အခန်း ၃၅၂

အခန်း (၃၅၂)

ယန်ဘုရင်၏ ညီလာခံခန်းမထဲတွင်။

" အရှင်မင်းကြီး ချင်နိုင်ငံက ကျူးကျော်ဖို့ စစ်တပ်ကို စေလွှတ်လိုက်ပါပြီ။ သူတို့က ကျွန်တော်မျိုးတို့ ယန်နယ်စပ်စထန်းကို ထိုးဖောက်ပြီး ယွင်တုံနယ်စပ်မြို့ဆီကို ချီတက်လာပါပြီ။ " သတင်းပို့သူက ဒူးထောက်ပြီး ကြောက်လန့်စွာ ပြောလိုက်သည်။

သူ၏ စကားဆုံးသည်နှင့် ညီလာခံတစ်ခုလုံးက ထိတ်လန့်တုန်လှုပ်သွားကြသည်။ ပလ္လင်ပေါ်တွင် ထိုင်နေသော ယန်ဘုရင်ကလည်း ထိတ်လန့်သွားသည်။

" ဘယ်လိုလုပ်ဖြစ်နိုင်မှာလဲ။ ငါတို့ ချင်နိုင်ငံကို သံတမန်အဖွဲ့က မကြာသေးခင်ကမှ စေလွှတ်လိုက်တာ မဟုတ်ဘူးလား။ "

"ချင်နိုင်ငံက ရုတ်တရက် ဘာလို့တိုက်ခိုက်တာလဲ။ ဒါက အကြောင်းမဲ့စစ်ပွဲပဲ။ "

" ချင်နိုင်ငံက ချီနဲ့ ချူနိုင်ငံတို့ စစ်ကူစေလွှတ်မှာကို မကြောက်ဘူးလား။ "

ခန်းမထဲရှိ ဝန်ကြီးများက ထိတ်လန့်စွာဖြင့် ဆွေးနွေးနေကြသည်။ သူတို့က ချင်နိုင်ငံကို အလွန်ကြောက်လန့်နေကြပြီဖြစ်သည်။

" တော်ကြစမ်း။ " ယန်ဘုရင်က အေးစက်စွာ အော်ဟစ်လိုက်သည်။

" စိတ်ထိန်းပါ အရှင်မင်းကြီး။ " ဝန်ကြီးများအားလုံးက ဦးညွှတ်လိုက်ကြသည်။

" ချင်နိုင်ငံက တကယ်တိုက်ခိုက်တာ သေချာရဲ့လား။ " ယန်ဘုရင်က သတင်းပို့သူကို ကြည့်ပြီး မေးလိုက်သည်။

" အရှင်မင်းကြီး သေချာပါတယ်။ ချင်နိုင်ငံက လက်စားချေမယ်ဆိုပြီး မြင်းစီးစစ်သည်တစ်သိန်းကို စေလွှတ်ပြီး နယ်စပ်ကနေ ကျူးကျော်ဝင်ရောက်လာပါတယ်။ ကျွန်တော်မျိုးတို့ ယန်စစ်သည်တစ်ယောက်မှ အသက်ရှင်မကျန်တော့ပါဘူး။ "

" ချင်စစ်တပ်က တစ်လမ်းလုံးတိုက်ခိုက်လာတာပါ။ ကျွန်တော်မျိုးတို့ ယန်နယ်စပ်စခန်းကို ကာကွယ်နေတဲ့ စစ်သည်တစ်သိန်းနီးပါးကို ချင်စစ်တပ်က သတ်ဖြတ်လိုက်ပါပြီ။ လူရာဂဏန်းလောက်ပဲ ယွင်တုန်မြို့ထဲကို ထွက်ပြေးလွတ်မြောက်ခဲ့ပါတယ်။ ဒါ့အပြင် ချင်မြင်းတပ်တင်မဟုတ်ဘဲ ဝူအန်းစခန်းတစ်ခုလုံး လှုပ်ရှားနေပုံရပါတယ်။ " သတင်းပို့သူက ထိတ်လန့်စွာဖြင့် ပြန်ဖြေလိုက်သည်။

ထိုစကားများကို ကြားသောအခါ ယန်ဘုရင်၏ အမူအရာက ပို၍ တင်းမာလာသည်။

" ဘာလို့ဒီလိုဖြစ်နေတာလဲ။ ချင်နိုင်ငံက အကြောင်းရင်းမရှိဘဲ ဘယ်တော့မှ မလှုပ်ရှားဘူး။ ပြီးတော့ ငါစေလွှတ်လိုက်တဲ့ သံတမန်တွေကလည်း အခုထိ ပြန်မရောက်သေးဘူး။ သံတမန်တွေက တစ်ခုခုများ ဖြစ်သွားတာလား။ " ယန်ဘုရင်၏ စိတ်က ပို၍ လေးလံလာသည်။

" ချီနဲ့ချူနိုင်ငံကို သံတမန်တွေ စေလွှတ်လိုက်။ ချင်နိုင်ငံက ယန်နိုင်ကို တိုက်ခိုက်နေကြောင်း အသိပေးပြီး မဟာမိတ်စာချုပ်အတိုင်း ယန်နိုင်ငံကို ကူညီဖို့ စစ်တပ်စေလွှတ်ဖို့ တောင်းဆိုလိုက်ပါ။ " ယန်ဘုရင်က စိတ်ကို ထိန်းချုပ်ပြီး အမိန့်ပေးလိုက်သည်။

သူ၏ ယန်နိုင်ငံက အခြားနိုင်ငံနှစ်ခုနှင့် မဟာမိတ်စာချုပ် လက်မှတ်ထိုးထားသည်။ ချင်နိုင်ငံ၏ မတရားသော တိုက်ခိုက်မှုကြောင့် ထိုနိုင်ငံနှစ်ခုက စစ်ကူစေလွှတ်မည်မှာ သေချာ​သည်။

" အမိန့်အတိုင်းပါ။ " သံတမန်ရေးရာဝန်ကြီးက ချက်ချင်း ပြန်ပြောလိုက်သည်။

" စစ်သေနာပတိချုပ်ချင်ချင်း " ယန်ဘုရင်က ခေါ်လိုက်သည်။

" စစ်သည်သစ်စုဆောင်းတာနဲ့ လေ့ကျင့်တာက ဘယ်လိုရှိလဲ။ " ယန်ဘုရင်က မေးလိုက်သည်။

" လွန်ခဲ့တဲ့ သုံးလကတည်းက စုစည်းခဲ့တာ လူပေါင်း တစ်သိန်းခွဲတောင် မပြည့်ပါဘူး။ သူတို့အားလုံးက အခြေခံလေ့ကျင့်ထားပြီး တိုက်ခိုက်ရေးစွမ်းအား မပြည့်မီသေးပါဘူး။ ပြီးတော့ သံချပ်ကာ၊ လက်နက်တွေနဲ့ အခြားပစ္စည်းတွေကိုလည်း မဖြန့်ဝေရသေးပါဘူး။ " ချင်ချင်းက ပြန်ဖြေလိုက်သည်။

" ဘာလို့ဒီလောက်တောင် နှေးရတာလဲ။ " ယန်ဘုရင်က မျက်မှောင်ကြုတ်သွားသည်။

" အရှင်မင်းကြီး အချိန်က တိုလွန်းပါတယ်။ အခုအချိန်မှာ စစ်သည်တစ်သိန်းခွဲက အတင်းအကျပ် စုဆောင်းရတာပါ။ " ချင်ချင်းက ကူကယ်ရာမဲ့စွာဖြင့် ပြောလိုက်သည်။

ချင်နိုင်ငံက အလွန်သန်မာသည်ကို လူတိုင်းသိကြသည်။ စစ်သည်စုဆောင်းခြင်းက ချင်စစ်တပ်ကို ရင်ဆိုင်ခြင်းဖြစ်ပြီး ၎င်းက သေခြင်းတရားကို ရင်ဆိုင်ရခြင်းဖြစ်သည်ကို ပြည်သူများက သိကြသည်။ ယန်ဘုရင် အမိန့်ထုတ်​ပြန်သောအခါ အစပိုင်းတွင် မစုဆောင်းနိုင်သည့်အတွက် ချင်ချင်းက ယန်ဘုရင်၏ အမိန့်အတိုင်း အတင်းအကျပ် စုဆောင်းခဲ့ရသည်။

အတင်းအကျပ် စုဆောင်းခံရသည့် စစ်သည်တစ်သိန်းခွဲက လေ့ကျင့်ရေးကို ကောင်းကောင်းမရရှိထားကြဘဲ အများစုမှာ လက်နက်ပင်မရှိကြပေ။ ထိုစစ်သည်များက ချင်စစ်တပ်ကို ရင်ဆိုင်ရလျှင် ရလဒ်က တစ်ခုသာ ရှိလေသည်။

" အမိန့်ထုတ်ပြန်လိုက်။ လက်နက်နဲ့ သံချပ်ကာ ထုတ်လုပ်ဖို့ နိုင်ငံတစ်ခုလုံးကို လှုပ်ရှားစေ။ ချီနဲ့ချူနိုင်ငံက ကူညီမယ်ဆိုပေမယ့် ယန်နိုင်ငံကလည်း မပြင်ဆင်ထားလို့မရဘူး။ " ယန်ဘုရင်က ညွှန်ကြားလိုက်သည်။

" သေစမ်း။ ချင်နိုင်ငံက ဒီလောက်မြန်မြန် လှုပ်ရှားလာတာ။ ငါပြင်ဆင်ဖို့တောင် အချိန်မရတော့ဘူး။ " ယန်ဘုရင်က စိတ်ထဲမှ ကျိန်ဆဲလိုက်သည်။

ချင်နိုင်ငံက ရုတ်တရက် လှုပ်ရှားရသည့် အကြောင်းရင်းကို သူနားမလည်ပေ။ သူတို့က ဝေနိုင်ငံကို သိမ်းပိုက်ပြီးသည်မှာ ခြောက်လပင်မပြည့်သေးပေ။ သူတို့ တိုက်ခိုက်လျှင် နိုင်ငံသုံးခုကို ရင်ဆိုင်ရမည်ဖြစ်သည်။

အိမ်ရှေ့စံမင်းသားစံအိမ်တွင်။

ယန်တန်က လက်နောက်ပစ်၍ ရပ်နေပြီး သူ၏ မျက်လုံးများထဲတွင် မျှော်လင့်ချက်အရိပ်အယောင်များ ပေါ်နေသည်။

" အချိန်ကို တွက်ကြည့်ရင် ချင်ဝူယန်နဲ့ ကျင်းခဲတို့ အောင်မြင်သွားလောက်ပြီ။ ဘယ်လိုပဲဖြစ်ဖြစ် ဒီတစ်ခါတော့ ရင်ကျန့် သေမှာသေချာတယ်။ " ယန်တန်က သူ၏ အစီအစဉ်မှာ အမှားအယွင်မရှိနိုင်ဟု ယုံကြည်နေသည်။

" ကျန်းလီ မင်းက တစ်ခုခုစိုးရိမ်နေတာလား။ " ယန်​တန်က နောက်လှည့်ကြည့်ပြီး မေးလိုက်သည်။

" အရင်တုန်းက ဟန်တန်မှာ ငါတို့သုံးယောက် အပြန်အလှန် မှီခိုခဲ့ရတာ။ အခုတော့ အခြေအနေက ဒီလိုဖြစ်သွားပြီ။ အဲ့ဒီရက်တွေကို တွက်ကြည့်ရင် ငါစိတ်ထဲမှာ မအေးချမ်းနိုင်ဘူး။ " ယန်တန်၏ နောက်တွင် ကုချင်းကို ကိုင်ထားသော လူတစ်ယောက်က လမ်းလျှောက်ထွက်လာသည်။

" ရင်ကျန့်က အရင်တုန်းက ကျောက်ကျန့်မဟုတ်တော့ဘူး။ အရင်တုန်းက သူက သူ့နိုင်ငံကို ပြန်ရောက်ရင် ကျောက်နိုင်ငံကို ဖျက်ဆီးပြီး ယန်နိုင်ငံကို ထောက်ပံ့မယ်လို့ ပြောခဲ့တယ်။ ဒါပေမယ့် သူဘာလုပ်ခဲ့လဲ။ ကျောက်နိုင်ငံ ကျူးကျော်တုန်းက သူ ဘေးကနေ ရပ်ကြည့်နေခဲ့တယ်။ ငါတို့ယန်နိုင်ငံရဲ့ ကြီးမားတဲ့ အင်အားကို စတေးပြီးမှ သူက စစ်တပ်စေလွှတ်ဖို့ သဘောတူခဲ့တာပဲ။ ဒီလို ကတိပျက်တဲ့လူက တကယ်ရွံစရာကောင်းတယ်။ " ယန်တန်က မုန်းတီးမှုများဖြင့် ပြောလိုက်သည်။

ကောင်းကျန်းလီက ခေါင်းခါလိုက်သည်။ ယန်တန်က ရိုးအပြီး ကလေးဆန်လှသည်။ သူတို့ ယန်နိုင်ငံတွင် ဓားစာခံအဖြစ် ရှိနေတုန်းက ရင်ကျန့်က အသက်ဘယ်လောက်တောင် ရှိသေးလို့လဲ။ ကလေးတစ်ယောက်၏ စကားကို ယန်တန်က အမှန်တကယ် ယုံကြည်ခဲ့သည်။ ထို့အပြင် နိုင်ငံများကြားတွင် အကျိုးစီးပွားက အဓိကဖြစ်သည်။

" ရင်ကျန့် သေသွားရင် ချင်နိုင်ငံက ဖရိုဖရဲ ဖြစ်သွားလိမ့်မယ်။ အဲ့ဒီအချိန်ကျရင် ကျင့်သုံးနိုင်ငံက နယ်မြေတွေကလည်း ရှုပ်ထွေးသွားလိမ့်မယ်။ အဲ့ဒီအချိန်ကျရင် ငါတို့ ယန်နိုင်ငံက အခွင့်အရေးယူပြီး နယ်မြေချဲ့ထွင်နိုင်လိမ့်မယ်။ ချင်နိုင်ငံက သတင်းရောက်လာတဲ့အခါ ခမည်းတော်က ငါကို အထင်ကြီးလေးစားပြီး ပြည်သူတွေက ငါ့ကို အားကိုးလာကြလိမ့်မယ်။ ငါယန်တန်က ယန်နိုင်ငံရဲ့ သူရဲကောင်းဖြစ်လာလိမ့်မယ်။ "ယန်တန်က စိတ်လှုပ်ရှားစွာဖြင့် ရေရွတ်လိုက်သည်။

" ဒါပေမယ့် လုပ်ကြံမှုသာ မအောင်မြင်ရင် ယန်နိုင်ငံက အန္တရာယ်ထဲ ကျရောက်သွားလိမ့်မယ်ဆိုတာ မင်းစဉ်းစားမိရဲ့လား။ ယမ်ဘုရင်ကို ချင်နိုင်ငံက သတ်ဖြတ်လိမ့်မယ်။ " ကောင်းကျန်းလီက ဖြည်းညင်းစွာ ပြောလိုက်သည်။

ယန်တန်က ချက်ချင်း ဒေါသထွက်သွားသည်။ " ဒါက မအောင်မြင်နိုင်စရာ အကြောင်းမရှိဘူး။ ငါ ဘယ်တော့မှ မရှုံးနိမ့်နိုင်ဘူး။ ယင်ကျန့်က သေကို သေရမယ်။ "

ထိုအချိန်တွင် အရာရှိတစ်ယောက်က အပြေးအလွှား ရောက်ရှိလာသည်။

" အိမ်ရှေ့စံမင်းသား တစ်ခုခုဖြစ်သွားပါပြီ။ " အရာရှိက ယန်တန်ရှေ့တွင် ဒူးထောက်လိုက်သည်။

" ဘာဖြစ်တာလဲ။ ချင်နိုင်ငံမှာ တစ်ခုခုဖြစ်သွားတာလား။ " ယန်တန်က စိတ်ထဲမှ ဝမ်းသာသွားပြီး မေးလိုက်သည်။

" အိမ်ရှေ့စံမင်းသားက ဘယ်လိုလုပ်သိတာလဲ။ " အရာရှိက အံ့ဩသွားသည်။

" ရင်ကျန့် သေသွားပြီလား။ "

" အိမ်ရှေ့စံမင်းသား ချင်ဘုရင်က ဘယ်လိုလုပ်သေမှာလဲ။ " အရာရှိက နားမလည်နိုင်စွာဖြင့် ပြောလိုက်သည်။ " ချင်စစ်တပ်က နယ်စပ်ကို ဖြတ်ကျော်ပြီး ကျွန်တော်မျိုးတို့ရဲ့ ယန်နိုင်ငံကို ကျူးကျော်လာပါပြီ။ ယန်နယ်စပ်မှာ ကာကွယ်နေတဲ့ စစ်သည်တစ်သိန်းကျော်ကိုလည်း ချင်စစ််တပ်က အားလုံးနီးပါးကို သတ်ဖြတ်လိုက်ပါတယ်။ ချင်စစ်တပ်က ကျွန်တော်တို့ ယန်နိုင်ငံကို တိုက်ခိုက်နေပါပြီ။ "

ယန်တန်က ထိတ်လန့်သွားပြီး သူ၏ မျက်နှာက ဖြူဖျော့သွားကာ ခြေလှမ်းများပင် ယိမ်းယိုင်သွားသည်။

" အိမ်ရှေ့စံမင်းသား ဘာဖြစ်တာလဲ။ " အရာရှိက အံ့ဩစွာဖြင့် မေးလိုက်သည်။

ကောင်းကျန်းလီ၏ အမူအရာကလည်း ပြောင်းလဲသွားသည်။ " ငါတို့ ရှုံးနိမ့်သွားပြီ။ သေချာပေါက် ရှုံးနိမ့်သွားပြီ။ အဲ့ဒါကြောင့် ချင်နိုင်ငံက ယန်နိုင်ငံကို တိုက်ခိုက်ခဲ့တာပဲ။ "

" မဖြစ်နိုင်ဘူး။ ရင်ကျန့်က ကျင်းခဲရဲ့ တိုက်ခိုက်မှုကို ဘယ်လိုလုပ်လွတ်မြောက်နိုင်မှာလဲ။ ဒီလောက်ပြည့်စုံတဲ့ အစီအစဉ်ကို လုပ်ကြံမှုက ဘာလို့မအောင်မြင်တာလဲ။ ကောင်ကင်ဘုံက ငါတို့ ယန်နိုင်ငံကို တကယ်ပဲ ဖျက်ဆီးချင်နေတာလား။ " ယန်တန်၏ ခန္ဓာကိုယ်က တုန်ယင်နေသည်။

ချင်စစ်တပ်က တိုက်ခိုက်လာသည်ဟု ကြားလိုက်ရသည့် သတင်းကို ကြားလိုက်ရသည်နှင့် လုပ်ကြံမှုမအောင်မြင်သည်ကို သူ နားလည်လိုက်သည်။ မဟုတ်လျှင် ချင်နိုင်ငံက အကြောင်းရင်းမရှိဘဲ တိုက်ခိုက်မည်မဟုတ်ပေ။

" ချင်စစ်တပ်က လက်စားချေမယ်ဆိုပြီး ကျွန်တော်တို့ ယန်နိုင်ငံကို တိုက်ခိုက်လာတာ။ အရှင်မင်းကြီးက ချီနဲ့ ချူနိုင်ငံတွေကို သံတမန်စေလွှတ်ပြီး စစ်ကူလွှတ်ဖို့ တောင်းဆိုထားတယ်။ ချင်စစ်တပ်က မတရားတဲ့ စစ်ပွဲကို စတင်လိုက်တာမလို့ သူတို့က ရပ်ကြည့်နေမှာမဟုတ်ဘူး။ သေချာပေါက် စစ်ကူလွှတ်မှာပဲ။ အိမ်ရှေ့စံမင်းသား အရမ်းစိုးရိမ်နေစရာမလိုပါဘူး။ " အရာရှိက ပြောလိုက်သည်။

" အကြောင်းပြချက်မရှိဘူးတဲ့လား။ " ယန်တန်၏ မျက်နှာက ပို၍ ဖြူဖျော့သွားသည်။

" ငါ ခမည်းတော်ကို ဘယ်လို မျက်နှာပြရမလဲ။ ယန်ဝန်ကြီးတွေကို ဘယ်လိုမျက်နှာပြရမလဲ။ " ယန်တန်က စိတ်ထဲမှ ကြောက်ရွံ့သွားသည်။

သူက အမြဲတမ်း သူ့ကိုသူသက်သေပြချင်ခဲ့သည်။ ထို့ကြောင့် ထိုလုပ်ကြံမှုက သူ့ကိုသူ သက်သေပြရန် အကောင်းဆုံး အခွင့်အရေးဖြစ်သည်။ အကယ်၍ အောင်မြင်ခဲ့လျှင် သူ၏ ခမည်းတော်နှင့် ဝန်ကြီးများက ဘယ်လောင်တောင်ချီးကျူးမလဲ စိတ်ကူးကြည့်နိုင်လေသည်။ သို့သော် ယခုတော့ အရာအားလုံးက စိတ်ကူးယဉ်သက်သက် ဖြစ်သွားခဲ့သည်။

စစ်မြေပြင်မှ ထာဝရရှင်သန်ခြင်းဆီသို့