဆင့် အရည်အသွေး ဖြစ်စေ၊ အားလုံးသည် သာလွန်ခြင်း ရောင်စဉ်ခါးပတ် တစ်ခုစီ ပါဝင်လျက် ပြန်လည် ထွက်ခွာသွားကြ၏။

အားလုံးက သာလွန်ခြင်းအဆင့် အရည်အသွေးများပင်တည်း။

ဧဒင် သည် ၎င်းတို့ကို အားစိုက်ထုတ်စရာမလိုဘဲ အေးအေးဆေးဆေးပင် အဆက်မပြတ် ထုတ်လုပ်နေခဲ့၏။ ဧဒင်က သေမျိုးအဆင့် အဂ္ဂိရတ် ထုတ်ကုန်များအတွက် သန့်စင်ရေးဌာနတစ်ခုအဖြစ် လုပ်ဆောင်နေစဉ်၊ အိုရီ သည်လည်း သူ၏ စိတ်အာရုံ တစ်ခွင်၌ စွမ်းအင်များကို ဖြန့်ကြက်ကာ အလုပ်များကို တစ်ပြိုင်နက်တည်း လုပ်ဆောင်နေခဲ့သည်။

ကောင်းကင်နှင့်မြေကြီး၏ အဖိုးတန်ပစ္စည်းများသည် သူ၏ ဟင်းလင်းပြင် လက်စွပ်များ ထဲမှ ပျောက်ကွယ်သွားပြီး ဖန်တီးခြင်း မျက်လုံး၏ နယ်မြေထဲသို့ ဝင်ရောက်သွားသည်။ ထို့နောက် ၎င်းတို့၏ ယခင်အဆင့် မည်သို့ပင်ဖြစ်စေကာမူ အတုအယောင် ဝိညာဉ် တန်ခိုးရှင် အဆင့် ပစ္စည်းများ၊ သို့မဟုတ် အထွတ်အထိပ် လျှို့ဝှက်လောက အဆင့် ပစ္စည်းများအဖြစ် ထွက်ခွာသွားကြ၏။

ထိုအတောအတွင်း မားဂတ် တွင် ပုံစံနှစ်မျိုး ရှိနေခဲ့သည်။ ပုံစံတစ်ခုမှာ ခရာတို၊ ဖီဆန်လေး နှင့် အသီနာ တို့နှင့် အများဆုံး စကားပြောဆိုရင်း တက်ကြွလှုပ်ရှားနေခဲ့၏။ ၎င်း၏ လျှို့ဝှက်အသွင်ဖြစ်သော ဧဒင် စာကြည့်တိုက် သည်မူ လုံ့လဝီရိယရှိသော စာကြည့်တိုက်မှူးများကဲ့သို့ တွဲဖက်လုပ်ဆောင်နေကြသည့် စိတ်ပိုင်းဆိုင်ရာ ကိုယ်ပွား သုံးထောင်ဖြင့် ကြီးမားကျယ်ပြန့်သော သတင်းအချက်အလက်များကို ကူးယူရေးသားကာ စီစဉ်ဖွဲ့စည်းနေခဲ့သည်။

ခရာတိုသည် ဝေ့ဝူယင် ၏ သွေးလှည့်ပတ်မှု ခုန်နှုန်းနှင့် ကိုက်ညီစွာ ရံဖန်ရံခါ ဟိန်းဟောက်သံကြီးများကို ထုတ်လွှတ်နေခဲ့သည်။ ၎င်းသည် အသစ် ရရှိထားသည့် လျှို့ဝှက် ဒဏ္ဍာရီ အမှတ်အသား ၏ ဒုတိယအဆင့်နှင့် အသားကျစေရန် ချိန်ညှိနေခြင်းဖြစ်ပြီး၊ ၎င်း၏ သွေးမျိုးဆက် စွမ်းရည်အသစ်များကိုပါ ဖော်ထုတ်နေခြင်း ဖြစ်သည်။

အသစ်ထုတ်လုပ်လိုက်သော ပစ္စည်းများကို ဝေ့ဝူယင် ၏ ဟင်းလင်းပြင် လက်စွပ်များ ထဲတွင် လုံခြုံစွာ သိမ်းဆည်းရန်အတွက် အိုရီ နှင့် ဧဒင် တို့သည် ဟင်းလင်းပြင် သလင်းကျောက် ဖွဲ့စည်းခြင်း ကို လုပ်ဆောင်ရန် ခရာတို အား အခါအားလျော်စွာ ပုတ်နှိုးနေခဲ့ကြသည်။

ဘုရင်သည် ဒြပ်စင် ၏ အနည်းငယ် ပင်ပန်းနွမ်းနယ်ပြီး ထိခိုက်နေသော ပုံစံကို အားဖြည့်ပေးခဲ့၏။ ၎င်းသည် စိတ်ရှည်ပြီး လုံ့လဝီရိယရှိသော ပြုစုစောင့်ရှောက်သူ တစ်ဦးအဖြစ် လုပ်ဆောင်နေခဲ့သည်။ ၎င်းသည် တိတ်တဆိတ် စောင့်ကြည့်နေခဲ့ပြီး မားဂတ် က နက်နဲသော လမ်းညွှန်မှုအချို့ လိုအပ်သည့်အခါမှသာ ရံဖန်ရံခါ ဝင်ရောက်ပြောဆိုတတ်၏။

သူတို့ထဲမှ မည်သူမျှ အားမနေခဲ့ကြပေ။ အလုပ်များကို တစ်ပြိုင်နက်တည်း လုပ်ဆောင်ကာ လုံ့လဝီရိယ ရှိနေခဲ့ကြ၏။

***