အခန်း ၈၁၁

အခန်း (၈၁၁) အမြင့်မြတ်ဆုံး စွမ်းအားလမ်းစဉ်၊ သိုင်းဝိဇ္ဇာသူတော်စင် ကျဆုံးခြင်း။ (၁)

"ဒါက စစ်မှန်တဲ့ ခွန်အားချင်း ယှဉ်ပြိုင်မှုပဲ၊ ကံကောင်းမှုဆိုတာ မရှိဘူး။"

အလောင်းကောင် အဖိုးအိုက လေးလံသော စိတ်နှလုံးဖြင့် ရေရွတ်လိုက်မိသည်။ စူးချန်ခုန်းနှင့် ဝေ့ရှန့်ရှင်းတို့၏ အဆင့်တွင် နည်းပရိယာယ်များမှာ အသုံးမဝင်သလောက် ဖြစ်နေလေပြီ။ ချောင်းမြောင်း တိုက်ခိုက်ခြင်း သို့မဟုတ် ရုတ်တရက် သေစေနိုင်သော လှည့်ကွက်များမှာလည်း အရာမထင်တော့ပေ။ ဆောင်းဦးလေပြေကို ကြိုသိသော ပုစဉ်းရင်ကွဲကဲ့သို့ပင် ပြိုင်ဘက်မှာ အန္တရာယ်ကို ကြိုတင်အာရုံခံမိပြီး တုံ့ပြန်နိုင်စွမ်း ရှိကြသည်။

တစ်ဖက်က အခြားတစ်ဖက်ကို လုံးဝနှိမ်နင်းနိုင်လောက်အောင် အစွမ်းထက်နေမှသာလျှင် သို့မဟုတ် ပြိုင်ဘက်က အန္တရာယ်ကို သတိမထားမိလောက်အောင် ဖြစ်နေမှသာလျှင် အောင်နိုင်ပေလိမ့်မည်။ ထို့ကြောင့် စစ်မှန်သော ခွန်အားချင်း ထိပ်တိုက်ရင်ဆိုင်မှုနှင့် ထိုခဏချင်း တုံ့ပြန်မှုများကသာ အနိုင်အရှုံးကို ဆုံးဖြတ်ပေးနိုင်မည် ဖြစ်သည်။

ကျီးရွှယ်ရှောင်းသည်လည်း သူမ၏ စိတ်ဝိညာဉ်ကို စုစည်းထားပြီး အကယ်၍ စူးချန်ခုန်းသာ အရေးနိမ့်တော့မည်ဆိုပါက သူမသည်လည်း နတ်ဘုရားမျိုးစေ့ကို ထုတ်ယူကာ ချက်ချင်းပင် သိုင်းဝိဇ္ဇာ သူတော်စင်အဆင့်သို့ တက်လှမ်းပြီး စူးချန်ခုန်းနှင့် ပူးပေါင်းကာ ဝေ့ရှန့်ရှင်းကို တိုက်ခိုက်ရန် အသင့်ပြင်ထားသည်။

အောက်ဘက်ရှိ မိစ္ဆာတောင်တန်းတွင် ကောင်းကင်နှင့် မြေကြီးကို ခွဲထုတ်နိုင်လောက်သော စွမ်းအားများ ပါရှိသည့် နဂါးမြွေကြီးများကဲ့သို့ လက်တံများသည် အရပ်မျက်နှာအနှံ့မှ စူးချန်ခုန်းကို ဝိုင်းရံတိုက်ခိုက်နေသည်။ ဝေ့ရှန့်ရှင်းက သိုင်းဝိဇ္ဇာသူတော်စင်အဆင့်သို့ ရောက်သွားပြီဖြစ်ရာ နတ်ဘုရားမျိုးစေ့မှာလည်း သူနှင့် အပြီးသတ် ပေါင်းစပ်သွားခဲ့ပြီ ဖြစ်သည်။ ထို့ကြောင့် သူသည် နတ်ဘုရားစွမ်းရည်များ၏ ကြီးမားသော စွမ်းအားကို အပြည့်အဝ ထုတ်ဖော်နိုင်ပြီ ဖြစ်သည်။ မိစ္ဆာဧကရာဇ် သားရဲမှ ထွက်ပေါ်လာသော နတ်ဘုရားစွမ်းရည်များသည် အဆုံးမဲ့ပင်လယ်၏ အရှင်သခင်ကဲ့သို့ ခန့်ညားထည်ဝါလှပြီး လှုပ်ရှားမှု တစ်ချက်တည်းဖြင့်ပင် တောင်တန်းများကို ကြိတ်ခြေကာ ချိုင့်ဝှမ်းများကို နှစ်ခြမ်းခွဲပစ်နိုင်စွမ်း ရှိသည်။

"သေစမ်း။ ငါ မင်းကို အသေရမှ ကျေနပ်မယ်။"

ဝေ့ရှန့်ရှင်းကတော့ အသိစိတ် လုံးဝ ပျောက်ဆုံးနေပြီ ဖြစ်သည်။ သူ၏ မျက်ဝန်းများမှာ သွေးရောင်လွှမ်းနေပြီး သူ၏ ကျင့်ကြံခြင်းလမ်းကြောင်းကို ဖျက်ဆီးခဲ့သော စူးချန်ခုန်းကို အကြီးမားဆုံးသော ပေးဆပ်မှုမျိုး မပေးရမချင်း သူ ရပ်တန့်မည်မဟုတ်ပေ။

"ဒါဆိုလည်း... လာခဲ့စမ်း။"

စူးချန်ခုန်း၏ အရေပြားမှာ မီးတောက်ကဲ့သို့ နီမြန်းလာပြီး သူ၏ ခန္ဓာကိုယ်ပေါ်မှ ရှေးဟောင်း တိုက်ပွဲဝင် အမှတ်အသားများက ခမ်းနားထည်ဝါစွာ တောက်ပနေသည်။ သူ့ခန္ဓာကိုယ်မှ ထွက်ပေါ်လာသော အပူရှိန်မှာ လေဟာနယ်ကိုပင် လောင်ကျွမ်းစေတော့မလိုပင်။ သိုင်းဝိဇ္ဇာသူတော်စင်တစ်ဦးကို ထိပ်တိုက်ရင်ဆိုင်ရခြင်းက သူ၏ တိုက်ပွဲဝင်လိုစိတ်ကို ပိုမိုပြင်းထန်စေသည်။ သူ၏ နတ်ဘုရားသွေးများမှာ ရူးသွပ်စွာ စီးဆင်းနေပြီး သူ၏ ခန္ဓာကိုယ်မှာ ရုပ်ပိုင်းဆိုင်ရာ ကျင့်ကြံမှုကို အဓိကမထားသော သာမန် သိုင်းဝိဇ္ဇာသူတော်စင်များထက်ပင် ပိုမိုသန်မာနေပြီ ဖြစ်သည်။

"ဂျောက် ဂျောက် ဂျောက်"

စူးချန်ခုန်း၏ ဝိညာဉ်စွမ်းအင်ဗဟိုချက်အတွင်း၌ ဆန်းကြယ်လိပ် ချီစွမ်းအင်အရည် တစ်စက်၊ နှစ်စက်... စုစုပေါင်း ၁၀ စက်မှာ တစ်ပြိုင်နက်တည်း ပေါက်ကွဲထွက်ပေါ်လာသည်။ ကြောက်မက်ဖွယ်ကောင်းသော အတွင်းစွမ်းအားများသည် သူ၏ အကြောများ၊ အရိုးများနှင့် ကြွက်သားများအတွင်းမှ ထွက်ပေါ်လာပြီး နက်ရှိုင်းသော ပင်လယ်ကြီးတစ်ခု မြည်ဟိန်းနေသကဲ့သို့ပင်။

အကယ်၍ စူးချန်ခုန်း၏ နတ်ဘုရားသွေးများ ရူးသွပ်စွာ မစီးဆင်းနေဘဲ ဧရာမဝေလငါး ခန္ဓာကိုယ် နည်းစနစ်ကိုသာ အသုံးမပြုထားပါက ဤကဲ့သို့ ချီစွမ်းအင်အရည် ၁၀ စက်ကို တစ်ပြိုင်နက်တည်း ထုတ်လွှတ်ခြင်းမှာ သေကြောင်းကြံခြင်းသာ ဖြစ်သည်။ ထိုသို့ ကျင့်ကြံထားလျှင်ပင် ၁၀ စက်မှာ သူ၏ လက်ရှိ အဆုံးစွန်သော ကန့်သတ်ချက် ဖြစ်နေပြီး သူ၏ ခန္ဓာကိုယ်မှာ ပြိုကွဲတော့မည့်အလား ဖိအားများကို ခံစားနေရသည်။ ထို့ထက်ပို၍ ထုတ်သုံးလိုက်ပါက သူ၏ အကြောများနှင့် အရိုးများကို တိုက်ရိုက် ပျက်စီးစေမည် ဖြစ်သည်။

ဝူချင်းရှီ၊ ဝက်ဝံရိုင်း မြေပြင် တုန်ခါစေခြင်း။

စူးချန်ခုန်း၏ စိတ်ဆန္ဒမှာ ပုံဖော်လာပြီး သူ၏ နောက်ကျောတွင် ကြီးမားလှသော ဝက်ဝံကြီး၏ ပုံရိပ်တစ်ခု ပေါ်ထွက်လာသည်။ ကြီးမားလှသော ဆန်းကြယ်လိပ် ချီစွမ်းအင်အရည်များ၏ တွန်းအားကြောင့် ဝက်ဝံကြီး၏ ပုံစံမှာ လျင်မြန်စွာ ခိုင်မာလာပြီး အမြင့်ပေ ၁၀၀ ခန့်အထိ ကြီးထွားလာသည်။ ၎င်း၏ အညိုရောင် အမွေးအမျှင်များနှင့် တောင်ကြီးတစ်လုံးအလား ကြီးမားသော လက်သည်းခွံကြီးများမှာ နတ်ဘုရားစွမ်းရည်များထဲတွင် မြင်တွေ့ရသော စစ်မှန်သော နတ်သားရဲ ဝက်ဝံရိုင်းကြီးနှင့် မခြားတော့ပေ။

ထက်လှသော အစွယ်များကို ထုတ်ကာ ရက်စက်ကြမ်းကြုတ်မှုများကို ပျံ့နှံ့စေရင်း ထိုဝက်ဝံရိုင်းကြီးမှာ ၎င်း၏ လက်သည်းခွံကြီးများကို အထက်သို့ မြှောက်လိုက်သည်။ ၎င်းမှာ နှေးကွေးသည်ဟု ထင်ရသော်လည်း အမှန်တကယ်တွင်မူ လျှပ်စီးကဲ့သို့ မြန်ဆန်လှပြီး အချိန်နှင့် ဟင်းလင်းပြင်ကိုပင် လိမ်ရှုံ့သွားစေကာ မြေပြင်ပေါ်သို့ ပြင်းထန်စွာ ရိုက်ချလိုက်တော့သည်။

"ဝုန်း ဝုန်း ဝုန်း"

ဝက်ဝံကြီး၏ လက်သည်းများ မြေပြင်ကို ထိမှန်သည့် ခဏတွင် ကမ္ဘာမြေကြီးမှာ အကြီးအကျယ် တုန်လှုပ်သွားတော့သည်။ အဆုံးမရှိသော လေမုန်တိုင်းများ တိုက်ခတ်လာပြီး စူးချန်ခုန်းကို ဗဟိုပြုကာ ရိုက်ခတ်မှု လှိုင်းလုံးများသည် ကောင်းကင်နှင့် မြေပြင်သို့ ပျံ့နှံ့သွားသည်။ မြေပြင်မှာ နိမ့်ဆင်းသွားပြီး သဲများနှင့် လေမုန်တိုင်းများမှာ ရောနှောကာ ကောင်းကင်သို့ ထိုးတက်သွားသော လေဆင်နှာမောင်းကြီးများ ဖြစ်လာသည်။ မိုင်ပေါင်းများစွာအတွင်း မြေပြင်မှာ ပြိုလဲသွားပြီး ဥက္ကာခဲ ထိမှန်ထားသကဲ့သို့ ကြီးမားသော ကျင်းကြီးတစ်ခု ဖြစ်ပေါ်လာသည်။

"ဝုန်း ဝုန်း ဝုန်း"

လေထဲတွင် ပေါက်ကွဲသံများ ဆက်တိုက် ထွက်ပေါ်လာပြီး စူးချန်ခုန်းကို ရစ်ပတ်တိုက်ခိုက်နေသော လက်တံများသည် ဝက်ဝံရိုင်း မြေပြင် တုန်ခါစေခြင်း၏ ရိုက်ခတ်မှုအောက်တွင် ကြေမွသွားရသည်။ နဂါးမြွေကြီးများကဲ့သို့ ကြီးမားသော လက်တံပုံစံများသည် ပြင်းထန်စွာ လွင့်စင်သွားပြီး ထူထဲသော အကြေးခွံများမှာလည်း ကြွေကျပျက်စီးသွားတော့သည်။

ဝေ့ရှန့်ရှင်းပင်လျှင် အဝေးမှနေ၍ ဆန်းကြယ်လိပ် ချီစွမ်းအင်အရည် ၁၀ စက်၏ ပေါက်ကွဲအားဒဏ်ကို ခံလိုက်ရသဖြင့် တိုက်ရိုက်ထိမှန်ခြင်းမှ ရှောင်ရှားနိုင်ရန် မိစ္ဆာဧကရာဇ် သားရဲ၏ ကြီးမားသော ခန္ဓာကိုယ် နောက်ကွယ်တွင် ပုန်းအောင်းလိုက်ရသည်။

"ဒါ... ဒါ ဘယ်လို ဖြစ်နိုင်မှာလဲ။ သိုင်းဝိဇ္ဇာသူတော်စင်ရဲ့ အရှိန်အဝါ အောက်မှာ သူက သဘာဝတရားရဲ့ ဝိညာဉ်စွမ်းအင်တွေကို မထိန်းချုပ်နိုင်ရဘူးလေ။ ဒါပေမဲ့ သူက ဘယ်လိုလုပ် ငါ့ရဲ့ မိစ္ဆာဧကရာဇ် သားရဲကို ပြန်ပြီး ခုခံနိုင်တာလဲ"

ဝေ့ရှန့်ရှင်းမှာ မယုံကြည်နိုင်လောက်အောင် ဖြစ်နေသည်။ သိုင်းဝိဇ္ဇာသူတော်စင် ဖြစ်လာပြီးနောက် သိုင်းဝိဇ္ဇာသူတော်စင်၏ ဖိအားက အောက်အဆင့် သိုင်းပညာရှင်များကို သဘာဝတရား၏ ဝိညာဉ်စွမ်းအင် အသုံးမပြုနိုင်အောင် တားဆီးနိုင်သည်။ သဘာဝတရား၏ ဝိညာဉ်စွမ်းအင်များကို အသုံးမပြုနိုင်ဘဲနှင့် စူးချန်ခုန်းက သူ့ကိုယ်ပိုင် အတွင်းအားနှင့် ကျင့်ကြံမှုသက်သက်ဖြင့် ဤမျှ အစွမ်းထက်သော တိုက်ခိုက်မှုကို ပြုလုပ်နိုင်တာလား။

ဤအရာမှာ နတ်ဘုရားစွမ်းရည်များနှင့်ပင် အလားသဏ္ဍာန် တူနေပြီ ဖြစ်သည်။

"ဝေ့ရှန့်ရှင်း…သေလိုက်တော့"

စူးချန်ခုန်း၏ သတ်ဖြတ်လိုစိတ်မှာ အထွဋ်အထိပ်သို့ ရောက်ရှိသွားသည်။ သူသည် ဝက်ဝံရိုင်း မြေပြင် တုန်ခါစေခြင်းဖြင့် ရောက်ရှိလာသော လက်တံများကို ပြန်လည် တိုက်ထုတ်လိုက်ပြီးနောက် ကောင်းကင်တုန်လောက်သော အော်သံကြီးဖြင့် ကြယ်တာရာရွှေ လေးကြီးကို ထပ်ဆွဲလိုက်ပြန်သည်။

မြှားများအဖြစ် အသုံးပြုရန် သဘာဝတရား၏ ဝိညာဉ်စွမ်းအင်များကို မထိန်းချုပ်နိုင်သဖြင့် သူသည် သန့်စင်လှသော ဆန်းကြယ်လိပ် ချီစွမ်းအင်အရည်များကိုသာ မြှားများအဖြစ် ပြောင်းလဲလိုက်သည်။ ဆန်းကြယ်လိပ် ချီစွမ်းအင်အရည် ၁၀ စက်မှာ ပေါက်ကွဲသွားပြီး မြှားများအတွင်းသို့ အရူးအမူး စီးဝင်သွားသည်။

"ဂျောက် ဂျောက် ဂျောက်"

စူးချန်ခုန်း လေးကို အစွမ်းကုန်ဆွဲလိုက်သဖြင့် လေးအိမ်တစ်ခုလုံးမှာ ဖိအားဒဏ်ကြောင့် အက်ကွဲသံများ ထွက်ပေါ်လာသည်။ သူ လေးကြိုးကို လွှတ်လိုက်သည်နှင့် ဆန်းကြယ်လိပ် ချီစွမ်းအင်အရည် မြှားများသည် ပေါက်ကွဲလျက် ပြေးဝင်သွားတော့သည်။

"ဝုန်း"

မြှားမှာ နှစ်စင်းအဖြစ် ကွဲထွက်သွားပြီး လေနှင့် မိုးကြိုးများမှာ ပြင်းထန်စွာ ဟိန်းဟောက်နေသည်။ ယင်နှင့်ယန် ပြောင်းလဲသွားပြီး နေမင်းမြှားနှင့် လမင်းမြှားအဖြစ် ပုံဖော်သွားသည်။ မိစ္ဆာတောင်တန်း၏ မှောင်မည်းနေသော ညဉ့်နက်ပိုင်းတွင် အသူရိန်နေမင်းနှင့် ငွေစန္ဒာလမင်းတို့မှာ ရစ်ပတ်ထွက်ပေါ်လာရာ မိုင်ပေါင်းရာချီအတွင်းရှိ မှောင်မိုက်မှုများကို ဖယ်ရှားပစ်လိုက်ပြီး မှောင်မည်းသော တောင်တန်းကြီးများကို နေ့ခင်းဘက်ကဲ့သို့ လင်းထိန်သွားစေသည်။

"ဒါက... ဒါက နတ်ဘုရားစွမ်းရည် အဆင့်ရှိတဲ့ တိုက်ခိုက်မှုပဲ။ သူ ဒါကို ဘယ်လိုလုပ်နိုင်တာလဲ"

ကြီးမားလှသော နတ်ဘုရား အရှိန်အဝါများ ပါရှိသည့် နေလမြှားနှစ်စင်း ဝေ့ရှန့်ရှင်းထံသို့ ပြေးဝင်သွားသည်ကို ကြည့်ရင်း ကျီးရွှယ်ရှောင်းမှာလည်း တော်တော်လေး အံ့အားသင့်နေမိသည်။ ဤတိုက်ခိုက်မှု၏ ကြောက်မက်ဖွယ်ကောင်းမှုမှာ အချို့သော နတ်ဘုရားစွမ်းရည်များထက်ပင် နိမ့်ကျခြင်းမရှိပေ။ သို့သော် ဤအရာမှာ မူလနယ်ပယ်အဆင့် သိုင်းပညာရှင် တစ်ဦးထံမှ ထွက်ပေါ်လာသော တိုက်ခိုက်မှုတစ်ခုသာ ဖြစ်သည်။