အခန်း (၃၅၃-၃၅၄)

အခန်း (၃၅၃) - မှော်မျှော်စင်

မြို့ထဲတွင် လဝက်ခန့်နေထိုင်ပြီးနောက် ရွှီနင်သည် မြို့၏အခြေအနေကို အကြမ်းဖျင်း နားလည်သဘောပေါက်သွားလေပြီ။

မှော်ပညာမြို့တော်အား အဖွဲ့အစည်းများစွာက ပူးပေါင်းအုပ်ချုပ်ကြပြီး အင်အားစုအသီးသီးတွင် မှော်ပညာရှင်ကျောင်းတော်များနှင့် မှော်ပညာရှင်မိသားစုများ ပါဝင်ကြသည်။

မြို့ပြင်ဘက်တွင် မှော်ပညာရှင်များသည် ကျောင်းတော်များသို့ ဝင်ရောက်ခြင်းဖြင့် စုစည်းကြပြီး မှော်ပညာရှင်မိသားစုများမှာမူ အလွန်နည်းပါးလှပေသည်။

သို့သော် မြို့ထဲတွင်မူ မှော်ပညာရှင်မိသားစု အရေအတွက်သည် မှော်ပညာရှင်ကျောင်းတော် အရေအတွက်နှင့် အခြေခံအားဖြင့် တူညီနေလေသည်။

ရွှီနင်သည် ကြိုတင်ပြင်ဆင်မှုအချို့ ပြုလုပ်ပြီးနောက် မှော်ပညာရှင်မိသားစုတစ်ခုသို့ ဝင်ရောက်ရန် ဆုံးဖြတ်လိုက်သည်။

မကြာသေးမီက မှော်ပညာမြို့တော်ရှိ အဓိကမှော်ပညာရှင်ကျောင်းတော်များနှင့် မှော်မိသားစုများသည် အဆင့်ခြောက်နှင့် အဆင့်ခုနစ်အထက်ရှိ အလယ်အလတ်မှ အဆင့်မြင့်မှော်ပညာရှင်များကို စုဆောင်းနေကြလေသည်။

သတင်းအချက်အလက်အချို့ကို စုံစမ်းပြီးနောက် မှော်မျှော်စင်ကြီးပွင့်တော့မည်ဖြစ်ကြောင်း ရွှီနင်သိရှိသွားလေသည်။

ထို့ကြောင့်ပင် အင်အားစုအသီးသီးသည် မျှော်စင်ထဲသို့ ဝင်ရောက်မည့်အဖွဲ့များ ဖွဲ့စည်းရန် အစွမ်းထက် မှော်ပညာရှင်များစွာကို လူသိရှင်ကြား စုဆောင်းနေခြင်းဖြစ်ပေသည်။

မှော်မျှော်စင်ကြီးမှာ မှော်ပညာရှင်မြို့တော်၏ အလယ်ဗဟိုတည့်တည့်တွင် တည်ရှိလေသည်။

ဒဏ္ဍာရီများအရ ထိုမှော်မျှော်စင်ကြီးကို လွန်ခဲ့သောနှစ်ပေါင်းများစွာက အဆင့်တစ်ဆယ် မှော်ပညာရှင်သုံးဦးပူးပေါင်း၍ တည်ဆောက်ခဲ့ခြင်းဖြစ်သည်ဟု ဆိုလေသည်။

အဆင့်တစ်ဆယ် မှော်ပညာရှင်များသည် သိုင်းလောကရှိ သိုင်းသခင်များနှင့် တန်းတူဖြစ်ပြီး သွမ့်ဟွေးယွဲ့နှင့်ယွီကျီးယင်တို့ ရောက်ရှိနေသော နယ်ပယ်ပင် ဖြစ်သည်။

ထိုအဆင့်တစ်ဆယ် မှော်ပညာရှင်သုံးဦးသည် မှော်မျှော်စင်ကြီးကို တည်ဆောက်ပြီးစီးသွားပြီးနောက် အရိပ်အယောင်ပင်မကျန်တော့ဘဲ ပျောက်ကွယ်သွားခဲ့ကြလေသည်။

ထိုအချိန်မှစ၍ မှော်ပညာရှင်လောကတွင် အဆင့်တစ်ဆယ် မှော်ပညာရှင်ဟူ၍ ထပ်မံပေါ်ထွက်လာခြင်း မရှိတော့ချေ။

အဆင့်တစ်ဆယ်သို့ တက်လှမ်းနိုင်မည့် လျှို့ဝှက်ချက်သည် မှော်မျှော်စင်ထဲတွင် ရှိနေသည်ဟု အချို့ကဆိုကြသည်။

ထိုအကြောင်းကြောင့်ပင် မှော်ပညာရှင် အင်အားစုအသီးသီးသည် ဆယ်နှစ်တစ်ကြိမ် မျှော်စင်ကြီးပွင့်လာသည့်အချိန်တိုင်း မျှော်စင်ကို စူးစမ်းလေ့လာရန်အတွက် အစွမ်းထက်မှော်ပညာရှင် အမြောက်အမြားကို စုဆောင်းလေ့ ရှိကြပေသည်။

ယခုအခါ မှော်မျှော်စင်ကြီးမှာ နောက်တစ်ကြိမ်ပွင့်လာရန် နှစ်လပင် မလိုတော့ချေ။

ရွှီနင်သည် ဤအချိန်ကာလတွင် မှော်ပညာမြို့တော်သို့ ရောက်ရှိလာခြင်းမှာ တကယ်ကို ကံကောင်းလှပေသည်။

မှော်မျှော်စင်ကြီးအား စူးစမ်းလေ့လာခွင့်ရမည့် အခွင့်အရေးကြီးသည် သူ့ရှေ့မှောက်သို့ ရောက်နေပြီဖြစ်ရာ ရွှီနင်တစ်ယောက် ဤအခွင့်အရေးကို လက်လွတ်ခံမည် မဟုတ်ပေ။

မှော်ပညာရှင်မိသားစုတစ်ခုသို့ ဝင်ရောက်ခြင်းဖြင့် သူတို့အား ကျောထောက်နောက်ခံအဖြစ် ရွေးချယ်မှုအတွက် ဆုလာဘ်အဖြစ် အရင်းအမြစ်များကို ရရှိနိုင်ရုံသာမက မှော်မျှော်စင်ထဲသို့ ဝင်ရောက်ခွင့်ပါ ရရှိနိုင်ပေသည်။

ရွှီနင်ဝင်ရောက်ရန် ရွေးချယ်လိုက်သော အင်အားစုမှာ မှော်ပညာရှင်မြို့တော်ရှိ နာမည်ကျော် ကောင်းမှော်မိသားစုပင် ဖြစ်သည်။

ဤမှော်မိသားစု၏ အလုံးစုံတိုက်ခိုက်ရေးစွမ်းရည်မှာ မှော်ပညာရှင်မြို့တော်တွင် ထိပ်ဆုံးငါးခုစာရင်း ဝင်လေသည်။

သူသည် အဘယ့်ကြောင့် အခြားမှော်ပညာရှင် အင်အားစုများကို မရွေးချယ်ဘဲ ကောင်းမှော်မိသားစုသို့ ဝင်ရောက်ခဲ့သနည်းဟူသော အကြောင်းပြချက်မှာ ရိုးရှင်းလှသည်။

အဘယ်ကြောင့်ဆိုသော် ကောင်းမှော်မိသားစုသည် လုပ်အားခ အများဆုံးပေးသောကြောင့်ပင် ဖြစ်သည်။

ကောင်းမိသားစု၏ စုဆောင်းမှုကို လက်ခံလိုက်သည်နှင့် သူဘာမှမလုပ်လျှင်ပင် ပထမအသုတ် ဆုလာဘ်များကို ရရှိမည်ဖြစ်သည်။

အကယ်၍ ထိုဆုလာဘ်များကို စွမ်းအင်ယူနစ်များအဖြစ် ပြောင်းလဲလိုက်ပါက ယူနစ် ငါးသန်းခန့် တန်ကြေးရှိလေသည်။

မျှော်စင်ထဲမှ ထွက်လာပြီးနောက် သူသည် ဒုတိယအသုတ် ဆုလာဘ်များကို ရရှိမည်ဖြစ်ပြီး ၎င်းမှာလည်း စွမ်းအင်ယူနစ် ငါးသန်းနှင့် ညီမျှပေသည်။

ဆိုလိုသည်မှာ မျှော်စင်ထဲမှ ထွက်လာပြီးနောက် ရွှီနင်သည် စွမ်းအင်ယူနစ် ဆယ်သန်းကို ရရှိမည်ဖြစ်သည်။

အဆင့်ခုနစ်မှ အဆင့်ရှစ်သို့ တက်လှမ်းရန် သူလိုအပ်သော စွမ်းအင်မှာ ယူနစ် နှစ်ဆယ့်ငါးသန်း ဖြစ်သည်။

ဤသို့လုပ်ဆောင်ခြင်းဖြင့် ရွှီနင်သည် အဆင့်တက်ရန် လိုအပ်သောစွမ်းအင်၏ လေးဆယ်ရာခိုင်နှုန်းကို စုဆောင်းမိသွားမည် ဖြစ်သည်။

ဤသည်မှာ မြို့ပြင်ဘက်တွင်ဆိုလျှင် လုံးဝစိတ်ကူးယဉ်၍ပင် မရနိုင်သောအရာ ဖြစ်လေသည်။

“ကျွန်တော်က မှော်မျှော်စင် စူးစမ်းလေ့လာရေးအဖွဲ့ထဲ ဝင်ချင်လို့လာတာပါ”

ရွှီနင်သည် ကောင်းမိသားစုထံသို့ ရောက်ရှိလာပြီးနောက် သူ၏ရည်ရွယ်ချက်ကို ရှင်းပြလိုက်သည်။

အစောင့်ဖြစ်သူက ရွှီနင်ကို ကောင်းမိသားစုအိမ်တော်ထဲသို့ ခေါ်ဆောင်သွားပြီး သက်လတ်ပိုင်းလူတစ်ဦးထံသို့ ပို့ပေးလေသည်။

ရွှီနင်သည် ထိုသက်လတ်ပိုင်းလူထံမှ အဆင့်ရှစ် မှော်ပညာရှင်တစ်ဦး၏ စွမ်းအားကြီးမားသော အရှိန်အဝါကို အာရုံခံမိလိုက်သည်။

“အဆင့်ခုနစ် မှော်ပညာရှင်လား”

သက်လတ်ပိုင်းလူက မသေချာသောအသံဖြင့် ရွှီနင်ကို မေးလိုက်သည်။

ရွှီနင်၏ စွမ်းအားကို အာရုံခံမိသောအခါ သူအနည်းငယ် ရှုပ်ထွေးသွားသည်။

“ဟုတ်ပါတယ်၊ ကျွန်တော်က အဆင့်ခုနစ် မှော်ပညာရှင်ပါ”

ရွှီနင်ကပြန်ဖြေလိုက်သည်။

“တော်တော်လေး ကောင်းမွန်တဲ့အခြေခံပဲ”

သက်လတ်ပိုင်းလူက ချီးကျူးလိုက်လေသည်။

ရွှီနင်သည် အဆင့်ခုနစ်အထွတ်အထိပ် မှော်ပညာရှင်တစ်ဦးဖြစ်ကြောင်း သူအာရုံခံမိလေသည်။

ကောင်းမိသားစု၏ စူးစမ်းလေ့လာရေးအဖွဲ့တွင် ကျွမ်းကျင်သူများ လိုအပ်နေသဖြင့် ရွှီနင်၏ဝင်ရောက်လာမှုမှာ နတ်ဒေဝါများမှ ပေးသနားလိုက်သည့် အလားပင်ဖြစ်သည်။

“မင်း အရင်က မျှော်စင်ထဲဝင်ဖူးလား”

သက်လတ်ပိုင်းလူကမေးလိုက်သည်။

“မဝင်ဖူးပါဘူး”

ရွှီနင်က ပြန်ဖြေလိုက်သည်။

“မျှော်စင်ထဲမှာ ကြွယ်ဝတဲ့ အရင်းအမြစ်မျိုးစုံရှိပေမဲ့ အန္တရာယ်တွေလည်း ပြည့်နှက်နေတယ်၊ မင်းကို ငါ မဖုံးကွယ်တော့ပါဘူး၊ သေနိုင်ခြေ အရမ်းများတယ်နော်”

သက်လတ်ပိုင်းလူမှာ အတော်လေး ရိုးသားပေသည်။ သူက အန္တရာယ်များအကြောင်းကို ရွှီနင်အား ဦးစွာရှင်းပြလေသည်။

“ကျွန်တော် နားလည်ပါတယ်”

ရွှီနင်၏ မျက်နှာအမူအရာမှာ ပြောင်းလဲသွားခြင်းမရှိချေ။

ဤမှော်မျှော်စင်သည် သိုင်းလောကရှိ လျှို့ဝှက်နယ်မြေတစ်ခုနှင့် အနည်းငယ်ဆင်တူနေသည်။

“စူးစမ်းလေ့လာရေးအဖွဲ့ထဲ ဝင်ပြီးတာနဲ့ လမ်းတစ်ဝက်မှာ နုတ်ထွက်ခွင့်မရှိဘူးနော်”

သက်လတ်ပိုင်းလူက ဆက်ပြောသည်။

“ပြီးတော့ မျှော်စင်ထဲရောက်ရင် ငါတို့ရဲ့ ညွှန်ကြားချက်တွေနဲ့ အစီအစဉ်တွေကို လိုက်နာရမယ်”

“ကောင်းပါပြီ”

ရွှီနင် ခေါင်းညိတ်လိုက်သည်။

ဤတောင်းဆိုချက်မှာ အကြောင်းပြချက် မခိုင်လုံသောအရာ မဟုတ်ပေ။

“ကောင်းပြီ၊ စာချုပ်ချုပ်ကြတာပေါ့”

သက်လတ်ပိုင်းလူက ပြောလိုက်သည်။

“စာချုပ်ချုပ်ပြီးတာနဲ့ သဘောတူညီချက်ထဲက ပထမအသုတ်ငွေကို မင်းရရှိလိမ့်မယ်၊ မှော်မျှော်စင်မပွင့်ခင် ဒီနှစ်လအတွင်းမှာ မင်း ကောင်းမိသားစုခြံဝန်းထဲမှာပဲနေပြီး နောက်ထပ်အစီအစဉ်တွေကို စောင့်ရလိမ့်မယ်”

“ရပါတယ်”

ရွှီနင်မှာ အလွန်ပွင့်လင်း ပြတ်သားလေသည်။

ထို့နောက် သက်လတ်ပိုင်းလူသည် ရွှီနင်နှင့်စာချုပ်ကို ကိုယ်တိုင်ကိုယ်ကျချုပ်ဆိုကာ လုပ်ငန်းစဉ်များကို အဆုံးသတ်လိုက်သည်။

ရွှီနင်ကို နေထိုင်ရန်နေရာတစ်ခု စီစဉ်ပေးလိုက်ပြီး တစ်စုံတစ်ယောက်က ပထမဆုံးလုပ်အားခကို လာရောက်ပေးအပ်လေသည်။

ရွှီနင်သည် အချိန်ဖြုန်းမနေတော့ချေ။ စွမ်းအင်ယူနစ် ငါးသန်းတန်ကြေးရှိသော အရင်းအမြစ်များကို သူတိုက်ရိုက် စုပ်ယူလိုက်တော့သည်။

‘မှော်ပညာမြို့တော်ဆိုတဲ့အတိုင်းပဲ၊ ဒီနေရာမှာ အရင်းအမြစ်တွေရဖို့က ပြင်ပလောကထက် အများကြီး ပိုလွယ်ကူတာပဲ’

အရင်းအမြစ်များကို စုပ်ယူပြီးနောက် ရွှီနင် သက်ပြင်းချလိုက်မိသည်။

အဆင့်ခုနစ်သို့ တက်လှမ်းရန် လိုအပ်သော စွမ်းအင်ယူနစ် သုံးသန်းကို စုဆောင်းရန် သူနှစ်နှစ်နီးပါး အချိန်ယူခဲ့ရသည်။

သို့သော် ယခုမူ စွမ်းအင်ယူနစ်ငါးသန်းရရှိရန် အလွန်လွယ်ကူလွန်းနေသည်။

ယခင်သဘောတူညီချက်အရ မှော်မျှော်စင်မပွင့်မီ ရွှီနင်အား ကောင်းမိသားစုခြံဝန်းထဲမှ ထွက်ခွာခွင့်မပြုထားသဖြင့် သူသည် သီးသန့်ခြံဝန်းလေးထဲတွင်သာ နေထိုင်နေခဲ့သည်။

လွန်ခဲ့သောနှစ်လအတွင်း ကောင်းမိသားစုသည် စူးစမ်းလေ့လာရေးအဖွဲ့ဝင်များကို စုစည်းကာ မျှော်စင်၏ အတွင်းပိုင်းပတ်ဝန်းကျင်အခြေအနေကို အကြိမ်ကြိမ်ရှင်းပြခဲ့သည်။

သူတို့သည် စူးစမ်းလေ့လာရေးအဖွဲ့ဝင်အားလုံးကို အကြမ်းဖျင်းနားလည်သဘောပေါက်စေချင်ခဲ့ကြသည်။

ရွှီနင်သည်လည်း စူးစမ်းလေ့လာရေးအဖွဲ့၏ အကြမ်းဖျင်းအခြေအနေကို သိရှိသွားလေပြီ။

ကောင်းမိသားစု၏ စူးစမ်းလေ့လာရေးအဖွဲ့တွင် အဖွဲ့ဝင်တစ်ရာခန့် ရှိသည်။

ခေါင်းဆောင်မှာ ကောင်းမိသားစုဝင်ဖြစ်ပြီး အဆင့်ရှစ်အထွတ်အထိပ် မှော်ပညာရှင်တစ်ဦး ဖြစ်သည်။

သူ့အပြင် အခြားအဆင့်ရှစ် မှော်ပညာရှင်လေးဦးရှိသေးရာ စုစုပေါင်းငါးဦးရှိလေသည်။

အဆင့်ခုနစ်မှော်ပညာရှင် စုစုပေါင်းနှစ်ဆယ့်ငါးဦးရှိပြီး ၎င်းတို့ထဲမှ ထက်ဝက်မှာ ရွှီနင်ကဲ့သို့ပင် အပြင်လူများထဲမှ စုဆောင်းထားခြင်း ဖြစ်သည်။

ကျန်ရှိသော အယောက်ခုနစ်ဆယ်မှာ အဆင့်ခြောက် မှော်ပညာရှင်များချည်းသာ ဖြစ်ကြသည်။

အဆင့်ခြောက် မှော်ပညာရှင်တစ်ဦးသည် မျှော်စင်ထဲတွင် အခြေခံတာဝန်အချို့ကိုသာ လုပ်ဆောင်နိုင်ပေမည်။

အရေးကြီးသော အခိုက်အတန့်များတွင် အဆင့်ရှစ်နှင့် အဆင့်ခုနစ် မှော်ပညာရှင်များ၏ စွမ်းဆောင်ရည်အပေါ်တွင်သာ မူတည်နေဆဲပင်။

နှစ်လကြာလွန်သွားခဲ့လေပြီ…

နောက်ဆုံးတွင် မှော်မျှော်စင်ကြီး ပွင့်လာမည့်အချိန်သို့ ရောက်ရှိလာခဲ့ချေပြီ။

ယနေ့တွင် ကောင်းမိသားစု၏ စူးစမ်းလေ့လာရေးအဖွဲ့သည် အသင့်ဖြစ်နေပြီဖြစ်ရာ မြို့လယ်ခေါင်သို့ စတင်ထွက်ခွာလာကြလေသည်။

“ရွှီနင်၊ မင်း ဘယ်လိုခံစားနေရလဲ”

ရွှီနင်၏ဘေးတွင် ထိပ်ပြောင်ပြောင်နှင့် လူငယ်တစ်ဦးရှိနေသည်။

ထိုထိပ်ပြောင်လူငယ်လေးထံတွင် လွှမ်းမိုးနိုင်သော အရှိန်အဝါရှိနေပြီး သူ၏မျက်လုံးများထဲတွင်လည်း စိတ်လှုပ်ရှားနေသော အကြည့်များရှိနေလေသည်။

သူ့နာမည်မှာ ကောင်းချီရွှမ်ဖြစ်ပြီး ကောင်းမိသားစုမှ အဆင့်ခုနစ် မှော်ပညာရှင်တစ်ဦး ဖြစ်သည်။

လွန်ခဲ့သောနှစ်လအတွင်း သူသည် ရွှီနင်နှင့်ရင်းနှီးလာခဲ့ပြီး သူတို့နှစ်ဦး၏ ဆက်ဆံရေးမှာ အတော်လေး ကောင်းမွန်လေသည်။

“ကျွန်တော် အဆင်ပြေပါတယ်”

ရွှီနင်သည် စိတ်လှုပ်ရှားနေခြင်းမရှိသကဲ့သို့ ဖိအားလည်း မသက်ရောက်ချေ။ မျှော်စင်ထဲသို့ ဝင်ရောက်ရခြင်းမှာ သူ့အတွက် လျှို့ဝှက်နယ်မြေတစ်ခုထဲသို့ ဝင်ရောက်ရသည်နှင့် တူညီနေပေသည်။

“ဒါ ကျွန်တော်မျှော်စင်ထဲကို ပထမဆုံးအကြိမ်ဝင်ရမှာပဲ၊ တော်တော်လေး မျှော်လင့်ထားတယ်”

ကောင်းချီရွှမ်မှာ ဆက်၍ပင် မစောင့်ဆိုင်းနိုင်တော့ချေ။

အခန်း (၃၅၄) - လျှို့ဝှက်အပိုင်းအစများနှင့် တိုးညှင်းသော ဟိန်းဟောက်သံ

မကြာမီတွင် ထိုအုပ်စုသည် မျှော်စင်ကြီးတည်ရှိရာ မြို့လယ်ခေါင်သို့ ရောက်ရှိလာကြလေသည်။

မျှော်စင်၏ ပတ်လည် မီတာတစ်ထောင်အား ပိတ်ဆို့ထားပြီး မြို့ထဲရှိ မှော်အဖွဲ့အစည်းကြီးများမှလွဲ၍ မည်သူ့ကိုမျှ အနားကပ်ခွင့် မပြုချေ။

အရင်းအမြစ်များစွာ ကိန်းအောင်းနေသော အဖိုးတန်ရတနာသိုက်ကြီးဖြစ်သည့် မှော်မျှော်စင်ကို မြို့တွင်းရှိ မှော်အဖွဲ့အစည်းအသီးသီးမှ လက်ဝါးကြီးအုပ်ထားကြခြင်း ဖြစ်ပေသည်။

ရွှီနင်နှင့် ကောင်းမိသားစုဝင်များသည် ပိတ်ဆို့ထားသော ဧရိယာအတွင်းသို့ အေးအေးလူလူ ဝင်ရောက်လာကြပြီး မျှော်စင်ရှေ့သို့ ရောက်ရှိလာကြသည်။

‘အဖွဲ့အစည်းတစ်ခုချင်းစီက လူတွေ တော်တော်များများ ရောက်နေကြတာပဲ...’

ရွှီနင် ပတ်ဝန်းကျင်ကို ဝေ့ကြည့်လိုက်သည်။ မျှော်စင်အပြင်ဘက်တွင် လူများ ပြည့်နှက်နေပြီး လူဦးရေ ထောင်ဂဏန်းခန့် ရှိလေသည်။

မြို့ထဲတွင် မှော်မျှော်စင်အတွင်းသို့ ဝင်ရောက်ခွင့်ရှိသည့် အဖွဲ့အစည်း ဆယ့်နှစ်ခုထက်မက ရှိပေသည်။

ဂိုဏ်းအင်အား ကြီးမားလေလေ မျှော်စင်အတွင်း ဝင်ရောက်နိုင်သည့် လူအရေအတွက် ပိုများလေလေ ဖြစ်သည်။

ဤသည်မှာ အဖွဲ့အစည်းအသီးသီးမှ ပြင်းပြင်းထန်ထန် ဆွေးနွေးညှိနှိုင်းပြီးနောက် ရရှိလာသော သဘောတူညီချက်တစ်ခု ဖြစ်သည်။

ကောင်းမိသားစု၏ အင်အားမှာ မြို့ထဲတွင် ထိပ်ဆုံငါးခုစာရင်းဝင်ရာ သူတို့၏ မိသားစုဝင်များအတွက် လူတစ်ရာစာဝင်ခွင့် ရရှိထားလေသည်။

ကောင်းမိသားစုထက် အင်အားပိုကြီးသော အဖွဲ့အစည်းများဆိုလျှင် ဝင်ခွင့်နေရာ တစ်ရာမှ နှစ်ရာအထိ ရရှိထားကြသည်။

အင်အားအနည်းဆုံး ဂိုဏ်းများမှာမူ ဝင်ခွင့်နေရာ နှစ်ဆယ်အောက်သာ ခွဲဝေရရှိထားကြသည်။

‘ဒီမျှော်စင်မှာ သတ်မှတ်ထားတဲ့ စည်းမျဉ်းတစ်ခု ရှိတယ်။ အဆင့်ကိုး မှော်ပညာရှင်တွေ ဝင်ခွင့်မရှိဘူး။ ဒါကြောင့် အင်အားစုအသီးသီးရဲ့ ခေါင်းဆောင်တွေက အဆင့်ရှစ် ကျွမ်းကျင်သူတွေ ဖြစ်နေကြတာပေါ့’

ရွှီနင်သည် ပတ်ဝန်းကျင်ကို ဝေ့ကြည့်လိုက်ရင်း ဆက်တွေးလိုက်သည်။

‘ဒီမျှော်စင်ထဲမှာ အန္တရာယ်တွေလည်း ပြည့်နှက်နေတယ်။ ဒီလိုမှမဟုတ်ရင် ဒီက အင်အားစုတွေက အဆင့်ရှစ် ကျွမ်းကျင်သူတွေကို ဒီထက်ပိုပြီး စေလွှတ်ကြမှာပဲ’

အဖွဲ့အစည်းအသီးသီးသည် မှော်မျှော်စင်မှ အကျိုးအမြတ်များစွာ ရယူလိုကြသော်လည်း ထိပ်တန်းကျွမ်းကျင်သူများ အများအပြား ဆုံးရှုံးသွားပါက သူတို့ကျောထောက်နောက်ခံပြုထားသည့် အဖွဲ့အစည်းများအတွက် ကြီးမားသော ထိုးနှက်ချက်ကြီးတစ်ခု ဖြစ်သွားရုံသာမက သူတို့၏ အခြေခံအုတ်မြစ်ကိုပင် တုန်လှုပ်သွားစေနိုင်လေသည်။

ထို့ကြောင့် ကျွမ်းကျင်သူများစွာ လာရောက်ခဲ့ကြသော်လည်း ဤသည်မှာ အဖွဲ့အစည်းအသီးသီး၏ အင်အားအပြည့်အဝ မဟုတ်ပေ။

“မှော်မျှော်စင်ကြီး ပွင့်တော့မယ်ဟေ့”

ထိုအခိုက်အတန့်တွင် လူတစ်ယောက်က အော်ဟစ်လိုက်လေသည်။

ရွှီနင်သည် မျှော်စင်ကြီးဆီသို့ လှမ်းကြည့်လိုက်ရာ မျှော်စင်မျက်နှာပြင်မှ ဖြူဖျော့ဖျော့အလင်းရောင်များ စတင်ထွက်ပေါ်လာသည်ကို မြင်တွေ့လိုက်ရသည်။

မကြာမီတွင် အလင်းရောင်မှာ ပိုမိုစူးရှတောက်ပလာတော့သည်။

ဝှစ်...

နောက်ဆုံးတွင် အလင်းရောင်မှာ မှေးမှိန်သွားလေသည်။

မျှော်စင်မျက်နှာပြင်ပေါ်တွင် ရောင်စုံအလင်းတန်းများ ပြည့်နှက်သွားပြီး အရည်များ စီးဆင်းနေသကဲ့သို့ သက်တံ့ရောင် မျက်နှာပြင်တစ်ခု ဖြစ်ပေါ်လာတော့သည်။

“ဝင်လို့ရပြီ”

ကောင်းမိသားစု၏ အဆင့်ရှစ် မှော်ပညာရှင်ခေါင်းဆောင် ကောင်းယွီကျိက ပြောလိုက်သည်။

ဤကောင်းယွီကျိဆိုသူမှာ ယခင်က ရွှီနင်အား လူတွေ့စစ်ဆေးခဲ့ပြီး ကောင်းမိသားစုသို့ ဝင်ရောက်ခွင့်ပြုခဲ့သော လူလတ်ပိုင်းအရွယ် အမျိုးသားပင် ဖြစ်သည်။

“အားလုံးပဲ... မျှော်စင်ထဲ ရောက်သွားရင် အတွင်းက အန္တရာယ်တွေကို သတိထားရုံတင်မကဘူး။ တခြားအဖွဲ့အစည်းက လူတွေကိုလည်း သတိထားကြဖို့ လိုတယ်”

ကောင်းယွီကျိက ဆက်ပြောလိုက်သည်။

“မှော်မျှော်စင်ထဲ ဝင်သွားတာနဲ့ အားလုံးက ကျပန်းနေရာတွေကို ရောက်သွားလိမ့်မယ်။ ကိုယ့်လူတွေနဲ့ ပြန်ဆုံတဲ့အခါကျရင် စုပေါင်းပြီး အန္တရာယ်တွေကို အတူတူ ရင်ဆိုင်ကြရမယ်”

“ဟုတ်ကဲ့ပါ”

အားလုံးက တညီတညွတ်တည်း ပြန်လည်ဖြေကြားလိုက်ကြသည်။

လူအများစု၏ မျက်နှာထက်တွင် စိတ်လှုပ်ရှားနေသည့်ဟန်နှင့် ကြောက်ရွံ့နေသည့် အရိပ်အယောင်များကို တွေ့မြင်နေရလေသည်။

“သွားကြစို့”

ကောင်းယွီကျိက အမိန့်ပေးလိုက်သည်။

ထို့နောက် ကောင်းမိသားစု၏ အင်အားစုများသည် အခြားအဖွဲ့အစည်းများနည်းတူ မျှော်စင်အပြင်ဘက်ရှိ အရည်ကဲ့သို့ စီးဆင်းနေသော အလင်းကန့်လန့်ကာကြီးထဲသို့ အပြေးအလွှား ဝင်ရောက်သွားကြတော့သည်။

“ရွှီနင်... မင်း အရာရာ အဆင်ပြေချောမွေ့ဖို့ ငါမျှော်လင့်ပါတယ်”

မျှော်စင်အတွင်း မဝင်ရောက်မီ ကောင်းချီရွှမ်က ရွှီနင်အား ပြောလိုက်သည်။

“မင်းလည်း အသက်ရှင်လျက် ပြန်ထွက်လာနိုင်အောင် ကြိုးစားပါ”

ရွှီနင်က ပြန်လည်တုံ့ပြန်လိုက်သည်။

သူတို့နှစ်ဦး အချင်းချင်း ပြုံးပြလိုက်ကြပြီးနောက် မျှော်စင်အတွင်းသို့ ဝင်ရောက်သွားကြလေသည်။

…

ခေါင်းအနည်းငယ် မူးဝေသွားပြီးနောက် ရွှီနင်တစ်ယောက် အနီရင့်ရောင် နေရာတစ်ခုသို့ ရောက်ရှိသွားသည်ကို သတိပြုမိလိုက်သည်။

ဤနေရာတွင် မီးတောင်များစွာ ရှိနေပြီး မည်းမှောင်သော တိမ်တိုက်များက ထူထပ်စွာ ဖုံးလွှမ်းနေကာ စူးရှသော အနံ့အသက်များက လေထုထဲတွင် ပျံ့နှံ့နေလေသည်။

ယခင်က ရရှိထားသော အချက်အလက်များအရ မျှော်စင်အတွင်း၌ သီးခြားတည်ရှိနေသော နေရာလွတ်များစွာ ရှိနေကြောင်း ရွှီနင် သိထားလေသည်။

နေရာတိုင်းတွင် ‌တည်နေရာကူးပြောင်းရေးတံခါးတစ်ခုစီ ရှိလေသည်။ ထိုတံခါးအတွင်းသို့ ဝင်ရောက်လိုက်ပါက အခြားသီးခြားနေရာတစ်ခုသို့ ကျပန်း ရောက်ရှိသွားမည် ဖြစ်သည်။

ဤသီးခြားနေရာများ၌ အန္တရာယ်နှင့် အရင်းအမြစ်များမှာ တစ်ခုနှင့်တစ်ခု မတူညီကြပေ။

နေရာအများစုတွင် အန္တရာယ်နှင့် အရင်းအမြစ်မှာ အချိုးကျညီမျှလေ့ရှိသော်လည်း အချို့သောနေရာများတွင်မူ အန္တရာယ်လုံးဝမရှိဘဲ အရင်းအမြစ်များစွာ ရှိနေတတ်သလို အရင်းအမြစ် လုံးဝမရှိဘဲ အန္တရာယ်များ ပြည့်နှက်နေသည့် နေရာမျိုးလည်း ရှိနိုင်ပေသည်။

ထို့ကြောင့် မည်သည့်သီးခြားနေရာသို့ ဝင်ရောက်သည်ဖြစ်စေ ကြိုတင်ခန့်မှန်း၍မရနိုင်သော ပတ်ဝန်းကျင်တစ်ခုနှင့် ရင်ဆိုင်ရမည်သာ ဖြစ်လေသည်။

‘မျှော်စင်ထဲ ဝင်ပြီးတဲ့နောက်မှာ ငါရှာတွေ့သမျှ မှော်အရင်းအမြစ်တွေ အားလုံးက ငါ့ဟာပဲ။ ဒါပေမဲ့ ‘လျှို့ဝှက်အပိုင်းအစ’ ကို ရခဲ့ရင်တော့ အပြင်ပြန်ထွက်တဲ့အခါ ကောင်းမိသားစုကို ပေးရလိမ့်မယ်’

ဤသည်မှာ မျှော်စင်အတွင်း မဝင်ရောက်မီ ကောင်းမိသားစုနှင့် အငှားခေါ်ယူထားသော အဖွဲ့ဝင်များအကြား သဘောတူညီချက်ပင် ဖြစ်သည်။

အငှားခေါ်ယူခံရသူများသည် လုပ်အားခရရှိမည့်အပြင် မျှော်စင်အတွင်း ဝင်ရောက်ခွင့်ရမည် ဖြစ်သော်လည်း လျှို့ဝှက်အပိုင်းအစများကို ရှာဖွေပေးရန်ဟူသော အခြေအနေတစ်ခု ပါဝင်လေသည်။

လျှို့ဝှက်အပိုင်းအစများကို ရရှိပြီးနောက် ၎င်းတို့ကို ကောင်းမိသားစုနှင့် အရင်းအမြစ်များ ဖလှယ်ရာတွင်လည်း အသုံးပြုနိုင်ပေသည်။

တစ်နည်းအားဖြင့်ဆိုရလျှင် ကောင်းမိသားစုသည် သူတို့ငှားရမ်းထားသူများအပေါ် အတော်လေး ရက်ရောသည်ဟု ဆိုရပေမည်။

‘အဲဒီ လျှို့ဝှက်အပိုင်းအစ ဆိုတာက ဘာများပါလိမ့်။ ငါရခဲ့ရင် သေသေချာချာ လေ့လာကြည့်ဦးမှပဲ...’

ရွှီနင်သည် ထိုလျှို့ဝှက်အပိုင်းအစများနှင့် ပတ်သက်၍ အနည်းငယ် စပ်စုချင်စိတ် ဖြစ်ပေါ်နေမိသည်။

ရွှီနင် သိထားသော အချက်အလက်များအရ ဤလျှို့ဝှက်အပိုင်းအစများသည် အဆင့်ကိုး မှော်ပညာရှင်တစ်ဦးအား အဆင့်တစ်ဆယ်သို့ တက်လှမ်းနိုင်ရန် ကူညီပေးနိုင်သော လျှို့ဝှက်ချက်တစ်ခု ဖြစ်လေသည်။

မှော်လောကတွင် အဆင့်တစ်ဆယ် မှော်ပညာရှင်တစ်ဦး မပေါ်ပေါက်ခဲ့သည်မှာ အချိန်အတော်ကြာမြင့်ခဲ့ပြီ ဖြစ်သည်။

မျှော်စင်ကြီးအား တည်ဆောက်ခဲ့သော အဆင့်တစ်ဆယ် မှော်ပညာရှင်သုံးဦး ပျောက်ကွယ်သွားသည့်အချိန်မှစ၍ အဆင့်တစ်ဆယ်သို့ တက်လှမ်းနိုင်မည့် နည်းလမ်းသည် အပြင်လောကသို့ ပျံ့နှံ့ခြင်းမရှိတော့ဘဲ အဆင့်ကိုး မှော်ပညာရှင်များမှာလည်း ရှေ့ဆက်ရမည့် လမ်းစပျောက်နေခဲ့ကြသည်။

ဤလောကတွင် အဆင့်တက်လှမ်းနိုင်မည့် လျှို့ဝှက်ချက်များအားလုံးသည် ဤလျှို့ဝှက်အပိုင်းအစများထဲတွင် ကိန်းအောင်းနေလေသည်။

‘သိုင်းလောကရဲ့ နယ်ပယ်တွေအရဆိုရင် အဆင့်ကိုးနဲ့ အဆင့်တစ်ဆယ် ကြားက ကွာခြားချက်ဟာ တာအိုနယ်ပယ်နဲ့ သိုင်းသခင်နယ်ပယ်ကြားက ကွာခြားချက်မျိုးပဲ။ ဒါကြောင့် အဲဒီ လျှို့ဝှက်အပိုင်းအစတွေက ပြင်ပကမ္ဘာတွေနဲ့ သက်ဆိုင်နေလောက်တယ်’

ဤသည်မှာ ရွှီနင်၏ ကိုယ်ပိုင်ခန့်မှန်းချက်သာ ဖြစ်ပေသည်။

‘ဒီသီးခြားနေရာမှာ အရင်းအမြစ်တွေ ဘယ်လောက်များပြီး ဘယ်လောက်တောင် အန္တရာယ်များမလဲ မသိဘူး...’

ရွှီနင်သည် မည်းမှောင်ပြီး ဖိအားပေးနေသော နေရာကြီးကို ကြည့်ရင်း စိတ်ထဲမှ တွေးတောလိုက်မိသည်။

‘ငါ အရင်ဆုံး လေ့လာကြည့်ရမယ်။ အန္တရာယ် သိပ်မများဘဲ အရင်းအမြစ်တွေလည်း မဆိုးဘူးဆိုရင် ဒီမှာပဲ အရင်းအမြစ်တချို့ စုဆောင်းမယ်။ အရင်းအမြစ် နည်းပါးပြီး ပတ်ဝန်းကျင်ကလည်း အန္တရာယ်များနေမယ်ဆိုရင်တော့ တည်‌နေရာကူးပြောင်းရေးတံခါးကို ရှာပြီး ဒီနေရာကနေ ထွက်ခွာရမယ်...’

ရွှီနင် မြေပြင်ပေါ်တွင် လမ်းလျှောက်သွားရင်း ဤသီးခြားနေရာ၌ မည်သည့် သက်ရှိအရိပ်အယောင်မျှ မရှိကြောင်း တွေ့ရှိလိုက်ရသည်။

အပင်များပင် မပေါက်ရောက်ချေ။

ပူပြင်းသော သီးခြားနေရာတစ်ခုတွင် မှော်ဆေးပင်များ ရှင်သန်နိုင်ရန် ခက်ခဲလှပေသည်။

‘အရင်းအမြစ်လည်း မရှိဘူး၊ အန္တရာယ်လည်း မရှိဘူး...’

ရွှီနင် အနည်းငယ် စိတ်ပျက်သွားမိသည်။

‘ဒီလိုဆိုမှတော့ တည်နေရာကူးပြောင်းရေးတံခါးကို ရှာပြီး တခြားသီးခြားနေရာတစ်ခုကို ဝင်ဖို့ ဒီကနေ ထွက်သွားသင့်ပြီ...’

‘နေဦး...’

ရွှီနင်သည် အဝေးမှ မီးတောင်ကြီးကို လှမ်းကြည့်လိုက်လေသည်။

‘သွားကြည့်ဦးမှပဲ...’

ရွှီနင်သည် အနီးဆုံး မီးတောင်ပေါ်သို့ တက်သွားလိုက်သည်။

သူ အောက်သို့ ငုံ့ကြည့်လိုက်ရာ ပွက်ပွက်ဆူနေသော ချော်ရည်များကို တွေ့မြင်လိုက်ရသည်။

ဤချော်ရည်များသည် သာမန်ချော်ရည်များနှင့် မတူပေ။ အနီရင့်ရောင်ရှိနေပြီး အန္တရာယ်ရှိသော အငွေ့အသက်များကို ထုတ်လွှတ်နေလေသည်။

အဆင့်ခြောက် မှော်ပညာရှင်တစ်ဦးပင် ဤချော်ရည်များကြောင့် ဒဏ်ရာရသွားနိုင်သည်ကို ရွှီနင် ခံစားမိလိုက်သည်။

‘မီးတောင်ထဲမှာလည်း အရင်းအမြစ်တွေ မရှိဘူးပဲ...’

ရွှီနင် အနည်းငယ် လက်မှိုင်ချချင်သလို ဖြစ်သွားရသည်။

‘တည်‌နေရာကူးပြောင်းရေးတံခါးကို ဆက်ရှာတာပဲ ကောင်းပါတယ်...’

ရွှီနင် အရင်းအမြစ်ရှာဖွေခြင်းကို လက်လွှတ်လိုက်ချိန်မှာပင် အဝေးမှ တိုးညှင်းသော ဟိန်းဟောက်သံတစ်ခု ရုတ်တရက် ထွက်ပေါ်လာလေသည်။

ရွှီနင်သည် အသံထွက်ပေါ်လာရာဆီသို့ လှမ်းကြည့်လိုက်သည်။

ထိုဟိန်းဟောက်သံ၏ မူလဇာစ်မြစ်မှာ အမြင့်ဆုံးမီးတောင်ဆီမှ ဖြစ်နေသည်။

ထိုအခိုက်အတန့်တွင် မီးတောင်ထဲမှ ချော်ရည်များ ပန်းထွက်လာတော့သည်။

‘သွားကြည့်ရအောင်’

ရွှီနင်၏ ရင်ထဲ၌ စိတ်လှုပ်ရှားမှုများ ဖြစ်ပေါ်လာပြီး အလျင်အမြန်ပင် ပြေးထွက်သွားလေတော့သည်။