အခန်း (၉၂၅-၉၂၆)

အခန်း ၉၂၅ သဲကမ္ဘာသားများ

ရွှီဟွေသည် အေးစက်စွာ နှာမှုတ်လိုက်ပြီး လေဆင်နှာမောင်းက သူမဆီ နီးကပ်လာချိန်တွင်ပင် လှုပ်ရှားမှုကို မရပ်တန့်ခဲ့ပေ။ ထိုအချိန်တွင် သူမသည် ရှေ့တွင် လက်ဟန် တစ်ခုကို အလျင်အမြန် ဖော်လျက် လက်နှစ်ဖက်အား ဘေးသို့ ဆန့်ထုတ်လိုက်သည်။

"သွားစမ်း"

သူမ ဆံပင်များ လေထဲတွင် လွင့်ခါနေသော်လည်း သူမ ထိုစကားကို ပြောလိုက်သည်တွင် သူမရှေ့ရှိ လေဆင်နှာမောင်းသည် ရုတ်တရက် ရပ်တန့်သွားသည်။ ရှေးဟောင်းကာလမှ ထွက်ပေါ်လာသကဲ့သို့ ဟိန်းဟောက်သံ တစ်သံသည် ထိုလေဆင်နှာမောင်းထဲမှ ထွက်ပေါ်လာသည်။

ထိုဟိန်းဟောက်သံတွင် စကြာဝဠာကို ဖျက်ဆီးလိုသော ဆန္ဒတစ်ခု ပါဝင်နေသည်။ ၎င်းသည် လေဆင်နှာမောင်း၏ အနက်ရှိုင်းဆုံးနေရာတွင် မီးတောက်များအဖြစ် ပြောင်းလဲသွားပြီး ရုတ်တရက် ပျံ့နှံ့သွားသည်။ ချက်ချင်းပင် ရွှီဟွေရှေ့ရှိ လေဆင်နှာမောင်းသည် မီးလောင်ကျွမ်းသွားပြီး မီးလေဆင်နှာမောင်း အဖြစ်သို့ ပြောင်းလဲသွားသည်။

ဟိန်းဟောက်သံသည် စူးရှလာပြီး နောက်ဆုံးတွင် အော်သံ တစ်သံအဖြစ် ပြောင်းလဲသွားသည်။ ထိုအသံ ထွက်ပေါ်လာသည်နှင့် မီးလေဆင်နှာမောင်းထဲမှ မီးဖီးနစ်ငှက်ကြီး တစ်ကောင် ပြေးထွက်လာသည်။ ၎င်းသည် ပေထောင်ပေါင်းများစွာ ရှည်လျားပြီး မယုံနိုင်လောက်အောင် ခွန်အားကြီးမားပုံရသည်။ ဖီးနစ်ငှက်သည် ကမ္ဘာကြီးအား လှည့်ပတ်ပျံသန်းနေပြီး စူးရှသော အော်သံများက အရပ်မျက်နှာ အားလုံးရှိ အရာခပ်သိမ်းကို လောင်ကျွမ်းသွားစေသည်။

"မီးဖီးနစ်... ထွက်လာစမ်း" ရွှီဟွေ၏ မျက်လုံးများတွင် လူသတ်ချင်သော အရိပ်အယောင်တစ်ခု တောက်ပသွားသည်။ သူမသည် ညာလက်ကိုမြှောက်ကာ အဝေးရှိ သဲလူကြီးဆီသို့ လက်ညှိုးထိုးပြလိုက်ရာ မီးဖီးနစ်ငှက်ကြီးသည် ထိုလူကြီးဆီသို့ ချက်ချင်း ပြေးဝင်သွားလေသည်။

လူကြီး ဟိန်းဟောက်လိုက်သည်နှင့် သူတို့နှစ်ဦး အချင်းချင်း ဝင်တိုက်မိသွားကြသည်။ ကျယ်လောင်သော ပေါက်ကွဲသံကြီးက မြေပြင်ကို တုန်ခါသွားစေပြီး ပြင်းထန်သည့် အရှိန်အဟုန်ဖြင့် ပျံ့နှံ့သွားသည်။

လကပ်ဘေး အဆင့်မှ စွမ်းအားကြီးသော နတ်ဘုရား စွမ်းရည်သည် ထိုအခိုက်အတန့်တွင် ရွှီဟွေ၏ လက်များမှ တစ်ဆင့် စွမ်းအင် အပြည့်အဝဖြင့် ထွက်ပေါ်လာခဲ့သည်။

သူမ အမြန်နှုန်းက ပြောင်းလဲမသွားပေ။ မျက်စိတစ်မှိတ်အတွင်း သူမသည် ခန္ဓာကိုယ် တစ်ကိုယ်လုံး မီးပင်လယ်ထဲ လွှမ်းခြုံခံနေရသော လူကြီးထံသို့ ရောက်ရှိသွားသည်။ လူကြီး၏ ဒူးများ ခွေကျသွားပြီး ကျယ်လောင်သော အသံနှင့်အတူ မြေကြီးပေါ်သို့ ဒူးထောက်ကျသွားသည်။ သူ့ခန္ဓာကိုယ် စတင်လောင်ကျွမ်းသွားချိန်တွင် နာကျင်နေပုံရသည်။

သို့သော် ရွှီဟွေ သတိမလျော့ခဲ့ပေ။ ထိုအစား သူမ မျက်နှာပေါ်တွင် တင်းမာသော အမူအရာတစ်ခု ပေါ်လာသည်။ သူမ လှုပ်ရှားမှုကို ရပ်တန့်ပြီး နေရာတွင်ပင် ရပ်ကာ ပတ်ဝန်းကျင်သို့ ကြည့်လိုက်သည်။ လူကြီး လောင်ကျွမ်းနေစဉ် သူမ ပတ်ဝန်းကျင်ရှိ မြေပြင်သည် စတင်တုန်ခါလာပြီး နောက်ထပ် သဲလူကြီး ဆယ်ကောင်ကျော် ပေါ်လာသည်။ ဤရက်စက်ကြမ်းကြုတ်သော သဲမိစ္ဆာများသည် ခြေလှမ်းကျဲကြီးများဖြင့် ရှေ့သို့ တိုးလာကြပြီး သူတို့ ခြေလှမ်းများ မြေကြီးပေါ် ကျရောက်သွားတိုင်း မြေပြင်က တုန်ခါသွားသည်။ ထိုသတ္တဝါများ အားလုံးသည် သူမဆီသို့ လျင်မြန်စွာ နီးကပ်လာကြသည်။

သို့သော်လည်း ဤလူကြီးများနှင့် ရွှီဟွေကို တုံ့ပြန်မှုလုပ်ဆောင်ရန် မလုံလောက်သေးပေ။ သူမ သူငယ်အိမ်များကို ကျုံ့သွားစေသည်က အဝေးမှ ပေထောင်ပေါင်းများစွာ မြင့်မားသော သဲလူကြီး တစ်ဦးကြောင့် ဖြစ်သည်။ သူ့ခြေရင်းရှိ သဲများသည် အသိဉာဏ်ရရှိသွား သကဲ့သို့ တောင်ကုန်းငယ် တစ်တောင် အသွင် ဖန်တီးထားသည်။

သူသည် တောင်ကုန်းငယ်ပေါ်တွင် မတ်တပ်ရပ်နေပြီး အဝေးမှ ရွှီဟွေ့ကို စိုက်ကြည့်နေစဉ် သူ၏ မျက်လုံးများတွင် အေးစက်စူးရှသော အကြည့်က တောက်ပနေသည်။ သူ့ဘယ်လက်ထဲတွင် အဝါရောင် လေးရှည်ကြီး တစ်စင်း ရှိသည်။ ထိုလေးသည် ပေထောင်ပေါင်းများစွာ ရှည်လျားပြီး သူ့ခန္ဓာကိုယ် အမြင့်နှင့် တူညီသည်။

အမှန်တွင် ရွှီဟွေ့နှင့် ပိုဝေးသော နေရာမှ သဲများသည် လူးလှိမ့်သွားကာ စက်ဝိုင်းပုံစံ အတားအဆီးတစ်ခု အဖြစ် ဖြစ်ပေါ်လာသည်။ ထိုနေရာမှ လေချွန်သံများ ထွက်ပေါ်လာပြီး သာမန်လူတစ်ယောက်၏ အရပ် တစ်ဝက်ခန့်သာရှိသော လူပုလေးများသည် အုပ်စုလိုက် ပေါ်လာကြသည်။ သူတို့သည် ရိုးရှင်းသော အဝတ်အစားများကို ဝတ်ဆင်ထားကြပြီး သူတို့ မွေးဖွားကတည်းက တစ်ခါမှ ရေမချိုးဖူးသကဲ့သို့ သူတို့၏ ခန္ဓာကိုယ်များမှာ မယုံနိုင်လောက်အောင် ညစ်ပတ်နေသည်။

ဤလူပုလေးများသည် တစ်ယောက်နှင့်တစ်ယောက် နီးကပ်စွာ ရပ်နေကြပြီး အရေအတွက်အားဖြင့် သောင်းနှင့်ချီ ရှိသည်။ သူတို့သည် အချင်းချင်း လေချွန်ရင်း ထိုနေရာကို ဝိုင်းရံထားကြသည်။ စူးရှသော ဆူညံသံများသည် ရွှီဟွေ ပတ်ဝန်းကျင်ရှိ နေရာအတွက် နောက်ခံ အသံတစ်သံသဖွယ် ဖြစ်နေပြီး ထူးဆန်းသည့် လေထုတစ်လွှာအား ဖန်တီးပေးနေသည်။

ရွှီဟွေ၏ အမူအရာက မှောင်မိုက်နေသော်လည်း သူမ မည်သို့မျှ မလုပ်နိုင်မီမှာပင် သူမ ပတ်ဝန်းကျင်ရှိ သဲလူ ဆယ်ကောင်ကျော်သည် သူမဆီသို့ ရောက်နေပြီ ဖြစ်သည်။ သူတို့ ဟိန်းဟောက်လိုက်သည်နှင့် မြေပြင်ပေါ်ရှိ သဲများ အထက်သို့ လွင့်စင်သွားပြီး လေဆင်နှာမောင်း ဆယ်ခုကျော် ဖြစ်ပေါ်လာကာ သူမဆီသို့ လျင်မြန်စွာ ပြေးဝင်လာသည်။

လေဆင်နှာမောင်းများသည် လျင်မြန်ပြီး မျက်စိတစ်မှိတ်အတွင်း ရွှီဟွေကို ဝါးမြိုသွားကြသည်။ ထိုအခိုက်အတန့်တွင် တောင်ကုန်းပေါ်ရှိ ပေထောင်ပေါင်းများစွာ မြင့်မားသော သဲလူကြီးသည် ဘယ်လက်ထဲရှိ လေးကို မြှောက်လိုက်သည်။ သူသည် ညာလက်ဖြင့် လေးကြိုးကို ကိုင်ကာ ဆတ်ခနဲ ဆွဲတင်လိုက်သည်။

သူ့ပတ်ဝန်းကျင်ရှိ သဲများသည် အထက်သို့ ပေါလောပေါ်လာပြီး အတူတကွ စုစည်းသွားကြသည်။ အသက်ရှိုက်စာ အနည်းငယ် အတွင်း လေးပေါ်တွင် သဲမြားတစ်စင်း ဖြစ်ပေါ်လာသည်။

ဝှစ်...

လူကြီးသည် လေးကြိုးကို လွှတ်လိုက်သောကြောင့် ကမ္ဘာကြီးထဲတွင် အသံတစ်သံ ပဲ့တင်ထပ်သွားသည်။ ချက်ချင်းပင် သဲမြားသည် ကောင်းကင်နှင့် မြေကြီးကို တုန်ခါစေသော စူးရှသည့် လေချွန်သံတစ်သံအား ထုတ်လွှတ်လျက် ရွှီဟွေဆီသို့ ပြေးဝင်လာသော ကြယ်တံခွန် တစ်စင်းအဖြစ်သို့ ပြောင်းလဲသွားသည်။

မြားသည် ဟင်းလင်းပြင်ကို ခွဲထုတ်၍ လောင်ကျွမ်းစေပြီး မြားထိပ်ဖျားသည် နတ်ဘုရား ရုပ်တုတစ်ရုပ် အဖြစ်သို့ ပြောင်းလဲသွားသည်။

ထိုနတ်ဘုရားသည် သူ့ရင်ဘတ်ကို လက်နှစ်ဖက်ဖြင့် ယှက်ထားသည့် မျက်လုံးများ မှိတ်ထားပြီး သံချပ်ကာ ဝတ်ဆင်ထားသော အမျိုးသား တစ်ဦး ဖြစ်သည်။ မျက်စိတစ်မှိတ်အတွင်း ရုပ်တုသည် လေဆင်နှာမောင်း ဆယ်ခုကျော်၏ တိုက်ခိုက်ခြင်းကို ခံနေရသော ရွှီဟွေ့ဆီသို့ နီးကပ်လာသည်။

ဝုန်း...

၎င်းတို့အနက် ရှစ်ခုမှာ မီးတောက်များအဖြစ် ပြောင်းလဲသွားသော်လည်း မြား ဝင်ရောက်လာသည်တွင် ကောင်းကင်သို့ ထိုးတက်သွားသော ကျယ်လောင်သည့် ပေါက်ကွဲသံကြီးများအဖြစ် ပြောင်းလဲသွားကြသည်။ ထိုဆူညံသံများကြားတွင် ရွှီဟွေသည် လျင်မြန်စွာ နောက်ဆုတ်သွားသည်။ ပေထောင်ပေါင်းများစွာထိ သူမ နောက်သို့ ရောက်သွားချိန်တွင် သူမ နှုတ်ခမ်းထောင့်များမှ သွေးများ စီးကျလာသည်။ ဖြူရော်နေသော မျက်နှာနှင့်အတူ သူမသည် အဝေးမှ လေးသမားကို စူးရဲစွာ ကြည့်လိုက်သည်။

သူမ ပတ်ဝန်းကျင်ရှိ သာမန်လူတစ်ယောက်၏ အရပ်တစ်ဝက်ခန့်သာရှိသော သဲကမ္ဘာသားများ၏ ပါးစပ်များမှ စိတ်လှုပ်ရှားပြီး ဒေါသတကြီး ဟိန်းဟောက်သံများ ထွက်ပေါ်လာသည်။ ဤလူများအားလုံးမှာ အမျိုးသားများဖြစ်ကြပြီး သူတို့၏ စိတ်လှုပ်ရှားမှု အလယ်တွင် မိတ်လိုက်ချင်နေသည့် သတ္တဝါများကဲ့သို့ ခေါင်းမော့ကာ ဟိန်းဟောက်ကြလေသည်။

ရွှီဟွေ၏ မျက်လုံးများထဲရှိ လူသတ်ချင်သော ရည်ရွယ်ချက်မှာ ပိုမိုပြင်းထန်လာသည်။ လူကြီး ဆယ်ကောင်ကျော် နီးကပ်လာသည်ကို မြင်သောအခါ သူမသည် ရွေ့လျားသွားပြီး အရိပ်အယောင်မကျန်ဘဲ ပျောက်ကွယ်သွားသော်လည်း သူမ ပျောက်ကွယ်သွားသည်တွင် သဲကန္တာရထဲ၌ အခြား ဧရာမ နတ်ဘုရား ရုပ်တုကြီးတစ်ရုပ် ပေါ်လာသည်။ ၎င်းသည် မယုံနိုင်လောက်အောင် ဝေးကွာသော နေရာတစ်နေရာတွင် ဖြစ်သည်။

ထိုရုပ်တုကြီးသည် ပေသိန်းပေါင်းများစွာ မြင့်မားသည်။ သူ့ပုံသဏ္ဌာန်က လေးသမား ပစ်ခတ်လိုက်သည့် မြားပေါ်တွင် ဖြစ်ပေါ်လာသော ရုပ်တုနှင့် အတိအကျ တူညီသည်။

သို့သော်လည်း ၎င်းသည် ပိုမို ခမ်းနားထည်ဝါပြီး ပိုမို၍ ရုပ်လုံးပေါ်သော ပုံစံရှိသည်။ ပေသိန်းချီမြင့်မားသော နတ်ဘုရားရုပ်တုကြီး၏ ထိပ်တွင် သာမန်လူတစ်ယောက်၏ အရပ်တစ်ဝက်ခန့်သာရှိသော အဘိုးအိုတစ်ဦး ရှိနေသည်။ သူသည် သားရဲရေခွံများကို ဝတ်ဆင်ထားပြီး ခန္ဓာကိုယ်က မယုံနိုင်လောက်အောင် ညစ်ပတ်နေသည်။ သို့သော် သူ့မျက်လုံးများတွင် အသိဉာဏ်က တောက်ပနေသည်။ သူ့လက်ထဲတွင် အမည်းရောင် ဦးခေါင်းခွံတစ်လုံးကို ကိုင်ထားသည်။ ၎င်းကို ခေါင်းပေါ်သို့ မြှောက်လိုက်သည်နှင့် သူ ဟိန်းဟောက်လိုက်သည်။

ထိုဟိန်းဟောက်သံတွင် ရှုပ်ထွေးပြီး ကြားရအဆင်မပြေသော၊ နားလည်ရန် ခက်ခဲသော ဘာသာစကားဖြင့် စကားလုံးများ ပါဝင်နေသည်။

သို့တိုင်အောင် ထိုလူ ဟိန်းဟောက်လိုက်ချိန်တွင် သဲကန္တာရတစ်ခုလုံးသည် သူနှင့် ဆက်သွယ်နေသကဲ့သို့ ညည်းတွားလာသည်။ ထိုအခိုက်အတန့်တွင် အဘိုးအို၏ မျက်လုံးများ၌ ကြက်သီးမွေးညင်းထစရာ အကြည့်တစ်ခု တောက်ပသွားပြီး သူ့ညာလက်ကို မြှောက်ကာ အဝေးရှိ ရွှီဟွေဆီသို့ လက်ညှိုးထိုးပြလိုက်သည်။

အဘိုးအို သူမကို လက်ညှိုးထိုးလိုက်သည့် အချိန်သည် သူမ ဟင်းလင်းပြင်ထဲသို့ ပေါင်းစပ်ဝင်ရောက်သွားသည့် အချိန်ပင် ဖြစ်သည်။ သူမ ပျောက်ကွယ်သွားသည့် နေရာတွင် လှိုင်းဂယက်များ ချက်ချင်း ပေါ်လာပြီး သူမသည် အပြင်သို့ အတင်းအကြပ် တွန်းထုတ်ခံလိုက်ရသည်။

သူမ အမူအရာ ပြောင်းလဲသွားသည်။ သူမ အံကြိတ်ကာ နောက်တစ်ကြိမ် လှုပ်ရှားလိုက်သည်။ ဤတစ်ကြိမ်တွင် သူမသည် ဟင်းလင်းပြင်ထဲသို့ ပေါင်းစပ်မသွားဘဲ နေရာရွှေ့ပြောင်းလိုက်သည်။ သို့သော် သူမ ပျောက်ကွယ်သွားသည့် အချိန်တွင် ထိုနေရာကို ဝိုင်းရံထားသော စက်ဝိုင်းပုံစံ အတားအဆီး၏ ဘယ်ဘက်မှ တစ်စုံတစ်ခု ရိုက်ခတ်သွားသည့် အသံတစ်သံ ထွက်ပေါ်လာသည်။

အတားအဆီးပေါ်ရှိ ရာနှင့်ချီသော သဲကမ္ဘာသားများ၏ အမူအရာများမှာ အတူတူပင် ဖြစ်သည်။ သူတို့သည် စိတ်လှုပ်ရှားပြီး ဒေါသတကြီး ဖြစ်နေဆဲဖြစ်ကာ သူတို့ မျက်နှာများပေါ်တွင် ရိုင်းစိုင်းသော အသွင်အပြင်များ ရှိနေဆဲဖြစ်သည်။

ရွှီဟွေသည် သူတို့ရှေ့ရှိ ဟင်းလင်းပြင်ထဲမှ နောက်တစ်ကြိမ် အတင်းအကြပ် တွန်းထုတ်ခံလိုက်ရပြန်သည်။ ဤတစ်ကြိမ်တွင်မူ သူမ နှုတ်ခမ်းထောင့်များမှ သွေးများ ပိုမို စီးကျလာသည်။

သူမ မျက်နှာက ဖြူရော်နေသည်။ ဟင်းလင်းပြင်ထဲသို့ ပေါင်းစပ်ရန် ကြိုးပမ်းမှုက ကျရှုံးခဲ့သလို ထိုနေရာမှ ထွက်ခွာရန် ကြိုးစားချိန်တွင်လည်း ကျရှုံးခဲ့သည်။ သူမ စွမ်းအားထက် ပိုမို အားကောင်းသည့် ချိပ်တံဆိပ်တစ်ခုကို ဤနေရာတွင် ချထားခဲ့ခြင်းဖြစ်သည်။

ဤချိပ်တံဆိပ်ထဲမှ သူမ အပြင်သို့ ထွက်မပြေးနိုင်ပေ။

သူမသည် ပတ်ဝန်းကျင်ရှိ သဲလူ ဆယ်ကောင်ကျော်ကို လျစ်လျူရှုထားနိုင်သော်လည်း မြားတစ်စင်းတည်းနှင့် လေးသမားသည် သူမအား ဒဏ်ရာရအောင် လုပ်နိုင်ခဲ့သည်။ သူမ အမြင်တွင် ဤလူသည် သူမကဲ့သို့ပင် လကပ်ဘေး အဆင့်ရှိ အင်အားကြီး စစ်သည်တော်တစ်ဦး ဖြစ်သည်။

အနည်းငယ် ခက်ခဲသော်ငြား ဤကဲ့သို့ ဝိုင်းရံထားခြင်းကို သူမ ကိုင်တွယ် ဖြေရှင်းနိုင်သေးပေမည့် အခြားတစ်ယောက်သာ ထပ်ပေါ်လာပါက သူမ ထွက်ပြေးရန် ခက်ခဲသွားမည် ဖြစ်သည်။

သူမ တွန်းထုတ်ခံလိုက်ရသည်တွင် စူးရှသော အသံတစ်သံကို ကြားလိုက်ရသည်။ လေးသမားထံမှ ဒုတိယမြောက်မြားသည် ဟင်းလင်းပြင်ကို ဖြတ်သန်းပစ်ခတ်လာပြီး ရွှီဟွေရှေ့တွင် ပေါ်လာသည်။

သူမ အံကြိတ်ကာ နောက်လှည့်လိုက်သည်။ သူမ၏ ဆံပင်များ လေထဲ လွင့်ခါသွားစဉ် ရှေ့တွင် လက်ဟန်တစ်ကွက် ဖော်လိုက်ပြီးနောက် ဝင်ရောက်လာသော မြားဆီသို့ လက်ညှိုးထိုးပြလိုက်သည်။

ကျယ်လောင်သော အသံနှင့်အတူ မြားသည် ကြေမွသွားသော်လည်း ရွှီဟွေသည် သွေးအန်လိုက်ရဆဲဖြစ်သည်။ သူမသည် ယိုင်နဲ့နဲ့ဖြင့် အနောက်သို့ ခြေလှမ်းအနည်းငယ် ဆုတ်လိုက်သော်လည်း သူမ အားနည်းမှုကို မပြသခဲ့ပေ။ ထိုအစား သူမ နောက်တစ်ကြိမ် ပျောက်ကွယ်သွားသည်။

သူမ ပြန်ပေါ်လာသောအခါ လေးသမား ဘေးတွင် ရောက်နေပြီဖြစ်သည်။ သူမ ညာလက်ကိုမြှောက်ကာ ရှေ့သို့ တွန်းထုတ်လိုက်သည်။ သူမ လက်ချောင်းများကို တစ်ချောင်းနှင့် တစ်ချောင်း ခွာလိုက်သောအခါ လက်ချောင်းများထံမှ နီရဲသော ကွင်းသုံးကွင်း ထွက်ပေါ်လာသည်။

ဤကွင်းသုံးကွင်း ပေါ်လာပြီးနောက် ချက်ချင်းပင် ၎င်းတို့သည် အချင်းချင်း ချိတ်ဆက်သွားပြီး လေးသမားဆီသို့ ပြေးဝင်သွားသည်။

လေးကိုင်ထားသောလူ၏ မျက်လုံးများတွင် အရိပ်အယောင်တစ်ခု ပေါ်လာသည်။ သူ မရှောင်တိမ်းဘဲ ခန္ဓာကိုယ်ကို အနည်းငယ် ကိုင်းညွတ်ပြီး မြေကြီးကို ဘယ်လက်ဖြင့် ဖိတွန်းလိုက်သည်။

၎င်းနှင့်အတူ ကျယ်လောင်သော ပေါက်ကွဲသံများ လေထဲသို့ ထွက်ပေါ်လာသည်။ ထိုနေရာရှိ အဆုံးအစမရှိသော သဲများသည် ပတ်ဝန်းကျင်တွင် စုစည်းကာ ကာကွယ်ရေး အတားအဆီးတစ်ခု အဖြစ် ပြောင်းလဲသွားသည်။ ကွင်းသုံးကွင်းက ၎င်းကို ဝင်တိုက်လိုက်သည်နှင့် သဲအတားအဆီးက ကြေမွသွားသော်လည်း တစ်ချိန်တည်း၌ပင် တတိယမြောက်မြားက ပြေးထွက်လာသည်။ ကျယ်လောင်သော လေချွန်သံနှင့်အတူ ၎င်းသည် ရွှီဟွေ၏ မျက်နှာဆီသို့ ပြေးဝင်လာသည်။

သူမ ၎င်းကို ရှောင်တိမ်းရန် ပြင်လိုက်စဉ် အေးစက်သော နှာမှုတ်သံ တစ်သံနှင့်အတူ ရှုပ်ထွေးပြီး နားလည်ရန် ခက်ခဲသော အသံများ လေထဲတွင် ပဲ့တင်ထပ်လာသည်။ ထိုအသံများသည် ဤနေရာနှင့် အလွန်ဝေးကွာသော နေရာတစ်နေရာမှ လာနေခြင်းဖြစ်သည်။

ထိုအသံသည် ရွှီဟွေ့ တိုက်ခိုက်နေသော နေရာမှ မမြင်နိုင်သည့် ပေသိန်းချီမြင့်သော ရုပ်တုပေါ်တွင် ထိုင်နေသည့် အဘိုးအို၏ အသံဖြစ်သည်။ သူသည် ဘယ်ဘက်လက်ကို မြှောက်ကာ ကောင်းကင်ဘက်က လေအား ဆုပ်ကိုင်လိုက်သည်။ ကြမ်းတမ်းသော အပြုံးတစ်ခု သူ့နှုတ်ခမ်းများပေါ်တွင် ပေါ်လာသည်။

ရွှီဟွေက လေထဲတွင် ရှိနေသော်လည်း သူမကိုယ်သူမ မမြင်နိုင်သော လက်တစ်ဖက်မှ ဆုပ်ကိုင်ခံထားရကြောင်း အာရုံခံနိုင်သောကြောင့် သူမ ရှောင်တိမ်းရန် လုံးဝ မဖြစ်နိုင်ပေ။ ထိုလက်မှ လာသော စွမ်းအားသည် နေကပ်ဘေး အဆင့်က မိစ္ဆာအိုကြီးများ ပိုင်ဆိုင်သော စွမ်းအားဖြစ်ပြီး ၎င်းက သူမကို ချေမွပစ်ချင်နေပုံရသည်။

သူမ ရှောင်တိမ်းနိုင်ခြင်း မရှိဘဲ မြားသည် ကျယ်လောင်သော အသံနှင့်အတူ ရောက်ရှိလာသည်။ ရွှီဟွေ သွေးအန်လိုက်ရသော်လည်း သူမခန္ဓာကိုယ်သည် လှုပ်ရှားနိုင်စွမ်း ပြန်လည်ရရှိသွားသည်။ သူမ ဆက်လက် နောက်ဆုတ်သွားစဉ် သူမ ဝတ်ရုံများ စုတ်ပြဲသွားပြီး ညာဘက်ပခုံးမှာ သွေးသံရဲရဲ ဖြစ်သွားသည်။

သို့တိုင်အောင် သူမ အရှုံးပေးရန် မရွေးချယ်ခဲ့ပေ။ နောက်ဆုတ်နေစဉ် သူမ ဘယ်လက်ကို မြှောက်ကာ သူမခန္ဓာကိုယ်ပေါ်ရှိ နေရာအနည်းငယ်အား ရိုက်နှက်လိုက်သည်။ ရုပ်ပုံလွှာ ဆယ့်ခုနစ်ခု သူမ ပတ်ဝန်းကျင်တွင် ချက်ချင်း ပေါ်လာသည်။

"ဖီးနစ်ရေကန်ပေါ်က တိုက်ခိုက်ချက် ဆယ့်ရှစ်ချက်" ရွှီဟွေ့သည် ဩရှရှအသံဖြင့် အော်ပြောလိုက်ရာ သူမ ပတ်ဝန်းကျင်ရှိ ရုပ်ပုံလွှာအားလုံးသည် လေထဲတွင် ရှိနေသော သူမ ခန္ဓာကိုယ်ပေါ်သို့ ချက်ချင်း စုစည်းသွားကြသည်။ အတူတကွ ပေါင်းစည်းပြီးနောက် လခြမ်းပုံသဏ္ဌာန်သို့ ပြောင်းလဲသွားသည်။

လကပ်ဘေး အဆင့်၏ စွမ်းအားသည် သူမ ခန္ဓာကိုယ်မှ ပေါက်ကွဲထွက်ပေါ်လာပြီး လခြမ်းဆီမှ မီးပင်လယ်တစ်စင်း ပေါက်ကွဲထွက်လာကာ ၎င်းသည် ဖီးနစ်ငှက်တစ်ကောင်အဖြစ် ပြောင်းလဲသွားသကဲ့သို့ပင်။ ၎င်းသည် လေးသမားဆီသို့ ပြေးဝင်သွားပြီး လျင်မြန်လွန်းသဖြင့် မျက်စိတစ်မှိတ်အတွင်း ပစ်မှတ်ဆီသို့ နီးကပ်သွားသည်။

လေးသမား၏ အမူအရာ ပြောင်းလဲသွားသည်။ သူသည် လေးကို ဆွဲတင်ရင်း ချက်ချင်း နောက်ဆုတ်သွားသည်။ မြားသုံးစင်း ဖြစ်ပေါ်လာပြီး တစ်ချိန်တည်းမှာပင် သူ ပစ်ခတ်လိုက်သည်။

ဤအရာအားလုံးသည် တစ်ဆက်တည်း လျင်မြန်စွာ ဖြစ်ပျက်သွားသည်။ မျက်စိတစ်မှိတ်အတွင်း နှစ်ဖက်စလုံး အချင်းချင်း ဝင်တိုက်မိကြပြီး စွမ်းအားကြီးမား၍ စူးရှသော အလင်းတန်း တစ်တန်း ပေါက်ကွဲထွက်လာသည်။ ၎င်းက ထိုနေရာရှိ လူအားလုံးကို မည်သည့်အရာကိုမျှ မမြင်နိုင်အောင် တားဆီးထားသည်။

ထိုအခိုက်အတန့်တွင် စုမင်သည် သူ့အမြင့်ဆုံး အရှိန်ဖြင့် ခရီးနှင်နေစဉ် သဲကန္တာရထဲရှိ ထိုနေရာနှင့် သိပ်မဝေးလှသော နေရာတစ်နေရာတွင် ရှိနေသည်။ သူသည် ကြက်သွေးရောင် မီးလျှံ ဂြိုဟ်သခင်ကိုပင် သူတို့အား နေရာရွှေ့ပြောင်းပေးရန် တောင်းဆိုခဲ့သည်။ သူ ရံဖန်ရံခါ ပျောက်ကွယ်သွားသောအခါ မူလနေရာနှင့် အလွန်ဝေးကွာသော နေရာတွင် ပြန်ပေါ်လာတတ်သည်။

သူ ရှေ့သို့ ပြေးဝင်သွားစဉ် အမူအရာက မှောင်မိုက်နေသည်။ ပိတ်မိနေသောသူသည် သူထင်ထားသောသူသာ မဟုတ်ခဲ့လျှင် သူက သူမကို လျစ်လျူရှုထားမည်ဖြစ်သော်လည်း သူမသည်သာ သူယုံကြည်ထားသူ ဖြစ်နေခဲ့လျှင် စုမင်အနေဖြင့် သူ့နောက်သို့ တိတ်တဆိတ် လိုက်လာခဲ့သော ရွှီဟွေအား ကယ်တင်ရမည်သာ ဖြစ်သည်။

မည်သို့ဆိုစေ သူမက သူ့ကို ကာကွယ်ရန် ဤနေရာသို့ လာခဲ့ခြင်းဖြစ်ပြီး သူသည် တာအိုခုန်း မဟုတ်သည့်အတွက် သူ့ဗီဇသည် တာအိုခုံး၏ ဗီဇ မဟုတ်ပေ။ ထို့ကြောင့် သူ သူမကို ကယ်တင်ရမည် ဖြစ်သည်။

သူသည် အလွန်လျင်မြန်စွာ သွားလာနေသဖြင့် သူလှုပ်နှိုးလိုက်သော လေနှင့်အတူ သဲများကိုပါ လွင့်စင်သွားစေသည်။ ရွှီဟွေ ပိတ်မိနေသော နေရာသို့ သူ ပိုမိုနီးကပ်လာသည်နှင့်အမျှ ကျယ်လောင်သော ပေါက်ကွဲသံကြီးများ လေထဲတွင် ပဲ့တင်ထပ်နေသည်။

အခန်း ၉၂၆ သူမ၏ အမည်ခံ ခင်ပွန်း

'နာလိုက်တာ...'

ထိုအသိသည် သူမ ခန္ဓာကိုယ် လွင့်စင်သွားသည့် အချိန်တွင် ရွှီဟွေ့၏ အဓိက အတွေးဖြစ်သည်။ သူမ မြေကြီးပေါ်သို့ ပြုတ်ကျသွားသောအခါ မတ်တပ်ရပ်နိုင်ရန် အတင်းကြိုးစားပြီး မလဲကျအောင် ထိန်းထားလိုက်သည်။ သို့သော် သူမ မျက်နှာက ဖြူရော်နေပြီး သွေးအမြောက်အမြား အန်ထုတ်လိုက်ရသည်။ သူမ ခန္ဓာကိုယ်တွင် ဒဏ်ရာများ ပြည့်နေပြီး သွေးတရဲရဲဖြစ်နေကာ အချိန်အကြာကြီး မတ်တပ် ရပ်နိုင်တော့မည် မဟုတ်သည့် အသွင်ပေါ်နေသည်။

သူမ တတ်နိုင်သမျှ အကောင်းဆုံး ကြိုးစားခဲ့ပြီး ဖြစ်သည်။ လေးသမား၏ ကျင့်ကြံခြင်း အဆင့်သည် သူမနှင့် အတူတူရှိသောကြောင့် ဖီးနစ်ရေကန် သိုင်းပညာကို အသုံးပြုရန် သူမအား ဖိအားပေးခဲ့သည်။ သူမသည် ဤသိုင်းပညာကို ကျွမ်းကျင်စွာ မတတ်မြောက်သေးဘဲ ၎င်းအား အသုံးပြုတိုင်း ပြင်းထန်သော နောက်ဆက်တွဲ ဆိုးကျိုးများကို ခံစားရမည် ဖြစ်သည်။

သို့တိုင် ထိုသိုင်းပညာမှ စွမ်းအားသည် သာမန်အရာတစ်ခု လုံးဝ မဟုတ်ပေ။ ထိုသူ၏ လက်ထဲမှ လေးသည် အဝေးသို့ လွင့်စင်သွားပြီဖြစ်သည်။ သူ၏ ညာဘက် လက်မောင်းက ပြတ်ထွက်သွားပြီး ရင်ဘတ်တွင် ခန္ဓာကိုယ်ကို ဖောက်ထွင်းသွားသော ဒဏ်ရာဆယ့်ခုနစ်ချက် ပေါ်လာသည်။

သူ့မျက်နှာက ဖြူရော်နေသည်။ သူလည်း သွေးအန်လိုက်ရပြီး ပေထောင်ပေါင်းများစွာ မြင့်မားသော ခန္ဓာကိုယ်သည် လျင်မြန်စွာ ကျုံ့ဝင်လာသည်။ ပေတစ်ရာခန့် အမြင့်ရောက်မှသာ သူ၏ ဒဏ်ရာများကို ထိန်းချုပ်နိုင်ခဲ့သည်။ သူသည် ရွှီဟွေကို စူးရဲစွာ ကြည့်ကာ တိုးညှင်းသော ဟိန်းဟောက်သံ တစ်သံ ထုတ်လွှတ်လိုက်သည်။

သူ ထိုသို့ပြုလုပ်လိုက်သည်နှင့် သွေးများ ဆက်မထွက်စေရန် ပတ်ဝန်းကျင်ရှိ သဲများက စုစည်းလာသည်။ သူ့ညာဘက် လက်မောင်း နေရာတွင်လည်း သဲများ စုစည်းလာပြီး လက်အသစ် တစ်ဖက်ကို ဖန်တီးလိုက်သည်။ သူ့လက် ပေါ်လာသည်နှင့် သူသည် လေးရှိရာဘက်သို့ လေကို ဆုပ်ကိုင်လိုက်ရာ လေးသည် သူ့ဆီသို့ လျင်မြန်စွာ ပြန်ရောက်လာသည်။ သူ့ခန္ဓာကိုယ်ပေါ်တွင် သဲများ ဆက်လက် စုစည်းလာသည်နှင့်အမျှ သူသည် ပေထောင်ပေါင်းများစွာ ထပ်မံ မြင့်မားလာသည်။

သူသည် ယခင်က တစ်ခါမှ ဒဏ်ရာမရခဲ့ဖူးသည့်အလား ထိုနေရာတွင် ရပ်နေသည်။ သဲများသည် လတစ်စင်းကို ဖန်တီးရန်အတွက် သူ့ခေါင်းပေါ်တွင်လည်း စုစည်းသွားကြသည်။

ထိုသည်က သဲများဖြင့် ဖွဲ့စည်းထားသော လတစ်စင်းဖြစ်သည်။

ရွှီဟွေ၏ မျက်လုံးထဲတွင် ပထမဆုံးအကြိမ်အဖြစ် မျှော်လင့်ချက်မဲ့သည့် အရိပ်အယောင် ပေါ်လာသည်။ သူမ ယိုင်နဲ့နဲ့ဖြင့် နောက်ဆုတ်သွားသော်လည်း နောက်သို့ ဆုတ်လိုက်စဉ်တွင်ပင် ရုတ်တရက် ကျောကို ကွေးလိုက်မိပြီး သူမ ခန္ဓာကိုယ်သည် မြေကြီးပေါ်သို့ ပစ်ချခံလိုက်ရသည်။ သူမသည် မြေကြီးပေါ်သို့ ကျယ်လောင်သော အသံနှင့်အတူ ပြုတ်ကျသွားသည်။

ရွှီဟွေ ယခင်က ရပ်နေခဲ့သည့် နေရာတွင် တစ်ပိုင်းပွင့်လင်းနေသည့် အရပ်ပုပုလူတစ်ဦး ပေါ်လာပြီး သူ ပစ်သွင်းလိုက်သော လက်သီးကို ပြန်ရုပ်သိမ်းလိုက်သည်။ ထိုလူပု၏ ပုံရိပ်က မှုန်ဝါးနေသော်လည်း သူ့ကို မြင်သူတိုင်း သူသည် အဘိုးအိုတစ်ဦးဖြစ်ကြောင်း သိနိုင်သည်။ သူသည် အဝေးရှိ ပေသိန်းချီမြင့်သော ရုပ်တုပေါ်တွင် ရုပ်လုံးပေါ်နေသည့် အဘိုးအိုပင် ဖြစ်သည်။

သူ၏ လက်ရှိ တည်ရှိမှုသည် နတ်ဘုရားစွမ်းရည်ဖြင့် ဖန်တီးထားသော ပုံရိပ်ယောင် ခန္ဓာကိုယ် တစ်ကိုယ်သာ ဖြစ်သည်။

ထိုအဘိုးအိုက အရပ်ပုကောင်း ပုနိုင်သော်လည်း သူပေါ်လာသည့် အချိန်တွင် ပေထောင်ပေါင်းများစွာ မြင့်သော လေးသမားသည် သူ့ကို အရိုအသေပေးရန် ချက်ချင်း ဒူးထောက်လိုက်သည်။ ထိုနေရာရှိ ပေသောင်းချီမြင့်သော သဲလူရာမကြီးများသည်လည်း ဒူးထောက်၍ အရိုအသေပေးကြသည်။

စက်ဝိုင်းပုံစံ အတားအဆီးပေါ်ရှိ သောင်းနှင့်ချီသော သဲကမ္ဘာသားများသည်လည်း စိတ်လှုပ်ရှားခြင်း၊ ရွှင်လန်းခြင်းနှင့် ပြင်းထန်သော သွေးရူးခြင်းများဖြင့် အတားအဆီးပေါ်တွင် ဝပ်တွားခယကြသည်။

ရွှီဟွေ့သည် မြေကြီးပေါ်မှ ထရန် ရုန်းကန်လိုက်သော်လည်း သူမ မည်သို့မျှ မလုပ်နိုင်မီ ပတ်ဝန်းကျင်ရှိ သဲများ နီးကပ်လာပြီး သူမ ခြေလက်များအား ချည်နှောင်ထားသည့် သံကြိုးလေးချောင်း အဖြစ်သို့ ပြောင်းလဲသွားသည်။ သူတို့က သူမကို မြှောက်တင်ပြီး လေထဲတွင် တွဲလွဲဆွဲထားလိုက်သည်။

ပုံရိပ်ယောင် ခန္ဓာကိုယ်ဖြင့် အဘိုးအိုသည် သူ့ညာလက်ကို မြှောက်လိုက်ရာ လက်ထဲတွင် သဲဓားတစ်လက် ပေါ်လာသည်။ သူ ထိုဓားကို ကိုင်ကာ ရွှီဟွေဆီသို့ ဖြည်းညှင်းစွာ လျှောက်သွားသည်။ သူ ထိုသို့လုပ်လိုက်သောအခါ ပတ်ဝန်းကျင်ရှိ သဲကမ္ဘာသားများ၏ ဝမ်းသာအားရ အော်ဟစ်သံများ ပိုမိုကျယ်လောင်လာသည်။ ရိုးရာဓလေ့ တစ်ခု၏ စကားလုံးများကို ရွတ်ဆိုနေသကဲ့သို့ အသံများ နိမ့်ချည်မြင့်ချည် ထွက်ပေါ်လာသည်။

ရွှီဟွေ သူမအောက်နှုတ်ခမ်းကို ကိုက်လိုက်သည်။ အဘိုးအို၏ လက်သီးချက်ကြောင့် သူမ၏ ကျင့်ကြံခြင်း အခြေခံသည် လုံးဝ ပြိုကွဲသွားခဲ့ပြီ ဖြစ်သည်။ သူမ ကိုယ့်ကိုယ်ကိုယ် မဖျက်ဆီးနိုင်စေရန် သူမကိုယ်တွင်း၌ ချိပ်တံဆိပ် တစ်ခုကိုလည်း ထည့်သွင်းထားပြီး ဖြစ်သည်။

သူမ ကောင်းကင်သို့ တိတ်ဆိတ်စွာ ကြည့်လိုက်ရာ အတိတ်မှ ပုံရိပ်များသည် မျက်စိရှေ့တွင် ဖြတ်ပြေးသွားသည်။ သူမသည် သာမန်မိသားစု တစ်စုတွင် မွေးဖွားခဲ့သော်လည်း ငယ်စဉ်ကတည်းက ဖီးနစ်ဂိုဏ်း၏ ခေါ်ဆောင်ခြင်းကို ခံခဲ့ရသည်။ ထို့ကြောင့် သူမ မိဘများ၏ ရုပ်သွင်က မှုန်ဝါးနေပြီး သူမ သူတို့ကို ရှင်းလင်းစွာ မမှတ်မိတော့ပေ။

သူမသည် သူမ ဇာတိမြေသို့ တစ်ခေါက် ပြန်သွားခဲ့ဖူးသော်လည်း ထိုနေရာသည် အချိန်ကြာလာသည်နှင့်အမျှ ဖုန်မှုန့်များအဖြစ် ပြောင်းလဲသွားခဲ့ပြီဖြစ်သည်။ သူမ၏ မိသားစုသည် အိုမင်းရင့်ရော်ကာ ကွယ်လွန်သွားခဲ့သည်ကား ကြာပြီဖြစ်ပြီး သူတို့၏ အရိပ်အယောင် အားလုံးသည်လည်း ပျောက်ကွယ်သွားခဲ့သည်ကား ကြာပြီ ဖြစ်သည်။

သို့သော် ဤအခိုက်အတန့်တွင် သူမ မျက်စိရှေ့ရှိ ပုံရိပ်များ ရုတ်တရက် ပိုမို ရှင်းလင်းလာသည်။ သူမ မိဘများနှင့် မိသားစုကို မြင်လိုက်ရသည်...

ထိုပုံရိပ်များသည် တစ်ရိပ်ပြီးတစ်ရိပ် ဆက်လက် ပေါ်လာကာ ရွှီဟွေ့၏ နှုတ်ခမ်းများပေါ်တွင် နူးညံ့သော အပြုံးတစ်ပွင့် ပွင့်အာလာသည်။ သူမ မျက်လုံးများကို တဖြည်းဖြည်း မှိတ်လိုက်သည်။

'ဒါက ငါ့ဘဝပဲ။ ဖီးနစ်ဂိုဏ်းရဲ့ တပည့်တစ်ယောက် ဖြစ်လာကတည်းက ငါ့ကံကြမ္မာက ကျောက်စာရေးထွင်းထားသလို ပုံသေ သတ်မှတ်ထားပြီးပြီ။ နံနက်ခင်း တာအိုဂိုဏ်းရဲ့ တိုက်ရိုက်မျိုးဆက် တစ်ယောက်အတွက် ငါ့ဘဝတစ်လျှောက်လုံး အသက်ရှင်နေရမယ်လေ'

'ဒါက ငါ့ဘဝပါပဲ။ ဒါပေမယ့် အခုတော့ ငါ ဒီကနေ လွတ်မြောက်သွားပြီလို့ သတ်မှတ်လို့ရပြီ' ရွှီဟွေ့သည် စိတ်ထဲတွင် တိုးညှင်းစွာ သက်ပြင်းချလိုက်သည်။

သူမ မျက်လုံးများ မှိတ်ကာ သေရမည့် အချိန်ကို စောင့်နေစဉ် အတားအဆီး အပြင်ဘက်မှ ကျယ်လောင်သော ဆူညံသံတစ်သံ ထွက်ပေါ်လာသည်။ ၎င်းနှင့်အတူ သောင်းနှင့်ချီသော သဲကမ္ဘာသားများ၏ အထိတ်တလန့် အော်ဟစ်သံများပါ လိုက်ပါလာသည်။

သဲလူ ဆယ်ကောင်ကျော်ထံမှ ဒေါသတကြီး ဟိန်းဟောက်သံများနှင့် ပုံရိပ်ယောင် အဘိုးအိုထံမှ အေးစက်သော နှာမှုတ်သံ တစ်သံလည်း ပါဝင်သည်။

ဤအရာအားလုံးကြောင့် မျှော်လင့်ချက်မဲ့နေသော ရွှီဟွေသည် သူမ မျက်လုံးများကို ဖွင့်ရန် ကြိုးစားလိုက်ရာ သူမ မျက်တောင်များ တုန်ခါသွားသည်။ သို့သော် သူမ ခန္ဓာကိုယ်က အားအင်ကုန်ခမ်းနေသဖြင့် မျက်လုံးဖွင့်ရန် ခွန်အားပင် မရှိတော့ပေ။

သူမ အနည်းငယ်မျှသာ ဖွင့်နိုင်ပြီး မျက်တောင်များနှင့် မှုန်ဝါးဝါး မြင်ကွင်းများကြားမှ အတားအဆီး အပြင်ဘက် အဝေးတွင် ရပ်ကာ အတားအဆီးအား လက်သီးဖြင့် ထိုးနေသော ရင်းနှီးသည့် ပုံရိပ်တစ်ခုကို မြင်လိုက်ရသည်။

'သူပဲ...' ရွှီဟွေ စိတ်ထဲတွင် ရေရွတ်လိုက်သည်။ 'သူ မလာသင့်ဘူး။ သူ့ရဲ့ ဗီဇအရ သူက အရာအားလုံးကို သူ့ရဲ့ ကိုယ်ကျိုးစီးပွားနဲ့ပဲ စဉ်းစားသင့်တာ'

'ဒါဆို သူဘာလို့ ဒီကို ရောက်နေတာလဲ'

'မျက်ရည်လှိုင်းတွေ ငါတို့ကို တိုက်ခိုက်တုန်းက သူပြန်လာခဲ့တယ်။ အခုလည်း သူပြန်လာပြန်ပြီ။ သူက တကယ်ပဲ တာအိုခုန်းလား။ လူတစ်ယောက်က တကယ်ပဲ ဒီလောက် မြန်မြန် ပြောင်းလဲသွားနိုင်လား။ ဒါပေမယ့် နင် ဘယ်သူပဲဖြစ်ဖြစ် နင်က တာအိုခုန်းပဲဖြစ်ဖြစ် အခြားသူပဲဖြစ်ဖြစ် ကျေးဇူးတင်ပါတယ်'

ရွှီဟွေ၏ စိတ်က တည်ငြိမ်နေသည်။ သူမ စိတ်ထဲတွင် ရေရွတ်လိုက်သော်လည်း ၎င်းသည် သူမ၏ ဝိညာဉ်သာ ကြားနိုင်သော စကားလုံးများကို ရေရွတ်နေခြင်း ဖြစ်သည်။

စုမင်သည် အတားအဆီးကို လက်သီးဖြင့် ထပ်မံ ထိုးလိုက်ရာ ပြင်းထန်သော အသံများ အရပ်မျက်နှာ အားလုံးသို့ ပဲ့တင်ထပ်သွားသည်။ အတားအဆီးမှ စွမ်းအားကြီးမားသော တန်ပြန်အားတစ်ခု ထွက်ပေါ်လာပြီး စုမင်ကို နောက်သို့ ခြေလှမ်း အနည်းငယ် ယိုင်သွားစေသည်။

သူ ခေါင်းမော့လိုက်သောအခါ သဲသံကြိုးများဖြင့် ခြေလက်များ ချည်နှောင်ခံထားရသော အထဲရှိ ရွှီဟွေကို မြင်လိုက်ရသည်။ သူမ၏ မျက်လုံးများက မှိတ်ကျနေပြီး အသက်ရှူသံက သီသီလေးသာ ကျန်တော့ကြောင်း သူ မြင်တွေ့ရသည်။

တစ်ချိန်တည်းတွင်ပင် သဲကမ္ဘာသားများနှင့် မကောင်းဆိုးဝါး သဲမိစ္ဆာ ဆယ်ကောင်ကျော်တို့အပြင် ပေထောင်ပေါင်းများစွာ မြင့်သည့် လေးသမားနှင့် ပုံရိပ်ယောင် အဘိုးအိုတို့ကို သူ မြင်လိုက်ရသည်။

လေးသမားထံမှ လကပ်ဘေး အဆင့်၏ ကြီးမားသော ဖိအား၊ ပုံရိပ်ယောင် အဘိုးအိုထံမှ နေကပ်ဘေး အဆင့်၏ စွမ်းအားနှင့် ကမ္ဘာမြေပြင် နယ်ပယ် နှောင်းပိုင်းအဆင့် စွမ်းအားရှိသည့် သဲလူ ဆယ်ကောင်ကျော်တို့ကြောင့် စုမင်၏ သူငယ်အိမ်များ ကျုံ့သွားသည်။

၎င်းသည် သူ၏ လက်ရှိ စွမ်းအားဖြင့် ရင်ဆိုင်နိုင်သော အရာမဟုတ်ပေ။ သဲလူ ဆယ်ကောင်ကျော်ကို ကိုင်တွယ်နိုင်သေးသော်လည်း လေးသမား တစ်ယောက်တည်းကပင် စုမင်အတွက် ကြီးမားသော ခြိမ်းခြောက်မှု ဖြစ်နေပြီ ဖြစ်သည်။ ပုံရိပ်ယောင် အဘိုးအိုကိုမူ ဆိုဖွယ်ရာ မရှိတော့ပေ။

စုမင် တည်ငြိမ်နေဆဲဖြစ်သည်။ သူ နောက်ဆုတ်သွားသောအခါ အတားအဆီးထဲရှိ သဲလူ ဆယ်ကောင်ကျော်သည် ဟိန်းဟောက်ကာ ခြေလှမ်းကျဲကြီးများဖြင့် ရှေ့သို့ တိုးလာကြသည်။ သူတို့ ခန္ဓာကိုယ်များသည် အတားအဆီးကို ဖောက်ထွက်လာနိုင်ပြီး သူတို့သည် စုမင်ဆီသို့ ပြေးဝင်လာကြသည်။

လေးသမားကမူ မျက်နှာပေါ်တွင် လှောင်ပြောင်သော အမူအရာတစ်ခု ပေါ်လာသည်။ သူ့အမြင်တွင် ကမ္ဘာမြေပြင် နယ်ပယ်တွင်သာ ရှိနေသော စုမင်သည် သူ လေးကို အသုံးပြုရန် အရည်အချင်းပင် မပြည့်မီပေ။ အမှန်တွင် သူသည် မြားတစ်စင်းတည်းဖြင့် စုမင်ကို ပြာကျသွားအောင် လုပ်နိုင်သည်ဟု ယုံကြည်ထားသည်။

စုမင် စိတ်ထဲတွင် သက်ပြင်းချလိုက်သည်။ ရွှီဟွေ၏ အသက်သည် သီသီလေးသာ ကျန်တော့ပြီး စက္ကန့်တိုင်းတွင် သူမ အသက်သည် အန္တရာယ် ပိုများလာသည်။ သူမကို မကယ်တင်ရန် ရွေးချယ်ခြင်းမှလွဲ၍ သူ စဉ်းစားနေရန် အချိန်မရှိတော့ပေ။ သို့သော် သူသည် ဤအနည်းငယ် မိုက်မဲသော ကောင်မလေးကို ကယ်တင်ရန် ဆုံးဖြတ်ခဲ့ပြီးဖြစ်သောကြောင့် သူ့စွမ်းအားများ ပေါ်လွင်သွားခြင်းကား သူ့အတွေးထဲတွင် မရှိတော့ပေ။

"ထားလိုက်တော့"

စုမင်သည် ခေါင်းယမ်းကာ ရှေ့သို့ တစ်လှမ်း တိုးလိုက်သည်။ ထိုသို့ လုပ်လိုက်သည်တွင် သူ၏ ခန္ဓာကိုယ်ထဲ၌ နတ်ဘုရား အနှစ်သာရ စွမ်းအားသည် လျင်မြန်စွာ မြင့်တက်လာသည်။ ဂုန်နီအိတ်အဖြစ် ပြောင်းလဲသွားသည့် ကြယ်တာရာ ဝတ်ရုံပေါ်တွင် မရေမတွက်နိုင်သော မညီညာသည့် မှော်သင်္ကေတများ ပေါ်လာသည်။ ထိုအချိန်တွင် သူ့စွမ်းအားက စတင် မြင့်တက်လာသည်။

သူက အလွန် လျင်မြန်သဖြင့် မျက်စိတစ်မှိတ်အတွင်း သဲလူတစ်ကောင်နှင့် ဝင်တိုက်လုနီးပါး ဖြစ်သွားသည်။ ထိုသဲလူသည် ကြမ်းတမ်းစွာ ရယ်မောလျက် ရှေ့သို့ လက်သီးတစ်ချက် ပစ်သွင်းလိုက်သော်လည်း စုမင်သည် ၎င်းကို တစ်ချက်မျှပင် မကြည့်ခဲ့ပေ။ အမှန်တွင် သူသည် ရှောင်တိမ်းရန်ပင် အချိန်မဖြုန်းခဲ့ပေ။ သူက ရှေ့သို့သာ ပြေးဝင်သွားသည်။

ကျယ်လောင်သော အသံနှင့်အတူ စုမင်သည် သဲလူနှင့် ဝင်တိုက်မိသွားသည်။ သူတို့ အချင်းချင်း ထိတွေ့သွားသည့် အချိန်တွင် မကောင်းဆိုးဝါး မိစ္ဆာ၏ ကြမ်းတမ်းသော အပြုံးသည် မယုံကြည်နိုင်ခြင်းအဖြစ် ပြောင်းလဲသွားပြီး သူ့ညာဘက် လက်မောင်းက ကျယ်လောင်သော အသံနှင့်အတူ ကြေမွသွားသည်။ စုမင်သည် လူကြီး၏ ခန္ဓာကိုယ်ကို ဖောက်ထွက်ပြီး လုံးဝ ဒဏ်ရာမရခဲ့ပေ။ ထို့နောက် ညာလက်ကို မြှောက်ကာ အနောက်သို့ လက်သီးတစ်ချက် ပစ်သွင်းလိုက်သည်။

ထိုလက်သီးတစ်ချက်ဖြင့် သဲလူကြီး၏ ခန္ဓာကိုယ်က တုန်ခါပြီး အပိုင်းပိုင်း ကြေမွသွားသည်။

"အားနည်းလိုက်တာ"

စုမင် ခြေမြှောက်ကာ ဒုတိယ ခြေလှမ်းကို လှမ်းလိုက်သည်။ ထိုအချိန်တွင် သူ၏ ကျင့်ကြံခြင်း အဆင့်သည် ကမ္ဘာမြေပြင် နယ်ပယ် နှောင်းပိုင်းအဆင့်သို့ ရောက်ရှိနေပြီဖြစ်သည်။ ထိုသည်ကား သူ၏ ရုပ်ပိုင်းဆိုင်ရာ စွမ်းအားနှင့် ကျင့်ကြံခြင်း အခြေခံတို့ကြား ပေါင်းစပ်မှုကြောင့် ဖြစ်ကာ ၎င်းတို့ အချင်းချင်း ပေါင်းစပ်သွားပြီးနောက် သူ့ထံမှ ပေါက်ကွဲထွက်လာသော စွမ်းအားဖြစ်သည်။

သူ့ရှေ့ရှိ သဲလူ နှစ်ကောင်သည် ဟိန်းဟောက်ရင်း လေဆင်နှာမောင်းများ ဖန်တီးလိုက်ကြသည်။ ထိုလေဆင်နှာမောင်းများသည် သူတို့ ခန္ဓာကိုယ်များကို လွှမ်းခြုံသွားပြီး ပြေးဝင်လာသော စုမင်ဆီသို့ ချက်ချင်း နီးကပ်လာသည်။ သူတို့သည် မျက်စိတစ်မှိတ်အတွင်းမှာပင် အချင်းချင်း ဝင်တိုက်မိသွားကြသည်။

ဖုန်း... ဖုန်း...

ကောင်းကင်နှင့် မြေကြီးကို တုန်ခါစေသော ကျယ်လောင်သည့် ပေါက်ကွဲသံကြီး နှစ်သံ ထွက်ပေါ်လာပြီး လှမ်းကြည့်လိုက်သော သဲကမ္ဘာသားများအားလုံးကို တုန်လှုပ်သွားစေသည်။ သူတို့၏ မျက်စိရှေ့၌ပင် သဲလူ နှစ်ကောင်သည် တုန်ခါပြီး သူတို့ မခံနိုင်သော စွမ်းအားတစ်ခုက သူတို့ ဖြစ်တည်မှု တစ်ခုလုံးအား ချေမှုန်းလိုက်သကဲ့သို့ အတူတကွ ပြိုကွဲသွားကြသည်။

စုမင်သည် လှုပ်ရှားမှုကို မရပ်တန့်ဘဲ တတိယ ခြေလှမ်းအား လှမ်းလိုက်သည်။ ထိုအခိုက်အတန့်တွင် သူ၏ မြင့်တက်လာသော စွမ်းအားသည် နတ်ဘုရား အနှစ်သာရနှင့် ပေါင်းစပ်သွားပြီး ကမ္ဘာမြေပြင် နယ်ပယ် နှောင်းပိုင်းအဆင့် ပြည့်စုံခြင်းနှင့် ညီမျှသော စွမ်းအားကို ရရှိခဲ့သည်။ နောက်ထပ် ခြေတစ်လှမ်းတွင် သူသည် လကပ်ဘေး အဆင့်သို့ ဝင်ရောက်နိုင်မည် ဖြစ်သည်။

ထိုသည်က စုမင်၏ လက်ရှိ အကန့်အသတ်ဖြစ်ပြီး သူ စုစည်းနိုင်သမျှထဲတွင် အပြင်းထန်ဆုံး စွမ်းအားလည်း ဖြစ်သည်။ သို့သော် ထိုသည်က အိစန်း ကိုယ်ပွားကို အသုံးမပြုလျှင်သာ ဖြစ်သည်။

နောက်တစ်ကြိမ် အသက်ရှူလိုက်သည့်အခါ စုမင်သည် စတုတ္ထ ခြေလှမ်းကို လှမ်းလိုက်သည်။ သဲလူ လေးကောင် သူ့ရှေ့တွင် ပေါ်လာချိန်၌ သူသာ ကြားနိုင်သော စကားတစ်ခွန်း နှုတ်ခမ်းမှ ထွက်ပေါ်လာသည်။

"အိစန်း"

သူ ထိုသို့ ပြောလိုက်သည်တွင် အနောက်ငွေ့ရည်တိမ်တိုက် သီးခြားနယ်မြေ ဖြစ်သည့် နတ်ဘုရား အနှစ်သာရ ကြယ်ပင်လယ်နှင့် အလွန်ဝေးကွာပြီး ၎င်းတို့ကြားတွင် မင်နက်ဂြိုဟ် တည်ရှိသော၊ မဟာလောကကြီး လေးခု လက်အောက်ရှိ နဂါးငွေ့တန်း တစ်ခု ဖြစ်သော ထိုနေရာတွင် စုမင်၏ အိစန် ကိုယ်ပွားသည် ခရမ်းရောင် နဂါးငွေ့တန်း အတွင်း၌ မျက်လုံးများကို ဖွင့်လိုက်သည်။

သူ့မျက်လုံးများတွင် ခရမ်းရောင် အလင်းတစ်စ ရှိနေပြီး ပြိုင်ဘက်ကင်းကာ ကြီးမားသော ဖိအားတစ်ခုသည် ခန္ဓာကိုယ်မှ ကျယ်လောင်သည့် အသံနှင့်အတူ ပေါက်ကွဲထွက်လာသည်။

သဲကန္တာရထဲရှိ စုမင်သည် သဲလူ လေးကောင်နှင့် ဝင်တိုက်မိသည့် အချိန်တွင် သူ့ကျင့်ကြံခြင်း အဆင့်သည် နောက်တစ်ကြိမ် မြင့်တက်လာပြီး လျှပ်တစ်ပြက် အတွင်းပင် လကပ်ဘေး အဆင့်သို့ ရောက်ရှိသွားသည်။

ထိုသည်က သူ လကပ်ဘေး အဆင့်သို့ တကယ် ရောက်ရှိသွားသည်ဟု မဆိုလိုပေ။ အဘယ်ကြောင့်ဆိုသော် သူ့ခန္ဓာကိုယ် ပတ်လည်တွင် လတစ်စင်းမျှ မရှိသောကြောင့် ဖြစ်သည်။ သို့သော် ထိုအချိန်တွင် သူ့ခန္ဓာကိုယ်မှ ထွက်ပေါ်လာသော အငွေ့အသက်က သူသည် လကပ်ဘေး အဆင့်တွင် ရှိနေသည်ဟူသော ခံစားချက်ကို ပေးစွမ်းနေသည်။

ဝုန်း... ဝုန်း... ဝုန်း... ဝုန်း

ဆက်တိုက် ပေါက်ကွဲသံ လေးသံ ထွက်လာပြီး စုမင်ရှေ့ရှိ သဲလူ လေးကောင်က ကြေမွသွားသည်။ သူသည် ပဉ္စမ ခြေလှမ်းကို လှမ်းကာ အတားအဆီးအား လက်သီးဖြင့် ထိုးလိုက်သည်။ ထိုသည်က လက်သီး တစ်ချက်တည်းသာ ဖြစ်သော်လည်း အတားအဆီးက ချက်ချင်းပင် စတင် တုန်ခါလာသည်။ အက်ကွဲကြောင်းများ ပျံ့နှံ့သွားပြီး အတားအဆီးသည် ကျယ်လောင်သော အသံနှင့်အတူ အပိုင်းပိုင်း ပြိုကျသွားသည်။

ထိုလက်သီးချက်သည် နေကပ်ဘေး အဆင့်နှင့် အလွန် နီးစပ်ပြီး ၎င်းတွင် နတ်ဘုရား အနှစ်သာရ ပါဝင်နေသောကြောင့် ရွှီဟွေက အတားအဆီးကို မချိုးဖျက်နိုင်သော်လည်း စုမင်ကမူ ချိုးဖျက်နိုင်သည်။

လေးသမား၏ အမူအရာ သိသိသာသာ ပြောင်းလဲသွားပြီး သူ့မျက်နှာပေါ်တွင် မယုံကြည်နိုင်မှုများ ပေါ်လာသည်။ စုမင် မည်သို့ ဆက်တိုက် အားကောင်းလာသည်ကို သူ မြင်တွေ့ခဲ့ရသည်။ ခြေလှမ်း ငါးလှမ်းတည်းဖြင့် သူသည် လေးသမား လှောင်ပြောင်ခဲ့သော ကမ္ဘာမြေပြင် နယ်ပယ် ကနဦးအဆင့်မှ လကပ်ဘေး အဆင့်သို့ တည့်တည့် တက်လှမ်းနိုင်ခဲ့သည်။ ထိုနောက်ဆုံး လက်သီးချက်သည်လည်း နေကပ်ဘေး အဆင့်နှင့် အလွန် နီးစပ်သော စွမ်းအားကို ထုတ်လွှတ်ခဲ့သောကြောင့် သူ့နှလုံးသားမှာ တုန်ခါသွားသည်။

ဘေးနားရှိ ပုံရိပ်ယောင် အဘိုးအို၏ မျက်နှာပေါ်တွင်လည်း ယခင်က တစ်ခါမှ မပေါ်ဖူးသော တင်းမာသည့် အမူအရာတစ်ခု ရှိနေသည်။

"မင်း... မင်းက ဘယ်သူလဲ" ပုံရိပ်ယောင် အဘိုးအိုက ချက်ချင်းပင် စူးရှသော အသံဖြင့် အော်မေးလိုက်သည်။

"ကျုပ်ကို တာအိုခုန်းလို့ ခေါ်လို့ရတယ်။ ကျုပ်က ခင်ဗျားဘေးက အမျိုးသမီးရဲ့ အမည်ခံ ခင်ပွန်းပဲ"