အခန်း ၂၃၅

အခန်း ၂၃၅ - အရပ်လေးမျက်နှာမှ နတ်ဘုရားနယ်မြေများ။ အရှေ့ဘုံနတ်ဘုရားနယ်မြေ။

“မင်း ငါ့ကို လမ်းပြပေးနိုင်မလား။”

လင်းချန် ၏ စကားများကို ကြားလိုက်ရစဉ် ဂေါ်ဖုန်းထျန်း သည် စိတ်အာရုံအနည်းငယ် ပြန်လည်ပွင့်လင်းလာခဲ့ပြီး မတတ်နိုင်ဘဲ သံသယစိတ်ဖြင့် ပြန်လည်မေးမြန်းလိုက်မိသည်။

“စီ... စီနီယာကြီး စီနီယာကြီးက ကျွန်တော့်ကို ဘယ်လိုလမ်းမျိုး ပြခိုင်းချင်လို့လဲဟင်။”

သူ ထိုသို့မေးလိုက်သည့်တိုင်အောင် သူ၏ အသံအတွင်း၌မူ အနည်းငယ် တုန်ရင်နေဆဲ ဖြစ်နေခဲ့ရာ သူ၏ ရင်ထဲမှ ထိတ်လန့်တုန်လှုပ်မှုများကို ဖုံးကွယ်နိုင်ခြင်း မရှိချေ။

လက်ဝါးတစ်ချက်... လက်ဝါးတစ်ချက်တည်းပဲ။

သူတို့ကို သေလမ်းထဲအထိ မောင်းထုတ်ခဲ့ကြတဲ့ လိုက်လံဖမ်းဆီးသူတွေ အကုန်လုံးက... ဘာမျှမရှိတဲ့ အနတ္တအဖြစ်ကို ပြောင်းလဲသွားခဲ့ရပြီ။

ဒါတင်တင် မကသေးဘဲ သူတို့ အနတ္တအဖြစ်သို့ ပြောင်းလဲမသွားမီမှာတင် သူတို့၏ မှတ်ဉာဏ်များအားလုံးကို တစ်ပြိုင်နက်တည်း ထုတ်ယူခြင်းခံလိုက်ရပြီး ဤစီနီယာကြီး၏ စစ်ဆေးခြင်းကို ခံလိုက်ရသေးသည်။

ဤကဲ့သို့သော နည်းလမ်းမျိုးက တကယ့်ကို ကြောက်မက်ဖွယ်ကောင်းလွန်းလှသည်။

ထိုလူများထဲတွင် သူတော်စင်ဘုရင်အဆင့် ကျွမ်းကျင်သူတစ်ယောက်ပင် ပါဝင်နေခဲ့သည် မဟုတ်ပါလား။

ဂေါ်ဖုန်းထျန်းတစ်ယောက်တည်းသာ စိတ်ထဲကနေ မထိန်းနိုင်ဘဲ ထိတ်လန့်တုန်လှုပ်နေခဲ့ရသည် မဟုတ်ဘဲ ဂေါ်လော့နှင့် အခြားသော ဂေါ်မိသားစုမှ ကျွမ်းကျင်သူများသည်လည်း ထို့အတူပင် ဖြစ်နေခဲ့ကြသည်။

သူတို့သည် လင်းချန်ကို ကြောင်အမ်းအမ်းဖြင့် စိုက်ကြည့်နေခဲ့ကြပြီး ပါးစပ်များကို ဟနေခဲ့ကြသော်လည်း မည်သည့်စကား ပြောရမည်ကိုမူ မသိရှိခဲ့ကြချေ။

သူတို့၏ ဦးနှောက်များသည် လက်ရှိတွင် လုံးဝ စဉ်းစားတွေးတောနိုင်စွမ်း ကင်းမဲ့နေခဲ့ပြီ ဖြစ်သည်။

အကျပ်အတည်းကြီးအတွင်းမှ ကံကောင်းထောက်မစွာ အသက်ရှင်လွတ်မြောက်ခဲ့ရသည်ဟူသော ခံစားချက်ကပင် သူတို့၏ ထိတ်လန့်တုန်လှုပ်မှုများကို ဖုံးကွယ်ပေးနိုင်ခြင်း မရှိချေ။

သူတို့အနေဖြင့် လင်းချန်သည် မိမိတို့ ဂေါ်မိသားစုတွင် အစွမ်းထက်ဆုံးဖြစ်သော ပုဂ္ဂိုလ်ထက်ပင် ပို၍ အစွမ်းထက်နေဦးမည်ဟု ခံစားလိုက်ရသည်။

ဤအခြေအနေသို့ ရောက်ရှိလာခဲ့ပြီ ဖြစ်သဖြင့်သူတို့သည် မိမိတို့၏ သက်တမ်းနှင့် အနှစ်သာရသွေး များကို လောင်ကျွမ်းစေခြင်းကို ရပ်တန့်လိုက်ကြပြီ ဖြစ်သည်။

သူတို့၏ ခန္ဓာကိုယ် အခြေအနေနှင့် သက်တမ်းမှာ အကြီးအကျယ် ထိခိုက်ပျက်စီးသွားခဲ့ရပြီ ဖြစ်သော်လည်းမနည်းပင် အသက်ကို ဖက်နဲ့ထုတ်၍ အရယူနိုင်ခဲ့ကြပြီ ဖြစ်သည်။

လင်းချန်သည် ပြုံးလိုက်ပြီး ရှင်းပြလိုက်သည်။

“ငါဒီ နေရာကို အခုတင် ရောက်ရှိလာတာမို့လို့မင်းတို့ဆီကနေ လမ်းညွှန်ချက်လေးတွေ တောင်းဆိုချင်လို့ပါ။ မင်းတို့ ငါ့ကို ပြောပြပေးနိုင်မလား။”

“ဒါနဲ့... ငါ့ကိုယ်ငါ မိတ်ဆက်ပါရစေဦး။ ငါ့နာမည်က လင်းချန် ပါ။ ငါ့ကို စီနီယာကြီးလို့ ခေါ်နေဖို့ မလိုပါဘူး ငါ့နာမည်အတိုင်းပဲ ခေါ်လို့ရပါတယ်။”

“တကယ်တော့ငါတို့ကြားထဲက အသက်အရွယ် ကွာခြားချက်က အဲဒီလောက်အထိ ကြီးမားလှတာ မဟုတ်ပါဘူး။”

သူ၏စကား ထွက်ပေါ်လာသည်နှင့်အမျှဂေါ်ဖုန်းထျန်းဂေါ်လော့နှင့် အခြားသော ဂေါ်မိသားစု ကျွမ်းကျင်သူများသည် တုန်လှုပ်သွားခဲ့ကြရပြီး စိတ်ထဲကနေ မအောင့်နိုင်ဘဲ တစ်ယောက်ကိုတစ်ယောက် လှမ်း၍ ကြည့်လိုက်မိကြတော့သည်။

ဤနေရာကို အခုတင် ရောက်ရှိလာတာ ဟုတ်လား... ဒါဆိုရင် လင်းချန်က တခြားသော နယ်မြေ ကနေ အခုတင် ငါတို့ရဲ့ အရှေ့ဘုံနတ်ဘုရားနယ်မြေ ဆီကို ရောက်ရှိလာတဲ့ ကျွမ်းကျင်သူကြီးတစ်ယောက်လား။

ဒါကို တွေးမိသွားကြစဉ်အားလုံးသောသူများသည် နောက်ထပ်တစ်ကြိမ် မထိန်းချုပ်နိုင်လောက်သည့် အလွန်အမင်း ထိတ်လန့်တုန်လှုပ်မှုကြီးအတွင်းသို့ ကျရောက်သွားခဲ့ကြရပြန်သည်။

နယ်မြေတစ်ခုနှင့်တစ်ခုအကြား ဖြတ်ကျော်နိုင်ခြင်းမျိုးဟူသည်ဤကဲ့သို့သော စွမ်းအားမျိုးကို မဟာဧကရာဇ်နယ်ပယ် ကျွမ်းကျင်သူတစ်ဦးသာလျှင် လုပ်ဆောင်နိုင်ခြင်း ဖြစ်ပေသည်။

တစ်နည်းအားဖြင့်ဆိုရသော် မိမိတို့ရှေ့မှောက်တွင် ရပ်တန့်နေသော လင်းချန်သည် စစ်မှန်လှသော မဟာဧကရာဇ် ကျွမ်းကျင်သူကြီးတစ်ဦး ဖြစ်ပေသည်။

မဟာဧကရာဇ်နယ်ပယ် ကျွမ်းကျင်သူတစ်ဦးသာလျှင် သူတို့ အစောနက မြင်တွေ့ခဲ့ရသည့် ကြောက်မက်ဖွယ်ကောင်းလှသော ကိစ္စရပ်မျိုးကို လုပ်ဆောင်နိုင်ခြင်း ဖြစ်သည်။

သို့သော် လင်းချန်က သူနှင့် ဂေါ်ဖုန်းထျန်းကြားရှိ အသက်အရွယ် ကွာခြားချက်မှာ ကြီးမားခြင်းမရှိဟု ပြောခဲ့သည်မှာ မည်သည့်အဓိပ္ပာယ်နည်း။

ရုတ်တရက်ဆိုသလိုဂေါ်လော့၏ မျက်သူငယ်အစုံမှာ ကျုံ့ဝင်သွားခဲ့ရပြီး သူသည် မတတ်နိုင်ဘဲ နောက်သို့ ခြေလှမ်းအများအပြား ဆုတ်ခွာလိုက်မိတော့သည်။

သူသည် ကြောက်မက်ဖွယ်ကောင်းလှသော အချက်တစ်ခုကို တွေးမိသွားခြင်း ဖြစ်ပြီးယင်းကလည်း အမှန်တရားဖြစ်ရန် အလွန်တရာ ရာခိုင်နှုန်းများနေခဲ့သည်။

လင်းချန်၏ အသက်အရွယ်မှာ သူတို့ စိတ်ကူးကြည့်ထားသကဲ့သို့ရှည်လျားလှသော ခေတ်ကမ္ဘာကြီးများကို ဖြတ်သန်းလာခဲ့သည့် ပုဂ္ဂိုလ်မျိုး မဟုတ်ချေ။

ဆန့်ကျင်ဘက်အနေဖြင့် သူသည် တကယ်ပဲ သူ မြင်တွေ့နေရသည့် ပုံစံအတိုင်း ငယ်ရွယ်လွန်းလှပြီးအသက် တစ်ဆယ့်ခုနစ် သို့မဟုတ် တစ်ဆယ့်ရှစ်နှစ်ဝန်းကျင်မျှသာ ရှိဦးမည် ဖြစ်သည်။

အကယ်၍ ဒါကသာ တကယ်အမှန်တရား ဖြစ်နေမည်ဆိုပါကယင်းက မည်မျှအထိ ကြောက်မက်ဖွယ်ကောင်းလိမ့်မည်ကို သူ စိတ်ကူးပင် မကြည့်ရဲတော့ချေ။

အသက် တစ်ဆယ့်ခုနစ် တစ်ဆယ့်ရှစ်နှစ်အရွယ် မဟာဧကရာဇ်တစ်ဦး... ဤကဲ့သို့သော ကိစ္စမျိုးသည် ဤအရှေ့ဘုံနတ်ဘုရားနယ်မြေ၏ ထောင့်စွန်းနေရာလေးတစ်ခုကို ထားဘိဦး အရှေ့ဘုံနတ်ဘုရားနယ်မြေတစ်ခုလုံး သို့မဟုတ် ထာဝရတိုက်ကြီး တစ်ခုလုံးတွင်ပင်လျှင် အလွန်တရာ ကြီးမားလှသော လှိုင်းတံပိုးကြီးများကို ထွက်ပေါ်လာစေပေလိမ့်မည်။

သူသည် လောကကြီးအတွင်း ထိပ်တန်းအဆင့် သို့မဟုတ် တစ်ဦးတည်းသော အနှိုင်းမဲ့ ပါရမီရှင် ကြီး ဖြစ်လာပေလိမ့်မည်။

သူတို့ ယခုတစ်ကြိမ်တွင် မည်ကဲ့သို့သော ကြောက်မက်ဖွယ်ကောင်းလှသည့် မိစ္ဆာကောင် ပါရမီရှင်ကြီးနှင့် ဆုံတွေ့ခဲ့ရခြင်း ဖြစ်သနည်း။

အခြားသော ဂေါ်မိသားစု ကျွမ်းကျင်သူများသည်လည်း ဤပြဿနာကို ထက်မြက်စွာဖြင့် ရိပ်မိလိုက်ကြသည်။

လင်းချန်၏ စွမ်းအားများကြောင့် အလွန်အမင်း ထိတ်လန့်နေခဲ့ကြရပြီ ဖြစ်သဖြင့်သူတို့ စကားပြောရန် ပို၍ပင် ခက်ခဲသွားခဲ့ရတော့သည်။

ဂေါ်ဖုန်းထျန်းတစ်ဦးတည်းသာလျှင် ခေတ္တမျှအတွင်း စိတ်အာရုံပြန်မလည်သေးဘဲ လင်းချန်၏ စကားကို အသိစိတ်အရ ပြန်လည်တုံ့ပြန်လိုက်မိသည်။

“စီနီယာကြီး... မဟုတ်ပါဘူးမဟုတ်ပါဘူးလင်းချန် အစ်ကိုကြီး... အစ်ကိုကြီးရဲ့ ကူညီမှုကြောင့်သာ ကျွန်တော့်တို့တွေ အန္တရာယ်ကနေ လွတ်မြောက်နိုင်ခဲ့တာပါ။”

“လမ်းပြပေးဖို့ နေနေသာသာ အစ်ကိုကြီးက ကျွန်တော် ဂေါ်ဖုန်းထျန်းကို အစ်ကိုကြီးအတွက် နွားလိုမြင်းလို အလုပ်အကျွေးပြုခိုင်းမယ်ဆိုရင်တောင်မှ ကျွန်တော့်အနေနဲ့ စက္ကန့်ပိုင်းမျှ တုံ့ဆိုင်းနေမှာ မဟုတ်ပါဘူး။”

သူတို့ ဂေါ်မိသားစုတစ်ခုလုံးတွင် အစွမ်းထက်ဆုံး တည်ရှိမှုမှာ သူတို့ မိသားစု၏ ဘိုးဘေးအိုကြီးသာ ဖြစ်ပြီးသူ၏ ကျင့်ကြံခြင်းအဆင့်မှာဧကရာဇ်အဆင့် အလယ်အလတ်အဆင့်မျှသာ ရှိခြင်း ဖြစ်သည်။

ယခုအခါတွင် ဤကဲ့သို့သော ကြောက်မက်ဖွယ်ကောင်းလှသည့် မဟာဧကရာဇ် ကျွမ်းကျင်သူကြီးတစ်ဦးနှင့် ဆက်ဆံရေးတစ်ခု တည်ဆောက်နိုင်မည့် အခွင့်အရေး ရရှိခဲ့ပြီ ဖြစ်သဖြင့် သူသည် ယင်းကို လက်မလွှတ်တမ်း ဆုပ်ကိုင်ရပေမည်။

သူသာ ဤကျွမ်းကျင်သူကြီး၏ မျက်နှာသာပေးမှုကို အရယူနိုင်မည်ဆိုပါကယွန်းထျန်းနတ်ဘုရားဂိုဏ်း မှ အကြီးအကဲတစ်ပါး၏ တပည့် ဖြစ်ခွင့်ရခြင်းဟူသည် ဘာမျှမဟုတ်တော့ချေ။

သူ မတော်တဆ ဆုံတွေ့ခဲ့ရသော ထိုယွန်းထျန်းနတ်ဘုရားဂိုဏ်း အကြီးအကဲ၏ ကျင့်ကြံခြင်းအဆင့်မှာ ဧကရာဇ်အဆင့်အထွတ်အထိပ် မျှသာ ဖြစ်သည်။

ဤကဲ့သို့သော အဆင့်အတန်းမျိုး၏ တပည့်တစ်ယောက်ဟူသည် မဟာဧကရာဇ် ကျွမ်းကျင်သူကြီးတစ်ဦးနှင့် မည်သို့လျှင် နှိုင်းယှဉ်နိုင်ပါမည်နည်း။

ထို့ပြင်လင်းချန်သည် တကယ်ပဲ သူတို့၏ အသက်ကို ကယ်တင်ပေးခဲ့ခြင်း ဖြစ်သဖြင့်သူ ဤကဲ့သို့ ပြုလုပ်သင့်ပေသည်။

စိတ်အာရုံ မနည်းပြန်လည်တည်ငြိမ်လာခဲ့သော ဂေါ်လော့သည် ဂေါ်ဖုန်းထျန်း၏ စကားများကို ကြားလိုက်ရစဉ် စိတ်ထဲကနေ မအောင့်နိုင်ဘဲ ချီးကျူးလိုက်မိတော့သည်။

'ဖုန်းထျန်းရဲ့ အကဲခတ်မှုက ဒီလောက်အထိ ထက်မြက်လာလိမ့်မယ်လို့ ငါ မျှော်လင့်မထားခဲ့ဘူး။'

အခြားသော ဂေါ်မိသားစု ကျွမ်းကျင်သူများသည်လည်း တစ်ယောက်ကိုတစ်ယောက် လှမ်းကြည့်လိုက်ကြပြီး စိတ်သက်သာရာရလှသော အပြုံးများဖြင့် ပြုံးလိုက်ကြသည်။

သူတို့၏ သခင်လေးသည် တကယ်ပင်ကြီးပြင်းလာခဲ့ပြီ ဖြစ်သည်။

ဂေါ်ဖုန်းထျန်း၏ စိတ်ရင်းမှန်လှသော စကားများကို ကြားလိုက်ရစဉ် လင်းချန်၏ မျက်နှာထက်ရှိ အပြုံးမှာ ပို၍ပင် နက်ရှိုင်းသွားခဲ့ရပြီး သူ၏ ခေါင်းကို ခါယမ်းလိုက်သည်။

“ငါ့ကို နွားလိုမြင်းလို အလုပ်အကျွေးပြုနေဖို့ မလိုပါဘူး။ မင်းရဲ့ စိတ်ဓာတ်က တော်တော်လေး ကောင်းမွန်တာမို့လို့သူငယ်ချင်းတွေအဖြစ် နေကြတာက ပိုပြီး အဆင်ပြေပါတယ်။”

“ဒါပေမဲ့ ငါက လက်ရှိ ဘယ်နေရာကို ရောက်နေလဲဆိုတာကို အနည်းငယ် ဇဝေဇဝါ ဖြစ်နေတုန်းပဲ။ မင်း ဒါကို ငါ့ကို အသေးစိတ်လေး ရှင်းပြပေးနိုင်မလား။"

ဂေါ်ဖုန်းထျန်း စကားမပြောနိုင်သေးမီမှာတင်ဂေါ်လော့က ပြုံးလျက် ဝင်၍ ပြောလိုက်သည်။

“စီနီ... ညီလေး လင်းချန် ငါ့ရဲ့ ဒီမြေးလေးက အသက်ငယ်ရွယ်သေးပြီး အပြင်လောကကို ထွက်ပြီး အတွေ့အကြုံရှာဖွေနိုင်မည့် အခွင့်အရေး သိပ်မရှိခဲ့သေးတာမို့လို့ သူက အပြင်လောကအကြောင်းကို သေသေချာချာ မသိသေးဘူး။”

“ငါတို့ လက်ရှိ ရောက်နေတဲ့နေရာကို ငါကပဲ ရှင်းပြပေးတာက ပိုပြီး အဆင်ပြေလိမ့်

မယ်။ မင်း ဘယ်လိုထင်လဲလင်းညီလေး။”

လင်းချန်သည် သူ၏ မြေးမလေး ဂေါ်ဖုန်းထျန်းနှင့် သူငယ်ချင်းများ ဖြစ်သွားခဲ့ကြပြီ ဖြစ်သလိုလင်းချန်သည်လည်း အသက်အရွယ် သိပ်ပြီး မကြီးရင့်သေးကြောင်း သိရှိထားသဖြင့် သူ့ကို စီနီယာကြီးဟု ဆက်လက်ခေါ်ဆိုနေခြင်းမှာ အနည်းငယ် ယဉ်ကျေးမှု မရှိရာ ရောက်ပေလိမ့်မည်။

ဤအခွင့်အရေးကို အသုံးပြု၍ သူတို့၏ ဆက်ဆံရေးကို ပိုမိုနီးကပ်သွားအောင် ပြုလုပ်လိုက်ခြင်းက ပို၍ ကောင်းမွန်ပေသည်။

လင်းချန်သည် ခေတ္တမျှ တွေးတောလိုက်ပြီး ခေါင်းညိတ်ပြလိုက်သည်။

“ဒီလိုဆိုရင်တော့ အဘိုးကြီးကို ဒုက္ခပေးရတော့မှာပဲ။”

ဂေါ်လော့သည် ဤမျှအထိ အလေးအနက်ထားခြင်း ခံလိုက်ရသဖြင့် အနည်းငယ် စိတ်လှုပ်ရှားသွားခဲ့ရပြီး သူ၏ လက်များကို အထပ်ထပ် အခါခါ ဝှေ့ယမ်းပြလိုက်သည်။

“လင်းညီလေး... ငါ့ကို အဘိုးကြီးလို့ ခေါ်တာကို ငါ မခံယူဝံ့ပါဘူး။ မင်းက ငါ့ကို အထင်ကြီးပေးထားတာမို့လို့ငါတို့ လက်ရှိ ရောက်နေတဲ့နေရာရဲ့ အချက်အလက်အားလုံးကို ငါ ပြောပြပေးပါ့မယ်။”

ပြောပြီးသည်နှင့် ဂေါ်လော့သည် သူ၏ အတွေးများကို ပြန်လည်စုစည်းလိုက်ပြီးနောက် ဆက်၍ ပြောလိုက်သည်။

“လင်းညီလေး... မင်း သိထားသင့်တာကတော့ ငါတို့ရဲ့ ထာဝရတိုက်ကြီးကို အရပ်လေးမျက်နှာ နတ်ဘုရားနယ်မြေများ ဆိုပြီး ခွဲခြားထားတာ ဖြစ်တယ်။”

“ငါတို့ လက်ရှိ ရောက်နေတဲ့နေရာကတော့ အရပ်လေးမျက်နှာ နတ်ဘုရားနယ်မြေများထဲက တစ်ခုဖြစ်တဲ့ အရှေ့ဘုံနတ်ဘုရားနယ်မြေအတွင်းမှာ တည်ရှိနေတာ။"

“နေရာအနေနဲ့ ပြောရရင်တော့ အရှေ့ဘုံနတ်ဘုရားနယ်မြေရဲ့ မြောက်ဘက်လွမ်ထီးခေါင် နတ်ဘုရားနယ်မြေ ဘက်ကို ဦးတည်တဲ့ လမ်းကြောင်းပေါ်မှာ တည်ရှိနေတာပါ။”

“ဒီနေရာမှာ... အတိုင်းအဆမဲ့ နတ်ဘုရားနိုင်ငံတော် လို့ ခေါ်တဲ့ အစွမ်းထက်လှတဲ့ နတ်ဘုရားနိုင်ငံတော်ကြီး တစ်ခု ရှိပြီး အဆုံးမဲ့လှတဲ့ နယ်မြေတွေကို အုပ်ချုပ်ထားတာ ဖြစ်တယ်။”

“ငါတို့ရဲ့ ပိုပြီး တိကျလှတဲ့ နေရာကတော့ အတိုင်းအဆမဲ့ နတ်ဘုရားနိုင်ငံတော်ရဲ့ ချင်းကျိုး နယ်မြေအတွင်းက ယွမ်လျှိုမြောင်ရဲ့ အနီးအနားမှာ ဖြစ်ပါတယ်။”

အရပ်လေးမျက်နှာ နတ်ဘုရားနယ်မြေများ... အရှေ့ဘုံနတ်ဘုရားနယ်မြေ... မြောက်ဘက်လွမ်ထီးခေါင် နတ်ဘုရားနယ်မြေ... အတိုင်းအဆမဲ့ နတ်ဘုရားနိုင်ငံတော်... ချင်းကျိုး ယွမ်လျှိုမြောင်... ထိုဝေါဟာရ ဝေါဟာရများသည် တစ်ခုနှင့်တစ်ခု ရောယှက်လျက် လင်းချန်၏ နားထဲသို့ ရောက်ရှိလာခဲ့ရာ သူသည် နားလည်သဘောပေါက်သွားသည့်အလား ခေါင်းညိတ်လိုက်သည်။

သူ၏ လက်ရှိ ရောက်နေသောနေရာသည် တာအိုပြည်နယ် ၃၀၀၀ နှင့် မည်မျှအထိ ဝေးကွာလိမ့်မည်နည်းဟု သူ စိတ်ထဲကနေ တွေးတောလိုက်မိသည်။

ဤတာအိုပြည်နယ် ၃၀၀၀ ဟူသည် အောက်ဘုံ ၏ တာအိုပြည်နယ် ၃၀၀၀ ကို ဆိုလိုခြင်း မဟုတ်ချေ။

ယင်းအစားတာအိုဘိုးဘေး နှင့် မိစ္ဆာဘိုးဘေးတို့ ထာဝရတိုက်ကြီးတွင် တည်ဆောက်ထားခဲ့သော အင်အားစုဖြစ်သည့် တာအိုပြည်နယ် ၃၀၀၀ ကို ဆိုလိုခြင်း ဖြစ်သည်။

သူသည် မိမိ၏ အမြဲတမ်း ရည်မှန်းချက်ပန်းတိုင်မှာ မည်သည့်အရာ ဖြစ်ကြောင်းကို မေ့လျော့နေခဲ့ခြင်း မရှိချေ။

မိမိကိုယ်ကို ပြန်လည်တည်ငြိမ်အောင် ပြုလုပ်လိုက်ရင်း လင်းချန်သည် ဂေါ်လော့ထံသို့ လက်အုပ် အနည်းငယ် ချီလိုက်သည်။

“ကျေးဇူးတင်ပါတယ်။”

ပြောပြီးသည်နှင့် လင်းချန်သည် လမ်းကြောင်းတစ်ခုကို သတ်မှတ်လိုက်ပြီး ထွက်ခွာရန် ပြင်လိုက်သော်လည်း မိမိအနေဖြင့် လမ်းကြောင်းကို မသိရှိသေးကြောင်း အခက်အခဲဖြစ်စွာဖြင့် တွေ့ရှိလိုက်ရသည်။

ထို့ကြောင့် သူသည် အခက်အခဲဖြစ်စွာဖြင့် နောက်သို့ ပြန်လှည့်လာခဲ့ပြီး ဂေါ်လော့ကို ရှက်ကိုးရှက်ကန်း အပြုံးမျိုးဖြင့် ပြုံးပြလိုက်မိသည်။

“ဟို... ဒီအနီးအနားမှာ မြို့ကြီးတွေ ဘာတွေ ရှိလားဆိုတာ သိကြလား။ ငါ မြေပုံတစ်ခုလောက် သွားဝယ်ချင်လို့ပါ။”

သူသည် ထာဝရတိုက်ကြီးနှင့် ပတ်သက်ပြီး တကယ်ပဲ ဘာမျှမသိရှိသေးသဖြင့် တိကျလှသော လမ်းကြောင်းများကို မခွဲခြားနိုင် ဖြစ်နေရခြင်း ဖြစ်သည်။

မိမိ၏ လက်ရှိ ရောက်နေသောနေရာကို သိရှိထားသည့်တိုင်အောင် မည်သည့်လမ်းကြောင်းအတိုင်း ခရီးသွားရမည်ကိုမူ သူ မသိရှိချေ။

အတိုင်းအဆမဲ့ နတ်ဘုရားနိုင်ငံတော်၊အရှေ့ဘုံနတ်ဘုရားနယ်မြေ သို့မဟုတ် ထာဝရတိုက်ကြီးတစ်ခုလုံး၏ ပြည့်စုံလှသော မြေပုံကို ရရှိပြီးမှသာလျှင် သူ နောက်ထပ် မည်သည့်နေရာသို့ သွားရမည်ကို သိရှိနိုင်ပေလိမ့်မည်။

ဒီအနီးအနားက မြို့ကြီးတွေ ဟုတ်လား...

ဂေါ်ဖုန်းထျန်းနှင့် ဂေါ်လော့တို့သည် တစ်ယောက်ကိုတစ်ယောက် လှမ်းကြည့်လိုက်ကြပြီး ပြုံးလိုက်ကြသည်။

“လင်းချန် အစ်ကိုကြီး... ကျွန်တော်တို့နဲ့အတူတူ ဘာဖြစ်လို့ ခရီးမထွက်တာလဲ။ ကျွန်မတို့ကလည်း အိပ်မက်မြို့တော် ဆီကို ပြန်ကြမှာပါ။”

“အိပ်မက်မြို့တော်ကို ရောက်သွားပြီးရင်တော့ အစ်ကိုကြီးအနေနဲ့ ဒါကို ကိုယ်တိုင် သွားဝယ်နေဖို့ မလိုတော့ပါဘူး။"

“ကျွန်တော်တို့ ဂေါ်မိသားစုအတွင်းမှာ အတိုင်းအဆမဲ့ နတ်ဘုရားနိုင်ငံတော်ရဲ့ ပြည့်စုံလှတဲ့ မြေပုံတစ်ခု ရှိပါတယ်။”

“အကယ်၍ အစ်ကိုကြီးက အရှေ့ဘုံနတ်ဘုရားနယ်မြေရဲ့ မြေပုံကို လိုချင်တယ်ဆိုရင်လည်း ကျွန်တော်တို့ အစ်ကိုကြီးအတွက် ရှာဖွေပေးနိုင်ပါတယ်။”

“အစ်ကိုကြီးက ကျွန်တော်တို့ရဲ့ အရှေ့ဘုံနတ်ဘုရားနယ်မြေကို အခုတင် ရောက်ရှိလာပြီး ကျွန်တော်တို့ကိုလည်း ကယ်တင်ပေးခဲ့တယ်။"

“အိပ်မက်မြို့တော်ဆီကို သွားပြီး ကျွန်တော်တို့အနေနဲ့ အိမ်ရှင်ကောင်းပီသစွာ တာဝန်ကျေပွန်ခွင့် ရရှိမှာဖြစ်ပြီး အစ်ကိုကြီးကိုလည်း ကောင်းကောင်းမွန်မွန် ကျေးဇူးတင်ခွင့် ရရှိမှာ ဖြစ်ပါတယ်။”

သူ စကားပြောလိုက်သည်နှင့်အမျှဂေါ်ဖုန်းထျန်း၏ မျက်နှာထက်တွင် စိတ်ရင်းမှန်ခြင်းနှင့် မျှော်လင့်စောင့်စားခြင်း အရိပ်အယောင်များဖြင့် ပြည့်နှက်နေခဲ့သည်။

ဂေါ်လော့နှင့် အခြားသော ဂေါ်မိသားစု ကျွမ်းကျင်သူများသည်လည်း မျှော်လင့်စောင့်စားလှသော မျက်ဝန်းများဖြင့် ကြည့်နေခဲ့ကြသည်။

အကယ်၍ လင်းချန်သာ သူတို့ ဂေါ်မိသားစုထံသို့ ဧည့်သည်တော်အဖြစ် လာရောက်လည်ပတ်ပေးမည်ဆိုပါကယင်းက သူတို့အတွက် အမြင့်ဆုံးသော ဂုဏ်သရေ ဖြစ်လာပေလိမ့်မည်။

သူသည် မိသားစုခေါင်းဆောင်သာ ဤကိစ္စကို သိရှိသွားမည်ဆိုပါက ဧကန်မုချ အလွန်အမင်း ဝမ်းမြောက်ဝမ်းသာ ဖြစ်သွားလိမ့်မည်ဟု ယုံကြည်နေခဲ့သည်။

အားလုံး၏ မျက်နှာအမူအရာများကို သတိပြုမိစဉ်လင်းချန်သည် ခေတ္တမျှ တွေးတောလိုက်ပြီး အသာအယာ ခေါင်းညိတ်ပြလိုက်သည်။

“ကောင်းပါပြီဒါဆိုရင်တော့ မင်းတို့ကို ဒုက္ခပေးရတော့မှာပဲ။”

ထာဝရတိုက်ကြီးရှိ ဒေသခံ မိသားစုတစ်ခု၏ အကူအညီကို ရရှိခြင်းအားဖြင့် အရာအားလုံးက ပိုပြီး အဆင်ပြေချေမွေ့သွားနိုင်မည်ဖြစ်ရာ သူ၏ အချိန်များကိုလည်း ဤမျှအထိ အလဟဿ ဖြုန်းတီးပစ်ရလိမ့်မည် မဟုတ်ချေ။

လင်းချန်၏ သဘောတူညီလှသော အဖြေကို ရရှိလိုက်ရသဖြင့် ဂေါ်ဖုန်းထျန်းနှင့် အခြားသော ဂေါ်မိသားစု ကျွမ်းကျင်သူများ အားလုံးသည် ဝမ်းမြောက်ဝမ်းသာ ဖြစ်သွားခဲ့ကြရသည်။

လင်းချန်က သဘောတူလိုက်ပြီ ဖြစ်သဖြင့် သူသည် ဂေါ်မိသားစုအပေါ် မကောင်းသော ရည်ရွယ်ချက် မရှိကြောင်း သက်သေပြနေခဲ့ပြီ ဖြစ်သည်။

ဤနည်းလမ်းဖြင့်ဆိုပါက သူတို့သည် ယခုတစ်ကြိမ်တွင် မဟာဧကရာဇ် ကျွမ်းကျင်သူကြီးတစ်ဦးကို ကျောထောက်နောက်ခံအဖြစ် ရရှိနိုင်မည့် အခွင့်အရေး အကြီးအကျယ် ရှိနေခဲ့ပြီ ဖြစ်သည်။

မဟာဧကရာဇ် ကျွမ်းကျင်သူကြီးများဟူသည် အတိုင်းအဆမဲ့ နတ်ဘုရားနိုင်ငံတော်တစ်ခုလုံးတွင် အလွန်တရာ မြင့်မားလှသောအဆင့်အတန်းကို ခံစားကြရသူများ ဖြစ်သည်။

အတိုင်းအဆမဲ့ နတ်ဘုရားနိုင်ငံတော်တစ်ခုလုံးတွင် ထိပ်တန်းအဆင့် အစွမ်းထက်ဆုံး ပုဂ္ဂိုလ်များသည် ကောင်းကင်ဘုံဧကရာဇ်များ ဖြစ်ကြပြီး မဟာဧကရာဇ်နယ်ပယ်တွင် ရှိနေကြသူများမှာမူ အနည်းဆုံးတော့ ပထမတန်းစား စွမ်းအားစုများအဆင့်တွင် တည်ရှိနေကြသူများ ဖြစ်သည်။

မဟာဧကရာဇ် ကျွမ်းကျင်သူကြီးတစ်ဦး၏ ကျောထောက်နောက်ခံကို ရရှိခြင်းအားဖြင့် သူတို့၏ အိပ်မက်မြို့တော် ဂေါ်မိသားစုသည် ဒုတိယတန်းစား မိသားစုအဆင့်ထံမှနေ၍ ပထမတန်းစား မိသားစုအဆင့်ဆီသို့ တဟုန်ထိုး မြင့်တက်သွားနိုင်ပေလိမ့်မည်။

ဤအခိုက်အတန့်တွင် လင်းချန်သည် တစ်စုံတစ်ခုကို သတိရသွားသည့်အလား သူ၏ နဖူးကို အသာအယာ ရိုက်လိုက်မိသည်။

“ဒါနဲ့... ငါ တစ်ခုပြောဖို့ မေ့သွားလို့။ မင်းတို့ကို ဖမ်းဆီးဖို့ ရောက်လာခဲ့ကြတဲ့ အဲဒီလူတွေက နောက်ကွယ်က ကြိုးကိုင်သူ အစစ်အမှန်တွေ မဟုတ်ကြဘူး။”

“သူတို့တွေက ရွေးချယ်စရာမရှိလို့ လုပ်ခဲ့ကြရတဲ့ သနားစရာကောင်းတဲ့ လက်ပါးစေ လူမိုက်အုပ်စုတစ်စုမျှသာ ဖြစ်တယ်။ မင်းတို့ တျန်းယွမ်မြို့တော် ရဲ့ လီမိသားစုအကြောင်းကို ကြားဖူးကြလား။”

“နောက်ကွယ်က ကြိုးကိုင်သူ အစစ်အမှန်ကတော့ တျန်းယွမ်မြို့တော် လီမိသားစုရဲ့ မိသားစုခေါင်းဆောင် လီရှန့်ချန်ပဲ။"

တျန်းယွမ်မြို့တော်ရဲ့ လီမိသားစု ဟုတ်လား။

လီရှန့်ချန် တဲ့။

သူ၏စကား ဆုံးသွားသည်နှင့်အမျှ ဂေါ်ဖုန်းထျန်း၏ မျက်ဝန်းအစုံအတွင်း၌ နာကျည်းမုန်းတီးမှု အရိပ်အယောင်များ ပေါ်ထွက်လာခဲ့တော့သည်။

သူတို့သည် ယခုတစ်ကြိမ်တွင် အသက်ရှင်လွတ်မြောက်ခဲ့ကြရပြီ ဖြစ်သော်လည်းဂေါ်မိသားစုအနေဖြင့် ယခင်က ကျွမ်းကျင်သူအများအပြားကို ဆုံးရှုံးခဲ့ရပြီးပြီ ဖြစ်သည်။

“တောက်... လီမိသားစု ငါ ဂေါ်ဖုန်းထျန်းအနေနဲ့ မင်းတို့နဲ့ တစ်မိုးတည်းအောက်မှာ မနေဘူး။”

ဂေါ်လော့၏ မျက်ဝန်းအစုံအတွင်း၌လည်း အေးစက်လှသော အလင်းတန်းတစ်ခု ဖျတ်ခနဲ ပေါ်ထွက်သွားခဲ့သည်။

“ငါ အစောပိုင်းကတည်းက ဒီကိစ္စက တော်တော်လေးကို မသင်္ကာစရာကောင်းနေတယ်လို့ သံသယဝင်ခဲ့တာ ကြည့်ရတာ တကယ်ပဲ အဲဒီအတိုင်း ဖြစ်နေတာပဲ။”

“တျန်းယွမ်မြို့တော်ရဲ့ လီမိသားစု ဟုတ်လား။ ကျိလဲ့မိစ္ဆာဂိုဏ်းရဲ့ ကျောထောက်နောက်ခံကို အားကိုးပြီးတော့ သူတို့တွေက ငါတို့ အပြင်ထွက်နေတဲ့အချိန်ကို ချောင်းမြောင်းတိုက်ခိုက်ရဲလောက်အောင်အထိ မောက်မာရဲကြတာပဲ။”

“ဒီတစ်ကြိမ် မိသားစုဆီ ပြန်ရောက်သွားပြီးရင်တော့ ငါတို့ သူတို့ကို ထိုက်တန်တဲ့ တန်ဖိုးကို သေချာပေါက် ပေးဆပ်စေရမယ်။”

သူ၏စကား ပင် မဆုံးသေးမီမှာတငအားလုံးသောသူများသည် တစ်ယောက်ကိုတစ်ယောက် လှမ်းကြည့်လိုက်ကြပြီး လင်းချန်ထံသို့ လေးနက်တည်ငြိမ်စွာဖြင့် လက်အုပ်ချီလိုက်ကြတော့သည်။

“ကျွန်တော်တို့ မိတ်ဆွေလင်းချန်ကို ကျေးဇူးတင်ပါတယ်ဗျာ။”

ဒါကို မြင်တွေ့ရစဉ် လင်းချန်သည် မရေမရာဖြစ်လှသော အပြုံးတစ်ခုကိုသာ ပြုံးပြလိုက်သည်။

ဤကိစ္စရပ်များသည် သူနှင့် မည်သို့မျှ သက်ဆိုင်ခြင်း မရှိချေ။ သူ လက်ရှိ လုပ်ဆောင်ရန် လိုအပ်သည်မှာ တာအိုပြည်နယ် ၃၀၀၀ ၏ တည်နေရာကို ရှာဖွေရန်သာ ဖြစ်ပေသည်။

ထို့နောက်တွင်မူ ထိုလူစုသည် သူတို့၏ ပြန်လမ်းခရီးကို စတင်ခဲ့ကြတော့သည်။

အန္တရာယ်ပြု ခြိမ်းခြောက်မှုများထံမှနေ၍ လွတ်မြောက်သွားခဲ့ကြပြီ ဖြစ်သဖြင့် ဂေါ်မိသားစု ကျွမ်းကျင်သူများ၏ မျက်နှာထက်တွင် အပြုံးများ ပြန်လည်ပျံ့နှံ့သွားခဲ့ကြပြီ ဖြစ်သည်။

သူတို့၏ ခန္ဓာကိုယ် အခြေအနေမှာမူ အလွန်တရာ ဆိုးရွားနေခဲ့ပြီ ဖြစ်သည်။

သို့သော်လည်း ကံကောင်းထောက်မစွာဖြင့် သူတို့ အသက်ရှင်နေကြသေးသည်။

သူတို့ အသက်ရှင်နေသရွေ့တော့ အရာအားလုံးအတွက် မျှော်လင့်ချက် ရှိနေသေးသည် မဟုတ်ပါလား။

နာရီဝက်ခန့် ကြာမြင့်ပြီးနောက်။

ခန့်ညားထည်ဝါလှသော မြို့ကြီးတစ်မြို့၏ အပြင်ဘက်တွင် လင်းချန်သည် ခြေလှမ်းများကို ရပ်တန့်လိုက်ပြီး သူ၏ ခေါင်းကို အသာအယာ မော့ကြည့်လိုက်မိသည်။

သူသည် ရှေ့မှောက်ရှိ အမြင့် အတောင်တစ်ရာခန့် ရှိသော နက်မှောင်လှသော မြို့ရိုးကြီးကို လှမ်း၍ အကဲခတ်ကြည့်လိုက်သည်။

အပေါ်ယံတွင်မူ ခန့်ညားလှသော စာလုံးကြီး သုံးလုံးကို လှပဆန်းပြားလှသော လက်ရေးဟန်ဖြင့် ရေးသားထားသည့် ဧရာမ ကမ္ပည်းပြားကြီးတစ်ခု ရှိနေခဲ့သည်။

အိပ်မက်မြို့တော်။

မြို့ရိုး၏ ကုန်ကြမ်းပစ္စည်းများမှာ အလွန်တရာ ထူးခြားဆန်းပြားလှပြီး အတွင်း၌လည်း လျှို့ဝှက်လှသော အစီအရင်များ ဖုံးကွယ်ထားရာ မဟာဧကရာဇ် ကျွမ်းကျင်သူကြီးများ၏ တိုက်ခိုက်မှုများကိုပင် တောင့်ခံနိုင်ရန် လုံလောက်နေကြောင်း လင်းချန် မြင်တွေ့လိုက်ရသည်။

ယင်းက လင်းချန်ကို စိတ်ထဲကနေ မအောင့်နိုင်ဘဲ သက်ပြင်းချမိသွားစေခဲ့သည်။ ထာဝရတိုက်ကြီးဟူသည် တကယ်ပဲ နာမည်နှင့်လိုက်ဖက်လှပေသည်။

ဤမြို့သည် သူ မြင်တွေ့ရသည့် ပထမဆုံး မြို့မျှသာ ဖြစ်သော်လည်း ဤမျှအထိ လက်ရာမြောက်လှသော အတတ်ပညာများကို ပိုင်ဆိုင်ထားခြင်း ဖြစ်ရာ တကယ့်ကို အံ့ဩစရာ ကောင်းလှပေသည်။

တစ်ချိန်တည်းမှာပင် ယင်းက ထာဝရတိုက်ကြီးအပေါ် သူ၏ မျှော်လင့်စောင့်စားမှုကို ပို၍ပင် နက်ရှိုင်းသွားစေခဲ့သည်။

“ထာဝရတိုက်ကြီးဆီ ရောက်လာတာက အစပျိုးမှုအသစ် တစ်ခုပဲ...”

ဂေါ်လော့က ပြုံးလိုက်ပြီး လက်ကို ဝှေ့ယမ်းပြလိုက်သည်။

“လင်းညီလေး... မြို့ထဲကို ဝင်ကြစို့။ ငါ မိသားစုခေါင်းဆောင်ဆီကို ငါတို့ ပြန်လာတဲ့အကြောင်း လှမ်းပြီး အကြောင်းကြားထားပြီးပြီ။”

“ငါတို့ ဂေါ်မိသားစုက စားသောက်ပွဲကြီးတစ်ခုကို ပြင်ဆင်ထားပြီးပြီဖြစ်လို့ လင်းညီလေး ရောက်လာမယ့်အချိန်ကို စောင့်ဆိုင်းနေကြတာ။"

ယခင်က သူတို့ လိုက်လံဖမ်းဆီးခြင်း ခံနေရစဉ်အချိန်တုန်းကမူ သူတို့၏ ဆက်သွယ်ရေး နည်းလမ်းအားလုံး ပိတ်ဆို့ခြင်း ခံထားရသဖြင့် အကူအညီလှမ်းတောင်းရန် နည်းလမ်းမရှိခဲ့ချေ။

ထို့နောက်တွင်မူ ထိုကောင်များအားလုံး ရိုက်သတ်ခြင်း ခံလိုက်ရသဖြင့် ပိတ်ဆို့မှုများမှာလည်း သဘာဝအတိုင်းပင် ပျောက်ကွယ်သွားခဲ့ပြီ ဖြစ်သည်။

လင်းချန်သည် ခပ်ဖျော့ဖျော့လေး ပြုံးလိုက်ပြီး အသာအယာ ခေါင်းညိတ်ပြလိုက်သည်။

“ဒုက္ခပေးရတာ အားနာစရာကြီးပဲ။”

ဂေါ်လော့၏ ဦးဆောင်မှုအောက်တွင် ထိုလူစုသည် မည်သည့်အတားအဆီးမျှ မရှိဘဲ မြို့အတွင်းသို့ လမ်းလျှောက်ဝင်လာခဲ့ကြတော့သည်။

လမ်းတစ်လျှောက်တွင်မူ အိပ်မက်မြို့တော်၏ ကျင့်ကြံသူအများအပြားသည် သူတို့ကို စပ်စုချင်စိတ်ရှိလှသော မျက်ဝန်းများဖြင့် လှမ်း၍ ကြည့်နေခဲ့ကြသည်။

“ဒါက အပြင်ထွက်သွားကြတဲ့ ဂေါ်မိသားစုရဲ့ ကျွမ်းကျင်သူတွေ မဟုတ်ဘူးလား။"

“ဒါပေမဲ့ ဘာဖြစ်လို့ သူတို့ရဲ့ အခြေအနေက ဒီလောက်အထိ ဆိုးရွားနေရတာလဲ။”

“သူတို့တွေ ချောင်းမြောင်းတိုက်ခိုက်ခံလိုက်ရလို့လား။”

“ပြီးတော့ အဲဒီလူငယ်က ဘယ်သူလဲ။”

"ဒီလိုဆက်ဆံမှုကို ခံယူရခြင်းမျိုးဂေါ်မိသားစုရဲ့ မဟာအကြီးအကဲကိုယ်တိုင်ကပင် သူ့အပေါ်မှာ ရိုရိုသေသေ ရှိနေပုံရတယ်နော်။"

အိပ်မက်မြို့တော်၏ ကျင့်ကြံသူအများအပြားသည် မိမိတို့ မသိရှိအပ်သော တစ်စုံတစ်ခု ဖြစ်ပွားသွားခဲ့ပြီ ဖြစ်ကြောင်း ခံစားလိုက်ရကြသည်။

ဖြစ်နိုင်သည်မှာ မကြာမီကာလအတွင်း အိပ်မက်မြို့တော်တွင် ကြီးမားလှသော ကိစ္စရပ်တစ်ခု ဖြစ်ပွားလာပေလိမ့်မည်။

ဂေါ်မိသားစုသည် အိပ်မက်မြို့တော်၏ အဓိက မိသားစုကြီး သုံးစုထဲမှ တစ်စုဖြစ်ပြီး ထိုသုံးစုထဲတွင်လည်း ထိပ်ဆုံးက ဖြစ်သည်။

ဂေါ်မိသားစုသာ ခြေတစ်ချက် ဆောင့်လိုက်မည်ဆိုပါက အိပ်မက်မြို့တော်တစ်ခုလုံး တုန်ခါသွားလိမ့်မည်ဟု ပြောခြင်းမှာ မလွန်လှချေ။

လွန်ခဲ့သည့် ရက်ပိုင်းလောက်ကတင် ယွမ်ထျန်းနတ်ဘုရားဂိုဏ်းမှ အကြီးအကဲတစ်ပါး ဤနေရာသို့ ခရီးဆန့်လာခဲ့ပြီး ဂေါ်မိသားစု၏ သခင်လေးဖြစ်သော ဂေါ်ဖုန်းထျန်းကို တိုက်ရိုက်တပည့်အဖြစ် လက်ခံချင်နေခဲ့သည်ကို ထည့်မပြောဘဲ ထားဦး။

ဤကဲ့သို့သော ကောင်းချီးဆိုးဒဏ်များ အားလုံးနှင့်အတူ ဂေါ်မိသားစုသည် ပို၍ပင် ပြစ်မှား၍မရသော တည်ရှိမှု ဖြစ်လာခဲ့ပြီ ဖြစ်ရာ နောက်ထပ် ဘယ်သူ ကံဆိုးမလဲဆိုတာ ဘယ်သူသိနိုင်ပါမည်နည်း။

သူတို့ အိပ်မက်မြို့တော်အတွင်းသို့ ဝင်ရောက်လိုက်သည်နှင့် ကွက်တိဆိုသလိုလင်းချန်၏ စိတ်အာရုံအတွင်း၌ ရှည်လျားလှသော စနစ် ၏ အကြောင်းကြားချက်အသံ ထွက်ပေါ်လာခဲ့တော့သည်။

[အိမ်ရှင်သည် ထာဝရတိုက်ကြီးအရှေ့ဘုံနတ်ဘုရားနယ်မြေ အတိုင်းအဆမဲ့ နတ်ဘုရားနိုင်ငံတော် အိပ်မက်မြို့တော်အတွင်း၌ ရောက်ရှိနေကြောင်း ထောက်လှမ်းမိပါသည်။ လက်မှတ်ထိုးဝင်ခြင်းကို လုပ်ဆောင်နိုင်ပါပြီ။]

[အိမ်ရှင်အနေနဲ့ လက်မှတ်ထိုးဝင်ချင်ပါသလား။]

လင်းချန်သည် စနစ်၏ အကြောင်းကြားချက်အပေါ် ချက်ချင်း ပြန်လည်မတုံ့ပြန်ခဲ့ချေ။

ဤနေရာသည် လက်မှတ်ထိုးဝင်ရန်အတွက် ကောင်းမွန်သော နေရာတစ်ခု မဟုတ်ချေ။ ဂေါ်မိသားစုထံသို့ ရောက်ရှိပြီးမှ လက်မှတ်ထိုးဝင်လျှင်လည်း နောက်ကျမည် မဟုတ်ပါလား။

သို့သော်လည်း သူသည် ဤနေရာတွင် လက်မှတ်ထိုးဝင်နိုင်မည့် အခွင့်အရေးတစ်ခုကို ပွင့်လှစ်နိုင်လိမ့်မည်ဟု မျှော်လင့်မထားခဲ့မိချေ။

အိပ်မက်မြို့တော်ဟူသည် ထာဝရတိုက်ကြီးတွင် အထူးတလည် ကြီးမားလှသောအင်အားစု သို့မဟုတ် မြို့ကြီးတစ်မြို့ မဟုတ်ချေ။

ဤကဲ့သို့သော နေရာမျိုးကပင် လက်မှတ်ထိုးဝင်နိုင်မည့် အခွင့်အရေးကို ပွင့်လှစ်ပေးနိုင်သည်ဆိုပါကပို၍ ကြီးမားလှသော နေရာများက မပွင့်လှစ်ပေးနိုင်စရာ အကြောင်းမရှိချေ။

ဤနှုန်းအတိုင်းသာ သွားမည်ဆိုပါကထာဝရတိုက်ကြီးတွင် သူ၏ စွမ်းအား တိုးတက်မှုနှုန်းမှာ စိတ်ကူးကြည့်နိုင်သည့် အဆင့်ထက် ကျော်လွန်သွားပေလိမ့်မည်။

သူ၏ စွမ်းအားသည် အလွန်အမင်း ကြီးမားလှသော ပေါက်ကွဲမှုကြီးတစ်ခုနှင့် ကြုံတွေ့ရတော့မည် ဖြစ်သည်။