အခန်း ၃၄၈

အခန်း။ ၃၄၈

ဇီဝေချန်မျိုးနွယ်စုဝင် တစ်ဦးချင်းစီတိုင်းသည် စီကုံးမျိုးနွယ်စုဝင် ဆယ်ဦးနှင့် ယှဉ်ပြိုင်နိုင်စွမ်း ရှိနေသည်။

"ဒီတိုက်ပွဲကို ငါ ဘယ်လိုလုပ် လွဲချော်နိုင်ပါ့မလဲ"

ကောင်းကင်ယံကို တုန်ခါသွားစေသည့် ဓားသံတစ်ချက် ရုတ်တရက် ပေါက်ကွဲထွက်လာသည်။

နောက်တစ်ခဏတွင် အဆုံးမရှိသော အနီရောင် နတ်ဘုရားအရှိန်အဝါများမှာ ကြယ်တံခွန်တစ်ခုအလား စီကုံးစစ်တပ်အတွင်းသို့ ပြင်းထန်စွာ ထိုးကျလာပြီး စစ်သည်များကြားတွင် ကြီးမားသော ဟာကွက်ကြီးတစ်ခုကို တိုက်ရိုက် ဖောက်ထွက်သွားသည်။

အလင်းတန်းများ ပျောက်ကွယ်သွားချိန်တွင် ဓားအလောင်းတူကြီးကို ကျောပိုးထားသော ဖြူဖွေးနေသော ဆံပင်နှင့် လူငယ်တစ်ဦး ပေါ်လာသည်။

ကြွပ်…

ဓားအလောင်းတူကြီးမှာ ကွဲအက်သွားပြီး လက်ကိုင်တွင် ဒေါင်လိုက်မျက်လုံးတစ်လုံး ပါရှိသည့် နီရဲနေသော မာရ်နတ်ဓားကို သူ၏ လက်ဖြင့် ဆုပ်ကိုင်လိုက်သည်။

"ဂိုဏ်းချုပ် ကျွန်တော် နောက်ကျသွားပါတယ်"

တုကူးနီသည် ရထားလုံးအတွင်းရှိ ချန်ကျီရှင်းကို တစ်ချက်ကြည့်လိုက်ပြီးနောက် စီကုံးအကြီးအကဲ ခုနစ်ဦးထဲမှ လက်ခြောက်ချောင်းပါသည့် နိဗ္ဗာန နယ်ပယ်ကျင့်ကြံသူကို အကြည့်ရောက်သွားသည်။

"စီကုံးအကြီးအကဲ ခုနစ်ဦးထဲက တစ်ဦးဖြစ်တဲ့ ချင်းဟုန်အရှင်…. ကျွန်တော့်သတင်းအရဆိုရင် ကျွန်တော့်ရဲ့ တုကူးမျိုးနွယ်စုကို ဖျက်ဆီးဖို့ လူတွေကို ဦးဆောင်ခဲ့တာ မင်းပဲ မဟုတ်လား"

တုကူးနီ၏ အကြည့်မှာ အေးစက်နေသည်။

"ဘယ်သူလဲလို့ ထင်နေတာ။ လွန်ခဲ့တဲ့ နှစ်တွေက အိမ်ခြေရာမဲ့ ခွေးတစ်ကောင် ဖြစ်နေတဲ့ ကောင်ပဲကိုး"

ချင်းဟုန်အရှင်က သူ၏ အသံအက်အက်ဖြင့် တုကူးနီကို ငုံ့ကြည့်ကာ အံ့ဩဟန်ဖြင့် ပြောသည်။ ထို့နောက် သူက ခေါင်းခါလိုက်သည်။

"မင်းရဲ့ နယ်ပယ်က မတည်ငြိမ်ဘူး။ အရှိန်အဝါတွေက ရှုပ်ထွေးနေတယ်။ မင်းရဲ့ နိဗ္ဗာန စွမ်းအားတွေတောင် အပြည့်အဝ မပြောင်းလဲနိုင်သေးဘူး။ ဒီလောက်အားနဲ့ မင်းက နိဗ္ဗာန နယ်ပယ်ကို အပြည့်အဝ မကျော်ဖြတ်ဘဲနဲ့ ငါ့ကို ရင်ဆိုင်ရဲတယ်လား"

ချင်းဟုန်အရှင်က လှောင်ပြောင်ရယ်မောလိုက်သည်။

"ဒီစွမ်းအားက မင်းကို သတ်ဖို့ လုံလောက်တယ်"

"ဖျက်ဆီးခြင်း မျက်လုံး"

သွေးကြွေးများရှေ့တွင် တုကူးနီသည် စကားမဖြုန်းတော့ဘဲ မာရ်နတ်ဓားအခြေအနေသို့ ချက်ချင်း ဝင်ရောက်လိုက်သည်။

ဘုန်း ဘုန်း ဘုန်း

ချက်ချင်းပင် သူ၏ အရှိန်အဝါများ တောက်လောင်လာသည်။

အနီရောင် မာရ်နတ်ငွေ့များမှာ သူ၏ မျက်လုံးများမှ ထွက်ပေါ်လာပြီး ဓားလက်ကိုင်ရှိ မျက်လုံးမှတဆင့် သူ၏ ခန္ဓာကိုယ်တစ်ခုလုံးကို ဖုံးလွှမ်းသွားသည်။

"ခုတ်"

တုကူးနီသည် ရှေ့သို့ တိုးဝင်ကာ ချင်းဟုန်အရှင်ကို ဓားချက်ပေါင်း မြောက်မြားစွာဖြင့် တစ်ပြိုင်နက် ခုတ်လိုက်သည်။

ဓားအလင်းတန်းများမှာ ရေတံခွန်အလား ကောင်းကင်ယံကို ပိုင်းဖြတ်သွားကာ သူသည် တုကူးမျိုးနွယ်စုမှ ကျဆုံးသွားသူများအတွက် စီကုံးမျိုးနွယ်စု၏ သွေးများဖြင့် အမှတ်တရ ပြုလုပ်တော့မည်ဖြစ်သည်။

"အဓိပ္ပာယ်မရှိတဲ့ နည်းလမ်းပဲ"

ချင်းဟုန်အရှင်က လက်ဝါးတစ်ချက်ဖြင့် ဓားအလင်းတန်းများကို ကြေမွသွားစေသည်။

တစ်ချိန်တည်းတွင်…

"ဂိုဏ်းချုပ်အတွက် တိုက်ပွဲဝင်ကြ"

စစ်မှန်သောကိုယ်ပိုင်နယ်ပယ်ကျင့်ကြံသူ ရာနှင့်ချီ၍ နတ်ဘုရားအလင်းတန်းများကို ထုတ်လွှတ်ကာ စီကုံးမျိုးနွယ်စုနှင့် အပြင်းအထန် တိုက်ခိုက်နေကြသည်။

ဘုန်း ဘုန်း ဘုန်း…

အကြောက်မက်ဖွယ်ကောင်းသော တိုက်ပွဲကြီးမှာ စတင်ဖြစ်ပွားနေသည်။

နတ်ဘုရားကျင့်စဉ်များနှင့် တာအိုဥပဒေသများမှာ ကောင်းကင်ယံတွင် ရောယှက်နေပြီး တောင်တန်းများမှာ ပြိုကျကာ လေဟာနယ်များမှာ ပေါက်ကွဲနေကြသည်။

ဤအခိုက်အတန့်တွင် အရှေ့နက်နဲသောနယ်မြေပြည်နယ် ၁၃ ခုလုံးမှာ တုန်လှုပ်နေသည်။

လူတိုင်းသိနေကြသည်မှာ ထိုတိုက်ပွဲက သမိုင်းမှတ်တမ်းဝင်မည့် တိုက်ပွဲဖြစ်ကြောင်းပင်။

ဤတိုက်ပွဲသည် အရှေ့နက်နဲသောနယ်မြေ၏ အရှင်သခင်သစ်ကို ဆုံးဖြတ်ပေးမည့် တိုက်ပွဲဖြစ်ကြောင်း လူတိုင်း သိရှိနေကြသည်။

...

...

ဘုန်း ဘုန်း ဘုန်း

အချိန်များ ကုန်ဆုံးသွားသည်။

"စောက်ကျိုးနည်း"

စီကုံးရွှမ်းကျီမှာ တိုက်ပွဲကို အနီးကပ်ကြည့်ရှုနေပြီး သူ၏ မျက်နှာမှာ မည်းမှောင်နေသည်။

စီကုံးစစ်သည်များမှာ အရေအတွက် များပြားသော်လည်း ဇီဝေချန်မျိုးနွယ်စု၏ တပ်ဖွဲ့များအောက်တွင် စပါးပင်များအလား ကျဆုံးနေသည်ကို သူမြင်နေရသည်။

ဇီဝေချန်မျိုးနွယ်စုဝင်များသည် အရေအတွက် နည်းပါးသော်လည်း ပြီးပြည့်စုံသော စစ်အစီအရင်များဖြင့် စနစ်တကျ တိုက်ခိုက်နေသည်။

ထိုစစ်အစီအရင်နှစ်ခုမှာ ကြိတ်စက်ကြီးများအလား စီကုံးစစ်သည်များကို အသက်သွင်းယူနေသည်။ စီကုံးမျိုးနွယ်စု၏ တိုက်ခိုက်မှုများမှာ ထိုစစ်အစီအရင်များကို ထိမှန်သည့်အခါတွင်ပင် ပျံ့နှံ့သွားပြီး အရာမထင်ပေ။

ထိခိုက်သူများကိုလည်း အစီအရင်အတွင်းပိုင်းမှ ကာကွယ်ပေးထားပြီး ဆေးဝါးများဖြင့် ချက်ချင်း ပြန်လည် ကုသပေးကာ စစ်မြေပြင်သို့ ပြန်လွှတ်ပေးနေသည်။

စစ်မှန်သောကိုယ်ပိုင်နယ်ပယ်တိုက်ပွဲများမှာ ပိုမို ရက်စက်ကြမ်းတမ်းလှသည်။ စီကုံးမျိုးနွယ်စု၏ အမာခံ တိုက်ခိုက်ရေးသမားများမှာ တစ်ဦးပြီးတစ်ဦး ကျဆုံးနေကြသည်။

"တစ်လှမ်းကြိုရင် တစ်လှမ်းသာတယ်ဆိုတဲ့အတိုင်း ဇီဝေချန်မျိုးနွယ်စုကတော့ အသာစီးကို လုံးဝရယူသွားပြီ"

စီကုံးရွှမ်းကျီ၏ ဘေးမှ အကြီးအကဲ ခုနစ်ဦး၏ ခေါင်းဆောင် ဖြစ်သူ ထျန်းလော့အရှင်က ခေါင်းခါရင်း ပြောသည်။

စီကုံးရွှမ်းကျီမှာ စကားမဆိုနိုင်ဘဲ လက်သီးကိုသာ တင်းတင်းကျပ်ကျပ် ဆုပ်ထားလိုက်

သည်။

ထျန်းလော့အရှင် ပြောသည်မှာ မှန်သည်။ ဤတိုက်ပွဲတွင် စီကုံးမျိုးနွယ်စုမှာ တစ်လှမ်းနောက်ကျနေခဲ့ရပြီး အရာရာတွင် နှေးကွေးနေခဲ့ရသည်။

ဇီဝေချန်မျိုးနွယ်စု၏ အင်အားကို မည်သူမျှ ဤမျှအထိ ထင်မထားခဲ့မိပေ။

"ထားလိုက်ပါတော့ စစ်မှန်သောကိုယ်ပိုင်နယ်ပယ်အောက်က တိုက်ပွဲတွေက နိုင်သည်ဖြစ်စေ ရှုံးသည်ဖြစ်စေ အဓိက မကျပါဘူး"

"ဒီတိုက်ပွဲရဲ့ ရလဒ်ကို ဆုံးဖြတ်ပေးမှာက နိဗ္ဗာန နယ်ပယ်ကျင့်ကြံသူတွေရဲ့ တိုက်ပွဲပဲ။ ငါတို့သာ နိုင်ရင် ဒီစစ်ပွဲက ပြီးသွားပြီ"

အခြားအကြီးအကဲတစ်ဦးက တည်ငြိမ်စွာ ပြောလိုက်သည်။

"လှုပ်ရှားကြစို့"

စီကုံးရွှမ်းကျီက ခေါင်းညိတ်လိုက်ပြီး ကျန်ရှိနေသည့် နိဗ္ဗာန နယ်ပယ် ကျင့်ကြံသူ လေးဦးနှင့် အကြည့်ချင်း ဆက်သွယ်လိုက်သည်။

ဘုန်း….

သူတို့ငါးဦးမှာ တစ်ပြိုင်နက်တည်း လှုပ်ရှားလိုက်ပြီး တိုက်ပွဲထဲသို့ ဝင်ရောက်သွားကြသည်။

ထိုအချိန်တွင်ပင်…

"စီကုံးရွှမ်းကျီ မင်းရဲ့ ပြိုင်ဘက်က ငါပဲ"

အေးစက်စက် အသံတစ်ခုက သူတို့ ငါးဦး၏ ရှေ့တွင် ပဲ့တင်ထပ်သွားသည်။

နောက်တစ်ခဏတွင် ရေတံခွန်အလား စီးဆင်းနေသော ဆံပင်အနက်ရောင်ရှိသည့် လူငယ်တစ်ဦးမှာ ရထားလုံးထဲမှ ထွက်ပေါ်လာပြီး သူတို့ ငါးဦးကို ပိတ်ဆို့လိုက်သည်။

"ချန်ကျီရှင်း မင်း ငါ့အစ်ကိုကို သတ်ခဲ့တယ် ဒီနေ့ မင်းသေရမယ်"

အကြီးအကဲ ခုနစ်ဦးထဲမှ လည်ပင်းတွင် ဦးခေါင်းခွံများ ချိတ်ဆွဲထားသည့် အိုမင်းသော လူကြီးတစ်ဦးက အော်ဟစ်လိုက်သည်။

"အော်"

ချန်ကျီရှင်းက ထိုလူကိုကြည့်ကာ ချက်ချင်း သဘောပေါက်သွားသည်။

သူသည် မကြာသေးမီကမှ သတ်ခဲ့သည့် သူနှင့် မျိုးရိုးတူသူ ဖြစ်မည်ဟု သူခန့်မှန်းမိသည်။

စီကုံးမျိုးနွယ်စု၏ အရင်းအမြစ်မှာ တကယ်ပင် နက်နဲလှသည်။ တစ်ယောက်သေလျှင် နောက်တစ်ယောက်က ချက်ချင်း နေရာဝင်ယူခြင်းပင်။

"မင်းအစ်ကိုက အောက်ကနေ မင်းကို စောင့်နေတယ်။ သူ မင်းကို အရမ်းလွမ်းနေတယ်တဲ့"

ချန်ကျီရှင်းက လေးလံခြင်းမရှိဘဲ ပြောလိုက်သည်။

နောက်တစ်ခဏတွင်…

ဘုန်း

ချန်ကျီရှင်းသည် လက်ကို ဆန့်ထုတ်လိုက်ကာ စီကုံးရွှမ်းကျီနှင့် နိဗ္ဗာန နယ်ပယ် ကျင့်ကြံသူ ငါးဦးကို ဆွဲယူကာ ကောင်းကင်ပြင်ပဆီသို့ တဟုန်ထိုး တက်သွားသည်။

"လာခဲ့ကြ ငါတို့နှစ်ဖက်ကြားက အငြိုးအတေးကို ဒီနေ့ပဲ ရှင်းကြရအောင်"

...

...

တစ်ချိန်တည်းတွင်ပင် ဟွိုင်ပြည်နယ်၏ အခြားတစ်ဖက်၌ ကောင်းကင်ယံကို ဖြတ်သန်းကာ နေ့ညမရွေး စီးဆင်းနေသည့် ကောင်းကင်နတ်ဘုရားလှိုင်းမြစ်ကြီးကဲ့သို့သော စွမ်းအားမျိုးဖြင့် နီရဲသော နဂါးသံချပ်ကာကို ဝတ်ဆင်ထားသည့် ချင်းထျန်းကျုံးမှာ ငွေရောင်လှံကို ကိုင်ဆောင်ကာ ဟိန်းဟောက်နေသည်။

သူသည် အကူအညီပေးရန် ရောက်လာသည့် ရန်သူ့တပ်များကို တည်ငြိမ်စွာ ငေးကြည့်နေသည်။

"ဒီလမ်းက ပိတ်ထားတယ်"

သူ၏ အသံမှာ တည်ငြိမ်သော်လည်း မိုးကြိုးသံအလား ပြင်းထန်သည်။

"ချင်းထျန်းကျုံး ဘာလို့ ချန်ကျီရှင်းအတွက် ဒီလောက်ထိ ကြိုးစားပေးနေတာလဲ"

ကျားကြီးကို စီးနင်းလာသည့် မွန်မြတ်သော မျိုးနွယ်စုခေါင်းဆောင်တစ်ဦးက မေးလိုက်သည်။

"ချင်းထျန်းကျုံး ချန်ကျီရှင်းက အာဏာရှင်ဆန်တယ်။ စီကုံးမျိုးနွယ်စု ပျက်စီးသွားရင် သူက ကမ္ဘာလောကကြီးတစ်ခုလုံးကို အုပ်စိုးပြီး ဘယ်သူ့ကိုမှ ဂရုစိုက်တော့မှာ မဟုတ်ဘူး"

"ရှေးခေတ်ကာလကတည်းက ငါတို့ရဲ့ မျိုးနွယ်စုတွေ ဘာကြောင့် ကြီးပွားခဲ့တာလဲ ချိန်ခွင်လျှာ ထိန်းထားလို့ မဟုတ်ဘူးလား"

"မှန်တယ် ချန်ကျီရှင်းက အဲဒီ ချိန်ခွင်လျှာကို ဖျက်ဆီးပြီး ကမ္ဘာလောကနဲ့ ဆန့်ကျင်ဘက် လုပ်နေတာ"

"ဒီနေ့ စီကုံးမျိုးနွယ်စုရဲ့ ကံကြမ္မာက မနက်ဖြန်မှာ ငါတို့ရဲ့ ကံကြမ္မာ ဖြစ်လာလိမ့်မယ်"

ခေါင်းဆောင်များက တပြိုင်နက်တည်း အော်ဟစ်လိုက်ကြသည်။

"ငါ့ကို စကားရှည်တွေ မပြောနဲ့။ ငါသိတာ တစ်ခုပဲရှိတယ်။ ချန်ကျီရှင်းက ငါတို့ရဲ့ ကောင်းကင်ဘုံနတ်ဘုရားလှိုင်းရဲ့ နတ်ဘုရားသားတော်ပဲ"

"သူ တိုက်မယ်ဆိုရင် ကောင်းကင်ပြိုကျသည်ဖြစ်စေ ပြည်နယ်မြေမြုပ်သည်ဖြစ်စေ ငါသူ့ဘက်ကနေ နောက်ဆုံးအထိ ရပ်တည်သွားမယ်"

ချင်းထျန်းကျုံးက ရယ်မောလိုက်သည်။ သူသည် ချန်ကျီရှင်းနှင့် ကံကြမ္မာခြင်း ဆက်စပ်နေသူဖြစ်သည်။ ဤတိုက်ပွဲတွင် ဇီဝေချန်မျိုးနွယ်စု ရှုံးနိမ့်သွားပါက သူတို့လည်း ကောင်းမွန်တော့မည် မဟုတ်ပေ။

"ခေါင်းမာလွန်းတယ်"

"ဒါဆိုရင်တော့ ခွင့်လွှတ်ပါ ဂိုဏ်းချုပ်ချင်း"

ခေါင်းဆောင်များက တိုက်ခိုက်လိုက်ကြသည်။

ဘုန်း ဘုန်း ဘုန်း

နိဗ္ဗာန နယ်ပယ် ကျင့်ကြံသူ စုစုပေါင်း ခုနစ်ဦးမှာ ချင်းထျန်းကျုံးကို ဝိုင်းဝန်း တိုက်ခိုက်ကြသည်။

"လာခဲ့ကြ"

ချင်းထျန်းကျုံးက ဟိန်းဟောက်လိုက်ပြီး သူ၏ လှံကို လခြမ်းပုံသဏ္ဍာန် ဝှေ့ယမ်းကာ ခုနစ်ဦးကို ရင်ဆိုင်လိုက်သည်။ သူ၏ နောက်တွင်လည်း ကောင်းကင်နတ်ဘုရားလှိုင်း၏ အထွတ်အထိပ် ကျင့်ကြံသူများက တစ်ပြိုင်နက်တည်း တိုက်ပွဲဝင်ရန် ပြင်ဆင်လိုက်ကြသည်။ တိုက်ပွဲကြီးမှာ ဤနေရာတွင်လည်း ပြင်းထန်စွာ စတင်ဖြစ်ပွားသွားတော့သည်။