အခန်း ၂၃၇

အခန်း ၂၃၇ - ကျင့်ကြံခြင်းအဆင့် တဟုန်ထိုး မြင့်တက်နေခြင်း။

သူ၏ စွမ်းအားများက အလျင်အမြန် တိုးတက်လာနေခဲ့သဖြင့် လင်းချန်သည် သူ၏ စိတ်အာရုံတစ်ခုလုံးကို စွမ်းအားကူးပြောင်းခြင်းအပေါ်တွင်သာ အပြည့်အဝ အာရုံစိုက်ထားလိုက်တော့သည်။

သူသည် ဤမဟာဧကရာဇ်ကျင့်ကြံခြင်း စွမ်းအားကူးပြောင်းခြင်းက သူ၏ စွမ်းအားကို လုံးဝဥဿုံ အသွင်ပြောင်းလဲသွားအောင် ပြုလုပ်ပေးလိမ့်မည်ဟု ကြိုတင်ခံစားနေခဲ့ရသည်။

ကျင့်ကြံခြင်း ပုံစံ သုံးမျိုးစလုံးသည် ၎င်းတို့၏ လက်ရှိ နယ်ပယ် များကို ဖောက်ထွက်သွားကြတော့မည်ဖြစ်ရာ စွမ်းအားများ အကြီးအကျယ် ပေါက်ကွဲထွက်ပေါ်လာတော့မည် ဖြစ်သည်။

နောင်တွင် လက်မှတ်ထိုးဝင်၍ ရရှိလာမည့် ဆုလာဘ်ဖြစ်သော ဖရိုဖရဲတာအိုသစ်သီး နှင့်သာ ပေါင်းစပ်လိုက်မည်ဆိုပါကတစ်ချက်တည်းဖြင့် မဟာဧကရာဇ်အဆင့် ပြည့်စုံခြင်းအဆင့် သို့ ရောက်ရှိသွားရန် မဖြစ်နိုင်သည် မဟုတ်ချေ။

ဤစွမ်းအားကူးပြောင်းခြင်းက လင်းချန်ကို ပိုမိုနက်ရှိုင်းလှသော ဖရိုဖရဲနိယာမများကို သဘာဝအတိုင်း ပိုမိုနားလည်သဘောပေါက်သွားစေခဲ့သည်။

ထိုအရာများသည် ထာဝရတိုက်ကြီး ၏ ကောင်းကင်နှင့် မြေပြင် နိယာမတရားများ ဖြစ်ကြပြီး တာအိုပြည်နယ် ၃၀၀၀၏ နိယာမတရားများထက် ပိုမိုအစွမ်းထက်ကြသည်။

လင်းချန်အနေဖြင့် မိမိသည် ဤစွမ်းအားကူးပြောင်းခြင်းကို လက်ခံရရှိနေစဉ်အတွင်းမှာတင်အထက်ဘုံသို့ တက်လှမ်းလာကြသူ အားလုံး ဧကန်မုချ ကြုံတွေ့ရမည့် ဖြစ်စဉ်တစ်ခုကို ဖြတ်သန်းနေရခြင်းဖြစ်ကြောင်း မသိရှိခဲ့ချေ။

ယင်းကတော့... စည်းမျဉ်းစွမ်းအားများကို အစားထိုးလဲလှယ်ခြင်းပင် ဖြစ်သည်။

အောက်ဘုံ တွင် နားလည်သဘောပေါက်ခဲ့သော စည်းမျဉ်းစွမ်းအားများသည် အထက်ဘုံသို့ ရောက်ရှိလာသည့်အခါ ထာဝရတိုက်ကြီး၏ ပိုမိုအစွမ်းထက်လှသော စည်းမျဉ်းများဖြင့် လုံးဝဥဿုံ အစားထိုးလဲလှယ်ရန် လိုအပ်ပေသည်။

ဤသို့ ပြုလုပ်ခြင်းအားဖြင့် သူ၏ တိုက်ခိုက်ရေးစွမ်းရည်သည် တူညီလှသော နယ်ပယ်တစ်ခုတည်းမှာတင် ထူးခြားဆန်းပြားလှသော အကြီးအကျယ် ပေါက်ကွဲမှုကြီးတစ်ခုကို ကြုံတွေ့ရပေလိမ့်မည်။

အချိန်များ တရွေ့ရွေ့ ကုန်ဆုံးသွားသည်နှင့်အမျှ လင်းချန်၏ ကျင့်ကြံခြင်း ပုံစံ သုံးမျိုးစလုံးမှာ တဟုန်ထိုး မြင့်တက်နေခဲ့ဆဲပင် ဖြစ်ပြီးသူ၏ အစွမ်းထက်လှသော အရှိန်အဝါကိုလည်း ဆက်လက်၍ ဖိနှိပ်ထားနိုင်ခြင်း မရှိတော့ချေ။

ယင်းက ခြံဝင်းအတွင်းမှနေ၍ သဘာဝအတိုင်း လျှံထွက်သွားခဲ့ရပြီး ဂေါ်မိသားစု တစ်ခုလုံးကို တဖြည်းဖြည်းချင်း လွှမ်းခြုံသွားခဲ့တော့သည်။

ဤအစွမ်းထက်လှသော အရှိန်အဝါ၏ လွှမ်းခြုံခြင်းကို ခံလိုက်ရသော ဂေါ်မိသားစု ကျွမ်းကျင်သူများ အားလုံးသည် ယင်းက လင်းချန်ရှိနေသည့် ခြံဝင်းဆီမှ ထွက်ပေါ်လာခြင်း ဖြစ်ကြောင်း အာရုံခံမိလိုက်ကြသည်။

ဂေါ်မိသားစု၏ ကယ်တင်ရှင်ကြီးက သူ၏ ကျင့်ကြံခြင်းအဆင့်ကို ဖောက်ထွက်အောင် ပြုလုပ်နေခြင်းပင်။

ဂေါ်မိသားစု၏ အကြီးမားဆုံးသော ရင်ပြင်ကျယ်ကြီးပေါ်တွင်မူ အောင်ပွဲခံနေခဲ့ကြသော ကျွမ်းကျင်သူများသည် စိတ်ထဲကနေ မအောင့်နိုင်ဘဲ အံ့ဩတုန်လှုပ်စွာဖြင့် တစ်ယောက်ကိုတစ်ယောက် လှမ်း၍ ကြည့်လိုက်မိကြတော့သည်။

ကြည့်ရတာ သူတို့ ဂေါ်မိသားစုအနေဖြင့် သူတို့ကို စောင့်ရှောက်ပေးမည့် အလွန်တရာ ထူးခြားဆန်းပြားလှသော တည်ရှိမှုကြီးတစ်ခုကို ကြိုဆိုခွင့် ရရှိခဲ့ပုံရသည်။

"အဟွတ်... အဟွတ်..."

ဂေါ်လော့ သည် သူ၏ ခန္ဓာကိုယ်အတွင်းရှိ အားနည်းမှုများကို ခံစားလိုက်ရသဖြင့် မတတ်နိုင်ဘဲ ချောင်းဆိုးလိုက်မိသော်လည်းသူ၏ မျက်နှာထက်တွင်မူ ဝမ်းမြောက်လှသော အပြုံးတစ်ခု ပေါ်ထွက်နေခဲ့သည်။

သူသည် ယခုတစ်ကြိမ်တွင် ဂေါ်မိသားစုအနေဖြင့် အလွန်တရာ အစွမ်းထက်လှသော ပေါင်လုံးကြီးကို တကယ်ပဲ ဖက်တွယ်နိုင်ခဲ့ပြီ ဖြစ်ကြောင်း သိရှိထားသည်။

လင်းချန်သည် သူ စိတ်ကူးကြည့်ထားခဲ့သည်ထက်ပင် ပို၍ အစွမ်းထက်လွန်းလှပြီး ပို၍ ပါရမီရှင်ဆန်လွန်းလှသည်။

ယခု လက်ရှိ ထွက်ပေါ်နေရုံမျှသာ ရှိသေးသော အရှိန်အဝါမျိုးကပင် သာမန် မဟာဧကရာဇ် ကျွမ်းကျင်သူများ လုံးဝ မပြသနိုင်သည့် အရာမျိုး ဖြစ်ပေသည်။

ထို့ပြင် လင်းချန် ရှိနေသည့် ခြံဝင်းဆီမှနေ၍ လျှံထွက်နေသော ဤအစွမ်းထက်လှသော ကျင့်ကြံခြင်း အရှိန်အဝါမှာအချိန်များ ကုန်ဆုံးသွားသည်နှင့်အမျှ ပို၍ပင် တဟုန်ထိုး မြင့်တက်လာနေခဲ့ပြီး ပို၍ ပို၍ အစွမ်းထက်လာနေခဲ့သည်။

ယင်းက လင်းချန်အနေဖြင့် သူ၏ ကျင့်ကြံခြင်းအပေါ် ထိုးထွင်းသိမြင်မှု အသစ်များကို ရရှိနေခဲ့ပြီ ဖြစ်ကြောင်းနှင့် သူ၏ စွမ်းအားကလည်း အရည်အသွေးပိုင်းဆိုင်ရာ အသွင်ပြောင်းလဲမှုကို ကြုံတွေ့နေရခြင်း ဖြစ်ကြောင်း သက်သေပြနေခဲ့သည်။

ဒါကို မြင်တွေ့ရစဉ် ဂေါ်ထျန်းချီ နှင့် ဂေါ်ဖုန်းထျန်းတို့၏ မျက်နှာထက်ရှိ ထိတ်လန့်မှုများနှင့် ဝမ်းမြောက်မှုများမှာ တဖြည်းဖြည်း မှေးမှိန်သွားခဲ့ရပြီး စိုးရိမ်ပူပန်လှသော အမူအရာများဖြင့် အစားထိုးဝင်ရောက်လာခဲ့တော့သည်။

“အဘိုး...ရဲ့ ခန္ဓာကိုယ် အခြေအနေက ဘယ်လိုလဲဟင်။ ဒဏ်ရာတွေ သက်သာသွားအောင် အောက်ကိုဆင်းပြီး သွားနားချင်လားဟင်။”

သူတို့အားလုံးသည် ဂေါ်လော့၏ လက်ရှိ ရုပ်ပိုင်းဆိုင်ရာ အခြေအနေမှာ မည်မျှအထိ ဆိုးရွားနေရကြောင်း အာရုံခံမိနေကြသည်။

သူ၏ သက်တမ်း မှာ ကုန်ဆုံးလုနီးပါး ဖြစ်နေခဲ့ပြီ ဖြစ်ပြီး ကျန်ရှိနေသည်မှာ အလွန်တရာ နည်းပါးလွန်းလှသည်ထို့ပြင် သူ၏ အနှစ်သာရသွေး များမှာလည်း ထက်ဝက်ကျော်မျှ လောင်ကျွမ်းသွားခဲ့ရပြီ ဖြစ်သဖြင့် သူ၏ စွမ်းအား ဆယ်ရာခိုင်နှုန်းပင် မပြည့်ချင်တော့ချေ။

အစောပိုင်းကတည်းက သူတို့သည် ဂေါ်လော့ကို သူ၏ အခြေအနေ ပြန်လည်ကောင်းမွန်လာစေရန်အတွက် ကောင်းကင်နှင့် မြေပြင်ဆိုင်ရာ ရတနာများ ကို သုံးဆောင်စေရန် တိုက်တွန်းနေခဲ့ကြခြင်း ဖြစ်သည်။

သို့သော် ဤတောင်းဆိုချက်များ အားလုံးကိုမူ ဂေါ်လော့က မည်သည့်တုံ့ဆိုင်းမှုမျှ မရှိဘဲ ငြင်းပယ်ခဲ့သည်။

အဘယ်ကြောင့်ဆိုသော် မိမိ၏ ခန္ဓာကိုယ်ကို ပြန်လည်အားဖြည့်ရန်အတွက် ထိပ်တန်းအဆင့် မဟာဧကရာဇ် ဆေးဖက်ဝင် အပင်မျိုးကို အသုံးမပြုနိုင်ပါကအခြားသော အဆင့်အတန်းရှိသည့် မည်မျှပင် များပြားလှသော ကောင်းကင်နှင့် မြေပြင်ဆိုင်ရာ ရတနာများကို အသုံးပြုပါစေဦးတော့ ဘာမျှ အသုံးဝင်လိမ့်မည် မဟုတ်ကြောင်း ဂေါ်လော့ကိုယ်တိုင်သာ အသိဆုံး ဖြစ်သောကြောင့်ပင် ဖြစ်သည်။

မိသားစု၏ ကျင့်ကြံခြင်း အရင်းအမြစ်များကို အလဟဿ ဖြုန်းတီးပစ်မည့်အစား ဤရှားပါးလှသော အခွင့်အရေးကို အသုံးချပြီး ပိုမို၍ ပျော်ပျော်ပါးပါး အောင်ပွဲခံလိုက်ကြခြင်းက ပို၍ ကောင်းမွန်ပေသည်။

သူ၏ အခြေအနေက တကယ်ပဲ ဆိုးရွားနေခဲ့ပြီး သူ၏ အသက်သက်တမ်းမှာလည်း လမ်းဆုံးသို့ ရောက်ရှိလုနီးပါး ဖြစ်နေခဲ့ပြီ ဖြစ်သော်လည်းယခုတစ်ကြိမ် သူရရှိခဲ့သော ဒဏ်ရာများသည် အလဟဿ ဖြစ်မသွားခဲ့ချေ။

ဂေါ်မိသားစုသည် မျှော်လင့်ချက်အသစ်ကို ကြိုဆိုခွင့် ရရှိတော့မည် မဟုတ်ပါလော။

ဂေါ်လော့၏ မျက်နှာမှာ အလွန်တရာ ဖြူဖျော့နေခဲ့သော်လည်း သူကိစ္စမရှိကြောင်း ဖော်ပြသည့်အနေဖြင့် သူ၏ လက်ကို ခပ်ပေါ့ပေါ့လေး ဝှေ့ယမ်းပြလိုက်သည်။

“ဘာမှမဖြစ်ပါဘူး စွမ်းအင်တွေ ကုန်ဆုံးသွားတာမျိုးမျှပါပဲ။ မိသားစု၏ ကျွမ်းကျင်သူတွေရဲ့ အခြေအနေကတော့ အခုလောက်ဆိုရင် ပြန်ပြီး ကောင်းမွန်လာလောက်ပြီ မဟုတ်လား။”

“ကောင်းကင်နှင့် မြေပြင်ဆိုင်ရာ ရတနာတွေနဲ့ ကျင့်ကြံခြင်း အရင်းအမြစ်တွေ အားလုံးကို ကပ်စေးကုပ်မနေကြပါနဲ့ သူတို့ကို တတ်နိုင်သမျှ အမြန်ဆုံး အခြေအနေ ပြန်လည်ကောင်းမွန်လာအောင် ပြုလုပ်ပေးရမယ်။”

ဂေါ်ဖုန်းထျန်းကို ကာကွယ်ပေးခဲ့ကြသော ထိုကျွမ်းကျင်သူများသည်လည်း သူ့ကဲ့သို့ပင် သူတို့၏ သက်တမ်းနှင့် အနှစ်သာရသွေးများကို လောင်ကျွမ်းစေခဲ့ကြခြင်း ဖြစ်ရာ သူ ဤအချက်ကို မနေ့လျော့နေခဲ့ခြင်း မရှိချေ။

ထိုကျွမ်းကျင်သူများသည် ဂေါ်မိသားစု၏ သူရဲကောင်းများ ဖြစ်ကြပေသည်။

ဒါကို ကြားလိုက်ရစဉ် ဂေါ်ထျန်းချီသည် စကားပြောရန် တုံ့ဆိုင်းနေခဲ့သော်လည်း နောက်ဆုံးတွင်မူ ခေါင်းညိတ်လိုက်မိတော့သည်။

“သူတို့အားလုံး အတိုင်းအဆတစ်ခုအထိ ပြန်ပြီး ကောင်းမွန်လာကြပါပြီ အဖေ။ အဖေနဲ့ မတူတာကတော့ သူတို့ လောင်ကျွမ်းစေခဲ့တဲ့ သက်တမ်းနဲ့ အနှစ်သာရသွေးက နည်းပါးတာမို့လို့ ကောင်းကင်နှင့် မြေပြင်ဆိုင်ရာ ရတနာတွေနဲ့ ပြန်ပြီး အားဖြည့်လို့ ရနိုင်ပါတယ်ဗျာ။”

“ဒါပေမဲ့ အဖေ့ရဲ့ အခြေအနေကတော့..."

သူ စကားကို အဆုံးမသတ်ခဲ့သော်လည်း ယင်း၏ အဓိပ္ပာယ်မှာမူ လူတိုင်းအတွက် ရှင်းလင်းနေခဲ့သည်။

ဂေါ်ဖုန်းထျန်း၏ မျက်နှာအမူအရာမှာ မှောင်မှောင်မည်းမည်း ဖြစ်သွားခဲ့ရပြီ သူ၏ ယခင်က ဝမ်းမြောက်မှုများမှာလည်း အရိပ်အယောင်မျှပင် မကျန်ရှိတော့ဘဲ ပျောက်ကွယ်သွားခဲ့ရသည်။

သူ့ရဲ့ အဘိုးဖြစ်သူ ဂေါ်လော့က မူလကတည်းက သက်တမ်း သိပ်ပြီး အများကြီး ကျန်ရှိတော့တာ မဟုတ်ဘဲ ယခုတစ်ကြိမ်တွင် ဤမျှအထိ ကြီးမားလှသော လောင်ကျွမ်းမှုကို လုပ်ဆောင်ခဲ့ရခြင်း ဖြစ်သည်။

'စွမ်းအင်တွေ အလွန်အမင်း ကုန်ဆုံးသွားတာမျိုးမျှပါပဲ' ဟူသော စကားကိုမူ သူ တစ်လုံးမျှပင် မယုံကြည်နိုင်ချေ။

သူတို့၏ ပတ်ပတ်လည်တွင် ရှိနေကြသော ဂေါ်မိသားစု ကျွမ်းကျင်သူများသည်လည်းမူလက ဝမ်းမြောက်လှသော အမူအရာများ ရှိနေခဲ့ကြသော်လည်း သူတို့၏ စကားဝိုင်းကို ကြားလိုက်ရစဉ် စိတ်ထဲကနေ မအောင့်နိုင်ဘဲ သက်ပြင်းချလိုက်မိကြတော့သည်။

ဂေါ်မိသားစု၏ ယခင် မိသားစုခေါင်းဆောင်ဟောင်းတစ်ဦး အနေဖြင့်မဟာအကြီးအကဲသည် သူ၏ တစ်သက်တာလုံးကို မိသားစုအတွက်သာ ပေးဆပ်ခဲ့ခြင်း ဖြစ်သည်။

နောက်ဆုံးတွင်မူ ဤကဲ့သို့သော ဝမ်းနည်းကြေကွဲဖွယ်ကောင်းလှသည့် ရလဒ်မျိုးနှင့် ကြုံတွေ့ရတော့မည် ဖြစ်သည်။

ဂေါ်လော့သည် ဂေါ်ဖုန်းထျန်း၏ အခြေအနေကို သတိပြုမိသွားခဲ့ပြီး ဂေါ်ထျန်းချီကို စူးစိုက်ကြည့်လိုက်ကာ ဂေါ်ဖုန်းထျန်းကို နှစ်သိမ့်ပေးရန် ပြင်လိုက်သည်။

သို့သော် ကွက်တိဆိုသလိုပင် လင်းချန်၏ အရှိန်အဝါနှင့် လုံးဝ ကွဲပြားခြားနားလှသော အလွန်တရာ အစွမ်းထက်လှသည့် အရှိန်အဝါတစ်ခုသည် ရင်ပြင်ကျယ်ကြီးပေါ်သို့ ရုတ်တရက် ပေါ်ထွက်လာခဲ့တော့သည်။

ဤအစွမ်းထက်လှသော အရှိန်အဝါကို အာရုံခံမိလိုက်ကြစဉ် ရင်ပြင်ကျယ်ကြီးပေါ်ရှိ ဂေါ်မိသားစု ကျွမ်းကျင်သူများ အားလုံး၏ မျက်နှာအမူအရာများမှာ အကြီးအကျယ် ပြောင်းလဲသွားခဲ့ရပြီး သူတို့သည် အရှိန်အဝါ ထွက်ပေါ်လာရာ လမ်းကြောင်းဆီသို့ အလျင်အမြန်ပင် ရိုရိုသေသေဖြင့် ဦးညွှတ်လိုက်ကြတော့သည်။

“ဘိုးဘေးကြီးကို အရိုအသေပေးပါတယ်။”

ရင်ပြင်ကျယ်ကြီးပေါ်တွင်မူဂေါ်လော့တစ်ဦးတည်းသာ သူ၏ ကျောကို မတ်မတ်ဆန့်ထားခဲ့ပြီး ကြီးမားလှသော ဦးညွှတ်မှုကို မလုပ်ဆောင်ခဲ့ချေ။

သို့သော် သူ၏ မျက်နှာထက်တွင်မူ ခါးသီးလှသော အပြုံးတစ်ခု ပေါ်ထွက်နေခဲ့သည်။

သူ့ရဲ့ အဖေက နောက်ဆုံးတော့ ကျင့်ကြံခြင်းကနေ ထွက်လာခဲ့ပြီလား။

အကယ်၍ သူသာ မိမိ၏ လက်ရှိ အခြေအနေကို မြင်တွေ့သွားမည်ဆိုပါကဆက်ပြီး ကျင့်ကြံနေဖို့ စိတ်ကူးရှိတော့မှာ မဟုတ်ဘူး မဟုတ်လား။

အမှန်တရားကတော့ သူတို့ ဂေါ်မိသားစု၏ ဘိုးဘေးဟူသည် တကယ်ပဲ သူ့ရဲ့ အဖေ ဖြစ်ပေသည်။

ဂေါ်မိသားစု ကျွမ်းကျင်သူအများအပြား ဦးညွှတ်နေကြသော နေရာတွင်မူ ဆံပင်ဖြူများနှင့် အလယ်အလတ်အရွယ် အမျိုးသားတစ်ဦး၏ လူရိပ်သည် တဖြည်းဖြည်းချင်း ထွက်ပေါ်လာခဲ့သည်။

သူ နေရာတွင် အတည်တကျ ဖြစ်သွားသည်နှင့် ကွက်တိ ဆံပင်ဖြူများနှင့် အလယ်အလတ်အရွယ် အမျိုးသားသည် ခြေလှမ်းတစ်ချက် လှမ်းလိုက်ရင်း ဂေါ်လော့၏ ရှေ့မှောက်သို့ ရောက်ရှိလာခဲ့ကာ သူ၏ မျက်ခုံးများကို တွန့်ချိုးလိုက်ရင်း လေးနက်တည်ငြိမ်လှသောအသံဖြင့် မေးမြန်းလိုက်သည်။

“လီမိသားစု က လုပ်တာလား။”

ဂေါ်လော့သည် ခါးသီးစွာ ပြုံးလိုက်ပြီး စကားမပြောခဲ့ချေ။ တိတ်ဆိတ်စွာဖြင့်သာ ခေါင်းညိတ်ပြလိုက်သည်။

ဂေါ်လော့ ခေါင်းညိတ်ပြလိုက်သည်ကို မြင်တွေ့ရစဉ် ဆံပင်ဖြူများနှင့် အလယ်အလတ်အရွယ် အမျိုးသား၏ မျက်ဝန်းအစုံအတွင်းမှနေ၍ သွေးဆာလှသော သတ်ဖြတ်လိုစိတ်များ ပေါက်ကွဲထွက်ပေါ်လာခဲ့တော့သည်။

“ကောင်းတယ် ကောင်းတယ် တကယ့်ကို ကောင်းတယ်။ လီမိသားစုက အခုတော့ မျက်နှာဖုံးကို လုံးဝ ခွာချပစ်ဖို့ ဆုံးဖြတ်လိုက်ပြီပေါ့ ဟုတ်လား။”

“ငါ ဂေါ်ရိ ကျင့်ကြံ နေတဲ့အချိန်ကို စောင့်ပြီးတော့ ငါ့ရဲ့ သားနဲ့ ငါ့ရဲ့ မြေးမြစ်ကို ချောင်းမြောင်းသတ်ဖြတ်ရဲတယ်ဆိုတော့... တကယ့်ကို သတ္တိကောင်းကြတာပဲ။”

ဤနေရာသို့ ရောက်ရှိလာခဲ့စဉ်ဆံပင်ဖြူများနှင့် ဂေါ်ရိသည် ရင်ပြင်ကျယ်ကြီးပေါ်ရှိ ဂေါ်မိသားစု ကျွမ်းကျင်သူများ အားလုံးကို လှမ်း၍ အကဲခတ်ကြည့်လိုက်သည်။

“အခု ငါ နိုးထလာခဲ့ပြီဖြစ်လို့ ငါ ကြေညာလိုက်တယ်... ထျန်းယွမ်မြို့တော်လီမိသားစုနဲ့ စစ်ပွဲစတင်ပြီ။”

အသံသည် ဟိန်းဟောက်ထွက်ပေါ်လာခဲ့ပြီးရင်ပြင်ကျယ်ကြီးတစ်ခုလုံးတွင် အဆက်မပြတ် ပဲ့တင်ထပ်သွားခဲ့တော့သည်။

ဤစကားများကို ကြားလိုက်ရစဉ် ဂေါ်မိသားစုဝင် အားလုံးသည် သူတို့၏ သွေးများ ဆူပွက်လာသကဲ့သို့ ခံစားလိုက်ကြရပြီး တစ်ယောက်ပြီးတစ်ယောက် ပြန်လည်တုံ့ပြန်လိုက်ကြတော့သည်။

“စစ်ပွဲ... စစ်ပွဲ... စစ်ပွဲ...”

ဟိန်းဟောက်သံကြီးသည် မိုးခြိမ်းသံကဲ့သို့ ထွက်ပေါ်လာခဲ့ပြီး အိပ်မက်မြို့တော် တစ်ခုလုံး၏ အပေါ်ယံတွင် ပေါက်ကွဲသွားခဲ့တော့သည်။

ဤအခိုက်အတန့်တွင်မူအိပ်မက်မြို့တော်အတွင်းရှိ အားလုံးသော ကျွမ်းကျင်သူများ၏ ရင်ထဲတွင် ထိတ်လန့်တုန်လှုပ်သွားခဲ့ကြရသည်။

မျှော်လင့်ထားခဲ့သည့်အတိုင်းပင် ဂေါ်မိသားစုက လှုပ်ရှားမှုများ စတင်တော့မည် ဖြစ်သည်။

ဂေါ်မိသားစု ရင်ပြင်ကျယ်ကြီးပေါ်တွင်မူ...

ဂေါ်ရိသည် အသက်ကို ပြင်းပြင်းရှူလိုက်ရင်း သူ၏ ရင်ထဲမှ ခံစားချက်များကို ပြန်လည်တည်ငြိမ်အောင် ပြုလုပ်လိုက်ကာ လင်းချန် ရှိနေသည့် ခြံဝင်းဆီသို့ လှမ်း၍ ကြည့်လိုက်ရင်း သူ၏ မျက်နှာထက်တွင် မေးခွန်းထုတ်လိုလှသော အမူအရာမျိုး ပေါ်ထွက်လာခဲ့သည်။

“ငါ အစောနကတင် အစွမ်းထက်လှတဲ့ အရှိန်အဝါတစ်ခုကြောင့် ထိတ်လန့်ပြီး နိုးထလာခဲ့တာ။ ငါ သေသေချာချာ စစ်ဆေးကြည့်လိုက်တော့မှအဲဒီအရှိန်အဝါ ထွက်ပေါ်လာတဲ့ နေရာက တကယ်ပဲ ငါတို့ ဂေါ်မိသားစုအတွင်းမှာ ဖြစ်နေတာကို တွေ့လိုက်ရတယ်။”

“ဒီကိစ္စက တကယ်ပဲ ဘာတွေဖြစ်နေတာလဲ။”

ဂေါ်ဖုန်းထျန်း၊ ဂေါ်လော့နှင့် ဂေါ်ထျန်းချီတို့သည် တစ်ယောက်ကိုတစ်ယောက် လှမ်းကြည့်လိုက်ကြပြီ ဖြစ်ပွားခဲ့သော ကိစ္စရပ်များနှင့် အသေးစိတ်အချက်အလက်များအားလုံးကို ဂေါ်ရိအား စတင်၍ ရှင်းပြလိုက်ကြတော့သည်။

ခေတ္တမျှ ကြာမြင့်ပြီးနောက် အရာအားလုံးကို သိရှိသွားခဲ့ရပြီးသည့်နောက်တွင်မူ ဂေါ်ရိ၏ မျက်ဝန်းအစုံအတွင်း၌ အလင်းတန်းတစ်ခု ဖျတ်ခနဲ ပေါ်ထွက်သွားခဲ့သည်။

သူသည် လင်းချန် ရှိနေသည့် နေရာကို စူးစိုက်ကြည့်လိုက်မိပြီး မသိစိတ်အရ အပြုံးတစ်ခု ပေါ်ထွက်လာခဲ့မိတော့သည်။

“ငါတို့ ဂေါ်မိသားစုမှာလည်း မဟာဧကရာဇ် ကျောထောက်နောက်ခံတစ်ခု ရှိလာတော့မယ် ထင်တယ်။”

“ထျန်းယွမ်မြို့တော် လီမိသားစုကကျိလဲ့မိစ္ဆာဂိုဏ်း ၏ ကျိလဲ့ဧကရာဇ်ရဲ့ကျောထောက်နောက်ခံကို အားကိုးပြီးတော့ငါတို့ ဂေါ်မိသားစုကို အမြဲတမ်း ရန်စစိန်ခေါ်နေခဲ့တာ။”

“ဒီတစ်ကြိမ်မှာတော့ သူတို့တွေက သူတို့နဲ့ ထိုက်တန်တဲ့ တန်ဖိုးကို သေချာပေါက် ပေးဆပ်စေရမယ်။”

သူ၏စကား ပင် မဆုံးသေးမီမှာတင်ဂေါ်ရိသည် လင်းချန် ရှိနေသည့် ခြံဝင်းဆီသို့ တဖြည်းဖြည်းချင်း လမ်းလျှောက်သွားခဲ့တော့သည်။

လင်းချန်အနေဖြင့် မြေပုံတစ်ခု လိုအပ်နေခဲ့ခြင်း ဖြစ်ပြီးသူ၏ လက်ထဲတွင်မူ ကွက်တိဆိုသလိုပင် အလွန်တရာ ပြည့်စုံလှသော အရှေ့ဘုံနတ်ဘုရားနယ်မြေ ၏ မြေပုံတစ်ခု ရှိနေခဲ့သည်။

ယင်းက သူ ငယ်ရွယ်စဉ်အချိန်တုန်းက အပြင်လောကသို့ ထွက်ပြီး အတွေ့အကြုံရှာဖွေခဲ့စဉ်အချိန်က အလွန်တရာ ကြီးမားလှသော တန်ဖိုးကို ပေးဆပ်ပြီး ဝယ်ယူခဲ့ခြင်း ဖြစ်ရာ လက်ရှိအချိန်နှင့်အညီ အလိုအလျောက် ပြောင်းလဲပေးနိုင်သည့် စွမ်းဆောင်ရည်လည်း ပါဝင်သည်။

အချိန်အတော်ကြာ ရှည်လျားသွားခဲ့ပြီ ဖြစ်သည့်တိုင်အောင် အပေါ်ယံရှိ မြေပုံ အမှတ်အသားများသည် အလွန်တရာ တိကျနေဆဲ ဖြစ်သည်။

သူသည် လင်းချန်ထံသို့ မြေပုံ ပေးအပ်မည့် အခွင့်အရေးကို အသုံးချပြီး သူနှင့် ကောင်းမွန်လှသော ဆက်ဆံရေးတစ်ခု တည်ဆောက်နိုင်ပေလိမ့်မည်။

လင်းချန်သာ သူတို့ ဂေါ်မိသားစုကို ကူညီပေးရန် လိုလားမည်ဆိုပါက ထျန်းယွမ်မြို့တော် လီမိသားစုကို အလွယ်တကူ ဖျက်ဆီးပစ်နိုင်ပေလိမ့်မည်။

ခြံဝင်းအတွင်း၌မူ လင်းချန်၏ ကျင့်ကြံခြင်း ပုံစံ သုံးမျိုးစလုံး၏ အရှိန်အဝါမှာ ဆက်လက်၍ အဆက်မပြတ် မြင့်တက်နေဆဲပင် ဖြစ်ပြီး စက္ကန့်တိုင်းလိုလို ပြောင်းလဲနေခဲ့သည်။

မဟာဧကရာဇ်ကျင့်ကြံခြင်း စွမ်းအားကူးပြောင်းခြင်းမှာ လက်ရှိအချိန်အထိ ဆက်လက်ဖြစ်ပွားနေခဲ့ခြင်း ဖြစ်သည်။ သူ၏ ဝိညာဉ်စွမ်းအင် ကျင့်ကြံခြင်းမှာ မဟာဧကရာဇ်အဆင့် အလယ်အလတ်အဆင့်တွင် ရှိနေသေးသော်လည်း မဟာဧကရာဇ်အဆင့် အလယ်အလတ်အဆင့်၏ အထွတ်အထိပ် သို့ ရောက်ရှိနေခဲ့ပြီ ဖြစ်သည်။

သူသည် မဟာဧကရာဇ်အဆင့် ပြည့်စုံခြင်းအဆင့်သို့ တက်လှမ်းရန်အတွက် ခြေလှမ်းတစ်ချက်မျှသာ လိုအပ်တော့သည်။

မူလကတည်းက မဟာဧကရာဇ်အဆင့် အလယ်အလတ်အဆင့်တွင် ရှိနေခဲ့သော သူ၏ ရုပ်ခန္ဓာ ကျင့်ကြံခြင်းမှာမူ တိုက်ရိုက်ပင် မဟာဧကရာဇ်အဆင့် ပြည့်စုံခြင်းအဆင့် အတွင်းသို့ ချိုးဖောက်ဝင်ရောက်သွားခဲ့ပြီ ဖြစ်သည်။

အကယ်၍ ဒါကို သာမန်အတိုင်း အဆင့်ကိုးဆင့် အဖြစ် ခွဲခြားလိုက်မည်ဆိုပါကသူ၏ လက်ရှိ ရုပ်ခန္ဓာ ကျင့်ကြံခြင်းမှာ ဧကရာဇ်

နယ်ပယ်၏ သတ္တမအဆင့် သို့ ရောက်ရှိနေခြင်း ဖြစ်ရပေမည်။