အခန်း (၉၄၅-၉၄၆)

အခန်း ၉၄၅ ကောင်းကင်ဖြတ်သန်းသူများ

သူသည် အချိန်ကာလကို လက်ဝါးကြီးအုပ်ထားပြီး အိုမင်းရင့်ရော်မှုအား ပိတ်လှောင်ထားကာ အချိန်ကာလတစ်ခုနှင့် လှပသော အမှတ်တရများကို သူနှင့်အတူ သိမ်းဆည်းထားခဲ့သည်။

စုမင် နဝမမျိုးနွယ်စုမှ ထွက်ခွာလာခဲ့ပြီးနောက် ငါးနှစ်မြောက်တွင်...

နဂါးငွေ့တန်း အတွင်း၌ တစီစီမြည်သံများ ပဲ့တင်ထပ်သွားပြီး ခေါင်းနှစ်လုံး ကင်းမြီးကောက် အုပ်ကြီး တစ်အုပ်သည် ရှေ့သို့ တဟုန်ထိုး ပြေးဝင်လာကြသည်။ သူတို့သည် သူတို့ရှေ့တွင် အလွန်အမင်း စုတ်ပြတ်သတ်ပြီး သနားစရာကောင်းလောက်အောင် ထွက်ပြေးနေရသည့် ပုံရိပ်နှစ်ရိပ် နောက်သို့ လိုက်နေခြင်း ဖြစ်သည်။

ထိုသူတို့မှာ အမျိုးသားတစ်ဦးနှင့် အမျိုးသမီးတစ်ဦးဖြစ်သည့် စုမင်နှင့် ရွှီဟွေ့တို့ပင် ဖြစ်သည်။

"ဒီလမ်းကို မရွေးသင့်ဘူးလို့ ငါ နင့်ကို စောစောကတည်းက ပြောသားပဲ"

"မင်းက ဒီလမ်းထဲ ရောက်သွားမှ ပြောတာလေ"

"ငါ မဟုတ်ပါဘူး"

သူတို့နှစ်ဦး ထွက်ပြေးနေစဉ် ရွှီဟွေ့၏ မြည်တွန်တောက်တီးသံများသည် ဟင်းလင်းပြင်ထဲတွင် ပဲ့တင်ထပ်နေသည်။ သူတို့၏ အသံများ အဝေးသို့ တဖြည်းဖြည်း မှေးမှိန်သွားသည်နှင့် ကင်းမြီးကောက်အုပ်ကြီး၏ စူးရှသော အော်ဟစ်သံများနှင့်အတူ သူတို့၏ ပုံရိပ်များသည်လည်း မြင်ကွင်းမှ တဖြည်းဖြည်း ပျောက်ကွယ်သွားခဲ့တော့သည်။

ခုနစ်နှစ်မြောက်တွင်...

"ငါတို့ရဲ့ ပုံရိပ်တွေကို နဂါးငွေ့တန်းရဲ့ ဝိညာဉ်ထဲမှာ အမှတ်အသားပြုထားခဲ့တယ်။ ဒါမှ အဲဒီနဂါးငွေ့တန်းက ငါတို့ကို မှတ်မိနေမှာ" ဤစကားလုံးများသည် စုမင်နှင့် ရွှီဟွေ့ဟူသော အမျိုးသားနှင့် အမျိုးသမီးကြောင့် ထိုလှပသော အချိန်ကာလ၏ လှိုင်းတွန့်များအဖြစ်သို့ ပြောင်းလဲသွားခဲ့သည်။

ဒေါသတကြီး ဟိန်းဟောက်သံများသည် နဂါးငွေ့တန်း တစ်ခုလုံးကို တုန်လှုပ်သွားစေသည်။ ယခင်က ဟင်းလင်းပြင်ကျယ်ထဲတွင် ပုန်းအောင်းနေခဲ့သည့် ဧရာမ သားရဲကြီး သုံးကောင်သည် လူနှစ်ယောက်ကို ဝိုင်းရံလျက် ဟိန်းဟောက်ကာ ကူးခတ်နေကြသည်။ အမျိုးသမီး၏ မျက်နှာသည် ဖြူလျော်နေပြီး အမျိုးသား၏ လက်ကို တင်းကျပ်စွာ ဆုပ်ကိုင်ထားသည်။

"ဒါ နင်ပေးတဲ့ အကြံဉာဏ်ကို နားထောင်ပြီးမှ ငါတို့ ရွေးခဲ့တဲ့လမ်းနော်"

"ငါပြောတာ တခြားလမ်းကိုပါ"

"မဟုတ်ပါဘူး..."

စုမင်က ခေါင်းခါလိုက်သည်။ သူ မျက်လုံးများကို မှိတ်လိုက်သောအခါ အိစန်း ပုံရိပ်ယောင်က ထင်ရှားလာပြီး ဟင်းလင်းပြင်ထဲရှိ သားရဲကြီး သုံးကောင် တုန်လှုပ်ခြောက်ခြားသွားသည့် အခိုက်အတန့်တွင် သူသည် ရွှီဟွေ့၏ လက်ကိုဆွဲကာ အဝေးသို့ အလျင်အမြန် ထွက်ခွာသွားခဲ့သည်။

ဆယ်နှစ်မြောက်တွင်...

ရွှီဟွေ့သည် ကျယ်ပြောသော နဂါးငွေ့တန်းထဲတွင် လေဟာနယ်ထဲမှ ထွက်လာသည့်အလား ရုတ်တရက် ပေါ်လာခဲ့သည်။ သူမ၏ မျက်နှာတွင် စိုးရိမ်ပူပန်မှုများ ပြည့်နှက်နေပြီး ပေါ်လာသည်နှင့်တစ်ပြိုင်နက် သူမသည် ခေါင်းကို ချက်ချင်းငုံ့လိုက်သည်။ သူမ၏ မျက်လုံးထဲရှိ စိုးရိမ်စိတ်များသည် အလွန် ထင်ရှားနေသည်။

သူမ အသက်ရှူလိုက်တိုင်း အချိန်များက တရွေ့ရွေ့ ကုန်ဆုံးသွားသည်။ ရွှီဟွေ့၏ အမူအရာက ဆက်တိုက် ပြောင်းလဲနေပြီး သူမသည် အံကို တင်းတင်းကြိတ်လိုက်သည်။ သူမသည် ဝဲဂယက်ထဲသို့ လှမ်းဝင်တော့မည့် အချိန်တွင်ပင် လက်တစ်ဖက်က ဟင်းလင်းပြင်ထဲမှ ရုတ်တရက် ဆန့်ထွက်လာခဲ့သည်။ ရွှီဟွေ့သည် ၎င်းကို လျင်မြန်စွာ ဖမ်းဆွဲပြီး အပြင်သို့ အားကုန် ဆွဲထုတ်လိုက်သည်။

သူမသည် စုမင်ကို ဝဲဂယက်ထဲမှ ချက်ချင်း ဆွဲထုတ်လိုက်ခြင်း ဖြစ်သည်။ သူသည် အလွန် သနားစရာကောင်းလောက်အောင် စုတ်ပြတ်နေသော်လည်း သူ့ဘယ်လက်ထဲတွင်မူ အမည်းရောင် အမွှေးအမျှင် တစ်ဆုပ်ကို ဆုပ်ကိုင်ထားသည်။ ထိုအမွှေးအမျှင်များသည် ပြင်းထန်စွာ လောင်ကျွမ်းနေသော်လည်း စုမင်က ၎င်းကို လွှတ်မချခဲ့ပေ။

"အဲဒါ ကံကြမ္မာနဲ့ သေခြင်းရှင်ခြင်း အရှင်သခင်အဆင့်နဲ့ ညီမျှတဲ့ စွမ်းအားကြီး သားရဲကြီးလေ။ နင်... နင်ကတော့..." ရွှီဟွေ့က ဒေါသတကြီး ချက်ချင်း ပြောလိုက်သည်။

"ကံကြမ္မာနဲ့ သေခြင်းရှင်ခြင်း အရှင်သခင် ဖြစ်တော့ရော ဘာဖြစ်လဲ" စုမင်က ပြုံးလိုက်သော်လည်း ဤအပြုံးကြောင့် ခန္ဓာကိုယ်အတွင်းရှိ ဒဏ်ရာများကို ပိုမိုဆိုးရွားသွားစေသည်။ သို့သော် သူ့လက်ထဲရှိ အမည်းရောင် အမွှေးအမျှင်များကို မြင်သောအခါ သူက ကျယ်လောင်စွာ ရယ်မောနေဆဲ ဖြစ်သည်။

"ငါ ဒီဝဲဂယက်ကို သုံးပြီး နေရာရွှေ့ပြောင်းလို့ မရတော့ဘူး။ ဒါပေမဲ့ ငါ နောက်တစ်ကြိမ် ထပ်သုံးဖို့ ရွေးချယ်တဲ့အခါကျရင် မင်းကို ငါ သေချာပေါက် အမိဖမ်းပြမယ်" စုမင်သည် သူ့ခြေအောက်ရှိ ဟင်းလင်းပြင်ကို ငုံ့ကြည့်လိုက်သည်။ ထိုနေရာတွင် ဝဲဂယက်တစ်ခု ရှိနေပြီး အဝေးမှ ဒေါသတကြီး ဟိန်းဟောက်သံများ ထွက်ပေါ်လာနေသည်။

ဆယ့်သုံးနှစ်မြောက်တွင်...

နဂါးငွေ့တန်း အတွင်း၌ ပေလေးသောင်းခန့်ရှိသော ဟင်းလင်းပြင် သားရဲကြီး တစ်ကောင် ရှိနေသည်။ ထိုသားရဲသည် မိကျောင်းတစ်ကောင်နှင့် တူသော်လည်း အနီးကပ် သေချာကြည့်မည်ဆိုလျှင် ၎င်းသည် ဟင်းလင်းပြင်နှင့် တစ်သားတည်း ပေါင်းစပ်နိုင်သော သားရဲတစ်ကောင် ဖြစ်ကြောင်း တွေ့ရပေမည်။

သို့သော် ထိုအချိန်တွင် ထိုသားရဲကြီး၏ ဦးခေါင်းထိပ်ပေါ်၌ တဲတစ်လုံး ရှိနေသည်။

ထိုတဲအတွင်းမှ အလင်းရောင်များ ပျံ့လွင့်နေသည်။ ထိုနေရာတွင် ပုလဲလုံးတစ်လုံး ရှိပြီး အလင်းရောင်ကို ထုတ်လွှတ်နေခြင်း ဖြစ်သည်။ ထိုတဲအောက်တွင် စုမင်က တင်ပျဉ်ခွေထိုင်ကာ ကျင့်ကြံနေပြီး ရွှီဟွေ့သည်လည်း ဘေးနားတွင် ထိုနည်းတူ ကျင့်ကြံနေသည်။

လွန်ခဲ့သော သုံးနှစ်တာ ကာလအတွင်း သူတို့သည် ဤသားရဲကြီးကို မည်သို့မဆို အမိအရ ဖမ်းဆီးခဲ့သဖြင့် သူတို့၏ ခရီးစဉ်တွင် အခက်အခဲများစွာ လျော့နည်းသွားခဲ့ကြောင်း ရှင်းလင်းသည်။ သို့သော် လက်ရှိ ဟင်းလင်းပြင် သားရဲကြီး၏ သနားစရာကောင်းသော ပုံစံကို ကြည့်ခြင်းအားဖြင့် သူသည် အဖမ်းခံရသည့် နှစ်အတွင်း အလွန်အမင်း နှိပ်စက်ခံခဲ့ရကြောင်း ထင်ရှားပေသည်။

တိတ်ဆိတ်နေသော နဂါးငွေ့တန်းထဲတွင် ညည်းတွားသံများ ပဲ့တင်ထပ်နေသည်။ ထိုအသံများသည် ဟင်းလင်းပြင် သားရဲကြီးထံမှ လာခြင်းဖြစ်ပြီး အော်သံသည် ပို၍ပင် အရေးတကြီး ဖြစ်လာကာ နောက်ဆုံးတွင် နားမခံသာလောက်အောင် စူးရှလာခဲ့သည်။

"အစာကျွေးရမယ့် အချိန်ရောက်ပြီ။ စုမင် အစာ သွားကျွေးလိုက်ဦး" ရွှီဟွေ့က မျက်လုံးဖွင့်လိုက်သည်။

"အမြဲတမ်း ငါချည်းပဲ။ ဒီတစ်ခါတော့ မင်း သွားကျွေးလိုက်"

"ဒါက ငါ့ရဲ့ အိမ်မွေးတိရစ္ဆာန်လေ။ ငါ ဖမ်းထားတာ" ရွှီဟွေ့က ဝင့်ကြွားစွာ ကြေညာလိုက်သည်။

စုမင် တိတ်ဆိတ်သွားသည်။ အတန်ကြာမှ သူက ခေါင်းခါလျက် မတ်တပ်ရပ်ကာ တဲအပြင်သို့ လျှောက်သွားခဲ့သည်။

ခဏအကြာတွင် ညည်းတွားသံများ ပျောက်ကွယ်သွားသည်။ စုမင် တဲထဲသို့ ပြန်ရောက်လာသောအခါ ပြုံးစိစိဖြစ်နေသော ရွှီဟွေ့ကို မြင်လိုက်ရသဖြင့် သူက ချောင်းတစ်ချက် ဟန့်လိုက်သည်။

"ထူးဆန်းတယ်..." သူက ဤစကားနှစ်လုံးကိုသာ ပြောပြီး ခေါင်းခါကာ ဆက်မပြောတော့ပေ။

"ဘာက ထူးဆန်းတာလဲ" ရွှီဟွေ့က ဇဝေဇဝါဖြင့် မေးလိုက်သည်။

"ဘာမှမဟုတ်ဘူး" စုမင် မျက်လုံးပြန်မှိတ်လိုက်သည်။

ရွှီဟွေ့ မျက်တောင်ခတ်လိုက်ပြီး ထပ်မေးပြန်သည်။ "ဘာက ထူးဆန်းတာလဲလို့"

"မင်း တကယ် သိချင်လို့လား" စုမင်က မျက်လုံးမှိတ်ထားလျက်ပင် ပြောလိုက်သည်။

"ပြောပါ၊ မြန်မြန် ပြော"

"လွန်ခဲ့တဲ့ နှစ်တွေအတွင်းမှာ ဒီဟင်းလင်းပြင် သားရဲပေါ်မှာ မှဲ့တွေ ဒီလောက်အများကြီး ထွက်လာတာကို ငါ ထူးဆန်းနေလို့" သူက တည်ငြိမ်သော မျက်နှာဖြင့် ပြောလိုက်သည်။ ပြောပြီးသည်နှင့် သူ့စိတ်ကို ကျင့်ကြံခြင်းထဲသို့ အာရုံစိုက်လိုက်ပြီး ရွှီဟွေ့၏ အမူအရာကို လှည့်မကြည့်တော့ပေ။

ဆယ့်ခုနစ်နှစ်မြောက်တွင်...

နတ်ဘုရား အနှစ်သာရ ကြယ်ပင်လယ် အတွင်းပိုင်း အစွန်အဖျားတွင် ဧရာမ ကွင်းပြင်ကြီး တစ်ပြင် ရှိပြီး ယင်းကို အဝေးမှ ရှင်းလင်းစွာ မြင်တွေ့နိုင်သည်။ ထိုကွင်းပြင်ကြီးသည် အဆုံးအစမရှိ တောက်ပနေသော ကြယ်ပျက်များဖြင့် ဖွဲ့စည်းထားခြင်း ဖြစ်သည်။ ၎င်းတို့သည် အတူတကွ စုစည်းကာ စက်ဝိုင်းပုံစံ ဖြစ်ပေါ်နေပြီး ဤနေရာကို ကြယ်တာရာ စီးဆင်းခြင်း တစ်ခုကဲ့သို့ ထင်မှတ်ရစေသည်။

ထိုနေရာတွင် မြူနှင်းပါးပါး ဖုံးလွှမ်းနေပြီး မရေမတွက်နိုင်သော ဂြိုဟ်များနှင့်အတူ ရှိနေသောကြောင့် ဤမြင်ကွင်းကို ပထမဆုံး မြင်လိုက်ရသူတိုင်း စွဲမက်သွားကြပေမည်။ သို့သော် ထိုမြင်ကွင်းကို အချိန်အတော်ကြာ စိုက်ကြည့်နေမည်ဆိုပါက ထိုစက်ဝိုင်းပုံသဏ္ဍာန် ကြယ်တာရာ စီးဆင်းခြင်း အတွင်းရှိ မြူနှင်းများထဲတွင် ပုံသဏ္ဍာန်များ ရှိနေပြီး ၎င်းတို့သည် ကြောက်မက်ဖွယ် သားရဲကြီးများ၏ ပုံရိပ်များကို ဖန်တီးနေကြောင်း သတိပြုမိလာကာ မြင်ရသူတိုင်း ထိတ်လန့်သွားကြလိမ့်မည်။

"ငါတို့ နတ်ဘုရားအနှစ်သာရ ကြယ်ပင်လယ်ရဲ့ အတွင်းပိုင်းကို နောက်ဆုံးတော့ ရောက်ခဲ့ပြီ" စုမင်သည် ဟင်းလင်းပြင် သားရဲကြီးပေါ်တွင် ရပ်လျက် အဝေးသို့ လှမ်းကြည့်လိုက်သည်။ သူ့ဘေးတွင်မူ ရွှီဟွေ့က တည်ငြိမ်လေးနက်သော မျက်နှာဖြင့် ရှိနေသည်။

သူမသည် ခဏမျှ တိတ်ဆိတ်နေပြီးမှ တိုးတိုးလေး ပြောလိုက်သည်။ "ကောင်းကင်ဖြတ်သန်းသူများ၊ သုစရိုက်မြစ်တွယ်သူများ၊ ရန်ဝူ မျိုးနွယ်စုနဲ့ မြေမှုန်မီးရှို့သူများ ဆိုတာ နတ်ဘုရားအနှစ်သာရ ကြယ်ပင်လယ်ရဲ့ အတွင်းပိုင်းမှာ ရှိတဲ့ လေးစားဖွယ်ရာ မျိုးနွယ်စုကြီး လေးခုပဲ။ သူတို့က နှစ်ပေါင်းများစွာကတည်းက တည်ရှိနေခဲ့တာ။ ငါတို့ရဲ့ စွမ်းအားနဲ့ဆိုရင် အဲဒီလူမျိုးစုတွေရဲ့ အုတ်မြစ်ကို လှုပ်ခါဖို့ အလွန် ခက်ခဲလိမ့်မယ်။ ဒါမှမဟုတ် မဖြစ်နိုင်ဘူးလို့တောင် ပြောလို့ရတယ်"

"ငါတို့ မကြိုးစားကြည့်ဘဲနဲ့တော့ သိမှာမဟုတ်ဘူးလေ" စုမင်က ခပ်ဖွဖွ ပြုံးလိုက်သည်။ သူ့ညာလက်ကို မြှောက်ပြီး ပုတ်လိုက်သောအခါ သိုလှောင်အိတ်ထဲမှ ကျောက်စိမ်းပြား တစ်ပြားက လက်ထဲတွင် ချက်ချင်း ပေါ်လာခဲ့သည်။ ၎င်းကို သေချာစွာ စိစစ်ကြည့်ရှုပြီးနောက် သူက ရွှီဟွေ့ထံသို့ ကမ်းပေးလိုက်သည်။

"ငါ မင်းကို အရင်က ပြောခဲ့တဲ့ အစီအစဉ်အတိုင်း မြေပုံပေါ်မှာ ငါ အမှတ်အသားလုပ်ထားတဲ့ နေရာမှာ ငါ့ကို စောင့်နေပါ။ ပြီးတော့ တစ်လကြာတဲ့အခါ အဲဒီ မှော်သင်္ကေတကို အသက်သွင်းလိုက်" စုမင်က ရွှီဟွေ့ကို ဘေးတစောင်း လှည့်ကြည့်လိုက်သည်။

သူမ ခေတ္တ ဝေခွဲမရဖြစ်နေပြီးမှ ခေါင်းမော့ကာ သူ့ကို ကြည့်လိုက်သည်။ "ငါ နင်နဲ့အတူ လိုက်ချင်တယ်"

"မင်း လိုက်ခဲ့ရင် နေရာရွှေ့ပြောင်းခြင်း မှော်သင်္ကေတကို ဘယ်သူက အသက်သွင်းမှာလဲ" စုမင်က ခေါင်းခါလိုက်သည်။

"ဒါဆို နင့်ရဲ့ အစီအစဉ် အပြည့်အစုံကို ငါ့ကို ပြောပြ။ ဘာဖြစ်လို့ သတ်မှတ်ထားတဲ့ နေရာမှာ တစ်လအကြာမှာ နေရာရွှေ့ပြောင်းခြင်း မှော်သင်္ကေတကို အသက်သွင်းဖို့ လိုအပ်နေရတာလဲ" ရွှီဟွေ့က စုမင်ကို စိုက်ကြည့်လိုက်သည်။

"ငါတို့နဲ့ အနီးဆုံးမှာ ရှိနေတဲ့ ကောင်းကင်ဖြတ်သန်းသူတွေကို ကြီးမားတဲ့ လက်ဆောင်တစ်ခု ပေးချင်လို့ပါ။ အစီအစဉ်က သတ်မှတ်ပြီးသားပဲ" စုမင်က တည်ငြိမ်စွာ ပြောလိုက်သည်။ လှုပ်ရှားမှုတစ်ခုနှင့်အတူ သူသည် အဝေးသို့ တဟုန်ထိုး ပြေးဝင်သွားသည့် အလင်းတန်း တစ်တန်းအဖြစ် ပြောင်းလဲသွားခဲ့သည်။ မျက်စိတစ်မှိတ်အတွင်း သူသည် အဝေးသို့ ရောက်ရှိသွားခဲ့ပြီး ဟင်းလင်းပြင် သားရဲကြီးနှင့်အတူ ရွှီဟွေ့ကို ချန်ထားခဲ့ကာ သူမက အဝေးသို့ ထွက်ခွာသွားသော သူ့အား ငေးကြည့်ကျန်ရစ်ခဲ့သည်။

ရွှီဟွေ့ ခဏမျှ တိတ်ဆိတ်နေပြီးမှ ဟင်းလင်းပြင် သားရဲကြီးနှင့်အတူ ဟင်းလင်းပြင်ထဲသို့ ပေါင်းစပ်ဝင်ရောက်သွားခဲ့သည်။ သူတို့သည် မည်သည့် အစအနမျှ မချန်ဘဲ ပျောက်ကွယ်သွားခဲ့ပြီး စုမင်၏ တောင်းဆိုချက်အရ မြေပုံပေါ်တွင် အမှတ်အသားပြုထားသော နေရာသို့ ဦးတည်သွားခဲ့ကြသည်။

စုမင်သည် နတ်ဘုရား အနှစ်သာရ ကြယ်ပင်လယ် အတွင်းပိုင်းကို ဖြတ်ကျော်ကာ တဟုန်ထိုး ပြေးထွက်လာခဲ့သည်။ သူ ရှေ့သို့ ပြေးဝင်သွားစဉ် နတ်ဘုရား အာရုံကို ထိုနေရာတစ်ခုလုံးသို့ ဖြန့်ကြက်ထားခဲ့သည်။ သူ့ပတ်ဝန်းကျင်ရှိ အရာအားလုံးသည် အလွန် စိမ်းသက်နေသည်။ အမှန်တကယ်တွင် စူမင်က နတ်ဘုရား အာရုံကို အပြင်သို့ ဖြန့်ကြက်လိုက်သောအခါ ထိုနေရာ၍ ဟင်းလင်းပြင် သားရဲကြီးများစွာ ရှိနေကြောင်း ခံစားသိရှိနိုင်သော်လည်း သူတို့အနက် အများစုမှာ နှစ်ခြိုက်စွာ အိပ်ပျော်နေကြသည်။ သူတို့သည် အပြင်သို့ ထွက်ခဲသဖြင့် သူ လှမ်းကြည့်လိုက်သောအခါ ပတ်ဝန်းကျင်တစ်ခုလုံး တိတ်ဆိတ်နေခြင်း ဖြစ်သည်။

"ကောင်းကင်ဖြတ်သန်းသူများ..." စူမင်၏ မျက်လုံးထဲတွင် အလင်းတစ်ချက် လက်သွားပြီး တိကျိုမိုရှား၏ ကျောက်စိမ်းပြားထဲတွင် ပါရှိသော ကောင်းကင်ဖြတ်သန်းသူများအကြောင်း ဖော်ပြချက်များသည် သူ့ခေါင်းထဲတွင် ပေါ်လာခဲ့သည်။

ဤသည်မှာ ကောင်းကင်ဘုံကို ကိုးကွယ်သည့် မျိုးနွယ်စု တစ်စု ဖြစ်သည်။ ထိုမျိုးနွယ်စုကို လူပေါင်း တစ်သိန်းကျော်ဖြင့် ဖွဲ့စည်းထားပြီး သူတို့သည် ရှေးဦးကျသော လူနေမှုဘဝဖြင့် နေထိုင်ကြကာ ကောင်းကင်ယံကို သူတို့၏ အထွတ်အထိပ်အဖြစ် သတ်မှတ်ကြသည်။ သူတို့ ကျင့်ကြံသည့် နတ်ဘုရား စွမ်းရည်များနှင့် ပညာရပ်များသည် အခြား ကျင့်ကြံသူများနှင့် လုံးဝ ကွဲပြားခြားနားသည်။ သူတို့သည် မာန်မျိုးနွယ်များနှင့် ရှားမန်များ၏ ပညာရပ်များနှင့် အနည်းငယ် ဆင်တူသော်လည်း သူတို့၌ ကိုယ်ပိုင် ကျင့်ကြံခြင်း စနစ်တစ်ခု ရှိသည်။

သို့သော် ကျင့်ကြံခြင်းစနစ် ခွဲဖြာမှုများ မည်မျှပင် ရှိစေကာမူ နောက်ဆုံးတွင်မူ တစ်ခုတည်းအဖြစ်သို့ ပြန်လည် ဆုံစည်းကြမည်သာ ဖြစ်သည်။ အစပိုင်းတွင် ကွဲပြားနေသော်လည်း တစ်စုံတစ်ယောက်က ကျင့်ကြံခြင်း အဆင့်တစ်ဆင့်သို့ ရောက်ရှိသွားပါက သူတို့သည် လမ်းကြောင်း တစ်ခုတည်းကိုသာ လျှောက်လှမ်းကြရမည် ဖြစ်သည်။ ဤလူမျိုးစုတွင်လည်း လကပ်ဘေးအဆင့်၊ နေကပ်ဘေးအဆင့်နှင့် ကံကြမ္မာနှင့် သေခြင်းရှင်ခြင်း အရှင်သခင်အဆင့် ကျင့်ကြံသူများ ရှိကြသည်။

သူတို့က ကောင်းကင်ဘုံ၏ အလိုတော်ကို ယုံကြည်ကြပြီး ကောင်းကင်အား သူတို့၏ နတ်ဘုရားအဖြစ် ကိုးကွယ်ကြသည်။ ကောင်းကင် တည်ရှိနေသရွေ့ သူတို့က သေဆုံးမည် မဟုတ်ဘဲ နဂါးငွေ့တန်းကို ပြောင်းလဲနိုင်သည်ဟု ယုံကြည်ကြသည်။ စုမင်၏ မျက်လုံးများ တောက်ပလာပြီး သူ့အရှိန်က ပိုမို မြန်ဆန်လာခဲ့သည်။

သူတို့က အပြာရောင် ဝတ်ရုံရှည်များကို ဝတ်ဆင်ကြသည်။ အဘယ်ကြောင့်ဆိုသော် အပြာရောင်က သူတို့အတွက် ကောင်းကင်၏ သင်္ကေတဖြစ်သောကြောင့် ထိုအရောင်ကို သူတို့ အလွန် နှစ်သက်ကြခြင်း ဖြစ်သည်။ သူတို့တွင် လူဦးရေ များစွာ ရှိပြီး ဤနေရာက ပတ်ဝန်းကျင်သည် အပြင်လောကနှင့် ကွဲပြားခြင်းကြောင့် ကောင်းကင်ဖြတ်သန်းသူများတွင် အတောင်ပံများ ရှိကြသည်။ စုမင်၏ မျက်လုံးထဲရှိ ပြင်းထန်သော အေးစက်မှုက ပိုမို အားကောင်းလာခဲ့သည်။

အတောင်ပံများ ရှိသဖြင့် ကောင်းကင်ဖြတ်သန်းသူများသည် ကောင်းကင်၏ အရှင်သခင်များ ဖြစ်ကြသည်။

တိကျိုမိုရှား၏ ကျောက်စိမ်းပြားထဲက မှတ်တမ်းများသည် လွန်ခဲ့သော နှစ်ပေါင်း တစ်ထောင်က မှတ်တမ်းများသာ ဖြစ်သည်။ အချိန်များ ဤမျှ ကုန်လွန်သွားပြီးနောက် ကောင်းကင်ဖြတ်သန်းသူများ မည်မျှထိ ကြီးထွားလာမှန်း မသိရပေ။ နှစ်ပေါင်း တစ်ထောင် ဟူသည်ကား များစွာ မကြာသေးသော်ငြား မျိုးနွယ်စု တစ်စုအတွက် ပုံမှန်မဟုတ်သည့် အရာများ ဖြစ်ပေါ်လာဖို့ မလုံလောက်သော်ငြား...

"ဒါပေမဲ့ ငါ့ရဲ့ အစီအစဉ်ကို ပြီးပြည့်စုံစေဖို့အတွက် သူတို့ကို စမ်းသပ်မှုတွေကနေ တစ်ဆင့် လေ့လာရဦးမယ်" စူမင်က အေးစက်စွာ ပြုံးလိုက်သည်။ လှုပ်ရှားမှုတစ်ခုနှင့်အတူ သူ့အရှိန်က ဆထက်ထမ်းပိုး မြင့်တက်သွားပြီး နေရာရွှေ့ပြောင်းလိုက်ပြီးနောက် သူသည် မယုံနိုင်လောက်အောင် ဝေးကွာသော အကွာအဝေးတစ်ခုသို့ ရောက်ရှိသွားခဲ့သည်။

ရက်အနည်းငယ်အကြာတွင် သူသည် နတ်ဘုရား အနှစ်သာရ ကြယ်ပင်လယ် အတွင်းပိုင်းသို့ ဝင်ရောက်ခဲ့ပြီး မြေပုံပေါ်တွင် ပြသထားသည့်အတိုင်း ကောင်းကင်ဖြတ်သန်းသူများ၏ နယ်မြေထဲသို့ ရောက်ရှိလာခဲ့သည်။

တိကျိုမိုရှား၏ နားလည်မှုအရ ကောင်းကင်ဖြတ်သန်းသူများသည် နတ်ဘုရား အနှစ်သာရ ကြယ်ပင်လယ်၏ အရှေ့မြောက်ပိုင်းတွင် ကျင့်ကြံခြင်းဂြိုဟ် ၁၇၃ လုံးနှင့် မျောလွင့်တိုက်ကြီး ၅,၂၀၀ နီးပါးကို ထိန်းချုပ်ထားသည်။ သူတို့ ပိုင်ဆိုင်သော နယ်မြေသည် နတ်ဘုရား အနှစ်သာရ ကြယ်ပင်လယ်၏ တစ်သောင်းပုံ တစ်ပုံခန့်သာ ရှိသော်လည်း ဤနယ်မြေသည် ကောင်းကင်ဖြတ်သန်းသူများအား မဟာ မျိုးနွယ်စုကြီး လေးခုအနက် တစ်ခုအဖြစ် လူသိများစေရန် လုံလောက်ပေသည်။

အဆုံးစွန်တွင် သူတို့သည် နတ်ဘုရား အနှစ်သာရ ကြယ်ပင်လယ်၏ အတွင်းပိုင်းတွင် နေထိုင်ရဲကြသော မဟာ မျိုးနွယ်စုကြီး လေးခုအနက် တစ်ခုဖြစ်ပြီး ဤသည်မှာ အပြင်လောကက သိထားသော အချက်ဖြစ်သည်။ အဘယ်ကြောင့်ဆိုသော် ဤနေရာတွင် ကြောက်မက်ဖွယ် သားရဲကြီးများစွာ ရှိနေသောကြောင့် ဖြစ်သည်။ မျိုးနွယ်စုများနှင့် နှိုင်းယှဉ်ပါက ထိုသားရဲကြီးများ၏ အရေအတွက်နှင့် စွမ်းအားက မျိုးနွယ်စုများထက် များစွာ သာလွန်လှပေသည်။

ဤနေရာတွင် အန္တရာယ်အရှိဆုံး တည်ရှိမှုများမှာ ထိုမျိုးနွယ်စုများ မဟုတ်ဘဲ ကြောက်မက်ဖွယ် သားရဲကြီးများသာ ဖြစ်ကြသည်။

"လေးစားဖွယ်ရာ လူမျိုးစုကြီး လေးခုက နတ်ဘုရား အနှစ်သာရ ကြယ်ပင်လယ်ရဲ့ အတွင်းပိုင်း ပတ်ပတ်လည်မှာ ပျံ့နှံ့နေကြတာ။ သူတို့က တစ်ခုနဲ့တစ်ခု အရမ်း နီးကပ်ကြတယ်။ ကောင်းကင်ဖြတ်သန်းသူတွေနဲ့ သုစရိုက်မြစ်တွယ်သူတွေက အတွင်းပိုင်းရဲ့ အနောက်မြောက်နဲ့ အရှေ့တောင် အရပ်တွေမှာ တည်ရှိကြတာ"

"မြေမှုန်မီးရှို့သူတွေကတော့ ဗဟိုနဲ့ ပိုနီးတယ်။ အဆန်းကြယ်ဆုံး ဖြစ်တဲ့ ရန်ဝူမျိုးနွယ်စုကတော့ ဗဟိုချက်တည့်တည့်မှာ နေထိုင်ကြပြီး သူတို့က စွမ်းအားကြီးတဲ့ သားရဲကြီးတွေနဲ့အတူ ယှဉ်တွဲတည်ရှိနေကြတာ"

"ဒီလူမျိုးစုကြီး လေးခုမှာ သူတို့အချင်းချင်း ဆက်သွယ်နိုင်တဲ့ နည်းလမ်းရှိကြပြီး စည်းကမ်းချက်တွေ ရှိကြတယ်။ ဒါကြောင့်မို့လို့ ကောင်းကင်ဖြတ်သန်းသူတွေက ငါ့ရဲ့ ပထမဆုံး ပစ်မှတ်ပဲ"

"မင်းတို့တွေ လွန်ခဲ့တဲ့ အချိန်တုန်းက ငါ့ဆရာကို လိုက်ပြီး သတ်ခဲ့ကြတယ်။ အခုတော့ ငါ စုက မင်းတို့ကို ပြန်ပေးဆပ်ခိုင်းဖို့ ရောက်လာပြီ"

သတ်ဖြတ်လိုသော အငွေ့အသက်များသည် စူမင်၏ မျက်လုံးထဲတွင် တောက်ပနေသည်။ လှုပ်ရှားမှုတစ်ခုနှင့်အတူ သူသည် ရှေ့တွင် ရှိနေသော အမည်းရောင် ကျင့်ကြံခြင်းဂြိုဟ် တစ်လုံးဆီသို့ တဟုန်ထိုး ပြေးဝင်သွားခဲ့သည်။

ဤဂြိုဟ်ကို အပြင်ဘက် ကောင်းကင်ဂြိုဟ်ဟု လူသိများပြီး ၎င်းသည် ကောင်းကင်ဖြတ်သန်းသူများ နယ်မြေ၏ အပြင်ဘက်ဆုံး အလွှာတွင် တည်ရှိသည်။

ဘုန်း...

စုမင်သည် ကြယ်တံခွန် တစ်စင်းကဲ့သို့ လှုပ်ရှားလျက် ထိုဂြိုဟ်ဆီသို့ တဟုန်ထိုး ပြေးဝင်သွားခဲ့သည်။ သူ အနီးသို့ မရောက်မီမှာပင် ကောင်းကင်ယံသို့ ပျံ့လွင့်သွားသော ဧရာမ လှိုင်းလုံးကြီးများကို လှုံ့ဆော်လိုက်ပြီး နဂါးငွေ့တန်း တစ်ခုလုံးသို့ ပျံ့နှံ့သွားသည့် လှိုင်းတွန့်များအား ဖြစ်ပေါ်စေခဲ့သည်။ ထိုလှိုင်းတို့က ထိုနေရာ တစ်နေရာလုံးကို တုန်လှုပ်သွားစေပြီး ကျယ်လောင်သော ပေါက်ကွဲသံကြီးများ ထွက်ပေါ်လာစေခဲ့တော့သည်။

ဤပြင်းထန်သော အသံများသည် တုန်ခါလှိုင်းများအဖြစ်သို့ ပြောင်းလဲသွားပြီး ထိုဂြိုဟ်ဆီသို့ ချက်ချင်း ကျရောက်သွားကာ ဂြိုဟ်ပေါ်ရှိ ရာသီဥတုကို ပြောင်းလဲသွားစေခဲ့သည်။ ပြင်းထန်သော လေပြင်းများ တိုက်ခတ်လာပြီး မြေပြင်များ တုန်ခါလာကာ ပင်လယ်ပြင်များ လှိုင်းထန်လာပြီး သစ်ပင်ကြီးများမှာလည်း အမြစ်မှ ပြတ်ထွက်ကုန်ကြတော့သည်။

အခန်း ၉၄၆ အပြင်ဘက် ကောင်းကင်ဂြိုဟ်သို့ ခြေချခြင်း

အပြင်ဘက် ကောင်းကင်ဂြိုဟ် တစ်ဂြိုဟ်လုံးတွင် အစိမ်းရောင်များ ဖုံးလွှမ်းနေသည်။ မည်သူမဆို လှမ်းကြည့်လိုက်ပါက မြေပြင်တစ်ခုလုံးကို သစ်တောများ ဖုံးလွှမ်းထားပြီး အဆုံးအစ မရှိသည်ကို မြင်တွေ့ရမည် ဖြစ်သည်။ ထိုနေရာတွင် ပေထောင်ပေါင်းများစွာ မြင့်မားသော သစ်ပင်ကြီးများစွာ မတ်မတ် ရပ်တည်နေကြသည်။

အဝေးမှ ကြည့်လျှင် ဧရာမ သစ်ပင်ထိပ်ဖျားများသည် မြေပြင်ပေါ်တွင် ရပ်နေသည့် ဘီလူးကြီးများနှင့် တူနေသည်။

ပေတစ်သောင်းကျော် မြင့်သော သစ်ပင်ကြီးများလည်း ရှိသေးသည်။ မည်သူမဆို ထိုအပင်များကို မြင်လိုက်သည်နှင့် ရှေးဟောင်း သဘာဝတန်ဖိုးကို စိတ်ထဲ၌ အလိုအလျောက် ခံစားမိသွားမည် ဖြစ်သည်။

အောက်ဘက် အဝေးဆီတွင်မူ ဧရာမ ပြာလဲ့လဲ့ ပင်လယ်ကြီး တစ်စင်း ရှိသည်။ လှိုင်းတံပိုးများ လိမ့်ဆင်းလာသောအခါ ပင်လယ်ကြမ်းပြင်၌ အဆုံးမရှိသော သစ်ပင်ကြီးများ ယိမ်းနွဲ့နေသကဲ့သို့ ထင်ရသည်။

ဤဂြိုဟ်သည် ဝိညာဉ်အငွေ့အသက်များ ပြည့်နှက်နေသော ကျင့်ကြံခြင်းဂြိုဟ် တစ်လုံး ဖြစ်သည်။ ကမ္ဘာ့အနှစ်သာရမှာ အလွန် ထူထပ်လှသဖြင့် ဂြိုဟ်ပေါ်ရှိ သက်ရှိအားလုံးသည် မွေးဖွားလာချိန်မှစ၍ သဘာဝအလျောက် အားအင် အနည်းငယ်ကို ပိုင်ဆိုင်ထားကြသည်။

ဤနေရာတွင် မြို့ပြများ မရှိသလို မည်သည့် မျိုးနွယ်စုကိုမျှလည်း မတွေ့ရပေ။ ခြိမ်းခြောက်မှု မရှိသော ငြိမ်းချမ်းသည့် ဂြိုဟ်တစ်လုံးဟု ထင်ရသော်လည်း သေချာစွာ အနီးကပ် ကြည့်မည်ဆိုလျှင် ဧရာမ သစ်ပင်ကြီးများ၏ အကိုင်းအခက်များအောက်၌ သစ်သားအိမ်များကို တွေ့ရပေမည်။

အတောင်ပံပါသော ပုံရိပ်အချို့သည် သစ်သားအိမ်များကြား၌ ရံဖန်ရံခါ လှုပ်ရှားသွားလာနေကြသည်။

သို့သော် ဤငြိမ်းချမ်းတိတ်ဆိတ်မှု အားလုံးသည် ကောင်းကင်ယံမှ ဟိန်းထွက်လာသော မိုးခြိမ်းသံများကြောင့် လျင်မြန်စွာ ပျက်စီးသွားရတော့သည်။ ပေါက်ကွဲသံကြီးများ နေရာအနှံ့ ထွက်ပေါ်လာသည်။ မြေပြင် တုန်ခါသွားပြီး သစ်ပင်များ ပြင်းထန်စွာ ယိမ်းနွဲ့ကာ အတော်များများမှာ အပိုင်းပိုင်း ပြတ်ထွက်ကုန်သည်။ အဝေးရှိ ပင်လယ်ပြင်မှာ ဟိန်းဟောက်သွားပြီး လှိုင်းလုံးကြီးများ ဆူညံစွာ ထကြွလာသည်။

သစ်သားအိမ်များ အတွင်းရှိ အတောင်ပံပါသော ပုံရိပ်များသည် ခေါင်းများကို ချက်ချင်း မော့လိုက်ကြသည်။ သူတို့၏ မျက်လုံးအရောင်မှာ အဝါနုရောင် ရှိသော်လည်း ကောင်းကင်ကို ကြည့်လိုက်သည့် ခဏမှာပင် နီရဲသွားကြသည်။

အတောင်ပံပါသူ အားလုံးထံမှ ရက်စက်ကြမ်းကြုတ်သော အငွေ့အသက်များ ပေါက်ကွဲထွက်ပေါ်လာသည်။

ထို့နောက် လေထုထဲတွင် ဟိန်းဟောက်သံများ ပဲ့တင်ထပ်သွားသည်။ သူတို့၏ အသံများ ပေါင်းစပ်သွားကာ အထက်မှ ကျလာသော အသံကို ပြန်လည် တိုက်ခိုက်လိုသည့်အလား ကောင်းကင်ယံသို့ တဟုန်ထိုး တက်သွားသည့် စူးရှသော အသံတစ်သံအဖြစ် ပြောင်းလဲသွားသည်။

ပေါက်ကွဲသံကြီးများက ကောင်းကင်နှင့် မြေကြီးကို တုန်လှုပ်သွားစေပြီး ထိုအချိန်တွင် ကောင်းကင်၌ ကြယ်တံခွန် တစ်စင်း ပေါ်လာသည်။ ထိုကြယ်တံခွန်သည် လမ်းကြောင်း တစ်လျှောက်ရှိ အရာအားလုံးကို ဖျက်ဆီးပစ်လိုသည့်အလား အလင်းတန်းရှည် တစ်တန်းအဖြစ် ပြောင်းလဲသွားသည်။ ၎င်းသည် ရှေ့သို့ တဟုန်ထိုး ပြေးဝင်လာပြီး မြေပြင်ဆီသို့ တိုက်ရိုက် ဦးတည်လာသည်။

ထိုအလင်းတန်းရှည် ပေါ်လာမှုကြောင့် သစ်ပင်များအောက်ရှိ ကောင်းကင်ဖြတ်သန်းသူ မျိုးနွယ်စုဝင်များ၏ မျက်လုံးများ နီရဲသွားသည်။ တစ်ချိန်တည်းမှာပင် သူတို့သည် အပေါ်သို့ လျင်မြန်စွာ ပျံတက်သွားကြသည်။ သူတို့က အတောင်ပံများကို ခတ်ကာ ကြယ်တံခွန် ကျရောက်မည့် နေရာဆီသို့ တဟုန်ထိုး ပြေးဝင်သွားကြသည်။

ကောင်းကင်ဖြတ်သန်းသူ မျိုးနွယ်စု ပိုင်ဆိုင်သော နယ်မြေ၏ အပြင်ဘက်ဆုံး အလွှာရှိ ဂြိုဟ်တွင် တပ်စွဲထားသည့် အစောင့်အကြပ်များ ဖြစ်သည့်အားလျော်စွာ သူတို့သည် တိုက်ပွဲများနှင့် ရင်းနှီးကျွမ်းဝင်ပြီး အရိုးထဲအထိ စွဲမြဲနေသော ရက်စက်ကြမ်းကြုတ်မှုကို ပိုင်ဆိုင်ထားကြသည်။ ပုံမှန် အခြေအနေများတွင် သူတို့သည် နဂါးငွေ့တန်းထဲသို့ ရံဖန်ရံခါ အမဲလိုက် ထွက်လေ့ရှိကြသည်။

အကယ်၍ သူတို့၏ ဂြိုဟ်ထဲသို့ ကျူးကျော်ဝင်ရောက်လာလောက်အောင် မိုက်မဲသော ကြောက်မက်ဖွယ် သားရဲကြီး တစ်ကောင် တကယ် ရှိခဲ့လျှင် ထိုသားရဲအတွက် တစ်ခုတည်းသော ရလဒ်မှာ သူတို့၏ ဝမ်းဗိုက်ထဲမှ အစာ ဖြစ်သွားရန်သာ ရှိပေမည်။

အမှန်တကယ်တွင် အခြား နဂါးငွေ့တန်းမှ မျိုးနွယ်စုဝင်များ သို့မဟုတ် နတ်ဘုရား အနှစ်သာရ ကြယ်ပင်လယ်မှ မဟုတ်သော ကျင့်ကြံသူများသည် သူတို့၏ ဂြိုဟ်ပေါ်သို့ ရံဖန်ရံခါ ကျူးကျော်ဝင်ရောက်လေ့ ရှိသော်လည်း ဤလူများသည်လည်း အပိုင်းပိုင်း ဆွဲဖြဲခံရပြီး အရှင်လတ်လတ် စားသောက်ခံခဲ့ရသည်။

ဤနေရာတွင် တပ်စွဲထားသော စစ်သည်တိုင်းနီးပါးသည် ယခင်က ဤကဲ့သို့ လုပ်ခဲ့ဖူးပြီး ကျင့်ကြံသူများ၏ သွေးသား အသားအရေ၏ နူးညံ့သော အရသာကို အလွန်အမင်း နှစ်သက်ကြသည်။

ရာပေါင်းများစွာသော ကောင်းကင်ဖြတ်သန်းသူ မျိုးနွယ်စုဝင်များသည် အလွန် မြန်ဆန်သော အရှိန်ဖြင့် သွားလာနေကြသည်။ သူတို့ ရှေ့သို့ ပြေးဝင်သွားစဉ် ပေတစ်သောင်းအထိ မြင့်မားသော ဧရာမ သစ်ပင်ကြီးထဲမှ အဘိုးအို နှစ်ဦး ပျံသန်းထွက်ပေါ်လာသည်။ ထိုနှစ်ဦးသည် အပြာရောင် ဝတ်ရုံရှည်များကို ဝတ်ဆင်ထားသည်။ သူတို့မှာ အိုမင်းသော ရုပ်သွင်များ ရှိပြီး ကမ္ဘာမြေပြင် နယ်ပယ် နှောင်းပိုင်း၏ အရှိန်အဝါများ သူတို့ထံမှ ပျံ့လွင့်နေသည်။

"ကောင်းကင်ဖြတ်သန်းသူ မျိုးနွယ်စုရဲ့ နယ်မြေကို ကျူးကျော်သူမှန်သမျှ သေရမယ်"

အဘိုးအို တစ်ဦးက နှာမှုတ်သံ တစ်ချက် ပြုလိုက်သည်။ သူ ညာလက်ကို မြှောက်ကာ ရှေ့သို့ ဝှေ့ယမ်းလိုက်သည်။ သူ့ရှေ့ရှိ သစ်တောသည် ချက်ချင်း တရှဲရှဲ မြည်လာပြီး လေထဲတွင် သစ်ရွက်များဖြင့် ပြုလုပ်ထားသော ဧရာမ လက်ဝါးကြီး တစ်ဖက်အဖြစ် ဖန်တီးလိုက်သည်။ ၎င်းသည် ရှေ့သို့ တိုးထွက်သွားပြီး ကြယ်တံခွန် ရှိရာနေရာဆီသို့ တဟုန်ထိုး ပြေးဝင်သွားသည်။

ဘုန်း...

ကြယ်တံခွန် မြေပြင်ပေါ်သို့ ကျရောက်လာသောအခါ ကျယ်လောင်သော ပေါက်ကွဲသံကြီးများက မြေပြင်ကို တုန်လှုပ်သွားစေသည်။ ကျယ်လောင်သော အသံကြီးနှင့်အတူ တုန်ခါလှိုင်း တစ်လှိုင်းက ထိုနေရာ တစ်ဝိုက်သို့ တိုက်ခတ်သွားကာ မြေကြီးများကို ပင့်တင်လိုက်ပြီး သစ်ပင်များစွာအား အမြစ်မှ ပြတ်ထွက်သွားစေကာ တုန်ခါနေသော မြေပြင်မှ ဟိန်းဟောက်သံများသည် အဝေးသို့ ပျံ့နှံ့သွားသည်။ ထို့နောက် မြေပြင်ပေါ်တွင် ပေါ်လာသော တွင်းကြီးထဲမှ စုမင် ဖြည်းညှင်းစွာ မတ်တပ်ရပ်လာသည်။

လူရိုင်းဝတ်စုံကို ဝတ်ဆင်ထားပြီး ဆံပင်များ လေထဲတွင် လွင့်ဝဲနေသော သူ့ပုံစံမှာ အေးစက်စိမ်းသက်နေသည်။ သူ့မျက်လုံးထဲတွင် ထိုးဖောက်နိုင်လောက်အောင် အေးစက်သော အလင်းတန်း တစ်တန်း ရှိနေသည်။ သူ မတ်တပ်ရပ်လိုက်သည့် အခိုက်အတန့်တွင် ကောင်းကင်ယံမှ လေခွင်းသံများ ထွက်ပေါ်လာပြီး ရာပေါင်းများစွာသော ကောင်းကင်ဖြတ်သန်းသူ မျိုးနွယ်စုဝင်များ သူ့ဆီသို့ လျင်မြန်စွာ ရောက်လာကြသည်။

စုမင်ကို မြင်သည်နှင့် သူတို့၏ မျက်လုံးများ ချက်ချင်း တောက်ပသွားသည်။ သူတို့အတွက် စုမင်သည် လမ်းပျောက်နေသော သိုးငယ်လေး တစ်ကောင်နှင့် တူနေပြီး သူ့အသား၏ နူးညံ့မှုက သူတို့အားလုံး တစ်ကိုက် ကိုက်စားပြီးနောက်တွင် အမှတ်ရ လွမ်းဆွတ်နေစေမည့် အရာမျိုး သေချာပေါက် ဖြစ်ပေသည်။

မျက်စိတစ်မှိတ်အတွင်း ကောင်းကင်ဖြတ်သန်းသူ အားလုံး ပါးစပ်များကို ဟလိုက်ကြပြီး ချွန်ထက်သော အညိုရောင်သန်းနေသည့် အဝါရောင် သွားများအား ဖော်ပြလိုက်ကြသည်။ ရှုထောင့် တစ်ခုမှ ကြည့်လျှင် နတ်ဘုရား အနှစ်သာရ ကြယ်ပင်လယ် အတွင်းပိုင်းတွင် နေထိုင်သော သူတို့သည် ကြောက်မက်ဖွယ် သားရဲကြီးများနှင့် ပေါင်းစပ်နေပြီ ဖြစ်ပြီး လူသားများအဖြစ် သတ်မှတ်၍ မရနိုင်တော့ပေ။

မည်သို့ပင်ဆိုစေ သူတို့ ကျောဘက်ရှိ အတောင်ပံများကပင် နတ်ဘုရား အနှစ်သာရ ကြယ်ပင်လယ် အပြင်ဘက်ရှိ ကျင့်ကြံသူများအတွက် ဤကောင်းကင်ဖြတ်သန်းသူများကို လူသားများအဖြစ် အသိအမှတ်ပြုရန် ခက်ခဲစေပြီ ဖြစ်သည်။

သူတို့ စုမင်ဆီသို့ ပြေးဝင်လာသည့် အချိန်မှာပင် မရေမတွက်နိုင်သော သစ်ရွက်များဖြင့် ဖွဲ့စည်းထားသည့် ဧရာမ လက်ဝါးကြီး ရောက်ရှိလာသည်။ ၎င်းသည် မျိုးနွယ်စုဝင်များကို ကျော်တက်ကာ စုမင် အနီးသို့ ရောက်လာပြီးနောက် သူ့ကို ပြင်းထန် ရက်စက်စွာ ဖမ်းဆုပ်လိုက်သည်။

စုမင်သည် ယခင်ကဲ့သို့ပင် တည်ငြိမ်စွာဖြင့် ခေါင်းမော့လိုက်သည်။ သစ်ရွက်များဖြင့် ပြုလုပ်ထားသော ဧရာမ လက်ဝါးကြီး သူ့ဆီသို့ တဟုန်ထိုး ဝင်လာသောအခါ သူ ညာလက်အား မြှောက်လိုက်ပြီး ကျင့်ကြံခြင်း အခြေခံကိုပင် မသုံးဘဲ ရုပ်ပိုင်းဆိုင်ရာ ခွန်အား သက်သက်ဖြင့် ရှေ့သို့ လက်သီးတစ်ချက် ထိုးချလိုက်သည်။

ဘုန်း...

ကျယ်လောင်သော ပေါက်ကွဲသံ တစ်သံ လေထဲတွင် ပဲ့တင်ထပ်သွားပြီး စုမင် နောက်သို့ တစ်လှမ်း ဆုတ်လိုက်သည်။ သူ့ဝတ်ရုံများသည် လေထဲတွင် ပြင်းထန်စွာ လွင့်ဝဲနေပြီး လက်ဝါးကြီးမှာ အပိုင်းပိုင်း ပြိုကွဲသွားကာ ပျောက်ကွယ်မသွားမီ အပိုင်းပိုင်း ကြွေကျသွားသော မရေမတွက်နိုင်သည့် သစ်ရွက်များအဖြစ် ပြောင်းလဲသွားသည်။

ဤမြင်ကွင်းကြောင့် ကောင်းကင်ဖြတ်သန်းသူများ ရုတ်တရက် ရပ်တန့်သွားကြသည်။ သူတို့၏ အတောင်ပံများကို ခတ်ကာ အတူတကွ ပျံတက်သွားကြပြီး ရန်လိုသော အမူအရာများဖြင့် စုမင်အား စိုက်ကြည့်နေကြသည်။

တစ်ချိန်တည်းတွင် အဘိုးအို နှစ်ဦးသည်လည်း ထိုနေရာသို့ ချဉ်းကပ်လာကြသည်။ စုမင်ကို မြင်လိုက်ရသည့် အခိုက်အတန့်တွင် သူတို့၏ သူငယ်အိမ်များ ကျုံ့ဝင်သွားသည်။

'ကမ္ဘာမြေပြင် နယ်ပယ် နှောင်းပိုင်း...' အဘိုးအိုများ အချင်းချင်း အကဲခတ် ကြည့်လိုက်ကြသည်။

"မင်း ဘယ်မျိုးနွယ်စုက လာတာလဲ။ ဘာလို့ ကောင်းကင်ဖြတ်သန်းသူ မျိုးနွယ်စုရဲ့ နယ်မြေထဲကို လာရတာလဲ" အဘိုးအို တစ်ဦးက အေးစက်စွာ မေးလိုက်သည်။ သူ့စကားလုံးများသည် ပါးစပ်မှ ထွက်ကျလာပြီး ကျင့်ကြံသူ အများစု နားလည်နိုင်မည် မဟုတ်သော ဘာသာစကား တစ်ခုဖြင့် ပြောဆိုလိုက်သည်။ သူတို့၏ ဘာသာစကားသည် မာန်မျိုးနွယ်များနှင့် ရှားမန်များ အသုံးပြုသော ဘာသာစကားနှင့် ဆင်တူသော်လည်း ကွာခြားချက်များလည်း ရှိသည်။ စုမင်သည် ၎င်းကို မကျွမ်းကျင်မီ တိကျိုမိုရှားနှင့်အတူ ထိုဘာသာစကားအား အချိန်အတန်ကြာ လေ့လာခဲ့ရသည်။

မည်သို့ပင်ဆိုစေ သူ့၌ မာန်မျိုးနွယ်စု ဘာသာစကား၏ အခြေခံ ရှိပြီး ဤကဲ့သို့သော မျိုးနွယ်စု အဖွဲ့အစည်းများနှင့် သူ စိမ်းသက်မနေပေ။

စုမင် စကားမပြောပေ။ သူ ကိုယ်ပေါ်ရှိ ဖုန်မှုန့်များကို ခါချလိုက်ပြီး နှုတ်ခမ်းထောင့်တွင် ခပ်ဖွဖွ အပြုံးတစ်ခု ပေါ်လာကာ ရှေ့သို့ တစ်လှမ်း တိုးလိုက်သည်။ သူ့ခန္ဓာကိုယ် ဝါးတားတား ဖြစ်သွားပြီးနောက် လုံးဝ ပျောက်ကွယ်သွားသည်။ ပြန်ပေါ်လာချိန်တွင် သူသည် လေထဲသို့ ရောက်နေပြီ ဖြစ်ပြီး ကောင်းကင်ဖြတ်သန်းသူ တစ်ဦး၏ အနောက် တည့်တည့်တွင် ရှိနေသည်။

"သတိထား"

သူ့လူများက သတိပေးလိုက်သည့် အချိန်မှာပင် ကောင်းကင်ဖြတ်သန်းသူ လူငယ်သည် သူ့ခန္ဓာကိုယ်ကို ကွေးလိုက်သော်လည်း လွတ်မြောက်ရန် ရှေ့သို့ ပြေးမထွက်ခဲ့ပေ။ ထိုအစား သူသည် သူ့ခန္ဓာကိုယ်ကို နောက်သို့ ပစ်ချလိုက်ပြီး သူ့အတောင်ပံများသည် နောက်ဘက်ရှိ နေရာသို့ လျင်မြန်စွာ ခုတ်ပိုင်းလိုက်သော ဓားသွားများကဲ့သို့ ထက်မြက်လာသည်။

ဤသည်မှာ ကောင်းကင်ဖြတ်သန်းသူများနှင့် အခြား မျိုးနွယ်စုများ အကြားရှိ ကွာခြားချက်ပင် ဖြစ်သည်။ ဤသည်မှာ တိုက်ပွဲဝင်ရာတွင် ကျွမ်းကျင်သော မျိုးနွယ်စု တစ်စု ဖြစ်သည်။ သူတို့၏ သာမန် မျိုးနွယ်စုဝင် တစ်ဦးပင်လျှင် မယုံနိုင်လောက်အောင် ကြီးမားသော တိုက်ပွဲ အတွေ့အကြုံကို ပိုင်ဆိုင်ထားသည်။ သို့သော် ဤနည်းလမ်းသည် သူတို့၏ ကျင့်ကြံခြင်း အဆင့်များအကြား ကြီးမားသော ကွာဟချက် မရှိချိန်တွင် ထိရောက်မည် ဖြစ်သော်လည်း စုမင်အတွက်မူ ထိုသူ၏ တုံ့ပြန်မှု မည်မျှ မြန်ဆန်ပါစေ သူ့လုပ်ရပ်များသည် အသုံးမဝင်ပေ။

စူးရှသော နာကျင်စွာ အော်ဟစ်သံများနှင့်အတူ ကောင်းကင်မှ သွေးမိုးများ ရွာကျလာသည်။ လူငယ်က သူ့ခန္ဓာကိုယ်အား ဝင်တိုက်ကာ အတောင်ပံများဖြင့် သူ့အရေပြားကို ခုတ်ပိုင်းခြင်းအား စုမင်က ရိုးရှင်းစွာ ခွင့်ပြုပေးလိုက်ပြီးနောက် လူငယ်၏ လည်ပင်းကို ညာလက်ဖြင့် ဖမ်းဆုပ်လိုက်သည်။ သူ ညှစ်လိုက်သည်နှင့် ကျယ်လောင်သော အရိုးကျိုးသံ တစ်သံ ထွက်လာသည်။ လူငယ်၏ လည်ပင်းအား ချေမွလိုက်သောအခါ စုမင်က သူ့စွမ်းအားကို ထိုသူ၏ ခန္ဓာကိုယ်ထဲသို့ တိုက်ရိုက် ပို့လွှတ်ကာ မူလဝိညာဉ်ကိုပါ ချေမှုန်းပစ်လိုက်သည်။

သူ ဆုပ်ထားသော လက်ကို လွှတ်လိုက်သောအခါ ပတ်ဝန်းကျင် အရပ်ရပ်မှ ဒေါသတကြီး ဟိန်းဟောက်သံများ ထွက်ပေါ်လာသည်။ ရာပေါင်းများစွာသော ကောင်းကင်ဖြတ်သန်းသူများ သူ့ဆီသို့ ချက်ချင်း ပြေးဝင်လာကြသည်။

"မင်း သေချင်နေတာပဲ"

ကမ္ဘာမြေပြင် နယ်ပယ် နှောင်းပိုင်းမှ ကောင်းကင်ဖြတ်သန်းသူ အဘိုးအို နှစ်ဦး၏ မျက်လုံးများတွင် သတ်ဖြတ်လိုသော ရည်ရွယ်ချက်များ တောက်ပနေပြီး ဤလူနှစ်ဦးသည် အုပ်စုထဲတွင် အမြန်ဆုံး ဖြစ်ကြသည်။ သူတို့ထဲမှ တစ်ဦးက စုမင်ဘေးသို့ ချက်ချင်း ရောက်လာသည်။ သူ ညာလက်ကို မြှောက်လိုက်သည်နှင့် ၎င်းသည် ခြောက်သွေ့နေသော သစ်သားတုံး တစ်တုံးအဖြစ် ချက်ချင်း ပြောင်းလဲသွားသည်။ ၎င်းမှ သစ်ကိုင်းများ ထွက်လာပြီး ပျံ့နှံ့သွားသောအခါ အဘိုးအို၏ လက်မောင်းသည် ပစ်မှတ်ဆီသို့ တဟုန်ထိုး ဝင်ရောက်လာသော သစ်ပင် တစ်ပင်အဖြစ် ပြောင်းလဲသွားသကဲ့သို့ ဖြစ်နေသည်။

စုမင်၏ အမူအရာက တည်ငြိမ်နေဆဲ ဖြစ်သည်။ ထိုအခိုက်အတန့်တွင် သူ၏ ကျင့်ကြံခြင်း အခြေခံ ကိုယ်ပွားနှင့် ပုံရိပ်ဝါးမျိုခြင်း ပညာရပ် ကျင့်ကြံသော ကိုယ်ပွားတို့ ပေါင်းစပ်သွားပြီး ကမ္ဘာမြေပြင် နယ်ပယ် မဟာပြည့်စုံခြင်းသို့ ရောက်ရှိထားသူများ၏ တိုက်ခိုက်ရေး စွမ်းအားများဖြင့် ပြည့်နှက်သွားသည်။ သူ လှည့်လိုက်သောအခါ ညာလက်ကို မြှောက်ကာ လက်ဟန် တစ်ခု ဖန်တီးလိုက်ပြီး အဘိုးအို၏ ဝင်ရောက်လာသော သစ်ကိုင်းလက်မောင်းဆီသို့ လက်ညှိုးထိုးလိုက်သည်။

ယင်းနှင့်အတူ အဘိုးအို၏ ခန္ဓာကိုယ်ကို တုန်လှုပ်မှု တစ်ခုက ဖျက်ဆီးပစ်လိုက်သည်။

"ငါ ကျိန်စာတိုက်တယ်။ ကောင်းကင်ဖြတ်သန်းသူ ဆယ်ယောက်မှာ သုံးယောက် သေစေရမယ်" စုမင်က ခံစားချက်ကင်းမဲ့စွာ ကြေညာလိုက်သည်။ ဤသည်မှာ သူ မာန်မျိုးနွယ်စုများ၏ မြေကမ္ဘာတွင် ရှိစဉ်က ကျွမ်းကျင်ခဲ့သော ကျိန်စာ ဖြစ်သည်။ ဤပညာရပ်သည် အလွန် ရက်စက်ကြမ်းကြုတ်သောကြောင့် စုမင်သည် ၎င်းကို ရံဖန်ရံခါမှသာ အသုံးပြုလေ့ ရှိသည်။ ယခု သူ၏ ကျင့်ကြံခြင်း အဆင့် တိုးတက်လာပြီ ဖြစ်သောကြောင့် သူ အသုံးပြုလိုက်သည့် ကျိန်စာ၏ စွမ်းအားသည် ယခင်ကထက် များစွာ ပိုမို အားကောင်းလာသည်။

စုမင် စကားပြောပြီးသည်နှင့် သူ့လက်ချောင်းက မည်းနက်သွားသည်။ အမည်းရောင် မီးခိုးများ ချက်ချင်း ထွက်လာပြီး ပုပ်သိုးဆွေးမြည့်နေသော အနံ့ဆိုးကြီးနှင့်အတူ အဘိုးအို၏ သစ်ကိုင်းလက်မောင်းကို ဝင်တိုက်လိုက်သည်။ အမည်းရောင်သည် လျင်မြန်စွာ ပျံ့နှံ့သွားပြီး အဘိုးအို၏ အမူအရာ ပြင်းထန်စွာ ပြောင်းလဲသွားချိန်တွင် ထိုအရောင်က သူ့ခန္ဓာကိုယ် တစ်ဝက်အထိ ပျံ့နှံ့သွားခဲ့သည်။

စုမင်သည် အဘိုးအိုကို ဆက်လက် ဂရုမစိုက်တော့ပေ။ လှုပ်ရှားမှု တစ်ခုနှင့်အတူ သူသည် ဝင်ရောက်လာသော ကောင်းကင်ဖြတ်သန်းသူများဆီသို့ တဟုန်ထိုး ပြေးဝင်သွားသည်။

အချိန်တိုအတွင်း သတ်ဖြတ်မှုနှင့် သွေးလွှမ်းမှုတို့က ကောင်းကင်ယံတွင် ပြည့်နှက်သွားသည်။ စူးရှသော နာကျင်စွာ အော်ဟစ်သံများ ဆက်တိုက် ထွက်ပေါ်နေသော်လည်း စုမင်မှာမူ မည်သည့် ခံစားချက်မျှ မရှိသည့်အလား အေးစက်စိမ်းသက်နေသည်။ သူနှင့် ကောင်းကင်ဖြတ်သန်းသူများ၏ ကျင့်ကြံခြင်း အဆင့် ကွာဟချက်က အလွန် ကြီးမားလွန်းသောကြောင့် အားနည်းသူများကို ဖိနှိပ်ရသည့်အပေါ် သူ အမှန်တကယ်ပင် မည်သို့မျှ မခံစားရပေ။

အမှန်တကယ်တွင် သူတို့သည် ဤလူ ရာပေါင်းများစွာထဲတွင် ပါဝင်နေသရွေ့ အမျိုးသမီး ကောင်းကင်ဖြတ်သန်းသူများပင်လျှင် အမျိုးသားများနှင့် တူညီသော ပုံစံဖြင့် ဆက်ဆံခံရပြီး စုမင်၏ သတ်ဖြတ်ခြင်းကို ခံခဲ့ရသည်။

မျက်စိတစ်မှိတ်အတွင်း ကောင်းကင်ဖြတ်သန်းသူများ ဆယ်ဂဏန်းခန့် စုမင် လက်ထဲတွင် သေဆုံးသွားခဲ့သည်။ ထိုနေရာရှိ လူများ၏ အမူအရာများ ပြောင်းလဲသွားပြီး တစ်ချိန်တည်းမှာပင် နောက်ဆုတ်သွားကြသည်။ ကမ္ဘာမြေပြင် နယ်ပယ် မဟာပြည့်စုံခြင်းသို့ ရောက်ရှိထားသော အခြား အဘိုးအို တစ်ဦးသာလျှင် ဒေါသတကြီး ဟိန်းဟောက်ကာ စုမင်ဆီသို့ ပြေးဝင်လာသည်။

သူက လေထဲတွင် တစ်လှမ်း လှမ်းလိုက်ရာ သူ့ကို တုန်လှုပ် ဟိန်းဟောက်သွားစေသည်။ သူ ဒုတိယ ခြေလှမ်းကို လှမ်းလိုက်သောအခါ သူ့ခြေထောက်များသည် သစ်ပင်များအဖြစ် ပြောင်းလဲသွားပြီး တတိယ ခြေလှမ်းအား လှမ်းလိုက်သောအခါ ညာလက်ကို မြှောက်ကာ ကောင်းကင်ဘက်သို့ ဦးတည်၍ လေထုအား ဆုပ်ကိုင်လိုက်သည်။ စိမ်းနက်ရောင် ကြာပွတ် တစ်ချောင်း သူ့လက်ထဲတွင် ထင်ရှားလာသည်။ သူ့လက်ကောက်ဝတ်ကို တစ်ချက် ရမ်းလိုက်သည်နှင့် ရိုက်ခတ်သံများက ကောင်းကင်နှင့် မြေကြီးကို တုန်လှုပ်သွားစေသည်။

စတုတ္ထမြောက် ခြေလှမ်းတွင် သူ့ခန္ဓာကိုယ်သည် အလင်းတန်းရှည် တစ်တန်းအဖြစ် ပြောင်းလဲသွားကာ စုမင်ဆီသို့ ဖိဆင်းလာသည်။ ထိုအချိန်တွင် ကမ္ဘာမြေပြင် နယ်ပယ် မဟာပြည့်စုံခြင်းသို့ ရောက်ရှိထားသူများ၏ စွမ်းအားသည် သူ့ခန္ဓာကိုယ်မှ ပေါက်ကွဲထွက်ပေါ်လာသည်။ ထိုအရှိန်အဝါ ပျံ့နှံ့သွားသည်နှင့် တစ်ပြိုင်နက် ကျင့်ကြံခြင်းဂြိုဟ် တစ်လုံးလုံးက သူ့အပေါ် ချစ်ခင်နေသည့်အလား ဖြစ်သွားသည်။ သစ်ပင်များ အားလုံးသည် သူရှိရာဘက်သို့ ယိမ်းနွဲ့လာပြီး အဝေးရှိ ပင်လယ်ကြီးက ဟိန်းဟောက်လာသည်။ လှိုင်းတံပိုးများ ကောင်းကင်သို့ ထိုးတက်သွားရာ သူတို့က ထိုအဘိုးအိုထံသို့ သူတို့၏ စွမ်းအားများကို ပေးပို့နေသကဲ့သို့ ထင်ရသည်။

ဤဝင်ရောက်လာသော အဘိုးအိုသည် ကျင့်ကြံခြင်းဂြိုဟ် တစ်လုံးလုံးကို လွှမ်းမိုးနိုင်စွမ်း ရှိနေသကဲ့သို့ သူ၏ သွေးစီးဆင်းမှုသည် ပင်လယ်တွင်းမှ ဆူပွက်နေသော လှိုင်းတံပိုးများ ဖြစ်နေသကဲ့သို့ သူ့ခြေလှမ်းများ ကျရောက်မှုသည် မြေပြင်ပေါ်ရှိ သစ်ပင်များ၏ ရှင်သန်နိုင်စွမ်းအား ဆုပ်ကိုင်ထားသကဲ့သို့ ထို့ပြင် သူ့နှလုံးခုန်သံသည် ဤကျင့်ကြံခြင်းဂြိုဟ်၏ လည်ပတ်မှု အစိတ်အပိုင်း တစ်ခု ဖြစ်နေသကဲ့သို့ စုမင် ခံစားလိုက်ရသည်။

"စိတ်ဝင်စားစရာပဲ..." စုမင် ခပ်ဖွဖွ ပြုံးလိုက်သည်။ အဘိုးအို သူ့အနီးသို့ ကပ်လာပြီး ကြာပွတ်ဖြင့် ရိုက်ချလိုက်သည့် အခိုက်အတန့်တွင် စုမင်၏ မျက်လုံးများထဲ၌ နတ်ဘုရား အနှစ်သာရ မှော်သင်္ကေတများ ပေါ်လာသည်။

နတ်ဘုရား အနှစ်သာရ ပေါ်လာသည်နှင့် တစ်ပြိုင်နက် စုမင်၏ စွမ်းအားများသည် ပေါက်ကွဲသံ တစ်သံနှင့်အတူ ပေါက်ကွဲထွက်လာပြီး ကမ္ဘာမြေပြင် နယ်ပယ် မဟာပြည့်စုံခြင်းမှ လကပ်ဘေးအဆင့်သို့ တိုက်ရိုက် တက်သွားသည်။ လ၏ အရိပ်သည် သူ့နောက်ကျောတွင် မပေါ်လာသော်လည်း သူ၏ လက်ရှိ တိုက်ခိုက်ရေး စွမ်းအားသည် လကပ်ဘေးအဆင့် စွမ်းအားပင် ဖြစ်သည်။

သူ့ဆီသို့ တဟုန်ထိုး ပြေးဝင်လာသော အဘိုးအို၏ မျက်နှာချင်းဆိုင်တွင် စုမင် ခေါင်းငုံ့ကာ ညာလက်ကို မြှောက်လိုက်ပြီး ရှေ့သို့ လက်သီးတစ်ချက် ပစ်သွင်းလိုက်သည်။

သူ့လက်သီးက လေထဲသို့ ကျရောက်သွားသည်။ ၎င်းနှင့်အတူ ထွက်ပေါ်လာသော ပေါက်ကွဲသံကြီးက ကောင်းကင်ယံကို တုန်လှုပ်သွားစေပြီး စုမင် ရှေ့ရှိ လေထုသည် ချက်ချင်း အပိုင်းပိုင်း ပြိုကွဲသွားသည်။ ၎င်းသည် နောက်သို့ လိမ့်ဆင်းသွားကာ လေဆင်နှာမောင်း တစ်ခုအဖြစ် ပြောင်းလဲသွားသည်။ မျက်စိတစ်မှိတ်အတွင်း ၎င်းသည် ဂြိုဟ်၏ ချစ်ခြင်းမေတ္တာများ စုစည်းထားသည့်အလား ဖြစ်နေသော အဘိုးအိုကို ဝင်တိုက်ကာ သူ့ကို ဝိုင်းရံသွားသည်။

မြေပြင် တုန်ခါသွားပြီး သစ်ပင်များ အားလုံး တစ်ပြိုင်နက် လှုပ်ရှားမှု ရပ်တန့်သွားသည်။ ပင်လယ်၏ ဟိန်းဟောက်သံများလည်း တိတ်ဆိတ်သွားသကဲ့သို့ ဖြစ်သွားသည်။ ထိုနေရာရှိ ကောင်းကင်ဖြတ်သန်းသူ မျိုးနွယ်စုဝင်တိုင်းသည် လေဆင်နှာမောင်းထဲမှ သွေးများ လွင့်စဉ်ထွက်လာသည်ကို မှင်သက်စွာ ကြည့်နေကြပြီး လေထဲတွင် ဆက်တိုက် ထွက်ပေါ်နေသော စူးရှသည့် နာကျင်ကြေကွဲဖွယ် အော်ဟစ်သံများအား သူတို့ နားထဲ၌ ကြားနေရသည်။

သိပ်မဝေးသော နေရာတွင် ယခုအခါ ခန္ဓာကိုယ် တစ်ကိုယ်လုံး မည်းနက်ပြီး ပုပ်သိုးဆွေးမြည့်နေပြီ ဖြစ်သော ကျိန်စာတိုက်ခံရသည့် အဘိုးအို ရှိနေသည်။ သူ့မျက်နှာပေါ်တွင် ဒေါသများ ရှိနေပြီး သူက ဟိန်းဟောက်သံဖြင့် မေးလိုက်သည်။ "မင်း ဘယ်သူလဲ"

စုမင် ညာလက်ကို ပြန်ဆွဲယူကာ ခေါင်းမော့လိုက်သည်။ "ထျန်းရှဲ့ကျီရဲ့ လေးယောက်မြောက် တပည့် စုမင်ပဲ။ အရင်တုန်းက ငါ့ဆရာ့ကို လိုက်ပြီး သတ်ဖြတ်ခဲ့တဲ့အတွက် မင်းတို့ကို ပြန်ပေးဆပ်ခိုင်းဖို့ ကောင်းကင်ဖြတ်သန်းသူ မျိုးနွယ်စုဆီကနေ ဝိညာဉ်ပေါင်း သုံးသောင်းကို လာယူတာပဲ" သူက ခံစားချက်ကင်းမဲ့စွာ ပြောလိုက်သည်။