အခန်း (၅၉၇-၅၉၈)

အခန်း ၅၉၇ - ဧကရာဇ်ခေါင်းတလား၏ ပိုင်ရှင် ၂

ကုချင်းဖန်အနေဖြင့် တစ်ဖက်လူကို ကြားဖြတ်ဟန့်တားရန် ဆန္ဒရှိခဲ့သော်လည်း အနည်းငယ် နောက်ကျသွားခဲ့ပြီ ဖြစ်ကြောင်း သိလိုက်ရသည်။

သူ လှုပ်ရှားရန် ပြင်ဆင်လိုက်သည့် အချိန်တွင်မူ ဧကရာဇ်ခေါင်းတလားကြီးမှာ ဘာအရိပ်အယောင်မျှမချန်ဘဲ ဟင်းလင်းပြင်ထဲ၌ ပျောက်ကွယ်သွားခဲ့ပြီ ဖြစ်သည်။

"တကယ်ကို မြန်မြန်ဆန်ဆန် ပြေးသွားတာပဲ။"

ကုချင်းဖန်၏ မျက်နှာထက်တွင် နှမြောတသဖြစ်မှု အရိပ်အယောင်အချို့ ပေါ်ထွက်လာခဲ့သည်၊ သူသည် မူလက ဧကရာဇ်ခေါင်းတလား၏ ပိုင်ရှင်ကို ဖိနှိပ်ထားပြီးနောက် ၎င်းတို့၏ ဇာစ်မြစ်ကို စုံစမ်းစစ်ဆေးရန် ရည်ရွယ်ထားခဲ့ခြင်း ဖြစ်သည်။

သို့သော် ရလဒ်မှာမူ ဤသက်ရှိက အလွန်အမင်း ပြတ်သားလှပေသည်။

မိမိဘက်က အောက်ရောက်နေသည်ကို မြင်သည်နှင့် ဘာတွန့်ဆုတ်မှုမျှမရှိဘဲ လှည့်၍ ထွက်ပြေးသွားခဲ့တော့သည်။

တစ်ချိန်တည်းမှာပင် ဤအချင်းအရာက ကုချင်းဖန်ကို အချက်တစ်ခုကို ကောင်းကောင်းနားလည်သွားစေခဲ့သည် - ၎င်းမှာ ရှေးဟောင်းမဟာဧကရာဇ် ဖြစ်ခဲ့ဖူးသူမှန်သမျှသည် ဘယ်လိုမှ ရိုးရှင်းသော တည်ရှိမှုများ မဟုတ်ကြဟူ၍ ဖြစ်သည်။ ဤကဲ့သို့သော အစွမ်းထက်သက်ရှိများကို သတ်ဖြတ်လိုပါက တစ်ချက်တည်းဖြင့် အသေသက်ရောက်အောင် ချေမှုန်းရမည်ဖြစ်ပြီး ၎င်းတို့ကို အသက်ရှူခွင့် လုံးဝ မပေးရပေ။

သို့မဟုတ်ပါက ဤကဲ့သို့သော သက်ရှိများတွင် မည်မျှအထိ နက်ရှိုင်းလှသော ဖဲချပ်များနှင့် အသက်ဘေးမှ လွတ်မြောက်နိုင်မည့် လျှို့ဝှက်စွမ်းရည်များ ရှိနေမည်ကို မည်သူမျှ ကြိုတင်မခန့်မှန်းနိုင်ပေ။

တစ်ချိန်တည်းမှာပင် ကုချင်းဖန်သည် အခြားအရာတစ်ခုကိုလည်း တွေးတောမိလိုက်သည်။

"ငါ အကဲခတ်တာမမှားရင် ပြီးခဲ့တဲ့တစ်ခေါက် ကြယ်တာယာဟင်းလင်းပြင်ထဲမှာ ငါ့ကို တိတ်တဆိတ် ချောင်းမြောင်းကြည့်ရှုခဲ့တဲ့သူက ဒီဧကရာဇ်ခေါင်းတလားပိုင်ရှင်ပဲ ဖြစ်ရမယ်။"

အကယ်၍ အခွင့်အရေးသာ ရှိမည်ဆိုပါက ကုချင်းဖန်သည် နောင်ရေးအတွက် အန္တရာယ်များကို အမြစ်ပြတ်ချေမှုန်းနိုင်ရန် တစ်ဖက်လူကို သဘာဝကျစွာပင် သတ်ဖြတ်ပစ်လိုသည်။

ရှေးဟောင်းမဟာဧကရာဇ်တစ်ပါး၏ တိတ်တဆိတ် စောင့်ကြည့်ခြင်းကို ခံနေရသည်ကို မည်သူမျှ အလိုမရှိကြပေ၊ တစ်ဖက်လူ၏ လက်ရှိအခြေအနေမှာ အလွန်အမင်း ကောင်းမွန်မနေဘူးဆိုဦးတော့ ၎င်းက ဖုံးကွယ်ထားသော ခြိမ်းခြောက်မှုတစ်ခု ဖြစ်နေဆဲပင်။

သို့သော်လည်း ယခုအခါ ဧကရာဇ်ခေါင်းတလား၏ ပိုင်ရှင်က ထွက်ပြေးသွားခဲ့ပြီ ဖြစ်သည်။

ကျယ်ပြောလှသော မငြိမ်မသက်ဟင်းလင်းပြင်။

အဆုံးမရှိသော ကြယ်တာရာကောင်းကင်ယံ။

ကုချင်းဖန်အနေဖြင့်လည်း တစ်ဖက်လူ၏ နောက်ကြောင်းခြေရာများကို လိုက်လံရှာဖွေရန် အလွန်အမင်း ခက်ခဲလှပေသည်။

သို့သော်ငြားလည်း ကုချင်းဖန်သည် အမှန်တကယ်တော့ အလွန်အမင်း စိုးရိမ်ပူပန်မနေပါပေ။

အကြောင်းမူကား ဧကရာဇ်ခေါင်းတလား၏ ပိုင်ရှင် ပြန်လည်ရောက်ရှိလာဦးတော့ သူ၏စွမ်းအားက ကြောက်ရွံ့နေရမည့် အဆင့်တွင် မရှိတော့သလို၊ မိမိကိုယ်တိုင်သာ အချိန်လုံလောက်စွာ ရရှိမည်ဆိုပါက သူ၏စွမ်းအားတိုးတက်မှုနှုန်းက ဧကရာဇ်ခေါင်းတလားပိုင်ရှင်ကို အံ့အားသင့် မှင်တက်သွားစေလိမ့်မည်ဟု ကုချင်းဖန်က ယုံကြည်ထားသောကြောင့် ဖြစ်သည်။

အမှန်ပင်၊ သူ ဧကရာဇ်နယ်ပယ်သို့ ဖောက်ထွက်သွားသည့် အချိန် သို့မဟုတ် ကောင်းကင်အကြောစင်များကို ပိုမို၍ ဖွင့်လှစ်နိုင်ခဲ့သည့် အချိန်ကျလျှင်။

ထိုအချိန်ကျမှ အကယ်၍ ဧကရာဇ်ခေါင်းတလား၏ ပိုင်ရှင်သာ ပြန်လာခဲ့မည်ဆိုပါက ကုချင်းဖန်သည် ၎င်းကို လက်သီးတစ်ချက်တည်းဖြင့်ပင် ဖိနှိပ်ပစ်နိုင်လိမ့်မည် ဖြစ်သည်။

သူ့ရှေ့မှောက်ရှိ ကြယ်တာရာကောင်းကင်ယံကြီးကို နက်နက်ရှိုင်းရှိုင်း တစ်ချက်ကြည့်လိုက်ပြီးနောက် ကုချင်းဖန်သည် လှည့်ပြန်ခဲ့ကာ ရှေးဟောင်းသီးခြားနယ်မြေထဲသို့ ခြေချဝင်ရောက်သွားခဲ့တော့သည်။

ကြယ်တာရာကောင်းကင်ယံကြီးက အလွန်အမင်း ကျယ်ပြောလှပေသည်။

လောလောဆယ်တွင်မူ သူ အလွန်အမင်း သွားရောက်စူးစမ်းရန် လိုအပ်သည်ဟု မမြင်မိသေးပေ။

အခြားတစ်ဖက်တွင်မူ...

သွေးရောင်အလင်းတန်းများ လွင့်စင်ပျောက်ကွယ်သွားခဲ့သည်။

ဘယ်အချိန်ကတည်းက ရောက်ရှိသွားမှန်းမသိဘဲ ဧကရာဇ်ခေါင်းတလားကြီးသည် ကြယ်တာရာကောင်းကင်ယံ၏ အခြားသော အစိတ်အပိုင်းတစ်ခုတွင် ပေါ်ထွက်လာခဲ့ပြီ ဖြစ်သည်။

"တောက်... ဒီကောင်ရဲ့ စွမ်းအားက မထင်မှတ်ဘဲ ဒီလောက်အထိ အစွမ်းထက်နေလိမ့်မယ်လို့။ ဧကရာဇ်တစ်ပိုင်းနယ်ပယ်ကို ဖောက်ထွက်ပြီးကာစတင် ရှိသေးတာကို ရှေးဟောင်းမဟာဧကရာဇ်တစ်ပါးနဲ့ ယှဉ်နိုင်တဲ့ စွမ်းအားမျိုးကို ထုတ်ဖော်နိုင်နေပြီပဲ။

ဒီလိုမျိုး အခြေခံအုတ်မြစ်က ရှေးဟောင်းသီးခြားနယ်မြေကို ဖိနှိပ်ခဲ့ဖူးပြီး ခေတ်အဆက်ဆက်ရဲ့ နံပါတ်တစ်ပုဂ္ဂိုလ်လို့ အပြောခံခဲ့ရတဲ့ ထိုက်ရိနတ်ဘုရားမင်းဆက်ရဲ့ အရှင်သခင်တောင်မှ ဒီလောက်အထိ မသန်မာခဲ့ဘူး။"

ဧကရာဇ်ခေါင်းတလား၏ ပိုင်ရှင်သည် စိတ်ထဲကနေ တိတ်တဆိတ် တုန်လှုပ်နေခဲ့သည်။

ဧကရာဇ်တစ်ပိုင်းဟူသော အမည်နာမကြောင့် ၎င်းကို အထင်မသေးသင့်ပါပေ၊ စစ်မှန်သော မဟာဧကရာဇ်တစ်ပါးနှင့် နှိုင်းယှဉ်လျှင် ကွာခြားချက်မှာ သာမန်ကာလျှံကာ မဟုတ်ပေ။

မဟာဧကရာဇ်တစ်ပါး၏ မျက်လုံးထဲတွင်မူ ဧကရာဇ်တစ်ပိုင်းဆိုသည်မှာ အနည်းငယ်မျှ ပို၍ကြီးမားသော ပုရွက်ဆိတ်မျှသာ ဖြစ်သည်။

ရှေးဟောင်းကာလတုန်းက ဧကရာဇ်တစ်ပိုင်း အထွတ်အထိပ်အဆင့်တွင် ရှိနေစဉ်မှာတင် မဟာဧကရာဇ်တစ်ပါးနှင့် ယှဉ်နိုင်သော အထွတ်အထိပ်စွမ်းအားများကို ပိုင်ဆိုင်ထားကြသည့် ကောင်းကင်ဘုံကို ဆန့်ကျင်နိုင်သော ပါရမီရှင်အနည်းငယ် ရှိခဲ့ဖူးသည်ဆိုဦးတော့။

သို့သော်လည်း ထိုသူများမှာ နောက်ဆုံးတွင် လူနည်းစုမျှသာ ဖြစ်သည်။

၎င်းထက်ပို၍ ထိုအရာက ဧကရာဇ်တစ်ပိုင်း အထွတ်အထိပ်အဆင့်တွင် ရပ်တည်နေသူများနှင့်သာ သက်ဆိုင်ခြင်း ဖြစ်သည်။

၎င်းနှင့် နှိုင်းယှဉ်လျှင်မူ ကုချင်းဖန်သည် ဧကရာဇ်တစ်ပိုင်း ဘေးဒုက္ခကို ကျော်ဖြတ်ပြီးကာစသာ ရှိသေးရာ အသစ်စက်စက် တက်လှမ်းလာသော ဧကရာဇ်တစ်ပိုင်းမျှသာ ဟု သတ်မှတ်နိုင်သည်။

ဧကရာဇ်တစ်ပိုင်း အထွတ်အထိပ်အဆင့်နှင့် ဧကရာဇ်တစ်ပိုင်း ကနဦးအဆင့်ကြားရှိ ကွာခြားချက်က အလွန်အမင်း ကြီးမားလှပေသည်။

ပြောရမည်ဆိုလျှင် ဤမျှလောက်အထိ ကောင်းကင်ဘုံကို ဆန့်ကျင်နိုင်သော နတ်ဆိုးအဆင့်ပါရမီရှင်မျိုးကို ဧကရာဇ်ခေါင်းတလား၏ ပိုင်ရှင်ပင်လျှင် တစ်ခါမျှ မမြင်တွေ့ခဲ့ဖူးပါပေ။

မူလက သူသည် အသစ်စက်စက် တက်လှမ်းလာသော ဧကရာဇ်တစ်ပိုင်းတစ်ယောက်ကို ဝါးမြိုပစ်ရန် ကြံစည်ခဲ့ခြင်းဖြစ်ပြီး ထိုသူ၏ စွမ်းအားများနှင့် သွေးချင်းများကို အသုံးချကာ မိမိကိုယ်မိမိ ပြန်လည်မွေးမြူရန်နှင့် ကုချင်းဖန်၏ ခန္ဓာကိုယ်ပေါ်ရှိ ကောင်းကင်ဘုံကို ဆန့်ကျင်နိုင်သော အခွင့်အရေးများကိုပါ လုယူရန် ရည်ရွယ်ခဲ့ခြင်း ဖြစ်သည်။

ဒါပေမဲ့ အခုတော့ ဧကရာဇ်ခေါင်းတလား၏ ပိုင်ရှင် လုံးဝ တွက်ချက်မှု မှားယွင်းသွားခဲ့ရပြီ ဖြစ်သည်။

ဝါးမြိုခြင်းနှင့် အခွင့်အရေးများကို လုယူခြင်း မပြုနိုင်ခဲ့သည့်အပြင် တစ်ဖက်လူ၏ ဒဏ်ရာရအောင် လုပ်ဆောင်ခြင်းကိုပင် အပြင်းအထန် ခံလိုက်ရသေးသည်။

ယခုအခါ ခန္ဓာကိုယ်တွင် ဒဏ်ရာများ ရရှိသွားခဲ့ပြီဖြစ်သဖြင့် ဧကရာဇ်ခေါင်းတလား၏ ပိုင်ရှင်သည် အမြန်ဆုံး ပြန်လည်ကုသရန် လိုအပ်ပေသည်၊ သို့မဟုတ်ပါက ဤကျယ်ပြောလှသော ကြယ်တာယာဟင်းလင်းပြင်ကြီးထဲတွင် မည်ကဲ့သို့သော အန္တရာယ်များနှင့် ထပ်မံရင်ဆိုင်ရဦးမည်ကို မည်သူမျှ မသိနိုင်ပေ။

ရုတ်ချည်းပင် ဧကရာဇ်ခေါင်းတလား၏ ပိုင်ရှင်သည် တစ်စုံတစ်ခုကို အာရုံခံမိလိုက်သည်။

"နတ်ဆိုးမျိုးနွယ်စုတွေပဲ... အတော်ပဲ၊ ဒါဆိုရင် မင်းတို့ရဲ့ သွေးချင်းတွေကိုပဲ ဒီဧကရာဇ်အတွက် အာဟာရအဖြစ် အသုံးချရတာပေါ့။"

နောက်တစ်ခဏတွင် ဧကရာဇ်ခေါင်းတလားကြီးသည် ဟင်းလင်းပြင်ကို ဖြတ်သန်းသွားခဲ့ပြီး နောက်တစ်ကြိမ် ပြန်လည်ပေါ်ထွက်လာသောအခါ နတ်ဆိုးတစ်အုပ်၏ ခေါင်းပေါ်သို့ တိုက်ရိုက် ရောက်ရှိသွားခဲ့တော့သည်။

ဤနတ်ဆိုးအုပ်မှာ အရေအတွက်အားဖြင့် အလွန်အမင်း မများပြားသော်လည်း ၎င်းတို့၏ စွမ်းအားမှာမူ တကယ့်ကို ထူးခြားလှပေသည်။ ၎င်းတို့ထဲတွင် အားအနည်းဆုံးသူပင်လျှင် နတ်ဆိုးအရှင်သခင်အဆင့်တွင် ရှိနေကြပြီး သူတော်စင်နယ်ပယ်နှင့် ယှဉ်နိုင်စွမ်း ရှိကြသည်။

နတ်ဆိုး သုံးဆယ့်ခြောက်ကောင်။

၎င်းတို့ထဲတွင် အစွမ်းထက်ဆုံးသူမှာ နတ်ဆိုးဘုရင်နယ်ပယ်ထဲသို့ ခြေချနိုင်စွမ်း ရှိသည်။

၎င်းတို့သည် အနက်ရောင်ဧကရာဇ်ခေါင်းတလားကြီး ပေါ်ထွက်လာသည်ကို မြင်တွေ့လိုက်ရသောအခါ ခေါင်းဆောင်ဖြစ်သော နတ်ဆိုးဘုရင်သည် ချက်ချင်းပင် အမူအရာ ပြောင်းလဲသွားခဲ့ပြီး လေးနက်သောအသံဖြင့် အော်ဟစ်လိုက်တော့သည်။

"ဒီခေါင်းတလားရဲ့ ဇာစ်မြစ်က မသိရဘူး၊ အားလုံး သတိထားကြ—"

နတ်ဆိုးဘုရင် သူ၏စကားကို ဆုံးအောင် မပြောရသေးခင်မှာပင် ခေါင်းတလားအဖုံးက ဝုန်းခနဲ ပွင့်သွားခဲ့ပြီး အဆုံးမရှိသော အနက်ရောင်မြူခိုးများက ခေါင်းတလားထဲမှနေ၍ သောင်းကျန်းထွက်ပေါ်လာကာ ဟင်းလင်းပြင်အကျယ်ကြီးကို ချက်ချင်း ဖုံးလွှမ်းသွားခဲ့သဖြင့် နတ်ဆိုး သုံးဆယ့်ခြောက်ကောင်စလုံးကို ချက်ချင်းပင် ဝါးမြိုပစ်လိုက်တော့သည်။

"ဝုန်း။"

"ဝုန်း"

အနက်ရောင်မြူခိုးများထဲမှနေ၍ ပြင်းထန်လှသော စွမ်းအားအတက်အကျများ ပေါက်ကွဲထွက်ပေါ်လာသံကိုသာ ကြားလိုက်ရပြီး၊ နတ်ဆိုးများသည် တစ်စုံတစ်ခုနှင့် အသည်းအသန် တိုက်ခိုက်နေကြသည့်အတိုင်း ဖြစ်ကာ စူးရှလှသော ကြောက်လန့်တကြား အော်ဟစ်သံများနှင့်အတူ နတ်ဆိုးမျိုးနွယ်စုများမှာ အလွန်အမင်း ထိတ်လန့်ဖွယ်ကောင်းသော အန္တရာယ်ကြီးနှင့် ရင်ဆိုင်နေရကြောင်း ညွှန်ပြနေခဲ့သည်။

ထို့နောက် ချက်ချင်းပင် အသားများကို ဝါးစားနေသည့် အသံဆိုးကြီး ထွက်ပေါ်လာခဲ့သည်။

ဤကဲ့သို့သော ကြယ်တာယာဟင်းလင်းပြင်ထဲတွင် ထိုအသံက အထူးသဖြင့် ပိုမို၍ ဆန်းကြယ်လှသလို ထိတ်လန့်စရာလည်း ကောင်းလှပေသည်။

ခဏမျှ ကြာပြီးနောက် အနက်ရောင်မြူခိုးများ လွင့်စင်ပျောက်ကွယ်သွားခဲ့သည်။

ဧကရာဇ်ခေါင်းတလားကြီးသည် ဟင်းလင်းပြင်ကို ဖြတ်သန်းကာ ထပ်မံ၍ ပျောက်ကွယ်သွားခဲ့ပြန်သည်။

ပျက်စီးသွားခဲ့သော အာကာသဟင်းလင်းပြင်ထဲတွင်မူ အသားစများနှင့် သွေးကွက်အချို့သာ ကျန်ရှိတော့ရာ ထိုနတ်ဆိုး သုံးဆယ့်ခြောက်ကောင်၏ ကံကြမ္မာက မည်သို့ဖြစ်သွားခဲ့မည်ကို ကောင်းကောင်း ခန့်မှန်းနိုင်ပေသည်။

"အပြာရောင်မှောင်မိုက်ခြင်း နတ်ဆိုးဘုရင်ရဲ့ ဝိညာဉ်မီးအိမ် ငြိမ်းသွားခဲ့ပါပြီ။"

နတ်ဆိုးတစ်သောင်းကနဦးနန်းတွင်းထဲတွင် ဝိညာဉ်ခန်းမကို စောင့်ကြပ်နေသော နတ်ဆိုးဘုရင်တစ်ဦးသည် အလောတကြီး ပြေးဝင်လာခဲ့ပြီး ရာရှာနတ်ဆိုးဧကရာဇ်ထံသို့ လာရောက်သတင်းပို့လိုက်သည်။

ရာရှာနတ်ဆိုးဧကရာဇ်သည် ထိုစကားကို ကြားရသောအခါ မျက်မှောင်ကို အနည်းငယ် ကြုတ်လိုက်မိသည်။

"ဘာကြောင့် ငြိမ်းသွားရလဲဆိုတာကို မင်း သိလား။"

"အပြာရောင်မှောင်မိုက်ခြင်း နတ်ဆိုးဘုရင်က ဘာသတင်းစကားမျှ ပြန်လည်ပေးပို့ခဲ့ခြင်း မရှိပါဘူး။ ၎င်းအပြင် အပြာရောင်မှောင်မိုက်ခြင်း နတ်ဆိုးဘုရင်နဲ့အတူ မငြိမ်မသက်ဟင်းလင်းပြင်ထဲကို လိုက်ပါသွားခဲ့ကြတဲ့ နတ်ဆိုးအရှင်သခင်တွေနဲ့ နတ်ဆိုးကြီး သုံးဆယ့်ငါးကောင်စလုံးရဲ့ ဝိညာဉ်မီးအိမ်တွေကလည်း တစ်ချိန်တည်းမှာတင် အတူတူ ငြိမ်းသွားခဲ့ကြတာ ဖြစ်ပါတယ်။"

နတ်ဆိုးဘုရင်က အမှန်အတိုင်း သတင်းပို့လိုက်ပြီး ဤသို့ပြောနေစဉ်အတွင်း သူ၏မျက်လုံးအိမ်ထဲတွင် ကြောက်ရွံ့မှု အရိပ်အယောင်အချို့ ဖြတ်ပြေးသွားခဲ့ပုံရသည်။

ထိုစကားကို ကြားလိုက်ရသောအခါ ရာရှာနတ်ဆိုးဧကရာဇ်၏ မျက်မှောင်ကြုတ်မှုမှာ ပိုမို၍ လေးနက်သွားခဲ့ရသည်။

သူသည် အပြာရောင်မှောင်မိုက်ခြင်း နတ်ဆိုးဘုရင်၏ စွမ်းအားကို ကောင်းကောင်းသိထားသည်၊ ၎င်းက ထိပ်တန်းအဆင့်ရှိ နတ်ဆိုးဘုရင်တစ်ဦးဖြစ်ပြီး နတ်ဆိုးဧကရာဇ်နယ်ပယ်သို့ ရောက်ရှိရန် ခြေလှမ်းတစ်လှမ်းမျှသာ လိုတော့သူ ဖြစ်သည်။

နတ်ဆိုးမျိုးနွယ်စု၏ အစွမ်းထက်ပုဂ္ဂိုလ် သုံးဆယ့်ငါးကောင်ကို ဦးဆောင်ကာ မငြိမ်မသက်ဟင်းလင်းပြင်ထဲသို့ ဝင်ရောက်သွားရသည့် ရည်ရွယ်ချက်မှာ ရှေးဟောင်းသီးခြားနယ်မြေ၏ တည်နေရာကို ရှာဖွေရန်အတွက် ဖြစ်သည်။

မငြိမ်မသက်ဟင်းလင်းပြင်၏ အန္တရာယ်များကြောင့် နတ်ဆိုးဘုရင်အဆင့်ရှိ တည်ရှိမှုတစ်ခုတည်း သွားရောက်မည်ဆိုလျှင်ပင် အန္တရာယ်များနှင့် ရင်ဆိုင်ရနိုင်သဖြင့် အခြားသောအစွမ်းထက်ပုဂ္ဂိုလ်များနှင့် အတူတကွ ပူးပေါင်းခဲ့ကြခြင်း ဖြစ်သည်။

အစွမ်းထက်လှသော နတ်ဆိုး သုံးဆယ့်ခြောက်ကောင်၏ စွမ်းအားနှင့်ဆိုလျှင် နတ်ဆိုးဧကရာဇ်အဆင့်ရှိ ပြိုင်ဘက်တစ်ဦးနှင့် ရင်ဆိုင်ရဦးတော့ ၎င်းတို့အနေဖြင့် အထိအခိုက်မရှိ ပြန်လည်ဆုတ်ခွာနိုင်ခြင်း မပြုနိုင်ခဲ့လျှင်ပင် တစ်ဂိုဏ်းလုံး၊ တစ်အုပ်စုလုံး အမြစ်ပြတ်ချေမှုန်းခံရသည့်အထိတော့ မဖြစ်သင့်ပါပေ။

သိသာထင်ရှားလှသည်မှာ အပြာရောင်မှောင်မိုက်ခြင်း နတ်ဆိုးဘုရင် ဦးဆောင်သော နတ်ဆိုး သုံးဆယ့်ခြောက်ကောင်ကို အချိန်တိုအတွင်း အမြစ်ပြတ်ချေမှုန်းနိုင်စွမ်း ရှိသော သက်ရှိ၏ စွမ်းအားမှာ ဘယ်လိုမှ ရိုးရှင်းမနေဘဲ အနည်းဆုံးတော့ ဧကရာဇ်တစ်ဝက်အဆင့် သို့မဟုတ် ၎င်းထက်ပင် ပိုမိုမြင့်မားသော အဆင့်သို့ ရောက်ရှိနေရမည် ဖြစ်သည်။

သို့သော်လည်း ရာရှာနတ်ဆိုးဧကရာဇ်ကို ပိုမို၍ စိုးရိမ်ပူပန်စေသောအချက်မှာ လှုပ်ရှားသွားခဲ့သည့် သက်ရှိ၏ မည်သူမည်ဝါဖြစ်ကြောင်း သတ်မှတ်ချက်ပင် ဖြစ်သည်။

၎င်းက မငြိမ်မသက်ဟင်းလင်းပြင်ထဲမှ သဘာဝအန္တရာယ်တစ်ခုလား၊ သို့မဟုတ် လူသားမျိုးနွယ်စုထဲမှ ပုဂ္ဂိုလ်တစ်ဦးလား။

အကယ်၍သာ ဒုတိယအချက်သာ မှန်ကန်ခဲ့မည်ဆိုပါက ၎င်းမှာ အပြာရောင်မှောင်မိုက်ခြင်း နတ်ဆိုးဘုရင်နှင့် အခြားသော နတ်ဆိုးအစွမ်းထက်ပုဂ္ဂိုလ်များသည် ရှေးဟောင်းသီးခြားနယ်မြေ၏ တည်နေရာကို ရှာဖွေတွေ့ရှိသွားခဲ့ပြီ ဖြစ်ကြောင်း ညွှန်ပြနေခြင်း ဖြစ်နိုင်သည်။

ရာရှာနတ်ဆိုးဧကရာဇ် စဉ်းစားတွေးတောမှုထဲတွင် နစ်မြုပ်နေစဉ်မှာပင် သတင်းပို့နေသော နတ်ဆိုးဘုရင်သည် တစ်စုံတစ်ခုသော သတင်းစကားကို ထပ်မံရရှိလိုက်ပုံရပြီး သူ၏မျက်နှာမှာ ချက်ချင်းပင် ထပ်မံ၍ ပြောင်းလဲသွားခဲ့ပြန်သည်။

"ရာရှာနတ်ဆိုးဧကရာဇ်ထံ သတင်းပို့ပါတယ် ဘုရား... ဝိညာဉ်ခန်းမဆီကနေ အခုလေးတင် သတင်းထပ်ရောက်လာပါတယ်၊ နတ်ဆိုးဘုရင် သုံးကောင်၊ နတ်ဆိုးကြီး တစ်ဆယ့်ခြောက်ကောင်နဲ့ နတ်ဆိုးအရှင်သခင် ခုနစ်ဆယ့်သုံးကောင်တို့ရဲ့ ဝိညာဉ်မီးအိမ်တွေဟာလည်း တစ်ခုပြီးတစ်ခု ဆက်တိုက်ဆိုသလို ငြိမ်းသွားခဲ့ကြပြန်ပါပြီ။"

ဝုန်း

ဤစကားများ ထွက်ပေါ်လာသည်နှင့်အမျှ ရာရှာနတ်ဆိုးဧကရာဇ်၏ ခန္ဓာကိုယ်ထဲမှနေ၍ ထိတ်လန့်ဖွယ်ရာ သတ်ဖြတ်ခြင်းအငွေ့အသက်များ ပေါက်ကွဲထွက်ပေါ်လာခဲ့ရာ သူ့ရှေ့မှောက်ရှိ နတ်ဆိုးဘုရင်ကိုပင် တုန်လှုပ်ခြောက်ခြားသွားစေခဲ့တော့သည်။

"ဘယ်သူကများ ငါ့ရဲ့ နတ်ဆိုးမျိုးနွယ်စုက အစွမ်းထက်ပုဂ္ဂိုလ်တွေကို ကွယ်ရာကနေ တိတ်တဆိတ် လုပ်ကြံရဲရတာလဲ"

ရာရှာနတ်ဆိုးဧကရာဇ်သည် အလွန်အမင်း ဒေါသထွက်သွားခဲ့ရသည်။

အကယ်၍ အပြာရောင်မှောင်မိုက်ခြင်း နတ်ဆိုးဘုရင်၏ သေဆုံးမှုက တိုက်ဆိုင်မှုတစ်ခုမျှသာ ဖြစ်ခဲ့မည်ဆိုလျှင် ယခုအခါ ဤမျှလောက်အထိ များပြားလှသော နတ်ဆိုးမျိုးနွယ်စုဝင်များ သေဆုံးသွားခဲ့ရခြင်းက အစွမ်းထက်လှသော သက်ရှိတစ်ဦးက မိမိတို့ နတ်ဆိုးမျိုးနွယ်စုကို ပစ်မှတ်ထားနေပြီ ဖြစ်ကြောင်း ပြသနေခဲ့သည်။

သို့မဟုတ်ပါက။

ဤမျှလောက်အထိ အစွမ်းထက်လှသော နတ်ဆိုးမျိုးနွယ်စုဝင် အမြောက်အမြား အချိန်တိုအတွင်း အဘယ်ကြောင့် သေဆုံးသွားခဲ့ရသည်ကို မည်သို့မျှ ရှင်းပြ၍ ရနိုင်မည်မဟုတ်ပေ။

လူတိုင်း သိထားရမည်မှာ။

မငြိမ်မသက်ဟင်းလင်းပြင်ကြီးက အလွန်အမင်း ကျယ်ပြောလှပေသည်။

ဤနတ်ဆိုးများသည် ရှေးဟောင်းသီးခြားနယ်မြေ၏ တည်နေရာကို ရှာဖွေရန် အမိန့်ပေးခြင်း ခံထားရသည်ဆိုသော်လည်း ၎င်းတို့၏ တည်နေရာများမှာ အတော်အတန် ကွဲပြားနေကြပြီး၊ သာမန်ကျင့်ကြံသူတစ်ဦးအနေဖြင့် ဤမျှလောက်အထိ များပြားလှသော နတ်ဆိုးအစွမ်းထက်ပုဂ္ဂိုလ်များကို အချိန်တိုအတွင်း လိုက်လံသတ်ဖြတ်ရန်မှာ ဘယ်လိုမှ မဖြစ်နိုင်ပါပေ။

နတ်ဆိုးမျိုးနွယ်စုကြီးက အလွန်အမင်း ကျယ်ပြောလှပြီး နှစ်ပေါင်းများစွာတိုင်အောင် နက်ရှိုင်းသော အခြေခံအုတ်မြစ်များကို စုဆောင်းထားနိုင်ခဲ့သည်ဆိုဦးတော့၊ တစ်ပြိုင်နက်တည်းမှာတင် အနည်းဆုံး နတ်ဆိုးအရှင်သခင်အဆင့်ရှိ အစွမ်းထက်ပုဂ္ဂိုလ် ကိုးဆယ်ကျော်ကို ဆုံးရှုံးလိုက်ရခြင်းက ရာရှာနတ်ဆိုးဧကရာဇ်ကို အတိုင်းအဆမရှိ နှမြောတသဖြစ်စေခဲ့သည်။

ဤမျှလောက်အထိ အစွမ်းထက်လှသော အုပ်စုကြီးကိုသာ မျိုးနွယ်စုနှစ်ခုကြားရှိ စစ်မျက်နှာပြင်ဆီသို့ စေလွှတ်လိုက်မည်ဆိုပါက ၎င်းက သေချာပေါက် ကြီးမားလှသော သက်ရောက်မှုများကို ဖြစ်ပေါ်စေနိုင်မည် ဖြစ်သည်။

ဒါပေမဲ့ အခုတော့ ဤနတ်ဆိုးအစွမ်းထက်ပုဂ္ဂိုလ်များအားလုံးမှာ အချည်းနှီး သေဆုံးသွားခဲ့ကြရပြီ ဖြစ်သည်။

ယခုအချိန်အထိပင် ရာရှာနတ်ဆိုးဧကရာဇ်အနေဖြင့် ဤကိစ္စကို လုပ်ဆောင်သွားခဲ့သည့် သက်ရှိမှာ မည်သူမည်ဝါဖြစ်ကြောင်း သဲလွန်စမျှပင် ရှာမတွေ့သေးသဖြင့် သူ့ကို ပိုမို၍ ဒေါသအမျက်ချောင်းချောင်း ထွက်စေခဲ့တော့သည်။

အခန်း ၅၉၈ - သွေးမျိုးဆက်မှတစ်ဆင့် ကျင့်စဉ်သစ်တစ်ခု ဖန်တီးခြင်း

နတ်ဆိုးမျိုးနွယ်စုနှင့် ပတ်သက်သော အဖြစ်အပျက်များကိုမူ ကုချင်းဖန် တစ်စုံတစ်ရာ သိရှိခြင်း မရှိပေ။

သို့သော် သူ သိရှိခဲ့လျှင်ပင် အလွန်အမင်း အာရုံစိုက်နေလိမ့်မည် မဟုတ်ပါချေ။

အဆုံးသတ်၌ နတ်ဆိုးများက ဧကရာဇ်ခေါင်းတလား၏ ပိုင်ရှင်နှင့် ထိပ်တိုက်ရင်ဆိုင်မိကြသည်ဆိုပါက ကုချင်းဖန်အနေဖြင့် ဤအချင်းအရာကို ဝမ်းမြောက်ဝမ်းသာ ဖြစ်ရုံသာ ရှိပေလိမ့်မည်။

ကျားနှစ်ကောင် သတ်ပုတ်ကြလျှင် တစ်ကောင်ကတော့ သေချာပေါက် ဒဏ်ရာရရှိမည်သာ ဖြစ်သည်။

ဧကရာဇ်ခေါင်းတလား၏ ပိုင်ရှင်ဖြစ်စေ၊ နတ်ဆိုးမျိုးနွယ်စုဖြစ်စေ ပြဿနာများနှင့် ရင်ဆိုင်ရခြင်းက ကုချင်းဖန်အတွက်တော့ အကျိုးကျေးဇူးသာ ရှိစေပြီး ဘာဆိုးကျိုးမျှ ရှိလိမ့်မည် မဟုတ်ပေ။

၎င်းထက်ပို၍ ဧကရာဇ်ခေါင်းတလား၏ ပိုင်ရှင်က အတိုင်းအဆမရှိ နက်နဲလှပေသည်။

ရှေးဟောင်းမဟာဧကရာဇ်တစ်ပါးဖြစ်သည့်အတိုင်း သူ၏နည်းလမ်းများက သဘာဝကျစွာပင် ထူးခြားဆန်းပြားလှသလို၊ နတ်ဆိုးမျိုးနွယ်စုတွင်လည်း နက်ရှိုင်းလှသော အခြေခံအုတ်မြစ်များ ရှိနေကြဆဲ ဖြစ်သည်။

အကယ်၍ နှစ်ဖက်စလုံးက အမှန်တကယ်ပင် အရှုံးအနိုင် ခွဲခြားလိုကြသည်ဆိုပါက ၎င်းက ရိုးရိုးရှင်းရှင်းနှင့် ပြီးသွားမည့်အရာ မဟုတ်ပါချေ။

လက်ရှိအချိန်တွင် ကုချင်းဖန်သည် ကုရှန်းမသေမျိုးမြို့တော်ဆီသို့ ပြန်လည်ရောက်ရှိနေခဲ့ပြီ ဖြစ်သည်။

ဤအကြောင်းအရာကို သိရှိရသောအခါ နတ်ဆိုးနှိမ်နင်းရေးဌာန၏ တပ်မှူးကြီးဖြစ်သူ ကျန်နန်ဖုန်းသည်လည်း စိတ်ထဲကနေ တိတ်တဆိတ် သက်ပြင်းချနိုင်ခဲ့တော့သည်။

ကုချင်းဖန် ထွက်ခွာသွားခြင်းနှင့် ပတ်သက်၍ အခြားသူများ မသိရှိကြဦးတော့၊ ကုရှန်းမသေမျိုးမြို့တော်၏ ဒုတိယအာဏာအရှိဆုံးပုဂ္ဂိုလ်ဖြစ်သော ကျန်နန်ဖုန်းအနေဖြင့် ဘယ်လိုလုပ်ပြီး မသိဘဲ နေပါမည်နည်း။

ထို့ကြောင့် ဤကာလအတောအတွင်း ကျန်နန်ဖုန်းသည် သတင်းများ ပေါက်ကြားသွားပြီး နတ်ဆိုးမျိုးနွယ်စုများ အလုံးအရင်းနှင့် လာရောက်ကျူးကျော်မည်ကို အစဉ်အမြဲ စိုးရိမ်ပူပန်နေခဲ့ရခြင်း ဖြစ်သည်။

ကံကောင်းလှစွာပင် အခြေအနေများက ထိုအဆင့်အထိ ဆိုးရွားမသွားခဲ့ပေ။

ယခုအခါ ကုချင်းဖန် ပြန်လည်ရောက်ရှိလာခဲ့ပြီဖြစ်သဖြင့် ကျန်နန်ဖုန်းအနေဖြင့် နတ်ဆိုးများ ကျူးကျော်လာမည့်အရေးကို ကြောက်ရွံ့နေစရာ မလိုတော့ပေ။

ပြောရမည်ဆိုလျှင် သိုင်းနတ်ဘုရားမင်းဆက် တော်ဝင်မင်းဆက်ကြီးအဖြစ် တက်လှမ်းသွားခဲ့ခြင်းကြောင့် ကျန်နန်ဖုန်းသည် နတ်ဆိုးနှိမ်နင်းရေးဌာန၏ တပ်မှူးကြီးဖြစ်သည့်အတိုင်း ကုရှန်းမသေမျိုးမြို့တော်တွင်သာ ရှိနေခဲ့သော်လည်း ကြီးမားလှသော အကျိုးကျေးဇူးများကို ရရှိခဲ့သည်။

သူ၏ကျင့်ကြံမှုမှာ တာအိုနန်းတော်နယ်ပယ် သတ္တမအဆင့်မှနေ၍ တာအိုနန်းတော်နယ်ပယ် နဝမအဆင့်သို့ တိုက်ရိုက် တက်လှမ်းသွားခဲ့ပြီ ဖြစ်သည်။

ဤအရာက မင်းဆက်တက်လှမ်းမှုက ပေးစွမ်းနိုင်သော ကောင်းကင်ဘုံအကျိုးကျေးဇူးပင် ဖြစ်သည်။

အကယ်၍ သာမန်အရာရှိရာထူးမျိုးသာ ဖြစ်ခဲ့မည်ဆိုပါက တာအိုနန်းတော်နယ်ပယ် ဆဋ္ဌမအဆင့်ရှိ ကျင့်ကြံသူတစ်ဦးအနေဖြင့် သေးငယ်သော ကျင့်ကြံမှုနယ်ပယ် သုံးဆင့်ကို တစ်ပြိုင်နက်တည်း ဖြတ်ကျော်ကာ တာအိုနန်းတော်နယ်ပယ် နဝမအဆင့်သို့ တစ်ဟုန်ထိုး ရောက်ရှိသွားရန်မှာ ဘယ်လိုမှ မဖြစ်နိုင်ပါပေ။

သို့သော် ကျန်နန်ဖုန်းကမူ မတူပေ။

နတ်ဆိုးနှိမ်နင်းရေးဌာန၏ အဆင့်အတန်းက အလွန်အမင်း ထူးခြားလှပြီး တပ်မှူးကြီးရာထူးက ဒုတိယအဆင့်အရာရှိကြီးအဖြစ် သတ်မှတ်ခြင်း ခံထားရသည်။

ဤကဲ့သို့သော ရာထူးနေရာက ပေးစွမ်းနိုင်သော ကံတရားအထောက်အပံ့က သဘာဝကျစွာပင် သာမန်ထက် ထူးကဲလှပေသည်။

ထို့ကြောင့် ကျန်နန်ဖုန်းအနေဖြင့် ဤကဲ့သို့သော အဆင့်တက်မှုကို လုပ်ဆောင်နိုင်ခဲ့ခြင်း ဖြစ်သည်။

ကုချင်းဖန် ပြန်လည်ရောက်ရှိလာခြင်းနှင့်အတူ ကုရှန်းမသေမျိုးမြို့တော်ကြီးက ယခင်အတိုင်းပင် ငြိမ်းချမ်းသာယာနေဆဲ ဖြစ်သည်။

အခြားသော ကျင့်ကြံသူများမှာမူ မသေမျိုးမြို့တော်မှ အစဉ်မပြတ် ထွက်ခွာသွားကြပြီး နတ်ဆိုးနယ်မြေများထဲသို့ ဝင်ရောက်ကာ ကံတရားများကို ရှာဖွေခြင်း သို့မဟုတ် နတ်ဆိုးများကို လိုက်လံအမဲလိုက်ခြင်းများ ပြုလုပ်နေကြသည်။

အကြောင်းမူကား ကုချင်းဖန်သည် သိုင်းနတ်ဘုရားမင်းဆက်၏ နာမည်ဖြင့် ကုရှန်းမသေမျိုးမြို့တော်အတွင်း၌ ဆုလာဘ်ကြေညာချက်တစ်ခုကို ထုတ်ပြန်ထားခဲ့သောကြောင့် ဖြစ်သည်၊ ထိုထုတ်ပြန်ချက်တွင် နတ်ဆိုးများကို သတ်ဖြတ်ပြီး ၎င်းတို့၏ ဦးခေါင်းများကို ယူဆောင်လာပါက နတ်ဆိုးနှိမ်နင်းရေးဌာနထံမှ ဆုငွေများကို ရရှိနိုင်မည်ဟု ဖော်ပြထားသည်။

ဤဆုငွေများကို စစ်မှုထမ်းကောင်းအမှတ်များအဖြစ် တိုက်ရိုက် လဲလှယ်ပေးခြင်းဖြစ်ပြီး၊ ထိုစစ်မှုထမ်းကောင်းအမှတ်များကို နတ်ဆိုးနှိမ်နင်းရေးဌာနတွင် အမျိုးမျိုးသော ကျင့်ကြံခြင်းအရင်းအမြစ်များ၊ ထိပ်တန်းကျင့်စဉ်အမွေအနှစ်များနှင့် နတ်ဘုရားစွမ်းရည်များအဖြစ် ပြန်လည်လဲလှယ်နိုင်ကြသည်။

ဤအရာက ကျင့်ကြံသူအများစု၊ အထူးသဖြင့် လေလွင့်ကျင့်ကြံသူများအတွက်မူ မငြင်းဆန်နိုင်သော ဆွဲဆောင်မှုကြီးတစ်ခု ဖြစ်နေခဲ့သည်။

အဆုံးသတ်၌ လေလွင့်ကျင့်ကြံသူများအတွက်မူ ကျင့်ကြံခြင်းအရင်းအမြစ်များကို ရရှိရန်မှာ သာမန်အားဖြင့် မလွယ်ကူလှသလို၊ ပြည့်စုံသော ကျင့်စဉ်အမွေအနှစ်များကို ရရှိရန်မှာလည်း အလွန်အမင်း ရှားပါးလှပေသည်။

လေလွင့်ကျင့်ကြံသူ အမြောက်အမြားမှာ အံ့အားသင့်ဖွယ်ရာ ကံကောင်းမှုများကို အခြေခံကာ နတ်ဘုရားအသွင်ပြောင်းလဲခြင်းနယ်ပယ်၊ ၎င်းထက်ပင် ကျော်လွန်၍ တာအိုနန်းတော်နယ်ပယ်ထဲအထိ တဖြည်းဖြည်းချင်း တက်လှမ်းနိုင်ခဲ့ကြသည်ဆိုဦးတော့။

သို့သော်လည်း လေလွင့်ကျင့်ကြံသူ အများစုမှာမူ မပြည့်စုံသော ကျင့်စဉ်အမွေအနှစ်များကိုသာ ကျင့်ကြံနေကြရသဖြင့် ခြေလှမ်းတစ်လှမ်းချင်းစီတိုင်းက အလွန်အမင်း ခက်ခဲလှပေသည်။

ဤကမ္ဘာမြေကြီးတွင် မိမိတို့ပိုင်ဆိုင်ထားသော အရာများကို အမြဲတမ်း တန်ဖိုးထား စောင့်ရှောက်လေ့ ရှိကြသည်။

အမျိုးမျိုးသော အစွမ်းထက်အင်အားစုကြီးများက ကျင့်စဉ်အမွေအနှစ်များကို တင်းကြပ်စွာ ထိန်းချုပ်ထားကြပြီး ပြင်ပသို့ လွယ်လွယ်ကူကူ လက်ဆင့်ကမ်းပေးလေ့ မရှိကြပါချေ။

ဤသို့ ပြုလုပ်ရသည့် ရည်ရွယ်ချက်မှာ ကမ္ဘာပေါ်ရှိ ကျင့်ကြံခြင်းအရင်းအမြစ်များက ကန့်သတ်ချက် ရှိနေသောကြောင့် ဖြစ်သည်၊ ကျင့်ကြံသူ အရေအတွက် ပိုမိုများပြားလာလေလေ မိမိတို့ လုယူယှဉ်ပြိုင်ရမည့် အရင်းအမြစ်များက ပိုမို၍ နည်းပါးသွားလေလေ ဖြစ်သည်။

သို့သော်လည်း ထိုနည်းတူစွာပင် မိမိတို့ဘက်မှ ကျင့်ကြံသူ အရေအတွက် မလုံလောက်ပါကလည်း အခြားသောအင်အားစုများနှင့် ယှဉ်ပြိုင်ရသည့်အခါ အောက်သို့ ရောက်ရှိသွားနိုင်သည်။

ထို့ကြောင့် အမျိုးမျိုးသော ဂိုဏ်းကြီးများနှင့် မင်းစိုးရာဇာမိသားစုကြီးများက ပါရမီရှင်ကျင့်ကြံသူများကို မိမိတို့အသုံးချရန်အတွက် အသည်းအသန် စည်းရုံးသိမ်းသွင်းလေ့ရှိကြသော်လည်း၊ တစ်ချိန်တည်းမှာပင် မိမိတို့၏ ကျင့်စဉ်အမွေအနှစ်များကို တင်းကြပ်စွာ ထိန်းချုပ်ထားကြပြီး ပြင်ပသို့ ပေါက်ကြားသွားခြင်းကို လုံးဝ ခွင့်မပြုကြသည့် အခြေအနေမျိုးကို ဖြစ်ပေါ်စေခဲ့ခြင်း ဖြစ်သည်။

ကုချင်းဖန်အနေဖြင့်မူ ဤအင်အားစုကြီးများ၏ လုပ်ဆောင်ချက်အပေါ် သဘောတူခြင်းလည်းမရှိ၊ သဘောမတူခြင်းလည်း မရှိပါပေ။

သူ၏အမြင်တွင်မူ နတ်ဆိုးများ၏ ခြိမ်းခြောက်မှုက အလွန်အမင်း ကြီးမားလှသဖြင့် သိုင်းနတ်ဘုရားမင်းဆက်နှင့် ကုမိသားစုအတွက် ဤကျင့်စဉ်အမွေအနှစ်အချို့ကို စနစ်တကျ ထုတ်ပေးလိုက်ခြင်းက အနစ်နာခံ၍မရနိုင်သောအရာ မဟုတ်ပါပေ။

အကယ်၍ အချို့သော ကျင့်စဉ်များကို ထုတ်ပေးခြင်းအားဖြင့် အခြားသော ကျင့်ကြံသူများကို နတ်ဆိုးများနှင့် ရင်ဆိုင်ရန် တွန်းအားပေးနိုင်မည်ဆိုပါက ၎င်းက မကောင်းသောအရာ မဟုတ်ပါချေ။

ဤအကြောင်းရင်းကြောင့်ပင် ရှေးဟောင်းသီးခြားနယ်မြေအတွင်းရှိ ကျင့်ကြံသူများမှာ ကုရှန်းမသေမျိုးမြို့တော်ဆီသို့ အစဉ်မပြတ် ဝင်ရောက်လာနေကြခြင်း ဖြစ်သည်။

တစ်ချိန်တည်းမှာပင် ကုချင်းဖန်သည် ယခုအခါ တိတ်တဆိတ် သီးသန့်အောင်း၍ ကျင့်ကြံခြင်းထဲသို့ ဝင်ရောက်နေခဲ့ပြီ ဖြစ်သည်။

ဤသို့ သီးသန့်ကျင့်ကြံရသည့် ရည်ရွယ်ချက်က တစ်ခုတည်းသာ ရှိပေသည်၊ ၎င်းမှာ ကုမိသားစုနှင့် သီးသန့်သက်ဆိုင်မည့် ကျင့်စဉ်သစ်တစ်ခုကို ဖန်တီးရန် ဖြစ်သည်။

အတိတ်ကာလကတည်းက ကုမိသားစုဝင် ကျင့်ကြံသူများသည် အမျိုးမျိုးသော ပညာရပ်များကို ကျယ်ပြန့်စွာ လေ့လာခဲ့ကြသည်။

ဤချဉ်းကပ်ပုံက သဘာဝကျစွာပင် အကျိုးကျေးဇူးများ ရှိနေသော်လည်း အားနည်းချက်များလည်း ရှိနေပေသည်။

ယခုအခါ ကုချင်းဖန် လုပ်ဆောင်လိုသောအရာမှာ မိမိ၏ ကုမိသားစု သွေးမျိုးဆက်စွမ်းအားကို အခြေခံအုတ်မြစ်အဖြစ် အသုံးချကာ ကုမိသားစုနှင့် အမှန်တကယ် သက်ဆိုင်မည့် ကျင့်စဉ်တစ်ခုကို ဖန်တီးရန် ဖြစ်သည်။

"ထိပ်တန်းမျိုးနွယ်စုကြီး အများစုမှာ မိမိတို့နှင့် သီးသန့်သက်ဆိုင်တဲ့ ကျင့်စဉ်တွေ ရှိကြတယ်၊ ဤကျင့်စဉ်တွေက သွေးမျိုးဆက်ရဲ့ ကနဦးမြစ်ဖျားခံရာကို ရှာဖွေနိုင်ကြတယ်၊ မိသားစုဝင် သွေးမျိုးဆက် မဟုတ်သူတွေအနေနဲ့ ကျင့်ကြံဖို့ အလွန်အမင်း ခက်ခဲလှပေမဲ့ မိသားစုဝင် သွေးမျိုးဆက် ရှိသူတွေအတွက်တော့ ပိုမိုပြီးတော့ အားသာချက်တွေ ရှိစေနိုင်တယ်။"

"ကုမိသားစုကို တည်ထောင်ခဲ့တာ သိပ်မကြာသေးဘူးဆိုပေမဲ့ ကြီးမားတဲ့ အမွေအနှစ်တွေ ရှိနေပြီဖြစ်ရုံတင်မကဘဲ ခေတ်အဆက်ဆက် လက်ဆင့်ကမ်းသွားနိုင်မယ့် ကျင့်စဉ်တစ်ခုပဲ လိုအပ်နေတာ ဖြစ်တယ်။"

ကုချင်းဖန် စိတ်ထဲကနေ တွေးတောလိုက်မိသည်။

သူသည် မိမိကိုယ်မိမိ ပြန်လည်ဆန်းစစ်လိုက်သည်။

ကျင့်စဉ်အရေအတွက်နှင့် ပတ်သက်၍ဆိုလျှင် ကုချင်းဖန်သည် အားနည်းသောအရာ၊ အားကောင်းသောအရာ ရေတွက်၍မရနိုင်လောက်အောင် များပြားလှသောအရာများကို တတ်မြောက်ထားခဲ့ပြီး ဖြစ်သည်။

၎င်းတို့အထဲတွင် အထူးခြားဆုံးနှင့် အစွမ်းထက်ဆုံး ကျင့်စဉ်ကြီးနှစ်ခုမှာ အနက်ရောင်အသူရာဧကရာဇ်ထံမှ 'အသူရာကျမ်းစာ' နှင့် မငြိမ်မသက်ရှေးဟောင်းနတ်ဘုရားဘုရင်ထံမှ 'ရှေးဟောင်းနတ်ဘုရားဘုရင်ကျမ်းစာ' တို့ ဖြစ်ကြသည်။

ဤဧကရာဇ်ကျမ်းစာကြီးနှစ်စောင်က ကုချင်းဖန် ပိုင်ဆိုင်ထားသော အစွမ်းထက်ဆုံး ကျင့်စဉ်ကြီးများ ဖြစ်ကြသည်။

ဝိညာဉ်လောက ပြန်လည်မွေးဖွားခြင်း မျက်လုံးနှင့် ပတ်သက်၍မူ ၎င်းက နတ်ဘုရားစွမ်းရည်ကဏ္ဍတွင်သာ ပါဝင်ပြီး ကျင့်စဉ်နယ်ပယ်ထဲတွင် ပါဝင်ခြင်း မရှိပေ။

ကုချင်းဖန်သည် မိမိ၏ ခန္ဓာကိုယ်အတွင်းပိုင်းကို ပြန်လည်အာရုံစိုက်ကြည့်လိုက်ရာ မိမိ၏အသားအရေနှင့် သွေးသားများထဲတွင် စီးဆင်းနေသော သွေးမျိုးဆက်စွမ်းအားများကို အာရုံခံမိလိုက်သည်၊ ဧကရာဇ်တစ်ပိုင်းနယ်ပယ်သို့ ဖောက်ထွက်နိုင်ခဲ့ကတည်းက သူ၏သွေးချင်းများမှာ ထပ်မံ၍ အသွင်ပြောင်းလဲသွားခဲ့ပြီဖြစ်ပြီး သွေးတစ်စက်ချင်းစီတိုင်းတွင် နက်နဲလှပြီး ထိတ်လန့်ဖွယ်ကောင်းသော အငွေ့အသက်များ ပြည့်နှက်နေခဲ့သည်။

သွေးတစ်စက်တည်းဖြင့်ပင် တောင်တန်းများနှင့် မြစ်ချောင်းများကို ဖိနှိပ်ထားနိုင်စွမ်း ရှိပေသည်။

ဤအရာက ဧကရာဇ်တစ်ပိုင်းတစ်ပါး၏ ကြောက်မက်ဖွယ်ကောင်းသော စွမ်းအားပင် ဖြစ်သည်။

"ငါ့ရဲ့ သွေးမျိုးဆက်ကို အခြေခံအုတ်မြစ်အဖြစ် အသုံးချပြီး၊ ဧကရာဇ်ကျမ်းစာကြီးနှစ်စောင်ကို ဖြည့်စွက်ကာ အခြားသော ကျင့်စဉ်အမွေအနှစ်တွေကိုပါ ပေါင်းစပ်လိုက်မယ်ဆိုရင် ကုမိသားစုနဲ့ အမှန်တကယ် သက်ဆိုင်မယ့် ကျင့်စဉ်တစ်ခုကို ငါ သေချာပေါက် ဖန်တီးနိုင်လိမ့်မယ်လို့ ယုံကြည်တယ်။"

ကုချင်းဖန်သည် ချက်ချင်းပင် စိတ်ကူးစိတ်သန်းများကို ရှာဖွေတွေ့ရှိသွားခဲ့တော့သည်။

ချက်ချင်းပင် သူသည် မိမိ၏မျက်လုံးများကို တိတ်တဆိတ် မှိတ်လိုက်ရာ သူ၏စိတ်အာရုံမှာ ယခင်က မရှိဖူးသေးသော ငြိမ်းချမ်းတည်ငြိမ်မှုထဲသို့ ဝင်ရောက်သွားခဲ့ပြီး၊ ခန်းမကြီးအတွင်း၌ နတ်ဘုရားတာအိုစည်းချက်များ ပေါ်ထွက်လာခဲ့သလို အမျိုးမျိုးသော ဆန်းပြားလှသော ဖြစ်စဉ်များကလည်း အစဉ်မပြတ် ပြောင်းလဲဖြစ်ပေါ်နေခဲ့တော့သည်။