အခန်း ၃၉၂

အခန်း (၃၉၂) ယွမ်ချန်၏ ပထမဆုံးသော ပညာရှင်

မနေ့ကမှ နိမိတ်လက္ခဏာများ ပေါ်ပေါက်ခဲ့ပြီး နောက်နေ့တွင် ချက်ချင်း အဆင့်တက်လှမ်းနိုင်ခဲ့သည့်အပြင် အဆင့်တက်လှမ်းရန် ယူခဲ့ရသော အချိန်ကာလကလည်း မယုံနိုင်လောက်အောင် တိုတောင်းလှသည်။

အဆင့်တက်လှမ်းပြီးနောက်တွင်လည်း သူက ရပ်တန့်ခြင်းမရှိဘဲ မိမိ၏ ကျင့်ကြံမှုကို ဆက်လက် မြှင့်တင်နေခဲ့သည်။

ဤမြင်ကွင်းသည် ချီရှူချင်း နှစ်ပေါင်းများစွာအတွင်း တည်ဆောက်ထားခဲ့သော ကျင့်ကြံခြင်းဆိုင်ရာ အယူအဆများကို လုံးဝ ပျက်ပြားသွားစေခဲ့သည်။

လျှို့ဝှက်ကျမ်းစာများအတွင်း ရှင်းလင်းစွာ ဖော်ပြထားချက်အရ ဒွာရသန့်စင်ခြင်းအဆင့် ကျင့်ကြံခြင်းသည် တဖြည်းဖြည်းချင်း လုပ်ဆောင်ရသော လုပ်ငန်းစဉ် ဖြစ်သည်ဟု ဆိုသည်။

ခန္ဓာကိုယ် ကြံ့ခိုင်ခြင်းအဆင့်တွင်မူ မြှင့်တင်နိုင်သော နည်းလမ်းမျိုးစုံ ရှိနိုင်ပြီး နည်းလမ်း မှန်ကန်သရွေ့ အခြေခံကို ထိခိုက်စေမည် မဟုတ်ချေ။

သို့သော် ဒွာရသန့်စင်ခြင်းအဆင့်၌မူ ဒွာရတစ်ခုချင်းစီကို ဖွင့်လှစ်ရာတွင် ဂရုတစိုက် အာရုံစိုက်ရမည်ဖြစ်ပြီး အနည်းငယ်မျှ ပေါ့ဆ၍ မရနိုင်ချေ။

သို့မဟုတ်ပါက ဒွာရများကို ထိခိုက်ပျက်စီးစေနိုင်သည်။

ဒွာရများကို အောင်မြင်စွာ ဖွင့်လှစ်ပြီးလျှင်ပင် ဒွာရများကို ပိုမို ကြံ့ခိုင်လာစေရန်အတွက် အစဉ်မပြတ် ပြုစုပျိုးထောင်ပေးရသေးသည်။

ဤအချက်များအားလုံးကြောင့် ဒွာရသန့်စင်ခြင်းအဆင့် ကျင့်ကြံခြင်းသည် အလွန်အမင်း နှေးကွေးလှပုံရပြီး ခွန်အား စုဆောင်းရန်အတွက် မကြာခဏဆိုသလို နှစ်ပေါင်းများစွာ သို့မဟုတ် ဆယ်စုနှစ်တစ်ခုထက်မက အချိန်ယူရတတ်သည်။

ကျင့်ကြံခြင်း အဆင့်ငယ်တစ်ခု တက်လှမ်းရန်အတွက်မူ ပို၍ပင် သတိထားရမည် ဖြစ်ရာ မည်မျှပင် သတိကြီးစွာ ထားစေကာမူ အလွန်အကျွံ ဖြစ်သည်ဟု မဆိုနိုင်ချေ။

မည်သို့ပင်ဆိုစေ အခြေခံ မလုံလောက်ဘဲ အတင်းအကျပ် အဆင့်တက်လှမ်းပါက အသက်စွမ်းအင်များ ထိခိုက်ပျက်စီးလွယ်လှပေသည်။

ပိုမို ဆိုးရွားသော အခြေအနေများ၌မူ သူတို့၏ ကျင့်ကြံမှုသည် တစ်သက်လုံး ရှေ့ဆက် တိုးတက်နိုင်တော့မည် မဟုတ်ချေ။

သို့သော် ချန်ဖေးထံ၌မူ ကျင့်ကြံခြင်း အရှိန်အဟုန်က မယုံနိုင်လောက်အောင် မြန်ဆန်ရုံသက်သက် မဟုတ်ဘဲ အဆင့်တက်လှမ်းခြင်းကလည်း လုံးဝ ကျိုးကြောင်းဆီလျော်မှု မရှိဘဲ စည်းမျဉ်းများကို ကျော်လွန်နေခဲ့သည်။

ထို့အပြင် အဆင့်တက်လှမ်းပြီးနောက်တွင်လည်း ပြီးဆုံးသွားခြင်း မရှိဘဲ ကျင့်ကြံခြင်း ချီစွမ်းအင်က ဆက်လက် မြင့်တက်နေဆဲ ဖြစ်သည်။

ဤကဲ့သို့သော မြင်ကွင်းမျိုးကို ရှေးဟောင်းကျမ်းစာများအတွင်း မှတ်တမ်းတင်ထားခြင်း မရှိရုံမက ချီရှူချင်း ကိုယ်တိုင်လည်း ဤကဲ့သို့သော နည်းလမ်းမျိုးဖြင့် ကျင့်ကြံသူတစ်ဦးဦး ရှိကြောင်း တစ်ခါမျှ မကြားဖူးခဲ့ချေ။

ထို့ကြောင့် ချီရှူချင်းသည် မိမိကိုယ်ကိုယ် ဖော်ပြရန် မည်သည့် စကားလုံး အသုံးချရမည်ကို လုံးဝ မသိတော့ဘဲ သူမ၏ ရင်ထဲ၌ ချန်ဖေးအပေါ် အဆုံးစွန်သော ကိုးကွယ်မြတ်နိုးမှုများသာ ကျန်ရှိတော့သည်။

ဤသည်က သူမ ရှာဖွေတွေ့ရှိခဲ့သော လူသားဖြစ်ပြီး ပါရမီရှင်ထက်ပင် ပိုမို ထူးခြားဆန်းပြားလှပေသည်။

"ဂျိန်း..."

မိုးကြိုးပစ်ချလိုက်သကဲ့သို့သော အသံတစ်သံ ထွက်ပေါ်လာပြီး ချန်ဖေးသည် ချီရှူချင်း၏ ရှေ့မှောက်သို့ လျှပ်တစ်ပြက် ရောက်ရှိလာပုံရကာ လျှပ်စီးကြောင်းများက ချန်ဖေး၏ ခန္ဓာကိုယ် မျက်နှာပြင်ပေါ်တွင် လျှပ်တစ်ပြက် ဖြတ်ပြေးသွားခဲ့၏။

မဟာမိုးကြိုး ဓားသိုင်း၏ စွမ်းအားကို ကောင်းကင် ရှောင်တိမ်းခြင်း ကိုယ်ဖော့ပညာနှင့် ပေါင်းစပ်လိုက်ခြင်းက ချန်ဖေး၏ ကိုယ်ဖော့ပညာ အမြန်နှုန်းကို ထူးခြားသော နည်းလမ်းဖြင့် ပြောင်းလဲသွားစေခဲ့သည်။

"ဒါက... မဟာမိုးကြိုး ဓားသိုင်းလား..."

ချန်ဖေး ပေါ်လာသည်ကို မြင်သောအခါ ချီရှူချင်းသည် သူမ၏ ငေးမောခြင်းမှ ပြန်လည် သတိရလာပြီး အံ့အားသင့်စွာဖြင့် မေးလိုက်၏။

မဟာမိုးကြိုး ဓားသိုင်းသည် လွန်ခဲ့သော နှစ်ပေါင်းများစွာက ယွမ်ချန်ဓားဂိုဏ်း၏ အဓိက ပြခန်းကျင့်စဉ်များထဲမှ တစ်ခု ဖြစ်ခဲ့ပြီး ကျုံးယွမ် ဓားထက် များစွာ ပိုမို ကျော်ကြားလှသည်။

အထူးသဖြင့် သာမန်လူများ၏ အမြင်တွင် မဟာမိုးကြိုး ဓားသိုင်းကို ထုတ်သုံးလိုက်သော ကျင့်ကြံသူသည် မိုးကြိုးနတ်ဘုရား ဆင်းသက်လာသည့်အလား ဖြစ်ပြီး သူ၏ ခမ်းနားထည်ဝါလှသော ကောင်းကင်ဘုံ အရှိန်အဝါကို စိုက်ကြည့်ရန်ပင် မဝံ့ရဲကြချေ။

သို့သော်လည်း မည်သည့်အချိန်မှ စတင်ခဲ့သည်ကို မသိရဘဲ ယွမ်ချန်ဓားဂိုဏ်းမှ လူများသည် မဟာမိုးကြိုး ဓားသိုင်းကို ထုတ်သုံးခြင်း မရှိကြတော့သဖြင့် သာမန်လူများက အကြောင်းရင်းကို မသိကြသော်လည်း ဂိုဏ်းအသီးသီးကမူ မဟာမိုးကြိုး ဓားသိုင်း၏ အမွေအနှစ် ပျက်စီးသွားခဲ့ခြင်းကြောင့် ဖြစ်ကြောင်း ရှင်းလင်းစွာ သိရှိကြသည်။

ချီရှူချင်းသည် ယနေ့တွင် ချန်ဖေးက ဤဂိုဏ်း၏ အမွေအနှစ်ကျင့်စဉ်ကို ထုတ်သုံးလိုက်သည်ကို အံ့ဩစွာ မြင်တွေ့လိုက်ရခြင်း ဖြစ်သည်။

ချန်ဖေး ထုတ်သုံးလိုက်သော ပုံစံမှာ အရှိန်အဝါ ကြီးမားလှသော်လည်း ပရမ်းပတာ ဖြစ်နေခြင်း မရှိဘဲ စွမ်းအား တစ်စက်ချင်းစီတိုင်းက ချန်ဖေး၏ ထိန်းချုပ်မှုအောက်တွင် ရှိနေသည်မှာ ထင်ရှားလှပေသည်။

ပျက်စီးနေသော အမွေအနှစ် ကျင့်စဉ်တစ်ခုဖြင့် ဤအဆင့်သို့ ရောက်ရှိရန်မှာ လုံးဝ မဖြစ်နိုင်ချေ။

"ဒါက အရေးမကြီးပါဘူး... တခြား ထူးခြားတဲ့ ခံစားချက်တစ်ခုကို စမ်းကြည့်ချင်လား..."

ချန်ဖေး၏ မျက်နှာတွင် သဲ့သဲ့ အပြုံးတစ်ခု ပေါ်လာ၏။

သူက လက်ဖဝါးကို မြှောက်၍ လက်ညှိုးများကို အနည်းငယ် ပွတ်သပ်လိုက်ရာ လျှပ်စီးကြောင်းများ နေရာအနှံ့ ပေါ်ထွက်လာခဲ့သည်။

ချီရှူချင်းသည် အံ့အားသင့်သွားပြီးနောက် ချန်ဖေး ဆိုလိုလိုသော အဓိပ္ပာယ်ကို သဘောပေါက်သွားကာ ရှက်ပြုံးလေးဖြင့် ချန်ဖေး၏ ပုခုံးကို ခပ်ဖွဖွ ပုတ်လိုက်ပြီး သူမ၏ မျက်ဝန်းများအတွင်း၌ နူးညံ့ အိန္ဒြေရမှုများ ပြည့်နှက်သွားခဲ့ရတော့သည်။

နောက်တစ်နေ့ နံနက်အစောပိုင်းတွင် ချန်ဖေးသည် နတ်တိမ်မြို့အတွင်းမှ ထွက်ခွာသွားခဲ့ပြီ ဖြစ်သည်။

ချီရှူချင်းမှာမူ ယခုအခါ အမှန်တကယ်ပင် နုံးချိသွားခဲ့ရပြီး အားအင် တစ်စက်မျှ မရှိတော့ချေ။

ထိုခံစားချက်က ပြင်းထန်လွန်းလှသဖြင့် ဒွာရသန့်စင်ခြင်းအဆင့် သိုင်းပညာရှင်တစ်ဦး ဖြစ်စေကာမူ တောင့်ခံနိုင်စွမ်း မရှိကြချေ။

အဂ္ဂိရတ်ပညာရှင် မဟာမိတ်အဖွဲ့အတွင်းသို့ ရောက်ရှိသောအခါ ချန်ဖေးသည် ကြိုးမျှင်တစ်ထောင် ကျင့်စဉ်၏ ကိုးခုမြောက် အဆင့်ကို လဲလှယ်ရန် ရောက်ရှိလာခဲ့ခြင်း ဖြစ်သည်။

မနေ့က ဝိညာဉ်အခွင့်အရေး ဆုံတွေ့မှုကြောင့် နောက်ဆုံးတွင် အချိန်အနည်းငယ်သာ ကုန်လွန်စေခဲ့သော်လည်း ကြိုးမျှင်တစ်ထောင် ကျင့်စဉ်၏ အဋ္ဌမမြောက် အဆင့် ကျွမ်းကျင်မှုက များစွာ တိုးတက်သွားခဲ့သည်။

ချန်ဖေးသည် မကြာသေးမီ လများအတွင်း အရင်းအမြစ်များ ကြွယ်ဝနေသော်လည်း အဂ္ဂိရတ်ပညာရှင် မဟာမိတ်အဖွဲ့၏ တာဝန်များကို လာရောက် လက်ခံဆောင်ရွက်ခဲ့ခြင်းမှာ ဤဂိုဏ်း၏ ပံ့ပိုးမှုအမှတ်များကို ရရှိရန်အတွက်သာ ဖြစ်၏။

ဤပံ့ပိုးမှုအမှတ်များကို ချန်ဖေးသည် အခြား မည်သည့်အရာနှင့်မျှ လဲလှယ်ခြင်း မပြုဘဲ ကြိုးမျှင်တစ်ထောင် ကျင့်စဉ်၏ ကိုးခုမြောက် အဆင့်ကို လဲလှယ်ရန်အတွက်သာ စုဆောင်းခဲ့ခြင်း ဖြစ်သည်။

အတန်ကြာကတည်းက ဤပံ့ပိုးမှုအမှတ်များ ပြည့်မီနေခဲ့ပြီ ဖြစ်သော်လည်း ချန်ဖေးသည် လာရောက် လဲလှယ်ခြင်း မပြုခဲ့သေးချေ။

ယခုအခါ ကြိုးမျှင်တစ်ထောင် ကျင့်စဉ် ကျင့်ကြံမှုက ထိုနေရာသို့ ရောက်ရှိလာပြီ ဖြစ်ရာ နောက်ပိုင်းတွင် ကျင့်ကြံခြင်း ပြတ်တောက်မှု မရှိစေရန်နှင့် မလိုလားအပ်သော ရှုပ်ထွေးမှုများကို ရှောင်ရှားရန်အတွက် ချန်ဖေးသည် ကိုးခုမြောက် အဆင့်ကို လဲလှယ်ရန် ဆုံးဖြတ်လိုက်ခြင်း ဖြစ်သည်။

"ဆေးပညာရှင်ချန် မဟာမိတ်အဖွဲ့ခေါင်းဆောင်က မင်းကို တွေ့ချင်လို့ပါ..."

ချန်ဖေး လဲလှယ်သည့်နေရာ

တွင် စောင့်ဆိုင်းနေစဉ် မဟာမိတ်အဖွဲ့၏ စီမံခန့်ခွဲသူတစ်ဦးက ချန်ဖေး၏ ရှေ့သို့ ရောက်ရှိလာပြီး တီးတိုး ဆိုလိုက်၏။

"မဟာမိတ်အဖွဲ့မှာ နှစ်ပေါင်းများစွာအတွင်း ဘယ်သူကမှ ကြိုးမျှင်တစ်ထောင် ကျင့်စဉ်၏ ကိုးခုမြောက် အဆင့်ကို လာရောက် လဲလှယ်ခြင်း မရှိခဲ့ဘူး... ကျွန်မလည်း ဒီလို ဖြစ်လာလိမ့်မယ်လို့ မထင်ထားခဲ့ဘူး..."

ဘေးနားတွင် ရပ်နေသော ချင်ကျင်လန်ကလည်း အတော်လေး အံ့အားသင့်စွာဖြင့် ပြောလိုက်သည်။

ချန်ဖေးက အနည်းငယ် ခေါင်းညိတ်ပြလိုက်ပြီး ထူးခြားသော အမူအရာမျိုး မပြခဲ့ချေ။

အဂ္ဂိရတ်ပညာရှင် မဟာမိတ်အဖွဲ့၏ ဂိုဏ်းစောင့် လျှို့ဝှက်ကျင့်စဉ်ကို လူတစ်ဦးဦးက လုံလောက်သော ပံ့ပိုးမှုအမှတ်များ စုဆောင်း၍ လာရောက် လဲလှယ်ခြင်း ဖြစ်ရာ မိမိတို့ မဟာမိတ်အဖွဲ့၏ ခေါင်းဆောင်က ချန်ဖေးအား ဆင့်ခေါ်တွေ့ဆုံခြင်းက လုံးဝ ကျိုးကြောင်းဆီလျော်မှု ရှိပေသည်။

ချင်ကျင်လန် ပြောသကဲ့သို့ပင် အဂ္ဂိရတ်ပညာရှင် မဟာမိတ်အဖွဲ့တွင် နှစ်ပေါင်းများစွာအတွင်း မည်သူမျှ ကြိုးမျှင်တစ်ထောင် ကျင့်စဉ်၏ ဤအဆင့်ကို လာရောက် လဲလှယ်ခြင်း မရှိခဲ့ချေ။

ပံ့ပိုးမှုအမှတ်များစွာ လိုအပ်ခြင်းအပြင် ကြိုးမျှင်တစ်ထောင် ကျင့်စဉ် ကျင့်ကြံခြင်း၏ ခက်ခဲမှုကလည်း ဆေးပညာရှင် အများအပြားကို လက်လျှော့သွားစေခဲ့သည်။

"နောက်ဆုံးအကြိမ် ငါတို့ ဆုံတုန်းက မင်းက အတွင်းကလီစာသန့်စင်ခြင်းအဆင့်ကိုတောင် မရောက်သေးဘူး..."

ဝေရှင်းရှန်းက ချန်ဖေးကို ကြည့်၍ လွန်ခဲ့သော နှစ်အနည်းငယ်က မဟာမိတ်အဖွဲ့၏ တာဝန်တစ်ခုတွင် သူတို့ ပထမဆုံး ဆုံတွေ့ခဲ့ကြစဉ်က အခြေအနေကို ပြန်လည် ပြောကြားလိုက်သည်။

ထိုစဉ်က ချန်ဖေးသည် ခြင်ဆီသန့်စင်ခြင်းအဆင့် သိုင်းပညာရှင်တစ်ဦးသာ ရှိသေးသည်။

သို့သော်လည်း နှစ်အနည်းငယ် ကုန်လွန်သွားခဲ့ပြီးနောက် ယခုအခါ ချန်ဖေးသည် ဒွာရသန့်စင်ခြင်းအဆင့်သို့ ရောက်ရှိနေပြီဖြစ်ရုံမက သူ၏ ဆေးဖော်စပ်ခြင်း ပါရမီကလည်း သိုင်းပညာလမ်းစဉ်၏ တိုးတက်မှုထက် အနည်းငယ်မျှ လျော့နည်းခြင်း မရှိချေ။

နှစ်အနည်းငယ်အတွင်း သူသည် ဆက်တိုက်ဆိုသလို ဝိညာဉ်ဆေးလုံးများကို လက်ခံ ဖော်စပ်ခဲ့သော်လည်း တစ်ကြိမ်မျှ ဆုံးရှုံးပျက်စီးခြင်း မရှိခဲ့ချေ။

ဤအချက်များ အားလုံးကို မှတ်တမ်းတင်ထားခြင်း ဖြစ်ရာ မည်သို့ပင်ဆိုစေ တာဝန်တစ်ခုချင်းစီတိုင်း၏ ပံ့ပိုးမှုအမှတ်များ အသုံးစရိတ်အားလုံးကို ထိုနေရာတွင် ရှင်းလင်းစွာ စာရင်းပြုစုထားသည်။

ဝေရှင်းရှန်းသည် ယခင်က မဟာမိတ်အဖွဲ့၏ စီမံခန့်ခွဲသူများထံမှ ချန်ဖေးအကြောင်း အစီရင်ခံစာများကို ကြားဖူးခဲ့ပြီး ချန်ဖေးကဲ့သို့ ရူးသွပ်စွာ ဆေးဖော်စပ်နိုင်ပြီး ကောင်းမွန်စွာ သန့်စင်နိုင်သူမျိုးမှာ ဤမဟာမိတ်အဖွဲ့အတွင်း၌ တစ်ဦးတည်းသာ ရှိသည်ဟု ဆိုနိုင်သည်။

ထိုစဉ်က ဝေရှင်းရှန်းသည် ချန်ဖေး၏ မူလဇာတိက ယွမ်ချန်ဓားဂိုဏ်း ဖြစ်နေခြင်းအပေါ် အနည်းငယ် နှမြောမိခဲ့သည်။

အကယ်၍ သူက နတ်တိမ်ဓားဂိုဏ်းမှ ဖြစ်ခဲ့မည်ဆိုပါက ဝေရှင်းရှန်းသည် ချန်ဖေးအား နတ်တိမ်ဓားဂိုဏ်း ဆေးတောင်ထွတ်၏ အမွေအနှစ် ဆက်ခံသူအဖြစ် သတ်မှတ်၍ ပြုစုပျိုးထောင်ပေးခဲ့မည် ဖြစ်သည်။

သို့သော်လည်း ထင်ရှားသည်မှာ ထိုကဲ့သို့သော ကိစ္စရပ်မျိုး မဖြစ်နိုင်တော့ဘဲ ချန်ဖေးသည် ယွမ်ချန်ဓားဂိုဏ်းနှင့် လုံးဝ စည်းနှောင်ထားပြီး ဖြစ်သည်။ ဝေရှင်းရှန်းသည် ချန်ဖေးကို သစ္စာဖောက်မှု အန္တရာယ်ကို စွန့်စားခိုင်းပြီး ချန်ဖေးအား နတ်တိမ်ဓားဂိုဏ်းအတွင်းသို့ အတင်းအကျပ် သွတ်သွင်းမည် မဟုတ်ချေ။

ထိုသို့လုပ်ဆောင်ပါက ဆေးတောင်ထွတ်အတွင်း ပဋိပက္ခ ဖြစ်ပွားမည်သာမက နတ်တိမ်ဓားဂိုဏ်း တစ်ခုလုံးကလည်း ကန့်ကွက်ကြမည် ဖြစ်သည်။

ထို့ကြောင့် နှစ်များစွာအတွင်း ဝေရှင်းရှန်းသည် ချန်ဖေးအကြောင်းကို အမြဲတစေ သိရှိထားသော်လည်း ချန်ဖေးအား တစ်ကြိမ်မျှ ဆင့်ခေါ်တွေ့ဆုံခြင်း မပြုခဲ့သည်မှာ မလိုအပ်သောကြောင့် ဖြစ်သည်။

ယနေ့တွင်မူ ချန်ဖေးသည် ကြိုးမျှင်တစ်ထောင် ကျင့်စဉ်၏ နောက်ဆုံးအဆင့်ကို လာရောက် လဲလှယ်သည်ဟု ကြားလိုက်ရသဖြင့် ဝေရှင်းရှန်းသည် ဤအခွင့်အရေးကို အသုံးချ၍ ချန်ဖေးနှင့် ဆုံတွေ့ခဲ့ခြင်း ဖြစ်သည်။

ကြိုးမျှင်တစ်ထောင် ကျင့်စဉ် ကျင့်ကြံခြင်း၏ ခက်ခဲမှုကို ဝေရှင်းရှန်းကိုယ်တိုင် အလွန် ရှင်းလင်းစွာ သိရှိသည်။

ဝေရှင်းရှန်းကိုယ်တိုင်လည်း ဒွာရသန့်စင်ခြင်း နောက်ဆုံးအဆင့်သို့ ရောက်ရှိခဲ့သည်မှာ နှစ်ပေါင်းများစွာ ကြာမြင့်ခဲ့ပြီ ဖြစ်သော်လည်း ကြိုးမျှင်တစ်ထောင် ကျင့်စဉ်မှာမူ ကိုးခုမြောက် အဆင့်တွင်သာ ဝဲလည်နေဆဲ ဖြစ်ပြီး လုံးဝ ကျင့်ကြံအောင်မြင်ခြင်း မရှိသေးချေ။

"မဟာမိတ်အဖွဲ့ခေါင်းဆောင်ကို ဂါဝရပြုပါတယ်..."

ချန်ဖေးက လက်နှစ်ဖက်ကို ယှက်၍ အရိုအသေပေးလိုက်၏။

"ကြိုးမျှင်တစ်ထောင် ကျင့်စဉ် ကျင့်ကြံရာမှာ နားမလည်တာ ရှိရင် မေးမြန်းနိုင်ပါတယ်..."

ချန်ဖေးသည် ကြိုးမျှင်တစ်ထောင် ကျင့်စဉ်၏ ကိုးခုမြောက် အဆင့်ကို လဲလှယ်ရန် ရောက်ရှိလာခြင်း ဖြစ်ရာ ဝေရှင်းရှန်းအား များစွာ အံ့အားသင့်စေခဲ့သော်လည်း ဝေရှင်းရှန်းသည် ချန်ဖေးက ဤကျင့်စဉ်ကို ဤနေရာအထိ ကျင့်ကြံပြီးမြောက်ခဲ့ပြီဟု မထင်ထားခဲ့ချေ။

လက်ရှိ တုန်လှုပ်ချောက်ချားဖွယ် အခြေအနေများကြောင့် သတင်းအချက်အလက်များကို ကြိုတင် လဲလှယ်သိမ်းဆည်းထားခြင်းသာ ဖြစ်လိမ့်မည်ဟု ထင်မှတ်ထာသည်။

"ကြိုးမျှင်တစ်ထောင် ကျင့်စဉ်ရဲ့ တတိယမြောက် အဆင့်မှာ အနည်းငယ် ဝေခွဲမရ ဖြစ်နေတဲ့ အချက်ကတော့..."

ချန်ဖေး၏ မျက်နှာတွင် သဘာဝကျသော ဝမ်းသာပီတိ ဖြစ်မှု မျက်နှာထားတစ်ခု ပေါ်လာပြီး ကြိုးမျှင်တစ်ထောင် ကျင့်စဉ်၏ တတိယမြောက် အဆင့်မှ အဓိက အချက်တစ်ခုကို ကောက်ယူ၍ ဝေရှင်းရှန်းအား လမ်းညွှန်မှု တောင်းခံလိုက်၏။

ဝေရှင်းရှန်းသည် ကြိုးမျှင်တစ်ထောင် ကျင့်စဉ်၏ တတိယမြောက် အဆင့်အကြောင်း ကြားလိုက်ရသောအခါ သူ၏ မျက်ဝန်းအတွင်း၌ လင်းလက်မှုတစ်ခု ဖြတ်ပြေးသွားပြီး စိတ်ရှည်စွာဖြင့် လမ်းညွှန်ပြသပေးခဲ့သည်။

ဝေရှင်းရှန်း လမ်းညွှန်ပြသပြီးနောက် ချန်ဖေးသည် ဤအခွင့်အရေးကို အသုံးချ၍ နောက်ထပ် မေးခွန်းအချို့ကို ထပ်မံ မေးမြန်းခဲ့ရာ ဝေရှင်းရှန်းအား ဆရာတစ်ဦးကဲ့သို့ လမ်းညွှန်ပေးရသော စိတ်ကျေနပ်မှုကို ရရှိစေခဲ့သည်။

နာရီဝက်ခန့် ကြာမြင့်ပြီးနောက်တွင်မှ ချန်ဖေးသည် စာကြည့်ခန်းအတွင်းမှ ထွက်ခွာခဲ့တော့သည်။

ဝေရှင်းရှန်းသည် ချန်ဖေး ထွက်ခွာသွားသည်ကို နှမြောတသသော မျက်ဝန်းများဖြင့် စိုက်ကြည့်နေမိ၏။

ဤမျှ ပါရမီ ထူးချွန်လှသော ကျောက်စိမ်းတုံးလေးသည် ဆေးတောင်ထွတ်၏ တပည့် မဟုတ်ခဲ့ခြင်းက ဝေရှင်းရှန်းအား အနည်းငယ် နှမြောတသဖြစ်စေခဲ့သည်။

ချန်ဖေးသည် ကြိုးမျှင်တစ်ထောင် ကျင့်စဉ်၏ ကိုးခုမြောက် အဆင့်ကို ယူဆောင်၍ နတ်တိမ်မြို့မှ ထွက်ခွာခဲ့ပြီး ယွမ်ချန်ဓားဂိုဏ်းအတွင်းသို့ ပြန်လည် ရောက်ရှိလာခဲ့သည်။

နောက်ပိုင်းလတွင် ချန်ဖေးသည် မိမိ၏ ခြံဝန်းအတွင်း၌သာ နေထိုင်ခဲ့ပြီး မည်သည့်နေရာသို့မျှ မသွားဘဲ ဒွာရသန့်စင်ခြင်း နောက်ဆုံးအဆင့်၏ သိမ်မွေ့သော အချက်အလက်များကို အစဉ်မပြတ် ဆင်ခြင်သုံးသပ်နေခဲ့၏။

လမ်းခရီးတွင် ချန်ဖေးသည် နှလုံးသားနယ်မြေအတွင်းသို့ တစ်ကြိမ် သွားရောက်ခဲ့သေးသည်။

သူ၏ ကျင့်ကြံမှုသည် ဒွာရသန့်စင်ခြင်း နောက်ဆုံးအဆင့်သို့ ရောက်ရှိလာခဲ့ပြီ ဖြစ်ရာ စိတ်စွမ်းအားနှင့် ကျင့်ကြံမှုအကြား၌ ကြီးမားသော ကွာဟချက် မရှိတော့သဖြင့် ချန်ဖေးသည် သဘာဝကျစွာပင် မိမိ၏ စိတ်စွမ်းအားကို ဆက်လက် မြှင့်တင်ရန် စဉ်းစားမိခြင်း ဖြစ်သည်။

စိတ်စွမ်းအား အဆင့် ပိုမို မြင့်မားလေလေ၊ မိမိ၏ ကိုယ်ပိုင် စွမ်းအားကို ထိန်းချုပ်ရာတွင် ပိုမို ထိရောက်မှု ရှိလေလေ ဖြစ်၏။

သုံးနာရီအတွင်း ချန်ဖေးသည် အဆင့် ၁ နှလုံးသား မိစ္ဆာ ဆယ်ဂဏန်းကျော်ကို သတ်ဖြတ်ခဲ့ပြီး သူ၏ စိတ်စွမ်းအားကို ဒွာရ ရှစ်ဆယ့်ရှစ် ခု ထိန်းချုပ်နိုင်စွမ်းရှိသည့် အဆင့်အထိ မြှင့်တင်ပြီးနောက်တွင်မှ စိတ်စွမ်းအား တိုးတက်မှုက ရပ်တန့်သွားခဲ့တော့သည်။

ချန်ဖေးသည် နောက်ထပ် အဆင့် ၁ မိစ္ဆာ ဆယ်ဂဏန်းကျော်ကို ထပ်မံ သတ်ဖြတ်ကြည့်ခဲ့သော်လည်း စိတ်ဝိညာဉ်အတွက် မည်သည့် အကျိုးကျေးဇူးမျှ မရှိတော့ကြောင်း သေချာသွားခဲ့သည်။

ဤနှလုံးသားနယ်မြေအတွင်း၌ ချန်ဖေးအတွက် စိတ်စွမ်းအားကို မြှင့်တင်ရန် အလွယ်ကူဆုံးနှင့် အသက်သာဆုံး နည်းလမ်းသည် နောက်ဆုံးတွင် အဆုံးသတ်သွားခဲ့ချေပြီ။

ချန်ဖေးသည် စိတ်ပျက်အားလျော့ခြင်း မရှိခဲ့ချေ။

မည်သို့ပင်ဆိုစေ သူ ယခင်က အဆင့် ၁ နှလုံးသား မိစ္ဆာများကို သတ်ဖြတ်စဉ်ကတည်းက အာနိသင်က လျော့နည်းလာခဲ့ပြီး ဖြစ်သကဲ့သို့ ချန်ဖေး ဒွာရသန့်စင်ခြင်း နောက်ဆုံးအဆင့်သို့ တက်လှမ်းခဲ့ပြီးနောက် စိတ်ဝိညာဉ်သည် ကောင်းကင်နှင့် မြေကြီး မူလချီစွမ်းအင်များ၏ သန့်စင်မှုကို ခံယူခဲ့ရသဖြင့် ဤလျော့နည်းမှု အချိုးအစားက ပိုမို သိသာလာခဲ့ခြင်း ဖြစ်သည်။

ထင်ရှားသည်မှာ အဆင့် ၁ နှလုံးသား မိစ္ဆာများထံမှ ရရှိသော မူလအစ စွမ်းအားသည် လက်ရှိ အခြေအနေရှိ ချန်ဖေးအတွက်မူ အလွန် အခြေခံကျလွန်းနေပြီ ဖြစ်သည်။

ကြယ်စင်ကြည့်ရှုခြင်း ကျင့်စဉ်ကို လည်ပတ်စေလျက် ချန်ဖေးသည် ပတ်ဝန်းကျင်၌ အဆင့် ၂ နှလုံးသား မိစ္ဆာတစ်ကောင်ကို ရှာဖွေတွေ့ရှိခဲ့၏။

ကြယ်စင်ကြည့်ရှုခြင်း ကျင့်စဉ်အောက်၌ ဤအဆင့် 2 နှလုံးသား မိစ္ဆာ၏ ချီစွမ်းအင်က အထူးတလည် အစွမ်းထက်နေခြင်း မရှိဘဲ ဒွာရသန့်စင်ခြင်း အစောပိုင်းအဆင့် သိုင်းပညာရှင်တစ်ဦးနှင့် ခန့်မှန်းခြေ ဆင်တူပေသည်။

ဤအဆင့် ၂ နှလုံးသား မိစ္ဆာကို သတ်ဖြတ်ရန်အတွက် ချန်ဖေးသည် အချိန်အနည်းငယ်သာ ကုန်လွန်စေခဲ့ရပြီး ဓားတစ်ချက်တည်းဖြင့် အဆင့် ၁ မိစ္ဆာများကို သတ်ဖြတ်ရခြင်းနှင့် နှိုင်းယှဉ်ပါက အဆင့် ၂ နှလုံးသား မိစ္ဆာသည် များစွာ ပိုမို အစွမ်းထက်လှသည်မှာ သေချာပေသည်။

သို့သော်လည်း ချန်ဖေးနှင့် သူတို့အကြားရှိ ထင်ရှားသော ကွာဟချက်ကြောင့် ဤအဆင့် ၂ နှလုံးသား မိစ္ဆာသည်လည်း ချန်ဖေး၏ အတင်းအကျပ် သတ်ဖြတ်ခြင်းကိုသာ ခံလိုက်ရသည်။

မူလအစ စွမ်းအားကို ထုတ်ယူ၍ စိတ်ဝိညာဉ် သန့်စင်ရေး အစီအရင်အတွင်းသို့ ထည့်သွင်းလိုက်၏။

စတုတ္ထမြောက် အဆင့် စိတ်ဝိညာဉ် သန့်စင်ရေး အစီအရင်သည် ချန်ဖေး စနစ်တကျ ဒွာရသန့်စင်ခြင်း နောက်ဆုံးအဆင့်သို့ တက်လှမ်းခဲ့ပြီးနောက်ပိုင်း နောက်ထပ် ခြေလှမ်းတစ်လှမ်း တိုးတက်လာခဲ့ခြင်း ဖြစ်သည်။

ဤအဆင့် ၂ နှလုံးသား မိစ္ဆာသည် စတုတ္ထမြောက် အဆင့် စိတ်ဝိညာဉ် သန့်စင်ရေး အစီအရင်အတွင်း၌ မည်မျှပင် ညစ်ညမ်းမှုများနှင့် ရူးသွပ်မှုများ ရှိနေစေကာမူ နောက်ဆုံးတွင် သန့်စင်သော မူလအစ စွမ်းအားတစ်ခုအဖြစ်သာ သန့်စင်ခြင်း ခံလိုက်ရသည်။

ချန်ဖေး စုပ်ယူပြီးနောက်တွင် ရပ်တန့်နေခဲ့သော စိတ်စွမ်းအား တိုးတက်မှုက ထပ်မံ၍ ပေါ်ပေါက်လာခဲ့ပြီး တိုးတက်မှု အချိုးအစားက အလွန် ကြီးမားလှသည်။

သို့သော်လည်း ထူးဆန်းသော ခံစားချက်တစ်ခုသည် ချန်ဖေး၏ စိတ်ထဲ၌ ရုတ်ချည်း ပေါ်ပေါက်လာခဲ့၏။

သဲ့သဲ့မျှသာရှိပြီး အာရုံခံရန် ခက်ခဲသော ရန်လိုမှုတစ်ခုက အရပ်မျက်နှာ အနှံ့အပြားမှ ချန်ဖေး၏ ခန္ဓာကိုယ်အပေါ်သို့ ကျရောက်လာသကဲ့သို့ ဖြစ်နေသည်။

ဤရှင်းမပြနိုင်သော ရန်လိုမှုက မည်သည့်နေရာမှ လာသည်၊ မည်သူ့ထံမှ ဖြစ်သည်ဟူသည်ကို မသိရဘဲ ချန်ဖေး၏ ရင်ထဲ၌ အေးစက်သွားစေကာ ကြီးမားလှသော ဘေးအန္တရာယ်တစ်ခု ကျရောက်တော့မည့်အလား ခံစားလိုက်ရသည်။

သတိကြီးစွာ ထားသည့်အနေဖြင့် ချန်ဖေးသည် နှလုံးသားနယ်မြေအတွင်းမှ ချက်ချင်းပင် ထွက်ခွာခဲ့တော့သည်။

ထိုအချိန်မှစတင်၍ ဆယ်ရက်ကျော်တိုင်တိုင် ချန်ဖေးသည် နှလုံးသားနယ်မြေအတွင်းသို့ ထပ်မံ မဝင်ရောက်ခဲ့တော့ဘဲ ချန်ဖေးသည် ပိုမို ဝေးကွာသော နေရာတစ်ခုသို့ ပြောင်းရွှေ့ပြီးမှသာ နှလုံးသားနယ်မြေအတွင်းသို့ ဝင်ရောက်၍ အခြေအနေအမှန်ကို စူးစမ်းရန် ကြံရွယ်ထားသည်။

ယွမ်ချန်ဓားဂိုဏ်း၏ ပင်မတောင်ထွတ်။

"မင်းက ဌာနေပြန်ဓားမျှော်စင်ကို သွားမလို့လား... ဘာဖြစ်လို့လဲ..."

ချွီချင်းရှန်းသည် ချန်ဖေးကို အံ့ဩစွာ ကြည့်၍ မေးလိုက်၏။

"ကျွန်တော်တို့ရဲ့ အမွေအနှစ်ကို ပြန်ယူဖို့ပါ..."

ချန်ဖေးက ပြောလိုက်သည်။

"ငါတို့ရဲ့ လက်ရှိ ခွန်အားက အဲဒီလိုလုပ်ဖို့ မလုံလောက်သေး..."

ချွီချင်းရှန်း စကား မဆုံးသေးမီမှာပင် ချန်ဖေး၏ ချီစွမ်းအင် အရှိန်အဝါ ပြောင်းလဲသွားကြောင်း ရုတ်ချည်း သတိပြုမိလိုက်သည်။

ဒွာရသန့်စင်ခြင်း အစောပိုင်းအဆင့်မှ အလယ်အလတ်အဆင့်သို့ တိုက်ရိုက် မြင့်တက်လာခဲ့၏။

ဤသည်မှာ ထူးခြားဆန်းပြားသောအရာ မဟုတ်ချေ။ အဘယ်ကြောင့်ဆိုသော် ချွီချင်းရှန်းသည် ချန်ဖေး အလယ်အလတ်အဆင့်သို့ တက်လှမ်းခဲ့ပြီးဖြစ်ကြောင်း လွန်ခဲ့သော အချိန်ကြာမြင့်စွာကတည်းက သိရှိထားသောကြောင့် ဖြစ်သည်။

သို့သော်လည်း အသက်တစ်ချက် ရှူလိုက်သည့် အချိန်အတွင်းမှာပင် ချွီချင်းရှန်းသည် သူ၏ မျက်လုံးများကို အလိုအလျောက် ပြူးကျယ်သွားခဲ့ရတော့သည်။

ချန်ဖေး၏ ချီစွမ်းအင် အရှိန်အဝါသည် ဒွာရသန့်စင်ခြင်း နောက်ဆုံးအဆင့်သို့ မြင့်တက်သွားခဲ့ပြီး ချွီချင်းရှန်းကိုယ်တိုင်နှင့် မည်သည့် ကွာခြားချက်မျှ မရှိတော့ချေ။