အခန်း (၃၉၈)

အပိုင်း (၃၉၈) ရှောင်ပိုင်၏ ဖြစ်တည်မှု

အနီရောင်ဝတ်စုံ နှင့် စောင်းဆရာ တို့သည် သူ့အား ဆီးကြိုရန် အလျင်အမြန် ထရပ်လိုက်ကြလေသည်။

ကူမော့သည် လှိုင်းတံပိုးများကို ကြည့်ရင်း လက်ကို အသာအယာ ဝှေ့ယမ်းပြလိုက်သည်။ သူသည် လွန်ခဲ့သော သုံးလခန့်က ဖုန်လိုင်ကျွန်းသို့ ပထမဆုံး ရောက်ရှိစဉ်က တွေ့ခဲ့ရသော ပင်လယ်သားရဲကို ရုတ်တရက် သတိရလိုက်မိသော်လည်း၊ ယနေ့တွင်မူ ထိုသားရဲမှာ တိတ်ဆိတ်နေလေသည်။ သူက မေးမြန်းလိုက်သည်မှာ...

"အဲဒီ ပင်လယ်သားရဲ က ဘာကောင်လဲ... အခုရော ဘယ်မှာရှိနေလဲ..."

အနီရောင်ဝတ်စုံ နှင့် စောင်းဆရာ တို့မှာ ယခုအခါ သူ၏ မိစ္ဆာကျွန်များ ဖြစ်နေကြပြီ ဆိုသော်လည်း၊ ၎င်းတို့တွင် ကိုယ်ပိုင် အသိစိတ်နှင့် မှတ်ဉာဏ်များ ရှိနေကြဆဲ ဖြစ်လေသည်။ တာအို နှလုံးသား မိစ္ဆာ မျိုးစေ့ နည်းစနစ် ဟာ သာမန် ရုပ်သေး အတတ်နှင့် မတူညီပါချေ။

၎င်းသည် တစ်ဖက်လူ၏ စိတ်ထဲတွင် အမှတ်အသား တစ်ခုကို ထည့်သွင်းလိုက်ခြင်း ဖြစ်ပြီး၊ ထိုလူမှာ မိမိကိုယ်ကို သတိမထားမိဘဲ ထိန်းချုပ်သူ၏ ရုပ်သေးရုပ် ဖြစ်သွားရခြင်း ဖြစ်လေသည်။ ရောဂါပိုး ကူးစက်ခံရသူမှာ ကိုယ်ပိုင် တွေးခေါ်နိုင်စွမ်း ရှိနေဆဲ ဖြစ်သော်လည်း၊ မသိစိတ်အရ ထိန်းချုပ်သူအပေါ် သစ္စာစောင့်သိသွားသဖြင့် စိတ်ဓာတ်ပိုင်းဆိုင်ရာ ပေါင်းစည်းသွားရခြင်း ပင် ဖြစ်လေသည်။

၎င်းတို့သည် အပြင်ပန်းရော အတွင်းပိုင်းပါ ပြောင်းလဲခြင်း မရှိသော အသိဉာဏ်ရှိ စက်ရုပ်များကဲ့သို့ပင် ဖြစ်သော်လည်း၊ ထိန်းချုပ်မှု စနစ်တစ်ခုလုံးကိုသာ အစားထိုးခံလိုက်ရခြင်း ဖြစ်လေသည်။

အနီရောင် ဝတ်စုံဝတ် အမျိုးသမီးက ဦးညွှတ်လိုက်ရင်း ...

"အရှင်ကို လျှောက်တင်ပါတယ်... အဲဒါက ပင်လယ်မြွေနဂါး တစ်ကောင်ပါ... ပိုင်ယွီကျင်း က အဲဒီသားရဲကို ပြုပြင်ပြောင်းလဲပြီး လူသားတွေရဲ့ အသိစိတ်ကို ထည့်သွင်းပေးခဲ့တာပါ... အခုအချိန်အထိ ပိုင်ယွီကျင်း ရဲ့ သားရဲဖန်တီးမှု အစီအစဉ်မှာ အောင်မြင်ခဲ့တဲ့ တစ်ဦးတည်းသော သာဓက ဖြစ်ပြီး၊ လွန်ခဲ့တဲ့ လဝက်လောက်ကပဲ ရှောင်ပိုင် က ခေါ်သွားခဲ့တာပါ..."

"သားရဲဖန်တီးမှု အစီအစဉ် ဟုတ်လား... အဲဒါက ဘာလဲ..."

ကူမော့က မေးမြန်းလိုက်လေသည်။

အနီရောင် ဝတ်စုံဝတ် အမျိုးသမီးက ...

"ပိုင်ယွီကျင်း အနေနဲ့ အင်အားတွေ ပိုပြီး တောင့်တင်းလာဖို့ လိုအပ်ပါတယ်... ဒါပေမဲ့ သူဟာ နှစ်ပေါင်း ထောင်ချီအတွင်းမှာ လူသား ပါရမီရှင်တွေရဲ့ မူလဝိညာဉ်တွေကို ထိန်းချုပ်နိုင်ခဲ့သလို၊ လူသားတွေရဲ့ အတွေးအခေါ်နဲ့ အသိစိတ်တွေကလည်း ကန့်သတ်ချက် မရှိဘဲ ဆက်လက် တိုးတက်နေခဲ့ပေမဲ့၊ လွန်ခဲ့တဲ့ အနှစ် ခုနစ်ရာအတွင်းမှာတော့ ကျင့်ကြံမှုပိုင်းက လုံးဝ ရပ်တန့်နေခဲ့တာလေ..."

"ဒါကြောင့်မို့လို့၊ ပိုင်ယွီကျင်း ဟာ လုံးဝ လမ်းကြောင်းအသစ် တစ်ခုကို ဖော်ဆောင်ဖို့ ကြိုးစားခဲ့တာပေါ့... အဲဒါကတော့ သားရဲတွေကို မိစ္ဆာတွေအဖြစ် ကျင့်ကြံခိုင်းတဲ့ လမ်းကြောင်းပဲ ဖြစ်ပါတယ်... ဒါဟာ သူရည်ရွယ်ထားတဲ့ မိစ္ဆာသားရဲ ဖန်တီးမှု အစီအစဉ် ပေါ့လေ..."

ကူမော့သည် ခေါင်းညိတ်ပြလိုက်လေသည်။ ကျင့်ကြံမှု လမ်းကြောင်း ဘာဖြစ်လို့ ရပ်တန့်နေရသလဲ ဆိုသည်ကို သူ ကောင်းကောင်း သိထားသည် မဟုတ်လား။ လွန်ခဲ့သော အနှစ် ခုနစ်ရာက မိစ္ဆာတစ်ကောင် ပေါ်လာခဲ့ပြီး ကောင်းကင်တံခါး ကို ပိတ်ဆို့ကာ လူသားကျင့်ကြံသူများကို တက်လှမ်းခြင်း နယ်ပယ် သို့ မရောက်အောင် တားဆီးထားခဲ့သဖြင့်၊ ကျင့်ကြံမှုပိုင်းတွင် တိုးတက်ရန် ခက်ခဲနေခဲ့ခြင်း ဖြစ်လေသည်။

သို့သော်လည်း၊ ကူမော့က သံသယအချို့ဖြင့် မေးမြန်းလိုက်သည်...

"တက်လှမ်းခြင်း နယ်ပယ် ရဲ့ အထက်မှာ နတ်ဘုရား နယ်မြေ ရှိနေတာ မဟုတ်လား... နတ်ဘုရား နယ်မြေ မှာ တက်လှမ်းခြင်း နယ်ပယ် ထက် မြင့်တဲ့သူတွေအတွက် ကျင့်စဉ်တွေ ရှိနေသင့်တာပေါ့... ပိုင်ယွီကျင်း အနေနဲ့ နတ်ဘုရား နယ်မြေ ကို သွားလို့ မရဘူးလား... ဒါမှမဟုတ် အတွင်းမိစ္ဆာ ကို မနိုင်လို့လား..."

အနီရောင် ဝတ်စုံဝတ် အမျိုးသမီးက ပြောပြသည်...

"အတွင်းမိစ္ဆာ ကိုလည်း မနိုင်သလို၊ နတ်ဘုရား နယ်မြေ ဆီကိုလည်း သွားလို့ မရပါဘူး... ... တကယ်တမ်းကျတော့ ပိုင်ယွီကျင်း ကိုယ်တိုင်က အစွမ်းထက်လှတာ မဟုတ်ပါဘူး... သူသိထားတဲ့ အသိပညာတွေနဲ့ အရည်အချင်းတွေ အားလုံးဟာ သူထိန်းချုပ်ထားတဲ့ လူသား မူလဝိညာဉ်တွေဆီကနေ လာတာလေ... သီအိုရီ အရပြောရရင်တော့၊ သူ့ရဲ့ အမြင့်ဆုံး အကန့်အသတ်ဟာ သူကိုယ်တိုင် ဖန်တီးထားတဲ့ အစွမ်းအထက်ဆုံးသော လူသားပုံစံပဲ ဖြစ်ရမယ်..."

"ဒီနေ့ မတိုင်ခင်အထိတော့၊ လူ့လောကမှာ ရှိနေတဲ့ ပိုင်ယွီကျင်း ရဲ့ အမြင့်ဆုံး စွမ်းအားနဲ့ အရည်အချင်းကတော့ ကျွန်မပဲ ဖြစ်ခဲ့တာပေါ့... ဒါပေမဲ့ သူ့မှာ မွေးရာပါ အစွမ်းတွေနဲ့ ပိုပြီး မြင့်မားတဲ့ သက်ရှိ အဆင့်အတန်း ရှိနေတာကြောင့်၊ သူဟာ အတွင်းမိစ္ဆာ ထက်တော့ မနိမ့်ပါဘူး၊ ဒါပေမဲ့ သူက တိုက်ရိုက်တော့ တိုက်ခိုက်လို့ မရဘူးလေ..."

"ပိုင်ယွီကျင်း ဆိုတာ အကန့်အသတ် မရှိတဲ့ တည်ရှိမှု တစ်ခုပါ... သီအိုရီ အရပြောရရင်၊ သူဖန်တီးလိုက်တဲ့ လူသားပုံစံတွေရဲ့ ခွန်အားဟာ သူ့ရဲ့ အသိပညာနဲ့ အသိစိတ်အပေါ်မှာပဲ မူတည်နေတာလေ...”

“ ဒီနေ့မှာ ကျွန်မ ရှင့်ကို ရှုံးနိမ့်ခဲ့ရတဲ့ အကြောင်းရင်းကတော့၊ ရှင့်ရဲ့ သိုင်းပညာ အသုံးချမှုတွေဟာ လူ့လောကရဲ့ လက်ရှိ အကန့်အသတ်တွေကို ကျော်လွန်နေတာကြောင့် ဖြစ်သလို၊ ပိုင်ယွီကျင်း ရဲ့ နားလည်နိုင်စွမ်းထက်ပါ သာလွန်နေလို့ပါပဲ..."

ကူမော့သည် ရုတ်တရက် သဘောပေါက်သွားပြီး ဆိုသည်...

"ဒါကြောင့်မို့လို့၊ ဆရာကြီး လျန်ရှန်း က ပိုင်ယွီကျင်း ဟာ ကျွန်တော့်ကို သေချာပေါက် ပစ်မှတ်ထားလိမ့်မယ်လို့ ပြောခဲ့တာကိုး..."

အနီရောင် ဝတ်စုံဝတ် အမျိုးသမီးက ခေါင်းညိတ်ပြလျက် ဆိုသည်မှာ...

"ဟုတ်ပါတယ်... ပိုင်ယွီကျင်း အမြဲတမ်း ရှာဖွေနေတဲ့ အရာက သူ့ရဲ့ အကန့်အသတ်တွေကို အမြဲတမ်း ဖောက်ထွက်နိုင်ဖို့ပါပဲ... အခုဆိုရင် ရှင်က သေမျိုးလောက မှာ အစွမ်းအထက်ဆုံးသူ ဖြစ်နေသလို၊ သူ့ရဲ့ နားလည်နိုင်စွမ်း အကန့်အသတ်တွေကိုလည်း ဖောက်ထွက်နိုင်ခဲ့ပြီလေ... “

“သူသာ ရှင့်ရဲ့ မူလဝိညာဉ် ကို ဝါးမြိုနိုင်ခဲ့မယ် ဆိုရင်တော့၊ ရှင့်ရဲ့ လက်ရှိ နယ်ပယ်ကို သေမျိုးလောကမှာ သာမန် ဖြစ်သွားတဲ့ အထိ သူက အကြိမ်ကြိမ် တွက်ချက်ပြီး ပြောင်းလဲပစ်နိုင်မှာပါ..."

"ဒီလို အခြေအနေမျိုးမှာ၊ ရှင့်ရဲ့ အဆင့်အတန်းကို ရောက်လာမယ့်သူတွေ ပိုပြီး များပြားလာမှာဖြစ်သလို သူ့ကိုလည်း ပိုပြီး အာဟာရ ပေးနိုင်ကြမှာပေါ့... အဲဒီအခါကျရင် သူက အဲဒီအချက်တွေကို ပေါင်းစပ်ပြီး သူ့ရဲ့ မွေးရာပါ အစွမ်းတွေကို ပိုပြီး မြှင့်တင်နိုင်မှာလေ... “

“ဖြစ်နိုင်တာက နောက်ထပ် ဆယ်နှစ်အတွင်းမှာ ဖြစ်ဖြစ်၊ အနှစ် တစ်ရာအတွင်းမှာ ဖြစ်ဖြစ်၊ ရှင့်ရဲ့ လက်ရှိ နယ်ပယ်ထက် သာလွန်တဲ့ နောက်ထပ် ပါရမီရှင် တစ်ယောက် ထပ်ပေါ်လာဦးမှာပဲလေ... အဲဒီအပြင်၊ လုံးဝ လမ်းကြောင်းသစ် တစ်ခုလည်း ပေါ်ထွက်လာနိုင်တာပေါ့”

ကူမော့က ဆိုသည်...

" ယုတ္တိမရှိတဲ့ အချက် နှစ်ချက် ရှိနေတယ်လေ... ပထမ တစ်ချက်ကတော့၊ သေမျိုးလောက က ဘယ်လောက်ပဲ တိုးတက်ပါစေ၊ တက်လှမ်းခြင်း နယ်ပယ် ကိုတော့ ကျော်လွန်လို့ မရနိုင်ဘူး မဟုတ်လား၊ ပြီးတော့ နတ်ဘုရား နယ်မြေ ရဲ့ တည်ရှိမှုဟာလည်း တက်လှမ်းခြင်း နယ်ပယ် အပေါ်မှာပဲ အခြေခံထားတာလေ... "

“နတ်ဘုရား နယ်မြေ က ဘယ်လောက်အထိ အဆင့်မြင့်နေပြီလဲ ဆိုတာ ဘယ်သူမှ မသိနိုင်တဲ့ အခြေအနေမှာ၊ ပိုင်ယွီကျင်း အနေနဲ့ သေမျိုးလောက ထဲမှာပဲ ပြဿနာတွေ ရှာနေတာက ဘာထူးမှာလဲ..."

"ဒုတိယ တစ်ချက်ကတော့၊ ပိုင်ယွီကျင်း ဟာ အမြဲတမ်း ခြေလှမ်း တစ်လှမ်း နောက်ကျနေမှာပဲလေ၊ သူ့ကို မြှင့်တင်ပေးဖို့အတွက် သူ့ရဲ့ နားလည်နိုင်စွမ်းထက် သာလွန်တဲ့သူ တစ်ယောက်ကို အမြဲတမ်း လိုအပ်နေရမှာပေါ့...”

“ တကယ်လို့ သူသာ ငါ့ကို မနိုင်ဘူး ဆိုရင်၊ သူက ငါ့ကို ဘယ်တော့မှ ကျော်တက်နိုင်မှာ မဟုတ်ဘူး မဟုတ်လား... အဲဒီတော့ သူက ဘယ်လိုဖြစ်ပြီး ကောင်းကင်တာအို ဖြစ်လာဖို့အထိ စိတ်ကူးယဉ်နေနိုင်ရတာလဲ..."

အနီရောင် ဝတ်စုံဝတ် အမျိုးသမီးက ခေါင်းကို အနည်းငယ် ယမ်းပြလျက် ဆိုသည်..

"အရှင်... ကျွန်မရဲ့ မှတ်ဉာဏ်တွေထဲမှာတော့ တစ်ခါက ရရှိခဲ့တာ ရှိပါတယ်..."

"ပိုင်ယွီကျင်း ရရှိခဲ့တဲ့ သတင်း အချက်အလက် တစ်ခုဟာ လုံဟူတောင် ကနေ လာတာပါ... အဲ့ဒီလူဟာ သေမျိုးလောက ရဲ့ မှတ်တမ်းတွေထဲမှာ နတ်ဘုရား နယ်မြေ ဆီကို အောင်မြင်စွာ တက်လှမ်းနိုင်ခဲ့ပြီး ပြန်လာနိုင်ခဲ့တဲ့ တစ်ဦးတည်းသောသူ တယ်... အဲ့ဒီလူက သတင်းစကား တစ်ခု ချန်ထားခဲ့ပါတယ်—'နတ်ဘုရား နယ်မြေ ဆီကို မတက်လှမ်းပါနဲ့၊ အဲဒီနေရာက လိမ်လည်မှု တစ်ခု သက်သက်ပါ' လို့ပေါ့..."

"ပိုင်ယွီကျင်း ဟာ အဲ့ဒီသတင်း အချက်အလက်ကို နှစ်ပေါင်းများစွာ ခွဲခြမ်းစိတ်ဖြာခဲ့ပြီးတဲ့နောက်၊ နောက်ဆုံးမှာတော့... နတ်ဘုရား နယ်မြေ ဒါမှမဟုတ် ကောင်းကင်တံခါး လို့ ခေါ်တဲ့ အရာဟာ တကယ်တော့ ပိုင်ယွီကျင်း ထက် ပိုပြီး အဆင့်မြင့်တဲ့ တည်ရှိမှု တစ်ခုပဲ ဖြစ်ရမယ် လို့ ကောက်ချက်ချခဲ့တာပေါ့..."

ကူမော့က အံ့သြတကြီး မေးမြန်းလိုက်သည်...

"မင်းဆိုလိုတာက ကောင်းကင်တံခါး ဆိုတာ လိမ်လည်မှု တစ်ခု ဖြစ်နိုင်ပြီး၊ အတွင်းမိစ္ဆာ ဒါမှမဟုတ် ပိုင်ယွီကျင်း လိုမျိုး အရာ တစ်ခုခု ဖြစ်နေနိုင်တယ် ပေါ့လေ... တက်လှမ်းလာတဲ့ သူတွေကို စားသုံးဖို့ ဒါမှမဟုတ် တခြား ရည်ရွယ်ချက် တစ်ခုခုအတွက် တက်လှမ်းလာအောင် လှည့်ဖြားနေတာဖြစ်ပြီး၊ နတ်ဘုရား နယ်မြေ ဆိုတာ တကယ် မရှိဘူး လို့ ဆိုလိုတာလား..."

အနီရောင် ဝတ်စုံဝတ် အမျိုးသမီးက အနည်းငယ် ခေါင်းညိတ်ပြလျက် ဆိုသည်မ...

"ပိုင်ယွီကျင်း မှာ မူလကတည်းက အဲ့လို သံသယမျိုး ရှိနေခဲ့တာပါ၊ ပြီးတော့ ဒီနေ့ ရှင့်နဲ့ တိုက်ခိုက်ပြီးတဲ့နောက်မှာတော့ အဲ့ဒီသံသယဟာ ပိုပြီးတော့တောင် သေချာသွားခဲ့ပြီလေ...”

“ ကောင်းကင်တံခါး က ရှင်ဟာ မိုးပြာ နဂါး ရဲ့ ဝိညာဉ် လူဝင်စား ဖြစ်နေနိုင်တယ် ဆိုတာကို အာရုံခံမိလို့ ဖြစ်ရမယ်၊ အဲဒါက သူ့ရဲ့ သတ်မှတ်ချက်တွေနဲ့ မကိုက်ညီလို့ပေါ့... ဒါကြောင့်မို့လို့၊ ရှင် တက်လှမ်းခြင်း နယ်ပယ် ကို ဖောက်ထွင်းနိုင်ခဲ့တဲ့ အချိန်မှာ၊ သူက ရှင့်ဆီကို လာပြီး မတွေ့ခဲ့တာပေါ့..."

"ကောင်းကင်တံခါး ရဲ့ ရည်ရွယ်ချက်ကို ကျွန်မတို့ ခန့်မှန်းလို့ မရနိုင်သေးပေမဲ့၊ အဲဒါက ကောင်းကင်တံခါး မှာ အသိစိတ် ရှိနေတယ် ဆိုတာကိုတော့ အများကြီး သက်သေပြနေတာပဲလေ... အဲဒီအပြင်၊ တက်လှမ်းခြင်း နယ်ပယ် ဆိုတာ မူလဝိညာဉ် တက်လှမ်းဖို့အတွက်ပဲ ရှိနေတာဖြစ်ပြီး၊ ရုပ် ခန္ဓာကိုယ် ကတော့ တက်လှမ်းခြင်း နယ်ပယ် မှာ မရှိတာဟာ တကယ်တော့ ယုတ္တိမရှိတဲ့ ကိစ္စပဲပေါ့..."

"ဒါကြောင့်မို့လို့၊ ပိုင်ယွီကျင်း အနေနဲ့ သေမျိုးလောက မှာပဲ ဆက်ပြီး အင်အားချဲ့ထွင်နေတာက ဘာပြဿနာမှ မရှိပါဘူး..."

ကူမော့၏ သူငယ်အိမ်များမှာ အနည်းငယ် ကျုံ့ဝင်သွားပြီး၊ သူသည် အလွန်ပင် ခံစားချက်များ ပြည့်နှက်လျက် ခေါင်းယမ်းလိုက်မိလေသည်။ လောကရဲ့ ရေကတော့ တကယ်ကို နက်လှချေတကား။

အနီရောင် ဝတ်စုံဝတ် အမျိုးသမီးက ဆက်လက် ပြောကြားသည်...

"ရှင့်ရဲ့ ဒုတိယ မေးခွန်းနဲ့ ပတ်သက်ရင်တော့၊ ပိုင်ယွီကျင်း ဟာ အမြဲတမ်း ခြေလှမ်း တစ်လှမ်း နောက်ကျနေတယ် ဆိုတဲ့ အချက်က မမှန်ပါဘူး... ပိုင်ယွီကျင်း ဖန်တီးလိုက်တဲ့ လူသားပုံစံတွေကသာ နောက်ကျနေတာပါ၊ ပိုင်ယွီကျင်း ကိုယ်တိုင်ကတော့ ဘာမှ ပြောင်းလဲခြင်း မရှိပါဘူး...”

“ သူ အားကောင်းလာဖို့ လိုအပ်တာက သူ့ရဲ့ သိမြင်နိုင်စွမ်းနဲ့ အသိစိတ်တွေပဲလေ... သူ့ရဲ့ စွမ်းအားနဲ့ မွေးရာပါ အစွမ်းတွေကတော့ ပုံသေသတ်မှတ်ထားပြီးသားပါ... ဒါပေမဲ့၊ တစ်နေ့နေ့မှာ သူဖန်တီးလိုက်တဲ့ လူသားပုံစံတွေက လူသားတွေထက် သာလွန်သွားခဲ့မယ် ဆိုရင်တော့၊ သူဟာ ကောင်းကင်တာအို ဖြစ်လာမှာပေါ့..."

"ပိုင်ယွီကျင်း ရဲ့ လူသားပုံစံတွေဟာ၊ စတင်ခဲ့တုန်းကဆိုရင် လူသားတွေကြားမှာ ဉာဏ်နည်းတဲ့သူတွေ အဆင့်လောက်တောင် မရှိခဲ့ပါဘူး... အဲဒီနောက်မှာတော့ သူတို့တွေက အမြဲတမ်း တိုးတက်လာခဲ့ကြတာ၊ လွန်ခဲ့တဲ့ အနှစ် သုံးရာကျော်က ကျွန်မ အဆင့်ကို ရောက်လာတဲ့ အခါမှာတော့၊ ကဏ္ဍတိုင်းမှာ လူသားတွေရဲ့ အထွတ်အထိပ် အဆင့်ကို မှီသွားခဲ့ပြီလေ...”

“ ပြီးတော့ ပိုင်ယွီကျင်း ရဲ့ စစ်မှန်သော ကိုယ်ထည်ကတော့ ပိုပြီးတော့တောင် ကြောက်စရာ ကောင်းပါသေးတယ်... သူဟာ များပြားလှတဲ့ ထိပ်တန်း ပါရမီရှင်တွေရဲ့ မူလဝိညာဉ်တွေကို ထိန်းချုပ်ထားပြီး သူ့အတွက် တွက်ချက်မှုတွေ လုပ်ခိုင်းနေတာလေ... လူ့လောကမှာ ဘယ်လို လျှို့ဝှက် ကျမ်းစာမျိုးပဲ ပေါ်လာပါစေ၊ သူသာ တစ်ချက် မြင်လိုက်ရရင်၊ မျက်စိတစ်မှိတ်အတွင်းမှာတင် အဲဒီထက် ပိုပြီး ပြည့်စုံကာ အဆင့်မြင့်တဲ့ ကျမ်းစာ တစ်ခုကို သူက တွက်ချက် ထုတ်ဖော်နိုင်တာပေါ့..."

"ဒါကြောင့်မို့လို့၊ သီအိုရီ အရပြောရရင်၊ လူ့လောကက ကျင့်ကြံသူတွေ ဘယ်လောက်ပဲ အစွမ်းထက်နေပါစေ၊ သူတို့တွေက ပိုင်ယွီကျင်း ရဲ့ လူသားပုံစံကိုပဲ အနိုင်ယူနိုင်မှာပါ၊ ပိုင်ယွီကျင်း ကိုယ်တိုင်ကိုတော့ အနိုင်မတိုက်နိုင်ပါဘူး... သူတို့တွေဟာ ပိုင်ယွီကျင်း က ဘယ်မှာ ရှိနေလဲ၊ ဒါမှမဟုတ် သူက ဘာလဲဆိုတာကိုတောင် သိကြမှာ မဟုတ်ဘူးလေ..."

အနီရောင် ဝတ်စုံဝတ် အမျိုးသမီး ပြောပြသည်ကို ကြားရသောအခါ...

ကူမော့သည် ပိုင်ယွီကျင်း အကြောင်းကို ပိုမို၍ နားလည်လာခဲ့လေသည်။ သူ ပြန်လည် စဉ်းစားကြည့်လိုက်သောအခါ၊ ပိုင်ယွီကျင်း ကို ကိုင်တွယ်နိုင်ဖို့ဆိုလျှင်၊ ဆရာကြီး လျန်ရှန်း အနေဖြင့် လူဝင်စားမှန် ကို ပြန်လည် ပြုပြင်နိုင်မည့် အချိန်ကိုပဲ စောင့်ရတော့မည် ဖြစ်ကြောင်း သဘောပေါက်လိုက်သည်။

ဘာပဲဖြစ်ဖြစ်၊ လူဝင်စားမှန် ဆိုသည်မှာလည်း ပိုင်ယွီကျင်း ကဲ့သို့ပင် လူသား မဟုတ်သော လျှို့ဝှက်ဆန်းကြယ်သည့် အရာဝတ္ထု တစ်ခု ပင် ဖြစ်လေသည်။

"ဒါနဲ့..."

ကူမော့က မေးမြန်းလိုက်သည်

"ဒီနေ့ မတိုင်ခင်အထိ ခင်ဗျား က ပိုင်ယွီကျင်း ရဲ့ အပြည့်စုံဆုံး လူသားပုံစံ ဖြစ်ခဲ့တယ် ဆိုတာက ဘာကို ဆိုလိုတာလဲ... ဒီနေ့မှာ အဲဒီထက် ပိုပြီး ပြည့်စုံတဲ့ လူသားပုံစံ တစ်ခု ပေါ်လာခဲ့လို့လား..."

အနီရောင် ဝတ်စုံဝတ် အမျိုးသမီးက ပြန်လည် ဖြေကြားသည်...

"ဟုတ်ပါတယ် အရှင်... အဲဒါကတော့ ပင်လယ်သားရဲ လို့ ခေါ်တဲ့ ဟို ရှောင်ပိုင် လေး ပါပဲ... အရှင် အနေနဲ့ ပိုင်ယွီကျင်း ရဲ့ လူသားပုံစံတွေကို လူသားတွေလို့ သတ်မှတ်နေဖို့ မလိုပါဘူး၊ သူတို့တွေ အကုန်လုံးက ရုပ်သေးတွေချည်းပါပဲ... ပြီးတော့ ရုပ်သေးရဲ့ အဆင့်က မြင့်လေလေ၊ သူ့ရဲ့ အသိစိတ်က ပိုပြီး အားကောင်းလေလေ ပါပဲ..."

"ရှောင်ပိုင် ဟာ မွေးကတည်းက ယူကျင့်ဟုန် ရဲ့ မူလဝိညာဉ် ဆန္ဒတွေကို အပြည့်အဝ နီးပါး ဆက်ခံနိုင်ခဲ့တာလေ၊ အဲဒီနောက်မှာတော့ သူမရဲ့ အသိစိတ်က ပိုပိုပြီး ပြည့်စုံလာခဲ့သလို၊ ပိုင်ယွီကျင်း ကို ပြန်ပြီး ဆန့်ကျင်နိုင်တဲ့ အသိစိတ်မျိုးနဲ့ ပိုင်ယွီကျင်း ကို နားလည်နိုင်စွမ်း ရှိတဲ့ အသိစိတ်မျိုးတွေတောင် ပေါ်ထွက်လာခဲ့တာပေါ့..."

"ဒီလိုမျိုး အသိစိတ်မျိုးဟာ လူသားတွေအတွက်တော့ ရိုးရှင်းလှပေမဲ့၊ ပိုင်ယွီကျင်း ရဲ့ လူသားပုံစံတွေ အတွက်ကတော့၊ အဲဒါက တကယ့်ကို ထူးခြားလှတဲ့ ဖောက်ထွက်နိုင်စွမ်း ရှိတဲ့ တိုးတက်မှု တစ်ခုပါပဲ... ကျွန်မကိုယ်တိုင်တောင်မှ နှစ်ပေါင်း ရာနဲ့ချီပြီး တည်ရှိနေခဲ့ပေမဲ့၊ အဲ့လိုမျိုး အသိစိတ်မျိုး တစ်ခါမှ မရှိခဲ့ဖူးပါဘူး..."