အခန်း ၄၈၈

အခန်း (၄၈၈) - ကမ္ဘာကြီး၏ တုန်လှုပ်မှုနှင့် တောင်တက်ဗျူဟာ

ယခုအခါတွင်မူ နယ်မြေ ၁၈၈ သည် တစ်ကမ္ဘာလုံး၌ နောက်ထပ်တစ်ကြိမ် ရေပန်းစား ဆူညံသွားရပြန်ချေပြီ။

ရွှီရှင်း၏ ရင်ခွင်အတွင်း၌ မှီနေသော လီဝမ်ရှီးသည် ၎င်းတို့၏ ဆွေးနွေးချက်များကို မြင်တွေ့လိုက်ရသောအခါ စိတ်လှုပ်ရှားစွာဖြင့် "ဝါး... အားလုံးပဲ ဂုဏ်ယူပါတယ်ရှင်၊ နင်တို့အားလုံး ဆီးနှင်းတောင်ပေါ်ကို အောင်မြင်စွာ တက်နိုင်ခဲ့ကြတာ တကယ့်ကို အစွမ်းထက်လွန်းပါတယ်" ဟု ဝမ်းသာအားရ ရေရွတ်လိုက်မိ၏။

သို့ဖြစ်ရာ သူမ၏ စကားလုံးများသည် အသံသွင်းစနစ်အတွင်းသို့ တိုက်ရိုက်မှတ်တမ်းဝင်သွားခဲ့ပါတော့သည်။

အဖွဲ့တွင်းချက်တင်အတွင်း၌မူ -

ရွှီရှင်း - "ဝါး... အားလုံးပဲ ဂုဏ်ယူပါတယ်ရှင်၊ နင်တို့အားလုံး ဆီးနှင်းတောင်ပေါ်ကို အောင်မြင်စွာ တက်နိုင်ခဲ့ကြတာ တကယ့်ကို အစွမ်းထက်လွန်းပါတယ်"

ချင်ယွန်ဟု - "..."

ကျောက်ရှောင်ချွမ်း - "...."

ဝမ်လေ့ "အစ်ကိုရှင်း... ဘာတွေဖြစ်နေတာလဲ"

ချီရွှယ်ဖေး - "ဒါက သေချာပေါက် ဝမ်ရှီးပဲ ဖြစ်ရမယ်၊ ညဉ့်နက်သန်းခေါင်ကြီး ရှိနေပြီကို သူမက ရွှီရှင်းရဲ့ အနားမှာ ရှိနေဆဲပဲကိုး"

လုဖေးအာ - "ကျွန်မ အတည်ပြုပေးနိုင်ပါတယ်၊ ဝမ်ရှီးက အခုထိ ရွှီရှင်းရဲ့ သစ်ပင်အိမ်ထဲမှာပဲ ရှိနေတုန်းပါ"

ချင်ယွန်လုံ - "...ကောင်းပါပြီ၊ တကယ့်ကို နတ်သက်ကြွေသလို ဘဝမျိုးနဲ့ ရှင်သန်နေတာပဲ"

ကျောက်ရှောင်ချွမ်း - "တစ်ကမ္ဘာလုံး အတိုင်းအတာအရ ထိပ်ဆုံး ငါးယောက်စာရင်းထဲ ဝင်ရတဲ့ ခံစားချက်က ချက်ချင်းပဲ ပျောက်ကွယ်သွားသလိုပဲ..."

လီဝမ်ရှီးမှာမူ ရှက်ကိုးရှက်ကန်း ဖြစ်သွားခဲ့ရရှာ၏။

သူမသည် ရွှီရှင်း၏ ရင်ဘတ်ကို လက်သီးဆုပ်လေးဖြင့် အသာအယာ ထုလိုက်ပြီးနောက် ရှက်လွန်းသဖြင့် စကားပင် မပြောရဲတော့ဘဲ သူ၏ ရင်ခွင်အတွင်းသို့ မျက်နှာလေး ဝှက်ထားတော့သည်။

ရွှီရှင်းသည် သူမ၏ နီမြန်းနေသော ပါးပြင်လေးများကို ညင်သာစွာ ပွတ်သပ်ပေးရင်း ကမ္ဘာလုံးဆိုင်ရာ ချန်နယ်ကို ဖွင့်လှစ်ကြည့်ရှုလိုက်၏။

"ဝါး... ဝါး... ဒါက ဘာအခြေအနေကြီးလဲ..."

"ဟင် ဒါက တကယ့်ကို ယုတ္တိမရှိလွန်းဘူး မဟုတ်လား"

"ထိပ်ဆုံး ငါးယောက်စာရင်းထဲမှာ နယ်မြေ၁၈၈ က လူချည်းပဲ လေးယောက်တောင် ဟုတ်လား"

"ဝမ်ကွေ့ရှင်း အမှတ်စာရင်းပေါ် ရောက်နေတာကိုတော့ ငါ အရင်ကတည်းက သိပါတယ်၊ ဒါပေမဲ့ ဒီကျောက်ရှောင်ချွမ်းဆိုတာက ဘယ်သူလဲ။ အရင်က နယ်မြေအားလုံး အမှတ်စာရင်းတွေထဲမှာ သူ့နာမည်ကို တစ်ခါမှ မမြင်ဖူးပါဘူး။ နယ်မြေ ၁၈၈ မှာ ပုန်းကွယ်နေတဲ့ နောက်ထပ် ဆရာကြီးတစ်ယောက် ရှိနေပြန်တာလား။ နယ်မြေ ၁၈၈ မှာ ဆရာကြီးတွေ ဘယ်လောက်တောင် များပြားနေရတာလဲ"

"ကျွန်တော်က နယ်မြေ ၁၈၈ ကပါ။ အဲ့တာက ပုန်းကွယ်နေတဲ့ ဆရာကြီး မဟုတ်ပါဘူး၊ သူကလည်း စူးစမ်းရှာဖွေသူများ ရဲ့ အဖွဲ့ဝင်တစ်ယောက်ပဲ။ အခု အမှတ်စာရင်းပေါ်က လေးယောက်စလုံးက စူးစမ်းရှာဖွေသူများ ရဲ့ ခေါင်းဆောင်တွေချည်းပဲ"

"ဝါး... စူးစမ်းရှာဖွေသူတွေက တကယ်ကို အစွမ်းထက်တာပဲ"

"တောက်... အဖွဲ့အစည်းတစ်ခုတည်းက တစ်ကမ္ဘာလုံးကို လွှမ်းမိုးထားတာလား။ ဒါက တကယ်ကို ယုတ္တိမရှိဘူး"

ယခင်က သံလက်နက်များ ရောင်းချခြင်းဖြင့် စူးစမ်းရှာဖွေသူများ ၏ အခြေခံအင်အားကို တစ်ကမ္ဘာလုံးအား ပြသနိုင်ခဲ့သည်ဆိုပါက ယခုတစ်ကြိမ်တွင်မူ ၎င်းအဖွဲ့ဝင်များ၏ တစ်ဦးချင်း အင်အားပိုင်းဆိုင်ရာ သန်မာမှုများက နယ်မြေအားလုံးသို့ ပြန့်နှံ့သွားခဲ့ပြီဖြစ်ရာ အလွန်အမင်း ချီးကျူးထောပနာပြုခြင်းကို ခံနေကြရခြင်း ဖြစ်ပေသည်။

"အနည်းဆုံးတော့ နယ်မြေ ၁ က လူက ဒုတိယနေရာကို ယူပြီး သိက္ခာအနည်းငယ် ဆယ်နိုင်ခဲ့သေးတယ်"

"သိက္ခာဆယ်တယ် ဟုတ်လား။ ရှီဝမ်ယွမ်က ငါတို့ နယ်မြေ ၁ က တစ်ကိုယ်တော်ဝံပုလွေ ဆရာမကြီးလေ။ အရင်က ငါတို့နယ်မြေက ခေါင်းဆောင်အဖွဲ့အစည်းတွေက သူမကို ပူးပေါင်းဆောင်ရွက်ဖို့ ငြင်းဆန်ခဲ့လို့ နယ်မြေချန်နယ်မှာ တကယ့်ကို အရှက်ခွဲပြီး စကားနာထိုးခဲ့ကြတာ။ အခုတော့ သူတို့တွေ ကိုယ့်စကားနဲ့ကိုယ် ပြန်ပိတ်ကုန်ကြပြီ။ ဒါတင်မကသေးဘူး... ဒီလို ပဋိပက္ခတွေကြောင့် ရှီဝမ်ယွမ်က သူမရဲ့ တောင်တက်ဗျူဟာ အတွေ့အကြုံတွေကို သူတို့ကို လုံးဝ မမျှဝေပေးခဲ့ဘူး။ သူတို့ဖက်က လူတစ်ယောက်ပဲ တက်နိုင်ခဲ့တာဖြစ်ပြီး အခု သူ့အမည်က မီးခိုးရောင် ပြောင်းသွားခဲ့ပြီ တကယ့်ကို ရယ်ချင်လွန်းလို့ သေတော့မယ်"

"တကယ်လား၊ နယ်မြေ ၁ ရဲ့ အတွင်းပိုင်းက ဒီလောက်အထိ ရှုပ်ထွေးနေတာလား"

"ဒီလို ကြည့်မယ်ဆိုရင်တော့ နယ်မြေ၁၈၈ က တကယ့်ကို သန်မာတာပဲ..."

"ဟေ့လူတွေ... ကိုယ့်အိမ်တွင်းရေး အရှုပ်ထုပ်တွေကိုအပြင်မှာ လာပြီး မပြပါနဲ့ဦး၊ ဒါက နယ်မြေ ၁ အတွက် အရှက်ရစရာ မဟုတ်ဘူးလား။ ခင်ဗျားကော နယ်မြေ ၁ က နေထိုင်သူ ဟုတ်ရဲ့လား"

"ငါကတော့ အဲဒီ စကားနာထိုးတတ်တဲ့ လူတွေကို တကယ် စိတ်ကုန်နေပြီ၊ နယ်မြေ ၁ က ဘာဖြစ်လို့လဲ။ အဲ့တာက နယ်မြေတစ်ခုပဲ မဟုတ်ဘူးလား။ အခွင့်အရေးသာ ရမယ်ဆိုရင်တော့၊ ငါ သစ်ပင်အိမ်မျိုးစေ့ကို ယူပြီး နယ်မြေ ၁၈၈ ဆီကို ချက်ချင်း ပြောင်းရွှေ့တော့မှာ"

"နင် အမည်မဖော်ဘဲ ပြောနေရင် နင့်ကို ရှာမရဘူးလို့ တကယ် ထင်နေတာလား"

"ဟုတ်လား။ ဒါဆိုလည်း လာပြီး ရှာကြည့်လိုက်ဦးလေ"

"နယ်မြေ ၁ က ဒရာမာတွေကတော့ တကယ့်ကို စိတ်ဝင်စားစရာ ကောင်းတယ်"

"အနည်းဆုံးတော့ သူတို့မှာ အမှတ်စာရင်းပေါ် ရောက်တဲ့လူ ရှိသေးတာပဲ။ ငါတို့နယ်မြေကို ကြည့်ဦး၊ ဟင်း... ဘာအရည်အချင်းနဲ့ သူတို့ကို သွားပြီး လှောင်ပြောင်ရမှာလဲ..."

"ငါတို့ နယ်မြေ ၂၃ က လူလည်း မကြာခင် တောင်ထိပ်ကို ရောက်တော့မှာပါ။ စောင့်ကြည့်လိုက်ကြဦး။"

"ငါကတော့ ဂုဏ်ယူဝင့်ကြွားစွာနဲ့ပဲ အော်ဟစ်ရယ်မောလိုက်ပါ့မယ်၊ ဟားဟားဟား"

၎င်းမှာ နယ်မြေ ၁၈၈ က ရှင်ကျန်သူတစ်ဦး၏ စကား ဖြစ်ပေသည်။

"...နယ်မြေ ၁၈၈ ရဲ့ အလံကို ကိုင်ဆောင်ထားရတာ တကယ့်ကို ကျေနပ်စရာ ကောင်းတယ်။အဲ့တာက အဆင့်အတန်း သင်္ကေတတစ်ခုအတိုင်းပဲ"

"နင်ကိုယ်တိုင် တောင်ပေါ်ကို တက်ခဲ့တာလည်း မဟုတ်ဘဲနဲ့ ဘာတွေကို ဒီလောက်အထိ ရယ်မောနေရတာလဲ"

"ငါက ရွှီရှင်း မဟုတ်ဘူးလို့ နင်က ဘယ်လိုနည်းနဲ့ သိတာလဲ။ ငါက ရွှီရှင်းပဲဥစ္စာ။ သတ္တိရှိရင် ငါ့ကို လာပြီး ဆဲကြည့်လိုက်လေ"

"တော်စမ်းပါ... အကယ်လို့ နင်သာ ရွှီရှင်းဆိုရင်တော့၊ ငါက အလင်းတန်းတစ်ခုအဖြစ် ပြောင်းလဲပြီး ကမ္ဘာကြီးကို ကယ်တင်ပြလိုက်မယ်"

ကမ္ဘာလုံးဆိုင်ရာ ချန်နယ်အတွင်းက မြှောက်ပင့် စကားပြောဆိုသံများနှင့် အငြင်းပွားသံများသည် ရွှီရှင်းနှင့် လီဝမ်ရှီးတို့နှစ်ဦးစလုံးကို တစ်ပြိုင်နက်တည်းမှာပင် ရယ်လည်းရယ်ချင်၊ စိတ်လည်းပျက်စရာ ကောင်းလှသည်ဟု ခံစားရစေမိပေသည်။

ထူးခြားသော အခြေအနေများ မရှိသည်ကို မြင်တွေ့ရသဖြင့် ရွှီရှင်းသည် စူးစမ်းရှာဖွေသူများ ချန်နယ်ဆီသို့ ပြန်လည်ပြောင်းလဲလိုက်၏။

ထိုစဉ် ဝမ်ကွေ့ရှင်းက အဖွဲ့အတွင်း၌ ထပ်မံ၍ စကားဆိုလာခဲ့ချေပြီ။

"ငါက စတုတ္ထနေရာလား၊ ဒီရှီဝမ်ယွမ်ဆိုတာက ဘယ်သူလဲ။ နင်တို့နှစ်ယောက်က ငါ့ကို ကျော်တက်သွားတာကတော့ ထားလိုက်ပါတော့၊ အခု နောက်ထပ်တစ်ယောက်က ဘာလို့ ထပ်ပြီး ပေါ်လာရပြန်တာလဲ။ နယ်မြေ ၁ က ဟုတ်လား"

ဝမ်လေ့ - "ကောလာဟလတွေအရဆိုရင်တော့၊ သူမက နယ်မြေ ၁ က တစ်ကိုယ်တော်ဝံပုလွေ ဆရာမကြီးပဲ ကိုယ်ပိုင်အစွမ်းနဲ့တင် တောင်ပေါ်ကို တက်ခဲ့တာဖြစ်လို့ သူမရဲ့ အရည်အချင်းကိုတော့ လျှော့တွက်လို့ မရနိုင်ဘူး"

ချင်ယွန်လုံ - "ပြဿနာမရှိပါဘူး၊ နယ်မြေ ၁ က ငါတို့နဲ့ ဝေးလွန်းလှတာမို့ ဘယ်အချိန်ကျမှ သူတို့နဲ့ ဆုံနိုင်မလဲဆိုတာ ဘယ်သူမှ မသိနိုင်ဘူး"

ကျောက်ရှောင်ချွမ်း - "အဲ့လိုတော့ ပြောလို့မရဘူးလေ။ ဆီးနှင်းတောင်ရဲ့ တယ်လီပို့စနစ်အကြောင်းကို... အစ်ကိုရှင်းနဲ့ အစ်ကိုကျိတို့ မင်းတို့ကို ပြောပြပြီးပြီ မဟုတ်လား၊ အခုဆိုရင် အဲ့တာကို သုံးပြီး အဝေးကြီးကို တယ်လီပို့ လုပ်လို့ ရနေပြီပဲဥစ္စာ"

ကျိချောင်းယန် - "မှန်ပါတယ်၊ ဒါပေမဲ့ လက်ရှိအချိန်မှာတော့ ဆီးနှင်းတောင်တယ်လီပို့စနစ်ကြီး အသက်ဝင်သွားခဲ့ရင်တောင်မှ နယ်မြေအချင်းချင်းကြားမှာပဲ တယ်လီပို့လုပ်နိုင်ဦးမှာ နယ်မြေကြီး ရဲ့ အပြင်ဘက်ကိုတော့ တယ်လီပို့လုပ်လို့ မရသေးပါဘူး"

ဝမ်ကွေ့ရှင်း - "ဒါပေမဲ့ ဒီတယ်လီပို့စနစ်ကို အသက်သွင်းဖို့အတွက် လူသုံးယောက် လိုအပ်တာ မဟုတ်ဘူးလား။ နင်တို့ သုံးယောက်ထဲက ဘယ်သူက တောင်ပေါ်ကို ထပ်ပြီး တက်ချင်သေးလဲ"

ဝမ်လေ့ - "ငါတို့ ဆွေးနွေးပြီးပါပြီ၊ ငါပဲ သွားပါ့မယ်။ ချင်ယွန်လုံတို့ ညီအစ်ကိုတွေက ရေဓာတ်စွမ်းရည်တွေ ရှိကြတာဆိုတော့၊ ဆီးနှင်းတောင်ပေါ် တက်တာက သာမန်လူတွေအတိုင်းပဲ ခက်ခဲလိမ့်မယ်၊ အနည်းဆုံးတော့ ငါက သူတို့ထက်စာရင် ခန္ဓာကိုယ်ပိုင်း ပိုပြီး သန်မာသေးတယ်"

ကျောက်ရှောင်ချွမ်း - "အဲဒီလိုဆိုရင်တော့၊ မင်းတောင်တက်တဲ့အခါ တောင်တက်တဲ့အလုပ်ကိုပဲ အာရုံစိုက်ဖို့ ငါ အကြံပြုချင်တယ်။ ငါ လမ်းခရီးမှာ အနည်းငယ် စူးစမ်းရှာဖွေမိလို့ ၁၂ နာရီ ကန့်သတ်ချက်ကို မမီတော့မလို့ ဖြစ်သွားခဲ့တာ၊ တကယ့်ကို ကြောက်စရာ ကောင်းတယ်..."

ရွှီရှင်းသည် စိတ်ဝင်စားသွားခဲ့ရပြီး "မင်းတို့နှစ်ယောက် ဆီးနှင်းတောင်ပေါ်မှာ ဘာတွေ ကြုံတွေ့ခဲ့ရလဲဆိုတာ ပြောပြပါဦး" ဟု မေးမြန်းလိုက်ပေသည်။

ထို့ကြောင့် ၎င်းတို့နှစ်ဦးစလုံးမှာ မိမိတို့၏ ကြုံတွေ့ခဲ့ရမှုများကို အဖွဲ့အတွင်း၌ စတင်၍ ပြန်လည်ပြောပြကြတော့၏။

ဝမ်ကွေ့ရှင်း - "ငါ့အတွက်ကတော့ ထူးထူးခြားခြား ဘာမှမဖြစ်ခဲ့ပါဘူး။ ဆီးနှင်းတောင်ရဲ့ အလယ်ဗဟိုပိုင်းမှာ ဗီဇပြောင်း ဧရာမငှက်အုပ်ကြီးနဲ့ ကြုံခဲ့ရပေမဲ့ နင်တို့ သိတဲ့အတိုင်း ငါ့အတွက်တော့ ဘာမှမဟုတ်တာမို့ အချိန်အများကြီး မကုန်ခဲ့ပါဘူး။ ငါက ဖြည်းဖြည်းချင်းပဲ တက်ခဲ့တာ၊ ပထမဆုံးအကြိမ် တောင်တက်တာဆိုတော့ အတွေ့အကြုံမရှိလို့ လမ်းမှာ အကြိမ်အနည်းငယ် ချော်လဲခဲ့သေးတယ်၊ ကံကောင်းထောက်မစွာနဲ့ပဲ ကိုယ်ပိုင်အရည်အချင်း ရှိပြီး တွန်းကန်ချိတ်ကို သုံးနိုင်ခဲ့လို့ တကယ်ကြီး ပြုတ်ကျမသွားခဲ့တာ"

ကျောက်ရှောင်ချွမ်း - "ငါကတော့ အစပိုင်းမှာ အတော်လေး မြန်မြန် တက်နိုင်ခဲ့တာ။ ဒါပေမဲ့ တိမ်တိုက်လွှာထဲကို ရောက်တဲ့အခါ ကျောက်ဂူတစ်ခုကို ရှာတွေ့ခဲ့တယ်။ ငါကပူအိုက်နေခဲ့တာမို့ ကျောက်ဂူထဲကို အမြန်ဆုံး ဝင်လိုက်တာပေါ့၊ အထဲမှာ တကယ့်ကို အေးမြနေတာ။ ငါ အထဲကို နက်နက်ထပ်ဝင်ပြီး စူးစမ်းမိတော့ ဂူက တော်တော်လေး နက်နေမှန်း သိလိုက်ရတယ်။ အချိန်လောက်ပါသေးတယ်၊ မကြာခင် တောင်ထိပ်ကို ရောက်မှာပဲဆိုပြီး ဆက်ပြီး စူးစမ်းခဲ့တာပေါ့။ ဒါပေမဲ့ အထဲက လမ်းကြောင်းတွေက တကယ့်ကို ကွေ့ကောက်လွန်းလို့၊ ငါ အပြင်ကို ပြန်ထွက်ဖို့ လမ်းပျောက်ပြီး နှစ်နာရီလောက် အချိန်ကုန်သွားခဲ့ရတယ်"

အခန်း ၄၈၈ ပြီး။