အခန်း ၂၄၁

အခန်း ၂၄၁- အသိအမြင်သစ်များနှင့် ကျိလဲ့မိစ္ဆာဂိုဏ်းဆီသို့။

ထျန်းယွမ်မြို့ရှိသူများနှင့် မတူဘဲ လီမိသားစုအိမ်တော်အတွင်းမှ လူများမှာမူ ကောင်းကင်ကို မော့ကြည့်ရင်း ဘာဖြစ်ပျက်နေမှန်း မသိဘဲ ငေးမောနေကြသည်။

ဘာကြောင့် အထက်တွင် လက်ဝါးကြီး ပေါ်လာရသနည်း။

သူတို့ လီမိသားစုအပေါ်ကို ဖိချနေခြင်း ဖြစ်သည်။

သူတို့သည် တိုက်ခိုက်ခံလိုက်ရသည်။ ထျန်းယွမ်မြို့၏ အရှင်သခင်ဖြစ်သော သူတို့၏ခေါင်းပေါ်တွင်ပင် ထိုသို့လုပ်ရဲသူ ရှိနေသည်။

လီမိသားစု၏ အနက်ရှိုင်းဆုံးနေရာမှ အလင်းတန်းတစ်ခု ကောင်းကင်သို့ ပျံတက်သွားပြီး ဒေါသတကြီး အော်ဟစ်လိုက်သည်။

"ငါ့လီမိသားစုမှာ ဘယ်သူက လာပြီး ဒီလိုပြုမူနေတာလဲ။"

သို့သော် ထိုဒေါသတကြီး အော်ဟစ်သံ မဆုံးမီမှာပင် နောက်ထပ် စူးရှသော အော်ဟစ်သံတစ်ခု ထွက်ပေါ်လာသည်။

"မဖြစ်နိုင်ဘူး ဒါ... ဒါ ဘယ်အဆင့်ရဲ့ စွမ်းအားလဲ။ မဟာဧကရာဇ် ဒါ မဟာဧကရာဇ်အဆင့် စွမ်းအားပဲ အကြီးအကဲ... မဟုတ်ဘူး။"

"ဘုန်း။"

လီမိသားစု၏ ရှေးဟောင်းဘိုးဘေးသည် အိမ်တော်ထဲမှ ပျံထွက်လာပြီးနောက် မည်သို့ဖြစ်သည်ကို မသိလိုက်ရမီမှာပင် လီမိသားစုဝင်အားလုံး၏ မျက်စိရှေ့တွင်ပင် သူသည် တိုက်ရိုက် ပေါက်ကွဲသွားသည်။

ရောင်မီးခိုးရောင် လက်ဝါးသည် အပြည့်အဝ မကျရောက်သေးပေ။ ၎င်း၏ အရှိန်ကြောင့်ပင် လီမိသားစု ဘိုးဘေး၏ ကိုယ်ခန္ဓာမှာ ပေါက်ကွဲသွားပြီး ဝိညာဉ်ပါ အမှုန့်ဖြစ်သွားခဲ့သည်။ ဖုန်မှုန့်တစ်စမျှပင် မကျန်ခဲ့ပေ။

တိတ်ဆိတ်သွားခဲ့သည်။

လီမိသားစုတစ်ခုလုံး လုံးဝ တိတ်ဆိတ်သွားသည်။ အားလုံးမှာ ကောင်းကင်ကို ကြောင်ကြည့်နေကြသည်။

သူတို့၏ လီမိသားစု ဘိုးဘေး ကျွမ်းကျင်သူတစ်ဦးသည် ထိုအတိုင်း ပျက်စီးသွားခဲ့သည်။

ဤလက်ဝါးကို ပစ်လွှတ်သူမှာ မဟာဧကရာဇ်တစ်ဦးပင် ဖြစ်သည်။

မည်သည့် မဟာဧကရာဇ်က သူတို့လီမိသားစုကို ပစ်မှတ်ထားသနည်း။ သူတို့ တစ်ခါမှ မဟာဧကရာဇ်များကို အပြစ်မပြုခဲ့ဖူးပါဘဲ။

ကံမကောင်းစွာဖြင့် သူတို့တွင် ထိုအကြောင်းကို စဉ်းစားရန် အချိန်မရှိတော့ပေ။

ထိုအချိန်တွင် ရောင်မီးခိုးရောင် လက်ဝါးကြီးမှာ လီမိသားစုတစ်ခုလုံးကို ဖုံးလွှမ်းပြီး ကျရောက်လာခဲ့သည်။

"ဘုန်း"

ကြီးမားသော ပေါက်ကွဲသံကြီးသည် ထျန်းယွမ်မြို့တစ်မြို့လုံးတွင် ပဲ့တင်ထပ်သွားတော့သည်။

လီမိသားစု တည်ရှိခဲ့သောနေရာတွင် အိမ်တော်ဟူ၍ မည်သည်မျှ မကျန်ရှိတော့ပေ။

လက်ဝါးရာကြီးတစ်ခုသာ ကျန်ရှိခဲ့သည်။ လီမိသားစုတစ်ခုလုံးသည် လုံးဝ အမြစ်ပြတ်သွားခဲ့ပြီဖြစ်သည်။

အဖြစ်အပျက်ကို စောင့်ကြည့်နေသော ထျန်းယွမ်မြို့ရှိ ကျွမ်းကျင်သူများနှင့် ပြည်သူများမှာ အံ့အားသင့်သွားကြသည်။

တစ်ဖဝါးတည်းဖြင့် လီမိသားစုကို လုံးဝ ပျက်သုဉ်းသွားစေလိမ့်မည်ဟု မည်သူမျှ မထင်မှတ်ထားခဲ့ပေ။

ဂေါ်ရိပင်လျှင် အံ့အားသင့်လျက် လီမိသားစု ရှိခဲ့ဖူးသော လက်ဝါးရာကို ငေးကြည့်နေမိသည်။

"အရမ်း... အရမ်း အားကောင်းလိုက်တာ။"

"ဒါက မဟာဧကရာဇ်အဆင့် ကျွမ်းကျင်သူတစ်ဦးရဲ့ စွမ်းအားလား။"

ကြောက်စရာကောင်းလှသည်။

လင်းချန်သည် လက်ကို ပြန်ရုပ်သိမ်းလိုက်ပြီး ဂေါ်ရိကိုကြည့်ကာ ပြုံးလိုက်သည်။

"လီမိသားစုကို ရှင်းထုတ်လိုက်ပြီ။ အခု ကျိလဲ့မိစ္ဆာဂိုဏ်းပဲ ကျန်တော့တယ်။ သွားကြစို့ နောက်တစ်နေရာက ကျိလဲ့မိစ္ဆာဂိုဏ်းပဲ။"

"အမြန်လုပ်ကြရအောင် ငါ အချိန်သိပ်မရှိဘူး..."

လင်းချန်၏ စကားအပြောအဆိုအရ သူသည် ကျိလဲ့မိစ္ဆာဂိုဏ်းကို လုံးဝ အလေးအနက် မထားပေ။

ကျိလဲ့မိစ္ဆာဂိုဏ်းသည် လီမိသားစုနည်းတူ သူစိတ်ကြိုက် ပုတ်ချလိုက်ရုံဖြင့် ပျက်စီးသွားနိုင်သည့် အရာတစ်ခုအဖြစ်သာ သူ သဘောထားနေသည်။

အမှန်တကယ်လည်း ထိုအတိုင်းပင်ဖြစ်သည်။ ကျိလဲ့မိစ္ဆာဂိုဏ်းမှာ မဟာဧကရာဇ်အဆင့်မျှသာ ဖြစ်သည့်အတွက် အထူးတလည် ဂရုစိုက်စရာ မလိုပေ။

သူ၏အမြင်တွင် လီမိသားစုနှင့် ကျိလဲ့မိစ္ဆာဂိုဏ်းမှာ အတူတူပင်ဖြစ်သည်။ ကွာခြားချက်မှာ လီမိသားစုကို ရှင်းရန် လက်တစ်ဖဝါးသာ လိုသော်လည်း ကျိလဲ့မိစ္ဆာဂိုဏ်းကို ရှင်းရန် နှစ်ချက်သုံးချက် ထပ်မံ လိုအပ်နိုင်သည်ဟူသော အချက်သာ ဖြစ်သည်။

သို့သော် အဆုံးသတ်ရလဒ်မှာ ပြောင်းလဲမည်မဟုတ်ပေ။ သူတို့နှစ်ခုစလုံးသည် ထာဝရတိုက်ကြီး ပေါ်မှ လုံးဝပျောက်ကွယ်သွားမည်ဖြစ်ပြီး သမိုင်း၏ ဖုန်မှုန့်များအဖြစ်သာ ကျန်ရစ်လိမ့်မည်။

အံ့အားသင့်မှုမှ အပြည့်အဝ မရုန်းထွက်နိုင်သေးသော ဂေါ်ရိသည် လင်းချန်၏စကားကို ကြားသောအခါ သတိပြန်ဝင်လာပြီး ခေါင်းညိတ်လိုက်သည်။

"ကောင်းပါပြီ ကောင်းပါပြီ သခင်လေး။ ကျွန်တော် ကျိလဲ့မိစ္ဆာဂိုဏ်းဆီကို လမ်းပြပေးပါ့မယ်။"

သူပြောရင်းနှင့် အနီးရှိ အာကာသလမ်းကြောင်း တစ်ခုကို ဖောက်လိုက်သည်။ သူ၏ကိုယ်ခန္ဓာမှာ စိတ်လှုပ်ရှားမှုကြောင့် ထိန်းမရအောင် တုန်ရီနေပြီး နှလုံးသားထဲတွင်လည်း တုန်လှုပ်မှုလှိုင်းများ ရိုက်ခတ်နေသည်။

ဒါသည် ကြောက်ရွံ့ခြင်းမဟုတ် စိတ်လှုပ်ရှားမှုနှင့် ရင်ခုန်ခြင်းသာ ဖြစ်သည်။

ကျိလဲ့မိစ္ဆာဂိုဏ်းသည် အလွန်ဆိုးသွမ်းသော မိစ္ဆာလမ်းစဉ်၏ အင်အားစုဖြစ်သည်။ မိစ္ဆာလမ်းစဉ်တိုင်းမှာ ရက်စက်ကြမ်းကြုတ်သည်မဟုတ်သော်လည်း ကျိလဲ့မိစ္ဆာဂိုဏ်းမှာမူ ခြွင်းချက်မဟုတ်သည်မှာ သေချာသည်။

ရက်စက်ကြမ်းကြုတ်သည် ဟုပြောရုံဖြင့်ပင် သူတို့၏ အပြုအမူကို ဖော်ပြရန် မလုံလောက်ပေ။

မဟာဧကရာဇ်အဆင့် ကျွမ်းကျင်သူတစ်ဦးကို အားကိုးပြီး သူတို့သည် ဤဒေသတွင် အမြဲတစေ မောက်မာစွာ ပြုမူခဲ့ကြသည်။

ဂေါ်မိသားစုမှာ ဒေါသထွက်သော်လည်း ဘာမှပြန်မပြောရဲဘဲ ကြောက်ရွံ့နေခဲ့ရသည်။

လီမိသားစုကိုပင် သူတို့၏နောက်ကွယ်မှ ကျိလဲ့မိစ္ဆာဂိုဏ်းကြောင့် အလွန်သတိထား၍ ရင်ဆိုင်ခဲ့ရသည်။

ယခုမူ လင်းချန်က သူတို့၏ ကျောထောက်နောက်ခံဖြစ်လာပြီဖြစ်ရာ ကျိလဲ့မိစ္ဆာဂိုဏ်း၏ ကောင်းသောနေ့ရက်များ ကုန်ဆုံးသွားပြီဖြစ်သည်။

လင်းချန်သည် အပျက်အစီးများအဖြစ် ပြောင်းလဲသွားသော လီမိသားစုကို နောက်ဆုံးတစ်ကြိမ် ကြည့်လိုက်ပြီးနောက် နှောင့်နှေးမနေဘဲ အာကာသလမ်းကြောင်းထဲသို့ ခြေလှမ်းလှမ်းလိုက်သည်။

ဂေါ်မိသားစုကို ပေးထားသော ကတိကို ပြီးမြောက်အောင် လုပ်ဆောင်ပြီးနောက် သူသည် သူ၏ကိုယ်ပိုင်ခရီးကို ဆက်လက်လျှောက်လှမ်းရပေမည်။

ထာဝရတိုက်ကြီးသို့ ရောက်ရှိလာပြီးနောက် သူပထမဆုံး မိတ်ဆွေဖွဲ့ခဲ့သော မိသားစုကို နှုတ်ဆက်ရမည့်အချိန်လည်း ဖြစ်သည်။

ရိုးရိုးသားသားပြောရလျှင် ထာဝရတိုက်ကြီးသို့ ရောက်လာပြီးနောက် အရာတော်တော်များများက သူ့၏ ယခင်အသိအမြင်များကို ပြောင်းလဲပစ်ခဲ့သည်။

ထာဝရတိုက်ကြီးတွင် လူတိုင်းသည် မဟာဧကရာဇ်အဆင့် ကျွမ်းကျင်သူများသာ ဖြစ်ပြီး ထိုအဆင့်အောက်တွင် မည်သူမျှ မရှိဟု သူ ထင်ခဲ့သည်။ ထို့ထက်ပို၍ မဟာဧကရာဇ်အဆင့်ကို ကျော်လွန်သော ကျွမ်းကျင်သူများစွာသည် ကောင်းကင်တိမ်တိုက်ထက်တွင် နေရာယူကာ ထာဝရတိုက်ကြီးတစ်ခုလုံးကို အုပ်စိုးနေမည်ဟု ထင်ခဲ့သည်။

သို့သော် ထာဝရတိုက်ကြီးသို့ အမှန်တကယ် ရောက်ရှိလာသောအခါ ထိုသို့မဟုတ်ကြောင်း တွေ့လိုက်ရသည်။ ထာဝရတိုက်ကြီးတွင်လည်း တာအိုပြည်နယ် ၃၀၀၀ကဲ့သို့ပင် မဟာဧကရာဇ်အဆင့်အောက်ရှိ သတ္တဝါများ ရှိနေသေးသည်။

ကွာခြားချက်မှာ ကျင့်ကြံခြင်း၏ အနိမ့်ဆုံးအဆင့်မှာ ပို၍မြင့်ပြီး အမြင့်ဆုံးအဆင့်မှာလည်း ထိုနည်းအတိုင်းပင် ပို၍မြင့်မားခြင်းသာဖြစ်သည်။

ထာဝရတိုက်ကြီးတွင် မွေးဖွားလာသူများသည် အရည်အချင်းအညံ့ဆုံးနှင့် စွမ်းအားအနည်းဆုံးဖြစ်လျှင်ပင် ယွမ်တန်အဆင့်သို့ ရောက်ရှိနေကြသည်။ ၎င်းမှာ တာအိုပြည်နယ် ၃၀၀၀တွင် မဖြစ်နိုင်သည့်အရာဖြစ်သည်။

ထာဝရတိုက်ကြီးတွင် မဟာဧကရာဇ်အဆင့်သို့ ရောက်ရှိပြီးနောက် ဆက်လက်၍ ကျင့်ကြံနိုင်သေးသည်။ ကောင်းကင်ဘုံ

ဧကရာဇ်၊ ရှေးဟောင်းဧကရာဇ် ၊ သူတော်စင်ဧကရာဇ် နှင့် နတ်ဘုရားဧကရာဇ် အထိ တိုးတက်နိုင်သည်။ ၎င်းတို့မှာလည်း တာအိုပြည်နယ် ၃၀၀၀ တွင် မဖြစ်နိုင်သော အဆင့်များ ဖြစ်သည်။

တာအိုပြည်နယ် ၃၀၀၀ တွင် ကောင်းကင်နှင့် မြေကြီး၏ နိယာမများ အပြည့်အဝ ပြန်လည်သက်ဝင်လာလျှင်ပင် ကျင့်ကြံသူတစ်ဦး၏ အဆင့်မှာ မဟာဧကရာဇ်အဆင့်၏ အထွတ်အထိပ်သို့သာ ရောက်နိုင်သည်။ ထိုထက်ကျော်လွန်ရန်မှာလေဟာနယ် ကို ဖျက်ဆီးကာ ထာဝရတိုက်ကြီးသို့ တတ်လှမ်းမှသာ ရနိုင်သည်။

သူ၏ တာအိုပြည်နယ် ၃၀၀၀ ကို မျိုးဆက်ပေါင်းများစွာ ပစ်မှတ်ထားခဲ့သည့် ထျန်းယီနန်းတော်'မှာ မည်သည့်အဆင့် ရှိမည်နည်းဟု သူ တွေးမိသည်။သူတော်စင်ဧကရာဇ်အဆင့်လား သို့မဟုတ် နတ်ဘုရားဧကရာဇ်အဆင့်လား။၍ နတ်ဘုရားဧကရာဇ်အဆင့်ဆိုလျှင် မည်မျှပင် အင်အားကြီးမားမည်နည်း။

ထိုသို့တွေးရင်း လင်းချန်သည် မျှော်လင့်ချက်များဖြင့် ပြည့်နှက်နေပြီး တာအိုပြည်နယ် ၃၀၀၀ ကို အမြန်ဆုံး ပြန်သွားလိုစိတ် ပေါ်ပေါက်လာသည်။

သို့သော် သူသည် အခြားသူများကို ပေးထားသော ကတိကို ဦးစွာ ပြီးမြောက်အောင် လုပ်ဆောင်ရမည်ဟု သိသည်။ သူသည် ကတိမတည်ဘဲ ထွက်မသွားသင့်ပေ။

လင်းချန်၏ ပုံရိပ် ဟင်းလင်းပြင်ထဲသို့ ပျောက်ကွယ်သွားသည်ကို ကြည့်ပြီး ဂေါ်ရိသည် လက်နှစ်ဖက်ကို ပွတ်သပ်ကာ အလျင်အမြန် လိုက်ပါသွားသည်။ သူတို့ ဂေါ်မိသားစုမှာ ယနေ့မှပင် ခေါင်းမော့နိုင်တော့မည်ဖြစ်သည်။

လင်းချန်နှင့် ဂေါ်ရိ ထွက်ခွာသွားပြီးနောက် ထျန်းယွမ်မြို့တစ်ခုလုံးသည် အဆုံးမရှိသော တိတ်ဆိတ်ခြင်းထဲတွင် နစ်မွန်းသွားသည်။

မြို့သူမြို့သားများနှင့် ကျွမ်းကျင်သူအားလုံးမှာ စကားမပြောနိုင်အောင် ဖြစ်နေကြသည်။ ဖြစ်ပျက်သွားသည်မှာ အလွန်တုန်လှုပ်ဖွယ်ကောင်းလွန်းသဖြင့် သူတို့ စိတ်ပြန်ငြိမ်အောင် မလုပ်နိုင်ကြပေ။

လုပ်ဆောင်ခဲ့သူမှာ မည်သူနည်း။ မဟာဧကရာဇ်အဆင့် ကျွမ်းကျင်သူတစ်ဦးသာလျှင် ဤမျှ ခွန်အားကြီးမားနိုင်မည်မှာ သေချာသည်။

သို့သော် သူသည် လီမိသားစုကို ကျိလဲ့မိစ္ဆာဂိုဏ်းက ကာကွယ်ပေးထားသည်ကို မသိပါသလား။ မဟာဧကရာဇ်အဆင့် ဖြစ်လျှင်ပင် ကျိလဲ့မိစ္ဆာဂိုဏ်းကို ကြောက်ရွံ့သင့်သည် မဟုတ်ပါလား။

လီမိသားစုကို လုံးဝ အမြစ်ပြတ်ချေမှုန်းခဲ့ခြင်းသည် ကျိလဲ့မိစ္ဆာဂိုဏ်း၏ လက်တုံ့ပြန်မှုကို မကြောက်ရွံ့ခြင်းလားသို့မဟုတ် ဤလုပ်ရပ်သည် အစကတည်းက ကျိလဲ့မိစ္ဆာဂိုဏ်းကို ပစ်မှတ်ထားခြင်းလား။

လီမိသားစုမှာ ကြားထဲတွင် ပိတ်မိသွားသည့် ပိုးကောင်မျှသာ ဖြစ်နိုင်သည်။

အချို့သော ကျွမ်းကျင်သူများမှာ ဤအချက်ကို သဘောပေါက်သွားကြသည်။

သို့မဟုတ်လျှင် မဟာဧကရာဇ်အဆင့်ရှိသူတစ်ဦးက ဤမျှအဆင့်နိမ့်သော မိသားစုတစ်ခုကို အထူးတလည် လာရောက်ရှင်းလင်းစရာ မလိုပေ။ ထိုသူတို့သည် ကျိလဲ့မိစ္ဆာဂိုဏ်းဘက်သို့ အကြည့်များ ရောက်သွားကြသည်။

အကယ်၍ သူတို့ထင်သည့်အတိုင်းဆိုလျှင် ကျိလဲ့မိစ္ဆာဂိုဏ်းတွင် မကြာမီ ကြီးမားသော ဖြစ်ရပ်တစ်ခု ဖြစ်ပေါ်တော့မည်ဖြစ်သည်။

ထျန်းယွမ်မြို့သားများက စိတ်ကူးယဉ်နေကြစဉ်မှာပင် ကျိလဲ့မိစ္ဆာဂိုဏ်း တည်ရှိရာ ချင်ပြည်နယ်တွင်မူ အခြေအနေများမှာ တင်းမာနေသည်။ ချင်ပြည်နယ်၏ အရှင်သခင်ဖြစ်သည့် ကျိလဲ့မိစ္ဆာဂိုဏ်းသည် ပြည်နယ်အတွင်းရှိ အင်အားစုများအားလုံးထံမှ နှစ်စဉ် ကျင့်ကြံခြင်း အရင်းအမြစ်များကို အဓမ္မကောက်ယူလေ့ရှိသည်။

ယနေ့သည် မြောက်ပိုင်း ချင်ပြည်နယ်ရှိ အင်အားစုများက အရင်းအမြစ်များကို လာရောက်အပ်နှံရမည့်နေ့ဖြစ်သည်။ ကျိလဲ့မိစ္ဆာဂိုဏ်း၏ တံခါးပြင်ပတွင် အင်အားစုအသီးသီးမှ ကိုယ်စားလှယ်များ စုရုံးနေကြသည်။

သူတို့မသိလိုက်သည်မှာ အထက်ကောင်းကင်တွင်ဟင်းလင်းပြင်မှာ အနည်းငယ် လှုပ်ရှားသွားပြီး လင်းချန်နှင့် ဂေါ်ရိတို့ ပေါ်လာခြင်းဖြစ်သည်။ လင်းချန်မှာ ခြေချလိုက်သည်နှင့် မျက်မှောင်ကြုတ်သွားသည်။

သူသည် သူ့ကို ရွံရှာစေသည့် အရှိန်အဝါတစ်ခုကို ခံစားလိုက်ရပြီး ထိုအရှိန်အဝါမှာ အောက်ရှိ ကျိလဲ့မိစ္ဆာဂိုဏ်းမှ ထွက်ပေါ်နေခြင်း ဖြစ်သည်။

"ဒီနေရာကတော့ အမှိုက်သရိုက်တွေနဲ့ မတရားမှုတွေရဲ့ အသိုက်အမြုံပဲ။"

လီမိသားစုတွင် ရှိစဉ်က သူအတွင်းသို့ မဝင်ခဲ့သည့်အတွက် လက်မှတ်ထိုးဝင်ခြင်း အခွင့်အရေး မရခဲ့ပေ။ ယခု ကျိလဲ့မိစ္ဆာဂိုဏ်းသို့ ရောက်သောအခါ အခွင့်အရေးရမလားဟု တွေးခဲ့သော်လည်း ယခုမူ လုံးဝစိတ်ဝင်စားမှု ပျောက်ဆုံးသွားသည်။

ဤမျှညစ်ပတ်သော နေရာမျိုးတွင် လက်မှတ်ထိုးဝင်ခြင်း လုပ်ရန်ပင် သူ စိတ်မပါတော့ပေ။

ဤမျှညစ်ပတ်သော အင်အားစုမျိုးကို လီမိသားစုနည်းတူ လက်တစ်ဖဝါးဖြင့် အမြစ်ပြတ် ချေမှုန်းပစ်လိုက်ရုံသာ ရှိတော့သည်။