အခန်း ၃၃၃

အခန်း။ ၃၃၃

ထိုအခိုက်အတန့်တွင် ဖူဘိုမြို့တစ်ခုလုံး အပြင်ဘက်ရော အတွင်းဘက်ပါ သေလူကဲ့သို့ တိတ်ဆိတ်သွားသည်။

အင်အားကြီး မျိုးနွယ်စုများ၏ ဂိုဏ်းချုပ်များမှအစ ကျင့်ကြံသူအပေါင်းတို့သည် ချန်ကျီရှင်းကို ကြောင်အမ်းအမ်းဖြင့်သာ ငေးကြည့်နေမိကြသည်။

ကောင်းကင်ဘုံမိစ္ဆာ ခန္ဓာကိုယ်

နောက်တစ်ကြိမ်ထပ်၍ ကောင်းကင်ဘုံမိစ္ဆာ ခန္ဓာကိုယ်ပင်။

လီချန်းရှင်းမှာ ပြီးဆုံးသွားပြီဆိုသည်ကို လူတိုင်း သိလိုက်ကြသည်။

ဤ စတေးခြင်း ကျိန်စာပညာရပ်သည် သာမန်လူသားများအတွက် မဖြေရှင်းနိုင်သော ကျိန်စာတစ်ခု ဖြစ်သော်လည်း ကောင်းကင်ဘုံမိစ္ဆာ ခန္ဓာကိုယ်ကို ပိုင်ဆိုင်ထားသူအတွက်မူ အသုံးမဝင်ဆုံး ပညာရပ်တစ်ခုသာ ဖြစ်သည်။

ကောင်းကင်ဘုံ ကိုးခုအပြင်ဘက်တွင် လီချန်းရှင်းက သက်ပြင်းရှည်ကြီးတစ်ခု ချလိုက်သည်။ ထိုသက်ပြင်းသံနှင့်အတူ သူ အားတင်းထားခဲ့ရသော ခွန်အားတို့မှာ တဖြည်းဖြည်း ပျံ့လွင့်သွားပြီး အသက်မီးတောက်မှာလည်း အားနည်းကာ လုံးဝ ငြိမ်းသတ်သွားတော့သည်။

"ဒီလောက်ဆို တော်ပါပြီ"

သူ၏ အသက်စွမ်းအားများ လျင်မြန်စွာ ကုန်ဆုံးသွားသည်ကို ခံစားမိရင်း လီချန်းရှင်းမှာ ခါးသီးစွာ ပြုံးလိုက်သည်။

သူသည် ဝေးကွာသော နေရာတွင် တောက်ပနေသည့် နေမင်းကြီးကို မော့ကြည့်သည်။ ဘဝ၏ နောက်ဆုံးအချိန်တွင် သူသည် အမြဲတမ်းနွေးထွေးသော နေရောင်ခြည်မှာ ယခုအချိန်တွင်မူ မျက်စိကျိန်းလောက်အောင် ပြင်းထန်လွန်းနေသည်ဟု ခံစားရသည်။

ဤတိုက်ပွဲတွင် ဘာမှ ပြောစရာမရှိဘဲ ရှုံးနိမ့်ခြင်းက ရှုံးနိမ့်ခြင်းပင်။

သူသည် ရှိသမျှ စွမ်းအားအားလုံးကို ထုတ်သုံးခဲ့ကာ သူ၏ အသား၊ သွေးနှင့် အသက်စွမ်းအားတို့ကို စတေးခဲ့သော်လည်း သူ ရှုံးနိမ့်ခဲ့သည်။

"ဖြစ်နိုင်တာက... ဒါက ကောင်းကင်ပေး တာဝန်ဖြစ်နေလို့လား"

လီချန်းရှင်းက သူ၏ လက်ကို ဆန့်ထုတ်ကာ တောက်ပလွန်းသော နေရောင်ကို ကာရင်း ခေါင်းခါလိုက်သည်။

"ငါကတော့ တကယ်ပဲ နောက်ထပ် ဘာတွေထပ်လုပ်နိုင်ဦးမှာလဲ။ အသက်ကိုရင်းပြီး သုံးရတဲ့ ရှေးဟောင်းပညာရပ်ကိုတောင် ငါ သုံးပြီးသွားပြီ။ နိဗ္ဗာနအဆင့်အစောပိုင်း ကျင့်ကြံသူတိုင်းဆိုရင် ဒါကိုသုံးမိတာနဲ့ အသက်ပျောက်ရမယ့်အဖြစ်မျိုး ဒါပေမဲ့ ချန်ကျီရှင်းကတော့ ဒီလိုသေလမ်းထဲကနေတောင် အသက်ရှင်ဖို့ လမ်းကြောင်းကို ရှာတွေ့သွားလိမ့်မယ်လို့ ဘယ်သူက ထင်ထားမှာလဲ"

"ကောင်းပါပြီ… နောက်ဆုံးတော့လည်း ကျီနုနဲ့ ကလေးတွေဆီကို ငါ ပြန်သွားလို့ရပြီ"

လီချန်းရှင်းမှာ အနည်းငယ် ပြုံးလျက်ပင် အသက်ပျောက်သွားသည်။ သေခြင်းတရားကို သူ မကြောက်ရွံ့တော့ပေ။ ကတိတစ်ခုကို အဆုံးသတ်နိုင်ခဲ့သည့်အတွက်သာ ဝမ်းသာနေတော့သည်။

ဘုန်း….

ကောင်းကင်ယံအဆုံးတွင် ဧရာမ ရွှေရောင်နေမင်းကြီး တစ်ခု ကျဆင်းသွားပြီး ကောင်းကင်ဘုံတစ်ခုလုံး ဝမ်းနည်းခြင်း တေးသီချင်းကို သီဆိုနေသကဲ့သို့ တာအိုတို့ တုန်ခါသွားသည်။

ဤသည်မှာ နိဗ္ဗာနအဆင့်ကျွမ်းကျင်သူတစ်ဦး ကျဆုံးသည့်အခါ ဖြစ်ပေါ်လာတတ်သော နိမိတ်တစ်ခုပင်။

လီချန်းရှင်း၏ ရုပ်အလောင်းမှာ အရှေ့ပင်လယ်ပြင်သို့ ပြုတ်ကျသွားကာ ကြီးမားသော လှိုင်းလုံးကြီးများ ပေါ်ထွက်သွားသည်။

ထိုအချိန်တွင် ဖူဘိုမြို့မှာ တိတ်ဆိတ်လွန်းနေကာ လူတိုင်းမှာ ချန်ကျီရှင်းကိုသာ ပါးစပ်

အဟောင်းသားဖြင့် ငေးကြည့်နေကြသည်။

"လီချန်းရှင်းလို နိဗ္ဗာနအဆင့် ၈ရှိတဲ့သူတစ်ယောက်က ဒီလောက်နဲ့ပဲ အဆုံးသတ်သွားပြီလား"

မိနစ်အနည်းငယ်ကြာပြီးနောက်….

ဘန်း…..

ဖူဘိုမြို့ တစ်မြို့လုံး ရူးသွပ်မတတ် ပျော်ရွှင်သံများ ပေါက်ကွဲထွက်လာသည်။

"အောင်ပွဲပဲ တတိယသခင်လေး ချန်ကျီရှင်း ထပ်ပြီး အနိုင်ရပြန်ပြီ"

"ငါမြင်နေတာ အမှန်ပဲလား... တာအိုတစ်ရာပေါင်းစပ်တာကို ပိုင်ဆိုင်ပြီး မိစ္ဆာခန္ဓာကိုယ်အထိ ထုတ်သုံးသွားတဲ့ လီချန်းရှင်းတောင် ကျဆုံးသွားတယ်ပေါ့"

"ကြောက်ဖို့ကောင်းလိုက်တာ... ဒီကမ္ဘာမှာ တတိယသခင်လေးကို ယှဉ်နိုင်မယ့်သူ နောက်ထပ် ဘယ်သူရှိတော့မှာလဲ"

"ဒီတိုက်ပွဲက သူကိုယ်တိုင် သက်သေပြလိုက်တာပဲ။ ဒဏ္ဍာရီတွေက ဆက်ပြီးတည်ရှိနေဦးမှာပဲ။ သူက ခေတ်အဆက်ဆက်မှာ တစ်ဦးတည်းသော ပုဂ္ဂိုလ်ပဲ"

"ပြိုင်ဘက်ကင်းတယ်... တကယ်ကို ပြိုင်ဘက်ကင်းလွန်းတယ်"

"ဒီနေ့ကစပြီး အရှေ့နက်နဲသောနယ်ပယ်က ဇီဝေချန်မျိုးနွယ်စုရဲ့ ခေတ်ထဲကို လုံးလုံးလျားလျား ရောက်ရှိသွားပြီ"

"ဟားဟားဟား... ငါ့ရဲ့ ပိုင်ဆိုင်မှုအားလုံးကို တတိယသခင်လေးဆီမှာ လောင်းထားတာ။ အခုတော့ အမြတ်တွေ အများကြီး ရပြီ။ တကယ့်ကို အမြတ်ကြီးရတဲ့ အမြတ်ပဲ"

လူအုပ်ကြားရှိ လူငယ်ကျင့်ကြံသူများမှာ ရင်ခုန်စိတ်လှုပ်ရှားစွာဖြင့် အော်ဟစ်နေကြသည်။

တတိယသခင်လေး ချန်ကျီရှင်း၏ ဂုဏ်သတင်းမှာ လှိုင်းလုံးကြီးများပမာ တစ်ဟုန်ထိုး တက်ကြွလာခဲ့သည်။

ဇီဝေချန်မျိုးနွယ်စုမှ တပည့်များ၊ မဟူရာအကြီးအကဲများမှာ စိတ်လှုပ်ရှားစွာဖြင့် လေထဲသို့ လက်သီးများ ထိုးယှက်ကာ ဝမ်းမြောက်ဝမ်းသာ ဖြစ်နေကြသည်။

အဓိက အင်အားစုများ၏ ခေါင်းဆောင်များမှာမူ တိတ်ဆိတ်လျက် ချန်ကျီရှင်းကို ရှုပ်ထွေးသော အကြည့်တို့ဖြင့် ကြည့်ရှုနေကြသည်။

လူတိုင်း သဘောပေါက်လိုက်ကြသည်။ စစ်မှန်သောကိုယ်ပိုင်အဆင့်ကို အနိုင်ယူခဲ့သော ချန်ကျီရှင်းမှာ ယခုအခါ နိဗ္ဗာနအဆင့်ကိုပါ လွှမ်းမိုးတော့မည်ပင်။

သူသည် သာမန် အရည်အချင်းရှိသူမှသည် အရှေ့နက်နဲသောနယ်မြေ၏ အဓိက ဗဟိုချက်မသို့ ခုန်တက်သွားသော ခေတ်ပြိုင် အစွမ်းထက်ဆုံးသူ ဖြစ်လာခဲ့သည်။

အရင်က ချန်ကျီရှင်းက ချန်မျိုးနွယ်စုကို မှီခိုခဲ့ရသော်လည်း ယခုအခါ ချန်မျိုးနွယ်စုက ချန်ကျီရှင်းကို မှီခိုရမည့် အခြေအနေသို့ ရောက်ရှိသွားပြီ ဖြစ်သည်။

"ငါတို့တွေ သမိုင်းကြောင်းရဲ့ စင်မြင့်ထက်ကနေ အမှန်တကယ် ဆင်းပေးရတော့မှာပဲ" သန့်ရှင်းသော မြေပြင်မှ ဂိုဏ်းချုပ်ကြီးတစ်ဦးက သက်ပြင်းချသည်။

ရှောင်ချူးရှင်းမှာလည်း ချန်ကျီရှင်းကို မော့ကြည့်ရင်း "ငယ်ရွယ်ပြီး အစွမ်းထက်လွန်းသူပဲ... ရှေးဟောင်း မသေမျိုးမင်းဆက်ရဲ့ ပိုင်ရှင်လိုမျိုးပဲ ကောင်းကင်နဲ့ မြေကြီးတစ်ခုလုံးကို လွှမ်းမိုးနိုင်မယ့် ခေတ်သစ်တစ်ခုကို သူ စတင်တော့မှာလား" ဟု ပြောလိုက်သည်။

ကောင်းကင်ဘုံ ကိုးခုအထက်တွင် ချန်ကျီရှင်းသည် လီချန်းရှင်း၏ ရုပ်အလောင်း ကျဆင်းသွားသည့် နက်ရှိုင်းသော ပင်လယ်ပြင်ကို ငုံ့ကြည့်လိုက်သည်။

လီချန်းရှင်းကို အရင်တစ်ခါက မတားဆီးနိုင်ခဲ့ပါက ကောင်းကင်ဘုံမိစ္ဆာ ခန္ဓာကိုယ်ဆုလာဘ်ကို မရရှိခဲ့ပါက သူသည် လီချန်းရှင်းနှင့်အတူ ငရဲသို့ အတူတူ သွားရပေလိမ့်မည်။

ရုတ်တရက်….

[ဒင် သင်သည် ကောင်းကင်ဘုံဇာတ်လိုက်ကို အနိုင်ယူ၍ အောင်မြင်သွားပြီ ဖြစ်သဖြင့် သူ၏ ကံကြမ္မာအရှိန်အဝါနှင့် ပင်ကိုယ်စွမ်းရည် အချို့ကို အောင်မြင်စွာ သိမ်းပိုက်နိုင်ခဲ့သည်]

[သင်၏ ကံကြမ္မာတန်ဖိုးမှာ ၁၂၀၀% မှ ၁၀၀၀% ထပ်မံတိုးတက်လာပြီး စုစုပေါင်း ၂၂၀၀% သို့ ရောက်ရှိသွားပြီဖြစ်သည်]

[ဘွဲ့တံဆိပ်အသစ် - သောင်းကျန်းသော ဖန်တီးရှင်]

[သင်၏ သန့်ရှင်းသောနယ်မြေမှာ အဆင့်မြှင့်တင်ရန်အတွက် အရည်အချင်း ပြည့်မီသွားပြီဖြစ်သည်]

[ဆုလာဘ်အဖြစ် - တာအိုရာပေါင်းစပ် ကောင်းကင်အမွေ နတ်ဘုရားဘီးစက်]

[ဆုလာဘ်အဖြစ် - မျိုးဆက်များပြားခြင်း၊ ကောင်းချီးများပြားခြင်း]

[ဤစွမ်းရည်အရ သင့်ထံမှ ပေါက်ဖွားလာမည့် သားစဉ်မြေးဆက်များသည် သူတို့၏ ကျင့်ကြံခြင်းအောင်မြင်မှုများ၊ နတ်ဘုရားခန္ဓာကိုယ်များ၊ နှင့် ကံကြမ္မာအရှိန်အဝါများကို သင့်ထံသို့ ပြန်လည်သွယ်တန်း ပေးပို့သွားမည်ဖြစ်သည်]

ချန်ကျီရှင်း၏ စိတ်ထဲတွင် အေးစက်သော အသံများ ကြားလိုက်ရသည်။

"နောက်ဆုံးတော့လည်း ဇာတ်လိုက်တစ်ယောက်ကို ဖယ်ရှားနိုင်ခဲ့ပြီ"

ချန်ကျီရှင်းမှာ သက်ပြင်းချလိုက်ပြီး နှုတ်ခမ်းတွင် အပြုံးတစ်ခု ပေါ်လာသည်။

သူ၏ စိတ်ထဲတွင် ပေါ်လာသော စာရင်းဇယားများကို ကြည့်လိုက်သည်။

"ကံကြမ္မာတန်ဖိုး တစ်ထောင်တောင်တိုးတယ် ဒီလောက်တောင် များတာလား"

သူ အံ့ဩသွားပြီးနောက် သန့်ရှင်းသော နယ်မြေအဆင့်မြှင့်တင်ခြင်းနှင့် မျိုးဆက်များပြားခြင်း၊ ကောင်းချီးများပြားခြင်းဆိုသော စွမ်းရည်ကို ကြည့်ကာ မျက်ခုံးပင့်လိုက်မိသည်။

"ဒါက... ငါ့ကို အိမ်ထောင်ပြုပြီး ကလေးယူဖို့ အတင်းအကျပ် တွန်းအားပေးနေတာလား"

သူ ခေါင်းကို ခါယမ်းလိုက်ပြီး ထိုအတွေးကို ခဏ ဖယ်ထားလိုက်သည်။

သူသည် ပင်လယ်ပြင်ကို လက်ဖြင့် ဝှေ့ယမ်းလိုက်သည်။ ကြီးမားသော ဆွဲငင်အားကြောင့် လီချန်းရှင်း၏ ရုပ်အလောင်းမှာ သူ၏ လက်ထဲသို့ ရောက်ရှိလာသည်။

ချန်ကျီရှင်းမှာ မဆိုင်းမတွပင် လီချန်းရှင်း၏ ခေါင်းကို ဖြတ်ထုတ်လိုက်ကာ ဆံပင်မှ ဆွဲကိုင်၍ ကမ်းခြေတွင်ရှိသော ရွှေရောင်ရထားကြီးဆီသို့ ပစ်ပေါက်လိုက်သည်။

ခေါင်းမှာ လူးလှိမ့်သွားပြီး ရွှေရောင်ရထား၏ ကန့်လန့်ကာရှေ့တွင် မျက်လုံးပြူးလျက် ရပ်တန့်သွားသည်။

နောက်တစ်ခဏတွင် ချန်ကျီရှင်းမှာ ရွှေရောင်ရထားကို ကြည့်ကာ လက်ညှိုးဖြင့် အေးဆေးစွာ ခေါ်လိုက်သည်။

သူ၏ အမူအရာမှာ ရိုးရှင်းလှသည်။

"မင်းအလှည့်ပဲ"