အခန်း ၂၆၀၃

အပိုင်း(၂၆၀၃)

"လူသစ်တွေ ရောက်လာပြီဟေ့..."

ဆူညံပြီး နက်ရှိုင်းကာ မိုးခြိမ်းသံကဲ့သို့ ကျယ်လောင်သော အသံကြီးတစ်ခုက နားစည်ကွဲမတတ် ထွက်ပေါ်လာခဲ့သည်။ မှန်စင်မြင့်ကြီး တုန်ခါသွားပြီး စင်ပေါ်ရှိ လူတိုင်းမှာ အသံလာရာဆီသို့ အကြည့်များကို ပို့လွှတ်လိုက်ရင်း ချက်ချင်းပင် သတိဝီရိယ အပြည့် ရှိသွားကြ၏။

အခြားအသံတစ်ခုကလည်း တွဲဖက်ထွက်ပေါ်လာခဲ့သည်။ ထိုအသံမှာ မနက်ရှိုင်းသော်လည်း စူးရှပြီး တူညီစွာ ကျယ်လောင်နေ၏။

"အိုး... နေ့ထူးနေ့မြတ်ပဲ... အသားစိမ်းတွေ ထပ်ရောက်လာပြန်ပြီ..."

၎င်းသည် မိန်းမသံဖြစ်သော်လည်း ၎င်းအတွင်း လွှမ်းမိုးထားသော ပဲ့တင်သံသည် သမားရိုးကျ လိင်ပိုင်းဆိုင်ရာ သတ်မှတ်ချက်များအားလုံးထက် ကျော်လွန်နေခဲ့သည်။

ထိုအသံပိုင်ရှင်များဖြစ်သော လူရိပ်နှစ်ခုသည် သူတို့ဆီသို့ လျှောက်လှမ်းလာကြသည်။ ပထမတစ်ဦးမှာ ကျောက်သင်ပုန်း တစ်ခုကို ကိုင်ဆောင်ထားသော လူငယ်တစ်ဦးဖြစ်ပြီး ပညာရှင်ဆန်သော တိုက်ခိုက်ရေးသမား တစ်ဦး သို့မဟုတ် နည်းဗျူဟာမှူး တစ်ဦး၏ အငွေ့အသက်များကို ထုတ်လွှတ်နေ၏။ သူသည် အပေါ့စား သံချပ်ကာကို ဝတ်ဆင်ထားပြီး ၎င်းအောက်တွင် ဖြူဖျော့ဖျော့ ချည်သားအဝတ်အစားကို ဝတ်ဆင်ထားသည်။ သူ၏ ခန္ဓာကိုယ်မှာ သွယ်လျသော်လည်း ကြွက်သားများ ထွက်ပေါ်နေပြီး အရပ်ရှည်ကာ ငွေရောင်ကိုင်းပါသော မျက်မှန်ဝိုင်းလေးကို တပ်ဆင်ထားသည်။

အခြားတစ်ဦးမှာမူ အမျိုးသမီးတစ်ဦး ဖြစ်သည်။ သူမသည် အတော်လေး ပုပြတ်ပြီး သေးသွယ်ကာ လူသားမျိုးနွယ် အမျိုးသမီးများ၏ ပျမ်းမျှအရပ်အောက်တွင် ရှိနေသည်။ သူမသည် ပုံမှန်ထက် သွယ်လျလွန်းသော်လည်း သူမအရပ်၏ နှစ်ဆခန့်ရှိသော ငွေရောင် စစ်ပွဲသုံး သံတူကြီးကို ကျောပေါ်တွင် ကန့်လန့်ဖြတ် လွယ်ထား၏။ သူမသည် ခြေလှမ်းလေးလံစွာ လျှောက်လှမ်းလာပြီး ခြေလှမ်းတိုင်းမှ ကြောက်မက်ဖွယ်ကောင်းသော ဆွဲငင်အားကို ထုတ်လွှတ်နေသည်။ သူမ၏ ဆံပင်များကို ဘေးတစ်ဖက်တစ်ချက်စီတွင် ဆံပင်နှစ်ခွ စည်းနှောင်ထားပြီး လေထဲတွင် ယိမ်းနွဲ့နေ၏။

သူမသည် သတ္တုများ လုံးဝမပါဝင်ဘဲ ချည်သားသီးသန့်ဖြင့် ပြုလုပ်ထားသော ကိုယ်ကြပ် သိုင်းဝတ်စုံကို ဝတ်ဆင်ထားသည်။ တင်းကျပ်စွာ စည်းနှောင်ထားသောကြောင့် ရင့်ကျက်သည့် ဆွဲဆောင်မှုကို ပေးစွမ်းနေသော သူမ၏ ပြည့်ဖြိုးမောက်ကြွားနေသည့် ရင်သားများသာ မရှိလျှင် သူမကို အသက်အလွန်ငယ်သော မိန်းကလေးတစ်ဦးဟု အထင်မှားနိုင်ပေသည်။

သူတို့နှစ်ဦးစလုံးသည် လူသားမျိုးနွယ် လျှို့ဝှက် အာဏာရှင်များ ဖြစ်ကြသည်။ ဒုတိယ တစ်ဦးမှာ သေမျိုး တစ်ပိုင်း အရှင် တစ်ဦးဖြစ်ပြီး သူမ၏ ခန္ဓာကိုယ်သည် လျှို့ဝှက် လမ်းစဉ် နှင့် အပြစ်အနာအဆာကင်းစွာ ပေါင်းစပ်နေ၏။ သူမသည် မြေကြီးရှန့်ထို အဆင့်သို့ ရောက်ရှိကာ လျှို့ဝှက် အာဏာရှင် အဆင့် ၏ အလယ်အလတ်အဆင့် ကျင့်ကြံသူများ၏ အတန်းအစားထဲသို့ ဝင်ရောက်ရန် နီးစပ်နေပြီ ဖြစ်ကြောင်း ထင်ရှားသည်။ သို့သော် ပထမတစ်ဦးမှာမူ လျှို့ဝှက် ဝိညာဉ် အဆင့် တွင်သာ ရှိနေသေး၏။

သူတို့ ရောက်ရှိလာချိန်တွင် ဝေ့ဝူယင် က အကဲခတ်လိုက်သည်။ သူတို့သည် ယခင်က သူတွေ့ဆုံခဲ့ဖူးသူများထက် ပို၍ အားနည်းကြ၏။ အမျိုးသား ကိုင်ဆောင်ထားသော ကျောက်သင်ပုန်းသည် ယခင် သူစတင်ရောက်ရှိလာစဉ်က တွေ့ဆုံခဲ့ဖူးသော တိုက်တန် ဖြစ်သည့် ကပ္ပတိန်ကျွင်း ကို သတိရသွားစေသည်။

သူသည် ၎င်းကို တပ်ဖြန့်ချထားမှုများနှင့် အခြားသော ကိစ္စရပ်များနှင့် ပတ်သက်သည့် သတိပေးချက်များ လက်ခံရယူရန် အသုံးပြုခြင်း ဖြစ်၏။ သူ ပထမဆုံးအကြိမ် ရောက်ရှိလာစဉ်က သူ၏လမ်းစဉ်သည် ခြားနားသင့်သည်ဟု သူခံစားခဲ့ရသည်။ သို့သော် ကပ္ပတိန်ကျွင်းက သူ့ကို စစ်သည် အမှတ်အသား လျှို့ဝှက် သင်္ကေတ တစ်ခု ပေးအပ်ခဲ့သောကြောင့် သူသည် တပ်ဖြန့်ချထားသည့် တပ်ရင်းတစ်ခုနှင့်အတူ စစ်မြေပြင်သို့ အတင်းအကျပ် ဝင်ရောက်ခဲ့ရ၏။

ဤအရာမှာ မရည်ရွယ်ဘဲ ဖြစ်ပေါ်ခဲ့သော အမှားတစ်ခုဖြစ်ပြီး အများအားဖြင့် သူ၏အမှားသာ ဖြစ်ပေသည်။ သူသည် စတင်ရောက်ရှိချိန်၌ အဂ္ဂိရတ် ပညာရှင် တစ်ဦးအဖြစ် မိမိကိုယ်ကို မိတ်ဆက်မည့်အစား မဟာစက်ဝန်း ကြယ်ကွင်းပြင် နှင့် ထာဝရ ဧကရာဇ် တို့နှင့် ပတ်သက်သည့် မေးခွန်းများကိုသာ မေးမြန်းခဲ့သည်။ ယခု ထိုအချိန်ကို ပြန်လည်အမှတ်ရလာသောအခါ စစ်ဝိညာဉ်များ ကို အသုံးပြုခြင်းဖြင့် လက်နက်များ၊ အစီအရင်များ၊ သိုင်းပညာများနှင့် ကျင့်ကြံခြင်း ကျင့်စဉ်များကိုသာမက အဂ္ဂိရတ် ထုတ်ကုန်များ၊ အစီအရင်များနှင့် ဝင်္ကပါများအတွက် ပုံစံထုတ်မှုများကိုပါ ရရှိနိုင်ကြောင်း ကပ္ပတိန်ကျွင်း က ရှင်းပြခဲ့သည်ကို သတိရသွား၏။ သို့တိုင်အောင် ထိုစာရင်းထဲတွင် အဂ္ဂိရတ် သို့မဟုတ် အဂ္ဂိရတ် ထုတ်ကုန်များနှင့် သက်ဆိုင်သော မည်သည့် ကျင့်ကြံခြင်း ကျင့်စဉ် ကိုမျှ သူ မတွေ့ခဲ့ရပေ။

ထိုအဖြစ်အပျက်များကို ပြန်လည်တွေးတောကြည့်မိသောအခါ သူ၏ ငယ်ရွယ်စဉ်ကာလက အခြေအနေနှင့်အညီ စီးမျောလိုက်ပါရခြင်းကို အနည်းငယ် ပို၍ သဘောကျခဲ့ကြောင်း မတွေးဘဲ မနေနိုင်ခဲ့ပေ။ ဝေ့ဝူယင်၏ နှုတ်ခမ်းထက်တွင် အပြုံးတစ်ခု ပေါ်လာခဲ့၏။ ထိုအချိန်က သူသည် ကြယ်ကွင်းပြင် အတွင်း၌ပင် သူ၏အမည်နာမကို အမှန်တကယ် အခိုင်အမာ မတည်ဆောက်နိုင်သေးသော သာမန်လူတစ်ယောက်မျှသာ ဖြစ်ခဲ့သည်။ စစ်မြေပြင်တွင် ပါဝင်ဆင်နွှဲပြီးနောက် သူ၏ အဆင့်အတန်းနှင့် စွမ်းအားများသည် ယခင်က မကြုံဖူးလောက်အောင် ပြိုင်ဘက်ကင်းစွာ ပေါက်ကွဲထွက်ပေါ်လာခဲ့၏။ သူသည် အထွတ်အထိပ် တည်ရှိမှုများနှင့် ရင်ဆိုင်နိုင်ရုံသာမက ပိုမိုကြီးမားသော ဂလက်ဆီ အဆင့်သို့ပါ ဝင်ရောက်နိုင်ခဲ့ပေသည်။

ယခု ဤအဆင့်သို့ ဝင်ရောက်လာချိန်တွင်မူ သူသည် ခွန်အားနှင့် ဗဟုသုတတို့ဖြင့် ကျောထောက်နောက်ခံပြုထားသော ယုံကြည်မှုကို ခံစားနေရပြီ ဖြစ်သည်။

မည်မျှ လန်းဆန်းဖွယ် ကောင်းလိုက်သနည်း။

ယခင်ကကဲ့သို့ပင် လူနှစ်ဦး ရောက်ရှိလာခဲ့၏။ ဤသည်မှာ ပုံမှန်လုပ်ရိုးလုပ်စဉ်တစ်ခုဖြစ်ရာ အင်ဂျလီကာ သည် သူမ၏ အသက်ရှူနှုန်းကို ထိန်းညှိပြီး အဝတ်အစားများကို သပ်ရပ်စွာ ပြင်ဆင်လိုက်သည်။ ထို့နောက် ခိုင်မာသော ခြေလှမ်းများဖြင့် ရှေ့သို့ လျှောက်လှမ်းလာကာ ဝေ့ဝူယင် ၏ ဘေးတွင် ရပ်လိုက်၏။ သူမက ဝေ့ဝူယင် ဘက်သို့ လှည့်ကြည့်ကာ ရိုသေစွာ ပြုံးပြလိုက်သည်။ သို့သော် သူမ၏ ရင်တွင်း၌မူ ခံစားချက်များ ပြင်းထန်စွာ ဆူပွက်နေခဲ့၏။

ဤမျှ ကြောက်မက်ဖွယ်ကောင်းသော တည်ရှိမှုဖြစ်သည့် အမျိုးသားတစ်ဦးသည် ကြယ်တာရာ စစ်မြေပြင် သို့ မည်သို့ ဝင်ရောက်လာခဲ့သနည်း။ သူမသည် ဤအမှန်တရားကို အလွယ်တကူ လက်မခံနိုင်ခဲ့ပေ။ ထို့ကြောင့် သူမ၏ အကောင်းဆုံး ပုံရိပ်ကို ပြသနိုင်ရန် ကျေနပ်ဖွယ် အပြုံးတစ်ခုအောက်တွင် သူမ၏ မယုံကြည်နိုင်မှုများကို ဖုံးကွယ်ထားလိုက်ရ၏။ အလွန်တရာ မြင့်မားလှသော ကျင့်ကြံခြင်းအဆင့် ရှိနေပါလျက် ကြယ်တာရာ စစ်မြေပြင် သို့ ခိုးဝင်လာခဲ့သည့် အပေါ် ဖော်ထုတ်ခြင်း မပြုရန် သူမ သို့မဟုတ် အခြားသူများထံ သတိပေးချက်တစ်ခုခု ရောက်လာမည်လားဟု သူမ တွေးတောနေမိသည်။

သူမ၏ ကစဉ့်ကလျား အတွေးများကို ကြားလိုက်ရသောအခါ ဝေ့ဝူယင်သည် ရယ်မောချင်စိတ် ဖြစ်ပေါ်လာခဲ့သည်။ ထိုမိန်းကလေး၏ စိတ်အား ဖတ်ရှုရခြင်း အပေါ် ဝေ့ဝူယင် မည်သည့် ဝန်လေးမှုမှ မရှိခဲ့ချေ။

"မင်္ဂလာပါ... စစ်ပွဲ ကြီးကြပ်သူများရှင့်..."

အင်ဂျလီကာ ဘိုင်ရာ၏ မိသားစုသည် ဤ စည်းမျဉ်းနှင့် စစ်ပွဲ ကြယ်တာရာ ဝင်ရောက်ခွင့် ကို နှစ်ပေါင်းများစွာကြာ ကြီးကြပ်လာခဲ့ကြသည်။ ထို့ကြောင့် ဤသူနှစ်ဦး၏ အမည်နာမများကို ကောင်းစွာ သိရှိထားကြ၏။ သူတို့သည် ဝင်ရောက်ခွင့် ကြီးကြပ်သူများ ဖြစ်ကြပြီး တစ်ဦးက စစ်ပွဲ ဝင်ရောက်ခွင့်ကို ကြီးကြပ်ကာ အခြားတစ်ဦးက စည်းမျဉ်း ဝင်ရောက်ခွင့်ကို ကြီးကြပ်ရသည်။ ထိုနေရာတွင် ဝင်ရောက်ရန် အသက်အန္တရာယ်ရှိသော စစ်မြေပြင် နှစ်ခု ရှိပေသည်။

"အိုး..."

ကျောက်သင်ပုန်းကို ကိုင်ဆောင်ထားသော လူငယ်က အာမေဍိတ်သံ ပြုလိုက်သည်။ သူက အင်ဂျလီကာ ဘိုင်ရာ၏ ခါးတွင် ချိတ်ဆွဲထားသော အဆောင် ကို စိုက်ကြည့်ရင်း မေးလိုက်၏။

"မင်းက ဘိုင်ရာ မိသားစု ကလား..."

အံ့အားသင့်သွားသော်လည်း သူမက ပြုံးပြလိုက်သည်။ ကြယ်ကွင်းပြင် ကို ဦးဆောင်နေသော မိသားစုတစ်ခုနှင့် ထိုက်တန်သည့် တည်ငြိမ်သော အမူအရာကို ပြသရင်း သူမက ပြန်လည်မေးခွန်းထုတ်လိုက်၏။

"ကြီးကြပ်သူ မင်းကြီးက ကျွန်မရဲ့ မိသားစုနဲ့ ရင်းနှီးလို့လားရှင်..."

"ဟားဟား... မင်းက ဟုတ်နေတာပဲကိုး..."

လူငယ်က ရယ်မောလိုက်သည်။ သို့သော် ထိုရယ်သံထဲတွင် အငြိုးအတေး အငွေ့အသက်များ ပါဝင်နေ၏။ မကောင်းဆိုးဝါး ရည်ရွယ်ချက်များ တောက်ပနေသော မျက်ဝန်းများနှင့်အတူ သူက နူးညံ့ပြီး ကြိုဆိုနေဟန်ရှိသော အပြုံးတစ်ခုကို ပြသလိုက်သည်။ ထို့နောက် သူက စတင်ကာ မေးခွန်းများ ထုတ်တော့သည်။ ထိုစကားဝိုင်းမှ တစ်ဆင့် ဤအမျိုးသားသည် သူမ၏ မိသားစုအပေါ် အငြိုးထားနေကြောင်း အင်ဂျလီကာ သဘောပေါက်သွားသည်မှာ ထင်ရှားပေသည်။

"..."

တစ်ချိန်တည်း၌... ဝေ့ဝူယင်၏ ဂရုမစိုက်မှုမှာ အမြင့်ဆုံးသို့ ရောက်ရှိနေခဲ့သည်။ ကောင်းကင် တာအိုများ က အင်ဂျလီကာ ဘိုင်ရာ၏ လမ်းစဉ်ပေါ်တွင် ထားရှိရန် ရည်ရွယ်ထားသော အခက်အခဲများကို သူ ဂရုမစိုက်ပေ။ ဤလူငယ်သည် ထင်ရှားသော အပြစ်သား တစ်ဦး ဖြစ်၏။ သူသည် ရိတ်သိမ်းရန် အသင့်ဖြစ်နေသော ကမ္မ ဂျုံပင် တစ်ပင် သို့မဟုတ် အင်ဂျလီကာ ၏ လမ်းစဉ်ကို ဖြတ်တောက်မည့် အတားအဆီး တစ်ခုပင် ဖြစ်ပေသည်။

ဝေ့ဝူယင်သည် ပြင်းထန်သော ရုပ်ပိုင်းဆိုင်ရာ အော်ရာကို ထုတ်လွှတ်နေသည့် ပုပြတ်ပြတ် အမျိုးသမီးကို အကဲခတ်ကြည့်လိုက်သည်။ သူမကလည်း ဝေ့ဝူယင် ကို ပြန်လည်အကဲခတ်နေ၏။ ဤနေရာရှိ လူများအားလုံးထဲတွင် ဝေ့ဝူယင် သည် ရုပ်ရည်သွင်ပြင်သာမက သူ၏ တည်ရှိမှုနှင့် မျက်ဝန်းများကြောင့်ပါ ထင်ရှားပေါ်လွင်နေခဲ့သည်။

သူ့ထံမှ ပြင်းထန်သော အဂ္ဂိရတ် အော်ရာများ ထွက်ပေါ်နေပြီး အစွမ်းကုန် သန့်စင်ခြင်း မြူခိုး မျှင်တန်းလေးများသည် သူ၏ ဝတ်ရုံလက်စများနှင့် ခန္ဓာကိုယ်၏ သိမ်မွေ့သော လှုပ်ရှားမှုများကြားမှ ထွက်ပေါ်လာကာ လေထဲသို့ ပျောက်ကွယ်သွားကြ၏။ ၎င်းသည် အရည်အသွေးအားဖြင့် အဆင့်(၁) သာ ရှိသော်လည်း ဤအံ့မခန်း မြင်ကွင်းက သူ၏ ထူးကဲသော အဂ္ဂိရတ် စွမ်းရည်ကို ဖော်ပြနေပေသည်။

"နင်..."

သူမက စိတ်ဝင်တစားရှိသော မျက်ဝန်းများဖြင့် ထောက်ပြကာ မေးလိုက်သည်။

"နင်က စည်းမျဉ်း စစ်မြေပြင် အတွက် ရောက်လာတာလား..."

သူမက မေးခွန်းထုတ်လိုက်သော်လည်း အဖြေကိုမူ ကြိုတင်သိရှိပြီး ဖြစ်နေ၏။ ဝေ့ဝူယင် အသုံးပြုခဲ့သော အဂ္ဂိရတ် ကြယ်တာရာများသည် သူမ၏ ဗဟုသုတ နယ်ပယ်ထက် ကျော်လွန်နေခဲ့သည်။ ၎င်းမှာ ထူးခြားသော အဂ္ဂိရတ် သက်ရောက်မှု တစ်ခုကို ဖန်တီးရန် အဂ္ဂိရတ် ကြယ်တာရာများ ၏ စွမ်းအားကို အသုံးချထားသော တမူထူးခြားသည့် မျက်လုံး အစီအရင် တစ်ခုဟု သူမ ယူဆထားခဲ့၏။

ဝေ့ဝူယင်သည် ဟိုးယခင်တုန်းက ကပ္ပတိန်ကျွင်း ကဲ့သို့ပင် စစ်ပွဲ စစ်မြေပြင် အတွက် ဝင်ရောက်ခွင့် ကြီးကြပ်သူကို လှမ်းကြည့်လိုက်ပြီး တိုက်ရိုက် ဝန်ခံလိုက်သည်။

"ဟုတ်တယ်..."

"ကောင်းတယ်... ဖန်တီးခြင်း ပညာရှင်တွေ ရဲ့ စည်းမျဉ်းတွေအရ သတ်မှတ်ထားတဲ့ နင့်ရဲ့ အဆင့်က ဘယ်လောက်လဲ..."

သူမက မေးလိုက်သည်။

ထိုအချိန်တွင် အင်ဂျလီကာ ဘိုင်ရာ သည် သူတို့၏ စကားဝိုင်းကို ကျွမ်းကျင်စွာ ထိန်းကျောင်းနေသောကြောင့် လူငယ်မှာ အလွန်အမင်း စိတ်ပျက်ကာ ဒေါသထွက်လုနီးပါး ဖြစ်နေ၏။ သူသည် ဟန်ဆောင်မျက်နှာဖုံးကို ဆွဲခွာပစ်တော့မည့် အခြေအနေသို့ ရောက်ရှိနေပြီး ဗိုလ်ချုပ် ဗွန်းကိန်း ကလည်း ဘေးမှနေ၍ သွေးထိုးလှုံ့ဆော်ပေးနေသည်။

"အားလုံးပဲ ပါးစပ်ပိတ်ထားကြစမ်း..."

ဝေ့ဝူယင် က ပေါ့ပါးစွာ အမိန့်ပေးလိုက်သည်။

ချက်ချင်းပင် လူငယ်၊ အင်ဂျလီကာ နှင့် ဗွန်းကိန်း တို့၏ ပါးစပ်များ ပိတ်လှောင်ခံလိုက်ရ၏။ ဤ ကောင်းချီးခံ နှင့် အပြစ်သား တို့၏ အငြင်းပွားမှုအတွက် သူ့တွင် သည်းခံနိုင်စွမ်း မရှိတော့ပေ။

"..."

ပုပြတ်ပြတ် အမျိုးသမီးမှာ အံ့အားသင့်သွားခဲ့သည်။ သူ ထုတ်လွှတ်လိုက်သော ဝိညာဉ်အင်အား မျှင်တန်းလေးသည် အတားအဆီးမရှိဘဲ ထိုနေရာရှိ လူအားလုံးအပေါ်သို့ တိုက်ရိုက် ကန့်သတ်ချက်များ ချမှတ်လိုက်ခြင်း ဖြစ်၏။ တီးတိုးရေရွတ်သံများ သို့မဟုတ် သဲ့သဲ့မျှသော အသက်ရှူသံများကိုပင် မကြားရတော့ချေ။ ဤအချိန်၌ သူမ၏ နှလုံးခုန်သံကိုသာ ကြားနိုင်တော့သည်။

'ဝိညာဉ်သခင်လား...'

***