အခန်း ၈၀၄

အခန်း (၈၀၄) တာ့ဝူဖုန်း အမြစ်ပြတ်သုတ်သင်ခြင်း။ နတ်ဘုရားသားတော်၏ ပြောင်းပြန်ကွပ်မျက်မှု။ (၃)

သို့သော် ကျီးရွှယ်ရှောင်းသည် စူးချန်ခုန်းအနေဖြင့် ရှေးဟောင်းမိစ္ဆာဂိုဏ်းမှ သိုင်းပညာရှင် ငါးဦးကို အလွယ်တကူ သတ်ဖြတ်နိုင်ခဲ့သည်ကို ကောင်းကောင်း သိထားရာ သူသည် မိမိကိုယ်မိမိ ယုံကြည်မှုရှိ၍သာ ဤဆုံးဖြတ်ချက်ကို ချမှတ်ခြင်းဖြစ်မည်ဟု နားလည်ထားသည်။ အကယ်၍ သူသာဆိုလျှင်... အမှန်တကယ်ပင် အံ့ဖွယ်တစ်ခုကို ဖန်တီးနိုင်ပေလိမ့်မည်။

စူးချန်ခုန်းသည် သူမ၏အကူအညီကို တောင်းခံခြင်းမှာ ပိုမိုစိတ်ချရစေရန်အတွက်ဖြစ်ပြီး အခြေအနေများက မျှော်လင့်ထားသည်ထက် ကျော်လွန်သွားပါက သူမအနေဖြင့် နတ်ဘုရားမျိုးစေ့ကို ချက်ချင်း ပေါင်းစပ်နိုင်ကြောင်းကိုလည်း စူးချန်ခုန်းက ရှင်းရှင်းလင်းလင်း ပြောကြားထားပြီးဖြစ်သည်။

"ကောင်းပါပြီ၊ အဲ့ဒီအချိန်မှာ ရှင်က ဝေ့ရှန့်ရှင်းကို မယှဉ်နိုင်တော့ဘူးဆိုရင် ကျွန်မ လှုပ်ရှားပါ့မယ်"

ကျီးရွှယ်ရှောင်းက အများကြီး တွန့်ဆုတ်မနေဘဲ သဘောတူလိုက်သည်။ ပြီးခဲ့သည့်အကြိမ်က စူးချန်ခုန်း ကူညီခဲ့သောကြောင့်သာ သူမသည် ရှေးဟောင်းသွေးနတ်ဆိုးဂိုဏ်းဝင်များလက်မှ လွတ်မြောက်နိုင်ခဲ့ခြင်း ဖြစ်သည်။ ကျီးရွှယ်ရှောင်းအတွက်မူ စူးချန်ခုန်းက သူမ၏အကူအညီကို တောင်းခံခြင်းမှာ ယုံကြည်မှု၏ ပြယုဂ်တစ်ခုလည်း ဖြစ်သည်။ ထို့အပြင် စူးချန်ခုန်းသည် မိမိကိုယ်မိမိ အတိုင်းအတာတစ်ခုအထိ စိတ်မချပါက ဝေ့ရှန့်ရှင်းကို ရင်ဆိုင်ရန် စီစဉ်မည်မဟုတ်ပေ။ ထိုယုံကြည်မှုများက ဘယ်ကလာသနည်းဆိုသည်ကို ကျီးရွှယ်ရှောင်း အလွန်သိချင်နေမိသည်။

"ဒါပေမဲ့ ဝေ့ရှန့်ရှင်း ဘယ်မှာရှိလဲဆိုတာ ရှင်သိလား" ကျီးရွှယ်ရှောင်းက မေးလိုက်သည်။ ဝေ့ရှန့်ရှင်းသည် ယခုအချိန်တွင် တံခါးပိတ်ကျင့်ကြံနေလောက်ပြီဖြစ်ရာ သူပုန်းအောင်းနေသည့်နေရာကို ရှာဖွေရန်မှာ မလွယ်ကူပေ။

"ကျွန်တော့်မှာ အစီအစဉ်ရှိပါတယ်။ နောက်ထပ်လူတစ်ယောက်နဲ့ သွားတွေ့ကြရအောင်" ဟု စူးချန်ခုန်းက ပြောလိုက်သည်။

မိစ္ဆာဂိုဏ်းများနှင့် နတ်ဆိုးတံခါးများ၏ အခြေစိုက်စခန်းများသည် အလွန်လျှို့ဝှက်လှပြီး ထွမ်မုထောင်ထံမှ ရရှိသော သတင်းအချက်အလက်များဖြင့်ပင် မိစ္ဆာဂိုဏ်း အနည်းငယ်၏ တည်နေရာကိုသာ သိရသေးသည်။ စူးချန်ခုန်း ရှာဖွေရန် ပြင်ဆင်နေသည့်လူမှာ အခြားသူမဟုတ်ဘဲ အလောင်းကောင် အဖိုးအိုပင် ဖြစ်သည်။

အလောင်းကောင် အဖိုးအိုကိုယ်တိုင်မှာ မိစ္ဆာဂိုဏ်းနှင့် နတ်ဆိုးတံခါးများမှ ရှားပါးလှသော မိစ္ဆာအိုကြီးတစ်ဦးဖြစ်ပြီး ခြေရာခံခြင်းအတတ်တွင် ကျွမ်းကျင်သူဖြစ်ရာ ဝေ့ရှန့်ရှင်း၏ တည်နေရာကို ရှာဖွေနိုင်ခြေ အရှိဆုံးလူ ဖြစ်သည်။

"အင်း" ကျီးရွှယ်ရှောင်းက ခေါင်းညိတ်လိုက်သည်။

စူးချန်ခုန်းသည် ကျီးရွှယ်ရှောင်းနှင့်အတူ အလောင်းကောင် အဖိုးအို တံခါးပိတ်ကျင့်ကြံနေသည့် အလောင်းမြှုပ်တောင်သို့ ချက်ချင်းထွက်ခွာလာခဲ့သည်။ သူ၏အလောင်းနတ်ဆိုးဂိုဏ်း ပျက်စီးသွားပြီးနောက် သူသည် ဤနေရာ၌ ပုန်းအောင်းကျင့်ကြံနေကြောင်းကို စူးချန်ခုန်းတစ်ဦးတည်းသာ သိသည်။

ခြောက်ကပ်နေသော အလောင်းမြှုပ်တောင်၏ အစွန်အဖျားတွင် စူးချန်ခုန်းသည် သူ၏စွမ်းအင်အငွေ့အသက်ကို အနည်းငယ်ထုတ်လွှတ်ကာ ခဏတာ စောင့်ဆိုင်းနေလိုက်သည်။

ဝှူးရှ်...

မကြာမီမှာပင် အလောင်းမြှုပ်တောင်၏ အနက်ရှိုင်းဆုံးနေရာမှ မီးခိုးရောင်မြူခိုးများ ဟုန်းဟုန်းတောက် ထွက်ပေါ်လာပြီး ထိုမြူခိုးများအတွင်း၌ မီးခိုးရောင်ဝတ်စုံနှင့် အဖိုးအိုတစ်ဦး ပါလာသည်။ ထိုသူမှာ အလောင်းကောင် အဖိုးအိုပင် ဖြစ်သည်။

"ညီလေးတာ့၊ အလုပ်များလှတဲ့ မင်းက ဘယ်လိုအကြောင်းကြောင့် ဒီအလောင်းအိုကြီးဆီကို ရောက်လာရတာလဲ"

စူးချန်ခုန်းကို မြင်သောအခါ အလောင်းကောင် အဖိုးအို၏ အိုမင်းနေသော မျက်နှာတွင် အပြုံးတစ်ခု ပေါ်လာသည်။ အသွင်အပြင်အရ သူသည် ယခင်ကကဲ့သို့ပင် ပိန်လှီသောအဖိုးအို ပုံစံသို့ ပြန်လည်ရောက်ရှိသွားသော်လည်း သူ၏ယခင်က အားနည်းနေသော ခန္ဓာကိုယ်မှာ ပြန်လည်နုပျိုလာပြီး အင်အားများ ပြည့်ဝလာနေသည်ကို စူးချန်ခုန်း အထင်အရှား ခံစားမိသည်။

"ပြီးခဲ့တဲ့အကြိမ်က ကောင်းကင်နဂါး တိုက်ပွဲဝင်ရုပ်သေးရုပ်ကို ရသွားတဲ့ ဒီအဖိုးအိုက လွန်ခဲ့တဲ့ နှစ်နှစ်၊ သုံးနှစ်အတွင်းမှာ အကျိုးအမြတ်တွေ အများကြီး ရရှိခဲ့တာပဲ" စူးချန်ခုန်းက စိတ်ထဲမှ မှတ်ချက်ပြုလိုက်သည်။ အသက်ရှည်ကြာစွာ နေထိုင်ခဲ့သော မိစ္ဆာအိုကြီးတစ်ဦးအနေဖြင့် သူသည် အထက်သို့ တက်လှမ်းနိုင်မည့် အခွင့်အရေးမှန်သမျှကို လက်လွှတ်မည်မဟုတ်ပေ။

စူးချန်ခုန်းသည် အချိန်ဆွဲမနေဘဲ တိုက်ရိုက်ပင် ပြောလိုက်သည်။ "အလောင်းအိုကြီး၊ ကျွန်တော် ဝေ့ရှန့်ရှင်းကို သွားတိုက်မလို့။ သူ့ရဲ့ တည်နေရာကို ရှာဖို့ ခင်ဗျားရဲ့အကူအညီ လိုတယ်"

ဤစကားသည် အလောင်းကောင် အဖိုးအိုကို အမှန်တကယ်ပင် တုန်လှုပ်သွားစေသည်။ "မင်းက ဝေ့ရှန့်ရှင်းကို သွားတိုက်မလို့လား"

ဝေ့ရှန့်ရှင်းသည် ယခင်က မိစ္ဆာလမ်းစဉ်ကို တစ်ဦးတည်း အုပ်စိုးခဲ့သော သိုင်းဝိဇ္ဇာသူတော်စင် မိစ္ဆာဧကရာဇ်၏ မျိုးဆက်ဖြစ်ပြီး မိစ္ဆာဧကရာဇ်၏ နတ်ဘုရားမျိုးစေ့နှင့် သွေးမျိုးဆက်အစွမ်းကို ဆက်ခံထားသူဖြစ်ရာ သာမန်လူ မဟုတ်ပေ။ ပြီးခဲ့သည့် ကောင်းကင်နဂါးတောင် တိုက်ပွဲတွင် ဝေ့ရှန့်ရှင်းသည် ကြောက်မက်ဖွယ်ကောင်းသော အစွမ်းကို ပြသခဲ့သည်။ ယန်မိသားစု၏ ဘိုးဘေးသာ ပေါ်မလာခဲ့ပါက ကျီးရွှယ်ရှောင်း တစ်ဦးတည်းအနေဖြင့် သူ့ကို အနိုင်ယူရန် ခက်ခဲပေလိမ့်မည်။ ယခု သုံးနှစ်ပင် မပြည့်သေးသည့် အချိန်တွင် စူးချန်ခုန်းသည် ဝေ့ရှန့်ရှင်းကို တိုက်ခိုက်ဖို့ ဆုံးဖြတ်လိုက်ပြီလား။

စူးချန်ခုန်းနှင့် အလုပ်အတူလုပ်ခဲ့သည်မှာ ပထမဆုံးအကြိမ် မဟုတ်သဖြင့် စူးချန်ခုန်း၏ စရိုက်ကို သူသိပါသည်။ သူသည် အောင်မြင်ရန် စိတ်မချပါက မည်သည့်အရာကိုမျှ ပြုလုပ်သူမဟုတ်ပေ။ ထို့အပြင် နတ်ဘုရားမျိုးစေ့ ပိုင်ဆိုင်ထားသော ကျီးရွှယ်ရှောင်းလည်း ပါဝင်နေသည်။

အလောင်းကောင် အဖိုးအိုသည် ချက်ချင်း ခေါင်းညိတ်လိုက်ပြီး တဟားဟားရယ်လိုက်သည်။ "ဒီဝေ့ရှန့်ရှင်းက မျိုးရိုးကောင်းတာကလွဲရင် ဘာထူးခြားလို့လဲ။ သူ မိစ္ဆာတောင်တန်းထဲမှာ ပုန်းအောင်းနေလောက်တယ်။ အရင်မိစ္ဆာဧကရာဇ်က အဲ့ဒီနေရာမှာပဲ ကျင့်ကြံရင်း ကွယ်လွန်သွားခဲ့တာလို့ ပြောကြတယ်။"

ဝေ့ရှန့်ရှင်း ဘယ်မှာ တံခါးပိတ်ကျင့်ကြံနေသနည်းဆိုသည်ကို အခြားသူများ မသိနိုင်သော်လည်း အလောင်းကောင် အဖိုးအိုကိုယ်တိုင်မှာ မိစ္ဆာဂိုဏ်းမှ လာသူဖြစ်ပြီး အသက်ရှည်ကြာစွာ နေထိုင်ခဲ့သူဖြစ်ရာ အခြားသူများမသိသော လျှို့ဝှက်ချက်များစွာကို သူသိထားသည်။

"ကောင်းပြီ၊ ဒါဆို မိစ္ဆာတောင်တန်းကို သွားကြစို့" စူးချန်ခုန်းက ချက်ချင်းပြောလိုက်သည်။

ထိုလူသုံးဦးသည် အချိန်ဆွဲမနေဘဲ မိစ္ဆာတောင်တန်းရှိရာသို့ တိုက်ရိုက် ပျံသန်းထွက်ခွာလာခဲ့ကြသည်။ ကျီးရွှယ်ရှောင်းသည် စူးချန်ခုန်းက လိုအပ်ပါက ကူညီရန် ခေါ်ဆောင်လာသူဖြစ်ပြီး အလောင်းကောင် အဖိုးအိုမှာမူ ဝေ့ရှန့်ရှင်းအပေါ် ရန်ငြိုးထားရှိသူ ဖြစ်သည်။ နှစ်ဦးစလုံးမှာ မိစ္ဆာဂိုဏ်းဝင်များ ဖြစ်ကြသော်လည်း ဝေ့ရှန့်ရှင်းမှာ မြင့်မြတ်သော နှလုံးသား မဟာမိတ်အဖွဲ့၏ ခေါင်းဆောင် ဖြစ်သည်။ သို့သော် မော့ကျွင်းလင်က အလောင်းနတ်ဆိုးဂိုဏ်းကို ဖျက်ဆီးပြီး သူတို့ကို အမြစ်ပြတ်အောင် လိုက်လံသတ်ဖြတ်နေစဉ်က ဝေ့ရှန့်ရှင်း ဝင်ရောက်မတားဆီးခဲ့ပေ။ ထို့ကြောင့် အလောင်းကောင် အဖိုးအိုသည် ဝေ့ရှန့်ရှင်း ဒုက္ခရောက်သည်ကို အလွန်ပင် မြင်တွေ့လိုသည်။

မိစ္ဆာတောင်တန်းသည် တိုင်းပြည်ဆယ်ခုထဲမှ မည်သည့်နယ်မြေထက်ပင် မနည်းသော ကျယ်ပြောလှသည့် မြေနေရာတွင် တည်ရှိပြီး ပတ်ဝန်းကျင် မိုင်ပေါင်း ရာနှင့်ချီ၍ လူသူကင်းမဲ့လှသည်။ ယခင်က မိစ္ဆာဧကရာဇ်သည် သူ၏ နောက်ဆုံးအချိန်များကို ဤနေရာ၌ ကုန်ဆုံးခဲ့ပြီး သူ၏ အမွေအနှစ်များကို ချန်ထားရစ်ခဲ့သည်။ သူ၏မျိုးဆက်ဖြစ်သော ဝေ့ရှန့်ရှင်းသည် သွေးမျိုးဆက်အစွမ်းကို နိုးထစေနိုင်ခဲ့ပြီး မိစ္ဆာတောင်တန်းသို့ ရောက်ရှိကာ ချန်ထားခဲ့သော အရာအားလုံးကို ရရှိခဲ့သောကြောင့်သာ ဤမျှ ငယ်ရွယ်သောအသက်ဖြင့် ဤမျှအထိ အစွမ်းထက်လာခြင်း ဖြစ်သည်။

"မိစ္ဆာတောင်တန်းရဲ့ အလယ်ဗဟိုမှာ အားနည်းတဲ့ စွမ်းအင်အတားအဆီးတစ်ခု ရှိနေတယ်။ ငါက ဝိညာဉ်စွမ်းအင်တွေကို အရမ်းအာရုံခံနိုင်လို့ ဒါကို သိလိုက်တာပါ။"

မိစ္ဆာတောင်တန်းအထက်သို့ ရောက်ရှိပြီးနောက် ခဏတာ ပျံသန်းကြည့်ရာ စူးချန်ခုန်းသည် ထူးခြားမှုကို သတိပြုမိလိုက်သည်။ အလောင်းကောင် အဖိုးအို ပြောသည့်အတိုင်း ဝေ့ရှန့်ရှင်း တံခါးပိတ်ကျင့်ကြံနေသည့် နေရာမှာ ဤနေရာပင် ဖြစ်သည်။

"ဒါဆိုရင်... အရင်ဆုံး နှုတ်ဆက်လိုက်ကြတာပေါ့"

စူးချန်ခုန်း၏ မျက်ဝန်းများထဲတွင် အေးစက်သော အလင်းတန်းများ ပေါ်လာသည်။ သူသည် ယနေ့တွင် ခြိမ်းခြောက်မှုများကို အမြစ်ပြတ် ရှင်းလင်းရန် ရောက်ရှိလာခြင်း ဖြစ်သည်။

စူးချန်ခုန်းသည် သူ၏လက်ကို ဆုပ်လိုက်ရာ ကြယ်တာရာရွှေလေးကြီး သူ၏လက်ထဲတွင် ပေါ်လာသည်။ သဘာဝတရား၏ ဝိညာဉ်စွမ်းအင် အမြောက်အမြား စုစည်းလာပြီး စူးချန်ခုန်း၏ လက်ချောင်းများကြားတွင် ဝိညာဉ်စွမ်းအင် မြှားတစ်စင်း ဖြစ်ပေါ်လာသည်။ သူသည် လေးကြိုးကို အစွမ်းကုန်ဆွဲကာ အောက်ဘက်ရှိ စွမ်းအင်အတားအဆီးကို ချိန်ရွယ်၍ လွှတ်လိုက်သည်။

"ဝှူးးးးး..."

မြှားသည် လေထဲတွင် နှစ်စင်းအဖြစ် ကွဲထွက်သွားသည်။ တစ်စင်းမှာ လေနှင့် မိုးကြိုးများ ဝန်းရံလျက် မီးတောက်များဖြင့် ရစ်ပတ်ထားသော နေမင်းမြှားဖြစ်ပြီး အခြားတစ်စင်းမှာ လရောင်များ လွှမ်းခြုံထားသော လမင်းမြှား ဖြစ်သည်။ ၎င်းတို့သည် ကောင်းကင်ယံ၌ ကခုန်လျက် ဤညအချိန်တွင် နေနှင့်လ အတူတူ ထွန်းလင်းနေသကဲ့သို့ ထင်မှတ်ရကာ အောက်ဘက်ရှိ မိစ္ဆာတောင်တန်းသို့ ထိုးဆင်းသွားသည်။

မြှားနှစ်စင်းသည် ဝိညာဉ်စွမ်းအင် အတားအဆီးကို ထိုးဖောက်ကာ မိစ္ဆာတောင်တန်းအတွင်းသို့ ကျရောက်ပြီး ပေါက်ကွဲသွားသည်။

"ဒုန်း..."

နားကွဲမတတ် ပြင်းထန်သော ပေါက်ကွဲသံကြီးသည် မိုင်ပေါင်းရာချီ၍ ဟိန်းထွက်သွားသည်။ အောက်ဘက်တွင် မီးတောက်များ လွင့်စင်လာကာ လေထုနှင့် သစ်ပင်များကို လောင်ကျွမ်းစေပြီး ပေါက်ကွဲသွားသော နေမင်းကြီးအလား မီးတောက်များ မြင့်တက်လာသည်။ တစ်ချိန်တည်းမှာပင် အေးစက်ထက်မြက်သော လရောင်များသည် နေရာအနှံ့သို့ ပိုင်းဖြတ်သွားရာ တောင်တန်းကြီးပေါ်တွင် ကြီးမားသော အက်ကြောင်းများ ဖြစ်ပေါ်သွားသည်။ လောင်ကျွမ်းနေသော သစ်ပင်များမှာ ပြာအဖြစ် ပြောင်းလဲသွားပြီး ကျောက်ဆောင်များမှာလည်း အမှုန့်ကြိတ်ခံလိုက်ရသည်။

အလောင်းကောင် အဖိုးအိုက ချက်ချင်းပင် ဖားလိုက်သည်။ “ညီလေးတာ့ရဲ့ လေးအတတ်က တကယ်ကို ပြောင်မြောက်ပါပေတယ်"

ကျီးရွှယ်ရှောင်းသည်လည်း အသိအမှတ်ပြုသည့်အနေဖြင့် ခေါင်းညိတ်လိုက်သည်။ စူးချန်ခုန်း၏ လေးအတတ်မှာ နတ်ဘုရားစွမ်းရည်တု အဆင့်တွင် ရှိနေသည်ကို သူမ မြင်တွေ့နိုင်သည်။

အောက်ဘက်ရှိ မီးတောက်များနှင့် လရောင်များကြားမှ မိုးကြိုးသံကဲ့သို့ ဟိန်းဟောက်သံကြီး ထွက်ပေါ်လာသည်။

"တာ့ဝူဖုန်း… မင်းကတော့ သေတွင်းလာတူးတာပဲ"

ဒေါသတကြီး ဟိန်းဟောက်သံသည် မိစ္ဆာတောင်တန်းတစ်ခုလုံးကို တုန်ခါသွားစေပြီး ပြင်းထန်သော လေမုန်တိုင်းများ တိုက်ခတ်လာကာ ကောင်းကင်ယံ၏ အရောင်အဆင်းပင် ပြောင်းလဲသွားတော့သည်။