အခန်း ၂၈၄

အခန်း (၂၈၄)

ချော်ရည်နတ်ဘုရား၏ အလိုဆန္ဒက ဤနေရာသို့ ဆင်းသက်လာချေပြီ။

ခေါင်းပြတ်သွားသော ဘိုဇန်ကာသည် နောက်တစ်ကြိမ် ပြန်လည်မတ်တတ်ရပ်လာလေ၏။

၎င်း၏ ပြတ်တောက်သွားသော လည်ပင်းပေါ်တွင် ရွှေနီရောင် ခေါင်းတစ်လုံး ထွက်ပေါ်လာကာ နတ်ဘုရားတစ်ပါး၏ အငွေ့အသက်က ကမ္ဘာမြေပေါ်သို့ လွှမ်းမိုးလာပေသည်။

၎င်း၏ မျက်နှာပေါ်တွင် မည်သည့် ခံစားချက်မှ မရှိဘဲ လက်နှစ်ဖက်ကို နောက်ပစ်ကာ မာနတခွဲဝါးဖြင့် ရပ်နေလေ၏။

ဧရာမ ခန္ဓာကိုယ်ကြီးမှာ တဖြည်းဖြည်း ကျုံ့ဝင်သွားပြီးနောက် နောက်ဆုံးတွင်တော့ သာမန်လူတစ်ယောက်၏ အရွယ်အစားသို့ ပြန်လည်ရောက်ရှိသွားလေတော့သည်။

"အို... နတ်ဆိုးကို ပိုင်ဆိုင်ထားတဲ့သူ၊ မင်းက"

"ကြီးမြတ်လှတဲ့ ချော်ရည်နတ်ဘုရားကို ဒေါသထွက်စေခဲ့ပြီ"

"ဒီနေ့ မင်းကတော့..."

"ရှုး..."

ဖြားယောင်းသွေးဆောင်ခြင်းနှင့် မာနတရားတို့ ပူးကပ်နေသော ရဲချီယန်၏ နှုတ်ပိတ်သံကြောင့် ချော်ရည်နတ်ဘုရားမှာ မသိစိတ်မှနေ၍ အလိုအလျောက် ပါးစပ်ပိတ်သွားရလေ၏။

၎င်းက ဒေါသတကြီးဖြင့် စကားဆက်ပြောရန် ဟန်ပြင်လိုက်စဉ်မှာပင်...

"တစ်ခုလောက် မေးပါရစေ၊ အခု မင်းရဲ့ အသိစိတ်တစ်ခုလုံးကို ဒီခန္ဓာကိုယ်ထဲကို ပြောင်းရွှေ့လိုက်တာလား"

ချော်ရည်နတ်ဘုရားက မျက်မှောင်ကြုတ်သွားသော်လည်း မည်သည့် ထူးဆန်းမှုကိုမျှ သတိမထားမိဘဲ မသိစိတ်မှနေ၍ အလိုအလျောက် ပြန်ဖြေလိုက်လေသည်။

"ဒါက သဘာဝကျကျပဲလေ"

ရဲချီယန်က နားလည်သဘောပေါက်ဟန်ဖြင့် ခေါင်းညိတ်ပြလိုက်၏။

ထို့နောက်... နောက်ထပ်မေးခွန်းကတော့ သဘာဝကျကျပဲ အဲဒီမေးခွန်း ဖြစ်မှာပေါ့လေ။

ကျီးကန်း အော်ဟစ်သံ ထွက်ပေါ်လာပြီးနောက် မေးခွန်းကို မေးမြန်းလိုက်ချိန်တွင် ချော်ရည်နတ်ဘုရား၏ နှလုံးသားထဲ၌ ထိတ်လန့်မှုတစ်ခု ဖြတ်ပြေးသွားချေပြီ။

"မင်း"

"သေမှာလား"

ဤအရာက ရဲချီယန် အနှစ်သက်ဆုံး မေးခွန်းပင် ဖြစ်ပေသည်။ အဘယ်ကြောင့်ဆိုသော် အကြိမ်တိုင်း ရရှိသည့် အဖြေမှာ အမြဲတမ်း တူညီနေသောကြောင့်ပင်တည်း။

"သေမှာပေါ့"

မေးခွန်းကို ဖြေဆိုပြီးနောက်တွင် ချော်ရည်နတ်ဘုရားက တစ်ခုခု မှားယွင်းနေကြောင်း ရုတ်တရက် သဘောပေါက်သွားလေ၏။

"ကျစ်... လူသား၊ ဒါက နတ်ဆိုးရဲ့ စွမ်းအားလား"

"မင်း..."

နောက်ကျသွားချေပြီ။

မှောင်မိုက်သော ရွှေရောင်အလင်းတန်း ထွက်ပေါ်လာချိန်တွင် ဤလူသားထံ၌ နတ်ဘုရားတစ်ပါးကို အောင်မြင်စွာ သတ်ဖြတ်နိုင်ခဲ့သူများတွင်သာ ရှိတတ်သည့် အငွေ့အသက်ကို ၎င်း ဘာကြောင့် ခံစားမိနေသနည်းဆိုသည်ကို ချော်ရည်နတ်ဘုရား နောက်ဆုံးတော့ နားလည်သွားလေတော့၏။

(နတ်ဘုရားများကို ပြစ်မှားစော်ကားသူ)

(နတ်ဘုရားများကို ဒေါသထွက်စေသူ)

ဤချော်ရည်နတ်ဘုရား ထွက်ပေါ်လာသည့် အခိုက်အတန့်ကတည်းက ဤဂုဏ်ပုဒ်နှစ်ခုစလုံးကို ရဲချီယန် တပ်ဆင်ထားပြီး ဖြစ်ပေသည်။

"ဘုရားစူး ကတ်ပြား"

အနည်းငယ်မျှပင် တုံ့ဆိုင်းနေခြင်း မရှိဘဲ ချော်ရည်နတ်ဘုရား၏ ယခင်က ရှိခဲ့သော မာနတရားများအားလုံး အလုံးစုံ ပျောက်ကွယ်သွားရလေ၏။

ယင်း၏နေရာတွင် အစားထိုးဝင်ရောက်လာသည်က ၎င်း၏ အသိစိတ်ကို ဤခန္ဓာကိုယ်ထဲမှနေ၍ ရူးသွပ်စွာ ထွက်ပြေးလွတ်မြောက်လိုသော ဆန္ဒပင် ဖြစ်တော့သည်။

သို့သော်ငြားလည်း နေရာရွှေ့ပြောင်းအမှတ်အသား ထွက်ပေါ်လာသည့် အခိုက်အတန့်တွင် ၎င်း၏ အသိစိတ်ကို သော့ခတ်ထားပြီး ဖြစ်ရာ ထွက်ပြေးရန် မဖြစ်နိုင်တော့ချေ။

ရဲချီယန်၏ ဘုရားစူး ကတ်ပြားက ၎င်းကို ချက်ချင်း သတ်ဖြတ်ပစ်ရန် မလုံလောက်နိုင်ဟု မှတ်ယူကာ အရှေ့သို့ တိုးဝင်တိုက်ခိုက်ရန် လောင်းကြေးထပ်နိုင်ကောင်းပေသည်။ သို့သော် ၎င်း ထိုသို့မလုပ်ခဲ့ပေ။ ၎င်း၏ ရွေးချယ်မှုက လွတ်မြောက်နိုင်စွမ်းမရှိသော ထွက်ပြေးခြင်းသာ ဖြစ်နေလေ၏။

"နေရာရွှေ့ပြောင်းအမှတ်အသား"

သူက ခေါ်ဆိုလိုက်လေသည်။ အသံက ကျယ်လွန်းခြင်း၊ တိုးလွန်းခြင်း မရှိသော်လည်း လူတိုင်း ရှင်းလင်းစွာ ကြားနိုင်ရန် လုံလောက်လှပေသည်။

သူက မျက်လုံးကို အပေါ်သို့ ပင့်ကြည့်လိုက်၏။

မှောင်မိုက်သော ရွှေရောင်အလင်းတန်းများက သူ၏ပတ်လည်တွင် ဝဲယံလည်ပတ်နေကြသည်။ ကတ်ပြားပေါ်ရှိ သင်္ဘောကျောက်ဆူးကို ကိုင်ဆောင်ထားသူက ကျောက်ဆူးကို မြှောက်တင်လိုက်ချိန်တွင် နေရာရွှေ့ပြောင်းအမှတ် သုံးခုမှာ တဖြည်းဖြည်း မှေးမှိန်သွားလေတော့သည်။

လေပြင်းမုန်တိုင်းတစ်ခု စတင်တိုက်ခတ်လာကာ ကောင်းကင်ယံရှိ မှောင်မိုက်သော ရွှေရောင် အလင်းရောင်ဝန်းတစ်ခုက ထွက်ပြေးရန် ကြိုးစားနေသော ချော်ရည်နတ်ဘုရားကို ခိုင်မာစွာ သော့ခတ်ထားလိုက်ချေပြီ။

တီးတိုးရေရွတ်သံများ...

ဂါထာမန္တာန် ရွတ်ဆိုသံများ...

မျက်ရည်နီ မိုးစက်များက အလင်းရောင်ဝန်းကြောင့် မွှေနှောက်ခံလိုက်ရပြီး ကောင်းကင်သို့ ထိုးတက်သွားသော လှည့်ပတ်နေသည့် ရေတိုင်လုံးကြီးတစ်ခုအဖြစ် ပြောင်းလဲသွားလေ၏။

ဘုရားစူး...

သူ၏ လက်ဖဝါးပေါ်တွင် နေရာရွှေ့ပြောင်းအမှတ်အသားက လွင့်မျောနေပေသည်။

သူက စကားဆိုလိုက်၏။

"ပြည်နှင်ဒဏ်ပေးခြင်း"

ကျောက်ဆူးကြီး ကျဆင်းလာလေပြီ။

ကမ္ဘာကြီးတစ်ခုလုံး ဟိန်းဟောက်တုန်ခါသွားရချေပြီ။

အလွန်အမင်း ပေါက်ကွဲစေတတ်သော အလင်းတန်းတစ်ခုက ကောင်းကင်ယံသို့ ထိုးတက်သွားလေ၏။

ဤစစ်တလင်း၏ စည်းမျဉ်းများပဲဖြစ်ဖြစ်၊ အခြားမည်သူမဆိုဖြစ်စေ ဤပြည်နှင်ဒဏ်ပေးခြင်း စွမ်းအားကို မည်သူမျှ တားဆီးနိုင်စွမ်း မရှိတော့ချေ။

တမန်တော် ဘိုဇန်ကာမှာ ၎င်း ယုံကြည်ကိုးကွယ်ရာ ချော်ရည်နတ်ဘုရား၏ နောက်ဆုံးသင်္ချိုင်းဂူ ဖြစ်လာခဲ့လေတော့သည်။

စနစ်၏ အလင်းမျက်နှာပြင်မှာ ဆက်တိုက်ဆိုသလို ကျယ်ပြန့်လာကာ ၎င်းပေါ်ရှိ "ဘုရားစူး" ဆိုသော စကားလုံးက ရူးသွပ်စွာ ထွက်ပေါ်လာပေသည်။

"မဟုတ်ဘူး၊ မဟုတ်ဘူး၊ ငါ မသေနိုင်ဘူး၊ ငါ သေလို့မဖြစ်ဘူး"

"နတ်ဘုရား" ၏ အော်ဟစ်ငိုယိုသံများနှင့်အတူ ချော်ရည်အမည်ရသော ဤ နတ်ဘုရားသည် အထွတ်အထိပ် အလင်းတန်းများကြားတွင် ဘိုဇန်ကာနှင့်အတူ ပျောက်ကွယ်သွားလေတော့၏။

၎င်း ဘယ်ကိုရောက်သွားသနည်း။ နတ်ဘုရားများ တောင့်တကြသော်လည်း ခြေမချရဲသည့် ထိုလွင်တီးခေါင်ပြင်ဆီသို့ ရောက်ရှိသွားခြင်းပင်တည်း။

အဆုံးအစမရှိသော လွင်တီးခေါင်ပြင်၏ မသိရသော နေရာတစ်နေရာ။

ချော်ရည်နတ်ဘုရားသည် နေရာရွှေ့ပြောင်းအမှတ်အသား၏ ပြည်နှင်ဒဏ်ပေးခြင်း စွမ်းအားအောက်တွင် ဤနေရာသို့ ရောက်ရှိလာခဲ့ပြီးနောက် ပတ်ဝန်းကျင်ကို ကြောင်အစွာ ငေးကြည့်နေမိလေ၏။

ချက်ချင်းဆိုသလိုပင် ၎င်း၏ နှလုံးသားထဲရှိ ကြောက်ရွံ့မှုများက ဖော်ပြ၍မရနိုင်လောက်အောင် ဖြစ်လာတော့သည်။

"ဒါက လွင်တီးခေါင်ပြင်ပဲ၊ မဟုတ်ဘူး၊ မဟုတ်ဘူး၊ ငါ ဒီကို မလာချင်ဘူး၊ ငါ မဟုတ်ဘူး၊ ငါ့ကို ချမ်းသာပေးပါ၊ ငါ ထွက်သွားပါ့မယ်၊ အခုချက်ချင်း ထွက်သွားပါ့မယ်"

သို့သော်ငြားလည်း...

ဝီ...

ကောင်းကင်ယံတွင် ရထားစနစ်၏ အလင်းမျက်နှာပြင် ထွက်ပေါ်လာလေ၏။

ထိုအေးစက်ပြီး ခံစားချက်ကင်းမဲ့နေသော ကြေညာသံက ဤအခိုက်အတန့်တွင် ထွက်ပေါ်လာပေသည်။

(နတ်ဘုရား ID——C-၃၄——ချော်ရည်)

(စည်းမျဉ်းများကို ချိုးဖောက်မှု၊ လွင်တီးခေါင်ပြင်သို့ ခွင့်ပြုချက်မရှိဘဲ ဝင်ရောက်လာမှု)

(ရထားစနစ်က ပြစ်ဒဏ်ချမှတ်မည်ဖြစ်သည်)

(စွပ်စွဲခြင်း တရားစီရင်မှုကို စတင်နေပါပြီ)

(ကျူးလွန်ခဲ့သော ကြီးမားလှသည့် ပြစ်မှု၊ မိမိကိုယ်ကိုယ် နတ်ဘုရားအဖြစ် ကြေညာခြင်း)

(တရားစီရင်ချက်၊ အမြစ်ပြတ် ချေမှုန်းမည်)

(ဝင်ရောက်စွက်ဖက်ခြင်းလား၊ ထွက်ပြေးလွတ်မြောက်ခြင်းလား၊ အကျုံးမဝင်ပါ)

အလင်းမျက်နှာပြင် အများအပြားက ချော်ရည်နတ်ဘုရား၏ ခန္ဓာကိုယ်ပေါ်သို့ ဖိချလာလေ၏။ ဘယ်တော့မှ ဖျက်ဆီး၍မရနိုင်ဟု ၎င်း ကြွေးကြော်ခဲ့သော မာကျောလှသည့် ကျောက်တုံးခန္ဓာကိုယ်ကြီးမှာ တရားစီရင်ခံရသည့် အခိုက်အတန့်မှာပင် စတင်၍ ကြေမွပျက်စီးသွားလေတော့သည်။

၎င်းနှင့် ပတ်သက်သမျှ အရာအားလုံး လေထဲသို့ ပျောက်ကွယ်သွားချိန်တွင် မီးခိုးဖြူရောင် မြူခိုးများက တိတ်ဆိတ်စွာ ရောက်ရှိလာခဲ့ချေပြီ။

တောင်ပံများပါရှိသော မျက်လုံးတစ်လုံးက ချော်ရည်နတ်ဘုရား ပျောက်ကွယ်သွားရာ နေရာတွင် တိတ်ဆိတ်စွာ လွင့်မျောလာ၏။

မကြာမီမှာပင် လွင်တီးခေါင်ပြင်ထဲ၌ အလင်းမျက်နှာပြင်အသစ်တစ်ခု ထွက်ပေါ်လာပေသည်။

(၊)

(၊၊၊)

(ထပ်ဆောင်း ဆုလာဘ်လား၊)

(ဆုလာဘ်ပေးပို့ခြင်းကို သော့ခတ်လိုက်ပါပြီ)

(ရဲချီယန်)

(ပို့ဆောင်ရမည့် ပစ်မှတ်၊ အိပ်မက်စားသုံးသူလေး)

(ထပ်ဆောင်း ဆုလာဘ် ပေးပို့ခြင်း ပြီးမြောက်ပါပြီ)

————

(ဒင်ဒေါင်...)

(နတ်ဘုရား ID——C-၃၄——ချော်ရည်၊ အသိစိတ် အလုံးစုံ တိတ်ဆိတ်သွားပါပြီ)

(သတ်ဖြတ်သူ၊ ID - E-3 - 1102၊ ရထားမောင်းနှင်သူ၊ ရဲချီယန်)

(ဆုလာဘ်များကို သင်၏ စာတိုက်ပုံးထဲသို့ အီးမေးလ်မှတစ်ဆင့် ပေးပို့ထားပြီး ဖြစ်ပါသည်)

(ဒင်...)

(လက်ရှိ နတ်ဘုရားသတ်ဖြတ်ခြင်း အရေအတွက်၊ ၃)

(ရှေ့ဆက်၍ သွားပါ)

(ဒင်ဒေါင်... သင်၏ ဂုဏ်ပုဒ်ဖြစ်သော နတ်ဘုရားများကို ပြစ်မှားစော်ကားသူ မှာ ပြောင်းလဲသွားပါပြီ)

(နတ်ဘုရားများကို ပြစ်မှားစော်ကားသူ)

(နတ်ဘုရားစွမ်းအား ပါဝင်သော မည်သည့် တည်ရှိမှုကိုမဆို ၃၀၀ ရာခိုင်နှုန်းမှ ၄၀၀ ရာခိုင်နှုန်းအထိ ထပ်ဆောင်း ထိခိုက်မှု ပေးစွမ်းနိုင်သည်)

"အီးမေးလ်ကတစ်ဆင့် ထပ်ပို့တာလား၊ ထူးဆန်းတယ်၊ နတ်ဘုရားသတ်ဖြတ်ခြင်း ဆုလာဘ်တွေကိုပဲ အီးမေးလ်ကနေ ပို့တာလားမသိဘူး"

ရဲချီယန်က အနည်းငယ် စိတ်ရှုပ်ထွေးစွာဖြင့် ခေါင်းကို ကုတ်လိုက်လေ၏။

သို့သော် ယခုအချိန်က ဤအရာကို သိချင်နေရမည့် အချိန်မဟုတ်ချေ။

စိတ်လှုပ်ရှားမှုများ ပြည့်နှက်စွာဖြင့် လက်ကိုပွတ်ကာ သူ၏ စာတိုက်ပုံးကို ဖွင့်လိုက်ပေသည်။ ထိုအထဲတွင် အလင်းတန်းများ တလက်လက် တောက်ပနေသော အီးမေးလ်အသစ်တစ်ခု ရှိနေလေ၏။

"ထုတ်ယူမယ်"

အီးမေးလ်ကို ထုတ်ယူလိုက်ရာ မှောင်မိုက်သော ကျောက်နက်သားကဲ့သို့ အသွင်အပြင်ရှိပြီး ရွှေနီရောင် ချော်ရည်များ ဖြည်းညင်းစွာ စီးဆင်းနေသော စက်ယန္တရား ကိရိယာတစ်ခုက ရဲချီယန်၏ လက်ထဲတွင် ထွက်ပေါ်လာလေတော့သည်။

(ချော်ရည်ဒိုင်းလွှာ အမြုတေ)

(မည်သည့် စက်ယန္တရား ဖန်တီးမှုမျိုးတွင်မဆို တပ်ဆင်ပြီးပါက ၎င်းကို ထပ်ဆောင်း စက်ယန္တရား လက်နက်ကိရိယာ အဖြစ် ပေးစွမ်းနိုင်သည်)

(ချော်ရည်ဒိုင်းလွှာ - [ဖျက်ဆီး၍မရနိုင်ခြင်း] [လောင်ကျွမ်း ရောင်ပြန်ဟပ်ခြင်း] နှင့် [ခိုင်ခံ့ခြင်း] စရိုက်လက္ခဏာများကို ပိုင်ဆိုင်ထားသည်)

(မှတ်ချက်၊ ဤအမြုတေသည် နတ်ဘုရားအမြုတေဖြင့် ပြုပြင်မွမ်းမံထားပြီးသော စက်ယန္တရား ဖန်တီးမှုများ အသုံးပြုရန်အတွက် ပိုမို သင့်လျော်ပါသည်)

"ဒိုင်းလွှာလား၊ ပြီးတော့ ဒီမှတ်ချက်က..." ရဲချီယန်က အဝေးတွင် နောက်ဆုံးကျန်ရှိနေသော ကျောက်တုံးလူသား အနည်းငယ်ကို ရှင်းလင်းနေသည့် စက်ရုပ်စစ်သည်တော် ဗီလိန်ကို တိတ်ဆိတ်စွာ လှမ်းကြည့်လိုက်လေ၏။

"ဘုရားရေ၊ အဲဒါဆို သူသုံးဖို့ အသင့်တော်ဆုံးဆိုတဲ့ အဓိပ္ပာယ်လား၊ ဟင်... စဉ်းစားကြည့်ရရင် နောက်ပိုင်း ငါသာ ဒီလို နတ်ဘုရားအမြုတေတွေကို ပိုရလာပြီး ဗီလိန်အပေါ်မှာ အကုန်လုံး စုပုံလိုက်နိုင်မယ်ဆိုရင်..."

လူလုပ် နတ်ဘုရားစက်ယန္တရားများ ဖြစ်လာမလား။

"မင်းအတွက် အမြတ်ပဲပေါ့... ဟွန်း၊ အဆင့်မြင့် အသွင်ကူးပြောင်းဖို့ကတော့ အခုထိ မဖြစ်နိုင်သေးဘူး၊ ဒါပေမဲ့ ကိစ္စမရှိပါဘူး၊ ဗီလိန်မှာ အရင်တပ်ဆင်ထားလိုက်မယ်၊ အချိန်တန်ရင် ဗီလိန်နဲ့အတူ အလုံးစုံ အဆင့်မြင့် အသွင်ကူးပြောင်းခြင်း လုပ်လိုက်တာပေါ့"

ရဲချီယန်က ဤနေရာတွင် ဗီလိန်အတွက် တိုက်ရိုက် မတပ်ဆင်ပေးသေးဘဲ ထိုအမြုတေကို သိမ်းဆည်းလိုက်လေ၏။

သူ၏အကြည့်က ကောင်းကင်ယံရှိ စစ်တလင်း၏ မျက်နှာပြင်ကြီးဆီသို့ ရောက်ရှိသွားပေသည်။

(အမည် - ရဲချီယန်၊ မျိုးနွယ် - လူသား၊ သရုပ် - လွင်တီးခေါင်ပြင် ခရီးသွား... ရထားမောင်းနှင်သူ၊ ဆက်တိုက်အနိုင်ရရှိမှု - ၁၂)

ဤအခိုက်အတန့်တွင် စစ်တလင်းအတွင်းရှိ အတုအယောင် အဲရစ် စနစ်၏ အလင်းမျက်နှာပြင်က ရဲချီယန်၏ ရှေ့တွင် ထွက်ပေါ်လာလေတော့သည်။

(ဂုဏ်ယူပါတယ်၊ ကြယ်အမြုတေ အဆင့် ဆယ့်နှစ်ကြိမ်မြောက် စမ်းသပ်မှုများကို ပြီးမြောက်သွားပါပြီ)