အခန်း ၈၀၉

အခန်း (၈၀၉) သိုင်းဝိဇ္ဇာသူတော်စင် အဆင့်သို့ ဝင်ရောက်ခြင်း။ အင်အားအကြီးဆုံး မူလနယ်ပယ် သိုင်းဝိဇ္ဇာသူတော်စင်။ (၂)

"ဒုန်း"

ရူးသွပ်စွာ ဟိန်းဟောက်လိုက်သံနှင့်အတူ ကောင်းကင်ယံ၌ တိမ်တိုက်များ စုရုံးလာပြီး လျှပ်စီးလက်သံ၊ မိုးခြိမ်းသံများနှင့်အတူ မိုင်ပေါင်းရာချီအတွင်းရှိ သဘာဝတရား၏ ဝိညာဉ်စွမ်းအင်များသည် ဝေရှန့်ရှင်းထံသို့ ဟိန်းဟောက်လျက် စုပြုံရောက်ရှိလာတော့သည်။

"ဝေ့ရှန့်ရှင်း... သူ နတ်ဘုရားမျိုးစေ့ကို အပြီးသတ် ပေါင်းစပ်လိုက်ပြီ။"

ကောင်းကင်ယံနှင့် တိမ်တိုက်များ၏ အရောင်မှာ ပြောင်းလဲသွားပြီး ပြင်းထန်သော လေမုန်တိုင်းများ တိုက်ခတ်လာသည်။ လေထဲတွင် ရှိနေသော ကျီးရွှယ်ရှောင်းနှင့် အလောင်းကောင် အဖိုးအိုတို့မှာ လေတိုက်နှုန်းကြောင့် လွင့်စင်မသွားစေရန် သူတို့၏ ခန္ဓာကိုယ်ကို အတင်းအကျပ် ထိန်းထားရသည်။ သူတို့နှစ်ဦးစလုံး၏ မျက်နှာမှာ အလွန်လေးနက်နေသည်။ ဝေ့ရှန့်ရှင်းက နတ်ဘုရားမျိုးစေ့ကို ပေါင်းစပ်ရန် ရွေးချယ်လိုက်ခြင်းမှာ သူသည် ယခုပင် သိုင်းဝိဇ္ဇာသူတော်စင်အဆင့်သို့ ခြေလှမ်းလှမ်းလိုက်ပြီဖြစ်ကြောင်း သူတို့ သိလိုက်ကြသည်။

"တာ့ဝူဖုန်းက... ဝေ့ရှန့်ရှင်းကို ဒီအဆင့်အထိ တကယ်ပဲ တွန်းပို့နိုင်ခဲ့တာလား"

အလောင်းကောင် အဖိုးအိုသည် တံတွေးကို ခက်ခက်ခဲခဲ မျိုချလိုက်မိသည်။ စူးချန်ခုန်းမှာ အစွမ်းထက်ပြီး ဝေ့ရှန့်ရှင်းကို စိန်ခေါ်ရန် ယုံကြည်ချက်အပြည့် ရှိသည်ကို သူသိသော်လည်း ဝေ့ရှန့်ရှင်းကို နတ်ဘုရားမျိုးစေ့ ပေါင်းစပ်ပြီး သိုင်းဝိဇ္ဇာသူတော်စင်အဆင့်သို့ တက်လှမ်းရန်မှတစ်ပါး အခြား ရွေးချယ်စရာမရှိအောင်အထိ ဖိအားပေးနိုင်ခဲ့သည်မှာ သူ့အတွက် အလွန်တုန်လှုပ်ဖွယ်ရာ ဖြစ်နေဆဲပင်။

တာ့ဝူဖုန်းမှာ သိုင်းဝိဇ္ဇာသူတော်စင် ပြန်ဝင်စားသူမဟုတ်သလို သိုင်းဝိဇ္ဇာသူတော်စင်မျိုးဆက်လည်း မဟုတ်ဘဲ သာမန်သိုင်းပညာရှင်တစ်ဦးသာ ဖြစ်နိုင်သည်။ သို့သော် သူသည် မွေးရာပါ ထူးကဲပြီး နတ်ဘုရားမျိုးစေ့ ပိုင်ဆိုင်ထားသော သိုင်းဝိဇ္ဇာသူတော်စင် ပြန်ဝင်စားသူ ဝေ့ရှန့်ရှင်းကို ကျော်လွန်သွားနိုင်ခဲ့တာလား။ တစ်နည်းအားဖြင့် ပြောရလျှင် ဝေ့ရှန့်ရှင်းကို ဤမျှအထိ အစွန်းရောက်အောင် တွန်းပို့နိုင်ခဲ့ခြင်းမှာပင် သူသည် အောင်ပွဲရရှိခဲ့ပြီ ဖြစ်သည်။

"တာ့ဝူဖုန်းက သိုင်းဝိဇ္ဇာသူတော်စင်အစစ်ကို တကယ်ပဲ အနိုင်ယူနိုင်ပါ့မလား"

ကျီးရွှယ်ရှောင်းသည် ဤအခြေအနေကို ကြိုတင်တွေးဆထားသော်လည်း သူမ၏ မျက်နှာမှာ တည်ငြိမ်နေသော်လည်း ရင်ထဲ၌မူ အလွန်လေးလံနေသည်။ အကယ်၍ စူးချန်ခုန်းသာ ဝေ့ရှန့်ရှင်းကို အနိုင်မယူနိုင်ပါက ကျီးရွှယ်ရှောင်းသည်လည်း နတ်ဘုရားမျိုးစေ့ကို ပေါင်းစပ်ကာ စူးချန်ခုန်းနှင့် ပူးပေါင်းပြီး ဝေ့ရှန့်ရှင်းကို သတ်ဖြတ်ရန် ရွေးချယ်ရပေလိမ့်မည်။

ဤသို့ပြုလုပ်ခြင်းမှာ ကျီးရွှယ်ရှောင်း၏ အနာဂတ် တိုးတက်မှုကို ဆိုးရွားစွာ ထိခိုက်စေမည်မှာ အမှန်ပင်။ အကယ်၍ ယခင်ကဆိုလျှင် ကျီးရွှယ်ရှောင်းသည် ဤသို့ သဘောတူမည်မဟုတ်ပေ။ သို့သော် ပြီးခဲ့သည့်အကြိမ်က စူးချန်ခုန်းသည် ရှေးဟောင်းနတ်ဆိုးဂိုဏ်းမှ ကျင့်ကြံသူ ငါးဦးကို သတ်ဖြတ်ပေးခဲ့သဖြင့် သူမသည် စူးချန်ခုန်းအပေါ် ကျေးဇူးကြွေးအကြီးအကျယ် တင်ရှိနေသည်။ သူမ၏ စိတ်နေစိတ်ထားအရ အနာဂတ်လမ်းကြောင်း ပျက်စီးသွားလျှင်ပင် ထိုကျေးဇူးကို ပြန်လည်ပေးဆပ်မည်သာ ဖြစ်သည်။

နတ်ဘုရားမျိုးစေ့ တစ်စေ့မျှမရှိဘဲ သာမန်အခြေခံအဆင့်ဖြင့်သာ သိုင်းဝိဇ္ဇာသူတော်စင်တစ်ဦးကို စိန်ခေါ်ခြင်းဆိုတာ ကျီးရွှယ်ရှောင်းအတွက်ပင် ဤအရာမှာ ဒဏ္ဍာရီထဲတွင်သာ ကြားဖူးသောအရာ ဖြစ်သည်။ မြင့်မြတ်သောရှေးဟောင်း နိုင်ငံတော်မှ ဆင်းသက်လာပြီး သဘာဝအလျှောက် သိုင်းဝိဇ္ဇာသူတော်စင်အဆင့်သို့ ကူးပြောင်းနိုင်သော မျိုးဆက်များသာ ဤအရာကို လုပ်ဆောင်နိုင်သည်ဟု ဆိုကြသည်။

စူးချန်ခုန်းမှာ သိုင်းဝိဇ္ဇာသူတော်စင်မျိုးဆက် မဟုတ်သလို နတ်ဘုရားမျိုးစေ့လည်း မရှိပေ။ သူသည် အနိမ့်ဆုံးအဆင့်သိုင်းဝိဇ္ဇာသူတော်စင်တစ်ဦး ဖြစ်စေဦးတော့ သတ်ဖြတ်နိုင်ခဲ့မည်ဆိုလျှင် သူသည် နောင်တစ်ချိန်တွင် ရှေးဟောင်းမြင့်မြတ်သော နိုင်ငံတော်၌ပင် နာမည်ကျော်ကြားလာလိမ့်မည်ဟု ကျီးရွှယ်ရှောင်း ခံစားနေမိသည်။

"ဒါက... သိုင်းဝိဇ္ဇာသူတော်စင်အဆင့်ကို တက်လှမ်းတာလား"

စူးချန်ခုန်းသည် အဝေးမှ ရူးသွပ်စွာ တိုးဝင်လာသော ဝိညာဉ်စွမ်းအင်များမှာ နဂါးတစ်ကောင်အလား ဝေ့ရှန့်ရှင်း၏ ခန္ဓာကိုယ်အတွင်းသို့ စီးဝင်သွားသည်ကို မြင်နေရသည်။ မိစ္ဆာဧကရာဇ် သားရဲမှာလည်း အကာအကွယ်ပေးလျက် ရှိသည်။ နက်မှောင်သော နတ်ဘုရားမျိုးစေ့မှာ ဝေ့ရှန့်ရှင်း၏ ခန္ဓာကိုယ်အတွင်း၌ အမြစ်တွယ်သွားပြီး ခန္ဓာကိုယ်၏ ခွဲထုတ်၍မရသော အစိတ်အပိုင်းတစ်ခု ဖြစ်လာကာ သူ၏ ခန္ဓာကိုယ်ကို စစ်မှန်သော သိုင်းဝိဇ္ဇာသူတော်စင် အဖြစ်သို့ အသွင်ပြောင်းလဲပေးနေသည်။

ကြီးကျယ်ခမ်းနားလှသော သိုင်းဝိဇ္ဇာသူတော်စင် အရှိန်အဝါများမှာ အရပ်မျက်နှာအနှံ့ ပျံ့နှံ့သွားပြီး မိုင်တစ်ထောင်အတွင်းရှိ တိရစ္ဆာန်များနှင့် အပင်များအားလုံးမှာ ထိုဘက်သို့ ဦးညွှတ်ကျုံ့ဝင်သွားကြသည်။ အရာအားလုံးထက် မြင့်မြတ်ပြီး ခမ်းနားထည်ဝါလှပေသည်။ ဝေ့ရှန့်ရှင်း၏ အရေပြားမှာ တောက်ပသော အရှိန်အဝါများ ထွက်ပေါ်နေပြီး သူသည် အခြားကမ္ဘာတစ်ခုမှ ရောက်ရှိလာသကဲ့သို့ ရှိနေကာ သူ၏ သက်ရှိအဆင့်အတန်းမှာပင် မြင့်တက်သွားခဲ့ပြီ ဖြစ်သည်။

ဝေ့ရှန့်ရှင်းသည် နတ်ဘုရားမျိုးစေ့ကို ပေါင်းစပ်ကာ သိုင်းဝိဇ္ဇာသူတော်စင်အဆင့်သို့ ဟိုးယခင်ကတည်းက တက်လှမ်းနိုင်သော်လည်း သူသည် ရည်ရွယ်ချက်ရှိရှိဖြင့် ထိန်းချုပ်ထားခဲ့ခြင်း ဖြစ်သည်။ ယခုအခါ ထိုထိန်းချုပ်မှုကို လွှတ်ပေးလိုက်ရာ နတ်ဘုရားမျိုးစေ့ ပေါင်းစပ်ခြင်း လုပ်ငန်းစဉ်မှာ မည်သည့်အတားအဆီးမျှမရှိဘဲ အောင်မြင်စွာ ပြီးဆုံးသွားကာ အသွင်ပြောင်းလဲခြင်းမှာ မြန်ဆန်စွာ ပြီးဆုံးသွားတော့သည်။

"ဒါက... သိုင်းဝိဇ္ဇာသူတော်စင်ရဲ့ စွမ်းအားပဲ..."

သူ၏ ခန္ဓာကိုယ်နှင့် ဘဝတစ်ခုလုံး ပြောင်းလဲသွားမှုကို ခံစားရင်း ဝေ့ရှန့်ရှင်းသည် ယခင်နှင့် ကွာခြားချက်မှာ ကလေးတစ်ဦးနှင့် လူကြီးတစ်ဦးကဲ့သို့ ဖြစ်နေသည်ကို မအံ့ဩဘဲ မနေနိုင်တော့ပေ။ ဝေ့ရှန့်ရှင်း၏ မျက်နှာမှာ ချက်ချင်းပင် ယုတ်မာစွာ ပုံပျက်သွားပြီး အဝေးရှိ စူးချန်ခုန်းကို မုန်းတီးမှုများဖြင့် စိုက်ကြည့်ကာ အော်ပြောလိုက်သည်။

"ကောင်းတယ်... အရမ်းကို ကောင်းတယ်။ ငါ ကျိန်ဆိုတယ်... မင်းကို အလောင်းတောင် မကျန်အောင် ငါ သတ်ပစ်မယ်။ မင်းကို ဘယ်တော့မှ ကျွတ်လွတ်ခွင့်မပေးဘူး။ မင်းရဲ့ ဝိညာဉ်လမ်းစဉ်ဂိုဏ်းနဲ့ မင်းရဲ့ မိသားစုဝင်တွေ အားလုံးကိုပါ ငါ အမြစ်ပြတ် သုတ်သင်ပစ်မယ်။ မင်းရဲ့ အကြီးမားဆုံး အမှားကတော့ ထွက်ပြေးဖို့ အခွင့်အရေးကို အမိအရ မဆုပ်ကိုင်ခဲ့တာပဲ။"

လေထုတစ်ခုလုံးမှာ မုန်းတီးမှုများနှင့် သတ်ဖြတ်လိုစိတ်များ ပြည့်နှက်နေပြီး ကောင်းကင်ယံရှိ တိမ်တိုက်များမှာလည်း ဝေ့ရှန့်ရှင်း၏ စွမ်းအားကြောင့် သွေးရောင်ကဲ့သို့ နီမြန်းလာသည်။ ဤနေရာရှိ သဘာဝတရား၏ ဝိညာဉ်စွမ်းအင်များမှာ လေးလံလာသဖြင့် ထိန်းချုပ်ရန် ခက်ခဲလာသည်။ သိုင်းဝိဇ္ဇာသူတော်စင် အောက်ရှိ သိုင်းပညာရှင်များသည် သိုင်းဝိဇ္ဇာသူတော်စင်တစ်ဦးနှင့် ရင်ဆိုင်ရပါက လုံးဝ ဖိနှိပ်ခြင်း ခံရမည် ဖြစ်သည်။ သိုင်းဝိဇ္ဇာသူတော်စင်တစ်ဦး၏ အရှိန်အဝါ ထုတ်လွှတ်လိုက်ရုံဖြင့် ဝိညာဉ်စွမ်းအင်များကို ဖရိုဖရဲဖြစ်စေကာ အခြေခံအဆင့် သိုင်းပညာရှင်များအား ဝိညာဉ်စွမ်းအင် ထိန်းချုပ်နိုင်စွမ်း မရှိတော့အောင် ပြုလုပ်နိုင်သည်။

ဤမျှအထိ ကွာခြားလှသော အဆင့်အတန်းကြောင့် သူတို့သည် သိုင်းဝိဇ္ဇာသူတော်စင်တစ်ဦးကို မည်သို့ ယှဉ်ပြိုင်နိုင်ပါမည်နည်း။ ဝေ့ရှန့်ရှင်း၏ စူးချန်ခုန်းအပေါ် မုန်းတီးမှုမှာ အလွန်နက်ရှိုင်းလှပြီး စူးချန်ခုန်းကို သတ်နိုင်ခဲ့လျှင်ပင် သူ၏ အနာဂတ်လမ်းကြောင်းမှာ ပျက်စီးသွားခဲ့ပြီဖြစ်ရာ သူသည် အရှုံးနှင့် ရင်ဆိုင်ခဲ့ရခြင်းပင် ဖြစ်သည်။ နတ်ဘုရားမျိုးစေ့မှာ အပြီးသတ် ပေါင်းစပ်သွားပြီဖြစ်ရာ သေဆုံးသည့်တိုင်အောင် ပြန်လည်ခွဲထုတ်၍ မရနိုင်တော့ပေ။

"ဝိညာဉ်လမ်းစဉ်ဂိုဏ်း"

စူးချန်ခုန်းသည် ဝေ့ရှန့်ရှင်း၏ ပါးစပ်မှ ထိုစကားလုံးကို ကြားလိုက်ရသဖြင့် မျက်မှောင်ကြုတ်လိုက်မိသည်။ သူသည် ဝိညာဉ်လမ်းစဉ်ဂိုဏ်းတွင် နေထိုင်ကြောင်းကို ကျီးရွှယ်ရှောင်း၊ ဖုချင်းစစ်နှင့် ချင်းမေ့ရှန့် တို့သာ သိကြသည်။ ဝေ့ရှန့်ကြရှင်းက ဤစကားကို ပြောခြင်းမှာ ချင်းမေ့ရှန်သည် ဝေ့ရှန့်ရှင်းထံသို့ ရောက်လာပြီး သူ၏ အချက်အလက်များကို ပေးခဲ့ခြင်းဖြစ်ကြောင်း သိသာပါသည်။

ဤအရာက စူးချန်ခုန်း၏ သတ်ဖြတ်လိုစိတ်ကို အမြင့်ဆုံးသို့ ရောက်ရှိသွားစေသည်။ သူ၏ သတ်ဖြတ်လိုစိတ်မှာ မသေသေးသော ချင်းမေ့ရှန်နှင့် ရှေ့မှ ဝေ့ရှန့်ရှင်းတို့ထံသို့ ဦးတည်နေသည်။

မူလက ဝေ့ရှန့်ရှင်းကို သိုင်းဝိဇ္ဇာသူတော်စင်အဆင့်သို့ အတင်းအကျပ် တက်လှမ်းစေပြီး သူ ထွက်ပြေးသွားလျှင်ပင် ပြဿနာကြီးကြီးမားမား မရှိဟု စူးချန်ခုန်း ထင်ခဲ့သည်။ အဘယ်ကြောင့်ဆိုသော် ဝေ့ရှန့်ရှင်းမှာ နောင်တွင် တိုးတက်ရန် လမ်းစမရှိတော့သောကြောင့် ဖြစ်သည်။ ယခု သူ၏ ပြိုင်ဘက်မဟုတ်ပါက နောင်တွင်လည်း စိုးရိမ်စရာ မရှိတော့ပေ။ သို့သော် ဝေ့ရှန့်ရှင်းသည် သူ၏ အချက်အလက်များကို သိရှိသွားပြီဖြစ်ရာ အကယ်၍ သူသာ လွတ်မြောက်သွားပါက ဝိညာဉ်လမ်းစဉ်ဂိုဏ်းရှိ အပြစ်မဲ့သူများကို ဒုက္ခပေးပေလိမ့်မည်။

ရူးသွပ်နေသော သိုင်းဝိဇ္ဇာသူတော်စင်တစ်ဦး၏ ကြောက်မက်ဖွယ်ကောင်းမှုမှာ စိတ်ကူး၍ပင် မရနိုင်ပေ။ ဒေါသတကြီးဖြင့် အသက်ရှူသံပြင်းပြင်း ဖြစ်နေသော ဝေ့ရှန့်ရှင်းထံမှ ယုတ်မာသော စွမ်းအားများ ပျံ့နှံ့လာသဖြင့် အလောင်းကောင် အဖိုးအိုမှာ အလွန်ပင် စိုးရိမ်ထိတ်လန့်နေမိသည်။ ဝေ့ရှန့်ရှင်းမှာ အမှန်တကယ်ပင် သိုင်းဝိဇ္ဇာသူတော်စင် ဖြစ်သွားခဲ့ပြီဖြစ်ရာ သူ ထုတ်လွှတ်လိုက်သော အရှိန်အဝါတစ်ခုတည်းဖြင့်ပင် ကောင်းကင်ယံကို အရောင်ပြောင်းစေပြီး ဝိညာဉ်စွမ်းအင်များကို ဖရိုဖရဲ ဖြစ်စေခဲ့သည်။ ဤကဲ့သို့သော အစွမ်းထက်သူနှင့် ရင်ဆိုင်ရာတွင် တူညီသော အဆင့်အတန်း မရှိပါက ၎င်းမှာ သတ်ဖြတ်ခံရခြင်း သက်သက်သာ ဖြစ်ပေလိမည်။