အခန်း ၃၃၂

အခန်း။ ၃၃၂

"တကယ်ကို ခေတ်ကာလတိုင်းမှာ မရှိနိုင်လောက်အောင် ပြိုင်ဘက်ကင်းတဲ့ အရည်အချင်းကို ပိုင်ဆိုင်ထားတဲ့သူပဲ"

ရုတ်တရက် လီချန်းရှင်းမှာ ခေါင်းကို မော့လိုက်ပြီး တိုးညင်းစွာ သက်ပြင်းချလိုက်သည်။

ကမ္ဘာပေါ်တွင် အသက်အငယ်ဆုံး နိဗ္ဗာနအဆင့်ကျင့်ကြံသူမှာ သူထင်ထားသည်ထက် ပိုမို ကြောက်မက်ဖွယ်ကောင်းနေသည်။

သူ့တွင်ရှိသမျှ ပညာရပ်အားလုံးကို ထုတ်သုံးလိုက်သော်လည်း ချန်ကျီရှင်းကို မယှဉ်နိုင်သေးပေ။

သူ၏ မဟာတာအို နတ်ဘုရားဘီးစက်ပညာရပ်တစ်ခုတည်းဖြင့်ပင် နိဗ္ဗာနအဆင့် ၉ရှိသည့် ထိပ်တန်းကျွမ်းကျင်သူတစ်ဦးကို ချက်ချင်း အနိုင်ယူနိုင်စွမ်းရှိသည်။

သို့သော် ချန်ကျီရှင်း၏ ဓားတစ်ချက်တည်းဖြင့်ပင် လွယ်လွယ်ကူကူ ဖျက်ဆီးခြင်း ခံလိုက်ရသည်။

ဤမျှ ကျွမ်းကျင်မှုနှင့် စွမ်းအားမှာ လောကီစည်းမျဉ်းများကိုပင် ချိုးဖျက်နိုင်ပြီး စိတ်ကူးယဉ်နိုင်သည့် နယ်ပယ်ထက် ကျော်လွန်နေပြီဖြစ်သည်။

ရုတ်တရက် လီချန်းရှင်း၏ ခန္ဓာကိုယ်အလယ်ဗဟိုမှနေ၍ ထူးဆန်းလှသော မိစ္ဆာချီစွမ်းအင်များ ပျံ့လွင့်လာသည်။

"ချန်ကျီရှင်း... မင်းက တကယ်ကို မကြုံစဖူး ပုဂ္ဂိုလ်တစ်ယောက်ပဲ။ မင်းရဲ့ စွမ်းအားက ငါ့ထက်တောင် သာလွန်နေတယ်။ မင်းကိုသာ အချိန်ပေးလိုက်ရင် ဒီကမ္ဘာမှာ အစွမ်းအထက်ဆုံးသူ ဖြစ်လာမှာ အသေအချာပါပဲ"

"မင်းက ရှေးဟောင်းမင်းဆက်ရဲ့ ပိုင်ရှင်တွေလိုမျိုး မသေမျိုး အမွေအနှစ်တစ်ခုကိုတောင် ဖန်တီးနိုင်လိမ့်ဦးမယ်"

လီချန်းရှင်းမှာ ချီးကျူးစကားများ ပြောနေသော်လည်း သူ၏ အကြည့်တို့မှာ တဖြည်းဖြည်း အေးစက်လာပြီး သူ၏ အသံမှာ ဝမ်းနည်းခြင်းနှင့် ကံကြမ္မာ၏ ရက်စက်မှုကို ထင်ဟပ်နေသည်။

"ဒါပေမဲ့ စိတ်မကောင်းစရာပဲ... ဇီဝေချန်မျိုးနွယ်စုရဲ့ စွမ်းအားကို ငါ စတင်သိရှိလိုက်တဲ့နေ့ကတည်းက ဒီနေ့အတွက် ကြိုပြီး ပြင်ဆင်ထားခဲ့တာ"

ဘုန်း ဘုန်း ဘုန်း

လီချန်းရှင်း၏ ခန္ဓာကိုယ်ပတ်လည်မှ မိစ္ဆာချီစွမ်းအင်များမှာ ပိုမို ပြင်းထန်လာသည်။ သူ၏ မျက်ဝန်းတို့မှာ ပုပ်နေသော စပျစ်သီးကဲ့သို့ မီးခိုးရောင်အဖြစ် ပြောင်းလဲသွားပြီး သူ၏ ခန္ဓာကိုယ်တစ်ခုလုံးတွင် အမည်းရောင် မိစ္ဆာအမှတ်အသားများ ဖုံးလွှမ်းသွားသည်။

သူ၏ နောက်ကျောမှ အသားအရေများ ပေါက်ထွက်ကာ ဧရာမ လက်ဝါးကြီးများကဲ့သို့သော မီးခိုးရောင် အသားအတောင်ပံတစ်စုံ ပေါက်ဖွားလာသည်။

"ဒီပညာရပ်က အသက်စတေးခြင်းပညာရပ်လေ။ တကယ်တော့ ဒါကို မင်းရဲ့အဘိုး ချန်တောက်ယန်အတွက် ရည်ရွယ်ပြီး ပြင်ဆင်ထားခဲ့တာပါ..."

ရုတ်တရက် လီချန်းရှင်းက ခေါင်းကို မော့လိုက်ပြီး ချန်ကျီရှင်းကို စိုက်ကြည့်လိုက်သည်။ သူ၏ မျက်လုံးအိမ်မှစ၍ မိစ္ဆာအမှတ်အသားများမှာ သူ၏ မျက်နှာတစ်ခုလုံးအထိ လျင်မြန်စွာ ပျံ့နှံ့သွားသည်။

"ငါ... လီချန်းရှင်း၊ ကောင်းကင်ဘုံမိစ္ဆာတာအိုထဲကို ထာဝရ ကျဆင်းသွားပါစေ။ ငါ့ရဲ့ ကောင်းကင်ဘုံမိစ္ဆာသွေးစက်တွေကို ယဇ်ပူဇော်ပြီး ငါ့သက်တမ်းနဲ့ အသက်စွမ်းအားတွေကို ပေးဆပ်ပြီး မရှောင်လွှဲနိုင်တဲ့ ကျိန်စာအဖြစ် ပြောင်းလဲပစ်လိုက်မယ်။ ချန်ကျီရှင်း... မင်းကို အဝီစိငရဲထဲမှာ ဘဝပေါင်းများစွာ ပြန်လည်မွေးဖွားခြင်း မရှိစေဘဲ ထာဝရ အကျဉ်းချထားပစ်မယ်"

လီချန်းရှင်း၏ အသံမှာ တဖြည်းဖြည်းနှင့် ပိုမို ကျယ်လောင်လာသည်။ နောက်ဆုံးစကားလုံးမှာ ခေါင်းလောင်းသံကြီးပမာ ကောင်းကင်ဘုံ ကိုးခုနှင့် မြေပြင်ဆယ်ခုကို တုန်ခါသွားစေသည်။

ဘုန်း…

လီချန်းရှင်း၏ ခန္ဓာကိုယ်တစ်ခုလုံးမှ သွေးများ ပြင်းထန်စွာ ထွက်ပေါ်လာပြီး ကောင်းကင်သို့ ပျံတက်သွားသည့် သွေးနဂါးများပမာ ပုံဖော်လိုက်သည်။

ထိုသွေးတိုင်များမှာ တစ်ခုနှင့်တစ်ခု ရစ်ပတ်ကာ ကောင်းကင်တစ်ခုလုံးကို ဖုံးလွှမ်းသွားသည့် အနီရောင် ပိုက်ကွန်ကြီးတစ်ခုအဖြစ် ပြောင်းလဲသွားသည်။

လီချန်းရှင်း၏ ခန္ဓာကိုယ်မှာလည်း သွေးနှင့် အသက်စွမ်းအားများ ကုန်ဆုံးသွားသကဲ့သို့ လျင်မြန်စွာ ညှိုးနွမ်းသွားပြီး အသက်မီးတောက်မှာ လေထဲရှိ ဖယောင်းတိုင်ကဲ့သို့ မှေးမှိန်သွားသည်။

သူ၏ ကျင့်ကြံခြင်းစွမ်းအားမှာလည်း လျင်မြန်စွာ ကျဆင်းသွားသည်။

ခဏအတွင်းမှာပင် လီချန်းရှင်းမှာ ခြောက်ကပ်နေသော ရုပ်အလောင်းတစ်ခုကဲ့သို့ ဖြစ်သွားသည်။ မျက်လုံးများ ချိုင့်ဝင်ကာ ပါးရိုးများ ထွက်ပေါ်လာပြီး အသက်မဲ့နေသည်။

ဖူဘိုမြို့အတွင်း၌။

"ကောင်းကင်ဘုံမိစ္ဆာ ခန္ဓာကိုယ်"

"ကောင်းကင်ဘုံမိစ္ဆာ ခန္ဓာကိုယ်ရဲ့ နောက်ဆုံးသတ်ကွက်က အသက်နဲ့လဲတဲ့ ပညာရပ်ပဲ"

"လီချန်းရှင်းက ချန်ကျီရှင်းနဲ့အတူ သေဆုံးဖို့ ပြင်ဆင်နေတာလား"

"လီချန်းရှင်းက ကောင်းကင်ဘုံမိစ္ဆာ ခန္ဓာကိုယ်ရဲ့ နောက်ဆုံးပညာရပ်ကို တကယ် ကျင့်သုံးထားတာပဲ။ သူက ဒီတိုက်ပွဲမှာ သေဖို့ ကြိုတင်ပြင်ဆင်ထားတာကိုး"

လူအများအပြားမှာ ထိတ်လန့်စွာဖြင့် အော်ဟစ်လိုက်ကြသည်။ ဤ ကောင်းကင်ဘုံမိစ္ဆာများသည် ရှေးခေတ်ကာလတွင် ကမ္ဘာသို့ ဆင်းသက်လာကာ အစွမ်းထက်သော ပညာရပ်များကို ဖြန့်ဝေခဲ့ကြသည်။

သူတို့၏ ကောင်းကင်ဘုံမိစ္ဆာ စွမ်းအားမှာ ဤလောကမှ မဟုတ်ဘဲ နိဗ္ဗာနစွမ်းအားနှင့် မယှဉ်နိုင်ပေ။ အကယ်၍သာ ဤမိစ္ဆာစွမ်းအားဖြင့် သတ်ဖြတ်ခြင်း ခံရပါက မည်သည့် ပညာရပ်နှင့်မျှ ကာကွယ်နိုင်မည် မဟုတ်ပေ။

အဆိုးရွားဆုံးမှာ မိစ္ဆာများက သူတို့၏ သွေးနှင့် အသက်ကို စတေးကာ ကျိန်စာအဖြစ် ပြောင်းလဲနိုင်ခြင်းပင်။

ထိုကျိန်စာ၏ ပစ်မှတ်ဖြစ်သူမှာ ကောင်းကင်ဘုံမိစ္ဆာမဟုတ်ပါက သူ၏ ကျင့်ကြံခြင်းစွမ်းအားများ ပျက်စီးသွားပြီး ဝိညာဉ်ရေးရာ အဆုံးသတ်ကာ နာကျင်စွာဖြင့် သေဆုံးရလိမ့်မည်ပင်။

မှတ်တမ်းများအရ ရှေးခေတ် မသေမျိုးမင်းဆက် ပျက်စီးခဲ့ရသည်မှာလည်း ဤမိစ္ဆာများကြောင့်ပင်။

လူသားတို့၏ ထူးခြားချက်မှာ သင်ယူလေ့လာခြင်းပင်။

တာအိုလမ်းကြောင်းအတွက် တစ်သက်တာလုံး မြှုပ်နှံခဲ့သော မဟာပညာရှိကြီးတစ်ဦးသည် နှစ်ပေါင်းများစွာ အသိပညာများကို လက်ဆင့်ကမ်းပြီးနောက် ပြိုင်ဘက်ကင်းသော မိစ္ဆာခန္ဓာကိုယ်တစ်ခုကို ဖန်တီးခဲ့သည်။

၎င်းမှာ ကောင်းကင်ဘုံမိစ္ဆာ ခန္ဓာကိုယ်ပင်။ သို့သော် ထိုမိစ္ဆာခန္ဓာကိုယ်ကို ဖန်တီးနိုင်လျှင်ပင် ကောင်းကင်ဘုံမိစ္ဆာတို့၏ အကြောက်ရွံ့ဆုံးလက်နက်ဖြစ်သော စတေးခြင်း ကျိန်စာပညာရပ်ကိုမူ မည်သူမျှ မတတ်မြောက်နိုင်ခဲ့ကြပေ။

နှစ်ကာလများ ကုန်လွန်သွားကာ ခေတ်ကာလများလည်း ပြောင်းလဲသွားသည်။

ရှေးဟောင်းဘုန်းတော်များအားလုံးမှာ အချိန်၏ မြစ်ရေအောက်သို့ နစ်မြုပ်သွားကြသည်။

မိစ္ဆာခန္ဓာကိုယ် ကျင့်စဉ်များမှာလည်း ကွယ်ပျောက်သွားခဲ့သည်။ မည်သူမျှ မထင်မှတ်ထားခဲ့သည်မှာ လီချန်းရှင်းသည် ကွယ်ပျောက်သွားပြီဟု ထင်ထားသော ထိုကျိန်စာပညာရပ်ကို တတ်မြောက်နေခြင်းပင်။

ဤအချိန်တွင် ကျင့်ကြံသူများ၏ မျက်နှာပေါ်တွင် အံ့ဩခြင်း၊ နောင်တရခြင်းနှင့် သက်သာရာရခြင်းများ ရောထွေးနေသည်။

ချန်ကျီရှင်းမှာ သူတို့အတွက် အသက်ရှူရပင် ခက်ခဲစေသည့် ဧရာမ တောင်ကြီးပမာ ဖြစ်နေခဲ့သည်။

ကောင်းကင်ဘုံ ကိုးခုအထက်တွင်….

"ကျဆင်းတော့……"

လီချန်းရှင်းက ညှိုးနွမ်းနေသော လက်ကို ဖြည်းညှင်းစွာ အောက်သို့ ဖိချလိုက်သည်။

ဘုန်း……

ကောင်းကင်တစ်ခုလုံးကို ဖုံးလွှမ်းနေသော သွေးရောင်ပိုက်ကွန်ကြီးမှာ ချန်ကျီရှင်းကို လှောင်

ပိတ်လိုက်ကာ ထွက်ပြေးစရာ လမ်းမရှိတော့ပေ။

ချန်ကျီရှင်းမှာ ပိုက်ကွန်ထဲတွင် ပိတ်မိနေသော ငါးငယ်တစ်ကောင်ပမာ ဖြစ်နေသည်။

"အင်း..."

သွေးရောင်ပိုက်ကွန်ကြီးမှာ တဖြည်းဖြည်း ကျဉ်းမြောင်းလာပြီး အရိုးများကိုပင် အေးခဲစေသည့် ဖိအားများဖြင့် ဝန်းရံလာသည်။

ချန်ကျီရှင်းသည် ရှေးဟောင်းရေအိုးကြီးကို ဖျက်ဆီးလိုက်ပြီး လက်နှစ်ဖက်ကို လျှော့ချကာ အရှုံးပေးလိုက်သည့်အတိုင်း ရပ်နေသည်။

"ချန်ကျီရှင်း... ဒီလောကကြီးကို အတူတူ နှုတ်ဆက်ကြရအောင်"

လီချန်းရှင်းက နောက်ဆုံးကျန်ရှိသော ခွန်အားကို စုစည်းကာ ချန်ကျီရှင်းကို စိုက်ကြည့်လိုက်သည်။ သေဆုံးခြင်းကို ဖော်ပြနေသော သူ၏ မျက်ဝန်းတို့မှာ တောက်ပနေဆဲပင်။ အတူတူ သေဆုံးခြင်းက အကောင်းဆုံး ရလဒ်ပင်။

"နှမြောစရာပါပဲ"

ဂိုဏ်းချုပ် ရှောင်ချူးရှင်းက သက်ပြင်းချသည်။

လူအများမှာလည်း တတိယသခင်လေး ချန်ကျီရှင်းကဲ့သို့ အရည်အချင်းရှိသူမျိုး ဤသို့ဖြင့် အဆုံးသတ်သွားရသည်ကို နောင်တကြီးစွာ ဖြစ်နေကြသည်။

မိစ္ဆာဂိုဏ်းမှ ကျွမ်းကျင်သူနှင့် ဟူယန်ဒါကွမ်းတို့မှာလည်း ကြည့်ရှုရန်မလိုတော့ဟူ၍ လှည့်ထွက်သွားကြသည်။

မကြာမီပင် ပိုက်ကွန်ကြီးမှာ တစ်ပေဝက်ခန့်ရှိသော သွေးလုံးကြီးတစ်ခုအဖြစ် ကျုံ့ဝင်သွားကာ အထဲတွင် ချန်ကျီရှင်းကို မမြင်ရတော့ပေ။

သွေးလုံးကြီးထဲတွင် ချန်ကျီရှင်းမှာ အရည်ပျော်သွားတော့မည်ဟု ထင်မှတ်ထားကြသည်။

ရုတ်တရက် သွေးလုံးကြီးထဲမှ တည်ငြိမ်အေးဆေးသည့် အသံတစ်ခု ထွက်ပေါ်လာသည်။

"လီချန်းရှင်း... ဒါက မင်းရဲ့ နောက်ဆုံးလက်နက်လား"

ခရက်... ခရက်... ခရက်

ပိုက်ကွန်များ ပြတ်တောက်သွားသည့် အသံများ ထွက်ပေါ်လာပြီး လူအများမှာ အံ့အားသင့်စွာ ကြည့်နေကြသည်။

မိစ္ဆာအမှတ်အသားများ ဖုံးလွှမ်းနေသည့် လက်နှစ်ဖက်မှာ သွေးလုံးကြီးကို ဖောက်ထွက်လာပြီး အစွန်းကို ဆွဲကိုင်ကာ ဖြည်းညှင်းစွာ ဆုတ်ဖြဲလိုက်သည်။

မီးခိုးရောင် ဆံပင်များ လွင့်စဉ်နေပြီး အလွန်လှပသော ရုပ်ရည်၊ နောက်ကျောတွင် ကြီးမားသည့် တောင်ပံများ ပါရှိသော ချန်ကျီရှင်းမှာ သွေးလုံးကြီးထဲမှ ခြေလှမ်းတစ်လှမ်းချင်းစီဖြင့် ထွက်လာသည်။

လီချန်းရှင်း၏ မျက်လုံးများမှာ ပြူးကျယ်သွားကာ အံ့ဩခြင်း၊ ထိတ်လန့်ခြင်း၊ မယုံကြည်နိုင်ခြင်းများဖြင့် ပြည့်နှက်သွားပြီး နောက်ဆုံးတွင်မူ ရှုံးနိမ့်ခြင်းကို လက်ခံသည့် သက်ပြင်းရှည်ကြီးတစ်ခုသာ ကျန်ရှိတော့သည်။

လူအများအပြား၏ အကြည့်အောက်တွင် ချန်ကျီရှင်းမှာ ထိခိုက်မှု တစ်စုံတစ်ရာမရှိဘဲ ထွက်ပေါ်လာသည်။ သူသည် လက်ဖမိုးပေါ်ရှိ အမည်းရောင် မိစ္ဆာအမှတ်အသားများကို ကြည့်လိုက်သည်။

"ကောင်းကင်ဘုံမိစ္ဆာ ခန္ဓာကိုယ် ဟုတ်လား တောင်းပန်ပါတယ်... ငါ့မှာလည်း ရှိတယ်လေ"