အခန်း ၃၄၁

အခန်း။ ၃၄၁

ဘုန်း... ဘုန်း... ဘုန်း

နက်နဲလှသော အဝါရောင်အလင်းတန်းများ လွှမ်းခြုံလိုက်သည်နှင့်အမျှ ဝိညာဉ်ချီစွမ်းအင်တို့မှာ တစ်ရှိန်ထိုး တိုးပွားလာသည်။

မူလက နှစ်ဆသာ တိုးပွားနေရာမှ ယခုမူ တစ်ခဏချင်းတွင် ငါးဆအထိ ခုန်တက်သွားသည်။ ထို့ပြင် နားလည်သဘောပေါက်နိုင်စွမ်း၊ အသက်စွမ်းအား၊ ဘေးအန္တရာယ်ကင်းရှင်းခြင်း စသည့် အကျိုးသက်ရောက်မှုများအားလုံးမှာလည်း ငါးဆအထိ မြင့်မားလာသည်။

ဤအဝါရောင်အလင်းတန်းများအောက်တွင် ဇီဝေတောင်တစ်ခုလုံးမှာ ပိုမိုသိပ်သည်းလာပြီး ရုပ်ဝတ္ထုအသွင်ဆောင်လာသယောင် ရှိသည်။

ငါးဆတိုးလာသော ဤစွမ်းအားများကြောင့် နတ်ဘုရားတို့၏ ဆေးဝါးများနှင့် ရှားပါးရတနာများမှာ မျက်စိဖြင့် မြင်နိုင်သည့်အထိ ကြီးထွားလာကာ အသက်စွမ်းအားများ တရိပ်ရိပ် တက်လာသည်။

သက်တမ်းတိုသော အပင်များမှာပင် ချက်ချင်းဆိုသလို အပွင့်များပွင့်ကာ အသီးများ သီးလာကြသည်။

တံခါးဝတွင် ပျင်းရိစွာ တွဲလျောင်းကျနေသော နတ်ဘုရား နွယ်ပင်မှာပင် အားအင်များ ပြည့်ဝလာကာ နေရောင်အောက်တွင် ကျေနပ်အားရစွာ ဆန့်ထုတ်နေသည်။

သို့သော် ဤသည်မှာ အဆုံးသတ် မဟုတ်သေးပေ။

ရုတ်တရက် အချိန်၏ စွမ်းအားများ ပြန့်နှံ့သွားကာ အရာရာတိုင်းမှာ သက်ဝင်လှုပ်ရှားနေသော်လည်း ဇီဝေတောင်တစ်ခုလုံး၏ အချိန်မှာ ရွှံ့နွံထဲတွင် နစ်မြုပ်နေသကဲ့သို့ နှေးကွေးသွားသည်။

အချိန်ဆိုသည်မှာ မမြင်နိုင်သော အရာဖြစ်သည်။

ဤအချိန်ပြောင်းလဲမှုကို ချန်ကျီရှင်းမှလွဲလျှင် တားမြစ်နယ်မြေထဲတွင် ပုန်းကွယ်နေသော ဘိုးဘေးများနှင့် မဟူရာ အကြီးအကဲများသာ သတိထားမိကြသည်။

အမှန်ဆိုရသော် မဟူရာ အကြီးအကဲများပင်လျှင် ထူးခြားမှုကို အနည်းငယ်သာ ခံစားမိလိုက်ခြင်းပင်။

"အို... အချိန်ရဲ့ စွမ်းအားပါလား"

ပင်မတောင်ထိပ်ရှိ တားမြစ်နယ်မြေအတွင်း၌ ဘိုးဘေး ချန်ထျန်းယွမ်မှာ မျက်လုံးများကို ရုတ်တရက် ဖွင့်လိုက်သည်။

သူသည် ချန်ကျီရှင်းရှိရာသို့ စူးစိုက်ကြည့်လိုက်ပြီး သူ၏ အရွယ်တင်နေသော မျက်နှာပေါ်တွင် အံ့အားသင့်မှုများ ဖြတ်ပြေးသွားသည်။

အချိန်၏ စွမ်းအားဆိုသည်မှာ အထွတ်အထိပ်သို့ ရောက်ရှိပြီးမှသာ နားလည်နိုင်သော အရာဖြစ်သည်။

ခဏအကြာတွင် ချန်ထျန်းယွမ်က မျက်လုံးကို ပြန်မှိတ်လိုက်ပြီး သူ၏ မျက်နှာပေါ်တွင် ပြုံးယောင်သန်းလာသည်။

...

...

"ဟားဟားဟား ငါ အဆင့်တက်သွားပြီ"

“ဒီနေ့တော့ ငါ ဘယ်သူလဲဆိုတာ သိလိုက်ရပြီ စစ်မှန်သောကိုယ်ပိုင်နယ်ပယ်ရေ ငါ ရောက်လာပြီ"

"နတ်ဘုရားခရီးသွားနယ်ပယ်ကို ရောက်တာနဲ့ ကမ္ဘာကြီးကို လွတ်လပ်စွာ လည်ပတ်နိုင်ပြီ ငါ အဆင့်တက်သွားပြီ"

"ငါလည်း နတ်ဘုရား ခရီးသွားနယ်ပယ်ကို ရောက်သွားပြီ"

"ဒီနေ့ ငါတို့ရဲ့ ဇီဝေချန်မျိုးနွယ်စုမှာ စစ်မှန်သောကိုယ်ပိုင်နယ်ပယ် ကျင့်ကြံသူ ၈၇ ဦး ရှိရာကနေ နောက်တစ်ဦး တိုးသွားပြီ"

"ဟား... ငါ့ရဲ့ နှစ်ပေါင်း ၃၀၅ နှစ်တာ ကြိုးပမ်းမှု နောက်ဆုံးတော့ စစ်မှန်သောကိုယ်ပိုင်နယ်ပယ်ရဲ့ အထွတ်အထိပ်ကို ရောက်သွားပြီ"

"ညီအစ်ကို ဒီနေ့တော့ ဟွာလင်ဟိုလည်း မင်းတို့နဲ့အတူ စစ်မှန်သောကိုယ်ပိုင်နယ်ပယ်ရဲ့ အထွတ်အထိပ်ကို ရောက်သွားပြီ"

ဇီဝေတောင် တစ်ခွင်လုံးတွင် ပျော်ရွှင်စွာ အော်ဟစ်ရယ်မောသံများ ပဲ့တင်ထပ်နေသည်။

တရားထိုင်ရင်း မျက်မှောင်ကြုတ်နေသူများမှာ တစ်ခဏချင်းတွင်ပင် ဉာဏ်ပွင့်သွားကာ အဆင့်အသစ်တစ်ခုသို့ ကူးပြောင်းသွားကြသည်။

လေ့ကျင့်ရေးကွင်းတွင် အစီအရင်များကို လေ့ကျင့်နေသော ချန်မျိုးနွယ်စုဝင်များမှာလည်း ဇဝေဇဝါ ဖြစ်နေသည့် အချက်များအားလုံးကို အလင်းတန်းများအောက်တွင် ချက်ချင်းဆိုသလို နားလည်သွားကာ အဆင့်မြင့် အခြေအနေသို့ ရောက်ရှိသွားကြသည်။

အဋ္ဌမမြောက်နှင့် နဝမမြောက် တောင်ထိပ်များတွင် ချွေးတဒီးဒီးကျနေသော ဆေးပညာရှင်များနှင့် လက်နက်သွေးသူများမှာ မီးဖိုများကို မနားတမ်း စောင့်ကြည့်ရင်း ဆေးလုံးများနှင့် ရတနာလက်နက်များကို ဖော်စပ်နေကြသည်။

ဝူး….

နက်နဲသော အဝါရောင် အလင်းတန်းများက ဒီရေအလား တောင်ထိပ်များပေါ်သို့ ဖြတ်သန်းသွားသည်။

ထိုအခါ ပင်ပန်းနွမ်းနယ်နေသော သူတို့အားလုံးမှာ ရုတ်တရက် အားအင်အသစ်များ ပြည့်ဝလာပြီး အမောပြေသွားကြသည်။

တိုင်တစ်တိုင်စာမျှ မကြာလိုက်သောအချိန်အတွင်းမှာပင် ဇီဝေချန်မျိုးနွယ်စုတစ်ခုလုံးမှာ ကမ္ဘာမြေကို တုန်လှုပ်သွားစေမည့် ပြောင်းလဲမှုကြီးတစ်ခုကို ဖြတ်သန်းသွားခဲ့သည်။

တတိယမြောက် တောင်ထိပ်ပေါ်တွင် ချန်ထျန်းချန်မှာ သူ၏ ဘေးတွင်ရှိသော ချန်ကျီရှင်းကို ကြည့်ကာ အံ့ဩတကြီး ဖြစ်နေသည်။

ဤသို့သော နည်းလမ်းမျိုးမှာ ယိုယွင်းပျက်စီးနေသည်တို့ကို ထူးခြားဆန်းပြားသော အရာအဖြစ် ပြောင်းလဲပေးနိုင်သည့် နတ်ဘုရားတို့၏ စွမ်းအားနှင့်ပင် တူသည်။

ရှေးဟောင်းသမိုင်းတွင် မည်သည့်အခါကမျှ မတွေ့ဖူးခဲ့သည့် အရာဖြစ်သည်။

"စတုတ္ထဦးလေး ကျွန်တော် ပြောသားပဲ... စိတ်မပူပါနဲ့လို့"

ချန်ကျီရှင်းက အနည်းငယ် ပြုံးပြလိုက်ပြီး တတိယမြောက် တောင်ထိပ်ရှိ ပင်မခန်းမဆောင်ဆီသို့ လျှောက်သွားလိုက်သည်။

ချန်ထျန်းချန်မှာ သူ၏ ကျောပြင်ကို လှမ်းကြည့်နေရင်းမှ သက်ပြင်းချလိုက်သည်။

"တတိယညီရေ... မင်း သားကောင်း တစ်ယောက်ကိုတော့ မွေးထားနိုင်ခဲ့တာပဲ"

ထိုသို့ရေရွတ်ရင်း ခေါင်းခါလိုက်ပြီး တတိယမြောက် တောင်ထိပ်မှ ပြန်လည် ထွက်ခွာသွားသည်။

ချန်ထျန်းချန် ထွက်သွားပြီးနောက် တတိယမြောက် တောင်ထိပ်ရှိ လျှို့ဝှက်ခန်းထဲတွင် ချန်ကျီရှင်းက အသက်ကို ဝအောင် ရှူသွင်းလိုက်ပြီး ကျေနပ်စွာ ပြုံးလိုက်သည်။

ဤ တာအိုကျင့်ကြံရာ နယ်မြေအဆင့်မြှင့်တင်ခြင်းမှ စွမ်းရည်သစ် ၂ ခုကို ရရှိလိုက်သည်။

တစ်ခုမှာ မြှင့်တင်ခြင်းဖြစ်ပြီး နယ်မြေ၏ စွမ်းအားအားလုံးကို ပိုမိုပြင်းထန်လာအောင် လုပ်ပေးနိုင်သည်။

နောက်တစ်ခုမှာ အချိန်စီးဆင်းမှု အရှိန်ဖြစ်သည်။

ဤစွမ်းရည်မှာ နယ်မြေအတွင်းရှိ အချိန်စီးဆင်းမှုကို လိုသလို ထိန်းချုပ်နိုင်သည်။

ဥပမာအားဖြင့် အပြင်လောကတွင် တစ်ရက်ကုန်ဆုံးလျှင် ဇီဝေတောင်တွင် နှစ်ရက်ကုန်ဆုံးသွားမည်ဖြစ်သည်။ အချိန်ကွာဟမှုမှာ တစ်ဆသာ ရှိသေးသော်လည်း အခြားသော စွမ်းအားများနှင့် ပေါင်းစပ်လိုက်ပါက အံ့ဩဖွယ်ကောင်းသော ရလဒ်များကို ရရှိမည်ဖြစ်သည်။

အရည်အချင်း တူညီသော လူနှစ်ဦးကို ဇီဝေတောင်နှင့် အပြင်လောကတွင် သီးခြားစီ ကျင့်ကြံခိုင်းပါက တစ်ဦးမှာ စစ်မှန်သောကိုယ်ပိုင်နယ်ပယ်သို့ ရောက်ရှိနေချိန်တွင် အခြားတစ်ဦးမှာ ကြည်လင်ခြင်းနယ်ပယ်၌သာ လည်ပတ်နေပေလိမ့်မည်။

"ကံမကောင်းတာက ဒီစွမ်းရည်တွေက ငါးရက်ပဲ ခံတယ်။ ပြီးရင် တစ်နှစ်လောက် နားရမယ်" ဟု ချန်ကျီရှင်းက စိတ်မကောင်းစွာဖြင့် ခေါင်းခါလိုက်သည်။

ဤအခြေအနေကိုသာ အမြဲတမ်း ထိန်းထားနိုင်ပါက ဇီဝေချန်မျိုးနွယ်စုသည် နတ်ဘုရား တာအိုမျိုးဆက်ကြီး သုံးခုကို ကျော်တက်သွားရန်မှာ အချိန်ကိစ္စသာ ဖြစ်ပေလိမ့်မည်။

"နောက်တစ်ခါ အဆင့်မြှင့်ဖို့ ကံကြမ္မာတန်ဖိုး၅၀၀၀ လိုသေးတယ်။ အခုထိ ကံကြမ္မာ၏ သားသမီးခြောက်ဦးကို သတ်ထားတာ၂၀၀၀ ကျော်ပဲ ရှိသေးတယ်။ နောက်လာမယ့်သူတွေဆီက ၅၀၀၀ ပြည့်အောင် ဘယ်လို လုပ်ရပါ့မလဲ"

ထိုသို့တွေးတောရင်း သူ၏ မျက်ခွံများမှာ တုန်ခါသွားသည်။

ထိုအကြောင်းကို ပိုမိုမတွေးတောတော့ဘဲ မျက်လုံးကို မှိတ်ကာ တရားထိုင်ရင်း လာမည့် တိုက်ပွဲအတွက် ပြင်ဆင်လိုက်သည်။

...

...

နေဝင် နေထွက်ကာ ရက်ပေါင်း နှစ်ရက် ကုန်ဆုံးသွားသည်။

ဂိုဏ်းချုပ်ခန်းမအတွင်း၌

"ဂိုဏ်းချုပ် ရတနာလက်နက်အားလုံး အောင်မြင်စွာ ဖော်စပ်ပြီးပါပြီ"

"ဂိုဏ်းချုပ် ဆေးဝါးအားလုံးလည်း အောင်မြင်စွာ ဖော်စပ်ပြီးပါပြီ"

"ဂိုဏ်းချုပ် အစီအရင်အားလုံးလည်း အဆင်သင့် ဖြစ်ပါပြီ"

"ဂိုဏ်းချုပ် စစ်ပွဲမှာ ပါဝင်မယ့် စစ်မှန်သောကိုယ်ပိုင်နယ်ပယ်ကျင့်ကြံသူ ၉၈ ဦး၊ နတ်ဘုရား ခရီးသွားနယ်ပယ်၂၀၂ ဦး၊ ကြည်လင်ခြင်းနယ်ပယ်၃၀၀ ကျော် ရှိပါတယ်"

တောင်ထိပ်ပိုင်ရှင်များမှာ ထိုင်ခုံမှ ထကာ စိတ်လှုပ်ရှားစွာဖြင့် အစီရင်ခံကြသည်။

သုံးရက်အတွင်း ချန်ကျီရှင်း၏ တောင်းဆိုချက်များကို ပြည့်မီအောင် လုပ်ဆောင်နိုင်ပါ့မလားဟု သူတို့ စိုးရိမ်ခဲ့ကြသော်လည်း ယခုအခါတွင်မူ မျှော်လင့်ထားသည်ထက် ပိုမိုကောင်းမွန်အောင် ပြင်ဆင်နိုင်ခဲ့သည်။

ဤစစ်ပွဲအတွက် သူတို့၏ ယုံကြည်မှုမှာ အတိုင်းအဆမဲ့နေတော့သည်။

"ကောင်းပြီ"

ချန်ကျီရှင်းက ခေါင်းညိတ်လိုက်ပြီး ကျောက်သားပလ္လင်မှ ထကာ ဝေးကွာလှသော နေဝင်ချိန်ကို ငေးကြည့်လိုက်သည်။

"ဒီစစ်ပွဲမှာ အနိုင်ပဲ ရရမယ် အရှုံးဆိုတာ မရှိစေရဘူး"

"နောက်ရက် နေဝင်ချိန်မှာ စီကုံးမျိုးနွယ်စုရဲ့ ရာဇပလ္လင်ပေါ်မှာ ငါတို့ ဇီဝေချန်မျိုးနွယ်စုရဲ့ အလံကို စိုက်ထူထားတာကို မြင်ချင်တယ်"

ဘုန်း…..

ချန်ကျီရှင်းက လက်ကို ဝှေ့ယမ်းလိုက်ရာ လေထဲတွင် ပေါက်ကွဲသံတစ်ချက် ထွက်ပေါ်လာသည်။

"စည်တွေကို တီးတော့ စစ်တပ်ကို စုစည်းကြ။ အခုချက်ချင်း စစ်ချီမယ်။ စီကုံးကို နင်းချေပစ်ကြမယ်"